མཚོ་སྔོན་པོ་བོད་ཡིག་ཟིན་བྲིས། བོད ཟིན མཚོ་སྔོན་པོ ཟིན་རྩོམ། | པར་རིས། | མཁན་པོ། | ཁྱུ་མཆོག | ཟིན་ཚོམས།
ཐོ་འགོད། | ནང་འཇུག ཉར་ཚགས་བྱེད་པ།
分享按钮
ཚེ་རིང་འཚོ།

ཟིན་བདག་བརྡ་ཁྱབ།

ང་རང་བོད་པའི་བུ་མོ་ཞིག་ཡིན་པའི་ངོས་ནས་

ཕ་སྐད་དག་མོ་ཞིག་ཤོད་ཐུབ་པ་བྱ་རྒྱུ་ནི་སྙན་

ངག་འབྲི་བ་ལས་ཀྱང་རྩ་ཆེ་བར་བསྒོམས་ཡོད།

ZZXXCRC@163.COM

ཟིན་ཐོ་གསར་བ།
པར་དེབ།
དཔྱད་བརྗོད་གསར་བ།
ལན་སློག་གསར་བ།
ངའི་གྲོགས་པོ།
ཟིན་བྲིས་ཆ་འཕྲིན།
དབྱར་སྟོན་བར་གྱི་སེམས་འགྱུ།
2013-9-24 8:50:12

དབྱར་སྟོན་བར་གྱི་སེམས་འགྱུ།

 

སྤྲིན་པ་ལྷོ་བཞུད་ཞིག་གི་ཤུལ་ལམ་ཡངས་པོ།།

སྔོ་བསངས་གཡུ་མདོག་དགུང་གི་བཞིན་རེས་དྭངས་མ།།

རེ་འཐིབ་རེ་ཚའི་མི་རྟག་རེག་བྱ་རྩུབ་མོས།།

འབྱུང་གཞི་འཁྲུག་པའི་དཔལ་འབར་མཁའ་ལ་ཞར་འདྲ།།

 

 

ལྕང་ལོ་སྔོན་མོའི་སྣེ་ལ་སེར་མདོག་བྱུགས་སོང་།།

རླུང་བུ་འཇམ་པའི་ངོགས་ལ་བཙག་ཤེད་ཐོན་སོང་།།

སེར་མ་རླུང་གི་རང་གཤིས་བུ་ཡུག་འདྲ་བོས།།

དབྱར་ཟླ་ཁ་ལས་ཅན་ལ་དྲི་རྟགས་རྒྱབ་སོང་།།

 

 

ནམ་ཟླ་བསིལ་མོའི་ངོགས་ན་དྲོད་ཅིག་མཆིས་རུང་།།

དྲོད་ལ་ཀླད་ཆེན་བསྲེགས་པའི་གདུག་རྩུབ་མངོན་འདུག།

དབྱར་སྟོན་དུས་ཀྱི་བར་ན་འགྲེལ་རྒྱག་དཀའ་བའི།།

སྤྱི་འགྲོས་རྙོག་འཛིང་ཞིག་གི་སྡོམ་ཚིག་གྲུབ་འདུག།།

 

 

ཀླད་ཆེན་གཞོམ་ལ་ཉེ་བའི་དྲོས་ཀྱི་ཚ་བ།།

ཤ་འོད་འཇིགས་སྐུལ་མོད་པའི་དགོང་ཁའི་ཆར་ཤ། །

ཉིན་གཅིག་འགྱུར་ལྡོག་མོད་པའི་དེང་གི་ནམ་ཟླར།།

བློ་རྩེ་གཏོད་པའི་ཡིད་ཆེས་བཅོལ་ཐབས་དབེན་འདུག།།

 

དྭངས་འཐིབ་འདྲེས་མའི་དུས་ཀྱི་ལྐོག་གྱུར་འདི་གོ།

ཚན་རྩལ་ཆ་འཕྲིན་བུ་ལོས་རྟོགས་པར་དཀའ་འདུག།།

ནམ་ཟླ་འཇམ་པོ་ཞིག་གི་འོད་ཐིག་དཀར་པོ།།

ས་ཆེན་ཨ་མའི་ལུས་ལ་ཅི་འདྲའི་མཁོ་ཨང་།།

            ༢༠༡༣ལོའི་ཟླ༩བའི་ཚེས༢ཉིན།

yangla | རྩོམ་ཡོངས་ཀློག་པ།(945) | ལན་སློག(6)
ཁྱོད
2013-9-10 10:51:42
ཁྱོད 
  ༼  དགེ་རྒན་གྱི་དུས་ཆེན་ལ་ཕུལ་བ། ༽

ཡོད་ཚད་ལ་ཚེ་སྲོག་སྤྱིན་པའི་མ་ཡུམ

མུན་ནག་གི་ཡོལ་བ་ཕྱེ་བའི་འཛུམ་ཟེར

ངས་ཁྱོད་ཀྱི་དཔེ་རུ་འཇོག

དྲི་མེད་དྭངས་གཙང་གི་ལྷག་བསམ་དཀར་པོར

དར་དཀར་ཡུག་ཅིག་གི་ལེགས་སྐྱེས་འབུལ

ལྷད་མེད་སྤྱོད་བཟང་གི་གཤིས་རྒྱུད་དྲང་མོར

སེམས་ཀྱི་ཟབ་ས་ནས་བསྟོད་བསྔགས་བྱེད

སློབ་བུ་ཁྲི་ཕྲག་གི་བློ་སྒོ་ཕྱེ་དུས

ཁྱོད་ནི་ཤེས་རིག་གི་བང་མཛོད་ཆུང་ཆུང་ཞིག

སྤྱོད་པ་རྣམ་དག་གི་སློབ་གསོ་གཏོང་དུས

ཁྱོད་ནི་བྱམས་བརྩེ་ཡིས་ཕྱུགས་པའི་ཕ་མ་ཞིག

ཞོགས་པའི་སྐྱ་རེངས་ཀྱི་མགྲོན་པོ་ཐོག་མ་བསུ་མཁན་དེ་ཁྱོད་ཡིན

མཚན་མོའི་དགུ་ཚུགས་ལ་སྐྱེལ་མ་ཐོག་མར་བྱེད་མཁན་དེ་ཁྱོད་ཡིན

 ཁྱོད་དུས་རབས་ཤིག་གི་དཀྱོག་འཚམས་ནས་ལངས་ཏེ

ཆེས་དྲང་བདེན་ལ་ཆས་པའི་ཆུ་སྣ་དང་པོ་ཡིན

ཁྱོད་མི་བུ་ཞིག་གི་སེམས་རྩ་རུ་ཡོད་པའི་འོད་ཀྱི་ཐིག་ལེ་ཡིན

ཤེས་བྱའི་ཞིང་ས་རུ་ས་བོན་གཏོར་མཁན་དེ་ཁྱོད་ཡིན

རེ་བའི་ཟབ་ས་ནས་འབྲས་བཟང་སྦྱིན་མཁན་དེ་ཁྱོད་ཡིན

ཁྱོད་ལ་ཚེགས་མི་དལ་མའི་འོས་འགན་ལྕི་མོ་ཞིག

ཁྱོད་ལ་ངོམས་ཆོག་ཆོག་གི་བྱ་བཞག་རླབས་ཆེན་ཞིག

དེ་བས ཁྱོད་ནི་སྙན་ངག་གི་བརྗོད་བྱ་དྭངས་མ་ཞིག

སེམས་ཁོང་གི་གླུ་གཞས་སྙན་མོ་ཞིག

 


yangla | རྩོམ་ཡོངས་ཀློག་པ།(1976) | ལན་སློག(25)
རླུང་བུ་གཡུག་ཕྱོགས།
2013-8-1 16:06:06
རླུང་བུ་གཡུག་ཕྱོགས། ནམ་མཁའི་སྤྲིན་པ་དཀར་པོ།། རླུང་བུའི་རྒྱུ་ཕྱོགས་ཤིག་གིས།། ནུབ་རིའི་རྩེ་མོ་དེ་རུ།། ལང་ལོང་འཕྱུར་འདི་མཚར་ཨང་།། རི་ཁའི་དར་ལྕོག་ཆུང་ཆུང་།། བསིལ་རླུང་འཇམ་པོའི་འོ་ཡིས།། དར་ཐག་རིང་བོའི་འོག་ནས།། ལྷབ་ལྷུབ་གར་ལ་རོལ་འདྲ།། རི་རྐེད་སྨུག་པ་སྲབ་མོ།། རི་རྩེའི་ཟམ་དུ་གྲུབ་དུས།། ཤིག་ཤིག་རླུང་བུས་རེག་ཚེ།། གང་དུ་བཞུད་སོང་མ་ཤེས།། སྟོན་གྱི་ལོ་ལེགས་སྙེ་མ།། རླུང་བུའི་ཕུ་སྒྲ་ཞིག་གིས།། ཕར་ཚུར་གཡོ་བའི་རྣམ་པ།། ཞིང་ཐང་རླབས་ཀྱིས་བཅགས་འདྲ།། འབྱུང་བཞི་རླུང་གི་གཤིས་ཀས།། སུ་ལ་རེག་ན་འཁུར་ཡང་།། བརྟན་མོའི་རང་གཤིས་ཅན་དག། བཙན་པོའི་ཤུགས་ཀྱི་མི་འཁྲིད།། ༢༠༡༣ལོའི་ཟླ༧པའི་ཚེས༢༨ཉིན་ཐོལ་གྱིས་སྦྱར།
yangla | རྩོམ་ཡོངས་ཀློག་པ།(605) | ལན་སློག(5)
རྣམ་ཤེས་ལ་ཕོག་པའི་གྲིབ་མ།
2013-7-28 20:57:42

རྣམ་ཤེས་ལ་ཕོག་པའི་གྲིབ་མ།

 

དུས་ཀྱིས་བཟུང་བའི་ཉིན་སྲིབ་འཚམས་ནས།།

རླུང་གིས་དད་པའི་སྡོང་ལོ་སེར་པོ།།

ནམ་ཟླ་ཞིག་གི་འགྱུར་ལྡོག་མིན་ན།།

ས་ལ་འཐོར་བའི་ཟློས་གར་མཚར་ཨང་།།

 

སྤྲིན་དང་ཆར་བའི་བཞུད་ཤུལ་དེ་རུ།།

ཉི་འོད་འཇམ་པོ་ལྷོད་ཀྱིས་ཆགས་ཀྱང་།།

འཇའ་འོད་མཛེས་བའི་སྣེ་མོ་གཉིས་ལ།།

བདག་པོ་རྒྱག་པའི་མེ་ཏོག་འཐོར་སོང་།།

 

སེམས་རྩའི་ཁྲག་རྒྱུན་འཁོར་སྐྱོད་ངོགས་ན།།

གྱེས་བྲལ་སྐྱོ་བའི་དུ་སྨུག་འཐིབས་འདུག།

སྐྲ་ལོ་འཇམ་པོའི་ལེན་བུའི་བར་གྱི།།

མཛུམ་མདངས་དྭངས་མའི་བཞིན་རས་ཡལ་སོང་།།

 

ལུས་ཀྱི་ལྷུ་ཚུགས་འགུལ་བའི་བར་ན།།

 རྨ་ཁ་གསར་བའི་ན་ཟུག་ལྕི་ཨང་།།

དབུགས་ཀྱི་འབྱིན་རྔུབ་གློ་སྒྱུའི་སྲིབས་ན།།

བརྩེ་བ་ལྕི་མོའི་ཤུགས་རིང་འཆོར་འགྲོ།།

 

ལུས་ལ་ཕོག་པའི་གྲིབ་མ་གཟན་པོ།།

སྙིང་ཁ་གཤགས་པའི་རལ་གྲི་ཡིན་འདུག།

སེམས་ཀྱི་རྨུ་ཐག་རྒྱང་དུ་བསྲིངས་ནས།།

མིག་གིས་འཚོ་བའི་མདུན་མ་བཅོལ་ཡོད།།

 

རྣམ་ཤེས་རྒོད་པོ་མཐུར་མེད་ཡིན་པས།།

གང་གི་ལུས་ལ་འཐིམ་འགྲོ་དཔག་དཀའ།།

དཀོན་མཆོག་ཞིག་གི་སྐྱབས་གནས་བར་ནས།།

རེ་བ་ཟད་པོར་མདོག་ཅིག་སྦྱིན་རོགས།།

yangla | རྩོམ་ཡོངས་ཀློག་པ།(1142) | ལན་སློག(11)
ཟང་ཟིང་གི་ཁུག་ཏུ་མཆོངས་བའི་སྨྱུ་གུ
2013-7-10 19:52:14

ཟང་ཟིང་གི་ཁུག་ཏུ་མཆོངས་བའི་སྨྱུ་གུ

 

གང་དྲན་སེམས་ཀྱི་རི་མོའི་ངོས་སུ།།

བྲིས་པའི་འཇའ་རིས་འོད་དུ་འཚེར་ཡང་།།

ཕྱི་ནང་གཉིས་ཀའི་ཧྲག་བར་འདི་ནས།།

མི་ཚེའི་རིན་ཐང་ལྷིང་ལ་བུད་འགྲོ།

 

སེམས་ཀྱི་མཁའ་དབྱིངས་སྟོང་བ་མིན་ན།།

དྲན་ཤེས་རྒོད་པོ་མཐུར་མེད་མིན་ན།།

མདུན་གྱི་བྱ་བྱེད་རུལ་བོ་དེ་དག།།

རྒྱན་དུ་བཟུང་བའི་རྟུལ་ཞུགས་མཚར་ཨང་།།

 

ཝུ་ཆང་བཟི་ཁའི་འཆལ་གཏམ་འོག་ནས།།

རིག་ཞེན་བུ་ལོའི་འཚོ་རྟེན་ངོགས་ནས།།

ཡང་མོ་རླུང་གིས་འཁུར་ལ་རན་པའི།།

སྤྱོད་སྟངས་སྡུག་པོ་འགྱིང་འདི་མཚར་ཨང་།།

 

སྨྲ་ལྕེ་རྒོད་པོའི་གས་སྲུབས་མཚམས་ནས།།

ཤ་ཚའི་མདོག་བཟང་མངོན་ཁུལ་བྱེད་ཀྱང་།།

རང་དོན་འཕྲད་དུས་ངོ་ཚ་བྲལ་བའི།།

སྒྱུ་མ་མཁན་གྱི་འཁྲབ་སྟངས་མཚར་ཨང་།།

 

དེང་རབས་མི་ཡི་རྗེས་སུ་བརྩོན་ན།།

རང་གཤིས་རྣལ་མ་ཟུར་ཏུ་འཇོག་དགོས།།

རལ་གྲི་སོ་གཉིས་ངང་ཚུལ་འདི་ལས།།

དུས་གསར་མི་བུའི་སྤྱོད་སྟངས་བརླག་སོང་།།

yangla | རྩོམ་ཡོངས་ཀློག་པ།(601) | ལན་སློག(8)
ཁྱེད་ལ་བཟོས་པའི་རྨ་ཁ།
2013-7-5 10:07:24

 ཁྱེད་ལ་བཟོས་པའི་རྨ་ཁ།

 

ཤིང་དུམ་སོག་ལེས་གཞོག་འདྲ་བོ།།

ཤ་འཁེངས་གྲི་ཡིས་གཏུབ་འདྲ་བོ།།

ཁ་སྒང་བདེ་མོའི་ལུས་སྟེང་འདིར།།

ས་བརྐོ་ལག་རིང་བཙན་པ་ལ།།

 

བེའུ་ཆུང་ལུ་གུའི་རྩེདམར་དང་།།

བྱིས་དུས་རྩེད་རྡོ་བསྒྲིགས་དེ།།

དུས་རབས་གསར་བའི་འཛུགས་བསྐྲུན་ཁྲོད།།

གཡས་ནས་བརྐོས་ཤིང་གཡོན་ནས་བླངས།།

 

ཁ་བདེ་ཅན་གྱི་གཡོ་ལ་ཚུད།།

ཧམ་སེམས་ཅན་པོས་ལྐོག་ཏུ་བཅུག།

གཡང་སྡེ་བཀྲ་ཤིས་སྣ་མགོ་ལ།།

མི་འདོད་གད་པའི་རང་གཟུགས་མངོན།།

 

ཆུ་རྐའི་དགོས་མཚན་གླེང་དང་ལྷན།།

དྭངས་གཙང་ཀླུ་ཆུའི་འགྲམ་ངོགས་སུ།།

བྱེ་མའི་རི་བོ་དགུང་དུ་བརྩེགས།།

ཆུ་རྒྱུན་འདམ་ལ་དྭངས་དུས་མེད།།

 

ད་ལོ་བཟོས་བའི་ཆུ་རྐ་སྟེ།།

སང་ལོ་ཞིག་པའི་གཤིས་ཞིག་གྲུབ།།

ཆུ་རྐའི་བཟང་ངན་དཔྱོད་དཀའ་ཡང་།།

བྱེ་རྡོའི་རིན་ལ་རྔམ་མཁན་མང་།།

yangla | རྩོམ་ཡོངས་ཀློག་པ།(504) | ལན་སློག(4)
རྨི་ལམ་སྐྱོ་བོ།
2013-7-2 8:50:47

          རྨི་ལམ་སྐྱོ་བོ།

 

ཉག་ཁའི་རི་ལམ་ཕྲ་མོ་སེམས་ཀྱི་འཚོ་བཞིན།།

ཐང་ཆེན་གཞུང་ལམ་ཡངས་མོ་འཕྲུལ་གྱིས་བསྐྱོད་སྐབས།།

དམིགས་དོན་མྱུར་འགྲུབ་རེ་བའི་འདུན་པ་ཚ་བོས།།

ནང་སེམས་བདེ་ལ་བཀོད་པའི་དུས་ཤིག་མ་བྱིན།།

 

ཤར་རིའི་རྩེ་ནས་འཕག་པའི་བཅོ་ལྔའི་དུང་ཟླ།།

ནམ་ལངས་སྐར་ཆེན་བུ་ལོས་བཙོན་དུ་བཅུག་སོང་།།

སེམས་པ་སྟོང་གིས་རེ་བའི་ཉི་ཟེར་གཞོན་ནུ།།

མཚམས་སྤྲིན་དམར་སེར་ངོགས་ནས་ཡུན་གྱིས་ཕེབས་ཤོག།

 

ལོ་ཟླའི་འཁོར་བསྐྱོད་བར་ནས་ཕྱིར་མིག་བལྟས་དུས།།

བཞག་པའི་རྐང་རྗེས་ཀྱ་མ་ཀྱོོག་གི་ངང་ཚུལ།།

གཟུགས་འཛིན་དབང་བོའི་ཡུལ་དུ་མཐོང་ཙམ་བྱས་ཚེ།།

མཛད་མེད་འདས་བའི་ལོ་ཟླར་འཁང་ར་ཤོར་སོང་།།

 

རི་ལ་ཤོར་བའི་རི་བོང་རྔོན་པས་བཟུང་སོང་།།

དགུང་ལ་འཕུར་བའི་བྱེའུ་ཆུང་གཟེབ་ཏུ་བཅུག་སོང་།།

རང་རང་འཚོ་བའི་གནས་ས་ཁ་ཁ་ཡིན་རུང་།།

རང་དབང་འཕྲོག་པའི་མི་བུའི་གདུག་རྩུབ་སྐྱོའང་།།

 

 

 

 

yangla | རྩོམ་ཡོངས་ཀློག་པ།(497) | ལན་སློག(5)
ཧམ་པའི་མདོག
2013-5-17 10:31:10
ཧམ་པའི་མདོག མིག་གི་ཡུལ་དུ་མི་མངོན་ཞིང་།། སེམས་རྩའི་བར་ན་སད་འདུག་པའི།། རྣམ་ཤེས་གསོན་པོའི་ལག་འཇུ་སྟེ།། ཚོར་བ་རྣོན་པོའི་རླབས་ཕྲེང་ཡིན།། དམིགས་པའི་བསྒོམ་པ་མཐའ་རུ་བསྐྲད།། ཧམ་པའི་ཞགས་ཐག་སྣེ་ལ་འཁྱུད།། གར་འགྲོ་རང་དབང་ཧམ་པར་སྤྲད།། སྒྱུ་མའི་གྲོང་གི་གཟུགས་འདུས་མཚར།། སུ་དང་གང་ལ་མི་དབང་ཞིང་།། སུ་ཡིས་སྤྱོད་ན་མི་ཆོག་པའི།། རང་ཉིད་གཅིག་པུས་སྤྱོད་འདོད་པ།། ཧམ་སེམས་ཁྲམ་མའི་ཟློས་གར་ཡིན།། ལོངས་སྤྱོད་དཔལ་དང་ལྡན་པ་ཡིས།། འཇིག་རྟེན་མི་ལུས་རིན་ཐང་སོམས།། ཧ་ཅང་མང་པོ་རྙེད་འདོད་པ།། ཧམ་སེམས་ཁྲམ་མའི་ཀུ་ཅོ་ཡིན།། འདོད་ཆུང་ཆོག་ཤེས་ནོར་ལ་དགོས།། གང་བདེ་གང་སྐྱིད་སེམས་ལ་དགོས།། སེམས་པ་སྐྱིད་པའི་གོང་རོལ་ན།། ཧམ་པའི་གཡབ་མོ་འགུལ་ཐབས་དབེན།། ༢༠༡༣ལོའི་ཟླ༥བའི་ཚེས༡༧ཉིན།
yangla | རྩོམ་ཡོངས་ཀློག་པ།(505) | ལན་སློག(7)
གྲིབ་མ།
2013-5-6 8:08:21
གྲིབ་མ། མིག་གི་མཐོང་བྱར་གྱུར་ན་ཡང་།། རེག་བྱའི་ཡུལ་དང་བྲལ་གྱུར་བའི།། གྲིབ་མའི་ལུས་ཀྱི་གསང་བ་སྟེ།། སྒྱུ་མའི་གྲོང་གི་ཟློས་གར་ཡིན།། མགྱོགས་མོ་འོད་ཀྱི་དཀྱིལ་འཁོར་ནས།། གར་འགྲོ་ར་མདའ་གྲིབ་མའི་གཟུགས།། ཕྱི་ལུས་བྲེལ་བའི་ངང་ཚུལ་ལས།། མི་ཡུལ་ཁམས་ལ་ཐོ་ཞིག་བཞེངས།། གྲིབ་མའི་གཟུགས་གཞི་གཉོམ་ན་ཡང་།། རྒྱུས་མེད་གྲིབ་མའི་བར་གསེང་ན།། རྣམ་ཤེས་གསོན་པོ་རྨས་ཤིག་ཕོག། རེ་སྨོན་ཞིག་གི་ཞགས་ཐག་བཅད།། གྲིབ་མའི་གསང་བ་རྒོད་པ་ལ།། གྲིབ་མའི་ར་མདའ་མྱུར་བ་ལ།། གྲིབ་མ་མེད་པའི་འཇིག་རྟེན་ཞིག། གང་ལ་སོང་ཡང་རྙེད་ལས་མིན།། ༢༠༡༣ལོའིཟླ༤བའིཚེས༢༨ཉིན།
yangla | རྩོམ་ཡོངས་ཀློག་པ།(466) | ལན་སློག(9)
མི་ཡུལ་ལ་བྲིས་པའི་སྙན་ངག
2013-4-8 10:36:55

   མི་ཡུལ་ལ་བྲིས་པའི་སྙན་ངག

 

             ༡

མེ་ལྕེ་དང་ལྷན་དུ་བྱུང་བའི་དུ་བ་དེ

རི་མཐོན་པོའི་ཁ་སྒང་བརྒྱུད་ནས་དགུང་སྔོན་པོའི་ཕ་མཐའ་ཟིན

ངས་དུ་བ་དེ་གཡུ་འབྲུག་གི་འཁྱུག་འགྲོས་ཞིག་ཏུ་འཁྲུལ་ནས་ནམ་མཁར་བལྟས་དུས

དགུང་དུ་ཡོད་པའི་གཡུ་འབྲུག་འཇམ་ཐིང་ངར་ལྷིང་འཇགས་ཡིན

ལྷིང་འཇགས་ཀྱི་ནམ་མཁའ་དེ་ལྷ་ཡུལ་ཡིན་པ་ལས་མི་ཡུལ་མིན་པ་གཞི་ནས་རྟོགས་བྱུང་།

                                   ༢

རྡུལ་ཕྲན་གྱི་ཕུང་བོ་སྟེ

ས་སྶྒང་གི་ལུས་ཀྱི་ཆ་ཤས་རེ་རེར་གྱུར་བ་ནས

མི་ཡུལ་ན་གདུལ་དཀའ་བའི་མུན་པའི་འཚུབ་མ་ཞིག

གླེང་མི་ཚར་བའི་གཏམ་རྒྱུད་ཀྱི་གླེགས་བམ་ཞིག

ཡོད་ཚད་ལ་དབུ་ཁྱུད་བྲིས་ཏེ་རྫོགས་ཚིག་བཞི་ཤད་འགོད་ལ་རན་དུས

ཡོད་ཚད་ལ་ལག་འཇུ་བྱས་ཏེ་གྱེས་ཕྱག་གི་ལག་བརྡ་འཇོག་རན་དུས

སླར་ཡང་རྡུལ་ཕྲན་གྱི་ཆ་ཤས་ཤིག་ན་སྐྱུར་མི་འདོད་པའི་དུངས་བ་ཞིག

ཤོར་མི་འདོད་པའི་ཚེ་སྲོག་ཅིག

དེ་བས་

ཚེ་སྲོག་གི་དབུགས་རྒྱུན་མ་ཆད་གོང

དུངས་ཞེན་གྱི་མར་ལོ་མ་ཞི་གོང

མི་ཡུལ་ནས་མི་བུ་ཞིག་གི་རྩ་དོན་རུམ་ལ་བཅུག་ནས

ཤོར་ཟིན་པ་དང་ཤོར་གྱིན་པའི་ཚེ་སྲོག་ལ་ལག་འཇུ་བྱེད་འདོད།

 

 

yangla | རྩོམ་ཡོངས་ཀློག་པ།(887) | ལན་སློག(13)
འབྲེལ་ཡོད་ནང་དོན་ 70 ཡོད།<<<1234567>>>
 
Powered by Oblog.