རྟེན་འབྲེལ་ལ་བརྩི་སྲུང་དགོས་པའི་གཞེན་སྐུལ།

རྟེན་འབྲེལ་ནི། ཇི་སྐད་དུ། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པ་ལྟར་ཆོས་ཉིད་དེ་བཞིན་ཉིད་ཀྱི་གནད་གསང་རྐྱེན་གསུམ་གྱི་བདག་ཉིད་ཅན་ཞིག་ཡིན་པ་དང་། སྲིད་པ་ཁམས་གསུམ་འཁོར་བའི་བྱ་གཞག་གི་ཁྱབ་ཁོངས་ནས་ཀྱང་འགྲོ་བ་མིའི་རིགས་ཀྱི་འཚོ་བའི་ལེགས་ཉེས་འཇུག་ལྡོག་གི་ཐད་ནས་ཆེ་བ་འཛམ་གླིང་གོ་ལ་ཆེན་པོའི་བདེ་འཇགས་དང་། འབྲིང་ས་གནས་རྒྱལ་ཁབ་དང་རྒྱལ་ཁབ་ཀྱི་བར། མི་རིགས་དང་སྡེ་ཁག་ཚོགས་པ། ཆོས་ལུགས་ཀྱི་གྲུབ་མཐའ་སོ་སོ། ཆུང་ས་ནས་མི་སྒེར་ཡན་གྱི་བདེ་སྐྱིད་དང་འབྲེལ་ཡོད་ཀྱི་ཆོས་སྲིད་བྱ་གཞག་ཡོད་ཚད་ཀྱི་སྲོག་རྩ་རྟེན་འབྲེལ་ལེགས་ཉེས་ལ་ཐུག་འདུག་པ་མངོན་གསལ་ཡིན་ཚུལ་མཁས་པ་སྤྱིས་འདོད་དོ་སྙམ་ལ།

སྔོན་ཡ་ཐོག་གི་དུས་རྟེན་འབྲེལ་ལེགས་པོས་རྫོགས་ལྡན་གྱི་དུས་སྐབས་ཟེར་བ་ཤར་མྱོང་ཡོད་ཚོད་མོད། བར་སྐབས་ཤིག་ནས་རྟེན་འབྲེལ་མ་འགྲིགས་པས་འཛམ་གླིང་གི་ལོ་རྒྱུས་སྟེང་རྒྱལ་ཁབ་སོ་སོའི་བར་འཇིགས་སུ་རུང་བའི་འཁྲུགས་ཆེན་དང་པོ་དང་གཉིས་པ་ཞེས། འཇིགས་སུ་རུང་བའི་གཡུལ་ཆེན་མཚོན་ཆ་ནག་པོའི་རིགས་འཕེན་རེས་ཀྱི་གནས་ཚུལ་བྱུང་མྱོང་བ་དང་། ཨ་རིའི་ཐོག་ཁང་ཆེན་མོའི་ཆགས་སྒོ་ལྟ་བུ་འཛམ་གླིང་གི་མིག་མདུན་དུ་ཡིད་དུ་མི་འོང་བའི་གནས་ཚུལ་སྐྱོ་བོ་དང་། དེ་བཞིན་དུ་རྟེན་འབྲེལ་མ་འགྲིགས་པར་ཆོས་ལུགས་ཆེ་ཆུང་མང་པོའི་བར་གྱི་འཁྲུགས་རྩོད་དང་། ལྷག་པར་དུ་བོད་དར་གྲུབ་མཐའ་སོ་སོའི་ནང་ཕྱོགས་རིས་ཀྱི་དུག་ལས་སྣ་ཚོགས་ཀྱིས་མཐོ་སྒང་གི་མི་རིགས་ཤིག་གི་ཆོས་སྲིད་རིག་འབྱོར་ལོ་རྒྱུས་ཀུན་ལ་རྡབ་སིག་རྒྱ་ཆེན་པོ་བཟོས་དང་བཟོ་བཞིན་པ།  དེ་ལས་ཀྱང་དེང་བརྡ་འཕྲིན་དུས་དྲྭ་སྒང་སོ་སོ་དང་སྐད་འཕྲིན་ཚོགས་པ་དང་ཚོགས་པའི་ནང་དུ་རྟེན་འབྲེལ་མ་འགྲིགས་པས། དུས་རྒྱུན་ནམ་ཡར་ལངས་དང་མུན་མར་རུབ་ལ། ཚོགས་མི་ནང་ཕན་ཚུན་བར་ངན་བརྗོད་དང་། གླེང་ལོག་རྫུན་བཟོས་རིགས་ཀྱིས་ཕན་ཚུན་གྱི་སེམས་ནང་ལ་ནག་ཐིག་བསུབ་ཏུ་མེད་པ་བཟོ་བཞིན་པ་མ་གཏོགས་བློ་ལ་བབས་ཤིང་སེམས་ཁམས་དྭངས་པའི་ཤུགས་རྐྱེན་བཞག་པའི་གནས་ཚུལ་མཐོང་ཐོས་དཀོན་པའི་ཚད་དེ་རེད།  ཡང་མི་སྒེར་མཛའ་གྲོགས་བར་རྟེན་འབྲེལ་མ་འགྲིགས་ཏེ། དང་པོ་གཅིག་གིས་གཅིག་ལ་བརྩེ་བརྩེ་དུང་དུང་གིས་སྙིང་གཏམ་ཡོད་དགུ་སྩལ་བསྩལ་བའི་མཐར་ཕན་ཚུན་བར་འགལ་བ་བྱུང་སྟེ། སྔར་སྙིང་ཤ་གླན་ཏེ་བཤད་བཤད་པའི་གསང་བ་རྣམས་ཐེར་འདོན་དང་། གཅིག་གིས་གཅིག་གི་ངན་མཚངས་ཕྱིར་སྐྱེལ་བྱས་ནས་མི་ལེགས་པའི་མཇུག་འབྲས་སྣ་ཚོགས་དར་བ་འདི་དག་ཐམས་ཅད་རྟེན་འབྲེལ་ལེགས་ཕྱོགས་སུ་མ་འགྲིགས་པའི་རྒྱུ་ཁོ་ན་ལས་བྱུང་བ་ཡིན་ན།

དེང་ཕྱིན་ཡང་མིའི་རིགས་ཀྱི་ཕན་ཚུན་བར་འབྲེལ་འདྲེས་སོགས་འཚོ་བའི་ཁྲོད་ཀྱི་གོམས་གཤིས་གང་གི་སྐབས་ཡིན་ཡང་། མགྱོགས་མགྱོགས་མྱུར་མྱུར་གྱིས་རྟེན་འབྲེལ་གྱི་ལྟ་བ་ལ་བརྩི་མཐོང་དང་། སོ་སོའི་རྒྱུད་ལ་རྟེན་འབྲེལ་ལེགས་བསྒྲིག་གི་རྒྱུན་ཤེས་ཆགས་ཐབས་ལ་མ་འབད་ན།  གློ་བུར་གློ་བུར་དུ་གོ་ལ་མི་འཁོར་བའི་དུས་དང་། ཉི་ཟླ་མི་འཆར་བའི་དུས། འབྱུང་བཞིའི་ནུས་པ་མི་འགུལ་བའི་དུས།  ས་བོན་ལས་འབྲས་བུ་མི་འབྱིན་པའི་དུས། ཚེ་སྲོག་གི་འགྱུ་བ་མ་འགགས་ཙམ་ལས་ཕན་ཚུན་བར་སྐད་བརྡ་མི་འཕྲོད་པར་ཧོན་ནེར། ནག་དུབ་བེར་ལུས་པའི་དུས་སྐབས་ཀྱང་མི་འབྱུང་བའི་ངེས་པ་མེད། རྒྱུ་མཚན་ཆོས་ཐམས་ཅད་རྒྱུ་རྐྱེན་རྟེན་འབྲེལ་ལས་བྱུང་ཕྱིར། རྟེན་འབྲེལ་མ་ལེགས་པ་བྱུང་ན་གནས་ཚུལ་མི་ལེགས་པ་འབྱུང་སྲིད་པས་སོ། །  དེས་ན་དུས་ད་ནས་བཟུང་འགྲོ་བ་མིའི་རིགས་སྤྱིས་རྟེན་འབྲེལ་ལེགས་པོ་ལ་གོམས་པར་བྱས་ཏེ། དཔྱོད་ཤེས་རྣོན་པོ་དང་ཤེས་རབ་རྣམ་དག་གིས་སེམས་པ་བཟང་པོ། སྤྱོད་པ་འཚེ་མེད། གཤིས་ཀ་ལྷོད་པོ། ངག་སྒོ་འཇམ་པོ། རྒྱུ་འབྲས་དྲང་པོ། དྲན་ཤེས་བརྟན་པོས་མི་ཚེའི་འཚོ་བར་ཟབ་ཞུགས་བྱས་ཏེ། དལ་འབྱོར་མི་ལུས་ཀྱི་རིན་ཐང་རྟེན་འབྲེལ་བཟང་པོས་སྐྱོང་རྒྱུར་ཐབས་བརྒྱ་ཇུས་སྟོང་གིས་འབད་ནུས་ན། རྒྱ་ཆེ་ས་ནས་སོ་སོས་རྣམ་གྲོལ་གྱི་ལམ་སྣེ་ཟིན་པའི་སྟ་གོན་བཅས་འཛམ་གླིང་ཡུན་གནས་དང་། ཞི་བདེ་ཞེས་པའི་སྐད་པོ་ཆེ་དེ་བསུ་བའི་ཡུལ་དངོས་ཀྱང་རྒྱང་རིང་ཞིག་མིན་ལ། ཆུང་ས་ན་ས་ཆ་ཡུལ་ལུང་རེ་རེའི་མི་སྒེར་རང་རང་གི་ཚེ་ཆོས་རླུང་རྟ་དཔལ་འབྱོར་སོགས་འཚམ་པོ་ཞིག་འབྱུང་སྲིད་རེད། དེ་ལྟར་རྟེན་འབྲེལ་ལེགས་ཕྱོགས་སུ་འབད་མེད་ལྷུན་གྲུབ་བྱུང་ན་རབས། གལ་སྲིད་འཕྲལ་རྐྱེན་ངན་པས་རྟེན་འབྲེལ་མི་ལེགས་པའི་རིགས་ལ་གདོང་བཟུར་དུ་མེད་པར་འཕྲད་དགོས་བྱུང་ན། སྤོབས་པ་དང་སྙིང་སྟོབས་མི་ཞན་པར་ལེགས་སྤྱོད་ལ་ཤུགས་སྒྲིམ་རྒྱུ་དང་། རྟེན་འབྲེལ་ཉེས་པ་སེལ་ཞིང་བཀྲ་ཤིས་པའི་འདུན་མ་ཅི་ནུས་ཀྱི་བསྐྱེད་ན། ཇི་སྐད་དུ། ཆོས་རྣམས་ཐམས་ཅད་རྐྱེན་ཡིན་ཏེ། ། འདུན་པའི་རྩེ་ལ་རབ་ཏུ་གནས། །ཞེས་གསུངས་པ་ལས་མ་འདས་པས། རྟེན་འབྲེལ་ལ་བརྩི་མཐོང་དང་། བྱ་སྤྱོད་གང་གི་སྐབས་ཡིན་ཡང་རྟེན་འབྲེལ་ལེགས་ཕྱོགས་སུ་འགྲིག་པར་བྱེད་རྒྱུར་བརྩོན་པ་ཤུགས་དྲག་གིས་འབད་སྒོས་པ་དྲན་སྐུལ་ཡིན་ལ། གལ་ཆེ་བ་ཡང་ཡིན་ནོ། །

ཞེས་༢༠༡༨-༥-༧ ཉིན་གློ་བུར་དུ་ཡིད་ལ་གང་བྱུང་གི་སྨྱོ་གཏམ་འདི་གླིང་སྒྲུང་ཁང་ནས་བྲིས།

རྒྱལ་མོ་ཚ་བ་རོང༌།

གནས་ཆེན་རྒྱལ་མོ་དམུ་རྡོ། །

གངས་ཅན་བོད་པའི་སྐུ་བླ། །

རི་བོའི་ཞལ་གྱི་ཉི་ཟླ། །

ཁ་བའི་ལྗོངས་ལ་གཟིགས་ཤོག།

ཆུ་བོ་རྒྱལ་མོ་རྔུལ་ཆུ། །

གངས་ཅན་བོད་པའི་གསོལ་ཆུ། །

རླབས་ཀྱི་མེ་ཏོག་དཀར་པོ། །

ཁ་བའི་ལྗོངས་ལ་མཆོད་ཤོག།

ཚ་ཤོད་རྒྱལ་མོ་རོང་བ། །

གངས་ཅན་བོད་པའི་རིགས་རྒྱུད། །

སེམས་ཀྱི་བརྩེ་བ་གསོན་པོ། །

ཁ་བའི་ལྗོངས་ལ་ཕྱོགས་ཤོག །

རྒྱལ་མོ་ཚ་བ་རོང་དུ། །

རང་རིགས་མཛེས་སྡུག་བཀོད་པ། །

སྤུན་ཟླའི་སྙིང་གི་རེ་སྙེག། །

མྱུར་དུ་སྨིན་པའི་སྨོན་ལམ། །

ཚ་རུང་གི་རྡུང་ལེན་པ་ཞིག་གི་འདོད་པ་ལྟར་སྨིན་དབུས་པོས་བྲིས།

ཟིན་བྲིས་སྤེལ་མཁན་ཚོར་ཕུལ་བ།

བོད་སྐད་ཡིག་ཟིན་བྲིས་གཅིག་གི་ལས་རིགས་ལ་བརྩོན་པའི་བློས་ཐུབ་པའི་གྲོགས་གྲོགས་མོ་རྣམ་པ་ལགས། འུ་ཚོ་ལ་ཅི་ཡང་མེད་པའི་ལོ་ཟླ་རེ་རེར། ཕན་ཚུན་གཅིག་གིས་གཅིག་ལ་སྐྱིད་སྡུག་ལེགས་ཉེས་ཀྱི་སྙིང་གཏམ་ལྷུག་པོར་བརྗོད་ཆོག་པའི་བོད་སྐད་ཡིག་ཟིན་བྲིས་འདི། འུ་ཚོ་ལ་སྐྱོ་བའི་གླུ་གཞས་གྱེར་རོགས་དང༌། སྡུག་གི་སྨྲེ་སྔགས་འདོན་རོགས་ཡིན་ལ། འུ་ཚོས་མ་འོངས་པར་ཡོད་ཚད་ལ་བརྩོན་ལེན་དང། མངོན་འགྱུར་གྱི་གྲུབ་འབྲས་རོལ་ཉིན་ཡང་བོད་སྐད་ཡིག་ཟིན་བྲིས་འདི་ཉིད་མཛའ་བའི་སྙིང་གཏམ་གླེང་རོགས་དང༌། དགའ་བའི་གླུ་དབྱངས་ལེན་རོགས་གཅིག་པུ་ཡིན་ན། འུ་ཚོ་བོད་སྐད་ཡིག་ཟིན་བྲིས་ཚོགས་པའི་ཁོངས་མི་ཡོད་དོ་ཅོག་གིས། གླེང་སྟེགས་འདི་ནས་བརྗོད་བྱ་གང་དང་གང་ཞིག་ལག་ཏུ་བསྟར་ཡང་ཆོག་པའི་སྣང་ཚུལ་མངོན་པ་ནི་སེམས་པའི་དྲོད་ཁོལ་དུ་འདུག་མོད། དེའི་བླ་སྲོག་ཡི་གེའི་དག་ཐོབ་དང༌། ཚེ་སྲོག་གི་སྲ་བརྟན་ལ་གཞིགས་པའི་རྒྱབ་ལྗོངས། ཕན་ཚུན་བསམ་བློའི་གོ་རྟོགས་བརྗེ་རེས་ཀྱི་ལམ་ནས་ཁོངས་གཅིག་གི་སྤུན་ཟླ་ཡོངས་ཀྱི་བསམ་བློའི་ཁ་ཕྱོགས་དང་དམིགས་ཡུལ་རྩོན་ལེན་གྱི་གྲུབ་འབྲས་ལ་སྙེག་པའི་དོ་སྣང་གི་འདུ་དེ་འདྲའི་སྦོམ་ལ་དམ་པ་ཞིག་མིན་པར་མ་ཟད་ཟིན་བྲིས་རེ་ཟུང་གི་ཟུར་ངོས་ནས་མཐོང་འོང་བ་ནི། བླ་སྲོག་ལ་གཅེས་སྤྲས། བརྩོན་ལེན་གྱི་ཁ་ཕྱོགས། རིགས་ཞེན་གྱི་དྲི་མ། སྤུན་ཟླའི་མཐུན་ལམ་དང་བློ་སེམས་གཅིག་སྒྲིལ་འགན་ཁུར་གྱི་འདུ་ཤེས་སོགས་ཉག་ཤིན་ཏུ་ཕྲ་བའི་སྣང་ཚུལ་ཡིན་པས། འུ་ཚོས་ད་ནས་བཟུང་བོད་སྐད་ཡིག་ཟིན་ཚོགས་ཁོངས་མི་ཡོངས་ཀྱིས་གོང་གི་གནས་ཚུལ་དག་གི་ཐད་ནས་ཡར་རྒྱས་དང་ལེགས་ཕྱོགས་ལ་བརྩོན་ལེན་གྱི་གོ་རྟོགས་སྔར་ལས་ཁྱད་པར་བ་སད་དགོས་པ་དང༌། དེ་ལས་ཀྱང་འུ་ཚོའི་ཟིན་བྲིས་ནི་ཆེད་དུ་བོད་མི་རིགས་ཀྱི་སྐད་དང་ཡིག་གེ་སྲུང་སྐྱོབ་ལ་ཁ་གཏད་པའི་ལས་ཀ་ཞིག་ཡིན་ཕྱིར། ཟིན་བྲིས་དོ་དམ་པ་རྣམ་པའི་དབུ་བྱས་འུ་ཚོ་ཁོངས་མི་མཐོ་དམན་མེད་པས་རང་དམ་རང་གིས་བཅས་ཏེ། རང་གི་ཡི་གེའི་ཐོབ་ཐང་སློབ་དཔོན་ཐུ་མིའི་ལུགས་བཟང་ལ་མཛད་རྗེས་མཐོ་བའི་མཁས་མཆོག་པྲ་ཏི་སི་ཏུ་ཟུང་གི་དགོངས་པའི་བབས་ལུགས་ཟུང་འབྲེལ་གྱི་ལམ་ནས་དོགས་སེལ་ཞུན་གཅོད་མཁས་པ་གོང་མ་རྣམ་པའི་ཕྱག་བཞེས་བཞིན་རྒྱུན་སྐྱོང་དར་སྤེལ་ནན་མོ་བྱེད་མ་ཐུབ་ཚེ། ཕྱི་ངོས་ནས་འུ་ཚོས་སྐད་དང་ཡི་གེ་དར་རྒྱས་དགོས་ཞེས་ཅི་ལྟར་སྟོང་སྐད་འཐེན་ན་ཡང༌། ལག་ལེན་གྱི་སྟེང་ནས་མིང་ཚིག་གི་ཚོགས་རྒྱུན་བཀོལ་ཐ་སྙད་ཀྱི་ཆ་དང༌། བྱེད་འབྲེལ་སོགས་ཕྲད་དང་རྣམ་དབྱེའི་ཚོགས། དེ་ལས་ཀྱང་བྱ་བྱེད་ལས་གསུམ་དང་དུས་གསུམ་སྤྱི་བྱེ་བྲག་གི་ཚོགས་ཏེ། ཚོགས་གསུམ་པོ་གང་གི་ཆ་ནས་ཀྱང་ལེགས་མཐར་འཁྱོངས་པ་མེད་པར་ཉ་ཉུང་བསྲེས་པའི་རྣམ་པ་ཉ་ཉོག་གི་རྣམ་པས་ཟིན་བྲིས་དྲ་ཚིགས་རྒྱུན་འབྱམས་སུ་འཛམ་གླིང་གི་མཐོང་ལམ་དུ་བསྟར་ན། འུ་ཚོའི་ཡི་གེ་ཚན་རིག་རང་བཞིན་དང་འཐུས་སྒོ་ཚང་བའི་བདག་ཉིད་ཅན་འདི་ལ་ཚུར་རྒྱུས་ལོན་དང་ཞིབ་འཇུག་བྱེད་བཞིན་པའི་ཕྱི་གླིང་བ་དང༌། རྒྱ་རིགས་ཤེས་ཡོན་པ་དག་གི་མདུན་དུ་ངོ་གནོང་དགོས་པའི་མཇུག་ཚབས་ཤིག་འུ་ཚོ་བོད་སྐད་ཡིག་ཟིན་བྲིས་པ་དག་གི་ལག་མགོ་ནས་ནང་ཆ་ཕྱིར་ཤོར་བྱེད་རྒྱུར་ཐག་ཉེ་བ་འདི། དུས་ད་ལྟ་ཉིད་ནས་བཟུང་རང་རེ་ཟིན་བྲིས་པ་སོ་སོས་མ་བཀལ་བའི་ཁུར་དུ་རང་ལེན་བྱས་ནས་སྤྱི་བསྒྲགས་དང༌། རང་རང་གི་ཟིན་བྲིས་སོ་སོར་ཡིག་ནོར་དག་བཅོས་ཀྱི་ལས་འགུལ་ཞིག་གསར་སྤེལ་གནང་ན་ཅི་འདྲ་རེད། སྤྱིར་རྩིས་འཕྲུལ་གྱི་ལམ་ནས་ཤར་སྤེལ་བྱས་པའི་རྩོམ་རིག་རང་ཐུང་གང་ཡིན་ལ་ཡིག་ནོར་རེ་ཟུང་མི་འོང་རྒྱུ་ཤིན་ཏུ་དཀའ་བ་དང༌། དེ་ལས་ཀྱང་འཕྲུལ་འཁོར་གྱི་དབང་གིས་དེང་ཐོག་དག་བྲིས་གནང་ཡོད་ན་ཡང་མ་དག་པར་འགྱུར་འགྲོ་བའི་ཉེན་ཁ་ཆེ་བ་བདེན་མོད། འུ་ཚོས་ཁ་ནས་གླེང་བ་དང་ལག་ཏུ་བསྟར་རྒྱུའི་བྱ་བ་གཉིས་རྒྱབ་འགལ་ཏུ་བཏང་ནས་ལག་འོག་གི་ཡིག་ལྡོག་རེ་འགའ་བྲིས་ཏེ་ཞུ་དག་ཚར་གཅིག་གི་འགན་ཡང་གཙང་ལེན་མ་ཐུབ་པར་ཡིན་མདོག་གིས་ཡིག་ནོར་ཁོ་ནས་རྫོབ་པར་བྱས་པའི་སྐད་ཆ་སྤོམ་པོ་ཁོ་ན་སྤེལ་ན།  དེ་ནི་ཅུང་ཁ་ནང་དུ་ལོག་ནས་བསམས་ན་བོད་རང་གི་རིག་གནས་སྤྱི་དང༌། ལྷག་པར་བོད་སྐད་ཡིག་ལ་ཞབས་ཞུ་རུ་འགྲོ་བ་ཕར་ཞོག་གཏོར་བཤིག་གི་ལས་དང༌། སྐད་ཡིག་ཟིན་བྲིས་ཀྱི་བར་སྟོང་འཕྲོ་བརླག་གི་ལས་ཁོ་ན་ཡིན་ཕྱིར། འདིའི་ཐད་ནས་མྱུར་བ་མྱུར་དུ་རང་རེ་བོད་སྐད་ཡིག་ཟིན་བྲིས་ཚང་ལ་སྤྱིའི་བྱེད་ཕྱོགས་དང༌། སྤྱིའི་བསྒྲིགས་འཛུགས་ཤིག་ངེས་པར་ཡོད་དགོས་སྙམ། རང་རེ་ཟིན་བྲིས་པ་ཚོར་རང་གི་སྐད་ཡིག་ལ་གཅེས་སྐྱོང་གི་འདུ་ཤེས་ཡོད་དགོས་རྒྱུ་དང་ལག་འོག་གི་ཡིག་འབྲུ་ཚོ་མི་རིགས་རང་གི་བརྡ་དག་སྤྱི་འགྲོས་ལྟར་དག་གཙང་གཅིག་གྱུར་གྱི་ལམ་ལ་འབད་བརྩོན་གྱི་རང་དམ་བཅའ་ཐུབ་པའི་སྒེར་ཚུགས་ལྡན་དགོས་པ་ནི། ཟིན་བྲིས་མཁན་པོ་སྤྱིའི་འགན་འཁྲི་ཡིན་པས་འདི་ལ་ལྟ་བ་དང་ཁ་ཕྱོགས་མཐུན་མིན་གྱི་དམིགས་བསལ་དབྱེ་རྒྱུ་མེད་ལ། འདི་ལ་སྐྱ་སེར་དང་ཕོ་མོ། སློབ་མ་དང་ལས་བྱེད། ཡང་ན་ཆོས་ལུགས་པ་དང་སྲིད་པ་འཁོར་བ་པ་ཞེས་པའི་དབྱེ་མཚམས་ཀྱང་གཏད་ནས་མེད་པར་ཚང་མའི་ཕྲག་ཏུ་དབྱུག་པ་ཕྲེད་བབས་ཀྱི་དཔེ་ཡིན་ན། དགེ་འདུན་རང་འགྲིག་དང༌། བ་རྔ་རང་ལྕག་ཅེས་པ་ལྟར་བསམ་བློ་དང་ཁ་ཕྱོགས་གཅིག་གི་འོག་ནས་ལས་ལག་བསྟར་ལ་འདེབས་དགོས་པ་འདྲ་འདུག་པས་རྒྱ་ཆེ་བའི་ཟིན་བྲིས་གྲོགས་པོ་ཚང་མས་ཐུགས་གཞིག་གནང་རྒྱུ་བཀའ་དྲིན་ཆེ་ཞུ་རྒྱུ་ཡིན་ནོ། ། 

2009-5-10 20:42:00 | By: སྨིན་དབུས་པོ། 

སྨོན་པའི་སེམས།

རི་ལ་དར་ཅོག་བཙུགས་ཡོད། །

དར་ལ་རླུང་རྟ་སྒྲོན་ཡོད། །

ཁ་བ་བོད་པ་ཚང་གི །

ཁ་ལས་དབང་ཐང་དར་དགོས། །

ཕ་ལས་ལོ་རྒྱུས་ཐོས་ཡོད། །

མ་ལས་གོམས་སྲོལ་ལོབ་ཡོད། །

ཕུ་ནུ་མིང་སྲིང་ཚང་མས། །

ཡ་རབས་རང་ཚུགས་ཟིན་དགོས། །

རང་སེམས་དཔང་ལ་བཞག་ནས། །

ཀ་ཁ་སྙིང་ལ་བྲིས་ཡོད། །

བླ་དང་སྲོག་གི་རྩ་བ། །

མི་ནུབ་བརྟན་པོར་འཛིན་དགོས། །

གླུ་ལ་ཁོར་ཡུག་བྲིས་ཡོད། །

དབྱངས་ལ་གནས་བབས་བཀུག་ཡོད། །

མགྲིན་པ་རོལ་མོའི་རྒྱུད་ནས། །

ལྷོད་ཀྱིས་ལན་གསུམ་ལེན་དགོས།   

༢༠༡༤-༡༡-༦ ལ་སྨིན་དབུས་པོས་བྲིས། 

ཚེ་སྲོག་འདྲ་མཉམ་ཐད་ཀྱི་གཞེན་སྐུལ།  

འགྲོ་བ་སེམས་ཅན་ཐམས་ཅད་ལ་བརྩེ་བའི་བདག་ཉིད་ཆེན་པོ། མཚུངས་མེད་དཔལ་ལྡན་བླ་མ་དང་རྣམ་དབྱེར་མ་མཆིས་པའི། སྙིང་རྗེའི་ལྷ་མཆོག་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ཞིང་སྐྱབས་སུ་མཆིའོ། ཐུགས་རྗེས་གཟིགས་ཤིག ། 

དེ་ཡང་ལག་པ་བྲང་ཁར་བཞག་ཅིང་། སེམས་པ་ནང་དུ་བཀུག་ཏེ། ཡང་དང་ཡང་དུ་བསམ་ན། འཛམ་གླིང་གི་ཤར་ནུབ་དང་། རྒྱལ་ཁབ་དང་རིགས་རུས་ཀྱི་ཁྱད་པར་། ཆོས་ལུགས་ཀྱི་དབྱེ་བ་དང་ཕོ་མོ་ཡི་བར་ཁྱད་སོགས་མེད་པར་འགྲོ་བ་རྐང་གཉིས་མིའི་རིགས་སུ་གྱུར་བའི་གྲོགས་པོ་ཡོངས་སུ་རྫོགས་པ་ལ། མི་དང་དུད་འགྲོ་ཡི་ཚེ་སྲོག་འདྲ་མཉམ་ལྟ་ཚུལ་ཐད་ནས། ཡིད་ལ་ཤར་ཚད་ཅིག་དང་། ངག་གིས་ཁྲོལ་ཚོད་ཙམ་མ་ཞུས་ཐུ་མེད་དུ་རེད་སོང་།

འུ་ཚོ་ནི་དུད་འགྲོ་སོགས་སེམས་ཅན་གཞན་དག་དང་བསྡུར་ན་འཚོ་ཐབས་ལ་བློ་གྲོས་ལྡན་པའི་མཐོ་རིམ་སྲོག་ཆགས་ཞེས། ཕ་མ་ཚོའི་བཀའ་དྲིན་དང་། ལས་འབྲས་བསགས་ལུགས་ཀྱིས་གནས་སྐབས་ཙམ་ལ་ཉམ་ཐག་པའི་སེམས་ཅན་གཞན་དག་དང་བསྡུར་ན། ཟས་གོས་འཚོལ་སྒྲུབ། གནས་ཁང་བཟོ་སྐྲུན་སོགས་ནས་བརྩམས་བདེ་སྐྱིད་ཀྱི་འཚོ་ཐབས་ལ་མཁས་ཤིང་དབང་ཡོད་པའི་སྲོག་ཆགས་ཁྱད་འཕགས་ཤིག་ཡིན་པར་མ་ཟད།  ད་དུང་བློ་ཐབས་ཅི་ཡོད་བཀོལ་ཏེ། རང་དབང་དང་འདྲ་མཉམ་རྩོད་ལེན་ལ་འབད་བརྩོན་ཤ་ཐང་ཐང་དུ་བྱེད་མཁན་དེའི་རིགས་ཡིན་ཕྱིར།  འུ་ཚོས་རང་ཉིད་ཤེས་ལྡན་དུ་ཁས་ལེན་ཞིང་། རང་ཉིད་གླེན་ལྐུག་དུད་འགྲོ་ལས་ཁྱད་དུ་འཕགས་པའི་ལུས་རྟེན་ཅན་ཞིག་ཡིན་པའི་རང་མཐོང་ཡོད་པས།  འུ་ཚོས་སེམས་ཅན་གཞན་གྱི་ཚེ་སྲོག་གི་རིན་ཐང་ཐད་ལ་བསམ་བློ་ཞིབ་མོ་ཞིག་གཏོང་དང་། མི་དང་སྲོག་ཆགས་གཞན་དག་གི་བར་དུ་གཟུགས་ཀྱི་འདྲ་མིན་དང་། འ ཚོ་ཐབས་ཀྱི་ཁྱད་པར་ཙམ་མ་གཏོགས་ མི་དང་དུད་འགྲོ་ལ་དབྱེ་བ་མེད་པར་ཚེ་སྲོག་གིས་བསྡུས་ཤིང་། བདེ་སྡུག་གི་ཚོར་བ་ཡང་གཅིག་འདྲའི་བདག་ཉིད་ཅན་ཡིན་པ་ཆོས་དང་ཚན་རིག་གང་གིས་གཞལ་ཀྱང་ཐེ་ཚོམ་མི་དགོས་མོད།

རང་རེ་འཛམ་གླིང་གི་མི་རྣམས་ཀྱིས་དུས་རྒྱུན་ཅི་མི་སྙམ་པར།  བསྐལ་བ་ནས་བསྐལ་བའི་བར་དུ། འཚོ་གནས་གོ་ལ་གཅིག་ལ་རྟེན་ཅིང་། ཕན་ཚུན་གཅིག་ཕན་གཅིག་གིས་བསྒྲུབས་མྱོང་བའི་གྲོགས་པོ་ལས་ཀྱང་གྲོགས་པོ་སྟེ། ཉམ་ཆུང་དུད་འགྲོའི་རིགས་ཀྱི་ཁེ་དབང་ལ་རྡོག་རོལ་ཅི་ཙམ་བཏང་ངམ། དེ་ལས་ཀྱང་ལུས་ཀྱི་རེག་བྱ་དང་། ལྕེ་ཡི་མྱོང་བྱ་སོགས་མང་པོ་མང་པོ་ཞིག་གི་ཆེད་དུ། ངོ་ཚ་དང་འཛེམ་བག་སྤུ་ཙམ་མེད་པར། འདོད་རྔམ་དང་ཧམ་སེམས་ཆེན་པོས་ཁོ་ཚོའི་ཚེ་སྲོག་ལ་རྩིས་མེད་ཅི་ཙམ་བཟོས། ཐུབ་ཚོད་ག་ཙམ་བཏང་། ཁྲག་དམར་གྱི་ཡུལ་ཆུ་དང་། རུས་དཀར་གྱི་རི་རབ་ཅི་ཙམ་བརྩིགས། བསམ་ན་སྙིང་འདར་ཞིང་། དྲན་ན་སྐྱི་གཡའ་བ་ཞིག་མིན་ནམ།

 འུ་ཚོས་རང་གི་སར་སྲོག་ཆགས་གཞན་དག་བཞག་ནས་བསམ་བློ་ཞིག་གཏོང་དང་། ཁོ་ཚོ་ཡང་བདེ་སྐྱིད་ལ་ག་ཙམ་དགའ་འམ། ཁོ་ཚོ་ཡང་སྡུག་བསྔལ་ལ་ཅི་ཙམ་སུན་ནམ།  དེ་ལས་ཀྱང་ཁོ་ཚོ་རང་རང་གི་ཚེ་སྲོག་ལ་རྩིས་ཐང་ཅི་ཙམ་ཆེ་ཞིང་། གཅེས་སེམས་ག་ཙམ་ཡོད་དམ། ཨ་མ་མ། གཅིག་པ་མིན་ནམ། ཁོ་ཚོ་ཡང་འུ་ཚོ་ནང་བཞིན་བདེ་སྐྱིད་ལ་ངེས་པར་དུ་དགའ་ལ། ཚེ་སྲོག་གི་རིན་ཐང་ལ་དེ་བས་ཀྱང་བརྩི་མཐོང་ཆེ་སྲིད།

འུ་ཚོས་སྲོག་ཆགས་གཞན་གྱི་སར་རང་བཞག་ཏེ་བསམ་བློ་ཞིག་གཏོང་དང་། རང་ཉིད་ཀྱི་ཚེ་སྲོག་ཏེ་གཞན་གྱིས་དབང་མེད་དུ་འཕྲོག་ན། རང་གི་ལུས་ལ་ན་ཚ་དང་ཟུར་ཟེར་ག་ཙམ་ཡོང་སྲིད། འཇིགས་སྐྲག་གི་སྡུག་བསྔལ་ཅི་ཙམ་མྱོང་སྲིད། ཚེ་འདིའི་སྣང་བ་དཀར་པོ་བཙན་གྱིས་བསྣུབས་ཏེ། བརྩེ་འདང་ཆེ་བའི་ཕ་མ་བུ་ཕྲུག་དང་། དུང་བ་ཟབ་པའི་སྤུན་ཟླ་མཛའ་གྲོགས་སོགས་འཕྲལ་དུ་བསྐྱུར་ཏེ་འཆི་བྲལ་དགོས་པ་ལ་འཕང་འགྱོད་ཅི་ཙམ་ཆེ་སྲིད། སེམས་སྡུག་ག་འདྲ་ཡོད་སྲིད།  ཨོ་ཧོ་ཧོ། བཟོད་ཐབས་ག་ལ་ཡོད།  སྲོན་ཐབས་ཅི་ལྟར་ཡོད།  སེམས་ལ་འཆར་མི་བཟོད་ལ། ངག་གིས་སྨྲ་མི་ཕོད་པའི་ཚད་ཅིག་ཅི་ལ་མིན།

དེས་ན་འུ་ཚོ་མི་རྣམས་ནི་བདེ་སྐྱིད་ལ་ཧ་ཅང་དགའ་བ་དང་། ཚེ་སྲོག་གི་བདེ་ཐང་ལ་ཡིད་གཟབ་ཤིན་ཏུ་བྱེད་པ་ནང་བཞིན། དུད་འགྲོ་ལ་ཡང་ལུས་ཕུང་གི་ཆེ་ཕྲ་མེད་པར་ཚོར་བ་བདེ་སྡུག་ཡོད་ཅིང་། ཚེ་སྲོག་གི་རྩིས་ཐང་འདྲ་མཉམ་ངེས་པར་ཡིན་པའི་རྒྱུ་མཚན་ངོས་ཟིན་པའི་འོག་ནས།  འུ་ཚོས་དུས་ད་ནས་བཟུང་། རང་ཉིད་ནས་མགོ་བརྩམས་ཏེ་འཇིག་རྟེན་འདིར་མི་དང་དུད་འགྲོའི་ཚེ་སྲོག་འདྲ་མཉམ་ཡིན་པའི་དྲང་བདེན་སྐྱོང་མི་དགོས་སམ། འབོད་སྐུལ་བྱེད་མི་དགོས་སམ།  ངེས་པར་དགོས་ལ། མཐོ་རིམ་སྲོག་ཆགས་ཞེས་པའི་མིང་ཐོབ་ཀྱི་གནས་ལུགས་ཀྱི་ངོས་ནས་བསམ་ན། དེ་བས་ཀྱང་ཕྲག་ཏུ་བབས་པའི་འོས་འགན་ཞིག་ཀྱང་ཅི་ལ་མིན།

དེ་ཡང་ཚེ་སྲོག་འདྲ་མཉམ་ཞེས་ནེ་ཙོས་མ་ཎི་བཏོན་ལུགས་དང་། འུག་པས་རྫུན་བསྒྲིགས་བཤད་པ་ལྟ་བུ་མ་ཡིན་པར། བཤད་པ་དོན་ལ་གནས་ཤིང་། ཁ་ཡོད་ལག་ཡོད་ཀྱིས་འཚོ་བའི་ཁྲོད་ཀྱི་འགྲོ་འདུག་སྤྱོད་ལམ་གང་གི་ཆ་ནས་ཀྱང་། སྲོག་ཆགས་གཞན་གྱི་ཚེ་སྲོག་ལ་གནོད་པའི་ལྡོག་ཕྱོགས་དང་། གཞན་གྱི་བདེ་སྐྱིད་ལ་ཕན་པ་བསྒྲུབ་པའི་མཐུན་ཕྱོགས་ནས་ཅི་ནུས་སུ་ལང་རྒྱུ་གལ་ཆེ་ཞིང་། དེ་ནི་ཚེ་སྲོག་གི་ཆེད་དུའོ། ། དེ་ནི་ཚེ་སྲོག་ཡིན་ན་འདྲ་མཉམ་ཡིན་དགོས་པའི་གནས་ལུགས་ཀྱིས་སོ། །

ཞེས་རབ་བྱུང་༡༧པའི་མེ་བྱ་ལོའི་ཟླ་༨པའི་ཚེས་༡༧ ཉིན་སྨིན་དབུས་པོས་མཁྱེན་བརྩེ་གླེང་ཚོམ་ནས་ཕུལ།

གནས་ལུགས།

ཆོག་ཤེས་ཅན་ནི་ཕྱུག་པོའི་ཡང་རྩེ་ཡིན། །
མ་བཅོས་པ་ནི་མཛེས་སྡུག་དང་པོ་ཡིན། །
རང་ཚུགས་ཟིན་པ་དཔའ་བོའི་ཡང་རྩེ་ཡིན། །
གནས་ལུགས་རྟོགས་པ་མཁས་པའི་རྒྱལ་པོ་ཡིན། །
ཨས་སོ། །

གཡུ་ཐོག་རྙིང་མ་འཁྲུངས་མ་མྱོང་ཟེར་མཁན་རྣམས་ཀྱི་ལན་དུ།

རྩོམ་མཁན། ཚངས་དབང་དགེ་འདུན་བསྟན་པ།

སྤྱིར་བཤད་ན། ལོ་རྒྱུས་ཐོག་ལ་ཡོངས་སུ་གྲགས་པའི་མི་སྣ་ཞིག་འཁྲུངས་ཡོད་མེད་ཐད་ལ་ཡང་བསྐྱར་དོགས་པ་སློང་བ་ནི་ཞིབ་འཇུག་གི་གནས་བབ་ཅིག་ཡིན་པས། སུ་ལའང་དོགས་པ་ནི་ཟ་ཆོག་ཆོག་ཅིག་རེད།  ང་ཚོས་ལོ་ངོ་སྟོང་ཕྲག་གཅིག་དང་ཉིས་བརྒྱ་ཡས་མས་ཀྱི་ཡར་སྔོན་དུ་བྱོན་པའི་གཡུ་ཐོག་རྙིང་མ་ལའང་འཁྲུངས་ཡོད་མེད་ཐད་ནས་དོགས་པ་ཟ་ཆོག་ལ།   ཞིབ་འཇུག་ཀྱང་བྱེད་འོས་པ་ཞིག་རེད། འོན་ཏེ།   རྩ་དོན་ནི་ཡོངས་སུ་གྲགས་པའི་མི་སྣ་དེ་འདྲ་ཞིག་འཁྲུངས་ཡོད་མེད་ཐད་ལ་ཡང་བསྐྱར་དོགས་པ་སློང་བ་ལ་ངེས་པར་དུ་རྒྱུ་མཚན་གཉིས་མཆིས་ཏེ།     

 གཅིག་ནི། དོགས་པ་ཟ་མཁན་གྱི་མི་དག་གིས་དོགས་གཞིའི་སྐོར་གྱི་འབྲེལ་ཡོད་ཀྱི་ལོ་རྒྱུས་ཡིག་ཚང་དང་དངོས་པོའི་བདེན་དཔང་གསལ་བོ་ཞིག་གསར་དུ་རྙེད་ནས་དོགས་པ་ཟ་གིན་ཡོད་པ་རེད།

 གཉིས་ནི། སོ་སོའི་དགོས་མཁོ་ཕྲན་བུ་ཞིག་ལ་དམིགས་ཏེ།  འུར་ལངས་པ་དང་།   དཀྲོག་གཏམ་བསླངས་ནས་སྤྱི་ཚོགས་ཟང་ཟིང་ལང་ལོང་དུ་བཏང་བ་དེ་རེད། གོང་གི་འགྲོ་ལུགས་དེ་གཉིས་ལས་དང་པོ་ནི་ངེས་དོན་གྱི་ཞིབ་འཇུག་པ་ཞིག་གི་འགྲོ་སྟངས་རང་རེད་ལ། རྗེས་མ་ནི་ཁྲམ་པ་དང་གཡོ་ཇུས་པ་ཚོའི་བྱེད་ལས་ཤིག་ཡིན་པ་ལས་རིག་གཞུང་ཞིབ་འཇུག་ལ་འབྲེལ་བ་མེད་དོ། ། 

 སྔོན་གྱི་དུས་སུའང་མཁས་པ་རེ་གཉིས་ཀྱིས་གཡུ་ཐོག་རྙིང་མ་བྱོན་ཡོད་མེད་སྐོར་ལ་དོགས་སློང་མཆིས་པ་ནི་བདེན་ཏེ། དེ་ཡང་༼  ལྔ་བ་ཆེན་པོའི་གསན་ཡིག ༽་དང་། སྡེ་སྲིད་ཀྱི་༼ བཻ་དཀར༽་དང་།༼ མཆོད་སྡོང་འཛམ་གླིང་རྒྱན་གཅིག༽་ སོགས་སུ་གསལ་བའི་སྨན་བརྒྱུད་གྲས་སུ་གཡུ་ཐོག་རྙིང་མ་ཟེར་བ་ཞིག་མི་བཞུགས་པས་དོགས་པ་དེ་བྱུང་བ་འདྲ། འབེ་ལོ་ཚེ་དབང་ཀུན་ཁྱབ་ཀྱིས་ཀྱང་ ༼  རབ་བྱུང་བཅུ་གཉིས་པའི་ས་ཁྱི་ལོ་སྟེ་སྤྱི་ལོ་1718ལོར་འཁྲུངས༽ གཡུ་ཐོག་རྣམ་ཐར་བཀའ་རྒྱ་མ་ལ་དགག་པ་བརྒྱབ་ནས་གཡུ་ཐོག་རྙིང་མ་བྱ་བ་ཞིག་བྱོན་མེད་ཚུལ་བཤད་ཡོད་སྐད། ཉེ་སྔོན་ཞིག་ལ་ཨ་རི་ན་ཡོད་པའི་སྨན་པ་རིག་པའི་ཡེ་ཤེས་ལགས་ཀྱིས། "གཡུ་ཐོག་གསར་རྙིང་གི་རྣམ་ཐར་སྐོར་ལ་ཁྱེད་ཀྱིས་ཞིབ་འཇུག་བྱེད་མྱོང་ཡོད་དམ།  ཐུབ་བསྟན་ཕུན་ཚོགས་ཀྱིས་གཡུ་ཐོག་རྙིང་མ་ཟེར་བ་ཞིག་འཁྲུངས་མི་འདུག་པའི་སྐོར་བཤད་བྱུང་།"   ཞེས་ང་ལ་རྩད་གཅོད་གནང་བྱུང་བས་ངས་འཕྲལ་དུ་དེའི་སྐོར་ཆེད་དུ་དོ་སྣང་བྱེད་མ་མྱོང་ཡང་། གཡུ་ཐོག་རྙིང་མ་བྱ་བ་ཞིག་འཁྲུངས་ཡོད་ཚུལ་གྱི་བདེན་དཔང་ཡིག་ཚང་འགའ་རེ་མཐོང་མྱོང་ཞེས་གསལ་བཤད་བྱས་པ་ཡིན།

 ཁ་སང་ཞིག་ལ་འཕྲིན་ཕྲན་སྟེང་དུ་བོད་ལྗོངས་སྨན་རྩིས་ཁང་གི་རྒན་རིན་ཆེན་དོན་གྲུབ་ལགས་ཀྱི་འཕྲིན་ཕྲན་ལས་བཤུས་པའི་རྩོམ་ཡིག་ཅིག་མཐོང་བྱུང་། 

རྩོམ་ཡིག་དེར་བོད་ལྗོངས་གསོ་རིག་སློབ་གླིང་གི་དགེ་རྒན་གཡང་དགའ་ལགས་དང་དགེ་རྒན་ཐུབ་བསྟན་ཕུན་ཚོགས་གཉིས་ཀྱིས་གཡུ་ཐོག་རྙིང་མ་འཁྲུངས་མེད་ཚུལ་གྱི་སྐད་ཆ་བཤད་ཡོད་པར་བསྟན་འདུག   དེ་མིན་ད་དུང་གྲོགས་པོ་རེ་གཉིས་ཀྱི་ཞལ་ནས་ཀྱང་། རྒན་ཁོ་ཚོས་གཡུ་ཐོག་རྙིང་མ་ཟེར་བ་ཞིག་བྱོན་མེད་ཚུལ་ཐག་བཅད་ནས་ཤོད་བཞིན་འདུག་ཅེས་ཐོས་མྱོང་ཡང་། དེའི་སྐོར་གྱི་རྩོམ་ཡིག་མཐོང་མ་མྱོང་། གང་ལྟར་ཉེ་ཆར་གཡུ་ཐོག་རྙིང་མའི་སྐོར་ནས་དེ་འདྲའི་རྩོད་གཞི་ཞིག་བྱུང་ཡོད་པ་མངོན་གསལ་རེད། ད་དུང་གཡུ་ཐོག་རྙིང་མ་ཟེར་བ་ཞིག་འཁྲུངས་མེད་པའི་རྒྱུ་རྐྱེན་གཙོ་བོ་གཞན་ཞིག་ནི། གཡུ་ཐོག་གསར་མའི་ལོ་རྒྱུས་དང་འབྲེལ་བ་ཡོད་པར་བཤད། དེ་ནི་གཡུ་ཐོག་རྙིང་མའི་ལོ་རྒྱུས་དང་གཡུ་ཐོག་གསར་མའི་ལོ་རྒྱུས་གཉིས་ཧ་ལམ་ཞིག་གཅིག་ཡིན་པར་འདོད་པའི་ལྟ་ཚུལ་ལས་བྱུང་བ་ཞིག་རེད། དེས་ན་ང་ཚོས་གཤམ་དུ་གཡུ་ཐོག་གསར་རྙིང་གཉི་ཀའི་ལོ་རྒྱུས་ལས་གནད་འགག་སྐོར་ཞིག་བསྡུར་ཏེ་གླེང་བར་བྱ། གཡུ་ཐོག་རྙིང་མ་ཡོན་ཏན་མགོན་པོ་ནི། ༼ བསྟན་རྩིས་ཀུན་བཏུས༽་སུ་སྤྱི་ལོ་768ལོར་འཁྲུངས་པར་བཤད། ༼ དུང་དཀར་ཚིག་མཛོད༽་དུ། སྤྱི་ལོ་དུས་རབས་བརྒྱད་708་པའི་ས་སྤྲེལ་ལོར་སྟོད་ལུང་སྐྱིད་སྣ་རུ་ཡབ་གཡུ་ཐོག་ཁྱུང་པོ་རྡོ་རྗེ་དང་། ཡུམ་རྒྱ་བ་ཆོས་སྒྲོན་གཉིས་ཀྱི་སྲས་སུ་སྐུ་འཁྲུངས།       ཞེས་གསལ།༼སུམ་པའི་ཆོས་འབྱུང་༽དུ།     787མེ་ཡོས་ལོར་འཁྲུངས་ཞེས་གསལ།  དེས་ན་འཁྲུངས་ལོ་ལ་བཤད་སྲོལ་མི་འདྲ་བ་གསུམ་ཙམ་འདུག སྤྱི་ལོ་785་ཆོས་རྒྱལ་མེས་ཨག་ཚོམ་དང་།  ཁྲི་སྲོང་ལྡེ་བཙན་གཉིས་ཀྱི་བླ་སྨན་པ་མཛད།༼ བསྟན་རྩིས་ཀུན་བཏུས༽་སུ། 812་ལོ་སྟེ་ཆུ་འབྲུག་ལོར། ཁྲི་སྲོང་གི་བླ་སྨན་གཡུ་ཐོག་ཡོན་ཏན་མགོན་པོས་སྨན་རྒྱུད་བཞི་གཏེར་ནས་སྤྱན་དྲངས།   ཞེས་གསལ་ཞིང་། དེ་ནི་གཡུ་ཐོག་རྙིང་མའི་རྣམ་ཐར་ལྟར་ཡིན་པར་བཤད། ༼  ཚིག་གཏེར ༽ ་དུ།  དགུང་ལོ་ཞེ་ལྔ་པར་གསོ་རིག་འབུམ་བཞི་གཏེར་ནས་བཏོན།  ཞེས་གསལ། དགུང་ལོ་བརྒྱ་དང་ཉི་ཤུ་རྩ་ལྔའི་ཐོག་འདས།    གཡུ་ཐོག་གསར་མ་ཡོན་ཏན་མགོན་པོ་ནི། གཡུ་ཐོག་རྙིང་མ་ནས་བརྩིས་པའི་གདུང་རབས་བཅུ་གསུམ་པ་ཡིན་ཞེས་བོད་རྒྱ་ཚིག་མཛོད་དུ་བཤད།   རབ་བྱུང་གཉིས་པའི་མེ་རྟ་སྤྱི་ལོ་1126་ལོར་གཙང་ཉང་སྟོད་སྒོ་བཞི་རེ་ཐང་དུ་འཁྲུངས། དགུང་ལོ་བཅུ་གཉིས་ཐོག་རོག་སྟོན་དཀོན་མཆོག་སྐྱབས་ཀྱི་མདུན་ནས་དཔལ་ལྡན་རྒྱུད་བཞི་རྫོགས་པར་ཞུས།   དགུང་ལོ་བཅོ་བརྒྱད་པ་ནས་རྒྱ་གར་ལ་རིམ་བཞིན་ཐེངས་དྲུག་ཕེབས་ཏེ་མཁའ་འགྲོའི་གཙོ་མོ་དཔལ་ལྡན་ཕྲེང་བ་དང་། དྲང་སྲོང་ཙ་ར་ཀ་སོགས་བསྟེན་ནས་དཔྱད་ཀྱི་གཞུང་ལུགས་ཐམས་ཅད་ཐུགས་སུ་ཆུད། རྡོ་རྗེ་གདན་དུ་པཎ་ཆེན་བརྒྱ་ཕྲག་དུ་མའི་ཚོགས་དཔོན་མཛད། སླར་བོད་དུ་ཕེབས་ནས་དཔལ་ལྡན་རྒྱུད་བཞི་གསེར་མཆན་དང་། ཟོང་མཆན་གཉིས་བཏབ། རྒྱུད་འཛིན་གྱི་བུ་སློབ་མང་ཡང་གཙོ་བོ་ནི་སུམ་སྟོན་ཡེ་ཤེས་གཟུངས་ཀྱིས་དབུ་མཛད་པའི་ལྗང་སྨན་ལེབ་སེ་དང་། འབལ་སྨན་ཉི་མ། སྟོན་པ་ཨ་ཚེས། ཤ་རམས་པ་ཉི་མ་དཔལ། གཡུ་ཐོག་བསོད་ནམས་སེང་གེ ༼ བསོད་ནམས་སེང་གེ་ཡིན་ཡང་།   ཚིག་གཏེར་དུ་བསོད་ནམས་དང་སེང་གེ་གཉིས་ཀྱི་བར་དུ་ཤད་བཞག་ཡོད། དེ་གཉིས་སོ་སོ་ཡིན་མིན་བརྟག༽དགེ་བཤེས་རོག་ཆུང་སོགས་མཁས་པ་མིང་དོན་མཚུངས་པ་སུམ་བརྒྱར་ཉེ་བ་བྱུང་། དགུང་ལོ་བདུན་ཅུ་རྩ་བདུན་སྟེང་དུ་ཕེབས་པའི་རབ་བྱུང་གསུམ་པའི་ཆུ་ཁྱི་སྤྱི་ལོ་1202ལོར་སྐུ་གཤེགས།    ཞེས་གསལ།  གོང་འཁོད་ཀྱི་ནང་དོན་གཉིས་ནི་གཡུ་ཐོག་གསར་རྙིང་གཉིས་ཀྱི་ལོ་རྒྱུས་མདོར་བསྡུས་རེ་བཏུས་ནས་སྤེལ་བ་ཡིན། ང་ཚོས་གོང་གི་ལོ་རྒྱུས་མདོར་བསྡུས་ལས་ཤེས་ཐུབ་པ་ཞིག་ནི། གཡུ་ཐོག་རྙིང་མའི་འཁྲུངས་ལོ་ལ། བཤད་ཚུལ་མི་འདྲ་བ་གསུམ་སྟེ།    ༼དུང་དཀར་ཚིག་མཛོད༽་དང་།  ༼ ཚིག་གཏེར༽་སོགས་ཀྱི་བཤད་ཚུལ་ལྟར་ན། སྤྱི་ལོ་708སྟེང་འཁྲུངས་པར་བཤད་པ་དང་། ༼བསྟན་རྩིས་ཀུན་བཏུས༽་ལྟར་ན།    སྤྱི་ལོ་ཡང་768ལོར་འཁྲུངས་པར་བཤད་པ་དང་།  ༼སུམ་པའི་ཆོས་འབྱུང་༽ལྟར་ན། སྤྱི་ལོ་787ལོར་འཁྲུངས་པར་བཤད།     མདོར་ན་ཚང་མས་དགུང་ལོ་བརྒྱ་དང་ཉེར་ལྔ་བཞུགས་པར་བཤད་དོ། །  

 དེས་ན་འདས་ལོ་ནི་༼དུང་དཀར་ཚིག་མཛོད༽་དང་།༼ཚིག་གཏེར༽་སོགས་ལྟར་ན། སྤྱི་ལོ་832་གཤེགས་པར་གསལ།༼བསྟན་རྩིས་ཀུན་བཏུས༽་ལྟར་ན། འདས་ལོ་ནི་892ལོར་འཁེལ་འདུག       ༼སུམ་པའི་ཆོས་འབྱུང་༽ལྟར་ན། སྤྱི་ལོ་911ལོར་འདས་པར་བཤད་དོ། །  གཡུ་ཐོག་གསར་མ་ནི་སྤྱི་ལོ་1126ལོར་འཁྲུངས་པ་དང་། སྤྱི་ལོ་1202ལོར་འདས། དེ་གཉིས་ཀྱི་བར་ལ་ལོ་ཚད་ཉིས་བརྒྱ་ལྷག་གི་བར་ཁྱད་ཡོད།    གཞན་གཡུ་ཐོག་རྙིང་མའི་འཁྲུངས་ཡུལ་ནི་སྟོད་ལུང་བདེ་ཆེན་རྫོང་ཁོངས་སུ་ཡོད་པ་དང་། གཡུ་ཐོག་གསར་མའི་འཁྲུངས་ཡུལ་ནི་གཙང་ཉང་སྟོད་ཕྱོགས་སུ་རེད། དེ་བཞིན་དུ། ཁོང་གཉིས་ཀྱི་དགེ་རྒན་བསྟེན་ཚུལ་དང་སློབ་གཉེར་བྱེད་སའི་གདན་ས་ཁག་ཀྱང་རྩ་བ་ནས་མི་གཅིག་པས་དེ་གཉིས་གཅིག་ཡིན་ཚུལ་གྱི་ནོར་བ་དེ་འབྱུང་དགོས་དོན་མེད་དོ།།

ད་ནི་སྐབས་སུ་བབ་པའི་གནད་དོན་དངོས་ནི། གཡུ་ཐོག་རྙིང་མ་འཁྲུངས་ཡོད་མེད་དེ་རེད། དེས་ན་གཡུ་ཐོག་རྙིང་མ་བྱ་བ་ཞིག་འཇིག་རྟེན་འདིར་དངོས་སུ་བྱོན་ཡོད་དམ་ཞེ་ན་ཡོད་དེ། གཤམ་དུ་ངེད་ཀྱིས་གཡུ་ཐོག་རྙིང་མ་བྱ་བ་ཞིག་འཁྲུངས་ཡོད་པའི་སྐོར་གྱི་ཡིག་ཚང་གལ་ཆེན་གཉིས་ལས་འཕྲོས་ཏེ་གཡུ་ཐོག་རྙིང་མ་འཁྲུངས་ཡོད་ཚུལ་གྱི་བདེན་དཔང་བྱེད་ཀྱི་ཡིན། བདེན་དཔང་ཡིག་ཆ་གཅིག་ནི། ཉེ་ཆར་ཀརྨ་བདེ་ལེགས་ལགས་ནས་མཁོ་སྤྲོད་བྱས་པའི་དུས་རབས་བཅུ་གཉིས་ཡས་མས་ཀྱི་དཔེ་རྙིང་སྟེ་༼བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད།༽ བྱ་བ་དེ་ཡིན་ལ། དཔེ་ཆ་དེ་ནི་ད་ཕན་བཞུགས་པའི་༼རྒྱུད་བཞི༽་སྐོར་གྱི་དཔེ་ཆ་རྙིང་ཤས་ཡིན་པར་འདོད།  དཔེ་ཆ་དེའི་ལོ་ཚད་ཏག་ཏག་ཅིག་བཤད་དཀའ་ཡང་། ལྷ་སྐུ་དག་གི་འབྲི་སྟངས་དང་།   ཡིག་ཚུགས་བཅས་ལ་དཔྱད་ན།  མ་མཐའ་ཡང་དཔེ་ཆ་དེ་ནི་དུས་རབས་བཅུ་གཉིས་པའི་སྐབས་ཀྱི་རེད་བསམ་གྱིན་ཡོད། དཔེ་ཆ་དེའི་མཇུག་བྱང་དུ། "རྒྱུད་པ་ལོ་རྒྱུས་ཀྱི་ཆིངས་ལ། བྷཱཻ་རོ་ཙ་ན་ཡས་ཆད།  སྟོང་ཐུན་མཛེས་པའི་གཞའ་རིས་ནས། བཞུགས་པ་རྒྱ་གར་བརྒྱུད་པའོ།། བོད་དུ་བརྒྱུད་པ་གཡུའ་ཐོག་མགོན་པོ།   གཡུའ་རྒ་རྒ། དེས་གཡུའ་ཐོག་དཔལ་བཟངས།     དེས་འཁུན་སྨན་ཐང་ཆུང་བ་བསོད་ནམས་འོད་ལ། དེས་ལྷ་རྗེ་ལྷ་སྟོན་དང་གྲགས་པ་ལའོ།།

ཡང་གཡུ་ཐོག་མགོན་པོས། རོག་ཤེས་རབ་དབང་ལ། དེས་རོག་དགོན་གཟུངས། དེས་རོག་བསོད་རྒྱལ་ལ། དེས་བསོད་ནམས་འོད་ལ། དེས་སློབ་དཔོན་དབང་གྲགས་ལའོ།། “ ༼ལྡེབ་མ་78བཞུགས། ༽   ཅེས་གསལ། གཡུ་ཐོག་རྙིང་མའི་རྣམ་ཐར་རྣམས་སུ། གདུང་རྒྱུད་འཛིན་པའི་སྲས་འབུམ་སེང་དང་།     དཔལ་འབུམ་དང་། དགའ་དགའ་གསུམ་འཁྲུངས་ཞེས་གསལ་བ་དང་། གོང་གི་རྒྱུད་བཞིའི་བརྒྱུད་ཡིག་ཏུའང་གཡུ་ཐོག་རྙིང་མ་ནས་རྒ་རྒ་ལ་བརྒྱུད་པར་གསལ་བ་དང་།   དགའ་དགའ་དང་རྒ་རྒ་གཉིས་ནི་ཡི་གེ་འབྲི་སྟངས་མི་འདྲ་བ་ཙམ་ལས་དོན་དུ་གཅིག་ཡིན་པ་དོན་གྱི་བབ་ལ་གཞིགས་ན་ཤེས་ཐུབ།

      ད་དུང་གནད་དོན་གཞན་ཞིག་ནི་གཡུ་ཐོག་གསར་མའི་ལོ་རྒྱུས་ཁག་ཏུ། ཁོང་གིས་རོག་སྟོན་དཀོན་མཆོག་སྐྱབས་ཀྱི་མདུན་ནས་རྒྱུད་བཞི་རྫོགས་པར་སྦྱངས་ཞེས་གསལ། གོང་གི་རྒྱུད་བཞིའི་བརྒྱུད་ཡིག་ཏུའང་རོག་མཚན་ཅན་གྱི་སློབ་བརྒྱུད་གསུམ་བཞི་ཞིག་བྱོན་ཡོད་པ་དེས་ཀྱང་གཡུ་ཐོག་གསར་མའི་གོང་ན་གཡུ་ཐོག་རྙིང་མའི་གདུང་རྒྱུད་ཀྱི་མཚན་ཅན་གསུམ་བཞི་དང་། སློབ་བརྒྱུད་ཀྱི་ཁྲོད་ནས་རོག་མཚན་ཅན་ཡང་གསུམ་བཞི་ཞིག་བྱོན་ཡོད་པ་མངོན་གསལ་རེད།  དེས་ན་གོང་གི་ནང་དོན་ཁག་ལས་ང་ཚོས་གསལ་བོར་ཤེས་ཐུབ་པ་ཞིག་ནི་གཡུ་ཐོག་གསར་མ་མ་བྱོན་སྔོན་དུ།   གཡུ་ཐོག་མགོན་པོ་དང་གཡུ་ཐོག་དགའ་དགའ་སོགས་སྲས་བརྒྱུད་དང་སློབ་བརྒྱུད་གཉིས་ཆར་ནས་བརྒྱུད་པ་དྲུག་ལྷག་ཅིག་བྱུང་ཡོད་དོ།།

    བདེན་དཔང་ཡིག་ཆ་གཉིས་པ་ནི། ཤིན་ཏུ་གལ་ཆེ་སྟེ། དེ་ནི་ཡོངས་གྲགས་སུ་ནག་ཚོ་ལོ་ཙཱ་བའི་ཇོ་བོའི་ལམ་ཡིག་ཏུ་གྲགས་པ་དང་། མཚན་དངོས་ལ་༼ཇོ་བོ་རྗེ་མར་མེ་མཛད་ཡེ་ཤེས་དཔལ་གྱི་རྣམ་ཐར་རྒྱས་པ༽་བྱ་བ་ཡིན་ནོ།།༼ལྡེབ་མ20སྟེང་།༽དེ་ཉིད་ལས།  " ཇོ་བོའི་ཞལ་ནས་རྒྱའི་སྨན་རེ་ལ་བོད་ན་དོད་པོ་རེ་ཅི་ནས་འདུག་སྟེ་སླར་ལ་བོད་ཀྱི་སྨན་ནུས་པ་ཆེ་ཙམ་འདུག ཁྱད་པར་དུ་དབུལ་ཕོངས་རྣམས་ལ་ཕན་པར་འདུག་གསུང་། ཇོ་བོ་ཐང་སྨན་གྱི་སྦྱོར་བ་ཁ་བསོས་གཅིག་སྡེབ་བྱ་བ། མཁས་པ་གཡུ་ཐོག་གི་བརྒྱུད་པས་ཤེས་ཏེ་ནན་ཏར་སྨན་དཔྱད་ལ་མཁས་པ་ཡིན།  ཞེས་པ་དང་། ཡང་དེ་ཉིད་ལས།   ཇོ་བོས་བསམ་ཡས་སུ་སྨན་དཔྱད་ཡན་ལག་བརྒྱད་པ་གསུང་བའི་དུས་སུ།  " ཞེས་གོང་འཁོད་ཀྱི་ནང་དོན་དེ་ནི། གཡུ་ཐོག་རྙིང་མ་འཁྲུངས་ཡོད་མེད་ཐད་ནས་འགག་རྩར་ཐུག་པའི་བདེན་དཔང་ཞིག་སྟེ། ལར་ཡིན་ན་གཡུ་ཐོག་རྙིང་མ་འཁྲུངས་ཡོད་ཚུལ་གྱི་བདེན་དཔང་འདི་གཅིག་པུ་ལས་མི་དགོས་སོ།། དེ་ཅི་ཡིན་ཞེ་ན། ནག་ཚོ་ལོ་ཙཱ་བའི་ཇོ་བོའི་ལམ་ཡིག་གམ་༼ཇོ་བོ་རྗེ་མར་མེ་མཛད་ཡེ་ཤེས་དཔལ་གྱི་རྣམ་ཐར་རྒྱས་པ༽་ཞེས་པ་འདི་ནི། ནག་ཚོ་ལོ་ཙཱ་བས་གསུངས་ཤིང་ཕྱག་སོར་བས་ཡི་གེར་བཏབ་པ་ཞིག་རེད། དེའི་ཕྱིར།   ཡོངས་གྲགས་སུ་རྣམ་ཐར་དེ་ལ་ནག་ཚོའི་ཇོ་བོའི་ལམ་ཡིག་རྒྱས་པར་གྲགས། དཔེ་ཆ་འདིར་འཁོད་པའི་གཡུ་ཐོག་པ་ནི་གཡུ་ཐོག་རྙིང་མར་བཤད་པ་ནི་གོར་མ་ཆག་སྟེ། ཇོ་བོ་རྗེ་ནི་སྤྱི་ལོ་1054ལོར་སྐུ་གཤེགས་པ་དང་། ནག་ཚོ་ལོ་ཙཱ་བ་ཡང་སྤྱི་ལོ་1064ལོར་འདས་པ་རེད།       གཡུ་ཐོག་གསར་མ་ནི་སྤྱི་ལོ་1126ལོར་འཁྲུངས་པ་ཡིན་པས། དེས་ན་ཇོ་བོ་རྗེས་གསུངས་པའི་གཡུ་ཐོག་སྨན་པ་ནི་གཡུ་ཐོག་རྙིང་མར་གོ་བ་ནི་ལོ་རྒྱུས་ཤེས་བྱའི་རྨང་གཞི་ཙམ་ཡོད་པ་ཀུན་གྱིས་མཁྱེན་གསལ་ལྟར་རོ།།

  མདོར་ན།   གཡུ་ཐོག་རྙིང་མ་ཟེར་བ་ཞིག་བྱོན་ཡོད་པའི་བདེན་དཔང་ནི་གོང་གི་ལོ་རྒྱུས་ཡིག་ཚང་དེ་གཉིས་ཀྱིས་ར་སྤྲོད་བྱས་ཡོད་པས། ད་ནི་གཞན་ཁུངས་ལུང་གང་ཡང་མི་དགོས་ཏེ། གཟུར་གནས་བློ་ལྡན་སུས་ཀྱང་དེ་ལ་རྩོད་པ་བྱེད་དགོས་པའི་རྒྱུ་མཚན་ཅི་ཡང་མི་འདུག  ལར་ང་ལ་མཚོན་ན། གཡུ་ཐོག་རྙིང་མ་མེད་སོང་ན་བོད་ཀྱི་གསོ་རིག་གི་བསྟན་པ་མཇུག་རྫོགས་སོང་བ་ལྟ་བུའི་འཇིགས་སྐྲག་དང་བྲེད་ཤ་ནི་མི་ལང་ཡང་།   འོན་ཏེ། གོང་དུ་བཤད་པ་ལྟར། བདེན་པའི་གནས་ལུགས་ལ་འབད་པས་བཙལ་ནས་བདེན་པ་སྐྱོར་བ་ནི་ལོ་རྒྱུས་སྨྲ་བ་པོ་ཞིག་གི་འགན་འཁྲི་ཡིན་སེམས་ཀྱི་ཡོད།

  ཅེས་པ་འདི་ནི། ལྷ་རིས་པའི་མིང་ཙམ་ཐོབ་མཁན་ཚངས་དབང་དགེ་འདུན་བསྟན་པ་ཞེས་འབོད་པ་དེས་སྤྱི་ལོ་2015ཟླ་བ་4ཚེས་15་ལ་བྲིས་པ་དགེའོ།།

སྨོན་ཚིག་མེ་ཏོག་སྐེ་རྒྱན།

_________༢༠༡༨ལོའི་རྒྱལ་སྤྱིའི་བུད་མེད་དུས་ཆེན་ཉིན་གྱི་ཀ་ཕྲེང་འཕྲལ་བྲིས།

ཨ་མ་དྲིན་ཆེན་མ་དང་སྲིང་གཅེས་ཚོ། །

ཧ་ཅང་མཛའ་བའི་སྙིང་གི་མེ་ཏོག་ཚོ། །

ས་ཆེན་ཕྱེད་ཀའི་བདག་མོ་སྐྱེས་མ་ཚོ། །

ཤ་ཚ་སྙིང་ཉེ་ཁྱེད་ཚོ་སྐུ་ཁམས་བཟང་། །

ལ་ཉེ་བཟང་བོར་རློམ་པའི་དེ་རིང་ནི། །

ར་བ་གངས་རི་ཅན་གྱི་ཡུལ་ལུང་དང་། །

འ་ཞ་སོགས་ཀྱི་སྲོལ་ཙམ་མ་ཡིན་པར། །

ཡ་རབས་རྒྱལ་སྤྱིའི་བུད་མེད་དུས་ཆེན་ཟེར། །

ཞ་ལུའི་འདབ་སྟོང་བཞད་འདྲའི་ལང་ཚོ་ལ། །

ཟ་མ་མོ་སོགས་འབོད་པའི་རླབས་ཆེན་ཚོར། །

ཝ་མ་ཝོལ་གྱི་གཅམ་ཚིག་མ་ཡིན་པར། །

ཛ་ཡནྟུ་ཞེས་བདེན་ཚིག་སྒྲོག་བཞིན་ཡོད། །

ཚ་གྲང་དཀའ་སྡུག་གང་ལ་མི་འཛེམས་པར། །

ཙ་རི་བསྐོར་ལྟར་དཀའ་སྤྱད་སྡུག་རུས་ཀྱིས། །

མ་ལུས་བདེ་སྐྱིད་བུ་ལ་སྩོལ་འདོད་ཐུགས། །

བ་འོའི་མདངས་ལས་དཀར་ཞེས་བསྟོད་བཞིན་ཡོད། །

ཕ་ལས་བཀའ་དྲིན་ལྡབ་འགྱུར་ཆེ་བ་ཡི། །

པ་སངས་ལྟ་བུའི་ལྷག་བསམ་དྭངས་གཙང་གིས། །

ན་ཕྲ་ཉམ་ཐག་སྐྱོང་མཁས་རླབས་ཆེན་ཚོར། །

ད་ལྟ་རྟེན་འབྲེལ་ཤིས་ཚིག་འབུལ་བཞིན་ཡོད། །

ཐ་གྲུ་ཡངས་པའི་འཇིག་རྟེན་ཆེན་པོ་འདིའི། །

ཏ་ལའི་འདབ་ལྟར་རྒྱས་པའི་ཚེ་བསོད་དང་། །

ཉ་གང་ཟླ་འདྲའི་དཔལ་ཡོན་ཡོད་དོ་ཅོག །

ཇ་ཆང་ཚུལ་དུ་ཁྱོད་ཚོར་བཏེགས་བཞིན་ཡོད། །

ཆ་བསགས་གྲོང་གི་བདེ་དགའི་འཚོ་བ་དང་། །

ཅ་དག་བདེ་ལྡན་ཞིང་གི་ཟག་བྲལ་སྐྱེས། །

ང་ཅག་འཚོ་བའི་ཕྱེད་ཀར་གྱུར་བ་ཚོ། །

ག་སར་གནས་ཀྱང་ཡིད་ཀྱིས་སྟོབ་བཞིན་ཡོད། །

ཁ་བའི་མདངས་ལྡན་འོ་ཞོ་རྩམ་ཐུད་དང་། །

ཀ་ར་བུ་རམ་སིལ་ཏོག་སྐོམ་ཆུ་ཡིས། །

མགྲོན་བསུའི་སྟབས་ཀ་གཅིག་ཏུ་མ་འགྲིགས་ཀྱང་། །

སེམས་སྐྱེས་སྨོན་ཚིག་ལྷག་བསམ་གཙང་མ་ཡིན། །

དེང་གི་བརྒྱ་ཤོག་བཅུ་ཤོག་གཅུད་པའི་ཐུམ། །

ཁུག་དམར་སྐུར་བའི་ལག་བསོད་མ་མཆིས་མོད། །

ཨཱ་ལི་ཀཱ་ལིའི་སྲད་བུར་རྒྱུས་པ་ཡི། །

སྙན་ཚིག་མེ་ཏོག་འདབ་ཕྲེང་འདི་བཞེས་ཤིག །

ཅེས་ལས་ཚོགས་གྲོལ་རྗེས་ཀྱི་བར་གསེང་དུ་སྨིན་དབུས་དེས་ཉམས་མཚར་དུ་ཕུལ།

རེ་སྨོན་དཀར་པོ།

སྨིན་དབུས་པོ།

ཉི་མ་ལྟ་བུའི་འོད་ཟེར་ཁྱེད་ལ་མངའ། །

པད་དཀར་ལྟ་བུའི་དྭངས་གཙང་ང་ལ་འཛོམས། །

སྐྱེད་ཚལ་ལྟ་བུའི་ཁོར་ཡུག་ལེགས་པོ་ནས། །

སྦྲང་རྩི་ལྟ་བུའི་ཤེས་རིག་འཕེལ་བར་ཤོག །

སློབ་གླིང་ལེགས་པོ། 

ཁོར་ཡུག་བཟང་པོ།

ང་ཡི་སློབ་གླིང་ལེགས་པོ། 

ང་ཡི་ཁོར་ཡུག་བཟང་པོ།

ཕ་མ་ལྟ་བུའི་བྱམས་སྐྱོང་ཁྱེད་ཀྱིས་གནོངས། །

བུ་ཆུང་ལྟ་བུའི་གུས་ལུགས་ང་ཡིས་ཞུ། །

ཕ་ཡིས་བུ་སྐྱོང་ལྟ་བུའི་སློབ་གསོ་འདིས། །

གསེར་སྦྱང་ལྟ་བུའི་མི་གཤིས་འཇོན་པར་ཤོག །

དགེ་རྒན་བཟང་བོ། 

བཀའ་དྲིན་ཆེན་པོ།

ང་ཡི་དགེ་རྒན་བཟང་པོ། 

ང་ཡི་འོད་ཀྱི་བདག་པོ། 

མེ་ཏོག་ལྟ་བུའི་ལང་ཚོ་ཁྱེད་ལ་ཡོད། །

གཡུ་སྦྲང་ལྟ་བུའི་དུང་སེམས་ང་ལ་ཡོད། །

ཟེའུ་འབྲུ་ལྟ་བུའི་བརྩེ་འདང་མངར་མོ་འདིས། །

མིང་སྲིང་ལྟ་བུའི་མི་ཚེ་འཁྱོངས་པར་ཤོག །

སློབ་གྲོགས་བཟང་པོ།

 བརྩེ་འདང་ཟབ་མོ།

ང་ཡི་སློབ་གྲོགས་བཟང་པོ། 

ང་ཡི་ཞེ་འདང་ཅན་པོ། 

ཚིག་འདི་གང་འདོད་དུ་མི་བཀོལ་བར་ཞུ།  གཞན་གྱིས་བཀོལ་ཚར་བས། 

གནམ་གཤིས་ཡག་ཉིན་གྱི་ཚོར་ཟིན།

སྟེང་གི་གནམ་གཤིས་སྔོ་ཞིང་དྭངས་པ་དང་། །

དགུང་གི་ཉི་མའི་ཟེར་མདངས་ལྷོད་འཇམ་འོག །

དེ་རིང་ས་གཞིར་དྲོད་ཀྱི་སྣང་བ་རྒྱས། །

དེ་ཡིས་མེ་ཏོག་སྐྱེས་པའི་ལོ་རྒྱུས་དྲན། །

དུས་ཚོད་སྲང་མདའ་སིང་སིང་རྒྱུག་ཞོར་དུ། །

མིག་བརྡ་ལན་རེ་བྱས་པའི་ཚོར་ཤུགས་འགྲོས། །

སོར་མོའི་གར་ལ་འཁྱུད་པའི་དབྱངས་རོལ་སྟོང་། །

སེམས་ཀྱི་ཤོག་བུར་མཚོ་རུ་བསྐྱིལ་བ་མང་། །

སྣང་བ་ཡན་པར་ཤོར་བའི་ཚོར་སྣང་གིས། །

སྲིད་པའི་རླུང་ཁམས་གཡོས་པའི་འདུ་འགོད་ཀྱིས། །

སྙན་ངག་ལྷ་མོ་བཞད་པའི་འཛུམ་གོང་དུ། །

དབྱངས་ཀྱི་མེ་ཏོག་བཏབ་པའང་བརྗོད་ལས་འདས། །

འདས་དང་ད་ལྟའི་སྲད་བུར་རྒྱུས་པ་ཡི། །

སེམས་སྐྱེས་ཚིག་སྦྱོར་རྡོག་རེའི་མིག་ཕྲེང་ན། །

འབྱུང་འགྱུར་རེ་བ་བསུ་བའི་སྟ་གོན་གྱིས། །

ངག་རིག་མེ་ཏོག་སིལ་མའི་རེ་སྙེག་འཁྱིལ། །

དོན་གྱི་ཟེའུ་འབྲུ་མངར་མོའི་འགྲམ་ཆང་དང་། །

མཛེས་སྡུག་འཕྲུལ་བག་འདབ་སྟོང་གཡོ་སྟངས་རེས། །

ཡིད་ཀྱི་འགྱུ་བ་སྙན་ངག་ཞིང་ཁམས་སུ། །

འདྲེན་པའི་དཔལ་འདི་ལེགས་པའི་སྐྱེས་སུ་ཐལ། །

2018-3-1

༄༅    གླིང་གེ་སར་འཁྲུངས་སྐར་དུས་ཆེན་ལ་འབུལ།

ཨ་དཀར་འོད་ཀྱི་ཝེར་མ་གེ་སར་ཞེས། །

ཧ་ཅང་མཐུ་རྩལ་ལྡན་པའི་ལྷ་སྲས་ཤིག །

ས་སྟག་རྒྱལ་ཟླའི་ཚེས་ཆེན་བཅོ་ལྔ་ལ། །

ཤ་ཁྲག་གཟུགས་སུ་གདོང་རིགས་གླིང་ལ་འཁྲུངས། །

ལ་ལུང་བསེ་རག་འདྲེ་སྲིན་ཕྲ་མོ་ནས། །

རྭ་ལྡན་ངམ་རིང་ཀླུ་བཙན་རྒྱལ་པོ་སོགས། །

ཡ་མེད་ནག་ཕྱོགས་བདུད་རིགས་ཕལ་མོ་ཆེ། །

འ་ཟད་འུ་ཐུག་གནས་སུ་ཆམ་ལ་ཕབ། །

ཟ་བྱེད་སྲིན་པོ་ས་ཁར་ཐོན་འདྲ་བའི། །

ཞྭ་ལ་རྔ་འཕྲུ་ཅན་གྱི་ཧོར་འཇང་གཉིས། །

ཝ་ཚོགས་གདོང་ལྔའི་དབང་པོས་བཅོམ་པ་ལྟར། །

ཛ་དྲག་རུ་བཞིའི་དཔུང་གིས་ཕམ་པར་མཛད། །

ཚ་བ་རོང་ནས་ལ་དྭགས་གངས་སྒོ་མན། །

ཙ་རིའི་འདབས་ནས་ལི་ཡུལ་ཚུན་ཆད་ཀྱི། །

མ་རུང་གདུག་རྩུབ་ཅན་གྱི་མི་བསྲུན་ཀུན། །

བ་གླང་ལྷས་ལ་བཙུད་བཞིན་བྲན་དུ་བཀོལ། །

ཕ་རོལ་དགྲ་སྡེའི་རིགས་ཀྱང་ནང་གི་སེམས། །

པ་སངས་ལྟར་དཀར་ཡོངས་རྫོགས་བདེ་བར་བཀོད། །

ན་བ་གསོ་བའི་བདུད་རྩི་སྨན་རྫོང་ནས། །

དཱ་འུའི་ཚ་སོགས་འཚོ་བཅུད་ཟས་རྫོང་བླངས། །

ཐ་རམ་རིན་ཆེན་གཏེར་རྫོང་ཆེན་མོ་དང་། །

ཏཱ་ཟིག་ནོར་གྱི་གཡང་མཛོད་སོགས་ཀྱང་ཕབ། །

ཉ་བའི་ཨ་མགོ་ལྕགས་མིག་ཡན་ཆད་ནས། །

ཇ་རོང་སྟོབས་ལྡན་རྒྱལ་པོ་མན་ཆད་ཀྱི། །

ཆ་ལུགས་ཆོས་མིན་ནག་པོའི་ཕྱོགས་བཟུང་ནས། །

ཅ་ཅོ་སྒྲོག་རྣམས་ལྔ་ལམ་བརྫངས་ཚུལ་མང་། །

ང་ཚོའི་མེས་པོ་གླིང་རྗེ་གེ་སར་ཞེས། །

ག་ས་གང་ནས་རྟོགས་བརྗོད་ནོར་བུའི་ཕྲེང་། །

ཁ་བ་འཚུབ་བཞིན་སྤེལ་བའི་ཁ་སྣོན་དུ། །

ཀ་ཕྲེང་འདི་ཡང་རྟེན་འབྲེལ་མཚོན་པའི་སྐྱེས། །

འཁྲུངས༌སྐར་དགུ་བརྒྱ་བརྒྱད་ཅུའི་དཔལ་ལ་འབུལ། །

གླིང་དཀར་ལྷ་མིའི་དབུ་རྨོག་བརྟན་པར་ཤོག།།

ཅེས་འཁྲུངས༌སྐར་༩༨༠ཡི་ཉིན་སི་ཁྲོན་དཔེ་རྙིང་བསྡུ་སྒྲིག་ཁང་ནས་འཁྲུངས༌སྐར་དུས་སྟོན་ལ་རོལ་བཞིན་འབྲི་བཞིན་བྱས་སོ། །