མཚོ་སྔོན་པོ་བོད་ཡིག་ཟིན་བྲིས། བོད ཟིན མཚོ་སྔོན་པོ ཟིན་རྩོམ། | པར་རིས། | མཁན་པོ། | ཁྱུ་མཆོག | ཟིན་ཚོམས།
ཐོ་འགོད། | ནང་འཇུག ཉར་ཚགས་བྱེད་པ།

amdotibet

ཟིན་རྩོམ་འོས་སྦྱོར།

tibetmonk  2019-9-28 11:19:44

༧ དཔལ་གཤེན་བསྟན་དགའ་མལ་དགོན་ཆེན་གྱིས་གཙོ་གཉེར་གནང་བའི་རིག་གཞུང་ལོ་དེབ་ཆུ་མྱིག་དཀར་མོ་སྤྱིའི་འདོན་ཐེངས་བཞི་པ།


སྔོན་གླེང་།

   དེ་ཡང་མི་ལོ་ཁྲི་ཕྲག་ལས་བརྒལ་བའི་གནའ་བོའི་ཞང་ཞུང་ཤེས་རིག་གི་རྩ་བ་ལས་རྒྱས་པའི་བོད་མི་རིགས་ཀྱི་རིག་གཞུང་རྒྱ་མཚོ་ནི་གཏིང་མཐའ་བྲལ་བའི་འཛམ་གླིང་ཡང་རྩེའི་ཤེས་རིག་གི་ཉིང་བཅུད་དུ་ཆགས་ཡོད་ལ། དེང་གི་དུས་ལ་ཡང་མཚོན་ན་གནའ་བོའི་ཞང་བོད་ཤེས་རིག་ནི་ཆེ་ཟབ་ནས་ཆེ་ཟབ་ཏུ་འགྲོ་བཞིན་པ་མ་ཟད། ཆེད་ལས་ཞིབ་འཇུག་པ་ཡང་ཆེ་མང་ནས་ཆེ་མང་དུ་འགྲོ་བཞིན་པ་ནི་རང་གཞན་ཀུན་གྱིས་མཐོང་ཐོས་གནས་གསུམ་དུ་གྱུར་བ་ལྟར་རེད། དེ་ཕྱིར་ངེད་དགའ་མལ་དགོན་ཆེན་གྱི་ངོས་ནས་ཀྱང་མེ་ཏོག་མཉམ་བཞད་དང་མཁས་བརྒྱ་འགྲན་གླེང་ཞེས་པའི་དཔེ་ལྟར་དུ། མི་ལོ་སྟོང་ཕྲག་འགའི་ལོ་རྒྱུས་ཀྱི་ཆུ་རྒྱུན་རིང་བའི་<<ཆུ་མྱིག་དཀར་མོ་>>ཞེས་པའི་མཚན་གྱི་ཅོད་པཎ་གསོལ་བའི་རིག་གཞུང་ལོ་དེབ་ཞིག་ལོ་རེ་བཞིན་འགྲེམ་སྤེལ་གནང་སྟེ། གནའ་བོའི་ཞང་བོད་ཤེས་རིག་གམ་ཡང་ན་རང་མི་རིགས་ཀྱི་རིག་གཞུང་ལ་ཞབས་འདེགས་ཀྱི་དམིགས་ཡུལ་གཙོ་བོར་འབེན་པ་དང་། གཞན་རང་ཅག་མདོ་སྨད་ས་ཡི་ཐིག་ལེ་ཟིང་ཆུའི་མངའ་ཁོངས་ཀྱི་ཐུན་མོང་མ་ཡིན་པའི་རིག་གཞུང་དང་གོམས་གཤིས་སོགས་ཁྱབ་སྤེལ་གྱི་དོན་དང་། དེ་བཞིན་རང་ཡུལ་གྱི་ན་གཞོན་གསར་སྐྱེས་རྩོམ་པ་པོ་དུ་མ་ཞིག་སྐྱེད་སྲིང་བྱེད་པ་སོགས་ལ་ཆེད་དམིགས་ཀྱི་སྒོ་ནས་ལོ་ནས་ལོ་རུ་རྒྱུན་མཐུད་ཀྱི་འགྲེམ་སྤེལ་གནང་བ་ཡིན།

   དེ་ནས་༧སྐྱབས་རྗེ་མཁན་ཆེན་ཤེས་རབ་གཡུང་དྲུང་དབང་རྒྱལ་རིན་པོ་ཆེ་དང་༧དཔོན་སློབ་བསྐལ་བཟང་ཤེས་རབ་མཐར་ཕྱིན་རིན་པོ་ཆེ་རྣམ་གཉིས་ཀྱི་བཀའ་དགོངས་བཞིན་༢༠༡༨ལོའི་རིག་གཞུང་ལོ་དེབ། སྤྱིའི་འདོན་ཐེངས་བཞི་བ་<<ཆུ་མྱིག་དཀར་མོ་>>འདི་ཉིད་པར་སྐྲུན་དང་འགྲེམ་སྤེལ་གནང་བ་ཡིན་ལ། གཞན་ད་ལོ་རང་ཅག་༧བྱང་བྱ་དུར་དགའ་མལ་དགོན་ཆེན་གྱི་སྒྲུབ་རྒྱུད་བསྟན་པའི་མངའ་བདག་སྒྲུབ་སློབ་ཤེས་རབ་གཡུང་དྲུང་ཚུལ་ཁྲིམས་རིན་པོ་ཆེ་དགོངས་པ་བོན་དབྱིངས་སུ་གཤེགས་པའི་མྱ་ངན་རྗེས་དྲན་ཆེད་སྒྲིག་ཅིག་བཟོས་ཏེ་ཁོང་རིན་པོ་ཆེ་ལ་བཀའ་དྲིན་རྗེས་དྲན་གྱི་ཚུལ་དུ་སྤེལ་ཡོད་ལ། ལོ་དེབ་རྗེས་མ་ལ་ཡང་རང་ཅག་རྒྱལ་བསྟན་སྤྱི་དང་ཁྱད་པར་དུ་གཡུང་དྲུང་བོན་གྱི་བསྟན་པ་རིན་པོ་ཆེ། ཡང་ཁྱད་ཟིང་ཆུའི་བསྟན་པའི་མངའ་བདག་༧སྐྱབས་རྗེ་མཁན་ཆེན་ཤེས་རབ་ཚུལ་ཁྲིམས་མཐར་ཕྱིན་རིན་པོ་ཆེ་མཆོག་དགོངས་པ་བོན་དབྱིངས་སུ་སྐུ་ཞི་བར་གཤེགས་པའི་མྱ་ངན་རྗེས་དྲན་ཞུ་བའི་ཆེད་སྒྲིག་ལེ་ཚན་ཞིག་ཀྱང་འགོད་འཆར་ཡོད་པས་དེ་ལུགས་ཀྱི་རྩོམ་པ་པོ་ཡོངས་ནས་ཐུགས་བཞེས་གནང་བར་འཚལ།

ཞེས་རིག་གཞུང་ལོ་དེབ་<<ཆུ་མྱིག་དཀར་མོའི་>>རྩོམ་སྒྲིག་པས་༢༠༡༩་༥་༢༥ཉིན།

tibetmonk  2019-9-25 17:08:44

[རྩོམ་པ་པོ། ཞང་ཞུང་ཁྱུང་ལུང་དངུལ་མཁར་བ།][རྩོམ་ཁུངས། ཧི་མ་ལ་ཡའི་བོན།]

སྤྱིར་ལོ་རྒྱུས་ཁག་གི་ནང་དུ་ཁྱུང་དང་བྱ་རུའི་སྐོར་རྒྱ་ཆེན་བཞུགས་ཡོད་པས་འདིར་ལུང་འདྲེན་མང་པོ་བྱེད་རྒྱུ་མིན། འདིར་དཔེ་དཀོན་འདུར་རྒྱུད་ཕྱར་བ་ཐང་ཆེན་ལས་འཁོད་པའི་བྱ་རུའི་སྐོར་གྱི་དགོངས་པ་གཙོར་འདོན་བྱས་ཏེ་འགྲེལ་བཤད་རོབ་ཙམ་ཞུས་ན་བསམ།

དོན་ཚན་དང་པོ། ལོ་རྒྱུས་རྒྱབ་ལྗོངས་ཀྱི་སྐོར་བཤད་པ།

༡ ཁམས་གསུམ་་སྲིད་པའི་གྲོལ་ཕུག་ནི་བ་སྦལ་ཁྱུང་གསུམ་ལ་ཐུག་ཡོད་པའི་སྐོར་ནི། འདུར་རྒྱུད་ཕྱར་བ་ཐང་ཆེན་ལས། ད་ནི་བ་སྦལ་ཁྱུང་གསུམ་ལས། ཁྱུང་ཞེས་བྱ་བ་ནམ་མཁའི་རྩལ། མཐོ་རུ་དགུང་ཕུབ་ཁྱུང་གི་ཕུབ། སྣང་སྲིད་སྤྱི་རྒྱ་རླབས་ཀྱི་གཅོད། སྦལ་ཞེས་བྱ་བ་ས་གཞིའི་ནུས། དམའ་རུ་ས་བཏེང་སྦལ་པའི་བཏེངས། སྣང་སྲིད་ཆགས་པའི་གཞི་རྨིང་འཛིན། བ་ཞེས་བྱ་བ་སྐྱེ་འགྲོའི་ཕུགས། བར་དུ་སྲིད་བཀྲོལ་བ་ཡི་བཀྲོལ། ཡོད་ཁམས་ལྷ་མིའི་རུ་མ་སྤེལ། དེ་ལྟར་བ་སྦལ་ཁྱུང་དང་གསུམ། ཡར་ཐུག་སྲིད་པའི་རྩེ་ལ་ཐུག ཅེས་སོགས་བ་སྦལ་ཁྱུང་གསུམ་ནས་གཟུགས་མེད་སྐྱེ་མཆེད་མུ་བཞི་ནས་རིམ་བཞིན་ཁམས་གསུམ་སྲིད་པ་གྲོལ་ཚུལ་བཤད་ཡོད།

༢ སྲིད་པ་ཡེ་སྨོན་འཕྲུལ་གྱི་རྒྱལ་པོའི་སྐོར་ནི།དེ་ནས་སྲིད་པ་ཐོག་མའི་སྲིད་པའི་རྗེ་བོ་སྲིད་པ་ཡེ་སྨོན་རྒྱལ་པོ་ཞེས་པ་དེ་ལ། སྲིད་པ་ཡེ་སྨོན་འཕྲུལ་གྱི་རྒྱལ་པོ། སྲིད་པ་སྨོན་པའི་མི་བུ་ལུམ་ལུམ། ཐ་ཚན་ཧི་སངས་རྐྱ། ཐམས་ཅད་སྔ་བའི་རྒྱལ་པོ། གཙུག་ཁྲི་བཙན་པོ། མང་པོ་བཀུར་བའི་རྒྱལ་པོ། ཞེས་པ་རྣམས་མིང་གི་རྣམ་གྲངས་ཡིན་ཞིང་དེ་ནི་དེ་ལས། དེ་འོག་སྨོན་ཡུལ་གྲུ་བཅུ་རུ། སྨོན་རི་དབུ་བཙུན་རྩ་བ་དེར། སྲིད་པ་ཡེ་སྨོན་རྒྱལ་པོ་བཞུགས། ཡོད་ཁམས་རུ་མ་དེ་ཡི་འཛིན། སྣང་སྲིད་ཁ་ལོ་དེ་ཡི་བསྒྱུར། སྐུ་ལས་སྤྲུལ་པའི་སྲས་ཀྱང་བསྐྱེད། ཅེས་དང་། གཏོ་རི་དཔྱད་མཚོའི་འགྲམ་ཤོད་དུ། གོང་དུ་སྨོན་བ་བྱེད་པ་ལ། སྨོན་རི་སྨོན་མཚོ་སྨོན་ལམ་གྲུབ། འབྲུག་ཁྱུང་སེང་གསུམ་ལ་སོགས་པ། ཡེ་གྲུབ་ལྷ་ཡི་རྟེན་བའོ། ཞེས་སོགས་འཁོད་ཡོད།

༣ ཡེ་སྨོན་རྒྱལ་པོའི་སྲས་གྱི་སྐོར་ནི།དེ་ནས་སྨོན་ལམ་ཕྱི་ཏ་ལ། ཡེ་སྨོན་རང་གིས་དགྱེས་སྡེ་རུ། ཆུ་ལྕམ་རྒྱལ་མོ་སྨོན་ལས་གྲུབ། ཡེ་སྨོན་ཆུ་ལྕམ་བཤོས་པའི་སྲས། ཞེས་དང་། སྨོན་སྲས་ལྷ་མི་གྲངས་མང་ཡང་། གདུང་བརྒྱུད་ཕྱྭ་དམུ་གཙུག་གིས་བཟུང་། །ཞེས་དང་། དགུང་སྟེང་ཕྱྭ་དམུ་གཙུག་གསུམ་དེ། དཔའ་འཛང་རྗེ་གསུམ་ཀུན་གྱི་ཕུགས། ས་སྟེང་རྒྱལ་རྒྱུད་ཐམས་ཅད་དེ་ལས་གྲོལ། །ཞེས་དང་།

༤ ཡིག་ཚངས་ཀྱི་སྐོར་ནི། སྤྱིར་གནའ་བོའི་སྐབས་སུ་ཡིག་ཚངས་གནང་ཞེས་པ་མི་ཕར་ཆེ་བ་དེས་བྱ་དགའ་སྤྲད་པ་ལ་གོ་སྲིད་ལ་དེ་ནི་སྤུ་རྒྱལ་སྲོང་བཙན་སྒམ་པོའི་སྐབས་སུ་དར་བའི་ལམ་ལུགས་ཤིག་ཡིན་པར་ངོས་འཛིན་བྱེད། དོན་དུ་ཡིག་ཚངས་ཞེས་པ་ནི་དེ་ཙམ་དུ་མ་ཡིན་ཞིང་ཆེས་གནའ་བོའི་སྐབས་སུ་རི་བོ་གངས་ཅན་པའི་ལྗོངས་སུ་དར་བའི་ཐོབ་དང་གོ་གནས་སྤྲད་པའི་ཕྱག་རྟགས་གཏན་ཚིག་གི་རིང་ལུགས་ཧ་ཅང་རྩ་ཆེན་ཞིག་ཡིན། དེ་ནི་དཔེར་ན་སྤུ་རྒྱལ་གཉའ་ཁྲི་བཙན་པོའི་སྐབས་སུ་ཡིག་ཚངས་སྡེ་དགུའམ་སྡེ་དྲུག་སོགས་ཡོད་པར་བཤད་པའི་སྐབས་སུ། བློན་པོ་རབ་ལ་གཡུ་དང་གསེར་གྱི་ཡི་གེ་ཆེ་ཆུང་། བློན་པོ་འབྲིང་ལ་དངུལ་དང་ཕྲ་མེན་གྱི་ཡི་གེ་ཆེ་ཆུང་། བློན་པོ་ཐ་མ་ལ་ཟངས་དང་ལྕགས་ཀྱི་ཡི་གེ་ཆེ་ཆུང་བཅས་སྤྲོད་སྲོལ་ཡོད་པ་ལྟ་བུ་ཡིན། དེ་ལ་ཡི་གེའམ་ཡིག་ཚངས་ཞེས་བཤད་མོད་དོན་དུ་ཡིག་ཚངས་ཞེས་ཚང་མ་ཡི་གེ་ཡིན་པའི་ངེས་པ་མེད་ཅིང་ལོ་རྒྱུས་ཐོག་ཏུ་ཐོབ་དང་གོ་གནས་རྒྱུན་འཇག་ཏུ་གནས་པའི་མཚོན་བྱེད་དུ་་ཕྱག་རྟགས་སྤྲད་པ་ཞིག་ཡིན། དེའང་གཉའ་ཁྲི་བཙན་པོ་སྤུ་རྒྱལ་བཙན་པོར་གཏོང་བའི་སྐབས་སུ། ཡབ་ཀྱིས་སྐུ་བླ་རི་རྫི་དང་། སྐུ་སྲུང་ལྷེའུ་རིན་ཆེན་བདུན། ལྷེའུ་གླང་རུ་དཀར་སོགས་ཕྱྭ་བརྒྱུད་དང་འབྲེལ་བའི་རིགས་ཀྱི་སྐུ་སྐལ་ཡིག་ཚངས་གནང་བ་དང་། ཞང་པོས་དམུ་ཁྲབ་ཤོལ་མོ་དང་། དམུ་རྨོག་དམུ་ལུགས། དམུ་མདུང་ཟངས་ཡག དམུ་ཞག་གམ་དམུ་འབྲེང་། དམུ་སྐས་ཐེམ་དགུ་སོགས་དམུ་ཡི་ནོར་སྐལ་ཡིག་ཚངས་གནང་བ་བཅས་དེ་ཚོའི་རིགས་ལ་ཡིག་ཚངས་ཞེས་བརྗོད་པ་མ་ཟད། དེ་ནས་སྤུ་རྒྱལ་རིམ་བྱོན་ལ་ཡིག་ཚངས་དེ་དག་སུ་ལ་གནང་བའམ་ཐོབ་པ་ཡིན་ན་སྤུ་རྒྱལ་བཙན་པོའི་གོ་གནས་དེ་ལ་ངེས་པ་ཡིན། ཡིན་ནའང་གྲི་གུམ་བཙན་པོའི་སྐབས་སུ་ཞང་པོ་དམུའི་ཡིག་ཚངས་ཀྱི་གྲལ་དུ་དམུ་འབྲེང་ངམ་དམུ་ཐག་སོ་སོའི་རག་གྲིས་བཅད་པས་དེ་ནས་བཟུང་སྤུ་རྒྱལ་བཙན་པོའི་སྤུར་ས་ལ་ལུས་པའི་བཤད་སྲོལ་ཡོད་པ་ལྟར། སྤུ་རྒྱལ་རིམ་བྱོན་རྣམས་ལ་གོང་དུ་ཡབ་ཡུམ་གྱི་གནང་པའི་ཡིག་ཚངས་རྣམས་སྤུ་རྒྱལ་བཙན་པོ་ཚང་མ་ཐོབ་ཡོད་པའི་ངེས་པ་མེད། མདོར་ན་གནའ་བོའི་སྐབས་སུ་ཕྱག་རྟགས་སམ་ཡིག་ཚངས་ཞེས་པ་ནི་རྩ་ཆེན་པོ་དེ་ལྟར་རྩི་སྲོལ་བྱུང་ཡོད་པར་ཤེས་ཤིང་གོ་བའང་དེ་ལྟར་ཞིག་ལེན་ཐུབ་པ་དགོས།


དོན་ཚན་གཉིས་པ། ཡེ་སྨོན་གྱིས་ཕྱྭ་རྗེ་ལ་གནང་བའི་བྱ་རུའི་སྐོར།

༡ སྨོན་སྲས་ཕྱྭ་རྗེ་ལ་ཕྱག་རྟགས་བྱ་རུ་གནང་བའི་སྐོར་ནི། འདུར་རྒྱུད་ཕྱར་བ་ཐང་ཆེན་ལས། མི་རྒྱུད་འཛིན་པ་གསུམ་ཙམ་བསྐོས། ཕྱྭ་དམུ་གཙུག་གསུམ་དེ་ལ་ཟེར། སྨྲ་རྒྱལ་ཆེ་གསུམ་ཞེས་ཀྱང་བྱ། དེ་གསུམ་མི་རྒྱུད་འཛིན་དགོས་པ། གང་དུ་གཉན་བའི་ལྷ་རེ་གནང་། ཁ་ལོ་བསྒྱུར་བའི་གཤེན་རེ་བསྐོས། རྗེ་རྒྱལ་ཡིག་ཚང་རྟགས་རེ་བྱིན། འདུལ་བའི་ཞིང་ཁམས་ཡུལ་རེ་བགོས། རྒྱལ་གྱིས་ཆ་རྐྱེན་དཀོར་མཛོད་རེ། རྒྱལ་སྲིད་འཛིན་བའི་ཁབ་རེ་བཞེད། ཞེས་དང་། ཡང་མི་རྒྱལ་རྗེ་ཡི་ཕྱག་རྟགས་ནི། རིན་ཆེན་གསེར་རྟགས་རྒྱལ་མཚན་ལ། བྱ་རུ་བུམ་པ་ཞལ་སྤྲོད་ཅན། ཕྱྭ་ཡི་རྒྱལ་པོ་དེ་ལ་བྱིན། ཞེས་དང་། ཕྱག་རྟགས་དེ་གསུམ་ཡོན་ཏན་གྱིས། ཕྱྭ་དམུ་གཙུག་དང་གསུམ་བོ་ལས། བུ་རྒྱུད་རྟགས་ཅན་གྲངས་སུ་བྱུང་། ཞེས་གསུངས་པས་སྲིད་པ་ཡེ་སྨོན་རྒྱལ་པོའི་རྒྱལ་པོའི་གདུང་འཛིན་སྨོན་སྲས་ཕྱྭ་དམུ་གཙུག་གསུམ་ལ་ཡུལ་ཀྱི་སྐལ་པ་རེ་སོགས་རྒྱལ་གཞིས་གནང་བགོས་བྱས་པའི་སྐབས་སུ་སྨོན་སྲས་ཕྱྭ་རྗེ་ལ་གསེར་ལས་གྲུབ་པའི་མི་ནུབ་རྟགས་ཀྱི་མཚོན་པའི་རྒྱལ་མཚན་དང་། སྲིད་པའི་རྗེ་བོའི་མཚོན་བྱེད་དུ་བྱ་རུ། ཕྱྭ་ཡི་རིགས་ནི་ཕྱྭ་ཚེའི་དང་གཡང་གི་འབྱུང་གནས་སམ་རུ་མའི་བདག་པོ་ཡིན་པའི་མཚོན་བྱེད་དུ་བུམ་པ་བཅུད་ལྡན་དང་། ཐོད་པ་ཞལ་སྤྲོད་དུ་གནང་བས་ཕྱྭ་ཡི་བྱིན་རླབས་ཀྱི་ནུས་པ་དང་ཆེ་བའི་ཡོན་ཏན་ལོ་རྒྱུས་ཀྱི་གཏན་ཚིག་ནི་དུས་དེ་ནས་འགོ་བཟུང་ཏེ་བྱུང་བ་ཞིག་ཡིན་ངེས།

༢ བྱ་རུའི་ཕྱག་རྟགས་ནི་སྲིད་པའི་རྗེ་བོའི་གོ་གནས་ཀྱི་མཚོན་བྱེད་ཡིན་པའི་སྐོར་ནི། འོ་ན་དེ་ལྟར་ན་བྱ་རུ་ནི་སྲིད་པའི་རྗེ་བོ་རུ་གོ་བའི་སྒྲུབ་བྱེད་ག་རེ་ཡོད་དམ་ཞེ་ན། དེའང་ཇི་སྐད་དུ། སྲིད་པ་གསུམ་གྱི་རྩེ་མོ་ན། སྤྱི་རྗེ་ཁྱུང་ཆེན་སྐུ་བཞུགས་པ། ཞེས་དང་། འགྲན་ཟླ་བྲལ་བ་སྤྱི་རྗེ་ཁྱུང་གི་སྲས། གནམ་གྱི་བསྐོས་པ་འཁོར་ལོ་དབང་བསྒྱུར་རྒྱུད། ཞེས་དང་། ཁྱུང་ནི་སྲིད་གསུམ་རྗེ་བོ་སྟེ། སྲིད་རྗེ་འབྲང་དཀར་ཉིད་དང་སྦྱར། ཞེས་སྲིད་པ་གསུམ་ཞེས་ཡེ་སྲིད་དང། བྱེད་བྱས་། རྒྱུ་མཐུན་བཅས་གསུམ་དང་དེ་ལྟར་ཁྱུང་ནི་སྲིད་པ་གསུམ་གྱི་སྤྱི་རྗེ་རུ་ངོས་འཛིན་བྱས་པ་ལྟར་དང་། སྲིད་པ་ཡེ་སྨོན་རྒྱལ་པོའི་སྲས་སུ་སྨོན་སྲས་ཕྱྭ་རྗེ་ལ། མིང་གི་རྣམ་གྲངས་སུ་ཕྱྭ་རྗེ་སྒམ་པོ། སྲིད་རྗེ་འབྲིང་དཀར། ཕྱྭ་རྗེ་རིང་དཀར། ལྷ་བུ་སྤྱི་གཙུག་རྒྱལ་བ། ཕྱྭ་རྗེ་འོད་དཀར། སྲིད་བུ་འདོད་ཙམ། འཕྲུལ་སྲས་དབང་ལྡན་ཞེས་བརྗོད་ཅིང་། ཁྱུང་ནི་སྲིད་རྗེ་འབྲིང་དཀར་ལ་སྦྱར་པ་ལྟར། མདོར་ན་སྲིད་པ་ཐོག་མའི་རྒྱལ་རྒྱུད་འདི་ནས་བཟུང་ཧོས་རྗེ་ཁྲི་ཝེར་སོགས་ཞང་རྒྱལ་རིམ་བྱོན་རྣམས་ཀྱི་མཚན་གྱི་ཆེ་བར་ལིག་མི་རྐྱའམ་སྲིད་པའི་རྗེ་བོ་ཞེས་འབོད་ཅིང། གསེར་གྱི་བྱ་རུ་ཅན་སོགས་དབུ་རྨོག་ཏུ་བྱ་རུའི་རྒྱན་སྲོལ་དང་། འཛམ་གླིང་ཡུལ་ཆེན་དང་ཡུལ་ཕྲན་རྣམས་ཀྱི་སྤྱི་རྗེ་ནི་རི་བོ་གངས་ཅན་པའི་རྗེ་བོ་ལ་ངོས་འཛིན་བྱས་ཡོད་པའི་ལོ་རྒྱུས་མི་ཉུང་བ་བྱུང་འདུག་པ་འདི་རྒྱུ་མཚན་ངེས་ཅན་ཞིག་ལ་བསྟེན་ཏེ་བྱུང་བ་ཞིག་ཡིན། དེས་ན་ཕ་གཞིས་སུ་བུ་ཆེ་བས་འཛིན་དགོས་པའི་ལོ་རྒྱུས་ཡོད་པ་བཞིན་སྨོན་སྲས་ཕྱྭ་དམུ་གཙུག་གསུམ་གྱི་ནང་ནས་ཕ་གཞིས་གཙོ་བོ་ནི་ཕྱྭ་ཡིས་འཛིན་ཡོད་པར་ངེས། དེ་ལྟར་སྲིད་པ་ཐོག་མའི་སྐབས་སུ་མཐོ་སྒང་གངས་ཅན་བསིལ་མོའི་ལྗོངས་སུ་ཆབ་སྲིད་ཀྱི་ཐོག་ནས་ཕྱྭ་ཡི་རིགས་སུ་གྲགས་ཆེ་བར་མངོན་ཞིང་། དེ་ནས་ཕྱིས་སུ་དམུ་རིགས་རྒྱལ་པོ་སྟོན་པ་གཤེན་རབ་མི་བོ་བྱོན་པ་དུས་མཚུངས་དམུ་ཡི་རྗེ་རྒྱལ་རིགས་རྣམས་ལ་གྲགས་ཆེ་བ་བྱུང་བས། སྔོན་གྱི་ལོ་རྒྱུས་རྣམས་སུ་ལྟར་ནས་གངས་རི་མཚོ་གསུམ་ནི་ས་ཚིགས་ཀྱི་ཡུལ་དབུས་དང་། ཞང་ཞུང་ཕུགས་པ་སྟག་གཟིག་འོལ་མོ་ལུང་རིང་ལ་བོན་ཚིགས་ཀྱི་ཡུལ་དབུས་ཞེས་རིགས་གཉིས་སུ་དབྱེ་སྲོལ་བྱུང་འདུག་པས། དེ་ནི་ས་ཚིགས་ཀྱི་ཡུལ་དབུས་ཞེས་པ་ནི་རྒྱལ་ཁམས་དེའི་ཆབ་དཔལ་རིག་འབྱོར་གྱི་ལྟེ་བའི་ས་གནས་ཞིག་དང་། བོན་ཚིགས་ཀྱི་ཡུལ་དབུས་ཞེས་པ་ནི་གཡུང་དྲུང་བོན་ཐོག་མར་དར་སའི་ལྟེ་བ་དེ་ཡིན་པ་ཧ་གོ་དགོས། གཞན་དུ་ན་ཞང་ཞུང་སྒོ་ཕུགས་བར་གསུམ་གྱི་སྐོར་བཤད་ཡོང་དུས་དེ་ནི་རྒྱབ་ཁབ་ཅིག་གམ། ཡང་ན་གཡུང་དྲུང་བོན་བསྟན་དར་གནས་ཀྱི་ཁྱབ་ཡུལ་ཞིག་གམ། ཡང་ན་ས་ཚིགས་དང་བོན་ཚིགས་གཉིས་པོར་གཙོ་བོ་ག་རེ་ཡིན་མིན་དང་དབྱེ་བ་གསལ་པོར་འབྱེད་མི་ཤེས་པ་གྱུར་བཞིན་ཡོད་པ་ནི་འདི་ལ་ཐུག་ཡོད་པར་ངེས་སོ།།

མཆོད་རྟེན་དབུ་རྩེར་བྱ་རུ། ༣ བྱ་རུའི་སྤྱོད་སྒོའི་སྐོར། གོང་དུ་བཤད་པའི་བྱ་རུ་ནི་ཁྱུང་གི་ར་ལ་གོ་དགོས་ཤིང་དེ་ལྟར་ཁྱུང་གི་ར་ལ་བྱ་རུ་ཞེས་བརྗོད་པ་དང་ཁྱུང་རུ་དབྱིབས་མཚུངས་པའི་ར་ལ་ཁྱུང་རུ་ཞེས་འབོད་པའི་ཚུལ་གསུངས་ཡོད། གང་ལྟར་བྱ་རུ་ནི་སྲིད་པའི་རྗེ་བོའི་མཚན་ཐོབ་པའི་རྒྱལ་པོ་རྣམས་ཀྱི་དབུ་རྨོག་ཏུ་བྱ་རུའི་རྒྱན་སྲོལ་ཡོད་པ་མ་ཟད། བྱ་རུ་ཐོབ་པའི་གཤེན་བརྒྱད། ཅེས་བོན་གཤེན་རྩ་ཆེན་དག་གི་དབུ་ལ་བྱ་རུ་གསོལ་སྲོལ་ཡོད་པ་དང་། ཁྲོ་བོ་དབང་ཆེན་གྱི་གཞུང་ལས། དབུ་ལ་བྱ་རུ་ཁྱུང་རུ་གསོལ། ཞེས་ཡི་དམ་ལྷ་ཡི་དབུ་ལ་བྱ་རུ་གསོལ་སྲོལ་ཡོད། ལྷག་ཏུ་གཡུང་དྲུང་བོན་ལུགས་སུ་ཅི་ཡང་སྤྲུལ་པའི་མཆོད་རྟེན་བརྒྱ་དང་ཉི་ཤུ་དང་།གསས་ཁང་།གཞལ་ཡས་ཁང་སོགས་ཕར་ཆེ་བའི་དབུ་རྩེར་བྱ་རུ་དང་བྱ་གྲིའི་བརྒྱན་པ་ཡིན། ད་དུང་ཡ་མཚན་པ་ཞིག་ལ་མངའ་རིས་ཁུལ་འདིར་དགའ་སྟོན་རྟེན་འབྲེལ་གྱི་སྐབས་སུ་ཆང་ཕོར་དང་སྡེར་མ་སོགས་ཀྱི་ཁ་ལ་མར་གྱིས་སྲུང་བཙུགས་པའི་མར་རྒྱན་ལ་ཡར་དགའ་ཟེར་ཞིང་། དེ་ནི་ཆང་ཅན་དང་ཆང་ཕོར་སོགས་ཀྱི་ཁ་ལ་བརྒྱན་པའི་ཡར་དགའ་འམ་མར་རྒྱན་དེའི་དབྱིབས་ནི་བོན་གྱི་མཆོད་རྟེན་རྙིང་པའི་དབུ་རྩེའི་བྱ་རུ་དང་ཆ་མཚུངས་པ་ཞིག་རེད། དེའི་མིང་དུ་ད་ལྟ་མངའ་རི་བས་བྱ་རུ་ཞེས་པའི་སྒྲ་ཅི་བཞིན་འབོད་བཞིན་པ་ཡིན། དེ་ནི་ད་ལྟ་སྤུ་རོང་། རྩ་མདའ། སྒར་སོགས་མངའ་རིས་སུ་ལུགས་དེ་མ་ཉམས་པར་གནས། དེ་བཞིན་པ་ཀི་སི་ཐན་གྱི་བྲུ་ཤ་ནས་ནས་བཟུང་བོད་ཡུལ་སྟོད་སྨད་ཀྱི་རྡོ་བརྐོས་རི་མོའི་ཁྲོད་དུ་བྱ་རུའི་རི་མོ་ཡོད་པའི་མཆོད་རྟེན་མང་དག་ཅིག་འདུག་པ་འདི་དག་ནི་ལོ་རྒྱུས་ཀྱི་བདེན་དཔང་ཞིག་ལོས་ཀྱང་ཡིན། ང་ཚོ་མཐོ་སྒང་བསིལ་མོ་ལྗོངས་རི་བོ་གངས་ཅན་པ་གནའ་བོའི་མེས་པོ་ཚོས་གཡུང་དྲུང་དང་བྱ་རུ་སོགས་ཕྱག་རྟགས་སམ་ཡིག་ཚངས་ཀྱི་སྐོར་ལ་ཞིབ་འཇུག་ཡང་དག་ཅིག་བྱེད་ཐུབ་ནས་ལོ་རྒྱུས་ཀྱི་རྒྱ་མདུད་གལ་ཆེན་ཞིག་དགྲོལ་ཐུབ་ངེས་སུ་ཡིན་ནོ།།

ཞང་ཞུང་ཁྱུང་ལུང་དངུལ་མཁར་བ་ལ་ཉིན་ཤས་གོང་དུ་ཚོར་བ་རྣོན་པོ་ཞིག་གིས་བསྐུལ་མོད་ད་བར་དུ་མ་ཁོམ་པ་ལུས་སོང་པས་དེ་རིང་ལུང་འདྲེན་མང་པོའི་སྤྲོས་པ་སྐྱུང་ཞིང་ཉིན་ཐོའི་ཚུལ་དུ་ནར་མར་བྲིས་ཏེ་སྤེལ་བའོ། །༢༠༡༩-༩-༣ཉིན།

tibetmonk  2019-9-24 9:53:06

[རྩོམ་པ་པོ། བྲག་མགོ་དགེ་བཤེས་ཚེ་དབང་རྒྱལ་མཚན།][རྩོམ་ཁུངས། ཧི་མ་ལ་ཡའི་བོན།]

(རྒྱལ་སྤྱིའི་བོད་རིག་པའི་ཚོགས་ཆེན་ཐེངས་བཅུ་གསུམ་པའི་སྟེང་དུ་སྒྲོག་སྦྱོང་ཟིན་པའི་རྩོམ་ཡིག་མ་ཟིན།)

[ནང་དོན་གནད་བསྡུས།] དཔྱད་གླེང་འདིའི་ནང་དུ་ཞང་བོད་ཡུལ་སྲོལ་རིག་གཞུང་ལ་འབྲེལ་བ་ཆེས་ཟབ་པའི་འཕྲེང་བའི་སྐོར་ཡིན། འཕྲེང་བ་སྤྱི་ཡི་ངོ་བོ་གསལ་བོ་བསྟན་ནས། རྫས་འཕྲེང་གི་གོ་དོན་དང༌། ཞང་བོད་ཡུལ་གང་ནས་ཐོག་མར་བྱུང་མིན་དང་དགོས་དམིགས་སོགས་ལ་སྡེ་ཚན་དགུ་རུ་ཕྱེས་ཏེ་ཅུང་ཟད་ཁ་གསལ་ཚུལ་དུ་དཔྱད་ཞིབ་བྱས་ཡོད།

[བརྡ་ཆད་གཙོ་བོ།] འཕྲེང་བ། རྫས་འཕྲེང༌། མཚོན་དོད། སྤངས་བྱ་དྲུག དམ་ཚིག་བཅུ་གཅིག རབ་གནས།

སྤྱིར“འཕྲེང་བ”འདི་ལ་བཞེད་དགོངས་དུ་མ་ཡོད་པར་མ་ཟད་ཚིག་གི་ཆ་ནས“འཕྲེང་”ཞེས་པར་འབྲི་ཚུལ་ཡང་“ཕྲེང་བ’’དང༌། “སྦྲེང་བ།’’ “འཕྲེང་བ’’ཞེས་བྲིས་ཡོད་པ་མང་ཡང་བོན་ལུགས་སུ་ཁུངས་ལྡན་གྱི་དཔྱད་གཞི་ཁག་ནས“འཕྲེང་”ཞེས་པར། “འཕྲེང་བ’’དང༌། “བསྒྲོད་བྱེད་འཕྲེང་བ། སེར་ཕྲེང༌། སེམས་འཕྲེང་བ།”1ཞེས་བྲིས་ཡོད། གཞན་ཡང་འཕྲེང་ཞེས་པ་ལ“སེར་འཕྲེང་’’དང་“གྲལ་གྱི་འཕྲེང༌།’’ “ཞེ་འཕྲེང་བའམ་ཡིད་འཕྲེང་།’’ “རྒྱུ་སྐར་གྱི་འཕྲེང་།’’ “འཁོར་བའི་ཕྱོགས་སུ་མི་འཕྲེང་བར’’ཞེས་པ་ལས་སོགས་འཇུག་ཚུལ་མང་མོད་ཀྱང་སྐབས་བབས་ཀྱི་འཕྲེང་བ་འདི་ལུང་དང་འབྲེལ་བའི་སྒོ་ནས་དཔྱད་པ་ལ།

དང་པོ། འཕྲེང་བའི་ངོ་བོ་ཇི་ལྟར་ཡིན་པའི་ཚུལ་ལ་དཔྱད་པ།

སྤྱིར་འཕྲེང་བའི་ངོ་བོ་ནི་བསྙེན་འཛབ་རིགས་གྲངས་སུ་བརྩི་བགྲང་གནང་འོས་པའི་རྫས་འཕྲེང་ཁོ་ནར་ངོས་འཛིན་གནང་མཁན་ནི་མང་ཡང་དེ་ཙམ་གྱིས་འཕྲེང་བའི་ངོ་བོ་འཐད་ལྡན་ཞིག་ཏུ་ངོས་འཛིན་དང་ཡི་རངས་ཞུ་བ་ནི་ནོར་འཁྲུལ་ཞིག་ཏུ་བརྩི་རུང་བར་སྙམ། དེས་ན་འཕྲེང་བའི་ངོ་བོ་ནི“ངན་སོང་འཁོར་བའི་ཕྱོགས་ལ་ཡིད་ཀྱི་འཕྲེང་ཐག་བཅད་ནས། མྱང་འདས་ཐར་པའི་ཕྱོགས་ལ་ཡིད་འཕྲེང་བར་བྱེད་པའི་བརྡ་ཐབས’’ཏེ་འཐད་ལྡན་དུ་འཁུམས་ཤིང༌། “འཁོར་བའི་ཕྱོགས་སུ་མི་འཕྲེང་བར། དམ་པའི་དོན་ལ་འཕྲེང་བ་བསྐྱེད། དོན་ལ་ངེས་པར་འཕྲེང་བ་དེ།’’2 ཞེས་གསུངས། འཕྲེང་བའི་ངོ་བོ་ནི་ཇི་ལྟར་དཔྱད་ཀྱང་ཞེ་འཕྲེང་བའམ་ཡིད་འཕྲེང་བ་ཁ་ནང་དུ་ཕྱོགས་ནས་བསམ་བློའི་འཁོར་ཕྱོགས་ཤིག་དགོས་པ་སྟེ། འཇིག་རྟེན་འཁོར་བའི་ཕྱོགས་ལ་ཡིད་མི་འཕྲེང་བའམ། བག་ཆགས་ངན་པའི་རྗེས་སུ་འབྲེང་ནས་རྒྱུ་ནོར་ལོངས་སྤྱོད་དང་ཡུལ་མཁར་གཉེན་ཉེ་མཛའ་དུ་སོགས་ལ་ཡིད་སེམས་ཀྱི་ཞེན་པ་བཅད་ནས། དོན་དམ་མྱང་འདས་ཐར་པའི་ཕྱོགས་སུ་ཞེ་འཕྲེང་བ་ལ་གོ་བར་སྙམ་ལ། ཕྱི་རྫས་འཕྲེང་དང་འཕྲེང་བའི་དབར་ཁྱད་འབྱེད་དགོས་པ་ཡིན། ‘‘ནང་དོན་དང་སྦྱོར་ན། གང་ཞིག་ཡུལ་གྱི་རྗེས་སུ་སེམས་སོང་བའམ། ཤོར་བ་དང་། ཆགས་པ་ལྟ་བུ་ལ་གོ། དཔེར་ན། གྲོགས་པོ་ལ་སེམས་འཕྲེང་བ་དང་མ་ཡིས་བུ་ལ་སེམས་འཕྲེང་བ།’’3 ཞེས་བརྗོད་པ་ཉུང་ལ་དོན་གནད་ཟབ་སྟོན་འདིས་འཕྲེང་བའི་དོན་གྱི་གནད་དུ་འཁེལ་བའི་མཛུབ་སྟོན་གནང་ཡོད་པས་ཐབས་ལམ་འདི་རིགས་ལས་འཕྲེང་བའི་ངོ་བོར་དཔྱད་རྟོགས་འབྱུང་གལ་ཆེའོ།།

གཉིས་པ། རྫས་འཕྲེང་གི་བྱུང་རིམ་དང་ངོ་བོ་རྣམ་དབྱེ་སོགས་ལ་དཔྱད་པ།

དང་པོར“རྫས་འཕྲེང་”འདིའི་འབྱུང་ཁུངས་སོགས་ལ་དཔྱད་ཞིབ་གང་ཡང་མེད་པའི་དེང་དུས་ཀྱི་དགེ་སྦྱོར་བ་མང་ཕྱོགས་ཤིག་རྨོངས་དད་ཙམ་ལས། ཁུངས་ལྡན་གྱི་ལུང་དང་རང་གི་རྣམ་དཔྱོད་གང་ལའང་མི་ལྟོས་པར་འཕྲེང་བ་སྣ་ཚོགས་འཆིང་ཞིང་རེ་འགའི་ལུས་ཀྱི་རྒྱན་ཆའི་ཚུལ་དུ་འགུལ་དང་ལག་སྐེར་དཀྲི་བ་ཙམ་ལས། འདིའི་འབྱུང་ཁུངས་དང་ངོ་བོ་ཅི་ཞིག་མཚོན་མིན་ནི་རྨོངས་གཉིད་ཀྱི་ཀློང་དུ་ཤེས་རྟོགས་ཀྱི་སྒྲོན་མེ་དབུལ། དེས་ན་རྫས་འཕྲེང་གི་ཐ་སྙད་འདི་ཐོག་མར་འབྱུང་ཁུངས་ནི་ཐམས་ཅད་མཁྱེན་པ་རྫོགས་པའི་སངས་རྒྱས་སུ་འདོད་པར་འཐད་ལྡན་ཞིག་སྟེ།4 འདིའི་བྱུང་རིམ་ནི་བོན་ལུགས་སུ་སྟོན་པ་གཤེན་རབ་མི་བོ་དེ་ཉིད། སྤྱི་ལོའི་ཡར་སྔོན་དུ་མི་ལོ(12916)མཚམས་སུ་ཁྱིམ་སྤངས་རབ་ཏུ་བྱུང་བའི་རྗེས། སྟོན་པ་ཁྲི་གཙུག་རྒྱལ་བས་དཀའ་ཐུབ་མཛད་ནས་སྐུ་ལུས་བལ་དཀར་འདབ་ལས་ཡང་བའི་དུས། ཕྱི་སྣང་བ་བསླུ་བྲིད་ཀྱི་ཁྱིམ་སྤངས་ནས་འཇིག་རྟེན་བྱ་བ་དང་རིང་དུ་གྱེས་ཟིན་ཡང༌། “འཇིག་རྟེན་འཁོར་དང་ཟང་ཟིང་རྣམས། རྨི་ལམ་ནང་དུ་རྒྱུ་བ་འདི། ཀུན་གཞིའི་དཀྱིལ་དུ་རྒྱུ་ནུས་པས། རྒྱུ་ལ་འབྲས་བུ་ཕྱིར་སྐྱེ་ངེས།”5ཞེས་གསུངས། ནང་ཀུན་གཞིའི་ཀློང་དུ་འཁོར་བའི་ས་བོན་བག་ལ་ཉལ་བར་དགོངས་ཏེ། བག་ཆགས་ངན་པས་ཞེན་པ་གཅོད་པའི་བརྡ་ཐབས། སྙིང་པོ་བགྲང་བའི་རྫས་ཀྱི་འཕྲེང་བ་ཐུགས་སུ་དགོངས་ཏེ། སྙིང་པོ་བགྲང་ཤིང་སྨོན་ལམ་བཏབ་པས། ཁ་དོག་ལྔ་ལྡན་གྱི་སྡོང་པོ་ཡ་མཚན་ཆེ་བ་ཞིག་སྐྱེས་པ་དེར་འཕྲེང་བའི་རྒྱུ་རྫས་བྱས་ཏེ་རིམ་གྱིས་རྫས་ཀྱི་འཕྲེང་བ་འདི་གྲུབ། “འཁོར་བའི་ཕྱོགས་སུ་མི་འབྲེང་བར། ཡང་དག་དོན་ལ་འཕྲེང་བའི་ཕྱིར། མ་ནོར་ངེས་པ་དོན་དམ་རྫས། གྲངས་སུ་བགྲང་བའི་རྫས་སྨིན་ཤོག”6ཞེས་པ་དག་ལ་ཞིབ་དཔྱད་བྱས་ཚེ་འདི་དག་གིས“རྫས་འཕྲེང་”ངམ་ཐུགས་དམ་འཕྲེང་བའི་བྱུང་རིམ་བསྟན་ཡོད།

གསུམ་པ། རྫས་འཕྲེང་གི་ངོ་བོར་དཔྱད་པ།

ངོ་བོ་ནི“རྒྱུ་འབྲས་བུ་ཅན་གྱི་སྡོང་པོ་ལས་གྲུབ་པའི་སྔགས་དང་སྙིང་པོ་གྲངས་སུ་བགྲང་རྩིས་སུ་འཛིན་པའི་འཁོར་བའི་ཕྱོགས་སུ་འཕྲེང་བ་བཅད་ནས་ཐར་པ་མྱང་འདས་ཕྱོགས་སུ་ཡིད་སེམས་འཕྲེང་བའི་བརྡ་ཐབས་ཀྱི་ཐུགས་དམ་ཕྱག་ཆ”དེར་རྫས་འཕྲེང་ངམ་ཐུགས་དམ་འཕྲེང་བའི་ངོ་བོ་ཞེས་འཇོག་པ་འཐད་པར་འོས་ཏེ། “བགྲང་བ་གྲངས་སུ་འཛིན་པ་དང༌། བརྗོད་པ་རྩིས་སུ་འཛིན་པ་དང༌། ཕྱག་ཆར་བྱུང་བ་ཕྲེང་བ་ཞེས་བྱ།7”ཞེས་གསུངས། འདི་ལ་ངོ་བོ་སྤང་བླང་གི་ཆ་ནས་མང་དུ་མཆིས་ཀྱང༌། འདིར་སྤངས་བྱ་དྲུག་ནི། “མེན་ཏུར་དང་རུས་པའི་འཕྲེང་བ་དང༌། རྡོ་དང་འབྲས་བུ་མེད་པའི་ཤིང་འཕྲེང་དང༌། རྡོ་རྗེ་རི་རབ་མདོ་འཛིན་དང༌། མཛོ་གྷར་རུས་པའི་འཕྲེང་ཐག་སྤང༌།”8ཞེས་པ་འདི་དག་གིས་དད་མོས་དགེ་སྦྱོར་བའི་ཕྱག་འཕྲེང་གི་ངོ་བོ་དང་སྤངས་བླང་གི་རྣམ་དབྱེ་བསྟན་པས་མ་ནོར་བར་གལ་འགངས་སུ་བསམ་ཏེ། བསྙེན་ཡིག་ལས། “འཕྲེང་བ་དེ་ཉིད་མ་ཤེས་ན།། བུད་མེད་རྒན་མོའི་དོ་ཤལ་འདྲ།།”9ཞེས་སོ།།

བཞི་བ། རྫས་འཕྲེང་གི་རྣམ་དབྱེ་ལ་དཔྱད་པ།

ཡུལ་ལུགས་ཀྱི་གོམས་སྲོལ་དང་བླ་མ་རེ་རེའི་གསུང་རྒྱུན། དུས་ཀྱི་འགྱུར་འགྲོས་དང་བསྟུན་ན་འདི་ཞེས་མཐའ་གཅིག་ཏུ་མ་ངེས་ཀྱང༌། “མཁས་རྣམ་མི་མཐུན་བདེན་དོན་ཀུན་ལ་ཡོད།”10ཅེས་གསུངས་པས། འདི་ནས་ཀྱང་མཐུན་མི་མཐུན་ལུང་མང་བགྲང་བ་ལ་དགོས་པ་ཆེར་མ་མཐོང༌། དེས་ན་དཔྱད་གཞི་ཡིག་ཆ་ཁུངས་ལྡན་མདོ་སྡེ་ཁག11གཞི་བཅོལ་ནས“ཕྱག་འཕྲེང་”གི་རྣམ་དབྱེ་ཅུང་ཙམ་བཤད་པ་ལ། བོན་སྒོ་བཞི་ལ་སྦྱོར་ནས་དབྱེ་ཚུལ་གཅིག་དང༌། སྒོ་བཞི་མཛོད་ལྔ་ལ་སྦྱོར་ནས་དབྱེ་ཚུལ་མི་འདྲ་བ་ཁག་གཉིས་ལས། དང་པོ་ལྟར་ན། “ཞི་བ་ལ་ཤེལ་དང་ཉ་ཕྱིས་དང༌། མུ་མིན་དུང་གིས་བཟོས་པ་ཡིན། རྒྱས་པ་གསེར་དངུལ་བ་སོ་སྟེ། ཚེ་རིང་ནད་མེད་དགེ་བ་ཡིན། བྱི་རུ་ཟངས་དང་ཙན་དན་དམར། འགུག་བྱེད་དབང་གི་ལས་རྣམ་མྱུར། རུ་རཀྴ་དང་ལུང་ཐང་འབྲས། ཐོད་པ་མངོན་སྤྱོད་དྲག་པོ་ལ། བྷོ་དྷི་ཙི་ནི་སྤྱི་ལ་རྒྱུག”12ཅེས་དང༌། གཉིས་པ་ལྟར་ན། “དཔོན་གསས་དུང་གི་འཕྲེང་བ་བགྲང༌། སྤྱི་ཁོག་རྒྱུད་ཀྱི་བཀྲོལ་བ་ཡི། ཆབ་ནག་ཤེལ་གྱི་འཕྲེང་བ་བགྲང༌། མན་ངག་མདོ་ཡི་རྩིས་འདེབས་པའི། ཆབ་དཀར་རག་ཤའི་འཕྲེང་བ་བགྲང༌། མདོ་ཁུངས་འབུམ་དུ་འབྲེལ་བ་ཡི། འཕན་ཡུལ་མན་ངག་ལུང་གི་འཕྲེང་བ་བགྲང༌། སྤྱི་ལུང་མཛོད་ཀྱི་དོན་སྟོན་པའི། གཙང་མ་མཐོ་ཐོག་སྤྱི་རྒྱུག་བཟླས་པ་དང༌། བརྗོད་མེད་བྷོ་ཏེ་ཙེའི་འཕྲེང་བ་བགྲངས།”13ཅེས་སོགས་རྣམ་དབྱེ་བསྟན། དེ་མཐུན་གཞན་ནས་གསལ་ཡང་འདིར་ལུང་མང་བཀོད་མེད་ལ། སྤྱིར་ཞིབ་དཔྱད་བྱས་ན་བོན་སྒོ་སོ་སོར་ལུང་ལས་གསལ་བ་ཇི་བཞིན་བེད་སྤྱོད་གནང་དགོས་ཏེ། ཉོན་མོངས་པ་བརྒྱད་ཁྲི་བཞི་སྟོང་འདུལ་བའི་ཐབས་སུ་བོན་སྒོ་ཡང་བརྒྱད་ཁྲི་བཞི་སྟོང་བཤད། དེ་དག་ཐམས་ཅད་སྒོ་བཞི་མཛོད་ལྔར་བསྡུས་ཏེ་བསྟན་པ་ཇི་བཞིན་འཕྲེང་བ་ཡང་དེ་བཞིན་བོན་སྒོ་བཞི་མཛོད་ལྔ་ལ་སོ་སོར་ཐུན་མོང་མ་ཡིན་པ་རེ་བསྟན་ཡོད་པ་གསལ་བོ་ཡིན།14 “ཉོན་མོངས་རྒྱུ་འབྲས་གདར་ཐག་གཅད་པའི་ཕྱིར་དུ། མི་ཡེངས་དོན་ལ་འཕྲེང་གིན་བགྲངས་པས་བསོད་ནམས་དཔག་ཏུ་མེད། དཀའ་བ་སྣ་ཚོགས་ཐུབ་པས་ཚུལ་ཁྲིམས་རྣམ་པར་དག སྟོབས་མཆོག་ཏེ་ཡི་ནུས་མཐུ་ཡིས། རྒྱུ་འབྲས་གཉིས་ཀའི་བག་ཆགས་གདར་ཐག་བཅད།”15ཅེས་པས། ལུང་བཞིན་སྤྱོད་ན་ཉོན་ཤེས་ཀྱི་བག་ཆགས་ངན་པ་སྦྱངས་ནས་རྒྱུ་འབྲས་བོན་གྱི་གནས་ལུགས་གདར་ཐག་ཆོད། གང་བཟླས་རྟགས་ཐོན་གང་སྒྲུབ་མྱུར་དུ་འགྲུབ་པའི་བྱིན་ནུས་ཆེ་བ་ཡིན།

ལྔ་བ། འཕྲེང་རྡོག་གི་གྲངས་ཇི་ལྟར་དགོས་པའི་ཚུལ་ལ་དཔྱད་པ།

གང་ལྟར་འཕྲེང་འཛིན་པ་མང་ཕྱོགས་ཞིག་གིས་འཕྲེང་བའི་གྲངས་དང་འཕྲེང་ཐག་འདྲེན་ཚུལ་སོགས་ཕྱོགས་གང་ས་ནས་རྨོངས་གནས་སུ་གྱུར་ཡོད་པ་ནི་གདོན་མི་ཟ། ལྷག་ཏུ་ལུང་གང་མང་ལས་གསལ་ཡང་བཞེད་མཐུན་དུ་བཀོད་པ་ནི་ཆེ་དཀོན་ལ་གྲངས་འདྲེན་གྱི་ཚུལ་ལའང༌། སྟོང་དང་རྩ་བརྒྱད་དུ་གསལ་བ་དང༌།16 “སྔགས་ཀྱི་གྲངས་བགྲང་བ་ཡིན་གྱི་བརྒྱ་དང་རྩ་བརྒྱད་ལེགས་སོ།།”17ཞེས་སོགས། ལུང་ལས་མི་མཐུན་པ་མང་བར་མ་ཟད་ཞི་རྒྱས་དབང་དྲག་སོ་སོར་གྲངས་ཡང་ཞི་བ་ལ་བརྒྱ་དང༌། དེ་བཞིན་རྒྱས་པ་ལ་བརྒྱ་དང་བརྒྱད། དབང་ལ་ལྔ་བཅུ། དྲག་པོ་ལ་བཅུ་རུ་བཤད་མོད་ཀྱང༌། འདུལ་གཞུང་ཁག་དང་ཡངས་སུ་གྲགས་པ་ལྟར་ན་གྲངས་བརྒྱ་དང་རྩ་བརྒྱད་དམ་བརྒྱ་དང་བརྒྱད་བཞེད་པ་མཐུན་པར་མང༌།18 གཞན་ཡང༌། “རིགས་རྟགས་སྟིམས་ལ་བརྒྱ་རྩ་བརྒྱད་དུ་འཕྲེང་རྡོག་དག་ལ་སྒོམ་པར་བྱ།”19ཞེས་མཐུན་པའི་དབང་དུ་དཔྱད་ནམ་རྒྱུན་གྲངས་ངེས་པར་བརྒྱ་དང་བརྒྱད་བདེ་སྤྱོད་གནང་བ་ལེགས་ཀྱང༌། ཐུན་མིན་གྱི་བསྙེན་མཚམས་དུས་སུ་སྐབས་བབས་ཞི་རྒྱས་དབང་དྲག་གི་ལུགས་དང་མཐུན་པར་གནང་དགོས་ཏེ་སངས་རྒྱས་དང་སེམས་དཔའི་བྱིན་རླབས་བསྡུས་ནས་རང་ཉིད་མྱང་འདས་དང་མྱང་འདས་ཆེན་པོ་འཐོབ་པའི་ཐབས་ཡིན་པའི་ཕྱིར།

དྲུག་པ། འཕྲེང་ཐག་ཇི་ལྟར་དགོས་པའི་ཚུལ་ལ་དཔྱད་པ།

“འཕྲེང་ཐག”དྲི་བག་ཅན་གྱི་འགྱིག་རིགས་དང་ཁ་དོག་ལས་སོགས་མཛེས་རྩལ་སྣ་ཚོགས་པ་གང་བྱུང་དུ་མི་བྱ་བར་མདོ་ལུང་སོགས་དང་མཐུན་པར་སྤྱོད་པའི་ཚུལ་ནི། “ཤིང་གི་འབྲས་བུ་རིས་ལྔ་བཏུས། ཤིང་ཤུན་ཐག་པ་རིགས་ལྔར་བཀལ།”20ཞེས་དང༌། “པད་ཤུན་འཕྲེང་ཐག་དཀར་པོ་ལ། ཤར་ཕྱོགས་དཀར་པོ་དུང་གི་འཕྲེང་བ་བརྒྱུས། པད་ཤུན་འཕྲེང་ཐག་ལྗང་གུ་ལ། བྱང་ཕྱོགས་ལྗང་གུ་ཤེལ་གྱི་འཕྲེང་བ་བརྒྱུས། པད་ཤུན་འཕྲེང་ཐག་དམར་པོ་ལ། ནུབ་ཕྱོགས་དམར་པོ་རག་ཤའི་འཕྲེང་བ་བརྒྱུས། པད་ཤུན་འཕྲེང་ཐག་སྔོན་པོ་ལ། ལྷོ་ཕྱོགས་སྔོན་པོ་མན་ལུང་གི་འཕྲེང་བ་བརྒྱུས། པད་ཤུན་འཕྲེང་ཐག་སེར་པོ་ལ། དབུས་ཕྱོགས་སེར་པོ་པོ་ཏི་ཙེ་ཡི་འཕྲེང་བ་བརྒྱུས།”ཞེས་དང༌། “འཕྲེང་ཐག་གཞའ་ཚོན་ལྔ་ལ་ནི།”21ཞེས་པས་འཕྲེང་ཐག་ལ་ཁ་དོག་ལྔ་སྒྲིལ་དང་ཕྱོགས་བཞི་དབུས་དང་ལྔའི་འཕྲེང་བའི་རྫས་མི་འདྲ་བའི་འཕྲེང་བ་རེ་རེར་ཁ་དོག་ཡང་དེ་བཞིན་བསྟན། “འོན་ཀྱང་གསང་སྔགས་རྫོང་འཕྲེང་དང༌། རིན་ཆེན་འཕྲེང་བ། རིན་ཆེན་གའུ་སོགས་ནས་ཞི་བའི་འཕྲེང་ཐག་ལ་དར་རས་ཀྱི་སྐུད་པ་དཀར་པོ་སུམ་བསྒྲིལ་དང༌། དེ་བཞིན་རྒྱུན་བུ་ལ་བྱས་ཚེ། ཞི་བ་ལ་གླང་རྒྱུན་དང༌། རྒྱས་པ་ལ་ར་ཁམ་པའི་རྒྱུན་དང༌། དབང་ལ་བ་དམར་པོའི་རྒྱུན་དང༌། དྲག་པོ་ལ་ཞིང་ཆེན་ཅེས་པ་བསྒྲལ་བའི་ཞིང་བཅུར་བསྒྲལ་བའི་མི་ཡི་པགས་པ་དང༌། རས་དམར་བཅས་ལ་བྱ་དགོས་གསུངས།”22ཞེས་གསུངས། ཞི་རྒྱས་དབང་དྲག་གི་འཕྲིན་ལས་མཛད་པོ་ཞིག་མིན་ཕྱིན། སྤྱིར་བཏང་ཞིག་དང་འདུལ་འཛིན་པ་རྣམས་ཀྱི་འཕྲེང་ཐེག་ནི་རས་དང་བལ་དཀར་གྱི་སྐུད་པ་བྱེད་པ་ནི་སྤྱན་ལམ་དུ་བབ་ཆགས་པའི་སྣང་བ་བསྟར་ཞིང་ལུང་དང་མཐུན་སྣང་དུ་གྱུར་པ་ཡིན་པས། “འདུལ་བ་རྒྱུད་དྲུག་ནས། འཕྲེང་ཐག་དར་རམ་བལ་དཀར་གྱི་ཐག་པས་རྒྱུས་པར་གསུངས་པ་དེ་ནི་འདུལ་བ་པའམ་ལས་བཞི་ནས་ཞི་བའི་འཕྲེང་ཐག་གསུངས་པར་སེམས།”23ཞེས་བསྟན་པ་ལྟར་རོ།། ཕྲེང་ཐག་གི་སྣེ་གཉིས་ལྷན་དུ་འདུས་སར་ཡོད་པའི“མདོ་འཛིན”24ནམ“འཕྲེང་དཔོན”25འདིས་ཕྱིའི་ཆ་ནས་འཕྲེང་སྣེ་མདུད་མདོ་ནས་སོ་སོར་མི་གྱེས་པར་དམ་དུ་འཛིན་པར་བྱེད་པའི་མདོ་འཛིན་དང༌། ནང་གི་ཆ་ནས་མདོ་འཛིན་ཡེ་ཤེས་ལྷ་མཚོན་བྱེད་དང༌། འཕྲེང་ཐག་དབྱིངས་ཀྱི་ཡུམ་དང༌། མཐེ་བོང་ཐབས། མཛུབ་བུ་ཤེས་རབ། བདག་ཉིད་གཤེན་རབ་ཏུ་སྦྱར་བར་འོས་ཤིང་མཚོན་བྱེད་དུ་བསྟན་པ་ཡིན་སྟེ།26 “འཕྲེང་ཐག་དབྱིངས་ཀྱི་ཡུམ་དང་སྦྱར།། ས་ཏྲིག་ཨེར་སངས་ཡི་དམ་ལྷ། མདོ་འཛིན་ཡེ་ཤེས་ལྷ་དང་སྦྱར།། གཤེན་ལྷ་འོད་དཀར་ཡི་དམ་ལྷ།། མཐེ་བོང་ཐབས་ཀྱི་མཆོག་དང་སྦྱར།། སངས་པོ་འབུམ་ཁྲི་ཡི་དམ་ལྷ།། མཛུབ་བུ་ཤེས་རབ་ཕུལ་དང་སྦྱར།།”27 ཅེས་པ་སོགས་ཇི་ལྟར་མཚོན་པའི་ཚུལ་དང་མཐུན་པར་དཔྱད་པ་ཡིས། གཞུང་གང་ཞིག་གི་སྙིང་པོ་བགྲང་ཡང་ལྷ་འཁོར་གཙོ་ཕལ་བཅས་སོ་སོར་སྦྱར་ཚུལ་མ་ནོར་བ་གལ་ཆེའོ།། “མདོ་འཛིན་རྩ་བའི་བླ་མར་སྒོམ། འཕྲེང་རྡོག་རེ་རེ་ཡི་དམ་ལྷ་རེ་རེར་སྒོམ།”28ཞེས་སོ།།

བདུན་པ། ཇི་ལྟར་འདྲེན་པའི་ཚུལ་ལ་དཔྱད་པ།

སྤྱིར་ཐུགས་དམ་འཕྲེང་བ་འདྲེན་པའི་ཚུལ་ལ་གཉིས་ཙམ་སྣང་བ་ལྟར་དང་པོ་ནི། དེ་ཡང་དང་པོ་ནི་སྒོ་གསུམ་མ་དག་པ་སྟེ། ལུས་མ་དག་པ་ཁ་སྦུབ་དང་གན་རྐྱལ་རྐང་བསྒྲད་ལག་བསྒྲད་མ་དག་པ་དང༌། བསྙེན་པ་གང་བགྲང་བའི་དུས་ལ་གཞན་ལག་བརྒྱུད་པ་འདི་དག་ནི་ལུས་མ་དག་པའི་སྤྱོད་པའོ།། ངག་མ་དག་པ་ལུང་དང་མ་འབྲེལ་བར་འདྲེན་པའི་དུས་སུ་ངག་ནས་ཅ་ཅོ་སྒྲུང་གཏམ་ཀུ་རེ་རྩེད་མཚར་འཇིག་རྟེན་པའི་ཆགས་སྡང་རྨོངས་གསུམ་གྱིས་གཏམ་གླེང་སྣ་ཚོགས་དང༌། ཡིད་མ་དག་པ་དགྲ་འདུལ་གཉེན་སྐྱོང་གི་བསམ་པ་ཡིད་ལ་བྱེད་པ་དང་གང་བགྲང་བའི་བསྙེན་པའི་གཙོ་འཁོར་གྱི་ལྷ་ཚོགས་མི་བསམ་པར་ཡིད་རྣམ་པར་གཡེང་ནས་འདྲེན་པ་འདི་དག་ནི་སྤངས་པར་བྱའོ།། གཉིས་པ་ནི་ལུང་ལས་གསལ་ཡང་ལུང་དུ་མ་བཞེད་དགོངས་གཅིག་དུ་མ་ངེས་པ་ནི། དཔེར་ན“འཕྲེང་བ་བགྲང་ཚུལ་ལའང་མི་འདྲ་བ་འགའ་ཞིག་མཆིས་ཏེ། མཁའ་འགྲོའི་རྒྱུད་ལྟར་ན། ཞི་བའི་ལས་ནི་མཛུབ་མོར་བཞག རྒྱས་པ་ལ་གུང་མོ་དང༌། དབང་ལ་སྲིན་ལག དྲག་པོ་ལ་མཐེའུ་ཆུང་གིས་འདྲེན་དགོས་པར་གསུངས།”ཅེས་དང་ཡང༌། “ལས་བཞི་རང་རང་མཛུབ་མོ་གུང་སྲིན་མཐེའུ་ཆུང་གང་བབས་ཀྱི་སྟེང་དུ་བཞག་ལ་མཐེ་བོང་གིས་ཚུར་ལ་བགྲང་བ་སྟེ། མཐེ་བོང་ལྕགས་ཀྱུས་ལྷ་རྣམས་འགུག་ཅེས་བཤད་དོ།། བཟློག་བསད་ལ་ལག་པ་གཡོན་པས་བཟུང༌། གཡས་ཀྱིས་མཐེ་བོང་མཐེའུ་ཆུང་གཉིས་ཀྱིས་ཕར་ལ་བགྲང་བར་བཤད་དོ།།”29ཅེས་གསུངས། “ སྟོང་པ་ཉིད་དང་སྙིང་རྗེས་དབྱེར་མེད་པའི་ངོས་ནས་ལྷ་ཕོ་རྒྱུད་རྣམས་ལ་ལག་པ་གཡས་དང༌། མོ་བརྒྱུད་རྣམས་ལ་ལག་གཡོན་གྱིས་བགྲང་བ་དང༌། ལྷའི་སྐུ་རང་བཞིན་མེད་པར་ཤེས་པའི་དེ་ཉིད་ཀྱི་དོན་ཡོངས་སུ་འགྲུབ་པར་བཤད་པའོ།།”ཅེས་དང༌། “བཟློག་སྔགས་དང་བསད་སྔགས་བགྲང་བའི་དུས་སུ་འཕྲེང་བ་ལ་ལག་གཡོན་གྱིས་བཟུང་ནས། གཡས་ཀྱི་མཐེ་བོང་དང་མཐེའུ་ཆུང་གཉིས་ཀྱིས་ཕར་བཅད་ནས་བགྲང་བ་ཡིན་ནོ།།”30ཞེས་གསུངས། “གསུམ་གྱི་སྦུབས་སུ་དྲང་གིན་བགྲངས”31ཅེས་པས། གསུམ་ནི་མཐེ་བོང་དང༌། མཛུབ་མོ། གུང་མོ་གསུམ་པོ་ཡིན་ལ་གཡས་པས་བཅུག་ལ་གཡོན་པའི་བགྲང་བའི་ཚུལ་དུ་འདྲེན་དགོས་པར་སམ་ཡང་མཐའ་གཅིག་ཏུ་མ་ངེས་ཏེ། “གྲངས་ཀྱི་ཚད་ནི་ལྔ་ལྔ་འཛབ་ཏུ་ཕུལ། གཡས་པས་སོར་མོས་རེ་རེ་བླངས།”32ཞེས་པ། བདེ་བར་གཤེགས་པའི་མཚན་དང་སྙིང་པོ་རྣམ་གསུམ། སྲུང་བཟློག་བསད་གསུམ་ལས་སོགས་སྔགས་འདྲེན་པའི་ཚུལ་མི་འདྲ་བའི་རྣམ་པ་དུ་མ་ཞིག་བཞེད་དགོངས་ཡོད་པ་གོང་འཁོད་ལྟར་ཡིན་ཡང་མདོ་རྩ་འདི་ལྟར་བགྲང་བའི་དགོས་པ་ནི་འཁོར་བའི་བག་ཆགས་ངན་པའི་རྗེས་སུ་མི་འབྲེང་མི་འཕྲེང་བར་བདེ་བར་གཤེགས་པ་སངས་རྒྱས་སྟོང་དང་རྩ་བརྒྱད་ལ་སོགས་ཡང་དག་གནས་ལུགས་ཀྱི་དོན་ཐར་པ་མྱང་འདས་ཀྱི་ཕྱོགས་སུ་འཕྲེང་བའི་དགོས་པར་དགོངས་ཏེ། “འཁོར་བའི་རྗེས་སུ་མི་འཕྲེང་བར། བདེར་གཤེགས་དོན་ལ་འཕྲེང་བའི་ཕྱིར།”33དུ་བོན་སྒོ་བཞིའམ་ཡང་ན་མཛོད་ལྔ་དང་མཐུན་པ་ཇི་ལྟར་བགྲང་འདྲེན་དགོས་པའི་ཚུལ་ལ་དཔྱད་པའོ།།

བརྒྱད་པ། འཕྲེང་བའི་དམ་ཚིག་ལ་ཇི་ལྟར་གནས་དགོས་མིན་ལ་དཔྱད་པ།

འཕྲེང་བའི་དམ་ཚིག་སྲུང་བ་ལ་ངོ་བོ་དང་རྣམ་དབྱེར་དཔྱད་ཞིབ་དགོས་པ་སྨོས་ཅི། འཕྲེང་བའི་དམ་ཚིག་ནི་སྤྱིར་བཤད་ན་འགོམ་ཡུག་བྱ་བ་དང༌། སྡིག་ཆེན་དམེ་བ་ཅན་གྱི་ལག་ནས་བརྒྱུད་འདྲེན་བྱ་བའི་རིགས། བསྙེན་པ་དང་འཛབ་བཟླ་དུས་སུ་མི་ལག་འགྲིམ་པ་དང་གསུམ་བཅས་ཡིན། “དམ་ཚིག་འགོམ་ཡུག་སྨེ་བ་དང༌། བསྙེན་པའི་དུས་སུ་མི་ལག་འགྲིམ་པ་དང༌། གོང་གི་སྤང་བླངས་ལྷན་པ་བྱ།”34ཞེས་གསུངས། གཞན་ཡང་འཕྲེང་བའི་དམ་ཚིག་མང་དུ་བཞེད་ཀྱང༌། བྱེ་བྲག་ཏུ་བཤད་པ་ལ། “འཕྲེང་བའི་དམ་ཚིག་བཅུ་གཅིག་ཡོད་དེ། སྙིང་པོ་བཟླ་དུས་འཕྲེང་བ་གཞན་ལ་མི་བསྟན། རང་གི་ཞབས་སུ་མི་བཅུག གཞན་གྱི་ལག་ཏུ་མི་འགྲིམ། ལག་དལ་བའི་མི་འདྲེན་པར་ལུས་ལ་བཅངས་པ་རྗེན་ལ་མི་འཇོག འཕྲེང་བ་རིགས་མི་གཅིག་པ་རྣམས་མི་བསྲེ། མཛེས་ཆོས་ཀྱི་རྒྱན་དང་མི་སྤྲད། མི་སྡིག་ཅན་གྱི་ལག་ནས་བྱུང་བ་མི་བཅང༌། གཞན་གྱི་གྲངས་བརྩི་སླད་དུ་བཤར་བ་མི་བྱེད། ཚུལ་འཆོས་ཀྱིས་ལག་ཏུ་མི་འདྲེན། རབ་གནས་མེད་པ་མི་བཅངས་པ་དང་བཅུ་གཅིག་གོ”35ཞེས་ཡན་ལག་གི་དམ་ཚིག་བསྟན། “འཕྲེང་བའི་དམ་ཚིག་རྩ་བ་ཡིན།། ཡན་ལག་དམ་ཚིག་མང་བཤད་ཀྱང༌།། མདོར་བསྡུས་འདི་ལྟར་ཤེས་པར་བྱ།། གཡར་དམ་ཉིད་དུ་འཆང་བ་ཡི།། འཕྲེང་བ་གཞན་ལ་མི་བསྟན་ཀྱང༌།། ལུས་ཀྱི་དྲོད་དང་མ་བྲལ་ན།། གང་བསྒྲུབ་མྱུར་དུ་འགྲུབ་པར་གྱུར།།”36ཅེས་པ་ལས་སོགས་དཔྱད་ན། འཕྲེང་བའི་དམ་ཚིག་ལ་གནས་དགོས་པ་ནི་ཤིན་ཏུ་ནས་གལ་ཆེ་བར་མཐོང་སྟེ། ལས་བཅོལ་མྱུར་བ་དང་བསམ་པའི་དོན་བཞིན་གང་བསྒྲུབ་མྱུར་དུ་འགྲུབ་པའི་ཕྱིར་འཕྲེང་བའི་དམ་ཚིག་དང་མ་བྲལ་བར་བྱ།

དགུ་བ། རབ་གནས་ཇི་ལྟར་དགོས་པའི་ཚུལ་ལ་དཔྱད་པ།

རབ་གནས་ཇི་ལྟར་བྱ་བའི་ཚུལ་ནི། འདི་ལའང་རབ་གནས་མི་བྱེད་པར་སྔགས་འཛབ་སོགས་བགྲང་བར་ཆེ་མང་མོད་ཀྱང་དེ་དག་ནི་སྔགས་ཀྱི་འགྱུར་ཆུང་བ་དང་བྱིན་རླབས་དང་གང་བསྒྲུབ་འགྲུབ་པ་དཀོན་པས་འཕྲེང་བའི་སྐྱོན་ཡིན་པས་སེལ་བར་འོས་ཏེ། “རབ་གནས་མི་ལྡན་འཕྲེང་བ་དེ། ནམ་ཡང་འཆང་བར་མི་བྱ་ཞིང༌།”37ཞེས་པས། རབ་གནས་ནི་ཤིན་ཏུ་ནས་གལ་ཆེ་སྟེ། འཇིག་རྟེན་འཁོར་བའི་ཕྱོགས་སུ་སེམས་ཀྱི་ཞེན་པ་བཅད་ནས་ཐར་པ་མྱང་འདས་ཕྱོགས་སུ་ཡིད་སེམས་དངོས་སུ་འཕྲེང་བར་བྱེད་པའི་ཐབས་ཀྱི་འཕྲེང་བ་འདི་ཐོག་མར་ཆབ་སྤོས་ཁྲུས་བསང་གིས་དག་ཅིང་གཙང་བར་མཛད། གནས་གཙང་དུ་གདན་ཕྱིང་པ་དཀར་པོའམ་རས་དཀར་པོའི་སྟེང་དུ་འབྲུ་རིགས་སྤུངས་ནས་དྲི་བཟང་བྱུག་སྟེ་བཞག དེའི་མདུན་དུ་མཆོད་པའི་སྤྲིན་ཚོགས་བཤམས་ཏེ། རང་རང་གི་ཡི་དམ་གྱི་མཚམས་བཅད་དང་བགེགས་བསྐྲད་བྱ་ལ། དབྱིངས་ན་བཞུགས་པའི་ཡི་དམ་ལྷ་ཚོགས་སྤྱན་དྲངས་ནས་མཆོད་པའི་ཚོགས་རྣམས་འབུལ་ལ་དགྱེས་བཞེས་མཛད་པར་བསམ་སྟེ། རབ་གནས་ཀྱི་སྙིང་པོ། “ཨཱོྃ་ཙ་རེ་ཐོ་ཡེ་པུ་ཙམ་ཧ་ར་ཁི་ཁར་ཞི་བྲུཾ་འདུ།”38ཞེས་བརྒྱ་ཕྲག་བགྲང་ནས་ཡི་དམ་ལྷ་ཚོགས་རྣམས་ཐུགས་དམ་འཕྲེང་བར་ཐིམ་པར་དམིགས་ཏེ་བྱིན་གྱིས་རླབས། གཞན་ཡང་ཞི་ཁྲོ་ལྷ་ཚོགས་ཀྱི་སྙིང་པོ་དང་ཨ་ལི་ཀ་ལི་བགྲང༌། བསྔོ་སྨོན་རྒྱས་གདབ་མཐར་ཕྱུངས་པར་བྱ། དེ་ལྟར་བགྱིས་པའི་སྔགས་གང་བཟླས་འགྱུར་ཆེ་བ་ལས་སོགས་ཁྱད་དུ་འཕགས་པར་དཔྱད་རབ་གནས་ནི་གལ་འགངས་ཆེ་བའི་ལག་ལེན་ཞིག་སྟེ། “དེ་ལྟར་འཕྲེང་བ་རབ་གནས་བྱས་པ་དེས། དེ་ཐོགས་བསྙེན་པ་གྲངས་ཞིང་ཐོགས་གྱུར་ན། བསྙེན་པ་བརྒྱ་རེ་འབུམ་དུ་འགྱུར། བཟླས་པ་གང་ཡང་ཆུད་མི་ཟ།”39ཞེས་སོགས་ནི་འཕྲེང་བའི་དམ་ཚིག་ཡིན་ལ། གཞན་ཡང་ཡིག་ཐོག་ཏུ་མ་འཁོད་པ་གནའ་བོའི་ངག་རྒྱུན་སོགས་ན་ཡང་འཕྲེང་བའི་དམ་ཚིག་མང་མོད་ཀྱང་དེ་དག་ལ་ཁུངས་ལུང་ཐུབ་པ་མེད་པས་རེ་ཞིག་མ་བཀོད་པའོ།།

དཔྱད་མཆན།

1. «གསང་སྔགས་རྫོང་འཕྲེང༌།» «མདོ་གཟེར་མིག» «མདོ་དྲི་མེད་གཟི་བརྗིད།» «རིན་ཆེན་གཏེར་ཁྱིམ»བཅས་ཡིན།

2. «མདོ་གཟེར་མིག» ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང༌། སྤྱི་ལོ། 1991.6 ཤོག་ངོས702ན་གསལ།

3. «བོན་སྒོ།» འདོན་ཨང་བཅུ་བ། བོན་མཐུན་འབྲེལ་ལྷན་ཁང་གི་ལོ་དེབ། སྤྱི་ལོ། 2009 ཤོག་ངོས1ན་གསལ།

4. «འདུལ་བ་མདོར་བསྡུས་ཀྱི་འགྲེལ་བ།» རྗེ་མཉམ་མེད། ཤོག་ངོས242ལས། ད་ལྟའི་འདུལ་བའི་ཕུགས་དང་བྱུང་ཁུངས་ནི་ཤིན་ཏུ་བཟང་བ་སྟེ། སྤངས་རྟོགས་ཕུལ་དུ་ཕྱིན་པའི་སྟོན་པ་ཁྲི་གཙུག་རྒྱལ་བ་དེ་ཉིད་ཡིན་པས་སོ།། ཞེས་གསུང་པ་འདིས་འཕྲེང་བའི་བྱུང་ཁུངས་ཀྱང་ཤུགས་ལས་གྲུབ་བོ།།

5.«མདོ་དྲི་མེད་གཟི་བརྗིད།» དེབ་ཨང་11པ། བོད་ལྗོངས་བོད་ཡིག་དཔེ་སྐྲུན་ཁང༌། སྤྱི་ལོ། 200.9 ཤོག་ངོས388ན་གསལ།

6.«མདོ་དྲི་མེད་གཟི་བརྗིད།» དེབ་ཨང་11པ། བོད་ལྗོངས་བོད་ཡིག་དཔེ་སྐྲུན་ཁང༌། སྤྱི་ལོ། 2009 ཤོག་ངོས389ན་གསལ།

7.«གསང་སྔགས་རྫོང་འཕྲེང༌།» དཔེ་གཟུགས། ལྡི་ལི་དཔེ་སྐྲུན་ཁང༌། ཤོག་ངོས606ན་གསལ།

8.«གསང་སྔགས་རྫོང་འཕྲེང༌།» དཔེ་གཟུགས། ལྡི་ལི་དཔེ་སྐྲུན་ཁང༌། ཤོག་ངོས607ལས་དེ་ལ་སྤང་བ་དྲུག་དང་ལེན་པ་དྲུག དམ་ཚིག་དྲུག་དང་རྒྱུ་རྐྱེན་དྲུག བྱིན་རླབས་དྲུག་དང་ཐར་ལམ་དྲུག དེ་ལ་སྤང་པ་དྲུག་ནི། མེན་ཏུར་དང་རུས་པའི་ཕྲེང་བ་དང༌། རྡོ་དང་འབྲས་བུ་མེད་པའི་ཤིང་འཕྲེང་དང༌། རྡོ་རི་རབ་མདོ་འཛིན་དང༌། མཛོ་གྷར་རུས་པའི་འཕྲེང་ཐག་སྤང༌། ལེན་པ་དྲུག་ནི་ནི་འདི་ལྟར་རོ།། འབྲས་བུ་དྲུག་དང་དྲག་པོའི་ཤིང༌། དབང་དང་འབྲས་བུ་ལྷན་པ་གསུམ། དམ་ཚིག་གྷོམས་ཡུགས་སྨེ་བ་དང༌། སྙེན་པའི་དུས་སུ་མི་ལག་འགྲིམ་པ་དང༌། ཞེས་མང་དུ་མཆིས་དེར་ཞིབ་གཟིགས་ཞུ།

9. «བོན་སྒོ།» འདོན་ཨང་བཅུ་བ། བོན་མཐུན་འབྲེལ་ལྷན་ཁང་གི་ལོ་དེབ། སྤྱི་ལོ། 2009 ཤོག་ངོས9ན་གསལ།

10. «ས་ལམ་རང་འགྲེལ་གྱི་གཞུང༌།» རྗེ་མཉམ་མེད། གཡུང་དྲུང་བོན་གྱི་བཤད་སྒྲུབ་འདུས་སྡེ་ནས་བསྐྲུན། ཤོག་ངོས26ན་གསལ།

11.0«གསང་སྔགས་རྫོང་འཕྲེང༌།» «མདོ་གཟེར་མིག» «མདོ་དྲི་མེད་གཟི་བརྗིད།» «འདུལ་བ་ཀུན་བཏུས»བཅས་ཡིན།

12. «ལྷ་གཉེན་ཤེལ་སྒོང༌།» རྫ་ཁོག་གི་ཤིང་དཔེ་ཅན། ཤོག་ངོས77ན་གསལ།

13.«མདོ་དྲི་མེད་གཟི་བརྗིད།» དེབ་ཨང་11པ། བོད་ལྗོངས་བོད་ཡིག་དཔེ་སྐྲུན་ཁང༌། སྤྱི་ལོ། 2000.9 ཤོག་ངོས390ན་གསལ།

14.«བསོད་བློའི་ཀུན་བཏུས་འདུལ་འགྲེལ།» གཡུང་དྲུང་བོན་གྱི་བཤད་སྒྲུབ་འདུས་སྡེ་ནས་པར་དུ་བསྐྲུན། ཤོག་ངོས346ན་གསལ།

15.«མདོ་གཟེར་མིག» ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང༌། སྤྱི་ལོ། 1991.6 ཤོག་ངོས704ན་གསལ།

16.«མདོ་གཟེར་མིག» ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང༌། སྤྱི་ལོ། 1991.6 ཤོག་ངོས703ན་གསལ།

17.«རྣལ་འབྱོར་རོལ་པའི་དགའ་སྟོན།» བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང༌། སྤྱི་ལོ། 1996.12 ཤོག་ངོས220ན་གསལ།

18.«བསོད་བློའི་ཀུན་བཏུས་འདུལ་འགྲེལ།» གཡུང་དྲུང་བོན་གྱི་བཤད་སྒྲུབ་འདུས་སྡེ་ནས་པར་དུ་བསྐྲུན། ཤོག་ངོས346ན་གསལ།

19. «གསང་སྔགས་རྫོང་འཕྲེང༌།» དཔེ་གཟུགས། ལྡི་ལི་དཔེ་སྐྲུན་ཁང༌། ཤོག་ངོས608ན་གསལ།

20.«མདོ་གཟེར་མིག» ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང༌། སྤྱི་ལོ། 1991.6 ཤོག་ངོས703ན་གསལ།

21.«གསང་སྔགས་རྫོང་འཕྲེང༌།» དཔེ་གཟུགས། ལྡི་ལི་དཔེ་སྐྲུན་ཁང༌། ཤོག་ངོས608ན་གསལ།

22.«བོན་སྒོ།» འདོན་ཨང་བཅུ་བ། བོན་མཐུན་འབྲེལ་ལྷན་ཁང་གི་ལོ་དེབ། སྤྱི་ལོ། 2009 ཤོག་ངོས4ན་གསལ།

23.«བོན་སྒོ།» འདོན་ཨང་བཅུ་བ། བོན་མཐུན་འབྲེལ་ལྷན་ཁང་གི་ལོ་དེབ། སྤྱི་ལོ། 2009 ཤོག་ངོས4ན་གསལ།

24.«གསང་སྔགས་རྫོང་འཕྲེང༌།» «མདོ་གཟེར་མིག» «མདོ་དྲི་མེད་གཟི་བརྗིད»སོགས་ནས“མདོ་འཛིན”ཞེས་གསལ།

25.ཡུལ་ལུང་ཁམས་བྲག་མགོ་སོགས་ཡུལ་ལུང་མི་ཉུང་བ་ཞིག་གིས་མདོ་འཛིན་ལ“འཕྲེང་དཔོན”ཞེས་ཀྱང་འབོད།

26.«མདོ་དྲི་མེད་གཟི་བརྗིད།» དེབ་ཨང་11པ། བོད་ལྗོངས་བོད་ཡིག་དཔེ་སྐྲུན་ཁང༌། སྤྱི་ལོ། 2000.9 ཤོག་ངོས390ན་གསལ།

27.«མདོ་གཟེར་མིག» ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང༌། སྤྱི་ལོ། 1991.6 ཤོག་ངོས703ན་གསལ།

28.«གསང་སྔགས་རྫོང་འཕྲེང༌།» དཔེ་གཟུགས། ལྡི་ལི་དཔེ་སྐྲུན་ཁང༌། ཤོག་ངོས608ན་གསལ།

29.«བོན་སྒོ།» འདོན་ཨང་བཅུ་བ། བོན་མཐུན་འབྲེལ་ལྷན་ཁང་གི་ལོ་དེབ། སྤྱི་ལོ། 2009 ཤོག་ངོས8ན་གསལ།

30.«རྣལ་འབྱོར་རོལ་པའི་དགའ་སྟོན།» བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང༌། སྤྱི་ལོ། 1996.12 ཤོག་ངོས222ན་གསལ།

31.«མདོ་གཟེར་མིག» ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང༌། སྤྱི་ལོ། 1991.6 ཤོག་ངོས704ན་གསལ།

32. «མདོ་གཟེར་མིག» ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང༌། སྤྱི་ལོ། 1991.6 ཤོག་ངོས704ན་གསལ།

33. «མདོ་གཟེར་མིག» ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང༌། སྤྱི་ལོ། 1991.6 ཤོག་ངོས704ན་གསལ།

34. «གསང་སྔགས་རྫོང་འཕྲེང༌།» དཔེ་གཟུགས། ལྡི་ལི་དཔེ་སྐྲུན་ཁང༌། ཤོག་ངོས607ན་གསལ།

35. «ལྷ་གཉེན་ཤེལ་སྒོང༌།» རྫ་ཁོག་གི་ཤིང་དཔར་ཅན། ཤོག་ངོས80ན་གསལ།

36. «རྣལ་འབྱོར་རོལ་པའི་དགའ་སྟོན།» བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང༌། སྤྱི་ལོ། 1996.12 ཤོག་ངོས87ན་གསལ།

37. «རྣལ་འབྱོར་རོལ་པའི་དགའ་སྟོན།» བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང༌། སྤྱི་ལོ། 1996.12 ཤོག་ངོས87ན་གསལ།

38. «གསང་སྔགས་རྫོང་འཕྲེང༌།» དཔེ་གཟུགས། ལྡི་ལི་དཔེ་སྐྲུན་ཁང༌། ཤོག་ངོས608ན་གསལ།

39. «གསང་སྔགས་རྫོང་འཕྲེང༌།» དཔེ་གཟུགས། ལྡི་ལི་དཔེ་སྐྲུན་ཁང༌། ཤོག་ངོས609ན་གསལ།

2012ལོའི་«དཔྱོད་ལྡན་མཆོད་པའི་མེ་ཏོག»སྤྱི་དེབ་དགུ་པ་ལས་བཤུས།


tibetmonk  2019-9-21 10:27:17

   གུས་པར་འོས་པའི་རྒྱ་ཆེའི་རྩོམ་པ་པོ་ལྷན་རྒྱས་ལ་ཞུ་གསོལ། དེ་ཡང་དུས་དང་རྣམ་པ་ཀུན་ཏུ་ཁྱེད་ཅག་གིས་ཞང་ཞུང་རིག་གནས་ལ་ཐུགས་ཁུར་ཟབ་བཞེས་ཀྱིས་གཟིགས་སྐྱོང་གང་ཆེ་གནང་བར་སྙིང་དབུས་ནས་བཀའ་དྲིན་ཆེ་ཞུ་རྒྱུ་དང་། ངེད་《ཞང་ཞུང་རིག་གནས》རྩོམ་སྒྲིག་ཁང་གིས་མུ་མཐུད་དེ་རང་ཅག་བོད་གངས་ཅན་པའི་རིག་གནས་སྤྱི་དང་ཁྱད་པར་ཞང་ཞུང་རིག་གནས་ཉམས་པ་སོར་ཆུད་དང་། མ་ཉམས་པ་གོང་འཕེལ་ངང་བོད་ཀྱི་ཤེས་རིག་ཞིབ་འཇུག་གི་ལམ་ཀ་སྔར་ལས་ཁོད་ཡངས་པོ་དང་། བོད་ཡིག་གི་རྩོམ་པ་པོ་གང་མང་ཞིག་གསོ་སྐྱོང་གཏོང་རེའི་ཆེད་ང་ཚོས་རང་གི་ཕྲག་ཏུ་བབ་པའི་འོས་འགན་ནམ་ཡང་སེམས་སུ་ཉར་ནས་ཡོད་ལ། འདི་ལོའི་ང་ཚོའི་《ཞང་ཞུང་རིག་གནས》ཞེས་པའི་དུས་དེབ་རྩོམ་སྒྲིག་འགྲེམ་སྤེལ་བྱ་འཆར་ལ། འདིར་ལྷག་བསམ་ཟོལ་མེད་ཀྱི་རྒྱ་ཆེའི་རྩོམ་པ་པོ་རྣམས་ལ་རྩོམ་བསྡུའི་བརྡ་ཐོ་འདི་ཕུལ་བ་ལགས། 

རྩོམ་ཡིག་གི་བླང་བྱར།

       གཅིག   རྩོམ་པ་པོ་རྣམ་པས་འདི་ག་ཞང་ཞུང་རིག་གནས་རྩོམ་སྒྲིག་ཁང་དུ་བསྐུར་བའི་རྩོམ་ཡིག་ཡིན་ཕྱིན་ཞང་ཞུང་ཤེས་རིག་དང་ལོ་རྒྱུས་ཀྱི་ཁྱབ་ཁོངས་ཡིན་པ་བརྗོད་མེད་ཐོག  དཔྱད་བྱ་གང་དེ་ལ་གསར་བཏོད་ཀྱི་རང་བཞིན་དང་། དམིགས་བསལ་གྱི་ལྟ་བ། རིག་གཞུང་གི་རིན་ཐང་ལྡན་པ། ངེས་པར་དུ་དུས་དེབ་སོགས་གཞན་ནས་སྤེལ་མ་མྱོང་བའི་རྩོམ་ཡིག་ཡིན་དགོས། གལ་སྲིད་ཞང་ཞུང་ཤེས་རིག་དང་འབྲེལ་བ་མེད་པའམ་དུས་དེབ་སོགས་གཞན་ནས་སྤེལ་ཟིན་པའི་རྩོམ་ཡིག་ཡིན་ན་ང་ཚོའི་དུས་དེབ་ཐོག་འགོད་ཀྱིན་མིན།

       གཉིས། དུས་དེབ་ཀྱི་ལེ་ཚན་ལ་སྔར་རྒྱུན་བཞིན། ལོ་རྒྱུས་སྲིད་པའི་དྲང་ཤིང་དང་། སྨན་རྩིས་གངས་རིའི་ལང་ཚོ། ལེགས་བཤད་ལུང་གི་སྙིང་པོ། སྒྲ་སྒྱུར་ཤ་རིའི་གར་སྟེགས། ཞང་ཞུང་རྒན་པོའི་འབེལ་གཏམ་སོགས་རང་མལ་དུ་བཞག་ཡོད།

       གསུམ། དཔྱད་རྩོམ་རྣམས་ཧི་གཟུགས་ཀྱི་གློག་རྡུལ་ཡིག་ཆ་དང་། དག་ཞུས་ཟིན་པ། ཡིག་འབྲུ་༥༠༠༠ནས་༡༥༠༠༠དབར་ཡིན་པ། ནང་དོན་གནད་བསྡུས་ཀྱང་ཡིག་འབྲུ་༣༠༠གཡས་གཡོན་ཅན་བཅས་ཡིན་དགོས། 

        བཞི། རྩོམ་པ་པོ་རྣམས་ལ་ཆེད་དུ་ཞུ་རྒྱུར། ངེད་རྩོམ་སྒྲིག་ཁང་གིས་《ཞང་ཞུང་རིག་གནས》དུས་དེབ་འགྲེམ་སྤེལ་བྱེད་པ་འདིས་རྩོམ་པ་པོའི་ཡོན་ཚད་དང་བོད་ཀྱི་རིག་གཞུང་ལ་བཅངས་པའི་བསམ་བློའི་འདུ་ཤེས་བཟང་པོ་དག་སྤྱི་ཚོགས་ཐོག་ནས་ཤེས་རྟོགས་ཡོང་ཆེད་དང་། དུས་དེབ་ཀྱི་ནང་དོན་ཆ་ཚང་བ་བཅས་ཀྱི་ཆེད་རྩོམ་པ་པོ་རྣམ་པས་འདི་ག་རྩོམ་སྒྲིག་ཁང་དུ་དཔྱད་རྩོམ་དང་མཉམ་དུ་རྩོམ་པ་པོ་རང་ཉིད་ཀྱི་ངོ་སྤྲོད་མདོར་བསྡུས་འགོད་དགོས་པ་སྟེ། མཚན་དང་། རྟེན། འཁྲུངས་ལོ། ལས་ཁུངས་དང་སློབ་གྲྭ༼སློབ་རིམ། ཆེད་ལས།༽ འབྲེལ་གཏུགས་བྱེད་ཡུལ་ས་གནས་དང་གློག་རྡུལ་ཡིག་ཟམ། ཁ་པར་ཨང་གྲངས། སྦྲག་ཨང་སོགས་ཀྱི་ཆ་འཕྲིན་འགོད་དགོས།

         ལྔ།  དཔྱད་རྩོམ་གློག་རྡུལ་སྦྲག་སྐུར་གྱི་རྣམ་པར་བརྟེན་ནས། ༢༠༡༩ལོའི་ཟླ་བ་༡༡ཚེས་༣༠གོང་དུ་སྐུར་དགོས། སྐུར་ཡུལ། (shangshung@qq.com)ཡིན། དེའི་གཙོ་དོན་དུ་【རྩོམ་པ་པོ+དཔྱད་རྩོམ་གྱི་ཁ་བྱང】འགོད་དགོས།

          དྲུག  ངེད་ལས་ཤག་གི་འགྲོ་དངུལ་དཀའ་ངལ་ཆེ་བས་སྤྱི་ལོ་༢༠༡༩ལོའི་དུས་དེབ་དང་པོ་འདི་ལ་གནས་སྐབས་རྩོམ་ཡོན་མེད་པས་དགོངས་བཞེས་ཡོད་པར་ཞུ། 

          མདོར་ན་ང་ཚོས་ཁྱེད་རྣམ་པའི་རྩོམ་ཡིག་དུས་དེབ་ཐོག་སྤེལ་གང་ཐུབ་ཞུ་རྒྱུ་ཡིན་ལ། ཁྱེད་རྣམ་པས་རྩོམ་ཡིག་སྤེལ་ཐུབ་པ་དེ་བོད་ཀྱི་རིག་གནས་སྤྱི་དང་ཁྱད་པར་ཞང་ཞུང་རིག་གནས་འཕེལ་རྒྱས་ཐད་ལ་ཤིན་ཏུ་སྨན་པའི་སེམས་ནུས་དང་ལྷག་བསམ་མཚོན་ཐུབ་པས། ཁྱེད་རྣམ་པས་ང་ཚོའི་རྩོམ་སྒྲིག་ཁང་དུ་རྩོམ་ཡིག་གང་མང་བསྐུར་གནང་བར་དགའ་བསུ་ཞུའོ། །

འབྲེལ་གཏུགས་ཁ་པར། 

    ཞུང་ཀརྨ་རྒྱལ་མཚན།༡༣༩༠༨༩༨༩༧༠༠(སྒྲིག་གཙོ)

    རིན་སྤུངས་ཚུལ་བསྟན།༡༣༩༩༠༤༡༨༧༧༣(རྩོམ་སྒྲིག་པ)

 གནས་ཡུལ། གྲོང་ཁྱེར་ལྷ་སའི་ཀརྨ་དགོན་གསར་ལམ་གྱི་བོད་ལུགས་གསོ་རིག་ཀུན་བཏོད་ར་བའི་ཁང་པ་༢༠༤ཞང་ཞུང་རིག་གནས་ལས་ཤག

《ཞང་ཞུང་རིག་གནས》རྩོམ་སྒྲིག་ཁང་གིས།

༢༠༡༩ལོའི་༩ཚེས་༡༧ཉིན།

tibetmonk  2019-9-18 9:00:14

[རྩོམ་པ་པོ། སྟོང་སྐོར་ཚེ་རིང་ཐར།][རྩོམ་ཁུངས། ཀྲུང་གོའི་བོད་རིག་པ།]

[ནང་དོན་གནད་བསྡུས།] བོད་ཀྱི་ད་ཡོད་ལོ་རྒྱུས་ཡིག་ཆ་ནང་དུ་དྲན་པ་ནམ་མཁའ་གསུམ་མམ་བཞི་ཡོད་པར་སྨྲ་སྟེ། སྟག་གཟིག་པ་གཅིག་དང་། ཞང་ཞུང་བ་གཅིག་དང་། དྭགས་པོ་བ་གཅིག་བཅས་ཡིན་ལ། ཡིག་ཆ་ཁ་ཤས་སུ་གྲི་གུམ་བཙན་པོའི་སྐབས་སུའང་གཅིག་ཡོད་སྐད། འདིར་བརྗོད་པའི་དྲན་པ་ནམ་མཁའ་ནི་དམུ་བོན་དྲན་པ་ནམ་མཁའ་སྟེ་དྭགས་པོ་ནས་འཁྲུངས་པ་དེའོ།། དམུ་བོན་དྲན་པ་ནམ་མཁའ་(753)ནི་བོད་བཙན་པོ་ཁྲི་སྲོང་ལྡེ་བཙན་གྱི་སྐུ་རིང་ཡིན། ཁོ་སྔར་བོན་གཤེན་ཆེན་པོ་ཞིག་ཡིན་པ་དང་ཕྱིས་སུ་ཆོས་སུ་ཞུགས་ཏེ་བོན་ཆོས་གཉིས་ཀ་སྤྱད་པའི་མཁས་གྲུབ་ཆེན་པོ་ཞིག་ཡིན་ལ། ལྷག་པར་དུ་ཆོས་ཕྱོགས་ཀྱི་མཛད་རྗེས་ཧ་ཅང་ཆེ་བས་རྗེ་འབངས་ཉེར་ལྔའི་གྲས་①སུ་ཆུད་ཡོད་པ་མ་ཟད། བོན་ཕྱོགས་ནས་ཀྱང་མཁས་གྲུབ་ཆེན་པོའི་གྲས་སུ་བགྲངས་ཡོད་པ་དང་། ཕྱིས་སུ་བོན་གྱི་བསྟན་པའི་འཛིན་སྐྱོང་སྤེལ་གསུམ་ཐད་ནུས་པ་རྒྱ་ཆེན་པོ་ཐོན་པ་རེད།

[བརྡ་ཆད་གཙོ་བོ།]དམུ་བོན། དྲན་པ་ནམ་མཁའ། ཁྲི་སྲོང་ལྡེ་བཙན།

[ཀྲུང་གོའི་དཔེ་དེབ་དབྱེ་རྟགས།][ཡིག་ཚང་མཚན་བྱང་།]A

[རྩོམ་གྱི་གོ་རིམ་ཨང་སྒྲིག] 1002-9060(2012)04-0068 -13

དང་པོ། དྲན་པ་ནམ་མཁའི་ལོ་རྒྱུས་ཀྱི་རྒྱབ་ལྗོངས།

སྲོང་བཙན་སྒམ་པོས་དམ་པའི་ཆོས་གདན་དྲངས་པ་ནས་བཟུང་སྟེ་བོད་ནས་འཕེལ་རྒྱུས་བྱུང་རུང་། སྐབས་དེར་བོན་གྱི་བསྟན་པ་དེ་ས་ཁྱབ་རྡོ་ཁྱབ་ཏུ་དར་ནས་དམངས་ཁྲོད་དུ་རྟིང་གཞི་ཤིན་ཏུ་མཐུག་པའི་རྒྱུ་མཚན་གྱིས། བཙན་སྲོང་སྒམ་པོ་ནས་ཁྲི་སྲོང་ལྡེ་བཙན་གྱི་བར་དུ་ལོ་བརྒྱ་ཕྲག་ལྷག་གི་དུས་ཡུན་རིང་པོ་ཞིག་གི་ནང་དུ་ཐུབ་པའི་བསྟན་པ་བོད་དུ་ཁྱབ་ཆེན་པོ་ཞིག་དར་མ་ཐུབ་པར། རྒྱལ་བརྒྱུད་དང་བློན་བརྒྱུད་ཁ་ཤས་ནང་མ་གཏོགས་དམངས་ཁྲོད་དུ་བོན་དར་ཁྱབ་ཆེ།

ཁྲི་སྲོང་ལྡེ་བཙན་སྐུ་ན་ཕྲ་དུས་སྲིད་བསྐྱངས་ཤིང་ཆོས་ལ་དང་བ་སྐྱེས། ནར་སོན་རྗེས་ཐུབ་པའི་བསྟན་པ་དར་སྤེལ་བཏང་། གཞོན་ནུ་མང་པོ་རྒྱ་གར་དང་བལ་ཡུལ་སོགས་སུ་ཆོས་སློབ་ཏུ་མངགས། སློབ་དཔོན་པད་མ་འབྱུང་གནས་དང་མཁན་ཆེན་བོ་ངྷི་ས་ཏྭ་གདན་དྲངས། བསམ་ཡས་གཙུག་ལག་ཁང་བཞེངས། ཆོས་ཀྱི་བསྟན་བཅོས་བོད་ཡིག་ཏུ་བསྒྱུར། འགྱུར་ཡིག་ཚད་ལྡན་དུ་གཏོང་བའི་ཆེད་དུ་བཀས་བཅད་གནང་། སད་མི་བདུན་རབ་ཏུ་བྱུང་། ཐང་དང་དམག་བཀྱེས་ནས་བཀྲ་ཤིས་ཁྲི་སྒོ་བླངས་པ་ལ་སོགས་པའི་མཐའ་འཁོར་གྱི་དམག་འཁྲུག་གི་རྒྱུན་བསྐྱངས་ནས་རྒྱལ་ཁ་ཆེན་པོ་ཐོབ་པས། སྐབས་དེའི་བོད་བཙན་པོའི་སྲིད་དབང་རྒྱ་བསྐྱེད་ནས་མཚན་སྙན་གྲགས་བླ་ན་མེད་པ་རྒྱས། སྐབས་དེ་ནི་ཆབ་སྲིད་དང་། དམག་དོན། རིག་གནས། དཔལ་འབྱོར་དང་བཅས་ཕྱོགས་གང་ཅིའི་ཐད་ནས་ཀྱང་ཡར་རྒྱས་དང་གོང་འཕེལ་སྔ་ན་མེད་པ་ཕྱིན་པའི་སྐབས་ཤིག་ཡིན་པ་དང་། སྤྱི་ཚོགས་ཀྱི་ཡར་རྒྱས་དང་གོང་འཕེལ་ལ་བརྟེན་ནས། བོད་ཀྱི་མངའ་རིས་བསྐྱེད་ཅིང་རྒྱལ་པོའི་དབང་ཐང་དར་ནས་སྐབས་དེར་ཨ་སི་ཡ་གླིང་དུ་དོ་ཟླ་མེད་པའི་ཡུལ་གྲུ་ཞིག་ཏུ་གྱུར་ཡོད་པས་ན། ཏུན་ཧོང་ཡིག་རྙིང་ལས་ཀྱང་། བཙན་པོ་ཁྲི་སྲོང་ལྡེ་བཙན་གྱྀ་རིང་ལ། ཆོས་བཟང་སྲྀད་ཆེ་སྟེ། རྒྱལ་བོ་ནྀ་གནམ་ས་གཉྀས་ཀྱི་བར་ཡུལ་དུ་བརྣམ་ཞིང་། འགྲེང་དུད་གཉིས་ཀྱི་རྗེ་དང་བདག་མཛད་པའྀ་གཙུག་ལག་ཆེན་པོ། མྱྀའི་དཔེར་རུང་བར་མཛད་དོ།།②ཞེས་གསུངས་པ་ལྟར་རོ།། ཁྲི་སྲོང་གི་མཛད་འཕྲིན་ནང་ནས། བོད་རྗེས་རབས་ཀྱི་ལོ་རྒྱུས་ལ་ཤན་ཤུགས་ཆེ་ཤོས་ནི་རྒྱ་གར་གྱི་ཆོས་གདན་དྲངས་ཤིང་བསྟན་བཅོས་མང་པོ་བོད་སྐད་དུ་བསྒྱུར་བ་དེ་རེད། དེས་སྤྱི་ཕྱོགས་ནས་བོད་མི་རིགས་ཀྱི་རིག་གནས་ཀྱི་ཆགས་རིམ་དེ་རིག་གནས་བཅུ་ལ་བསྒྱུར་ཞིང་བསམ་བློའི་འཁྱེར་སོ་ནང་བའི་ཆོས་ལ་བསྐོར་བས། བོད་ཀྱི་སྲོལ་རྒྱུན་རིག་གནས་ཕུན་སུམ་ཚོགས་པར་བཏང་བ་མ་ཟད། བོད་མི་རིགས་ཀྱི་རིན་ཐང་གི་ལྟ་བ་དེའང་ཁ་ཕྱོགས་གསར་བ་ཞིག་ཏུ་བསྐོར། དེའི་ཕྱིས་ཀྱི་ལོ་རྒྱུས་ནང་དུ། རིག་གནས་བཅུ་ཡོངས་སུ་དང་དུ་བླངས་ནས་སྤེལ་བ་དང་། ལྷག་པར་དུ་དེའི་ནང་གི་ནང་དོན་རིག་པ་དང་ཚད་མ་རིག་པ་སོགས་དགོན་སྡེའི་སློབ་གསོའི་སྟོབས་ཤུགས་དང་འཆད་རྩོད་རྩོམ་གསུམ་གྱི་ཐབས་ལམ་བརྒྱུད་དེ། སྔར་ཡོད་གྱི་བཀའ་དང་བསྟན་བཅོས་ལ་འགྲེལ་ཤིན་ཏུ་མང་པོ་བརྒྱབ་པ་མ་ཟད། བོད་རང་གི་ལྗགས་རྩོམ་ཡང་ཕོན་ཆེན་པོ་བྱུང་ནས། བོད་མི་རིགས་འདི་འཛམ་གླིང་སྟེང་གི་ནང་བའི་བསྟན་པའི་གསལ་བྱེད་ཆེན་པོར་གྱུར།

གཉིས་པ། བོན་ཆོས་ཀྱི་འགལ་འབྲེལ་ནང་གི་དྲན་པ་ནམ་མཁའ།

ཁྲི་སྲོང་ལྡེ་བཙན་གྱིས་རྒྱ་གར་གྱི་ཆོས་བོད་ནས་གཏིང་ཇེ་ཟབ་དང་རྒྱ་ཇེ་ཆེ་རུ་བཏང་བ་དེས་བོད་ཀྱི་ཆོས་ལུགས་དང་རིག་གནས་སྤྱི་ཕྱོགས་ནས་སྔར་ལས་ཕུན་སུམ་ཚོགས་པར་བཏང་། རྒྱ་གར་གྱི་རིག་གནས་ཆེ་བ་ལྔ་དང་ཆུང་བ་ལྔ་བོད་སྐད་དུ་བསྒྱུར་ནས་བོད་ནས་དར་འགོ་བཙུགས་པ་བཅས་ཀྱིས་བོད་ལ་སྐུ་དྲིན་ཆེ། ཡིན་ན་ཡང་། བྱ་བཞག་དེ་དག་གི་རྒྱབ་སྐྱོར་དང་མཐུན་རྐྱེན་འོག ཁྲི་སྲོང་ལྡེ་བཙན་གྱིས་བོན་གྱི་བསྟན་པ་བསྣུབས་ཏེ། བོད་རང་སའི་ས་སྐྱེས་རྡོ་སྐྱེས་ཀྱི་བསྟན་པ་དང་རིག་གནས་ལ་གཏོར་སྐྱོན་ཆེན་པོ་བཏང་བ་དེ་ནི་བོད་མི་རིགས་ཀྱི་ཆོས་ལུགས་དང་རིག་གནས་ལོ་རྒྱུས་སྟེང་གི་གྱོང་གུད་ཆེན་པོ་ཞིག་རེད།

ཁྲི་སྲོང་གིས་སྲིད་དབང་བཟུང་མ་ཐག་པའི་དུས་སྐབས་ཤིག་ལ། ཁོང་སྐུ་ན་ཕྲ་བ་དང་སྲིད་དབང་ཕལ་ཆེར་ཞང་མ་ཞང་ཁྲོམ་པ་སྐྱེས་དང་། ངམ་སྟག་ར་ཀླུ་གོང་དང་། མང་རྗེ་ལོད་དང་། སྦས་སྐྱེས་བཟང་སྟག་སྣང་དང་། ར་ལྕག་ཁྲི་རྨང་ཁུང་རྒྱལ་དང་། ཁྱུང་པོ་སྤུངས་དང་ཟུང་ཙེ་ལ་སོགས་པའི་བོན་ལ་དགའ་བའི་བློན་པོ་རྣམས་ཀྱིས་བཟུང་བའི་སྟབས་ཀྱིས། བོད་དུ་བོན་གཙོ་བོ་དར་ཏེ། བསྒྲགས་པ་རིན་ཆེན་གླིང་གྲགས་ལས་ཀྱང་། ཡུལ་ཐམས་ཅད་བོན་གྱི་གསས་ཁང་། ཚ་ཚ་མཆོད་རྟེན་དུ་བཞེངས་ཤིང་བླ་མ་སློབ་དཔོན་མང་དུ་བྱུང་ངོ་།།③ཞེས་པ་དང་། དུས་དེ་ཙམ་ན་བོན་པོ་མཁས་བཙུན་བྱིན་རླབས་ཅན་བསམ་དུ་མེད་པ་བཞུགས། སྒོས་སུ་མཐུ་ཆེན་མི་དགུ བླ་ཆེན་དྲན་པ་ནམ་མཁའ་ལ་སོགས་མང་དུ་བཞུགས་སོ།།④ཡང་། དེའི་དུས་སུ་རྒྱལ་པོ་ཡང་མངའ་ཐང་དགུང་དང་མཉམ། བོད་ཡུལ་ཐམས་ཅད་བདེ་སྐྱིད་དང་ལྡན་ནོ།།⑤ཞེས་གསུངས་པར་བལྟས་ན། ཁྲི་སྲོང་ལྡེ་བཙན་གྱི་ཚེ་སྟོད་དུ་བན་བོན་གྱི་འགལ་བ་ཆེན་པོ་བྱུང་མེད་པ་འདྲ། ཡང་བསྒྲགས་པ་རིན་ཆེན་གླིང་གྲགས་ལས། ལྷ་སྲས་ཁྲི་སྲོང་ལྡེ་བཙན་ལ། སྐྱེ་བ་གོང་མའི་ལས་དབང་དང་། བོད་ཁམས་ཕུགས་སུ་ཐུབ་པ་ཡི། དམ་པའི་ཆོས་རང་སྤྱོད་དགོངས་ནས། རྒྱ་གར་ནས་བོ་དྷེ་ས་ཏྭ་དང་། པདྨ་སམ་བྷ་བ་གདན་དྲངས་ཏེ། ངས་ཆོས་ལ་སྤྱོད་པས་ཁྱེད་རྣམས་ཀྱང་བཞུགས། ལྷ་ཁང་འདྲ་བ་ཡང་བཞེངས་པ་ཡིན་ཟེར་རོ།།⑥ཞེས་གསུངས། དེ་ནས་བཟུང་སྟེ། ཁྲི་སྲོང་ལྡེ་བཙན་གྱིས་བོན་སྤངས་ནས་ཆོས་སྤྱོད་པའི་ཐག་བཅད། ཡིན་ན་ཡང་།སྐབས་དེར་དམངས་ཁྲོད་དུ་བོན་གྱི་བསྟན་པའི་རྟིང་གཞི་མཐུག་ཅིང་། བཙན་པོའི་གཡས་གཡོན་དུ་བློན་པོ་དང་གཤེན་པོ་དང་བཙུན་མོ་དང་བཅས་བོན་ལ་དད་པའི་མི་སྣ་དབང་ཐང་ཅན་གྱིས་བསྐོར་ཡོད་པས། ཆོས་གཙོ་བོར་བཀུར་ཞིང་བོན་བསྣུབ་པའི་ཐག་གཅོད་དེ་ཀུན་གྱིས་ཁས་ལེན་སོས་ཐེག་བྱ་བའི་ཆེད་དུ། ཁྲི་སྲོང་གིས་བོན་པོ་དང་ཆོས་པའི་རྩོད་པ་ཆེན་པོ་ཞིག་བཀོད་སྒྲིག་བྱས་ནས་བོན་ཆོས་ཀྱི་འདེམས་ཀ་བོར། དེ་ལ་བརྟེན་ནས་བོན་བསྣུབ་པའི་ཐབས་ཇུས་བཀོད། ཁྲི་སྲོང་སྐབས་ཀྱི་བོན་དང་ཆོས་ཀྱི་རྩོད་པ་དེའི་སྐོར་ལ། བོད་ཀྱི་ད་ཡོད་ཀྱི་ཡིག་རྙིང་ དུ་བཀོད་ཡོད་པ་སྔ་ཤོས་ནི་རྦ་བཞེད་ཞབས་བཏེགས་མ་ཡིན་ཏེ་དེ་ལྟར་ན། ཁྲི་སྲོང་གིས་ཆོས་དར་སྤེལ་བྱེད་བཞིན་པའི་སྐང་ལ། བོན་པོ་དང་བློན་པོ་ཁ་ཤས་ཁ་ལོག་སྟེ་ཆོས་མི་བྱེད་བོན་བྱེད་ཟེར་ནས་རྒྱལ་པོའི་བཀའ་གྱེན་དུ་བཟློག བོ་ངྷི་ས་ཏྭས་བོན་ལ་རྩོད་པ་བསླངས་ནས། བོན་རྒྱལ་ན་བོན་སྤེལ་ཞིང་ཆོས་འགྲོ་རྒྱུ་དང་ཆོས་རྒྱལ་ན་ཆོས་སྤེལ་ཞིང་བོན་འགྲོ་རྒྱུར་འཆམ། ཕོ་རང་ཟུར་ཕུ་སྐྱང་བུ་འཚལ་དུ་བཏབ་ནས། ཆོས་ཀྱི་ཁད་དཔོན་ཞང་ཉ་བཟང་དང་། སྟག་བཙན་ལྡོང་གཟིགས་དང་། སེང་འགོ་ལྷ་ལུང་གཟིག་དང་། ཉང་ཤ་མི་རྣམས་བོ་ངྷི་ས་ཏྭའི་ཁ་འཛིན་དང་ཤགས་འདེབས་སུ་བསྐོས། སྟག་ར་ཀླུ་གོང་དང་།རྩིས་པ་ཆེན་པོ་ཁྱུང་པོ་དུམ་ཚུགས། ཁྱུང་པོ་ཙེ་ཙེ། ལྕོག་ལ་སྨོན་ལམ་འབར། ཚེ་མི་ལ་སོགས་པ་བོན་གྱི་ཁ་འཛིན་ཤགས་འདེབས་སུ་བསྐོས།⑦ཞེས་གསུངས། ཡིན་ན་ཡང་། ཡིག་ཆ་དེར་བོན་ཆོས་ཀྱི་རྩོད་པའི་སྐོར་བཤད་པའི་སྐབས་སུ་དྲན་པ་ནམ་མཁའི་མཚན་གླེང་མེད། དེའི་རྗེས་སུ་དུས་རབས་བཅུ་བ་ནས་བཅུ་གཅིག་པའི་བར་དུ་བྱུང་བར་འདོད་པའི་ཡིག་རྙིང་བསྒྲགས་པ་རིན་ཆེན་གླིང་གྲགས་⑧ལས། རྒྱལ་པོ་ཁྲི་སྲོང་གིས་བོན་དང་ཆོས་གཉིས་རྩོད་དུ་བཅུག་པ་ལ། བོན་པོའི་ཁ་འཛིན་ཞང་མ་ཞང་ཁྲོམ་པ་སྐྱེས་དང་། ངམ་སྟག་ར་ཀླུ་གོང་བསྐོས། ཆོས་ཀྱི་ཁ་འཛིན་ཆིབ་ཤཱཀྱ་བྲ་བ་དང་། སྙེར་སྟག་བཙན་ལྡོང་གཟིགས་བསྐོས། སྤྱི་པ་ལ་འགོས་ཁྲི་བཟང་ཡབ་ལྷག་དང་། བྱང་ཆུབ་རྡོ་རྗེ་སྤྲེའུ་ཆུང་བསྐོས། རྒྱལ་པོ་ཉིད་ནི་བླ་ན་བཞུགས། བོན་པོའི་ཤག་མཁན་དྲན་པ་ནམ་མཁས་མཛད། ཆོས་པའི་ཤགས་མཁན་རྨ་ཨ་ཙ་ར་རིན་ཆེན་མཆོག་གིས་མཛད།⑨ཅེས་གསུངས། རྦ་བཞེད་ཞབས་བཏེགས་མ་ནང་བོན་གྱི་ཁ་འཛིན་དང་ཤགས་མཁན་མཉམ་དུ་མི་ལྔ་བགྲངས་རུང་དྲན་པ་ནམ་མཁའ་དེའི་གྲས་སུ་ཆུད་མེད། རྦ་བཞེད་ཕྱོགས་བསྒྲིགས་ནང་དུ་འདུས་པའི་རྦ་བཞེད་དང་དབའ་བཞེད་དང་ཆོས་འབྱུང་གི་ཡི་གེ་ཞིབ་མོ་ལ་སོགས་པའི་ཡིག་རྙིང་རིགས་མཚུངས་རྣམས་དེའི་སྐོར་ལ་ཞལ་མཐུན། དེ་ནས་ལོ་འཁོར་ཉིས་བརྒྱ་ལྷག་གི་རྗེས་སུ་གཏེར་ནས་ཐོན་པའི་བསྒྲགས་པ་རིན་ཆེན་གླིང་གྲགས་ནང་དུ་རྩོད་པའི་ཁ་འཛིན་དང་ཤགས་མཁན་བྱ་བ་སོ་སོར་བགྲངས་ནས་དྲན་པ་ནམ་མཁའ་ཤགས་མཁན་ཡིན་པར་བཀོད་ཡོད། དེའི་མཇུག་བྱང་དུ།⑩ རིག་འཛིན་རྣམས་ཀྱིས་བཀའ་བགྲོས་ནས། དྲན་པ་བདག་གིས་ཡི་གེར་བཏབས་པའོ།། ཞེས་གསུངས་པར་བལྟས་ན། དྲན་པ་ནམ་མཁའ་ཤགས་མཁན་ཡིན་པར་འདོད་པའི་ཡིག་ཆ་རྙིང་ཤས་བསྒྲགས་པ་རིན་ཆེན་གླིང་གྲགས་ཡིན་པ་དང་། དེ་ནི་རིག་འཛིན་མང་པོས་སྐབས་དེའི་ལོ་རྒྱུས་ཕྱིར་དྲན་བྱས་པ་དེ་དྲན་པ་ནམ་མཁས་ཡིག་ཐོག་ཏུ་ཕབ་པ་ཡིན་དགོས། དེའི་ཕྱིས་སུ་བྱུང་བའི་སྲིད་པ་རྒྱུད་ཀྱི་ཁ་བྱང་དུ་བསྒྲགས་བྱང་བཞིན་དུ་བཀོད། བོན་ལུགས་གི་བསྟན་འབྱུང་ཁག་ཏུ་དྲན་པ་ནམ་མཁའ་བོན་ཆོས་རྩོད་པའི་སྐབས་སུ་ཤགས་མཁན་ཡིན་པར་སྨྲ་བའི་ཁུངས་དེ་ལ་ཐུག བསྒྲགས་པ་རིན་ཆེན་གླིང་གྲགས་དང་སྲིད་པ་རྒྱུད་ཀྱི་ཁ་བྱང་གཉིས་སུ་ཤགས་འགྱེད་མ་གཏོགས་མཐུ་རྩལ་འགྲན་པའི་བརྒྱུད་རིམ་ཁ་ཤས་ཀྱང་བརྗོད་ཡོད། རྩོད་པ་མ་བྱས་གོང་དུ་འབྲས་སུ་མངོན་གསལ་དུ་ཤེས་ཐུབ་པའི་བོན་ཆོས་ཀྱི་རྩོད་གླེང་དེ་མཐར་ཆོས་རྒྱལ་བོན་ཕམ་གྱི་འབྲས་བུས་མཇུག་བསྒྲིལ། ཤགས་མཁན་བྱས་ནས་ཕམ་རུང་། དྲན་པ་ནམ་མཁའ་ནི་ཁྲི་སྲོང་སྐབས་ཀྱི་མཁས་གྲུབ་ཆེན་པོ་ཞིག་ཡིན་པ་བན་བོན་གཉིས་ཀར་རྩོད་མེད་ཡིན་ཏེ། དུས་རབས་བཅུ་གཉིས་པར་གྲུབ་པའི་ཉང་ཆོས་འབྱུང་དུ། དྲན་པ་ནམ་མཁས་ཐོག་ཆེན་མདའ་ལྟར་འཕེན། གཡག་རྒོད་ཁུགས།⑾ཞེས་བསྔགས་པ་དང་། ཀློང་ཆེན་ཆོས་འབྱུང་དུ་ཁྲི་སྲོང་སྐབས་ཀྱི་པཎ་གྲུབ་དང་ལོ་ཙཱ་བའི་མཚན་ཐོའི་ནང་དུ་དྲན་པ་ནམ་མཁའ་ཆུད་⑿ཡོད་པ་དང་། རྗེ་འབངས་ཉེར་ལྔའི་གྲས་སུ་ཁྱེའི་ཀི་ཆུང་ལོ་ཟེར་བ་དེ་དྲན་པ་ནམ་མཁའ་ཡིན་པ་ཡིག་རྙིང་ཁག་ཏུ་གསལ་བ་དང་དུང་དཀར་བློ་བཟང་འཕྲིན་ལས་ནས་ཀྱང་གསུངས་⒀ཡོད་པ་བཅས་ཀྱིས་བདེན་དཔང་བྱེད་ཐུབ། བོན་ཆོས་ཀྱི་རྩོད་པ་ལས་བོན་ཕམ་པའི་གོ་སྐབས་དང་བསྟུན་ནས། ཁྲི་སྲོང་གིས་བོན་གྱི་བསྟན་པ་བསྣུབས། བསྒྲགས་པ་རིན་ཆེན་གླིང་གྲགས་ལས། དུས་དེ་ཙམ་ན། རྒྱལ་བློན་བན་དྷ་རྣམས་ཀྱིས་བོན་གྱི་ལྷ་ཁང་མཆོད་རྟེན་འགའ་རེ་བཤིག ཆོས་ཀྱི་ལྷ་ཁང་མཆོད་རྟེན་དུ་བསྒྱུར་རོ། བོན་པོ་ལ་ལ་གྲི་རུ་བཀྲོངས། བོན་སྤྱོད་པ་གང་ན་འདུག་པ་ལ་ལྟ་བས་ཉུལ་མར་བཏང་། བོན་ལ་དགའ་བའི་བོད་འབངས་འགའ་རེ་ལ་ཆད་པ་བཅད། བོད་ཀྱི་ས་སྐོར་དུ་བོན་དེ་ལྟར་བསྣུབས་སོ།།⒁ཞེས་གསུངས། ཁ་ཅིག་བནྡེར་བསྒྱུར་ཞིང་ཁ་ཅིག་ཡུལ་གྲུ་གཞན་དུ་སྤྱུགས། དྲན་པ་ནམ་མཁའ་ནི་བནྡེར་བསྒྱུར་བའི་གྲས་ཀྱི་མཁས་གྲུབ་ཆེན་པོ་ཡིན་པ་བོན་ཆོས་གཉིས་ཀའི་ཡིག་ཆ་ལས་གསལ། ཁོ་རང་ནན་གྱིས་བནྡེར་བསྒྱུར་པས་ཁོ་ལ་ནན་བན་དྲན་པ་ནམ་མཁའ་ཞེས་ཐོགས་⒂པའི་ལོ་རྒྱུས་ཡང་དེ་ལ་ཐུག བན་དུ་བསྒྱུར་པའི་རྗེས་སུ་ཆོས་ཕྱོགས་ཀྱི་དོན་བྱ་མང་པོ་བསྒྲུབས་པས་ཁོ་རང་རྗེ་འབངས་ཉེར་ལྔའི་གྲས་སུ་ཆུད། ཁོ་བན་དུ་བསྒྱུར་བ་མ་ཟད་ཆོས་ལུགས་སུ་རབ་ཏུ་བྱུང་བའི་ལོ་རྒྱུས་ཀྱང་བསྒྲགས་པ་རིན་ཆེན་གླིང་གྲགས་དང་དེའི་ཕྱིས་སུ་གཏེར་ནས་ཐོན་པའི་སྲིད་པ་རྒྱུད་ཀྱི་ཁ་བྱང་ནང་དུ་གསལ་མོད། དེའི་སྐོར་བན་ལུགས་ཀྱི་ཆོས་འབྱུང་དུ་གསལ་ཁ་མ་ཐོན། ངག་རྒྱུན་དུ་ཁོ་རང་སད་མི་བདུན་གྱི་གྲས་སུ་ཡོད་པར་གྲགས་མོད་ཡིག་ཐོག་ཏུ་ཕབ་པ་མ་མཐོང་། ངག་རྒྱུན་དེའི་བྱུང་ཁུངས་ཡང་གོང་སྨྲས་ཀྱི་ཡིག་ཆ་དེ་གཉིས་སུ་ཁོ་རང་ཆོས་ལུགས་སུ་རབ་ཏུ་བྱུང་བའི་སྐོར་བྲིས་ཡོད་པ་དེ་ལ་ཐུག་ཡོད་སྙམ། དེའི་ཕྱིས་ཀྱི་ལོ་རྒྱུས་ཡིག་ཆ་ཁག་ཏུ་ཕལ་ཆེར་གོང་སྨྲས་ཀྱི་བཞེད་པ་འདིའི་རྒྱུན་བསྐྱངས། དཔེར་ན། མཁས་གྲུབ་ལུང་རྟོགས་རྒྱ་མཚོས་(1878)དྲན་པ་ནམ་མཁའ་ལ་སོགས་ཀྱིས་གྲུབ་མཐའ་ཕྱོགས་མེད་བཞེས་ནས། རྒྱལ་པོ་དང་བན་དེ་དགོངས་པ་དང་མཐུན་པར་ཆོས་ཀྱི་རྗེས་སུ་རབ་ཏུ་བྱུང་བའི་ཚུལ་མཛད། དེ་ཡང་རང་གི་གཤང་ནི་སྤྱི་བོར་བཀྲོལ་ནས་སྤང་བར་བྱའོ་གཡུང་དྲུང་གི་བོན་གསུངས་ནས་གཤང་བསྐུངས་སོ།། རྡོ་རྗེ་དང་དྲིལ་བུ་བླངས་ནས་སྨིན་མཚམས་སུ་བསྒྲགས་ཏེ་བླང་བར་བྱའོ་དམ་པའི་ཆོས་གསུངས་ནས་རང་གི་དབུ་སྐྲ་རང་གིས་བྲེགས། ལོ་སུམ་ཅུ་སོ་ལྔའི་བར་དུ་བན་གྲལ་དུ་བཞུགས་སོ།། ཞེས་གསུངས་པ་ལྟར་རོ།།⒃སྐབས་དེ་ལ་དྲན་པ་ནམ་མཁའ་གཙོ་བྱས་པའི་ནན་བན་མང་པོ་ཞིག་གིས་ཆོས་ཀྱི་འགྲོས་དང་བསྟུན་པའི་བོན་བསྟན་གྱི་གཞུང་ལུགས་དང་ཆོ་གའི་བསྟན་བཅོས་མང་པོ་བརྩམས་པ་དུས་ཕྱིས་ཀྱི་བོན་གསར་མའི་ཁུངས་སུ་གྱུར། ཁྲི་སྲོང་གིས་བོན་བསྣུབས་པ་ནི་ཆོས་སྤེལ་བའི་ལམ་གྱི་གེགས་བསལ་བ་ཡིན་ལ། གེགས་མེད་ཀྱི་ལམ་དེར་ཞུགས་ནས་ཆོས་སྤེལ་མཁན་གཙོ་བོ་ནི་སློབ་དཔོན་པད་མ་འབྱུང་གནས་གཙོ་བྱས་པའི་རྒྱ་བོད་ཀྱི་མཁས་གྲུབ་དང་ཆོས་བློན་རྣམས་ཡིན། དེའི་རྐྱེན་གྱིས་བོན་གྱི་གཞུང་ལུགས་དང་ཆོ་གའི་བསྟན་བཅོས་གསར་བ་བརྩམས་པ་རྣམས་སུ་སློབ་དཔོན་པད་མ་འབྱུང་གནས་གཙོ་བོར་བཀུར་ཡོད། སྐབས་དེའི་བོན་པོ་རྣམས་ལ་མཚོན་ན་སློབ་དཔོན་པད་མ་བཀུར་མི་བཀུར་དེ་ཁྲི་སྲོང་གི་དབང་ཐང་དེ་ལ་མགོ་སྒུར་དང་མི་སྒུར་གྱི་གནད་འགག་ལ་ཐུག་ཡོད་པས། བོན་བསྟན་སྤེལ་བའི་ཆེད་དུ་ནན་བན་རྣམས་ཀྱིས་སློབ་དཔོན་པད་མ་གཙུག་ཏུ་བཀུར་ནས་རང་གི་བསྟན་པ་སྤེལ་བ་དང་དེའི་དར་རྒྱུན་བོན་གསར་མ་བྱ་བ་དེ་རེད། དེའི་རྒྱུ་མཚན་གྱིས་སློབ་དཔོན་བསྟེན་མི་བསྟེན་དེ་ཕྱིས་བྱུང་གི་བོན་པོ་གསར་རྙིང་གི་ཁྱད་པར་འགའ་རེ་ནང་གི་གཅིག་ཡིན་པ་གདོན་མི་ཟའོ།། ཁོ་བོ་ནི་བོན་གྱི་གཞུང་གི་ཐོས་བསམ་དང་ཆོ་གའི་ལག་ལེན་ཕྱོགས་གང་ཅི་ཐད་ནས་སྦྱོང་བ་ཅི་ཡང་མེད་པ་ཞིག་ཡིན་མོད། མཁས་པའི་དབང་བོ་རྣམས་ལ་བཀའ་འདྲི་ཞུས་པ་ལྟར་ན། གོང་སྨྲས་ཀྱི་ཁྱད་པར་དེ་དང་ཆོ་གའི་ལས་ཚོགས་ལ་སོགས་པའི་བཅའ་ཁ་ཕྱག་ལེན་ཙམ་མ་གཏོགས། མདོ་སྔགས་སེམས་གསུམ་གྱི་གཞུང་གི་རྒྱུད་ལུང་མན་ངག་དང་དེ་དག་གི་ཉམས་ལེན་ཕྱོགས་ནས་བོན་གསར་རྙིང་བར་ལ་ཁྱད་པར་ཅི་ཡང་མེད་པར་གསུངས། སྐབས་དེར་བརྩམས་པའི་བསྟན་བཅོས་མང་པོ་ཞིག་མངོན་ལྐོག་གཉིས་ཀའི་སྒོ་ནས་སྤེལ་བ་དང་། མང་ཤོས་གཏེར་དུ་སྦས་ནས་ཕྱིས་སུ་སྤྲུལ་སྐུ་རྣམ་བཞི་ལ་སོགས་པས་གཏེར་ནས་བཏོན་པ་རྣམས་བོན་གསར་མར་གཏོགས་པའི་གཏེར་གསར་གྱི་བསྟན་བཅོས་ཡིན་ནོ།།

ཁྲི་སྲོང་ལྡེ་བཙན་གྱིས་བོན་བསྣུབས་པ་བདེན་མོད། ཁོས་བོན་པོ་ཐམས་ཅད་མེད་པར་བཟོས་པ་མ་ཡིན་པའང་མངོན་གསལ་རེད། བོན་བསྣུབས་པའི་དམིགས་ཡུལ་གཙོ་བོ་ནི་ཆོས་ལ་བརྣག་པའི་བོན་གྱི་བློན་པོ་རྣམས་དང་དེ་དག་གིས་རྒྱབ་སྐྱོར་བྱས་པའི་བོན་པོ་དེ་ཚོ་ཡིན་ལ། དེ་ཆོས་ལུགས་ཀྱི་འགལ་ཟླ་གཅིག་པུ་མ་ཡིན་པར་ཁོ་རང་གི་སྲིད་དབང་གིའང་འགྲན་ཟླར་གྱུར་ཡོད་པས། རྒྱལ་པོའི་སྲིད་དབང་བརྟན་དགོས་ན་ངེས་པར་དུ་ཁོ་ཆོའི་སྟོབས་ཤུགས་དེ་རྩ་མེད་དུ་གཏོང་དགོས་པར་གྱུར་པ་ལས། བོན་གྱི་བསྟན་པ་ཐམས་ཅད་མེད་པར་བཟོས་པ་མ་རེད་སྙམ། དེའི་རྒྱུ་མཚན་གྱིས་ཁྲི་སྲོང་གིས་བོན་བསྣུབས་པའི་རྗེས་སུ། བོན་ཆོས་གཉིས་ཀ་སྤྱད་པའི་ལོ་རྒྱུས་ཡིག་ཐོག་ཏུ་གསལ། བསྒྲགས་པ་རིན་ཆེན་གླིང་གྲགས་ལས། རྒྱལ་པོའི་ཞལ་ནས། བོན་ཆོས་གཉིས་ཐང་རེ་གཉིས་ཀ་སྤངས། ད་ཡང་གཉིས་ཀ་སྤྱན་དྲངས་བ་ལགས། ད་གཉིས་ཀ་ང་ཡི་མཆོད་གནས་ལ་བཞུགས་འཚལ། གཏེར་ཡང་ཀཉིས་ཀ་ལ་སོ་སོར་བདོག་པས། དེ་ཀའི་སྟེང་དུ་ཞོག བོན་ཆོས་གཉིས་བཟང་ལ་བདེན་པས། ང་ཡི་སྐུ་ཚེ་ལ་ཡང་གཉིས་ཀ་དགོས་འབངས་ཀྱི་སྲོག་འཚོ་བ་ལ་ཡང་གཉིས་ཀ་དགོས། སེམས་ཅན་གྱི་དོན་བྱེད་པ་ལ་ཡང་གཉིས་ཀ་དགོས་པས། སྲིད་པ་ན་གཉེན་པ་བོན་ཡིན་བཙུན་པ་ཆོས་ཡིན་པས། ད་ཕྱིན་ཆད་བོན་ཆོས་གཉིས་ཀ་འཚོགས་ལ། ཟུར་ཕུད་རྐྱང་བུ་ཚལ་དུ་གཉེན་སྲེད་ཅིག་མཛད་པར་ཞུ། ཞེས་གསུངས་སོ།།⒄ཞེས་བཀོད། བོན་ཆོས་གཉིས་ཀ་མཉམ་དུ་སྤྱད་པ་མ་ཟད། ཁྲི་སྲོང་ལྡེ་བཙན་གྱིས་ཞང་ཞུང་གི་མཁས་པ་གྱེར་སྤུངས་སྣང་བཞེར་ལོད་པོ་ལ་དོན་བཞི་ཁས་བླངས་པའི་ལོ་རྒྱུས་ཡིག་ཆ་ཁ་ཤས་སུ་མཐོང་རྒྱུ་ཡོད་དེ། དེའི་ནང་དུ་གྱེར་སྤུངས་ཀྱིས་སྤྱོད་པའི་ཞང་ཞུང་གི་བོན་སྡེ་དེ་མི་བསྣུབ་རྒྱུ་དང་། ཁོའི་སྐྱེས་ཁུངས་གུ་རིབ་ཀྱི་མི་སྡེ་དེ་ལ་ཡར་ལུང་སོག་ཀ་བྱིན་ནས་བླ་དང་བློན་གྱི་ཁྲལ་མེད་པར་གཡས་གྲལ་དུ་འཇོག་རྒྱུ་དང་། ཞང་ཞུང་རྒྱལ་པོའི་སྐུ་ཚད་ཀྱི་གསེར་གྱི་མཆོད་རྟེན་གཅིག་བཞེང་རྒྱུ་དང་། མི་སྟོང་བཅུ་གསུམ་བཙུན་མོ་ཁྱུང་ཟ་མཚོ་རྒྱལ་གྱི་སྤྱན་སྔར་བརྫངས།⒅ཞང་ཞུང་སྙན་རྒྱུད་གཏེར་དུ་མ་སོང་པའི་རྒྱུ་མཚན་ཡང་དེ་ཡིན་པར་གྲགས། གོང་གི་ལུང་འདི་དག་ལ་རྒྱུ་མཚན་མེད་པ་ཞིག་མ་ཡིན་ཏེ། སྐབས་དེར་དམངས་ཁྲོད་དུ་བོན་གྱི་སྟོབས་ཤུགས་ཤིན་ཏུ་ཆེ་བས། ཁོས་བོན་བསྣུབས་པ་དེ་གཙོ་བོ་བོན་པོའི་ནང་ནས་ཁོས་ཆོས་སྤེལ་བའི་བྱ་བཞག་དེ་ལ་ངོ་རྒོལ་དྲག་པོ་བྱས་པའི་སྟོབས་ཤུགས་དེ་ལ་དམིགས་པ་ཡིན་པ་ལས། བོད་ནས་བོན་ཐམས་ཅད་མེད་པར་བཟོ་རྒྱུ་གཏན་ནས་མ་རེད། དེ་བས། སྐབས་དེར་དྲན་པ་ནམ་མཁས་གཙོས་པའི་བོན་གསར་མ་ཆོས་ལ་བསྟུན་ནས་བྱུང་ཞིང་མི་མཐུད་ནས་དར་ཐུབ་པའི་རྒྱུ་མཚན་དེ་ལ་ཐུག སྐབས་དེར་ཆོས་ལ་བསྟུན་ནས་བོན་གསར་མ་བྱུང་བའི་དུས་མཚུངས་སུ། བོན་ལ་བསྟུན་ནས་ཆོས་གསར་མ་ཡང་བྱུང་ཡོད་ལ། རྒྱ་གར་གྱི་ཆོས་ལ་བོད་ཀྱི་བཙན་པོའི་སྲིད་དབང་གི་རྒྱབ་སྐྱོར་ཡོད་པས་སྟོབས་ཤུགས་ཆེ་ཞིང་དར་སྤེལ་ཆེན་པོ་བྱུང་ཡོད་མོད། ལོ་ངོ་སྟོང་ཕྲག་ཁ་ཤས་བརྒྱུད་པའི་ས་སྐྱེས་རྡོ་སྐྱེས་ཀྱི་བོན་པོའི་དད་པ་དེ་བོད་མི་རྣམས་ཀྱི་ལུས་ཁྲག་དྲོན་མོའི་རྒྱུན་དང་རུས་པའི་རྐང་དུ་ཞུགས་ཡོད་པས་དེ་གློ་བུར་དུ་བརྗེས་ཐུབ་རྒྱུ་ག་ལ་སྲིད། དེ་བས། བཙན་པོའི་སྲིད་དབང་གི་བཙན་ཤུགས་ལ་བརྟེན་ནས་ལྷ་ཁང་བཞེངས་ཤིང་ཆོས་ཀྱི་བསྟན་བཅོས་བསྒྱུར་བའི་དུས་མཚུངས་སུ། སློབ་དཔོན་པད་མ་ལ་སོགས་པའི་ཆོས་པ་རྣམས་ཀྱིས་བོད་མི་རྣམས་གོམས་འདྲིས་ཆེ་ཞིང་སྐྱིད་སྡུག་རེ་དགོས་པའི་བོན་ལུགས་ཀྱི་ཡུལ་ས་གཞི་བདག་དང་གནས་རི་ཐམས་ཅད་ལ་ཆོས་དང་མཐུན་པའི་བསང་དང་བསྐང་གསོལ་གསར་བ་བརྩམས་ནས་ཆོས་ཕྱོགས་ཀྱི་སྲུང་མར་བཀུར། སྲིད་པ་རྒྱུད་ཀྱི་བོན་ལས་འཇིག་རྟེན་གྱི་བདེ་སྡུག་སྒྲུབ་ནས་བོད་དམངས་ཁྲོད་དུ་དར་ཁྱབ་ཤིན་ཏུ་ཆེ་བའི་སེལ་དང་བསང་། བརྔན། གཡང་། མདོས། ཀླུ། གླུད། གཉན། འདུར། གཏོ། དཔྱད། མོ། རྩིས། གཏོར་མ་ལ་སོགས་པའི་བོན་གྱི་རིག་གནས་ཐམས་ཅད་ཆོས་དང་བསྟུན་ནས་སླར་ཡང་གཞུང་གསར་བ་བརྩམས་ནས་ཆོས་ལུགས་སུ་བསྒྱུར། བསྒྱུར་བཅོས་དེ་དག་གིས་བོད་པ་རྣམས་གློ་བུར་དུ་རང་ལ་རྒྱུས་མེད་པའི་ཆོས་ལུགས་ཤིག་ལ་བསྒྱུར་དགོས་པའི་སེམས་ཁྲེལ་དང་། རྒྱུས་མེད་པའི་ཆོས་ཤིག་ལ་དད་པ་བྱས་ན་ཡུལ་ས་གཞི་བདག་གི་ཆད་པ་འབྱུང་སྲིད་པའི་འཇིགས་སྣང་སེལ་བས། སྐབས་དེར་ཆོས་སྤེལ་བའི་གྲོགས་སུ་གྱུར། དེ་ནི་བོན་དང་བསྟུན་པའི་ཆོས་གསར་བ་བྱུང་བའི་ལོ་རྒྱུས་ཀྱི་རྒྱུ་མཚན་རེད། སྐབས་དེར་ཆོས་ལ་བསྟུན་པའི་བོན་གསར་མ་དང་བོན་ལ་བསྟུན་པའི་ཆོས་གསར་མ་གཉིས་ཀ་བྱུང་བ་ནི་བོད་ཀྱི་ལོ་རྒྱུས་སྟེང་དུ། རྒྱ་གར་གྱི་དམ་པའི་ཆོས་དང་བོད་རང་སའི་གཡུང་དྲུང་བོན་གཉིས་འབྲེལ་འདྲིས་དང་ཕན་ཚུན་དང་ལེན་གཏིང་ཟབ་མོ་འབྱུང་བའི་འགོ་བཙུགས་པ་ཡིན་པ་དང་། རིན་ཐང་གཞལ་དུ་མེད་པའི་བསྟན་པ་དེ་གཉིས་གྱི་གསེར་གྱི་ཞུན་མ་བོད་ས་མཐོའི་སྟེང་དུ་བཞུར་ཞིང་མཉམ་གཅིག་ཏུ་འདྲེས་ནས་ཕྱིས་བྱུང་བོད་མི་རིགས་ཀྱི་སྲོལ་རྒྱུན་རིག་གནས་ཕུན་སུམ་ཚོགས་པར་བཏང་པ་དང་། བོད་མི་རིགས་ཀྱི་སེམས་ཁམས་ཀྱི་དྭངས་གཙང་དང་། བསམ་བློའི་འཁྱེར་སོ། བྱ་སྤྱོད་ཀྱི་སྟབས་སྟངས་སོགས་ལ་ཤན་ཤུགས་རྒྱ་ཆེན་པོ་ཐེབས་ཡོད་པ་ལ། སློབ་དཔོན་པད་མ་འབྱུང་གནས་དང་དྲན་པ་ནམ་མཁའ་ལ་སོགས་པའི་མཁས་གྲུབ་རྣམས་ཀྱིས་ཕྱག་རྗེས་བླ་ན་མེད་པ་བཞག་ཡོད།

གསུམ་པ། དྲན་པ་ནམ་མཁའ་དང་སློབ་དཔོན་པད་མ་འབྱུང་གནས།

བོད་ཀྱི་ལོ་རྒྱུས་སྟེང་དུ་དྲན་པ་ནམ་མཁའ་ཁ་ཤས་བྱུང་བ་དང་། འདིར་བརྗོད་པའི་དྲན་པ་ནམ་མཁའ་ནི་དྭགས་པོའི་ཡུལ་ནས་འཁྲུངས། ཡབ་དམུ་གཤེན་དགས་པ་དང་ཡུམ་བདའ་ཟ་མཁར་ལྕམ། དགོང་ལོ་དགུ་ནས་འབྲི་ཀློག་ལེགས་སུ་སྦྱངས། བཅུ་བདུན་ལོན་ནས་རྒྱ་གར་ཡུལ་དུ་བྱོན། དགུང་ལོ་བཞི་བཅུ་ཞེ་བདུན་ལ་གསེར་ཕྱེ་བྲེ་གསུམ་ཁྱེར་ནས་བླ་མ་ལ་ཞབས་ཏོག་འབུལ་དུ་བྱོན། རྒྱ་གར་མཁས་པ་བདེ་བ་སྙིང་པོ་གསས་ལ་རྒྱ་གར་བོན་སྐོར་སྦྱངས། ལྷག་པར་དུ་གསང་སྔགས་དང་སེམས་ཕྱོགས་དཔྱིས་ཕྱིན་པར་སྦྱངས། དྲང་དོན་མུན་སེལ་སྒྲོན་མ་ལས།(དྲན་པ་ནམ་མཁས་)ཞང་ཞུང་སྟོང་རྒྱུང་མཐུ་ཆེན་ལ་མཐུ་དང་རྫུ་འཕྲུལ་གྱི་བོན་སྡེ་ཞུས། འོད་འཕྲོ་སེང་གེ་འབར་བའི་ཚལ་དུ་ལོ་གསུམ་ཐུགས་ཉམས་སུ་བཞེས། རིག་པ་གཅིག་རྫོགས་སུ་སོང་བས་རྫུ་འཕྲུལ་ཞབས་ཀྱིས་བོད་དུ་ལན་གསུམ་བྱོན། བསམ་ཡས་མཆིམས་ཕུ་རུ་བཅུད་ལེན་དང་རྐང་མགྱོགས་ལ་སོགས་གྲུབ་རྟགས་ཤིན་ཏུ་མང་བར་བྱུང་།⒆ཞེས་དང་། ཚེ་ཡི་དངོས་གྲུབ་ཐོབ་ནས་བོད་ལ་ལོ་བདུན་བཞུགས། དེ་དུས་ཆོས་དར་བོན་བསྣུབས་བོན་རྣམས་གཏེར་དུ་སྦས།⒇ཞེས་གསུངས། ལོ་སུམ་ཅུ་རྩ་བདུན་སྟེང་དུ་ནན་བན་བྱས་གཏེར་དུ་སྦས་པའི་བོན་གཏེར་རྣམས་ནི་དུས་ཕྱིས་སུ་བླ་ཆེན་དྲན་པ་ནམ་མཁའི་ཡང་སྲིད་དུ་འདོད་པའི་སྤྲུལ་སྐུ་རྣམ་བཞི་21ལ་སོགས་པས་གཏེར་ནས་དྲངས་པའི་བོན་གསར་མ་མདོ་ཁམས་སྨད་དུ་དར་བ་དེ་རྣམས་ཡིན་པར་གྲགས། དྲན་པ་ནམ་མཁའ་དང་པད་མ་འབྱུང་གནས་གཉིས་ཀ་དུས་རབས་བརྒྱད་པའི་སྐབས་ཀྱི་ལོ་རྒྱུས་མི་སྣ་གལ་ཆེན་ཡིན་པ་དང་། སྔ་མ་བོན་གཤེན་ཆེན་པོ་ཡིན་ཞིང་། རྗེས་སུ་ཁྲི་སྲོང་ལྡེ་བཙན་གྱིས་ཆོས་སྤེལ་ཞིང་བོན་བསྣུབས་པས་ནན་གྱིས་བན་དུ་བསྒྱུར་ནས་བོན་ཆོས་གཉིས་ཀ་སྤྱད་པའི་མི་སྣ་ཞིག་ཏུ་གྱུར། ཕྱི་མ་ནི་ཁྲི་སྲོང་གིས་ཨོ་རྒྱན་ཡུལ་ནས་གདན་དྲངས་ནས་བོད་དུ་ཆོས་སྤེལ་བའི་མཁས་གྲུབ་ཆེན་པོ་ཞིག་རེད། ཁོང་གཉིས་དུས་མཉམ་ཡིན་ཞིང་ཆོས་ལུགས་ཕྱོགས་ཁག་ཁ་ཁ་ཡིན་པ་མངོན་གསལ་རེད་མོད། ཐད་ཀར་འགལ་འབྲེལ་ཅི་བྱུང་གི་ལོ་རྒྱུས་ཡིད་རྟོན་ཐུབ་པ་ཞིག་ད་རེག་བར་དུ་མ་མཐོང་།

ཁོང་རྣམ་པ་གཉིས་ལ་འགལ་འབྲེལ་ཅི་བྱུང་གི་ལོ་རྒྱུས་གསལ་བོ་མེད་ན་སྐབས་འདིར་མཉམ་དུ་བརྗོད་པའི་དགོས་པ་ཆེར་མ་མཆིས་མོད། ཕྱིས་བྱུང་གི་ལོ་རྒྱུས་ཡིག་ཆ་ཁ་ཤས་སུ་པད་མ་འབྱུང་གནས་མངལ་སྐྱེས་ཡིན་པ་དང་གྱེར་སྤུངས་དྲན་པ་ནམ་མཁའ་བྱ་བ་དེ་པད་མ་འབྱུང་གནས་ཀྱི་ཡབ་ཡིན་པར་བརྗོད་ཡོད་པས། སྐབས་འདིར་དེའི་སྐོར་གྱི་གཏམ་གླེང་རགས་ཙམ་མི་བྱེད་ཀ་མེད་བྱུང་།

བོན་ལུགས་ཀྱི་ཡིག་ཚང་ལྟར་ན། ཞང་ཞུང་ཁྱུང་ལུང་དངུལ་མཁར་ནས་འཁྲུངས་པའི་གྱེར་སྤུངས་དྲན་པ་ནམ་མཁའ་བྱ་བ་ལ་སྲས་གཉིས་ཡོད་ལ། དེ་ནི་ཚེ་དབང་རིག་འཛིན་དང་པད་མ་མཐོང་གྲོལ་ཏེ། ཕྱི་མ་ནི་པད་མ་འབྱུང་གནས་ཡིན་པར་གྲགས། དེའི་སྐོར་ལ་ཡིག་ཆ་སྔ་ཤོས་ནི། དུས་རབས་བཅོ་བརྒྱད་པའི་ནང་གི་གཏེར་སྟོན་སངས་རྒྱས་གླིང་པས་(1705-1735)གཏེར་ནས་བཏོན་པའི་སློབ་དཔོན་པད་མའི་རྣམ་ཐར་ཡིན། རྣམ་ཐར་དེའི་མཚན་བྱང་ལ། གུ་རུ་པད་འབྱུང་གི་རྣམ་ཐར་ཀུན་སྣང་གསལ་བའི་སྒྲོན་མེ་22ཞེས་ཟེར། དེའི་ཡར་སྔོན་གྱི་ཡིག་ཆ་རྙིང་པར་དྲན་པ་དང་སློབ་དཔོན་པད་མ་གཉིས་ཡབ་སྲས་ཡིན་པའི་སྐོར་བྲིས་ཡོད་པ་མ་མཐོང་། སྲིད་པ་རྒྱུད་ཀྱི་ཁ་བྱང་ལས་དྲན་པ་རྒྱ་གར་དུ་བྱོན་དུས་མཁའ་འགྲོ་འོད་ལྡན་འབར་མ་སྒྲུབ་སྡེ་མ་རུ་བཙལ་ནས་སྲས་བྱུང་བའི་ཚིག་སྒྲོས་ཙམ་23བྱུང་མོད། སྐབས་དེར་བྱུང་བའི་སྲས་ནི་རིག་འཛིན་ཆེན་པོ་ཚེ་ལ་དབང་ཐོབ་པ་ཞེས་པ་དེ་གཅིག་པུ་ཡིན་ལ་དེ་ནི་བླ་ཆེན་ཚེ་དབང་རིག་འཛིན་ཡིན་པ་མངོན་གསལ་རེད། སྲས་དེ་མ་གཏོགས་པད་མ་འབྱུང་གནས་སྐོར་གྱི་སྐད་ཆ་ཅི་ཡང་མེད། དེ་ལ་བལྟས་ན་དྲན་པ་ནམ་མཁའ་དང་པད་མ་འབྱུང་གནས་གཉིས་ཡབ་སྲས་ཡིན་པའི་འབྲེལ་བའི་སྐོར་གྱི་སྐད་ཆ་དེ་མ་མཐའ་ཡིན་ན་ཡང་དུས་རབས་བཅུ་གསུམ་པའི་ནང་དུ་ཁོད་པོ་བློ་གྲོས་ཐོགས་མེད་(L280 )ཀྱིས་སྲིད་པ་རྒྱུད་ཀྱི་ཁ་བྱང་གཏེར་ནས་བཏོན་པའི་རྗེས་སུ་བྱུང་བ་ཡིན་པ་འདྲ།

འཇམ་དབྱངས་མཁྱེན་བརྩེ་དབང་བོས་( 1820-1892) གསུངས་པའི་གཏེར་སྟོན་གྱི་རྣམ་ཐར་ནང་དུ་བོན་ལུགས་ཀྱི་སློབ་དཔོན་པད་མའི་རྣམ་ཐར་ཞིག་ཡོད་པ་ཕྱིས་སུ་ཀོང་སྤྲུལ་བློ་གྲོས་མཐའ་ཡས་ཀྱིས་རིན་ཆེན་གཏེར་མཛོད་ནང་དུ་བཅུག་ཡོད། འཇམ་དབྱངས་མཁྱེན་བརྩེ་དབང་བོས་གསུངས་པའི་རྣམ་ཐར་དེའི་ནང་དུ། ལེའུ་དང་པོ། ཡབ་དྲན་པ་ནམ་མཁའི་འཁྲུངས་རབས་དང་། ལེའུ་གསུམ་པར། སྤྲུལ་བའི་སྲས་གཉིས་འཁྲུངས་པ་གཡུང་དྲུང་དོན་གསལ་དང་པད་མ་མཐོང་གྲོལ་ཏེ་རྗེས་མ་ནི་པད་མ་འབྱུང་གནས་ཡིན། ལེའུ་བཅུ་བའི་ནང་དུ་པད་མ་འབྱུང་གནས་བོད་དུ་ཕེབས་ནས་བསྟན་པ་བསྐྱངས་ཤིང་གཏེར་མང་པོ་སྦས་པའི་སྐོར་གསུངས་ཡོད། དེ་ལ་བལྟས་ན། བོན་ལུགས་སུ་ཡོད་པའི་པད་མ་འབྱུང་གནས་ཀྱི་རྣམ་ཐར་དེས་ཐུབ་བསྟན་པའི་མཁས་པ་ཁ་ཤས་ལ་ཡང་ཤན་ཞུགས་ཡོད་པ་ཤེས་ཐུབ།

མཁར་རྨེའུ་བསམ་གཏན་གྱིས་1972ལོར་འཇམ་དབྱངས་མཁྱེན་བརྩེ་དབང་བོས་གསུངས་པའི་བོན་ལུགས་ཀྱི་པད་མ་འབྱུང་གནས་ཀྱི་རྣམ་ཐར་སྐོར་གྱི་གསུང་གླེང་ཡོད་ཅིང་། ཧྥ་རན་སིའི་མཁས་པ་ལྕམ་འབུ་ལུང་མདོ་ཡིས། བོན་པོའི་གསང་སྔགས་ཀྱི་གཏམ་རྒྱུད་དང་པད་མ་འབྱུང་གནས་ཀྱི་རྣམ་ཐར་ནང་གི་ལོ་རྒྱུས་རྒྱུ་ཆའི་བྱུང་ཁུངས་24ཞེས་བྱ་བའི་དཔྱད་རྩོམ་ཞིག་1985ལོ་ཡི་ཏ་ལི་ནས་བཀྲམ་པའི་ནང་དུ། འཇམ་དབྱངས་མཁྱེན་བརྩེ་དབང་པོས་གསུངས་པའི་སློབ་དཔོན་པད་མ་འབྱུང་གནས་ཀྱི་རྣམ་ཐར་ནང་གི་ལོ་རྒྱུས་ཀྱི་རྒྱུ་ཆའི་བྱུང་ཁུངས་བོན་པོ་ཡིན་པ་གསལ་བོར་བསྟན་ཡོད།

1924ལོར་ཉག་རོང་གཏེར་ཆེན་གསང་སྔགས་གླིང་པས་(1864- )དྲན་པ་ནམ་མཁའི་རྣམ་ཐར་གཡུང་དྲུང་གསང་བའི་མཛོད་ཆེན་ཞེས་བྱ་བའི་རྣམ་ཐར་པོ་ཏི་བརྒྱད་ཀྱི་བདག་ཉིད་ཅན་ཞིག་གཏེར་ནས་དྲངས།25 ཕྱིས་སུ་དེ་ཉག་རོང་གོང་རྒྱལ་དགོན་པས་ཤིང་པར་བརྐོས་ནས་སྤེལ། རྣམ་ཐར་དེའི་ནང་དུ། ཡབ་དམུ་རྒྱལ་རྒྱུང་ཡ་མུ་ཁོད་དང་། ཡུམ་ཕྱ་བཙུན་གོང་མ་གཉིས་ཀྱི་སྲས་སུ། གྱེར་སྤུངས་དྲན་པ་ནམ་མཁའ་བྱ་བ་འཁྲུངས་པ་26 བཀོད་པའི་རྗེས་སུ། གྱེར་སྤུངས་དྲན་པ་ནམ་མཁའ་སྟག་གཟིག་དང་། རྒྱ་གར། ཞང་ཞུང་། འཇང་ཡུལ། རྒྱ་ནཀ་རི་བོ་རྩེ་ལྔ།

བྲུ་ཤ གེ་སར། ཐོད་དཀར། ཁ་ཆེ། གྲུ་གུ་ལ་སོགས་པའི་ཡུལ་གྲུ་སོ་སོར་རྫུ་འཕྲུལ་གྱིས་ཕེབས་པ་མ་ཟད། རྒྱ་གར་ནས་ཡབ་བཟང་སྐྱོང་རྒྱལ་པོའི་སྲས་མོ་འོད་ལྡན་འབར་མ་ཁབ་ཏུ་བཞེས། ཞང་ཞུང་སྐོ་ཕུག་བར་གསུམ་དུ་ཕེབས་པའི་སྐབས་སུ། ཁྱུང་ལུང་དངུལ་མཁར་རྒྱལ་བ་མཉེས་པའི་ཡུལ་གྱི་གསང་གནས་གཡུང་དྲུང་གཏམས་པའི་བྲག་ཕུག་ཏུ། ཡུམ་འོད་ལྡན་འབར་མའི་གློ་གཡས་ནས་མཐོང་བ་སྒྲོན་གསལ་དང་གློ་གཡོན་ནས་གཡུང་དྲུང་མཐོང་གྲོལ་གཉིས་སྲས་སུ་འཁྲུངས།27སྔ་མ་མཐོང་བ་སྒྲོན་གསལ་སྒྲུབ་གནས་བྱ་རི་གཙུག་ལྡན་དུ་བཞུགས་པའི་དུས་སུ་ཚེ་དབང་རིག་འཛིན་དུ་གྲགས་28པ་དང་། ཕྱི་མ་གཡུང་དྲུང་མཐོང་གྲོལ་གྱིས་བལ་ཡུལ་དུ་བསྟན་པ་སྤེལ་བའི་སྐབས་སུ་མཚན་ཡང་སཾ་བྷ་ཝ་ར་ཞེས་སུ་གྲགས་29པ་པད་མ་འབྱུང་གནས་ཡིན། དྲན་པའི་རྣམ་ཐར་གཡུང་དྲུང་གསང་བའི་མཛོད་ཆེན་འདི་དང་ཡིག་ཆ་སྔ་མ་རྣམས་སུ། ཞང་ཞུང་ཁྱུང་ལུང་དངུལ་མཁར་ནས་འཁྲུངས་པའི་དྲན་པ་ནམ་མཁའ་དེའི་འཁྲུངས་ལོ་ལ་ཡིག་ཆ་གསལ་ཁ་ཐོན་པ་མ་མཐོང་30མོད། ཁོང་ཞང་ཞུང་རྒྱལ་རབས་ཀྱི་སྐབས་སུ་ཁྱུང་ལུང་དངུལ་མཁར་དུ་འཁྲུངས་པ་ཡིན་ན། མ་མཐའ་ཡང་ལོ་འཁོར་བརྒྱ་ཕྲག་མང་པོའི་སྔོན་དུ་གོ་དགོས། དྲན་པའི་རྣམ་ཐར་གཡུང་དྲུང་གསང་བའི་མཛོད་ཆེན་ལྟར་ན་ཁོང་ནི་ཚེ་ལོ་ལ་རང་དབང་ཐོབ་པའི་གྲུབ་ཆེན་ཞིག་ཡིན་པས། ཚེ་ལོ་ཅི་ཙམ་བཞུགས་པ་དང་མཛད་པ་ཅི་ཙམ་བསྐྱངས་རུང་འགལ་བ་མེད་མོད། དེང་སང་ཚན་རིག་ཞིབ་འཇུག་གི་རིག་པའི་རྩལ་ལ་བརྟེན་ནས་དེའི་གསལ་ཁ་འགྲོལ་བའི་ཐམས་ལམ་ད་རུང་རྙེད་མེད།

བཞི་བ། དྲན་པ་ནམ་མཁའི་གསུང་རྩོམ་དང་གཏེར་ཆོས་སྐོར།

དྲན་པ་ནམ་མཁའི་གསུང་རྩོམ་དང་གཏེར་ཆོས་སྐོར་ལ། ལོ་རྒྱུས་ཡིག་ཆ་ལྟར་ན། དམུ་བོན་དྲན་པ་ནམ་མཁའ་ནི་དུས་རབས་བརྒྱད་པའི་སྐབས་ཀྱི་བོན་གཤེན་ཆེན་པོ་ཡིན་པ་དང་གཏེར་མང་པོ་སྦས་པའི་ལོ་རྒྱུས་གསལ་བོ་ཡོད་པ་ལས། དངོས་སུ་གསུངས་པ་དྲང་དོན་མུན་སེལ་སྒྲོན་མེ་དང་ངེས་དོན་ནམ་མཁའ་འཕྲུལ་མཛོད། བསྒྲགས་པ་རིན་ཆེན་གླིང་གྲགས་བཅས་ཡོད། གཏེར་དུ་སྦས་པའི་སྐོར་ལ། དབུས་གཏེར་ནང་གསེས་ཀྱི་ཡེར་རྫོང་མ་ནི། དམུ་བོན་དྲན་པ་ནམ་མཁའ་དང་བ་གོར་བེ་རོ་ཙ་ན་གཉིས་ཀྱིས། རྒྱ་གར་བོན་སྐོར་རྣམས་དབུས་ཀྱི་ཡང་དབེན་དང་ལྷ་ས་ཡེར་བའི་རྫོང་ལ་སྦས་པ་དེ་ལ་ཟེར། གཙང་གི་བནྡེ་མི་གསུམ་སྟེ་སུམ་པ་དབང་ཚུལ་དང་། སྒྲེ་ཚུལ་སེང་། རྐྱང་བུ་དབང་ཕྱུག་གྲགས་བཅས་ཀྱིས་ཡིག་ཆའི་ཁ་བྱང་གཅིག་ཁྱེར་ནས་བསམ་ཡས་སུ་ཆོས་གཏེར་འཚོལ་དུ་ཕྱིན་ཀྱང་མ་རྙེད། གཏེར་མེད་པས་ངོ་ཚ་བསམ་ནས་མུ་མཐུད་དུ་ཡེར་བར་འཚོལ་དུ་ཕྱིན། གཏེར་རྙེད་རུང་གཏེར་བདག་མ་མཆོད་པས་མི་གསུམ་ག་བཙན་གཟེར་གྱིས་གྲོངས་ཤིང་། གཏེར་ཤོག་རྣམས་འདོག་ཚ་ཁུད་ཀྱི་གཉེན་སྟོན་ལྷ་འབར་ལ་བབས་པར་གྲགས། དེའི་སྲས་གཉན་སྟོན་གཟི་བརྗིད་ཀྱིས་ལུང་བཀྲོལ་པའི་གསུང་རབ་ནི། བོན་ཉིད་སྙིང་པོ་བདལ་བའི་འབུམ། དུམ་པ་བརྒྱད་འབུམ་རྩ་གཅིག་དང་དགུ་བྱུང་ངོ་། །མངོན་རྟོགས་རིག་པ་རྩེ་མོའི་འབུམ་དུམ་པ་བཅུ། ཐེག་པ་རིམ་པ་མངོན་དུ་བཤད་པའི་མདོ་རྒྱུད། རྩ་འགྲེལ་མེ་ལོང་དགུ་སྐོར་དང་བཅས་པ། ཚད་མ་སྨྲ་སེང་། མུ་སྟེགས་གཏན་ཚིག་ཐིགས་པ། ཕྱི་ལ་གཟུངས་འདུས་རྒྱབ་ཆོག་རེ་དང་བཅས་པ། མཆོད་གཏོར་རྒྱ་ཆེར་འགྲེལ། ཐུགས་རྗེ་བྱམས་མའི་མདོ་རྩ་དང་། ཤེས་རབ་སྙིང་པོ་ལ་སོགས་མདོ་དགུ། ཡན་ལག་བསྡུས་པ་དང་བཅུའོ།། སྔགས་ཀྱི་སྐོར་ལ། ཁྲོ་བོ་མངོན་པར་རོལ་པ་ལ། ཡང་གསང་མཆོག་གི་རྩ་རྒྱུད་ལ་སོགས་ཏེ། རྒྱུད་བཅུ་གསུམ། དོན་འགྲེལ་ཁོག་དབུབ་ཆེན་མོ་དང་བཅུ་བཞི། ཁུག་གསུམ། དུས་ཚིགས་གསུམ། མཐའ་རྒྱས་གསུམ། ཞི་བའི་ཕྲིན་ལས་རིན་ཆེན་དྲ་བ། ཁྲོ་བོའི་ཕྲིན་ལས་མངོན་པར་རོལ་པ། མཆོང་དང་ཆ་ལག་མང་ངོ་།། རྒོད་སྐོར་ལ། ཞི་ཁྲོ་ཡང་གབ། ཕྱག་རྒྱ་གསང་ཐིས། ཐོག་སེར་སྲོག་གསུམ་གྱི་སྒྲུབ་པ་ལ་སོགས། འཆི་བདག་བདུད་སྐོར་ནི། བདུད་ཕུར་ནག་པོ་ལ་རྒྱུད་གསུམ། ཞལ་གདམས་དགྲ་འབྱེད་དང་བཅས་པའོ།། གཞན་ཡང་ཕུར་བ་ཤ་འབལ་གྱི་སྐོར་ལ་སོགས་བྱུང་། ལི་ཤུའི་སྒྲུབ་སྐོར་ལ་སོགས་བྱུང་ངོ་།། སེམས་ཕྱོགས་རྫོགས་ཆེན་གྱི་སྐོར་ནི། བྱང་སེམས་ནམ་མཁའ་དབྱིངས་ཡངས་ཀྱི་རྒྱུད་དོན་འགྲེལ་དང་བཅས་པ། སེམས་ཉིད་གཏིང་རྫོགས་འཁོར་བ་དོང་སྤྲུགས་ཀྱི་རྒྱུད། བླ་མེད་ཀྱི་མདོ་གསུམ། དར་ཁའི་ཚད་མ་ཀུན་གཞི་འཕྲུལ་གྱི་མེ་ལོང་། ཐིག་ལེ་ཉི་མའི་སྙིང་པོ། ས་གཅོད་དང་བཅས་པ་བྱུང་ངོ་། །དེར་གཉན་སྟོན་ལ་གྱེར་དབང་གྲུབ་ཀྱིས་ཞུས། དེའི་སྲས་གྱེར་སྟོན་ནམ་གཡུང་ལ། ལུང་བོན་ལྷ་གཉན་གྱིས་ཞུས་ཏེ་དར་བས། གྱེར་ལུང་གཉིས་ལ་ཁུངས་སུ་བྱེད་དོ།།31མཁས་གྲུབ་ལུང་རྟོགས་རྒྱ་མཚོས། དྲན་པ་ནམ་མཁའ་དང་ཅོ་ཟ་བོན་མོས་བསམ་ཡས་དང་ལྷ་ས་ཡེར་པའི་རྫོང་ལ་སྦས།32ཞེས་གསུངས། འཇར་པན་གྱི་རྒྱལ་ས་ཐོ་ཁིས་ཡོ་ན་ཡོད་པའི་དཔེ་མཛོད་ཁང་ཆེན་མོ་ཏོ་ཡོ་བྷུང་ཁོ་སྟེ་ཤར་མཚོའི་རིག་མཛོད་ནང་གི་བོད་ཡིག་གི་ཐོ་ཡིག་ཏུ33།མཇུག་བྱང་དུ་དུས་རབས་བརྒྱད་པའི་དྲན་པ་ནམ་མཁའི་གཏེར་མ་ཡིན་པར་བཀོད་པའི་ཡིག་ཆ་གཤམ་གསལ་ཏེ།No.1 VII 5-A 176,2,pp. 1-239:བདེན་པ་བོན་གྱི་མཛོད་ས་སྒྲ་འགྲེལ་འཕྲུལ་གྱི་ལྡེ་མིག་34 NO. 6 VII 5-A 299,2,pp. 324-439:སྙན་རྒྱུད་ཐོས་གྲོལ་བར་དོ་འཕྲང་སྒྲོལ་ཆེན་མོ། NO.7 VII 5-A 215,20,pp. 415-428:ཡང་དག་རིན་ཆེན་སྒྲོན་མེའི་བཏགས་ཆོག་འཁོར་ལོའི་ལག་ལེན། ཤོག No.13 VII 5-A 204,27,pp. 671-715:སྨད་འགྲེལ་མན་ངག་འདུས་པའི་རྒྱུད། No.23 VII 5-A 279,5,pp. 217-226: གསང་སྔགས་རྫོང་འཕྲེང་། No.29 Zogai,32,pp.44 folgs:སྙན་རྒྱུད་བར་དོ་ཐོས་གྲོལ་གསལ་སྒྲོན་ཆེན་མོ། No.32 VII 5-A 281,22,pp. 239-359:སྤྱི་སྤུངས་སྐོར་གསུམ་གྱི་ཡང་བཅུད་རྩོད་པ་བཟློག་པའི་འཁོར་ལོ་དབལ་གསས་རྔམ་པའི་ལས་རིམ། No.43 VII 5-A 282,18,pp. 401-418:ངོ་སྤྲོད་བསྡུད་པའི་འཆོང་ཡིག No.44 VII 5-A 284,5,pp. 1-22:དྲན་པ་གསང་སྒྲུབ་ཁྲིད་གཞུང་བཅས། NO.57 VII 5-A 200,27,pp.519-522: དྲན་པ་གསེར་གདམས་ཀྱི་རྩིས་རྒྱ། No. 65 VII 5-A 206,2, pp.48-71:བསྒྲགས་པ་གླིང་གྲགས། No.73 VII 5-A 210,1,pp. 1-16:བོན་ཐམས་ཅད་ཀྱི་ཡང་མཛོད་རྣམ་འབྱེད་འཕྲུལ་གྱི་ལྡེ་མིག T887. No.91 VII5-A 326,21,pp.539-585:ལམ་ལྔ་མཁའ་འགྲོའི་སྒྲུབ་པ་ལས་དབང་མཆོག་ཀ་དག་ལག་མཆང་།

དབྱི་ཏ་ལི་རྒྱལ་ཁབ་ཀྱི་རྒྱལ་ས་རོ་མ་ན་ཡོད་པའི་ཤར་ཕྱོགས་དང་ཨ་ཧྥི་རི་ཀ་ཞིབ་འཇུག་གླིང་གེ་དཔེ་མཛོད་ཁང་དུ་རྒྱལ་སྤྱིའི་བོད་རིག་པའི་མཁས་ཆེན་ཏུའུ་ཆིས་བོད་ནས་ཁྱེར་བའི་བོད་ཡིག་དཔེ་རྙིང་མང་པོ་བཞུགས་པའི་ཁྲོད་དུ། བོན་གྱི་ཡིག་རྙིང་པོ་ཏི་བདུན་ཅུ་དོན་བརྒྱད་ཡོད་ལ། དེར་དྲན་པ་ནམ་མཁའི་གསུང་རབ་དང་གཏེར་མ་ཡིན་པར་ཁ་གསལ་བ་གང་ཡང་མེད།35

དེང་སང་བོད་རང་ན་པར་དུ་བསྐྲུན་པའི་བོན་གྱི་བཀའ་འགྱུར་དང་བརྟེན་འགྱུར་ཁྲོད་དུ་དྲན་པའི་གཏེར་མ་ཡིན་པ་ཡོད་མོད། དེ་དག་གི་དཀར་ཆག་པར་དུ་བསྐྲུན་ཡོད་པས་དེར་ཡོད་དྲན་པའི་གཏེར་ཆོས་འདིར་བཀོད་མེད། དེའི་ནང་ནས་ཁ་ཤས་ཀྱི་མཇུག་བྱང་དུ་དྲན་པ་ནམ་མཁའ་གང་གི་གསུང་ཡིན་པར་ཁ་གསལ་བཀྲལ་མོད། ཡིག་ཆ་ཁ་ཤས་སུ་དྲན་པ་ནམ་མཁའ་སྔ་ཕྱི་གང་གིས་གསུངས་པ་ཡིན་པར་གསལ་ཁ་བཀྲོལ་མེད།

ལྔ་བ། སྤྱི་སྡོམ།

བོད་ཀྱི་ལོ་རྒྱུས་སྟེང་དུ་དྲན་པ་ནམ་མཁའ་ཟེར་མཁན་ཁ་ཤས་བྱུང་ལ། སྟག་གཟིག་གི་དྲན་པ་ནམ་མཁའ། ཞང་ཞུང་གི་གྱེར་སྤུངས་དྲན་པ་ནམ་མཁའ་དང་དྭགས་པོའི་དམུ་བོན་དྲན་པ་ནམ་མཁའོ།། དེ་མ་ཟད། གྲི་གུམ་བཙན་པོའི་སྐབས་སུའང་དྲན་པ་ནམ་མཁའ་ཞིག་ཡོད་སྐད། སྐབས་སྐབས་སུ་དྲན་པ་ནམ་མཁའ་དགོང་ལོ་བརྒྱད་བརྒྱ་བཞུགས་པའི་བཤད་སྟངས་ཀྱིས་གྲི་གུམ་བཙན་པོའི་སྐབས་ཀྱི་དྲན་པ་ནམ་མཁའ་དང་ཁྲི་སྲོང་སྐབས་ཀྱི་དྲན་པ་ནམ་མཁའ་དེ་གཅིག་ཡིན་པར་འདོད་པའང་ཡོད། བན་བོན་གཉིས་ཀའི་ཁུངས་ཐུབ་ཀྱི་ཡིག་ཆ་ཚད་མར་བཟུང་ནས་དཔྱད་ན། མ་མཐའ་ཡང་ཁྲི་སྲོང་ལྡེ་བཙན་སྐབས་ཀྱི་དམུ་བོན་དྲན་པ་ནམ་མཁའ་དེ་ལོ་རྒྱུས་ཀྱི་མི་སྣ་དངོས་ཡོད་ཅིག་ཡིན་པ་ར་སྤྲོད་འབྱུང་ཐུབ།

དམུ་བོན་དྲན་པ་ནམ་མཁའ་དེ་སྔར་བོན་པོ་ཡིན་ཞིང་རྗེས་སུ་ཆོས་སུ་ཞུགས་པ་དེ་གཞན་དབང་དུ་གྱུར་བའི་ལས་ཤིག་རེད་མོད། སྐབས་དེར་ཆོས་ལ་བསྟུན་པའི་བོན་གསར་མ་ཞིག་དང་བོན་ལ་བསྟུན་ནས་ཆོས་གསར་མ་ཞིག་བྱུང་ཡོད་པ་དེས། དམ་པའི་ཆོས་བོད་དུ་གདན་དྲངས་པའི་རྗེས་སུ་བོན་ཆོས་གཉིས་ཀ་མོས་མཐུན་གྱི་འགོ་བཙུགས་པའི་རྟགས་མཚན་ཞིག་ཏུ་གྱུར་ཡོད་པས་དེ་ལ་དོན་སྙིང་ཆེན་པོ་ལྡན་སྙམ། བོད་རང་སའི་བོན་བསྟན་དང་ཐུབ་བསྟན་པའི་འབྲེལ་བའི་ལོ་རྒྱུས་ནི། ཐོག་མར་འགལ་ཟླ་དང་། བར་དུ་འབྲེལ་འདྲིས་དང་། རྗེས་སུ་འཆམ་མཐུན་བྱུང་ནས་མཐར་སྐྱབས་འགྲོ་དང་ལྟ་བ་བཀའ་བཏགས་ཀྱི་ཕྱག་རྒྱ་ལ་སོགས་པའི་གནད་འགག་ཆ་ནས་ཀྱང་གཅིག་མཐུན་དུ་བྱུང་བའི་ལོ་རྒྱུས་ཤིག་རེད། དེའི་ནང་ནས་སློབ་དཔོན་པད་མ་འབྱུང་གནས་མཆོད་གནས་སུ་བཀུར་པའི་བོན་གསར་མའི་ཁུངས་ཡང་དྲན་པ་ནམ་མཁའ་ལ་ཐུག་ཡོད་པས། ལོ་རྒྱུས་དེས་བོད་མི་རིགས་ཀྱི་རིག་གནས་ཀྱི་ཆགས་རིམ་དང་རིན་ཐང་གི་ལྟ་བ་སྔ་མ་རྣམས་ཀྱི་རྟིང་བཟློག་ནས་བོན་ཆོས་གཅིག་ཏུ་བསྒྲིལ་བས། བོད་ཀྱི་རིག་གནས་འདི་སྔར་ལས་ཕུན་སུམ་ཚོགས་པར་བཏང་བ་མ་ཟད། བོན་ཆོས་གཉིས་ཀ་ནང་པའི་བསྟན་པ་ལ་འདྲེས་ནས། བོད་མི་རིགས་ཀྱང་ནང་བའི་བསྟན་པའི་རྒྱུད་འཛིན་པའི་མི་རིགས་ཤིག་ཏུ་གྱུར་ཡོད་པ་དེས། མི་རིགས་ཀྱི་སྔོན་ཐོན་དང་སྤྱི་ཚོགས་ལ་ཕན་ཐོགས་ཆེན་པོ་བྱུང་ཡོད།

མཆན་འགྲེལ།

①《དུང་དཀར་ཚིག་མཛོད་》ལས། བཅུ་བ་ཁྱེའི་ཀི་ཆུང་ལོ་ནི་དྲན་པ་ནམ་མཁའ་ཡིན་པར་གསུངས། P.1287

②www.idp.bl.uk/pages/collections.a4d

③④⑤⑥⑩14 17《བསྒྲགས་པ་རིན་ཆེན་གླིང་གྲགས》བོན་གྱི་ལོ་རྒྱུས་ཡིག་ཆ་ཕྱོགས་སྒྲིག བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། 2010ལོ། ལྷ་ས། P176 P176 P177 P177P185 P187

⑦བཙན་པོ་ཁྲི་སྲོང་ལྡེ་བཙན་དང་མཁན་པོ་སློབ་དཔོན་པདྨའི་དུས་མདོ་སྔགས་སོ་སོར་མཛད་པའི་《སྦ་བཞེད་ཞབས་བཏགས་མ》 《སྦ་བཞེད་ཕྱོགས་བསྒྲིགས》 མི་རིགས་དཔེ་སྐྲུན་ཁང་། 2009ལོ། པེ་ཅིན། P24

⑧དྲན་པ་ནམ་མཁས་བརྩམས་པར་གྲགས། 《མཐའ་བཞི་འཕྲུལ་གསས་སམ་མཐའ་གཞི་ཡེ་ཤེས་བློ་གྲོས་ཀྱི་གཏེར་མ》 དུས་རབས་10-11པ།

⑨ 《བསྒྲགས་པ་རིན་ཆེན་གླིང་གྲགས》 གངས་ཏི་སེ་བོན་གཞུང་རིག་མཛོད་དཔེ་ཚོགས་ཀྱི་པོད་དང་པོ་སྟེ། སྟོན་པའི་མཛད་རྣམ་དང་ལོ་རྒྱུས་ཀྱི་སྐོར། P124-125།

⑩ A Catalogue of Bonpo Publications by Samten  G. Karmay. Tokyo, The Toyo Bunko, 1977.
⑾ཉང་ཉི་མ་འོད་ཟེར་(1124-1192)གྱིས་བརྩམས་པའི་《ཆོས་འབྱུང་མེ་ཏོག་སྙིང་པོ་སྦྲང་རྩིའི་བཅུད》 བོད་ལྗོངས་མི་དམངས་དཔེ་སྐྲུན་ཁང་། 1988ལོ། ལྷ་ས། P324

⑿ཀློང་ཆེན་དྲི་མེད་འོད་ཟེར་གྱི་བརྩམས་པའི་《ཀློང་ཆེན་ཆོས་འབྱུང》 བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་།1991ལོ། ལྷ་ས། P380

⒀《དུང་དཀར་ཚིག་མཛོད་ཆེན་མོ》 ཀྲུང་གོའི་བོད་རིག་པ་དཔེ་སྐྲུན་ཁང་། 2002ལོ། པེ་ཅིན། P904

⒂《སྲིད་པ་རྒྱུད་ཀྱི་ཁ་བྱང》 བོན་གྱི་ལོ་རྒྱུས་ཡིག་ཆ་ཕྱོགས་སྒྲིག། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། 2010ལོ། ལྷ་ས། P260

⒃ མཁས་གྲུབ་ལུང་རྟོགས་རྒྱ་མཚོས་(1878 )བརྩམས་པའི་《བསྟན་འབྱུང་རིག་པའི་ཤན་འབྱེད་ནོར་བུ་ཀེ་ཏ་ཀའི་དོ་ཤལ》གངས་ཏི་སེ་བོན་གཞུང་རིག་མཛོད་ཀྱི་དཔེ་ཚོགས་ཀྱི་དེབ་དང་པོ་སྟོན་པའི་མཛད་རྣམ་དང་ལོ་རྒྱུས་ཀྱི་སྐོར། མི་རིགས་དཔེ་སྐྲུན་ཁང་། 2010ལོ། P498། བསྟན་འབྱུང་དེ་ནི་མཁས་གྲུབ་ལུང་རྟོགས་རྒྱ་མཚོས་དགོངས་ལོ་སུམ་ཅུ་སོ་དགུའི་སྟེང་1917ལོར་བརྩམས་པར་བོན་བརྒྱ་དགེ་ལེགས་རྒྱ་མཚོས་གསུངས་པའི་《ལོ་རྒྱུས་ཉེར་མཁོ་བསྟན་རྩིས་རིས་མེད་དཔྱད་པ་དང་བཅས་པའི་ཡིད་ཀྱི་མུན་སེལ་སྒྲོན་མེ་བློ་གསར་དགའ་བའི་མཛེས་རྒྱན་》བྱ་བར་བཞེད།《མཁས་དབང་བོན་བརྒྱ་རིན་པོ་ཆེའི་བསྟན་རྩིས་དང་དཔྱད་རྩོམ་ཕྱོགས་བསྒྲིགས》 ཀན་སུའུ་མི་རིགས་དཔེ་སྐྲུན་ཁང་། 2009ལོ། ལན་ཀྲུའུ། P146

⒄《རྫོགས་པ་ཆེན་པོ་ཞང་ཞུང་སྙན་རྒྱུད་བཀའ་རྒྱུད་སྐོར་བཞིའི་གསུང་པོད་》ལས། 《རྫོགས་པ་ཆེན་མོ་ཞང་ཞུང་སྙན་རྒྱུད་ཀྱི་བོན་མ་ནུབ་པའི་གཏན་ཚིགས》 ཞང་བོད་ཤེས་རིག་པར་སྒྲིག་ལྟེ་གནས་ཁང་གིས་བསྒྲིགས་པའི་ཞང་བོད་ཤེས་རིག་དཔེ་ཚོགས། 2005ལོ། ཁྲིན་ཏུའུ། P2G、P194

⒆⒇《དྲང་དོན་མུན་སེལ་སྒྲོན་མ》 གངས་ཏི་སེ་བོན་གཞུང་རིག་མཛོད་ཀྱི་དེབ་བདུན་པ་སྟེ་བྱང་ཆུབ་ལམ་རིམ་བློ་སྦྱོང་གི་སྐོར། མི་རིགས་དཔེ་སྐྲུན་ཁང་། 2010ལོ། པེ་ཅིན། P30 P31

21བློ་ལྡན་སྙིང་པོ། མི་ཤིགས་རྔོ་རྗེ། སངས་རྒྱས་གླིང་པ། ཀུན་གྲོལ་གྲགས་པ།

22A Catalogue of the New Collection of Bonpo Katen Texts,Edited by Karmay G.Samten & Yasuhiko Nagano,National Museum of Ethnology. Osaka. 2001 Pp. 324:034-1-1 ག 《གུ་རུ་པད་འབྱུང་གི་རྣམ་ཐར་ཀུན་སྣང་གསལ་བའི་སྒྲོན་མེ》pp.1- 937 2 ག་4 འཆི་མེད་གུ་རུ་པད་མ་འབྱུང་གནས་ཀྱིས ཀྱི༔ སྐྱེས་རབས་རྣམ་ཐར་རྒྱས་པར་བཀོད་པ་ལས༔ བསྟན་འབྱུང་ཡིད་བཞིན་ནོར་བུ་རིན་པོ་ཆེ༔ ཀུན་སྣང་གསལ་བའི་སྒྲོན་མེ་ཞེས་བྱ་ལས༔ གནོད་སྦྱིན་དམ་བཏགས་གཙུག་ལག་བསྟན་བསྲུང་བསྐོས་ནས་བར་ཆད་མ་ལུས་བཟློག་པར་མཛད་པའི་ལེའུ་སྟེ་བརྒྱ་དང་བཅུ་གཅིག་པའོ༔ ས་མ་ཡ༔ རྒྱ༔རྒྱ༔རྒྱ༔ 5གཏེར་མ། 6སངས་རྒྱས་གླིང་པ། 12 ལེའུ་བརྒྱད་བཅུ་ཐམ་པ་ནས་ལེའུ་བརྒྱ་དང་བཅུ་གཅིག་བར་དུ་ཡོད།

23《སྲིད་པ་རྒྱུད་ཀྱི་ཁ་བྱང་》བོན་གྱི་ལོ་རྒྱུས་ཡིག་ཆ་ཕྱོགས་སྒྲིག བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། 2010ལོ། ལྷ་ས། P269

24 “mKhyen - brtse , i dbang - po : La biographie , de Padmasambhava selon la tradition du bsGrags pa Bon, et ses sources" , in Gnoli, G. & L. Lanciotti (éds) Orientalia Iosephi Tucci memoriae dicata, Serie Orientale Roma LVI, 1, Roma, IsMEO: 111-158.

25 གསང་སྔགས་གླིང་བའི་གཏེར་མ། 《དྲན་པའི་རྣམ་ཐར་གཡུང་དྲུང་གསང་བའི་མཛོད་ཆེན་》ཁ་བྱང་རྒྱས་པ་ནི། རྒྱལ་ཀུན་སྤྱི་གཟུགས་དྲན་པ་ནམ་མཁའ་རྗེའི།། ཞིང་ཁམས་རབ་འབྱམས་བཀོད་པ་བསམ་ཡས་ལ།། གང་འདུལ་མཛད་པ་གྲངས་མེད་སྤྲུལ་བའི་སྐུའི།། རྣམ་ཐར་གཡུང་དྲུང་གསང་བའི་མཛོད་ཆེན་བཞུགས།།ཨ་དུམ་པ། P195-196 གོང་རྒྱལ་དགོན་པའི་ཤིང་པར་མ། དེའི་མཇུག་བྱང་ལྟར་ན། མདོ་སྨད་ཀྱི་གནས་ཆེན་བྱེ་བ་སྟག་རྩེ་དང་། རྒྱལ་མོ་མུ་(དམུ་)རྡོ་སོགས་ཀྱི་གནས་རེ་འགའ་ནས་དྲན་པའི་རྣམ་ཐར་ཉུང་བསྡུས་ཀྱི་ཁ་བྱང་སོགས་བརྙེས་པའི་རྟེན་འབྲེལ་དང་མཐུན་པར། རྗེས་སུ་ཁྱུང་དཀར་རི་ཁྲོད་དུ་གྲུབ་དབང་རྣམ་གཉིས་ཀྱི་གདན་ས་འཛིན་པ་ཀུན་དགའ་རིན་པོ་ཆེ་སྐུ་མཆེད་ཀྱིས་ཡར་ཕེབ་(ཕེབས་)ཀྱི་བྱ་མ་རྟ་འབྱོར་བའི་དགོངས་བཞེད་རྗེས་སུ་བསྒྲུབ་པའི་ཆེད་དུ། ཤིང་བྱི་ལོར་ཁྱུང་ཡུལ་དུ་ཐེགས་ཏེ་ཁྱུང་དཀར་རི་ཁྲོད་ཀྱི་གནས་དེར་ཡོད་པའི་སྐབས་སུ། མཁའ་འགྲོ་མ་ཞིག་གིས། རིན་ཆེན་འབར་བའི་རི་བོ་ལ། དགོས་འབྱུང་ནོར་བུ་མཆོག་ལྡན་ཡོད། ཅེས་ལུང་བསྟན། དེའི་རྗེས་སུ་གཏེར་སྲུང་ལྕམ་སྲས་སྡེ་ལྔ་གཙོ་འཁོར་དང་བཅས་པའི་ལུང་བསྟན་ཡང་ཐོབ། མཇུག་བྱང་ལས། ཁོ་བོ་གསང་སྔགས་གླིང་བ་ཡབ་ཡུམ་གྱིས་ཤིང་གླིང་ལོའི་སྟོན་ཟླ་འབྲིང་བོའི་ཡར་ཚེས་ལ་ཟབ་གཏེར་རིན་པོ་ཆེ་དྲན་པའི་སྐུ་གསུང་ཐུགས་ཀྱི་རྟེན་བཅས་སྤྱན་དྲངས་ནས་སླར་གསང་རྒྱ་བསྡོམ་ཞིང་སྦས། ཕྱིས་སུ་རབ་བྱུང་བཅུ་དྲུག་པའི་ཐོག་མ་རབ་བྱུང་ཞེས་པ་མེ་ཡོས་ལོའི་ཧོར་ཟླ་དྲུག་པའི་ཚེས་བཅུ་ལ། ཟབ་གཏེར་རིན་པོ་ཆེ་བཀའ་རྒྱ་བཀྲོལ་བའི་དུས་ལ་བབ་པའི་ཚེ། ཁམས་དབུས་ཀྱི་གྲུབ་བརྙེས་དམ་པ་མཆོག་གྱུར་རྣམས་དང་། བཀའ་བབས་ལས་ཅན་གྱི་སྐྱེས་བུ་དམ་པ་དུ་མ་དང་དད་སློབ་མང་པོས་ཡང་ཡང་བསྐུལ་བ་ལ་བརྟེན་ནས། སྦས་གནས་ཤང་ལང་བྲག་དཀར་གྱི་ཉེ་འདབ་རང་བསྟན་དབལ་ཁྱུང་བླ་བྲང་གི་གདན་ས་རུ་མཁའ་འགྲོའི་བརྡ་ཡིག་སྡེ་ལྔ་བཞུགས་པ་བོད་ཡིག་ཏུ་ཕབ་པའི་དབུ་བཟུང་སྟེ། སླར་ཡང་མདོ་ཁམས་ཀྱི་གནས་ཆེན་གཡུང་དྲུང་གསང་བ་དབལ་རོང་དྲག་པོ་གནམ་ལྕག་ཡོང་(ཡང་)རྫོང་གི་ཐུགས་ཀའི་སའི་ཆ། དབལ་ཁྱུང་སུ་ལའི་ཡུལ་ལྗོངས་འཆི་མེད་བྱང་ཆུབ་གླིང་གི་སྒྲུབ་སྡེ་ཆེན་པོའི་དབེན་ཁྲོད། རྒྱལ་རིགས་ཁོད་སྤུངས་དབོན་སྤྱུལ་གྱི་བསམ་གཏན་གྱི་བསྟྀ་གནས། ཟླ་འོད་བདུད་རྩིའི་ཟིལ་བ་ཅིར་ཡང་འབབ་པའི་སྤྲོ་ཁང་དུ། རྟེན་འབྲེལ་གྱི་ངོ་མཚར་དུ་མ་དང་བཅས་ཏེ། ལྕགས་རྟ་ལོའི་ནག་པ་ཟླ་བའི་ཚེས་བཅུའི་མཆོད་པ་དང་འབྲེལ་བར་ཡོངས་སུ་རྫོགས་པར། བོད་ཡིག་ཏུ་གཏན་ལ་ཕབ་པའི་དགེ་བས་རྒྱལ་བསྟན་སྤྱི་དང་། ཁྱད་པར་གཤེན་བསྟན་གསང་སེམས་སྙིང་པོའི་བསྟན་པ་རིན་པོ་ཆེ་ཕྱོགས་ཐམས་ཅད་དུ། སྒོ་ཀུན་ནས་དར་ཞིང་རྒྱས་པའི་རྒྱུ་རུ་གྱུར་ཅིག དེ་ལྟར་བཀའ་ཐང་ཆེན་མོའི་ཐོག་མའི་ཡི་གེ་པ་ནི། རབ་སློབ་ཐུགས་ཟིན་གྱི་བསྒྲུབ་བརྩོན་དམ་པ་གཡུང་དྲུང་ཡེ་ཤེས་ནས་དབུ་མཐར་ཕྱིན་པར་བགྱིས་པ་དགེ་ལེགས་རྣམ་པར་འཕེལ་བའི་རྒྱུ་རུ་གྱུར་ཅིག་ཅེས་གསུངས་སོ།།

26 གོང་སྨྲས་《དྲན་པའི་རྣམ་ཐར་གཡུང་དྲུང་གསང་བའི་མཛོད་ཆེན》 ཇ་དུམ་པ། ཉིན། གོང་རྒྱལ་དགོན་པའི་ཤིང་པར་མ། P23

27 28 29《དྲན་པའི་རྣམ་ཐར་གཡུང་དྲུང་གསང་བའི་མཛོད་ཆེན》 ཆ་དུམ་པ། སྲིབ། གོང་རྒྱལ་དགོན་པའི་ཤིང་པར་མ། P103 P 141 P160

30《དྲན་པའི་རྣམ་ཐར་གཡུང་དྲུང་གསང་བའི་མཛོད་ཆེན》 ཆ་དུམ་པ། གྱེར་སྤུངས་དྲན་པ་ནམ་མཁའི་འཁྲུངས་ལོ་ལ། སྤྲེའུའི་ལོ་སྤྲེའུ་ཟླ་ཚེས་བཅུ་བ་ཡི་ནམ་ལང་དུས་སུ། ཞེས་གསུངས་པ་ཙམ་ལས། ལོ་ཚིགས་དེའི་རྩི་སྟངས་གསལ་བོ་ཞིག་མི་གསལ། གཙང་ཚྭ་ཤེས་རབ་གཡུང་དྲུང་གཙུག་ཕུད་ཀྱིས་བརྩམས་པའི། 《བླ་ཆེན་དྲན་པ་ནམ་མཁའི་མཛད་རྣམ་རགས་བསྡུས་བོན་སྒོ་འདོན་ཐེངས་བརྒྱད་པ》 ཞེས་བྱ་བའི་ནང་དུ་ཁུངས་ལུང་ཅི་ཡང་མ་བསྟན་པར། ཕྱི་ལོ་(914B.C.)མེ་རྟ་ལོའི་རྟ་ཟླ་བའི་ཚེས་བཅུའི་ཉི་ཤར་ལ་འགྲོ་བ་རང་མཐུན་གྱི་སྐྱེ་བ་མི་རུ་བཞེས། ཞེས་བཀོད་ཡོད། P103

31《སྤ་བསྟན་རྒྱལ་གསལ་བའི་སྒྲོན་མེ》 གངས་ཏི་སེ་བོན་གཞུང་རིག་མཛོད་ཀྱི་དེབ་དང་པོ་སྟོན་པའི་མཛད་རྣམ་དང་ལོ་རྒྱུས་ཀྱི་སྐོར། མི་རིགས་དཔེ་སྐྲུན་ཁང་། 2010ལོ། པེ་ཅིན། P349 350

32 མཁས་གྲུབ་ལུང་རྟོགས་རྒྱ་མཚོས་བརྩམས་པའི་《བསྟན་འབྱུང་རིག་པའི་ཤན་འབྱེད་ནོར་བུ་ཀེ་ཏ་ཀའི་དོ་ཤལ》 གངས་ཏི་སེ་བོན་གཞུང་རིག་མཛོད་དེབ་དང་པོ་སྟོན་པའི་མཛད་རྣམ་དང་ལོ་རྒྱུས་ཀྱི་སྐོར། མི་རིགས་དཔེ་སྐྲུན་ཁང་། 2010ལོ། པེ་ཅིན། P497

34 འབྲུག་མོ་སྐྱིད་ཀྱིས་བསྒྲིགས་ཤིང་པར་དུ་བསྐྲུན་པའི་《བདེན་པ་བོན་སྒོ་སྒྲ་འགྲེལ་འཕྲུལ་གྱི་ལྡེ་མིག་》ཏུ་གྱེར་སྤུངས་དྲན་པ་ནམ་མཁའ་ཡིན་པར་བཀོད་ཡོད། 《སྲིད་པའི་མཛོད་ཕུག》 ཀན་སུའུ་མི་རིགས་དཔེ་སྐྲུན་ཁང་། 2008ལོ། ལན་ཀྲིག P94-9535 Catalogue of the Tucci Tibetan Fund in the Li- brary of IsIAO by Elena De Rossi Filibeck, Volume 2, pp . 260-309 . Rome , 2003.དཀར་ཆག་དེའི་ནང་དུ། གབ་འགྲེལ་ཆེན་པོ་མཁས་པ་མི་བཞིའི་མཛད་པ། ཞེས་པོ་ཏི་གཅིག་ཡོད་པ་དེའི་མཛད་པ་པོ་དྲན་པ་ནམ་མཁའ་ཡིན་པར་བཀོད་ཡོད་མོད། མཁས་བཞི་ཡིན་ན་ནམ་རྒྱུན་དུ་སེ་ཤ་རི་དབུ་ཆེན་དང་། ལྡེ་གྱིམ་ཚ་རྨ་ཆུང་། མི་ཉག་ལྕེ་ཚ་མཁར་བུ། སྟོང་རྒྱུང་མཐུ་ཆེན་བཅས་བཞི་ལ་གོ་དགོས་པས། དྲན་པ་ནམ་མཁའ་དང་འབྲེལ་བ་མེད་པར་སྙམ། དེ་མ་གཏོགས་དྲན་པ་ནམ་མཁའ་དང་འབྲེལ་བའི་ཡིག་རྙིང་གང་ཡང་མེད།

tibetmonk  2019-9-14 10:36:41

 ཧི་མ་ལ་ཡའི་བོན་དཔེ་མཛོད་ཁང་གི་དྲ་གནས། https://books.himalayabon.com/

   ཤར་གླིང་མི་རིགས་མང་པོའི་ཤེས་རིག་ལོ་རྒྱུས་ཀྱི་མགོ་ཁུངས་ནི་ཧི་མ་ལ་ཡའི་རི་རྒྱུད་ལ་འབྲེལ་ཡོད་པ་དང་། ལྷག་དོན་དུ་ཞང་བོད་ཤེས་རིག་ལོ་རྒྱུས་ཀྱི་འབྱུང་གནས་བླ་རི་གངས་རྒྱལ་ཏི་སེས་དབུས་བྱས་པའི་ཧི་མ་ལ་ཡའི་རི་རྒྱུད་ནས་ཐོན་པའི་གཏན་ཚིགས་སམ་ཧི་མ་ལ་ཡའི་བོན་དྲ་བས་ལོ་ངོ་བཅུ་ཕྲག་གཅིག་ལྷག་རིང་རྒྱ་ཆེའི་དྲ་གྲོགས་ཡོངས་ལ་སྤྱི་ཕན་གྱི་ཚུལ་དུ་ཞབས་ཞུ་སྒྲུབ་པའི་ཁུལ་ཙམ་ཡིན་ལ། ད་ལམ་གཡུང་དྲུང་བོན་མཉམ་འབྲེལ་ལྷན་ཚོགས་དང་ཧི་བོན་དྲ་བའི་གཙོ་སྒྲུབ་ཁང་གཉིས་མཉམ་གཉེར་ཐོག “ཧི་མ་ལ་ཡའི་བོན་དཔེ་མཛོད་ཁང”ཞེས་བསྒྲགས་པ་གསུང་གི་དཔེའུ་ཙེ་སྟེ་ད་བཞུགས་བོན་གྱི་གསུང་རབ་ཁག་རྣམས་མྱུར་སྐྱོབ་དང་འཚོལ་བསྡུ། བསྡུ་སྒྲིག་དང་པར་འདེབས། ཁྱབ་སྤེལ་དང་འབྲེལ་བའི་དྲ་ངོས་གསར་པ་ཞིག་སྒོ་འབྱེད་ཞུས་ཡོད། དཔེ་ཁང་འདིའི་ནང་ལ་བོན་གྱི་བཀའ་དང་བཀའ་བརྟེན་སོགས་ཀྱི་གསུང་རབ་ཟངས་པར་དང་། ཤིང་པར། བྲིས་མ། འཕྲུལ་པར། དེབ་གཟུགས་སོགས་ཀྱིས་གྲུབ་པའི་དཔེ་རྙིང་གཙོས་གནའ་དེང་གི་གླེགས་བམ་མང་པོ་ཞིག་རྒྱ་ཆེའི་དྲ་གྲོགས་ཚང་མའི་ལོངས་སྤྱོད་ཀྱི་ཡུལ་དུ་གཟིགས་འབུལ་ཞུ་བཞིན་ཡོད་པས་ཀུན་གྱིས་དགྱེས་གཟིགས་གནང་བར་འཚལ།

tibetmonk  2019-5-29 10:29:34

དེང་དུས་བོད་རིག་པ་མཁས་ཅན་གྱི་བོད་ཀྱི་གནའ་དེང་ཞིབ་འཇུག་དཔེ་ཚོགས་ལས་སྲིད་པའི་དམུ་ཐག་དཀར་པོ།
རྩོམ་པ་པོ་ངོ་སྤྲོད།

   བདེ་ཁང་བསོད་ནམས་ཆོས་རྒྱལ་ནི་སྤྱི་ལོ་1963ལོར་བོད་དབུས་གཙང་ཁུལ་ལྷོ་ཁ་གོང་དཀར་རྫོང་རྒྱ་དྲུག་གླིང་གྲོང་ཚོའི་བདེ་སྐྱིད་ཁང་གསར་ཞེས་པའི་ཞིང་པའི་ཁྱིམ་ཚང་ཞིག་ཏུ་འཁྲུངས་ཤིང་། དགུང་ལོ་བརྒྱད་དགུ་ཙམ་ནས་སློབ་ཆུང་འགྲིམས་གནང་ཞིང་། དེ་ནས་རིམ་བཞིན་གོང་དཀར་རྫོང་སློབ་འབྲིང་དང་བོད་ལྗོངས་སློབ་ཆེན་ཞོར་གཏོགས་མཐོ་རིམ་སློབ་འབྲིང་དུ་སློབ་ཞུགས་མཛད། སྤྱི་ལོ་1982ལོར་ཀྲུང་དབྱང་མི་རིགས་སློབ་ཆེན་དུ་བསྐྱོད་གནང་བ་དང་སྤྱི་ལོ་1986ལོར་སློབ་གྲྭ་དེ་ནས་ཐོན་རྗེས། བོད་ལྗོངས་སྤྱི་ཚོགས་ཚན་རིག་ཁང་བོད་ལྗོངས་ཞིབ་འཇུག་རྩོམ་སྒྲིག་ཁང་དུ་ཕྱག་ལས་གནང་། བོད་ལྗོངས་སྤྱི་ཚོགས་ཚན་རིག་ཁང་དུ་ཕྱག་ལས་གནང་རིང་སྔ་རྗེས་སུ་ནོར་ཝེ་ཨོ་སེ་ལོ་སློབ་ཆེན་དང་། དབྱིན་ཇིའི་ཏེ་ཝེ་གེམ་སློབ་ཆེན། ཁེ་ན་ཏྲའི་བེ་རེ་ཐེ་ཞི་ཀོ་ལོན་བེ་ཡ་སློབ་ཆེན་སོགས་ཕྱི་རྒྱལ་གྱི་སློབ་གྲྭ་ཁག་ཏུ་དབྱིན་ཇིའི་སྐད་ཡིག་དང་། ཆོས་ལུགས་རིག་པ། ལོ་རྒྱུས་རིག་པ་བཅས་ལ་སྦྱངས་པ་མཛད། སྤྱི་ལོ་2014ལོ་ནས་བཟུང་། བོད་ལྗོངས་སྤྱི་ཚོགས་ཚན་རིག་ཁང་ཏ་ལའི་ལོ་མའི་དཔེ་ཆ་ཞིབ་འཇུག་ཁང་དུ་ཕྱག་ལས་གནང་ཞིང་། ཆེད་དེབ《མདའ་དང་འཕང》སྟོད་སྨད་བར་གསུམ་དང་དཔྱད་རྩོམ་བསྒྱུར་རྩོམ་མི་ཉུང་བ་ཞིག་པར་སྐྲུན་འགྲེམས་སྤེལ་གནང་ཡོད།

 ནང་དོན་གཙོ་བོ། 

   དཔེ་དེབ་དེའི་ནང་བོན་ཆོས་རགས་བཤད་དང་། བོན་གྱི་འཇིག་རྟེན་ཆགས་ཚུལ་སྐོར་གྱི་ལྟ་བ། བོན་གྱི་གནས་མཆོག་འོལ་མོ་ལུང་རིང་། བོན་གྱི་སྟོན་པ་གཤེན་རབ་མི་བོ་ཆེའི་མཛད་རྣམ། བོན་པོའི་བླ་མ་དང་གྲུབ་ཐོབ་མཁའ་འགྲོ། བོན་གྱི་གདུང་རྒྱུད་ཁྱིམ་ཚང་ཆེན་མོ་ལྔ། བོན་གྱི་ལག་བྲིས་དཔེ་རྙིང་། བོན་གྱི་བཀའ་འགྱུར་དང་བརྟེན་འགྱུར། བོན་ལུགས་ཀྱི་ཞི་ཁྲོའི་ལྷ་ཚོགས། བོན་གྱི་ཡུལ་ལྷ་གཞི་བདག བོན་གྱི་ཆོ་ག་སྣ་ཚོགས། བོན་ལུགས་ཀྱི་རྫོགས་ཆེན། ལོ་རྒྱུས་ཐོག་བོན་བསྣུབས་ཚུལ་དང་བསྐྱར་དར་བྱུང་ཚུལ། བན་བོན་ཆོས་ལུགས་གཉིས་གཤིབ་བསྡུར་བྱས་ཚུལ་བཅས་ཆེ་བ་བཅོ་ལྔ་ལས་གྲུབ་པ་ཞིག་ཡིན་ཞིང་། སྐབས་ཐོག་གི་ནང་དོན་རྣམས་གླེང་སྐབས་གཙོ་བོ་བོན་གྱི་ཁུངས་བཙན་ཡིག་ཆར་གཞི་བཞག་ཐོག ཕྱི་ནང་མཁས་པའི་ལྟ་ཚུལ་ལ་དབྱེ་ཞིབ་དང་བླངས་དོར་གྱི་ཆ་ལ་མ་ནོར་བར་བྱས་ནས་ངོ་སྤྲོད་དང་། དཔྱད་བརྗོད། མཁོ་སྒྲིག་བཅས་བྱས་འདུག

 འོས་སྦྱོར་རྒྱུ་མཚན། 

   ལོ་རྒྱུས་ཀྱི་རྒྱུ་རྐྱེན་དང་སྤྱི་ཚོགས་ཀྱི་ཆ་རྐྱེན་ལ་སོགས་པའི་ཚད་བཀག་འོག ད་ལྟ་བོན་ལུགས་ཀྱི་ཡིག་ཆ་ལག་ཏུ་རག་རྒྱུར་བལྟོས་བཅས་དཀའ་ངལ་འཕྲད་པ་དང་། ལྷག་པར་དུ་བོན་དཔེའི་དཀར་ཆག་དང་། ཚིག་མཛོད། མ་ལག་ལྡན་ཞིང་། ཁ་གསལ་ལ་གོ་བདེ་བའི་སྒོ་ནས་བོན་ཆོས་ངོ་སྤྲོད་བྱས་པའི་དཔེ་དེབ་དང་རྩོམ་ཡིག་སོགས་ཤིན་ཏུ་དཀོན་པས། དེང་དུས་ཀྱི་གསར་བུ་རྣམས་ལ་བོན་ཆོས་ཀྱི་གཞུང་དང་ལོ་རྒྱུས་སོགས་ལ་བལྟ་ཀློག་བྱ་རྒྱུར་དཀའ་ངལ་འཕྲད་བཞིན་ཡོད། དེར་བརྟེན་ཁུངས་བཙན་གྱི་དཔྱད་གཞིའི་ཡིག་ཆ་མང་པོ་དྲངས་པའི་དཔེ་དེབ་འདི་ཁྱེད་རྣམ་པར་ངོ་སྤྲོད་བྱས་ནས་ཕན་པ་ཐོགས་རྒྱུའི་རེ་བ་ཡོད།

tibetmonk  2019-5-27 12:59:01
ཤར་ཟིང་ཆུ་སྣང་ཞིག་རྣམ་རྒྱལ་ཀུན་གྲགས་གླིང་གི་༧དགེ་བའི་བཤེས་གཉེན་ཆེན་མོ་༧ངག་དབང་བློ་གྲོས་སམ་ཤར་པ་ངག་དབང་ལགས་ཀྱི་རྩོམ་དེབ་གཉིས་པ་༼དགོན་སྡེའི་དཔེ་ཀློག༽ འགྲེམ་སྤེལ་གནང་བ།བདག་ལ་རྒྱབ་སྐྱོར་དང་རོགས་རམ་དཔལ་འབྱོར་སོགས་གང་ཅིའི་ཐད་ནས་ཞན་ཆ་ཆེ་སྟབས། ལོ་དུ་མའི་རིང་བདག་གིས་བྲིས་པའི་<<དགོན་སྡེའི་དཔེ་ཀློག>>་ཟེར་བ་འདི་མི་ཡུལ་ལ་བཀྲམས་པའི་ཐབས་ཤེས་ལར་ནས་མ་རྙེད། དེས་བདག་གི་སྔས་མགོ་འགྲམ་ནས་ལོ་འགའ་ལུས་སོང་། ལོ་འགའ་རྩོམ་འདི་སྔས་མགོ་འགྲམ་ནས་ལུས་ནའང་། བདག་གི་ད་དུང་དམིགས་ཡུལ་དང་འབྲེལ་ནས་འབོལ་རྩོམ་འབྲི་རྒྱུའི་ལག་མགོ་གཏིང་ནས་བཞག་མ་མྱོང་། རང་གི་སེམས་ལ་འཁོར་བའི་གནས་ཚུལ་རིང་ཐུང་ག་འདྲ་ཡིན་ནའང་ཡིག་ཐོག་ཕབ་ཀྱི་ཡོད། ད་ལོའི་ཚེས་གང་ཡིན་མ་ཚོད། ལོ་ཟླ་ནི། 2018/10་པའི་ནང་ང་དང་ལོ་མང་རིང་མཉམ་འགྲོ་མཉམ་འདུག་དང་། དགའ་སྐྱོ་མཉམ་རོལ་བྱ་བའི་གྲོགས་མཆོག་(རིན་སྤུངས་བསོད་དར)་དང་སྐད་འཕྲིན་རྒྱུད་ནས་གཏམ་གླེང་འགའ་བྱས་པ་ཡིན། དེའི་ཁྲོད་ནས་ཁོང་གི་“ཁྱེད་ཀྱི་དཔེ་ཆ་དེ་ངས་པར་བསྐྲུན་བྱ་འོང་། འོ་ཅག་གྲོགས་པོ་བར་འདི་འདྲ་རོགས་པ་བྱེད་ན་མ་གཏོགས་ཅི་ཕན”ཅེས་གསུངས་ནས་ངའི་རྩོམ་ཡིག་མ་ཡིག་ཆ་ཚང་ཁོང་ལ་བསྐུར་བ་ཡིན། ཁོང་གིས་(གཙུག་ཕུད་རྣམ་རྒྱལ)་ལ་ཟེར་ནས་ཁོང་གཉིས་ཀྱིས་ངས་བྲིས་པའི་<<དགོན་སྡེའི་དཔེ་ཀློག>>ཅེས་པའི་དཔེ་ཆ་འདི་མི་ཡུལ་ལ་བཀྲམས་པ་དེར་ངས་སྙིང་ཁུང་རུས་པའི་གསེང་ནས་བཀའ་དྲིན་ཆེ་ཞུ་བ་ཡིན།
tibetmonk  2019-5-25 22:55:02
ཉིས་སྟོང་བཅུ་དགུ་ལོའི་སྤྱི་ཟླ་ལྔ་པའི་ཚེས་བཅུ་དགུ་ཉིན་གྱི་ཕྱི་དྲོར། སི་ཁྲོན་ཞིང་ཆེན་ཁྲིན་ཏུ་གྲོང་ཁྱེར་གངས་རིན་པོ་ཆེ་རིག་གནས་ཁྱབ་སྤེལ་ཚད་ཡོད་ཀུང་ཟིའི་གཙོ་སྒྲུབ་འོག་དཔེ་ཀློག་མྱོང་གླེང་ཞེས་པའི་བགྲོ་གླེང་ཚོགས་འདུ་ཞིག་གངས་རིན་པོ་ཆེ་དཔེ་མཛོད་ཁང་དུ་བསྡུས།
 
ཐེངས་འདིའི་ཚོགས་འདུར་བོད་ཀྱི་ལོ་རྒྱུས་རིག་པའི་ཆེད་མཁས་པ་གྲགས་ཅན་མཁས་པ་སྡེ་རོང་ཚེ་རིང་དོན་གྲུབ་ལགས་དང་། ལྷོ་ནུབ་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ་རྫ་པ་ཚེ་རིང་འགྱུར་མེད་རྣམ་གཉིས་དབུ་བཞུགས་ཐོག་མཁན་པོ་ཚེ་རིང་ནོར་བུ་མཆོག་ནས་དཔེ་ཀློག་མྱོང་གླེང་གི་དགོས་པ་དང་དམིགས་ཡུལ་སོགས་གླེང་སྟེ་བཀྲ་ཤིས་པའི་དབུ་ཁྱུད་བྲིས།
 
མདོ་འཛིན་པ་གྲགས་ཅན་ཁ་བའི་སྒྲོལ་མ་དང་སྡེ་དགེ་ཚེ་རིང་གཡང་འཛོམས་གཉིས་ཀྱིས་ཚོགས་ཞུགས་མི་སྣ་རྣམས་རེ་རེ་བཞིན་ངོ་སྤྲོད་བྱས། ཁོང་ཚོ་ནི་ལྷོ་ནུབ་མི་རིགས་སློབ་གྲྭ་ཆེན་མོའི་འབུམ་རམས་པ་སྙན་བཟང་བྱམས་པ་ལགས་དང་། འབུམ་རམས་པ་བཀྲ་ཤིས་འཚོ། འབུམ་རམས་པ་ཞི་མོ། འབུམ་རམས་པ་བན་དེ་ལྷུན་གྲུབ། ཞིབ་འཇུག་སློབ་མ་བཀྲ་ཤིས་རྡོ་རྗེ། ཞིབ་འཇུག་སློབ་མ་ཚེ་རིང་གཡང་འཛོམས་སོགས་ཆེད་ལས་ཞིབ་འཇུག་པ་དང་། བྲག་མགོའི་སྤྲུལ་སྐུ་འཆི་མེད་གཡུང་དྲུང་དང་གྲྭ་བཙུན་སློབ་གཉེར་བ་འགྱུར་མེད་སོགས་མི་གྲངས་སུམ་ཅུ་ལ་ཉེ་བ་མཉམ་ཞུགས་བྱས་ཏེ། འབྲེལ་ཡོད་བོད་རིག་པའི་ནང་དོན་མང་པོ་སྒྲོག་སྦྱོང་དང་མཉམ་གླེང་བྱས་ནས་དཔེ་ཀློག་གི་མྱོང་བ་ཕུན་སུམ་ཚོགས་པར་བྱས།
 
ལྷག་པར་དུ་གཟེངས་སུ་ཐོན་པའི་ཁྱད་ཆོས་ཤིག་ཡོད་པ་ནི་ཞིབ་འཇུག་པ་རེ་རེས་རང་རང་གི་དཔྱད་རྩོམ་སྒྲོག་སྦྱོང་བྱས་མ་ཐག་རྒན་སྡེ་རོང་ཚེ་རིང་དོན་གྲུབ་དང་རྒན་ཚེ་རིང་འགྱུར་མེད་རྣམ་གཉིས་ནས་དཔྱད་བརྗོད་སྤེལ་ཅིང་། མི་འདིང་བའི་ཆར་ཁ་སྐོང་གི་མྱོང་བ་སོགས་གླེང་སྟེ་སྔར་ལས་གོ་བ་ཟབ་མོ་ཆགས་པར་ནུས་པ་གལ་ཆེན་ཐོན།
 
མཐར་མཁན་པོ་ཚེ་རིང་ནོར་བུ་མཆོག་ནས་ཡི་དམ་དབལ་གསས་རྔམ་པའི་ཆོ་གའི་སྐོར་གྱི་ངོ་སྤྲོད་དང་འབྲེལ་ཏེ་ཐེངས་འདིའི་དཔེ་ཀློག་མྱོང་གླེང་ཚོགས་འདུ་བདེ་བླག་ངང་གྲུབ་པར་བྱས། བཀྲ་ཤིས་བདེ་ལེགས།
tibetmonk  2019-5-15 9:15:53

གནའ་བོའི་ཞང་ཞུང་ལ་ལྟ་སྐོར་དུ་སོང་རྗེས།

འདི་ནས་ཕྱོགས་བཞི་ལ་ལྟ་སྐབས།
ནམ་མཁའ་ལ་མཐའ་མེད་ཅིང་།
ས་གཞི་ལའང་མཐའ་མེད་པ་བཞིན།
བརྒྱུད་ཟིན་པའི་རྐང་ལམ་ནི་དེ་ལྟར།
ཤོར་ཚར་བའི་ལོ་ཟླའང་།
རི་ཚོགས་ཀྱི་ཐུགས་སུ་ལྷུང་ཞིང་།
རི་ཚོགས་ཀྱི་སྤྱན་ལམ་ན་འཚེར།

གནས་གང་རུང་ཞིག་ལ་མཚོན་ན།
ཡི་གེར་མ་བཏབ་པའི་ལོ་རྒྱུས་ནི།
སྐྱོ་ཞིང་གདུང་བའི་རྒྱུ་ནི་ལོས་ཡིན་མོད།
དེ་བས་ཀྱང་ལོ་རྒྱུས་བསུབ་མཁན་ནི།
ལོ་རྒྱུས་ཀྱི་གཤེད་མ་དང་ལག་དམར་ཡིན་ཞིང་།
ལོ་རྒྱུས་ཀྱི་ཉེས་ཅན་པ་ཡང་ཡིན་ངེས་པའི་ཕྱིར།
ས་གཞི་ཆུང་ཆུང་ཞིག་གིས་ཀྱང་སྔ་མོ་ནས།
ཟབ་ཅིང་མཐུག་པའི་གནས་ལུགས་དེ་དག་གི།
འཇིངས་ཕུགས་གཏིང་ནས་ལོན་ཟིན་པ་ལྟར།
རིགས་རྒྱུད་ཅིག་གི་ཤེས་རིག་དང་བསམ་བློའི་ཆེད་དུ།
རང་ཉིད་ཀྱི་ཤ་རུས་དང་ཁྲག་རྒྱུན་དྲོན་མོ།
ལྷགས་རླུང་དང་ཁ་ཆར་གྱི་ཁྲོད་ནས་སྦར་སྐབས།
རྟོགས་པ་ཡངས་པའི་དཔྱོད་ལྡན་དེ་གང་དུ་མཆིས

དམིགས་པ་མེད་པའི་རིས་མེད་དེ་གང་དུ་བཞུགས

མངོན་མཁྱེན་མངའ་བའི་རྟོགས་ལྡན་པ་དེ་དང་།
གཟུ་བོར་གནས་པའི་བློ་ལྡན་དེ་ཡང་གང་དུ་ཡོད

འཁྲུག་རྩོད་ལྟར་ཡང་ཡང་ལངས་པའི།
ཆར་སྤྲིན་དང་གློག་ཞགས་ཞི་རྗེས།
ཁ་མལ་དུ་སྣང་བའི་ས་གཞི་ཆུང་ཆུང་དེ།
གནས་དེ་ན་སྔར་བཞིན་ཕྱི་ལ་འབུར་ཞིང་།
ཆེས་གོ་བདེ་ལ་རྟོགས་ཀྱང་སླ་བའི།
བརྡ་མཚོན་དང་ཁ་དོག་ཅན་གྱི་དན་རྟགས་རྣམས།
རི་སྒང་མང་བོས་ཤེད་མོང་གིས་བཏེགས་ཏེ།
འཇིག་རྟེན་འདིར་རྒྱང་འབོད་བྱེད་དུས།
ཐོག་མའི་དུས་ཀྱི་ལྷ་རྣམས་འཕུར་ཟིན་ལ།
བཙན་པོ་དང་བློན་པོ་སྐོར་ཞིག་ཀྱང་།
འཇིག་རྟེན་གྱི་ཁེ་དབང་ཁོ་ནའི་ཆེད་དུ།
མཁའ་རུ་གཤེགས་དགོས་བྱུང་བ་ཡིན་ན།
དེའི་རྗེས་སུ་ཡོད་པ་ནི་རྨ་ཁས་ཁེངས་པའི།
རྐང་ལམ་དང་གཏམ་རྒྱུད་ཡིན་ནམ།
ཡང་ན་དེའི་རྗེས་སུ་མཆིས་པ་ནི།
ས་རུ་ཉིལ་བའི་རྡོ་གསེབ་དག་ལ་སྐྱེས་པའི།
རྣམ་ཤེས་ཀྱི་གྲིབ་མ་དང་།
དད་གུས་ཆེ་ཡང་བརྩེ་དུངས་མེད་པའི།
གང་ཟག་དེ་རྣམས་ཡིན་ནམ།

གང་ལྟར་ང་ནི་གནས་འདིར་འགྲེང་སྐབས།
ལུང་ཁུད་དེ་དག་ཁ་ཁུ་སིམ་ཞིང་།
རྡོ་བ་དེ་དག་གིས་སྐད་ཆ་བཤད་མི་ཤེས་ལ།
རྡུལ་ཕུང་དུ་གྱུར་བའི་མཁར་ཤུལ་དེ་དག་ཀྱང་།
སྔར་ལྟར་གཟིམ་སྟེ་ཡོད་ནའང་།
ཕུགས་བསམ་གྱིས་རབ་ཏུ་ཁེངས་ཤིང་།
འཕུར་འདོད་ཆེ་བའི་བྱ་རྒོད་དེ་རྣམས་ཀྱིས།
རི་བོ་གྲངས་མེད་ཅིག་གི་བར་གསེང་ནས།
ལྕགས་དྲ་ལྟ་བུའི་སྒེའུ་ཁུང་རེ་རེ་བརྟོལ་ཏེ།
ཕྱི་རོལ་གྱི་ནམ་འཕང་གཅོད་སྐབས།
རི་བོ་ཁ་ཤས་བརྗིད་ཉམས་ལྡན་ཞིང་།
རི་བོ་ཁ་ཤས་དམའ་སར་ཉལ་བའི་གནས་དེ་ན།
ཞང་ཞུང་གི་ཤེས་རིག་འོད་དུ་འབར།

 

གནས་ཆེན་བོན་རི་ལ་མཇལ་བའི་འཆར་སྣང་།

ལོ་ངོ་སྟོང་ཕྲག་དུ་མའི་རིང་ལ།
ཁྱོད་ཉིད་མི་ཆེན་ཞིག་གི་ཐུགས་ཚབ་ཏུ་བསྡད་དེ།
གནས་འདི་རུ་ཁེར་རྐྱང་གིས་འགྱིང་བ་ནི།
ཕྱི་རོལ་དང་ནང་རོལ་ནས་འཚུབ་ཀྱིན་ཡོང་བའི།
ཁ་ཆར་མང་བོར་འཐབ་འཛིང་བྱེད་པའི་ཆེད་དུ་ཡིན་ལ།
ཉམ་ཆུང་གི་འགྲོ་བ་རྣམས་ལ་དཔུང་རོགས་དང་།
རྒྱབ་རྟེན་མཛད་པའི་སླད་དུའང་ཡིན།

དེ་རིང་ངས་རི་ཚོགས་མང་བོ་ཞིག་གི།
རྩེ་མོ་ན་གཡོ་ཞིང་ཐོང་ག་རུ་འཁྱིལ་བའི།
སྨུག་སྤྲིན་དང་ན་བུན་གཤགས་ཤིང་།
དེ་རིང་ངས་གནས་རི་གྲངས་མེད་ཅིག་གི།
ཐར་ས་དང་སྐུང་ས་མེད་པའི་ལྟ་ལམ་དང་།
ཕྲག་དོག་མང་བོའི་འཇིག་རྟེན་བརྒྱུད་དེ།
ཁྱོད་ཀྱི་སྐུ་དྲུང་དུ་བཅར་བ་དང་།
ཁྱོད་ཀྱི་སྐུ་དྲུང་ནས་ཕྱག་གསུམ་བསྒུར་ཅིང་།
ཁྱོད་ཀྱི་སྐུ་དྲུང་ནས་རྒྱང་ལྟ་བྱེད་སྐབས།
ང་དགོད་འདོད་པའི་དགོད་ཁ་སློང་བྱེད་དང་།
ངུ་བསམས་པའི་ཀུན་སློང་དཀྲུག་བྱེད་ནི།
གཤེན་རབ་མི་བོ་ཆེའི་དགོངས་པའམ།
ཁྱོད་ཀྱི་ཁོར་ཡུག་ན་བསྲིངས་པའི་སྐོར་ལམ་ལྟར།
ཐེག་པ་རིམ་པ་དགུ་རུ་གྲགས་པའི།
ཐེམ་སྐབས་དེ་རྣམས་མིན་ལ།
ཁྱོད་ཀྱི་སྐུ་དྲུང་དུ་ཡང་ཡང་བསླེབས་ཤིང་།
ཁྱོད་ཀྱི་སྐུ་དྲུང་ནས་ཡང་ཡང་སོང་བའི།
བན་བོན་གྱི་མཇལ་བ་ཚོ་སྟེ་ང་ཚོ་རེད།

ཁྱོད་ནི་དུས་རྟག་ཏུ་བརྟན་ཞིང་།
ཁྱོད་ནི་དུས་དང་རྣམ་པ་ཀུན་ཏུ།
ང་ཚོ་ལ་གཏན་ནས་སྡང་ཡང་མ་མྱོང་མོད།
ངན་སོང་གི་འཕྲང་ལ་འཇིགས་ཤིང་།
ཐར་འདོད་ཀྱི་ཞིང་ལ་སྨོན་པའི་ང་ཚོ་ནི།
ནམ་ཡང་བློ་རྩེ་གཉིས་གཉིས་ཀྱིས་ཡོང་སྟབས།
ངས་འདི་ནས་རེ་ཞིག་ལ་གོམ་ཁ་ལྷོད་དེ།
ཁྱོད་ཀྱི་སྐུ་དྲུང་ན་འབབ་ཀྱིན་པའི་ཆུ་བོ་དེ་དང་།
ཆུ་བོ་དེས་དབྱངས་སུ་གྱེར་བའི་ངག་སྒྲོས་དག་ལ།
རྣ་བ་བླགས་ཤིང་ཞིབ་ཏུ་གསན་སྐབས།
ང་ཡང་སྔར་ནས་རྒྱ་རྙི་ཞིག་ཏུ་ཚུད་ཟིན་ཅིང་།
ཁྱོད་ཀྱི་དོ་ཟླ་བྲལ་བའི་བྱིན་རླབས་ཀྱིས།
ནམ་ཡང་སྐྱོབས་ཐབས་གཅེས་ཐབས་མེད་ལ།
འདུལ་ཡང་ཤིན་ཏུ་དཀའ་བའི།
གནས་མཇལ་བ་ཞིག་ཡིན་པ་རྟོགས་སོང་།


ང་དང་སྟོན་པ་གཤེན་རབ།

ང་ཡི་གུས་དད་དང་སེམས་པ་དེ།
སྔར་ནས་གཞན་དབང་དུ་ཤོར་ཟིན་ནའང་།
ང་ནི་འོལ་མོ་ལུང་རིང་དུ་བསླེབས་རྗེས།
རི་རྐེད་དང་ལུང་མཐིལ་དུ་བབས་པའི།
སྤྲིན་པ་དཀར་བོ་ཞིག་གི་ཀློང་དུ།
སྟོན་པ་གཤེན་རབ་དང་ཐུག་འཕྲད་བྱུང་རྐྱེན།
ཁ་བཏགས་འདོམ་གང་ཕར་ལ་བསྲིངས་ན།
ལག་འཇུའང་བྱེད་ཐུབ་པའི་བར་མཚམས་དེ་ནས།
ངས་རང་ཉིད་ལ་མགོ་སྐོར་གཏོང་ཐབས་མ་བྱུང་།
སྤྲིན་དཀར་གྱི་ཁྲོད་དུ་ནུབ་པའི་རི་རྐེད་དུ།
ང་དང་སྟོན་པ་གཤེན་རབ་ལྷན་དུ་འགྲེང་ཞིང་།
ང་དང་སྟོན་པ་གཤེན་རབ་མཉམ་དུ་གཤིབ་ནས།
དེང་རབས་ཀྱི་རྒྱལ་ཤེལ་ཐོགས་ཏེ།
སྤྲིན་ཕུང་གི་གསེབ་ན་སྔར་ལྟར་བསྲིངས་ཤིང་།
རྒྱང་ཤེལ་གྱི་ངོས་ན་ཞིག་རལ་ཏུ་གྱུར་བའི།
འོལ་མོ་ལུང་གི་ལམ་ཕྲན་དེ་དག་ལ།
ཁ་ཁུ་སིམ་མེར་རྒྱང་ལྟ་བྱེད་སྐབས།
ང་སྟོན་པ་གཤེན་རབ་ལ་འཇིགས་དོན་མེད་མོད།
ང་སྟོན་པ་གཤེན་རབ་ལ་ངོ་ཚ་ཞིང་།
ཁ་ཡང་སྐྱེངས་པར་གྱུར་བ་ནི།
ངས་ཚེ་འདིར་འཆུགས་པའི་ནོར་འཁྲུལ་དེ་དང་།
ལམ་འདིར་བཞག་པའི་ཕ་བོང་དེས།
ལམ་པའམ་རྒྱུ་མཚན་གྱིས་ཡིན་མེད་མོད།
ཡོད་ཚད་ཧ་ཅང་འཕྱིས་དྲགས་པའི་དབང་གིས།
ངས་རི་སྒང་ན་འཁྲིགས་པའི་སྤྲིན་པ་ལྟར།
རང་ཉིད་ཀྱི་སེམས་ཁོང་ནའང་འཁྲིགས་པའི།
སྐྱོ་གདུང་དང་ན་ཟུག་དེ་རྣམས།
ད་ལྟ་སྟོང་བར་ལུས་པའི་ཡུལ་ཁམས་འདི་དང་།
འདས་ཟིན་པའི་མེས་པོ་ཚོ་ལ་ཇི་ལྟར་བཤད།
སྤྲིན་པ་དཀར་བོ་དེ་མཁའ་རུ་གཤེགས་དུས།
སྟོན་པ་གཤེན་རབ་ཀྱང་ཕེབས་ཟིན་མོད།
འོལ་མོ་ལུང་རིང་གི་ལམ་རིང་དེ་ནི།
ང་དང་སྟོན་པ་གཤེན་རབ་འཕྲད་ས་ཡིན་ལ།
ང་དང་སྟོན་པ་གཤེན་རབ་གྱེས་འང་ཡིན་པས།
ནམ་ཞིག་མཁའ་རུ་ཡལ་བའི་སྤྲིན་དཀར་དེས།
དད་པ་ཁོ་ན་མིན་པའི་བདེན་དཔང་གི་ཆེད་དུ།
སྟོན་པ་གཤེན་རབ་སྐྱར་དུ་གདན་ཞུ་མཛད་སྐབས།
ང་ཡང་དུས་དེར་གནང་གང་རུང་ཞིག་ཏུ།
སྟོན་པ་གཤེན་རབ་ཀྱི་འཁོར་དུ་སྐྱེ་ཆོག

༡༩༩༧་༣་༡༣—༡༥

ཉྭ་ནག་པ་བ་རེས་ཀྱི་སྙན་དེབ་༼བརྩེ་མདངས་ལ་འཁྱུད་པའི་སྨོན་འདུན་༽ལས་བཤུས།

འབྲེལ་ཡོད་ནང་དོན་ 308 ཡོད།<<<12345678910>>>
Powered by Oblog.