རྩོམ་པ་པོ།:tibetmonk སྤེལ་དུས།:2012-4-23 16:19:14
ཞང་ཞུང་སྐད་དུ། ༼ བོད་སྐད་དུ།༽
མར་ཞི་རི་རྦང་དེ་དྲོད་དི་ར་ཝང།༼གསེར་གྱི་རི་རབ་དེ་བཞིན་འགྱུར་མེད་སྐུ།༽
མུ་ཨུན་ད་ཀྲ་ཁ་སང་ཅི། ༼ནམ་མཁའ་འབྲུག་ལྟར་གྲགས་པའི་གསུང་དབྱངས་ཅན།༽
ཧ་ར་ཐ་ཙེ་ཁིར་ཞི་ཁྲི་ཙ་དྷེ། ༼ཡེ་ཤེས་ཆེན་པོ་གལས་བའི་ཐུགས་ཉིད་གདམ།༽
ཛྲ་མིན་ཀུ་ར་རད་ན་ཏིར་ཤོ་གུང། ༼ཟད་མེད་ཡོན་ཏན་རིན་ཆེན་ཆུ་བོ་མཛོད།༽
ཅི་པར་རཎྚ་པ་ཏ་ཡ། ༼བླ་མ་རིན་པོ་ཆེན་ལ་ཕྱག་འཚལ་ལོ།༽
གུ་མུ་ཡ་དོག་དྲུང་མུ་དམུ། ༼ཀུན་ལ་དོག་མེད་གཡུང་དྲུང་དབྱིངས།༽
སུ་རི་མ་ཏི་ཉེ་ལོ་ཡོ། ༼གཞི་ནི་མ་བཅོས་མཉམ་ཉིད་ལ།༽
ལྕུམ་ཞི་ག་མིན་དུ་དྲོད་ཞི།༼ ལམ་ནི་འགག་མེད་རང་བཞིན་ཡིན།༽
ཁྲི་ཙེ་མུ་ཞི་ཐ་ཙེ་ནི། ༼འབྲུས་བུ་དབྱིངས་ཉིད་ཆེན་པོའོ།༽
ཏ་དན་ཞུང་ཞག་མུ་ལ་ལྡབ། ༼ལྟ་བ་ཁྱུང་ཆེན་མཁའ་ལ་ལྡིང་།༽
ཉེ་ལོ་མུང་ནོམ་གྱེར་ཤུད་ཙོ། ༼དགོངས་པ་འཁྲུལ་པའི་ཐེ་ཚོམ་བཅད།༽
ནམ་གྲ་གེ་ཏ་ཏག་གོི་པྲ། ༼སྤྱོད་པ་མཛིན་རྟོག་ཐོག་མཐར་བྲལ།༽
ཁོ་སྤྱོད་ཐ་ཙེ་པ་ཏ་ཡ། ༼ལྷུན་གྲུ་ཆེན་པོ་ཕྱག་འཚལ་ལོ།༽
ཧེ་ཏོད་བི་ཏ་ཁོད་རྩལ་དོད། ༼སྦྱིན་པ་ཚད་མེད་སྟོབས་ཆེན་སྐྱེད།༽
ཚུ་མི་སིང་ངི་ཉེ་ལོ་ཏན། ༼ཚུལ་ཁྲིམས་བྱམས་སྙོམས་ཏིང་འཛིན་ལྡན།༽
མུར་སོན་ཏི་པ་མ་མིག་ལོ། ༼བཟོད་པ་བྱུང་ཚོར་དམིགས་མེད་བསྒོམ།༽
ཚར་ཅི་དྷ་ཙེ་ལེ་བི་མོར། ༼བརྩོན་འགྲུས་ཤུགས་ལྡན་རླུང་གི་གྲབ།༽
ཉེ་ལོ་ཧྲུན་སྤུངས་དྲུང་མུ་ཅི།༼བསམ་གཏན་མི་གཡོ་གཡུང་དྲུང་འཛིན། ༽
ས་དྲིག་རྒྱུ་ཡོད་མུ་ལ་ཅི། ༼ཤེས་རབ་ཐབས་ཆེན་དབྱིངས་ལ་འབྱོར།༽
གཤེན་ལ་པཎྜི་ཉི་རི་ཝེར་ཞི། ༼གཤེན་ལ་མཁས་པ་ཉི་མ་རྒྱལ་མཚན།༽
བྲུ་ལ་པཎྜི་ཝེར་ཡ་དྲུང་མུ། ༼བྲུ་ལ་མཁས་པ་རྒྱལ་བ་གཡུང་དྲུང་།༽
ཞུ་ལ་པཎྜི་ཧ་ར་རད་ཎ། ༼ཞུ་ལ་མཁས་པ་ཡེ་ཤེས་རིན་ཆེན།༽
སྤ་ལ་པཎྜི་མུ་ལ་སྨར་ཞི། ༼སྤ་ལ་མཁས་པ་ནམ་མཁའ་བཟང་པོ།༽
རྨེ་ལ་པཎྜི་པཎྜི་ཤྲི་ཙེ། ༼རྨེ་ལ་མཁས་པ་མཁས་པ་སྤ་ཆེན།༽
པཎྜི་གྷིང་ས་དྲིག་ཝེར་ཞི། ༼མཁས་པ་མཆོག་ཤེས་རབ་རྒྱལ་མཚན། ༽
པཎྜི་ནམ་ལ་གུ་དུན་ཧྲུན། ༼མཁས་པ་རྣམས་ལ་གུས་པར་འདུད།༽
ཞང་སྐད། ༼བོད་སྐད༽
དམིག ༼མིག༽ར་ཙེ།༼རྣ་བ།༽གྱུམ་ཞི། ༼སྣ༽ ལྐེ་རི། ༼ལྕེ༽ ཐ་ཡུད། ༼ཡིད།༽ རྐོ་ཕུང་། ༼གཟུགས།༽ ཨུ་གླང་། ༼སྒྲ།༽ ཤིན་ཙ། ༼དྲི།༽ ཡུག་ཙོག ༼རོ།༽ ཞམ་ཟེ། ༼རེག་བྱ།༽
སྒྲ་ཡི་སྡེ་སྦྱོར་དོན་གསལ་འདི། །རྒྱལ་བའི་བཀའ་དང་བླ་མའི་ལུང་། །
རང་གི་ཚད་གསུམ་འཕྲང་ལ་ཤར། །མི་འཁྲུལ་ལེགས་པར་བཀོད་པ་ལ། །
འོན་ཀྱང་ཤེས་བྱའི་གནས་ལུགས་ཀྱི། །ནོར་འཁྲུལ་ཉེས་འགལ་གྱུར་སྲིད་ན། །
ཡི་དམ་ལྷ་དང་བླ་མ་དང་། །རིག་འཛིན་མཁའ་འགྲོ་བཀའ་སྐྱོང་ལ། །
གནོང་ཞིང་འགྱོད་དོ་བཤགས་བྱང་གསོལ། །དགེ་བས་མཁའ་ཁྱབ་འགྲོ་ལ་བསྔོ། །
རྩོམ་པ་པོ།:tibetmonk སྤེལ་དུས།:2012-4-9 19:29:40
ཤེར་སྒྲོན་བོན་པོའི་སྐོར་གྱི་དོགས་སེལ་སྔོན་རྗེས་གཉིས་ལས་འཕྲོས་པའི་གཏམ་དོན་གནད་རྗེན་གཅེར་དུ་ཕྱུང་བ།
ཀླུ་དགོན་དཔོན་སློབ་ཤེས་རབ་གཡུང་དྲུང་གཙུག་ཕུད།
བླ་མ་དང་ཤེས་རབ་སྨྲ་བའི་སེང་གེ་དབྱེར་མ་མཆིས་པ་ལ་སྒོ་གསུམ་གུས་པ་ཆེན་པོའི་ཕྱག་འཚལ་ཞིང་སྐྱབས་སུ་མཆིའོ།།
མཚན་དཔེའི་བང་རིམ་ལྷུན་པོའི་སྐུ་ལ་རྫོགས། །
དྲུག་ཅུའི་འོ་མཚོ་གསུང་གི་རྒྱ་མཚོར་འཁྱིལ། །
ཤེས་བྱའི་རྒྱུ་སྐར་མཁྱེན་པའི་མཁའ་ལ་ཤར། །
སྤངས་རྟོགས་ཕུན་ཚོགས་རྫོགས་སངས་རྒྱས་དེར་འདུད། །
དྲི་བྲལ་པད་དཀར་འདབ་མའི་ཞལ་དཀྱིལ་དུ། །
ཉེ་བར་བརྩེན་པའི་སྤྱན་ཟུང་བུང་བ་རྒོད། །
སྟོང་ལྡན་པི་ཝང་བྲང་གི་རྒྱན་དུ་མཛའ། །
རིག་པའི་ལྷ་མོས་དབྱངས་ལ་རམ་འདེགས་མཛོད། །
མཆོད་ཚིག་ཁྱུང་སྔོན་སྐྱེས་ཀྱིས་ཉེར་དྲངས་ཏེ། །
དངོས་དོན་ཉིན་བྱེད་མཁའ་ལ་འཛུམ་པའི་མོད། །
ལོག་སྒྲུབ་རྨོངས་པའི་མུན་ནག་བསལ་བྱས་ཏེ། །
ཤེས་རིག་སྣང་བའི་དགའ་སྟོན་འགྱེད་ལ་ཕྱོགས། །
ཞེས་སྔོན་བྱོན་མཁས་པའི་ཕྱག་སྲོལ་མཚོན་ཕྱིར་དུ་སྔོན་འགྲོའི་ཀླད་དོན་སྔོན་དུ་བཏང་ནས་སྐབས་དོན་གླེང་བའི་སྤྲོ་བ་བརྟས་སོ། དེ་ཡང་ཁོ་བོ་༢༠༡༠ ལོ་ཟླ་༡༠་ནང་པེ་ཅིང་ནང་བསྟན་སློབ་གླིང་གི་དགེ་རྒན་བྱས་ཏེ་བསྡད་སྐབས། མཁན་ཚུལ་ཁྲིམས་བློ་གྲོས་དང་སྣང་ཞིག་དགོན་གྱི་དགེ་བཤེས་འགའ་ཤེར་སྒྲོན་ཞེས་པའི་དཔེ་ཆའི་སྐོར་ལ་བགྲོ་གླེང་བྱས་རྗེས་སུ་མཁན་པོ་ནས་གསལ་བཤད་བྱས་པའི་ཡི་གེ་དེ་མིག་མཐོང་བྱུང་། ངས་རོབ་ཙམ་བལྟས་པས་ཡི་གེ་འདི་ལ་དཔྱད་ན་མཁན་པོ་ལགས་ནས་བོན་ལ་འཛིན་པའི་ལྟ་སྟངས་དེ་འགྱུར་བ་གཏོང་རྒྱུ་ཕར་བཞག་ནས་སྔོན་མའི་རྒྱབ་རྟེན་དུ་བྲིས་པ་ཞིག་མི་འདུག་གམ་ཞེས་བཤད་པ་ཡིན། ཁོ་བོས་སེམས་ནང་ལ་འདི་འདྲའི་རིགས་ལ་དངོས་དོན་ར་སྤྲོད་བྱེད་རྒྱུ་གལ་ཆེན་རེད་སྙམ་ཏེ་རྩོམ་ཐུང་ཞིག་སྤེལ་བར་འདོད་ཀྱང་། མ་རིང་བར་ཛ་དྲག་སྒོ་ནས་ཕ་ཡུལ་དུ་ལོག་དགོས་བྱུང་ནས་དཔྱད་གཞིའི་ཡི་གེ་དང་ཁ་བྲལ་བ་སོགས་ཀྱིས་རྐྱེན་པས་དེ་དོན་ལག་ལེན་ལ་འཁྱོལ་མ་སོང་། དེ་རྗེས་མཁར་ནག་སྤྲུལ་སྐུ་རིན་པོ་ཆེ་ནས་མཁན་པོ་ལགས་ལ་རྒོལ་ལན་ཞིག་བྲིས་གནང་བ་དང་། དེ་ནི་དོན་གནད་ལ་ཁེལ་བའི་ལུང་རིག་ཚད་མའི་གཏམ་ཡང་དག་པ་ཞིག་ཡོད་པ་ཕྱོགས་སོ་སོ་ནས་བསྟོད་བསྔགས་ཀྱི་མེ་ཏོག་འཐོར་བཞིན་ཡོད་པ་གོ་ཐོས་བྱུང་བས་ཕྲན་རང་ཧ་ཅང་གི་བློ་བདེ་པོ་བྱུང་། ཉེ་ཆར་གྲོགས་པོ་རིན་སྤུངས་ཚུལ་བསྟན་ལགས་དང་ཁ་བརྡ་བྱུང་སྐབས་ཁོང་གིས་མཁར་ནག་སྤྲུལ་སྐུ་མཆོག་ནས་རྒོལ་ལན་བྲིས་པའི་རྗེས་སུ་ཡང་བསྐྱར་མཁན་པོ་ལགས་ནས་གསར་བཤད་ཅིག་བྱས་འདུག་པས། ངས་མཁན་པོའི་གསལ་བཤད་ཀྱི་ཡི་གེ་སྔ་ཕྱི་གཉིས་དང་མཁར་ནག་སྤྲུལ་སྐུ་མཆོག་ནས་རྒོལ་ལན་གྱི་ཡི་གེ་རྣམས་བསྐུར་ཡོང་། དེ་སྐོར་གྱི་རྩོམ་ཡིག་ཅིག་བྲིས་ན་ཡག་པོ་འདུག་ཅེས་བཤད་བྱུང་། ཡིག་ཆ་དེ་རྣམས་ལག་འཕྲོད་བྱུང་རྗེས་ངས་རྩོམ་ཐུང་ཞིག་འབྲི་བར་བརྩོན་པ་ཡིན།
《ཤེས་རབ་སྒྲོན་མའི་བོན་པོའི་སྐོར་གྱི་དོགས་སེལ་རྗེས་མ།》 ཞེས་པ་ལས། “རྒྱ་ནག་གི་ཆོས་པ་འགའ་རེས་གཡུང་དྲུང་བོན་ཞེས་པ་དེའང་ས་དགེ་བཀའ་རྙིང་བཞིན་དུ་སངས་རྒྱས་ཤྰཀྱ་ཐུབ་པས་གསུངས་པའི་གྲུབ་མཐའ་ཞིག་ཡིན་ནམ་མིན་སྙམ་དུ་དོགས་པ་དང་ཤེས་འདོད་ཡོད་པ་རྣམས་ལ། སངས་རྒྱས་ཤྰཀྱ་ཐུབ་པས་གསུངས་པའི་གྲུབ་མཐའ་མིན་ཞེས་སྨྲས་པ་ཡིན། དེ་ལས་གཞན་དུ་རྒྱལ་བ་གཤེན་རབ་སངས་རྒྱས་ཡིན་མིན་དང་གཡུང་དྲུང་བོན་འདི་སྤྱིར་སངས་རྒྱས་ཀྱི་བསྟན་པ་ཞིག་ཡིན་མིན་དཔྱད་པ་ཅི་ཡང་མེད་པ་ནི་དོགས་སེལ་སྔ་མའི་ནང་དུ་བཤད་ཟིན་པ་ལྟར་ཡིན་ལ། མ་བཤད་ཀྱང་དེ་འདྲ་མེད་པ་ཡི་གེ་ལ་བལྟས་པ་ཙམ་གྱིས་ཤེས་སོ། ”ཞེས་པ་ལ། ཁྱོད་རང་གིས་གཡུང་དྲུང་བོན་འདི་ཤྰཀྱ་ཐུབ་པས་གསུངས་པའི་གྲུབ་མཐའ་མིན་ཞེས་བཤད་པ་ལ་བསམ་ཚུལ་ཅི་ཡང་ཡོད་མི་སྲིད། རྒྱལ་བ་གཤེན་རབ་སངས་རྒྱས་ཡིན་མིན་དང་གཡུང་དྲུང་བོན་འདི་སྤྱིར་སངས་རྒྱས་ཀྱི་བསྟན་པ་ཞིག་ཡིན་མིན་དཔྱད་པ་ཅི་ཡང་མེད་ཅེས་པ་དེ་ཡང་བདེན་པར་སྣང་། གང་ཡིན་ཟེར་ན། གཡུང་དྲུང་བོན་གྱི་ངོ་སྤྲོད་ཤིན་ཏུ་བསྡུས་པ་དེ་ཡི་ནང་དུ་སྔ་བར་ཕྱི་གསུམ་གང་ནས་བལྟས་ན་རྒྱལ་བ་གཤེན་རབ་སངས་རྒྱས་ཡིན་མིན་དང་གཡུང་དྲུང་བོན་འདི་སངས་རྒྱས་བསྟན་པ་ཡིན་མིན་གྱི་དཔྱད་པ་གང་ཡང་མ་བྱས་ནས། མ་ཡིན་པ་གཞིར་བཞག་བྱས་ནས་བྲིས་ཡོད་པ་གསལ་པོ་རེད། གལ་སྲིད་ཁྱོད་རང་གིས་ལུང་དང་རིག་པས་དཔྱད་པ་བྱས་ནས་གཤེན་རབ་སངས་རྒྱས་མ་ཡིན་པ་དང་གཡུང་དྲུང་བོན་སངས་རྒྱས་བསྟན་པ་མ་ཡིན་པར་སྒྲུབ་ཡོད་ན་ངས་སྤྲོ་སྣང་ཆེན་པོའི་སྒོ་ནས་ལན་རྒྱག་པར་འདོད་དེ། བན་བོན་གྱི་སྟོན་པ་རྣམ་གཉིས་ཞལ་མཐུན་པར་ཐར་པ་དང་ཐམས་ཅད་མཁྱེན་པའི་གོ་འཕང་སྒྲུབ་པ་ལ་ལམ་དང་ལམ་མ་ཡིན་པའི་ཁྱད་པར་འབྱེད་བྱེད་ཀྱི་ཤེས་རབ་མེད་ནས་ལམ་ལོག་དམན་འཁྱལ་གསུམ་དུ་གོལ་ན། ཐར་པ་ལས་རིང་དུ་འགྲོ་བར་དགོངས་ནས་རྒྱལ་བའི་བཀའ་ཟབ་མོ་འདི་དག་ལའང་དཔྱད་གསུམ་དག་པའི་ཚད་མས་རང་རྒྱུད་ལ་ཉམས་སུ་བསྟར་དགོས་པར་གསུངས་པ་ནི། བོན་སྟོན་གཤེན་རབ་ཀྱི་ཞལ་ནས། “གང་དག་བཀའ་ལས་བྱུང་གྱུར་པ། དེ་དག་རིག་པས་གཞལ་མིན་ན། སྙིང་པོའི་དོན་ཐོབ་མི་འགྱུར་ཏེ། དེ་ཕྱིར་རིག་གཞལ་དོན་ཡོད་བྱ།”ཞེས་དང་ཆོས་སྟོན་ཐུབ་པའི་ཞལ་ནས། “ང་ཡིས་བཤད་པའི་བཀའ་རྒྱུད་འདི། བསྲེགས་དཔྱད་བརྡར་བའི་གསེར་བཞིན་དུ། དཔྱད་པར་བྱ་ལ་གུས་ཕྱིར་མིན། ” ཞེས་སོ། ཡང་ སྟོན་པ་རྣམ་གཉིས་ཀྱི་གསུང་ལ་དཔྱད་པ་མ་བྱས་ན་དེ་ལའང་ནོར་འཁྲུལ་གྱི་ཆ་ཡོད་པའི་དོན་ནི་ཅི་སྟེ། བན་བོན་གཉིས་ཀའི་ལུང་ལས། “ཉེས་པ་ཟད་པས་རྫུན་གྱི་ཚིག། སྨྲ་བར་མི་འགྱུར་རྒྱུ་མེད་ཕྱིར། ཉེས་ཟད་ལུང་དུ་ཤེས་པར་བྱ།”གསུངས་པ་ལྟར་རོ། ད་ཁྱོད་རང་གིས་གཤེན་རབ་སངས་རྒྱས་ཡིན་མིན་དང་གཡུང་དྲུང་བོན་འདི་སངས་རྒྱས་བསྟན་པ་ཡིན་མིན་ལུང་དང་རིག་པས་དཔྱད་པ་མ་བྱས་པའམ་བྱེད་མ་ཤེས་པ་གང་ཡིན་ཀྱང་དེ་ནི་བོན་པོར་ངོ་སོ་བསྟོད་བྱེད་ཡོང་སྲིད་ཀྱི་མ་རེད་ལ། ང་ཚོ་བོན་པོ་རྣམས་ལ་དགོས་པ་ནི་ལུང་དང་རིག་པས་དཔྱད་པའི་སྒོ་ནས་གཤེན་རབ་སངས་རྒྱས་ཡིན་མིན་དང་གཡུང་དྲུང་བོན་འདི་སངས་རྒྱས་བསྟན་པ་ཡིན་མིན་བཤད་རྒྱུད་དེ་རེད། རི་བོ་གངས་ཅན་པའི་འདས་པའི་ལོ་རྒྱུས་ལ་ཕྱི་མིག་ཅིག་བལྟོས་དང་། དུས་རབ་བདུན་པ་ནས་རིག་གསར་ཆེན་པོའི་རླུང་འཚུབས་མ་བྱུང་བའི་བར་ཏུ་ སྤྱང་ཀི་ལུག་ལྤགས་ཅན་ཆབ་སྲིད་ཀྱི་ཇག་པ་དམར་སེར་ཅན་པོ་དག་གིས་བློ་གཟུ་བོར་གནས་པའི་སྒོ་ནས་ལུང་རིག་ཡང་དག་པའི་དཔྱད་པ་གང་ཡང་མེད་པར་ང་ཚོ་བོན་པོ་ལ་ཐུབ་ཚོད་དང་ཕམ་ཁ་ག་ཚོད་སྤྲད་ཡོད་པ་གསལ་པོ་རེད། ད་ཆར་ཡང་ “ར་ཤི་ཡང་ ར་སྔ་མ་ཤི་”ཞེས་པའི་གཏམ་དཔེ་ལྟར། ཁྱོད་དང་ཁྱོད་འདྲ་བའི་འབྲི་གུང་ར་སེ་སོགས་འགའ་ཞིག་གིས་མཐོང་རྒྱ་ཁྲོན་སྦར་ལས་མེད་ཀྱང་བཤད་པ་ཉི་ཟླ་ལས་གསལ་ཚུལ་བྱེད་ཏེ་གཡུང་དྲུང་བོན་འདི་ཉིད་གཤེན་བར་མ་བྱོན་གོང་གི་བོད་གནའ་བོའི་གདོད་མའི་བོན་དང་ཉ་ཉུང་མཉམ་གསེས་བྱེད་པ་འདི། ད་ཆར་དུས་རབས་ཉེར་གཅིག་པའི་ནང་མཁས་བརྒྱ་འགྲན་གླེང་དང་མེ་ཏོག་མཉམ་བཞད་ཀྱི་དུས་སྐབས་འདི་ལ་མུན་ནག་མདའ་འཕེན་གྱིས་དགྲ་བོ་ཐུར་བའི་བསམ་ངན་མ་འཆང་ན་ཡག་ཤོས་མ་རེད་དམ། ད་ཁྱོད་ཀྱིས་གཤེན་རབ་སངས་རྒྱས་མ་ཡིན་པ་དང་གཡུང་དྲུང་བོན་སངས་རྒྱས་བསྟན་པ་མ་ཡིན་པ་གཞིར་བཞག་ནས་བཤད་པ་མེད་ཟེར་ན། འོ་ན་ཁྱོད་རང་གིས་ “བོན་པོའི་ཆོས་འདི་སངས་རྒྱས་ཤྰཀྱ་ཐུབ་པའི་ཆོས་མ་ཡིན་པ་དེ་ལྟར་ན་འདི་ལ་ཐར་བ་ཡོད་དམ་ཞེ་ན། ཁོང་ཅག་གི་རང་གཞུང་ན་གསུངས་པའི་མཐར་ཐུག་གི་ཐར་བ་ཡོད་ཀྱང་སངས་རྒྱས་ཤྰཀྱ་ཐུབ་པའི་ཆོས་ལས་གསུངས་པའི་མཐར་ཐུག་གི་ཐར་བ་ནི་མེད་དེ། རྒྱུ་གང་ལ་བསླབ་པ་དེ་ལ་དེའི་འབྲས་བུ་འབྱུང་དགོས་ཀྱི། རྒྱུ་གཞན་ལ་བསླབས་ནས་འབྲས་བུ་གཞན་འབྱུང་བ་རྒྱུ་འབྲས་འཛོལ་བ་ནི་མི་སྲིད་པའི་ཕྱིར་རོ། རུའུ་ལུགས་དང་ཏའུ་ལུགས་བཞིན། ” ཞེས་བྲིས་པའི་སྐབས་སུ་ཁྱོད་ཀྱི་ཞེ་འདོད་ཅི་ཞིག་བཟུང་ཡོད། ཚིག་དེས་ཉན་པ་པོ་ལ་གོ་བརྡ་ག་རེ་ཞིག་སྤྲད་ཀྱི་རེད་བསམ་བྱུང་། ཁྱོད་རང་གིས་དངོས་སུ་གཡུང་དྲུང་གི་བོན་འདི་སངས་རྒྱས་ཀྱི་བསྟན་པ་མ་རེད་ཅེས་མ་ལབ་ཀྱང་དོན་དུ་དེ་ལྟ་བུ་གོ་བརྡ་སྤྲད་པའི་ཆེད་དུ་གོང་གི་བཤད་པ་དེ་བྱས་པ་ལ། སངས་རྒྱས་ཡིན་ན་ཤྰཀྱ་ཐུབ་པ་ཡིན་པའི་ཁྱབ་པ་དང་སངས་རྒྱས་བསྟན་པ་ཡིན་ན་ཤག་ཐུབ་ཀྱི་བསྟན་པ་ཡིན་པའི་ཁྱབ་པ། སངས་རྒྱས་གཞན་གྱིས་གསུངས་པའི་ཐར་པ་ཐོབ་ཀྱང་ཤག་ཐུབ་ཀྱིས་གསུངས་པའི་ཐར་པ་ཐོབ་མེད་པ་བཅས་མི་འདོད་བཞིན་དུ་ཁས་ལེན་དགོས་པར་ཐལ་བ་ལ། མཁར་ནག་སྤྲུལ་སྐུ་རིན་པོ་ཆེས་ལུང་རིག་ཡང་དག་པས་སྒྲུབ་ཟིན་པ་ལྟར་རོ། ད་ཁྱོད་རང་ལ་དོན་གནད་འདི་ཡི་ཐད་ལ་ངས་དྲི་བ་ཞིག་འདོན་རྒྱུ་ཡིན། གཤེན་རབ་སངས་རྒྱས་ཡིན་པ་དང་དེས་གསུངས་པའི་ཐར་པ་ཐོབ་ན་འཁོར་བ་ལས་ཐར་པའི་ཐར་པ་ཐོབ་ཡོད་ཅེས་ཁས་ལེན་རྒྱུ་ཡིན་ནམ་མིན། ཡིན་ན་དེ་ལྟར་ཁས་ལེན་དགོས་པའི་རྒྱུ་མཚན་བཤད་དགོས། མ་ཡིན་ན་གཤེན་རབ་སངས་རྒྱས་མ་ཡིན་པའི་ལུང་རིག་ཚད་མའི་སྒྲུབ་བྱེད་དང་། དེས་གསུངས་པའི་ཐར་པ་ཞེས་པ་དེ་འཐོབ་བྱེད་ཀྱི་རྒྱུ་གང་ཞིག་ལ་འབད་དགོས་པ་དང་། ཐོབ་པའི་ངོ་བོ་གང་ཞིག་ཡིན་པ་གསལ་པོར་ངོས་འཛིན་ནས་དེའི་ཐར་པ་ཐོབ་ཀྱང་ད་དུང་འཁོར་བ་ལས་ཐར་མ་ཐུབ་པའི་རྒྱུ་མཚན་ངེས་པར་དུ་བཤད་དགོས། འཁོར་བ་ལས་ཐར་ཀྱང་ཤག་ཐུབ་ཀྱིས་གསུངས་པའི་ཐར་པ་ཐོབ་མེད་ཅེས་པའི་བླུན་རྒན་ཅི་ཡང་མ་ཤེས་པའི་རང་རྟགས་ནི་སྟོན་དོགས་མེད། གཤེན་རབ་ཀྱིས་གསུངས་པའི་ཐར་པ་ཞེས་གང་ཞིག་ཟེར་གྱི་ཡོད་མེད་མ་ཤེས་ནས་གཡུང་དྲུང་བོན་ལུགས་འདི་རུའུ་ལུགས་དང་ཏའོ་ལུགས་བཞིན་ཡིན་ཤར་ཤར་བྱས་ནས་དེ་ལྟར་བཤད་པ་ཡིན་ན་དེ་ལ་ལུང་རིག་སྨྲ་བའི་སྐྱེས་བུ་སུ་ཡིས་བདེན་པའི་ཚད་དུ་འཛིན་མི་སྲིད་དོ། །
ཡང་ འོན་ཀྱང་ཐོག་མར་མི་འགའ་ཞིག་གིས་བོན་པོ་ལ་དགག་པ་བྱས་ཡོད་ཅེས་བསྒྲགས། དེ་རྗེས་བོན་པོའི་ཕྱོགས་ཀྱི་མི་མང་པོ་ཞིག་གིས་དོ་སྣང་མཛད་ཀྱིས་འདུག་པ་ཤེས་ནས་སྣང་དགོན་གྱི་དགེ་བསྐོས་ལ་ལོ་རྒྱུས་ཆ་ཚང་བཤད་ནས་བོན་ཚོགས་ཀྱི་བླ་མ་དགེ་བཤེས་རྣམས་ལ་ཞུ་བ་བྱེད་རོགས་ལབ་པ་ཡིན། ཞེས་དང་། དེ་རྗེས་སྣང་དགོན་གྱི་དགེ་བཤེས་འགའ་དང་འཕྲད་ནས་ཉིན་གཉིས་རིང་བགྲོ་གླེང་བྱས་ཏེ་ཤེར་སྒྲོན་གྱི་ཚིག་འགའ་ལ་གསལ་ཁ་གཏོད། འགའ་ཞིག་ལ་མཆན་བུ་བཏབ་ནས་མཐར། བན་བོན་གཉིས་ཀའི་ནང་ནས་བློ་གཟུ་བོར་གནས་པ་རྣམས་ཀྱིས་གཟིགས་ན་སྐྱོན་མི་འདུག་ཅེས་པ་ཞིག་གི་ཐོག་ཏུ་ཐག་བཅད་ནས་ཕྱོགས་གཉིས་ཀའི་སེམས་ནང་ཤིན་ཏུ་མཐུན་པོ་གྱུར་པ་ཡིན་ནོ། ཞེས་པ་ལ། འདི་ཡི་སྐོར་ལ་སྔོན་མ་མཁན་པོ་ལགས་དང་བགྲོ་གླེང་གནང་མཁན་དགེ་བཤེས་རྣམ་པས་ཁྱོད་རང་ཚོ་བགྲོ་གླེང་སྐབས་ཀྱི་སྐད་ཆ་དང་མཁན་པོ་ལགས་ནས་བྲིས་པའི་དོགས་གནས་གསལ་བཤད་བྱས་པའི་ཡི་གེ་གཉིས་ཀྱི་ནང་དོན་དང་རྟག་རྟག་ཡོང་གི་ཡོད་མེད་གཅིག་གསུང་ན་ཡག་པོ་འདུག་བསམ་པ་བྱུང་།
ཡང་ ལོ་གཅིག་སོང་རྗེས་སུ་ད་དུང་ཡང་བན་བོན་གཉིས་ཀྱི་ནང་ནས་མི་འགའ་ཞིག་གིས་ཕན་ཚུན་ཚིག་ངན་དང་ཤགས་འབྱེད་བྱེད་བཞིན་འདུག། ལར་བོད་ཀྱི་སྐྱ་སེར་གཉིས་ཀའམ་གྲུབ་མཐའ་ཕན་ཚུན་བར་དུ་དོན་ཅི་ཞིག་ཡོད་ཀྱང་ངོ་འཕྲད་ནས་གྲོས་བསྡུར་བྱས་ན་ཐག་མི་ཆོད་རྒྱུ་ཅི་ཡང་མེད་པས། འདི་འདྲའི་ཤགས་འབྱེད་མི་བྱེད་པར་ཞུ་ཞེས་སྙིང་ཐག་པ་ནས་ཞུ་བ་ཡིན། ཞེས་པ་ལ་བོད་ཀྱི་སྐྱ་སེར་གཉིས་ཀའམ་གྲུབ་མཐའ་ཕན་ཚུན་བར་དུ་དོན་ཅི་ཞིག་ཡོད་ཀྱང་ངོ་འཕྲད་ནས་གྲོས་བསྡུར་བྱས་ན་ཐག་མི་ཆོད་རྒྱུ་ཅི་ཡང་མེད་ཅེས་པ་ནི་ཉམས་མྱོང་དང་མཐོང་རྒྱ་ཅི་ཡང་མེད་པའི་གཏམ་ཞིག་ཡིན་པ་བཤད་མི་དགོས་ཏེ། བོད་ཀྱི་སྐྱ་སེར་གཉིས་ཕྱོགས་ནས་ཆབ་སྲིད་དང་གྲུབ་མཐའི་བར་གྱི་དོན་དག་མང་པོ་མི་ལོ་བརྒྱ་ཕྲག་དུ་མའི་རིང་རྙོག་ཟིང་གི་རང་བཞིན་དུ་གནས་ཡོད་པ་དེ་ཕན་ཚུན་ངོ་འཕྲད་ནས་གྲོས་བསྡུར་བྱེད་མྱོང་མེད་པ་ཡིན་སྲིད་ཀྱི་མ་རེད། ཡིན་ནའང་ཕན་ཚུན་ངོ་འཕྲད་ནས་སྐད་ཆ་ཐད་ཀར་བཤད་རྒྱུ་དེ་གལ་ཆེན་པོ་རེད། གཏམ་དཔེར། “གཏམ་ངོས་ལ་བཤད་ན་ངོ་མི་ཚ། སྐྲ་རྒྱབ་ལ་གཡུག་ན་མིག་མི་སྒྲིབ།”ཞེས་པ་ལྟ་བུའོ། །ཁོང་གིས་དེ་ལྟར་དགོས་དོན་ནི་བོད་མི་རིགས་གྲངས་ཉུང་ནང་དུ་རྩོད་པ་མང་པོ་བྱུང་ན་སྤྱི་ཚོགས་ཡར་རྒྱས་དང་མཐུན་སྒྲིལ་ལ་གནོད་པ་དང་། སོ་སོས་ཆོས་སྤོང་གི་ལས་ཚབས་ཆེན་བསོག་གི་ཡོད་པས་ཁོ་རང་གིས་བོན་པོའི་དགེ་བཤེས་ཕར་བཙལ་ནས་དཔེ་ཆ་ལ་གསལ་ཁ་བཏོད་པ་སོགས་བོད་སྤྱི་པའི་མཐུན་སྒྲིལ་ལ་བསམ་བློ་གཏོང་ཡོད་པར་བཤད་པ་ལ། “བློ་སྔོན་ནས་རྙེད་ན་མཁས་པ་ཡིན། རྗེས་སུ་རྙེད་ན་བླུན་པོ་ཡིན་”ཞེས་པ་ལྟར་ཁྱོད་རང་གིས་ཤེར་སྒྲོན་ཞེས་པའི་དཔེ་ཆ་དེ་འབྲི་བའི་སྐབས་སུ་དེ་འདྲ་ཞིག་དྲན་ཐུབ་ཡོད་ན་ཅི་འདྲའི་ཡག་བ་ལ། ད་ནི་ཅུང་འཕྱི་སོང་བས་ “སྔ་དྲོའི་གཡོ་མ་གཡོ་ཤེས་ན། ཕྱི་དྲོའི་གཡོ་སྐྱོ་ལྡག་ཤེས་དགོས་”ཞེས་པའི་དཔེ་ལྟར། དཔེ་ཆ་འདི་ཡི་སྐོར་གྱི་རྙོག་གྲ་དེ་ག་དུས་མཚམས་འཇོག་མིན་ནི་ཁྱོད་རང་གིས་གཡོ་ཟོལ་མེད་པའི་སྒོ་ནས་སྔོན་འགྱོད་དང་ཕྱིས་བསྡོམས་ཡང་དག་པ་ཞིག་ག་དུས་བྱས་ན་དེ་དུས་མཚམས་འཇོག་ཡོང་གི་རེད། དེ་མིན་ཁྱོད་རང་གིས་བཤད་བསམ་པ་མཐའ་དག་སྐད་ཡིག་དུ་མའི་ཐོག་ནས་འཛམ་གླིང་གང་སར་བརྒྱུད་བསྒྲགས་བྱས་ཚར་ནས། ད་ཁྱོད་རང་ཚོས་དེ་ལ་བདེན་རྫུན་གྱི་གསལ་བཤད་བྱས་པ་ཡིན་ན་བོད་སྤྱི་པའི་ཡར་རྒྱས་དང་མཐུན་སྒྲིལ་ལ་གཏོར་བཤིག་གཏོང་བ་ཡིན་པས་དེ་ལྟར་མི་བྱེད་རོགས་ཞེས་སྤྱི་སེམས་ཡོད་མདོག་གིས་ཁ་འཇམ་པོའི་སྡིག་མོ་ཛ་དྲག་པོ་བྱས་པ་ལ་སུ་ཡིས་ལེགས་སོ་ཞུ་ཐུབ་ཀྱི་མ་རེད་ལ། རྙོག་ཟིང་དེ་མི་རབས་ནས་མི་རབས་བར་ཛ་དྲག་ཏུ་འགྲོ་སྲིད་པ་ཞིག་སྟེ། དཔེར་ན་ བོན་ལ་འཁྱལ་བོན་བསྒྱུར་བོན་བརྡོལ་བོན་ཞེས་པའི་སྐོར་གྱི་དོན་གནད་ལ་གཟིགས་དང་མཁྱེན་ཐུབ་ངེས་རེད། ལར་རྩོད་པ་ཞེས་པ་དེ་སྤྱི་མིང་རེད་ལ་རྩོད་པ་བྱས་ཚད་ཡར་རྒྱས་དང་མཐུན་སྒྲིལ་ལ་གནོད་ཅིང་སོ་སོས་ཆོས་སྤོང་གི་ལས་བསགས་པ་རེད་ཅེས་པ་ནི་ཆོས་དང་འཇིག་རྟེན་སོ་སོར་ཕྱེ་མ་ཤེས་པ་དང་འཇིག་རྟེན་བོན་བརྒྱད་ཀྱི་ལྟ་བ་རྨིང་གཞི་བྱས་ཏེ་བདག་རྒྱལ་གཞན་ཕམ་གྱི་རྩོད་པ་བྱས་པ་དང་། ཆོས་དང་འཇིག་རྟེན་སོ་སོར་ཕྱེ་ཤེས་པའི་སྒོ་ནས་དཀོན་མཆོག་དཔང་པོར་བཟུང་། ལས་འབྲས་རྨང་གཞི་བྱེད། ཚད་མ་གསུམ་གྱི་སྒོ་ནས་གྲུབ་མཐའ་དང་གཞུང་ལུགས་ལོ་རྒྱུས་རིགས་གནས་གང་ལ་དཔྱད་པ་གཏོང་བ་ནི་ཆོས་དང་འཇིག་རྟེན་གང་ལ་ཡང་ཡར་རྒྱས་དང་རང་རྒྱུད་ཀྱི་མ་རིག་མ་ཤེས་པའི་ཆ་རྣམས་བསལ་ནས་ཀུན་མཁྱེན་ཡེ་ཤེས་ཀྱི་དགོངས་པ་རྒྱུད་ལ་སྐྱེ་བ་སོགས་ལ་དགོས་ངེས་ཡིན་པས་དེ་གཉིས་ཁྱད་པར་ཕྱེ་ཤེས་པར་བྱོས་ཤིག། སྟོན་པ་རྣམ་གཉིས་ཀྱིས་ཚད་མ་རིག་པ་གསུངས་དགོས་དོན་ཡང་རང་གཞན་གྱི་རྒྱུད་ལ་ཡོད་པའི་མ་རིག་མ་རྟོགས་ལོག་རྟོག་གི་སྒྲོ་འདོགས་འདི་ལྟ་བུའི་རིགས་རྣམས་བསལ་བའི་ཆེད་དུ་ཡིན་ངེས་སོ། དེས་ན་ངས་མཁན་པོ་ལགས་ནས་འདིའི་སྐོར་ལ་ལུང་རིག་ཚད་མའི་སྒྲུབ་བྱེད་དང་རྩོད་སྤོང་ཡང་ནས་ཡང་དུ་ཡོད་པར་བསྒུག་ཡོད།
སྨྲས་པ།
ཐོས་བསམ་སྤང་བྱར་འཛིན་རྣམས་ལ། །
ལུང་རིག་རྩོད་པ་དགོས་དབེན་ཀྱང་། །
ཚད་གསུམ་སྨྲ་བའི་གཟུར་གནས་ཚོགས། །
དགྱེས་པའི་དགའ་སྟོན་འདི་ལས་ཅི། །ཞེས་སོ། །
ཡང་རྒྱད་སྐད་དུ་(佛教) སངས་རྒྱས་ཀྱི་ཆོས་ཞེས་པ་དེ་སངས་རྒྱས་ཤྰཀྱ་ཐུབ་པའི་ཆོས་ཞེས་སྦྱར་མེད་པ་དེ་རྒྱ་ཡིག་གི་ཚིག་མཛོད་འགའ་ལ་བསྟུན་ནས་བྲིས་པ་ལས་བོན་ལ་སྨོད་པ་དང་དགག་པའི་ཚིག་གཅིག་མེད་ཅེས་པ་ལ། རྒྱ་སྐད་དུ་ ཧྥོས་ཅོའོ་ ཞེས་པ་རྣམས་དོན་དངོས་སངས་རྒྱས་ཀྱི་ཆོས་ཞེས་པའི་སྐད་དོད་ཡིན་ཀྱང་། དེ་སྔོན་ཁྱོད་རང་ཚོས་གཡུང་དྲུང་བོན་ཆོས་འདི་སངས་རྒྱས་ཀྱི་བསྟན་པ་ཡིན་པ་འགོག་པའི་ཆེད་དུ་ཐག་རིང་པོ་ཞིག་ནས་དེ་དག་ཚང་མ་ཤག་ཐུབ་ཀྱི་ཆོས་རང་གོ་དགོས་པའི་བཤད་པ་བྱས་པར་བརྟེན་རྒྱ་ཡིག་ཚིག་མཛོད་འགའ་ཡི་ནང་དུ་བཤད་སྟངས་དེ་བྱུང་བ་རེད་མ་གཏོགས། རྒྱ་ཡིག་ཚིག་མཛོད་འགའ་ལ་བརྟེན་ནས་ཁྱོད་རང་ཚོའི་ལྟ་སྟངས་དེ་བྱུང་བ་མ་ཡིན་པ་གསལ་པོ་རེད།
ཡང་ཤེར་སྒྲོན་ནང་གི་སངས་རྒྱས་ཀྱི་ཆོས་ཞེས་པ་རྣམས་ལ་སངས་རྒྱས་ཤྰཀྱ་ཐུབ་པའི་ཆོས་ཞེས་བཅོས་ཡོད་ཅེས་བོན་ལ་ལྟ་སྟངས་ཡག་ཏུ་གཏོང་ཡོད་པའི་གསལ་བཤད་བྱས་པ་ནི། དེ་སྔོན་ཁྱོད་ཙམ་མ་ཡིན་པར་གྲུབ་མཐའ་དང་སྐྱ་སེར་ལ་མ་བལྟོས་པའི་ཆོས་པ་དང་ཞིབ་འཇུག་པའི་མིང་སྐམ་འཛིན་པ་མང་དག་ཞིག་གིས་སངས་རྒྱས་ཆོས་སམ་ནང་པའི་ཆོས་ཞེས་པ་ཤྰཀྱ་ཐུབ་པའི་ཆོས་ལ་གོ་དགོས་རེད། ཅེས་མིག་ཆེ་ཆེ་བྱེད་ནས་བཤད་ཀྱི་ཡོད་པ་དང་། རྒྱུ་མཚན་གང་ཞིག་ཡིན་ནམ། ཞེས་དྲིས་ཚེ། ཨ་ད་སྐབས་རྒྱལ་ཕྱི་རྒྱལ་ནང་གང་སར་དེ་འདྲའི་ཁས་ལེན་གྱི་འདུག་པས་ཞེས་བཤད་ཀྱི་ཡོད་པ་ལ། ཉེ་ཆར་མཁར་ནག་སྤྲུལ་སྐུ་ཚང་ནས་དེའི་སྐོར་ལ་དགག་སྒྲུབ་དཔྱིས་ཕྱིན་པ་བྱས་པར་བརྟེན་ཁྱོད་ཙམ་མ་ཡིན་པར་མཁས་བླུན་མང་དག་པ་ཞིག་གིས་དེའི་ཐད་བསམ་གཞིག་གནང་དགོས་པ་ཞིག་བྱུང་བ་རེད།། དེ་ལྟ་བུའི་རྨོངས་པའི་འདུ་ཤེས་དེ་དོར་ཐུབ་ཡོད་ན་སངས་རྒྱས་ཟེར་ཚད་ཤག་ཐུབ་ལ་གོ་དགོས་པའི་འདུ་ཤེས་དེ་ཡང་འདོར་ཐུབ་ངེས་ལ་དེ་ནི་ལུང་རིག་ཚད་མའི་རྩོད་པ་བྱས་པའི་འབྲས་བུ་ཡིན་པ་བཤད་མ་དགོས་སོ།།
སྨྲས་པ། ཆགས་སྡང་ལྟ་བའི་ཤེ་མུན་ལ། །
ལུང་རིག་སྐྱ་རེངས་མ་ཤར་ན། །
ཚད་གསུམ་བདེན་པའི་ཉི་གཞོན་དེ། །
གྲུབ་མཐའི་མཁའ་ལ་འཕགས་མི་སྲིད།།
ཅེས་བར་སྐབས་ཀྱི་ཚིགས་སུ་བཅད་པའོ། །
ཡང་དོགས་སེལ་སྔོན་མའི་ནང་དུ། བོན་གྱི་བླ་གྲྭ་ཁག་གཅིག་གིས་ཤྰཀྱ་ཐུབ་པའི་ཆོས་ལས་གསུངས་པའི་རྫོགས་ཆེན་སོགས་སངས་རྒྱས་པའི་ཆོས་ཐུགས་ཉམས་སུ་བཞེས་པ་ཡོད་ཀྱང་དེ་ནི་གང་ཟག་སྒེར་གྱི་ཉམས་ལེན་ལས་བོན་པོའི་ཆོས་ཀྱི་ཚབ་བྱེད་མི་ཐུབ་ཅེས་པའི་མཆན་དུ་(བོན་པོའི་བཀའ་ནའང་དེའི་རྫོགས་པ་ཆེན་པོ་ཡོད།)ཅེས་མཆན་དུ་བཏགས་པའི་དོན་གང་ཡིན། བོན་གྱི་བཀའ་ནང་རྫོགས་པ་ཆེན་པོ་ཡོད་པར་ཁས་བླངས་བ་ཡིན་ནམ་མིན། ཡིན་ན་དེ་ཉམས་སུ་བླངས་བ་ལ་བོན་པོའི་བཀའ་ཉམས་སུ་བླངས་བ་དང་དེ་འདྲའི་ཉམས་ལེན་དེ་བོན་པོའི་བཀའ་ཡི་ངོ་བོ་མཚོན་ཐུབ་པ་མཁར་ནག་སྤྲུལ་སྐུ་རིན་པོ་ཆེ་ནས་རིག་པ་ཚད་མས་སྒྲུབ་ཏེ་གྲུབ་ཟིན་ལགས་ན་གྲུབ་ཟིན་སྒྲུབ་པ་ལ་དགོས་པ་མེད་པས་བཞག། གོང་དུ་མ་ཡིན་ཞེས་ལན་རྒྱག་པར་འདོད་ན། འོ་ན་དེ་ལྟར་མཆན་བཏགས་པ་ལ་གོ་རྒྱུ་ག་རེ་ཡོད་གསལ་པོར་ཤོག་ཅིག། མཚམས་འདིར་ངས་ཁྱོད་རང་ལ་རིག་པ་ཚད་མའི་མཆོད་པ་ཉུང་ངུ་ཞིག་འབུལ་རྒྱུ་ཡིན་པས་ལེགས་པར་ཉོན་ཅིག་ཨ། བོན་པོའི་བཀའ་ནའང་དེའི་རྫོགས་པ་ཆེན་པོ་ཡོད་ཅེས་པའི་སྐབས་སུ་དེའི་རྫོགས་པ་ཆེན་པོ་ཞེས་པ་དེ་ཐུབ་པའི་ཆོས་ལས་གསུངས་པའི་རྫོགས་པ་ཆེན་པོ་དེ་ཡོད་པར་གོ་དགོས་པ་ཐལ། དེ་ལས་གོ་ཚུལ་གཞན་མེད་པའི་ཕྱིར། འདོད་ན། བོན་པོའི་བཀའ་ནའང་ཐུབ་པའི་ཆོས་ལས་གསུངས་པའི་མཐར་ཐུག་གི་ཐར་པ་ཡོད་པ་ཐལ། ཐུབ་པའི་ཆོས་ལས་གསུངས་པའི་རྫོགས་པ་ཆེན་པོ་ཡོད་པའི་ཕྱིར། རྟགས་ཁས། མ་ཁྱབ་ཟེར་ན། འཁོར་གསུམ། ཐུབ་པའི་ཆོས་ལས་གསུངས་པའི་རྫོགས་པ་ཆེན་པོ་ཡོད་ན། ཐུབ་པའི་ཆོས་ལས་གསུངས་པའི་མཐར་ཐུག་གི་ཐར་པ་ཡོད་པའི་ཁྱབ་པ་ཐལ། ཐུབ་པའི་ཆོས་ལས་གསུངས་པའི་མཐར་ཐུག་གི་ཐར་པའི་ངོ་བོ་དང་། ཐར་པ་དེ་འཐོབ་བྱེད་ཀྱི་རྒྱུ་དང་། ཐར་པ་དེ་སྒྲུབ་མཁན་གྱི་ཉམས་ལེན་པ། ཐར་པ་དེ་ཐོབ་པའི་གང་ཟག་རེ་རེ་ནས་ཡོད་པར་ཁྱབ་པའི་ཕྱིར། རྟགས་མ་གྲུབ་ཟེར་ན། རྟགས་གྲུབ་པ་ཐལ། དང་པོ་ཐུབ་པའི་ཆོས་ལས་གསུངས་པའི་སྤངས་རྟོགས་མཐའ་དག་ཕུན་སུམ་ཚོགས་པ་དེ་ཡོད་པར་གྲུབ། གཉིས་པ་ཐུབ་པའི་ཆོས་ལས་གསུངས་པའི་རྫོགས་པོ་ཆེན་པོའི་ཉམས་ལེན་དེ་ཡོད་པར་གྲུབ། གསུམ་པ་ཐུབ་པའི་ཆོས་ལས་གསུངས་པའི་རྫོགས་པོ་ཆེན་པོའི་ཉམས་ལེན་རྣལ་འབྱོར་པ་དེ་ཡོད་པར་གྲུབ། བཞི་པ་ཐུབ་པའི་ཆོས་ལས་གསུངས་པའི་མཐར་ཐུག་གི་ཐར་པ་ཐུབ་པའི་སངས་རྒྱས་ཡོད་པར་གྲུབ་པའི་ཕྱིར། དེ་ལས་སྟབས་བདེ་བའི་ཐོག་ནས་ཞུས་ན། བོན་གྱི་བཀའ་ལ་ཐུབ་པའི་ཆོས་ལས་གསུངས་པའི་མཐར་ཐུག་ཐར་པ་ཡོད་པ་ཐལ། བོན་གྱི་བཀའ་ལ་རྫོགས་པ་ཆེན་པོ་ཡོད་པ་གང་ཞིག། དེ་ཉམས་སུ་བླངས་བ་ལས་མཐར་ཐུག་གི་ཐར་པ་ཐོབ་པའི་སངས་རྒྱས་ཡོད་པའི་ཕྱིར། དང་པོ་མ་གྲུབ་ན། དེར་ཐལ། ཐུབ་པའི་ཆོས་ལས་གསུངས་པའི་རྫོགས་པ་ཆེན་པོ་ཡོད་པའི་ཕྱིར། རྟགས་ཁས། ཁྱབ་སྟེ། ཐུབ་ཆོས་ལས་གསུངས་པའི་རྫོགས་ཆེན་ཡོད་ན་རྫོགས་ཆེན་ཡོད་པར་ཁྱབ་པའི་ཕྱིར་ཏེ། ཐུབ་ཆོས་ལས་གསུངས་པའི་རྫོགས་ཆེན་དེ་རྫོགས་ཆེན་ཡིན་པའི་ཕྱིར་རོ། མ་གྲུབ་ན་། ཐུབ་པས་རྫོགས་ཆེན་མ་གསུང་པར་ཐལ་ལོ། རིག་ལམ་ཡང་དག་པའི་གོ་བ་མེད་པའི་རིགས་ལ་ལུང་རིག་ཚད་མའི་སྒྲུབ་བྱེད་རྣ་བར་བླུགས་ཀྱང་ཕན་པ་མེད་པས་འཁོར་གསུམ་གྱིས་མཚམས་སྦྱར་བར་བྱའོ། །
ད་ཁྱོད་རང་གིས་ཞེ་འདོད་ངོ་མ་བཤད་མ་ནུས་ཀྱང་ངས་བཤད་རོགས་བྱས་པ་ཡིན་ན། བོན་པོའི་ཆོས་ལ་ཐུབ་པས་གསུངས་པའི་མཐར་ཐུག་གི་ཐར་པ་མེད་ཅེས་པ་ནི་བོན་གྱི་ཆོས་ཉམས་ལེན་བྱས་པ་ལས་དེ་འཐོབ་པ་མེད་པ་དང་། བོན་གྱི་བཀའ་ནའང་ཐུབ་པའི་ཆོས་ལས་གསུངས་པའི་རྫོགས་པ་ཆེན་པོ་ཡོད་ཅེས་པ་ཐུབ་པའི་བཀའ་ཡིན་པར་གྱུར་པའི་རྫོགས་ཆེན་དེ་བོན་གྱི་བཀའ་ནང་དུ་བཞག་ཡོད་པ་དང་། དེ་ཉམས་སུ་བླངས་པ་ནི་གང་ཟག་སྒེར་གྱི་ཉམས་ལེན་ལས་བོན་གྱི་ངོ་བོའི་ཚབ་བྱེད་མི་ཐུབ་ཅེས་བཤད་པ་ཨེ་ཡིན། ཡིན་ན་ སྐབས་འདི་ལ་སླེབས་དུས་ཚུལ་ཆོས་སེང་རས་ཀྱིས་སྒྲིབ་པའི་མཁན་པོ་ལགས་ཀྱི་གདོང་རིས་ངོ་མ་དེ་མཐོང་ཐུབ་པ་མ་ཡིན་ནམ། བོན་གྱི་བཀའ་ནང་དུ་ཐུབ་པའི་ཆོས་ལས་གསུངས་པའི་མདོ་སྔགས་གཉིས་ཀྱང་ཡོད་པ་ཐལ། མདོ་སྔགས་གཉིས་རེ་རེ་ནས་ཡོད་པ་གང་ཞིག། ཁྱོད་ཀྱིས་དེ་དག་ཐུབ་པས་གསུངས་པའི་ཆོས་ཡིན་པར་ཁས་ལེན་པའི་ཕྱིར། འདོད་ན་ཐེག་ཆེན་སངས་རྒྱས་གཡུང་དྲུང་བོན་ཞེས་པའི་མདོ་སྔགས་སེམས་གསུམ་གྱི་བདག་ཉིད་ཅན་འདི་སངས་རྒྱས་ཀྱི་ཆོས་ཡིན་པ་ཐལ། ཐུབ་པས་གསུངས་པའི་ཆོས་ཡིན་པའི་ཕྱིར། རྟགས་ཁྱབ་ཁས། འདོད་ན། གཡུང་དྲུང་བོན་གྱི་དཀོན་མཆོག་གསུམ་ལ་སྐྱབས་སུ་འགྲོ་བའི་བོན་པོ་རྣམས་བོན་ཅན། ནང་པ་སངས་རྒྱས་པ་ཡིན་ཐལ། ཐུབ་པས་གསུངས་པའི་དཀོན་མཆོག་གསུམ་ལ་སྐྱབས་སུ་འགྲོ་བའི་གང་ཟག་ཡིན་པའི་ཕྱིར། དེར་ཐལ། གཡུང་དྲུང་བོན་ལས་གསུངས་པའི་དཀོན་མཆོག་གསུམ་ལ་སྐྱབས་སུ་འགྲོ་བའི་གང་ཟག་གང་ཞིག་དེ་འདྲའི་དཀོན་མཆོག་གསུམ་དེ་ཐུབ་པའི་ཆོས་ལས་གསུངས་པའི་དཀོན་མཆོག་གསུམ་ཡིན་པའི་ཕྱིར། དེར་ཐལ། གཡུང་དྲུང་བོན་དེ་ཐུབ་པས་གསུངས་པའི་ཆོས་ཡིན་པའི་ཕྱིར། རྟགས་ཁས། ཁྱབ་པ་དངོས། ད་གཡུང་དྲུང་གི་བོན་ལ་མཐར་ཐུག་གི་ཐར་པ་ཡོད་པ་ཐལ། དམ་པའི་ཆོས་དང་ཡོད་ན་ཡོད་མཉམ་མེད་ན་མེད་མཉམ་སོང་བའི་ཕྱིར། འདོད་ན་རྩ་བའི་དམ་བཅའ་བུད།། ད་རྒྱུ་འབྲས་འཛོལ་བ་སྲིད་པ་ཐལ། བོན་ལ་ཐུབ་པའི་ཆོས་ལས་གསུངས་པའི་ཐར་པ་ཡོད་པའི་ཕྱིར། ཁྱབ་པ་ཁས། ཡང་ཁྱོད་ཀྱིས་ད་ཆར་ཐེག་ཆེན་གཡུང་དྲུང་བོན་ཅེས་པའི་མདོ་སྔགས་སེམས་གསུམ་འདི་ཉིད་གཡུང་དྲུང་བོན་མ་ཡིན་ཞེས་བཤད་ཐུབ་པ་འདུག་གམ། འདུག་ན་དེ་དག་ཉམས་སུ་ལེན་མཁན་གྱི་བོན་པོ་ཚང་མ་བོན་པོ་མ་རེད་ཟེར་ཐུབ་པ་འདུག་གམ། ལེགས་པར་སོམས་ཤིག། གོང་གི་མདོ་སྔགས་སེམས་གསུམ་གྱི་བདག་ཉིད་གཡུང་དྲུང་བོན་དེ་ཐུབ་པའི་ཆོས་ལས་གསུངས་པའི་མདོ་སྔགས་སེམས་གསུམ་ཡིན་པ་གཏན་ཚིགས་སུ་བཀོད་པ་དེ་དག། ཕྱི་རྒོལ་ཁྱོད་རང་གིས་ཁས་བླངས་པའི་དོན་གཏན་ཚིགས་བཀོད་ནས་ཁྱོད་རང་དམ་བཅའ་ལ་སུན་འབྱིན་བརྗོད་པ་མ་གཏོགས་སྔ་རྒོལ་ཁོ་བོས་དེ་ལྟར་ཁས་མི་ལེན་པ་ཤེས་དགོས་སོ། ད་ང་རང་གཉིས་ཀྱིས་གོ་ལ་འདི་ཡི་སྟེང་དུ་མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན་ཞེས་པའི་གྲུབ་མཐའ་འདི་ནང་པའི་གྲུབ་མཐའ་ཡིན་པ་དང་། གྲུབ་མཐའ་འདི་ལ་ཞུགས་པའི་གང་ཟག་མཐའ་དག་ནང་པ་རེད་ཅེས་ལབ་རྒྱུ་ལས་གཞན་གཡོལ་ས་མེད་པ་ལུང་རིག་ཚད་མས་གྲུབ་འདུག་པ་ཨི་གོ་ཐལ། མི་གོ་ན་བོང་བུའི་རྣ་བར་གསེར་བོང་གང་བླུགས་ཀྱང་ཁྱད་པར་མེད་ཅེས་པ་ལྟར་རོ། ད་ལེགས་པར་སོམས་དང་བོན་པོའི་ཆོས་འདི་ལ་རང་ལུགས་ཀྱི་མཐར་ཐུག་ཐར་པ་ཡོད་ཀྱང་ཐུབ་པའི་ཆོས་ལས་གསུངས་པའི་མཐར་ཐུག་གི་ཐར་པ་ནི་མེད་དོ། །ཞེས་པའི་དམ་བཅའི་དེ་ག་འདྲ་བྱུང་།
མཁན་པོ་ལགས།
རྣམ་དཔྱོད་མཁྱེན་པའི་མཁའ་དབྱིངས་སུ། །
ལུང་རིག་ཆུ་འཛིན་དཀྲིགས་པ་ལས། །
ཚུལ་གསུམ་མེ་ཆར་གཡོས་པའི་མོད། །
ལོག་རྟོག་བྲག་རི་བཅིལ་འདི་རྨད། །ཞེས་ཀྱང་སྨྲའོ། །
ད་འུ་རང་གཉིས་ཀྱིས་ད་ཆར་བོན་པོ་རྣམས་ཀྱིས་སྤྱོད་བཞིན་པའི་མདོ་སྔགས་སེམས་གསུམ་གྱི་བདག་ཉིད་ཅན་འདི་ནང་པ་སངས་རྒྱས་ཀྱི་བསྟན་པ་ཡིན་པ་ཁས་ལེན་པ་གཉིས་ཀར་མཐུན། ཁས་ལེན་སྟངས་གི་ཐད་ནས་ཅུང་མི་འདྲ་བ་ནི། ཁྱོད་ཀྱིས་དེ་དག་ཐུབ་པའི་ཆོས་ལས་གསུངས་པའི་བཀའ་ཡིན་པའི་སྒོ་ནས་འདོད། ངས་དེ་ལྟར་མི་འདོད་ཀྱང་གོང་གི་བསྟན་པ་དེ་ནི་ཕྱི་ནང་གི་ཁྱད་པར་སྟོན་པ་དང་བསྟན་པ། ལྟ་བ་དང་སྐྱབས་འགྲོ་སོགས་ཀྱི་སྒོ་ནས་ནང་བསྟན་དུ་གྲུབ་པ་དང་དེའང་དམ་པའི་ཆོས་བོད་དུ་མ་དར་བའི་གོང་ནས་རི་བོ་གངས་ཅན་པའི་ཞིང་འདིར་དར་རྒྱས་སོང་བའི་བོན་སྟོན་གཤེན་རབ་ཀྱི་བསྟན་པ་རྣམ་པར་དག་པ་ཞིག་ཏུ་འདོད་དོ།། དེས་ན་ང་རང་གཉིས་རྩོད་པའི་གོམ་པ་གཉིས་པ་ཐེག་ཆེན་གཡུང་དྲུང་བོན་ཞེས་སུ་གྲགས་པའི་མདོ་སྔགས་སེམས་གསུམ་གྱི་བདག་ཉིད་ཅན་འདི་ཉིད་སྟོན་པ་རྣམ་གཉིས་གང་གི་བསྟན་པ་མིན་ཡིན་རྩོད་རྒྱུ་དེ་རེད། ཁྱོད་ཀྱིས་དེའི་སྐོར་ལ་བོན་གྱི་བཀའ་ནང་ཡོད་པའི་མདོ་སྔགས་སེམས་གསུམ་དེ་ཐུབ་ཆོས་ཡིན་ཤར་ཤར་གྱིས་བཤད་རྐྱང་བྱས་པ་ལས་རྒྱུ་མཚན་གང་ཞིག་མ་བཀོད་པར་བརྟེན། དང་པོ་ངས་ཁྱོད་ཀྱིས་ལུང་རིག་ཚད་མས་དཔྱད་པའི་སྒོ་ནས་རྩོམ་ལེན་གང་མཇོག་གནང་བའི་རེ་བསྐུལ་ཞུས་ནས་སྒུག་ཡོད་པས་རྩོམ་ལེན་ག་དུས་འབྱོར་ན་དེ་དུས་ངས་རྩོད་སྤོང་དང་སྒྲུབ་བྱེད་ཀྱི་ལུང་རིག་ཚད་མའི་གཟིགས་མོ་མི་དམན་པ་ཞིག་འབུལ་རྒྱུ་ཡིན་པར་གཟིགས་འདོད་ཡོད་པ་ཞུ།།
སྨྲས་པ།
རིག་པའི་སེང་ཆེན་གླལ་བའི་སྒྲས། །
ལོག་ལྟ་རྒོལ་ངན་ཝ་མོའི་ཁྱུ། །
བརྒྱལ་དང་བསྔངས་པར་གྲགས་པའི་གཏམ། །
སྨྲ་སེང་འཇམ་དབྱངས་དགྱེས་པའི་རྒྱུ། །ཞེས་སོ། །
དེ་ཉིད་ལས། “བོན་པོའི་བླ་མ་འགའ་རེས་བོན་ཆོས་དང་སངས་རྒྱས་ཤྰཀྱ་ཐུབ་པའི་ཆོས་གཅིག་མཚུངས་རེད། ཁྱོད་ཀྱིས་གང་ལ་བསླབ་ཀྱང་ཆོག་ཟེར། དོན་ལ་བོན་པོའི་ཆོས་དང་སངས་རྒྱས་ཤྰཀྱ་ཐུབ་པའི་ཆོས་ཀྱི་ཆེས་འགག་རྩར་གྱུར་བའི་མི་འདྲ་ས་ནི། དེ་ཉིད་སངས་རྒྱས་ཤྰཀྱ་ཐུབ་པའི་མཆོག་གསུམ་ལ་སྐྱབས་སུ་མི་འགྲོ་བ་དེ་རེད། གལ་ཏེ་བོན་པོའང་སངས་རྒྱས་ཤྰཀྱ་ཐུབ་པའི་ཆོས་ལ་སྐྱབས་སུ་འགྲོ་ན་ནི་སངས་རྒྱས་ཤྰཀྱ་ཐུབ་པའི་ཆོས་པ་ཡིན་ལ། མི་འགྲོ་ན་ནི་མ་ཡིན་ཏེ། དེ་ལྟར་ཡིན་མིན་གྱི་དབྱེ་བ་འབྱེད་བྱེད་ཀྱི་ཚད་དེ་ཤེས་ན་གནད་དོན་ཤིན་ཏུ་སླ་མོ་ཡིན་ནོ།” ཞེས་པ་ལ། བོན་པོའི་བླ་མ་འགའ་རེས་བོན་ཆོས་དང་ཐུབ་པའི་ཆོས་གཉིས་གཅིག་མཚུངས་རེད་ཅེས་པའི་བོན་ཆོས་དེ་ཐེག་ཆེན་སངས་རྒྱས་གཡུང་དྲུང་བོན་ཞེས་མདོ་སྔགས་སེམས་གསུམ་གྱི་བདག་ཉིད་ཅན་དེ་ཡིན་ནམ། ཆེས་གདོད་མའི་དུས་ནས་རྨོངས་དད་ཀྱི་ལྟ་བ་གོང་འཕེལ་སོང་ནས་འཚེ་བ་ཆོས་སུ་སྨྲས་པའི་གཤེན་རབ་མ་བྱོན་གོང་གི་གདོད་མའི་བོན་ལུགས་དེ་ལ་ཟེར། དང་པོ་ལྟར་ན་ཁྱོད་རང་ལ་མཚུངས་པ་ཙམ་མ་ཚད་དངོས་སུ་ཡིན་པར་བསྒྲུབས་ཟིན་པས་གོང་ལྟར་འགྲེས་སོ། གཉིས་པ་ལྟར་ན་དེ་འདྲའི་བོན་པོའི་བླ་མ་འགའ་དེ་གདོད་མའི་འཚེ་བ་ཅན་གྱི་བོན་ལུགས་ཀྱི་བླ་མ་རེད་བས། རེད་ན་བླ་མ་དེ་དག་ངོས་བཟུང་ནས་ཤོད་རྒྱུ་ཡོད་དམ། མེད་ན་ཁྱོད་ཀྱིས་བདག་འཛིན་མ་རིག་པས་རྒྱུ་རྐྱེན་དང་གྲུབ་མཐའི་ཆགས་སྡང་གིས་བདག་རྐྱེན་བྱས་ནས་སྐྱེས་པའི་མོ་ཤམ་བུ་ཡི་གཏམ་ཞིག་གླེང་ཡོད་པར་ངེས། གོང་དུ་ཁྱོད་ཀྱིས་གཤེན་བོན་ཐུབ་ཆོས་དང་གཅིག་མཚུངས་ཡིན་ན་ཐུབ་ཆོས་ཡིན་དགོས་པར་སྒྲུབ་འདུག་པ་ལ། ཇི་སྐད་དུ། “འདྲ་ན་དངོས་མ་ཡིན། མ་འདྲ་ན་དཔེ་མ་ཡིན་”ཞེས་རིག་པ་སྨྲ་བའི་ཁ་ནས་རླུང་ལྟར་དུ་གྲགས་པ་དེའང་ཁྱོད་ཀྱིས་གོ་མྱོང་མེད་པ་འདྲ། དེ་འདྲའི་ཐོས་རྒྱ་ཆུང་བ་ལ་ཨ། བོན་བླ་དག་གིས་གཅིག་མཚུངས་རེད་ཟེར་དོན་ནི་ཆོས་བོན་གང་ལ་བསླབ་ཀྱང་དགོས་ཆེད་གཙོ་བོ་གཅིག་ཡོད་པ་དེ་ནི་ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་རྒྱུ་དེ་རེད། བོན་ཆོས་གཉིས་ཆར་གཞི་ལམ་འབྲས་གསུམ་ཆ་ཚང་བའི་བསྟན་པ་རྣམ་པར་དག་པ་ཞིག་ཡིན་དུས་དེ་གཉིས་གང་ལ་བསླབ་པ་ཡིན་ན་འབྲས་བུ་དེ་འཐོབ་ཀྱི་ཡོད་པས་གང་ལ་བསླབ་ཀྱང་ཆོག་ཅེས་བཤད་པ་རེད་མ་གཏོགས་གཤེན་བོན་ཐུབ་ཆོས་ཡིན་ཟེར་ནས་བཤད་པ་མ་རེད། དེས་ན་ཁྱོད་རང་གིས་གོང་དུ་བན་བོན་གང་ལ་བསླབ་ཀྱང་ཆོག་སྟེ་སྟོན་པ་སངས་རྒྱས་ཀྱིས་ཀྱང་མ་དགག་ན་ངེད་ཅག་གིས་ཅི་སྟེ། ཞེས་ཨོ་ཟོབ་ཀྱི་བློ་རྒྱ་ཆེ་མདོག་དང་སྤམ་མདོག་གིས་བཤད། ད་ཆར་གང་ལ་བསླབ་ཀྱང་མི་ཆོག་པའི་རྒོལ་བ་མེད་པའི་སྒྲུབ་བྱེད་ལྟར་སྣང་མཚུངས་མི་མཚུངས་གི་ཁྱད་པར་མ་བཤད་ནས་ཕན་ཚུན་ཡིན་མིན་གྱི་ཁྱད་པར་འགའ་བཀོད་འདུག་པས་ཡ་མཚན་མི་ཆེའམ།།
ཡང་དེ་ཉིད་ལས། “གཞུང་འདི་རྣམས་ཀྱི་བརྗོད་བྱའི་གཙོ་བོ་མདོར་བསྡུས་ན་ ༡ བོན་གྱི་ཆོས་འདི་སངས་རྒྱས་ཤྰཀྱ་ཐུབ་པའི་ཆོས་མ་ཡིན་ཞེས་དང་། ༢ སངས་རྒྱས་ཤྰཀྱ་ཐུབ་པའི་རྗེས་འཇུག་ཡིན་མིན་གྱི་ཁྱད་པར་ནི་གཙོ་བོ་སངས་རྒྱས་ཤྰཀྱ་ཐུབ་པའི་་ཆོས་ཀྱི་མཆོག་གསུམ་ལ་སྐྱབས་སུ་འགྲོ་མིན་གྱི་སྒོ་ནས་འབྱེད་དགོས་ཞེས་པ་དང་། ༣ བོན་ལ་རང་གཞུང་ནས་བཤད་པའི་མཐར་ཐུག་གི་ཐར་པ་ཡོད་ཀྱང་སངས་རྒྱས་ཤྰཀྱ་ཐུབ་པའི་ཆོས་ལས་གསུངས་པའི་ཐར་བ་ནི་དེའི་མཆོག་གསུམ་ལ་སྐྱབས་སུ་སོང་ན་ཡོད་ལ་མ་སོང་ན་མེད་ཅེས་པ་འདི་གསུམ་ཡིན་ནོ།” ཞེས་པ་ལ། དོན་དག་དང་པོ་བོན་གྱི་ཆོས་ཞེས་པ་དེ་གཡུང་དྲུང་བོན་ཞེས་པ་འདི་གོ་དགོས་ངེས་ལ། དེ་ལ་བོན་པོ་ཚོའི་འདོད་ཐོག་ལ་སོང་ཀྱང་ཁྱོད་རང་གིས་གོང་དུ་གཡུང་དྲུང་བོན་ཐུབ་ཆོས་སུ་མི་འདོད་བཞིན་ཁས་ལེན་དགོས་སོང་བས་སྐབས་འདིའི་དམ་བཅའ་བུད། དེ་ལྟར་ཁས་མི་ལེན་ན་ཐུབ་ཆོས་མ་ཡིན་པའི་མདོ་སྔགས་སེམས་གསུམ་གྱི་བདག་ཉིད་ཅན་གྱི་གཡུང་དྲུང་བོན་ཞེས་པའི་སངས་རྒྱས་བསྟན་པ་ཞིག་ཡོད་པར་གྲུབ་པ་ནི་རྩ་བའི་སྒྲུབ་བྱ་གྲུབ་པ་ཡིན་ནོ། དོན་དག་གཉིས་པ་ལ་ཁྱོད་རང་གིས་གོང་དུ་ཁས་ལེན་ལྟར་ན་གཡུང་དྲུང་བོན་པོ་རྣམས་ཀྱང་ཐུབ་པའི་རྗེས་འཇུག་ཡིན་པར་ཐལ་ལོ། དོན་དག་གསུམ་པ་ནི་གོང་དུ་རྩོད་སྤོང་མདོར་བསྡུས་སོང་བའི་སྐབས་སུ་གཡུང་དྲུང་བོན་ལ་མཐར་ཐུག་གི་ཐར་པ་ཡོད་པར་གྲུབ་པ་དེས་མཐུས་སོ། ཁྱོད་ཀྱིས་ཐུབ་ཆོས་ལས་གསུངས་པའི་ཐར་པ་ཡོད་ན་ཐུབ་ཆོས་ཉམས་སུ་བླངས་བ་ལས་ཐོབ་པ་ཡིན་དགོས་ཞེས་བཤད་སྟངས་འདི་ལ་བལྟས་ན་བསྡུས་གྲྭའི་རིག་ལམ་ཙམ་ཡང་མ་ཆགས་པ་ལྟ་བུ་འདུག་གོ །
ཡང་དེ་ཉིད་ལས། “གཞུང་འདི་རྣམས་ཀྱི་ནང་ན་ནང་བ་སངས་རྒྱས་པ་ཡིན་ན་སྟོན་པ་སངས་རྒྱས་ཤྰཀྱ་ཐུབ་པའི་ལུགས་འཛིན་པ་ཁོ་ན་ཡིན་དགོས་མི་དགོས་དང་། བོད་གངས་ཅན་ན་སངས་རྒྱས་ཤྰཀྱ་ཐུབ་པའི་ལུགས་འཛིན་པ་མ་ཡིན་པའི་ནང་བ་སངས་རྒྱས་པའི་ཆོས་ཤིག་ཡོད་མེད་དང་། རྒྱལ་བ་གཤེན་རབ་དང་སངས་རྒྱས་ཤྰཀྱ་ཐུབ་པ་གཉིས་སངས་རྒྱས་གཅིག་གི་སྤྲུལ་པ་ཡིན་མིན་དང་། རྒྱལ་བ་གཤེན་རབ་སངས་རྒྱས་ཡིན་མིན་དང་། བོན་གྱི་ཆོས་ལུགས་མུ་སྟེགས་པའི་ལུགས་ཡིན་མིན་དང་། བོན་གྱི་གྲུབ་མཐའ་རང་ལུགས་ལ་རྫོགས་པ་ཆེན་པོ་ཡོད་མེད་དང་། བན་བོན་གཉིས་ཀྱི་ཆོས་ལ་འདྲ་མཚུངས་ཡོད་མེད་སོགས་ལ་བརྟག་དཔྱད་དང་དགག་སྒྲུབ་དང་ཁ་ཚོན་བཅད་པ་ཅི་ཡང་མེད་ཅིང་།” ཅེས་པ་ལ། གོང་གི་དོན་དག་བདུན་པོའི་ཐད་ལ་བརྟག་དཔྱད་དང་དགག་སྒྲུབ་དང་ཁ་ཚོན་བཅད་པ་ཅི་ཡང་མེད་ཅེས་པ་ནི་ལུང་རིག་ཚད་མས་བརྟག་དཔྱད་དང་དགག་སྒྲུབ་ཁ་ཚོན་བཅད་པ་མེད་ཟེར་གྱི་ཡོད་ན་བདེན་ལ། དེ་མིན་རྨོངས་པའི་མོས་ཕྱོགས་ཙམ་ལ་བརྟེན་ནས་ཁ་ཚོན་བཅད་པ་གོང་གསལ་ལྟར་ལ་དེའི་རིགས་ལ་ལུང་རིག་ཚད་མས་དགག་བཞག་མདོར་བསྡུས་འགའ་བྱས་ཟིན་པ་དང་། ད་ཁྱོད་ཀྱིས་དོན་དག་བདུན་པོ་དེའི་སྐོར་ལ་ལུང་རིག་ཚད་མས་དགག་བཞག་བྱེད་ཤེས་ཀྱི་འདུག་ན་སྐབས་སུ་བབ་པ་ལགས་ན་ངེས་པར་དུ་གྱིས་ཤོག། གལ་སྲིད་ལུང་རིག་ཚད་མའི་བརྒལ་རྟགས་ཕར་ཞོག་རང་གི་གང་བཤད་པ་དེ་དག་ཀྱང་དྲན་པ་མི་འདུག་ན་དྲང་པོ་ཤོད་དང་། “མ་ཤེས་མ་རིག་མ་གོ་གསུམ། དེ་གསུམ་རྒྱལ་པོའི་ཁྲིམས་ལས་ཐལ་”ཞེས་པ་ལྟར་ཁྱོད་ཀྱིས་སྔོན་བཤད་ལ་དོན་གནད་ཁེལ་བའི་ལེགས་བཅོས་བྱོས་དང་དེ་ཙམ་གྱིས་འཐུས་པར་བྱེད་ཆོག།
མཇུག་ཏུ་ངས་དྲི་བ་ཁག་བདུན་འདོན་རྒྱུ་ཡིན།
༡ ད་ཆར་བོན་པོ་རྣམས་ཀྱིས་སྤྱོད་བཞིན་པའི་མདོ་སྔགས་སེམས་གསུམ་གྱི་བདག་ཉིད་གཡུང་དྲུང་གི་བོན་འདི་སྟོན་པ་གང་གི་བསྟན་པ་ཡིན་ནམ།
༢ བསྟན་པ་འདི་ཉམས་སུ་བླངས་བ་ལས་ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་པ་སྲིད་དམ།
༣ བོན་ཆོས་ལ་བོན་རང་ལུགས་ཀྱི་ཐར་པ་ཡོད་ཀྱང་ཐུབ་ཆོས་ལས་གསུངས་པའི་ཐར་པ་མེད་ཅེས་པའི་དོན་གང་ཡིན།
༤ བོན་གྱི་བཀའནང་ཐུབ་ཆོས་ལས་གསུངས་པའི་རྫོགས་པ་ཆེན་པོ་ཡོད་དོ་ཞེས་པའི་དོན་གང་ཡིན།
༥ ཐུབ་ཆོས་ལས་གསུངས་པའི་ཐར་པ་ཐོབ་ན་ཐུབ་ཆོས་ཉམས་སུ་བླངས་པ་ལས་ཐོབ་པ་ཡིན་པས་ཁྱབ་དགོས་སམ།
༦ གཤེན་རབ་བོད་དུ་མ་བྱོན་པའི་སྔོན་དུ་བོད་ལ་བོན་ཞེས་པའི་ཆོས་ཞིག་ཡོད་དམ་མེད།
༧ བོན་ཡིན་ན་གཡུང་དྲུང་བོན་ཡིན་དགོས་པར་ཁྱབ་སམ་ཁྱབ། གོང་གི་དྲི་བ་རྣམས་ལུང་རིག་ཚད་མའི་རྒྱབ་རྟེན་དང་བཅས་པའི་སྒོ་ནས་ལན་ངེས་པར་དུ་རྒྱག་རོགས་ཞུ། གལ་ཏེ་ལན་མེད་པའམ་ཡང་ན་གཡོ་ཟོལ་གྱིས་དྲི་བའི་གནད་ལ་མ་ཁེལ་བའི་“བལ་ནང་རྡོ་བཏུམས་”ལྟ་བུའི་ལན་ཞིག་རྒྱབ་པ་ཡིན་ན་ཁྱོད་རང་གིས་བཤད་པ་ཐམས་ཅད་གྲུབ་མཐའི་ཆགས་སྡང་ཙམ་ལས་ལུང་རིག་ཚད་མའི་སྒྲུབ་བྱེད་གང་ཡང་མེད་པར་བླུན་པོ་སྙིང་ཁམས་ཅན་ཞིག་ཡིན་པའི་དོན་རྟགས་ཕྱི་རུ་མངོན་པ་ནི་བཤད་མ་དགོས་སོ།།
སྨྲས་པ།
ཅི་ཡང་མི་ཤེས་སྐྱེ་བོའི་འཁོར་ཚོགས་ལ། །
ཅི་བཤད་རྒོལ་བ་མེད་པའི་ལང་ཤོར་གཏམ། །
ཅི་བཞིན་ལུང་རིག་སྨྲ་བའི་ཚོགས་རྣམས་ཀྱིས། །
ཅི་ཡིན་བདེན་རྫུན་འབྱེད་ལ་སུ་ཡིས་འགོག །
སྣ་ཚོགས་གྲུབ་མཐའི་དོ་ར་རུ། །
ལུང་རིག་ཚད་མའི་གར་མཁན་མས། །
ཚུལ་གསུམ་སྟངས་སྟབས་བསྒྱུར་བ་ན། །
རྨོངས་ལོང་དག་གིས་ཅི་བྱར་ཅི། །
ཞེས་ལེགས་བཤད་སྨྲ་བའི་ཉི་མ་ཞེས་པ་དེས་ཁམས་མདོ་སྟོད་ཧོར་སྦྲ་ཆེན་རྫོང་ཀླུ་ཕུག་དགོན་ཆེན་དུ་འབྱུང་ལྡན་༣༠༡ བོད་ཆུ་འབྲུག་ལོའི་རྟ་ཟླ་བའི་ཡར་ངོར་སྦྱར་བའོ།།
རྩོམ་པ་པོ།:tibetmonk སྤེལ་དུས།:2012-4-9 9:48:39


རེ་བ་དང་ཡིད་ཆེས་ཀྱི་ཀློང་ན་འཚོ་ཞིང་། ཉི་མ་དང་ཟླ་བའི་འཁོར་སྐྱོད་ལ་ཅེར་བའི་བསིལ་ལྡན་ཁ་བའི་ལྗོངས་ཀྱི་ཕུ་ནུ་མིང་སྲིང་རྣམ་པ་ལགས། ངས་དེ་རིང་སྲིད་པའི་རྗེ་བོ་གཉའ་ཁྲི་བཙན་པོ་ནས་བཟུང་སྟེ། བརྩེ་བ་དང་མིག་ཆུ་འདྲེས་ཤིང་། སྙིང་གཏམ་དང་ཁྲག་རྒྱུན་བསྲེས་པའི་ཡར་ཀླུང་གཙང་བོའི་རླབས་རིས་དང་། གངས་རྒྱལ་ཏི་སེའི་བརྗིད་ཉམས་ཏེ་ཞང་བོད་མི་རིགས་ཀྱི་སེམས་ཀྱིས་བཀུར་ཞིང་ལག་པས་སྐྱོར་བའི་ཞང་བོད་ནང་བསྟན་རིག་གནས་སོགས་མི་རིགས་ཤིག་གི་གཟི་བརྗིད་དང་། ཡུལ་སྲོལ་གོམས་གཤིས། དགའ་སྐྱོ་ཆགས་སྡང་། མཐུན་སྒྲིལ་སློབ་གསོ་སོགས་མི་རིགས་ལ་བཅང་བའི་རེ་བ་དང་། མི་རིགས་ལ་དུངས་པའི་ལྷག་བསམ་ཡོད་ཚད་ལྷན་དུ་བཤམས་ཏེ། དུས་རབས་ཉེར་གཅིག་པའི་བོད་མི་སྤུན་ཟླ་ཡོངས་ཀྱི་མཐུན་སྒྲིལ་དང་། མདུན་སྐྱོད། སྐད་ཡིག་རིག་གསུམ་གྱི་ངོ་བོ་ཡར་ངོའི་ཟླ་ལྟར་རྒྱས་པའི་འབོད་སྐུལ་དང་། ལྷག་པར་དུ་བརྙན་འཁོར་འདིའི་སྦྱིན་བདག་སྦྲ་ཆེན་བསྟན་འཛིན་ཡེ་ཤེས་ལགས་ཀྱིས་ཁོང་ཉིད་བོད་མི་ཞིག་ཡིན་ཕྱིར་རི་བོ་གངས་དཀར་ཏི་སེའི་ཉིན་སྲིབ་ན་གནས་པའི་བོད་མི་རྒན་དར་གཞོན་གསུམ་ལ་ལྷག་བསམ་གཙང་མའི་ཞབས་ཕྱི་རྣལ་མ་ཞིག་དང་། བརྩེ་བ་འབུམ་གྱི་སེམས་གཏམ་དྲོན་མོ་ཞིག་གི་དོད་དུ། མདོ་དབུས་མཐོ་སྒང་གི་རི་ལུང་ཀུན་ན། སྙན་འགྱུར་དབྱངས་རྟ་ཡི་གླུ་སྒྲས་རྨི་ལམ་དཀྲོགས་པའི་རྔ་ལྗོངས་ཁུ་བྱུག་སྔོན་མོ་གྲགས་བྷེ་དང་། སྙན་གྲགས་ཀྱི་རླུང་རྟ་དགུང་ལ་སྤུར་ཞིང་རྣམ་རིག་གི་མེ་ཏོག་ལྷུག་པོར་བཞད་པའི་གཉེན་པོ་གཡུ་རྩེའི་བུ་རྒྱུད་ཤེར་བསྟན། མཚན་སྙན་གྱི་བ་དན་དཀར་པོ་གངས་དཀར་རི་བོའི་དབུ་རྩེ་ན་འཕྱོ་ཞིང་། ངག་རིག་གི་དབྱངས་རྟ་སྙན་མོ་ཆོལ་གསུམ་སྤུན་ཟླའི་རྣ་བ་རུ་ཟགས་པའི་གངས་ལྗོངས་གླུ་ཡི་རྒྱལ་སྲས་སྐལ་བཟང་ཡོན་ཏན། ཚངས་སྲས་བུ་མོའི་འགྱུར་ཁུག་ལ་མངའ་དབང་བསྒྱུར་ཞིང་། དྲི་ཟའི་བུ་མོའི་ལང་ཚོ་ལས་མཛེས་སྡུག་རྫོགས་པའི་ཚངས་པའི་སྲས་མོ་དར་མཚོ་སོགས་གངས་རིའི་འདབས་རོལ་ནས་ལང་ཚོ་རྒྱས་ཤིང་། གོ་ལའི་གཞིས་ཁྱིམ་དུ་རླུང་རྟ་སྐྱོད་པའི་ན་གཞོན་ཁྱུ་གཅིག་གི་སྙན་མོའི་དབྱངས་ལ་བསྐུལ་ཏེ།{ཡར་ཀླུང་གཙང་པོའི་བཞུད་སྒྲ།}ཞེས་པའི་བརྙན་འཁོར་འདི་ཕུལ་བ་ཡིན་ལ། དེ་བས་ཁོང་གིས་རྒྱལ་ཕྱི་ནང་ན་བཞུགས་པའིབ་བོད་མི་སྤུན་ཟླ་ཡོངས་ལ་འཚམས་འདྲི་ལེགས་སྐྱེས་དང་། བོད་ཀྱི་ཆབ་དཔལ་རིག་གསུམ་གྱི་ངོ་བོ་སྔར་ལས་རྒྱས་ཤིང་། ཚེ་བསོད་རླུང་རྟ་ཡི་བ་དན་ནམ་ཡང་གཟི་བརྗིད་ངང་གནས་པའི་བཀྲ་ཤིས་སྨོན་འདུན་དུ་ཕུལ་བ་ཡིན་ཟེར།
རྩོམ་པ་པོ།:tibetmonk སྤེལ་དུས།:2012-4-6 22:38:30
སྟོན་པ་གཤེན་རབ་མི་བོ་རྟག་གཟིགས་འོལ་མོ་ལུང་རིང་ནས་བོད་ཡུལ་ཀོང་པོའི་བར་དུ་ཕེབས་པའི་ལམ་ལ་དཔགས་ཏེ་རྟག་གཟིགས་དང་ཞང་ཞུང་དང་བོད་ཀྱི་ས་ཡི་ཁྱོན་དབྱིབས་འབྲེལ་ཚུལ་བཅས་ལུང་བཞིན་བཤད་པ་ཞིག་སྔར་ནས་རགས་ཙམ་བཤད་ཀྱང་། བསྐྱར་དུ་བསྟན་པ། གངས་དབལ་སོ་ར་བའི་ཕྱི་རོལ། གངས་ཏི་སེའི་བྱང་ཕྱོགས་ཀྱི་མཐར། གེ་སར་ཕྲོམ་གྱི་ཡུལ་ཡོད། གེ་སར་ཕྲོམ་གྱི་རྒྱལ་པོ་ཁ་ལ་དུང་སྤྲུག་གི་མངའ་འོག་ཏུ་ཧོར་གྱི་ཞིང་དྲུག་ཡོད། དེ་ནི་སྟོད་ན་གུར་དཀར་གྱི་གླིང་ཆེན་སྡེ་དྲུག་སྨད་ན་གུར་ནག་གི་ཞིང་ཆེན་སྡེ་དྲུག བར་ན་དྲུག་ཕྲོམ་གྲུ་གུའི་སྡེ་དྲུག་ལ་གུར་སེར་གྱི་ཆོལ་ཁ་སྡེ་དྲུག བློན་དང་སོག་པོ། གངས་རྒྱུད་དང་མཚོ་གླིང་དང་གཉིས་བཅས་ཏེ་སྡེ་ཆེན་ཉི་ཤུ་ཡོད་པར་གསལ།
༼མདོ་དྲི་མེད་གཟི་བརྗིད། ཉ ༤༦༡༽ཡུལ་སྡེ་འདི་རྣམས་གུར་དཀར་ནག་ཏུ་གནས་པར་མངོན། ཧོར་དང་སོག་པོ་རྣམས་ཀྱང་ཕྲོམ་གྱི་མངའ་ཁོངས་ཡིན་པར་གསལ། ཕྲོམ་གྱི་མཐའ་རས་བོད་མི་ཡིན་ཞེས་པས། ཕྲོམ་གྱི་ལྷོ་ཡི་མཐའ་རུ་བོད་མི་ཡིན་ཞེས་པ་ལྟར་མངོན་ཀྱང་། ཕྲོམ་དང་བོད་ཀྱི་བར་དུ་ཐོ་གར་དང་། ཞང་ཞུང་གི་ཡུལ་གཉིས་ངེས་པར་ཡོད་དགོས་ཏེ། ༼མདོ་གཟེར་མིག ཁ ༦༦༡༽ལས་ཞང་ཞུང་མུ་ཕྱ་དུམ་པ་ཚལ་ན། ཞེས་སྟོན་པ་ཕེབས་ལམ་དུ་ཞང་ཞུང་དང་འཕྲད་པར་བཤད། བོད་ཀྱི་ཡུལ་ཁྱོན་ཀྱང་ཉང་པོ། ཀོང་པོ། དྭགས་པོ་དང་། ཀློ་དང་། མོན་དང་། བོད་དང་བཅས་པ་ཡིན་པས་ཉང་པོ་ནི། ཀོང་པོའི་བྱང་ནུབ་བྲག་གསུམ་གྱི་རྒྱུད་ནས་བསམ་ཡས་ཀྱི་ལྷོ་ཤར་འོལ་ཁ་སོགས་ཡིན་ལ། ཀོང་པོ་ནི་དེང་དུས་ཀྱང་རྩེ་བླ་རྫོང་ཞེས་པའི་མངའ་འོག་དང་། སྤོ་ཡུལ་བཅས་པ། དྭགས་པོ་ནི་དེང་དུས་དྭགས་པོ་ཁོག་ཅེས་པའི་ས་གནས་ཡོད་པ་འདི་རྣམས་ཀྱི་སྣེ་ཟུར་ཕན་ཚུན་ནས་ཆེ་ཆུང་གི་འགྱུར་ལྡོག་ཅུང་ཙམ་བྱུང་བ་སྲིད་ཀྱང་ས་གནས་ནི་མ་འགྱུར་བར་མངོན། ཀློ་ནི་དེང་སང་ཀློ་མོན་ཐང་ཞེས་པ་བལ་པོའི་རྒྱལ་པོའི་མངའ་འོག་ཏུ་འདུག་པ་འདི་ནི་སྔ་མོའི་དུས་ནས་བོད་ཀྱི་མངའ་འོག་ཡིན་འདུག་སྟེ། དེ་རྗེས་བོད་ཀྱི་རྒྱལ་རབས་བྱུང་ནས་རྒྱལ་པོ་ཁྲི་སྲོང་ལྡེ་བཙན་གྱི་དུས་སུ་ཡང་ཀློ་བོད་འོག་ཏུ་ཡོད་དེ། རྒྱལ་པོས་བོན་གཤེན་རྣམས་ལ་ཐུགས་མཉེས་པའི་རྟགས་སུ༼རྒྱལ་རས༽སྟོད་ནས་འབངས་གསུམ་ཕུལ་བ། སོ་དང་། སོ་ན། ཀློ་བོ་དང་གསུམ་མོ། །ཞེས་དང་། མོན་ནི་བལ་བོད་མཚམས་ཀྱི་ཡུལ་སྡེ་ཕལ་ཆེར་དང་། ཁྱད་པར་སྐྱིད་རོང་གི་སྐོར་ལ་བརྗོད། བོད་ནི་བོད་ཡུལ་རུ་བཞི་ཞེས་གཡས་རུ་གཡོན་རུ་དབུས་རུ་རུ་ལག་རྣམས་སོ།།
༼མཛོད་ཕུགས། ༡༡༠༽ལྷོ་འཛམ་བུ་གླིང་ལ་རི་དགུ་ཡིས་ཕྱི་ནས་ནང་དུ་འཁོར་ནས་ཡོད་དེ། འདི་ནི་བྱང་ནས་ལྷོ་རུ་བརྩིས་པ་སྟེ། འཛམ་གླིང་བྱང་གི་ཁ་ཁྱེར་ལ། མཚོ་དང་གླིང་འབྱེད་པ་ཏིང་བྱེར་གྱི་རི་རྒྱུད་བྱ་བ་ཡོད། དེ་ལ་གཅན་གཟན་སྣ་ཚོགས་གནས་སོ། །དེའི་ལྷོ་ན་མཐའ་འཁོབ་དང་ཡང་འཁོབ་འབྱེད་པ་རི་བོ་ད་ཤན་གྱི་རི་རྒྱུད་ཡོད། དེ་ལ་གནོད་སྦྱིན་ཕོ་མོ་མི་ལ་མངོན་སུམ་དུ་རྒྱུགས་པ་གནས་སོ། །དེའི་ལྷོ་ན་ཡང་འཁོབ་དང་མཐའ་འཁོབ་དུ་འབྱེད་པའི་རི་བོ་ཤ་ཚགས་ཀྱི་རི་རྒྱུད་ཡོད། དེ་ལ་མི་རྒོད་ཤ་ཤོར་གྱི་རིགས་གནས་སོ། །དེའི་ལྷོ་ན་མཐའ་འཁོབ་དང་གེ་སར་དུ་འབྱེད་པའི་རི། ལ་ཤངས་རྩེ་མངས་ཀྱི་རི་རྒྱུད་ཡོད། དེའི་རྩ་ན་རྩི་ཤིང་སྐྱེས། རི་ལ་རི་དྭགས་གནས་སོ། །དེའི་ལྷོ་ན་ཕྲོམ་དང་གེ་སར་དུ་འབྱེད་པའི་རི། དན་ཤན་གྱི་རི་རྒྱུད་གནས་ཏེ། དེ་ལ་རྩི་ཤིང་དང་འདབ་ཆགས་མང་བར་གནས་སོ། །དེའི་ལྷོ་ན་ཕྲོམ་དང་ཧོར་དུ་འབྱེད་པའི་རི་བྱང་རྩུག་རི་ཞེས་བྱ་བ་ལ། རྩི་ཤིང་དང་ནགས་ཚལ་གཅན་གཟན་དང་འདབ་ཆགས་གནས་སོ། །དེའི་ལྷོ་ན་ཧོར་དང་གྲུ་གུ་དང་རུ་འབྱེད་པ་ཤང་ལ་ནག་པོ་བྱ་བ་ལྕགས་རི་དང་ཟངས་ཐང་དུ་ཡོད་དོ། །དེའི་ལྷོ་ན་དྲུག་གུ་ཚ་གསེར་དུ་འབྱེད་པ། བ་དག་ཤན་གྱི་རི་རྒྱུད་གནས་སོ། །དེའི་རྒྱབ་ན་ཚ་གསེར་དང་འབྲུ་བོད་དུ་འབྱེད་པ་ཏ་ལ་ནག་པོའི་རི་རྒྱུད་ཡོད་དོ། །དེའི་ལྷོ་ན་རྣིལ་དང་རང་ཞེས་བྱ་སྟེ། རྩེ་མོ་གངས་རི་དང་བྲག་རི་ཡོད་པ། ཤེལ་གྱི་མཆོད་རྟེན་འདྲ་བ་ཞིག་ཡོད་དོ། །སྤོས་དྲི་ཅན་གྱི་བྱང་ཕྱོགས་ན། མཚོ་མ་དྲོས་ཞེས་པར་ཀླུ་གནས་པར་ཡོད་དོ། །མདོར་ན་གངས་ཏི་སེ་དང་། སྤོས་རི་ངད་ལྡན་དང་མཚོ་མ་པང་ཞེས་པའམ་མ་དྲོས་དང་གསུམ་སྒྱེད་པུ་ལྟ་བུར་གནས་སོ། །ཞེས་གསུངས། སྟོན་པ་སངས་རྒྱས་དེ་ཉིད་བོད་ཀྱི་འགྲོ་བ་འདུལ་བའི་དུས་དང་སྨོན་ལམ་གདབ་པའི་ཆེད་དུ་རྟག་གཟིགས་འོལ་མོ་ལུང་རིང་ནས་བོད་ཡུལ་དུ་ཕེབས་པའི་ཚུལ་ནི། རྒྱལ་ས་ཕོ་བྲང་གླིང་བརྒྱད་ནས་ལྷོ་ཤར་རྒྱལ་མོ་མོ་ཁྲིམས་ཀྱི་གླིང་ནས། ༼གཟི་བརྗིད། ཉ༤༦༦༽ ཞེས་རྒྱལ་མོ་མོ་ཁྲིམས་ཀྱི་གླིང་ཞེས་པ་ཞིག་ཕྱི་གླིང་བཅུ་དྲུག་གི་ནང་ཚན་ནུབ་ཏུ་ཡོད་ཀྱང་། མིང་དེ་དང་འདྲ་བའི་གླིང་ཞིག་མཐའ་གླིང་དུའང་ཡོད་པར་མངོན། ཡུལ་དེ་ནས་མུ་ཁྱུད་བདལ་བའི་རྒྱ་མཚོ་ལ་གཟིངས་ཆེན་ཤན་ལ་རླུང་གིས་བསྐྱོད་ནས་བགྲོད། དེ་རྒྱབ་དབལ་སོ་གངས་ཀྱི་ར་བ་འགྲིམས་ལམ་གྱི་སྒོ་ཞིག་ཡོད་ཅིང་། སྒོ་དེ་ལ་དག་ཤ་དུང་གི་སྒོ་མོ་ཞེས་བརྗོད། དེའི་ཕྱི་ལོགས་ཞང་ཞུང་གི་ས་མཚམས་ནས་མུ་ཁྱུད་བདལ་བའི་རྒྱ་མཚོའི་འགྲམ་བར་དུ་མུན་པ་དང་གཅན་གཟན་དང་ལམ་འཕྲང་བཅས་ཀྱིས་ཉིན་ལམ་དགུས་ཆོད་པའོ། །
༼ཉ༢༢༣༽དག་ཤ་དུང་གི་སྒོ་མོའི་ཕྱི་རུ་བདུད་ཀྱི་ཆུ་ཡིས་སྟོན་པའི་ལམ་བཀག་པས། མ་ཁེགས་ཤིང་ས་དེར་རྟགས་སུ་རྒྱ་མཚོ་ཆེན་པོའི་དཀྱིལ་དུ། པདྨའི་སྡོང་པོ་སྐྱེས་ཏེ་བཀྲ་ཤིས་ཀྱི་ས་རྟགས་སུ་བཞག་གོ །ས་དེར་སྟོན་པས་ཟ་ཧོར་དང་ཡུ་གུར་དང་། ཁ་ཆེ་དང་། བྲུ་ཤའི་བོན་པོ་རྣམས་ལ་གསང་བ་སྔགས་ཀྱི་ལུང་ཕོག་ཅེས་པས་ས་གནས་དེ་ཡུལ་དེ་རྣམས་དང་ཐག་ཉེ་བ་ཡོད་པའི་རྒྱུ་མཚན་ཡང་ཡིན་ནོ། །ཟ་ཧོར་ནི་བོད་མི་འགས་མན་ཊིའི་ས་གནས་སུ་ངོས་འཛིན་ཏེ་གནས་སྐོར་དང་ཕྱག་མཆོད་བྱེད་པ་འདུག་མོད་ཀྱང་འདིར་འདི་ཙམ་ལས་ཁ་གསལ་མ་བྱུང་། ཡུ་གུར་ནི་སོག་ཡུལ་གྱི་བྱེ་བྲག་ཨུ་གུར་ཟེར་བ་མིན་ནམ་སྙམ། འོན་ཀྱང་ཁ་གསལ་མ་བྱུང་། ཁ་ཆེ་ནི་དེང་སང་ཡང་ཀ་ཤི་མེར་བ་ཟེར་བ་འདི་ཡིན་ཏེ་ཚིག་དེ་སཾ་སྐྲྀ་ཏར་ཡང་ཁ་ཆེ་ཡིན། བྲུ་ཤ་ནི་དེང་སང་གེལ་གེ་ཊི་ཟེར་བ་ཀ་ཤི་མེར་གྱི་ཐག་ཉེ་ཞིག་གོ །ལི་ཡུལ་ནི་ཤིན་ཅང་། ཡུལ་དེའི་བྱང་ཤར་དེང་སང་སོག་ཡུལ་དང་ཉེ་བར་སྔར་ཐོད་དཀར་གྱི་ས་ཆགས། ཡུལ་དེའི་ལྷོ་ནུབ་མཚམས་སུ་སྔར་གྱི་སོག་པོ་ཆགས་ས། ལི་ཡུལ་དང་། སོག་ཡུལ་བོད་བཅས་ཀྱི་འདུས་མཚམས་བོད་བྱང་ཤར་ལ་འ་ཞའི་ཡུལ་ཆགས། དེང་དུས་ཀྱི་སོག་པོའི་ཡུལ་གྱི་ལྷོ་རྒྱ་ནག་གི་ས་ཆར་སྔར་མེ་ཉག་གི་རྒྱལ་ཁབ་ཆགས་ཤིང་། དེའི་རྒྱལ་རབས་རགས་པ་ཙམ་ནི། རྒྱལ་རབས་བོན་གྱི་འབྱུང་གནས་སུ་གསལ།
དེ་ནས་སྟོན་པ་འཁོར་བཅས་ཕེབས་པའི་ལམ་དུ་བདུད་ཀྱིས་མེ་བཏང་སྟེ་བསྲེགས་པའི་ས་རྟགས་སུ་ཆུ་མེད་མྱ་ངན་ཐང་བྱེ་མའི་ཐང་དཀྱིལ་ན། བྲག་དམར་པདྨའི་སྡོང་པོ་ལྟ་བུ་ལ། སྐུ་གསུམ་མེ་ལྷའི་དཀྱིལ་འཁོར་བཀྲ་ལ་གསལ་བ་བཀྲ་ཤིས་ཀྱི་རྟགས་སོ། །དེ་ནི་སྟག་གཟིག་དང་ཞང་ཞུང་གི་ས་མཚམས་ཡིན་པར་གསུངས། ས་དེར་སྟོན་པས་ཞང་ཞུང་གི་བོན་པོ་ལ། བོན་དུ་ཛྭོ་དང་སྔགས་ཀྱི་ལུང་ཕོག ཅེས་པས་ཞང་ཞུང་གི་ས་མཚམས་དེ་ནས་ཚུགས་པ་བཤད། ཡང་སྟོན་པ་བོད་ཀྱི་ཆུ་བོ་བཞི་འདུས་ཀྱི་འགོར་བྱོན་པས། བདུད་ཀྱི་དམག་གིས་ས་དང་བྱེ་མའི་འཚུབ་མ་བཏངས་པས་སྟོན་པ་འཁོར་བཅས་ས་ཡིས་མ་ནོན་པར། མྱ་ངམ་བྱེ་མའི་གསེབ་ནས་བྲག་གི་གཡུང་དྲུང་སྐྱེས་པ་ལ། སྟོན་པའི་ཞབས་རྗེས་བཏོད་དེ་བཀྲ་ཤིས་ཀྱི་རྟགས་སུ་བཞག་གོ །དེ་ནི་བོད་དང་ཞང་ཞུང་གི་ས་མཚམས་སོ། །དེང་སང་ཡང་ས་དེར་གུང་དུམ་དུམ་པ་ཚལ་ཞེས་སྟོད་ཀྱི་འབྲོང་པའི་ས། གཡས་རུ་མ་གཙང་གི་འགྲམ་དུ་ཡོད། ས་དེར་སྟོན་པས་བོད་ཀྱི་བོན་པོ་ལ་བོན་དུ་ལྷ་གསོལ་བ་དང་། འདྲེ་བཀར་བའི་ལུང་ཕོག ནམ་ཞིག་ཐེག་པ་རིམ་དགུའི་བོན་དར་བའི་སྨོན་ལམ་བཏབ་བོ། །
དེ་ནས་སྟོན་པ་འཁོར་བཅས་གཡས་རུ་གཙང་པོའི་བརྒྱུད་ནས་ཀོང་པོའི་བར་དུ་ཕེབས་ཤིང་། ཀོང་ཡུལ་དུ་བོན་རི་ཞེས་བྱ་བར་བྱིན་གྱིས་བརླབས་ཏེ་བོད་ཀྱི་འགྲོ་བ་རྣམས་ཀྱི་དད་འདུན་མོས་པའི་རྟེན་དུ་མཛད་དོ། །དེ་ཡང་བོད་ཡུལ་དུ་བོན་གྱི་བསྟན་པ་དང་། དེ་རྒྱུད་ལྡན་གྱི་གང་ཟག་ལ་འགྱུར་ལྡོག་སྣ་ཚོགས་བྱུང་བར་བརྟེན། ཀོང་ཡུལ་བོན་རི་འདི་ཉིད་ཀྱང་སྔར་གྱི་གནའ་གཏམ་ལྟ་བུ་ལས། དངོས་ཀྱི་སྤྱོད་ཡུལ་དུ་མེད་ཅིང་། བརྗེད་པ་ལྟ་བུ་གྱུར་ནས་ལོ་དུ་མ་འདས་པའི་རྗེས་སུ་གསང་བའི་རྣལ་འབྱོར་ཆེན་པོ་རི་པ་འབྲུག་གསས་ལ་རིག་འཛིན་མཁའ་འགྲོས་ལུང་བསྟན་ཐོབ་པ་དང་། སྐབས་ཀྱི་བོད་མིའི་བསོད་ནམས་ཀྱི་མཐུ་ལས་གནས་ཀྱི་སྒོ་ཕྱེས་པ་ཞེས་པ་སླར་ཡང་ངོས་འཛིན་བྱས། དེ་ཡང་གནས་རི་ལ་བསྐོར་བ་དང་། ཕྱག་མཆོད་བྱེད་པའི་སྲོལ་ཡོད་པ་ལ་རྟོག་ཚིག་ཇི་སྙེད་ཅིག་བཏགས་པ་འདུག་ཀྱང་བདེ་བར་གཤེགས་པའི་བྱིན་རླབས་ཞུགས་པའི་མཆོད་རྟེན་དང་སྐུ་གདུང་སྐུ་གཟུགས་སོགས་ལ་བཀུར་བསྟི་འོས་པའི་རྒྱུ་མཚན་དེས་འདིར་ཡང་མཚུངས་པར་སྦྱར་རོ། །རི་དེ་ཡི་དབྱིབས་དང་། ཡུལ་གྱི་ཆགས་ཚུལ་དཔེ་རིས་ལྟར་རོ། །
མདོ་ལས་བྱུང་ཚུལ་ལྟར༼གཟི་བརྗིད། ཉ༤༧༤༽༼གཟེར་མིག ཁ༦༦༤༽གནས་རི་འདི་ལ་སྟོན་པ་སངས་རྒྱས་རྒྱལ་བ་གཤེན་རབ་ཀྱི་བྱིན་གྱིས་བརླབས་པ་ཡིན་པར་བཤད་ཟིན་པ་ལྟར་ལ། དེ་ཙམ་གྱིས་མ་ཚད་བོན་པོ་རྣམས་ཀྱིས་ཕྱག་བཙལ་བ་དང་སྐོར་བ་བྱེད་པ་མཆོད་པ་འབུལ་བའི་གནས་གཞན་ཡང་ཡོད་དེ། སྨད་རྒྱ་ནག་གླང་ཆེན་འགྱིང་རི་འགྲོ་མགོན་ཚེ་དབང་རིག་འཛིན་གྱི་བྱིན་བརླབས་པ་དང་། རི་དེ་རྒྱ་ནག་ཁྲི་འདུ་ནས་ཨོ་མན་ཤན་དང་། དེའི་ཉེ་སར་ཡོད། ཨ་མདོའི་ཡུལ་དུ་དུང་རི་ལ། ཡི་དམ་དབལ་གསས་རྔམ་པས་བྱིན་གྱིས་བརླབས་པ་ཡིན་ཞིང་རི་འདི་ཨ་མདོ་ཤར་ཁོག་སུན་ཕན་ཤན་གྱི་འགྲམ་དུ་ཡོད། རྒྱལ་རོང་ཡུལ་དུ་དམུ་རྡོ་ལྷ་གཉན་ལ་ཡི་དམ་གཙོ་མཆོག་གིས་བྱིན་གྱིས་བརླབས་པ་ཡིན་ཞིང་རྒྱལ་རོང་བྲག་སྟེང་གི་ཉེ་འགྲམ་རབ་བརྟན་གྱི་ཡུལ་དུ་ཡོད། ཚ་བ་རོང་དུ་ཁ་བ་དཀར་པོ་ཞེས་པ་ཡི་དམ་དབལ་གསས་རྔམ་པའི་བྱིན་བརླབས་པ། རི་དེ་ནི་ཚ་བ་སྨད་ཤོད་པའི་སར་རྒྱ་མོ་དངུལ་ཆུའི་འགྲམ་དུ་ཡོད། སྟོད་མངའ་རིས་སུ་གངས་ཏི་སེ་ནི་ཡི་དམ་དབལ་ཆེན་གེ་ཁོད་ཀྱི་བྱིན་གྱིས་བརླབས་པའི་གནས་ཡིན་ཞིང་དེའི་ལོ་རྒྱུས་དང་དཀར་ཆག་ཞིབ་ཏུ་ཡོད་པ་རྣམས་ཕལ་ཆེར་དེང་དུས་རི་དེའི་ཕྱོགས་མཚམས་རྣམས་སུ་བཀའ་རྒྱུད་པའི་དགོན་ཆུང་འགའ་ཆགས་ཡོད་པ་རྣམས་ཀྱིས་དེའི་ལོ་རྒྱུས་དང་བསྲེས་ཏེ་བཤད་དོ། །
སྟོན་པ་བོད་དུ་བྱོན་དུས་གངས་ཏི་སེ་དང་། མཚོ་མ་པང་གཉིས་ཀྱི་འགྲམ་ནས་ཕེབས་ཤིང་། གངས་རིའི་ཕྱོགས་བཞིར་སྟོན་པའི་ཞབས་རྗེས་ཀྱང་ཡོད། ཞབས་ཀྱི་རྗེས་རྣམས་གཡས་བསྐོར་དུ་ཡོད་པས་ཆོས་པ་ཚོས་བློ་མ་བཟོད་ནས་གཡོན་དུ་སྤོས་ཡོད་པའི་ཚུལ་ཐོ་བས་བརྡུངས་ཏེ་བཟོས་འདུག གངས་རི་མཚོ་གཉིས་ཀྱི་ཕྱོགས་མཚམས་སུ་སྔར་བོན་གྱི་དགོན་སྡེ་ཆགས་པའི་ཤུལ་དང་ལོ་རྒྱུས་རགས་ཙམ་བསྡུས་པ་དཔལ་ཚུལ་གྱིས་བྲིས་པའི་དགོན་དེའི་ཆགས་དེབ་ཏུ་གསལ།
གཞན་ཡང་བོད་ཡུལ་དུ་གནས་དང་གནས་ཕྲན་ཇི་སྙེད་ཡོད་པ་རྣམས་ལ་བོད་མི་རྣམས་ཀྱིས་ཚེ་འདིའི་རྐྱེན་སེལ་བ་དང་། ཕྱི་མའི་སྒྲིབ་སྦྱང་དུ་དམིགས་ནས་དཀའ་བ་དུ་མ་དང་དུ་ལེན་ནས་སྐོར་བ་བྱེད་པ་དང་། ཕྱག་བྱ་བ་དང་། མཆོད་པ་འབུལ་བར་བྱེད་དོ། །
༧སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེའི་གསུང་འབུམ་ཁ་དུམ་པ་ལས་བཤུས།
རྩོམ་པ་པོ།:tibetmonk སྤེལ་དུས།:2012-4-5 22:40:39
རྩོམ་པ་པོ། ཁྱུང་གི་ཤེས་རབ།
སངས་རྒྱས་བསྟན་པའི་རྩ་ལག་གང་ཡང་སེམས་ཀྱི་དཀྱིལ་དུ་འབེབ་པ་ཡི། །
ཡང་དག་ཆོས་ཚུལ་ཇི་བཞིན་འཛིན་པའི་དགེ་སྦྱོང་རྒས་པོ་སུ་ཡིན་པ། །
ལྕག་དམར་སྐམ་པས་འཐེན་དང་བཙིར་བའི་གནས་སུ་ནམ་ཡང་མི་འོས་པས། །
རང་རང་སོ་སོའི་ས་རུ་བཞུག་ལ་སེམས་ཀྱི་བཟོད་པ་ཡངས་པར་མཛོད། །
གདུལ་བྱ་འདུལ་བའི་སྔོན་འགྲོའི་ཐོག་མར་རང་གི་རྒྱུད་འདི་མ་ཐུལ་ན། །
མིག་དང་རྣ་བ་ཚད་ལྡན་ཡོད་ན་གཞན་གྱི་འགྲོ་བ་ཐུལ་ཐབས་ཅི། །
རྫོགས་པའི་སངས་རྒྱས་སངས་རྒྱས་ས་རུ་མངོན་པར་གཤེགས་པ་གང་དེ་ཡི། །
དཀའ་བའི་བརྟུལ་ཤུགས་དང་དུ་བླང་བ་་ཚུལ་འདི་ཡིད་ལ་སོམ་མཛོད་དང་། །
རྒྱལ་གཤེན་ཆེན་པོ་རང་གི་ངོ་རུ་དགོས་གལ་ཏིལ་ཙམ་མེད་བཞིན་དུ། །
ཆེན་པོའི་རྒྱལ་སྲིད་གཅེས་པའི་བུ་ཚ་བརྩེ་བའི་བཙུན་མོ་མ་ལུས་པ། །
དུག་སྦྲུལ་ནག་པོའི་གཟེབ་བཞིན་དོར་ནས་བཀད་སའི་ཐང་ལ་གཟིམ་སོང་བ། །
ཞར་ར་མིན་ན་འདི་ལ་ལྟོས་ཀྱཻ་འོན་པ་མིན་ན་དེ་ལ་ཉོན། །
མཉམ་མེད་བླ་མའི་ཕྱི་ཡི་ཚུལ་དེ་ར་མ་ལུག་གི་ཟླ་རུ་བསྒྱུར། །
ཁྲི་གཙུག་རྒྱལ་བའི་ནང་གི་ཁྲིམས་དེ་ཚུལ་འཆོས་ཟོབ་ཀྱི་མཛེས་མཚོན་བྱེད། །
དད་པས་ཕྱུག་པའི་བླུན་རྨོངས་འབུམ་གྱི་དངུལ་ཆུའི་ཐིགས་པའི་ཁྲི་འཕང་རྩེར། །
གཙུག་ན་ཟླ་བའི་ཟོལ་གྱི་འགྱིང་གང་མིག་དང་རྣ་བ་འདི་རུ་གཏོད། །
སངས་རྒྱས་བསྟན་པའི་མིང་གི་སྙན་པ་ཁྱོད་ལ་མཁོ་བའི་དངོས་ཟོག་ཞིག །
བླུན་རྨོངས་འབུམ་གྱི་བརྟགས་དཔྱད་མེད་པ་དེ་ཉིད་བྲིན་པའི་འཁོར་ཡུག་ཅིག །
དབྱར་རྩ་དགུན་འབུའི་འཕེལ་ཁ་རྒྱས་པ་གཉིས་ཀར་དགོས་པའི་ཆ་རྐྱེན་ཞིག །
ཁོར་ཡུག་འདི་ཡི་གར་སྟེག་ཐོག་ནས་བླ་མའི་འཁྲབ་སྟོན་མིག་ལ་ཟུག །
རྣ་ཐོས་ཞིག་ལ་རིག་གསར་སྟ་རེས་བསྟན་པ་བཤིག་ཅེས་གྲགས་ནའང་། །
མིག་དང་རྣ་བའི་ཡུལ་དུ་གྱུར་པའི་སངས་རྒྱས་བསྟན་པའི་རྩ་ཧེ་ཙམ། །
བཅད་ཅིང་བཏུབ་པའི་གནས་ཚུལ་ཙམ་ལས་བསྟན་པའི་སྙིང་པོ་བཤིག་ཐབས་བྲལ། །
བསླབ་གསུམ་བསྟན་པའི་ཉིང་ཁུ་འདི་ཚོ་ཁྲོག་བརླག་བཏང་བ་བསྟན་བཤིག་དངོས། །
སྐུ་ཤ་རློན་པའི་སངས་རྒྱས་འདི་ཚོ་སྐུ་བསོད་ཤིན་ཏུ་བརྒྱག་ཆེ་བས། །
ཉམས་དང་རྟོགས་པའི་ཡོན་ཏན་དགོས་ན་ཁྱོད་ལ་སྦལ་པའི་སྤུ་བས་མོད། །
མདོ་སྔགས་སེམས་ཀྱི་རིག་གནས་མཁོ་སྐབས་ཁྱོད་ནི་ཀ་དག་སྟོང་རྐྱང་ཞིག །
ལོག་འཚོ་ལྔ་ཡི་འཚོ་ཐབས་སྒྲུབ་སྐབས་ཁྱོད་ནི་ལྷུན་འགྲུབ་དངོས་བདེན་ཞིག །
གཤེན་སྲས་ལྷ་རྗེས་བོང་བུ་ཁྲིད་ནས་མ་སྲིང་མཁའ་འགྲོའི་རྗེས་སུ་སོང་། །
དམུ་གཤེན་ཉི་མ་རྒོད་ལ་བརྫུས་ཏེ་རྒྱལ་མོ་རོང་པའི་ཡུལ་ལ་བྱོན། །
བདག་ཉིད་ཆེན་མོ་རྣ་ལོ་ཁྲིད་ནས་གཅེས་པའི་མ་ལོ་འཐུག་ཏུ་ཕེབས། །
ཁྱུང་པོ་བཟོ་པ་ཕྱག་མཁར་བརྟེན་ནས་འཛམ་གླིང་ཡུལ་ཁམས་བསྐོར་ཞེས་གྲགས། །
ཉེར་གཅིག་དུས་རབས་གསར་པའི་འགོ་འདིར་ཚན་རྩལ་རིག་པ་འཕེལ་ཆེ་བས། །
སྐལ་པ་སྐད་ཅིག་སྐད་ཅིག་སྐལ་པ་སྒྱུར་བའི་ངོ་མཚར་མངོན་བསྟན་སྐབས། །
རིན་པོ་ཆེ་ཚོས་v8བཏོང་སོང་མགོ་ཟླུམ་ཚོགས་ཀྱི་སྦག་རྟ་ཁྱེར། །
ངོ་མཚར་ཆེ་བའི་གོམ་འགྲོས་འདི་ནི་འགོག་ཐབས་བྲལ་བའི་དུས་བབ་ཅིག །
དམུ་རྒྱལ་གཤེན་དང་རྒྱལ་བ་གཉིས་པ་རྫུལ་འཕྲུལ་བར་སྣང་མཁའ་ལ་འགྲེན། །
མཛད་རྗེས་སྣང་བ་དཀར་པོའི་དཔལ་ཡོན་གཅིག་བས་གཅིག་ཉིད་ལེགས་པའི་ཚུལ། །
དེང་གི་དུས་ན་བླ་ཤར་འགའ་རེས་ཆིབ་འཁོར་མིང་བྱང་ཆེ་ཆུང་འགྲན། །
ཚེ་འདས་ཕོ་མོའི་དཀོར་ཟས་བསམ་ན་གཅིག་བས་གཅིག་ཉིད་ཨ་ཙ་མ། །
ཕ་རོལ་གནས་སུ་ཕ་རྒན་འཁྱམ་པའི་ར་མདའ་ཁྱེད་ལ་བཅོལ་བའི་དུས། །
མ་གིས་གནས་སུ་མ་རྒན་སོང་ཚེ་རྗེས་གཅོད་ཁྱེད་ལ་ཞུས་པའི་སྐབས། །
གངས་ཅན་བོད་པའི་སེམས་ཀྱི་ཕུག་དེར་ཇི་འདྲའི་ཡིད་ཆེས་གཙང་མ་ཞིག
མཆོད་གནས་ཁྱེད་ཀྱི་སེམས་ཀྱི་གསང་མཆོག་གསལ་བརྟེན་དག་གསུམ་སུ་ཡི་དཔོག །
སྡེ་སྣོད་ཀླུ་དབང་རོལ་པའི་གཞུང་ལ་སློབ་ལ་བརྩོན་པའི་ལོ་རྒྱུས་མེད། །
རྣམ་འབྱེད་ཤེས་རབ་བསླབ་པ་མེད་པས་རྒྱུ་མེད་འབྲས་བུ་ག་ནས་ཡོང་། །
ཤེས་རབ་མེད་པའི་བློ་ཕུག་གཏད་སའི་ཏིང་ངེ་འཛིན་ཞིག་འོང་དོན་ཅི། །
ཏིང་འཛིན་མེད་པས་དེ་ཉིད་ཆགས་སའི་ཚུལ་ཁྲིམས་བསླབ་པ་ལྟ་ཅི་ཞིག །
དེ་ལྟར་དེ་བཞིན་རྒྱུ་མ་ཕུ་འདེད་ཕྲ་ཞིང་ཞིབ་པས་དཔྱད་ཙམ་ན། །
བསླབ་གསུམ་བསྟན་པའི་སྙིང་པོ་ངོ་མ་ཤིན་ཏུ་ཉམས་ཐག་གྱུར་ནའང་། །
ཁ་དཀར་རྐྱང་བས་མགོ་འཕང་ལོས་མཐོ་ཉིད་ཀྱི་སྒུལ་ཤུགས་གཅིག་པུ་ཏེ། །
བརྒྱ་ལོ་དམར་པོའི་དབང་སྒྱུར་འཁོར་ལོ་རྔམ་ཁ་ཤིན་ཏུ་མཐོ་བས་སོ། །
མཉམ་མེད་བླ་མ་སྙིང་ཁམས་ཆུང་བས་གྲུམ་རྩེའི་སྟེང་དུ་སྡོད་མ་ཕོད། །
རྗེས་བསྲུང་ཁྲིམས་ཀྱི་བཅའ་བ་མཛད་ཅིང་རྗེས་འཇུག་ཚོ་ཀྱང་མ་འདུག་གསུང་། །
དིང་གི་དུས་ན་བླ་ཤར་འདི་ཚོ་སྐུ་བསོད་ཤིན་ཏུ་བརྒྱག་ཆེ་བས། །
འབུམ་ཕྲག་དུ་མའི་གདན་གྱི་སྟེང་དུ་སྣང་དག་མེད་པར་ལིང་ལིང་ལིང་། །
འདོད་པའི་དཔལ་ཀུན་ལུས་སེམས་ཡུལ་ལ་གང་འདོད་བྲིན་ལ་ཚོད་བཀག་མེད། །
མཁས་དང་གྲུབ་པའི་རྒྱུ་རྐྱེན་ཙམ་ལ་སེམས་ཀྱི་གཏིང་ནས་རྨུག་པར་གྱུར། །
སྤྱན་ཟུང་ཁྲ་མོས་འཚོ་ས་དང་ནི་དམར་པོ་ལྕེ་ཡི་ལྡེབ་ས་ལ། །
ཆིབ་འཕྲུལ་བཟང་ངན་ཁོ་ནར་གཏམ་འདི་སྙིང་ལ་གཟན་པའི་སྐྱུག་ནད་ཅིག །
རྒྱལ་བ་གཤེན་གྱི་བསྟན་པའི་སྙིང་པོ་བསླབ་པ་གསུམ་གྱི་ཉམས་ལེན་ཞིག །
དེ་ཉིད་ཇི་བཞིན་མཁྱེན་པའི་ཆེད་དུ་སྡེ་སྣོད་གསུམ་ལ་སློབ་སྦྱོང་ཞིག །
རང་ལ་ལྟོས་ཏེ་་མེད་ཐབས་མེད་པའི་ཐོས་གསུམ་སྒོམ་པའི་ཆེད་སྦྱོང་ཞིག །
གཞན་གྱི་ངོ་ལ་དགོས་གལ་ཆེ་བའི་འཆད་རྩོད་རྩོམ་པའི་མཛད་པ་ཞིག །
འཁྲུལ་པ་དང་ནི་སྣང་བ་འདི་ཀུན་ཞིག་རྒྱུའི་དངོས་པོ་དངོས་ཡིན་ཀྱང་། །
ཁྱོད་ལ་ཞིག་པའི་ཞིག་པ་བཞི་པོ་མེད་ན་ཆག་སྒོ་ཆེན་པོ་སྟེ། །
རྫོགས་སངས་རྒྱས་པའི་ཐུགས་ཀྱི་དེ་ཉིད་བལྟ་བའི་མིག་དབང་ལོང་བ་དང་། །
བླ་ཆེན་དྲན་པའི་གསུང་གི་གསང་བ་གོ་བའི་རྣ་བ་འོན་པས་སོ། །
ཨ་སྙན་རྫོགས་གསུམ་བླ་མའི་རྣམ་ཐར་ཡང་ཡང་ཀློག་ཅིང་ཉན་ཐེང་རེར། །
ཡོངས་འཛིན་བླ་མའི་ཕྱི་ནང་གསང་བའི་མཛད་རྗེས་ཡིད་ལ་འཁོར་ཐེང་རེར། །
ཡལ་འདབ་ལྔ་པ་གུས་པའི་ཕྱག་རྒྱ་དབང་མེད་བྲང་གི་ཐད་དུ་ཤོར། །
དད་མོས་གངས་དཀར་ཞུ་བའི་ཆབ་ཀྱི་བྲང་གི་བཞི་མདོ་བརླན་པར་བྱས། །
ཁ་ཁོག་བར་ལ་བསྐལ་བརྒྱས་ཆོད་པའི་ཨོ་ཟོོབ་ཅན་གྱི་སྟོན་ཆེན་དང་། །
སྒོར་མོ་་སྒྲུབ་ལ་ཀུན་རྟོག་རི་མོ་སུ་ལས་མཁས་པའི་བླ་སྤྲུལ་ཚོའི། །
ཕྱི་ནང་གསང་བའི་དེ་ཉིད་མཐོང་བས་སྣ་སྟེང་གཉེར་མ་འདུ་བཞིན་ཡོད། །
ཁྱུང་གི་ཤེས་རབ་མྱལ་བར་ལྷུང་ཡང་ཁྱེད་ཚོས་སྐྱོབ་པའི་རེ་བ་མེད། །
འཇའ་ལུས་ཉེར་བཞིའི་རྟོགས་པའི་རྒྱལ་ཚབ་དུས་ཚིགས་འདི་ལ་སུ་ཡི་བྱེད་?
མེ་སྟོན་ཡབ་སྲས་སྒྲུབ་པའི་རྒྱལ་མཚན་གསས་མཁར་མཐོ་པོ་སུ་ལ་བཙུག་?
འཇའ་ལུས་ཡབ་སྲས་དོན་རྒྱུད་རྟོགས་པ་སྐལ་ལྡན་སྐྱེ་བུ་སུ་ཡི་འཛིན་?
འདི་འདྲའི་དྲི་རྟགས་ཚ་བོ་རེ་ལ་ལན་གྱི་ཟླ་རུ་མགོ་བོ་གུག །
རང་གཞན་གཉིས་ཀྱི་ཉམས་བཙའི་ཆེད་དུ་སློབ་གཉེར་གནང་ན་དགའ་བ་ལྭ། །
གཡུང་དྲུང་བོན་གྱི་སྙིང་པོ་ངོ་མ་རྫོགས་ཆེན་མཐོང་ན་སྐྱིད་པ་ལྭ། །
རྫོགས་སངས་རྒྱས་ཀྱི་བསྟན་པའི་འབབ་སོ་སེམས་ཐོག་ཡོད་ན་འཐད་པ་ལྭ། །
མིག་དང་རྣ་བའི་ཡུལ་དུ་གྱུར་པ་བསྟན་པར་བཟུང་ན་འཁྲུལ་ཚབ་ལྭ། །
འདི་དང་ཕྱི་མའི་སྐྱེ་རབ་ཀུན་ཏུ་མི་ལུས་རིན་ཆེན་ཐོབ་སྲིད་པས། །
དེ་དང་ད་ལྟའི་གནས་སྐབས་ཀུན་ཏུ་བཤེས་གཉེན་དག་དང་འཕྲེད་པའི་ཚེ། །
དེ་ཡི་ཕྱི་ནང་གསང་བའི་གནས་ལ་དཔྱད་པ་ཞིབ་མོས་བཅར་བ་ལས། །
རྨོངས་པའི་ཕྱག་རྒྱ་བྲང་ཁར་ཟུམ་སྟེ་མགོ་བོ་རང་གར་མ་སྒུར་ཅིག །
གཟུ་བོར་གནས་པའི་སེམས་ཀྱི་དཀྱིལ་དུ་སྙན་པ་རྣ་བའི་བུ་་རམ་ཡིན། །
མཚོང་ཅན་སྙིང་གི་རྣག་ཐུམ་དེ་ལ་སྦྲིད་སྨན་མེད་པའི་བཤའ་བཅོས་ཡིན། །
རྩོམ་པ་པོ་ཡི་སེམས་ཀྱི་ན་ཟུག་དབང་མེད་ཤོར་བའི་སྐད་ངན་ཡིན། །
ཀློག་མཁན་རྣམ་པས་རྫི་མ་འཕེན་བཞིན་མགོ་བོ་འགིག་ན་འགྲིག་པ་ཡིན། །
དུས་པོ་ཆེ་དེ་རིང་པོ་མི་ཐོག་ཉིད་ཀྱི་དབུ་ཐོག་ཕེབས་པའི་ཚེ། །
ལྟོས་བཅས་མང་པོའི་ལན་ཆགས་དང་བཅས་ཕེབས་བསུའི་རུ་ལྟར་བསྒྲིག་པའི་སྐབས། །
རྒྱུ་འབྲས་བདེན་པའི་རྒྱལ་མོ་འཁྲོས་པའི་འབྲི་ཚུག་སྤྱན་གྱི་གཅེར་བའི་དུས། །
བསླུ་བ་མེད་པའི་དཀོན་མཆོག་གསུམ་པོས་ཁྱོད་ལ་ཐེངས་ཅིག་སྲུང་གྱུར་ཅིག །
ཁམས་པའི་ཁ་ལག་རྩུབ་ཐལ་ཆེ་བའི་གྱ་གྱུ་མེད་པའི་ཐད་ཀར་དང་། །
རྩོམ་འདིའི་གཤིས་ལ་སྤྲེལ་ལག་ངོ་དགའི་དྲིས་མས་རིང་ནས་བཏང་བ་གཉིས། །
ལྷན་ཅིག་འཛོམ་པའི་ཚིག་གི་སྦྱོར་བས་ཉིད་ལ་གུ་ཡངས་མ་བཏང་བ། །
རྩོམ་པ་པོ་བས་སེམས་ཀྱི་ཚོར་འདུ་དབལ་ཁ་བཙན་པའི་དབང་གིས་སོ། །
སྤྱི་འཚོགས་འཚོ་བའི་སྣང་ཚུལ་ངོ་མ་རྩོམ་གྱི་སྲོག་རྩ་བཟུང་བྱས་ཏེ། །
གོ་སླ་སྦྱོར་བདེའི་ངག་གི་རིག་བྱེད་འབུར་དུ་ཐོན་པའི་ཚུག་ཀ་ཡི། །
བརྗོད་བྱ་གང་དེའི་སྟོང་སྟབས་ཕྲ་མོ་ཡིད་ལ་ཝ་ལེར་འཆར་བཅུག་པའི། །
རྩོམ་གྱི་རིན་ཐང་ཅུང་ཙམ་མཆིས་ན་ཀློག་པ་པོ་ལ་མཆོད་པ་ཡིན། །
ང་ཚོའི་སྐྱབས་མགོན་རིན་པོ་ཆེ་སོགས་འཇམ་རྒུ་གཏམ་སྙན་ཕར་བཅུར་ནས། །
མཆོག་ལ་ཞུ་དག་བཏང་བའི་དྲང་གཏམ་ཐད་དཀར་མཛུབ་མོ་ཀེར་བའི་ཚེ། །
དཀར་གསལ་ཞལ་རས་ཟླ་བའི་འཁོར་ལོ་རགྟའི་མདངས་ཀྱི་འཆུད་གྱུར་ན། །
གནོང་འགྱོད་འོ་མཚོ་དཀར་མོའི་ཆབ་ཀྱི་སླར་ཡང་དག་ཚངས་བྱ་འདོད་མེད། །
༼ཧི་མ་ལ་ཡའི་བོན༽དྲ་ཚིགས་ལས་བཤུས།
རྩོམ་པ་པོ།:tibetmonk སྤེལ་དུས།:2012-4-5 10:38:47
རྩོམ་པ་པོ། དགེ་འདུན་ཆོས་འཕེལ།
ཀ་ལི་ཀ་ཏ་བལ་ཡུལ་པེ་ཅིང་དང་། །
ཁ་བ་ཅན་གྱི་གྲོང་ཁྱེར་ལྷ་ས་སོགས། །
ག་ས་གང་དུ་ཡོད་པའི་མི་འདི་རྣམས། །
ང་ཡིས་བལྟས་ན་རང་བཞིན་གཅིག་པར་མཐོང་། །
ཅ་ཅོ་འུར་ཟིང་ཕྱོགས་ལ་མི་དགའ་ཞིང་། །
ཆ་ལུགས་ཞི་དུལ་གནང་བ་ཁོང་ཚོ་ཡང་། །
ཇ་མར་གོས་དང་པད་ཤག་མཐོང་བའི་ཚེ། །
ཉ་པ་རྒད་པོའི་སེམས་དང་ཁྱད་མི་འདུག །
ཏ་རེན་སྐུ་དྲག་ངོ་བསྟོད་གཏམ་ལ་དགའ། །
ཐ་མལ་མི་རྣམས་གཡོ་དང་རྒྱུ་ལ་དགའ། །
ད་ལྟའི་ཕལ་ཆེར་ཐ་མལ་ཆང་ལ་དགའ། །
པ་ཕ་ཨ་མའི་ཕྱོགས་ལ་ཞེན་པ་དང་། །
ཕ་རོལ་རིགས་མ་མཐུན་ལ་སྡང་བ་སོགས། །
བ་ལང་དང་ནི་རང་རེའི་མི་རྣམས་ཀྱི། །
མ་བཅོས་སེམས་ཀྱི་རྒྱུ་དག་གཅིག་པར་མཐོང་། །
ཙ་རིའི་གནས་སྐོར་བྱེད་པ་མིང་གི་དོན། །
ཚ་གྲང་དཀའ་ཐུབ་བྱེད་པ་ལྟོ་ཡི་དོན། །
ཛ་ཡའི་གསུང་རབ་ཀློག་པ་ཡོན་གྱི་དོན། །
ཝ་ལེར་བསམ་ན་ཐམས་ཅད་ནོར་གྱི་དོན། །
ཞྭ་མོ་ཆོས་གོས་བ་དན་བླ་བྲེ་དང་། །
ཟ་རྒྱུ་འཐུང་རྒྱུའི་མཆོད་པ་ཚོགས་འཁོར་སོགས། །
འ་ཅག་རྣམས་ཀྱིས་ཅི་དང་ཅི་བྱེད་པ། །
ཡ་མཚན་ལྟད་མོ་ཙམ་ལས་གཞན་མ་མཐོང་། །
ར་ཁང་ཁྱི་ཁང་ནང་དུ་སླེབས་པ་བཞིན། །
ལ་ལུང་གང་ན་བདེ་སྐྱིད་མི་འདུག་ཀྱང་། །
ཤ་ཁྲག་རྒྱུ་མའི་ལུས་འདི་མ་འཇིག་བར། །
ས་སྟེང་འདི་རུ་མི་འདོད་ཀ་མེད་ལགས། །
ཧ་ཅང་དྲང་པོར་བཤད་པ་དེ་འདྲ་སྟེ། །
ཨ་ཙི་གཞན་ཚོ་ཚིག་པ་ཟ་ལས་ཆེ། །
ཆོས་གྲོགས་དྲ་བ་ལས་བཤུས།
རྩོམ་པ་པོ།:tibetmonk སྤེལ་དུས།:2012-4-5 0:34:12
རྩོམ་པ་པོ། རྒྱལ་མོ་འབྲུག་པ།
དེ་ཡང་འདིར་གཅིག་གྱུར་གྱི་བོད་ཆེན་པོའི་རྒྱལ་ཁབ་མ་ཚུགས་གོང་ལ་བོད་ཡུལ་ན་གནས་པའི་རྒྱལ་ཕྲན་ཟུར་བ་འགའ་ཞིག་གི་ཚུལ་ཇི་ལྟར་ཡིན་པ་ཅུང་ཟད་གླེང་ན།སྔོན་ཆད་རྒྱའི་གནའ་རབས་ཀྱི་ཡིག་ཆ་དང་ལོ་རྒྱུས་རྣམས་སུ་མདོ་དབུས་མཐོ་སྒང་གི་གནའ་བོའི་རིགས་རྒྱུད་དག་ལ་སྤྱི་མིང་དུ་ཆྰང་ཞེས་འབོད་སྲོལ་དར་ལ།དེ་ལས་འཕྲོས་ཏེ་མདོ་དབུས་ཡུལ་གྲུ་ཀུན་གྱི་བོད་མིའི་འཚོ་བ་དང་མི་སྡེ་རྣམས་ལའང་ཆྰང་གི་ཚོ་བ་དང་ཆྰང་གི་མི་སྡེ་ཞེས་ཆྰང་བྱ་བའི་ཐ་སྙད་ཁོ་ནས་སྦྱར་ཞིང་།ཐ་ན་བོད་ཆེན་པོའི་སྲོག་ཤིང་ལྟ་བུའི་ཡར་ཀླུང་གི་སྤུར་རྒྱལ་ཚོ་བ་ལའང་བྷོད་ཆྰང་ཞེས་འབོད་བཞིན་མཆིས་པས།རྒྱ་རིགས་མཁས་པ་ཚང་མས་བོད་ཀྱི་རིགས་རྒྱུད་ནི་ཆྰང་ལས་ལོགས་སུ་བཀར་བ་ལྟ་བུ་ཞིག་སྒྲོག་བཞིན་འདུག་པ་ལ།རང་རེའི་མཁས་པ་མང་བོ་ཞིག་གིས་འདོད་པ་དེར་མི་འཐད་པའི་རྣམ་འགྱུར་འཛིན་ཡང་རིག་གཞུང་ཐད་དགག་གཞག་གི་སྤྲོས་པ་བཀོད་ཡོད་པ་ད་སྔ་ཉུང་བས།དེ་ཡང་མཐའ་གཅིག་ཏུ་སྙན་ལ་གཟོན་དགོས་པའི་རྒྱུ་མཚན་ཆེར་མི་ལྡན་སྙམ་སྟེ།དེ་ལ་ང་ཚོས་འདིར་བསམ་བློ་ཅུང་ཟད་ཅིག་བཏང་ན་བློ་ངོར་འབབ་ཐུབ་པའི་གནས་ལུགས་ཤིག་ཀྱང་ཡོད་སྲིད།སྤྱིར་མི་རིགས་གང་དང་གང་ཡིན་རུང་ཕལ་ཆེ་བར་རང་གིས་འཛིན་པའི་མིང་དང་གཞན་གྱིས་འབོད་པའི་མིང་སྟེ་རིགས་གཉིས་མཆིས་ཤིང་།ཕྱི་མ་ལའང་རིགས་སོ་སོར་རང་རང་གི་འབོད་སྲོལ་མི་གཅིག་པ་སྣ་ཚོགས་ཤིག་ཡོད་པ་བཞིན་དུ་འདིར་ཆྰང་ཞེས་པའང་རྒྱའི་སྔ་རབས་ཡིག་ཚང་དུ་གནའ་བོའི་བོད་མི་སྤྱིའི་ཡབ་མེས་ལ་འབོད་པའི་མིང་ཞིག་ཏུ་གྲུབ་པ་ཙམ་ལས་བོད་རང་གིས་འཛིན་པའི་སྤྱི་མིང་ནི་མ་ཡིན།དེའང་ཐོག་མར་སྔོན་ཐོས་གཙོར་བཟུང་གི་ཚུལ་དུ་རྒྱའི་ཡི་གེར་བཀོད་པ་ཁོ་ནར་བརྟག་དཔྱད་མི་བྱེད་པ།ཆྰང་བྱ་བ་ཅི་ཞིག་ཡིན་པ་བཅས་ཀྱི་ཐད་དུ་བརྟག་ཅིང་དཔྱད་པས་ན།ད་གཟོད་ཆྰང་དང་བོད་བར་གྱི་འབྲེལ་བ་དང་མིང་འདིའི་གདོད་མའི་རྣམ་པ་ལེགས་པར་རྟོགས་ནུས་སྙམ།ཡིན་ན་ཡང་ད་སྔ་རང་རེ་བོད་ཀྱི་དེབ་ཐེར་རྣམས་སུ་ཆྰང་བྱ་བའི་ཐ་སྙད་དང་དེའི་གོ་དོན་ནམ་རྒྱུ་མཚན་སོགས་བཀོད་པ་གསལ་བོ་ཞིག་མ་མཐོང་བས་འདིར་ཁུངས་བཙན་ཞིག་འགོད་པར་མི་ནུས་མོད།འོན་ཀྱང་ཕྱིས་ཀྱི་མཁས་པ་དང་དེང་གི་དཔྱོད་ལྡན་ལ་ལས་གནད་དོན་འདི་ལ་བསམ་གཞིགས་བགྱིས་ཡོད་པར་གཞི་བྱས་ཏེ་བརྟགས་ན།འགའ་ཞིག་གིས་ཆྰང་བྱ་བ་ནི་ཕྱོགས་ཀྱི་ཆ་ནས་བོད་སྐད་ཀྱི་བྱང་ཞེས་པའི་སྒྲ་ལས་བྱུང་བར་འདོད་ཀྱང་དེ་ནི་རིག་འདེད་ཙམ་དུ་ཟད་པས་དཔྱད་རིན་མེད་ཅིང་།ཡང་ཁ་ཤས་ཀྱིས་བོད་སྐད་ཀྱི་སྤྱང་ཟེར་བའི་སྒྲ་བསྒྱུར་ཡིན་པ་དང་།སྔོན་དུས་མ་སྤྱངས་སྤུན་དགུ་ཟེར་བ་ཕྱིས་སུ་མ་སངས་སུ་གྱུར་པའི་གོ་རིམ་སོགས་ཀྱི་སྒྲུབ་བྱེད་དུ་བཀོད་ཡོད་པ་མཐོང་ཞིང་།དེ་ཡང་རྒྱུ་མཚན་མེད་པ་ཞིག་མིན་ཏེ།སུམ་པ་ཆོས་འབྱུང་དུ་མདོ་སྨད་བསང་ཆུ་ལ་སྤྱང་ཆུ་དང་བསང་ཁོག་ལ་སྤྱང་ཁོག་ཞེས་བཀོད་པ་བཞིན་ནོ། ཡང་ལ་ལས་ཆྰང་བྱ་བ་བོད་ཀྱི་ཁྲོམ་ཞེས་པའི་དོན་ཡིན་པ་དང་།རྒྱུ་མཚན་ནི་སྔོན་ཆད་བོད་ཀྱི་རུས་རྒྱུད་ཚོ་ཁག་རེ་རེར་བླ་ཟོག་བཀུར་བའི་སྲོལ་ཡོད་པ་བཞིན་བོད་རང་གི་རུས་ཆེན་པོའི་ཡ་གྱལ་སྒ་ལྡོང་གི་རིགས་ཀྱི་བླ་ཟོག་ནི་ལུག་སྟེ་ཁྲོམ་ཡིན་པར་བཤད་ལ།དེའང་སྔོན་བརྡ་རྙིང་ལ་ཁྱོམ་ཞེས་བཀླགས་པས་དེ་ལས་སྒྲ་མཆེད་པར་འདོད་ཅིང་།དེར་མ་ཟད་རྒྱ་ཡིག་ཏུ་ཆྰང་གི་གོ་དོན་ཡང་ནུབ་ཕྱོགས་ཀྱི་ལུག་འཚོ་བའི་རིགས་ཞེས་དང་།དེ་མིན་ཆྰང་ཞེས་པའི་རྒྱའི་གནའ་བོའི་དཔེ་རིས་ཅན་གྱི་ཡི་གེའི་གཟུགས་ཀྱང་མིའི་མགོ་ན་ལུག་ཡོད་པ་ལྟ་བའི་དབྱིབས་བྲིས་ཡོད་ཚུལ་བཅས་སྒྲུབ་བྱེད་དུ་བཀོད་པ་དང་།ཡང་ཐང་ཡིག་གསར་རྙིང་དུ་ཐད་ཀར་འཇང་ཞེས་བསྒྱུར་བ་སོགས་མཁས་པ་དང་དཔྱོད་ལྡན་སོ་སོར་བཞེད་ལུགས་མི་མཐུན་པ་སྣ་ཚོགས་འབྱུང་ཡང་།རྩ་བའི་འདོད་ཚུལ་ནི་ཆྰང་བྱ་བའི་མིང་འདི་བོད་སྐད་ཀྱི་སྒྲ་གང་རུང་ཞིག་ལས་བྱུང་བར་བསམས་པ་དེ་གཅིག་མཐུན་དུ་སྣང་།དེ་ཡང་མཁས་པས་བཤད་ན་ཅི་ཡང་བདེན་ཞེས་པའི་རྗེས་སུ་འགྲོ་ནའང་།གང་ལྟར་ཆྰང་ཞེས་པའི་མིང་དེ་བོད་གནའ་བོའི་སྐད་གང་རུང་ཞིག་ལས་ཟུར་ཆག་སྟེ་བྱུང་བ་ནི་གདོན་མི་ཟ་ཞིང་།སྒོས་སུ་མིང་འདི་ཡང་ཐོག་མར་རྒྱ་རིགས་དང་ཉེ་བ་མདོ་སྨད་གཙོས་པའི་ཡུལ་སྡེའམ་ཚོ་བ་ངེས་ཅན་ཞིག་གི་མིང་ལས་བྱུང་སྟེ་ཁྱབ་ཇེ་ཆེར་སོང་བས་སྤྱི་མིང་དུ་ཐོགས་པར་སེམས་སོ། དེ་བཞིན་སྔོན་ཆད་མི་མང་བོ་ཞིག་གིས་གནའ་དུས་མདོ་དབུས་མཐོ་སྒང་དུ་མིའི་འགྲོ་མེད་པར་བསམས་པའི་ལུགས་ལྟར་བོད་རིགས་ནི་ཆྰང་ལས་ཆད་པ་དང་བོད་ཁུངས་ཆྰང་རིགས་ཡིན་འདོད་པའི་བཤད་རྒྱུན་དེ་ཅུང་ཟད་ཁྱབ་ཆེ་ནའང་།དེ་ལ་དེང་སང་ཚན་རིག་གི་བརྟག་དཔྱད་དང་སྒོས་སུ་གནའ་བརྟག་སློག་འདོན་གྱི་སྟེང་ནས་མདོ་དབུས་མཐོ་སྒང་དུ་དུས་སྔ་མོ་ཞིག་ནས་མིའི་འགྲོ་བ་ཡོད་པའི་དཔང་རྟགས་བསྙོན་མེད་པར་ར་སྤྲོད་བྱུང་བ་ནས་བཟུང་།ད་ལྟ་སྔར་གྱི་བོད་ཁུངས་ཆྰང་ཡིན་པར་འདོད་པའི་ལུགས་དེ་མགོ་མཇུག་ལྡོག་དགོས་པའི་འོས་ལ་བབས་ཤིང་།མདོ་དབུས་མཐོ་སྒང་གི་ཡུལ་མི་ནི་བོད་ཡིན་པ་མ་ཟད་ཆྰང་ཁུངས་ཀྱང་བོད་སྤྱིའི་རྒྱུད་ལ་ཐུག་པའི་ལྟ་བ་དེ་འཛིན་དགོས་སྙམ།དེ་ལྟར་ཆྰང་བྱ་བ་ནི་རྒྱས་བོད་མིའི་ཆ་ཤས་ཀྱི་མིང་ནས་སྤྱི་མིང་ལ་འདོད་པ་དེའང་རྒྱ་ལ་མཚོན་ན་བོད་ལ་ཆྰང་ཞེས་འབོད་སྲོལ་སྔ་བ་ཙམ་གྱིས་མ་དག་རྒྱུད་འབྱམས་སུ་གྲགས་པར་མངོན།དེ་ལྟར་གོང་གི་འདི་ལྟ་བུའི་མིང་རང་ངོས་ནས་འབྱུང་ཁུངས་ཀྱི་ཁྱད་པར་མེད་པ་དང་།བོད་རིགས་ནི་རང་ས་ནས་བྱུང་འཕེལ་ཡོང་བ་བཅས་པའི་རྒྱུ་མཚན་གྱི་སྒོ་ནས་ཆྰང་བྱ་བ་དེ་མི་རིགས་གཞན་ཞིག་ལ་གོ་བ་དང་བོད་ནི་དེའི་ནང་གསེས་ཀྱི་གྲུབ་ཆ་ལྟ་བུར་རྩི་བ་ནི་སྔ་ལབ་རྗེས་འབྲང་གི་ལུགས་ཙམ་དུ་ཟད་དོ།།
སྤྱིར་དེ་དག་ཀྱང་མིང་གི་འདོགས་ལུགས་ཀྱི་དབྱེ་བ་ཙམ་མ་གཏོགས་གདགས་གཞི་གཅིག་ཡིན་པ་དང་།དེས་མི་ཚད་མིང་དེ་ཡང་རྒྱ་ཡིས་ཚུར་བཏགས་པ་ཞིག་ཡིན་པ་བཅས་ཀྱི་དབྱེ་བ་ལེགས་པར་རྟོགས་ཚེ།གཞི་ནས་ཆྰང་ལ་བརྟག་དཔྱད་བྱ་བའི་སྡོམ་ཚིག་དེ་ལུགས་དང་མཐུན་པ་ཞིག་བཟོ་ཐུབ་ཅིང་།དེ་ལྟར་གནའ་སྔ་མོར་མདོ་དབུས་མཐོ་སྒང་གི་ཡུལ་མི་ལ་བོད་ཅེས་མི་འབོད་ཀྱང་ཡུལ་འདི་བོད་མིའི་མིན་ཟེར་མཁན་སུ་ཞི་ཡོད།འདི་ནི་ངོ་སྤྲོད་ཀྱི་ཚུལ་དུ་སྨྲས་པ་ཙམ་ལས་ཆྰང་གི་སྐོར་རྒྱས་པ་ཟུར་དུ་འབྲི་འོས་པས་མང་བོ་འབྲི་བར་མི་སྤྲོས་སོ།། དེ་ཡང་འདིར་རྩ་བའི་འབྱུང་ཁུངས་དང་ཁྱབ་ཁོངས་དབྱེ་བ་བཅས་ཀྱི་གནས་ཚུལ་ཤེས་ན་དེར་རྒྱས་ཆྰང་གི་ནང་ཚན་དུ་བཤད་པའི་ཚོ་བ་ཁག་ཀྱང་ངོས་འཛིན་དང་གོ་བ་ལེན་ཐུབ་ལ།དཔེར་ན་སྔོན་གྱི་རོང་ཆྰང་དང་སྡེ་ཆྰང་ངམ་ལྡོང་ཆྰང་བྱ་བ་སོགས་ནི་བོད་ཀྱི་གནའི་ཚོ་བ་ཁོ་ན་ལགས་ཤིང་།ཡང་ཕྱིས་ཀྱི་སུམ་པ་དང་ཞང་ཞུང་སོགས་ཀྱང་རྒྱ་ཡིག་ཏུ་ཆྰང་གི་ཁོངས་སུ་འདྲེན་པའི་རྒྱུ་མཚན་ཡང་གནད་དེ་དག་ལ་ཐུག་ཡོད་པ་ཤེས་པར་བྱ་ལ།དེ་མིན་དེང་སང་རང་རྒྱལ་ན་ཆྰང་རིགས་ཞེས་པ་དང་བོད་སྐད་དུ་འཇང་བྱ་བ་ནྰ་ཞིས་རིགས་སུ་འབོད་པ་རྣམས་ནི་སྐབས་བབ་གནའི་རྒྱ་ཡིག་གི་ཆྰང་དང་ཁྱད་པར་ཆེ་ལ་དབྱེ་བའང་དུ་མ་ཡོད་པ་ཤེས་སོ།མདོར་ན་ཆྰང་བོད་བར་གྱི་འབྲེལ་བ་ནི་མིང་གི་འབོད་ལུགས་ཀྱི་དབང་གིས་མ་གཏོགས་བོད་ཁུངས་ཆྰང་མ་ཡིན་ཏེ་ཆྰང་ཁུངས་བོད་(གནའ་བོའི་བོད་མི)ཡིན་པར་འདོད་དོ།།
རྩོམ་པ་པོ།:tibetmonk སྤེལ་དུས།:2012-4-4 10:37:03
བོད་ཀྱི་ལོ་རྒྱུས་གླེང་བའི་གཏམ།
མཚོ་སྔོན་བོད་སྐད་བརྙན་འཕྲིན་ཁང་གི་གླེང་སྟེགས་ལེ་ཚན་ཁང་གིས་ལོ་རྒྱུས་སྨྲ་བ་མཁས་དབང་སྡེ་རོང་ཚེ་རིང་དོན་གྲུབ་ལགས་ལ་བོད་ཀྱི་ལོ་རྒྱུས་སྐོར་ལ་བཅར་འདྲི་བྱས་པའི་བརྙན་གཟུགས།
མདོ་འཛིན་པ། ལྷ་དཔལ།
གདན་ཞུའི་སྐུ་མགྲོན། སྡེ་རོང་ཚེ་རིང་དོན་གྲུབ།
རྩོམ་པ་པོ།:tibetmonk སྤེལ་དུས།:2012-4-3 21:42:06
བསྭོ། དབོན་གསས་ལ་ཅི་ཆེ་ན། དབོན་གསས་ལ་ཐོད་དཀར་ཆེ། ཐོད་དཀར་ནི་སྤྲིན་ལྟར་འཁྲིགས། སྡོང་བ་ནི་གསས་དང་སྡོང་། འགྲོགས་པ་ཡང་གསས་དང་འགྲོགས། མགོན་པ་ཡང་གསས་ལ་མགོན། བཤམ་བཤམ་གྱི་མཆོད་པ་འབུལ། ངན་འདྲེས་ཀྱི་ནོངས་པ་མཐོལ། དབོན་གསས་ལ་ཅི་ཆེ་ན། དབོན་གསས་ལ་ཝེར་མ་ཆེ། ཝེར་མ་ནི་བུ་ཡུག་འཚུབ། སྡོང་བ་ནི་གསས་དང་སྡོང་། འགྲོགས་པ་ཡང་གསས་དང་འགྲོགས། མགོན་པ་ཡང་གསས་ལ་མགོན། བཤམ་བཤམ་གྱི་མཆོད་པ་འབུལ། ངན་འདྲེས་ཀྱི་ནོངས་པ་མཐོལ། རེས་འགའ་ནི་ཀློང་ན་རྒྱུ། གཟའ་སྐར་གྱི་བྱ་ར་བ། རེས་འགའ་ནི་ཟེར་མར་རྒྱུ། ཡག་ཉེས་ཀྱི་སྟང་མ་འཛིན། རེས་འགའ་ནི་དོགས་ལ་རྒྱུ། དབོན་གསས་ཀྱི་ལས་ལ་མྱུར། ཅོང་སེ་དང་སྤྲུལ་པ་ལ། གཞའ་ཚོན་ནི་ཅི་ལི་ལི། རྔ་ཤང་ནི་ཁྲོལ་ལོ་ལོ། སྤོས་དུད་ནི་ཐུ་ལུ་ལུ། ཕྱེ་མར་ནི་སིལ་ལི་ལི། ཡུ་ཏི་ནི་མེ་རེ་རེ། ཐུན་རྫས་ནི་ཐོ་རོ་རོ། སྣང་སྲིད་ཀྱི་ཝེར་མ་བརྔན། ངན་འདྲེས་ཀྱི་ནོངས་པ་མཐོལ། མུ་ཡེ་ཧ་ར་ཐིམ་ཐིམ་ཡེ་ཐུན་ཡ། སད་དོ་ཧྲོ་ཡོ་ཐིམ་ཡེ་ཐུན་ཡ། མདོས་ཁ་གསོ་ནས་གྲང་བསག་གོ།
དགོངས་གསོལ་ནི། བསྭོ། དགོངས་གསོལ་ནི་སུ་ལ་གསོལ་ན། དགོངས་གསོལ་ནི་གཤེན་ལ་གསོལ་ལོ། ལྷ་རྗེ་ནི་གཤེན་ལྷ་འོད་དཀར། སྲིད་རྗེ་ནི་སྟག་ལ་མེ་འབར། མྱི་རྗེ་ནི་གཤེན་རབ་མྱི་བོ། སྐུ་བཞུགས་པ་ཀློང་ན་བཞུགས་ཀྱང་། ཐུགས་དགོངས་པ་གསས་ལ་སལ་ལེ་ཡ། ཨ་དཀར་སལེ་འོད་ཨ་ཡཾ་བྲུཾ་འདུ། ཐིབ་རྨུག་གི་ཞ་ནག་ཕུད། གསལ་ས་ལེའི་མཐུ་ནུས་ཕོབ། དབོན་གསས་ནི་སད་དོ་ལ། ཤ་གཟུགས་ཀྱི་འདྲེན་ཆེ་བ། བླ་སྲོག་གིས་ཅི་རྡོ་སྟེ། ཡེ་སྲིད་ཀྱི་འདྲེན་པ་ནི། གཡུང་དྲུང་གི་ཀློང་ལ་ཐོབ། བྲུཾ་བྲུཾ་ཨ་ཡཾ་སལ་ལེ་སལ་ལེ་གསལ་སལ་ལེ་ཨཱོྃ་འདུ།
བསྭོ། སྟེང་གི་ལྷ་བསྙེན་ཏོ། དགུང་ཕྱི་བསྙེན་འཚལ་ན། དགུང་ནས་སྐྱོབ་མ་གྱིས། རྨུ་རྗེ་བསྙེན་ཏོ། གནམ་གྱི་འཇུ་ཐག་གྱིས། གུ་ལང་བསྙེན་ཏོ། སྲིད་པའི་རྟེན་ཕུར་གྱིས། བཙན་རྗེ་བསྙེན་ཏོ། རྒྱབ་ཀྱི་རྟེན་ས་གྱིས། ཐིས་རང་བསྙེན་ཏོ། མདུན་གྱི་སོ་ཁ་གྱིས། མ་མོ་བསྙེན་ཏོ། ཡག་ཁའི་རྗེ་འུ་གྱིས། དོགས་བདག་བསྙེན་ཏོ། གཞིས་ཀྱི་ཁ་འཛིན་གྱིས། གཉན་རྗེ་བསྙེན་ཏོ། ཞིང་ཁའི་ལོ་རྫི་གྱིས། ཀླུ་རྗེ་བསྙེན་ཏོ། མྱི་ཕྱུགས་སྲོག་ཀར་གྱིས། ཐོད་དཀར་བསྙེན་ཏོ། དབོན་གསས་བདུང་འཚོབ་ཀྱིས། ཝེར་མ་བསྙེན་ཏོ། བསམ་བསམ་ལག་ཏུ་སྤྲོད། མི་འབྲལ་གྲིབ་ལྟར་འགྲོགས། གསོན་པོ་བླ་ཚེ་བརྟན། གཤིན་པོ་གཤེད་དང་ཁྲོལ། རྒྱལ་ཁམས་བདེ་ལ་སྐྱིད། སྟོང་ཁམས་དར་ལ་རྒྱས། ཅི་བསམ་ལྷུན་གྱིས་འགྲུབ། བསྭོ་ཡཾ་ཨ་ཡཾ་འདུ།
སྲིད་པ་སྤྱི་སྐོང་སྣང་སྲིད་ཀྱི་མདོས་ཟབ་མོ། དབོན་གསས་ཐམས་ཅད་ཀྱི་སྲུང་བའི་གོ་ཁྲབ་གཤེན་ཆེན་པོ་གཅེ་འོད་ནས་རིམ་པར་བརྒྱུད་པ། སངས་པོ་ཁྲི་ན་ཁོད་བདག་གིས་ཡི་གེར་བཏབ་པ། ཞང་བོད་དབོན་གསས་བར་མ་ཆད་པས་མཐུ་ཐོན་པ། ཟབ་མོ་ཆིག་ཆོག་ནི་རྫོགས་སོ། ། མུ་ཙུག་སྨྲར་རོ། །
གསལ་བཤད། སྲིད་པ་སྤྱི་སྐོང་སྣང་སྲིད་སྤྱི་མདོས་ཞེས་པ་འདི་ནི། ལོ་རྒྱུས་ཆེས་རིང་བའི་བོན་གྱི་དཔེ་རྙིང་རྩ་ཆེན་ཞིག་དང་། བོད་རྒྱལ་སོ་གཅིག་པ་སྟག་རི་གཉན་གཟིགས་ཀྱི་སྐུ་གཤེན་སངས་པོ་ཁྲི་ན་ཁོད་ཀྱིས་ཡི་གེར་བཀོད་པ་གཏན་ཚིགས་སུ་ངེས་པས། དེང་རབས་བོད་ཀྱི་སློབ་གྲྭ་ཆེ་འབྲིང་གི་གཞོན་ནུ་བློ་གྲོས་ཅན་རྣམས་ཀྱི་མཐོང་ལམ་དུ་བསྟར་ན་ཕན་ཐོགས་ཆེ་བར་དམིགས་ཏེ། གུས་ཕྲན་པ་བདག་གིས་རང་ནུས་ཅི་ལྕོགས་ཀྱིས་མ་བསྐུལ་བའི་འགན་འཁྲི་དང་དུ་བླངས་ཏེ། འཚོལ་སྡུད་དང་བརྒྱུད་སྤྲོད་ཀྱི་བྱ་བ་སྤེལ་བ་འདི་ལ། མ་ཕྱི་ལག་བྲིས་ཀྱི་དབང་གིས་ཡི་གེ་ནོར་དོགས་ཀྱི་ཆ་ཅི་རིགས་ཤིག་མཆིས་ན་ཡང་། མ་དཔེ་ཇི་བཞིན་བཅོས་ལྷད་ཀྱིས་མ་གོས་པར་རང་སོར་བཞག་པ་ལས། སང་ལ་བསང་དང་། ཙང་ལ་གཙང་། ནོངས་པ་ཐོལ་ལ་མཐོལ་ཞེས་བཅོས་པ་ཙམ་དུ་ཟད་པ་ལ། འགྲིག་མིན་ལྟང་འཛིན་གྱི་དོན་ལ་བསམ་གཞིག་གནོངས་རོགས་ཞེས། རྒྱ་ཆེ་བའི་གཟིགས་མོ་བ་རྣམས་ཀྱི་ཐུགས་མོས་དང་མཐུན་པའི་དགེ་བ་དོན་ཡོད་དུ་སྨིན་པས་རེ་བ་སྙིང་ནས་ཞུ། ཟིན་བདག་པས།
རྩོམ་པ་པོ།:tibetmonk སྤེལ་དུས།:2012-4-3 11:19:21
བསྭོ་བསྭོ་བསྭོ། ཨ་ཕྱི་ནི་ནམ་གྱི་ལྷ། ཡང་ཕྱི་ནི་དགུང་རྒྱལ་མ། ཕྱི་ཀློང་གི་རྒྱལ་མོ་ཟེར། ནང་ཁམ་གྱི་བདག་མོ་ཟེར། དགའ་དགའ་ལ་མ་མ་འདྲ། སྡང་སྡང་ལ་གཤེད་མ་འདྲ། གཟའ་སྐར་གྱི་བདག་མོ་ཟེར། སྣང་སྲིད་ཀྱི་མདོས་ཀྱིས་བཀང་། ངན་དུག་གི་འདྲེ་བྱུང་ན། དགུང་རྒྱལ་མ་ནོངས་པས་མཐོལ། གདོན་བོན་གྱི་ཤེ་ཆུའི་སྐྱེམས། རྨུ་རྗེ་ཡང་ཅི་དགྱེས་ཏེ། ཡེ་སྲིད་ཀྱི་རྨུ་ཐག་ཅད། གཤེན་རབ་ནི་མཐུ་རེ་ཆེ། ཆད་པ་ལ་ཐུད་དུ་སྲིད། རྨུ་རྗེ་ནི་བཙད་པོ་ལ། སྣང་སྲིད་ཀྱི་མདོས་སྐྱེམས་འབུལ། ཤེ་ཆུ་ཡི་འདྲེ་བྱུང་ན། རྨུ་རྗེ་ལ་ནོངས་པ་མཐོལ། ཤེ་ཐུན་གྱི་མཆོད་པ་ལ། བདུད་རྗེ་ཡང་ཅི་དགྱེས་ཏེ། གཤེན་ལྷ་ལ་ནོངས་པ་མཐོལ། སྲོག་བདུད་ནི་ཆམ་ལ་ཕབ། གནག་ཕྱུགས་ཀྱི་གླུད་ཀྱིས་བརྔན། བླ་སྲོག་གི་འདྲེ་བྱུང་ན། གུ་ལང་ལ་ནོངས་པ་མཐོལ།
བསྭོ་བསྭོ་བསྭོ། བཙན་རྗེ་ནི་ཅི་ལ་དགྱེས། ཟ་བ་ནི་ཤ་ལ་རྔམ། འཐུང་བ་ནི་ཁྲག་ལ་ཧབ། ལེན་པ་ནི་སྲོག་དབུགས་ལེན། སྡོང་བ་ནི་བགེགས་དང་སྡོང་། འགྲོགས་པ་ནི་གཉན་དང་འགྲོགས། མགོན་པ་ནི་བཙན་བོན་མགོན། འཚེ་བ་ནི་གསས་ལ་འཚེ། གཤེན་རབ་ནི་མཐུ་བཙན་པས། ཛོ་དམར་ནི་གླད་ལ་གཟེར། སྲོག་ཐག་ནི་གཤེན་ལ་བཅོལ། ཐ་ཚིག་གི་ཡས་རྟགས་སྲིད། སྲོག་གླུད་ལ་ནམ་མཁས་བརྔན། དབུགས་གླུད་ལ་རླུང་གིས་བརྔན། དྲོད་གླུད་ལ་མར་མྱེས་བརྔན། ཁྲག་གླུད་ལ་ཆབ་ཀྱིས་བརྔན། ཤ་གླུད་ལ་ཁམ་པས་བརྔན། ཐུན་རྫས་ནི་འདི་བཤམ་ན། ངན་འདྲེས་ཀྱི་ནོངས་པ་མཐོལ། ཐིས་རང་ནི་ཅི་ལ་དགྱེས། ཟས་སུ་ནི་སྲོག་དབུགས་འགམ། གོས་སུ་ནི་པགས་དམར་འབུད། ལས་སུ་ནི་འཁྲུགས་རྩོད་སློང་། སྡོང་བ་ནི་སྲི་དང་སྡོང་། འགྲོགས་པ་ནི་བྱུར་དང་འགྲོགས། མགོན་པ་ནི་དུན་ཙེ་མགོན། འཚེ་བ་ནི་གཞོན་ལ་འཚེ། གཤེན་རབ་ནི་མཐུ་བཙན་པས། ཛོ་དམར་ནི་གླད་ལ་གཟེར། སྲོག་ཐག་ནི་གཤེན་ལ་བཅོལ། ཐ་ཚིག་གི་ཡས་རྟགས་སྲིད། ཟས་གླུད་ལ་གཏོར་མས་བརྔན། སྐོམ་གླུད་ལ་ཡུ་ཏིས་བརྔན། གོས་གླུད་ལ་དར་སྣས་བརྔན། ཐུན་རྫས་ནི་འདི་བཤམ་ན། ངན་འདྲེས་ཀྱི་ནོངས་པ་མཐོལ། མ་མོ་ནི་ཅི་ལ་དགྱེས། རྒྱུ་བ་ནི་ཀུན་ལ་རྒྱུ། ཟས་སུ་ནི་ཚེ་སྲོག་ཟ། སྐོམ་དུ་ནི་གསོན་ཁྲག་འཐུང་། མི་རྫུ་ནི་དགུ་རུ་རྫུ། སྤྲིན་གསེབ་ན་གློགས་ལ་རྫུ། ཐོག་སེར་དང་དལ་ཡམ་བཏང་། རྒྱལ་ཁམས་སུ་བྱག་མོར་རྫུ། རིམས་ནད་དང་ལྟས་ངན་འགྱེད། སྟོང་ཁམས་སུ་བདག་མོར་རྫུ། མྱི་ཁ་དང་འཁྲུགས་རྩོད་སློང་། སྡོང་བ་ནི་ཐན་དང་སྡོང་། འགྲོགས་པ་ནི་གདོན་དང་འགྲོགས། མགོན་པ་ནི་བསེ་རག་མགོན། འཚེ་བ་ནི་མྱི་ལ་འཚེ། གཤེན་རབ་ནི་མཐུ་བཙན་པས། ཛོ་དམར་ནི་གླད་ལ་གཟེར། སྲོག་ཐག་ནི་གཤེན་ལ་བཅོལ། ཐ་ཚིག་གི་ཡས་རྟགས་སྲིད། སྲོག་གླུད་ནི་དུན་ཙེའི་སྲོག ཚེ་གླུད་ཀྱང་དུན་ཙེ་སྲོག ཚེ་གླུད་ཀྱང་དུན་ཙེའི་ཚེ། ཁྲག་གླུད་ཀྱང་དུན་ཙེའི་ཁྲག ཐུན་རྫས་ནི་འདི་བཤམ་ན། ངན་འདྲེས་ཀྱི་ནོངས་པ་མཐོལ།
བསྭོ་བསྭོ་བསྭོ། དོགས་བདག་ནི་གཙང་སྦྲ་ཆེ། རྨེ་གཞོབ་ཀྱིས་སྐུ་རེ་མནོལ། དོགས་བདག་ནི་ལྷོད་བག་ཆེ། ཀུ་ཅོ་ཡིས་སྙན་རེ་བསུན། དོགས་བདག་ནི་བརྟན་རླིང་ཆེ། འཁྲུ་སློག་གིས་ཐུགས་རེ་དཀྲུགས། ཁྲོས་པ་ནི་འགའ་ལ་ཁྲོས། ཆད་པ་ནི་ཀུན་ལ་བཅད། གཤེན་རབ་ནི་མཐུ་བཙན་པས། སྡུམ་ཆེན་གྱི་ཡས་རྟགས་གནང་། དཀར་མངར་དང་འོ་ཞོས་མཆོད། དཀོར་ཆས་དང་མདོས་ཀྱིས་བརྔན། མནོལ་རྨུག་དང་འཁོན་འགྲས་བསང་། ངན་འདྲེས་ཀྱི་ནོངས་པ་མཐོལ། གཉན་རྗེ་ནི་བཀའ་རེ་གཉན། མྱི་འཁོན་གྱིས་གཉན་ལ་འཁོན། རི་རྨས་ཀྱིས་གཉན་ལ་རྨས། རྔོན་བསད་ཀྱིས་གཉན་ལ་ཕོག ཁྲོས་པ་ནི་འགའ་ལ་ཁྲོས། ཆད་པ་ནི་ཀུན་ལ་བཅད། གཤེན་རབ་ནི་མཐུ་བཙན་པས། སྡུམ་ཆེན་གྱི་ཡས་རྟགས་གནང་། དཀར་མངར་དང་འོ་ཞོས་མཆོད། དཀོར་ཆས་དང་མདོས་ཀྱིས་བརྔན། མནོལ་རྨུག་དང་འཁོན་འགྲས་བསང་། ངན་འདྲེས་ཀྱི་ནོངས་པ་མཐོལ། ཀླུ་རྗེ་ནི་ཀོ་ལོང་ཆེ། དམར་ཐབ་ཀྱིས་ནད་ཕོག་ན། ཀླུ་ནད་ནི་མྱི་ལ་ཕབ། གོད་ཁ་ནི་ཕྱུགས་ལ་དྲང་། བཙའ་སད་ནི་ཞིང་ལ་གཏོང་། ཁྲོས་པ་ནི་འགའ་ལ་ཁྲོས། ཆད་པ་ནི་ཀུན་ལ་བཅད། གཤེན་རབ་ནི་མཐུ་བཙན་པས། སྡུམ་ཆེན་གྱི་ཡས་རྟགས་གནང་། དཀར་མངར་དང་འོ་ཞོས་མཆོད། དཀོར་ཆས་དང་མདོས་ཀྱིས་བརྔན། མནོལ་རྨུག་དང་འཁོན་འགྲས་བསང་། ངན་འདྲེས་ཀྱི་ནོངས་པ་མཐོལ།
མུ་འགོད།