མཚོ་སྔོན་པོ་བོད་ཡིག་ཟིན་བྲིས། བོད ཟིན མཚོ་སྔོན་པོ ཟིན་རྩོམ། | པར་རིས། | མཁན་པོ། | ཁྱུ་མཆོག | ཟིན་ཚོམས།
ཐོ་འགོད། | ནང་འཇུག ཉར་ཚགས་བྱེད་པ།

amdotibet

ཟིན་རྩོམ་འོས་སྦྱོར།

tibetmonk  2018-11-15 23:23:09

1541829691326482.jpg

   བཅུ་ཕྲག་རིག་པའི་གཞུང་ལུགས་ལ་མཁྱེན་དཔྱོད་རབ་ཏུ་ཡངས་ཤིང་། མདོ་སྔགས་གཞུང་བརྒྱ་སྨྲ་བའི་སློབ་དཔོན་ཆེན་མོ། གཡུང་དྲུང་བོན་བཤད་སྒྲུབ་སློབ་གླིང་གི་སློབ་གཙོ་རྫ་དགེ་བཤེས་ཚེ་དབང་བསྟན་འཛིན་མཆོག་ནི། སྤྱིར་བཏང་གི་དགེ་བཤེས་ག་གེ་མོ་ཞིག་དང་། མཁས་རློམ་རང་ག་བ་ཞིག་དང་གཏན་ནས་མི་འདྲ་བར། ཁོང་ནི་ལོ་རྒྱུས་རིག་པ། ཚད་མ་རིག་པ། སྒྲ་རིག་པ། སྐར་རྩིས་རིག་པ། གསོ་བ་རིག་པ། འབྱུང་རྩིས་རིག་པ། བཟོ་བ་རིག་པ་སོགས་རིག་གནས་ཀྱི་རྣམ་གྲངས་མང་པོ་མང་པོ་ཞིག་གི་བདག་ཉིད་དུ་གྱུར་པས། ཁོང་ལ་ངེས་དོན་གྱི་དགེ་བཤེས་ཆེན་མོ་དང་། ངེས་དོན་གྱི་སློབ་དཔོན་ཆེན་མོ་ཞིག་གི་མཚན་སྙན་བཟང་པོ་དོན་གྱིས་མངའ་བ་ལགས། དེ་བས་ཁོང་གིས་༢༠༡༥ལོ་ནས་བསྟུད་མར་རྔ་ལྗོངས་ལི་ཐོ་བརྩམས་གནང་མཛད་དེ་ད་ལྟ་༢༠༡༩ལོའི་རྔ་ལྗོངས་ལི་ཐོ་འགྲེམ་སྤེལ་བྱེད་ལ་ཉེ་བའི་གཏམ་བཟང་སྙན་མོ་དོ་དགོང་དངོས་སུ་ཐོས་པས་དགའ་སྤྲོས་སྣང་བ་ཆེས་ཆེར་རྒྱས་བཞིན་གསལ་བཤད་ཐུང་ངུ་འདི་བྲི་བར་སྤྲོ་བ་དཔག་མེད་བརྟས།

1541829691160981.jpg

   དེ་བཞིན་གྲུབ་མཐའ་དང་ཆོལ་ཁ་རིས་སུ་མེད་པའི་གྲོགས་པོ་རྣམས་ཀྱིས་དུས་ལྟར་རྔ་ལྗོངས་ལི་ཐོ་བླུ་ཉོ་བྱ་འདོད་ཚེ་གཤམ་གྱི་ཁ་པར་ཨང་གྲངས་ལ་འབྲེལ་རོགས་གྱིས་དང་། ‭135 6881 8771‬ཁྱེད‭་ཚོའི་འདོད་བློ་ལྟར་ས་གནས་སོ་སོར་བསྐུར་ཐུབ་ངེས་ཡིན། མཇུག་མཐར་དགེ་བའི་བཤེས་གཉེན་ཆེན་མོ་གང་གི་མཛད་འཕྲིན་ཡར་ངོས་ཟླ་ལྟར་རྒྱས་ཤིང་ཐུགས་དགོངས་ཐ་དག་ཡིད་བཞིན་དུ་འགྲུབ་པའི་སྨོན་འདུན་བཅས། 

སྤོས་ངེད་གྲོང་ཁྱེར་ནས་ལྷ་བུ་བློ་བཟང་གིས་གུས་པས་བྲིས།
tibetmonk  2018-11-9 16:39:12

68282888888888.jpg

[རྩོམ་པ་པོ། ཤར་དྲུང་མུ་ཧ་ར།]


འོ་ལགས་སོ།

དེ་རིང་བཀྲ་ཤིས་དུས་འཛོམས་ཀྱི་ཉིན་མོ་འདི་ལ།

ཚོགས་པ་འདིའི་ཐོག་ལ་ཕེབས་པའི་གོང་གི་བླ་སྤྲུལ་དགེ་བའི་བཤེས་གཉེན་རྣམ་པ་དང་མ་ཚད་དེ་འོག་གི་སྐྱ་སེར་རིས་སུ་མ་ཆད་པ་ཁྱེད་རྣམ་པས་དཀའ་མོའི་ཚགས་དང་དཀོན་པོའི་རྒྱུ་གང་ལའང་མ་འཛེམ་པར་བསམ་པ་བཟང་པོ་དར། ལྷག་བསམ་བཟང་པོ་དུང་ལྟ་བུ་ཁུར་ནས་སྐུ་ལྗིད་མོས་ཡང་མོ་དང་ཐུགས་བྲེལ་མོས་དལ་མོ་བྱས་ནས་ཞལ་འཛུམ་མདངས་དང་བཅས་ཕེབས་པ་ལ་ངས་འདི་ནས་འཚམས་འདྲི་བཀྲ་ཤིས་བདེ་ལེགས་ཞུ།

དེ་དང་ཆ་གཅིག་ཏུ་ད་དེ་རིངཁྱེད་རྣམ་པའི་བསམ་བློ་བརྗེ་རིས་དང་། ལྟ་བ་བགྲོ་གླེང་། ནུས་ཤུགས་མཉམ་འདོན་གྱི་སྐོར་ནས་བགྲོ་གླེང་མང་པོ་བྱས་སོང་། དེ་དང་བསྟུན་ནས་རང་གི་སྐད་ཆ་ཁ་ཤས་ཤིག་བཤད་རྒྱུ་ཡིན། རང་གི་བསམ་ཕྱོགས་དང་ལས་ཕྱོགས་གཉིས་ནས་བསམ་ཕྱོགས་སྐོར་ཡིན་ལགས། འདི་ཡི་ཁ་བྱང་ལ་སངས་རྒྱས་ཀྱི་བསྟན་པའམ་«གཡུང་དྲུང་བོན་གྱི་མི་སྣ་གསོ་སྐྱོང་བྱེད་པ»ཟེར་ནས་བཏགས་ཡོད། དེ་ཡིན་དུས་དང་པོ་གཡུང་དྲུང་གི་བོན་རིན་པོ་ཆེ་འདི་སྲོལ་གཏོད་པ་པོ་སུ་རེད་ཟེར་ན། སངས་རྒྱས་སྟོང་གི་ཐུ་བོ་རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོ་ཆེ་དེ་རེད། བསྟན་པ་འདི་ཡང་བྱུང་ཡུལ་གྱི་ཁུངས་བཙུན་ལ་ལོ་རྒྱུས་ཀྱི་ཕུགས་ཐག་རིང་བ་ཞིག་ཡིན་ན་ཡང་དུས་ཀྱི་འཕོ་འགྱུར་དང་གྲུབ་མཐའི་ཆགས་སྡང་གིས་དར་ནུབ་མང་པོ་ཞིག་བྱུང་བ་རེད། རེད་དེ་གྲུབ་ཆེན་གོང་མ་དག་གིས་དཀའ་སྡུག་མང་པོ་ཞིག་གི་ཁྲོད་ནས་རང་ཚུགས་བཟུང་རང་བསྟན་སྐྱོང་ནས་ད་ལྟ་མཇལ་རྒྱུ་ཡོད་པ་འདི་རེད། མདོར་ན་ལུང་རྟོགས་གཉིས་ཀྱིས་བསྡུས་པའི་གཡུང་དྲུང་གི་བོན་རིན་པོ་ཆེ་འདི་མ་ཉམས་གོང་འཕེལ་དང་ཉམས་པ་སླར་གསོ་གཏང་དགོས་ན། མི་སྣ་ག་འདྲ་གསོ་སྐྱོང་བྱེད་དགོས་རེད་ཟེར་ན།

སྐྱེས་པ་དང་བུད་མེད་གཉིས་ཀ་དགོས་རེད་ཟེར་ནས་བཤད་རྒྱུ་ཡིན། དང་པོ་སྐྱེས་པའི་བསྐོར་ནས་བཤད་རྒྱུ་ཡིན། སྤྲུལ་སྐུ་དང་གདུང་རྒྱུད་པ། རབ་བྱུང་བ་དང་སྔགས་པ། སེར་མོ་བ་རྣམས་རེད། ང་ཚོ་ལ་སྤྲུལ་སྐུ་ཡང་ཡོད་དགོས་སྔ་མོ་ནས་ཡོད་རེད། སྤྲུལ་སྐུ་དྲིན་ཆེན་རྣམ་གཉིས་དང་མ་ཚད་གཏེར་སྟོན་སྤྲུལ་སྐུ་རྣམ་བཞི་སོགས་བསམ་གྱིས་མི་ཁྱབ་པ་བྱོན་ཟིན་པ་དང་ད་ལྟ་ཡིན་ན་ཅི་འདྲའི་བསྟན་འཛིན་གྱི་སྐྱེས་བུ་སྤྲུལ་སྐུ་མང་པོ་ཡོད། གདུང་རྒྱུད་པ་ཡིན་ན་བྲུ་ཞུ་སྤ་རྨེའུ་གཤེན་དང་ལྔ། ཁྱུང་པོ་དཀར་ནག་སེར་གསུམ་དང་ཞིག་པོ་བཅུ་གསུམ་སོགས་ཅི་འདྲའི་བསྟན་འཛིན་སྐྱེས་བུ་མང་པོ་བྱོན་པ་རེད། རེད་དེ་ད་ལྟའི་གནས་འབབ་ལྟ་བུ་ཡིན་ན། རང་དོན་དུ་ཐོས་བསམ་སྒོམ་གསུམ་དང་གཞན་དོན་དུ་འཆད་རྩོད་རྩོམ་གསུམ་མེད་ན་མི་འགྲིག་པ་རེད། དཔེ་དགོན་བདག་ལྟ་བུ་ཞིག་ལ་མཚོན་ན་མདོ་སྔགས་རྫོགས་གསུམ་ལ་སྦྱངས་པ་ཞིག་མེད་ན་རྩ་བ་ནས་མི་འགྲིག་པ་རེད།

དེ་ངས་ཅི་ཤེས་ཏེ། མཁས་གྲུབ་བྱེ་བའི་གཙུག་རྒྱན་དམ་པ། རྒྱུད་གསུམ་བོན་གྱི་མངའ་བདག་ཆེན་མོ། ཀུན་མཁྱེན་རྒྱལ་བ་གཉིས་པ་མཉམ་མེད་བླ་མས་གསུངས་པ་ལྟར་ན། སྦྱོང་བའི་ཤེས་རབ་ཆེ་བ། ཀུན་སློང་གི་བསམ་པ་དག་པ། གཞན་རྒྱུད་འདུལ་བའི་ཐབས་ལ་མཁས་པ་གསུམ་གསུངས་ཡོད། སྦྱོང་པའི་ཤེས་རབ་ཆེ་བ་ནི། མདོ་འབྲི་ཀློག་འདོན་གསུམ་ནས་མཐར་རྫོགས་པ་ཆེན་པོ་ལ་མ་ཐུག་གི་བར་དུ་རབ་ན་ལོ་བཅུ་གཉིས་དང་བཅུ་གསུམ། འབྲིང་ན་ལོ་བརྒྱད་དགུ། མཐའ་ན་ལོ་ལྔ་དྲུག དྲུག་བདུན་རེ་སྦྱོང་པ་བྱེད་རྒྱུ། རེད་དེ་དེས་ད་རུང་མི་འདང་བ་རེད།

གཉིས་པ་ཀུན་སློང་གི་བསམ་པ་དག་པ་ཞིག་དགོས་པ་རེད། ཀུན་སློང་གི་བསམ་པ་དག་པ་དེ་ཡང་། སྤྱིར་བསྟན་འགྲོ་དང་ཁྱད་པར་རང་གི་ཡུལ་དགོན་གཉིས་ལ་ཤ་ཚ་མཁན་ཞིག་ཡོད་དགོས། དཔེར་ན་ཕ་མས་བུ་རྒྱུད་སྐྱོང་པ་ལྟ་བུ་ཞིག་སྐྱོང་དགོས། ཁྱེད་ཀྱི་ལས་འགན་ཡང་དེ་རེད། གདུལ་ཞིང་ཡང་དེ་རེད། ཁྱེད་ཀྱི་འགན་འཁྲི་ཡང་དེ་རེད།

གསུམ་པ་གཞན་རྒྱུད་འདུལ་བའི་ཐབས་ལ་མཁས་པ་ནི། མཛངས་མོས་ལྟོ་ཚད། ཚོང་པས་ཐེག་སྟོབས། བླ་མས་བློ་ཚད་དང་བསྟུན་ནས་སྐྱོང་དགོས་པ་རེད། དཔེར་ན་དགོན་བདག་དེས། རབ་བྱུང་བ་ལྟ་བུ་ཞིག་ལ་མཚོན་ན་གྲྭ་ཆུང་ལ་སློབ་གྲྭ། སློབ་གྲྭ་དེ་ཡང་བྲིས་སློབ་འདོན་གསུམ་ཁ་ཚང་བ་ཞིག་ཡོད་དགོས་པ་དང་། གྲྭ་རྒན་ལ་སྒྲུབ་གྲྭ། སྒྲུབ་གྲྭ་ཡིན་ན་ལོ་ཡར་ངོ་ལ་འཆད་ཉན་དང་མར་ངོ་ལ་སྒོམ་སྒྲུབ་ཡོད་པ་དང་། བཤད་གྲྭ་ཡིན་ན་དགོན་པ་རེ་ལ་རེ་རེ་མེད་ན་མི་དགོས། ཁུལ་རེ་ལ་རེ་རེ་ཡོད་ན་འགྲིག་འདུག་བསམ། སྔགས་པ་དང་སེར་མོ་བ་ཞིག་ཡིན་ན། ཨ་ཁྲིད་སྔོན་དངོས་རྗེས་གསུམ་ལ་རྒྱུད་སྦྱངས་དང་བསགས་སྦྱངས་དང་། གསང་སྔགས་རྒྱུད་སྡེ་བཞི་ལ་འཆད་ཉན་དང་། སྒོམ་སྒྲུབ་སོགས་ཡོད་སའི་ས་ཆ་རེ་བཀོད་སྒྲིག་བྱེད་དགོས། མི་སྐྱ་ཕོ་མོ་འདྲ་ཡིན་ན། སློབ་གསོ་གཏང་རྒྱུ་དང་དགེ་སྡིག་བླང་དོར་མང་པོ་བཤད་ནས་རང་རང་གི་ལྷ་སྡེ་ལ་རང་རང་གི་བསྟན་པ་སྤེལ་དགོས། ལྷ་སྡེ་དེ་ཐག་རིང་ཐུང་གང་ན་ཡོད་ན་རང་རང་གི་བླ་གྲྭ་རྣམ་པས་བདག་པོ་བརྒྱག་རྒྱུ། ཁོ་ཚོ་ལ་འབུམ་དགུ་དང་འཕོ་ལུང་དངོས་གཞི་ལ་སོགས་པ་བསག་བཅུག་རྒྱུ། དེ་ལྟ་བུའི་ཁྱད་པར་གསུམ་དང་ལྡན་པའི་དགོན་བདག་དེ། སྤྲུལ་སྐུ་སྔགས་པ་གདུང་རྒྱུད་སུ་ཡིན་ན་འགྲིག་རེད། རེད་དེ་དེ་ལྟ་བུའི་ཆ་རྐྱེན་ལྡན་མཁན་མང་པོ་ཞིག་ཡོད་ན་མ་འོངས་པར་དགོན་པའི་དགོན་བདག་དེ་མ་སྲིད་པ་རྒྱལ་མོ་ལ་གདམ་བཅུག་རྒྱུ་མ་གཏོགས། མི་ཡིས་གདམ་མི་ཉེན། སྨན་རིའི་མཁན་རབས་རིམ་བྱོན་ཚང་མ་རྟགས་སྒྲིལ་འཕངས་ནས་མ་སྲིད་པ་རྒྱལ་མོས་གདམ་པ་མ་གཏོགས་མིས་བསྐོས་པ་ཞིག་གཅིག་ཀྱང་ཡོད་མ་རེད། བསྐོས་བཞག་པ་དེ་ཚོ་ཡིན་ན་འདིས་བསྟན་པ་བསྐྱངས་ཐུབ་ཡོད་མ་རེད། འདིས་བསྟན་པ་འཛིན་མ་ཐུབ་ཟེར་རྒྱུ་གཅིག་ཀྱང་ཡོད་མ་རེད། དེ་རྣམ་ཐར་ལ་ལྟོས་དང་ཤེས་གསལ་རེད། ཚང་མ་བསྟན་འཛིན་གྱི་སྐྱེས་བུ་རྐྱང་པ་བྱོན་པ་རེད། དཔེར་ན་གདུང་རྒྱུད་པ་དང་སྤྲུལ་སྐུ་འདྲ་ཡིན་ན་སྐུ་ཕྲེང་སྔོན་མ་དེས་བསྟན་པ་འཛིན་སྐྱོང་སྤེལ་གསུམ་བྱེད་ཐུབ་རྒྱུ་ཡིན་ནའང་རྗེས་མ་དེས་བྱེད་མ་ཐུབ་སོང་བ་འདྲ་བོ། སྐུ་ཕྲེང་སྔོན་མ་དེ་མཁས་གྲུབ་གཉིས་ལྡན་གྱི་སྐྱེས་བུ་ཞིག་ཡིན་ནའང་རྗེས་མ་དེས་སྣེ་གཅིག་ཀྱང་མི་ཤེས་རྒྱུ་འདྲ་བོ་བྱུང་ན། བསྟན་པ་ལ་འཕེལ་འགྲིབ་ཆེན་པོ་འོང་པ་རེད། དེ་ཡིན་དུས་རིང་ལུགས་འཁྲུལ་མེད་རྒྱལ་བ་སྨན་རི་བ་ཟེར་ནས་གྲྭ་ཆུང་ཞིག་ཡན་ཆད་ཀྱིས་འདོན་པ་རེད། འདོན་པ་ཙམ་གྱིས་མི་ཆོག་ཀི ལག་ལེན་བསྟར་དགོས་ཀི། ལག་ལེན་བསྟར་དགོས་ན་ཅི་ལྟ་བུ་ཞིག་བསྟར་དགོས་ཟེར་ན། སྨན་རིའི་མཁན་རབས་སོ་བཞི་པ་བསྐོས་པ་ལྟར་དུ་རྟགས་སྒྲིལ་འཕེན་དགོས། འདི་ང་ཚོ་མི་གཅིག་ལ་དགའ་མི་དགའ་གང་ཡང་མ་རེད། བསྟན་པ་གཅིག་གི་ཆགས་འཇིག་ལ་ཐུག་ནས་བཤད་པ་རེད། ཚང་མས་བསམ་མནོ་རྒྱ་ཆེ་ས་ལ་བཏང་། དམིགས་ཡུལ་ཕུགས་འདུན་རིང་ས་ལ་ལྟ། ཚང་མས་སངས་རྒྱས་ཀྱི་བསྟན་པ་ལ་བསམས་ནས་དེ་ལས་དགོས། སེམས་ཅན་གྱི་བདེ་སྐྱིད་ལ་བསམས་ནས་དམིགས་ཡུལ་དེ་ཁུར་དགོས།

གཉིས་པ་བུད་མེད་ཡིན་ནའང་གཡུང་དྲུང་གི་བོན་རིན་པོ་ཆེ་འདི་ཉམས་སུ་ལེན་ཆོག་པ་རེད། སྐྱེས་པ་དང་གཅིག་པ་རེད། སྤོབས་པ་ཞུམ་མི་རུང་། སྟོན་པ་སངས་རྒྱས་ཞབས་བཞུགས་སྐབས་ཡིན་ན་ཕོ་གྲལ་གཡས་དང་མོ་གྲལ་གཡོན་བྱས་ནས་བཞག་པ་རེད། འདིར་གསར་བཞག་ཅིག་གཏན་ནས་མ་རེད། སྤྱིར་བཏང་ཕོ་མོ་གཉིས་ཀ་ཁྱད་ཡོད་མ་རེད། ད་ལྟ་འཛམ་བུ་གླིང་ལ་ཕྱེད་ཀ་སྐྱེས་པ་དང་ཕྱེད་ཀ་བུད་མེད་རེད། ཚང་མ་མང་ཉུང་འདྲ་མཉམ་རེད། མ་འོངས་པར་སྐྱེས་པ་དང་བུད་མེད་གཉིས་ཀས་རང་རང་ནུས་པའི་སྒོ་ནས་བསྟན་པ་འཛིན་དགོས་པ་རེད་མ་གཏོགས་གཡུང་དྲུང་བོན་གྱི་རྗེས་འཇུག་དཔེ་ཉུང་ཉུང་རེད།

ད་ལྟ་ང་ཚོའི་བསྟན་པ་འདི་ཡིན་ན་སྐད་རིགས་མང་པོ་དང་མི་རིགས་མང་པོ་ལ་སྤེལ་ཐུབ་ཡོད་མ་རེད་ཟེར་ན་ཆོག་པ་རེད། རེད་དེ་འཛམ་གླིང་མཁས་པའི་གཙུག་རྒྱན་དམ་པ་མཁས་སློབ་རྣམ་གཉིས་ཀྱི་བཀའ་དྲིན་གྱིས་སྔར་དང་མི་འདྲ་བར་འཛམ་བུ་གླིང་ལ་ཁྱབ་བསྒྲགས་ཅུང་ཙམ་སོང་ཡོད་རེད། དེ་ད་རུང་ང་ཚོས་རྒྱ་ཇེ་ཆེ་དང་ཕུན་སུམ་ཇེ་ཚོགས་སུ་གཏང་དགོས་པ་རེད། དེ་དགོས་དུས་སྐད་རིགས་མང་པོ་མ་ཤེས་ན་མི་རིགས་གཞན་ལ་བསྟན་པ་གཅིག་སྤེལ་དགོས་ན་སྤེལ་མི་ཐུབ་པ་རེད། དེ་ཚོའི་སྐད་དང་ཡི་གེ་སྦྱང་དགོས་ན་མི་ཁ་ཤས་གཅིག་གི་སྦྱོང་ན་ནུས་པ་ཆེན་པོ་ཐོན་ཟེར་ན་དཀའ་མོ་རེད། མི་མང་པོ་ལ་སྦྱོང་བཅུག་དགོས་པ་རེད། རེད་དེ་མདོར་བསྡུས་ན་སྤྱི་སྐད་ཆེན་པོ་གཉིས་ཀྱི་ནང་དུ་བསྡུ་ན་ཆོག་གི རྒྱ་ཡིག་དང་དབྱིག་ཡིག་འདི་གཉིས་རེད། འདི་ཕལ་ཆེར་ས་ག་ན་སོང་ན་ཡུལ་ག་ན་བསྡད་ན། འདི་གཉིས་མི་གོ་རྒྱུ་ཕལ་ཆེ་ཡོད་ས་མ་རེད། དེ་ཡིན་དུས་སློབ་གླིང་འདི་དང་འདི་ལྟ་བུ་ཡིན་ན། བོད་ཀྱི་སྐད་ཡིག་སྟེང་ནས་མདོ་སྔགས་སེམས་གསུམ་དེ་སྦྱོང་དགོས་པ་དེ་བཤད་མ་དགོས་པ་རེད། རེད་དེ་དེའི་ཟུར་ནས་རྒྱ་ཡིག་དང་དབྱིག་ཡིག་ཟུར་སྦྱོང་ངམ་ཆེད་སྦྱོང་བྱེད་བཅུག་རྒྱུ་དེ་རྩ་ཆེན་རེད་བསམ། སྐད་ཡིག་དེ་གཉིས་ལ་ཕུལ་དུ་ཕྱིན་པའི་མི་སྣ་ཉིས་བརྒྱ་ཙམ་ཞིག་གསོ་སྐྱོང་སྤྲད་ཐུབ་སོང་བ་ཡིན་ན་མ་འོངས་པར་རྒྱལ་ཁབ་ཉིས་བརྒྱ་ཚོད་ཅིག་ལ་གཏང་རྒྱུ་ཡིན་ན་གཡུང་དྲུང་གི་བོན་རིན་པོ་ཆེ་འདི་འཛམ་བུ་གླིང་ལ་རྒྱ་ཇེ་ཆེ་དང་ཕུན་སུམ་ཇེ་ཚོགས་ལ་འགྲོ་རྒྱུ་རེད། རེད་མ་གཏོགས་སྐད་རིགས་གཅིག་དང་མི་རིགས་གཅིག་གི་སྟེང་ལ་ང་ཚོའི་བསྟན་པ་འདི་ཡུན་རིང་པོ་དང་རྒྱ་ཆེན་པོ་འགྲོ་ཐུབ་དགོས་ན་དཀའ་མོ་རེད། དཔེར་ན་སྔར་ཞང་ཞུང་གི་སྐད་ཡིག་གི་སྟེང་ལ་མདོ་སྔགས་སེམས་གསུམ་ཚང་མ་ཡོད་ཟེར་བ་རེད། རེད་དེ་ད་ཐར་ཐོར་ཙམ་ལས་རིག་རྒྱུ་མི་འདུག མི་རིགས་གཅིག་གི་ནང་ན་ཡང་གཡུང་དྲུང་བོན་ལ་བདག་པོ་རྒྱག་མཁན་དེ་བརྒྱ་ཆ་བརྒྱའི་ནང་ནས་བརྒྱ་ཆ་དགུ་བཅུ་ཙམ་དེ་མ་རེད།

ང་ཚོས་གཡུང་དྲུང་གི་བོན་འདི་བདག་པོ་རྒྱག་མཁན་གྱི་མི་སྣ་དེ་ཇེ་མང་ལ་གཏང་དགོས། རྒྱལ་ཁབ་མང་པོ་དང་མི་རིགས་མང་པོ་སྐད་རིགས་མང་པོ་ཞིག་ལ་སྤེལ་བ་དང་གནས་པར་བྱེད་མ་ཐུབ་ན། མ་འོངས་པ་ལ་ག་འདྲ་ཞིག་འོང་ཧ་གོ་རྒྱུ་མ་རེད། ད་ལྟ་འཛམ་བུ་གླིང་ནས་སྐད་ཡིག་གི་ཆག་འཇིག་འགྲོ་དང་འགྲོ་བཞིན་པ་རེད། མི་རིགས་གཅིག་གི་སྐད་ཡིག་དེ་གཅིག་ནུབ་སོང་རྒྱུ་ཡིན་ན་དེ་ལ་བརྟེན་པའི་མི་རིགས་དེས་རིག་གཞུང་དང་སངས་རྒྱས་ཀྱི་བསྟན་པ་གཞི་ལམ་འབྲས་གསུམ་ལྟ་སྒོམ་སྤྱོད་གསུམ་ཚང་མ་འཇིག་རྒྱུ་རེད། དཔེར་བཞག་ན་སྡོང་པོ་ཞིག་གི་རྩ་བ་འགྱེལ་སོང་བ་ཡིན་ན་དེ་ལ་བརྟེན་པའི་ཡལ་ག་དང་ལོ་མ་འབྲས་བུ་དང་བཅས་པ་འཇིག་རྒྱུ་རེད། མ་འོངས་པར་ཆགས་འཇིག་ཅི་དང་ཅི་ལྟ་བུ་བྱུང་ཡང་ལོགས་གཅིག་ལ་འཇིག་བཞིན་ཡོད་ནའང་ལོགས་གཅིག་ལ་གནས་ཐུབ་པ་ཅིག་དགོས་པ་རེད། དཔེར་ན་ཡེ་ཤུ་ཆོས་ལུགས་སྤེལ་སྟངས་འདྲ་ཡིན་ན་དཔེ་ཐབས་མཁས་པ་རེད། ད་ལྟར་འཛམ་བུ་གླིང་ནས་ཆོས་ལུགས་ཀྱི་རིག་གཞུང་ཆུང་དགོས་ན་ཡེ་ཤུའི་ཆོས་ལུགས་ལས་ཆུང་ཞིག་ཡོད་མ་རེད་ཟེར་ནི། དེབ་ཆུང་ཆུང་གཅིག་ལས་ཡོད་མ་རེད་ཟེར་ཤས་འགི ཁོ་ཚོས་ཆོས་སྤེལ་ལུགས་དེ་ཡག སྤེལ་སྟངས་དེ་མཁས་སོང་བ་རེད། མི་འཇོན་ཐང་ཅན་དང་ཐོབ་ཐང་ཅན་ཕྱུག་པོ་དེ་ཚོ་ཡི་ལག་ཏུ་སོང་ཡོད་རེད། མི་དེ་ཚོས་མི་བརྒྱ་སྟོང་མང་པོ་ཁ་ལོ་བསྒྱུར་བ་རེད། ང་ཚོའི་བསྟན་པ་ཡིན་ན་ཐབས་མཁས་པའི་སྒོ་ནས་སྤེལ་རྒྱུ་དེ་རྩ་ཆེན་པོ་རེད། གཞུང་ལུགས་ཤིག་ཆེ་དགོས་ན་སངས་རྒྱས་བསྟན་པའམ་གཡུང་དྲུང་བོན་བས་ཆེ་ཞིག་ཡོད་དཀའ་རྒྱུ་རེད། དར་ཁྱབ་ཆུང་དགོས་ན་གཡུང་དྲུང་གི་བོན་བས་དར་ཁྱབ་ཆུང་ཞིག་ཡོད་རབས་མེད། དེ་དར་ནུབ་མང་པོ་བྱུང་དང་ཆགས་འཇིག་མང་པོ་བྱུང་བས་ཡིན་ན་ཐང་། སྤེལ་སྟངས་ཐབས་མ་མཁས་སོང་བ་ཡིན་ན་ཡང་ཐང་། མ་འོངས་པ་ལ་ཐབས་མཁས་པའི་སྒོ་ནས་བསྟན་པ་སྤེལ་རྒྱུ་དང་འཛམ་བུ་གླིང་དུ་ང་ཚོའི་གཡུང་དྲུང་གི་བོན་རིན་པོ་ཆེ་འདི་ཁྱབ་བསྒྲགས་གཏང་དགོས། དེ་གཏང་དགོས་ན་གོང་ནས་ཞུས་པ་ལྟར་དུ་མི་རིགས་མང་པོའི་སྐད་ཡིག་ཤེས་རྒྱུ་དེ་རྩ་ཆེན་རེད། དཔེར་ན་ང་ཚོ་ད་སྔོན་རྒྱབ་ཁབ་མང་པོ་ཞིག་དང་མི་རིགས་མང་པོ་ཞིག་ལ་བརྒྱུད་ནས་བསྟན་པ་སྤེལ་བསམ་རྒྱུའི་བསམ་བློ་མེད་པ་འདི་ནད་ཅི་ཞིག་ན་སོང་བ་རེད། སྐད་རིགས་མ་ཤེས་པའི་སྐྱོན་རེད། ས་ཆ་དེར་འགྲོ་བསམ་རྒྱུ་དང་བསྟན་པ་སྤེལ་བསམ་རྒྱུའི་བསམ་མནོ་སྐྱེ་ཕོད་ཡོད་མ་རེད། དཔེར་བཞག་ན་མི་ནམ་མཁར་འཕུར་མི་དྲན་རྒྱུ་དེ། གཤོག་པ་མེད་པ་ལ་བརྟེན་ནས་འཕུར་མི་དྲན་པ་རེད། བྱ་ནམ་མཁར་འཕུར་འདོད་པ་དེ་གཤོག་པ་ཡོད་པ་ལ་བརྟེན་ནས་འཕུར་བ་རེད། དཔེ་དེའི་ནང་བཞིན་དུ་ང་ཚོ་ཡང་མི་རིགས་གཞན་དང་རྒྱལ་ཁབ་གཞན་དུ་འགྲོ་མ་འདོད་པ་དང་བསྟན་པ་སྤེལ་མི་བསམ་རྒྱུ་དེ་སྐད་དང་ཡི་གེ་མ་ཤེས་པའི་སྐྱོན་རེད། དེ་ཡིན་དུས་ང་ཚོ་ཚང་མ་ལ་སེམས་ནང་དུ་སྤོབས་པ་ཡོད་དགོས་འཆར་གཞི་ཡོད་དགོས། ས་ག་ན་སོང་ན་ཡུལ་ག་ན་བསྡད་ན་རང་ཚུགས་བརྟན་པོ་གཟུང་དགོས། རང་བསྟན་རང་གིས་སྤེལ་དགོས། ང་བོན་པོ་ཡིན་ཟེར་དགོས། ད་མདོར་བསྡུ་ན་སྐྱ་སེར་རིས་སུ་མ་ཆད་པར་ང་ཚོ་ཚང་མས་བསམ་མནོ་གཅིག་ལ་གཏོང་དགོས། དམིགས་ཡུལ་གཅིག་ཏུ་གཟུང་དགོས། ང་ཚང་ལ་མཐུན་སྒྲིལ་ཡོད་དགོས། མཐུན་སྒྲིལ་མེད་ན་དོན་ཆེན་མི་འགྲུབ། སྙིང་རུས་མེད་ན་མཁས་པ་མི་འགྱུར་གསུངས་པ་ལྟར་དུ་རང་ཅག་ཚང་མས་མཐུན་སྒྲིལ་བྱེད་རྒྱུ་འདི་གཙོ་ཆེ། མཐུན་པའི་ལག་གདང་གཅིག་ཏུ་བསྒྲིལ་ནས་སངས་རྒྱས་གཡུང་དྲུང་བོན་གྱི་བསྟན་པ་འདི་འཛམ་བུ་གླིང་ལ་ཁྱབ་སྤེལ་གཏོང་དགོས། འཛམ་བུ་གླིང་གི་མི་ཚང་མའི་སེམས་ནང་ལ་གཡུང་དྲུང་གི་བོན་རིན་པོ་ཆེ་འདི་སྤེལ་ཐུབ་དགོས། སྤེལ་ཐུབ་པའི་སྨོན་འདུན་དང་མཉམ་དུ་མཚམས་བསྡུ་རྒྱུ་ཡིན།

tibetmonk  2018-11-7 22:30:45

1541480227109421.jpg

ཉེ་སྔོན།   ལྷོ་ནུབ་མི་རིགས་སློབ་ཆེན་གྱི་དགེ་རྒན་ཆེན་མོ།  འབུམ་རམས་པའི་མཛུབ་སྟོན་དགེ་རྒན།ཤར་བ་ཐོགས་མེད་ལགས་ཀྱི་བརྩམས་ཆོས《ཞང་ཞུང་ཤེས་རིག་ཞིབ་འཇུག》ཅེས་པའི་དེབ་གསར་འདི་ཉིད་ནི་སི་ཁྲོན་ཏང་སྐྲུན་དུས་དེབ་ཚོགས་པ་དང་།  སི་ཁྲོན་མི་རིགས་དཔེ་སྐྲུན་ཁང་གིས་པར་སྐྲུན་བྱས་པ་རེད།   དེབ་འདི་ནི་རྒྱལ་སྤྱིའི་བོད་རིག་པའི་ཞིབ་འཇུག་གི་ལོ་རྒྱུས་སྟེང་ཞང་ཞུང་ཤེས་རིག་ཞིབ་འཇུག་ཅེས་མིང་བཏགས་པའི་ཆེད་རྩོམ་ཐོག་མ་ཡིན་སྟབས།གནའ་རབས་བོད་ཀྱི་ཞང་ཞུང་ཤེས་རིག་གི་ཞིབ་འཇུག་ཐད་ལ་ནུས་པ་ཆེན་པོ་འདོན་སྲིད་ངེས་རེད།

༡.jpg༢.jpg༣.jpg
《ཞང་ཞུང་ཤེས་རིག་ཞིབ་འཇུག》གི་དཀར་ཆག

དེབ་གསར་འདིའི་ནང་དུ་ཞང་ཞུང་གི་ས་ཁོངས་ངོས་འཛིན་དང་།ཞང་ཞུང་རྒྱལ་རབས་ཀྱི་ལོ་རྒྱུས་བརྒྱུད་རིམ།ཞང་ཞུང་དང་ཐུ་བྷོད་བར་གྱི་རིག་གནས་མཉམ་འདྲེས། གངས་ཅན་བོན་དང་དེའི་ཆོ་ག   གནའ་མོ་བོན་གྱི་དགོན་སྡེ།ཞང་ཞུང་དང་རྒྱལ་རོང་དང་སན་ཞིན་ཏོས་གནའ་ཤུལ།ཞང་ཞུང་དང་རྒྱལ་རོང་དང་ཅིན་ཧྲ་གནའ་ཤུལ།   བོད་དང་རྒྱ་གར་གྱི་རིག་གནས་མཐོང་ལམ་ནང་གི་གངས་ཏི་སེའི་དད་མོས་དང་དེའི་ཁྱད་ཆོས།   གངས་ཅན་བོན་ཆོས་དང་འཇང་གི་སྟོན་པའི་རིག་གནས་སོགས་ལེའུ་བཅུ་རུ་འདུས་འདུག

ཞང་ཞུང་ཤེས་རིག་ཞིབ་འཇུག་ཅེས་པ་དེབ་འདི་ལ་ཐུན་མོང་མ་ཡིན་པའི་ཁྱད་ཆོས་གང་ཡོད་དམ་ཞེ་ན།དཔེར་ན།  ཞང་ཞུང་ཤེས་རིག་ནི་མིའི་རིགས་ཀྱི་ཤེས་རིག་འཕེལ་འགྲིབ་འགྲོས་དང་བསྟུན་དཔྱད་པ་གཞི་བྱས།  ད་ལྟའི་བར་གྱི་རྒྱལ་ཁབ་ཕྱི་ནང་གི་ཞང་ཞུང་ཤེས་རིག་ཞིབ་འཇུག་གི་གྲུབ་འབྲས་གསར་བ་དག་ཀྱང་ཕྱོགས་སྡོམ་བྱས་པ་དང་ཆབས་ཅིག           ཞང་ཞུང་རྒྱལ་རབས་ཀྱི་དར་རྒུད་འཕོ་འགྱུར་ཤུལ་གྱི་རི་མོ་གསལ་ལེར་བསྟན་ཡོད་སྟབས།《ཞང་ཞུང་ཤེས་རིག་ཞིབ་འཇུག》ཅེས་པ་འདི་ནི་ཕྱིས་སུ་བོད་ཤེས་རིག་ཞིབ་འཇུག་ཐད་ལ་མེད་དུ་མི་རུང་བའི་དཔེ་ཆ་གལ་ཆེན་ཞིག་ཏུ་འགྱུར་སྲིད་དོ།།

1541480443229832.png

རྩོམ་པ་པོ་ཤར་བ་ཐོགས་མེད།

རྩོམ་པ་པོ་ཤར་བ་ཐོགས་མེད་ནི་ཀྲུང་གོའི་གངས་ཅན་བོན་ཆོས་ཞིབ་འཇུག་ལྟེ་གནས་ཀྱི་གསར་འཛུགས་མཁན་དང་།རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་ལས་གཞི་རྣམ་གྲངས་གལ་ཆེ་ཤོས《བོན་གྱི་རིག་གནས་སྤྱི་དཔྱད》ཀྱི་དབུ་བཞུགས་ཆེད་མཁས་རེད།    སྔ་རྗེས་སུ་ལྷོ་ནུབ་མི་རིགས་སློབ་གྲྭ་ཆེན་མོ་དང་སི་ཁྲོན་སློབ་གྲྭ་ཆེན་མོ།པེ་ཅིང་སློབ་ཆེན་བཅས་སུ་སློབ་གྲྭ་འགྲིམས་པ་མ་ཟད།  ཨ་མེ་རི་ཁ་དང་ཧྥ་རན་སི།  འཇར་མན།   ཕྱི་སོག  བལ་ཡུལ།  འབྲུག་པ་ལ་སོགས་དང་།   རང་རྒྱལ་གྱི་ཞང་ཀང་དང་ཐའེ་ཝན་ས་ཁུལ་དུ་རིག་གཞུང་སྤེལ་རེས་བྱེད་མྱོང་།  ཞིབ་འཇུག་ཁ་ཕྱོགས་ནི་བོད་ཀྱི་ཆོས་ལུགས་དང་བོད་ཀྱི་ཡིག་ཚངས་སྐོར་རེད།   ཉིད་ཀྱི་བརྩམས་ཆོས་ཀྱི་ཁྱད་ཆོས་མཚོན་བྱེད་ལ་དཔེར་ན《བོད་རིག་གནས་གསར་དཔྱད》《རྒྱལ་རོང་གི་ལོ་རྒྱུས་དང་རིག་གནས》《གངས་ཅན་བོན་ཆོས་ཞིབ་འཇུག》སོགས་ཡོད།  དཔྱད་རྩོམ་གྱི་ཁྱད་ཆོས་མཚོན་བྱེད་ལ་དཔེར་ན《བོད་བརྒྱུད་ནང་བསྟན་ཆོས་ལུགས་ཞེས་པའི་ཐུན་མོང་མ་ཡིན་པའི་ཁྱད་ཆོས་མཚོན་བྱེད་དཔེར་བརྗོད་ཁོ་ན་ཉིད་དེ་གཡུང་དྲུང་བོན་ཅེས་པ་འདི་རེད》  《བོད་དང་རྒྱ་གར་གྱི་རིག་གནས་མཐོང་ལམ་ནང་གི་གངས་ཏི་སེའི་དད་མོས་དང་དེའི་ཁྱད་ཆོས》སོགས་ཡོད།  ཁོང་གི་བརྩམས་ཆོས་ཀྱིས་བོད་རིག་པའི་ཞིབ་འཇུག་ལ་ཤུགས་རྐྱེན་ཆེན་མོ་ཐེབས་ཡོད་དོ།།

tibetmonk  2018-11-5 11:04:57


1541033233122872.jpg
འབུམ་རྒྱས་འབྲིང་བསྡུས་གསུམ་གྱི་སྐོར་ལ་དཔྱད་པ་ལོག་བཤད་རྨོངས་མུན་སེལ་བའི་སྒྲོན་མེ།

༧གཤེན་ཡ་ངལ་ཁྲི་རྒྱལ།

སྐྱེ་འགག་མཐའ་བྲལ་དམིགས་མེད་བོན་གྱི་སྐུ། །

མ་བཅོས་ལྷུན་གྲུབ་ལོངས་སྤྱོད་རྫོགས་པའི་སྐུ། །
མ་ངེས་ལྔ་ལྡན་ཅིར་ཡང་སྤྲུལ་པའི་སྐུ། །
སྐུ་གསུམ་རྫོགས་སངས་རྒྱས་ལ་དད་ཕྱག་བརྩེགས། །
ཡེ་ནས་མཐའ་བཞི་རྒྱ་གྲོལ་བདེ་སྟོང་གསལ་གསུམ་ངང་ལས་མ་གཡོས་ཀྱང་། །
དུག་ལྔའི་ནད་ཀྱིས་རབ་གཟིར་སྐྱེ་རྒུ་དགེ་བའི་ལམ་ལ་བཀྲི་བའི་ཕྱིར། །
ཐུགས་རྗེ་བརྩེ་བ་ཆེན་པོས་འདོར་མེད་སྲིད་པའི་མིག་གྱུར་བདེ་བར་གཤེགས། །
དབྱིངས་ཀྱི་ཡུམ་ཆེན་ཤེས་རབ་བྱམས་མའི་བྱམས་བརྩེ་ཆེན་པོས་རྟག་ཏུ་སྐྱོངས། །
རྒྱལ་བ་གཉིས་པ་ཤེས་རབ་རྒྱལ་མཚན་དང་། །
བཤད་སྒྲུབ་བསྟན་སྤེལ་ལྷ་ཀླུ་མི་ཡི་གཤེན། །
བསྟན་པའི་མཛེས་རྒྱན་གྲུབ་ཐོབ་བརྒྱད་ཅུ་སོགས། །
རྒྱལ་སྲས་འཕགས་མཆོག་སེམས་དཔའི་ཚོགས་དེར་འདུད། །
རྒྱལ་བསྟན་སྒོ་འབྱེད་གཤེན་ཆེན་ཀླུ་དགའ་དང་། །
བསྟན་འཛིན་སྐྱེས་ཆེན་མཁས་མཆོག་དཔལ་ཆེན་ལགས། །
བསྟན་པའི་གསལ་བྱེད་སྨྲ་དབང་ཉི་མ་སོགས། །
གཤེན་བསྟན་སྐྱོང་མཁས་རྣམ་གསུམ་རྒྱལ་གྱུར་ཅིག།

   ཅེས་མཆོད་ཚིག་ཨུ་དུམ་བཱ་རའི་མེ་ཏོག་གིས་མདུན་བསུས་ཏེ་སྐབས་དོན་གླེང་བྱ་ལ་འཇུག་པར་སྤྲོ་བ་ནི། རང་བའི་བློ་གྲོས་མཐོ་བའི་རྒན་པ་རྣམས་ཐུགས་ཀྱི་དཀྱིལ་འཁོར་དགྱེས་པའི་མཆོད་སྤྲིན་དང་། རང་དང་སྐལ་བ་མཉམ་པའི་གྲོགས་དག་གྲོས་སུ་འགུག་པའི་ལྕགས་ཀྱུ། རང་ལས་དམན་པའི་མཆེད་གྲོགས་རྣམས་ལ་འཚོ་བཅུད་དུ་འགྱུར་བའི་སྨོན་འདུན་དང་བཅས། སྤྱིར་རྣམ་དག་རྒྱས་པའི་འབུམ་སྡེ་བཞུགས་ཚུལ་བསྟན་པ་དང་། སྡེ་ཚན་སྒྲིག་ཚུལ་བསྟན་པ་གཉིས་ཀྱི་སྒོ་ནས་བཤད་པར་སྤྲོ་བ་ལ། དང་པོ་ནི་གཙང་གི་བན་དེ་མི་གསུམ་གྱི་གཏེར་མ། བོན་ཉིད་སྙིང་པོ་བདལ་བའི་འབུམ་ལས། འབུམ་ཆེན་བླ་མེད་སྡེ་བཞི་དང་། འབུམ་ཕྲག་བརྒྱ་དང་རྩ་བརྒྱད་དོ། ཞེས་གསུངས་པ་ལྟར། བླ་མེད་སྡེ་བཞི་ནི། མདོ་འབུམ་བཞི། གཟུངས་འབུམ་བཅུ། སྔགས་འབུམ་དྲུགཤེས་རབ་ཀྱི་འབུམ་བཞི་དང་བཞིའོ། མདོ་འབུམ་གསུང་བ་པོ། དྭགས་པ་གསལ་བ་ཤེས་པ་གསུམ་དང་། རྒྱལ་བའི་གདུང་ཚོབ་མུ་ཆོ་ལྡེམ་དྲུག་དང་བཞི་ཡིས་སྟོང་ཐུན་བསྡེབ་དང་བཅས་པ་རབ་དུ་བཤད། བཀའ་འདི་ལ། ཞལ་ནས་གསུང་བ་དང་། རྗེས་སུ་གནང་བ་དང་། བྱིན་གྱིས་རླབས་པའི་བཀའ་སོགས་ཡོད། སྔགས་འབུམ་གསུང་བ་པོ། གསང་བ་འདུས་པ། གཤེན་སྟག་ལ་མེ་འབར། མཁའ་འགྱིང་གཙུག་ཕུད། དབལ་བོན་རིམ་པོ། ཧ་ར་མུ་རྒྱུང་། གྱེར་ཞི་དིང་ནམ་དང་དྲུག་གོགཟུངས་འབུམ་འདས་པའི་ལྷ་མོ་བཅུས་གསུངས། ཤེས་རབ་ཀྱི་འབུམ། ས་ཏྲིག་ཨེར་སངས། གཤེན་ལྷ་འོད་དཀར། སངས་པོ་འབུམ་ཁྲི། གཤེན་རབ་མི་བོ་བཞིས་གསུངས། ཀུན་སྐྱོབས་བྱམས་མའི་རྒྱུད་ལས། བྱམས་མ་རྩ་བའི་འབུམ་སྡེ་གླེགས་བམ་༡༦ཡན་ལག་༤༨དགེ་རྒྱས་འབུམ་ལ་རྩ་བ་གླེགས་བམ་༡༤ཡན་ལག་༤༢འདུལ་འབུམ་གླེགས་བམ་༡༦ཡན་ལག་༦༡དོན་འབུམ་གླེགས་བམ་༢༠ཡན་ལག་༥༤དེ་ལྟར་གླེགས་བམ་༣༦༠བཞུགས་པར་གསུངས་ཀྱང་། གླེགས་བམ་༨༢མ་གཏོགས་མེད་པས་ཡན་ལག་དང་མཉམ་པོར་༣༦༠ཡིན་པར་སེམས། གཉིས་པ་འཕེན་ཡུལ་རྒྱས་པ་འབུམ་གྱི་བོན་སྒོ་ལ། འདོན་མཆོད་གཉིས་སུ་ཕྱེ་བས། འདོན་པ་འབུམ་སྡེའི་གཙོ་བོ་ནི། དངོས་བསྟན་སྟོང་ཉིད་ཀྱི་རིམ་པ་དང་། སྦས་དོན་མངོན་རྟོགས་ལམ་རིམ་གྱི་བརྗོད་བྱ་གཙོ་བོར་སྟོན་པའི་བཀའ་ཤེས་རབ་བླ་མེད་ཀྱི་འབུམ་སྡེ་ཞེས་བྱ་བ་ཡིན་ཀྱང་། བཀའ་འཁོར་བར་པའི་དབང་དུ་བྱས་པའི་འབུམ་སྡེ་ལའང་། མཁས་རྣམས་མི་མཐུན་པའི་བདེན་དོན་རྣམ་གྲངས་བགྲང་ཚུལ་དུ་མར་གསུངས་ཀྱང་། རང་ལུགས་ལ་ཀུན་མཁྱེན་ཉི་མ་བསྟན་འཛིན་དབང་གི་རྒྱལ་པོའི་དགོངས་བཞེད་ལྟར་གཙོར་བྱེད་པ་གལ་འགངས་རྩ་ཆེན་ཞིག་ཡིན་པ་གདོན་མི་ཟའོ། དེས་ན། འཁོར་འདས་ཀྱི་འགྲེས་རྐང་དང་ས་བཅུ་ལམ་ལྔ་ཁམས་བརྒྱད་ཡན་ལག་ཡོངས་རྫོགས་ཞིབ་ཅིང་ཕྲ་བའི་སྒོ་ནས་བསྟན་པའི་བཀའ་དང་། དེའི་དོན་ཙམ་སྟོན་པའི་བཀའ་དང་གཉིས། དང་པོ། བསམ་ཡས་མཆོད་རྟེན་དམར་པོ་ནས། ཨ་ཙ་ར་མི་གཉིས་ཀྱི་གཏེར་མ། མཛད་མདོ་བསྡུས་པ། མདོ་འདུས་ལས། རྒྱས་འབྲིང་བསྡུས་གསུམ་བོན་སྡེ་རྣམས། ལྷ་ཀླུ་མི་ཡི་ཡུལ་དུ་དར། ཞེས་ལུང་ཟིན་ལྟར། ཤེར་ཕྱིན་གྱི་བོན་སྡེ་འདི་ལ་བསྒྲགས་པ་སྐོར་གསུམ་དུ་ཡོད་པར་མ་ཟད། རང་གཞན་སེམས་ཅན་ཐམས་ཅད་ཐར་བ་དང་ཐམས་ཅད་མཁྱེན་པའི་གོ་འཕང་རིན་པོ་ཐོབ་པར་འདོད་པ་དག་གིས་ཉམས་སུ་བླང་བྱའི་གཙོ་བོ་ནི། ཤེས་རབ་ཀྱི་བླ་ན་མེད་པར་ཕྱིན་པ་བཀའ་རྒྱས་འབྲིང་བསྡུས་གསུམ་རྣམས་ཡིན་པར། སྨྲ་དབང་ཀུན་མཁྱེན་ཉི་མ་བསྟན་འཛིན་དབང་གི་རྒྱལ་པོ་མཆོག་གིས་དགོངས་བཞེད་བླ་ན་མེད་པ་ཞིག་ཡིན་ཙང་། དེ་ལྟ་ནའང་། ལྷ་གཤེན་ཡོངས་སུ་དག་པའི་སྟེང་ལྷ་ཡུལ་དུ་རྒྱས་པ་ཉི་ཟེར་གྱེས་པ་ལྟ་བུ་གླེགས་བམ་༡༢༨གྱི་བདག་ཉིད་ཅན་དེ་བསྒྲགས། རྒྱལ་གཤེན་མི་ལུས་བསམ་ལེགས་ཀྱིས་བར་མི་ཡུལ་དུ་། རྒྱས་པའི་སྐོར་གཉིས་དང་། འབྲིང་པོའི་སྐོར་གསུམ། བསྡུས་པའི་སྐོར་གསུམ། བསྡུས་དོན་ཚིགས་སུ་བཅད་པ་དང་དགུ་རུ་བསྒྲགས་པའོ། ཀླུ་སྒྲུབ་ཡེ་ཤེས་སྙིང་པོས་འོག་ཀླུ་ཡུལ་དུ་བསྡུས་པ་ནོར་བུ་ལྟ་བུའི་ཤེར་ཕྱིན་གྱི་འབུམ་སྡེ་རྣམས་བསྒྲགས་པའོ། ལྷ་ཡུལ་དུ་གསུངས་པའི་གནས་ཕུན་སུམ་ཚོགས་པ་ནི། རི་རྒྱལ་ལྷུན་པོའི་རྩེ་མོ། སུམ་ཅུ་རྩ་གསུམ་གྱི་ལྷ་གནས། རྣམ་པར་རྒྱལ་བའི་ཁང་བཟང་གི་ལྷོ་ནུབ། མཚལ་རི་ལྷ་ཡི་འདུན་ས། འོད་ཀྱི་ལྷ་རི་སྤོ་མཐོན་ཞེས་པ་མཚལ་གྱི་རི་བོ་ཟུར་གསུམ་དབྱིབས་ལེགས་ལ་འཕང་མཐོ་བ། དེའི་རྩེ་་ལ་ཤེལ་གྱི་རྡོ་རིང་ཡེ་ཤེས་ཅན་ཞེས་པ་ཁྲུ་བཅུ་དྲུག་པ་འདིའི་སྟེང་ལ་ཉི་ཟླ་པད་མའི་གདན་ཡོད་པ། བསྟན་གཙོ་རྣམས་ཀྱིས་བོན་བསམ་ལས་འདས་པ་བཤད་པའི་ཁྲིའོ། ཡར་སྤེལ་མར་སྡུད་དུ་སྟོན་པ་ཆུ་བོའི་རྒྱུན་ལྟ་བུ་ནི། བར་མི་ཡུལ་དུ་བསྒྲགས་པའི་ཤེར་ཕྱིན་གྱི་འབུམ་སྡེ་རྣམས་སོ། རྒྱས་པའི་སྐོར་ལ་གཉིས་ཞེས་པས། དང་པོ་རྒྱས་པའི་རྒྱས་པ་ནི། བྱེ་མ་ལ་ཉིས་ཁྲི་ཆུ་རྒྱུན་གྱི་འབུམ། གཙང་གི་བན་སྡེ་མི་གསུམ་གྱིས། དབུས་ཡུལ་གྱི་གཏེར་མ་བདལ་འབུམ་ལས། དཔེ་ལ་མཚན་དུ་གསོལ་བ་བྱེ་མ་ཉིས་ཁྲི་ཆུ་རྒྱུན་གྱི་འབུམ། དོན་ལ་མཚན་དུ་གསོལ་བ་ཁམས་བརྒྱད་གཏན་ལ་ཕབ་པའི་འབུམ་ཞེས་དང་དེ་ལ་ཁྲི་ཕྲག་གི་དོན་དང་། འབུམ་ཕྲག་གི་འགྲེས་སུ་ཡོད་པ་གསུངས་པའི་ཕྱིར། བོན་བསྟན་སྔ་དར་སྐབས་སུ་འབུམ་འདི། གཏེར་སྟོན་ཆེས་སྔ་བར་སྤྱི་ལོར་༩༡༣ལོར་རྒྱ་གར་ནས་བྱོན་པའི་ཨ་ཙ་ར་དཀོན་མཆོག་གྲགས་པ། ཉ་མོ་མགོན་པོ། སད་ཀུན་རད་ན། གསུམ་གྱི་དབུས་བསམ་ཡས་ནས་གཏེར་དུ་བཏོན་ནས། གཟེ་བོན་ཤེས་རབ་རྒྱལ་མཚན་གྱི་ནང་མི་གཟེ་བོན་སྒུར་པོས་བཀྲོལ་བའོ། ཕྱི་དར་སྐབས་སུ་ལྡེམ་བོན་གྱིམ་ཚ་རྨ་ཆུང་གིས་སྦས་པ། གཏེར་སྟོན་སུམ་ཅུ་པ་གཉེན་སྟོན་ཤེས་རབ་རྡོ་རྗེས་གཙང་འཕྲང་ནུ་མའི་བྲག་ནས་བཏོན་པར་འདོད་པ་དང་། ལི་ཤུ་དང་བཻ་རོ་གཉིས་ཀྱིས་ལྕགས་མོ་བྱ་ལོར། བསམ་ཡས་ཅ་ཏི་སྒོ་མང་མཆོད་རྟེན་དམར་པོ་རུ་སྦས། ཕྱིས་སུ་གོང་མི་གཉིས་ཀྱི་རྣམ་སྤྲུལ་གཏེར་སྟོན་ཨང་༡༠༡-༡༠༢གསང་བདག་ཏྲེའུ་རྒྱ་ར་ཛ་དང་། སད་གུ་རིན་ཆེན་གྲགས་པ་རྣམ་གཉིས་ཀྱི་གོག་ཤུལ་སྒྲོམ་ཐོན་ལྷ་ཁང་རྒྱབ་ནས་དངོས་གྲུབ་དུ་རྙེད་པར་འདོད་པ་དང་མི་མཐུན་པ་རྣམ་པ་གཉིས་སུ་ཡོད་པའོ། ཀུན་མཁྱེན་ཁོང་གིས་བོད་དུ་ཕྱི་དར་སྐབས་སུ་འབུམ་འདི་གཏེར་སྟོན་ངོས་མ་བཟུང་བ་མ་ཟད། མཁས་པ་འགས་གཏེར་དུ་བྱོན་པ་གསུངས་རུང་ཁོ་བོས་ནི་དེ་སྔོན་མཐོང་ཡུལ་དུ་མ་གྱུར་བས། མཇལ་ཚེ་འབུམ་སྡེའི་དབུ་ཡིན་པར་ལུང་གིས་གྲུབ། ཅེས་གསུངས་པའོ། རྒྱས་པ་ཙམ་ནི། སྲིད་རྒྱུད་ལས། སྟོང་རྒྱུང་མཐུ་ཆེན་སྤྲུལ་པ་ནི། འཆི་མེད་གཙུག་ཕུད་དངོས་མཚུངས་པའི། དམུ་རིག་སྒ་ཚ་གཤེན་གྱི་རྒྱུད། གཤེན་སྒུར་ཀླུ་དགའ་བྱ་བ་འབྱུང་། མཚོ་སྔ་བྲག་གི་གཏེར་སྒོ་འབྱེད། ཅེས་ལུང་ཟིན་གྱི་སྐྱེས་མཆོག་བོད་དུ་སྤྱི་ལོ་༡༠༡༧བསྟན་པ་ཕྱི་དར་གྱི་ཐོག་མ་བྱོན་པ། གཏེར་སྟོན་བརྒྱ་དང་རྩ་བརྒྱད་ཀྱི་གཙོ་བོ། ས་སྟེང་གི་སྐྱེས་ཆེན་མཚན་བརྗོད་པར་དཀའ་བ་གཤེན་གྱེར་རྨ་དབྱིལ་གྱི་ནང་ཚན་གཤེན་ཆེན་ཀླུ་དགའ་བྱ་བ་དེ་ཉིད་ཀྱིས་ལྷོ་འབྲི་མཚམས་མཐའ་དཀར་ནས་དངོས་གྲུབ་ཏུ་རྙེད་པའི་ཤེར་ཕྱིན་འབུམ་ཁམས་ཆེན་ནམ་སྟོང་ཕྲག་བརྒྱ་པར་གྲགས་པར་ཤོ་ལོ་ཀ་སྟོང་ཕྲག་བརྒྱ་དང་སྲིད་པའི་ཁམས་བམ་པོ༤༡རིན་ཆེན་རྒྱུད་ཁམས་༤༨སྣང་ཁམས་༤༧སྟོང་ཁམས་༤༩སོ་སོའི་ཁམས་༤༩རིགས་ཁམས་༤༡དབྱིངས་ཁམས་༥༠མཉམ་ཁམས་༥༡དེ་ལྟར་ཁྱོན་བམ་པོ་༢༥༥ཕྱག་རྒྱའི་ཡན་ལག་སྟོང་དང་རྩ་བརྒྱད། ལེའུ་བརྒྱད་ཅུ་གྱ་གཅིག་བཞུགས་པ་འདིའོ། གྲུབ་པའི་ཁྱུ་མཆོག་ཆེན་མོ་རྣལ་འབྱོར་བ་ཞབས་དཀར་བའི་ཞལ་སྔ་ནས། ཕྱོགས་གཅིག་ཤེས་ནས་གཉིས་མ་མཐོང་། གཡག་ཞར་རྩྭ་ཟན་འདི་རེ་སྡུགགྲུབ་མཐའི་གསང་དོན་མ་རྟོགས་པར། སྐུར་བ་འདེབས་པ་འདི་རེ་སྡུགཅེས་གསུངས་པ་ལྟར་རྩོད་ལྡན་སྙིགས་མ་ལྔ་བདོ་བའི་དུས་འདིར་བདེན་དོན་ཆེད་བསད་བྱེད་པའི་གཞན་སྡེ་ཁ་ཅིག་གིས། རྫུན་གྱི་ཕམ་པ་དང་། སྒྲོ་སྐུར་གྱི་ཉེས་དམིགས་ལ་མི་བསམ་པར་གྲུབ་མཐའ་སོ་སོའི་གཞུང་ལུགས་ཀྱི་གོ་དོན་དང་། ལོ་རྒྱུས་སོགས་ལ་རྣམས་དཔྱོད་ཤེས་རབ་གྱི་མིག་འབྲས་ཟུམ་ཞིང་། ནེ་ཙོའི་མི་སྐད་སྨྲ་བ་ལྟ་བུའི་ཡ་མ་བརླའི་ཚིག་སྒྲོས་ཙམ་ལ་བསྙེགས་ནས་ཞིབ་འཇུག་གི་ཁུར་ཙམ་འཛིན་པའི་རྨོངས་པ་མགོ་འཐོམ་དེ་དག་ལ་བཟང་ངན་གྱི་ལན་ཅི་ཡང་མི་སྨྲ་བ་རང་སྣང་གང་དྲན་གྱིས་སྒོ་ནས་ངན་པ་ལང་ཤོར་དུ་བཏང་ཚེ། རང་རེས་གངས་ཅན་བོད་ཀྱི་ཆོས་སྲིད་གང་ལའང་ཕན་པ་སྤུ་ཙམ་ཞིག་མེད་པར་མ་ཟད་ཆོས་ལྡན་རྒྱལ་ཁབ་ཀྱི་ཆོས་ལུགས་ནང་ཁུལ་གྱི་མཐུན་སྒྲིལ་ལ་གནོད་པ་ཧ་ཅང་ཆེ་བས། གངས་ཅན་པ་ང་ཚོ་ལ་འགོང་བོ་སྤུན་དགུའི་སྣ་དྲངས་མཁན་ཡང་ཁྱོད་ཡིན་པས་དེས་ན་ཁོ་བོས་ཕྱོགས་ལྷུང་གི་ངག་འཁྱལ་དང་ཚིག་རྩུབ་སྤངས་པའི་སྒོ་ནས་ལན་ཞིག་འབུལ་བ་ལ། ཁྱེད་ཅག་རྩོམ་པ་པོ་ཚད་ལྡན་གང་ཡིན་པ་རྣམས་ཀྱིས། ལྷག་བསམ་རྣམ་དག་གིས་བསྟན་པའི་དར་ཆེན་དགུང་སྔོན་དབྱིངས་སུ་ཕྱར་ནས། རོགས་རམ་བསིལ་འཇམ་མཉེན་མོའི་རླུང་གིས་བསྐྱོད་པར་ཐུགས་ཀྱི་དཀྱིལ་འཁོར་ཟབ་མོ་རུ་ནན་གྱིས་འཛིན་པར་བཀའ་དྲིན་ཆེ་ཞུ། དེ་ཡང་སེར་སྨད་སྦོམ་རའི་དགེ་བཤེས་ཡེ་ཤེས་དབང་ཕྱུག་ཟེར་བ་ཞིག་གིས་རྩོམ་བྲིས་གཙོ་འགན་ཁུར་བའི། ༼གྲུབ་མཐའ་ཁག་གི་ཆོས་འབྱུང༽ཟེར་བ་ཞིག་གི་དེབ་ཐོག་ཏུ། བན་བོན་གང་གི་ལུང་རིགས་ལ་མི་མཐུན་པ་ཞིག་བྲིས་འདུག་པ་ལ། ཇི་སྐད་དུ། རྫུན་དང་གཡོ་རྒྱུའི་སྤྱོད་ཚུལ་གོམས་རྣམས་ཀྱིས། ཁ་ནས་མི་འབྱུང་ལོག་པའི་ཆོས་ཡོད་མིན། ཞེས་གསུངས་པ་ལྟར། དབང་ཕྱུག་ན་རེ། ཁྱོད་སངས་རྒྱས་གཡུང་དྲུང་བོན་གྱི་བསྟན་པ་ལ་སྡང་དགོས་དོན་མེད་ཀྱང་། རྩོད་གཞི་མེད་པར་རྩོད་པ་བཟོ་བའི་ཉེས་པ་རང་མགོ་རུ་འབད་མེད་ངང་འཁོར་བས། ཁྱོད་ཀྱི་ཉོག་བཤད་འཁྱལ་གཏམ་གྱི་ཚིག་རྩུབ་འདི་ལྟར་ཏེ། བསྒྱུར་བོན་གསུམ་ལས་དང་པོ་བསྒྱུར་བ་ནི། པཎ་ཌི་ཏ་ཤམ་ཐབས་སྔོན་པོ་ཅན་གྱི་ཆོས་མང་པོ་གཏེར་ནས་བཏོན་ཏེ་དར་བར་མཛད། བར་དུ་བསྒྱུར་བ་ནི། རྒྱལ་པོ་ཁྲི་སྲོང་ལྡེའུ་བཙན་གྱི་དུས་སུ་རྒྱལ་བའི་བྱང་ཆུབ་ཟེར་བ་ཞིག་གིས་བོན་དང་བསྡེབས་ནས་སངས་རྒྱས་ཀྱི་གསུངས་རབ་འགའ་ཞིག་བོན་དུ་བསྒྱུར་བ་ལ་ཆོས་རྒྱལ་ཁྲི་སྲོང་ལྡེའུ་བཙན་གྱིས་དེ་བཞིན་གཤེགས་པའི་གསུང་རབ་བོན་དུ་བསྒྱུར་བ་པོ་རྣམས་སྐེ་ཆོད་གསུངས་པས། བསྒྱུར་བ་པོ་དེ་དག་སྐྲག་སྟེ་རྒྱལ་བའི་གསུང་རབ་བསྒྱུར་འཕྲོ་དང་བཅས་པ་གཏེར་དུ་སྦས་པ་ན། ཕྱིས་སུ་བཏོན་ནས་བོན་གཏེར་མ་ཟེར་ཞིང་དར་སྤེལ་བྱས། ཐ་མར་བསྒྱུར་བ་ནི་གླང་དར་གྱི་བསྟན་པ་བསྣུབས་རྗེས། གཙང་ཉང་སྟོད་ནས་གཤེན་སྒུར་ཀླུ་དགའ་བྱ་བས། དར་ཡུལ་སྒྲོ་ལག་ཅེས་པ་དབུས་ཀྱི་བོན་གནས་ཤིག་ཏུ་སངས་རྒྱས་ཀྱི་བཀའ་མང་པོ་བོན་དུ་བསྒྱུར་ཏེ། ཡུམ་རྒྱས་པ་ཁམས་ཆེན། ཉི་ཁྲི་ཁམས་ཆུང་། གཏན་ལ་དབབ་པ་བོན་མདོ། གཟུངས་སྡེ་ལྔ་ལ་ཀླུ་འབུམ་དཀར་ནག་ཅེས་བཏགས་ནས། མཚོ་ལྔ་འདྲེའུ་ཆུང་གི་བྲག་ལ་གཏེར་དུ་སྦས་ཕྱིས་སུ་ཀླུ་དགའ་རང་ཉིད་ཀྱིས་བཏོན། བསྒྱུར་བོན་སྔ་ཕྱི་གསུམ་ལ། ཆབ་དཀར་དང་། འབྲས་བུའི་བོན་ཟེར། གོང་གི་བོན་གཉིས་ལ་ཆབ་ནག་དང་རྒྱུ་ཡི་བོན་ཟེར་བ་ཡིན། གོང་དུ་པཎ་ཌི་ཏ་ཤམ་ཐབས་སྔོན་པོ་ཅན་གྱིས་ཆོས་མང་པོ་གཏེར་ནས་བཏོན་ཏེ་ཞེས་པ་ནས། ཕྱིས་སུ་བཏོན་ནས་བོན་གཏེར་མ་ཟེར་ཞིང་དར་སྤེལ་བྱས་ཞེས་པའི་བར་གྱི་ཁུངས་མེད་ལུང་མེད་ཀྱི་རྫུན་དང་གཡོ་རྒྱུའི་ཚིག་ངན་ལ། ཤེས་རབ་རལ་གྲིས་མི་ཆོད་པ་དང་། གནམ་ལྕགས་ཐོ་བས་མི་སས་རྒྱུ་གང་ཡང་མེད་པས། བརྒལ་ལན་ཕྲག་དོག༼དུག་ཕུང་བསྲེག་པའི་མེ་དཔུང་ཞིག་སྤྲོ་བར་འདོད་པར། དྲི་བ། འོ་ན་ཁྱོད་ཀྱི་ཆོས་རྒྱལ་ཁྲི་སྲོང་ཡར་སྔོན་རྒྱལ་བོ་གང་གི་རིང་དུ་དར་ནུབ་བྱུང་ནས་གཏེར་དུ་སོང་། གཏེར་སྦས་མཁན་གང་ཟག་སུ་ཁྱེད་ཀྱིས་ཆོས་ལ་ཁྲི་སྲོང་ཡར་སྔོན་དུ་ནུབ་རྐྱེན་སོང་བའི་ལོ་རྒྱུས་མེད་པར་གཏེར་དུ་སྦས་དོན་ཅི། ཁྱེད་རང་ཚོའི་ལོ་རྒྱུས་ཚད་ལྡན་གང་གི་ནང་དུ་ཆོས་རྒྱལ་ཡར་སྔོན་དུ་གཏེར་དུ་སོང་བའི་རྒྱུ་མཚན་མེད་པ་གང་། དེས་ན་ལས་འབྲས་ལ་བློ་གཏད་མེད་པར་དགེ་བཤེས་ཀྱི་མིང་རྐྱང་ཙམ་ཁུར་བས་སངས་རྒྱས་བསྟན་པའི་ཞབས་འདྲེན་ཁྱོད་ཀྱིས་རྫུན་ཁུག་ཤུགས་ཀྱིས་བརྡོལ་བ་ཡིན་པ་ཨེ་ཤེས། རྫུན་པ་རང་གི་ཕུག་མི་ཐུབ། བདེན་པ་རྡོ་རྗེའི་བྲག་ཀྱང་འགས། ཞེས་པའི་ལུང་དེ་ཁྱོད་དང་ཁྱོད་ལྟ་བུའི་ཕྱོགས་ལྷུང་གིས་གྲུབ་མཐའ་སྨྲ་མཁན་ལ། སྟོན་པ་ཐུགས་རྗེ་ཅན་གྱིས་བརྩེ་བའི་སྙིང་རྗེས་གཟིགས་པའི་ངང་ལེགས་པའི་ལམ་སྟོན་གྱི་བསླབ་བྱ་ཡིན་པ་ཤེས་སམ། གཉིས་པ་གླང་དར་གྱི་བསྟན་པ་བསྣུབས་རྗེས། གཤེན་སྒུར་ཀླུ་དགའ་བྱ་བས་སངས་རྒྱས་ཀྱི་བཀའ་མང་པོ་བོན་དུ་བསྒྱུར་ཞེས་པ་ནས། གོང་གི་བོན་གཉིས་ལ་ཆབ་ནག་རྒྱུ་ཡི་བོན་ཟེར་བ་ཡིན་ཞེས་པའི་བར་གྱི་ལན། ལུང་ལས། མ་རྟོགས་སེམས་ཅན་ཚིག་གིས་མ་ཁྲིད་ན། མུན་པའི་འཛུབ་གཡུག་དེས་ཀྱང་བརྡ་མི་འཕྲོད། ཅེས་པ་ལྟརམུན་པའི་འཛུབ་གཡུག་ཙམ་མིན་པར། ལུང་རིག་ཟུང་འབྲེལ་གྱི་སྒོ་ནས་ལན་ཞིག་སྤྲོ་བར་འདོད་པས། ཕྲག་དོག་གཏི་མུག་གིས་དབང་དུ་མ་སོང་བར། རྣམ་ཤེས་གཏོད་བློ་རིག་སྒྲིམས་ལ་རྩེ་གཅིག་གཡེང་མེད་ངང་ལྷག་བསམ་རྣམ་དག་གིས་ཉོན་ཅིགཁྱོད་རང་ཚོའི་ནང་ལོག་ལ་བཅོམ་ལྡན་འདས་ཀྱི་ཐེག་ཆེན་གྱི་བཀའ་གསུངས་མ་གསུངས་ཀིིས་རྩེ་གཉིས་ཀྱི་ཐེ་ཚོམ་ཟ་བའི་གླེང་སློང་བྱུང་བ་ཅི། ད་དུང་དེ་བཞིན་གཤེགས་པའི་གསུངས་པས་ཐེག་དམན་གྱི་བཀའ་ཡོངས་སུ་རྫོགས་པ་སྐད་རིགས་གཞན་པཱ་ལའི་ཡིག་ཐོག་སོགས་སུ་ཡོད་ལ་ཐེག་ཆེན་གྱི་ལྟ་སྤྱོད་བསྟན་པའི་བཀའ་ལུང་གཅིག་ཀྱང་མཐོང་རྒྱུ་མེད་པས་རྒྱུ་མཚན་ཅིས་ཕྱིར། བཅོམ་ལྡན་འདས་ཀྱི་ཆ་ལུགས་དང་ཧ་ཅང་མཐུན་པའི་དེའི་རྗེས་འབྲང་དགེ་སློང་སེར་པོ་རྣམས་ཀྱིས་བཅོམ་ལྡན་འདས་ཀྱི་ཐེག་དམན་གྱི་བཀའ་མ་གཏོགས་ཐེག་ཆེན་གྱི་བཀའ་གསུངས་མེད་ཟེར་ནས་མཐའ་གཅིག་ཏུ་དམ་བཅའ་བྱེད་དགོས་དོན་ཅི་བྱུང་། ཁྱེད་ཚོའི་རྒྱུ་མཚན་གཞན་ཞིག་ནི། མི་ཡུལ་དུ་ཐེག་ཆེན་གྱི་བཀའ་བསྟན་སའི་སྣོད་མེད་པར། དེ་བཞིན་གཤེགས་པའི་དགོངས་ནས་ཀླུ་ཡུལ་དུ་བསྟན་ཞེས་པས་ཡར་མཐོ་རིས་མི་ལ་བསྟན་པའི་སྣོད་མེད་པར། མར་བྱོལ་སོང་ཀླུ་རིགས་ལ་ཐེག་ཆེན་གྱི་ཆོས་བསྟན་པའི་སྣོད་ཡོད་ཅེས་བཤད་ནས་གོ་ལྡོག་པ་དེ། བླུན་པོ་གནག་རྫིས་ཀྱང་ཧབ་བགད་ཤོར་བའི་མཚར་གཏམ་ཞིག་མིན་ནམ། སྨྲས་པ། སྙོམས་པར་མི་འཇོག་ཕྲག་དོག་རྩོད་པ་འདི། དོན་དག་འགལ་འདུའི་མཚོན་ཆ་རྣོན་པོ་ཞིགམཐར་ཐུག་བོད་ཡུལ་འཕོང་བའི་རྒྱུ་རུ་འགྲོ། དེའི་ཕྱིར་བོན་ཆོས་མ་རྩོད་རང་སར་ཞོགཡུམ་རྒྱས་པ་ཁམས་ཆེན་དུ་བསྒྱུར་བ་ཡིན་ན། ཁམས་ཆེན་སྟོང་ཕྲག་བརྒྱ་བ་ལ་པོ་ཏི་༡༦ཁྱེད་ཀྱི་ཡུམ་རྒྱས་པ་ལ་གླེགས་བམ་༡༢ལས་མེད་པས་བཞི་ལྷག་པར་ཅིའི་ཕྱིར། བོན་ལུགས་ཀྱི་རྒྱས་པ་ཙམ་དེ་ལའང་ཤོ་ལོ་ཀ་བརྒྱ་འམ་འབུམ་བམ་པོ་༣༦༠ཕྱག་རྒྱའི་ཡན་ལག་སྟོང་དང་རྩ་བརྒྱད་ཡོད་པས་འཁོར་འདས་ཀྱི་བོན་ཐམས་ཅད་སེམས་དབྱིངས་སྐྱེ་མེད་ཀྱི་ཀློང་དུ་གཏན་ལ་ཕབ་པ་ལ་འཕྲོ་ལུས་མེད་པས་ཁྱེད་ཀྱི་ཤེར་མདོ་འབུམ་དང་ཉི་ཁྲི་བརྒྱད་སྟོང་བ་གསུམ་ཀར་བསྡོམ་པའི་དུམ་བུ་༡༦ལས་མེད་པས། བོན་གྱི་ཁམས་བརྒྱད་གཏན་ལ་དབབ་པ་ཆོས་ལུགས་སུ་བསྒྱུར་བའི་འཕྲོ་གླེགས་བམ་བཞི་བསྒྱུར་འགྲོ་ལུས་པ་མ་ཡིན་ནམ། དེས་ན་གཞུང་ལུགས་གང་དང་གང་ཞིག་ཡིན་ཡང་དེ་དག་གི་བྱུང་ཚུལ་མི་ཤེས་པར་རྨོངས་པས་རང་བཟོས་རྨོངས་པ་རྣམས་ཚིམ་ཀྱང་། ཚུལ་ལྡན་གྱི་མཁས་དབང་དག་ཐུགས་ཁྲེལ་བའི་རྒྱུའོ། སྤྲུལ་སྐུ་གཤེན་ཆེན་ཀླུ་དགས་ལྷོ་འབྲི་མཚམས་མཐའ་དཀར་ནས་གཏེར་ནས་བཏོན་པའི་ཤེར་ཕྱིན་གྱི་འབུམ་སྡེ་རྣམས་བོན་ཅན། སྤྱི་ལོའི་སྔོན་༦༨༣གྲི་གུམ་གྱི་དུས་སུ་སངས་རྒྱས་གཡུང་དྲུང་བོན་གྱི་རྒྱལ་བསྟན་རིན་པོ་ཆེ་ལ་བསྣུབས་རྐྱེན་བྱུང་ནས་སྦས་པ་ཡིན་ཏེ། དེ་དུས་སུ་སྟོང་རྒྱུང་སོགས་མཁས་པ་གོང་མ་བཞིས་སྦས་པར་གསུངས་པའི་ཕྱིར། བསྒྲགས་པ་གླིང་གྲགས་ལས། མཁས་པ་མི་བཞིས་ཐེག་པ་དགུའི་བོན་ཐམས་ཅད་དྲིལ་ནས་མཚོ་རྔའི་བྲག་ཀ་རི་ལ་སྦས་ཞེས་གསུངས་པའི་ཕྱིར། ད་དུང་རྒྱལ་པོ་ཁྲི་སྲོང་གི་ལོ་༣༢ཐོག་དུས་རབས་བདུན་པའི་ནང་བོན་བསྣུབས་པའི་སྐབས་བྷོ་ཏི་སོགས་བན་དེ་རྣམས་ཀྱིས་བོན་སྡེ་མང་པོ་ཆོས་སུ་བསྒྱུར་ཏེ། བོན་གྱི་སེམས་ཕྱོགས་ཀྱི་སྡེ་རྣམས་ཆོས་ཀྱི་སེམས་ལུང་། བོན་གཡུང་དྲུང་གི་ཁམས་བརྒྱད་ཤེར་མདོ་འབུམ། བོན་གཡུང་དྲུང་གི་གསེར་གྱི་ཡང་ཞུན། ཆོས་ལྟ་བ་གཅེར་མཐོང་། བོན་བྱང་སེམས་གབ་པ། ཆོས་སེམས་སྨད་ཕྱོགས་སུ་བསྒྱུར་ཞིང་བཅོས། བོན་བསྒྲགས་པ་རིན་པོ་ཆེ་ཆོས་མཛོད་གོང་མ་བྱ་བ་བསྒྱུར་རོ། དེ་བཞིན་དུ་བོན་སྡེ་མང་པོ་ཆོས་སུ་བསྒྱུར་ཏེ་མཚན་སྤོས། བོན་གྱི་གསས་ཁང་དང་མཆོད་རྟེན་ལ་ལ་བཤིགས་ལ་ལ་ཉིང་ཞལ་བྱས་ནས་ཆོས་ཀྱི་གཙུག་ལག་ཁང་ཞེས་མིང་བཏགས། དེ་དུས་མ་མཆོག་སྲིད་པའི་རྒྱལ་མོའི་ཐུགས་སུ་བསྙུང་ནས་རྒྱལ་པོ་གཉིད་པའི་རྨི་ལམ་དུ་བུད་མེད་ནག་མོ་ལྕགས་ཀྱིརལ་བ་ཕྱ་ལེ་བ་སྤྱན་གསུམ་མཆེ་བ་གཙིགས་པ་སྐུ་ལ་རྨ་བྱའི་ཐུལ་བ་གྱོན་པ་ཞིག་གིས་རྒྱལ་པོ་ལ་འདི་སྐད་ཅེས་གསུངས། ངའི་བོན་སྒོ་བཞི་མཛོད་དང་ལྔ་། གཞུང་ཆ་ལག་འགྲེལ་བ་རྣམས་ང་ལ་གཏོད་ཅིགགལ་ཏེ་མི་གཏད་པ་བསྒྱུར་ཞིང་བསྣུབས་ན་ལོག་ཆོས་ཁེ་དྲག་ལ། སྤྱད་ཀྱང་མི་ཁོམ་པར་ཁྱོད་ཀྱི་ཚེ་ཉི་མ་ཐལ་བ་དང་སྙོམ་པའི་རྟིང་དུ་ཏིའི་དམྱལ་ཁམས་སུ་སྦྱོང་ངོ་། གསུང་ནས་མེད་དེ་སོང་ངོ་རྒྱལ་པོ་ཡང་ཐུགས་སྐྲག་ནས་དེ་ཕྱིན་ཆད་བོན་རྣམས་ཆོས་སུ་བསྒྱུར་ཞིང་བསྣུབས་པའི་ཕོད་པ་ཆུང་ངོ་། དེ་ལྟར་ལུང་རིགས་ཉི་ཟླ་ཟུང་འབྲེལ་གྱིས་ཁྱོད་ཀྱི་རྨོངས་བློ་བསལ་ཐུབ་པར་གྱིས། ད་དུང་རིན་ཆེན་གསེར་གྱི་ལྡེ་མིག་གིས། ཁྱོད་བློ་རྨོངས་པའི་སྒོ་མི་འབྱེད་ན་གནས་སྐབས་གང་གིས་ཕན་པའི་ཐབས་ཟད། ཀྱེ་ཧུད་སྒྲིབ་གཉིས་བག་ཆགས་འཐུག་པོའི་འཇིགས་པ་ཅན། །ཟབ་མོའི་དོན་ལ་དཔྱོད་པའི་ཤེས་རབ་མེད། །དོན་མེད་ཅ་ཅོ་སྒྲོག་ལ་ཅི་དགར་སྤྱོད། །དེར་མ་ཟད་གཤེན་ཀླུ་དགའི་གཏེར་ཁ་ལ་སྔགས་ཕྱི་ནང་ཞི་རྒྱས་དབང་དྲག་གི་བོན་ཟབ་པ་མཐའ་ཡས་པ་དག་སྐལ་ལྡན་གྱི་སློབ་མ་རྣམས་བརྒྱུད་དེ། དེ་དག་གིས་བསྒྲུབས་པས་གྲུབ་རྟགས་བསམ་གྱིས་མི་ཁྱབ་པར་བྱུང་ཞིང་གྲུབ་པར་བརྙེས་པ་ཤ་སྟག་ཡིན་ལ། བསྒྱུར་བོན་འདྲ་ཆོས་ལ་དེ་འདྲའི་རྟགས་མཚན་དང་གྲུབ་ཐོབ་བྱུང་པ་ཕར་ཞོགརྒྱུ་འབྲས་དང་བདེན་དོན་ལམ་ནས་བསྟན་པ་སྐྱོང་བའི་འཇིག་རྟེན་མངའ་དབང་ཅན་གྱི་བཀའ་ཆད་ཕོག་པ་ཨེ་ཤེས། ཀླུ་འབུམ་དཀར་ནག་སོགས་ཀྱང་གཤེན་ཀླུ་དགའི་གཏེར་མ་མ་ཡིན་པར་འཁྱལ་གཏམ་དུ་སྨྲ་བར་ཟད་དོ། སྣང་བའི་བདག་པོའི་འོད་མདངས་ཀྱིས། །མུན་པའི་ཁ་དོག་དྲུང་ནས་བཅིལ། །ཕྱོགས་ལྷུང་བྲལ་བའི་བདེན་ཚིག་་གིས། །རྫུན་གྱིས་རྩ་བ་ལྷང་ངེར་བུད། །༼ནོར་མཛོད་ཅེས་པའི་དུས་དེབ་ཞིག་གི་ཐོག་ཏུ། དུག་ལྔའི་ནད་གཅོང་གིས་ཧ་ཅང་གཟིར་བའི་རྨོངས་འཐིབ་གཉིད་ལས་མ་སངས་པའི་ལོག་སྨྲ་བ་ཁ་ཅིག་གིས་རྩོད་ལྡན་ཚེ་ལོ་བརྒྱ་ཡི་མགོན་པོ་ཡང་དག་པར་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་མཆོག་གིས་སྲོལ་བཟང་བཏོད་པའི་མི་ལོ་༡༨༠༣༥་ཡན་གྱི་ལོ་རྒྱུས་ལྡན་པའི་ཡང་མེས་སངས་རྒྱས་གཡུང་དྲུང་གི་བོན་འདི་ལ་སྐྱབས་འགྲོ་མེད་ཚུལ་དང་བཀའ་བསྟན་འགྱུར་སོགས་མེད་ཚུལ་དུ་མ་ཞིག་བཤད་ནས། དེང་སང་བོན་ཡར་རྒྱས་ཟེར་ན་འདྲ། ནང་ཆོས་དང་འབྲེལ་བ་བྱུང་ནས་སྐྱབས་འགྲོ་སོགས་ནང་བའི་བོན་སྒོ་དུ་མ་ཞིག་ཡོད་ཚུལ་བཤད་པ་མ་ཟད། ལོ་རྒྱུས་ཐོག་ནས་བོན་གཞུང་འདི་ང་ཚོའི་ཕ་མེས་ཀྱི་རིག་གཞུང་ཆགས་བསྡད་ཡོད་པ་རེད། ངེས་པར་དུ་བརྩི་བཀུར་བྱེད་དགོས་རྒྱུ་རེད། དེའི་རྒྱུད་འཛིན་དགོས་པ་རེད་ཟེར་ནས། ཚིག་གོང་འོག་གིས་འགལ་འདུ་སྟག་སྤྲོད་བྱེད་པའི་ངང་། རང་ཁ་སྒོ་མོའི་ནང་ནས། རང་སྲོག་གཅོད་པའི་སྟ་རེ་ཟེར་བ་ལྟར། ཁ་ནས་ང་ཚོའི་ཕ་མེས་ཀྱི་རིག་གཞུང་ཟེར་བཞིན། ཁུངས་བཙུན་ཡང་དག་མ་ཡིན་པར་དུ་མ་ཞིག་བྲིས་འདུག་པ་ལ། ཇི་སྐད་དུ། རྡོ་རྗེ་གླིང་བའི་གཏེར་མ་བཀའ་ཐང་ལས། བོན་དང་ཆོས་གཉིས་བོན་སྔ་བས། ཆོས་ཀྱི་བྱུང་ཁུངས་བོན་ལ་ཐུགཆོས་པའི་བོན་གཤེ་དམ་ཚིག་ཉམས། རྐྱེན་དེའི་རང་བསྟན་རང་གིས་བཤིགས། ༼ཞེས་གསུངས་པའི་ཕྱིར། འཁོར་གསུམ། དམ་ལོག་ཁྱོད་ལྟ་བུ་ལ་དགོངས་ཏེ་གསུངས་པ་མ་ཡིན་ནམ། སྒྲོལ་མ་དགུ་སྐོར་ལས་ཀྱང་། གཤེན་རབ་དང་ཐུབ་པའི་བསྟན་པ་རྣམ་གཉིས། གཅིག་སྟེང་གཅིག་དར་གྱི་འགྲོ་དོན་བྱེད་པའོ། ལྔ་བརྒྱའི་ཐ་མ་ལ། ལ་ལས་གཡུང་དྲུང་བོན་མི་བདེན། ལ་ལས་དམ་པའི་ཆོས་མི་བདེན་ཟེར་ཡང་འཁྲུལ་བའོ། ངོ་བོ་དབྱེ་བ་མེད་པ་དང་། སྤྱོད་ཚུལ་སོ་སོར་སྤྱོད་པའི་དོན་གྲུབ་པའོ། ཞེས་གསུངས་པའི་ཕྱིར། འཁོར་གསུམ། དེས་ན་སངས་རྒྱས་སྟོན་པ་གཤེན་རབ་བོན་ཅན། ཁྱོད་ཀྱི་བསྟན་སྒོར་ཞུགས་པར་མཆོག་གསུམ་ལ་སྐྱབས་སུ་འགྲོ་དགོས་པ་ཡིན་ཏེ། མདོ་དྲི་མེད་ལས་སྟོན་པ་བླ་མེད་སངས་རྒྱས་དང་། དེས་གསུང་ཞལ་ནས་བཅུད་འཐིག་པའི། སྐྱོབས་པ་བླ་མེད་བཀའ་རྒྱུད་དང་། དེ་དག་བསྟན་པའི་གཉེར་འཛིན་པའི། འདྲེན་པ་བླ་མེད་སེམས་དཔའ་གསུམ། དེ་ལྟར་ཡིད་བཞིན་ནོར་བུ་ལྟར། བླ་ན་མེད་པ་དཀོན་པའི་མཆོགཅེས་དང་། འབུམ་ལྔ་ལས། སྐུ་ལྔ་ཡེ་ཤེས་ལྔ་ཡི་མངའ་བདག་སངས་རྒྱས་ལ་སྐྱབས་སུ་མཆིའོ། ཚད་གསུམ་བདེན་པ་གཉིས་ཀྱི་རང་བཞིན་བོན་ལ་སྐྱབས་སུ་མཆིའོ། ས་གསུམ་སྤང་རྟོགས་རྣམས་ཀྱི་སྣ་འདྲེན་སེམས་དཔའ་ལ་སྐྱབས་སུ་མཆིའོ། ཞེས་དང་། ལོ་པཎ་ཤ་རི་དབུ་ཆེན་གྱི་གཏན་ཚིག་ངེས་པའི་གལ་མདོ་ལས། གཡུང་དྲུང་གནས་བཞི་མོས་འདུན་སྐྱབས་ཡུལ་མཆོགའཇིག་རྟེན་དབང་ཕྱུག་མོས་འདུན་སྐྱབས་ཡུལ་མིན། ཞེས་དང་། སེམས་ལུང་གསལ་བའི་སྒྲོན་མེ་ལས། གཡུང་དྲུང་གནས་བཞི་སྐྱབས་སུ་མ་སོང་ན། བདུད་དང་མུ་སྟེགས་འཁོར་བའི་བསླུ་བྲིད་འབྱུང་། ཞེས་དང་། འབུམ་ལས། ཡུལ་ཁྱད་པར་ཅན་སངས་རྒྱས་བོན་དང་སེམས་དཔའ་ལ། སྐྱབས་སུ་འགྲོ་བའི་རྟེན་དལ་འབྱོར་གྱི་ལུས་ཅན་རྣམས། འབྲས་བུ་བླ་ན་མེད་པར་ཡང་དག་པར་རྫོགས་པའི་སངས་རྒྱས་འཐོབ་པོ། དྲང་དོན་མུན་སེལ་སྒྲོན་མེ་ལས། ཕྱི་ནི་སངས་རྒྱས་བོན་དང་གཤེན་རབ་ལ། ལུས་ངག་ཡིད་གསུམ་མོས་བྱས་སྐྱབས་ཀྱི་རབ། ནང་གི་བླ་མ་ཡི་དམ་མཁའ་འགྲོ་ལ། གུས་འཇུག་མཉེས་པར་བྱ་བ་སྐྱབས་ཀྱི་རབ། གསང་བ་རྩ་དང་རླུང་དང་ཐིག་ལེ་ལ། རིག་པ་བྱང་ཆུབ་སེམས་ཀྱི་འགྲོ་ལྡོག་སྐྱབས་ཀྱི་རབ་ཅེས་དང་། ལེགས་བཤད་ལམ་རིམ་ལས། ཁས་དམན་པོ་ལ་དགྲ་བྱུང་ན། རྗེ་དཔོན་མྱུར་དུ་འཚོལ་བ་ལྟར། འཁོར་བའི་འཇིགས་ལས་སྐྱོབ་འདོད་ན། རིན་ཆེན་གསུམ་ལ་སྐྱབས་ཚོལ་ཞིགཅེས་གསུངས་པས། གསེར་ལྡན་འཛིན་མའི་ཁྱོན་གྱི་དགེ་བའི་ས་བོན་ཅིག་ཆར་དུ་སྨིན་ནུས་པའི་ལུང་རིགས་བདུད་རྩིའི་ཆར་ཆེན་འཛིན་པ་དེས། ཁྱོད་ཀྱི་རྨོངས་བློའི་དུད་དྲག་རྣམས་བཀྲུ་བར་གྱིས་ཤིགཔད་འབྱུང་གི་ཞལ་སྔ་ལས། སྔོན་ཚེ་བསྐལ་བ་སངས་རྒྱས་ཐམས་ཅད་དང་། ད་ལྟ་སྟོན་པའི་སྐུ་གསུང་ཐུགས་ཀྱི་བསྟན། ཅི་གསུང་ཐམས་ཅད་འགྲོ་དོན་ཡིན་པའི་ཕྱིར། བོན་དང་ཆོས་ཞེས་དབྱེ་བ་ག་ལ་ཡོད། པཎ་ཆེན་སྐུ་འཕྲེང་ལྔ་བ་བློ་བཟང་ཡེ་ཤེས་ཀྱིས། དབུས་གཙང་མངའ་རིས་བར་གྱི་གྲུབ་པའི་མཐའ། ཀུན་ཀྱང་ནང་པའི་བསྟན་པ་རོ་གཅིག་པས། ཕྱོགས་རིས་དབང་གིས་སྡང་ཞེན་མི་བྱེད་པར། དག་སྣང་ནོར་བུའི་འོད་ཀྱིས་ཁྱབ་ན་ལེགས། ཞེས་གསུངས་པའི་ཕྱིར། འཁོར་གསུམ། ད་དུང་སངས་རྒྱས་ཀྱི་ཕྲིན་ལས་ཕྱོགས་མེད་དུ་འཆད་པ་མ་རྟོགས་པར། བསྟན་པ་ལ་ངག་འཆལ་སྨྲ་བ་ཡིན་ན་ལོག་སྨྲ་ཁྱོད་ལ་གནས་སྐབས་ཐབས་གཞན་ཟད་དོ། ཁུང་ལྡན་ལུང་གི་རྒྱབ་རྟེན་མེད་པར། གཅིག་ཤོས་ལ་དད་པ་བྱེད་པ་དང་། གཅིག་ཤོས་ལ་སྡང་བར་བྱེད་པ་ནི། སྙིང་ལ་བདུད་ཞུགས་པའམ། རང་རྒྱུད་ཀྱི་དམ་ཚིག་ཉམས་པའི་སྔ་ལྟས་ཡིན་ཏེ། རྗེ་དགེ་འདུན་གྲུབ་པའི་ཞལ་ནས། ལར་ད་ལྟ་གངས་རིའི་ཁྲོད་འདི་ན། རང་བསྟན་པ་འཛིན་ལ་ཁས་ལེན་ཀྱང་། གཞན་བསྟན་འཛིན་དགྲ་བོའི་དྭངས་མར་འཛིན། ཚུལ་འདི་ལ་སྐྱོ་བ་གཏིང་ནས་སྐྱེ། བདག་དང་བོན་གྱི་འབྱུང་ཁུངས་ལེགས་པར་སྨྲ་བའི་མདུན་དུ་རྩོད་ནུས་སམ་མི་ནུས་ན། རྫུན་དང་གཡོ་རྒྱུའི་འཁྱལ་གཏམ་ལ་ཉེས་དམིགས་ཡོད་མེད་སོམས་ཤིགབོན་གྱི་བྱམས་མ་ལས། མ་ཅིག་སྐུ་ཡི་ལམ་འབྲས་ཉིད་ནི། མུ་སྟེགས་ཕ་རོལ་རྒོལ་བའི་གཤེད་མ། ཞེས་དང་། རྣམ་རྒྱལ་ལས། བདུད་དང་སྲིན་པོ་མུ་སྟེགས་ལ་སོགས་པ། ལྟ་བ་ལོགས་པ་ལྟ་བ་ཐམས་ཅད་ཀྱང་། རྣམ་པར་རྒྱལ་བའི་ངང་དུ་གྲོལ་བར་ཤོགགསང་སྔགས་ལས་ཀྱང་། ལྟ་བ་ལོག་པ་མུ་སྟེགས་ཀྱི་ལྟ་བ་སོགས་གསུངས་ནས། ཕྱི་ནང་གསང་གསུམ་གྱི་བོན་སྡེ་རྣམས་ལས། མུ་སྟེགས་སུན་འབྱིན་གྱི་དོན་གོ་བར་མཛོད་ཅིགདེས་ན་བཀའ་བརྟེན་འགྱུར་སོགས་ཀྱང་། བསྒྱུར་བ་པོ་ག་འདྲ་གང་འདྲས་བསྒྱུར་བ་རེད་ཅེས་ལོག་རྟོག་ཐེ་ཚོམ་གྱི་དབང་དུ་སོང་ནས་བླུན་པོའི་འཁྱལ་གཏམ་དུ་སྨྲས་པར་ཟད་དོ། མདོ་ལས། བོན་ལ་རྣམ་གྲངས་གསུམ་ཡིན་ཏེ། སྤྱི་རུ་ཐེག་པ་རིམ་དགུ་སྟེ། སྒོས་སུ་གསས་མཁར་སུམ་བརྒྱ་དང་། ཡང་དགོས་བརྒྱད་ཁྲི་བཞི་སྟོང་དབྱེ། ཞེས་དང་། སྟོང་ཕྲག་བརྒྱ་བ་ལས། ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོ་བོན་གྱི་སྒོ་མོ་བརྒྱད་ཁྲི་བཞི་སྟོང་བསྟན་པར་དགོངས་ནས། ཞེས་སོ། མདོ་འདུས་ལས། མདོ་འབུམ་རྒྱུད་མཛོད་བཞི་ཕྱེས་ལ། འཁོར་རྣམས་བཀའ་ནི་བསྡུ་བར་གྱིས། ཞེས་དང་། དེ་ཉིད་ལས། ཧོས་སྒོ་བརྒྱད་ཁྲི་བཞི་སྟོང་ནི། མདོ་འབུམ་རྒྱུད་མཛོད་སྡེ་བཞི་ལ། ཉིས་ཁྲི་ཆིག་སྟོང་སྒོ་བཞི་དབྱེ། ཞེས་གསུངས་པའི་ཕྱིར། བླུན་པོ་ཁྱོད་ཀྱིས་བན་བོན་གྱི་འབྱུང་ཁུངས་ཡང་དག་པར་མི་ཤེས་པར་ད་དུང་ཞིབ་འཇུག་བྱེད་ཁུར་བྱེད་ནས་བོན་རང་ལ་རང་སྐྱ་ཐུབ་པའི་བསྟན་འགྱུར་མེད་ཅེས་པས། ཁྱོད་ཀྱི་ཡིད་སེམས་དཔྱང་ཐག་འཁྱོག་པོ་བཀྲོལ་བའི་རིག་པ་ཡོད་དེ། གདུང་སོབ་མི་ཆོ་དང་། བླ་ཆེན་དྲན་པ། ལི་ཤུ་སྟག་རིང་། མཁས་པ་དཔལ་ཆེན། རྟག་གཟིགས་ཀྱི་མཁས་པ་དྲང་སྲོང་རྒྱལ་བ་མཁས་གྲུབ་ཡེ་ཤེས་རྒྱལ་མཚན། རྗེ་བཙུན་ཡར་མེ་བ། འ་ཞ་འགྲོ་མགོན་བློ་གྲོས་རྒྱལ་མཚན། རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན། མཁས་གྲུབ་རིན་ཆེན་བློ་གྲོས། སུམ་ལྡན་གཡོར་པོ་མེ་དཔལ། སྒ་རིགས་སྟོན་པ་ཚུལ་ཁྲིམས་རྒྱལ་མཚན། མཁས་གྲུབ་རྒྱལ་མཚན་མཆོག་ལེགས། གཤེན་སྟོན་ནམ་མཁའ། ཞང་སྟོན་ཚུལ་ཁྲིམས་བློ་ལྡན། འགྲོ་མགོན་བདུད་རྩི་རྒྱལ་མཚན། ཤར་རྫ་རིན་པོ་ཆེ། འཛམ་གླིང་གཙུག་རྒྱན་མཁན་རིན་པོ་ཆེ་ཀུན་མཁྱེན་ཉི་མ་བསྟན་འཛིན་དབང་གི་རྒྱལ་པོ་ལ་སོགས་མཁས་མཆོག་དུ་མས། གསུང་འབུམ་གླེགས་བམ་༣༠༠་ལས་བརྒལ་བའི་མཐོང་བ་མངོན་གྱུར་སྟོན་པ་ལ་མངོན་སུམ་ཚད་མའི་གནོད་པ་མེད་པས། བྱིས་པ་སོ་སོའི་མངོན་སུམ་གྱི་གཞལ་བྱ་དེ་བོན་ཅན། གཡུང་དྲུང་བོན་རང་ལུགས་ཀྱི་བཀའ་བརྟེན་ཡིན་ཏེ། སྟོན་པ་གཤེན་རབ་ཀྱི་རྗེས་འཇུག་གིས་གཙོ་བོ་བཀའ་བརྟེན་རྩོམ་པའི་བསམ་པས་ཀུན་ནས་བསླངས་ཏེ། བསྟན་པའི་གསལ་བྱེད་དུ་དམིགས་ཏེ་བསྡེབས་པའི་ཚིག་སྦྱོར་གང་ཞིག་རང་གི་བརྗོད་བྱ་ལ་གྲུབ་མཐའ་རང་ལུགས་ཀྱི་གནོད་པ་མེད་ཀྱང་གྲུབ་པ་ཡིན་པའི་ཕྱིར། ལུང་རིགས་དེ་དག་གིས་ཁྱོད་ཀྱི་ངག་འཁྱལ་ཚིག་རྩུབ་ཀྱི་ཉོག་བཤད་ཐམས་ཅད་རྩ་བ་ནས་རུལ་སོང་བ་ཨེ་ཤེས། ད་དུང་ཁུངས་ལྡན་ལུང་ལ་ཡིད་ཆེས་མི་བྱེད་པར། མགོ་བོ་འགལ་མེ་བཞིན་དུ་འཁོར་ཏེ། སེམས་ལ་གདོན་ཞུགས་པའི་སྨྱོན་པའི་ངག་ཚིག་བཞིན་ཁ་ནས་ཅི་ཐོན་ལོག་གཏམ་སྨྲ་ན་ལོག་སྨྲ་ཁྱོད་ལ་ནང་པ་སངས་རྒྱས་ཀྱི་དྲི་ཙམ་ཞིག་མི་བྲོ་བར་མ་ཟད་ཕྱི་རོལ་ཆད་ལྟ་སྡེ་གསུམ་གྱི་ལྟ་བ་དངོས་སུ་ཞུགས་པའི་ལོག་ལྟའི་རྟུལ་ཤུགས་ཅན་ཞིག་ཡིན་པར་གདོན་མི་ཟ་བས། གནས་སྐབས་ཁྱོད་ཀྱི་ལོག་ལྟའི་གཉེན་པོ་གྱུར་བ་དཀའ་སྟེ། མདོ་ལས། མཚམས་མེད་ལྔ་ལ་གཉེན་པོ་ཡོད། ལོག་ལྟ་ཅན་ལ་གཉེན་པོ་མེད། ཅེས་གསུངས་པའི་ཕྱིར། མི་ཕམ་འཇམ་དབྱངས་རྣམ་རྒྱལ་གྱིས། ཕན་བདེ་མཛད་པའི་སྤྲུལ་སྐུ་ལ། སོ་སོའི་ལྟོན་པ་ཉིད་དུ་བསྟན། བན་དང་བོན་ཞེས་སོ་སོར་དབྱེ། མི་འགལ་ཕྱིར་ན་དགོངས་པ་གཅིགརྒྱལ་བའི་རྣམ་སྤྲུལ་བསམ་མི་ཁྱབ། ཅེས་དང་། མཁའ་འགྲོ་ཡེ་ཤེས་མཚོ་རྒྱལ་གྱི་རྣམ་ཐར་ལས། བོན་ནང་བའི་བསྟན་པ་དར་བའི་ཆོས་དང་ཚུལ་མཐུན་སངས་རྒྱས་ཤཱཀྱ་ཐུབ་པ་དང་སྟོན་པ་གཤེན་རབ་གཉིས་ངོ་བོ་གཅིག་ལ་རྣམ་པ་མི་འདྲ་གཉིས་སུ་འདོད་ཅེས་དང་། དེ་ཉིད་ལས། བོན་ནང་བ་དང་ཆོས་གཉིས་ཀ་དར། བོན་ཆོས་རིས་མེད་པས། བསྐོར་བ་སོགས་གཡས་སྐོར་བ་ཕྱག་རྒྱ་ཆེན་མོ། གཡོན་སྐོར་བ་རྫོགས་པ་ཆེན་པོ། ཕྱག་འཚལ་བ་དབུ་མ་ཆེན་པོ་ཁྱད་མེད་དུ་འབད་དོ། ཞེས་གསུངས་པའི་ཕྱིར། འཁོར་གསུམ། འབུམ་ཁྲི་གློག་ལྕེ་ངོམ་པའི་འགྱུར་ཁུག་མིན། །གཞུང་ལུགས་དོན་ལ་བརྩོན་པའི་གྲུབ་འབྲས་ཡིན། །ཕྲ་ཞིབ་རིག་པའི་རྩལ་བའི་རྣམ་དཔྱོད་མིན། །སྐལ་ཉམས་གྲོགས་ལ་བཞག་པའི་ལག་རྗེས་ཡིན། འབུམ་རྒྱས་པའི་སྐོར་ལ་གཉིས་ཞེས་པའི། དེ་འོག་འབྲིང་པོའི་རྒྱས་པ་ནི། གཤེན་གྱེར་རྨ་དབྱིལ་གྱི་སྤྲོས་པའམ། གཏེར་སྟོན་དང་པོ། དཀོན་མཆོག་གྲགས་པ། ཉ་མོ་མགོན་པོ། སད་ཀུན་རད་ན་གསུམ་གྱིས། དངོས་གྲུབ་ཏུ་རྙེད་པ་གྲགས་པའི། འཕྱོང་འབུམ་དུམ་པ་༨་ཡོད་པ་དང་། འབྲིང་བོ་ཙམ་ནི། གཤེན་གཏེར་ལས། བྱུང་བར་འདོད་པ་དང་། སྤྲུལ་སྐུ་བདེ་ཆེན་གླིང་པ་ཀླུ་ཡི་དབང་པོས་ལྷོ་འབྲི་མཚམས་མཐའ་དཀར་ནས་དངོས་གྲུབ་ཏུ་ཐོབ་པར་འདོད་པ་གཉིས། ཁམས་འབྲིང་སྟོང་ཕྲག་ཉི་ཤུ་རྩ་ལྔ་པ་གླེགས་བམ་༦ལེའུ་༧༡བམ་པོ་༧༣བཞུགས་པའོ། འབྲིང་པོའི་བསྡུས་པ་ནི། གཏེར་སྟོན་ཨང་༢༨གཉེན་སྟོན་གཟི་བརྗིད་ཀྱི་དངོས་གྲུབ་ཏུ་རྙེད་པའི་ཁམས་ཆུང་དུམ་པ་༦གི་བདག་ཉིད་ཅན་ནོ། བསྡུས་པའི་རྒྱས་པ་ནི། གཉེན་སྟོན་གྱི་གཏེར་ལུང་ངམ། གཤེན་གཏེར་དུ་གྲགས་པའི་རྩ་འབུམ་དུམ་པ་༢་པ། ཤོ་ལོ་ཀ་སྟོང་ཕྲག་བརྒྱད་པའོ། བསྡུས་པའི་འབྲིང་བོ་ནི། གཉེན་སྟོན་ཤེས་རབ་རྡོ་རྗེས་གཏེར་ནས་རྙེད་པའི་ཁམས་རྩ་དུམ་པ་གཉིས། དེང་སང་བཀའ་འདུས་སུ་གྲགས་པའོ། བསྡུས་པའི་བསྡུས་པ་ནི། གཤེན་གཏེར་དུ་འདོད་པའམ། སྤྲུལ་སྐུ་བདེ་ཆེན་གླིང་པའི་སྤ་གྲོའམ། འབྲི་མཚམས་ཀྱི་གཏེར་ཤོག་ཡིན་ཁུལ་ཁམས་རྩ་རྣམ་པར་ངེས་པའོ། བཞི་བ་བསྡུས་དོན་ཚིགས་སུ་བཅད་པ་ནི། གཉེན་ཐིང་རེ་ངན་གྱིས་གཙང་འཕྲང་ནུ་མའི་བྲག་ནས་དངོས་གྲུབ་ཏུ་རྙེད་པའི་ཁམས་བསྡུད་ཚིགས་བཅད་མ་ལེའུ་བརྒྱད་པ་དང་། ཤིན་ཏུ་བསྡུས་པ་ནི། ཐེག་པ་ཆེན་པོའི་ཡུམ་མདོ་རྣམས་སོ། གཉིས་པ་ཤེར་ཕྱིན་གྱི་དོན་ཙམ་བསྟན་པའི་བཀའ་ལ་གཙོ་བོ་ནི། ཁྲི་སྲོང་དུས་སུ་དྲན་པ་དང་བཻ་རོ་གཉིས་ཀྱིས། དབུས་ཡེར་བའི་རྫོང་ལ་རྦས་ནས། ཕྱིས་སུ་བཻ་རོའི་རྣམ་སྤྲུལ་གཙང་གི་བན་དེ་སུམ་པ་དབང་ཚུལ། འབྲི་ཚུལ་སང་། གཅེར་བུ་དབང་ཕྱུག་དང་། གསུམ་བསམ་ཡས་སུ། ཆོས་གཏེར་ཚོལ་དུ་སོང་བས་མ་རྙེད། དེ་ལོ་འགའ་འགོར། དེ་ནས་ཡར་ལོག་སྟེ། རང་རེའི་དྲག་ཤོས་གསུམ་གྱིས་གཏེར་མ་ཐོན་པ་ངོ་ཚ་ཟེར་ནས། ཡེར་བར་བཙལ་ནས། གཏེར་རྙེད་ཀྱང་། བོན་གྱི་བདལ་འབུམ་དུམ་པ་༡༠མངོན་རྟོགས་རིག་པའི་རྩེ་འབུམ་དུམ་པ་༡༠དང་། མངོན་རྟོག་རྩེ་མོའི་འབུམ་རྩ་དུམ་པ་༡༠དྲི་མེད་འབུམ་དུ་གྲགས་པའི་དུམ་པ་༦དང་བཅས་འདུག་པ་ཐམས་ཅད་བོན་དུ་འདུག་པས་མ་འདོད་དེ། གཉེན་སྟོན་གཟི་བརྗིད་ཀྱི་ཕྱག་ཏུ་ཕུལ་ནས་གཏེར་སྟོན་ཉེར་དགུ་བ་སྤྲུལ་སྐུ་ལུང་བོན་ལྷ་གཉེན་གྱི་བཀྲོལ་བའོ། ཨ་ཙ་ར་མི་གསུམ་གྱིས་བསམ་ཡས་དཀོར་ཁང་ནས་གཏེར་དུ་དྲངས་པའི་གསུང་འབུམ་དུམ་པ་༣བཅས་དྲི་མེད་འབུམ་དང་འབུམ་རྩ་གསུང་འབུམ་བཅས་སྡོམ་པོ་ཏི་༡༠དང་། དབུས་གཏེར་གྱི་ཐུགས་རྗེ་ཉི་མ་དགུ་ཤར་འོད་འབུམ་དུམ་པ་༡༠དང་། ཁྲི་གདུགས་བདལ་འབུམ་དུམ་པ་༦རྣམས་ཡོད་པར་གྲགས་སོ། གཏེར་དུ་མ་སོང་བར་གཉའ་སྟོན་གཞོན་ནུ་འབུམ་ལ་དངོས་གྲུབ་དུ་བབས་པ། གཙུག་ལག་དཔའ་འབུམ་དཀར་པོ་དང་། བྱམས་མ་འབུམ་ལྔའི་ཡང་སྙིང་དང་། གཉེན་སྟོན་ཤེས་རབ་རྡོ་རྗེས་གཏེར་མ་ཐིག་ལེའི་མདོ་དང་། སེ་དོར་སྟོན་པའི་སྙན་རྒྱུད་ཨ་དཀར་ཐིག་ལེ་གཅིག་པའི་མདོ་རྣམས་དང་། དེ་འོག་དུ་བོན་ཉིད་སྙིང་པོ་བདལ་བའི་འབུམ་རྩ་ལེའུ་༣༢བཞུགས་པ་ལགས་སོ། དེ་ལྟར་ལེགས་བཤད་ཤེར་ཕྱིན་འབུམ་སྡེའི་རྒྱལ་བསྟན་རིན་པོ་ཆེ་བོན་ཉིད་སྙིང་པོ་རིག་པའི་ཡེ་ཤེས་ཀྱི་ཉི་མ་དགུ་ཤར་བ་སྟེ་མ་རིག་པའི་མུན་པ་སེལ་བའི་བརྡ་རྟགས་སུ་རྟེན་འབྲེལ་ལྷུན་གྱིས་གྲུབ་པའོ། སྒོ་བཞི་མཛོད་ལྔའི་ནང་ཚན་གྱི་འཕན་ཡུལ་རྒྱས་པ་འབུམ་གྱི་བོན་སྒོ་ལ་ལྔ་ཡིན་ཏེ། བྱམས་མའི་འབུམ་ལས། ཁམས་བརྒྱད་གཏན་ལ་ཕབས་པའི་འབུམ། དགེ་རྒྱས་ཚོགས་ཆེན་རྫོགས་པའི་འབུམ། རྣམ་དག་ཚུལ་ཁྲིམས་འདུལ་བའི་འབུམ། གཡུང་དྲུང་ས་བཅུ་ལམ་གྱི་འབུམ། ཡེ་གཤེན་བཀོད་པ་དོན་གྱི་འབུམ་དང་ལྔ་། དེ་དག་ལ་ཕུན་སུམ་ཚོགས་པ་ལྔ་དང་ལྡན་པར་སྤྲོ་བ་ནི། དུསཕུན་སུམ་ཚོགས་པ་སྟོན་ཟླ་ཐ་ཆུང་གི་ཚེས་༨འབྱུང་བཞི་ཁོད་སྙོམས། རྩི་ཤིང་ལོ་ཏོག་གི་འབྲས་བུ་ཐམས་ཅད་རྒྱས་ཤིང་སྨིན་པ། གཟའ་སྐར་སྤར་སྨེ་ཐམས་ཅད་མཐུན་རྐྱེན་ལེགས་ཚོགས་སྦྱར་ཞིང་བཀྲ་ཤིས་དགེ་མཚན་གྱི་དུས་དེར་གསུངས་པའོ། སྟོན་པ་ཕུན་སུམ་ཚོགས་པ་ནི། སྟོན་པ་གཤེན་རབ་མི་བོ་ཀུན་ལས་རྣམ་པར་རྒྱལ་བ་ཡང་དག་ཁྲི་གཙུག་རྒྱལ་བ་དེ་ཉིད་ལགས་སོ། གནས་ཕུན་སུམ་ཚོགས་པ་ཞེས་པའི། ལྷ་ཡུལ་དུ་གསུངས་པའི་གནས་ཕུན་སུམ་ཚོགས་པ་གོང་དུ་བཤད་ཟིན་པས། སྐབས་བབ་མི་ཡུལ་དུ་ཤེར་ཕྱིན་གསུངས་པའི་གནས། རྟག་གཟིགས་འོལ་མོ་གླིང་ཆེན་གྱི་བར་གླིང་ཉི་ཤུ་རྩ་བཞིའི་ནང་ཚན། ཤར་ཕྱོགས་གཡུང་དྲུང་བཀོད་པའི་གླིང་དུ་གསུངས་པར་མངོན་ཏེ། ཤར་ན་གཡུང་དྲུང་བཀོད་པའི་གླིང་། ཆུ་བོ་ན་ར་ཛའི་འགྲམ། དཔག་བསམ་ལྗོན་པ་ལོ་རྒྱས་ཀྱི་ཚལ་གསེབ། འོད་ཀྱི་ལྷ་རི་སྤོ་མཐོན་གྱི་རྩེ་མོ། འདུན་ས་བཀྲ་ཤིས་གླིང་ཆེན་གྱི་ཕོ་བྲང་དུ། ཐེག་པ་ཆེན་པོ་ཡུམ་གྱི་དོན་གཏན་ལ་ཕབས་པར་དགོངས་ནས་ཞེས་སོགས་དང་། མདོ་འདུས་ལས། དེ་རྒྱབ་གླིང་ཆེན་བཅུ་གཉིས་ཏེ། ཤར་ན་གཡུང་དྲུང་བཀོད་པའི་གླིང་། རིན་ཆེན་བཀྲ་གསལ་མཛེས་པ་སྟེ། འོད་ཀྱི་ལྷ་རི་སྤོ་མཐོན་ཡོད། ཅེས་དང་། རྗེ་བཙུན་ཡར་མེ་བས། བསྡུས་དོན་རྣམ་ངེས་ལས། དམ་པའི་རྟག་གཟིགས་ཡུལ་ན་ཡོད་པར་བཞེད་དེ། ཞེས་གསུངས་པའི་ཕྱིར། འཁོར་ཕུན་སུམ་ཚོགས་པ་ནི། འབུམ་ཏིག་ལས། ལྷ་ཡི་བུ་དད་པ་ཅན་དང་། རྨ་མའི་བུ་དད་པ་ཅན་ལྔ་སྟོང་བཏུལ་བས་ལྔ་སྟོང་དང་། ཚོགས་ལམ་དང་། དྲོད་དང་། རྩེ་མོ་དང་། བཟོད་པ་དང་། བོན་མཆོག་ལ་གནས་པ་བརྒྱ་བརྒྱ་སྟེ་༥༠༠འོ། ཞེས་གསུངས་པ་ལྟར། དེ་དག་འཁོར་གྱི་གཙོ་བོར་སྨོས་པ་ཡིན་ལ། སྤྱིར་ཤེར་ཕྱིན་འབུམ་སྡེ་གསུངས་པའི་འཁོར། བསྡུས་ན་ཅི་ཙམ་ཡོད་ཅེ་ན། དོན་དང་ལྡན་པ་གཡུང་དྲུང་སེམས་དཔའི་འཁོར། བསྟན་པ་སྐྱོང་བ་འཇིག་རྟེན་མངའ་དབང་ཅན་གྱི་འཁོར། གདུལ་བྱ་དམན་པ་འགྲོ་བ་རིགས་དྲུག་གི་འཁོར་དང་གསུམ་མོ། དང་པོ་ནི། ཕྱི་འཁོར་དུ་གྱུར་བའི་གཤེན་རབ་གཡུང་དྲུང་སེམས་དཔའ་དུང་ཕྱིར་འབུམ་ཕྲག་བཅུ་དང་། བར་འཁོར་དུ་གཏོགས་པའི་གཡུང་དྲུང་སེམས་དཔའ་བྱེ་བ་༡༦། ནང་འཁོར་དུ་གནས་པའི་གཡུང་དྲུང་སེམས་དཔའ་ཁྲི་དྲུག་སྟོང་། གསང་འཁོར་དུ་གཏོགས་པའི་གཡུང་དྲུང་སེམས་དཔའ་ལྔ་སྟོང་ལྔ་བརྒྱ། སྐུ་ལ་རྟག་པར་འཁོར་བའི་གཡུང་དྲུང་སེམས་དཔའ་ལྔ་སྟོང་ལྔ་བརྒྱ་དང་། འཁོར་གྱི་དམ་པར་གྱུར་བའི་གཡུང་དྲུང་སེམས་དཔའ་སུམ་བརྒྱ་དྲུག་ཅུ་དང་། མཆོག་ཏུ་གྱུར་བའི་གཡུང་དྲུང་སེམས་དཔའ་ཞུ་བའི་གཤེན་བརྒྱད་དང་ཐབས་གཅིག་ཏུ་བཞུགས་སོ། གཉིས་པ་ལྷ་ཡི་རྒྱལ་པོ་ཚངས་པ་དང་བརྒྱ་བྱིན། ཀླུ་ཡི་རྒྱལ་པོ་གཙུག་ན་དང་། འཇོག་པོ། ལྷ་མིན་ཐང་བཟང་རིང་སྐྱེས། མི་དབང་འདོད་པ་དགུའགྱུར། ས་བདག་གི་རྒྱལ་པོ་ཆེན་པོ་བཞི་དང་། ལྷ་མོ་བསྟན་མ་ལ་སོགས། འཇིག་རྟེན་ལ་དབང་བསྒྱུར་བར་བྱེད་པའི་དཔལ་མགོན་འཇིག་རྟེན་པ་རྣམས་སོ། གསུམ་པ། ལྷ་མོ་སུམ་བརྒྱ་དྲུག་ཅུ་དང་། ཀླུ་མོ་བརྒྱད་ཁྲི་བཞི་སྟོང་། འབངས་དད་པ་ཅན་རྨ་མི་གྲོང་བདུན་ལ་སོགས་སྡེ་བརྒྱད་དང་། རིགས་དྲུག་གི་འགྲོ་བ་བསམ་གྱིས་མི་ཁྱབ་པ་ཐེག་པ་ཆེན་པོའི་ལས་སད་པ་རྣམས་སོ། བཀའ་ཕུན་སུམ་ཚོགས་པ་ནི། ལམ་དང་འབྲས་བུའི་ཤེར་ཕྱིན་ཐུན་མོངས་མ་ཡིན་པར་བརྗོད་བྱའི་གཙོ་བོར་སྟོན་པའི་ལེགས་བཤད་འདི་དག་གོཤེར་ཕྱིན་གྱི་ལུས་ཡོངས་སུ་རྫོགས་པར་སྟོན་པའི་མདོ་ལ། དཔེར་ན། གསུང་བའི་གནས་བརྒྱད། ཞུ་བའི་གཤེན་བརྒྱད། མཆོད་པའི་རྫས་བརྒྱད། བསྟན་པའི་བོན་བརྒྱད་དང་བཞིའོ། སྲིད་ཁམས་གསུངས་བའི་གནས་འོད་ཀྱི་ལྷ་རི་སྤོ་མཐོན་གྱི་རྩེ་མོ་དང་། རྒྱུད་ཁམས་གསུང་བའི་གནས། རིན་ཆེན་གྲངས་མ་སྤུངས་པའི་གླིང་དང་། སྣང་ཁམས་གསུང་བའི་གནས། གཡུང་དྲུང་གསལ་བ་འོད་ཀྱི་གླིང་། སྟོང་ཁམས་གསུང་བའི་གནས། བར་ཏི་ཏན་མུན་པ་གཡུང་དྲུང་གླིང་། སོ་སོ་གསལ་བའི་ཁམས་གསུང་བའི་གནས། མུ་ལེ་ཁྱུད་ཚོ་མུ་ཡི་གླིང་། རིག་ཁམས་གསུངས་བའི་གནས། མཚོ་གླིང་དར་དཀར་གུར་ཕུབ་འོགདབྱིངས་ཁམས་གསུང་བའི་གནས། འཕེལ་འགྲིབ་མེད་པར་གཡུང་དྲུང་ཁྱིམ་བདུན་གྱི་གླིང་། མཉམ་ཁམས་གསུང་བའི་གནས། རིན་ཆེན་འཕྲུལ་སྣང་འོད་གཞལ་ཡས་ཁང་དང་བརྒྱད་དོ། ཞུ་བ་པོ། སྟོན་པའི་ཐུགས་སྤྲུལ་ཡིད་ཀྱི་ཁྱེའུ་ཆུང་དང་། གཏོ་བུ་འབུམ་སྲས། གསལ་བ་འོད་ལྡན། མེད་ཁམས་སྟོང་བ་རྗེ། ཚངས་པ་གཙུག་ཕུད། ཀླུ་མོ་མ་མ་དེ། གཡུང་དྲུང་གཙུག་གཤེན་རྒྱལ་བ། འཕྲུལ་བོན་གསང་བ་ངང་རིང་དང་བརྒྱད་དོ། མཆོད་པའི་རྫས་བརྒྱད། སྲིད་ཁམས་བསྟན་པའི་ཐོག་མར་ལྷ་ཆེན་ཚངས་པའི་གསེར་གྱི་མེ་ཏོག་ཁལ་སྟོང་དང་། འཕྲུལ་གྱི་དཀོར་ཆ། ལྷ་མོ་བསྟན་མའི་གསེར་གྱི་འཁོར་ལོ་རྩིབ་སྟོང་གི་དབུས་སུ་གསེར་བུམ་བདུད་རྩིས་བལྟམས་པ་ཕུལ་ཏེ་གསོལ་བ་གདབ། རྒྱུད་ཁམས་གསུང་བའི་ཐོག་མར་གསེར་གྱི་མེ་ཏོག་དང་ཡིད་བཞིན་གྱི་ནོར་བུ་རིན་པོ་ཆེའི་མཆོད་པ་དང་། སྣང་ཁམས་གསུང་བའི་ཐོག་མར་མེ་ཏོག་གི་འཕྲེང་བ་དང་། དང་ར་ཤིམ་ཕོད་དང་ལྡན་མཆོད་པ་དང་། སྟོང་ཁམས་གསུང་བའི་ཐོག་མར་མཚན་མའི་ཀུན་རྫོབ་ལ་མ་བརྟེན་པར་དོན་དམ་སྟོང་བ་ཉིད་ཀྱི་མཆོད་པ་དང་། སོ་སོའི་ཁམས་གསུང་བའི་ཐོག་མར། མེ་ཏོག་ཨུ་པ་ལ་ཡི་མཆོད་པ་དང་། རིགས་ཁམས་གསུང་བའི་ཐོག་མར། ཀླུ་ཤིང་པད་མའི་བུ་གུར་ཀུ་ལང་གསེར་གྱི་བཀང་བ་དང་། དཀོར་ནོར་སྣ་ཚོགས་ཀྱི་མཆོད་པ་དང་། དབྱིངས་ཁམས་གསུང་བའི་ཐོག་མར། རྔ་གཤང་དུང་གླིང་ཅིང་དང་པི་ཝང་རོལ་མོ་གར་སྟབས་ཀྱི་མཆོད་པ་དང་མཉམ་ཁམས་གསུང་བའི་ཐོག་མར། དགོས་འདོད་ནོར་བུ་དང་། གསེར་གྱི་མེ་ཏོག་ལ་སོགས། རིན་པོ་ཆེ་དཀོར་ཆ་སྣ་ཚོགས་ཅང་ཤེས་ཀྱི་རྟ་ཕོ་སྤྲིན་གྱི་ཤུགས་ཅན་ལ་བཀལ་ནས་བཀུར་བའི་ཞིང་མཆོག་རྣམས་ལ་ཕུལ་བ་དང་བརྒྱད་དོ། མ་བཅོས་སེམས་ཉིད་གཤིས་ཀྱི་རོལ་བའི་རྩལ། །གཤེན་བསྟན་སྙིང་ལ་བཅིང་ནས་བྲིས་མོད་ཀྱང་། །ཕྱྭ་སྲས་གཞོན་ནུའི་ངག་ནས་བཏོན་མིན་པས། །གཟུང་གནས་མཁས་དབང་ཚོགས་ལ་ནོང་བཤགས་འབུལ། །མདོ་སྡེའི་སྡེ་སྣོད་ཀྱི་བཀའ་བརྟེན་ལ། སྤྱིར་འཕན་ཡུལ་གྱི་བོན་ལ། འདོན་པ་མདོ་འབུམ་གྱི་སྐོར་དང་། མཆོད་པ་བསྙེན་སྒྲུབ་ཀྱི་སྐོར་གཉིས་སུ་གསུངས་ཀྱང་། འདིར་འདོན་པ་མདོ་འབུམ་གྱི་སྐོར་ཅུང་ཙམ་གླེང་ན། བཀའ་དང་དབྱེར་མེད་ཀྱི་བཀའ་བརྟེན་དུས་གསུམ་སྟོན་པའི་ནང་ཚན་མ་འོངས་སྟོན་པ་ཐང་མ་མེ་སྒྲོན་གཡུང་དྲུང་སེམས་དཔའི་ཚུལ་བཟུང་ནས། གསུངས་པའི་བཀའ་བརྟེན། མདོ་སྡེ་ཉི་ཤུ་པའམ། སྨོན་འཇུག་ཆེན་མོར་བྱ་བ་ཡོད་པར་གསུངས་ཀྱང་། གཞན་སྡེའི་བྱམས་ཆོས་སྡེ་ལྔ་ཞེས་པར་བསྒྱུར་བར་བཤད་དོ། དྲང་སྲོང་རྒྱལ་བའི་མཛད་པའི་ཕར་ཕྱིན་གྱི་རྣམ་བཤད་འབུམ་ཏིག་བྱ་བ་དང་། གཞུང་དེའི་དགོངས་དོན་ཡེ་ཤེས་རྒྱལ་མཚན་གྱིས་མཛད་པའི་ས་ལམ་རྣམ་འབྱེད་ཉི་འོད་དང་། སྨྲ་དབང་དཔལ་ཆེན་གྱིས་མཛད་པའི་ཤེར་ཕྱིན་གྱི་སྦས་དོན་མངོན་རྟོགས་ལམ་རིམ་གསལ་བར་བཤད་པའི་བཀའ་བརྟེན་མངོན་རྟོགས་ལམ་གྱི་རིམ་པ་ལེའུ་བརྒྱད་པ་དང་། ཁམས་འགྲེལ་ཆེན་མོ་ལེའུ་བརྒྱད་དང་། ཤེར་ཕྱིན་དངོས་བསྟན་སྟོང་ཉིད་ཀྱི་ལམ་རིམ་གསལ་བར་བཤད་པའི་བཀའ་བརྟེན་མཚུངས་བྲལ་བསྟན་པའི་གསལ་བྱེད། ཡར་མེ་བ་ཆེན་པོས་མཛད་པའི་ཁམས་བརྒྱད་བསྡུས་དོན། དབུ་མ་བདེན་གཉིས་ཀྱི་རྩ་འགྲེལ་དང་བཅས་པ་ལམ་རིམ་ཆེན་མོ་སུམ་བརྒྱ་བ་དང་། བོན་འཁོར་ཚིག་བཞིའི་རྣམ་བཤད་རང་འགྲེལ་དང་བཅས་པ། རྗེ་སྨན་རི་བ་མཉམ་མེད་བླ་མས་མཛད་པའི་ཁམས་བསྡུད་ཚིགས་སུ་བཅད་པའི་འགྲེལ་བ་དང་། དབུ་མ་བདེན་གཉིས་ཀྱི་འགྲེལ་དང་། ས་ལམ་སྨོན་ལམ་དང་། ས་ལམ་འཕྲུལ་སྒྲོན་རྩ་འགྲེལ་དང་བཅས་པ། མཁས་གྲུབ་རིན་ཆེན་བློ་གྲོས་ཀྱིས་མཛད་པའི་དབུ་མ་བདེན་གཉིས་ཀྱི་འགྲེལ་དང་། གཡོར་པོ་མེ་དཔལ་གྱིས་མཛད་པའི་ཐེག་པ་ཆེན་པོའི་ས་ལམ་རྣམ་བཤད་དང་། སྒ་སྟོན་གྱིས་མཛད་པའི་རྣམ་འབྱེད་རྒྱན་ཞེས་བྱ་བའི་ཚིགས་བཅད་དང་། ཞང་སྟོན་རྒྱལ་མཚན་མཆོག་ལེགས་ཀྱིས་མཛད་པའི་སུམ་བརྒྱ་བའི་ཚིག་འགྲེལ་གཉིས་དང་། མཁས་གྲུབ་རྒྱལ་མཚན་མཆོག་ལེགས་ཀྱིས་མཛད་པའི་གཞི་ལམ་འབྲས་གསུམ་གྱི་དོན་གསལ། ཡང་སུམ་བརྒྱ་བའི་འགྲེལ་གཤེན་སྟོན་ནམ་མཁའི་མཛད་པ་དང་། མཛད་མདོ་འབྲིང་བོ་ལེའུ་བཅོ་བརྒྱད་པའི་འགྲེལ། ཞང་སྟོན་ཚུལ་ཁྲིམས་བློ་ལྡན་གྱིས་མཛད་པ། འགྲོ་མགོན་བདུད་རྩི་རྒྱལ་མཚན་གྱིས་མཛད་པའི་དབུ་མའི་འགྲེལ། མདོ་གཡུང་དྲུང་གློང་རྒྱས་ཀྱི་འགྲེལ་བ༽བོན་གྱི་སྤྱན་ལྡན་ཆེན་མོས་མཛད་པའི་ཐེག་པ་ཆེན་པོ་ས་དང་ལམ་གྱི་རིམ་པ་རིན་པོ་ཆེ་འཕྲུལ་གྱི་ལྡེ་མིག་ཅེས་བྱ་བ་བཞུགས་པ་རྣམས་སོ། སླར་སྨྲས་པ། འཁྱུག་བྲིས་འདི་དག་སྙན་གྲགས་ཆེ་འདོད་མིན། །རྒྱལ་བའི་བསྟན་དང་འགྲོ་ཀུན་ཕན་བདེའི་ཆེད། །དྲི་མེད་ལུང་རིག་ལམ་ནས་བསླངས་པས་ན། །དེ་ཉིད་སྐྱེ་འགྲོའི་གསོས་སུ་སྨིན་པར་ཤོག། འ་ཅག་རྗེས་འཇུག་གཤེན་བསྟན་སྤེལ་འདོད་ཡོངས། །མདོ་སྔགས་སེམས་ཕྱོགས་ཟབ་མོའི་སྒོར་འཇུག་སྟེ། །གཞུང་ལུགས་འོ་མཚོ་དལ་བུ་འབབ་པའི་ནང་། །གསེར་ཉ་འུ་ཅག་གར་སྟབས་བསྒྱུར་བར་སྨོན། །ཕྱི་མའི་ལྔ་་ལམ་གྱུར་བའི་ཕ་ལོ་དང་། །ད་ལྟ་རྔ་ལྗོངས་གནས་པའི་མ་ལོ་དེས། །བརྩེ་བའི་དྲིན་གྱིས་བསྐྱངས་པའི་བཀའ་དྲིན་གྱི། །ཆ་ཙམ་འཇལ་བའི་ལེགས་བཤད་འདི་ན་ཕུལ། །མདོ་སྔགས་བཅུ་ཕྲག་གནས་ཀྱི་འོ་མའི་མཚོ། །བདག་མགྲིན་ཡོལ་གོའི་གནས་སུ་འཁྱིལ་བ་འདི། །མཚུངས་མེད་བརྩེ་བའི་བསྐྱངས་པའི་སློབ་དཔོན་གྱིས། །བཀའ་དྲིན་བསམ་བཞིན་མཇུག་བསྡུའི་རོལ་མོ་དཀྲོལ། །རང་གི་རིག་པའི་ལམ་གྱི་འཕྲུལ་འཁོར་འདི། །རྒྱལ་གཤེན་ཟུང་གི་ལུང་གིས་ཟིན་མེད་ཀྱང་། །གཞན་དོན་བྱང་ཆུབ་སེམས་ཀྱིས་ཟིན་པའི་ཕྱིར། །གང་བྲིས་རྫོགས་བྱང་ཐོབ་པའི་རྒྱུ་རུ་བསྔོ། །གཤེན་བཙུན་ཁྲི་གཙུག་རྣམ་རྒྱལ་ཉི་མ་ནས། །ཤེར་ཕྱིན་གཞུང་ལུགས་ཟབ་མོ་འཆད་སྦྱོང་སྐབས། །ལྷག་བསམ་འོ་མཚོའི་སྲུབ་ལས་འཁྲུངས་པ་འདི། །བསྟན་དང་འགྲོ་ལ་ཕན་པའི་རྒྱུ་རུ་བསྔོ། །དཔྱད་གཞིའི་ཡིག་ཆ་འགའ་གླེང་བ། ༡ལེགས་བཤད་སྐལ་བ་བཟང་པོའི་མགྲིན་རྒྱན། མཛད་པ་པོ་དཔལ་ལྡན་ཚུལ་ཁྲིམས། ༢ལེགས་བཤད་རིན་པོ་ཆེའི་གཏེར་མཛོད་དཔྱོད་ལྡན་དགའ་བའི་ཆར་ཞེས་བྱ་བ། འཇའ་ལུས་པ་ཤར་རྫ་བཀྲ་ཤིས་རྒྱལ་མཚན། ༣ཟབ་དང་རྒྱ་ཆེར་གཡུང་དྲུང་བོན་གྱི་བཀའ་འགྱུར་གྱི་དཀར་ཆག་ཉི་མ་འབུམ་གྱི་འོད་ཟེར། རིག་འཛིན་ཀུན་གྲོལ་གྲགས་པ། ༤བསྟན་པའི་རྣམ་བཤད་དར་རྒྱས་གསལ་སྒྲོན་ལས་བསྟན་པའི་གནས་ཚད་དང་ལོ་རྒྱུས་ལྷུན་གསལ། སྤ་བསྟན་རྒྱལ་བཟང་པོ། ༥གྲུབ་མཐའི་བྱུང་བ་བརྗོད་པ། དགེ་བཤེས་ཡེ་ཤེས་དབང་ཕྱུག་སོགས། ༦བགྲེས་པོའི་འབེལ་གཏམ། རྩོམ་སྒྲིག་པ་སྤུ་རྒྱལ་བ་ཉི་མ་རྒྱལ་མཚན་སོགས། ༧ཕར་ཕྱིན་སྐབས་དང་པོའི་རྣམ་བཤད་ཚིག་དོན་དཀའ་གནད་རབ་གསལ། ཀུན་མཁྱེན་ཉི་མ་བསྟན་འཛིན། ༨བོན་སྒོ། རྩོམ་སྒྲིག་པ་དགེ་བཤེས་བསྟན་འཛིན་འབྲུག་གྲགས་སོགས། ༩སྔ་རབས་བོན་གྱི་བྱུང་བ་བརྗོད་པའི་འབེལ་གཏམ་ལུང་གི་སྙིང་པོ། ཡོངས་འཛིན་དཔོན་སློབ་བསྟན་འཛིན་རྣམ་དག་རིན་པོ་ཆེ། ༡༠བཀའ་འགྱུར་གྱི་སྡེ་ཚན་བསྒྲིག་ཚུལ་བསྟན་པའི་མེ་རི་སྤར་པའི་རླུང་གཡབ་པད་མོ་རྒྱས་བྱེད། མཁན་ཆེན་ཉི་མ་བསྟན་འཛིན། ༡༡ནོར་མཛོད། སྤྱི་ཁྱབ་རྩོམ་སྒྲིག་པ་རྡོ་རྗེ་དབང་ཕྱུག་སོགས། ༡༢འདུལ་བ་མདོར་བསྡུས། རྗེ་རིན་པོ་ཆེ། ༡༣རྫོགས་ཆེན་ཡང་རྩེ་ཀློང་ཆེན། ལི་ཤུ་སྟག་རིང་། རྩོམ་ཉོག་འདི་ལ་འགལ་དང་ནོར་འཁྲུལ་གང་མང་ཡོད་ངེས་པས། མཁྱེན་ལྡན་མཁས་པའི་དབང་བོ་རྣམ་པའི་སྤྱན་སྔར་མཐོལ་བཤགས་གནོང་འགྱོད་དང་བཅས། བཀྲ་ཤིས་དགེ་མཚན་གྱི་གཟི་འོད་ཕྱོགས་བཅུར་ཁྱབ་པའི་གསོལ་བ་སྨོན་ལམ་བསྐལ་བརྒྱའི་ཆར་བཞིན་ཞུས་པ་ལགས་སོ། །

tibetmonk  2018-11-4 16:26:04

1541033443875954.jpg

   ཇ་ནི་བོད་མི་རིགས་ཀྱི་བཏུང་བ་མཆོག་ཏུ་གྱུར་པ་ཞིག་ཡིན་ཞིང་ཇ་བོད་དུ་ཐོག་མར་བྱུང་བའི་དུས་ནི་རྒྱ་བོད་ཡིག་ཚང་ལ་ཁ་གསལ་འཁོད་པ་ལྟར་བོད་ཀྱི་ལོ་རྒྱུས་སྨྲ་བ་པོ་ཕར་ཆེ་བའི་བཞེད་དགོངས་དེ་ལྟར་དུ་ངེས་པར་འཛིན།   དེའང་བཙན་པོ་འདུས་སྲོང་མང་པོ་རྗེ་(སྤྱི་ལོ་༦༧༦-༧༠༤)བསྙུན་གཞི་དྲག་པོ་ཐེབས་པར་བོད་ན། ཟས་དང་། སྤྱོད་ལམ། རིག་བཟོ་ལ་བརྟེན་པ་ཙམ་ལས་སྨན་དཔྱད་གཞུང་བཞིན་ཤེས་པ་མེད་པའི་རྐྱེན་གྱིས་དྲག་སྐྱེད་མ་བྱུང་བས།  ཉིན་ཞིག་ཕོ་བྲང་གི་པུ་ཤུ་ཟུར་ན་སྔར་མཐོང་མ་མྱོང་བའི་བྱ་ཡིད་དུ་འོང་བ་ཞིག་གི་ཁ་ན་ཤིང་བུ་ལོ་འདབས་དང་ལྡན་པ་བཅས་ཞིག་ཁྱེར་ནས། སྐད་སྙན་པར་སྒྲོག་པར། རྒྱལ་པོས་གཟིགས་ནའང་བཙན་པོས་དོ་སྣང་མ་མཛད། དེ་བཞིན་སང་ནང་ཉི་ཤར་མཚམས་སུ་ཡང་དེ་ཀ་བྱེད་ཀྱི་འདུག་པར་རྒྱལ་པོའང་ཐེ་ཚོམ་སྐྱེས་ཏེ་ལྟས་ཏེ་བརྟག་པས། སྔར་མེད་ཀྱི་ཤིང་དུ་འདུག་ཅིང་། ཤིང་དེ་ཡི་སྣ་མོ་གཅིག་ཞལ་དུ་བཅུག་ནས། བྲོ་བ་མྱངས་པས། ཞལ་སྐྱེམས་པ་སོས། བཏུང་བའི་མཆོག་ཏུ་མངོན་ནས། ད་ཁྱེད་བློན་འབངས་རྣམས་ཉོན་ཅིག  ང་ན་བའི་སྐབས་འདིར་། གཞན་གྱི་བཟའ་བཏུང་ནི་གང་ཡང་མི་འདོད་། བྱས་ཁྱེར་བའི་ཤིང་བུ་འདི་ནི། བཏུང་བའི་མཆོག་ལུས་ཀྱིས་གསོས། ནད་ཀྱི་སྨན་དུ་འདུག་པས། ང་ལ་གློ་བ་ཉེ་བ་རྣམས་ཀྱིས། ཤིང་འདི་ལྟ་བུ་གར་འདུག་ཀྱང་ཚོལ་བྱོན་ཅིག   བྱ་དགའ་ཆེན་པོ་བྱེད་དོ་གསུངས་པ་དང་།  བློན་འབངས་ཀུན་གྱིས་བོད་ཡུལ་གྱི་ས་ཆ་སྟོད་སྨད་ཐམས་ཅད་རྩལ་ཡང་མ་རྙེད། རྒྱལ་པོ་ལས་བསམ་རུ་མེད་པའི་གློ་བ་ཉེ་བཤོས་ཀྱི་བློན་པོ་ཞིག་གིས། བོད་ཀྱི་ས་མཐའ་འཁྱམས་པས། རྒྱ་ནག་གི་ནགས་གསེང་འཐུག་པོ་སྨུག་ལིང་ངེ་བ་མཐོང་སར་ཞིག་ཏུ་སླེབས་པར།   ཕ་ཀི་འདྲ་བའི་གསེབ་ན། ཤིང་དེ་ངེས་པར་ཡོད་དམ་སྙམ་ཏེ་དེར་གཏད་ཕྱིན་པས། ནགས་དེའི་ཚུར་རོལ་ན། ཆུ་ཆེན་པོ་གཅིག་འདུག་པས། ཆུ་ལ་ནི་འགྲོ་མ་ནུས། ཤིང་དེ་ནི་ནགས་གསེབ་ན་ཡོད་པར་ངེས་རིག་སྟེ།   རྒྱལ་པོ་ཡིད་ལ་སེམས་ཀྱིན་སྡད་ཙ་ན། དར་ཅིག་ནས་ཉ་ཆེན་པོ་ཅིག་ཁོའི་ཐད་དེ་ནས་ཆུ་དེ་ལ་ཞུགས་སོང་པ་དང་། ཆུ་ཁ་ཞེང་ཆེ་བ་མ་གཏོགས། གཏིང་ལ་མི་ནུབ་པར་འདུག་པས། སེམས་དགའ་སྟེ། དེའི་རྗེས་ལ་རྒལ་ཕྱིན་ནས། ནགས་གསེབ་ཏུ་སླེབས་པ། ནགས་མ་ནི་ཕལ་ཆེ་བ། བྱས་ཁྱེར་བའི་ཤིང་དེ་རྐྱང་དུ་འདུག་པས། ད་ནི་བདག་གི་རྗེ་བོ་ངེས་པར་སྐུ་ལྟས་པར་འགྱུར་རོ་སྙམ་པའི་དགའ་སྤྲོ་དང་བཅས་ནས། ཤིང་དེ་འདྲ་བ་རྒྱབ་གཅིག་རྔས། ཡང་བསམ་མནོ་ཕྱི་མ་ལ། རྒྱལ་པོ་སྙུང་བ་དྭངས་པ་ལ་ནི། འདི་ཕན་ངེས། ས་ཐག་རིང་བར་འདུག་པས། ད་ལན། འཁུར་བའི་གྲོགས་སམ། ཁལ་པ་གཅིག་ཡོད་ན་བསམ། འདོད་པ་སྐྱེས་པའི་དུས་དེར། ད་ཀི་མེད་པའི་ཤ་བ་ཡུ་མོ་གཅིག་མི་འཛེམ་པར་རྩ་རུ་སླེབས་བྱུང་པས། འདི་འདྲ་ལ་ཁལ་བཀོལ་རུང་པའང་སྲིད་དམ་སྙམ་ནས་གྲབས་བྱས་པས། ཇི་ལྟར་འདོད་པ་བཞིན་བྱར་བྱུང་ནས། ཤིང་དེ་ནས། ཤ་བའི་ཁལ་རྒྱབ་ཅིག་དང་།ཁོ་རང་གི་རྒྱབ་གཅིག་ཁུར་ཡོང་པས། ལམ་ཞག་ཟླ་བའི་བར་ལ་སོང་ནའང་། ཤ་བས་ཀྱང་ཁུར་ནས་བོད་རྒྱལ་པོའི་ཕོ་བྲང་མཐོང་སར་བར་དུ་བསྐྱལ་ལོ།། དེ་ནས་གྲོགས་བཀུག་སྟེ། རྒྱལ་པོའི་སྤྱན་སྔར་ཕུལ་བས། ཤིན་ཏུ་དགྱེས་དགའ་ནས།   བྱ་དགའ་ཆེན་པོའང་བྱས། བསྙུང་སོས་པ་ལ་ཡང་ཕན་པོ་བྱུང་སྐད། དེ་རྟིང་། རྒྱལ་པོའི་ཞལ་ནས། འདི་ནི་བཏུང་བའི་མཆོག་ཏུ་འདུག་པས། འདི་འཐུང་བའི་སྣོད་དགོས་པའི་ཐུགས་བསམ་འཁོར་བས་རྒྱ་ནག་རྒྱལ་པོ་ལ། དཀར་ཡོལ་ཟེར་བ་ཅིག་ཡོད་འདུག་པ། སློངས་ལ་ཤོག་ཅིག་གསུངས་པ་བྱུང་ནས། གསེར་ཡིག་པ་བཏང་པས། རྒྱ་ནག་རྒྱལ་པོ་ན་རེ། རང་རེད། རྒྱ་བོད་གཉིས་འཐབ་མཐུན་ལན་མང་། བོད་ལ་ཕན་གདགས་པའི་ཕྱིར་དུ། ངེད་ཀྱིས། སྨན་རྩིས་བཟོ་གནས། རོལ་མོ་མཁན་རིམ་པར་བཏང་ནའང་། བོད་ཀྱིས་བསམ་དུ་མ་འདོད་པས།  དཀར་ཡོལ་མི་བསྐུར་། བོད་རང་ལ་བཟོ་རྒྱུ་ཡོད་ན། བཟོ་མཁན་ཅིག་བཏང་དགོས་པ་ཡིན་ཡོངས་གསུངས་པ་བྱུང་ན། རྒྱའི་དཀར་ཡོལ་བཟོ་མཁན་བོད་དུ་འབྱོར།   ལྷོ་ཁ་གྲ་ནང་ཁུལ་ནས་རྡོ་དཀར་གོང་གི་གཏེར་ཁ་བཏོན་ནས་དེས་རྒྱུ་ཆ་བྱས་ཏེ་དཀར་ཡོལ་བཟོས་པ་མ་ཟད།   ལག་རྩལ་མི་སྣ་ཁག་གཅིག་གསོ་སྐྱོང་བྱས་ཏེ་དཀལ་ཡོལ་རབ་འབྲིང་ཐ་གསུམ་སོགས་བོད་དཀར་རིགས་མི་འདྲ་བ་བཟོས།   དེའི་གྲལ་དུ་བོད་དཀར་དར་ཚེའི་རིགས་རྣམས་འདི་རྣམས་ནི། དེ་གོང་རྒྱ་ནག་ནའང་མེད་པར་བྱེད་ཅིང་། བོད་དུ། ཇ་དང་དཀར་ཡོལ་བྱུང་བའི་སྔ་མ་འདི་ཡིན་པར་འདོད་དོ།   དེ་རྗེས་བཙན་པོ་ཁྲི་རལ་(སྤྱི་ལོ༨༠༢-༨༤༡)གྱི་སྐབས་སུ་ཐང་གི་བློན་པོ་ཀྲང་ལུང་བོད་དུ་འབྱོར་བར་རྒྱལ་པོས་མགྲོན་བོས་ཤིང་རྒྱལ་པོས་ཇ་སྟོན་སྣེ་ལེན་དང་ཕྱག་སྒམ་ནང་དུ་ཇ་རིགས་མི་འདྲ་བ་མང་པོ་བཏོན་ནས་རེ་རེའི་ཐོན་ཁུངས་དང་།  ཁྱད་ཆོས་བཅས་ཞིབ་གསལ་གསུངས་པས་བློན་པོ་ཀྲང་ལུང་ངོ་ཚ་ཁ་སྐྱེངས་དགོས་པ་བྱུང་བའི་ཚུལ་ཐང་རྒྱལ་རབས་ཀྱི་ལོ་རྒྱུས་རྒྱ་ཡིག་ལ་འཁོད་པར་བཤད།   དུས་རབས་བཅུ་གཅིག་པའི་ནང་ཇོ་བོ་ཨ་ཏི་ཤ་མངའ་རིས་སུ་ཕེབས་པའི་ཉིན་ཐོག་མའི་རྟེན་འབྲེལ་དུ་བོད་རང་ནས་བཟོས་པའི་དཀར་ཡོལ་འབྲུག་རྒྱབ་མ་གསེར་སྲང་ལྔའི་རིན་ཐང་ཅན་གྱི་ནང་དུ་གསོལ་ཇ་བསྲུབས་མ་དྲངས་པས།  ཇོ་བོ་རྗེ་ཤིན་ཏུ་གཉེན་ནས།  ཇ་མཆོད་མཛད་དེ་གསོལ་རྗེས་ཁྱེད་བོད་ཀྱི་རབ་ཏུ་བྱུང་བ་ཀུན་རྒྱ་གར་ལ་མེད་པའི་བཏུང་བ་ཞིམ་པོ་ཕྱི་དྲོའི་དུས་སུ་ཡང་འཐུང་ཆོག་པ་འདི་འདྲ་ཡོད་པ་ནི་བསོད་ནམས་ཆེན་པོ་རེད།  ཇ་འདི་འཐུང་ན་སྐོམ་སེལ་བ་ཙམ་མ་ཟད།  རིག་པ་དྭངས་བ་དང་།  ལུས་སྟོབས་རྒྱས་པ།  གཉིད་དང་རྨུགས་པ་སེལ་བ།  དགེ་སྦྱོར་ལ་སྤྲོ་སྣང་སྐྱེ་བ་བཅས་ཀྱི་ཁྱད་ཆོས་ཆེན་པོ་འདུག་པས་རྒྱ་གར་ལ་འདི་འདྲ་ཡོད་ན་ངས་གསེར་སྤྲད་ནས་ཉོ་ཆོག་པ་ཞིག་འདུག།   ཅེས་ཇ་ཡི་ཕན་ནུས་དང་རིན་ཐང་་དང་བཅས་པ་གསུངས་པའི་ལོ་རྒྱུས་ཀྱང་འདུག་གོ།   གང་ལྟར་བོད་ཀྱི་ཆོས་འབྱུང་ཁག་གི་ནང་དུ་ཇ་ཡི་ཁུངས་ནི་རྒྱ་ནག་ཡིན་པ་དང་བོད་དུ་བཙན་པོ་འདུས་སྲོང་མང་པོ་རྗེ་ཡི་སྐབས་སུ་དར་བའི་ངོས་འཛིན་བྱེད་པ་ནི་ཡོང་གྲགས་སུ་ཆགས་ཡོད།   ཡིན་ནའང་ད་དུང་དཔྱད་རིན་ལྡན་པའི་ལོ་རྒྱུས་མང་པོ་ལུས་སྡད་ཡོད་པ་ནི་ཅི་སྨྲོས་དགོས་ཏེ།   བློ་གཟུ་བོ་རུ་གནས་པའི་མཁས་དབང་དག་གིས་བོན་གྱི་རིག་གཞུང་དོར་ན་བོད་ཀྱི་རིག་གཞུང་ཤོད་མི་ཐུབ་ཅེས་གསུངས་པས་སོ།    དེས་ན་ཇ་གཅིག་བུ་ལ་ཆ་མཚོན་ན་བོན་གྱི་ལོ་རྒྱུས་ནང་དུ་རྩ་ནས་མེད་པ་མ་ཡིན་ཏེ།

1541033444442926.jpg

 དེའང་མདོ་དྲི་མེད་གཟི་བརྗིད་ལས།  ༡ ཇ་ཡི་རྒྱུ་བསྟན་པ་སྟེ།     ཇ་ནི་སྐྱེད་ཤིང་རྒྱུ་ལས་བྱུང་།   སྤྱིར་ནི་སྐྱེད་ཤིང་བཅད་པ་དང་།   རྩི་ཏོག་བྲེགས་དང་ལོ་མ་བསྐམས།   དབུགས་མེད་སྲོག་བཅད་རྒྱུ་ལ་གཏོགས།   དེ་ཡང་རྩི་ཤིང་ལོ་ཏོག་ལ།   ལྗང་པ་དྲུངས་སུ་སྐམས་ན་ཉེས།   དེ་བཞིན་ལོ་རྒྱས་མེ་ཏོག་དང་།   འབྲས་བུ་སྨིན་པ་རིམ་བཞིན་ཆུང་།   ཤེ་མོང་རྫོགས་ནས་སྐྱེད་མེད་ལས།   ལོ་འདབ་མེ་ཏོག་འབྲས་བུ་བྲུལ།   དེ་ལ་ཉེས་འགལ་མེད་པར་ཤེས།   སྐྱེད་ཤིང་ལོ་འབྲས་བརྒྱ་བྲེགས་པས།   ཡལ་ག་གཅིག་བཅད་ཉེས་པ་ཆེ།   དེ་ཕྱིར་སྡོང་པོ་རྩ་བཅད་ན།   དེ་ཡང་དབུགས་མེད་སྲོག་ལས་གཏོགས།   ས་བདག་ཀླུ་གཉན་གཏོད་འཁོར་གྱི།   བརྟེན་པའི་གནས་དང་བསྐྱེད་པའི་སྲོག   གསེར་གྱི་རུས་སྦལ་ལུས་ལའ་བྱུང་།   དེ་ལ་སྐྱེ་འགྲོ་སེམས་ཅན་འཁྲས།   ཤིང་གི་ལྷ་མོས་བདག་ཏུ་བྱེད།   དེ་ཕྱིར་ནགས་ཚལ་མེ་གཏོང་དང་།   སྐྱེད་ཤིད་རྩ་བཅད་སྤང་བར་བྱ།  སྒོས་སུ་ཡོངས་མར་ཇ་ཞེས་པ།   ཡོངས་ནི་ཡོངས་འདུའི་ཤིང་ལས་བྱུང་།   མར་ནི་བཙོ་མ་གསེར་ལས་དམར།   ཇ་ནི་སྐོམས་པ་བངས་པས་ཇ།   དེ་ཕྱིར་ཡོངས་མར་ཇ་ཞེས་བྱ།  ཞེས་དང་། 

༢   ཆང་གི་འབྱུང་ཁུངས་དང་ཉེས་པ་བསྟན་པ།  དེ་ལས།     དེ་ཡང་ཐོག་མར་བྱུང་ཚུལ་ནི།   རི་རབ་བང་རིམ་གསུམ་པ་ན།   རྟག་མྱོས་ཀུ་མ་ར་ཙ་གནས།   འབྲུ་བཅུད་རྩི་ཏོག་ཤིང་ཏོག་ལ།   ཨ་མྲི་ཏ་ཡི་ཕབས་བཏབ་ནས།   བསྙལ་དང་མྱོས་དང་ལངས་དང་གསུམ།   ཡུ་ཏི་ཆང་ལ་ལོངས་སྤྱོད་བྱེད།   དེ་ལ་བག་མེད་འགལ་འཐུངས་པས།   སྐོམས་པ་ངོམས་དང་བཟི་བ་དང་།   མྱོས་དང་རྨུགས་དང་འཐིབས་པར་བྱུང་།   དེ་ཚེ་བང་རིམ་གསུམ་པའི་མི།   མཚེ་མ་གནོད་སྦྱིན་ལྷ་ཡིས་ཀྱང་།   བཏུང་བའི་ཡུ་ཏིས་རྐྱེན་བསླངས་ནས།   ལྷ་དང་ལྷ་མིན་འཁྲུག་པ་བྱུང་།   ལྷ་སྲས་ཁྱེའུ་ལྕམ་དྲལ་རྣམས།   གཅིག་ལས་སྐྱེ་བ་མ་སྲིད་ཀྱང་།   གཉིས་གཉིས་འགྲོགས་ཏེ་མཚེ་རུ་སྐྱེས།   དེས་ན་གནོད་སྦྱིན་མཚེ་མ་ཞེས།   ལྕམ་དྲལ་གཅིག་ལ་གཅིག་འཚོ་ཞིང་།   གཅིག་སྲོག་གཅིག་གིས་བཅད་ནས་སུ།    ལྷ་ལ་དམེ་དང་ཁྲེལ་ཤོར་བས།   གཙང་མའི་ལྷ་རིགས་ཐུགས་འཁྲུགས་ནས།   ལྷ་ཁམས་སྨེ་ཞིང་མནོལ་བ་ལས།  ཞེས་དང་།

༣  ཇ་འཐུང་དགོས་པའི་རྒྱུ་མཚན་བསྟན་པ། དེ་ལས།  དེ་ཚེ་ཡོད་ཀྱི་ཁ་འཛིན་པ།   གནོད་སྦྱིན་ལག་རིང་རྩེ་རྒན་གྱིས།   སྲིད་པ་གསུམ་གྱི་རྩེ་མོ་ཡི།   ཡོངས་འདུའི་ཤིང་གི་ལྡིང་ཁང་དུ།   ཇོ་མོ་གནམ་ཕྱི་གོང་རྒྱལ་ལ།   གུས་པའི་ཚུལ་གྱིས་ཞུ་བ་ཕུལ།   ཇོ་མོ་གནམ་ཕྱི་གོང་རྒྱལ་ལགས།   ཁྱོད་ནི་སྐྱེ་འགྲོ་སྲིད་པའི་མ།   འགྲོ་བ་ཡོངས་ལ་བཀའ་དྲིན་ཆེ།   བདག་ཅག་མཚེ་མ་གནོད་སྦྱིན་ལྷ།   རི་རབ་བང་རིམ་གསུམ་པ་ན།   རྟག་མྱོས་ཀུ་མ་ར་ཛཱ་གནས།   འབྲུ་དགུ་བཅུད་ཀྱི་འབྲས་བུ་ལ།   ཨ་མྲྀ་ཏ་ཡི་ཕབས་བཏབ་ནས།   ཡུ་ཏི་ཆང་ལ་ལོངས་སྤྱོད་པས།   སྨྱོས་དང་མྱོས་དང་རྩུབ་པ་ཡིས།   མཚེ་མའི་ལྷ་ལ་འཁྲུག་པ་བྱུང་།   ལྕམ་དྲལ་ནང་དུ་དམེ་བསྣོལ་བས།   ལྷ་ལ་དམེ་དང་ཁྲེལ་ཤོར་ཏེ།   གཙང་མའི་ལྷ་རིགས་ཐུགས་འཁྲུགས་ནས།   ལྷ་ཁམས་དམེ་ཞིང་བནོལ་བ་ཡི།   གྲིབ་མ་འགྲོ་བ་མི་ལ་ཕོག   ལྷ་མི་དབུ་འཕང་དམའ་ལ་ཁད།   བདུད་སྲིན་འགོ་ལོ་འཕར་ལ་ཁད།   འདི་ལ་ཇོ་མོས་ཐུགས་དགོངས་ལ།   ལྷ་ཁམས་མནོལ་བ་སངས་པ་དང་།   མི་ཁམས་དར་ལ་རྒྱས་པ་དང་།    ཀུ་མ་མྱོས་པ་དྭངས་ནས་སུ།   ལྷ་མིན་འཁྲུག་པ་མི་འབྱུང་ཞིང་།   ཞི་བདེ་མཉམ་པའི་ཐབས་ཤིག་ཞུ།   དེ་ལ་ཇོ་མོས་བཀའ་སྩལ་པ།   ཉོན་ཅིག་གནོད་སྦྱིན་རྒྱལ་པོའི་ལྷ།   ཁྱོད་ཀྱི་བསམ་པའི་དོན་དེ་དག   བདག་གི་སྨོན་པ་བཞིན་དུ་བསྒྲུབ།   ཁྱོད་ཀྱང་སྐྱེ་འགྲོ་བརྟེན་པའི་ཤིང་།    ཡོངས་འདུའི་ཤིང་གི་སྡོང་པོ་ལ།   བདུད་དང་སྲིན་པོའི་ཆོ་འཕྲུལ་གྱིས།   གདུག་པ་སྲིན་བུ་མི་འབྱུང་བའི།   རིན་ཆེན་དབྱུག་པ་ཐོགས་ནས་སུ།   སྲིད་པའི་རྩེ་ནས་བྱ་ར་མཛོད།   གལ་ཏེ་གདུག་པའི་སྲིན་བྱུང་ན།    དབྱུག་ཐོགས་རྒྱལ་པོས་ཆད་པ་ཆོད།   དེ་སྐད་གསུངས་ནས་བཀའ་ལུང་གནང་། ཞེས་དང་། 

༤  ཇ་ཡི་འབྱུང་ཁུངས་བསྟན་པ།  དེ་ལས།  དེ་ནས་གནམ་ཕྱི་གོང་རྒྱལ་གྱིས།    སྲིད་གསུམ་འདུས་པའི་ཡོངས་གོང་གི།   ཡོངས་འདུའི་ཤིང་གི་རྩེ་མོ་ན།   དབུ་སྐྲ་སྨིན་མ་ཕྱད་ཕྱོད་དང་།   ལྗགས་ཀྱི་མཆིལ་པ་བསྲེས་པ་ལ།   བདུད་རྩི་སྨན་གྱི་སྨོན་ལམ་བཏབ།   དེ་ལས་བདུད་རྩི་ཤིང་གཅིག་སྐྱེས།   ཤིང་ལས་ཡལ་ག་ལྔ་རུ་གྱེས།   སྡོང་པོ་ཡོངས་འདུའི་ཤིང་ལ་ཟུག   ཡལ་ག་ཕྱོགས་བཞི་དབུས་ལྔར་གྱེས།   ཤར་དུ་དུང་ལོ་སུར་བུ་དཀར།   ལྷོ་རུ་གཡུ་ལོ་ཤུག་པ་སྔོ།   ནུབ་ཏི་ཟངས་ལོ་འོམ་བུ་དམར།   བྱང་དུ་གསེར་ལོ་སྟག་པ་སེར།   དབུས་སུ་མུ་ལེ་དྲུམ་ཤིང་ལྗང་།   དེ་ལས་བསང་གི་རྩེ་དགུ་འཁྲུངས།   རྩེ་ལས་བསང་ཤིང་བཅོ་བརྒྱད་སྲིད།   དེར་བདུད་རྩི་བསང་གི་ལོ་བྲེགས་དང་།   ཕྱེ་མར་འོལ་ཀོན་ཕུད་སྦྱར་ནས།   གསེར་གྱི་རི་བདུན་རྩེ་མོ་རུ།   རེངས་པར་མི་རྟ་བཅོ་བརྒྱད་དང་།   སྲིད་པའི་བླ་བོན་བཅུ་གསུམ་དང་།   བྱ་བོན་འཕྲིན་པ་བཅུ་གསུམ་གྱིས།   གཡུ་དུད་སྔོན་པོས་མནོལ་བསང་ཞིང་།   ཕྱེ་མར་འོལ་ཀོན་ཕུད་མཆོད་པས།   ལྷ་ཁམས་སྨེ་ཞིང་མནོལ་བ་བསངས།   འགྲོ་བ་མི་རྣམས་བདེ་སྐྱིད་ལྡན།   བདུད་རྩི་བསང་ཤིང་འབྲས་བུ་རྣམས།   མི་ཡུལ་གླིང་བཞིར་གཏོར་བ་ལས།   བདུད་རྩི་ཅན་གྱི་ཤིང་རྣམས་སྲིད།   ཀུ་མ་ར་ཙ་དྭངས་པའི་ཐབས།   མུ་ལེ་དྲུམ་ཤིང་འབྲས་བུ་རྣམས།   གསེར་གྱི་རི་བདུན་དང་པོ་དང་།   བང་རིམ་གསུམ་པར་བསྐྱེད་པ་ལས།   མུ་ལེ་དྲུམ་ཤིང་ཚལ་དུ་སྲིད།   ཚལ་ལས་དྲུམ་ཤིང་བཅུད་འབྱུང་གནས།   ཤིང་ལ་འདོད་ཡོན་སྣ་ཚོགས་བྱུང་།   ལོ་མར་བསིལ་དང་གཡབ་ཏུ་བྱུང་།   མེ་ཏོག་ངོ་མཚར་ལྟད་མོར་བྱུང་།   འབྲས་བུར་གསོས་དང་ཟས་སུ་འབྱུང་།   སྙིང་པོར་རིན་ཆེན་རྒྱན་ཆར་བྱུང་།   ཤུན་པར་དར་དང་ཟབ་ཏུ་བྱུང་།   ཁུ་བར་བཅུད་དང་བདུད་རྩིར་བྱུང་།   སྡོང་པོར་འཁྲ་བའི་གནས་སུ་བྱུང་།   གནམ་ཕྱི་གོང་རྒྱལ་བྱིན་རླབས་ཀྱིས།   སྦྱིན་པ་མཐར་ཕྱིན་ལྡན་པ་ཡིས།   དྲུམ་ཤིང་མི་ཡི་ལོངས་སྤྱོད་རྒྱུ།   སྐལ་ལྡན་རྣམས་ཀྱིས་སྤྱོད་ཡུལ་ལ།   སྐལ་མེད་རྣམས་ནི་ག་ན་བ།    དབུལ་ཕོངས་རྣམས་ཀྱིས་བྱས་མི་མཐོང་། ཞེས་དང་། 

༥  ཇ་ཡི་རིགས་སམ་དབྱེ་བ་བསྟན་པ།    དེ་ལས།   བང་རིམ་གསུམ་པར་ཚལ་བསྐྱེད་པས།   དེ་ལས་ཡོངས་མར་ཇ་ཤིང་བྱུང་།   ཁ་དོག་རྣམ་པ་དྲུག་ཏུ་ཆད།   དཀར་ལྗང་དམར་སྔོན་ཐིང་ཁ་སེར།    ལོ་མ་མེ་ཏོག་འབྲས་བུ་དང་།    དྲི་ངད་རོ་མཆོག་དྲུག་དང་ལྡན་།   རྒྱུ་ནི་ཡོངས་འདུའི་ཤིང་ལས་བྱུང་།   གཏོགས་ནི་དྲུམ་ཤིང་རིགས་ལ་གཏོགས།  ཞེས་དང་།

1541033443304406.jpg

༦  ཇ་ཡི་ཕན་ཡོན་བསྟན་པ།  དེ་ལས། གནམ་ཕྱི་གོང་རྒྱལ་བྱིན་རླབས་ཀྱིས།   གསོ་བྱེད་ཤིང་གི་བདུད་རྩི་དེས།  ཀུ་མ་ར་ཙ་མྱོས་པ་དྭངས།   མཚེ་མ་གནོད་སྦྱིན་གདུག་སེམས་ཞི།   དེ་ཚེ་རྣམས་ཕྱི་གོང་རྒྱལ་གྱིས།   དེ་ཡི་ལོ་མ་མེ་ཏོག་འབྲས།   མི་ཡུལ་གླིང་བཞིར་གཏོར་ནས་སུ།  བདུད་རྩི་གསོས་ཀྱི་སྨོན་ལམ་དང་།   དེ་ལས་ཇ་ཡི་རྒྱུ་རུ་སྲིད།   བཏུང་བ་ཀུན་གྱི་མཆོག་ཏུ་སྟེ།   ཤིང་ལས་བྱུང་བས་ཉེས་འགལ་ཆུང་།   དེ་ཡང་བག་དང་ལྡན་པར་བྱ།   བག་མེད་བཏུང་ན་ལང་འཚོ་རྒྱས།   གཟི་མདངས་རྐང་གི་རྒྱུ་རུ་འགྲོ།   བདུད་རྩི་ཤིང་གི་བཅུད་ཡིན་པས།   ལུས་པོ་ཤེད་ཆེ་ཆགས་པ་སྐྱེ།   སྲིད་ལེན་ཐིག་ལེ་འཁོར་བའི་རྒྱུ།   དེ་ཕྱིར་རན་ཚོད་སྐོམས་བངས་ཙམ།   དེ་ལས་ཉེས་པ་ཆེ་ཆུང་ནི།   ལྗང་བུ་སྐྱེད་ཤིང་རྩ་བཅད་རྒྱུ།   འབྱུང་བའི་རྒྱུ་ལས་བསྐྱེད་པ་སྟེ།   དུས་ཀྱི་འཁོར་ལོའི་ཆོ་གས་འབྱང་།   དེ་མིན་དར་དང་རྒྱས་པ་དང་།   རྒུད་པར་རིམ་བཞིན་ཉེས་འགལ་ཆུང་།   བཏུང་བའི་རྒྱུ་རུ་བསྟན་པའོ།  ཞེས་གསུངས་ཤིང་མདོ་དྲི་མེད་གཟི་བརྗིད་ལས་ཇ་ཡི་སྒྲུང་ལྟ་བུའི་ལོ་རྒྱུས་ཀྱི་ས་བོན་བྱུང་འདུག་པ་མ་ཟད།   བན་བོན་གྱི་ཆོས་འབྱུང་ཁག་དང་བོད་ཀྱི་དམངས་ཁྲོད་དུ་གསེར་སྐྱེམས་དང་གཡུ་མངོན་གྱི་མཆོད་པའི་སྲོལ་ཡོད་པ་དེ་ནི་གསེར་སྣོད་དམ་གསེར་བླུག་པའི་སྣོད་དུ་ཆང་ཕུད་ཀྱིས་བཀང་བ་ནི་གསེར་སྐྱེམས་དང་།  གཡུ་བླུག་པའི་སྣོད་དུ་ཇ་ཕུད་ཀྱི་བཀང་བ་ནི་གཡུ་མངོན་ནམ་གཡུ་སྐྱེམས་བརྗོད་པ་ནི་ལུང་རིགས་གཉིས་ཀས་དཔོག་ནུས་པ་ཡིན་སྙམ།  ཆང་ཕོར་བཟང་ཤོས་གསེར་ཡིན་པའི་རྒྱུ་མཚན་གཙོ་བོ་ནི་ཆང་ལ་དུག་མི་ཡོང་བའི་ཆེད་དང་།   ཇ་ཕོར་རམ་ཇ་ཕུད་མཉམ་དུ་གཡུ་བླུགས་དགོས་པའི་རྒྱུ་མཚན་ནི་ཇ་སྐྱུར་པོ་ཆགས་མི་འགྲོ་བའི་ཆེད་དུ་ཡིན་ངེས།  གཡུ་མངོན་ལ་གཡུ་སྐྱེམས་དང་།  གཡུ་བརྔོན།  གཡུ་རྔོན།  གཡུ་སྔོན་བཅས་འབྲི་ལུགས་མི་འདྲ་བ་ཡོད་པ་ཡིན།  དེ་ལྟར་ཆང་ཕུད་ལ་གསེར་དགོས་པ་དང་ཇ་ཕུད་ལ་གཡུ་དགོས་པ་ནི་དོན་དངོས་ཡིན་ལ་ཆང་གི་མདོག་སེར་པའི་ཡིན་པའི་ཆ་ནས་གསེར་སྐྱེམས་དང་།  ཇ་ཡི་ལོ་མ་ལྗང་ཁུ་ཡིན་པའི་ཆ་ནས་གཡུ་མངོན་ཞེས་བརྗོད་པའང་ཡིན་སྲིད།  བོད་ཀྱི་ཆོས་འབྱུང་ཁག་ལས།  བཙན་པོ་ཐོ་རི་གཉན་གཙན་གྱི་ལོ་རྒྱུས་འཆད་ཡོང་བའི་སྐབས་སུ།  དེ་ངོ་མཚར་ཆེ་བ་ཅིག་འདུག་ནས། དེའི་མིང་ནི་གཉན་པོ་གསང་བ་བྱ་བར་བཏགས་སོ། །  དེ་རིན་པོ་ཆེའི་ཁྲི་ལ་བཞུགས་ནས་གསེར་སྐྱེམས་དང་གཡུ་སྔོན་གྱིས་མཆོད་ཀྱིན་གསོལ་བ་བཏབ།  ཅེས་བྱུང་ཞིང་དེའི་ངོས་འཛིན་བྱེད་སྟངས་ནི།   གསེར་སྐྱེམས་ཞེས་བཏུང་བར་གསེར་བླུག་པ་དང་། གཡུ་སྔོན་ཞེས་སྒོག་པ་ཡིན་ཟེར་མཁན་དང་།  ཡང་ན་བཟའ་བའི་སྟེང་དུ་གཡུ་བཟང་པོ་བཞག་པར་སྣང་ངོ༌། ཡང་ན། གནའ་སྔ་མོའི་དུས་བོད་ཡུལ་ནས་རྒྱལ་པོ་གཙོས་པའི་མི་ཆེན་དེ་ཚོའི་གྲལ་ནས་གསེར་གཡུ་ཟས་སུ་ཟ་བའི་སྲོལ་ཡོད་ལུགས་སོགས་དང་། ལུགས་དེ་དག་ད་བར་རྗེས་འཛིན་ལྟ་བུར་དཔེར་མཚོན་ཇ་ནག་ལ་འབྲི་མར་སེར་པོ་རྒྱག་པ་དང་། དབུས་ཁུལ་དུ་འབྲས་ཚལ་མདོག་སྔོ་སེ་བྱེད་པ་སོགས་བདེན་དཔང་བགྲང་སྲོལ་བྱུང་ཡོད་འདུག་པར་ཁག་མེད་དེ།   གཡུ་མངོན་ནམ་གཡུ་སྐྱེམས་ཇ་ཡིན་སྙམ་པའི་བསམ་བློ་མེད་དེ་འདུས་སྲོང་མང་པོ་རྗེ་ཡི་སྐབས་སུ་གཞི་ན་ཇ་བྱུང་བའི་ལོ་རྒྱུས་ལས་དེ་གོང་ཐོ་རི་གཉན་བཙན་སྐབས་སུ་ཇ་ཕུད་ཡོད་ཅེས་བརྗོད་ནས་ལོ་རྒྱུས་ནང་འགལ་ཆགས་འགྲོ་བས་སོ།   ཡིན་ནའང་གསེར་ཕྱེ་དང་གཡུའམ་གཡུ་ཕྱེ་ཟས་སུ་རོལ་མཁན་གྱི་བོད་རིགས་ཡོད་མེད་མ་ངེས་མོད།   ལྷ་ལ་འབུལ་རྒྱུའི་ཆང་ཕུད་དང་ཇ་ཕུད་ལ་ཡག་ཤོས་བྱུང་ན་གསེར་རྒོད་དང་གཡུ་རྒོད་གསེར་ཕྱེ་དགོས་པ་ནི་ངེས་པ་ཡིན་ཏེ།   གེ་ཁོད་རྟེན་འཛུག་གི་བསྐང་བ་ལས།   ཆང་ཕུད་དུ་གསེར་བདར་ལ། ཞེས་དང་། གེ་ཁོད་གསང་བ་དྲག་ཆེན་གྱི་གཞུང་ལས།  བདག་བཅག་ཤེལ་གྱེར་སྒྲུབ་པ་པོས། ཏིང་རྫོགས་ལྷ་ཚོགས་ཐུགས་དམ་བསྐང་བའི་ཕྱིར། གསེར་རྒོད་གཡུ་རྒོད་ཕུད་ཀྱིས་མཆོད།  ཅེས་དང་། གེ་ཁོད་གསང་བ་དྲག་ཆེན་གྱི་བརྣལ་བསང་དང་བསྐང་བ་ལས།   ཞང་ཞུང་ཤེལ་གྱེར་སྒྲུབ་པ་པོས། བདུད་འདུལ་གསང་བའི་ལྷ་ཚོགས་ལ། གསང་བའི་མཆོད་པ་འབུལ་བ་ནི། འབྲོང་རྒོད་དར་མའི་རུ་སྐྱོགས་སུ། བཀྲ་ཤིས་རྣམ་དག་ཞལ་བུ་རུ། འབྲས་དཀར་ཡུ་ཏིའི་ཁུ་བ་ལ། མུ་མར་གསེར་དང་གཡུ་ཡིས་སྤྲས། རིན་ཆེན་སྣ་སྔའི་སྙིང་པོ་དང་། སྨན་ལ་གསོས་ཀྱི་རྩི་མཆོག་ལ། བདུད་རྩི་སྨན་གྱི་ཟིལ་པས་སྦྲན། སྒྲུབ་གཤེན་དགོངས་པའི་ཏིང་འཛིན་གྱིས། གཡུ་འབྲང་བདུད་རྩི་སྨན་དུ་བསྒྲུབ། གསེར་ལ་ལྗོན་པའི་བདུད་རྩིར་བསྒྱུར། དྭང་ར་ཙམ་གྱི་གཏིང་ཟབ་འཁྱིལ། དུག་ལྔ་དུག་གསུམ་གསོ་བའི་སྨན།  ཞེས་ཞལ་གསལ་བར་གསུངས་པས་སོ། འགའ་ཞིག་གིས་གཡུ་མངོན་ཞེས་གཡུ་ཡི་སྣོད་དམ་གཡུ་རྒོད་དང་ཆང་མཉམ་དུ་བླུགས་པ་དེ་ལ་གཡུ་མངོན་ཡིན་པའི་ངོས་འཛིན་བྱེད་ཅིང་དེ་ལྟར་ཡིན་སྲིད་མོད།   གསེར་སྐྱེམས་དང་གཡུ་མངོན་ཕུད་ཀྱིས་མཆོད།   ཅེས་འདི་ལྟར་མཉམ་དུ་གསེར་སྐྱེམས་དང་གཡུ་སྔོན་ཞེས་བྱུང་བས་དེའི་སྐབས་སུ་ཆང་ལ་རིགས་མི་འདྲ་བ་གཉིས་མཉམ་དུ་བཤམས་ཤིང་མཆོད་སྲོལ་མེད་ཅིང་།  ཆང་ཕུད་དང་ཇ་ཕུད་གཉིས་ཀ་བཤམས་ཏེ་ལྷ་ལ་མཆོད་སྲོལ་དང་།  དེ་བཞིན་ཇ་དང་ཆང་ནི་བོད་མི་རིགས་འཚོ་བའི་ཁྲོད་དུ་མེད་ན་མེད་ཐབས་མེད་པ་ལྟ་་བུའི་ལོངས་སུ་སྤྱོད་སྲོལ་བྱུང་ཡོད་ཅིང་བོད་མི་རིགས་ཀྱི་སྲོལ་རྒྱུན་ད་ལྟའི་བར་དུ་མ་ཉམས་པར་གནས་བཞིན་ཡོད་པ་ནི་བོད་རིགས་ཡིན་པ་ཙམ་གྱི་མཁྱེན་ཚོད་ཡིན།      དེ་ལྟར་ལོ་རྒྱུས་ཡུན་རིང་ལྡན་པའི་གསེར་སྐྱེམས་དང་གཡུ་སྔོན་གྱིས་མཆོད་ཀྱིན་གསོལ་བ་བཏབ་ཅེས་པར་བོན་པོར་སྨད་པ་གཏོང་རྒྱུ་ཆེད་དུ་གཡུ་སྔོན་ཞེས་པ་དེ་སྒོག་པར་ངོས་འཛིན་བྱས་ཏེ་མཆོད་ཀྱི་ཡོད་སྲོལ་བཤད་ཅིང་།   གཡུ་མངོན་ཞེས་ཇ་མིན་པར་སྒྲུབ་རྒྱུའི་ཆེད་དུ་ཡིན་པ་ལས་གཞན་དུ་ན་རྒྱུ་མཚན་བགྲང་རྒྱུ་འགའ་ཞིག་ཨ་ཡོད་ན།    དེས་ན་ང་ཚོས་གསེར་སྐྱེམས་གཡུ་མངོན་ཞེས་པ་ནི་གོང་དུ་བཤད་པ་ལྟར་ཡིན་ངེས་མོད་ཡིན་ནའང་ཇ་ཡིན་པ་ཙམ་གྱིས་ད་ལྟ་ང་ཚོས་ལོངས་སུ་སྤྱོད་བཞིན་པའི་ཇ་དེའི་རིགས་ཡིན་པའི་ངེས་པ་མེད།     གསེར་སྐྱེམས་དང་གཡུ་མངོན་ནམ་ཆང་ཕུད་དང་ཇ་ཕུད་ནི་ཆེས་གནའ་བོའི་དུས་སུ་བོད་དུ་ལྷ་ལ་མཆོད་པ་སོགས་བེད་སྤྱོད་བྱེད་སྲོལ་བྱུང་ཡོད་ཅིང་།   ཇ་དེའི་རིགས་ནི་གོང་དུ་མདོ་དྲི་མེད་གཟི་བརྗིད་ལས་གསུངས་པ་ལྟར།    རྒྱུ་ནི་ཡོངས་འདུའི་ཤིང་ལས་བྱུང་།   གཏོགས་ནི་དྲུམ་ཤིང་རིགས་ལ་གཏོགས། ཞེས་དང་། དེ་ལས་ཡོངས་མར་ཇ་ཤིང་བྱུང་།   ཁ་དོག་རྣམ་པ་དྲུག་ཏུ་ཆད།   དཀར་ལྗང་དམར་སྔོན་ཐིང་ཁ་སེར།    ལོ་མ་མེ་ཏོག་འབྲས་བུ་དང་།    དྲི་ངད་རོ་མཆོག་དྲུག་དང་ལྡན་།   ཞེས་གསུངས་པ་དང་།  ང་ཚོ་མིའི་འཆེད་ཁུངས་ཤོད་ཡོང་བའི་སྐབས་སུ་དཔག་པའི་མི་རིགས་བཞིའི་ནང་ཚན་དྲུམ་ཤིང་བཅུད་འཐུང་གི་མི་ཞེས་བྱུང་བ་དང་།  མ་པང་མཚོ་ལས་ཤིང་འཛམ་བུ་ཏྲི་ཤ་བྱ་བ་ཡོད་ཅིང་དེ་ལ་འབྲས་བུ་ཞིང་རོ་མངར་བ་དང་ལྡན་པར་ཆུའི་ནང་དུ་ལྷུང་བའི་སྐབས་སུ་འཛམ་བུ་ཞེས་པའི་སྒྲ་གྲགས་པ་དང་།  འཛམ་བུའི་ཆུ་བོའི་གསེར་ཞེས་གསེར་ཡག་ཤོས་དེ་བོད་ལས་བྱུང་བའི་ལོ་རྒྱུས་ཡོད་པ་དང་།   དེ་བཞིན་ལོ་རྒྱུས་ཡུན་རིང་ལྡན་པའི་མངའ་རིས་ཀྱི་གནས་བོའི་གཉའ་རབས་གླུ་གཞུང་ལས་ཤིང་འཛམ་བུ་ཏྲི་ཤ་དང་འབྲེལ་བའི་བཤད་པ་མི་དམན་པ་འདུག་པས་དེ་ཚོ་ལ་དཔྱད་པ་གཏོང་རིན་ཤིན་ཏུ་ན་ཆེ་བ་ཡིན།   ད་ལྟ་བོད་ཀྱི་མཐོ་སྒང་ཕར་ཆེ་བ་དེ་བྱེ་མ་ཤས་ཆེ་བར་འདུག་པས་གནའ་བོའི་སྐབས་སུའང་འདི་ལྟ་བུ་ཞིག་ཡིན་པར་མ་སེམས་ཤིག།    བོད་ཁུལ་དུ་ནགས་ཚལ་མང་བ་དང་འཛམ་བུ་ཏྲི་ཤ་དང་།   མུ་ལེ་དྲུམ་ཤིང་དང་འབྲེལ་བའི་ཇའི་རིགས་ཡོད་སྲིད་ཅིང་བ་ལུའང་སུར་དཀར་ནི་ཇ་མཆོག་ཏུ་གྱུར་བ་ཞིག་ཡིན་པ་རེད།   ད་དུང་བཙན་པོ་འདུས་སྲོང་མང་པོ་རྗེའི་གོང་དུ་བོད་པས་ཇ་བཏུང་སྲོལ་མེད་པ་དང་ཇ་མཐོང་མ་མྱོང་བའི་ལོ་རྒྱུས་ཁུངས་བཙན་ཞིག་ཤོད་རྒྱུ་ཡོད་དམ།   ཡོད་མི་སྲིད་དེ་སྤྱི་ལོ་༢༠༠༦ལོརཞང་ཞུང་གི་གནའ་མཁར་ཁྱུང་ལུང་དངུལ་མཁར་གྱི་འགྲམ་དུ་གནས་པའི་གུར་གྱམ་དགོན་མདོ་སྔགས་གྲགས་རྒྱས་གླིང་གི་གཡས་ཟུར་ནས་ང་ཚོས་རྙེད་སོན་བྱུང་བའི་བང་སོའི་དུར་རྒྱགས་ཁྲོད་དུ་ཟངས་སྣོད་ཀྱི་ནང་དུ་ཇ་རོ་ཐོན་པར།  ཀྲུང་གོའི་གནས་རྫས་ཆེད་མཁས་པས་དཔྱད་འབྲས་ལས།   དེ་ནི་ཇ་ཡི་རྫས་མང་པོ་ལྡན་པ་དང་བང་སོ་དེ་ལོ་ངོ་གཅིག་སྟོང་བདུན་བརྒྱའི་གཡས་གཡོན་དང་ཇ་ལོ་དེ་ལོ་གཅིག་སྟོང་བརྒྱད་ཙམ་འགྲོ་གི་ཡོད་པས།   ད་ལྟ་ཀྲུང་གོའི་ས་འོག་ནས་ཐོན་པའི་ཇ་ལོ་སྔ་ཤོས་དེ་ཡིན་པའི་ངོས་འཛིན་བྱེད་ཅིང་ཕར་ཆེར་ད་ལྟ་དངོས་སུ་སྟོན་རྒྱུ་ཡོད་པའི་ཀྲུང་གོའི་ཇ་ལོ་ལོ་རྒྱུས་ཡུན་རིང་ཤོས་དེ་ཆགས་བསྡད་ཡོད་པའི་ཚོད་དུ་སྣང་བས་སོ།   དེ་ལྟར་ང་ཚོ་གུར་གྱམ་དགོན་པའི་བང་སོ་དང་ཇ་ལོའི་སྐོར་དཔྱད་གཏམ་ནི་ད་ལྟ་ས་ཁྱབ་རྡོ་ཁྱབ་རེད་འདུག་པས་འདིར་ཡིག་ཚོགས་དོགས་པས་སྐྱར་བཤད་མི་བྱ།      མདོར་ན་དེ་ལྟར་ལོ་རྒྱུས་ལ་དཔྱད་སྡོམ་བྱས་ན་ཆེས་གནའ་བོའི་སྐབས་བོད་དུ་བཏུང་བ་ཇ་ནི་མུ་ལེ་དྲུམ་ཤིང་རིགས་ཀྱི་ཁུ་བ་དང་བ་ལུའི་ཁུ་བ་སོགས་བཏུང་སྲོལ་བྱུང་ཡོད་པ་དང་།   དེ་ནས་མུ་ལེ་དྲུམ་ཤིང་གི་རིགས་ཇེ་ཉུང་དུ་ཕྱིན་པས།  ཇི་སྐད་དུ།   རྒྱ་ནག་རྒྱལ་པོ་ཇ་དར་རས་ཀྱིས་ཕྱུག  ཅེས་གསལ་བ་ལྟར་དེ་ནས་ཇ་ཕར་ཆེ་བ་དེ་རྒྱ་ནག་ནས་ཡར་འདྲེན་ཏེ་ཇ་ལམ་དང་དར་ལམ་འདི་དར་སྲོལ་རིམ་བཞིན་རྒྱ་ཆེ་རུ་ཕྱིན་པ་འདྲ་ཞིག་སྣང་ངོ་།     འདིར་ང་ཚོ་བོད་མི་རིགས་བཏུང་བ་གཙོ་བོ་ཇ་ཡི་ཁུངས་དཔྱད་པ་གཏོང་སྟེ་མཚམས་སྦྱོར་ཕྱོགས་ཙམ་བྱས་པའི་ཁུལ་ཡིན་ཞིང་ད་དུང་འདིའི་སྐོར་དང་བོད་མི་རིགས་རྒྱུན་ལྡན་གྱི་འཚོ་བའི་སྐོར་ཞིབ་ཕྲའི་ཞིབ་འཇུག་བྱེད་དགོས་པ་ནི་ཧ་ཅང་གལ་ཆེན་པོ་ཡིན།     སོ་སོའི་མི་རིགས་ཀྱི་ལོ་རྒྱུས་དང་འཚོ་བ་སོགས་སོ་སོས་ནག་བསུབ་གཏོང་ན་རྩ་ནས་མི་འགྲིག་སྟེ།    ང་ཚོ་སྨྲ་ཤེས་དོན་གོ་བའི་མི་བུ་ཞིག་དང་འཛམ་བུ་གླིང་པའི་ཁྲོད་དུ་མི་རིགས་ཞེས་ཟླས་ཕྱེས་པའི་བོད་མི་རིགས་ཞེས་པ་དེ་ཡིན་ཞིང་།  བག་ཆགས་ངན་པས་མ་སླད་པར་དྲང་བདེན་གྱི་སྒོ་ནས་ཞིབ་འཇུག་བྱེད་ཅིང་སྐད་ཆ་ཤོད་རྒྱུ་ནི་ང་ཚོས་འོས་འགན་ཞིག་ཡིན་པས་སོ།། སོར་རྩེར་ཐལ་ལོ།།        ཞང་ཞུང་ཁྱུང་ལུང་རྔུལ་མཁར་བ་ཚུལ་ཁྲིམས་ཕུན་ཚོགས་ཀྱིས་ཉིན་རྩོམ་དུ་བྲིས་ཏེ་སྤེལ་བའོ།།   ༢༠༡༨-༡༠-༣༡ཉིན།།

རྩོམ་སྒྲིག་པ།   ཚུལ་ཁྲིམས་ཕུན་ཚོགས་ཀྱི་ཉིན་རྩོམ། 

ལུང་ཁུངས་རྣམས་ཀྱི་ཡིག་སྟར་བ།  ཚུལ་ཁྲིམས་གཙུག་ཕུད།

tibetmonk  2018-10-22 19:52:31

88888.jpg

རྩོམ་པ་པོ། ལྕགས་མོ་མཚོ།


ནང་དོན་གནད་བསྡུས།

དཔྱད་རྩོམ་འདིར་གཙོ་བོ་རོང་ཆེན་བཞིའི་ཡ་གྱལ་ཏེ་སྦས་པའི་ཡུལ་ཤར་ཕྱོགས་རྒྱལ་མོ་རོང་ཆེན་གྱི་གཡུང་དྲུང་ལྷ་སྟེང་དགོན་པའི་རྡོ་རིང་ཡི་གེར་དཔྱད་པ་བཏང་ཡོད་ཅིང་། རྡོ་རིང་འདིའི་ངོས་གཅིག་ཏུ་ཆན་ལུང་ཁྲི་ལོ་སོ་གཅིག1766དང་སོ་གཉིས1767དུས་སྐབས་སུ་ཆུ་ཆེན་རབ་བརྟན་རྒྱལ་པོས་བོན་གྱི་འདུས་སྡེ་ཆེན་མོ་གཡུང་དྲུང་ལྷ་སྟེང་དགོན་རྒྱ་བསྐྱེད་བཞེངས་གྲུབ་ཀྱི་ལོ་རྒྱུས་དང་མཛད་པ་བཀོད་ཡོད་པ་དང་། ངོས་གཞན་དེར་རྒྱ་བོད་ཡིག་རིགས་གཉིས་ཀས་དུས་རབས་བཅོ་བརྒྱད་པའི་དུས་མཇུག་ཏུ་དགེ་ལུགས་པའི་དགོན་སྡེར་བསྒྱུར་ཟིན་པའི་བསྟན་འཕེལ་གླིང་དུ་ཆིང་སྲིད་གཞུང་གིས་རྒྱལ་རོང་ས་ཆའི་དགོན་སྡེར་དོ་དམ་བྱེད་མཁན་གྱི་མཁན་པོ་བཏང་བ་ལས་མཁན་རབས་གསུམ་པ་བློ་བཟང་འཇམ་དབྱངས་ཀྱིས་གོང་མ་ཆན་ལུང་གི་བཀའ་བཞིན་བསྒྲུབས་པའི་མི་ཚེའི་མཛད་པ་དང་སྐུ་གཤེགས་ཚུལ་སོགས་བཀོད་ཡོད་པས། རྩོམ་འདིར་གཡུང་དྲུང་ལྷ་སྟེང་དང་བསྟན་འཕེལ་གླིང་ཞེས་བན་བོན་གྱི་དགོན་པའི་འཕོ་འགྱུར་དང་འབྲེལ་ནས་དགོན་པའི་མདུན་གྱི་རྡོ་རིང་གི་ངོས་གཉིས་སུའང་དེར་བསྟུན་གྱི་ལོ་རྒྱུས་བཀོད་པའི་ཡི་གེའི་ནང་དོན་ལ་དཔྱད་པ་བཏང་ཡོད་དོ། །

གཙོ་གནད་ཚིག གཡུང་དྲུང་ལྷ་སྟེང་། ལྷོ་ངོས་ཀྱི་ཡི་གེ བྱང་ངོས་ཀྱི་ཡི་གེ བློ་བཟང་འཇམ་དབྱངས།

དང་པོ། གཡུང་དྲུང་ལྷ་སྟེང་དགོན་པའི་ལོ་རྒྱུས་མདོར་བསྡུས།

གཡུང་དྲུང་ལྷ་སྟེང་དགོན་འདི་ནི། སྦས་པའི་ཡུལ་ཤར་ཕྱོགས་རྒྱལ་མོ་ཚ་བ་རོང་ཆུ་ཆེན་རྫོང་ཨན་ཉིང་ཞང(安宁乡)མོ་འབྲུ1གྲོང་ཚོའི(末末扎村)རྒྱལ་མོ་རྔུལ་ཆུའི་བཞུར་འགྲམ་དུ་གནས་ཤིང་། ཆུ་ཆེན་རྫོང་དང་བར་ཐག་སྤྱི་ལེ་སུམ་ཅུ་ལྷག་ཙམ་ཡོད། དགོན་པའི་ཆགས་དབྱིབས་ཀྱི་ཐད་ནས། ངག་རྒྱུན་ལྟར་ན་གནམ་ཟླ་གམ་དང་། ས་ཟླ་གམ། ཆུ་ཟླ་གམ། རི་ཟླ་གམ་གྱི་དབྱིབས་སུ་མངོན་ཞེས་དགོན་པ་ཆགས་སའི་ས་ཆུ་རི་དང་ནམ་མཁའི་དབྱིབས་ནི་ཟླ་གམ་གྱི་དབྱིབས་དང་འདྲ་བར་མ་ཟད། དེ་ནི་རྒྱལ་རོང་ཕུ་མདའ་བར་གསུམ་ལས་ཕུའི་ཁོངས་སུ་གཏོགས་ཤིང་། བཙན་ལྷ་དང་ཆུ་ཆེན་རྫོང་གཉིས་ཀྱི་བར་མཚམས་སུ་གནས་ཡོད།

ལོ་རྒྱུས་སྟེང་གི་གཡུང་དྲུང་ལྷ་སྟེང་དགོན་ནི་རྒྱལ་རོང་ས་ཁུལ་གྱི་བོན་དགོན་ཁག་གི་ལྟེ་བ་བྱས་ཏེ་དུས་རབས་བཅོ་བརྒྱད་པའི་བར་དུ་གནས་ཏེ་ནུས་པ་མི་དམན་པ་ཞིག་བཏོན་ཡོད་ཅིང་། དུས་རབས་བཅོ་བརྒྱད་པའི་སྔོན་གྱི་གཡུང་དྲུང་ལྷ་སྟེང་དགོན་དང་དུས་རབས་བཅོ་བརྒྱད་པའི་རྗེས་ཀྱི་བསྟན་འཕེལ་གླིང་སོགས་གང་ཡིན་རུང་། དགོན་པ་དེས་རྒྱལ་ཁབ་སྲིད་གཞུང་དང་ས་གནས་བར་གྱི་ཆབ་སྲིད་དང་ལོ་རྒྱུས་ཀྱི་འབྲེལ་བའི་ཁྲོད་གོ་གནས་ཆེན་པོ་ཟིན་ཡོད་པར་མ་ཟད། ལྷག་པར་དུ་བསྟན་འཕེལ་གླིང་དུ་བསྒྱུར་རྗེས་སུ་ཆིང་གོང་མའི་དགོན་སྡེ་ཁག་བཞིའི་ཡ་གྱལ་དུ་གྱུར་ཏེ་རྒྱལ་རོང་ས་ཁུལ་གྱི་དགོན་སྡེ་ཡོངས་ལ་དོ་དམ་དང་བདག་པོ་བྱས་མྱོང་།

དེ་ཡང་ལི་ཝེར་གནམ་གྱི་རྒྱལ་པོས་བསྟན་འགྲོའི་ཆེད་དུ་ཞང་ཞུང་ཡུལ་ནས་རྒྱལ་རོང་དུ་ཕེབས་ཏེ་བོན་བསྟན་སྤེལ་བ་ནས་བཟུང་རྒྱལ་རོང་ས་ཆའི་བོན་བསྟན་གྱི་རྫོང་ཧ་ཅང་མཐུག་པར་མ་ཟད། ཡུལ་དེའི་རྒྱལ་པོ་དང་མང་ཚོགས་ཀྱི་རྒྱབ་སྐྱོར་འོག རྒྱལ་མོ་དམུ་རྡོ་ལྟེ་བ་བྱས་ཏེ་བོན་བསྟན་རྒྱ་ཆེར་དར་ཞིང་། དེ་ལས་གཡུང་དྲུང་ལྷ་སྟེང་དགོན་འདིའང་དང་པོ་བོན་སྤེལ་གྱི་གནས་ཆུང་ངུ་འདུ་གནས་ཤིག་ནས་རིམ་བཞིན་ལྷ་སྐུ་སོགས་བཤམས་པའི་གསས་ཁང་དུ་གྱུར་པ་དང་། དེ་ནས་རིམ་བཞིན་རྩ་འཛུགས་ཀྱི་མ་ལག་སོགས་ལྡན་པའི་དགོན་སྡེར་གྱུར་པ་ཞིག་ཡིན་ཞིང་། དེ་བཞེངས་སྐྲུན་གྱི་ལོ་ཚིགས་ཐད་བཞེད་པ་མི་མཐུན་པ་མང་པོ་ཡོད་མོད། དགོན་པའི་རྡོ་རིང་ངོས་ཀྱི་ཡི་གེ་དང་། རྒྱལ་རོང་ལོ་རྒྱུས་རབ་གསལ་མེ་ལོང་། རབ་བརྟན་རྒྱལ་པོའི་བཀའ་ཤོག་དང་རབ་བརྟན་དང་ཁྲོ་སྐྱབས་པར་མའི་བོན་གྱི་ཁམས་ཆེན་སོགས་ལ་གཞིགས་ན། གཡུང་དྲུང་ལྷ་སྟེང་དགོན་པའི་སྔར་མིང་ལ་གཤེན་རབ་ལྷ་ཁང་ཟེར་ཞིང་། དེ་ནི་རབ་བརྟན་རྒྱལ་པོ་ཐོག་མ་ལི་ཝེར་གནམ་གྱི་རྒྱལ་པོར་སྲས་གསུམ་ཡོད་པ་ལས་ཐ་ཆུང་ཁྲོ་ཏིའི་སྐབས་སུ་ཕོ་བྲང་གཡུ་རྩེ་ཞེས་པ་བཞེངས་པ་དང་། དེ་ནས་བརྩིས་པའི་གདུང་རབས་ལྔ་པ་སྲས་བཀའ་རྟགས་ཀྱི་དུས་སུ་བཀའ་རྗེ་གཡུ་རྩེ་ཕོ་བྲང་བཞེངས་ནས་སྔར་ཡོད་གཤེན་རབ་ལྷ་ཁང་ཁྲོ་བོ་སྟག་ལྷ་མེ་འབར་སྲུང་མར་གསོལ་བས་ན། ཡུལ་བཅོ་བརྒྱད་དུ་སྲུང་དམག་དྲེགས་པ་བཅོ་བརྒྱད་དུ་བཀོལ་ཞིང་། ཡང་དེ་ནས་བརྩིས་པའི་གདུང་རབས་བཅུ་བཞི་པ་སྟེ་མང་ཁར་སྒོམ་སྐྱབས་བྱ་བའི་དུས་སུ་གཤེན་རབ་ལྷ་ཁང་ཇེ་རྒྱས་སུ་བཏང་སྟེ་འདུ་གནས་ནས་གསས་ཁང་དུ་འཕེལ་བའི་གོ་རིམ་ཁྲོད་དུ། རབ་བརྟན་རྒྱལ་པོའི་སྲས་ཆུང་བ་ཁྲོ་ཏི་དང་། གདུང་རབས་ལྔ་པ་བཀའ་རྟགས། གདུང་རབས་བཅུ་བཞི་པ་མང་ཁར་སྒོམ་སྐྱབས་གསུམ་གྱི་རིང་དུ་ཐོག་མར་གཡུ་རྩེ་ཕོ་བྲང་བཞེངས་པ་དང་། དེ་ནས་རྒྱ་བསྐྱེད་ཐེངས་གཉིས་མཛད་མྱོང་ཞིང་། བཞེངས་སྐྲུན་དང་རྒྱ་བསྐྱེད་ཐེངས་གསུམ་པོ་ནི་གཞི་རྒྱ་ཆུང་བའི་ཐོག་མའི་རྣམ་པ་ཡིན། དེའི་རྗེས་ཀྱི་རྒྱ་བསྐྱེད་ནི་གོང་མ་ཆན་ལུང་དང་རབ་བརྟན་ནམ་མཁའ་རྒྱལ་པོའི་སྐུ་རིང་ཡིན་ཏེ། འདིའི་སྐབས་ཀྱི་བསྐྱར་བཞེངས་བྱས་པའི་ལོ་ཚིགས་དེ་དགོན་པའི་མདུན་གྱི་རྡོ་རིང་ཡི་གེ་གཞིར་བཟུང་ན། མེ་ཁྱི་ལོ་སྟེ་སྤྱི་ལོ1766 ལོར་རྨང་གཞི་བཏིང་བ་དང་། ཕག་ལོ་སྟེ་སྤྱི་ལོ1767ལོར་ཁང་ཚན་བརྒྱ་དང་བཅོ་ལྔ་གྲུབ་ཅིང་། ཟླ་བཅུ་གཅིག་པའི་དུས་སུ་ཡོངས་སུ་ལེགས་འགྲུབ་བྱུང་བ་ཡིན་པས། དེ་ནི་སྤྱི་ལོ1747ལོ་ནས་1749ལོའི་བར་གྱི་ཆུ་ཆེན་དམག་འཁྲུག་ཐེངས་དང་པོའི་རྗེས་སུ་རབ་བརྟན་ནམ་མཁའ་རྒྱལ་པོས་བསྐྱར་བཞེངས་མཛད་ཅིང་། སྐབས་དེར་དགོན་པ་རྒྱ་ཆེ་བ་འདི་འདྲ་ཞིག་བཞེངས་པ་ལས་སྐབས་དེའི་རབ་བརྟན་རྒྱལ་པོའི་སྟོབས་ཤུགས་ཧ་ཅང་ཆེ་བ་ཤེས་ཐུབ།

སྤྱི་ལོ1747ནས1776ལོའི་བར་གྱི་ལོ་ངོ་སུམ་ཅུར་ཉེ་བའི་རིང་ཆུ་ཆེན་ས་ཁུལ་དུ་དམག་འཁྲུག་ཆེན་པོ་ཐེངས་གཉིས་བྱུང་ཞིང་། དམག་འཁྲུག་དེས་རྒྱལ་རོང་ལོ་རྒྱུས་སྤྱི་དང་བྱེ་བྲག་ཏུ་རབ་བརྟན་རྒྱལ་པོའི་ལོ་རྒྱུས་དང་གཡུང་དྲུང་ལྷ་སྟེང་དགོན་པའི་ལོ་རྒྱུས་ལ་ཤུགས་རྐྱེན་ཆེན་པོ་བཟོས་པར་མ་ཟད། ཆུ་ཆེན་དམག་འཁྲུག་ཐེངས་གཉིས་པའི་རྗེས་སུ་གོང་མ་ཆན་ལུང་གིས་བདེ་འགོད་ཀྱི་ཐབས་ཇུས་ཁྲོད་གཡུང་དྲུང་ལྷ་སྟེང་དགོན་དེ་དགེ་ལུགས་པར་བསྒྱུར་ཏེ་མིང་ལ་བསྟན་འཕེལ་གླིང་ཞེས་གསོལ་བ་དང་། དུས་དེ་ནས་གཡུང་དྲུང་ལྷ་སྟེང་དགོན་དེ་གཡུང་དྲུང་བོན་གྱི་དགོན་སྡེ་ནས་དགེ་ལུགས་པའི་དགོན་སྡེ་ཆེན་པོ་ཞིག་ཏུ་གྱུར་ཏེ་གོང་མའི་དགོན་ཆེན་བཞིའི་ཡ་གྱལ་དུ་གྱུར་ཅིང་། ཆིང་སྲིད་གཞུང་ནས་བཏང་བའི་མཁན་པོ་དང་། ཕྱིས་ཀྱི་དབུས་གཙང་ནས་བཏང་བའི་མཁན་པོ་རིམ་བྱོན་གྱིས་ཆིང་རྒྱལ་རབས་དང་། ཀྲུང་ཧྭ་མིན་གོ་སོགས་ཀྱི་དུས་སྐབས་རབ་དང་རིམ་པའི་ནང་དོ་དམ་གང་ལེགས་བྱས་ཤིང་། སྤྱི་ལོ1986ལོར་རང་རྒྱལ་གྱི་ཆོས་ལུགས་དད་མོས་རང་དབང་གི་སྲིད་ཇུས་ལག་བསྟར་བྱས་པ་ནས་བཟུང་། དད་ལྡན་མང་ཚོགས་ཀྱི་འདོད་མོས་ལྟར་ཆུ་ཆེན་རྫོང་སྲིད་གཞུང་གིས་ཆོག་མཆན་སྤྲད་དེ་བོན་བློན་ནམ་མཁའ་བསྟན་འཛིན་སོགས་ཀྱིས་བསྟན་འཕེལ་གླིང་དེ་ཡང་བསྐྱར་བོན་གྱི་དགོན་སྡེ་ཆེན་མོ་གཡུང་དྲུང་ལྷ་སྟེང་དུ་ཕྱིར་བསྒྱུར་ཏེ་ཆོས་སྒོ་ཕྱེས་མོད། དུས་བབ་ཀྱི་དབང་གིས་འཕེལ་རྒྱས་གང་ལེགས་སུ་འགྲོ་མ་ཐུབ། དུས་རབས་ཉེར་གཅིག་པའི་ནང་བོན་བློན་ནམ་མཁའ་བསྟན་འཛིན་གྱིས་མངགས་པའི་རྔ་བའི་རྟོགས་ལྡན་དགོན་པའི་སྤྲུལ་སྐུ་པདྨ་རིན་ཆེན་མཆོག་གིས་དགོན་པ་བདག་སྐྱོང་གི་བྱ་བ་དང་ལེན་བྱས་རྗེས། རིམ་བཞིན་དགོན་པར་ཞིག་གསོ་རྒྱ་ཆེན་པོ་མཛད་དེ་ད་སྐབས་ཀྱི་ཚོགས་ཁང་ཆེན་མོ་རིམ་པ་གསུམ་ཅན་དང་། སྤྱན་རས་གཟིགས་ཀྱི་ལྷ་ཁང་། ཀུན་བཟང་རྒྱལ་བ་རྒྱ་མཚོ་དང་སྒྲུབ་ཁང་། བྱམས་ཁང་ལ་སོགས་བཟོ་སྐྲུན་གྱི་ཆ་ནས་གཞི་རྒྱ་ཆེ་བའི་དགོན་སྡེ་ཞིག་ཏུ་གྱུར་ཡོད།

གཉིས་པ། གཡུང་དྲུང་ལྷ་སྟེང་དགོན་པའི་རྡོ་རིང་གི་སྤྱིའི་རྣམ་པ།

རྡོ་རིང་འདི་ནི་དེང་གི་གཡུང་དྲུང་ལྷ་སྟེང་དགོན་པའི་སྒོ་ཆེན་མདུན་གྱི་ལྷོ་ནུབ་མཚམས་ཀྱི་ཁང་ཆུང་ཞིག་གི་ནང་དུ་ཡོད་ཅིང་། རྡོ་རིང་གི་གཟུགས་ཀྱི་མཐོ་ཚད་ལ་སྨི4 དང་། ཞེང་ལ་སྨི0.6དང་མཐུག་ཚད་ལ་སྨི0.2ཡོད། དེ་སྔར་རྡོ་རིང་ལ་རྡོ་རིང་གི་ངོས་དང་། རྡོ་རིང་གི་ཀླད། རྡོ་རིང་གི་བྲེ་གདན་སོགས་ཡོད་འོས་མོད། ཕལ་ཆེར་ཟིང་འཁྲུག་གི་ནང་དུ་གཏོར་བརླག་ཐེབས་པས་ད་ལྟར་རྡོ་རིང་གི་ཀླད་དང་བྲེ་གདན་མི་འདུག རྡོ་རིང་དེ་ནི་ལོ་རྒྱུས་ཀྱི་རིག་དངོས་རྩ་ཆེན་ཞིག་ཡིན་པས་ཞིབ་འཇུག་གི་རིན་ཐང་ཆེན་པོ་ལྡན།

རྡོ་རིང་གི་ངོས་གཉིས་སུ་བན་བོན་གཉིས་སུ་ཕྱེས་ནས་བརྐོས་ཡོད་པར་མ་ཟད། ངོས་གཉིས་ཀྱི་འཁོར་ཕྱོགས་ཀྱི་གོ་བཟློག་བརྗེས་ནས་བརྒྱབ་པ་ཞིག་སྟེ། ཐོག་མར་རབ་བརྟན་རྒྱལ་པོ་ནམ་མཁའི་རིང་གཡུང་དྲུང་ལྷ་སྟེང་དགོན་བསྐྱར་བཞེངས་བྱས་ཏེ་རྒྱལ་རོང་རྒྱལ་ཁག་བཅུ་བོ་འབངས་སུ་བཀོལ་ནས་བསྐྱར་བཞེངས་ཀྱི་གནས་ཚུལ་སོགས་རྡོ་རིང་དུ་བཀོད་དེ་དགོན་མདུན་དུ་བསླངས་མོད། རྗེས་སུ་བོན་དགོན་འདི་དགེ་ལུགས་པའི་བསྟན་འཕེལ་གླིང་དུ་བསྒྱུར་རྗེས་སུ་རྡོ་རིང་དེ་གོ་བཟློག་བརྗེས་ཏེ་བོན་ལུགས་ཀྱི་ལོ་རྒྱུས་བརྐོས་ཡོད་པའི་ངོས་དེ་ཐུར་ཏུ་བཙུགས་ཤིང་ངོས་གཞན་དེར་བསྟན་འཕེལ་གླིང་གི་མཁན་པོའི་ལོ་རྒྱུས་བརྐོས་ཏེ་དྲང་ཕྱོགས་སུ་བསྐོར་ནས་བཙུགས། དུས་རབས་ཉི་ཤུ་བའི་ལོ་རབས་བརྒྱད་ཅུའི་ནང་དུ་རྒྱལ་ཁབ་ཀྱི་ཆོས་ལུགས་སྲིད་ཇུས་ལྷོད་ཡངས་སུ་བཏང་ཞིང་ཆུ་ཆེན་རྫོང་སྲིད་གཞུང་གིས་གཡུང་དྲུང་ལྷ་སྟེང་དགོན་པ་བོན་ལུགས་སུ་སྒོ་ཕྱེས་པའི་ཆོག་མཆན་བཀོད་པའི་རྗེས་སུ། རྡོ་རིང་སྟེང་གི་ངོས་གཅིག་གི་བོན་ལུགས་ལོ་རྒྱུས་དང་ངོས་གཞན་དེའི་ཆོས་ལུགས་ལོ་རྒྱུས་གང་ཞིག་དྲང་ཕྱོགས་སུ་བཙུགས་ན་ཡང་དེའི་ངོས་གཞན་པ་དེ་ཐུར་དུ་འཛུགས་དགོས་པ་བྱུང་བས། དགོན་བདག་བླ་མ་པད་མ་རིན་ཆེན་གྱིས་དགོན་པའི་སྒོ་ནས་ཁང་པ་ཆུང་ཆུང་ཞིག་བཞེངས་ཏེ་དེའི་ནང་དུ་རྡོའི་སྟེགས་བུ་གཅིག་གི་སྟེང་དུ་རྡོ་རིང་དེ་འཕྲེད་དུ་བཞག་ནས་བན་བོན་གང་ལ་ཡང་ཕོག་ཐུག་མེད་པ་བྱས་ཡོད།

ད་ལྟར་རྡོ་རིང་དེ་འཕྲེད་དུ་བཞག་ཡོད་པས་ངོས་གཅིག་ལྷོ་ཕྱོགས་སུ་འཁོར་བ་དང་། ངོས་ཅིག་ཤོས་དེ་བྱང་ཕྱོགས་སུ་འཁོར་བར་བྱས་ཡོད་ཅིང་། ལྷོ་ཕྱོགས་སུ་འཁོར་བའི་ངོས་དེར་བོད་ཡིག་རྐྱང་བ་བྲིས་ཡོད་ཅིང་། དེར་བསྡོམས་པས་ཐིག་ཕྲེང་དོན་དགུ་ཡོད་པ་དང་། དེའི་ནང་དོན་ནི་རབ་བརྟན་རྒྱལ་པོ་ནམ་མཁའི་རིང་བོན་གྱི་འདུ་གནས་ཆེན་པོ་གཡུང་དྲུང་ལྷ་སྟེང་དགོན་རྒྱ་བསྐྱེད་དང་། དེའི་གཡོག་ཏུ་རྒྱལ་རོང་རྒྱལ་ཁག་བཅུ་བོ་བཀོལ་ནས་ཁང་ཚན་བརྒྱ་དང་བཅོ་ལྔ་ལེགས་འགྲུབ་བྱུང་བ་དང་རབ་གནས་མཛད་པ་སོགས་ཀྱི་བརྒྱུད་རིམ་དང་། མི་དབང་ནམ་མཁའ་ཉིད་ཀྱིས་དགེ་བསྙེན་གྱི་སྡོམ་པ་བླངས་ཚུལ་དང་། ཀུན་གྲོལ་གྲགས་པ་དང་རབ་བརྟན་རྒྱལ་པོའི་བར་དུ་མཆོད་ཡོན་གྱི་འབྲེལ་བ་བཙུགས་ཏེ་ཁོང་གིས་རྒྱལ་རོང་རྒྱལ་ཁག་སོ་སོའི་ཁྲོད་གོ་གནས་ཆེན་པོ་ཟིན་པ་སོགས་ཀྱི་ལོ་རྒྱུས་རྡོ་རིང་གི་ཤར་ནས་ནུབ་ཏུ་རིམ་བཞིན་བརྐོས་ཡོད་ཅིང་། ངོས་འདིའི་མཐའ་བཞིར་གཡུ་འབྲུག་དང་པདྨ་ལྟ་བུའི་རྒྱན་རིས་མེད།

བྱང་ཕྱོགས་སུ་འཁོར་བའི་ངོས་ནི་རྒྱ་ཡིག་དང་བོད་ཡིག་གཞུང་གིས་བྲིས་ཤིང་། དེར་དགེ་ལུགས་པའི་བསྟན་འཕེལ་གླིང་དུ་བསྒྱུར་རྗེས་སུ་ལིས་ཧྥན་ཡོན་ནས་བཏང་བའི་མཁན་རབས་གསུམ་པ་བློ་བཟང་འཇམ་དབྱངས་ཀྱི་ལོ་རྒྱུས་དང་མཛད་འཕྲིན་སོགས་ནུབ་ནས་ཤར་ཕྲེང་དུ་རིམ་བཞིན་བརྐོས་ཏེ་བཀོད་ཡོད།

ངོས་འདི་ཧྲིལ་བོ་སྟོད་དང་གཡས་གཡོན་ཁག་གསུམ་དུ་བགོས་པ་སྟེ། ངོས་དེའི་སྟོད་དུ་རྒྱ་ཡིག་སྟར་མ་གཅིག་བྲིས་པ་དང་། ངོས་དེའི་གཡོན་ཕྱོགས་སུ་བོད་ཡིག་ཐིག་ཕྲེང་ཞེ་བརྒྱད་དང་། གཡས་ཕྱོགས་སུ་རྒྱ་ཡིག་སྟར་མ་བཞི་ཡིས་གྲུབ་ཡོད་པར་མ་ཟད། མཐའ་བཞིར་གཡུ་འབྲུག་དང་མེ་ཏོག་པདྨའི་རྒྱན་རིས་ཀྱིས་བསྐོར་ཞིང་། དེར་དུས་རབས18པའི་དུས་མཇུག་གི་ཆན་ལུང་དུས་ཀྱི་པཎྚི་ཛ་སག་བླ་མའི་འཕྲིན་ལས་བཀོད་པ་དང་། རྒྱ་ཡིག་ཏུའང་ཆན་ལུང་ཁྲི་ལོ་དྲུག་ཅུ་པ་སྤྱི་ལོ1795ལོའི་སྐབས་ཀྱི་བསྟན་འཕེལ་གླིང་གི་མཁན་པོ་པཎྚི་ཏ་ཛ་སག་བླ་མ་བློ་བཟང་འཇམ་དབྱངས་ཀྱི་སྐུ་གདུང་བཀོད་ཡོད།

གསུམ་པ། རྡོ་རིང་ངོས་ཀྱི་ཡི་གེ་དང་དེའི་དཔྱད་པ།

གཅིག རྡོ་རིང་གི་ལྷོ་ངོས་ཡི་གེའི་མ་ཡིག་དང་དེའི་དཔྱད་པ།

གཡུང་དྲུང་ལྷ་སྟེང་གི་རྡོ་རིང་ངོ་ན་ཡོད་པའི་ཡི་གེ་བཞུགས་སོ། །

མཆོག་གསུམ་རིན་ཆེན་གསུམ་ལ་ཕྱག་འཚལ་ལོ།། (དང་པོ་མཆོད་བརྗོད་སོགས་ཡི་གེ་མི་གསལ་བས་འབྲི་རྒྱུ་མ་རྙེད། ཐིག་ཕྲེང་ལྔ་ཙམ་གྱི་འཕྲོ་ནས) ཟབ་དོན་བཀའ་གཏེར་མ་བུ་ཁ་སྤྲད་སོགས། བརྗོད་ཀྱི་མི་ལང་མདོར་བསྡུར་ཟུར་ཙམ་ལགས། རྣམ་འདྲེན་དེ་ཡི་རྗེས་འཛིན་མཆོག་གྱུར་བ། སྨོན་རྒྱལ་རིམ་སྤྱོན་རབ་འབྱམས་དབང་གྲགས་དང་། ཐོས་དབེན་སངས་རྒྱས་རིན་ཆེན་དཔལ་བཟང་ཟུང་། (འདིའི་བར་ན་ཚིག་རྐང་གཅིག་བྲི་རྒྱུ་མ་ལོན) རྟེན་འབྲེལ་དགེ་ལེགས་ངོ་མཚར་བཀའ་ཡི་རྟགས། རང་འདིར་རྣམ་འདྲེན་ཀུན་གྲོལ་བྱིན་རླབས་ལགས། སྔོན་བཞིན་རོང་ཁམས་སྤྱོན་མཆོད་བླ་རབས་ཀུན། གཞི་འདིའི་བསྟན་སྦྱིན་རབ་རྒྱལ་མིང་གི་མཚན། བསྟན་སྦྱིན་རབ་རྒྱལ་རྡོ་རྗེའི་རྒྱལ་གྱི་སྲས། སྲས་པོ་ནམ་འཁའ་ཡེ་ཤེས་རྒྱལ་པོ་མཚན། ཆུང་ངུའི་དུས་ནས་ཐུགས་སྐམ་བློ་རྩལ་རྫོགས། སྲིད་ཞུའི་ཤེས་བྱ་མཁྱེན་ཡང་ཆ་ཤེས་གང་། སངས་རྒྱས་བསྟན་པ་རིན་ཆེན་དགུང་དུ་བཏེགས། ཁྱོན་མང་ཐ་གྲུ་ཕུ་མདའ་བར་གསུམ་དུ། ཕྱི་ནང་ལྷ་ཡི་གཞལ་ཡས་ཁང་བཞེངས་དང་། རྩ་གསུམ་རིས་འབུར་བྲུག་རྡུང་འབབ་འདྲ་སོགས། བཀའ་ཡི་གླེགས་བམ་བྲི་སྒོ་ཀློག་སྒྲུབ་དང་། གསུམ་ལྡན་འདུས་རྗེ་མཆོད་བསྐུལ་མཛད་དཀར་པོས། ས་ཁམས་འགེངས་ཤིང་རྒྱལ་རྒྱུད་འཛིན་པ་ཡིན། སློབ་དཔོན་མཁས་མཆོག་ཚུལ་ཁྲིམས་དབང་རྒྱལ་དང་།བསོད་ནམས་ཕུན་ཚོགས་རྒྱལ་བ་འོད་ཟེར་དང་། བསོད་ནམས་དབང་གི་རྒྱལ་པོ་གྲགས་རྒྱལ་དང་། སྟོན་པ་ཟེ་བཅས་བཟང་པོར་སྤྱོད་པའོ།། འོན་ཀྱང་སྣང་མུན་དཀར་ནག་ངང་ཚུལ་བཞིན། སྔོན་ལས་དུས་ཀྱི་འཁྲུག་པ་ཆེ་ལངས་པའི།། དབང་མེད་སྡིག་པ་མི་བསག་ཀ་མེད་གྱུར། འོན་ཀྱང་མཐར་དམག་ཞི་ནས་རང་སར་བསྐྲད། རོང་ཁམས་རྒྱལ་པོ་བཅུ་བོ་འོག་ཏུ་བསྡུས། གོང་མ་ལྷ་ཡི་ལུང་བཞིན་དགོན་ཆེན་གཡུང་དྲུང་ལྷ་སྟེང་འདུས་སྡེ་བསྐྲུན། དེ་ཡང་ལུང་བས་ཆུ་ཚན་ཕུན་ཚོགས། ལྷ་སྡེ་ཚོགས་པ་ཡི་ས་ཕོ་བྱི་བ་ལོར་བསྟན་པའི་འགོ་ཟུགས། གཤེད་གཞི་ལོ་བ་བསྟན་རིམ་དྲི་མེད་འབྱུང་། སྤྱོད་པའི་དུས་ན་ནུབ་ཀྱང་མཐའ་ནས་དར། ཞེས་སོགས་གསུངས་བཞིན་མི་ཟད་མེ་ཁྱི་ལོ་ཟླ་བ་ལྔ་བའི་ཡར་ཚེས་བརྒྱད་ཉིན། རྨང་བཏིང་གསུམ་ལྡན་བསོད་ནམས་རྒྱལ་མཚན་པས། གཞི་བརྟན་མངའ་དབུས་དགེ་བའི་ལྟས་མང་རྨད། ལས་བྱེད་གཡོག་ཀྱང་ཅག་ལའི་རོང་མི་དང་། བཅན་ལའི་འབངས་མི་ཝོ་བཞིའི་མངའ་འབངས་དང་། སེ་མོ་རྫུང་འགའ་ཅོག་ཙེ་གསུམ་གྱི་འབངས། དམ་བྷའི་བློན་འབངས་ཁྲོ་སྐྱབས་གཟིམས་ལོག་འབངས། དགེ་བཤེས་འཁོར་འབངས་ཡར་རྒན་རྒྱལ་པོའི་འབངས། བཅུ་པོས་ལས་བྱས་ཟླ་བཞིའི་ཁོངས་སུ་གྲུབ། ཕག་ལོར་ཁང་ཚན་བརྒྱ་དང་བཅོ་ལྔ་གྲུབ། ཟླ་ལྔའི་ཡར་ཚེས་བོད་རོང་ལྷ་བྲི་མཁས། ཟླ་བཅུ་གཅིག་གིས་ཟླ་གཉིས་ཁོངས་སུ་འགྲུབ། དེ་ཚེ་མཁན་ཆེན་བསོད་ནམས་རྒྱལ་མཚན་དང་། སྲག་ངེས་བླ་མ་ཤེས་རབ་གཡུང་དྲུང་དང་། རྟོགས་ལྡན་རྣམ་བཞིས་ལམ་གྱི་རབ་གནས་མཛད། རྟེན་འབྲེལ་འཇའ་གུར་འུར་ཆེམ་དད་སྤྲོ་མངོན། བྲས་བུའི་རབ་གནས་བཀའ་བླུགས་རྒྱལ་བསྟན་དང་། སྨོན་རྒྱལ་རབ་འབྱམས་བསྟན་པའི་རྒྱལ་མཚན་དང་། སྨོན་རྒྱལ་མཁན་རྗེ་སངས་རྒྱལ་རིན་ཆེན་སོགས། བྱས་རྗེ་འཇའ་དང་རྟེན་འབྲེལ་ངོ་མཚར་སྨད། བཤད་གྲ་དགའ་ལྡན་རབ་སྤྲོའི་གཞིའི་རབ་གནས། རྣམ་དག་བླ་མ་བསྟན་གཡུང་དག་གི་བྱས། དེ་ཕོབས་བདག་མི་དབང་ནམ་མཁའི་མཚན། འཇིག་རྟེན་སྒྱུ་མའི་རྣམ་རོལ་མངོན་གཟིགས་པས། གོང་ནས་རིག་འཛིན་ཀུན་གྲགས་གྲགས་པའི་དྲུང་། ཁྱིམ་བསྟེན་དགེ་བསྙེན་སྡོམ་པ་ནོད་པའི་མཚན། ནམ་མཁའ་གཡུང་དྲུང་ཡེ་ཤེས་དབང་གི་རྒྱལ། ཞེས་སོགས་གཞུང་མཐུན་འཛོལ་མེད་བསྲུང་བར་མཛོད། མཁན་པོ་གསུམ་ལྡན་བསོད་ནམས་རྒྱལ་མཚན་དྲུང་། སོ་ཐར་ཚུལ་ཁྲིམས་གོང་སྤར་མནོས་པའི་ཆེད་མཚན་ནི་ནམ་མཁའ་ཡེ་ཤེས་ཞེས་སུ་གསོལ། ཚངས་སྤྱོད་ཚུལ་མངའ་དབང་བཞིའི་བརླན་གྱིས་བསྐྱེད། བྱང་སེམས་འདབ་ལེགས་མངར་བའི་ཡོངས་སུ་གཏམས། དགོན་ཆེན་མི་འགྱུར་གཡུང་དྲུང་ལྷ་སྟེང་། ལུང་དང་མཐུན་པར་ས་འཛིན་ས་བྱི་ལོའི། ཟླ་བ་དང་པོའི་ཡར་ཚེས་ཤིས་པའི་ཉིན། ལུང་ལས་མི་བསླུ་འབུམ་ཕྲག་འཁྱིལ་བའི་སྟོང་། བརྒྱ་ཕྲག་ལྷག་ལ་ཆས་གོས་མཆོད་རྫས་དང་། འབྲུ་དང་བཞེས་ཚོགས་ཡོགས་རྒྱག་མི་དམན་བཏང་། གོང་དུ་བཀུར་བའི་སྨོན་རྒྱལ་རབ་འབྱམས་དང་། མཁན་ཆེན་བསོད་ནམས་རྒྱལ་མཚན་གཉིས་བཅས་བཞུགས། གླིང་གི་བཅའ་འགྲིགས་ཚོགས་ཀྱི་དགེ་སྤྱོད་སོགས། མ་མཉམ་མི་ཉམས་མཉམ་མེད་རྗེསུ་འབྲེངས། རྒྱལ་བསྟན་ལེགས་བྱས་བི་ཤོས་འོར་སྩང་བསྐྲུན། དབང་ཕྱོགས་སྤོ་མཐོན་ཕྲག་པར་གཟི་འབར་ཆེ། རྒྱ་མཚོའི་གོས་ཅན་སྔ་འགྱུར་པད་ཚལ་རྒྱས། ལུས་ཅན་རྐང་དྲུག་དོན་གཉིས་རོ་ལང་དཀྱེས། མཆོད་ཡོན་དགོན་གསུམ་ལོ་རབས་ཟུར་ཙམ་མོ།།

གསུམ་པ་མཇུག་སྡུད་བཀྲས་སྨོན་སྤེལ་བ་ནི། མཐའ་ཀླས་ཕྱོགས་བཅུའི་རྒྱལ་བ་ཡོངས་ཀྱི་རྩ་བ་དཔལ་ལྡན་བླ་མ་ཞེས། བསྟོད་འོས་སྐྱབས་ཀྱི་མཆོག་གྱུར་ཨེ་མ་ཨེ་མའོ་བསོད་ནམས་ཞིང་གི་མཆོག ཁྱེད་ཀྱི་དྲིན་ལས་མངོན་མཐོ་ངེས་ལེགས་སོགས་ཏེ་དགོས་དགུའི་རེ་ཕྲས་ཀུན། སྦྱིན་མཛད་ཁྱབ་གདལ་ཀུན་གྲོལ་གྲགས་དབང་རྩ་གསུམ་བཀའ་བསྟོད་བཅས་ཀྱིས་གཟིགས། གང་གི་ཐུགས་རྗེ་སྐབས་གསུམ་དབུས་འགྱིང་རྩེ་བརྒྱ་སྙིལ་བར་འཆང་བ་ཡིས། ལོག་ཚོགས་ཕས་ཀྱི་རྐྱེན་ངན་སྟོབས་ལྡང་རིམ་མང་ས་ཡི་འོག་ཡིབས་ཤིང་། ཁྱོན་ཡངས་ནོར་འཛིན་ལྗོངས་ཚར་ལྷ་མི་ལེགས་བྲས་བགྲང་ཡས་གྲངས་མང་བ། འཆི་མེད་བྱུང་བས་འཚོ་ཞིང་དགེ་ལེགས་དཔལ་སྤྱོད་ཕན་ཡོན་འབར་གྱུར་ཅིག ཁྱད་པར་ཤར་རོང་ཐ་གྲུ་རྣམ་དག་བཀོད་དབུས་ཞིང་སྐྱོང་དམ་པ་ཡིས། བསྐྱིལ་མི་འདུས་སྡེ་རྒྱ་མཚོའི་འཕྲིན་ནམ་ཟབ་རྒྱས་གཏིང་རིང་རབ་དར་ངོས། ཚད་གསུམ་བདེན་གཉིས་ལེགས་ལམ་བཤད་གྲྭའི་དཔལ་འབར་མཐའ་ནས་དབུས་ཁྱབ་པས། སྔ་འགྱུར་རིང་ལུགས་ལྷ་ཆུའི་རྒྱུན་རིང་གྲོགས་པོ་རྟག་བརྟན་རྒྱལ་གྱུར་ཅིག རབ་མང་རྒྱལ་ཕྲན་ས་འཛིན་དབུས་ན་རབ་བརྟན་རྒྱལ་རྒྱུད་རབ་བརྗིད་པ། ལྷུན་མཐུག་རིང་བ་རི་ཡི་སྤོབ་པ་ལྷུན་རྫོགས་ལྡན་པའི་ལྷུན་ཆོས་ཤིང་། བསྟན་པ་བོན་གྱི་ཉི་མ་བསྟན་འཛིན་བསྟན་སྲིད་མི་ནུབ་བསྟན་དཔལ་མཐོ། གཡོ་མེད་ལྷ་མི་དཀྱིལ་ན་དབྱིག་གཏེར་གཡོ་ཞིང་ལོངས་སྤྱོད་གཡོ་བྲལ་ཤོག དེ་ལྟར་བསྟན་པའི་སྦྱིན་བདག་མི་དམན་དད་པའི་དཔལ་མཐོ་སི་ཡི་ཕྲག གོང་མ་གོང་མའི་རྒྱུད་འཛིན་ཕན་བདེ་སྤེལ་མཛད་སྨོན་རྒྱལ་སུ་རྨའི་གཟི། འཆད་མེད་ཡང་ནས་ཡང་འཆར་ལེགས་ཚོགས་དེ་མཐུས་ཁམས་གསུམ་རི་དྲུག་འགྲོ། ཀུན་ལ་སྙིགས་མའི་སྙུད་ཞི་དགའ་བདེ་ལོངས་སྤྱོད་བཀྲ་ཤིས་མཐའ་བརྟན་ཤོག འདི་སོགས་སྟོང་ཁམས་ལེགས་བྱས་བསྡོམ་སྟེ་ཆབས་གཅིག་མཁའ་མཉམ་འགྲོ་བར་བསྔོ། དོན་དེས་འཁོར་བར་འཁོར་སྤང་བདེ་མི་ལམ་ལྔ་བརྒྱུད་དེ་རིམ་པར་བགྲོད། ས་བཅུ་རིམ་སྤྱོད་བདག་དོན་ལྷུན་གྲུབ་ཕྱི་ནང་གསང་བའི་འོག་མིན་དབྱིངས། འཁོར་ནས་གཞན་དོན་དམ་པ་ཕར་འདས་སྟོང་ཁམས་དུས་ཀྱི་འདྲེན་ནུས་ཤོག གང་འདི་སྐྲུན་པོ་མཆོད་ཡོན་དངོས་ཀྱི་བསོད་ནམས་ཡེ་ཤེས་ཚོགས་གཉིས་རྫོགས། ཉོན་ཤེས་་སྒྲིབ་བྱང་ལམ་བསྒྲོད་པ་རྣམས་བདེ་ཆེན་གོ་འཕང་མྱུར་ཐོབ་ནས། སླར་ཡང་བཤེས་གཉེན་དེ་དཔལ་འགྲོ་བའི་མགོན་ཏུ་སྟོབས་བཅུ་མངའ་བའམ། འཁོར་ལོས་བསྒྱུར་བའི་མངའ་འཛིན་བསྟན་འགྲོ་ཕན་བདེའི་མཛད་མཁོར་བྱེད་གྱུར་ཅིག གང་འདི་མི་དབང་བསླབ་གསུམ་འཛིན་པའི་བཞེད་དུ་སྒྲ་བ་བུརྷའི་མིང་། བདག་ཀྱང་ཚེ་རབས་འདི་ནས་ཀུན་ཏུ་བོན་དང་གང་རྟོག་སླ་འཛོལ་མིན་པར། དམུ་རྒྱལ་སྲས་ཀྱི་རིང་ལུགས་བླ་ནས་བླར་འདེགས་བྱེད་མངའ་ཐོབ་ནས། མཐར་ཐུག་མི་འཁོར་མི་འཕྲུལ་རྣམ་འདྲེན་རྒྱས་པའི་དྲུང་དུ་སྐྱེ་བར་ཤོག དེ་སྐད་རྒྱ་ཆེན་སྨོན་ལམ་བཏབ་འདི་གེགས་མེད་ཡོངས་སུ་འགྲུབ་པར་ཤོག ཅེས་པའོ། །

རྡོ་རིང་ཡི་གེ་འདིའི་ནང་དོན་ཁག་གསུམ་དུ་བགོས་ཆོག་སྟེ། དང་པོ་མཆོད་བརྗོད་དང་། བར་དུ་དངོས་གཞི། ཐ་མར་བཀྲ་ཤིས་སྨོན་ལམ་སྤེལ་བ་ཡིན་ཞིང་། དེར་དངོས་གཞིའི་ཁྲོད་དུ་རབ་རྒྱལ་མི་དབང་ནམ་མཁའ་རྒྱལ་པོ་དང་འབྲེལ་བའི་དོན་ཆེན་འགའ་བརྗོད་པ་སྟེ།

༡ རྡོ་རིང་ལས།“སྨོན་རྒྱལ་རིམ་བྱོན་རབ་འབྱམས་དབང་གྲགས་དང་། ཐོས་དབེན་སངས་རྒྱས་རིན་ཆེན་དཔལ་བཟང་ཟུང་། རྟེན་འབྲེལ་དགེ་ལེགས་ངོ་མཚར་བཀའ་ཡི་རྟགས། རང་འདིར་རྣམ་འདྲེན་ཀུན་གྲོལ་བྱིན་རླབས་ལགས།”2ཞེས་སྨོན་རྒྱལ་རབ་འབྱམས་དབང་གྲགས་དང་། ཐོས་འབེན་སངས་རྒྱས་རིན་ཆེན་ཟུང་ལ་རྟེན་འབྲེལ་ངོ་མཚར་བའི་རྟགས་བྱུང་བ་ནི་ཀུན་གྲོལ་གྲགས་པའི་བྱིན་རླབས་ཡིན་པར་མ་ཟད། བླ་རབས་འདི་དག་གི་བསྟན་པའི་སྦྱིན་བདག་གི་མཚན་ལ་ནམ་མཁའ་ཡེ་ཤེས་རྒྱལ་པོ་ཟེར་བ་རྟོགས་ཐུབ།

༢ རབ་རྒྱལ་ནམ་མཁའ་རྒྱལ་པོ་ཁོང་ནི་བསྟན་སྦྱིན་རབ་རྒྱལ་རྡོ་རྗེ་རྒྱལ་གྱི་སྲས་ཡིན་ཚུལ་བཀོད་པ། “བསྟན་སྦྱིན་རབ་རྒྱལ་རྡོ་རྗེའི་རྒྱལ་གྱི་སྲས། སྲས་པོ་ནམ་འཁའ་ཡེ་ཤེས་རྒྱལ་པོ་མཚན” 3ཞེས་བསྟན་པའི་སྦྱིན་བདག་རབ་བརྟན་རྒྱལ་པོ་རྡོ་རྗེ་རྒྱལ་གྱི་སྲས་ནམ་མཁའ་ཡེ་ཤེས་རྒྱལ་པོ་མཚན་ཏེ་ནམ་མཁའ་ཡེ་ཤེས་ནི་མཁན་ཆེན་བསོད་ནམས་རྒྱལ་མཚན་གྱི་དྲུང་ནས་སོ་ཐར་གྱི་སྡོམ་པ་བཞེས་ཏེ་བཏགས་པའི་མིང་ཡིན། རྡོ་རིང་དུ་བརྐོས་པའི་གནད་འདིས་རྒྱའི་མཁས་པ་རྣམས་ཀྱིས་རྒྱ་ཡིག་ཏུ་བྱུང་བའི莎罗奔དང莎罗奔细གཉིས་མི་སྣ་གཉིས་ཡིན་པར་སྒྲུབ་བྱེད་དྲངས་ཡོད། རྒྱའི་ཡིག་ཚང་དུ། ནམ་མཁའི་རྒྱལ་པོ་ནི་རྡོ་རྗེ་རྒྱལ་གྱི་ནུ་བོ་ཡིན་ཞིང་། ཁོང་གཉིས་ཀྱི་འབྲེལ་བ་ནི་ཕུ་ནུའི་འབྲེལ་བ་ལས་ཡབ་སྲས་ཀྱི་འབྲེལ་བ་ཡིན་པ་གླེང་མེད་དེ། “ཆན་ལུང་སྲིད་ལོ་ཉེར་གསུམ་པ་(1758ལོར)རབ་བརྟན་རྒྱལ་པོ་སློབ་དཔོན་ནད་ཀྱིས་ཚེ་ལས་འདས་ཤིང་། ཁོང་གི་ནུ་བོ་ནམ་མཁས་ཐུའུ་བསིའི་གོ་གནས་རྒྱུད་འཛིན་བྱས” 4ཞེས་རབ་བརྟན་རྒྱལ་པོ་སློབ་དཔོན་ཚེ་ལས་འདས་ཏེ་ནུ་བོ་ནམ་མཁས་རྒྱལ་རྒྱུད་བཟུང་བ་ལས་ཁོ་གཉིས་ཀྱི་འབྲེལ་བ་ནི་ཕུ་ནུའི་འབྲེལ་བ་ཡིན་པ་བཤད། ཡང་ལ་ལས“ཆན་ལུང་སྤྱི་ལོ1743ལོར་སློབ་དཔོན་ནད་ཀྱིས་ཚེ་ལས་འདས་ཤིང་། དེའི་ནུ་བོ་གསེར་ལེགས་འབུམ་བཞིས་རྒྱལ་རྒྱུད་བཟུང་། ཆན་ལུང་སྲིད་ལོ་ཉེར་གསུམ་པ་སྟེ(སྤྱི་ལོ1758ལོར)། གསེར་ལེགས་འབུམ་བཞི་དགུང་ལོ་མཐོ་བས་དེའི་སྲས་ནམ་མཁས་རབ་བརྟན་རྒྱལ་པོའི་རྒྱལ་རྒྱུད་བཟུང” 5ཞེས་སྤྱིར་ཡིན་ན་སློབ་དཔོན་ཟེར་བ་རབ་བརྟན་རྒྱལ་པོ་རྡོ་རྗེ་རྒྱལ་ལ་གོ་མོད། འདིར་སློབ་དཔོན་དང་གསེར་ལེགས་འབུམ་བཞི་ཟེར་བ་གཉིས་བྱུང་ཡོད་པར་མ་ཟད། ནམ་མཁའ་རྒྱལ་པོའི་ཡབ་ནི་གསེར་ལེགས་འབུམ་བཞི་ཟེར་བ་འདི་ཡིན།

ཡིན་ཡང་བོད་ཡིག་གི་ཡིག་ཆ་རྣམས་ལས་སློབ་དཔོན་གྱི་རྗེས་ནས་ནམ་མཁའ་རྒྱལ་པོས་རྒྱལ་སྲིད་བཟུང་བར་མ་ཟད། སློབ་དཔོན་འཚོ་བཞུགས་དུས་སུའང་ཁོ་གཉིས་ཀས་སྲིད་སྐྱོང་བ་སྟེ། “་་་་་་་ཏ་ཀྱིན་ཆྭན་ཐིའུ་བསི་སློབ་དཔོན་དང་ནམ་མཁའ་རྒྱལ་པོ་གཉིས་ཀྱི་ཡི་གེ་ཡིན། ༧ཆེན་ལུང་དགོང་ལོ་ཉར་གསུམ་ཟླ12ཚེས11ལ་ཕུལ” 6ཅེས་སྤྱི་ལོ1758ལོའི་ཟླ12པའི་ཚེས11ཉིན་ཆུ་ཆེན་རབ་བརྟན་རྒྱལ་པོ་སློབ་དཔོན་དང་ནམ་མཁའ་རྒྱལ་པོ་གཉིས་ཀྱིས་གོང་མ་ཆན་ལུང་ལ་ཕུལ་བའི་ཞུ་ཡིག་ཅིག་ཡིན་ཞིང་། འདིར་སློབ་དཔོན་དང་ནམ་མཁའ་རྒྱལ་པོ་གཉིས་བྱུང་བ་དང་། དེ་མིན་ཞུ་ཡིག་ཕུལ་བའི་དུས་ནི1758ལོ་ཡིན་པས་ན། གོང་གི《རྒྱལ་རོང་བོད་ཀྱི་ལོ་རྒྱུས》ཞེས་པར་འཁོད་པའི1758ལོར་སློབ་དཔོན་ཚེ་ལས་འདས་པ་དང་ཕིང་ཀྲི་ཡན་གྱི་(彭陟焱)ཆན་ལུང་སྲིད་ལོ་ཉེར་གསུམ་པ་སྟེ(སྤྱི་ལོ1758ལོར)། གསེར་ལེགས་འབུམ་བཞི་དགུང་ལོ་མཐོ་བས་དེའི་སྲས་ནམ་མཁས་རབ་བརྟན་རྒྱལ་པོའི་རྒྱལ་རྒྱུད་བཟུང་ཞེས་པའི་ལྟ་བ་དེ་གཉིས་ཀྱི་ལོ་ཚིགས་དང་མཐུན་པར་མ་ཟད། ཞུ་ཡིག་དེ་ཟླ12པའི་ཚེས11ཉིན་ཕུལ་བས་སྐབས་དེར་ཚེ་ལས་འདས་མེད་པ་རྟོགས་ཐུབ་པ་དང་། དེ་ལྟར་ན་དུས་ཚོད་ཀྱི་ཆ་ནས་ཕིང་ཀྲི་ཡན་གྱི(彭陟焱)ལྟ་བ་ལྟར1758ལོར་གསེར་ལེགས་འབུམ་བཞི་ཟེར་བ་དགུང་ལོ་བགྲེས་ཏེ་ནམ་མཁའ་རྒྱལ་རྒྱུད་བཟུང་བ་དེ་གོང་གི་ཞུ་ཡིག་ཏུ“སློབ་དཔོན་དང་ནམ་མཁའ་རྒྱལ་པོ་གཉིས་ཀྱིས་ཕུལ”ཞེས་འབྲི་དགོས་པའི་རྒྱུ་མཚན་གྱི་རིགས་ལམ་དང་མཐུན་པས། འདི་ལས་རྒྱའི་ཡིག་ཚང་དུ་འཁོད་པའི་སློབ་དཔོན་བྱ་བ་དང་ནམ་མཁའ་རྒྱལ་པོའི་བར་མཚམས་སུ་རྒྱལ་པོ་ཞིག་བྱུང་མེད་པ་རིགས་འདེད་བྱེད་ཐུབ་ཅིང་། སློབ་དཔོན་གྱི་རྗེས་ནས་ནམ་མཁའ་རྒྱལ་པོ་ཡིན་པ་གསལ་བོར་ཤེས་ཐུབ་ལ། རྒྱའི་ཡིག་ཚང་ཁྲོད་ཀྱི莎罗本ཟེར་བ་རྒྱལ་རོང་སྐད་དེ། ས་ལོབ་དཔོན་ཞེས་བོད་ཡིག་གི་ཡིག་འབྲུ་སོ་སོར་བཀྲལ་བ་ཡིན་ཞིང་ཡི་གེར་བྲིས་ན་སློབ་དཔོན་ཞེས་པ་ཡིན་པས། 莎罗本དང色勒本གཉིས་ནི་བོད་ཡིག་གི་སློབ་དཔོན་ཞེས་པའི་འབྲི་ཚུལ་མི་འདྲ་བ་གཉིས་ཡིན་ནམ་སྙམ། ཡང་ལོ་རྒྱུས་རབ་གསལ་མེ་ལོང་དུ“ལྷ་དབང་རྡོ་རྗེ་ལ་སྲས་ལྔ་འཁྲུངས་པའི་གཅེན་འོག་རྡོ་རྗེ་རྒྱལ་གྱིས་རྒྱལ་སྲིད་སྐྱོང་བས་ན། རྒྱལ་པོ་རེ་ལ་སྐུ་སྲུང་གཅེན་པོ་རེ། བཞེངས་པའི་གསས་ཁང་མཛད་འཕྲིན་མཐའ་ཡས་པས། བོན་སྲིད་རྒྱལ་སྲིད་སྐྱོང་བའི་རིམ་པ་ནི། ཞིབ་པར་རྒྱལ་རབས་མུ་ཏིག་འཕྲེང་བར་གསལ། རྒྱལ་པོ་རྡོ་རྗེ་རྒྱལ་གྱི་སྲས་ལྔ་ལས། ལྕམ་སྲིང་ཨ་ཁོ་བཙན་ལྷའི་བཙུན་མོ་བྱོན། གཅེན་པོ་མི་དབང་ནམ་མཁའ་རྒྱལ་པོའི་མཚན། ཆུང་ངུའི་དུས་ནས་ཐུགས་སྒོམ་བློ་རྩལ་རྒྱས”7ཞེས་ནམ་མཁའ་རྒྱལ་པོ་ནི་རྡོ་རྗེ་རྒྱལ་གྱི་སྲས་ལྔའི་ནང་གི་གཅེན་པོ་ཡིན་པ་བསྟན་པ་དང་། གོང་གི་དགོན་པའི་རྡོ་རིང་དུའང“བསྟན་སྦྱིན་རབ་རྒྱལ་རྡོ་རྗེའི་རྒྱལ་གྱི་སྲས”ཞེས་བྱུང་ཡོད་པར་མ་ཟད། ཁོང་ནི་ཆུང་ངུའི་དུས་ནས་ཐུགས་སྒམ་བློ་རྩལ་རྫོགས་ཤིང་ཤེས་བྱར་མཁྱེན་རྒྱ་ཡངས་པ། སངས་རྒྱས་ཀྱི་བསྟན་པ་དགུང་དུ་བཏེགས་ཏེ་ལྷ་ཁང་མང་པོ་བཞེངས་པའི་མཛད་རྗེས་དང་ཁོང་གི་གཤིས་སྤྱོད་གླེང་བར་མ་ཟད། ད་རུང་ཁོང་ཉིད་ཀྱིས་སློབ་དཔོན་ཚུལ་ཁྲིམས་དབང་རྒྱལ་དང་། བསོད་ནམས་ཕུན་ཚོགས་རྒྱལ་བ་འོད་ཟེར། བསོད་ནམས་དབང་གི་རྒྱལ་པོ་གྲགས་རྒྱལ། སྟོན་པ་ཟེ་བཅས་8ལ་འགྲིག་མཐུན་གྱིས་བཟང་པོར་སྤྱོད་པ་དང་། དེ་མིན་སྔོན་གྱི་དུས་སུ་འཁྲུག་པ་ལངས་དུས9སྡིག་པ་མི་བསག་ཀ་མེད་དུ་གྱུར་ཏེ་མཐའ་བཞིའི་དམག་རྣམས་ཞི་བར་བྱས་ཏེ་རྒྱལ་རོང་རྒྱལ་ཁག་བཅུ་བོ་དབང་དུ་བསྡུས་ཚུལ་བསྟན་ཏེ་ལྷས་སྐྱོང་གོང་མ་ཆན་ལུང་གི་བཀའ་བཞིན་དུ་གཡུང་དྲུང་ལྷ་སྟེང་བཞེངས་སྐྲུན་བྱས་པའི་གནས་ཚུལ་གསལ་བོར་བཀོད་ཡོད།

རབ་བརྟན་རྒྱལ་པོ་མི་དབང་ནམ་མཁའ་རྒྱལ་པོ་ཁོང་ནི་ཆན་ལུང་ཁྲི་ལོ་སོ་ལྔ་པ་སྟེ་སྤྱི་ལོ1770ལོའི་ཟླ4པར་སྐུ་གཤེགས་པ་དང་། དེ་རྗེས་ཁོའི་བུ་བསོད་ནམས་ཀྱིས་རྒྱལ་སྲིད་བཟུང་། དེར་བརྟེན། རྡོ་རིང་གི་ཡི་གེ་འདིས་ནམ་མཁའ་རྒྱལ་པོ་ནི་རྡོ་རྗེ་རྒྱལ་གྱི་བུ་མིན་པར་སྤུན་ཟླ་ཡིན་པའི་བཤད་ཚུལ་ལ་དགག་པའི་ལུང་ཁུངས་བཙན་པོ་ཞིག་སྤྲད་ཡོད།

༣ གཡུང་དྲུང་ལྷ་སྟེང་དགོན་བསྐྱར་བཞེངས་ཀྱི་བརྒྱུད་རིམ་དང་ལོ་ཚིགས་གསལ་བོར་བཀོད་པ།

རྡོ་རིང་དུ།“ལྷ་སྡེ་ཚོགས་པ་ཡི་ས་ཕོ་བྱི་བ་ལོར་བསྟན་པའི་འགོ་ཟུགས། གཤེད་གཞི་ལོ་བ་བསྟན་རིམ་དྲི་མེད་འབྱུང་། སྤྱོད་པའི་དུས་ན་ནུབ་ཀྱང་མཐའ་ནས་དར”ཞེས་བཀོད་པ་བཞིན། རབ་བརྟན་ནམ་མཁའ་རྒྱལ་པོས་མེ་ཁྱི་ལོ1766ལོའི་ཟླ5པའི་ཚེས8ཉིན། དགོན་པའི་རྨང་གཞི་བཏང་སྟེ་བསོད་ནམས་རྒྱལ་མཚན་བྱ་བས་གཞི་བརྟན་པོ་བཙུགས་ཏེ་དགེ་བའི་ལྟས་རྨད་དུ་བྱུང་བ་མང་པོ་བྱུང་ཞིང་། དེར་ལས་བྱེད་པའི་གཡོག་ཏུ་རྒྱལ་རོང་ལྕགས་ལའི་རོང་མི་དང་། བཙན་ལའི་འབངས་མི། ཝོ་གཞིའི་འབངས་མི། སོ་མོ་དང་། རྫི་འགག ཅོག་ཙེ་གསུམ་གྱི་འབངས། དམ་བྷའི་བློན་འབངས་དང་ཁྲོ་སྐྱབས་ཀྱི་འབངས། དགེ་བཤེས་དང་ཡར་རྒན་རྒྱལ་པོའི་འབངས་མི་བཅས་རྒྱལ་ཁག་བཅུ་པོའི་མངའ་འབངས་གཡོག་ཏུ་བཀོལ་ནས་ཟླ་བཞིའི་རིང་དུ་གྲུབ་པར་བྱས་ཤིང་། ཕག་ལོ་སྟེ1767ལོར་དགོན་པའི་ཁང་ཚན་བརྒྱ་དང་བཅོ་ལྔ་ཡོངས་སུ་གྲུབ་པ་དང་། ཟླ་ལྔ་པའི་ཡར་ཚེས་སུ་བོད་རོང་གི་ལྷ་བཟོས་ལྷ་བྲིས་ཏེ་ཟླ་བཅུ་གཅིག་པའི་ནང་དུ་ཡོངས་སུ་གྲུབ། དེ་ནས་མཁན་ཆེན་བསོད་ནམས་རྒྱལ་མཚན་དང་། སྲག་ངེས་བླ་མ་ཤེས་རབ་གཡུང་དྲུང་། རྟོགས་ལྡན་རྣམ་བཞིས་གཞི་ལམ་འབྲས་གསུམ་ལས་ལམ་གྱི་རབ་གནས་མཛད་དེ་ངོ་མཚར་བའི་རྟེན་འབྲེལ་མང་པོ་བྱུང་། དེ་ནས་བཀའ་བླུགས་རྒྱལ་བསྟན་དང་། སྨོན་རྒྱལ་རབ་འབྱམས་བསྟན་པའི་རྒྱལ་མཚན། སྨོན་རྒྱལ་མཁན་རྗེ་སངས་རྒྱས་རིན་ཆེན་སོགས་ཀྱིས་འབྲས་བུའི་རབ་གནས་མཛད་དེ་རྟེན་འབྲེལ་ངོ་མཚར་བ་བྱུང་། དེ་ཡང་རྣམ་དག་བླ་མ་བསྟན་གཡུང་གིས་གཞིའི་རབ་གནས་བྱས། འདི་ལས་དུས་རབས་བཅོ་བརྒྱད་པའི་ལོ་རབས་དྲུག་ཅུའི་ཡར་སྔོན་དུ་རབ་བརྟན་རྒྱལ་པོ་ནི་རྒྱལ་ཁག་འདི་བཅུ་པོའི་འགོ་པ་དང་བདག་པོ་ལྟ་བུ་ཡིན་ཏེ་དེའི་སྟོབས་དང་དབང་ཐང་ཆེ་བ་གསལ་བོར་མཚོན་ཡོད་ཅིང་། བསྐྱར་བཞེངས་བྱས་པའི་རིམ་པ་སོ་སོའི་ལོ་ཚིགས་གསལ་བོར་བཀོད་པ་དེས་གོང་མ་ཆན་ལུང་སྔོན་གྱི་གཡུང་དྲུང་ལྷ་སྟེང་ནམ་བཞེངས་པའི་ལོ་ཚིགས10ལ་གཞི་འཛིན་དང་ཁུངས་ལུང་བཙན་པོ་ཞིག་སྤྲད་ཡོད།

༤ ནམ་མཁའ་རྒྱལ་པོ་ཀུན་གྲོལ་གྲགས་པའི་མདུན་ནས་རབ་ཏུ་བྱུང་ཚུལ་བཀོད་པ།

དེ་ཡང་རྡོ་རིང་དུ། ནམ་མཁའ་རྒྱལ་པོས་འཇིག་རྟེན་སྒྱུ་མའི་རྣམ་རོལ་མངོན་པར་གཟིགས་ཏེ་རིག་འཛིན་ཀུན་གྲོལ་གྲགས་པ་དང་། མཁན་ཆེན་བསོད་ནམས་རྒྱལ་མཚན་གྱི་དྲུང་ནས་དགེ་བསྙེན་དང་སོ་ཐར་གྱི་སྡོམ་པ་བླངས་ཏེ་མཚན་ལ་སྔ་ཕྱིར་ནམ་མཁའ་གཡུང་དྲུང་ཡེ་ཤེས་དབང་གི་རྒྱལ་དང་། ནམ་མཁའ་ཡེ་ཤེས་ཞེས་སུ་གསོལ་ཞིང་། ཚངས་པའི་སྤྱོད་ཚུལ་གྱིས་བྱང་སེམས་ཀྱི་འདབ་མ་ལེགས་པོར་བཞད་དེ་ལུང་དང་མཐུན་པའི་སྒོ་ནས་ས་བྱི་སྤྱི་ལོ1768ལོར་དགོན་ཆེན་པོ་གཡུང་དྲུང་ལྷ་སྟེང་དགོན་ལ་འགྱེད་དང་མཆོད་རྫས་མི་དམན་པ་བཏང་ཞིང་། སྨོན་རྒྱལ་རབ་འབྱམས་དང་མཁན་ཆེན་བསོད་ནམས་རྒྱལ་མཚན་གཉིས་གོང་དུ་བཀུར་ཏེ་དགོན་པའི་བཅའ་འགྲིགས་ལ་སོགས་ནི་མཉམ་མེད་ཀྱི་རྗེས་སུ་འབྲང་བ་བྱས་ཏེ་རྒྱལ་བའི་བསྟན་པ་དར་སྤེལ་དུ་བཏང་ཞེས་མཆོད་པ་དང་ཡོན་བདག་དང་དགོན་པ་གསུམ་གྱི་ལོ་རབས་བསྟན་ཡོད་དོ། །

༥ མཐའ་མའི་མཇུག་སྡུད་དུ་བཀྲ་ཤིས་སྨོན་ལམ་བཀོད་པ།

དེ་ནི་ཚེག་བར་བཅོ་ལྔ་ཅན་གྱི་ཤོ་ལོ་ཀ་བརྒྱད་ཀྱིས་གྲུབ་ཅིང་། ཚིག་རྐང་སོ་གསུམ་ཡོད་པ་དང་། དེར་མཐའ་ཡས་ཕྱོགས་བཅུའི་རྒྱལ་བ་ཡོངས་ཀྱི་རྩ་བ་དཔལ་ལྡན་བླ་མ་ཞེས་སྐྱབས་ཀྱི་མཆོག་ཏུ་གྱུར་པ་དང་། སྦྱིན་པ་མཛད་མཁན་གྱི་ཀུན་གྲོལ་གྲགས་པས་བཀའ་བསྟོད་ལེགས་པར་གཟིགས་པའི་སྨོན་ལམ་བཏབ་ཅིང་། ཁོང་ཉིད་ཀྱི་ཐུགས་རྗེས་སྙིང་དུ་སྒོམ་ནས་ཕས་ཀྱི་རྐྱེན་མང་འཇོམས་པར་བྱས་ཏེ་འགྲོ་བ་མི་ཀུན་ལེགས་པར་འཚོ་ཞིང་དགེ་ལེགས་དཔལ་སྤྱོད་པར་གྱུར་པའི་སྨོན་ལམ་བཏབ་པ་དང་། རབ་བརྟན་གྱི་རྒྱལ་རྒྱུད་བརྗིད་པར་བསྟོད་བསྔགས་དང་གཡུང་དྲུང་བོན་གྱི་བསྟན་པ་མི་ནུབ་པའི་བཀྲ་ཤིས་སྨོན་ལམ་བཏབ་ཡོད་དོ།།

གཉིས། རྡོ་རིང་གི་ལྷོ་ངོས་ཡི་གེར་བྱུང་བའི་མི་སྣའི་བར་གྱི་འབྲེལ་བ།

ནམ་མཁའ་རྒྱལ་པོའི་ཡབ་ནི་རྡོ་རྗེ་རྒྱལ་ཡིན་པ་དང་། ཁོང་གི་རྒྱལ་རྒྱུད་འཛིན་མཁན་ནི་མཁས་མཆོག་ཚུལ་ཁྲིམས་དབང་རྒྱལ་དང་། བསོད་ནམས་ཕུན་ཚོགས་རྒྱལ་བ་འོད་ཟེར། བསོད་ནམས་དབང་གི་རྒྱལ་པོ་གྲགས་རྒྱལ། སྟོན་པ་ཟེ་བཅས་ཡིན། མེ་ཁྱི་ལོར་གཡུང་དྲུང་ལྷ་སྟེང་དགོན་བསྐྱར་བཞེངས་སྐབས་སུ་གཞི་ལམ་འབྲས་གསུམ་གྱི་རབ་གནས་མཛད་པ་སྟེ། གཞི་བརྟན་རྨང་འདིང་མཁན་ནི་བསོད་ནམས་རྒྱལ་མཚན་དང་། དེར་ལམ་གྱི་རབ་གནས་མཛད་མཁན་ནི་མཁན་ཆེན་བསོད་ནམས་རྒྱལ་མཚན་དང་། སྲག་ངེས་བླ་མ་ཤེས་རབ་གཡུང་དྲུང་། རྟོགས་ལྡན་རྣམ་བཞི་ཡིན་ཞིང་། འབྲས་བུའི་རབ་གནས་སྤེལ་མཁན་ནི་རྒྱལ་བསྟན་དང་། སྨོན་རྒྱལ་བསྟན་པའི་རྒྱལ་མཚན། སྨོན་རྒྱལ་མཁན་རྗེ་སངས་རྒྱས་རིན་ཆེན་ཡིན། བཤད་གྲྭ་དགའ་ལྡན་རབ་སྤྲོའི་རབ་གནས་གནང་མཁན་བསྟན་གཡུང་གིས་བྱས་ཤིང་། དེའི་མངའ་འབངས་སུ་རྒྱལ་རོང་རྒྱལ་ཁག་བཅུ་པོ་ཡོད།

ཀུན་གྲོལ་གྲགས་པ་དང་བསོད་ནམས་རྒྱལ་མཚན་ནི་ནམ་མཁའ་རྒྱལ་པོའི་བླ་མ་ཡིན་ཏེ། ཀུན་གྲོལ་གྲགས་པའི་མདུན་ནས་དགེ་བསྙེན་གྱི་སྡོམ་པ་བཞེས་ཏེ་མཚན་ལ་ནམ་མཁའ་དབང་གི་རྒྱལ་གསོལ་བ་དང་། བསོད་ནམས་རྒྱལ་མཚན་གྱི་དྲུང་ནས་སོ་ཐར་གྱི་སྡོམ་པ་བླངས་ཏེ་ནམ་མཁའ་ཡེ་ཤེས་ཞེས་སུ་བཏགས་ཤིང་། ཀུན་གྲོལ་གྲགས་པ་དང་རབ་བརྟན་རྒྱལ་པོའི་དབར་མཆོད་ཡོན་གྱི་འབྲེལ་བ་བཙུགས་ཚུལ་ནི། ཁོང་གི་རྣམ་ཐར་དུ། ད་ལྟ་བཙན་གཉའ་ལི་ཝེར་གདུངས་གྲོལ་བའི།། ཆུ་ཆེན་མངའ་བདག་རབ་རྟན་མི་དབང་རྒྱལ། མཆོད་ཡོན་ཉི་ཟླའི་ཟུངས་གཅིག་སྤྲས་པའི་འདི། །བོན་གྱི་རྒྱལ་མཚན་ཚུགས་པའི་རྟེན་འབྲེལ་འགྲིག། མ་བསྒྲིགས་རྟེན་འབྲེལ་ངོ་མཚར་ཕུན་སུམ་ཚོགས། སྐྱབས་མཆོག་གོང་མ་རྣམས་ཀྱི་ཐུགས་རྗེ་ཡིན། དེ་ཡང་ཇི་སྲིད་འཁོར་བ་མ་སྟོང་པར།།རྟེན་འབྲེལ་སྙིང་པོའི་འགྲོ་ཀུན་འཚེ་བ་སྨོན། ཁྱད་པར་བསྟན་པའི་སྦྱིན་བདག་མི་ཡི་དབང་། རབ་རྟེན་རྒྱལ་གྱི་མངའ་དབང་ས་བསྐོར་ལ། ནད་མཚོན་མུ་གེ་བསྐལ་པ་རབ་ཞི་ནས། བཀྲ་ཤིས་བདེ་ལེགས་ནམ་མཁའི་མཐའ་མཉམ་ཤོག ཅེས་བདེན་ཚིག་གེ་སར་རྒྱན་འཕྲེང་བྱ་བ་འདི་ནི་དུས་སྙིགས་མའི་ཁོ་བོ་ཀུན་གྲོལ་གྲགས་པ་བདག་གིས། བསྟན་པའི་སྦྱིན་བདག་ཆེན་པོ། ཆུ་ཆེན་རབ་བརྟན་རྒྱལ་པོ་དང་། མཆོད་ཡོན་ཤེལ་དཀར་ཕྲེང་བ་བཞིན་དུ་རྟེན་འབྲེལ་འགྲུབ་པར་གྱུར་ཅིག་གི་སྨོན་པ་དང་བཅས་པ་ཨི་ཐི། 11ཞེས་པ་འདི་ལས་ཀུན་གྲོལ་གྲགས་པས་རབ་བརྟན་རྒྱལ་པོ་དང་མཆོད་ཡོན་གྱི་འབྲེལ་བ་བཙུགས་ཏེ་རྟེན་འབྲེལ་འགྲུབ་པའི་སྨོན་ལམ་བཏབ་པ་མཚོན་པ་དང་། དེ་མིན་རབ་བརྟན་རྒྱལ་པོ་ནི་བསྟན་པའི་སྦྱིན་བདག་ཆེན་པོ་ཞིག་ཡིན་པ་དང་། ཁོང་ནི་བཙན་གཉའ་ལི་ཝེར་གྱི་གདུང་ལས་གྲོལ་བ་དང་། རྒྱལ་པོས་བོན་གྱི་བསྟན་པའི་རྒྱལ་མཚན་འཛུགས་ཐུབ་པ་བསྟན་པས། འདི་ལས་རབ་བརྟན་རྒྱལ་པོས་བོན་གྱི་འདུས་སྡེ་ཆེན་མོ་གཡུང་དྲུང་ལྷ་སྟེང་དགོན་རྒྱ་བསྐྱེད་དགོས་ཚུལ་གྱི་ཐུགས་དགོངས་སོགས་གསལ་བོར་བསྟན་ཡོད། ཀུན་གྲོལ་གྲགས་པས་རྒྱལ་རོང་རྒྱལ་ཁག་སོ་སོ་ལས་དགེ་བཤེས་རྒྱལ་པོ་དང་། འགྲན་གྱི་རྒྱལ་པོ། ཁྲོ་སྐྱབས་རྒྱལ་པོ། རབ་བརྟན་རྒྱལ་པོ་སོགས་དང་མཆོད་ཡོན་གྱི་འབྲེལ་བ་བཙུགས་ཏེ་བླ་མ་སངས་རྒྱས་གླིང་པའི་ལུང་བསྟན་ཇི་བཞིན་རྒྱལ་རོང་ས་ཁུལ་དུ་བོན་གྱི་འགྲོ་དོན་རྒྱ་ཆེར་སྤེལ་ལོ། །

གསུམ། རྡོ་རིང་གི་བྱང་ངོས་ཡི་གེའི་མ་ཡིག་དང་དེའི་དཔྱད་པ།

༡ རྡོ་རིང་གི་བྱང་ངོས་ཀྱི་བོད་ཡིག་གི་མ་ཡིག་དང་དཔྱད་པ།

1 ༄༅༎སྭསྟི་ཕུན་ཚོགས་དགེ་ལེགས་ཐོབས་2 བསྟན་པའི་སྐུ། མཐའ་ཡས་འགྲོ་བའི་རེ་བསྐོང་བའི་གསུང་

3 མ་ལུས་ཤེས་བྱ་ཇི་བཞིན་གཟིགས་པའི་ཐུགས། ཤཱཀྱ་4 གཙོ་བོ་དེ་ལ་མཐོལ་ཕྱག་འཚལ། ཐུ་མེད་སྟོན་པ་

5 དེ་ཡི་སྲས་ཀྱི་མཆོག རྒྱལ་བའི་མཛད་པ་ཀུན་6 གྱི་ཁུར་བསྣམས་ནས། གྲངས་མེད་ཉིད་དུ་སྤྲུལ་དང་

7 རྣམ་རོལ་བ། མི་ཕམ་འཇམ་པའི་དབྱངས་ལ་ཕྱག་8 འཚལ་ལོ།། གངས་ཆེན་ཤིང་རྟའི་

9 སྲོལ་འབྱེད་ཙོང་ཁ་པ། དངོས་ 10 སྟོབས་རིགས་པའི་དབང་ཕྱུག་རྒྱལ་

11ཚབ་རྗེ།། མདོ་སྔགས་བསྟན་པའི་ 12བདག་པོ་མཁས་གྲུབ་དཔལ།

13 རྒྱལ་བ་ཡབ་སྲས་གསུམ་ལ་གུས་ཕྱག་ 14 འཚལ། ཞེས་ཕྱག་འཚལ་ཞིང་དང

15 བས་སྐྱབས་སུ་མཆིའོ།། དེ་ཡང་ 16 མཁན་ཆེན་བློ་བཟང་འཇམ་དབྱངས

17 ཞིང་གཤེགས་འདི་ཉིད་ཀྱིས། ཁྱན 18 ལུང་ཁྲི་བཞུགས་ལོ་གསུམ་རང་ལོ་

19 བཅུ་ཕྲག་ལོ་ཚེ་རབ་ཏུ་བྱུང་བ་ཡིན། 20 ཁྱན་ལུང་བཅུ་གཉིས་རང་ལོ་བཅུ་དགུའི་

21 ཐོག་ལ་ལྷ་སར་ཕེབས་ནས་གྲ་ས་ 22 ཞུགས། དེ་ནས་ཚེསལ་བསླབ་སྦྱངས་

23 ཁོ་ནའི་ངང་དུ་ལོ་གྲངས་ཉི་ཤུ་རྩ་ 24 བདུན་བཞུགས། ཁྱན་ལུང་བཞི་བཅུའི་

25 ཐོག་ལ། ༧འཇམ་དབྱངས་གོང་མ་ཆེན་ 26 པོའི་བཀའ་ལུང་གིས་རྒྱ་ནག་ཡུལ་དུ་

27 བྱོན། ཁྱན་ལུང་ཞེ་ཅིག་ལོན་ཚེ་ཞུ་ཧོར་ 28 པོ་ཊ་ལལོ་གྲངས་ལྔ་

29 ཙམ་བཞུགས་པ་ཡིན། ཁྱན་ལུང×× 30ཉུག་ཐོག་ལ། ༧གོང་མའི་བཀའིས་རི་བོ་

31རྩེ་ལྔར་ལོ་གྲངས་བཞི་ཙམ་བཞུགས། 32 དེ་ནས་གོང་མ་ཆེན་པོའི་བཀའ་ཁྱན་

33 ལུང་ཞེ་དགུའི་ཐོག་ལ་རྒྱལ 34 ཀྭང་ཧྥ་ཟི་ལ་སླེབ་ཡོད ཁྱེན་

35 ལུང་ང་ལྔ་ཟླ་བ་དང་པོའི་ཚེས་དགུའི་ 36 ཉིན་ལ་ཛ་སག་པཎྚི་ཏའི་ཆོ་ལོ་གནང་

37བ་ཡིན། ཁྱན་ལུང་ལྔ་བཅུ་ང་དགུ་དགོང་ 38 ལོ་རེ་དྲུག་ལོན་ཚེ་མཁན་ཆེན་བློ་བཟང་

39 འཇམ་དབྱངས་འདི་ཉིད་དག་ཞིང་དུ་གཤེག 40 དེ་ཚེ་ཉེར་གནས་ཀུན་གྱིས་དགོངས་

41རྫོགས་ལ་སོགས་འབྱོར་ཚད་གང་ནས་སྟག་སེང་ 42 བསྣུབས་སྐུདངུལ་སྲང་

43 བརྒྱ་འགྲོ་བ་ཡིན།  44ཆད་ཕུལ་སྤྲོ་སྣང་སོགས་སྤོས་དང་མཆོད་མེའི་འབས་

45 སོགས། འབྱོརབཞག་པ་ཡིན། གོང་གི 46 འབྲས་བུནས་ཤིང་བཤགས་པའི་ཐར་བ་བླ་ན་མེད

47 རིན་རྒྱུར་གྱུར་ཅིག ། 

བྱང་ཕྱོགས་སུ་འཁོར་བའི་རྡོ་རིང་ཡི་གེ་འདིའི་ནང་དོན་ནི་ཆིང་རྒྱལ་རབས་ཀྱི་སྐབས་སུ་བསྟན་འཕེལ་གླིང་དུ་བསྒྱུར་རྗེས་སུ་བརྐོས་པ་ཤ་སྟག་ཡིན་ཞིང་། དེར་རྒྱ་ཡིག་དང་བོད་ཡིག་གཉིས་ཀ་ཡོད་པ་དང་། འདིར་ལྟ་བདེ་བའི་ཆེད་དུ་ཐིག་ཕྲེང་སོ་སོར་ཨང་གྲངས་བཀོད་ནས་རིམ་པ་ལྟར་བྲིས་ཡོད།

དེར་དང་པོ་སྟོན་པ་ཤཱཀྱ་ཐུབ་པ་དང་། འཇམ་པའི་དབྱངས། ཙོང་ཁ་པ། རྒྱལ་ཚབ་རྗེ། མཁས་གྲུབ་རྗེ་ཞེས་རྒྱལ་བ་ཡབ་སྲས་གསུམ་སོགས་ལ་མཆོད་པ་དང་གུས་ཕྱག་འཚལ་བ་བསྟན་ཞིང་། དེ་ནས་དངོས་གཞིའི་ནང་དུ་བསྟན་འཕེལ་གླིང་གི་མཁན་ཆེན་བློ་བཟང་འཇམ་དབྱངས་ཞིང་དུ་གཤེགས་པ་དང་། ཁོང་གི་མི་ཚེ་གང་བོའི་ལོ་རྒྱུས་ཀྱི་མཛད་པ་ཞིབ་པར་བཀོད་ཡོད། མཐའ་མར་བསྔོ་བ་དང་སྨོན་ལམ་གྱིས་མཇུག་བསྡུས་ཤིང་། འདིར་མཁན་ཆེན་བློ་བཟང་འཇམ་དབྱངས་ནིམདོ་སྨད་ཆོས་འབྱུངདང་དུང་རི་བླ་མ་བཤད་སྒྲུབ་རྒྱ་མཚོས་མཛད་པའིརྒྱལ་མོ་རོང་གི་དགོན་ཆེན་གཡུང་དྲུང་ལྷ་སྟེང་གི་ལོ་རྒྱུས་མདོར་བསྡུསགཉིས་ཀྱི་ཁྲོད་དུ་བཀོད་པའི་བསྟན་འཕེལ་གླིང་གི་མཁན་པོ་རིམ་བྱོན་གྱི་ཁྲོད་དུ་དང་པོ་སངས་རྒྱས་འོད་ཟེར་ནས་བརྩིས་པའི་མཁན་རབས་གསུམ་པ་ཡིན། ཁོང་གི་མི་ཚེའི་ལོ་རྒྱུས་དང་མཛད་རྗེས་མདོར་བསྡུས་ཙམ་བཀོད་པ་ནི།

ཆན་ལུང་ཁྲི་ལོ12 གསུམ་པ་སྤྱི་ལོ1738ལོར་བློ་བཟང་འཇམ་དབྱངས་ཁོང་ཉིད་རང་ལོ་བཅུར་སོན་ཏེ་རབ་ཏུ་བྱུང་བ་དང་། ཆན་ལུང་ཁྲི་ལོ་བཅུ་གཉིས་པ་སྤྱི་ལོ1747ཏེ། ཁོ་རང་ལོ་ན་བཅུ་དགུའི་ཐོག་ལྷ་སར་ཕེབས་ནས་གྲྭ་སར་ཞུགས་ཏེ་ལོ་ངོ་ཉེར་བདུན་རིང་སློབ་གཉེར་བྱས་ཤིང་། ཆན་ལུང་ཁྲི་ལོ་བཞི་བཅུ་པ་སྤྱི་ལོ1775དང་། རང་ལོ་ཞེ་བདུན་གྱི་སྟེང་འཇམ་དབྱངས་གོང་མ་ཆེན་པོའི་བཀའ་ཕེབས་ཏེ་རྒྱ་ནག་ཡུལ་དུ་ཕེབས་པ་དང་། ཆན་ལུང་ཁྲི་ལོ་ཞེ་གཅིག་པ་སྤྱི་ལོ1776ལོར་(རང་ལོ་ཞེ་བརྒྱད)ཞེ་ཧོར་པོ་ཏ་ལ་ཆུང་བ་ནས་ལོ་ལྔ་ཙམ་བཞུགས། དེ་ནས་གོང་མས་བཀའ་ཕབ་སྟེ་ཆན་ལུང་ཁྲི་ལོ་ཞེ་དྲུག་པ་སྤྱི་ལོ1780ལོར(རང་ལོ་ང་གཉིས)་རི་བོ་རྩེ་ལྔ་ནས་ལོ་གྲངས་བཞིར་བསྡད་པ་དང་། དེ་ནས་གོང་མ་ཆེན་པོའི་བཀའ་ཕབ་ནས་ཆན་ལུང་ཞེ་དགུའི(སྤྱི་ལོ1784དང་རང་ལོ་ང་དྲུག)ཐོག་ཀྭང་ཧྥ་ཟི13རུ་སླེབས་པ་སྟེ། དེ་ནས་གོང་མ་ཆེན་པོའི་བཀའ་ཆན་ལུང་ཁྲི་ལོ་ང་ལྔ་པ་སྤྱི་ལོ1790ལོའི་བློ་བཟང་འཇམ་དབྱངས་རང་ལོ་དྲུག་ཅུ་རེ་གཉིསཟླ་དང་པོའི་ཚེས་དགུ་ཉིན་ཛ་སག་པཎྚི་ཏའི14ཆོ་ལོ་གནང་བ་དང་། ཆན་ལུང་ཁྲི་ལོ་ལྔ་བཅུ་ང་དགུསྤྱི་ལོ1794ལོདང་རང་ལོ་རེ་དྲུག་ལོན་ཚེ་མཁན་ཆེན་བློ་བཟང་འཇམ་དབྱངས་འདི་ཉིད་དག་པའི་ཞིང་དུ་གཤེགས་པ་དང་། དེ་ཚེ་ཉེར་གནས་ཀུན་གྱིས་ཁོང་ཉིད་དགོངས་པ་རྫོགས་པའི་དུས་མཆོད་དུ་སྐུ་དང་དངུལ་སྲང་ལ་སོགས་ཕུལ་བ་དང་། དེ་མིན་སྤྲོ་སྣང་ཡུལ་སོགས་ཀྱི་མང་ཚོགས་ཀྱིས་སྤོས་དང་མཆོད་མེ་བསམ་གྱིས་མི་ཁྱབ་པ་བཞག་སྟེ་འབྲས་བུ་དེ་དག་ལས་ཞིང་དུ་གཤེགས་པའི་ཐར་བ་བླ་ན་མེད་པའི་རིན་པོ་ཆེའི་རྒྱུར་གྱུར་ཅིག་ཅེས་བསྔོ་བའི་སྨོན་ལམ་བཏབ་པའི་གནས་ཚུལ་ཞིབ་ཕྲ་བཀོད་ཡོད་ཅིང་། བསྟན་འཕེལ་གླིང་གི་མཁན་རབས་གསུམ་པ་བློ་བཟང་འཇམ་དབྱངས་ནི་སྤྱི་ལོ1729ལོར་སྐུ་འཁྲུངས་པ་དང་། སྤྱི་ལོ1794ལོར་སྐུ་གཤེགས།

དེ་ལས་རྡོ་རིང་སྟེང་གི་ཡི་གེ་འདི་ནི་ཛ་སག་པཎྚི་ཏ་བློ་བཟང་འཇམ་དབྱངས་སྐུ་གཤེགས་རྗེས་སུ་བྲིས་པ་ཤེས་ཐུབ། དེ་མིན་གོང་འཁོད་ཀྱི་ཡི་གེ་ལས། “གོང་མ་ཆེན་པོའི་བཀའ་ཆན་ལུང་ཞེ་དགུའི་ཐོག་ལ་རྒྱལཀྭང་ཧྥ་ཟི་ལ་སླེབ་ཡོད”ཅེས་པ་ལྟར་ན། ཁོང་ནི་སངས་རྒྱས་འོད་ཟེར་ནས་བརྩིས་པའི་མཁན་རབས་གསུམ་པ་ཡིན་ཞིང་། དེར་མཁན་རབས་སོ་སོར་ལོ་གསུམ་དུ་བསྡད་པ་ཡིན་ན། མཁན་པོ་སངས་རྒྱས་འོད་ཟེར་དུས་ནི། “ཆན་ལུང་ཁྲི་ལོ་ཞེ་གཅིག་པའི་ཟླ་བཅུ་པ་ཡིན”15ཏེ། དེ་ནི་ཆུ་ཆེན་དམག་འཁྲུག་ཐེངས་གཉིས་པའི་མཇུག་རྫོགས་མ་ཐག་སྟེ་སྤྱི་ལོ1776ལོ་ཡིན་ཞིང་། དེ་ལོ་གསུམ་འགོར་བ་ན་སྤྱི་ལོ1779ལོ་དང་། དེ་ནས་མཁན་པོ་གཉིས་པ་ཅོ་ནེ་གྲགས་པ་ཕུན་ཚོགས་ལོ་གསུམ་དུ་བསྡད་ཚར་དུས་སྤྱི་ལོ1782ལོ་ཡིན། དེས་ན་གོང་གི་རྡོ་རིང་ཡི་གེ་ལྟར་ན་མཁན་པོ་བློ་བཟང་འཇམ་དབྱངས་ཁོང་ཉིད་བསྟན་འཕེལ་གླིང་དུ་སླེབས་དུས་ནི་སྤྱི་ལོ1784ལོ་ཡིན་ཞིང་། སྤྱིར་ཡིན་ན་ལོ་གཉིས་སམ་གསུམ་ཡིན་མོད། འོན་ཀྱང་ལམ་ཐག་དང་མཁན་པོ་རང་ངོས་ཀྱི་གནས་ཚུལ། དགོན་པའི་གནས་ཚུལ་གྱི་ཆ་ནས་མཚམས་རེར་ལོ་གསུམ་དང་བཞིར་འདུག་པའི་ངེས་པ་མཆིས་པས། རྡོ་རིང་ངོས་ཀྱི་རྒྱུ་ཆ་འདིར་གཞིགས་ན་བསྟན་འཕེལ་གླིང་གི་མཁན་རབས་གསུམ་པ་ནི་བློ་བཟང་འཇམ་དབྱངས་ཡིན་པ་ཁག་ཐེག་བྱས་ཆོག

༢ རྡོ་རིང་གི་བྱང་ངོས་ཀྱི་རྒྱ་ཡིག་གི་མ་ཡིག་དང་དཔྱད་པ།

རྡོ་རིང་བྱང་ངོས་ཀྱི་གཡས་ནས་གཡོན་དུ།

བྱང་ངོས་ཀྱི་དཀྱིལ་དུ“皇清诰赠”ཞེས་བྲིས་ཡོད།

སྟར་ཕྲེང་དང་པོ། 堪布大喇嘛一视同仁 开场黄教经典 远方之人无不悦从敬奉 期寿命延

སྟར་ཕྲེང་གཉིས་པ། 长不意天不加年意别尘而登仙境徒众谨择良辰葬于寺之东隅山垂永

སྟར་ཕྲེང་གསུམ་པ། (འོག)以期报答于万亡公尔 (སྟེང)乾隆岁次乙卯月望 夕日

སྟར་ཕྲེང་བཞི་པ། 钦命广法寺班智达扎萨克大喇嘛罗——桑扎木之灵柩

རྡོ་རིང་གི་བྱང་ངོས་དེ་ཁག་ཆེ་བ་གཉིས་སུ་བགོས་ཡོད་ཅིང་། དེར་ངོས་དེའི་གཡས་ཕྱོགས་སུ་རྒྱ་ཡིག་གིས་མཁན་ཆེན་བློ་བཟང་འཇམ་དབྱངས་སྐུ་གཤེགས་པའི་གདུང་རྟེན་ཡིན་པར་མ་ཟད། སྟར་ཕྲེང་གཉིས་པའི་ནང་དུ་མཁན་པོ་ཁོང་ཉིད་དགོན་པའི་ཤར་རིའི་འདབས་སུ་སྦས་ཏེ་དམ་པ་ཁོང་གི་བཀའ་དྲིན་གསོལ་བ་ཡིན་ཞེས་ཆན་ལུང་ཁྲི་ལོ་དྲུག་ཅུ་སྟེ་སྤྱི་ལོ1795ལོ་ཡིན། སྟར་ཕྲེང་བཞི་པར ༼ “བསྟན་འཕེལ་གླིང་དུ་མངག་གཏོང་བྱས་པའི་པཎྚི་ཏ་ཛ་སག་བླ་མ་ཆེན་པོ་བློ་བཟང་འཇམ་དབྱངས་ཀྱི་གདུང་སྒམ”ཞེས་པ་འདི་ལས། རྒྱ་བོད་ཡིག་རིགས་གཉིས་ཀས་མཁན་པོ་བློ་བཟང་འཇམ་དབྱངས་སྐུ་གཤེགས་ཏེ་ཁོར་དྲན་གསོའི་ཚུལ་དུ་གདུང་སྒམ་བཞེངས་པ་བསྟན་པར་མ་ཟད། རྒྱ་ཡིག་དེ་བོད་ཡིག་ལས་ལོ་གཅིག་གིས་འཕྱི་བ་སྟེ། གོང་དུ་སྨོས་པ་ཇི་བཞིན་མཁན་པོ་བློ་བཟང་འཇམ་དབྱངས་ནི་ཆན་ལུང་ཁྲི་ལོ་ང་དགུ་པ་སྤྱི་ལོ1794ལོར་དགོངས་པ་རྫོགས་ཤིང་། རྒྱ་ཡིག་འདིར་ཆན་ལུང་ཁྲི་ལོ་དྲུག་ཅུ་པ་སྤྱི་ལོ1795 ལོ་ཞེས་གསལ་བས། སྐུ་གཤེགས་པ་ནས་གདུང་སྒམ་འབུལ་བའི་བར་དུ་ལོ་གཅིག་སོང་ཡོད་པ་རྟོགས་ཐུབ།

བཞི་པ། རྡོ་རིང་ལས་འཕྲོས་པའི་བན་བོན་གྱི་འབྲེལ་བ།

རྡོ་རིང་གི་ངོས་གཉིས་སུ་བྲིས་པའི་ཡི་གེ་འདི་ནི“གཡུང་དྲུང་ལྷ་སྟེང་དགོན”དང་“བསྟན་འཕེལ་གླིང”གི་ལས་དབང་དང་ལོ་རྒྱུས་ཀྱི་འཕེལ་རིམ་དང་འབྲེལ་བ་དམ་ཟབ་ཡོད་པར་མ་ཟད། “གཡུང་དྲུང་ལྷ་སྟེང་དགོན”དང་འབྲེལ་ནས་རྡོ་རིང་གི་ལྷོ་ཕྱོགས་སུ་འཁོར་བའི་ངོས་དེའི་ཡི་གེ་བྱུང་བ་དང་། “བསྟན་འཕེལ་གླིང”དང་འབྲེལ་ནས་རྡོ་རིང་གི་བྱང་ངོས་སུ་བྲིས་པའི་ཡི་གེ་དེ་བྱུང་བས་ན། རྡོ་རིང་འདི་ནི་ཆུ་ཆེན་རྫོང་ཨན་ཉིང་ཤང་དུ་གནས་པའི་ཐུན་མོང་མ་ཡིན་པའམ་དམིགས་བསལ་ཅན་གྱི་དགོན་པ་འདིའི་ཀྱག་ཀྱོག་གི་ལོ་རྒྱུས་མཚོན་པའི་བདེན་དཔང་ཞིག་ཡིན་ལ། ཡང་ཕྱོགས་གཞན་ཞིག་གི་ངོས་ནས་བརྗོད་ན་རྡོ་རིང་གི་ངོས་གཉིས་པོ་དང་དགོན་པའི་ལོ་རྒྱུས་ཀྱི་བརྒྱུད་རིམ་མི་འདྲ་བ་འདི་གཉིས་པོས་སྐབས་དེའི་བོན་དང་ཆོས་གཉིས་ཀྱི་འབྲེལ་བ་མཚོན་ཞིང་། དགོན་པས་འབྲེལ་བ་འདི་གཉིས་པོའི་ཁྲོད་དུ་གོ་གནས་དང་ནུས་པ་ཅི་འདྲ་ཞིག་འདོན་བཞིན་ཡོད་པ་གསལ་བོར་རྟོགས་ཐུབ་སྟེ། རབ་བརྟན་མི་དབང་ནམ་མཁའ་རྒྱལ་པོས1766ལོར་རྒྱལ་རོང་རྒྱལ་ཁག་བཅུ་པོ་ལས་གཡོག་ཏུ་བཀོལ་ནས་བོན་གྱི་འདུས་སྡེ་ཆེན་མོ་གཡུང་དྲུང་ལྷ་སྟེང་དགོན་བསྐྱར་བཞེངས་བྱས་ཤིང་། ཁོང་གིས་བོན་གྱི་གཏེར་སྟོན་གྲགས་ཅན་ཀུན་གྲོལ་གྲགས་པ་སོགས་སློབ་དཔོན་ཏུ་བསྟེན་ནས་བོན་བསྟན་རྒྱ་ཆེར་དར་སྤེལ་དང་རྒྱབ་སྐྱོར་ཆེན་པོ་བྱས་པར་མ་ཟད། ཀུན་གྲོལ་གྲགས་པས་སྐབས་དེར་ཁོང་གི་བླ་མ་སངས་རྒྱས་གླིང་པའི་རྟེན་འབྲེལ་བཞི་པ་རྒྱལ་རོང་ཡུལ་དུ་འགྲོ་དོན་བསྒྲུབ་པའི་བཀའ་བཞིན་རྒྱལ་རོང་ཡུལ་དུ་བོན་བསྟན་རྒྱ་ཆེར་སྤེལ་ཅིང་། ཀུན་གྲོལ་གྲགས་པས་སྐབས་དེར་བཙན་གཉའ་རབ་བརྟན་རྒྱལ་པོ་དང་། ཁྲོ་སྐྱབས་རྒྱལ་པོ། དགེ་བཤེས་རྒྱལ་པོ། བེ་རི་རྒྱལ་པོ། འགྲན་རྒྱལ་པོ་སོགས་དང་མཆོད་ཡོན་གྱི་འབྲེལ་བ་བཙུགས་ཏེ་བོན་གསུངས་ཤིང་བོན་གྱི་བཀའ་བསྟན་གྱི་པར་ཤིང་བཞེངས་པ་སོགས་ཀྱི་འགྲོ་དོན་རྒྱ་ཆེར་སྤེལ་བ་དང་། རྒྱལ་རོང་རྒྱལ་ཁག་སོ་སོས་ཀྱང་ཀུན་གྲོལ་གྲགས་པར་དད་གུས་བླ་མེད་བྱས་ཏེ་དགེ་བའི་ལས་མང་པོ་བསྒྲུབས་པས། གཡུང་དྲུང་ལྷ་སྟེང་དགོན་བསྐྱར་བཞེངས་དང་ནམ་མཁའ་རྒྱལ་པོ་རབ་ཏུ་བྱུང་བའི་མཛད་པ་དག་དགོན་པའི་རྡོ་རིང་དུ་བརྐོས་ནས་དན་རྟགས་སུ་བཀོད་དེ་ཡར་བསླངས་ཡོད་མོད། ཕྱིས་སུ་ཆུ་ཆེན་དམག་འཁྲུག་ཐེངས་གཉིས་པོ་མཇུག་སྒྲིལ་ཏེ་གོང་མས་བོན་བསྟན་མེད་པར་བཟོས་པ་དང་། བོན་གྱི་དགོན་སྡེ་ཡོངས་རྩ་གཏོར་བྱས་པའི་ཚབ་ཏུ་དགེ་ལུགས་པའི་གྲུབ་མཐའ་དར་སྤེལ་དུ་བཏང་སྟེ། སྔར་གྱི་བོན་དགོན་གཡུང་དྲུང་ལྷ་སྟེང་དེ་དགེ་ལུགས་པའི་བསྟན་འཕེལ་གླིང་དུ་བསྒྱུར་བར་མ་ཟད། དེས་རྒྱལ་རོང་ས་ཁུལ་ཡོངས་ཀྱི་ཆོས་སྲིད་ཀྱི་གོ་གནས་གལ་ཆེན་ཞིག་ཟིན་ཏེ་རྒྱལ་རོང་དགོན་ཁག་ཡོངས་ལ་བདག་སྐྱོང་དང་དོ་དམ་བྱེད་པའི་དབང་ཆ་ཆེན་པོ་ཡོད་དེ། སྐབས་དེར། རྒྱལ་རོང་གྲྭ་པ་རྣས་དབུས་གཙང་དུ་སློབ་གཉེར་ལ་འགྲོ་དགོས་ཚེ་བསྟན་འཕེལ་གླིང་གིས་གནང་བའི་མིང་རྟགས་མེད་ཚེ་དབུས་གཙང་དུ་འགྲོ་བའི་ས་མཚམས་ནས་ཐར་མི་ཐུབ་ཅིང་། གལ་ཏེ་དེ་ཡོད་ཚེ་དམིགས་བསལ་གྱིས་སྣེ་ལེན་བྱེད་པ་ཡིན། ལོ་རྒྱུས་ཡིག་ཚང་ལྟར་ན། བསྟན་འཕེལ་གླིང་གི་སྔ་དུས་ཀྱི་མཁན་པོ་རྣམས་ནི་པེ་ཅིང་གི་དགའ་ལྡན་བྱིན་ཆགས་གླིང་(སྐབས་དེར་ལིས་ཧྥན་ཡོན理藩院ཟེར)གིས་མིང་བཏགས་ནས་མངག་གཏོང་བྱེད་པ་ཡིན་ཏེ། སྤྱི་ལོ1776ལོའི་ཟླ10པའི་ཚེས3ཉིན་གྱི་གོང་མའི་བཀའ་ཡིག་ཅིག་གི་ནང་དུ། པོ་ཏ་ལར་བསྡད་མྱོང་ཞིང་གསུང་ཆོས་གང་ལའང་མཁྱེན་རྒྱ་ཡངས་པའི་མཁན་པོ་སངས་རྒྱས་འོད་ཟེར་ལ་བནྟེ་ཏཱ་བླ་མའི(班第达喇嘛)མིང་རྟགས་གནང་སྟེ་དབྱི་ལའི(伊犁) བླ་མ་གྲ་ས་ཁིའི་དཔེ་ལྟར་ཆུ་ཆེན་དུ་མངག་གཏོང་བྱས་ཤིང་། དུས་དེ་ནས་བཟུང་ལིས་ཧྥན་ཡོན་ནས་བསྟན་འཕེལ་གླིང་དུ་མཁན་པོ་རིམ་བྱོན་མངགས་པའི་སྲོལ་ཆགས་པ་རེད། ཁོ་ཚོ་བསྟན་འཕེལ་གླིང་དུ་ཡོང་སྟེ་ལོ་གསུམ་རིང་གཙོ་འཛིན་གནང་སྟེ་རྒྱལ་ཁག་བཅོ་བརྒྱད་ཀྱིས་བདག་སྐྱོང་བྱ་བའི་བོད་ཀྱི་གྲྭ་པ་བརྒྱད་ཅུ་གྱ་ལྔ་ལྷག་དགོན་པའི་ནང་དུ་ཡོང་ནས་གཞུང་ལ་སློབ་གཉེར་བྱེད་པར་བསྡུ་རུབ་བྱེད་དགོས་ཤིང་། གལ་ཏེ་མཁན་པོའི་ལོ་གསུམ་གང་ཚེ་བརྗེ་བའམ་ཡང་ན་སྔར་བཞིན་སྡོད་ཀྱིན་ཡོད། གོང་མ་ཏའོ་ཀོང་གི་ཁྲི་ལོ་གསུམ་པ་སྤྱི་ལོ1823ལོའི་རྗེས་སུ་བོད་ནས་བདམས་མངགས་བྱེད་པར་བསྒྱུར་ཅིང་། ལིས་ཧྥན་ཡོན(理藩 )གྱི་ཨམ་བན་ཆེན་པོ་སྤྲིངས་ཡིག་ཆོས་རྒྱལ་གྱིས་སེ་འབྲས་དགེ་གསུམ་གྱི་དགེ་བཤེས་ཁྲོད་ནས་རྒྱུགས་བླངས་ཏེ་མི་གསུམ་བསྡུས་ནས་ཨམ་བན་ལ་ཞུ་འབུལ་བྱེད་པ་དང་། ཨམ་བན་གྱིས་མི་གསུམ་པོའི་ནང་ནས་གཅིག་བདམས་ཏེ་རུས་མིང་དང་། ལོ་ཚིགས། མི་དེའི་ལོ་རྒྱུས་སོགས་བློ་འདྲི་བྱས་ཏེ་བསྒྲུབ་དགོས།

ཆིང་རྒྱལ་རབས་དུས་སྐབས་ཀྱི་ལིས་ཧྥན་ཡོན་(理藩院)གྱིས་བསྟན་འཕེལ་གླིང་དུ་མཁན་པོ་བཅུ་གསུམ་མངགས་གཏོང་བྱས་ཤིང་། བོད་ནས་མཁན་པོ་བཅུ་དྲུག་མངགས་པ་དང་། མིན་གོའི་དུས་སྐབས་སུ་བོད་ས་གནས་སྲིད་གཞུང་ནས་མཁན་པོ་བཅུ་གཉིས་མངགས་གཏོང་བྱས་ཏེ་བསྡོམས་པས་མཁན་རབས་ཞེ་གཅིག་བྱུང་བ་ཡིན་ཞིང་། མཁན་པོ་དེ་དག་ལོ་གསུམ་རེའི་ནང་ཐེངས་གཅིག་བརྗེ་བ་ཡིན་ཞིང་། མཁན་པོ་དེའི་འཁུར་ཡུན་ལོ་གསུམ་ལོངས་རྗེས། སི་ཁྲོན་ཙུང་ཏུའུ་དམག་དཔོན་གྱིས་དེར་བསྐྱོད་པའི་བོད་བཞུགས་ཨམ་བན་ལ་བློ་དྲིས་ཏེ་གནས་དེའི་མཁན་པོའི་ཁྲོད་ནས་རིག་གནས་ལ་མཁས་པའི་མི་སྣ་ཞིག་བདམས་ཐོན་བྱུང་སྟེ། དེར་དངུལ་སྲང་སུམ་བརྒྱའི་ཕོགས་གནང་ནས་བརྗེ་བར་མངག་གིན་ཡོད།

མདོ་སྨད་ཆོས་འབྱུང་དང་རྒྱལ་མོ་རོང་གི་དགོན་ཆེན་གཡུང་དྲུང་ལྷ་སྟེང་གི་ལོ་རྒྱུས་མདོར་བསྡུས》《རྒྱལ་རོང་ལོ་རྒྱུས་རབ་གསལ་མེ་ལོང་སོགས་དཔྱད་གཞིའི་ཡིག་ཆར་གཞིགས་ན། མདོ་སྨད་ཆོས་འབྱུང་དང་རྒྱལ་མོ་རོང་གི་དགོན་ཆེན་གཡུང་དྲུང་ལྷ་སྟེང་གི་ལོ་རྒྱུས་མདོར་བསྡུསགཉིས་སུ་བློ་བཟང་འཇམ་དབྱངས་ནི་མཁན་རབས་གསུམ་པ་ཡིན་པ་དང་། རྒྱལ་རོང་ལོ་རྒྱུས་རབ་གསལ་མེ་ལོང་ཁྲོད་དུ་མཁན་རབས་གཉིས་པར་བགྲངས་ཡོད་པར་མ་ཟད། དེར་སྤྲོ་སྣང་བ་བློ་གླིང་བློ་བཟང་འཇམ་དབྱངས་ཞེས་བཀོད་ཡོད། གནས་ཚུལ་འདི་ལས་ང་ཚོས་རྡོ་རིང་ཡི་གེའི་ཐིག་ཕྲེང་ཞེ་བཞི་དང་ཞེ་ལྔའི་བར་དུ། ཆད་ཕུལ་སྤྲོ་སྣང་སོགས་སྤོས་དང་མཆོད་མེའི་འབས་སོགས། འབྱོར བཞག་པ་ཡིན། ཞེས་སྤྲོ་སྣང་ས་ཆའི་མང་ཚོགས་ཀྱིས་མཆོད་མེ་དང་སྤོས་སོགས་བཞག་སྟེ་བསྔོ་སྨོན་བྱས་པའང་དོན་དང་ལྡན་པའི་གནས་ལུགས་ཡོད་དེ། ཁོ་རང་ཉིད་སྤྲོ་སྣང་ས་ནས་སྐྱེས་པ་ཡིན་པས་ཕ་ཡུལ་གྱི་མང་ཚོགས་ཀྱིས་ཁོང་ལ་བསྔོ་བ་སྨོན་ལམ་རྒྱག་པ་བསྟན་ཡོད།

བསྟན་འཕེལ་གླིང་གི་སྐབས་དེར་བན་བོན་ལས་བན་ཁའི་དབང་ཤུགས་ཆེ་བས་སྔར་གྱི་བོན་དགོན་དུས་ཀྱི་གཡུང་དྲུང་ལྷ་སྟེང་དགོན་བསྐྱར་བཞེངས་ཀྱི་ལོ་རྒྱུས་བཀོད་པའི་ངོས་དེ་ཐུར་དུ་ལྡོག་བསླངས་བྱས་ཏེ་དེའི་རྒྱབ་ངོས་སུ་བསྟན་འཕེལ་གླིང་གི་མཁན་རབས་གསུམ་པ་བློ་བཟང་འཇམ་དབྱངས་ཀྱི་ལོ་རྒྱུས་དང་མཛད་པ་བཀོད་ནས་ཡར་བསླངས་ཤིང་། རྡོ་རིང་ཡར་བསླང་ཚུལ་གྱི་ཁ་ཕྱོགས་ལས་གང་དེའི་དབང་ཤུགས་ཆེ་བ་མཚོན་ཐུབ་ཀྱི་ཡོད། ཕྱིས་སུ་སྲིད་ཇུས་གསར་པའི་འོག་དགོན་དེ་སྔར་གྱི་ལུགས་སྲོལ་དང་བསྟུན་ནས་བོན་དགོན་དུ་སླར་གསོ་བྱུང་སྟེ་རྡོ་རིང་གི་སྤྱིའི་གནས་ཚུལ་ལ་གཞིགས་ནས་གང་ཡང་ལྡོག་ཏུ་མ་བཀོད་པར་འདྲ་མཉམ་གྱི་ངང་ཚུལ་བཟུང་སྟེ་སྟེགས་བུའི་སྟེང་དུ་འཕྲེད་ཉལ་བྱས་ཏེ་བཞག་ཅིང་། འདིས་བན་དང་བོན་གཉིས་འདྲ་མཉམ་གྱི་དགོངས་པ་མངོན་ཏེ་ལོ་རྒྱུས་ལ་བརྩི་འཇོག་བྱས་པ་མཚོན་གྱི་ཡོད།

མཇུག་གི་གཏམ།

རྒྱལ་རོང་ས་ཁུལ་གྱི་འདུས་སྡེ་ཆེན་མོ་གཡུང་དྲུང་ལྷ་སྟེང་དང་བསྟན་འཕེལ་གླིང་གི་ལོ་རྒྱུས་ཀྱི་འཕོ་འགྱུར་དེ་རྡོ་རིང་འདིའི་ངོས་གཉིས་བརྒྱུད་དེ་གསལ་བོར་བསྟན་ཡོད་ཅིང་། དེང་སྐབས་རྡོ་རིང་གི་ངོས་གཉིས་སོ་སོ་ལྷོ་བྱང་ཕྱོགས་གཉིས་སུ་འཁོར་ཡོད་པ་ལས། ལྷོ་ངོས་ཀྱི་ཡི་གེར་རབ་བརྟན་མི་དབང་ནམ་མཁའ་རྒྱལ་པོའི་དུས་སྐབས་ཀྱི་གཡུང་དྲུང་ལྷ་སྟེང་དགོན་པའི་རྒྱ་བསྐྱེད་བཞེངས་གྲུབ་ཀྱི་ལོ་ཚིགས་གསལ་བོར་བཀོད་ཡོད་དེ། མེ་ཁྱི་ལོ་སྟེ་སྤྱི་ལོ1766ལོར་རྨང་གཞི་བཏིང་བ་དང་། ཕག་ལོ་སྟེ་སྤྱི་ལོ1767ལོར་ཁང་ཚན་བརྒྱ་དང་བཅོ་ལྔ་གྲུབ་ཅིང་། ཟླ་བཅུ་གཅིག་པའི་དུས་སུ་ཡོངས་སུ་ལེགས་འགྲུབ་བྱུང་བ་ཡིན་པར་མ་ཟད། དགོན་པ་བཞེངས་གྲུབ་ཀྱི་ལག་གཡོག་ཏུ་རྒྱལ་རོང་རྒྱལ་ཁག་ལས་ལྕགས་ལ་དང་། བཙན་ལ། ཝོ་གཞི། སེ་མོ། རྫི་འགག ཅོག་ཙེ། དམ་བྷ། ཁྲོ་སྐྱབས། དགེ་བཤེས། ཡར་རྒན་བཅས་རྒྱལ་རོང་རྒྱལ་ཁག་བཅུ་པོའི་འབངས་མི་རྣམས་བཀོལ་ཡོད། འདི་ལས་ཆུ་ཆེན་རབ་བརྟན་ནམ་མཁའ་རྒྱལ་པོ་ནི་རྒྱལ་རོང་རྒྱལ་ཁག་སོ་སོ་ལས་དབང་ཐང་ཆེས་ཆེ་བ་དང་ཟིལ་ཤུགས་དྲག་པོ་ལྡན་པ་ཞིག་ཡིན་པ་མཚོན་པར་མ་ཟད། གཡུང་དྲུང་ལྷ་སྟེང་གིས་རྒྱལ་རོང་ས་ཆའི་ཆོས་སྲིད་ཀྱི་གོ་གནས་གལ་ཆེན་བཟུང་ཡོད་པ་དང་། རབ་བརྟན་རྒྱལ་པོ་དང་བོན་གྱི་གཏེར་སྟོན་གྲགས་ཅན་ཀུན་གྲོལ་གྲགས་པ་དབར་གྱི་མཆོད་ཡོན་གྱི་འབྲེལ་བ་ཟབ་མོ་ཡིན་པ་སོགས་ཀྱི་ལོ་རྒྱུས་ཀྱི་གནས་ཚུལ་གལ་ཆེན་རྟོགས་ཐུབ།

ཡང་བྱང་ངོས་ཀྱི་ཡི་གེས་དུས་རབས་བཅོ་བརྒྱད་པའི་དུས་མཇུག་སྟེ་སྤྱི་ལོ1776ལོར་གཡུང་དྲུང་ལྷ་སྟེང་ནས་བསྟན་འཕེལ་གླིང་དུ་བསྒྱུར་ཟིན་པ་དང་། གོང་མ་ཆན་ལུང་གིས་སྔར་གྱི་ལོ་རྒྱུས་བསྐྱར་ཟློས་མི་བྱེད་པའི་ཆེད་དུ་བསྟན་འཕེལ་གླིང་དུ་ཆེད་མངགས་ཀྱི་མཁན་པོ་བཏང་སྟེ་རྒྱལ་རོང་ས་ཆའི་དགོན་སྡེ་ཁག་ལ་དོ་དམ་བྱེད་དུ་བཅུག་ཅིང་། ཕྱོགས་གཅིག་ནས་ཡུལ་ཁོངས་རྒྱལ་རོང་ཡིན་པའི་མཁན་པོ་བསྟན་འཕེལ་གླིང་དུ་མངགས་ནས་རྒྱལ་རོང་གི་ཆོས་ལུགས་ལ་དོ་དམ་དང་། ཕྱོགས་གཞན་ཞིག་ནས་ཡང་དོ་དམ་བྱེད་མཁན་གྱི་མཁན་པོ་མཚམས་མི་ཆད་པར་རྒྱ་ནག་གི་རི་བོ་རྩེ་ལྔ་དང་ཞེ་ཧོར་སོགས་སུ་ཕེབས་པའི་བཀའ་ཕབ་སྟེ་མཐའ་མཚམས་བཅོས་སྐྱོང་གི་སྲིད་ཇུས་ཏན་ཏན་ཏིག་ཏིག་ཏུ་ལག་བསྟར་བྱས་ཤིང་། མཁན་པོས་ཆིང་ཀྲུང་དབྱང་སྲིད་གཞུང་དང་ས་གནས་ཀྱི་བར་དུ་བཅོས་སྐྱོང་དང་དོ་དམ་གྱི་ནུས་པ་གལ་ཆེན་ཞིག་བཏོན་པ་མཚོན། བྱང་ངོས་འདིར་གཙོ་བོ་ཆིང་གོང་མས་མངགས་གཏོང་བྱས་པའི་མཁན་པོ་བློ་བཟང་འཇམ་དབྱངས་ཀྱི་མི་ཚེའི་ལོ་རྒྱུས་དང་མཛད་པ་མདོར་བསྡུས་བཀོད་ཡོད་པ་དང་། དེ་མིན་ཁོང་ཉིད་སྐུ་གཤེགས་པའི་རྗེས་སུ་འབངས་མི་སེར་རྣམས་ཀྱིས་སྐུ་གདུང་མཆོད་འབུལ་གྱི་བསྔོ་སྨོན་བཏབ་སྟེ་རྒྱ་བོད་ཡིག་རིགས་གཉིས་ཀྱིས་བཀོད་ཡོད། གང་ལྟར་ཡང་དགོན་པའི་མདུན་གྱི་རྡོ་རིང་ཡི་གེ་འདི་ནི་དུས་རབས་བཅོ་བརྒྱད་པ་ནང་གི་བོན་གྱི་འདུས་སྡེ་ཆེན་མོ་གཡུང་དྲུང་ལྷ་སྟེང་དང་དུས་མཇུག་གི་དགེ་ལུགས་པའི་བསྟན་འཕེལ་གླིང་སོགས་གང་རུང་ལ་མཚོན་ནའང་། དེར་ལོ་རྒྱུས་རང་བཞིན་གྱི་དོན་སྙིང་དང་རིན་ཐང་ཆེན་པོ་ལྡན་པ་སྨོས་མེད་ཅིག་གོ །

དཔྱད་གཞིའི་ཡིག་ཆ།

1 རྒྱལ་རོང་ཁ་སྐད་དུ། མོ་འབུ་ར་ཟེར་ཏེ། རྒྱལ་རོང་ཁ་སྐད་ཀྱི་ཁྱད་ཆོས་དང་བསྟུན་ནས་ཡི་གེར་བྲིས་ན་མོ་བཀྲ་ཡིན།

2 ལྷོ་ངོས་ཀྱི་རྡོ་རིང་ཡི་གེ་ལས་དྲངས།

3 ལྷོ་ངོས་ཀྱི་རྡོ་རིང་ཡི་གེ་ལས་དྲངས།

4雀丹著;《嘉绒藏族历史》,民族出版社,1995 283页。

5彭陟焱;《试论乾隆平定金川之影响》,《西藏研究》,2003年第1期。 93页。

6 ཀྲུང་གོའི་ལོ་རྒྱུས་ཡིག་ཚགས་ཁང་དང་པོའི་ནང་དུ་ཉར་ཚགས་བྱས་པའི་ཆིང་རྒྱལ་རབས་དུས་ཀྱི་དམག་མིའི་ཡིག་ཚགས་ཁང་གི་ཡིག་ཆ་ཨང053-1422-------053-1428དུ་གསལ།

7བྲག་བར་དཔལ་ལྡན་གྱིས་བརྩམས། བོད་རྒྱལ་མོ་རོང་གི་ལོ་རྒྱུས་རབ་གསལ་མེ་ལོང་། ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་འབར་ཁམས་རྫོང་ཨུ་ཡོན་ལྷན་ཁང་། 2002ལོའི་ཟླ6པར་པར། ཤ 39རུ་གསལ།

8འདི་དག་ནི་ཁོང་གི་གཅེན་གཅུང་ཡིན།

9 སྔོན་གྱི་དུས་སུ་འཁྲུག་པ་ལངས་དུས་ནི་ཆུ་ཆེན་དམག་འཁྲུག་ཐེངས་དང་པོར་གོ་དགོས་ཏེ། རྡོ་རིང་འདི་ནི་ཆུ་ཆེན་དམག་འཁྲུག་ཐེངས་དང་པོའི་རྗེས་ཏེ1767ལོར་ཁང་ཚན་བརྒྱ་དང་བཅོ་ལྔ་ཡོངས་སུ་གྲུབ་པ་དང་རབ་གནས་བྱས་པའི་རྗེས་སུ་རྡོ་རིང་བཙུགས་ཏེ་ཡི་གེ་བཀོད་པ་ཡིན། ཆུ་ཆེན་དམག་འཁྲུག་ཐེངས་དང་པོའི་དུས་ནི1747ལོ་ནས1749ལོའི་བར་ཡིན།

10 གཡུང་དྲུང་ལྷ་སྟེང་དགོན་པའི་འདུས་སྡེ་བསྐྲུན་ཏེ་ས་ཕོ་བྱི་བ་ལོ་སྟེ་ཀུན་འཛིན་ཞེས་པ་1768ལོར་བསྟན་པའི་འགོ་ཚུགས་པ་དང་། དེ་ཡང་མེ་ཁྱི་ལོ་སྟེ་1766ལོར་རྨང་གཞི་བཏིང་བ་དང་། དེ་ནས་ཕག་ལོ་སྟེ1767ལོར་ཁང་ཚན་བརྒྱ་དང་བཅོ་ལྔ་འགྲུབ་པ་དང་། དེ་ནས་ལྷ་རིས་པས་ལྷ་བྲིས་ཏེ་དགོན་པ་ཡོངས་ལེགས་འགྲུབ་བྱུང་། སྐབས་དེའི་གཡུང་དྲུང་ལྷ་སྟེང་དགོན་པས་ས་བྱི1768ལོར་འགྱེད་དང་མཆོད་རྫས་མི་དམན་པ་བཏང་།

11 ནམ་མཁའ་ཡེ་ཤེས་ཀྱིས་བརྩམས། རིག་འཛིན་ཀུན་གྲོལ་འཇའ་ཚོན་སྙིང་པོའི་རྣམ་ཐར། ཤིང་དཔར་སྣ་རིང་མ། ཤ487ནས488བར་དུ་གསལ།

12 གོང་མ་ཆན་ལུང་ཁྲིར་བཀོད་པའི་ལོ་ནི1735ལོ་ཡིན།

13 ཀྭང་ཧྥ་ཟི་ནི་རྒྱ་སྐད་(广法寺)ཡི་སྒྲ་སྒྱུར་ཏེ། སྐབས་དེ་དུས་བོད་སྐད་དུ་བསྟན་འཕེལ་གླིང་ཟེར།

14 ཛ་སག་ནི་སོག་སྐད་དེ། མཉྫའི་རྒྱལ་རབས་ཀྱི་གོ་གནས་ཆེ་གྲས་ཤིག་སྟེ། བོད་སྐད་དུ་སྤྱི་དཔོན་ཞེས་ཟེར།

15 中国科学院民族研究所,《金川案》(内部资料),19636月复制,第167页。

རྩོམ་པ་པོ་ངོ་སྤྲོད། ལྕགས་མོ་མཚོ། མཚོ་སྔོན་རེབ་གོང་གི་མི་ཡིན། ད་ལྟ་པེ་ཅིང་སློབ་ཆེན་སྤྱི་ཚོགས་རིག་པའི་ཚན་ཁག་གི་འབུམ་རམས་པ་ཕྱི་ཚར་གྱི་ལས་ཀ་གཉེར་གྱིན་ཡོད།

2018ལོའི་དེབ་གསུམ་པའིཀྲུང་གོའི་བོད་རིག་པདུས་དེབ་སྟེང་བཀོད་པ་ལས་དྲངས།

tibetmonk  2018-10-19 17:36:42

༢༠༡༨ལོའི་གཡུང་དྲུང་བོན་དང་འབྲེལ་བའི་དཔྱད་གླེང་ལོ་དེབ་མུ་ཁྲི་བཙན་པོ་ཡི་རྩོམ་བསྡུ་གསལ་བརྡ།
1539940820618581.jpg

དེ་ཡང་དུས་དང་རྣམ་པར་ཀུན་ཏུ་གཡུང་དྲུང་བོན་དང་འབྲེལ་བའི་དཔྱད་གླེང་ལོ་དེབ་མུ་ཁྲི་བཙན་པོ་ལ་རྩོམ་ཡིག་གིས་རྒྱབ་སྐྱོར་གནང་མཁན་གྱི་རྒྱལ་ཕྱི་ནང་དུ་བཞུགས་པའི་རྩོམ་པ་པོ་རྣམས་ལ་སླར་ཡང་རེ་ཞུ་ལ།
ངེད་གཡུང་དྲུང་བོན་དང་འབྲེལ་བའི་དཔྱད་གླེང་ལོ་དེབ་མུ་ཁྲི་བཙན་པོ་འགྲེམ་སྤེལ་གནང་ནས་ད་བར་དུ་ལོ་ངོ་བཅུ་ལྷག་ཕྱིན་ཡོད་པ་དང་དེའི་རིང་ལ་ལོ་རེར་དེབ་རེ་འགྲེམ་སྤེལ་བགྱིས་ཏེ་སྤྱིའི་འདོན་ཐེངས་བཅུ་གཅིག་ཙམ་སྤེལ་ཡོད། དེ་ཀྱང་བོད་མི་རིགས་སྤྱི་དང་ཁྱད་པར་དུ་ཞང་ཞུང་དང་གནའ་བོའི་བོད་ཀྱི་ཤེས་རིག་ཞིབ་འཇུག་སོགས་ལ་ཞོགས་འདེགས་མི་དམན་པ་ཞིག་བསྒྲུབས་པ་ཡིན་ལ།
ད་ལོ་སྟེ་༢༠༡༨ལོའི་དེབ། སྤྱིའི་དེབ་བཅུ་གཉིས་པ་ཡང་པར་སྐྲུན་གྱི་འགོ་ཟིན་བཞིན་ཡོད་པས་ཕྱོགས་ཀྱི་རྒྱ་ཆེ་བའི་རྩོམ་པ་པོ་རྣམས་ཀྱིས་གཙོ་བོ་གཡུང་དྲུང་བོན་དང་འབྲེལ་བའི་དཔྱད་རྩོམ་སྣ་ཚོགས་ཤིག་ངེད་རྩོམ་སྒྲིག་ཁང་ལ་གནང་རོགས་ཞུ་བ་ལགས།
རྩོམ་ཡིག་གི་ནང་དོན་ཐད་ལ། གཡུང་དྲུང་བོན་དང་འབྲེལ་བའི་དཔྱད་རྩོམ། ཤེས་རིག རྒྱལ་རབས་ལོ་རྒྱུས། སྐྱེས་ཆེན་ངོ་སྤྲོད། ལེགས་བཤད། གཏོ་དཔྱད། བོན་དང་འབྲེལ་བའི་དྲི་བ་དྲིས་ལན།  རྒྱལ་སྤྱིའི་བོན་འབྲེལ་གནས་ཚུལ་སོགས་སྤྱི་ལོ་༢༠༡༨ལོའི་ཟླ་བ་༡༡་ཚེས་༡༩སྔོན་ལ་བསྐུར་གནང་ཡོད་པར་ཞུ་ཞུ།

དཔྱད་རྩོམ་བསྐུར་སའི་གློག་རྡུལ་ཡིག་སྒམ། rinpung2018@yahoo.com ___897252858@qq.com

འབྲེལ་གཏུགས་ཁ་པར། 13990418773_13909043403__13350095866

ཞེས་གཡུང་དྲུང་བོན་དང་འབྲེལ་བའི་དཔྱད་གླེང་ལོ་དེབ་མུ་ཁྲི་བཙན་པོའི་རྩོམ་སྒྲིག་ཁང་གིས།

tibetmonk  2018-10-15 20:48:58

6b2288522449bfeb6153bf16b26eed6f.jpg

མཁན་པོ་ཚེ་རིང་ནོར་བུ།

ནང་དོན་གནད་བསྡུས། རྣམ་ཐར་ནི་བོད་ཀྱི་ལོ་རྒྱུས་བསྟན་བཅོས་ཀྱི་རིགས་རྣམ་གཙོ་བོ་ཞིག་ཡིན་པ་དང་།དུས་རབས་སོ་སོར་བྱུང་བའི་རྣམ་ཐར་རྣམས་ནི་སྐབས་ཀྱི་བསམ་བློའི་འགྱུར་ལྡོག་དང་།སྤྱི་ཚོགས་ཀྱི་གནས་བབ།ལོ་རྒྱུས་དོན་རྐྱེན་གྱི་འཕོ་འགྱུར་སོགས་ཆེས་ལེགས་པར་མཚོན་པར་བྱེད་ནུས་པའི་རྒྱུ་ཆ་གཙོ་བོ་དེ་རུ་གྱུར་ཡོད།དེའང་རྣམ་ཐར་རང་ཉིད་ཀྱི་ཐད་ནས་བྱུང་རབས་དང་གྲུབ་སྟངས།ནང་དོན།རྣམ་པ།ངོ་བོ་སོགས་ཀྱི་ངོས་ནས་རིགས་དབྱེ་དུ་མ་ཙམ་དུ་བགར་ཆོག་པར་མ་ཟད།རྣམ་ཐར་མཛད་མཁན་གྱི་གང་ཟག་ངོས་ནས་ཀྱང་རང་རྣམ་དང་གཞན་རྣམ་ལྟ་བུར་ཁྱད་པར་འབྱེད་ནུས་པ་དང་།བྱུང་བའི་དུས་རིམ་གྱི་ཐད་ནས་ཀྱང་དུས་རབས་སོ་སོའི་རྣམ་ཐར་དུ་བགར་ནས་ཞིབ་པར་འཇུག་རིགས་སོ།།དེའང་གཡུང་དྲུང་བོན་གྱི་ལུགས་ལྟར་ན།རྣམ་ཐར་དོ་ཅོག་ནི་དུས་རབས་བཅུ་པའི་རྗེས་སུ་རིམ་གྱིས་གྲུབ་ཅིང་།དེ་དག་གི་གྲུབ་སྟངས་ཀྱི་ཐད་ལ་བཀའ་མ་དང་།གཏེར་ཆོས།སྙན་བརྒྱུད།བརྩམས་ཆོས་སོགས་རིགས་ཇི་སྙེད་ཅིག་ཡོད་པ་ལྟར།དཔྱད་རྩོམ་འདིར་ཁོ་བོས་གོང་གི་བོན་ལུགས་རྣམ་ཐར་གྱི་གྲུབ་ཆ་དེ་དག་གི་ངོ་བོ་དང་ནང་དོན་སོགས་ལ་ངོ་སྤྲོད་རགས་བསྡུས་བྱས་པ་དང་བརྒྱུད།གྲུབ་ཆ་དེ་དག་གི་བརྗོད་གཞི་རེ་རེ་དང་སྦྱར་ཏེ་བྱེ་བྲག་གི་མཚོན་བྱེད་བརྩམས་ཆོས་ཀྱི་ནང་དོནའཕོ་འགྱུར་ཐད་ལ་ཉམས་ཞིབ་ཅུང་ཟད་རེ་བགྱིས་ཡོད།
བརྡ་ཆད་གཙོ་བོ། གཡུང་དྲུང་བོན། རྣམ་ཐར། བྱུང་འཕེལ།
    སྤྱིར་བོད་ཀྱི་རིག་གནས་ལ་ཡ་ཐོག་གདོད་མའི་དུས་ཀྱི་རིག་གནས་དང་།རྒྱལ་ཕྲན་སིལ་མའི་དུས་ཀྱི་རིག་གནས། བཙན་པོ་རྒྱལ་རབས་སྔ་མའི་དུས་ཀྱི་རིག་གནས།བཙན་པོ་རྒྱལ་རབས་ཕྱི་མའི་སྐབས་ཀྱི་རིག་གནས།བོད་སིལ་བུའི་དུས་ཀྱི་རིག་གནས་བཅས་སྡེ་ཚན་ལྔར་ཕྱེས་བ་ལས་འདིར་བོད་སིལ་བུའི་དུས་རབས་དང་བསྟུན་ཏེ་བོན་གྱི་རྣམ་ཐར་བྱུང་འཕེལ་སྐོར་འགའ་ཞིག་བརྗོད་པ།

དང་པོ། གཏེར་ཆོས་དང་བརྩམས་ཆོས་སྙན་རྒྱུད་བཀའ་མ་བཅས་ཀྱི་ངོ་སྤྲོད་གནད་བསྡུས།

    དུས་རབས་དགུ་པའི་ལོ་རབས་བཞི་བཅུ་པ་སྟེ་བོད་ཀྱི་རྒྱལ་པོ་ཐ་མ་དར་མ་འུ་དུམ་བཙན་པོ་སྐུ་བཀྲོངས་བ་ནས་ལོ་ངོ་ཉིས་སྟོང་ཉེ་བར་དབང་བསྒྱུར་བའི་བཙན་པོ་རྒྱལ་ཁབ་ཀྱང་སིལ་བུ་ཁ་འཐོར་གྱི་ལམ་དུ་ཆས་པའི་དབུ་བརྙེས། དེ་ལ་བོད་ཀྱི་ལོ་རྒྱུས་ཐོག་བོད་སིལ་བུའི་དུས་རབས་ཞེས་ཡོངས་སུ་གྲགས། དུས་རབས་དེའི་ནང་དུ་རྒྱལ་ཕྲན་སོ་སོའི་རང་གི་དགོས་དབང་ལྟར་ཆོས་ལུགས་གྲུབ་མཐའ་མང་པོ་དར་སྤེལ་བཏང་། ཆོས་ལུགས་དེ་དག་གནད་བསྡུས་ན་བོན་པོའི་ཆོགས་ལུགས་དང་བན་དེའི་ཆོས་ལུགས་གཉིས་སུ་འདུ། འདིར་དུས་རབས་བཅུ་པ་ཚུན་གྱི་བོན་གྱི་རིག་གཞུང་གནས་བབས་དང་འབྲེལ་ཏེ་བོན་ལུགས་ཀྱི་རྣམ་ཐར་འགྱུར་ལྡོག་གནས་ཚུལ་འགའ་ཞིག་བརྗོད་པ་ལ།ཐོག་མར་བོན་ལུགས་གཏེར་ཆོས་དང་བརྩམས་ཆོས་སྙན་རྒྱུད་བཀའ་མ་བཅས་ངོ་སྤྲོད་མདོ་ཙམ་ཞུ་བ་ལ།

གཅིག  བོན་ལུགས་གཏེར་ཆོས་ངོ་སྤྲོདམདོར་བསྡུས།

    དུས་རབས་བཅུ་ནས་བཟུང་བོན་གྱི་ཡིག་ཆ་ལ་གཏེར་མ་དང་སྙན་རྒྱུད། བཀའ་མ་དང་བརྩམས་ཆོས་སོགས་མ་ལག་མི་འདྲ་བ་ཁ་ཤས་དར་ཡོད། དེ་ལས་གཏེར་མ་ཞེས་པ་ནི་བྲག་ཕུག་དང་ས་འོག་སོགས་ནས་གསར་རྙེད་བྱུང་བའི་ཡིག་ཆ་ཡིན་པ། དཔེར་ན་ཨ་ཙ་ར་མི་གསུམ་ནས་གཤེན་ཆེན་ཀླུ་དགའི་བར་གཏེར་སྟོན་བཅོ་ལྔ་བྱུང་ཞིང་བོན་གྱི་གཏེར་ཆོས་རྣམས་དར་བའི་དབུ་བརྙེས། གཤེན་ཆེན་ཀླུ་དགའ(996ནས་གཤེན་གྱེར་རྨ་དབྱིལ ། ཁུ་བཞེད་གཉེན་གསུམ་ སོགས་བོན་གྱི་གཏེར་སྟོན་དུ་མ་རིམ་གྱིས་བྱོན་ཏེ་གཏེར་ཆོས་དང་འབྲེལ་བའི་རིག་གནས་རྣམས་དར་སྤེལ་བཏང་། དེང་དུས་ཀྱི་མཁས་པ་འགའ་རེས་གཏེར་མ་ཞེས་པ་གཏེར་སྟོན་ཁོ་རང་གིས་བརྩམས་པ་ལས་གསར་རྙེད་བྱུང་བར་ཁས་ལེན་གྱི་མེད་ནའང་། དེར་བསམ་བློ་ཞིབ་མོ་གཏོང་དགོས་པ་ཞིག་ནི དཔེར་ན་བོན་གྱི་ལོ་རྒྱུས་ནང་དུ་སྐད་གྲགས་ཤིན་ཏུ་ཆེ་བའི་གཏེར་སྟོན་ཨ་ཙ་ར་མི་གསུམ་ལྟ་བུར་མཚོན་ན། བལ་ཡུལ་ནས་ཐོན་པའི་གསེར་ཚོང་བ་ཡིན་པ་ལས་བོན་གྱི་བསྟན་པ་སྤེལ་བའི་བླ་མ་དང་མཁས་པ་གང་ཡང་མིན། ཁོ་ཚོས་གཏེར་ནས་བཏོན་པའི་ཡིག་ཆ་རྣམས་ཀྱང་ས་འོག་དང་རི་བྲག་སོགས་ནས་གསར་རྙེད་བྱུང་བ་མ་ཡིན་པར། བསམ་ཡས་གཙུག་ལག་ཁང་ནས་བརྐུས་སོང་བའི་ཡིག་ཆ་ཡིན་པར་བོན་གྱི་ལོ་རྒྱུས་རྣམས་སུ་བལྟས་ན་ཤེས་ཐུབ།  དཔེར་ན་སྤྱི་ལོ་༩༡༣་པ་ལ་བལ་ཡུལ་གྱི་ཨ་ཙ་ར་མི་གསུམ་གནས་སྐོར་བར་བརྫུས་ནས་བོད་ཡུལ་དུ་གསེར་ཉོ་རུ་ཡོང་། བསམ་ཡས་སུ་སླེབས་པ་དང་སྐོར་བ་འདྲ་བྱས་པས་ས་དེ་གའི་མི་རྣམས་ཀྱིས་ལྷོ་བལ་གྱི་མི་འདི་རྣམས་དད་པ་ཅན་དུ་འདུག་ཟེར་ནས་ནུབ་མོར་བསམ་ཡས་གཙུག་ལག་ཁང་དུ་བསྡད་བཅུག ཨ་ཙ་ར་རྣམས་ཀྱིས་ལྷ་ཁང་དུ་སྒམ་ཆ་རེ་འདུག་པར་མཐོང་བར་རིན་པོ་ཆེ་ཡིན་ལས་ཆེ་བསམ་སྟེ་རྐུས་ནས་བྲོས་སོང་། ལམ་ནས་ཁ་ཕྱེས་བས་ཚང་མ་བོན་དཔེར་འདུག་པས་པོ་ཏི་ཆ་རེ་བོན་པོའི་བླ་མ་མཐའ་བཞི་འཕྲུལ་གསས་ལ་ཕུལ་ནས་ཟན་དང་བརྗེས། ཡང་འགའ་རེ་བན་དེ་མི་གསུམ་ལ་བཙོང་བར་བཤད་པས་རིག་གནས་ཀྱི་ཆུ་ཚད་ཧ་ཅང་དམན་བའི་མི་སྐྱ་བ་ཁོ་ན་ཡིན་པ་ཤེས་ཐུབ།   དེ་བཞིན་དུ་སྤྱི་ལོ་༡༠༦༧པ་ལ་སྐུ་འཁྲུངས་བའི་བོན་གྱི་གཏེར་སྟོན་ཁུ་བཞེད་གཉན་གསུམ་གྱི་ནང་ཚན་ཁྱེའུ་གཉན་མཐིང་པའང་ལུག་རྫི་རྒད་པོ་ཞིག་ཡིན་ཞིང་། ཁོང་གིས་ར་ལུག་འཚོ་སྐབས་གཙང་འཕྲེང་ནུ་མ་ནས་ཡི་གེ་པོ་ཏིས་བཀང་བའི་བྲག་ཕུག་ཅིག་རྙེད་པ་ལ་ཕྱིས་སུ་གཏེར་སྟོན་སྐད་གྲགས་ཅན་ཏུ་གྱུར་པ་དེ་ལྟ་བུ་རེད། དེ་བཞིན་ཏུ་དུས་རབས་བཅུ་པའི་དཀྱིལ་ཙམ་ལ་ཁྱི་ར་བ་གསུམ་མམ་རྔོན་པ་མི་གསུམ་གྱིས་ཤིང་སྡོང་ཆེན་པོ་ཞིག་གི་འོག་ནས་སོལ་བ་ཐར་ཐོར་བྱུང་བས་རྐོས་པ་ལས་ཀླུ་འབུམ་དཀར་ནག་ཁྲ་གསུམ། ཀླུ་གཉན་ས་བདག་གི་འབུམ་སོགས་བོན་གྱི་ཡིག་ཆ་མང་པོ་བྱུང་བ།དཔེ་རྒྱུན་ཡང་ད་ལྟ་བོན་དགོན་སོ་སོར་བཞུགས་ཡོད།དེ་བཞིན་དུ་སྤྱི་ལོ་༩༩༦པ་ལ་སྐུ་འཁྲུངས་བའི་བོན་གྱི་གཏེར་སྟོན་ཆེན་པོ་གཤེན་ཆེན་ཀླུ་དགའ་ཡང་དོན་ངོ་མ་མི་སྐྱ་ཞིག་ཡིན་ཞིང་། ཆུང་ནས་བཟུང་ཡབ་འདས། སྐུ་མཆེད་བཀྲོང་བ་སོགས་ཀྱིས་ཤེས་བྱ་ཡོན་ཏན་སྦྱང་ལོང་མ་རྙེད། འོན་ཀྱང་དགུང་ལོ་༢༢པ་ལ་བོད་ལྗོངས་གཞིས་རྩེ་གངས་པ་རྫོང་གི་འབྲི་མཚམས་མཐའ་དཀར་ནས་གཏེར་ཞལ་ཕྱེས་བ་སོགས་སུ་གཞིག་ན་པོ་ཏི་དེ་འདྲ་མང་པོ་ཞིག་གསར་རྩོམ་བྱེད་པའི་ཁོམ་ལོང་མེད་པར་ཤིན་ཏུ་གསལ། དཔེར་ན་བསྒྲགས་པ་གླིང་གྲགས་དང་སྲིད་པ་རྒྱུད་ཀྱི་ཁ་བྱང་ཆེན་མོ་སོགས ལས། བོན་གྱི་གཏེར་ཡིག་རྣམས་དུས་ནམ་ཞིག་ལ་སྦས་པ་དང་། རྒྱུ་མཚན་ཅིའི་ཕྱིར་དུ་སྦས་པ། སྦས་ནས་ལོ་ག་དུས་སོང་བ་དང་། གཞན་ཡང་གཏེར་འདོན་སའི་ས་དང་།གཏེར་ནས་བཏོན་བའི་དུས་ཚོད། གཏེར་འདོན་མཁན་གྱི་བླ་མ། གཏེར་ནས་ཐོན་པའི་ཡིག་ཆ་གང་དག་ཡིན་པ་སོགས་རེ་རེ་ནས་ཁ་གསལ་བསྟན་ཡོད་པས བོན་གྱི་གཏེར་ཆོས་ལ་གཞན་དང་མི་འདྲ་བའི་ཁྱད་ཆོས་དུ་མ་ཡོད་པའང་ཤེས་ཐུབ།  འོ་ན་གཏེར་ཡིག་དེ་དག་གཏན་ནས་བཅོས་མ་ཕོག་ཞིག་ཡིན་ནམ་ཞེ་ན། དེའང་མ་ཡིན་ཏེ། དཔེར་ན་མཁར་རྨེའུ་བསམ་གཏན་སོགས་ཀྱིས་བོན་གྱི་གཏེར་ཡིག་ནི་སྔོན་གྱི་དཔེ་རྙིང་ཞིག་གསར་རྙེད་བྱུང་བས་མ་གཞི་བྱས་ཏེ། གཏེར་སྟོན་དང་ཁོང་གི་སློབ་རྒྱུད་དག་གིས་མ་གཞི་དེའི་སྟེང་དུ་ཚིག་དོན་ཁ་གསབ་དང་འཕྲི་སྣོན་བྱས་ལས་འཕེལ་རྒྱས་བྱུང་བ་ཞིག་ཡིན་པར་བཤད་པ་ཉིད་དོན་ལ་གནས་པར་བསམ། རྒྱུ་མཚན་ནི་དཔེ་ཆ་དེ་དག་གི་ནང་དུ་ཡི་གེ་འབྲི་སྟངས་དང་སྡེབ་སྦྱོར་སོགས་དུས་རབས་བཅུ་གཅིག་པའི་སྐབས་ཀྱི་ཡི་གེ་སྡེབ་སྦྱོར་དང་མི་མཚུངས་པའི་གནའ་བོའི་བརྡ་རྙིང་སོགས་ཅི་རིགས་ཡོད་པས་ཀྱང་ཤེས་ཐུབ།

གཉིས། བརྩམས་ཆོས་ངོ་སྤྲོད།

   དེའང་བོན་གྱི་ཡིག་ཆ་རྣམས་སུ་ཉམས་རྒྱུད་རྒྱལ་བའི་ཕྱག་ཁྲིད་ཀྱི་བླ་བརྒྱུད་རྣམ་ཐར།  ཞང་ཞུང་སྙན་རྒྱུད་ཀྱི་བླ་མ་བརྒྱུད་ཀྱི་རྣམ་ཐར།  གཡུང་དྲུང་བསྟན་འཛིན་གྱི་རང་རྣམ།  མཁན་ཉི་མའི་རང་རྣམ།  ཤར་རྫ་བའི་ཨ་ཁྲིད་བླ་བརྒྱུད་རྣམ་ཐར་ སོགས་མང་པོ་བཞུགས་ཤིང་། དེ་དག་ནི་མཁས་པ་སོ་སོས་བརྩམས་ཆོས་ཡིན་པས། གཏེར་མ་དང་ཅུང་མི་འདྲ་བ། དཔེར་ན་དུས་རབས་བཅུ་གཉིས་པའི་དཀྱིལ་ཙམ་ལ་གཏེར་ནས་ཐོན་པའི་ཡིག་ཆ་དབལ་ཆེན་གེ་ཁོད་ དང་དབལ་གསས་གཤེད་རྡུང་ སོགས་སུ་ཀི་ཀུ་ཕྱིར་ལོག་དང་། མི་ལ་མྱི། མེད་མྱེད། མེས་པོ་ལ་མྱེས་པོ།བོན་ལ་བོནད།ཡོངས་རྫོགས་ལ་ཡང་རྫོག་ཅེས་འབྲི་སྲོལ་ཡོད་པ་དང་། དཔེར་ན་ཞལ་གཅིག་ཕྱག་གཉིས་སྤྱན་གསུམ་ཞེས་པ་ལ། ཞལ་༡་ཕྱག་༢་སྤྱན་༣་ཞེས་པ་སོགས་བྲིས་ཡོད་པ།   དེ་ལ་མཁས་པ་མང་པོ་ཞིག་གིས་དུས་རབས་བཅུ་གཉིས་པའི་སྐབས་ཀྱི་ཡི་གེ་འབྲི་སྟངས་དེ་དེ་འདྲ་ཞིག་ཡིན་པར་བསམ་སྲིད་མོད་ཀྱང་།དོན་དངོས་དུས་རབས་བཅུ་གཅིག་པའི་དཀྱིལ་ཙམ་ལ་བོན་གྱི་བླ་མ་མཁས་པ་དཔལ་ཆེན་གྱིས་བརྩམས་པའི་ཕར་ཕྱིན་མངོན་རྟོགས་རྒྱན་དང་ཁམས་སྡུད་ཚིགས་སུ་བཅད་པའི་འགྲེལ། མེ་སྟོན་ཤེས་རབ་འོད་ཟེར་གྱིས་བརྩམས་པའི་དབུ་མ་བདེན་གཉིས་དང་ལམ་རིམ་སུམ་བརྒྱ་ཉི་ཤུ་བ། འདུལ་བ་ཀུན་བཏུས། འདུལ་བ་མདོར་བསྡུས་སོགས་ཐམས་ཅད་ཚིགས་བཅད་ཁོ་ན་ཡིན་ཞིང་།ཚིག་སྙན་ལ་དོན་ཟབ་པ། བརྡ་རྙིང་གིས་མ་བཅིང་པ། ཚིག་རྫོབ་ཉུང་བ། འདོན་བདེ་བ། དེང་དུས་སུམ་རྟགས་ཀྱི་འགྲིག་དང་མཐུན་པ་སོགས་ཀྱིས་མཚོན། དེ་དང་གོང་ཞུས་ཀྱི་དུས་རབས་བཅུ་གཉིས་པའི་གཏེར་ཡིག་རྣམས་ལ་ཁྱད་པར་ཧ་ཅང་ཆེན་པོ་ཡོད་པ་དཔེ་ཆ་གོ་བསྡུར་ནས་བལྟས་ན་ཤེས་སླ། དེ་བཞིན་ཏུ་དུས་རབས་བཅུ་གཉིས་པར་འགྲོ་མགོན་བློ་གྲོས་གྱིས་བརྩམས་པའི་ཚད་མ་ཀུན་བཏུས་དང་། རྩ་རྒྱུད་གསང་བ་བསེན་ཐུབ་གྱི་འགྲེལ་ཡིད་བཞིན་རྣམ་པར་བཀོད་པའི་རྒྱན་སོགས་སུ་བལྟས་ནའང་སྐབས་དེའི་གཏེར་ཡིག་དང་མི་འདྲ་བར་ཤེས་ཐུབ། ་དེ་བཞིན་ཏུ་ད་ལྟ་ཕུའུ་མིན་普米族མི་རིགས་ཀྱི་ཡིག་ཆའི་གྲས་སུ་བཞུགས་པའི་བོན་ལུགས་གེ་ཁོད་དང་དབལ་གསས། གཞི་བདག་མཆོད་ཐབས། འདུར་གྱི་སྐོར་སོགས་ལ་མཁས་པ་ཞིབ་འཇུག་པས་བརྟག་དཔྱད་བྱས་པས་དུས་རབས་དགུ་པའི་ཡིག་ཆར་ངོས་བཟུང་ཡོད་མོད།  འོན་ཀྱང་མཇུག་ཏུ་དཔོན་གསས་ཁྱུང་རྒོད་རྩལ་གྱིས་གཏེར་ནས་བཏོན་ཞེས་པར་བཤད་པས་དུས་རབས་བཅུ་གཉིས་པའི་དཀྱིལ་ཙམ་ལ་གཏེར་ནས་ཐོན་པར་ཁས་མ་ལེན་རང་ལེན་འདྲ་ཆགས་ཡོད་མོད། གལ་ཏེ་ཆེད་ལས་པ་ཞིག་གིས་བོན་གྱི་སྲོལ་རྒྱུན་རིག་གཞུང་ལ་རྒྱུས་ལོན་གང་ཡང་བྱེད་མ་མྱོང་ཞིང་ཐད་ཀར་དཔེ་ཆའི་ངོས་སུ་ལྟ་ནས་ཁ་གྲགས་དགོས་ན་དུས་རབས་བཅུ་པའི་ཡིག་ཆ་ཅིག་རེད་ཅེས་བཤད་སྲིད་པ་དེ་ལྟ་བུ་ཡིན་པས་གཏེར་ཡིག་དང་རྩོམ་ཆོས་ལ་ཁྱད་པར་ཡོད་པ་དེ་དག་གིས་ཀྱང་ཤེས་ཐུབ།

གསུམ། སྙན་རྒྱུད་ཅེས་པ་ངོ་སྤྲོད།

   དེ་བཞིན་དུ་བོན་ལུགས་ལ་ཐུན་མོང་མ་ཡིན་པའི་གཞུང་སྙན་བརྒྱུད་ཟེར་བ་ཞིག་ཡོད། དེ་ནི་གང་ཟག་ག་གེ་མོས་གང་ཟག་གཞན་པ་ཞིག་གི་རྣ་ལམ་དུ་བརྒྱུད་པའམ་བསྒྲགས་ནས་སྤེལ་བ་ཞིག་ཡིན་པ་ལས་ས་འོག་ནས་ཐོན་པ་ཞིག་མ་ཡིན་པར་ཤེས་དགོས། དེའང་འདིའི་སྐབས་སུ་བཤད་པའི་སྙན་བརྒྱུད་དང་ཞང་ཞུང་སྙན་བརྒྱུད་ལས་བཤད་པའི་སྙན་རྒྱུད་གཉིས་བརྒྱུད་ཚུལ་གྱི་ཆ་ནས་ཁྱད་པར་ཆེན་པོ་ཡོད། ཞང་ཞུང་སྙན་བརྒྱུད་ནི་གང་ཟག་ཉི་ཤུ་རྩ་བཞི་པོས་གཅིག་ནས་གཅིག་ལ་སྙན་དུ་བརྒྱུད་ཅིང་བར་ཆད་མ་མྱོང་བ་བླ་བརྒྱུད་རྣམ་ཐར་སོགས་སུ་བལྟས་ན་ཤེས་ཐུབ།  འདིའི་སྐབས་ཀྱི་སྙན་བརྒྱུད་ཅེས་པ་ནི་རིག་འཛིན་གོང་མ་རྣམས་ཀྱིས་བླ་མ་ག་གེ་མོ་ཞིག་གི་སྙན་ལམ་དུ་བརྒྱུད་པར་བཤད་ཅིང་སྙན་དུ་བརྒྱུད་མཁན་ནམ་བཤད་མཁན་གྱི་བླ་མ་དང་བཤད་ས་གཉིས་ཀྱི་བར་དུ་ལོ་བརྒྱ་འམ་སྟོང་ལས་བརྒལ་བའང་ཡོད། བརྒྱུད་པའི་སྐབས་སུ་བརྒྱུད་པ་ལེན་མཁན་ཁོ་རང་མ་གཏོགས་གང་ཟག་གཞན་པའི་གོ་ཐོས་མེད་པ་དེ་ལྟ་བུ་རེད། སྐབས་འདིར་བཤད་པའི་སྙན་བརྒྱུད་ཀྱི་བོན་རྣམས་ནི་རིག་འཛིན་གྱེར་མི་ཉི་འོད་དང་སྤྲུལ་ལུང་བོན་ལྷ་གཉེན་གཉིས་ཀྱིས་སྲོལ་བཏོད་ཅིང་། དེའང་གྱེར་མི་ཉི་འོད་ཀྱིས་སྤྱི་ལོ་༡༡༠༨་ལོ་ལ་ཞི་བ་ཨ་གསལ་སོགས་སྙན་བརྒྱུད་གྱི་བོན་རྣམས་སེ་ཀར་སྟོན་པ་ལ་བརྒྱུད་དེ་དར་བར་བཤད། ཤོད་སྲོལ་ལ་དེ་དུས་གྱེར་མི་ཉི་འོད་དགུང་ལོ་སུམ་བརྒྱ་ཡིན་ཞིང་། ཁྱུང་པོ་གྱེར་ཟླ་མེད་ཀྱི་སྲས་ཡིན་པར་བཤད་པ་དེ་ལྟར་ན་དུས་རབས་བརྒྱད་པ་ཙམ་ལ་སྐུ་འཁྲུངས་དགོས། དེ་བཞིན་ཏུ་སྤྱི་ལོ་༡༠༨༨པར་སྤྲུལ་སྐུ་ལུང་བོན་ལྷ་གཉེན་ལ་ཚེ་དབང་རི་ཁྲོད་པས་སྙན་དུ་བརྒྱུད་པའི་བོན་དྲང་དོན་མུན་སེལ་སྒྲོན་མ།ངེས་དོན་ནམ་མཁའི་འཕྲུལ་མཛོད། ཡེ་ཁྲིད་མཐའ་སེལ་སོགས་ཤིན་ཏུ་མང་། དེ་ནས་དུས་རབས་བཅུ་བཞི་པའི་དཀྱིལ་ཙམ་ལ་སྤྲུལ་སྐུ་བློ་ལྡན་སྙིང་པོ་དང་དམུ་གཤེན་ཉི་མ་རྒྱལ་མཚན་སོགས་བྱོན་པ་ནས་སྙན་བརྒྱུད་ཀྱི་བོན་རྣམས་དར་རྒྱས་བཏང་བ་ཞིག་ཡིན་པ་དེ་ལྟར་ན་སྤྱི་ལོ་དུས་རབས་བཅུ་གཅིག་པའི་སྨད་ཙམ་ནས་སྙན་བརྒྱུད་དར་བའི་དབུ་བརྙེས། མི་མང་པོ་ཞིག་གིས་དཔེ་ཆ་དེ་རྣམས་ཁོ་རང་ཚོས་བརྩམས་པ་མ་རེད་ཅེ་ན་ཁས་ལེན་མི་སྲིད་ནའང་བསམ་བློ་གཏོང་དགོས་པ་ཞིག་ནི། དཔེར་ན་ད་ལྟ་བོད་ཀྱི་ཡུལ་དུ་དང་ར་བླ་མ་ཟེར་བ་ཞིག་ཡོད། ཁོང་ནི་རིག་གནས་ཀྱི་ཆུ་ཚད་ཧ་ཅང་དམན་ཞིང་རང་གི་མིང་ཡང་དག་ཆ་ཅན་ཞིག་འབྲི་ཤེས་ཀྱིན་མེད་ནའང། གནས་ཡིག་དང་བོན་གཞུང་ཆོ་ག་སོགས་ཁོང་གིས་བཏོན། ཡི་གེ་བ་རྣམས་ཀྱིས་ཡི་གེར་ཕབ་ན་དེབ་མང་པོ་གསུང་ཐུབ། སྙན་བརྒྱུད་དེ་དག་འདོན་ཡོང་དུས་བསམ་བློ་གཏོང་མི་དགོས་པ་དཔེར་ན་འདི་ནས་འདོན་མཚམས་བཞག་སྟེ་ཇ་གསོལ་བ་དང་ཡང་མུ་མཐུད་དུ་བཏོན་ནའང་ནོར་བ་དང་གོ་རིམ་འཁྲུག་པ་སོགས་གཏན་ནས་ཡོང་མི་སྲིད་པ་དེ་ལྟ་བུ་རེད། དཔེ་ཆ་གང་ཡིན་ཡང་ཚར་གཅིག་ཉན་པ་དང་བློར་འཛིན་ཐུབ། དེ་བཞིན་ཏུ་ཁྱུང་པོ་བློ་ལྡན་སྙིང་པོའི་སྙན་བརྒྱུད་མདོ་དྲི་མེད་གཟི་བརྗིད་ཀྱི་ནང་དོན་དང་ཐ་སྙད་སོགས་ལ་མཚོན་ནས་བཤད་ན། དེར་ཡོད་པའི་མི་སྣ་སོ་སོའི་མཚན་དང་ཆ་ལུགས་རྣམས་དུས་རབས་མི་འདྲ་བའི་རིག་གནས་མཚོན་ཐུབ་པ་དང་། སྲོག་ཆགས་མི་འདྲ་བ་བཞི་བརྒྱ་ལྷག་གི་མཚན་རྣམས་གསལ་བོ་བྲིས་ཡོད་པས་རང་ཀེར་མི་ཞིག་གིས་རྩོམ་དགོས་ན་ཧ་ཅང་དཀའ་ལས་ཁག་པོ་ཡིན་པ་དང་། སྤྱིར་ཁྱུང་པོ་བློ་ལྡན་སྙིང་པོ་ལ་སྙན་བརྒྱུད་དུ་གྲགས་པའི་བོན་དཔེ་པོ་ཏི་དྲུག་ཅུ་ལྷག་ཡོད་པ་དེ་རྣམས་དགུང་ལོ་བཞི་བཅུ་ཞེ་བརྒྱད་ཚུན་ཆད་ལ་བྲིས་ཟིན་པ་དེ་ལྟ་བུ་རེད།

བཞི། བཀའ་མ་ཞེས་པ་ངོ་སྤྲོད་མདོར་ཙམ་ཞུ་བ།

    བོན་ལུགས་ལ་བཀའ་མ་དང་གཏེར་མ་ཞེས་རིག་གནས་མ་ལག་གཉིས་ཡོད་པ་ལས། བཀའ་མ་ཞེས་པ་ནི་དུས་རབས་བརྒྱད་པའི་སྐབས་སུ་གཏེར་འོག་ཏུ་མ་སོང་བོན་རྣམས་ལ་ཟེར། དེ་ལ་རྒྱ་གར་བོན་སྐོར་དང་ཞང་ཞུང་བོན་སྐོར་ཞེས་མ་ལག་ཆེན་པོ་གཉིས་ཡོད། ཞང་ཞུང་བོན་སྐོར་ལ་རྫོགས་ཆེན་སྐོར་དང་གསང་སྔགས་འདུལ་བ་ཏེ་གསུམ་དུ་དབྱེ། རྫོགས་ཆེན་ལ་སྙན་རྒྱུད་བཀའ་བརྒྱུད་སྐོར་བཞི་དང་ཉམས་བརྒྱུད་རྒྱས་འབྲིང་བསྡུས་གསུམ་སྟེ་མ་ལག་གཉིས་ཡོད། བོན་གྱི་ལོ་རྒྱུས་རྣམས་སུ་སྟོན་པ་གཤེན་རབ་ནས་འཇའ་ལུས་འཕོ་ཆེན་ཉི་ཤུ་རྩ་དྲུག་ལ་རིམ་གྱིས་བརྒྱུད་པའི་ཉམས་མྱོང་རྣམས་དུས་རབས་བདུན་པའི་སྟོད་ཙམ་ལ་ཏ་པི་ཧྲི་ཙ་དང་སྣང་བཞེར་ལོད་པོ་གཉིས་ཀྱིས་ཡུལ་ད་རོག་(ད་ལྟ་ཡིན་གཞིས་རྩེ་འབྲོང་པ་རྫོང་ད་རོག་ཤང་གི་བྱང་ངོས་ན་ཡོད་པ)དུ་ཡིག་སྣ་བཏབ་པར་བཤད། ད་ལྟ་གངས་ཏི་སེའི་བོན་གཞུང་རིག་གཏེར་པོད་ཉེར་བཞི་པ་ཤོག་ལྡེབ་༤༦༩ཡོད།བོན་གྱི་བཀའ་འགྱུར་པོད་༡༣༥པ་སོགས་སུ་བཞུགས།དུས་རབས་བརྒྱད་པའི་སྨད་ཙམ་ནས་བླ་མ་འོར་སྒོམ་ཀུན་འདུས་ཀྱིས་ཉམས་བརྒྱུད་རྒྱས་འབྲིང་བསྡུས་གསུམ་རྣམས་ཡིག་སྣ་བཏབ་པས་ཞང་ཞུང་སྙན་རྒྱུད་ལ་བཀའ་བརྒྱུད་དང་ཉམས་བརྒྱུད་གཉིས་སུ་ཀྱེས་ཏེ་དར།སྔགས་ཕྱོགས་ལ་མེ་རི་སྐོར་རྣམས་ཉམས་བརྒྱུད་དང་བརྒྱུད་ཚུལ་གཅིག་ཡིན། འདུལ་བ་རྒྱུད་དྲུག་ལ་བཀའ་མ་དང་གཏེར་མ་གཉིས་ཡོད། གཏེར་མ་ལའང་ཨ་ཙ་མི་གསུམ་གྱི་གཏེར་ཆོས་དང་གཏེར་སྟོན་གུ་རུ་རྣོན་རྩེའི་གཏེར་མ་སྟེ་གཉིས་ཡོད་པ་ད་ལྟ་བོན་གྱི་བཀའ་འགྱུར་པོད་གཉིས་པར་བཞུགས།
རྒྱ་གར་བོན་སྐོར་ལ་སེམས་ཕྱོགས་དང་སྔགས་ཕྱོགས་སོགས་ཤིན་ཏུ་མང་། སེམས་ཕྱོགས་ལ་རྫོགས་ཆེན་ཡེ་ཁྲིད་མཐའ་སེལ། དྲང་དོན་མུན་སེལ་སྒྲོན་མ། ངེས་དོན་ནམ་མཁའ་འཕྲུལ་མཛོད་སོགས་དང་པོ་དྲན་པ་ནམ་མཁས་ཚེ་དབང་རིག་འཛིན་ལ་བརྒྱུད། དེས་སྤྲུལ་ལུང་བོན་ལྷ་གཉེན་ལ་སྙན་ཏུ་བརྒྱུད་པར་བཤད། རྒྱ་གར་བོན་སྐོར་གྱི་སྔགས་ལུགས་ལ་ཡོང་ལུགས་བོན་སྐོར་ཡང་ཟེར། ནང་དོན་གཙོ་བོ་ཁྲོ་བོ་རོལ་པ་དང་རམ་པ་འབུམ་པ་ལ་སོགས་བོན་སྐོར་རྣམས་ཡིན།  མེ་ཉག་ཁྱུང་གསས་ཀྱིས་ཞང་ཞུང་རྒོད་ཀྱི་ཡུལ་ནས་སྤྱང་གི་སྔོན་པོ་ལ་བཀལ་ཏེ་འོང་ཞིང་མདོ་ཁམས་སྨད་མི་ཉག་གི་ཡུལ་སོགས་སུ་དར།  དེའང་དེ་དུས་ཀྱི་མི་ཉག་ཅེས་པ་ནི་དེང་དུས་ཀྱི་ཀན་སུའུ་ཞིང་ཆེན་གྱི་ཉིན་ཞཱ་ས་ཁུལ་ལ་གོ་བ་ལེན་གྱི་ཡོད་ས་རེད་སྙམ།  དེ་ནས་མེ་ཏྲི་སྟོན་པ་ཤེས་རབ་གྲགས་པ་ནས་ཤར་རྩ་དང་དྲུང་མུ།   སྐྱ་རྩེ།   ཝ་པ་ལ་སོགས་པ་ལ་རིམ་གྱི་བརྒྱུད་ཚུལ་བཤད་པ་དང་།  མེ་ཏྲི་སྟོན་པ་ཤེས་རབ་གྲགས་པ་ཡང་གླང་དར་དང་དུས་མཉམ་ཡིན་པར་མ་ཟད་གླང་དར་མས་སྐུ་བཀྲོངས་ཚུལ་གླེང་གཞི་བསྟན་པའི་འབྱུང་ཁུངས་སོགས་སུ་བཤད་ཡོད། 

གཉིས་པ། རིག་གཞུང་དེ་དག་དང་འབྲེལ་ཏེ་བོན་ལུགས་རྣམ་ཐར་གྱི་བྱུང་འཕེལ་བརྗོད་པ།
གཅིག གཏེར་མ་དང་འབྲེལ་བའི་བོན་ལུགས་རྣམ་ཐར་འགའ་ཞིག

   བོན་ལུགས་ལ་བཀའ་གཏེར་གཉིས་སུ་ཕྱེས་བའི་གཏེར་མའི་ཁོངས་སུ་གཏོགས་པའི་རྣམ་ཐར་ཧ་ཅང་མང་ནའང། འདིར་དཔེ་མཚོན་ཙམ་དུ་མདོ་འདུས་དང་མདོ་གཟེར་གཉིས་ངོ་སྤྲོད་བྱེད་རྩིས་ཡིན། དེའང་བོན་ལུགས་མདོ་འདུས་དང་མདོ་གཟེར་མིག་མདོ་དྲི་མེད་གཟི་བརྗིད་གསུམ་ལ་སྟོན་པ་གཤེན་རབ་ཀྱི་རྣམ་ཐར་རྒྱས་འབྲིང་བསྡུས་གསུམ་དང་མཛད་མདོ་རྒྱས་འབྲིང་བསྡུས་གསུམ་ཡང་ཟེར།
   དེ་ལས་མདོ་འདུས་ལ་མདོ་འདུས་པ་རིན་པོ་ཆེ་རྒྱུད་ཐམས་ཅད་མཁྱེན་པ་བཀའ་ཚད་མ་ཞེས་དང་། གཡུང་དྲུང་ལྷ་ཡི་བོན་མདོ་འདུས་པ་རིན་པོ་ཆེ་རྒྱུད་ཀྱང་ཟེར།། སྟོན་པ་གཤེན་རབ་ཀྱི་རྣམ་ཐར་རྒྱས་འབྲིང་བསྡུས་གསུམ་ལས་རྣམ་ཐར་བསྡུས་མར་གྲགས་ཤིང་།  ཁྱོན་ལེའུ་ཚན་པ་ཉི་ཤུ་རྩ་བཞིར་བགོ་ནས་བྲིས་ཡོད། ཤོག་ལྡེབ་༨༦ཡོད། དུས་རབས་བཅུ་པ་ནས་བོན་གྱི་རིག་གཞུང་ལ་བཀའ་མ་དང་གཏེར་མ་གཉིས་ཕྱེས་སྲོལ་ཡོད་པ་ལས་གཏེར་མའི་གྲས་སུ་རྩི་བ་དང་། མདོ་འདུས་རང་གི་མཇུག་ཏུ་གཉན་ཆེན་ལི་ཤུ་སྟག་རིང་གིས་གཡུང་དྲུང་ལྷའི་སྐད་ལས་བོད་སྐད་དུ་བསྒྱུར་ཞེས་པ་ཙམ་ལས་གཏེར་སྟོན་སུ་ཡིན་གསལ་བོ་གསུངས་མེད།     མཁར་རྨེའུ་བསམ་གཏན་ལགས་ཀྱི་མདའ་དང་འཕང་ལས།  ལྷོ་བལ་གྱི་ཨ་ཙ་རྱ་མི་གསུམ་གྱིས་བསམ་ཡས་ནས་གཏེར་དྲངས་བར་བཤད། དུས་རབས་བཅུ་བཞི་པ་ཙམ་ལ་བྲིས་པའི་བོན་འབྱུང་བསྟན་པའི་རྣམ་བཤད་དར་རྒྱས་གསལ་སྒྲོན་ལས་ཡུལ་དུས་ཀྱི་དབང་གིས། བོན་གྱི་གཏེར་ཆོས་ལ་བྱང་གཏེར། ལྷོ་་གཏེར། དབུས་གཏེར། ཁམས་གཏེར། གཏེར་གསར་བཅས་ལྔར་དབྱེ་བ་ལས་ཨ་ཙ་ར་མི་གསུམ་ནི་བོན་གྱི་གཏེར་སྟོན་ཐོག་མ་དང་བྱང་གཏེར་གྱི་སྲོལ་བཏོད་པ་པོར་ངོས་བཟུང་ཡོད།  མཁན་ཆེན་ཉི་མའི་རང་རྣམ་དང་བསྟན་རྩིས་ནོར་བུའི་ཕྲེང་བ་ལས་ཨ་ཙ་རྱ་མི་གསུམ་གྱིས་གཏེར་བཏོན་པའི་ལོ་སྤྱི་ལོ་༩༡༣པ་ཁ་གསལ་བསྟན་ཡོད་པ་ལས་ཤེས་པར་བྱའོ།།   ད་ལྟ་བོན་གྱི་ཡིག་ཆའི་ཁྲོད་དུའང་མདོ་གཞུང་འདི་ཉིད་པར་བསྐྲུན་ཐེངས་མང་པོ་བྱས་ཡོད་པ། དཔེར་ན་ཨ་ལགས་ཟླ་བ་དང་ཚེ་རིང་ཐར་སོགས་ཀྱིས་ཕྱོགས་བསྒྲིགས་མཛད་ཅིང་པེ་ཅིན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་གངས་ཏི་སེའི་བོན་གཞུང་རིག་མཛོད་དཔེ་ཚོགས་ཀྱི་དེབ་དང་པོའི་ལྡེབ་༡ནས་༨༦པ་དང་། ཁྱུང་པོ་སྟེང་ཆེན་དགོན་པས་བསྒྲིགས་སྦྱོར་མཛད་དེ་ཀན་སུའུ་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་གཡུང་དྲུང་བོན་གྱི་བཀའ་འགྱུར་ཆེན་མོའི་དེབ་ཕྲེང་༢༥པ་དང་། སྣང་མཐའ་བསྟན་འཛིན་ཉི་མས་ཕྱོགས་བསྒྲིགས་མཛད་ཅིང་སི་ཁྲོན་མི་རིགས་དཔེ་སྐྲུན་ཁང་གིས་སྤྱི་ལོ་༢༠༡༦ལོར་བསྐྲུན་པའི་ཞང་བོད་ལོ་རྒྱུས་ཕྱོགས་བསྒྲིགས་སྟོད་ཆའི་ཤོག་ལྷེ་༤༡༩ནས་༤༨༦་པ་སོགས་སུ་བཞུགས། དེ་དག་གི་མ་དཔེ་ཉག་རོང་དབལ་ཁྱུང་དགོན་པར་ཉར་ཚགས་བྱས་པའི་བཀའ་འགྱུར་ལས་བྱུང་བའི་མདོ་འདུས་ཉིད་ཡིན་པར་ཤེས་དགོས། དེ་ལས་གཞན་པའི་མ་དཔེ་ད་ཕན་ལག་ཏུ་རྙེད་སོན་མ་བྱུང་།
    གཞུང་འདི་ཉིད་ལས་གངས་ཏི་སེ་དང་ཉེ་བའི་སར་པག་ཤུ་དང་སི་དྷི་སོགས་ཆུ་བོ་བཞི་ཡོད་པ་དང་། དེའི་ནུབ་བྱང་ཕྱོགས་སུ་གཤེན་ཡུལ་འོལ་མོ་ལུང་རིང་ཡོད། ནུབ་ཕྱོགས་དམུའི་ཡུལ། ཤར་ཕྱོགས་རྒྱ་ཡི་ཡུལ། ལྷོ་ཕྱོགས་མོན་གྱི་ཡུལ། ཤར་ལྷོ་འཇང་གི་ཡུལ། བྱང་ཕྱོགས་ལི་བལ་ཕྲོམ།བྱང་ཤར་ཧོར་གྱི་ཡུལ།གངས་ཅན་བོད་ཡུལ་སོགས་འོལ་མོ་ལུང་རིང་ཉིད་ཡུལ་གང་དུ་ཡོད་པ་དང་།རྒྱ་དང་ལི་བལ། ཕྲོམ་དང་ཧོར་འཇང་སོགས་ཀྱི་ས་ཕྱོགས་རྣམས་བསྟན་ཡོད། འོན་ཀྱང་མདོ་གཟེར་མིག་ལས་དེ་དག་བསྟན་མེད་པས་ཁྱད་པར་ཆེའོ།།
སྤྱིར་སྟོན་པ་གཤེན་རབ་ཀྱི་རྣམ་ཐར་ལ་རྩ་བའི་མཛད་པ་བཅུ་གཉིས་དང་ཡན་ལག་གི་མཛད་པ་ཉེར་བཞི། ཉུང་ལག་གི་མཛད་པ་དྲུག་ཅུ་དང་བརྒྱ་རྩ་སོགས་བཤད་སྲོལ་ཡོད་མོད། དེ་ལས་མཛད་པ་བཅུ་གཉིས་ཞེས་པ་ནི་དུས་རབས་བཅུ་གཉིས་པའི་འགོ་ཙམ་ནས་(དྲང་དོན་མུན་སེལ་སྒྲོན་མ་ལས) གསར་དུ་དར་བའི་བཤད་སྲོལ་ཞིག་རེད། མདོ་འདུས་དང་མདོ་གཟེར་མིག་གཉིས་ལས་མཛད་པ་བཅུ་གཉིས་ཞེས་པའི་བཤད་སྲོལ་དེ་ཆགས་མི་འདུག  སྟོན་པ་གཤེན་རབ་ཀྱིས་ཡུམ་ཧོས་བཟའ་དང་དཔོ་བཟའ་རྒྱ་བཟའ་ཀོང་བཟའ་སགས་ཡུམ་བརྒྱད་ཁབ་ཏུ་བཞེས་པ་ལས་སྲས་གཏོ་བུ་དང་དཔྱད་བུ། ལུང་འདྲེན་དང་རྒྱུད་འདྲེན་རྐོང་ཚ་དབང་ལྡན་སོག་བརྒྱད་འཁྲུངས་ཚུལ་ཙམ་ལས་ཁོ་རང་ནམ་འཁྲུངས་ཀྱི་ལོ་ཚིགས་དང་དུས་རབས་ག་འདྲ་ཞིག་གི་མི་ཡིན་པ་གསལ་བོ་བཀོད་མེད།། མདོ་འདུས་ལེའུ་གཉིས་པ་དང་གསུམ་པའི་ནང་དུ་ཕྱི་སྣོད་ཆགས་ཚུལ་དང་ནང་བཅུད་གྲུབ་ཚུལ། ཁམས་གསུམ་རིགས་དྲུག་ཉོན་མོང་དུག་ལྔ་སོགས་ཀྱི་རྣམ་བཞག་རྣམས་གསལ་བོ་བསྟན་ཡོད་པ་རྣམས་དུས་རབས་༡༡པའི་ཡིག་ཆ་སྲིད་པའི་མཛོད་ཕུག་གི་ ལེའུ་དང་པོ་དང་གཉིས་པའི་དགོངས་དོན་དང་ཕལ་ཆེར་གཅིག ལེའུ་བཞི་པ་དང་ལྔ་པ་དྲུག་པ་སོགས་སུ་འདས་པའི་སྟོན་བདུན་དང་དུས་གསུམ་སྟོན་པའི་རྣམ་བཞག་རྣམས་དུས་རབས་བཅུ་གཅིག་པའི་གཏེར་ཡིག་རྩ་རྒྱུད་ཉི་ཟེར་སྒྲོན་མེའི་ ནང་དོན་དང་ཕལ་ཆེར་འདྲ་བ་དང་།ལྷག་པར་དུ་ལེའུ་བཅུ་དྲུག་པའི་ནང་དུ་སྲིད་པའི་མཛོད་ཕུགས་ནང་དོན་ཆ་ཚང་བསྟན་ཡོད་པ་སོགས། མདོར་ན་ལེའུ་ཉི་ཤུ་རྩ་བཞིའི་ནང་དུ་སྟོན་པ་གཤེན་རབ་ཀྱི་ཡན་ལག་གི་མཛད་པ་ཉེར་བཞིའི་དོན་རྣམས་བསྟན་ཡོད།
   མདོ་གཟེར་མིག་ནི་སྟོན་པ་གཤེན་རབ་ཀྱི་རྣམ་ཐར་འབྲིང་པོར་གྲགས་ཤིང་།ཁ་བྱང་ཡོངས་ལ་དུས་གསུམ་གཤེན་རབ་བྱུང་ཁུངས་དང་མཛད་པའི་རྒྱུད་འདུས་པ་རིན་པོ་ཆེ་གཟེར་མིག་གི་མདོ་ཞེས་བྱ་བའི་གླེགས་བམ་བཞུགས་སོ།།ཞེས་དང་འདུས་པ་རིན་པོ་ཆེའི་རྒྱུད་གཟེར་མིག་གི་ལེའུ་བཅོ་བརྒྱད་པ་ཞེས་ཀྱང་བྱ།བོན་ལ་སྒོ་བཞི་མཛོད་དང་ལྔ་ཡོད་པ་ལས་གཙང་མ་མཐོ་ཐོག་སྤྱི་རྒྱུག་མཛོད་ཀྱི་ཁོངས་སུ་འདུ་བར་བཤད།མཛོད་ལའང་དུས་གསུམ་གཤེན་རབ་བྱུང་ཁུངས་ཀྱི་མདོ་དང་།ཁམས་གསུམ་སེམས་ཅན་སྐྱེ་འཆིའི་མདོ། སྣོད་རྟེན་འབྱུང་བ་ཆགས་འཇིག་གི་མདོ།བླ་མེད་གོ་འཕང་སྒྲུབ་ཐབས་ཀྱི་མདོ་དང་བཞིར་དབྱེ་བ་ལས་དུས་གསུམ་གཤེན་རབ་བྱུང་ཁུངས་ཀྱི་མདོར་གཏོགས། དེ་ལས་སྔར་འདས་པའི་སྟོན་པ་དང་མ་འོང་པའི་སྟོན་པ་སོགས་ཟུར་ཙམ་བརྗོད་ཅིང་། ད་ལྟའི་སྟོན་པ་གཤེན་རབ་མི་བོའི་རྣམ་ཐར་ཞིབ་རྒྱས་ལེ་ཚན་བཅོ་བརྒྱད་དུ་དབྱེ་ནས་བཤད་པའི་གཞུང་ཞིག་ཏུ་ངོས་འཛིན་གནང་གི་ཡོད། དེའང་བོན་འདི་དང་པོ་གཤེན་རབ་མི་བོས་གསུངས། དེ་ནས་མི་ཆོ་ལྡེམ་དྲུག་གི་སློབ་མ་སྟག་གཟིག་གི་མཁས་པ་དམུ་ཙ་ཏྲ་ཧེ། ཞང་ཞུང་གི་མཁས་པ་ཁྲི་ཐོག་སྤར་ཙ། གྷུ་ཧུ་ལུ་སྤར་ལེགས། རྒྱ་གར་གྱི་མཁས་པ་ལྷ་བདག་སྔགས་གྲོལ། རྒྱ་ནག་གི་མཁས་པ་ལེགས་ཏང་རྨང་པོ། ཕྲོམ་གྱི་མཁས་པ་གསེར་ཐོག་ལྕེ་འབྱམས།བོད་ཀྱི་མཁས་པ་ཤ་རུ་དབུ་ཆེན།མེ་ཉག་གི་མཁས་པ་ལྕེ་ཙ་མཁར་བུ།སུམ་པའི་མཁས་པ་མུ་སྤུངས་གསལ་ཏང་སོགས་ཀྱིས་སོ་སོའི་སྐད་དུ་བསྒྱུར་ཏེ་དར་སྤེལ་བཏང་།ཁྲི་སྲོང་སྐབས་སུ་བོད་དུ་བོན་བསྟན་དར་ནུབ་ནང་དུ་གཏེར་དུ་སྦས། དུས་རབས་བཅུ་པའི་དཀྱིལ་ཙམ་ནས་དྲང་རྗེ་བཙུན་པ་གསེར་མིག་གིས་དུར་ཁྲོད་ཞིག་གི་ནང་ནས་རྙེད་པར་བཤད།མར་བ་སྟག་ལ་ལ་དངོས་གྲུབ་དུ་བབས། ཞེས་སོ།།
    དེའང་བསྟན་པའི་རྣམ་བཤད་དར་རྒྱས་གསལ་སྒྲོན་ལས།   དང་པོ་ཀུན་ཏུ་བཟང་པོ་ཟེར་བའི་བླ་མ་ཞིག་གིས་རྒྱལ་པོ་ར་ཛཱ་སྤུངས་པ་ལ་བརྒྱུད།   དེར་ཞང་ཞུང་གི་བོན་པོ་ལི་མུར་གཙུག་ཕུད་ཀྱིས་ཞུས།   དུས་རབས་བརྒྱད་པའི་སྐབས་སུ་ལོ་ཆེན་བཻ་རོ་ཙ་ནས་ཞང་སྐད་ནས་བོད་སྐད་དུ་བསྒྱུར་ཏེ་ཆོས་རྒྱལ་ཁྲི་སྲོང་ལ་ཕུལ།   རྗེས་སུ་བན་བོན་ཕྱོགས་རིས་དང་ཆོས་སྲིད་འཐབ་རྩོད་ནང་དུ་བཻ་རོ་ཙ་ན་ཚ་བ་རོང་དུ་སྤྱུགས།   རྒྱལ་པོས་ཀྱང་བོན་དཔེ་འདི་རྣམས་དཀོར་མཛོད་དུ་བཞག་པ་ལས་རྒྱ་ཆེར་མ་སྤྱོད།   ཆོས་རྒྱལ་ཁྲི་སྲོང་འདའ་ཁར་སྲས་མུ་ཏིག་བཙན་པོ་ལ་གཏད།   དེས་མངའ་བདག་རལ་བ་ཅན་ལ་གཏད།   དེས་དར་མ་འུ་དུམ་བཙན་པོའམ་ལྷ་སྲས་དར་མའམ་གླང་དར་མ་ལ་གཏད་པས་བོད་བཙན་པོ་རིམ་བྱུང་གི་ཐུགས་དམ་གྱི་བོན་སྒོ་རུ་གྱུར།   དར་མའི་སྲས་ཆེ་ཆུང་རྣམས་སྲིད་ལ་མ་འཆམ་ནས་ནང་འཁྲུགས་བྱུང་བ་ལ་དཔེ་ཆ་འདི་རྣམས་སྔགས་མཁན་དྲང་ང་དཔལ་གྱི་ཡོན་ཏན་གྱི་ཐོབ།   བོན་གྱི་ལོ་རྒྱུས་རྣམས་སུ་དྲང་ང་དཔལ་་གྱི་ཡོན་ཏན་ཉིད་གླང་དར་མའི་སྐུ་གཤེན་ཡིན་ཚུལ་བཤད། དེ་ནས་བཟུང་དྲང་ང་མའི་ལོ་རྒྱུས་ཞེས་ཡོངས་སུ་གྲགས།   དྲང་ང་དཔལ་གྱི་ཡོན་ཏན་གྱིས་སྲས་དྲང་ང་དཔལ་གྱི་གྲགས་པ་ལ་གཏད།   དེས་སྲས་རིན་ཆེན་དཔལ་ལ་གཏད།   དེ་དང་བཙུན་མོ་ཆེ་བར་སྲས་མེད་ཅིང་བཙུན་མོ་ཆུང་བ་ཞིག་བཞེས་པས་བུ་དྲང་ང་མདོ་ལ་འཁྲུངས།   དེ་དགུང་ལོ་བཞི་བཞེས་པ་ན་ཡབ་སྐུ་སྙུང་།   ཡབ་འདའ་ཁར་དྲང་རྗེ་བཙུན་པ་གསེར་མིག་མདུན་དུ་བོས་ཏེ་ངའི་བུ་འདི་ལོ་བཞི་ཡིན།   དཔེ་ཆ་འདི་རྣམས་ངེད་ཚང་གི་ཕ་མྱེས་ནས་བརྒྱུད་པའི་ཕ་ནོར་ཡིན་པས།   བུ་ལོ་བཅུ་གསུམ་མ་ལོན་པར་ཁྱེད་ཀྱིས་དཔེ་ཆ་འདི་རྣམས་གཏེར་ཏུ་སྦོས།   ལོ་བཅུ་གསུམ་ལོན་པ་དང་གཏེར་ནས་ཐོན་ལ་ཁྱོད་རང་གཉིས་ཀས་བེད་སྤྱོད་ཀྱིས་གསུངས་ནས་བཀའ་བསྒོས་བྱས།   དེའི་གོང་དུ་སུ་ལའང་མ་བསྟན་ཞེས་མནའ་བསྒགས་བཙན་པོ་བྱས།   དེར་དྲང་རྗེ་ལགས་ཀྱིས་དྲང་ང་མའི་བུ་དེ་ཁྲིད་ནས་དྲང་ང་རིན་ཆེན་དཔལ་གྱི་ཁ་ཆེམས་ལྟར་བསམ་ཡས་ལྷ་ཁང་ནང་གི་གྱང་ངོས་སུ་གཏེར་དུ་སྦས།   ལོ་བཅུ་གསུམ་ལོན་པ་དང་གཏེར་ནས་བཏོན།   མདོ་གཟེར་མིག་ནི་དེའི་གྲས་སུ་བཞུགས་པའི་དཔེ་ཆ་རྩ་ཆེན་ཞིག་ཡིན།  
   དྲང་རྗེ་འཁྲུངས་ལོ་གསལ་བོར་བཀོད་མེད་ཀྱང་ཁོང་གི་སློབ་མ་མར་བ་སྟག་ལ་ཡིན་པ་དང་།  དེའི་སློབ་མ་གཡུང་བཙུན་ཇོ་གདུང་ཡིན།  དེའི་སློབ་མ་བྲུ་ནམ་མཁའ་གཡུང་དྲུང་ཡིན་པར་ལེགས་བཤད་མཛོད་ལས་བཤད་པ་དེ་ལྟར་ན་བྲུ་ནམ་མཁའ་གཡུང་དྲུང་སྤྱི་ལོ་༩༩༤པར་སྐུ་འཁྲུངས་བས་དྲང་རྗེ་བཙུན་པའང་ཕལ་ཆེར་དུས་རབས་བཅུ་པའི་སྟོད་དམ་དཀྱིལ་ཙམ་གྱི་མི་ཞིག་ཡིན་པར་སྨོས་མ་དགོས་ཏེ།   དཔེར་ན་དྲང་ང་དཔལ་གྱི་དབང་ཕྱུག་རྒྱལ་པོ་གླང་དར་གྱི་སྐུ་གཤེན་ཡིན་པས་ཁོང་དང་དུས་མཉམ་ཡིན་པ་སྨོས་མ་དགོས།  རྒྱལ་པོ་གླང་དར་དུས་རབས་དགུ་པའི་ལོ་རབས་བཞི་བཅུ་པར་སྐུ་བཀྲོངས་ཚུལ་ཏུན་ཧོང་སོགས་ལས་གསལ།   དྲང་ངེས་སྲས་དྲང་ང་དཔལ་གྱི་གྲགས་པ།   དེའི་སྲས་དྲང་ང་རིན་ཆེན་དཔལ་ཡིན་པས།   ཁོང་ནི་དྲང་རྗེ་བཙུན་པ་དང་དུས་རབས་གཅིག་གི་མི་ཡིན་པ་གོང་དུ་ཞུས་པ་ལས་ཤེས་པར་བྱའོ།  །  
   དེ་ནས་དྲང་ང་མའི་བུ་དགུང་ལོ་བཅུ་གསུམ་ལ་སླེབས་པ་དང་དྲང་རྗེ་དང་མཉམ་དུ་སྔར་སྦས་པའི་བོན་དཔེ་རྣམས་ཚུར་བླངས།   དྲང་རྗེ་བཙུན་པས་ན་རེ་ང་ནི་ལོ་རྒྱུས་ལ་དགའ་བོ་ཡོད་པས་མདོ་གཟེར་མིག་གི་ཤོག་སེར་མ་གཏོགས་གཞན་ཅི་ཡང་མི་དགོས་ཞེས་མདོ་གཟེར་མིག་ཉིད་བླངས་སོང་།   ད་ལྟའི་མཁས་པ་མང་པོ་ཞིག་གིས་མདོ་གཟེར་མིག་ཉིད་དྲང་རྗེ་བཙུན་པས་གཏེར་ནས་དྲངས་ཞེས་བཤད་ཚུལ་རྣམས་ཀྱང་དེ་འདྲ་བ་ལས་བྱུང་བར་ངེས།   དྲང་རྗེ་བཙུན་པས་མར་བ་སྟག་ལ་ཉིད་རང་ལ་བཀའ་དྲིན་ཆེ་པས་དེར་འབུལ་དགོས་ཞེས་མར་བ་སྟག་ལ་བོས་ཏེ། ཁྱོད་རང་དཔེ་བཅད་ཅིང་ཞི་དག་ལེགས་པོ་བྱོས།   མ་དཔེ་མི་སྟེར་ཞེས་ཤོག་སེར་རྣམས་དྲང་སྟོན་རང་གིས་ཁྱེར་ནས་སོང་བར་བཤད་པ་སོགས་སུ་གཞིགས་ན་སྐབས་དེར་བོད་མི་རྣམས་ཀྱིས་ཡི་གེ་ལ་རྩིས་མཐོང་ཧ་ཅང་ཆེན་པོ་བྱེད་དུ་ཡོད་པའང་ཤེས་ཐུབ།   
    མར་བ་སྟག་ལ་ནས་བརྒྱུད་ཁ་གཉིས་ཆད།   གཅིག་ནི་མར་བ་སྟག་ལས་རང་གི་སློབ་མ་བྱ་འོང་རིན་ཆེན་ལ་བསྟན་ཏེ་དཔེ་བཅད།   དེས་རྨེའུ་ལྷ་རི་གཉེན་པོ་ལ་བརྒྱུད་དེ་དར། རྨེའུ་ལྷ་རི་གཉེན་པོ་ནི་སྤྱི་ལོ་༡༠༢༤ལ་སྐུ་འཁྲུངས་པས་མར་བའང་དུས་རབས་བཅུ་པའི་དཀྱིལ་ཙམ་ལ་སྐུ་འཁྲུངས་བར་ཤེས་ཐུབ།  ཡང་ཤོད་ཚུལ་གཅིག་ལ་རྨེའུ་ལྷ་རི་གཉེན་པོའི་སྲས་གསས་མཁར་བླ་མ་ཡིན།   དེའི་སྲས་ཤཱག་ཀྱ་བརྟན་ཡིན།   དེའི་སྲས་དགོངས་མཛོད་རི་ཁྲོད་ཡིན།   དགོངས་མཛོད་རི་ཁྲོད་ནི་སྤྱི་ལོ་༡༠༣༨པ་ལ་སྐུ་འཁྲུངས་བར་བཤད་པས་རྨེའུ་ལྷ་རི་དེ་ལས་ཀྱང་སྔ་དགོས་པས་མཁས་པ་རྣམས་ཀྱིས་དཔྱད་པར་ཞུ།   བརྒྱུད་ཁ་གཉིས་པ་མར་བ་སྟག་ལ་ལ་གཡུང་བཙུན་ཇོ་གདུང་གིས་ཞུས།   དེར་བྲུ་བདག་ཉིད་ཆེན་པོས་ཞུས།   བྲུ་བདག་ཉིད་ལ་དགོངས་མཛོད་རི་ཁྲོད་སོགས་ཀྱིས་ཞུས་ཏེ་དར།   བྲུ་བདག་ཉིད་ནི་སྤྱི་ལོ་༩༩༤པར་སྐུ་འཁྲུངས།  མདོར་ན་དྲང་རྗེ་བཙུན་པ་གསེར་མིག་ནས་བརྒྱུད་ཁ་གཉིས་ཆད་ཅིང་།  བྲུ་ནམ་མཁའ་གཡུང་དྲུང་དང་རྨེའུ་ལྷ་རི་གཉེན་པོ་རྣམ་གཉིས་ནས་འཕེལ་རྒྱས་རྩེར་སོན་པ་ཤེས་ཐུབ།  
   བོད་ཀྱི་མཁས་པ་ལ་ལས་མདོ་གཟེར་མིག་ཉིད་དྲང་རྗེ་བཙུན་པས་མདོ་འདུས་དང་ཏུན་ཧོང་ཡིག་རྙིང་སོགས་ལ་དཔེ་བཅད་ནས་བརྩམས་པར་བཤད།   གང་ལྟར་འདིའི་ནང་དུ་གནའ་བོའི་བརྡ་རྙིང་མང་བ་དང་ཚིག་གི་སྡེབ་སྦྱོར་མི་མཛེས་པ། འདོན་དགོས་ན་ཁར་མི་ཡོང་བར་མ་ཟད་དོན་ཡང་གོ་དཀའ་བ་སོགས་ལ་བརྟགས་ན་དུས་རབས་དགུ་པའི་ཡིག་ཆ་ཞིག་ཡིན་པ་བསྟན་ཐུབ།   དཔེར་ན་དུས་རབས་བཅུ་གཅིག་པའི་དཀྱིལ་ཙམ་ལ་རྨེའུ་མཁས་པ་དཔལ་ཆེན་ལགས་ཀྱིས་བརྩམས་པའི་ཁམས་སྡུད་ཚིགས་སུ་བཅད་པའི་འགྲེལ་བ་དང་ཕར་ཕྱིན་མངོན་རྟོགས་རྒྱན་སོགས་སུ་བརྟགས་ན་ཚིག་གི་བརྗོད་བདེ་བ།   དོན་གོ་སླ་བ།   སྡེབ་སྦྱོར་ཡངས་པ།   ཚིག་གི་སྙན་ཆ་སོགས་དེང་དུས་ཀྱི་བརྩམས་ཆོས་དང་ཁྱད་མེད་པ་དེ་ལྟ་བུ་རེད།   མདོར་ན་མདོ་གཟེར་མིག་ལ་བྲིས་མ་དང་ཤིང་པར་མ་སོགས་མ་དཔེ་མི་འདྲ་བ་དུ་མ་ད་ལྟ་དམངས་ཁྲོད་དུ་སོང་ན་མཐོང་དུ་ཡོད་ཅིང་། དེ་ལས་ལོ་རྒྱུས་དང་ཡིག་རྙིང་གི་རིན་ཐང་བླ་ན་ལྷག་པ་ནི་འགྱར་མིན་ནས་ཐོན་པའི་མདོ་གཟེར་མིག་དེ་ཡིན། དཔེ་རྙིང་དེར་ཚིག་གི་སྡེབ་སྦྱོར་མི་བདེ་བ་དང་ཚིགས་བཅད་རིང་ཐུང་མ་ངེས་བ། བརྡ་རྙིང་ཧ་ཅང་མང་ཞིང་།བརྡ་སྦྱོར་དང་རྩོམ་གཤིས་སོགས་ཏུན་ཧོང་ཡིག་རྙིང་དང་ཆེས་འདྲ་བས་དུས་རབས་དགུ་པའི་ཡི་གེ་ཡིན་པ་ཤེས་ཐུབ།
དཔེར་ན་མདོ་འདུས་དང་མདོ་གཟེར་མིག་གཉིས་ལས་སྟོན་པ་གཤེན་རབ་སྐུ་འཁྲུངས་དུས་མི་བོན་དང་ལྷ་བོན། བདུད་བོན་དང་བཙན་བོན། དམུ་བོན་དང་མཚམས་བོན། སྲིན་པོའི་བོན་དང་གནོད་སྦྱིན་བོན། ཉི་བོན་དང་ཟླ་བོན། སྐར་བོན་དང་སྤྲིན་བོན་འཇའ་བོན་སོགས་བོན་པོ་སུམ་ཅུ་སོ་གསུམ་གདན་འདྲེན་ཞུས་ཤིང་ཆོས་སྲིད་ཀྱི་བྱ་བ་མཛད་ཡོད་པ་དང་།  བདུད་བཏུལ་བའི་སྐབས་སུ་དམུ་རིགས་རྒྱལ་ཁབ་དང་བོད་ཆུ་བོ་བཞི་འདུས། དྭགས་རྐོང་ཉང་གསུམ། ཞང་ཞུང་དང་ཕྲོམ་ཁ་ཆེ་སོགས་ཀྱི་ཐ་སྙད་དང་ཡུལ་གྲུ་རྣམས་བསྟན་ཡོད། ལྷག་པར་དུ་བསྟན་པ་རྗེས་བཞག་སྐབས་མདོ་གཡུང་དྲུང་ཀློང་རྒྱས་དང་རྣམ་རྒྱལ་གཟུངས་ཆེན་གྱི་ནང་དོན་ཕལ་ཆེ་བར་བསྟན་པ་སོགས་སུ་གཞིག་ན། རྣམ་རྒྱལ་གཟུངས་ཆེན་དང་མདོ་གཡུང་དྲུང་ཀློང་རྒྱས། དྲི་མེད་གཟི་བཇིད་སོགས་ཀྱི་མ་གཞི་མདོ་གཟེར་མིག་ཉིད་ཡིན་པ་ཤེས་ཐུབ། གཞུང་འདིར་སྟོན་པའི་མཛད་པ་ལ་སྐྱེས་བ་བཞེས་པ། བསྟན་པ་སྤེལ་བ།འགྲོ་བ་འདུལ་བ། ཁབ་བཞེས་པ། སྲས་སྤྲུལ་བ། ལྷ་གཤེན་བརྒྱ་ལ་ཕྱག་འཚལ་བའི་ལེའུ། ལྷ་མོ་སུམ་བརྒྱ་ལ་ཕྱག་འཚལ་བའི་ལེའུ། བདུད་བཏུལ་བ། བསྟན་པ་རྣམ་གསུམ་རྗེས་སུ་བཞག་པ།  སྒོ་བཞི་མཛོད་ལྔ་བསྟན་པའི་སྐོར། མདོ་འཕྲིན་ལས་བཅོ་བརྒྱད་བསྟན་པ། ཁྱིམ་སྤང་པ། འཁོར་སྤང་པ་སོགས་ཧ་ཅང་ཞིབ་རྒྱས་བསྟན་ཡོད། འོན་ཀྱང་ཐེག་པ་རིམ་དགུའི་སྐོར་རྣམས་ཐ་སྙད་ཙམ་ལས་གསལ་རྒྱས་བསྟན་མེད། 

གཉིས། སྙན་རྒྱུད་དང་འབྲེལ་བའི་རྣམ་ཐར་ངོ་སྤྲོད།  

    སྙན་རྒྱུད་དང་འབྲེལ་བའི་རྣམ་ཐར་ལ་ཧ་ཅང་མང་ནའང་འདིར་དཔེར་མཚོན་ཙམ་ལ་དྲང་དོན་མུན་སེལ་སྒྲོན་མ་དང་ཡེ་ཁྲིད་མཐའ་སེལ་ལས་བྱུང་བའི་ལོ་རྒྱུས་རྣམ་ཐར་གསུམ། མདོ་དྲི་མེད་གཟི་བརྗིད་བཅས་ངོ་སྤྲོད་བྱེད་རྩིས་ཡིན། དྲང་དོན་མུན་སེལ་སྒྲོན་མ་ནི་ལུང་བོན་ལྷ་གཉེན་གྱི་སྙན་རྒྱུད་ཡིན་ཞིང་། བླ་ཆེན་དྲན་པ་ནམ་མཁས་བཛད་པར་གྲགས། དྲན་པས་རང་གི་སྲས་ཚེ་དབང་རིག་འཛིན་ནམ་ཚེ་དབང་རི་ཁྲོད་པ་ལ་བརྒྱུད། དེས་སྤྲུལ་སྐུ་ལུང་བོན་ལྷ་གཉེན་ལ་སྙན་ཏུ་བརྒྱུད་ཅེས་པ་ལྟར་ན་རྣམ་ཐར་འདིའང་སྙན་རྒྱུད་ཀྱི་ཁོངས་སུ་གཏོགས་དགོས། བོན་གྱི་ལོ་རྒྱུས་བསྟན་རྩིས་ནོར་བུའི་ཕྲེང་བ་ལས་ཚེ་དབང་རིག་འཛིན་སྤྱི་ལོ་སྔོན་གྱི་ལོ་༨༨༨་སྐུ་འཁྲུངས།  ལུང་བོན་ལྷ་གཉེན་སྤྱི་ལོ་༡༠༨༨ལོ་ལ་སྐུ་འཁྲུངས་བར་བཤད་པས་དུས་རབས་གཅིག་གི་མི་མ་ཡིན་པར་ཤིན་ཏུ་གསལ།  
    སྤྱིར་དྲང་དོན་མུན་སེལ་སྒྲོན་མ་ལ་ལམ་རིམ་སྐོར་དང་རིགས་དྲུག་རང་སྦྱང་གི་སྐོར་རྣམ་ཐར་སྐོར་སོགས་དུ་མ་ཡོད།རྣམ་ཐར་ནི་སྟོན་པ་གཤེན་རབ་ཀྱི་རྣམ་ཐར་ཡིན། མཚན་ཡོངས་ལ་དྲང་དོན་མུན་སེལ་སྒྲོན་མ་ལས་གཤེན་རབ་ཀྱི་མཛད་པ་མཐར་ཕྱུང་གི་གཟེར་བུ་དང་བོན་གྱི་ཆེ་བ་བརྗོད་པ་གཤེན་རབ་ཀྱི་མཛད་པ་མཐར་ཕྱུང་གི་གཟེར་བུའང་ཟེར། དེའང་གཟེར་བུ་ཞེས་པ་གནའ་བོའི་བརྡ་རྙིང་ཞིག་སྟེ། གནད་བསྡུས་དང་གནད་འགག གནས་དོན་དང་གནད་རྩ་སོགས་ལ་གོ། སྐྱེས་བཞེས་བསྟན་སྤེལ་འགྲོ་གཉིས་འདུལ། ཁབ་བཞེས་སྲས་སྤྲུལ་བདུད་རྣམས་བཏུལ་ནས་བསྟན་པ་བཞག  །ཁྱིམ་སྤང་འཁོར་སྤང་འདའ་ཚུལ་བསྟན།། ཞེས་མཛད་པ་བཅུ་གཉིས་སྐོར་རྣམས་གཞུང་འདི་ནང་དུ་གསལ། ད་ལྟ་གངས་ཏི་སེའི་བོན་གཞུང་རིག་གཏེར་དེབ་བདུན་པ་ཤོག་ལྷེ་༡༠༡ནས་༡༡༥བར་ཡོད། བསྟན་རྩིས་ནོར་ཕྲེང་སོགས་ལས་ལུང་བོན་ལྷ་གཉེན་སྤྱི་ལོ་༡༠༨༨ལ་སྐུ་འཁྲུངས་ཚུལ་བཤད་པ་དང་། ཁོང་གི་དངོས་སློབ་ལུང་སྒོམ་འཁོར་ལོས་བརྩམས་པའི་ལུང་བོན་གྱི་རྣམ་ཐར་ལས། ཁོང་དགུང་ལོ་ཉེར་གཅིག་ཡན་ལ་རྫོགས་ཆེན་བསྒྲགས་པ་སྐོར་གསུམ་སློབ་སྦྱང་མཛད། དགུང་ལོ་སོ་ལྔ་པ་ལ་ཚེ་དབང་རི་ཁྲོད་པ་དང་མཇལ། ཞེས་པ་ལྟར་ན་སྤྱི་ལོ་དུས་རབས་༡༢་པའི་ལོ་རབས་ཉི་ཤུ་ཡས་མས་སུ་སྙན་རྒྱུད་འདི་དར་བར་གསལ།
    སྔོན་བྱོན་བླ་མ་གསུམ་གྱི་ལོ་རྒྱུས་ཞེས་པ་ནི་བླ་ཆེན་དྲན་པ་ནམ་མཁའ་དང་རྗེ་རི་ཁྲོད་པའམ་དྲན་པ་ནམ་མཁའི་སྲས་ཚེ་རིག་དབང་རིག་འཛིན། སྙན་རྒྱུད་འཛིན་མཁན་གྱི་བླ་མ་ལུང་བོན་ལྷ་གཉེན་དང་གསུམ་གྱི་རྣམ་ཐར་ཡིན། མཇུག་བྱང་དུ་ལུང་སྒོམ་འཁོར་ལོ་རྒྱལ་པོས་བརྩམས་ཞེས་བྲིས་འདུག ལུང་སྒོམ་འཁོར་ལོ་ནི་ལུང་བོན་ལྷ་གཉེན་གྱི་དངོས་སློབ་ཡིན་པར་རྣམ་ཐར་མཇུག་ཏུ་གསལ།    དེའང་མཁན་ཉི་མའི་རང་རྣམ་ལས།སྤྲུལ་ལུང་བོན་ལྷ་གཉེན་སྤྱི་ལོ་༡༠༨༨ལོར་སྐུ་འཁྲུངས་ཚུལ་བཤད་ཅིང་།  ལུང་སྒོམ་འཁོར་ལོའང་དུས་རབས་བཅུ་གཉིས་པའི་སྟོད་ཙམ་ལ་སྐུ་འཁྲུངས་དགོས། གཞུང་འདི་རྩོམ་དུས་ཀྱང་ཕལ་ཆེར་ཚོད་དཔག་ཐུབ་པའོ།།གཞུང་དེ་དག་གི་ནང་དུ་དྲང་དོན་མུན་སེལ་སྒྲོན་མེ། ངེས་དོན་ནམ་མཁའི་འཕྲུལ་མཛོད། རྫོགས་ཆེན་ཡེ་ཁྲིད་མཐའ་སེལ་སོགས་དང་པོ་ཅི་ལྟར་དར་བ། བར་དུ་ཅི་ལྟར་བརྒྱུད་པ། ཐ་མ་ལུང་བོན་ལྷ་གཉེན་ལ་ཚེ་དབང་རི་ཁྲོད་པས་ཅི་ལྟར་སྙན་དུ་བརྒྱུད་ཚུལ་སོགས་ཞིབ་རྒྱས་བསྟན་ཡོད།ད་ལྟ་བོན་གྱི་བཀའ་འགྱུར་པོད་༡༣༨པ་རྒྱུད་ཀྱི་རྒྱལ་པོ་ཡེ་ཁྲིད་མཐའ་སེལ་ཤོག་ལྷེ་༦༧༥ནས་༦༩༢བར་བཞུགས། ཁྱོན་ཤོག་ངོས་༡༧ཡོད། ཡིག་འབྲུ་ཁྲི་གཅིག་ལྷག་འདུག  
   དྲི་མེད་གཟི་བརྗིད་ལ་མདོ་དྲི་མེད་གཟི་བརྗིད། དྲི་མ་མེད་པ་གཟི་བརྗིད་རབ་ཏུ་འབར་བའི་མདོ། མཛད་མདོ་རྒྱས་པ་སོགས་མཚན་གྱི་རྣམ་གྲངས་དུ་མ་ཡོད།སྟོན་པ་གཤེན་རབ་ཀྱི་རྣམ་ཐར་རྒྱས་འབྲིང་བསྡུས་གསུམ་ཡོད་པ་ལས་རྣམ་ཐར་རྒྱས་པ་དེ་ཡིན།ཁྱུང་པོ་བློ་ལྡན་སྙིང་པོ་ལ་སྟོང་ཆེན་དམུ་ཙ་གྱེར་མེད་ཀྱིས་དུས་རབས་༡༤པ་ཙམ་ལ་སྙན་ཏུ་བརྒྱུད། ཁྱོན་ལེའུ་དྲུག་ཅུ་ཡོད། པོ་ཏི་བཅུ་གཉིས་དྲི་མེད་རྩ་བའི་མདོ་དང་བཅུ་གསུམ་ཡོད།སྤྱིར་བློ་ལྡན་སྙིང་པོ་ལ་སྙན་རྒྱུད་པོ་ཏི་དྲུག་ཅུ་ཙམ་ཡོད། དེ་ལས་མི་ནུབ་མཚན་མདོ་པོད་བརྒྱད། དྲི་མེད་གཟི་བརྗིད་པོད་བཅུ་གཉིས། པད་འབྱུང་བསང་བརྔན། དམ་ཅན་རྒྱ་མཚོ་མཁའ་ལ་རང་བཞིན་གྱི་མངའ་གསོལ། དབྱིངས་ནས་ཐུགས་དམ་གྱི་རྒྱུད་སྐུལ། ཀློང་འདིར་དྲག་པོ་ལས་བཅོལ་སོགས་ཤིན་ཏུ་མང་།དེ་ལས་དྲི་མེད་གཟི་བརྗིད་ནང་དུ་རྒྱལ་གྱི་ལོ་མཛད་བརྒྱད་ཅུ་ཞེས་ལོ་རེ་ལ་མཛད་པ་ཕྱེས་ནས་སྟོན་པ་གཤེན་རབ་ཀྱི་རྣམ་མཛད་པ་ཐར་ཆ་ཚང་བསྟན་པ་དང་། བོན་ལུགས་ཀུན་རིག སྨོན་ལམ་མཐའ་ཡས། སྨན་ལྷ། དགེ་སྤྱོད། གཡུང་དྲུང་རྣམ་འཇོམ། རྣམ་དག་ལ་སོགས་ཆོ་ཀ་བཅུ་གཉིས་དང་། གཞན་ཡང་སྲོག་ཆགས་མི་འདྲ་བ་བཞི་བརྒྱ་ལྷག་གི་མཚན་དང་གཟུགས་དབྱིབས་ཁ་དོག་སོགས་བསྟན་འདུག  དཔེར་ན་སེང་གེ་ལ་གསེར་སེང་དང་དུང་སེང་།འདམ་སེང་གངས་སེང་སོགས་དབྱེ་བ་དུ་མ་ཡོད་པ་དང་།དེ་བཞིན་ཏུ་སྟག་ལའང་འཛོམ་དྲུག་ཅན། རི་མོ་ཅན་སོགས་བཞི་ཡོད་པ་དང་།གཟིག་ལ་བཞི་སོགས་ཞིབ་གསལ་བསྟན་ཡོད། ད་ལྟ་བོན་གྱི་བཀའ་འགྱུར་པོད་༡༣ནས་༢༤བར་བཞུགས། གཞན་ཡང་བོད་ཀྱི་བན་བོན་དགོན་གྲོང་དུ་སོང་ན་དྲི་མེད་གཟི་བརྗིད་ཤིང་པར་མ་དང་བྲིས་མ། བྲིས་མ་ལའང་གསེར་བྲིས་དངུལ་བྲིས་སོགས་དུ་མ་མཐོང་དུ་ཡོད།

གསུམ། བརྩམས་ཆོས་དང་འབྲེལ་བའི་བོན་ལུགས་རྣམ་ཐར་སྐོར།

    བརྩམས་ཆོས་དང་འབྲེལ་བའི་བོན་ལུགས་རྣམ་ཐར་ལ་ཧ་ཅང་མང་ནའང་། སྐབས་འདིར་ངོ་སྤྲོད་ཞུ་བ་ནི་ཞང་ཞུང་སྙན་རྒྱུད་ཀྱི་བརྒྱུད་པའི་བླ་མའི་རྣམ་ཐར། དམ་ཅན་མཐོང་སྣང་འཇའ་ཚོན་དྲྭ་བ། མཁན་ཉི་མའི་རང་རྣམ། ཨ་ཁྲིད་བླ་མ་བརྒྱུད་པའི་རྣམ་ཐར་བཅས་ཡིན། ཞང་ཞུང་སྙན་རྒྱུད་ཀྱི་བླ་མ་བརྒྱུད་པའི་རྣམ་ཐར་ལ་བཀའ་བརྒྱུད་དང་ཉམས་བརྒྱུད་གཉིས་ཡོད་པ་ལས། ཉམས་རྒྱུད་ཀྱི་རྣམ་ཐར་ནི་ཉམས་རྒྱུད་རྒྱལ་བའི་ཕྱག་ཁྲིད་ཀྱི་ལེའུ་དང་པོར་བཞུགས་ཤིང་། དཔྲ་ཙའི་མཁན་པོ་བསྟན་འཛིན་དར་རྒྱས་ཀྱིས་༢༠༠༢ལོར་རྒྱ་གར་ནས་པར་དུ་བསྐྲུན་པའི་དེབ་ཀྱི་ཤོག་ལྷེ་༣ནས་༡༢༨བར་ཡོད། བྲུ་རྒྱལ་བ་གཡུང་དྲུང་གིས་སྤྱི་ལོ་༡༢༤༢ནས་༡༢༩༠བར་བརྩམས།  ཉམས་རྒྱུད་རྒྱས་འབྲིང་བསྡུས་གསུམ་ཀྱི་དགོངས་པ་གཅིག་ཏུ་བསྡུས་པའི་གཞུང་ཡིན་པར་གྲགས། བཀའ་བརྒྱུད་བླ་བརྒྱུད་རྣམ་ཐར་ནི་དུས་རབས་བཅུ་བཞི་པའི་དཀྱིལ་ཙམ་ལ་སྤ་བསྟན་རྒྱལ་བཟང་པོས་ཕྱོགས་བསྒྲིགས་མཛད་ཅིང་། ཁ་བྱང་ཡོངས་ལ་ཞང་ཞུང་སྙན་རྒྱུད་ཀྱི་བརྒྱུད་པའི་བླ་མའི་རྣམ་ཐར་ཞེས་བརྗོད།ད་ལྟ་ཞང་བོད་ལོ་རྒྱུས་ཕྱོགས་བསྒྲིགས་སྨད་ཆ། ཤོག་ལྷེ་༡ནས་༦༨བར། སི་ཁྲོན་མི་རིགས་དཔེ་སྐྲུན་ཁང་གིས་༢༠༡༦ལོར་བསྐྲུན། གངས་ཏི་སེའི་བོན་གཞུང་རིག་གཏེར་དེབ་བདུན་པ་ཤོག་ལྷེ་༡ནས་༧༠བར།  པེ་ཅིན་མི་རིགས་དཔེ་སྐྲུན་ཁང་གིས་༢༠༡༠ལོར་བསྐྲུན།དེ་གཉིས་ཀྱི་ནང་དོན་ཕལ་ཆེར་གཅིག་མཚུངས་ཡིན། རྩོམ་དུས་དང་རྩོམ་མཁན་མི་འདྲ།
   དེའི་ནང་དུ་བདེར་གཤེགས་དགོངས་བརྒྱུད་དགུ   སྟོན་པ་གཤེན་རབ་ནས་སྣང་བཞེར་ལོད་པོའི་བར་དུ་བྱོན་པའི་འཇའ་ལུས་འཕ་ཆེན་ཉེར་དྲུག་དང་།འཆི་མེད་གཙུག་ཕུད་ནས་སྣང་བཞེར་ལོད་པོའི་བར་དུ་བྱོན་པའི་བླ་མ་ཉེར་བཞི། གསང་བ་འདུས་པ་ནས་བྱོན་པའི་བླ་མ་བཅུ། ཡེ་གཤེན་གཙུག་ཕུད་ནས་རིམ་གྱིས་བྱོན་པའི་བླ་མ་བཅུ་གཅིག་སོགས་ཀྱི་རྣམ་ཐར་དང་།སྣང་བཞེར་ལོད་པོ་ནས་རྣམ་སྤྲུལ་གྲུབ་ཆེན་ལྔ། རྟོགས་ལྡན་འཁྲུལ་ཞིག་དྲུག  མཉམ་མེད་གདིང་ལྡན་དགུ  བཀའ་བརྒྱུད་རིག་འཛིན་བདུན་སོགས་ཀྱི་རྣམ་ཐར་རྣམས་གསལ་རྒྱས་བསྟན་ཡོད། ལྷག་པར་དུ་སྟོན་པ་གཤེན་རབ་ནས་དུས་རབས་བདུན་པའི་བར་དུ་བྱོན་པའི་འཇའ་ལུས་འོ་ཆེན་ཉེ་དྲུག་གི་འཁྲུངས་གནས་དང་ཕ་མ། སྒྲུབ་པ་མཛད་སའི་གནས། གདམས་ངག་ཞུ་ཡུལ་གྱི་བླ་མ། སྒྲུབ་པ་ལོ་ག་དུས་མཛད་པ་དང་།མཐར་གྲུབ་པ་ཐོབ་ཚུལ། བརྒྱུད་འཛིན་གྱི་སློབ་མ་སུ་དག་ཡིན་པ་སོགས་ཁ་གསལ་བསྟན་ཡོད།
   དམ་ཅན་མཐོང་འཇའ་ཚོན་དྲྭ་བ་ནི་དགེ་བཤེས་གཡུང་དྲུང་བསྟན་འཛིན་གྱི་རང་རྣམ་ཡིན། དགེ་བཤེས་གཡུང་དྲུང་བསྟན་གྱིས་དུས་རབས་༡༧པའི་མཇུག་ཙམ་ལ་བརྩམས། ཁྱོན་ཤོག་ལྡེབ་༣༥ཙམ་ཡོད་ཀྱང་ད་ལྟ་ཤོག་ལྷེ་༢༠ཙམ་ལས་ལུས་མེད། རྣམ་ཐར་ཆ་ཚང་ཡོད་མཁན་ཡོད་ན་མཁོ་འདོན་གནང་བར་བཀའ་དྲིན་ཞུ། འདིའི་ནང་དུ་རྒྱལ་རོང་དགེ་བཤེས་གཡུང་དྲུང་བསྟན་འཛིན་གྱི་མི་ཚེ་བརྒྱུད་རིམ་དང་འབྲེལ་བའི་དུས་རབས་བཅུ་བདུན་པའི་དུས་ཀྱི་བོད་སྤྱིའི་གནས་བབས་དང་།ལྷག་པར་དུ་ཁམས་ཕྱོགས་ཀྱི་བོན་པོའི་གནས་ཚུལ་ཁ་གསལ་ཡོད། འདི་ནི་རྣམ་ཐར་གཞན་དང་མི་འདྲ་བ་དཔེར་ན། བླ་མ་རང་ཉིད་ཀྱིས་རང་གི་མི་ཚེ་བརྒྱུད་རིམ་རྣམས་ཟིན་ཐོད་དུ་བྲིས་པ་ཞིག་ཡིན་པས། ནང་དོན་ཞིབ་ཅིང་རབ་བཏགས་དང་ཆེ་སྟོད་སོགས་ཀྱིས་མ་བསླད་པས་རྣམ་ཐར་འབྲི་སྟངས་ཁྱད་པར་བ་ཞིག་ཡིན་པར་ཤེས་དགོས། བཤད་སྲོལ་ལ་ཁོང་ལ་རྨ་རྒྱལ་བོམ་རའི་མཐོང་སྣང་དང་དམ་ཅན་མཐོང་སྣང་སོགས་ལྗགས་རྩོམ་དུ་མ་ཡོད་ཀྱང་ད་ལྟ་དམ་ཅན་མཛོང་སྣང་འཇའ་ཚོན་མ་གཏོགས་ལྷག་མེད།བོན་གྱི་ལོ་རྒྱུས་ལ་མཚོན་ན། གཉའ་ཁྲི་བཙན་པོ་ནས་སྔགས་རྫོགས་དང་སྲིད་པའི་རྒྱུ་བོན་རྣམས་དར་བའི་དབུ་བརྙེས། གྲི་གུམ་སྐབས་སུ་བོན་ནུབ། སྤུ་དེ་གུང་རྒྱལ་སྐབས་སླར་ཡང་དར། ཁྲི་སྲོང་ལྡེ་བཙན་དུས་སུ་བོན་ལ་བསྒྱུར་བཅོས་ཟབ་མོ་ཕོག་ཏེ་རྒྱ་གར་བོན་སྐོར་རྣམ་དར་བའི་དབུ་བརྙེས། དེ་ནས་བཟུང་བོན་ལའང་མ་ལག་ཆེན་པོ་གཉིས་ཆགས། ལྷ་བླ་མ་ཡེ་ཤེས་འོད་ནས་མངའ་རིས་ཕྱོགས་ཀྱི་བོན་རྣམས་བསྣུབས་པའི་དབུ་བརྙེས།  དུས་རབས་བཅུ་གཅིག་ནས་བཅུ་གཉིས་པའི་བར་ལ་དབུས་གཙང་ཕྱོགས་སུ་བོན་དར།མངའ་རིས་ཕྱོགས་སུ་བཀའ་གདམས་བསྟན་པ་དར། དུས་རབས་བཅུ་གསུམ་ནས་བཀའ་གདམས་བསྟན་པ་རྣམས་ཉམས་གུན་བྱུང་བ་དང་བོད་ལ་ནུས་པ་ཆེ་ཤུག་ས་སྐྱ་དང་བོན་པོ་གཉིས་ཡིན།དུས་རབས་བཅུ་བཞི་པའི་འགོ་ཙམ་ལ་བོན་གྱི་གྲྭ་ས་ཆེ་ཤུགས་གཡས་རུ་དབེན་ས་ཁ་འཇིག་པ་ཐེབས་པ་ནས། དབུས་གཚང་ཕྱོགས་ཀྱི་བོན་པོའང་ནུས་པ་ཕྲ་མོར་གྱུར། དུས་རབས་བཅུ་བདུན་པའི་ལོ་རབས་བཞི་བཅུ་པ་ཙམ་ནས་ཧོར་གྱི་དམག་དཔུང་བོད་ལ་ཐོན་ཏེ།མཚོ་སྔོན་ནས་ཆོ་ཐུའི་རུ་སྡེ་དང་ཁམས་བེ་རི་རྒྱལ་པོ་སོགས་བཅོམ་ཏེ་ས་དེ་གར་ཡོད་པའི་བོན་པོ་རྣམས་བསྣུབས་བཅོས་བསྒྱུར་གསུམ་གྱི་ལས་དུ་མ་བགྱིས།  དེ་ནས་བཟུང་རྒྱལ་རོང་ཕུད་པའི་ཡུལ་གྲུ་རྣམས་སུ་བོན་གྱི་དགོན་པ་ཕལ་ཆེར་བཙན་པོ་སྒོས་དགེ་ལུགས་སུ་བསྒྱུར། དུས་རབས་བཅུ་བདུན་པའི་ལོ་རབས་དྲུག་ཅུ་ནས་དགུ་བཅུ་པ་སྟེ་དགེ་བཤེས་གཡུང་དྲུང་བསྟན་འཛིན་གྱི་དུས་སུ་ཁམས་བྲག་འགོ་དང་ཉག་རོང་། རྟའུ། དཀར་མཛེས། འབའ་དང་ལི་ཐང།སྡེ་རོང་། ཉག་ཆུ་ཁ། དར་མདོ་སོགས་ད་དུང་བོན་གྱི་གྲུབ་མཐའ་ཁོ་ན་ཡིན་པར་ཤེས་ཐུབ།དུས་རབས་བཅོ་བརྒྱད་པའི་ལོ་རབས་དྲུག་བཅུ་པ་ཆིན་རྒྱལ་རབས་ཀྱིས་ཆུ་ཆེན་རྒྱལ་པོ་འཁོར་བཅས་ཕམ་པར་མཛད་པ་ནས་བཟུང་བོད་ཡུལ་སྟོད་སྨད་ཀུན་ཏུ་བོན་གྱི་བསྟན་པ་ཕལ་ཆེར་ནུས་མེད་དུ་གྱུར་པ་དེ་ལྟ་བུའོ།  །
   མཁན་ཉི་མའི་རང་རྣམ་ལ་མཁན་ཆེན་ཉི་མའི་རྣམ་ཐར་ལེགས་བཤད་ཉི་མ་འབུམ་གྱི་འོད་ཅན་ཟེར། དཔལ་གཤེན་བསྟན་སྨན་རི་བའི་མཁན་པོ་སྒོ་སྟོན་ཉི་མ་བསྟན་འཛིན་དབང་གི་རྒྱལ་པོའི་རྣམ་ཐར་ལེགས་བཤད་ཉི་མ་འབུམ་གྱི་འོད་ཅན་འགྲོ་ཀུན་བློ་མུན་སེལ་བའི་སྒྲོན་མེ་ཞེས་ཀྱང་ཟེར།མཁན་ཆེན་ཉི་བསྟན་འཛིན་གྱིས་དུས་རབས་༡༩པའི་དབུ་ཙམ་ལ་བརྩམས། ཀྲུང་དབྱང་མི་རིགས་སློབ་ཆེན་གྱི་དགེ་རྒན་ཆེན་པོ་ཚེ་རིང་ཐར་ལགས་ཀྱིས་བསྒྲིགས་སྦྱོར་དང་དག་བཅོས་མཛད། པེ་ཅིན་མི་རིགས་དཔེ་སྐྲུན་ཁང་གིས་སྤྱི་ལོ་༢༠༡༢ལོ་ཟླ་༩པར་བསྐྲུན།འདི་ནི་སྨན་རིའི་མཁན་རབས་ཉེར་གསུམ་པ་མཁན་ཆེན་ཉི་བསྟན་འཛིན་ལགས་ཀྱིས་རང་གི་མི་ཚེ་བརྒྱུད་རིམ་དང་འབྲེལ་བའི་ཟིན་ཐོ་རྣམས་ཕྱོགས་བསྒྲིགས་བྱས་པ་ཞིག་ཡིན།སྤྱིར་མཁན་ཆེན་ཉི་མ་བསྟན་འཛིན་ལ་བསྡུས་གྲྭ། ཕར་ཕྱིན་མངོན་རྟོགས་རྒྱན་འགྲེལ། འདུལ་བའི་རྣམ་བཤད། བོན་གྱི་བཀའ་བསྟན་དཀར་ཆག  བསྟན་རྩིས་ནོར་བུའི་ཕྲེང་སོགས་ཤིན་ཏུ་མང་། འདི་ནི་གསུང་གི་བཅུད་ལྟ་བུ་ཆགས་འདུག དཔེར་ན་ཕྱི་སྣོད་ཆགས་ཚུལ། ནང་གི་བཅུད་གྲུབ་ཚུལ།  སྟོན་པ་གཤེན་རབ་ནས་བཟུང་བོན་གྱི་སྐྱེས་ཆེན་དུ་མའི་འདས་འཁྲུངས་ཀྱི་ལོ་ཚིགས། མདོ་སྔགས་རྫོགས་གསུམ་སོ་སོ་དང་པོ་དར་ཚུལ། བར་དུ་བརྒྱུད་ཚུལ་སོགས་ཞིབ་རྒྱས་བསྟན་ཡོད།ལྷག་པར་དུ་མཁན་ཆེན་ཉི་མའི་དུས་ཀྱི་མདོ་དབུས་ཁམས་གསུམ་གྱི་བོན་པོ་གནས་བབས་དང་ཁོང་ཉིད་དབུས་གཙང་ནས་རྐང་ཐང་བརྒྱུད་དེ་ཁམས་ཕྱོགས་སུ་ཕེབས་པ་སོགས་མཁས་པ་ཞིབ་འཇུག་པ་ཞིག་ལ་མཚོན་ན་རིན་ཐང་ལྡན་པའི་དཔྱད་གཞིའི་ཡིག་ཆ་ཞིག་ཡིན།
ཨ་ཁྲིད་བླ་མ་བརྒྱུད་པའི་རྣམ་ཐར་ལ་མན་ངག་རིན་པོ་ཆེའི་ཨ་ཁྲིད་བླ་མ་བརྒྱུད་པའི་རྣམ་ཐར་པདྨ་དཀར་བོའི་ཕྲེང་བ་ཞེས་ཟེར།ཤར་རྫ་བཀྲ་ཤིས་རྒྱལ་མཚན་གྱིས་བརྩམས། ཀུན་མཁྱེན་ཤར་རྫ་བའི་གསུང་འབུམ་པོད་༩པའི་ཤོག་ལྷེ་༣༤༥ནས་༤༠༩བར་བཞུགས། རྣམ་ཐར་འདི་ནང་དུ་སྤྱི་ལོ་༡༠༣༨སྐུ་འཁྲུངས་བའི་དགོངས་མཛོད་རི་ཁྲོད་ནས་ཉག་གཏེར་གསང་སྔགས་གླིང་པའི་བར་གྱི་བླ་མ་སུམ་ཅུ་ལྷག་གི་རྣམ་ཐར་གནད་བསྡུས་བཤད་ཡོད།  སྤྱིར་ཨ་ཁྲིད་བླ་བརྒྱུད་རྣམ་ཐར་ལ་བྲུ་རྒྱལ་བ་གཡུང་དྲུང་གིས་བརྩམས་པ་སོགས་ཤིན་ཏུ་མང་ནའང་། འདི་ནི་ཁ་ཚང་ཞིང་སྐབས་དེའི་གནས་བབས་དང་མཐུན་པ། དུས་རབས་བཅུ་གཅིག་པ་ཚུན་ཆད་ཀྱི་བོན་གྱི་ཨ་ཁྲིད་རྫོགས་ཆེན་ལོ་རྒྱུས་ཁ་གསལ་བ་ཞིག་ཡིན། དུས་རབས་༡༨པའི་ལོ་རབས་༦༠པ་ནས་ཁམས་ཕྱོགས་ཀྱི་བོན་བསྟན་རྣམས་ནུས་པ་ཕྲ་མོར་གྱུར། དུས་རབས་༡༩པ་ལོ་རབས་༥༠པ་ཡས་མས་ནས་ཁམས་སྡེ་དགེ་རྒྱལ་པོས་ཆ་རྐྱེན་བསྐྲུན་པའི་འོག་ཏུ་ཁམས་ཁུལ་གྲུབ་མཐའ་རིས་མེད་ཀྱི་བྱ་འགུལ་སྤེལ་བའི་དབུ་བརྙེས།རིས་མེད་ཀྱི་གྲིབ་བསིལ་འོག་ཏུ་ཀུན་མཁྱེན་ཤར་རྫ་བ་སོགས་བོན་གྱི་སྐྱེས་ཆེན་མང་པོ་གསོ་སྐྱོང་བྱས། ཁོང་གི་རྣམ་ཐར་སོགས་སུ་སྐབས་དེར་བན་བོན་བར་གྱི་འབྲེལ་བ་དང་། བོན་པོ་དང་དགེ་ལུགས། དགེ་ལུགས་དང་གྲུབ་མཐའ་གཞན་པ་སོགས་ཀྱི་གནས་བབས་རྣམས་ར་སྤྲོད་བྱེད་ཐུབ་

བཞི། བཀའ་མ་དང་འབྲེལ་བའི་བོན་ལུགས་རྣམ་ཐར།

   བཀའ་མ་ནི་གཏེར་འོག་ཏུ་མ་སོང་བའི་ཡིག་ཆ་ཡིན་ཞིང་།མཁས་པ་ལ་ལས་ལུང་བོན་ལྷ་གཉེན་གྱི་སྙན་རྒྱུད་རྣམས་ཀྱང་བཀའ་མའི་གྲས་སུ་བཞག་མོད་ཀྱང་དེ་དག་སྙན་རྒྱུད་ཀྱི་སྐབས་སུ་བཤད་ཟིན་པས་སླ་ཡང་ངལ་བར་མི་བྱ།སྤྱིར་བཀའ་མ་ལ་མང་ནའང་སྐབས་འདིར་སྙན་རྒྱུད་བོན་མ་ནུབ་པའི་གཏན་ཚིགས་དང་སྙན་རྒྱུད་བླ་མ་བརྒྱུད་པའི་རྣམ་ཐར་སོགས་འགའ་ཞིག་ངོ་སྤྲོད་བྱེད་པ་ལ།སྙན་རྒྱུད་ཀྱི་བོན་མ་ནུབ་པའི་གཏན་ཚིགས་ཞེས་པའི་རྩོམ་པ་པོ་མི་གསལ། གཞུང་རང་གི་མཇུག་ཏུ་གྱེར་སྤུངས་སྣང་བཞེར་ལོད་པོས་བརྩམས་ཞེས་བྲིས་ཡོད།བོད་རིག་ཞིབ་འཇུག་ཆེད་མཁས་མཁར་རྨེའུ་བསམ་ལགས་ཀྱིས་དུས་རབས་བཅུ་པའི་སྔོན་གྱི་ཡིག་ཆ་ཞིག་ཏུ་ངོས་འཛིན་གནང་འདུག  མདོར་ན་ཡིག་ཆ་དེ་ད་ལྟ་ཞང་བོད་ལོ་རྒྱུས་ཕྱོགས་བསྒྲིགས་ཀྱི་སྟོད་ཆ་ཤོག་ལྷེ་༦༥༩ནས་༦༦༣བར་ཡོད། མདའ་ཚན་ཤོག་ངོས་བཅུ་ཙམ་ཡོད། དེའི་ནང་སྣང་བཞེར་ལོད་པོ་དང་ཞང་ཞུང་རྒྱལ་པོ་ལིག་རྐྱལ་གཉིས་མཆོད་གནས་སུ་འབྲེལ་བའི་ལོ་རྒྱུས་དང་། རྩོམ་དུས་ཞང་ཞུང་གི་རྒྱལ་པོ་ལིག་མིན་རྐྱལ་དང་བོད་ཀྱི་རྒྱལ་པོ་ཁྲི་སྲོང་ལྡེ་བཙན་གྱི་དུས་ཡིན་པར་བཤད། དེ་ཉིད་ལས་སྔར་བོད་ཀྱི་རྒྱལ་པོ་རྣམས་ལ་ཕྱི་བློན་གཅིག ནང་བློན་གཅིག ཉེ་བའི་བློན་པོ་གཅིག་བཅས་གསུམ་ལས་མེད། རྒྱལ་པོ་འདི་བའི་རིང་ལ་ཕྱི་བློན་བཅུ། ནང་བློན་བཅུ། ཕྲིན་བློན་བཅུ་བཅས་སུམ་ཅུ་ཡོད་པར་བཤད། སྟོབས་ཆེ་བས་སྟག་གཟིག་ནོར་གྱི་རྒྱལ་པོ། རྒྱ་གར་ཆོས་ཀྱི་རྒྱལ་པོ། རྒྱ་ནག་ཁྲིམས་ཀྱི་རྒྱལ་པོ་སོགས་བཏུལ། ཞང་ཞུང་རྒྱལ་པོ་ལིག་མིན་རྐྱལ་ཐབས་མཛད་ནས་བཏུལ་ཚུལ་བཤད། དེའི་ནང་དུ་བོད་རྒྱལ་ཁྲི་སྲོང་གིས་ཞང་རྒྱལ་བཀྲོངས་ཚུལ་སྐོར་ཁ་གསལ་ཞིག་ཡོད།
   ཞང་ཞུང་སྙན་བརྒྱུད་ཀྱི་བླ་མ་བརྒྱུད་པའི་རྣམ་ཐར་ནི་བྲུ་རྒྱལ་བ་གཡུང་དྲུང་དང་སྤ་བསྟན་རྒྱལ་བཟང་པོ་གཉིས་ཀྱིས་ཕྱོགས་བསྒྲིགས་མཛད་པར་གྲགས་མོད་ཀྱང་། ཁོང་གཉིས་ཀྱིས་གསར་དུ་བརྩམས་པར་མ་ཡིན་ཏེ། དེ་ནི་བླ་མས་རང་གི་སློབ་མ་དག་ལ་དབང་སྐུར། རྒྱུད་བཤད། གདམས་ངག་རྣམས་གནང་ཚར་བ་དང་།སློབ་མ་ཚོས་རང་གི་བླ་མའི་རྣམ་ཐར་དེ་བརྒྱུད་པའི་བླ་མའི་རྣམ་ཐར་དང་བརྒྱུད་པའི་གསོལ་འདེབས་ཀྱི་གྲས་སུ་བཞག་སྲོལ་ཡོད་པས། ཞང་ཞུང་སྙན་རྒྱུད་ཀྱི་བརྒྱུད་པའི་བླ་མའི་རྣམ་ཐར་ཡང་དེ་ལྟར་གྲུབ་པ་རེད།

tibetmonk  2018-10-14 17:19:10

微信图片_20181009125259.jpg

ཞང་ཞུང་ཤེས་རིག་ཞིབ་འཇུག》དེབ་ངོ་སྤྲོད།

དེབ་འདིར་འཁོད་པའི་རྩོམ་ཡིག་མང་ཤོས་ནི་དེ་སྔོན་རྩོམ་སྒྲིག་བྱས་པའི་དུས་དེབ་ལས་བདམས་ཤིང་། བརྗོད་བྱ་རྗོད་བྱེད་ཀྱི་ཆ་གང་ཐད་ནས་ཅུང་ལེགས་པའི་རྩོམ་ཡིག་གི་གྲས་སུ་བརྩིས་ཆོག་པས། ང་ཚོས་ཀྱང་མེ་ཏོག་མཉམ་བཞད་དང་། མཁས་བརྒྱ་འགྲན་གླེང་ཞེས་པའི་བྱེད་ཕྱོགས་ལྟར། རྩོམ་པ་པོ་རྣམས་ཀྱིས་དཔྱད་རྩོམ་འབྲི་བའི་སྤུས་ཚད་མཐོར་འདེགས་ཡོང་ཞིང་། རྩོམ་ཡིག་གི་ནང་དོན་ཇེ་ཞིབ་དང་། ལྟ་བ་ཇེ་གསལ་དུ་འགྲོ་ཆེད་དཔེ་སྐྲུན་འགྲེམ་སྤེལ་བྱས་ཏེ་ཀློག་པ་པོ་རྣམས་ཀྱི་སྤྱན་ལམ་དུ་བསྟར་བ་ཡིན།

དེབ་འདིར་ཞང་བོད་ཀྱི་ལོ་རྒྱུས་དང་། ཆོས་ལུགས་ཞིབ་འཇུག སྲིད་པ་རྒྱུད་ཀྱི་བོན་སྐོར། ཡིག་རྙིང་གསེད་བཀྲོལ། དགོན་སྡེ་བརྟག་དཔྱད། མོ་གཏོ་སྨན་རྩིས། རྩོམ་རིག་སྒྱུ་རྩལ། ཡུལ་སྲོལ་གོམས་གཤིས། ཆོ་ག་ཕྱག་ལེན། ཁོར་ཡུག་སྲུང་སྐྱོབ་ཀྱི་སྐོར་བཅས་ཚུད་པའི་སྤྱི་ཚོགས་འཆམ་མཐུན་དང་རིག་གཞུང་དར་སྤེལ་བྱ་བར་ཕན་པའི་རྩོམ་ཡིག་ཤ་སྟག་ཡིན་པས། རྒྱ་ཆེའི་ཀློག་པ་པོ་རྣམ་པའི་ཡིད་ཀྱི་ཞིང་སར་སྦྲང་ཆར་བཞིན་སིམ་སིམ་དུ་བབས་པ་འདིས་ཀྱང་བོད་ཀྱི་ཤེས་རིག་ཞིབ་འཇུག་སྔར་ལས་དར་རྒྱས་གོང་འཕེལ་དུ་འགྲོ་བའི་རྒྱུ་རུ་གྱུར་ཅིག་གུ།

དེང་སྐབས་ཞང་ཞུང་ཤེས་རིག་གི་སྐོར་ལ་སྔར་ལས་ལྷག་པའི་དོ་སྣང་ཚད་མཐོན་པོ་ཞིག་ཏུ་སླེབ་བཞིན་ཡོད་པ་མ་ཟད། བོད་རང་གི་མེས་པོའི་ཤུལ་བཞག་རྩ་ཆེན་དུ་བརྩིས་ཏེ། མདོ་དབུས་མཐོ་སྒང་གི་རྩམ་དྲི་མ་ཡལ་བའི་རིག་གནས་དང་ལོ་རྒྱུས་ཀྱི་ཕྱག་རྒྱུན་མ་ནོར་བར་རྒྱུན་འཛིན་བྱ་འདོད་པས། དེ་ལ་དཔྱད་པའི་སྒོ་ནས་ངེས་ཤེས་གསར་བ་འདྲོངས་པའི་བློ་གསལ་གཞོན་སྐྱེས་མང་པོ་རྒྱུན་མ་ཆད་པར་ཇེ་མང་དུ་སོང་བ་ཕུད། ཉམས་ཞིབ་དང་སློབ་སྦྱོང་བྱེད་པའི་ཁོར་ཡུག་ཀྱང་ལྟོས་བཅས་ཀྱིས་ཇེ་ལེགས་ཇེ་ཆེ་རུ་འགྲོ་བཞིན་ཡོད་པས། དེ་ནི་མི་རིགས་རང་གི་ཤེས་རིག་ལོ་རྒྱུས་ལ་དགའ་ཞེན་དང་བརྩི་མཐོང་བྱས་པའི་གནས་ཚུལ་བཟང་པོ་ཞིག་ཏུ་གྱུར་ཡོད།

微信图片_20181009125309.jpg

རྔ་ཡུལ་སྣང་ཞིག་དགོན་ཆེན་དུ་ཞང་བོད་ཤེས་རིག་གཞུང་བརྒྱའི་བགྲོ་གླེང་ཆེན་མོ་ཐེངས་གཉིས་པ་དང་སྟབས་བསྟུན་ཞང་ཞུང་ཤེས་རིག་ཞིབ་འཇུགགི་འགྲེམ་སྤེལ་མཛད་སྒོ་འཚོགས་སྐབས།

tibetmonk  2018-9-15 10:55:33
ཟིན་ཐོ་འདི་དོ་དམ་པས་ཞིབ་བཤེར་བྱས་རྗེས་ད་གཟོད་ལྟ་ཀློག་བྱེད་ཐུབ།
འབྲེལ་ཡོད་ནང་དོན་ 273 ཡོད།<<<12345678910>>>
Powered by Oblog.