མཚོ་སྔོན་པོ་བོད་ཡིག་ཟིན་བྲིས། བོད ཟིན མཚོ་སྔོན་པོ ཟིན་རྩོམ། | པར་རིས། | མཁན་པོ། | ཁྱུ་མཆོག | ཟིན་ཚོམས།
ཐོ་འགོད། | ནང་འཇུག ཉར་ཚགས་བྱེད་པ།
分享按钮
 
སྒྲོལ་མ་ལྷ་ཁང་། http://blog.amdotibet.cn/rl25258/index.aspx
ཁྱིམ་བདག་ལགས་ངས་ཁྱེད་ལ་བཤད། གསུམ་པ།
2012-10-24 8:43:46

               ཁྱིམ་བདག་ལགས།   ངས་ཁྱེད་ལ་བཤད།  ཁག་གསུམ་པ།

 

          ད་ནི་དཔྱིད་ཀའི་ལྗང་སྨྱུག་གི་ནེམ་ཤ་ཡལ་ཏེ་དབྱར་ཁའི་མེ་ཏོག་གི་འདབ་མ་རྙིད་ནས་སྟོན་གྱི་སྙེ་མ་ཡིས་མགོ་ལྕོག་ལྡེམ་སོང༌།   ཡང་ན་དཔྱིད་གསུམ་རྡུལ་འཚུབ་ཁྲོད་ཀྱི་རྨོ་འདེབས་སམ་འབྲི་མ་མོའི་ནུ་ཁ་སྣུན་ཞིང་དབྱར་གསུམ་ཆར་ཆུའི་ནང་གི་ཡུར་མའམ་ནོར་ལུག་གི་རྨུག་རྗེས་དེད་ནས་སྟོན་གསུམ་གྱི་ལྷགས་རླུང་ཁྲོད་དུ་བཙས་མ་རྔ་ཞིང་ཕྱུགས་ཟོག་གི་ཁ་ཚང་ལེན་པའི་དུས་ལ་བབས་སོང༌།   དེ་བས་སྙིང་ཉེ་བའི་ཁྱིམ་བདག་ལགས།  ཁྱོད་རང་ལ་བྲེལ་འཚུབ་ཆེ་བ་ངས་ཅི་ལ་མི་ཤེས།  བྲེལ་ཟིང་ཁྲོད་རང་ཉིད་ཀྱི་སེམས་པ་དང་ལུས་པོ་བཙན་གྱིས་སྒོར་ཕྱུང་སྟེ། གླག་ཕྲུག་འདྲ་བའི་གཅེས་ཕྲུག་ལག་པས་ཁྲིད་ཅིང་ལུས་ཚིགས་ཅུང་འཆོལ་འདུག་པའི་ཁྱོད་ཀྱིས་འཚབ་འཚུབ་ངང་སློབ་གྲྭའི་སྒོ་ཆེན་འཛུལ་དུས།  ངའི་ཡ་ཆུང་ན་ན་ཟུག་དང་མིག་ཆུ་མཉམ་གཅིག་ཏུ་སྡེབས་ནས་ལང་ལོང་འཕྱུར་གྱིན་ཡོད།   ཁྱིམ་བདག་ལགས།  ཁྱོད་ཀྱིས་རང་གི་གཅེས་ཕྲུག་ངའི་མདུན་སོར་ཁྲིད་ཡོང་ཞིང་ཧ་ཅང་འཁོས་ཆུང་གིས་བྲང་ཁུག་ལས་སློབ་རིན་ཉིས་བརྒྱ་བོ་བླངས་ཏེ་ངའི་མདུན་དུ་སྲིང་ཡོང་དུས།  ཁྱོད་ཀྱི་འཐོར་ལ་ཉེ་བའི་ལག་པའི་རུས་ཚིགས་རེ་རེ་ངའི་མིག་གི་རྒྱལ་མོར་འཛུལ་ཞིང་སེམས་ཀྱི་ན་སར་འཐམས་སོང༌།  ཁྱོད་ཀྱིས་ཧ་ཅང་ཉམ་ཆུང་གིས་རང་གི་བུ་ཕྲུག་སློབ་སྦྱོང་ལ་མི་བཟང་ཚུལ་དང་མ་རབས་པྲ་ཚགས་ཡིན་རབས་མང་པོ་བཤད་ཞོར་སློབ་གྲྭར་སྐྱེལ་བའི་ཉིན་མོ་འདི་ནས་བུ་ཕྲུག་གི་ཡོད་ཚད་དགེ་རྒན་ང་ལ་སྤྲད་ཟིན་པས་བཟང་དང་ངན་རུང་དགེ་རྒན་ང་ལ་གསལ་ཞིང་གཅར་དང་རྡུང་རུང་དགེ་རྒན་ང་ཡི་ལག་ཡིན་ཟེར།   ཁྱོད་ཀྱིས་སྐད་ཆས་ངའི་སེམས་པ་སྒུལ་ཡང་ཡིད་སེམས་ཅུང་ཆད་སོང་བས།  ཁྱོད་ཀྱི་སྐད་ཆར་ང་ལ་ལན་ཡོད་རུང་ངག་ནས་ཐོན་མ་བྱུང༌།    ཁྱིམ་བདག་ལགས།    བདག་གི་སྙིང་ཉེ་བའི་ཁྱིམ་བདག    ཁྱོད་ཀྱི་ལྷག་བསམ་ལ་དྲི་མ་མེད་པ་ངས་ལོས་ཚོར།   ཁྱོད་ཀྱི་རེ་བཞག་ལ་ལྕི་ཚད་ཆེ་བ་ངས་ལོས་ཤེས།   ཡིན་ཡང་ཁྱིམ་བདག་ལགས།   ཁྱོད་ཀྱིས་ཅིས་ཀྱང་ང་ལ་ཐེངས་གཅིག་ཉོན་དང༌།  བུ་ཕྲུག་ནི་ཁྱོད་ཀྱི་སྙིང་གི་ནོར་བུ་རེད་ལ་ང་ཡི་སེམས་ཀྱི་གདུལ་བྱའང་རེད།  ཁྱོད་རང་རང་གི་བུ་ཕྲུག་ལ་རེ་བ་ཇི་ལྟར་ཆེ་བ་བཞིན་ང་ཡང་རང་གི་སློབ་བུ་ལ་རེ་བ་དེ་ལྟར་དུ་ཆེ།   ཡིན་ན་ཡང༌།   མི་ཞིག་འཚར་ལོངས་བྱུང་ནས་མ་འོངས་པར་འཇོན་ཐང་ཅན་ཞིག་ཏུ་འགྱུར་བར་བྱ་བ་ནི་འཇིན་རྟེན་སྟེང་ཆེས་དཀའ་ཞིང་ཆེས་རླབས་ཆེ་བའི་ལས་དོན་ཞིག་རེད།   ཚ་གདུག་ཁྲོད་ཀྱི་ལྗང་སྨྱུག་ལ་ཆུ་གཏོར་བ་དང་རླུང་དམར་ཁྲོད་ཀྱི་སྡོང་ཕྲུག་ལ་སྐྱོར་མ་རྒྱག་པ།   བརླན་སར་ཁུམས་པའི་མེ་ཏོག་ལ་ཉི་ཟེར་སྤྲོ་བ་བཞིན།   ང་ཚོས་ཀྱང་བུ་ཕྲུག་ཅིག་གཉོར་ཞིང་སློབ་བུ་ཞིག་སྐྱོང་དུས་ཀྱང༌། ནང་ཁྱིམ་ཚང་དང་ཕྱི་སྤྱི་ཚོགས་བར་སློབ་གྲྭ་མཉམ་རུབ་ཀྱིས་ཕ་མས་སྐྱོང་ཤེས་དང་དགེ་རྒན་གྱིས་བསླབ་ཤེས་བུ་ཕྲུག་རང་གིས་སྦྱོང་ཤེས་བྱེད་པ་གལ་ཆེ་བ་རེད།   ཁྱོད་ཀྱིས་རྒྱུན་དུ་ང་ལ།   ཁྱོད་ཀྱི་བུ་ཕྲུག་སློབ་གྲྭ་བསྐྱལ་ནས་དགེ་རྒན་ང་ལ་སྤྲད་པ་ནས་བཟུང༌།  ང་རང་ཁྱོད་ཀྱི་ཚབ་བྱ་དགོས་ཚུལ་ཡང་ཡང་དུ་གདམས་སོང༌།  ཡིན་ན་ཡང༌།  ཁྱིམ་བདག་ལགས་དགོངས་པ་མ་ཚོམས།  ཐོག་མར་ང་རང་ནམ་ཡང་ཁྱོད་ཀྱི་ཚབ་བྱེད་དཀའ་སྟེ།  ཕ་བུའི་ཤ་རུས་ཀྱི་བརྩེ་དུང་དེ་ང་དང་སློབ་མའི་བར་དུ་འབྱུང་མི་སྲིད་དེ།  ངས་ཁོ་ཚོར་སྟེར་ཐུབ་པ་ནི་དགེ་སློབ་བར་གྱི་མཛའ་བརྩེ་དང་དེ་ལས་བརྒལ་ན་གྲོགས་པོ་གྲོགས་མོ་ཙམ་གྱི་མཛའ་བརྩེ་ཡིན་སྲིད་རྒྱུ་རེད་ལ།   འུ་གཉིས་སུ་ཡིན་རུང༌།   སྔར་ནས་བྱིས་པའི་མི་ཚེ་ལ་ཁག་ཐག་བྱ་དཀའ་ཞིང༌།   ལྷག་པར་སློབ་ཆུང་གི་བསླབ་གཞིའི་རྒྱུགས་སྐར་མཐོ་དམའ་ཙམ་ཞིག་གིས་ཁོའི་མི་ཚེ་ལ་ཐག་གཅད་ཁག་པོ་རེད།   དེ་བས་ང་ཚོས་འདང་རྒྱག་དགོས་པ་ནི་མཐའ་མར་ཅི་འདྲ་གང་འདྲ་ཞིག་ཡིན་སྲིད་པ་དེ་མ་ཡིན་པར།  ད་ལྟའི་བརྒྱུད་རིམ་དུ་ཅི་འདྲ་གང་འདྲ་བྱ་རྒྱུ་དེ་རེད།

               སློབ་གསོ་ནི་དོན་དམ་དུ་བྱིས་པ་སློབ་གྲྭར་བསྐྱལ་ནས་དཔེ་ཆར་ལྟ་རུ་གཞུག་རྒྱུ་དེ་འདྲའི་ལསསླ་མོ་ཞིག་ཁྱོན་ནས་མ་རེད།  སློབ་གསོ་ནི་རིག་གནས་ཤེས་བྱ་བྱང་ཆུད་པ་ཞིག་སྦྱང་རྒྱུ་ལས་གཞན་གལ་ཆེ་བ་ནི་སེམས་བརྒྱུད་དྲང་མོ་ཞིག་དང༌།  མི་གཤིས་བརྟན་པོ་ཞིག  དཀའ་ངལ་ལ་མགོ་མི་སྒུར་བ་ཞིག  ལག་རྩལ་ལ་མཁས་པ་ཞིག  དོན་དག་མཐའ་འཁྱོལ་བ་ཞིག  སྤྱི་ཚོགས་ལ་ཕན་ཆེ་ཞིག་འཁྱོངས་རྒྱུ་དེ་རེད།   དེས་ན་ཁྱིམ་བདག་ལགས།  ཁྱེད་ཀྱིས་བལྟས་ན།  བྱིས་པས་མ་རབས་པྲ་ཚགས་ཅི་ཡང་མ་བྱས་པར་ལག་ཟུང་རྒྱབ་ཏུ་བཅིངས་ནས་མགོ་བོ་ཡ་ཡོ་བྱེད་ཀྱིན་ཀ་ཁའི་མིང་ཚིག་དབྱངས་ལ་གྱེར་རྒྱུ་དེ་ཁོ་ནས་འགྲུབ་བམ།  དེ་བས།  བྱིས་པའི་པྲ་ཚགས་ལ་ཅིས་ཀྱང་བཟོད་པ་སྒོམ་ཞིང་བྱིས་པའི་སྤྲོ་སྣང་ལ་ཅིས་ཀྱང་བཀག་སྡོམ་མི་བྱ་རོགས།  དོན་དམ་པས་དེང་གི་བྱིས་པ་དང་བསྡུར་ན་ང་ཚོ་ནི་ལས་ཅན་རེད།   ཁྱོད་ཀྱིས་འདང་ཞིག་རྒྱོབས་དང༌།  ང་ཚོས་མ་མཐའ་ཡང་བྱིས་དུས་ཀྱི་ལོ་བརྒྱད་ཀྱི་ནང་ཨ་ཕའི་གཉའ་ལ་ཞོན་ནས་གཉིད་ལྕོག་རྒྱབ་མྱོང་ལ་ཨ་མའི་རུམ་ལ་འཐམ་ནས་གཅེས་གཏམ་བཤད་མྱོང༌།  ད་དུང་ལྷས་རའི་བར་འཁྱམ་གྱི་ཕྱི་ནང་གང་རུང་ནི་ཕར་ཞོག  སྡེ་འདབས་རུ་འདབས་ཀྱི་ཆུ་ཁ་རི་ཁ་ཞིང་ཁ་དང་རྩྭ་ས་ར་བ་སོགས་མིག་གིས་མཐོང་ཚད་དང་གོམ་པས་ལོངས་ཚད་དུ་རྒྱུག་ནས་རྐང་འོག་ན་ས་གཞི་ཡོད་པར་མི་བསམ་ལ་མགོ་ཐོག་ན་ནམ་མཁའ་ཡོད་པར་ཡང་སྣང་འཇོག་མེད་པར་ལུ་གུ་རེའུ་ཤར་བདའ་ལུང་གདའ་དང་རྩྭ་ཐང་མེ་ཏོག་གང་འདོད་འབལ་རྐྱང༌།  རྟེའུ་དང་ཐོ་རུར་རང་དགར་ཞོན་ཆོག  གནམ་ན་འཕུར་བའི་བྱེའུ་འཛིན་འདོད་ན།  ས་ན་བརྒྱུད་པའི་འབའ་འབུར་རྩེད་འདོད་ན་ཡོད་ཚད་འུ་ཚོའི་ལག་མིན་ནམ།   ད་དུང༌།  རྩེད་ར་གྲུ་བཞི་ཕུབ་ཅིང་ཐབ་ཀ་ཐབ་མ་ལས་ནས་མནའ་མ་མག་པ་ལེན་ཚུལ་རྩེད་དུས་ལོ་ལོན་བསམ་ཤེས་ཅན་དག་གིས་ཀྱང་ཞལ་ངོ་འཛུམ་གྱི་ལེར་སྐལ་བ་ཡག་པའི་རྟགས་ཡིན་ཟེར།  དངོས་གནས་བྱིས་པ་ཚོ་ནད་མེད་དུག་མེད་ངང་ལྗང་སྨྱུག་འབུས་པ་བཞིན་སྤྲོ་ཤིག་ཤིག་གིས་མགོ་བོ་རིག་རིག་གིས་འབུས་ཡོང་བ་ནི་འུ་ཚོའི་བསོད་ནམས་མ་ཡིན་ནམ།   སྤྱི་ཚོགས་སློབ་གསོ་སྤྱི་ཚོགས་སློབ་གསོ་ཟེར་བ་དོན་དམ་དུ་འདི་འདྲ་ལ་ཟེར་ཞིང༌།  བྱིས་པ་ཚོ་མི་ཚོགས་སྤྱིའི་ཁྲོད་ངང་ངམ་ཤུགས་ཀྱི་ཟ་དང་ཟུར་ནས་གོ་སྐོན་སློབ་གསོ་རེ་ཐོབ་པར་བྱ་རྒྱུ་ནི་དངོས་ནས་གལ་བོ་ཆེ་ལ་ནན་ཏན་གྱི་ཚུལ་ཡིན་པས།  བྱིས་པའི་པྲ་ཚགས་ཀྱི་རང་གཤིས་ལ་སྡིག་མཛུབ་སྟོན་པ་ནི་བྱིས་པའི་རང་དབང་ལ་བཀག་བསྡོམས་བྱས་པ་ཡིན་ལ། བྱིས་པའི་པྲ་ཚགས་ཀྱི་རང་གཤིས་ལ་ཐར་འདོན་བྱེད་པ་ནི་བྱིས་པའི་རིག་པའི་འཆར་སྒོ་སྣ་ཚོགས་པ་འབུར་འཇོམ་བྱེད་པ་རང་ཡིན།  ཕ་མ་རང་ཉིད་མ་རབས་ཐ་ཤལ་ཅིག་མིན་ན་བྱིས་པ་ནི་ནམ་ཡང་དེ་འདྲ་རུ་འགྱུར་བའི་དཔེ་མེད་དོ།   དེ་བས་ང་ཚོས་དོ་སྣང་བླ་ལྷག་བྱ་དགོས་པ་ནི་ཕ་མ་རང་གིས་རང་ངོ་ཟིན་ནས་རང་རྒྱུད་ཀྱི་མ་དག་པ་རྣམས་མྱུར་དུ་དོར་རྒྱུ་དེ་ཡིན་པ་ལས་བུ་ཕྲུག་ལ་མགོ་རྔ་མེད་པའི་ཆ་རྐྱེན་འདོན་རྒྱུ་དེ་མ་རེད་ཡ།   ཁྱིམ་བདག་ལགས།  ང་ཚོས་འདིའི་ཕྱོགས་ལ་ཅིས་ཀྱང་འདང་ཞིག་ཟབ་མོ་ཞིག་རྒྱག་དགོས་ཡ།

 

rl25258 | རྩོམ་ཡོངས་ཀློག་པ།(1310) | ལན་སློག(14)
ཁྰ་ཁྰའི་པར་རིས་བརྩམས་ཆོས་མྱང་བའི་ཚོར་བ།
2012-9-8 15:28:58
 

ཁྰ་ཁྰའི་པར་རིས་བརྩམས་ཆོས་མྱང་བའི་ཚོར་བ།

རྫ་རི་དང་རྫ་འདབས་ཀྱི་ཀེ་ཚེ་མེ་ཏོག

        

            

ནམ་ཡང་སེམས་པ་དང་ཉེ་རུ་བཅར་བའི་རྒྱང་རིང་གི་རྫ་ཕྲེང་སྨུག་པོ།

ཡབ་ཆེན་གྱི་ལང་ཚོ་དང་སྤོབས་པ་སྟོབས་ཀྱིས་ཁུར་མྱོང་བའི་གླུ་གཞས་དང་རླུང་རྟའི་འབྱུང་གནས།

མ་ཡུམ་གྱི་མཛེས་སྡུག་དང་རི་གླུ་རླུང་གིས་བསྐྱོད་མྱོང་སའི་དག་ཞིང་དང་རྨི་ལམ་འཁྲུངས་ས།

གནས་འདི་རུ།     ཆར་བ་ཤག་ཤག་འབབ་དུས་སེར་ཆེན་གྱིས་མགོ་ལྕོག་ལྡེམ་ས་འདི་རུ།

གནས་འདི་རུ།     ཁ་བ་ཡི་འདབ་མ་རྩེན་དུས་གངས་ལྷ་ཡི་དྲི་བསུང་ལྡང་ས་འདི་རུ།

གནས་འདི་རུ།     ཏག་ཏག་གནས་འདི་འདྲ་ཞིག་ཏུ།

ངའི་ཡབ་ཡུམ་གྱིས༌།    གནམ་གྱི་དགུ་ཚིགས་ས་ལ་དྲངས་པར་གཙང་བོ་ཞེས་བཏགས་ཏེ།

ངའི་ཡབ་ཡུམ་གྱིས།     བརྩེ་བའི་རི་མོ་ས་ལ་ཕབ་པར་སྤང་ལྗོངས་སུ་གསོལ་ཏེ།

ངའི་ཡབ་ཡུམ་གྱིས།    གནམ་གྱི་སྐར་ཚོགས་ས་ལ་བཀྲམས་པར་ནོར་ལུག་ཞེས་བོས་ནས།

མཐིང་སྨུག་སྦྲ་ནག་ཞེས་པའི་འཇིག་རྟེན་འཛོམས་ཁང་ཞིག

བུ་རབས་ཚ་རྒྱུད་ཀྱི་སྐྱིད་དུ་སྨིན་པར་བྱས།

                              

                    

ཕྱི་རིམ་ནང་རིམ་གྱིས།    སྨུག་ཀློང་ཁྲོད་སྒམ་རླིང་གིས་འགྱིང་པའི་རྫ་རིའི་འདབས་རོལ་དུ།

ཕུ་ནུ་མིང་སྲིང་གི་རྒྱང་བཞུད་ཀྱི་སྣེ་མོ་ཟིན་མ་བྱུང་པའི་ཡབ་ཡུམ་གྱི་ཕྱག་ཟུང་གིས།

དཀའ་ཚེགས་ཀྱིས་བཏབས་ཤིང་བརྣག་ཁྲག་གིས་འབུས་བར་བྱས་ཏེ།

རྔུལ་ཆུས་སྨིན་ཞིང་བརྔོ་དགོས་པའི།   སེར་ལམ་ལམ་གྱི།  

ལྟ་ན་སྡུག་པའི་ཀེ་ཚེ་མེ་ཏོག་གི་བཀྲག་མདངས།

འོད་ཆེམ་ཆེམ་གྱིས་རེ་སྨོན་དང་མཉམ་གཅིག་ཏུ་བཀྲ

ཡིད་དུ་འོང་བའི་ཀེ་ཚེ་མེ་ཏོག་གི་ཞིང་ཁ།

སྣུམ་ཤིག་ཤིག་གིས་རྫ་འདབས་དང་ཡུག་གཅིག་ཏུ་འདྲེས།

                              

གསེར་སྦྲང་གིས་མཆུ་སྒྲོས་ཡང་ཡང་སྦྱོར་སྲིད་པའི་ཀེ་ཚེ་མེ་ཏོག་གི་ཟེའུ་འབྲུ་སྙིང་རྗེ།

འཇམ་རླུང་གིས་བྱིལ་བྱིལ་ཡང་ཡང་བྱེད་ངེས་པའི་ཀེ་ཚེ་མེ་ཏོག་གི་ཞིང་ཁ་མཛེས་སྡུག

རྫ་འདབས་ཀྱི་ཁོད་ཡངས་པོའི་པང་བ་ན་བག་ལྷོད་ཀྱིས།   

སྦྲ་ཁྱིམ་གྱི་རྒྱང་བཞུད་ལ་རྣ་བ་བླགས་ནས་ཡོད་དམ།

རེ་སྒུག་གི་གཏིང་ཟབ་པའི་གཞི་མ་རུ་འཛུམ་ཤིག་གེར།

ཡབ་ཡུམ་གྱི་སྡུག་ཡུས་ལ་སེམས་གསོ་བྱེད་ཀྱིན་ཡོད་དམ།

སྨུག་པ་ལང་ལོང་ཁྲོད།   

སྟོང་འཇགས་ཀྱིས་ང་ལ་མཆུ་མ་སྦྱིན་མཁན་དེས།

ཉི་འོད་ལམ་ལམ་ཁྲོད།

མཚར་སྡུག་གིས་ང་ལ་ན་ཟུག་སྟེར་མཁན་དེས།

ངའི་མིག་གི་རྒྱལ་མོས་ངོས་སུ་གནས་ཏེ།

ངའི་སྙིང་གི་འཕར་སྒྲའི་སྟེང་དུ་འཕྱོ་ཞིང༌།

ངའི་སེམས་པའི་སྙི་ས་དེ་ལ་འཐམ།

                                        ༢༠༡༢ལོའི་ཟླ་༢པའི་ཚེས་༡ཉིན་གྱི་ཕྱི་དྲོ་རང་ཁྱིམ་དུ།

པར་བ།   ཁྰ་ཁྰ།

rl25258 | རྩོམ་ཡོངས་ཀློག་པ།(892) | ལན་སློག(8)
ངའི་གཅེས་ཕྲུག་ཚོ་དང་ཁོ་ཚོའི་རྨི་ལམ་གླེང་བ།
2012-6-11 10:31:25
 

གཅེས་ཕྲུག་ཚོ་དང་རྨི་ལམ།

                 དྲུག་གཅིག་བྱིས་པའི་དུས་ཆེན་ལ་བྱིས་པ་ཚོ་བསམ་པའི་ཟིན་ཐོ།

                    མཚོ།

ཁྱོད་ཚོ་བསམ་ཞིང་གླེང་ཐེངས་རེར།

ང་རང་སླར་ཡང་།   བྱམས་དུངས་དུངས་ཀྱིས།

ཁྲ་ལམ་ལམ་གྱི་སྐར་ཚོགས་ཁྲོད་དའ་མ་ཐུབ།

ཁྱོད་ཚོར་དུངས་ཤིང་དྲན་ཐེངས་རེར །

ང་རང་སྔར་བཞིན་སྤྲོ་བསང་བསང་གིས།

ལྗང་ནེམ་ནེམ་གྱི་རྩྭ་ཐང་ལས་བརྒལ་མ་ཐུབ།

ཁྱོད་ཚོར་ཆགས་ཤིང་འཁྲེང་དུས་སུ།

ང་རང་ད་དུང་སྙིང་ཉེ་ཉེ་ངང་།

ཁྲ་མ་མེའི་མེ་ཏོག་གི་གང་བུ་ལ་བྲལ་མ་ཐུབ།

མཚན་གུང་གི་སྐར་མ་ཁྲི་འབུམ་ཁྲོད།

ངའི་རྨི་ལམ་འཁུར་བའི་བྱིས་པ་ཚོ་འོད་ལམ་ལམ་བྱེད།

དབྱར་དྲུག་པའི་རྩྭ་ཐང་གི་པང་བ་རུ།

ངའི་ཕྱེ་ལེབ་བཞིན་གྱི་བྱིས་པ་ཚོ་བྲེལ་འཚུབ་ཀྱིས་ཡང་ཡང་འཕུར།

ནངས་ཞོགས་པའི་ཉི་ཟེར་ལམ་ལམ་ཁྲོད།

ངའི་མེ་ཏོག་བཞིན་གྱི་བྱིས་པ་ཚོའི་གང་བུ་ཤིག་ཤིག་འགུལ།

དངོས་ནས་ཁྱོད་ཚོ་བསམ་ཞིང་གླེང་ཐེངས་རེར།

རྙིང་དྲག་པ་འདྲ་བའི་ཐ་སྙད་ལ་སྔར་བཞིན་གསོན་ཤུགས་རྒྱས།

ནམ་ཡང་།  ངའི་ཡ་ཆུང་ན་ལྷོག་ལྷོག་གདུ་བའི་རེ་སྨོན་ཁྲི་ཕྲག་གི་དྭངས་མ་ཨ།

                                  

ད་ནི།   ཞོགས་པ་རེ་རེར།

ཁྱི་གུ་རྒྱ་བོ་ལ་སེམས་པ་འཁྲེང་མི་དགོས་ལ།

རྩམ་ཆང་རེ་ཁ་རུ་འཇུག་ཞོར།

ཟིལ་བ་ཁྲོམ་ཁྲོམ་འཁུར་བའི་རྩྭ་ལྗང་ལ་ཅོའང་འདྲི་མི་དགོས།

ཨ་མས་རེ་སྨོན་དང་མཉམ་དུ་བཙེམས་པའི་དཔེ་ཁུག་ཟད་པོ།

རུ་འདབས་ཀྱི་གྲུ་ཟུར་གང་ཞིག་ན་གཉིད་དུ་ཡུར་ཡོད་མེད་དེའང་།

ཁྱོད་ཀྱི་འདང་རྒྱ་གི་ཁྱབ་ཁུང་ཆུང་ངུ་རུ་ཆུད་མི་སྲིད།

ད་ནི།   ཞོགས་པ་རེར།

འཚུ་ལོང་གིས་མལ་ལས་ལྡིང་དུས།

ཁྱོད་ཀྱི་དགྲ་བོ་ངོ་མ་དེ།  ཁ་སང་འཛིང་རེས་བྱས་པའི་སློབ་གྲོགས་དེ་ཡིན་མི་སྲིད།

མ་མཐའ་ཡང་།   རྨི་ལམ་བདས་པའི་དྲིལ་ཆུང་དེ་ལས་སྙིང་ན་བ་ཞིག་ཡིན་མི་སྲིད།

བུ་ཆུང་རེ་རེ།  བུ་མོ་རེ་རེ།

ཕ་མ་རེ་རེའི་རྨི་ལམ་དང་མཉམ་དུ་འཁོར་ཡོང་བའི་རེ་སྨོན་རེ་རེ།

རྡོག་སྒྲ་གཉོམ་པོའི་བར་གསེང་གང་རུང་ནས།

ཞོགས་པའི་ན་བུན་དང་འགྲོགས་ཏེ་མཁའ་རུ་འཕགས།

ཕུགས་བསམ་ཆུང་ཆུང་རྨི་ལམ་ཐུང་ངུ་རུ་ཉར་བའི་གཅེས་ཕྲུག་ཚོ།

ཁོད་ཡངས་པའི་རྩལ་སྦྱོང་ར་བའི་རྩྭ་ལྗང་གང་རུང་གི་འདབ་མའི་སྟེང་།

ཉམ་ཆུང་གིས་འདར་ཙམ་འདར་ཙམ་བྱེད་པའི།

གཉིད་མ་སད་ཀྱི་ཟིལ་ཁྲོམ་རྡོག་པོ་རེ།                               

  

ནམ་ཞིག་ནས།    ཁྱོད་ཀྱིས་ནག་རིལ་རིལ་གྱི་མིག་ཟུང་ཞིག

རེ་འབྲས་ཀྱི་ས་བོན་བཞིན་སེམས་ཀྱི་ཟབ་སར་སྦས།   

སེམས་ཀྱི་ཟབ་ས་དེ་རུ་ཡུན་གྱིས་ལྗང་མྱུག་འབུས་ཤིང་གཉོམ་ལག་ཆེ་རུ་རྒྱས་དུས།

ཁྱོད་ཀྱིས་སྤྲོ་སྣང་ཞེས་པ་དོན་དམ་ཇི་འདྲ་ཞིག་ཡིན་པ་གཞི་ནས་རྟོགས་ཤིང་།

སློང་སྦྱོང་གི་འདུན་པ་ཞེས་པ་དེ འང་ཡོད་སྲིད་པ་ཞིག་ཡིན་པ་དངོས་སུ་ཚོར་སོང་།

ཁྱོད་ཀྱིས་རྟག་ཏུ་དེ་ལྟར་འདོད།

སློབ་གྲོགས་ཚོས་བཟའ་ཚོ་ཞེས་ཟུར་ཟའི་མདའ་མོས་ཁྱོད་རང་མ་རྨས་གོང་།  

དགེ་རྒན་གྱིས་ངོ་ཚ་ཞེས་སྐྱོན་བརྗོད་ཀྱི་རལ་གྲིས་ཁྱོད་རང་མ་འཇོམས་གོང་།

ཁྱོད་ཀྱིས་དངོས་ནས་རྟག་ཏུ་དེ་ལྟར་འདོད།

དབྱར་ཟླ་དྲུག་པ།   

རྩྭ་ལྗང་གི་དུས་ཚིགས།   མེ་ཏོག་གི་དུས་ཚིགས།

ད་དུང་ཕྱེ་ལེབ་དང་སྦྲང་ཆུང་གི་དུས་ཚིགས།

ངལ་དུབ་དང་སྐྱོ་སུན་གྱིས་མཉེད་ཀྱིན་པ་དེ།

ནམ་ནམ་བྲོས་འགྲོ་བའི་ཁྱོད་ཀྱི་སེམས་པ་སྟེ།

རྩྭ་ལྗང་གི་ཁུགས་ན།   མེ་ཏོག་གི་ཚལ་ན།

ད་དུང་ཕྱེ་ལེབ་དང་སྦྲང་ཆུང་གི་གཤོག་ཐོག་ན།

ཨ་ཨ་་་་་་ ཕ་ཡུལ་།   ཨ་ཨ་་་་་རྩེད་གྲོགས།

དབྱར་ཟླ་དྲུག་པ།

ཉི་མའི་དུས་ཚིགས།   ཆར་བ་ཡི་དུས་ཚིགས།

ད་དུང་ཟིང་ཟིང་བྲེལ་འཚུབ་ཀྱི་དུས་ཚིགས།

དུས་ཚིགས་འདི་ལ།   ཁྱོད་ཀྱི་འཇིག་རྟེན་ཆུང་ཆུང་དུ།

རྟག་ཏུ་གཉིད་གླུ་ཡང་ཡང་གྱེར་མཁན་དེ་ང་ཡིན་པས།

ནམ་རྒྱུན་གཉིད་ལྕོག་ཡང་ཡང་རྒྱག་མཁན་དེ་ཁྱོད་ཅི་ལ་མིན།

ཁྱོད་ཀྱིས་བློ་རིག་སྒྲིམ་དུས་ནི། ཆར་བ་ཤག་ཤག་འབབ་དུས་ཡིན་ཅིང་།

ཁྱོད་ཀྱིས་རྨི་ལམ་རྨི་དུས་ནི།   ཏག་ཏག་ཕུགས་བསམ་རྩོམ་དུས་ཡིན་སྲིད་ན།

ཁྱོད་རང་གཉིད་ལས་བསླངས་པ་དེ་ནི་ནོར་འཁྲུལ་ཉག་ཅིག་ཏུ་ཟད་པས།

གཅེས་ཕྲུག       མུ་མཐུད་མིག་ཟུང་ཚུམས་ལ་རྨི་ལམ་རྨིས་ཨང་།

ཆུང་བྱིས་པ།   ཁྱད་མཚར་དང་སྤྲོ་དགའ་འཚོ་བའི་ལྷ་ཕྲུག

སྤྲིན་པ་དང་འཇའ་ཚོན་ཞོན་རྟ་རུ་འདོད་པའི་གཅེས་ཕྲུག

ཆུང་བྱིས་དུས། རྨི་ལམ་དང་སྟོང་འདང་གིས་ཕྱུགས་པའི་དུས་ཡུན།

བྱེའུ་ཆུང་དང་མཉམ་དུ་འུར་ཆི་ལེར་འགྲོ་བའི་བག་ཡངས་ཀྱི་བྱིས་དུས།

མི་ཚེའི་ནང་ཡུན་ཐུང་བའི་བདེ་སྐྱིད་ཀྱི་བགོ་སྐལ་འདི།

མི་ཚེའི་ཁྲོད་ཆེས་རིན་བྲལ་གྱི་ཐོབ་ཆ་ཆེན་པོ་འདི།

ཁྱོད་ཚོའི་མི་ཚེ་ཧྲིལ་བོའི་ཕུགས་བསམ་གྱི་སྟོན་འབྲས་སྨིན་སའི་གཤིན་ས་ཡིན་པ།     

ང་ཚོའི་ཡིད་ཆེས་དང་རེ་སྨོན་ཡོངས་སུ་བཅོལ་ཆོག་པའི་ལྷད་མེད་ཀྱི་ནོར་བུ་ཡིན་པ། 

ང་ཚོས་ཅིས་ཀྱང་ཤེས་དགོས་ཨང་།

rl25258 | རྩོམ་ཡོངས་ཀློག་པ།(713) | ལན་སློག(9)
མོ་ལོ་སུམ་ཅུའི་ཕྱི་མིག༲མུ་འགོད༳
2012-1-19 15:44:01

                                                 མོ་ལོ་སུམ་ཅུའི་ཕྱི་མིག

                                                                             མཚོ།

      ད་ལོའི་ལོ་འདི་གསར་ན་ང་མོ་ལོ་སུམ་ཅུར་སོན་པ་ཡིན།    རྒྱ་རྩིས་ལྟར་ན་མོ་ལོ་ཉེར་བརྒྱད་ཡིན།   ཁྱིམ་ཐོ་སྟེང་དུ་བོད་རྩིས་ལྟར་དུ་བཀོད་ཡོད་ནའང་ངས་ཀྱང་མི་མང་བོ་བཞིན་དུ་བོད་རྩིས་ཀྱི་ལོ་ཚོད་རང་ལོ་ལ་རྩི་བཞིན་མེད་དེ།    བོད་རྩིས་ཀྱི་རྩི་སྲོལ་འདི་ནི་གླན་རྟགས་ཤིག་ཏུ་ངོས་བཟུང་སྟེ།   བྱིས་པ་ཨ་མའི་མངལ་ནས་ལྷུང་མ་ཐག་པའི་ཉིན་དེ་ལོ་གཅིག་ལ་ལྟ་ཞིང་དེ་ནས་ཉིན་འགའ་ཤས་སམ་ཐ་ན་ཉིན་     གཅིག་གིས་ལོ་སར་བ་ཡིན་ཀྱང་ལོ་གཅིག་ཏུ་བརྩི་བས་ང་ནི་བོད་ལོ་ཉི་ཤུ་དགུ་ལ་སྐྱེས་   པས་ཉིན་ཞག་གཉིས་ཀྱི་རིང་ལོ་གཉིས་སུ་གྱུར་ལ་ད་ལྟའི་ང་ནི་མོ་ལོ་སུམ་ཅུ་ཡིན།   དུས་ཡིན་རིང་བོ་ཞིག་ལ་ངས་ཀྱང་མི་མང་བོ་བཞིན་དུ་བོད་རྩིས་ཀྱི་རྩི་ལུགས་འདི་ལ་    འདང་མ་དཔོགས་པར་ལེ་བདའ་གང་མང་བྱས་མྱོང་ལ།   ཁྱད་པར་སྐྱེས་སྐར་རོལ་སྲོལ་མེད་པ་འདིར་ཡང་ཅི་བྱུང་བསམ་མྱོང་མོད།   ཐེངས་སྔོན་མར་ངའི་ཨ་ཁུ་དང་ཁ་  བརྡ་བྱས་པ་ལས་གནས་ལུགས་ཤིག་རྟོག་བྱུང་སྟེ།   བོད་ཀྱི་རྩི་སྲོལ་འདིས་རྣམ་ཤེས་མངལ་དུ་སྦྲུམ་པ་ནས་ཚེ་སྲོག་ཏུ་མཐོང་བས་མིའི་ཚེ་སྲོག་ལ་བརྩི་བཀུར་བྱས་པ་    མཚོན་ཞིང༌།   མ་གཞི་ཚེ་སྲོག་ནི་རིན་ཐང་གཞལ་དུ་མེད་པས་དུས་ཡུན་སྐད་ཅིག་  ཙམ་ལའང་ཚེ་སྲོག་ལ་གཅེས་སྤྲས་བྱ་འོས་ཤིང་དུས་ཡུན་སྐད་ཅིག་ཙམ་ལའང་རང ་ཉིད་གསོན་ཡོད་པའི་ངེས་ཤེས་བསྐྱེད་དགོས་པས་སྐྱེས་སྐར་ཀྱི་ཉིན་མོ་ཁོ་ནའི་སྐབས་མ་གཏོགས་པའི་འདས་ཟིན་དང་ད་ལྟ་མ་འོངས་གང་གི་དུས་ཚོད་སྐར་ཆ་དག་ཀྱང་སྐྱེས་སྐར་གྱི་ཉིན་མོ་བཞིན་དུ་གལ་ཆེན་མ་ཡིན་ནམ། ཡང་གཅིག་བཤད་ན།    དུས་སླེབས་པ་ཡིན་ན་ཅི་ཡང་འགྱུར་འགྲོ་བ་ཆོས་ཉིད་དུ་གྲུབ་ལ་མིའི་མིག་ལམ་དུ་མོ་ལོ་ སུམ་ཅུར་སོན་པའི་ང་ད་དུང་མོ་ལོ་ཉི་ཤུའི་ལང་ཚོ་རུ་སྣང་ན་ནི་དགའ་འོས་པའི་དོན་ཞིག་མ་ཡིན་ནམ།   དེ་བས་ད་ལོ་ང་ནི་མོ་ལོ་སུམ་ཅུར་སོན་པ་ཡིན་ཞེས་སེམས་ཐག་བཅད་དེ་སྨྲ་སྤོབས་སོ།

       སྐྱེས་པ་ཞིག་གི་ཆུང་མ་དང་ཁྱིམ་ཚང་ཞིག་གི་བདག་མོ།    ལྷག་པར་བུ་ཆུང་ཞིག་གི་ཨ་མ་རུ་གྱུར་བའི་མི་ལོ་སུམ་ཅུའི་དུས་འདིར།   ཁྱིམ་ལས་ཙག་ཙིག་དང་བུ་ཆུང་གི་འགྲོ་འདུག   བྱ་བའི་བྲེལ་ཟིང་གི་ཁྲོད་ནས་དབུགས་སྣ་རེ་ལེན་ཞོར་འདས་བྱུང་གི་དོན་ལ་སེམས་པ་རེ་འཕངས་ནས།   ཐོག་མར་ཚེ་ཐོག་འདིར་ཡོང་ནས་དྲན་པ་རབ་རུབ་ཅིག་ཡོད་པ་ནས་ད་ལྟའི་བར་ཅི་འདྲ་གང་འདྲ་བྱུང་སོང་ངམ་སྙམ་ནས་  ཕྱིར་འདང་རེ་རྒྱབ་ན།    དངོས་ནས་བརྙན་འཕྲིན་འཕྲུལ་ཆས་ནང་གི་འགུལ་རིས་མགྱོགས་པོར་སྒྱུར་བ་དང་འདྲ་བར་ལོ་ངོ་སུམ་ཅུའི་ནང་གི་བྱུང་བ་ཡོད་ཚད་ཀྱི་    འགྲོས་མགྱོགས་ཤིང་ལོ་ངོ་སུམ་ཅུ་བོ་འདི་ཧ་ཅང་ཐུང་ཨང་སྙམ་བྱུང་བའི་མུར་ད་  ལྟའི་བར་དུ་དོན་སྙིང་ཅན་གྱི་ལས་ག་འདྲ་བྱས་སོང་བར་ཚང་རྩིས་མང་པོ་བརྒྱག་རྒྱུ་མ་བྱུང་བས་ཡིད་མུག་ནས་འདུག་དགོས་བྱུང་མོད།    འདས་སོང་གི་དོན་དག་རེ་གཉིས་ཤིག་ད་དུང་ཡང་དྲན་པའི་ཀློང་ན་གསལ་ལྷང་ངེར་འདུག་པས།  དྲན་པའི་མེ་ལོང་ཐེངས་ཤིག་ཕྱིས་ནས་ཕྱིར་འོང་མེད་པའི་ཁ་སང་ལ་མིག་ཞག་ཅིག་འཕེན་འདོད་ཆེ།    ད་ལྟའི་ང་མི་ལོ་སུམ་ཅུར་བུད་པ་འདིས་མི་ཚེ་ཞིག་གི་ཕྱེད་ཀ་ཕལ་ཆེར་ཡོལ ་ཟིན་པ་མཚོན་ལ།   མ་འོངས་པའི་དུས་ཚོད་ཀྱང་གཟབ་གཟབ་དང་ཞིབ་ཚགས་ཀྱིས་བརྒལ་དགོས་པ་དང༌།   ལྷག་པར་གཅེས་འཛིན་བྱ་དགོས་པར་སྐུལ་བ་མ་ཡིན་ནམ།   ཆུང་དུས་སུ་ཨ་ཡེ་1དྲིན་ཆེན་མས་རྒྱབ་ལ་ཁུར་ཏེ།   ཕྱུགས་ཟོག་གི་རྗེས་དེད་དེ་ལ་ལུང་དང་རི་སྒང་བརྒལ་དུས།    ངའི་མིག་ཟུང་སྒྲིབ་པར་བྱེད་པའི་ཁོང་གི་སྐྲ་དཀར་ཉག་མ་དག་ལ་ང་རང་སུན་སྣང་སྐྱེས་མྱོང་ལ།    སྐྲ་དཀར་ཉག་མ་དང་གཉེར་མ་ཤར་ཤུར་དག་ནི་ཁོང་མོ་དང་ཁོང་མོ་འདྲ་བའི་ཨ་ཡེ་ཨ་མྱེས་དག་ལ་ཆེད་དུ་སུ་ཞིག ་གིས་བཟོས་པར་སྙམ་པ་ལས་ཉིན་དང་མཚན།  ཟླ་དང་ལོ་བརྩེགས་ནས་མི་ཚེའི་ཤུལ་ལམ་རིང་མོ་ཞིག་དགའ་སྡུག་འདྲེས་མས་བསྐྱེལ་ནས་གྲུབ་པ་ཡེ་ནས་ཤེས་ཀྱིན་མེད་ ལ།   ནམ་ཞིག་གི་ཚེ་མིག་ཟུང་བཙུམས་ནས་ཚེ་འདིའི་ཡོད་ཚད་ལ་བདེ་མོ་འཇོག་  དགོས་པའང་གཏན་ནས་ཚོར་གྱི་མེད།    ཡིན་ནའང་རིམ་བཞིན་ནར་སོན་ནས་  སློབ་གྲྭ་ཆུང་འབྲིང་ཆེ་གསུམ་དུ་འགྲིམ་ཞིང་བྱིས་བློ་དང་གཏན་དུ་བྲེལ་དུས་ཨ་ཡེ་དྲིན་ཆེན་མ་ཁོང་ཡང་ལྷག་ཏུ་རྒ་བར་གྱུར་བས།   ང་རང་སློབ་གྲྭའི་ཉལ་ཁང་དུ་ཁེར་རྐྱང་དུ་སྡོད་དུས་རྒྱུན་དུ་ལུས་པོ་བདེ་ཐང་མིན་པའི་ཨ་ཡེ་དྲན་ལ་དྲན་ཐེངས་རེར་མིག་ཆུ་བྱོ་བཞིན།    མི་ཚེ་འདིར་ཆེས་འདང་བརྩི་ཆེ་བའི་མི་ཞིག་རང་ཉིད་དང་གཏན་དུ་ཁ་གྱེས་འགྲོ་བ་འདི་ནི་ཅི་འདྲའི་བཟོད་དཀའ་བའི་སྡུག་བསྔལ་ཞིག་རེད་ཨང་སྙམ།     ཡིན་ནའང་འཚོ་བ་ནི་སྔར་བཞིན་བསྐྱེལ་དགོས་པས།    དྲིན་ཆེན་མ་ཁོང་མོ་གཏན་དུ་ཁ་གྱེས་དུས་ཀྱང་མིག་ཆུས་སྐྱེལ་མ་བྱེད་པ་ལས་གཞན་པའི་ཐབས་བཀོད་ཅི་ཡང་མེད་པ་ཐོག་མར་ཚོར།    ཁོང་མོ་གྱེས་ནས་ལོ་ངོ་མང་པོ་ཞིག་འགོར་ཟིན་མོད།   ཁོང་མོའི་ལྷ་སྒྲུང་འདྲེས་མའི་གནའ་གཏམ་དང་ཁ་ཏ་སློབ་གསོའི་ཚིག་རེ་རེ་ད་དུང་ཡང་ངའི་དྲན་པའི་ངོགས་སུ་  གསལ་ལྷང་ངེར་ཡོད་ལ།    རྣ་ལོབས་སུ་སོང་བའི་གནའ་གཏམ་དང་ཁ་ཏའི་ཚིག་དེ་དག་གིས་ང་རང་ཡ་རབས་སྤྱོད་བཟང་གི་ཕྱོགས་ལ་ལམ་སྣ་ཐོག་མར་དྲངས་ཤིང་ང་རང་གིས་བྱིས་པ་ལ་སློབ་གསོ་བྱེད་པའི་ཐབས་ལམ་གྱི་ཆ་ཤས་སུའང་གྱུར་ཡོད།

     སྤྱིར་ན་ངས་རང་ལ་ཨ་ཡེ་འདས་པ་ལས་གཞན་པའི་སྡུག་བསྔལ་ཞིག་ཡོད་མི་སྲིད་སྙམ་མོད་ཀྱང༌།   མ་བསམ་ས་ནས་མི་ཚེའི་བགྲོད་ལམ་ནང་ཅིས་ཀྱང་བརྒྱུད་དགོས་པའི་དོན་དག་གང་མང་ལ་འཕྲད་ངེས་ཏེ།   དཔེར་ན།   ལང་ཚོའི་དཔལ་གྱིས་ཕྱུག་པའི་གཞོན་ནུའི་སྐབས་ཀྱི་བརྩེ་དུངས་དང་དེས་བྱིན་པའི་སྐྱིད་སྣང་དང་སྡུག་སྣང་ལྟ་བུ།    ངས་བསམ་ན་འདི་ནི་ང་ཚོ་སུ་ཡིན་ཡང་ཕལ་ཆེར་བརྒྱུད་དགོས་པའི་དོན་དག་ཞིག་རེད།    ད་ལྟ་ངས་ཕྱིར་འདང་རེ་རྒྱབ་ནས་བསམ་བློ་རེ་བཏང་ན།   ང་ནི་སེམས་པ་ཆེས་སྙི་ལ་དུང་ཞེན་ཆེས་ཟབ་པའི་རིགས་ཡིན་པས་མི་ཚེ་འདིར་ང་ལ་མིག་ཆུ་ཧ་ཅང་མོད།     ཡིན་ན་འང་ང་ལ་སྙིང་སྟོབས་ཧ་ཅང་ཆེ་སྟེ།    རང་ཉིད་ཀྱི་ དགའ་ཁ་ཁྱེར་སོ་དང་སེམས་པ་ཕྱོགས་ས་དེར་བློ་སེམས་རྩེ་གཅིག་གཏོད་ཅིང་ལྷག་བསམ་རྣམ་དག་གིས་བྲང་ཁོག་བསྟན་དེ་རང་ཉིད་ཀྱི་ཡོད་ཚད་དེ་ལ་ཕུལ་ཅི་ཐབས་བྱེད་པས།   ངའི་ལུས་སེམས་གང་རུང་ན་རྨ་ཁ་ཧ་ཅང་མང༌།    མིག་ཆུ་དེ་བཞིན་དུ་མང་བས་མིག་ཆུ་ལ་སུན་མཁན་ཡོད་ན་དགོངས་དག་ཞུ།   རྨ་ཁ་དང་མིག་ཆུ་མང་བས་ཁེར་རྐྱང་གི་མཚན་མོ་འང་རིམ་བཞིན་ཇེ་མང་དུ་སོང་ལ།    ཕྱི་ལ་ཤོད་སྲོད་མེད་པའི་གསང་བ་གང་མང་ཞིག་ཀྱང་སྔས་འོག་གི་འབྲི་དེབ་ཆུང་ཆུང་ཞིག་གི་ཤོག་ངོས་སུ་ག་ལེར་སྦས་དགོས་སོང༌།     སྡུག་བསྔལ་གྱིས་སྦྱར་ཞིང་མིག་ཆུས་བངས་པའི་གཏམ་རྒྱུད་ཁ་བོ་ཞིག་གི་རྗེས་སུ་ཡང་བསྐྱར་དུངས་སྣང་བན་བུན་ཞིག་གིས་ཡོངས་སུ་    བསླུས་ནས་མི་ཚེའི་བགྲོད་ལམ་ཁྲོད་དུ་རང་གིས་རང་ལ་ལ་མོ་གཟར་མོ་ཞིག་བསྐྲུན་ནས་དཀའ་སྡུག་ཁྲི་ཕྲག་རྒྱབ་རྗེས་ཀྱི་དཔྱིད་ཟླ་མགོ་མ་ཚེས་དུས་ཤིག་ལ་ངས་ཁོ་བོ་དང་མཉམ་དུ་སྦས་པའི་དེབ་ཆུང་དེ་སྙིང་སྟོབས་ཆེན་པས་ཁོ་བོ་ལ་ཕུལ་རྗེས།    ང་རང་  སེམས་པའི་ཁོ་ཐག་ཆད་དེ་རང་ཤག་ན་གཅིག་པུ་མིག་ཆུ་འབྱིད་ཀྱིན་སྡོད་དུས།   ཁོ་བོ་ལོག་འོང་སྟེ།  ངས་བྲིས་པའི་སྙན་ངག་ཡག་པོ་འདུག་ཟེར།    ངའི་སྣང་ངོར།   སྐབས་དེ་ནས་ཁོ་བོ་ང་དང་ཐག་ཉེ་རུ་གྱུར་བ་འདྲ་བས།   ངས་ནུས་ཤུགས་ཡོད་དགུ་བཏོན་ནས་དཔེ་ཆར་བལྟས་ཤིང་སྙན་ངག་འབྲི་སྦྱོང་བྱེད་པ།    སྐད་ཆ་སྨྲ་དག་པར་སྦྱོང་བ།   རི་མོ་འབྲི་བ།   དེང་རབས་གླུ་དབྱངས་ལ་ཉན་རྒྱུར་ལོབས་པར་བྱེད་པ།  རྒུན་ཆང་ཉུང་ཙམ་འཐུང་བར་བྱེད་པ།   ཁོ་བོ་དང་མཉམ་དུ་རིག་རྩལ་ལེ་ཚན་ལ་ལྟ་བ།   ཁོ་བོའི་གྲོགས་པོ་ཚོ་འཛུམ་དཀར་ཚིག་བཟང་གིས་གདོང་ནས་བསུས་པ་སོགས་    མདོར་ན།   ཁོ་བོའི་དགའ་ཕྱོགས་དང་བསམ་ཕྱོགས་ང་ཡི་འང་ངོ།   རྒྱུ་མཚན་ཇག་པ་ཞིག་གི་ཆུང་མ་བྱ་དགོས་ན་རྟ་ཞོན་ཤེས་དགོས་པས་མ་ཡིན་ནམ།   འདི་ལྟར་དུ་ ཡིན་མོད་ཀྱང་ཐལ་དྲག་མེད་དེ།    མི་ཞིག་ལ་དགའ་བ་ཡིན་ན་དགའ་ཤ་སྟག་བྱ་དགོས་པས་སོ།         (མུ་འགོད)

1ཨ་ཡེ་ནི་ཨ་མདོ་མཚོ་ལྷོ་ས་ཁུལ་གྱི་རོང་ཁུལ་མང་ཆེ་བར་ཕ་མའི་མ་ལ་འབོད།

 

rl25258 | རྩོམ་ཡོངས་ཀློག་པ།(558) | ལན་སློག(7)
སད།
2011-12-20 9:06:44

སད།  

                       གླེང་གཞི།

བདེ་སྐྱིད་ནི། 

མཁའ་མཐའ་རུ་འོད་ཆེམ་ཆེམ་དུ་འཕྲོ་བའི་སྐར་མའི་གཟི་འོད་དེ་མ་རེད།

བདེ་སྐྱིད་ནི།

སྙིང་ཁུངས་སུ་ཡར་འཕགས་པའི་ཚོར་བ་ཟ་ཟའི་བཟི་ཁ་དེའང་མ་རེད།

                                 

ནམ་ཞིག་ནས།   ཁུ་སིམ་མེར།   ང་རང་ཁྱོད་ཀྱི་སྙིང་དབུས་ནས་ག་ལེར་བཞུད།

ཆུ་མིག་ཅིག་སྤང་ཁུད་ནས་ཡུན་གྱིས་སྐམ་པ་བཞིན།

ནམ་ཞིག་ནས།   ཁེར་རྐྱང་གིས།   ཁྱོད་ཁོ་ན་དེ་ལྟར་རྒས་ཤིང་འཁོགས།

རྒོད་པོ་ཞིག་གིས་བསྐྱུར་བའི་བྲག་སྐྱིབས་བཞིན།

གཅེས་ལོ།   ཁྱོད་ཀྱི་སེམས་པ་དེ་སླེབས་པ་འཕྱི་དྲག་པས་ཡིན་ནམ།

 

མཚན་མོའི་ལྷིང་འཇགས་དང་མཛེས་སྡུག་གི་བསླུ་བྲིད་ཀྱིས།

ངའི་རྨི་ལམ་ནས་ཁྱོད་རང་རེ་ཞིག་བོར་དགོས་བྱུང༌།

མཁའ་མཐའི་སྐར་ཚོམ་གྱིས་འབོད་པ་གཏོང་བའི་འཕྲུལ་སྣང་གིས།

ངའི་མིག་ཟུང་དུ་ཁྱོད་རང་ཡུན་ཞིག་ལ་བོར་དགོས་སོང༌།

གཅེས་ལོ།   ཁྱོད་ཀྱི་ཞེ་འདང་དེ་འོངས་པ་འཕྱི་དྲགས་པས་ཡིན་ནམ།

 

གཅེས་ལོ་ཨང༌།  

ངལ་དུབ་ཀྱིས་མནར་བའི་ངའི་ཕྱི་མིག་གི་སྣེ་རུ་སྙིང་ཉེ་ཉེ་ངང་འགྲེང་བ་དེ་སུ་ཡིན།

ཁྱོད་ཀྱིས་ངའི་ངུ་འབོད་ལ་བྱིན་པའི་ཨ་ལན་དྲོན་མོ་དེ།

ངའི་ང་རྒྱལ་དང་རང་སྣང་གི་དུག་ལོ་གཅོད་པའི་རྨོངས་སེལ་གྱི་རལ་གྲི་ཨེ་ཡིན།

                                   

ཡུན་རིང་བརྒལ་བའི་སྟོང་སྣང་གི་ཟམ་ཆེན་ཡོམ་ཡོམ་འགུལ།

ཡུན་རིང་ཉར་བའི་འཕྲུལ་སྣང་གི་ནོར་བུ་གང་ལ་ལྷུང༌།

སུ་ཞིག་གི་སེམས་ཁུངས་སུ་མཚོ་ལྟར་འཁྱིལ་མ་ཐུབ་པའི་ང་ཡི་ཞེ་འདང༌།

རླུང་གིས་སྤུར་བའི་བྱ་སྒྲོ་བཞིན་གང་དུ་ཐོར།

སུ་ཞིག་གི་ཡ་ཆུང་ལ་དཔར་དུ་འ

དེབས་མ་ཐུབ་པའི་ང་ཡི་འཛུམ་ཆུང༌།

སད་ཀྱིས་བཅོམ་པའི་འདབ་མ་བཞིན་སུ་ཡིས་བརླགས།

 

གཏན་དུ་ནོག་པ་མེད་པའི་སེམས་རྟེན་ཡ།

ཁྱོད་ཀྱི་བདེ་སྡུག་སེམས་ཀྱིས་འཚོ་བ་དེ་ངའི་ཆོད་སེམས་ཤིག་གི་དབུ་ཁྱུད་ཡིན་པས།

ཁྱོད་དང་དཔུང་བ་མཉམ་བཤིབས་ཀྱི་སྣང་བ་དེ་བདེ་སྐྱིད་ཅིག་གི་ཁུགས་སོ་ཡིན་པས།

མག་མོག་གི་ལམ་བུ་ཞིག་ལ་རྐང་རྗེས་ཕབ་ཉིན་ནས།

ཨམ་གཙུགས་བསྡམས་ཏེ།

བརྣག་ཟིན་པའི་རྨ་ཁ་ལ་སེན་འདྲེད་བྱས་པ་ཐེངས་གཅིག་མིན།

 

སྐྱ་རེངས་ཀྱི་ཡོལ་བར་མཚམས་སྤྲིན་གྱི་གཟི་འོད་ཕོག་དུས།

ངའི་འཇིག་རྟེན་ནས་གཏན་དུ་ཡལ་ངེས་པའི་སྐར་མདའ་དེ་སུ་ཡིན།

 

ཐུགས་འཕྲད་ཀྱི་བར་སྟོང་ལ་དགའ་སྣང་གི་འཇའ་རིས་ཡལ་དུས།

ངའི་མིག་ཀོང་ན་འོད་དུ་འཚེར་སྲིད་པའི་མཆི་མ་རྡོག་པོ་དེ་སུ་ཡིན།

དེ་བས།    སྙིང་སྡུག

ཟུར་མིག་གི་བཟི་ཁ་ཉམས་པས་བསྐྱུར་འཇོག

བརྩེ་བ་ཡི་ཉིང་བཅུད་ཟད་པས་བདེ་མོ།

                  

རྦ་རླབས་ཀྱིས་ཕྱིར་འདེད་མ་ཐུབ་པའི་དུང་དཀར་སྙིང་རྗེ།

ཉ་ཆུང་གི་སྒལ་གཞུང་ལ་ཞོན་མ་ཐུབ་པའི་མུ་ཏིག་རྡོག་པོ།

བུ་ཆུང་གངས་དགའ་རིག་གྲོལ།

སྐར་ཁུང་མེད་པའི་རྒྱ་མཚོའི་རུམ་ཁུངས་ནས་ཨ་མ་དྲན་ཨེ་བྱུང༌།

 

འཚོ་བའི་གདན་སྟེང་ན་མིག་ལ་མཛེས་པའི་སེམས་ཀྱི་ནོར་བུ།

ང་ཡི་བླ་སྲོག་ལ་དམ་དུ་བརྒྱུས་པའི་མི་ཚེའི་སྙིང་བོ།

བུ་ཆུང་གངས་དགའ་རིག་གྲོལ།

སྒེའུ་ཁུང་མེད་པའི་བརྩེ་བའི་སྙིམ་པ་རུ་ཨ་ཕ་དྲན་ཨེ་བྱུང༌།

 

དུས་ཀྱིས་འཚེམས་པའི་ངོ་གདོང་གི་གཙེགས་གྲུབ་ལ་དོ་སྣང་བྱོས།

ལོ་ཟླས་བརྐོས་པའི་སེམས་ངོགས་ཀྱི་རི་མོ་ལ་ཡིད་འཇོག་བྱོས།

ཁྱོད་ཀྱི་ཞིབ་ཚགས་ཀྱི་འཚོ་བའི་སྲུབས་ཀ་གང་རུང་ན།

ཕ་མེས་ཀྱི་རུས་རྐང་བཞུས་པའི་དྭངས་མ་ཡོད།

བུ་ཆུང་གངས་དགའ་རིག་གྲོལ།  

འཇིག་རྟེན་འདིར་བག་ལྷོད་ཅན་གྱི་མིག་ཟུང་དང་སེམས་པ་མེད་པས།

འགྲོ་རོགས་མེད་པའི་མྱ་ངམ་ཐང་ཆེན་དུ་འཐུང་ཆུ་རང་གིས་ཚོལ།

གངས་རི་ཉུག་པའི་ཁོར་ཡུག་དོག་མོ་རུ་མདུན་ལྗོངས་རང་གིས་སྐྲུན།

ཁ་དོག་མེད་པའི་རྨི་ལམ་སྐྱ་བོ་རུ་ཚོན་མདངས་རང་གིས་བྱུགས།

                       

ནར་སོན་པ་ཡིན་ནམ།

རྒྱང་རིང་དུ་ཕྱིན་པའི་ང་ཡི་ཐོག་མའི་རྨི་ལམ་ཁྱོད་ཁོ་ནའི་ཡིད་ན་གསལ།

འུ་ཐུག་པ་ཡིན་ནམ།

ཡུན་རིང་ལ་སྒུག་པའི་ང་དང་འཛོམས་ཆད་ག་ཚོད་ཁྱོད་ཀྱི་ཡ་ཆུང་ན་དཀག

རྨི་ལམ་དུ་འཆར་ཉུང་བའི་ཁྱོད་ཀྱི་ཞལ་རས།

ག་དུས་ཤིག་ནས་ངའི་དྲན་ཡུལ་དུ་མག་མོག་ནས་རབ་རིབ་དུ་གྱུར།

གུད་ཡངས་གནང་རོགས།    ཨ་ཕ།

 

ཁ་པར་ལས་འཕུར་ཡོང་བའི་ཁྱོད་ཀྱི་ཚིག་འབྲུ་མ་ལུས།

ངའི་འཚོ་བ་ཡི་ལྷུ་ལག་ཆ་ཚང་ཡིན།

རྣ་ལམ་དུ་འཁོར་ཡོང་བའི་ཁྱོད་ཀྱི་ཁ་ཏའི་གསུང་ཚིག

ངའི་ཚེ་སྲོག་གི་གསོས་སྨན་ངོ་མ་ཡིན།

དུས་ཚོད་ལ་བསྡོད་བཟོད་མེད་ཀྱང་སེམས་པ་ཡི་སྒོ་མོ་བརྒྱབ་པས།

གུད་ཡངས་གནང་རོགས།    ཨ་མ།

 

ལང་ཚོའི་མེ་ཏོག་དེ་སུ་ཡི་ཆེད་དུ་རྙིད་དགོས་སོང༌།

ཕྱེ་ལེབ་ཀྱི་ཁྱུ་ཚོགས་འཕུར་བའི་དུས་ཚིགས་ད་དུང་ཡལ་མེད།

དགའ་སྤྲོའི་དགོད་སྒྲ་དེ་ཅིའི་ཕྱིར་དུ་ཆད་དགོས་སོང༌།

ཁུ་བྱུག་གི་དྲུག་འགྱུར་སྒྲོག་པའི་དུས་ཚིགས་ཀྱང་ད་དུང་གནས་འོས།

ཁྱོད་ཀྱིས་ངལ་དུབ་དང་རྒ་བ་འཁུར་ལྕི་སོང༌།    ཨ་ཅེ།

ང་ཡིས་ལག་འཇུ་དང་དྲོད་ཁོལ་བསྲིངས་འཕྱི་སོང༌།   ཨ་ཅེ།

                                        མཇུག་བྱང༌།
ཉིན་མཚན་དུས་དྲུག་རེས་མོས་སུ་བརྩེགས་པའི་མི་ལོ་སུམ་ཅུའི་བར་བླགས་ནས།
ངའི་བྲང་ཁོག་ན་བསྐྱིལ་བའི་བརྩེ་ཞེན་གྱི་འོ་མཚོར་རོལ་མ་སོང་བ་དེ་དག་སུ་ཡིན།
ངའི་མིག་ཟུང་ནས་ཟེགས་པའི་དགའ་སྡུག་གི་མཆི་མས་ཡང་ཡང་བྲན་པ་དེ་དགསུ་་ཡིན།
ཡང་ན།  ངུ་ངག་གི་འགྱོད་གཤེགས་རིང་མོས་རང་སེམས་ལ་སོས་པ་མེད་པའི་རྨ་ཁ་འཇོག
ཡང་ན།  བྲང་ཁོག་གི་སྙིང་ཁྲག་དྲོན་མོས་སྙིང་ཉེ་བའི་མི་ལ་སྐལ་བརྒྱར་བརྩེ་བ་མཆོད།

 

 

 

rl25258 | རྩོམ་ཡོངས་ཀློག་པ།(692) | ལན་སློག(10)
བོདམོའི་བློ་སྤོབས་འདི་མོ་ཡིན་དགོས།
2011-12-9 9:41:15

བློ་སྤོབས།

དུངས་བརྗོད་གླུ་དབྱངས་ཞིག་ལ་ཉན་རྗེས།

མཚོ།

ང་ནི་རྡེའུ་ཞིག་མིན་ལ

མིག་ཆུ་རྡོག་གཅིག་ཀྱང་མིན

 

ང་ནི་བྱེའུ་ཆུང་ཞིག་སྟེ

དགའ་འཛུམ་གྱི་བར་ནས

ཕྱི་མིག་གི་ཀློང་ནས

གཤོག་ཟུང་སྟོབས་ཀྱིས་བརྐྱངས

སེམས་པ་རྒྱང་ལ་ཕྱོགས

 

འཕུར་བསྐྱོད་ཀྱི་བར་སྣང

རང་དབང་གི་སེམས་པ

གཡའ་དག་པའི་ནམ་མཁའི་བྲང་གཞུང་ནས

ཐོལ་གྱིས་བརྒལ

 

ང་ནི་བྱེ་རྡུལ་ཞིག་མིན་ལ

སྟོན་ལོ་ཞིག་ཀྱང་མིན

 

ང་ནི་ཆུ་ཕྲན་ཞིག་སྟེ

འཁྲེང་སེམས་ཀྱི་ཁུགས་ནས

བརྩེ་འདང་གི་དབུས་ནས

ཟེགས་མ་ཤུགས་ཀྱིས་འཕྱོ

སེམས་འདུན་རིང་དུ་བསྲིངས

 

མཆོངས་རྩལ་གྱི་རང་སྣང

ཡིད་ཆེས་ཀྱི་སེམས་པ

རྒྱ་ཆེ་བའི་ས་གཞི་ཁོང་ནས

ཕ་མཐའ་བརྒལ

༢༠༡༡ལོའི་ཟླ༡༢པའི་ཚེས༧པའི་མཚན་མོ།

rl25258 | རྩོམ་ཡོངས་ཀློག་པ།(598) | ལན་སློག(6)
སྦྲང་ཆར་སོགས་དུས་དེབ་འགར་བཀོད་པའི་སྙན་ངག་འོས་སྦྱོར།
2011-10-29 11:17:51

སྙན་ངག་ནི་ཅི་ཞིག་ཡིན་ནམ།

མཚོ། (མཚོ་ལྷོ)

 

སྙན་ངག་ནི་ཅི་ཞིག་ཡིན་ནམ།

སྙན་ངག་ནི་མཇལ་འཛོམས་ཀྱི་དགའ་སྤྲོའི་སེམས་གཞས་ཡིན།  

སྙན་ངག་ནི་སྙིང་སྡུག་གི་སྙིང་གཏམ་དམར་པོ་ཡིན།  

སྙན་ངག་ནི་གྱེས་བྲལ་གྱི་རྨ་ཁའི་ཟབ་ཚད་ཡིན། 

སྙན་ངག་ནི་བརྩེ་དུང་གི་རྡོ་རྐོས་གཏམ་རྒྱུད་ཡིན།

 

སྙན་ངག་ནི་ཅི་ཞིག་ཡིན་ནམ།

སྙན་ངག་ནི་ཁྱོད་ཀྱི་བརྩེ་བས་གཏམས་པའི་མིག་ཟུང་དྭངས་མོ་ཡིན།

སྙན་ངག་ནི་བདག་གི་དུངས་པས་བྱུགས་པའི་ཡིད་འོང་གི་འཛུམ་རིས་ཡིན།

སྙན་ངག་ནི་ཁྱོད་ཀྱི་སེམས་ལ་བསྲིངས་བའི་བདག་གི་སེམས་འགྱུ་དམར་པོ་ཡིན།   

སྙན་ངག་ནི་བདག་གི་ཕྱོགས་སུ་སྤོ་བའི་ཁྱོད་ཀྱི་གོམ་པའི་འདེགས་འཇོག་ཡིན།

 

སྙན་ངག་ནི་ཅི་ཞིག་ཡིན་ནམ།

སྙན་ངག་ནི་ལྷབ་ལྷུབ་ཀྱི་ཁ་བ་བཞིན་གྱི་མཛའ་མོའི་འཇོ་སྒེག་ཡིན། 

སྙན་ངག་ནི་ལྷུང་ལྷུང་གི་ཆུ་རྒྱུན་བཞིན་གྱི་མཛའ་སེམས་ཀྱི་བཞུར་འགྲོས་ཡིན། 

སྙན་ངག་ནི་ཡུག་ཡུག་གི་རྩྭ་ལྗང་བཞིན་གྱི་རེ་སྒུག་གི་གཡབ་མོ་ཡིན། 

སྙན་ངག་ནི་ཟམ་ཟིམ་གྱི་སྦྲང་ཆར་བཞིན་གྱི་དྲན་གདུང་གི་མིག་ཆུ་ཡིན།

<<སྦྲང་ཆར>>དུས་དེབ་སྟེང་བཀོད་ཡོད།

 

ཁུ་སིམ་པའི་དུངས་པ།

མཚོ། (མཚོ་ལྷོ)

 

ཡོལ་བ་འདྲ་བའི་མཚན་གུང་གི་རྨི་ལམ་དེ

རོལ་དབྱངས་བཞིན་གྱི

ཁྱོད་ཀྱི་མཛེས་སྡུག་གིས་བྱིལ་བྱིལ་བྱེད་དུས

ང་ད་དུང་སུས་ཀྱང་ངོ་མི་ཤེས་པའི

མེ་ཏོག་མིང་མེད་དེ་ཡིན

 

ཨ་ཇོ་ལགས   ཆུང་འདྲིས་བྱམས་པ

ད་ནི  ང་རང་མཆོད་མདུན་གྱི་བུམ་པ་རུ་བཤམས་དུས

ཁྱོད་ཀྱི་ཁྲ་ཆུང་མིག་ན

སྣུམ་ཤིག་ཤིག་གི་ངའི་སེམས་པ་ཡོད་དམ

ངས་ཁྱོད་ཀྱི་མིག་ཟུང་ལས

ཁྱོད་ཀྱི་སེམས་པ་ཀློག་འདོད་ཇི་འདྲའི་ཆེ

 

ཨ་ཇོ་ལགས   ཆུང་འདྲིས་བྱམས་པ

སྐྱེ་བ་ཕྱི་མར

ང་ད་དུང་ཡང  སུས་ཀྱང་ངོ་མི་ཤེས་པའི

མེ་ཏོག་མིང་མེད་དེ་བྱེད་འདོད

ངས་ད་དུང་ཡང   ཁྱོད་ལ་ཚེ་གང་གི

བདེ་སྐྱིད་ཀྱི་སྨོན་ལམ་འདེབས

ཁ་ཁུ་སིམ་མེར་སྨོན་ལམ་འདེབས

༢༠༡༠ལོའི་<<གངས་རྒྱན་མེ་ཏོག>>དེབ་གསུམ་པའི་སྟེང་བཀོད་ཡོད།

 

བུ་མོ་དུང་མཚོ།

མཚོ། (མཚོ་ལྷོ)

 

མོ་ལོ་ཉི་ཤུ་ཇི་ལྟར་བཞུད་ཚུལ་མ་གླེང༌།།

མཛེས་པའི་མེ་ཏོག་ཇི་ལྟར་རྙིད་ཚུལ་མ་བཤད།།

བུ་མོའི་མིག་ཆུར་རིན་ཐང་མི་འདུག་མ་ཟེར།།

ཐེ་ཚོམ་སོམ་ཉི་དབྱར་གྱི་གནམ་ངོར་མ་བསྡུར།།

ཐམས་ཅད་དུང་མཚོར་དུངས་ཀ་ཆེ་བས་ལན་སོང༌།།

 

བསམ་པ་མེད་རུང་ཁ་ནས་འོ་མ་རྡོལ་བྱུང༌།།

བརྩེ་སེམས་འཕྲོག་རྗེས་མིང་ལ་སྒྲོལ་མ་བཏགས་བྱུང༌།།

ལོག་མལ་དྲིས་ན་མདུན་གྱི་མགྲོན་ཁང་བསྟན་བྱུང༌།།

མ་འོངས་གླེང་ན་མགོ་བོ་འཕྲེད་དུ་གཡུག་བྱུང༌།།

ཐམས་ཅད་དུང་མཚོར་དུངས་ཀ་ཆེ་བས་ལན་སོང༌།།

 

ཕ་མས་བརྩེ་བའི་རྒྱུན་ཐག་གཅོད་དགོས་གསུང་ན།།

མཛའ་བོས་བརྩེ་དུང་རླབས་ཆེན་ཡིན་ཚུལ་གླེང་བྱུང༌།།

བརྩེ་ཞེན་ཆུ་བོའི་རྒྱུན་ལ་འགྲོགས་དགོས་གསུང་བྱུང༌།།

ཅི་བྱེད་མི་འཚལ་ཡ་ཆུང་སྡུག་གིས་ཁེངས་བ།།

ཐམས་ཅད་དུང་མཚོར་དུངས་ཀ་ཆེ་བས་ལན་སོང༌།།

 

བརྩེ་བར་འགལ་བའི་བཀའ་ལུང་བཙན་པོ་ཞིག་དང༌།།

བརྩེ་བ་གཅོད་པའི་རལ་གྲི་སོ་གཉིས་མ་བོ།།

ཕུར་ཚུགས་སྡང་མིག་མདེའུ་བཅས་མཉམ་སྡེབ་ན།།

མཛའ་བོའི་ཕྱོགས་ལ་ལུས་སེམས་དབང་མེད་ཤོར་བ།།

ཐམས་ཅད་དུང་མཚོར་དུངས་ཀ་ཆེ་བས་ལན་སོང༌།།

 

རྣ་རྒྱབ་རླུང་ལ་བསྐུར་ཟིན་ཨ་མའི་སྙིང་གཏམ།།

མི་སྙན་ཚིག་གིས་བཅོམ་པའི་ཨ་ཕའི་བཙན་གཏམ།།

མི་འདོད་ན་ཟླའི་དབུས་ན་རྒྱུད་པའི་མི་ཁ།།

ཡོད་ཚད་མཛའ་བོས་མ་ཤེས་མ་ཚོར་གསུང་ཐལ།།

ཐམས་ཅད་དུང་མཚོར་དུངས་ཀ་ཆེ་བས་ལན་སོང༌།།

 

ལུས་སེམས་གཉིས་ཀ་སྡུག་ལ་སྦྱར་ཚུལ་གླེང་ན།།

མཛའ་བོས་ཚིག་གཅིག་གསུང་བ“དལ་མོར་སྒུག”རེད།།

བསྡད་ན་ཕ་མས་སེམས་ཁ་དཀྲུགས་འགྲོ་གསུང་གི།

མཚན་མོའི་ལམ་སྒྲོན་ཁྲེལ་དགོད་བྱེད་པའི་ཚུལ་འདི།།

ཐམས་ཅད་དུང་མཚོར་དུངས་ཀ་ཆེ་བས་ལན་སོང༌།།

                                <<ཟླ་ཟེར>>དུས་དེབ་སྟེང་བཀོད་ཡོད།

rl25258 | རྩོམ་ཡོངས་ཀློག་པ།(1471) | ལན་སློག(13)
ང་ལ་མིག་ཆུ་སློང་མཁན་སུ་ཡིན།
2011-5-17 8:51:19

ང་ལ་མིག་ཆུ་སློང་མཁན་སུ་ཡིན།

འཇབ་ཀྱིན་འཇབ་ཀྱིན་འོང་བའི།
མཚར་སྡུག་གི་རྨི་ལམ་རེ་རེས།
མངར་ཁ་སློང་བའི་རྒུན་ཆང་དམར་པོ།
ལྟེམས་ལྟེམས་ཀྱིས་དྲངས་ཡོང་དུས།
སྙིང་ཉེ་སུ་ཞིག་གིས་ཆེད་དུ་བསྐྲུན་པའི།
སྟོང་འཇགས་ཀྱི་མཚན་མོ་རེ་རེ།
ངའི་ར་བཟི་བའི་སེམས་པ་ཡི་ལོག་མལ་ཡིན་ནམ།
གཏིང་ཟབ་པའི་དྲན་གདུང་གི་གར་སྟེགས་ཡིན།
མཛེས་སྡུག་གི་རྨི་ལམ་རུམ་པའི།
བདེ་སྐྱིད་ཀྱིས་མཚན་མོ་རེ་རེ།
སྐྱ་རེངས་ཀྱི་བྲེལ་འཚུབ་ལས་ཕར་འདས་དུས།
ང་ཡི་སྔས་འགྲམ་ལ་རེ་ཆད་ཀྱི་མཆི་མ་སློང་མཁན་དེ་སུ་ཡིན།

ཉིན་གྲངས་བརྩི་བའི་མཛུབ་བར་ནས།
རླུང་བུ་བཞིན་ག་ལེར་བཞུད་འགྲོ་བའི།
མ་འོངས་བའི་ལོ་ཟླ་ག་ཚོད་ཅིག
རེ་སྒུག་གི་ཆེས་གཏིང་རིམ་ན་སྐགས་པའི་མར་ལོ་ཡིན་ངེས་ན།
ད་ནས་བཟུང༌།   ང་རང་དྲན་ཤེས་རྟུལ་བའི་རྒན་མོ་ཞིག་བྱེད་འདོད།

rl25258 | རྩོམ་ཡོངས་ཀློག་པ།(595) | ལན་སློག(4)
མཚོ་ཡི་སྙན་ངག་རིང་མོ། རྟག་བརྟན་གྱི་བརྩེ་བ།
2011-4-23 8:10:27

རྟག་བརྟན་གྱི་བརྩེ་བ། 

                                             མཚོ།

ང་རང་ཁྱོད་ཀྱི་ཁ་གཏད་དུ་འགྲེང་དུས་སུ།

རི་རྩེ་རུ་ཤུགས་ཀྱིས་བསྐྱོད་པའི་དར་ལྕོག་དེ་ཡིན་ནམ།

 

སྤོབས་པའི་རླུང་བུ་དེ་ཁྱོད་ཀྱིས་བཏང་པ་ཡིན་ན།

ཤུགས་གླུའི་དབྱངས་རྟ་དེ་ཁྱོད་ཀྱིས་བུས་པ་ཡིན་ན།

ཁྱོད་དེ།   ད་དུང་ཅི་ཞིག་བསྩོལ་པར་སྟ་གོན་བྱེད་པའི་ངལ་མེད་ཀྱི་ཁྱོད་ཨ།

ག་དུས་བར་དུ་བདག་གི་མཐོང་ལམ་དུ་གནས་སྲིད།

 

དར་གོས་ཀྱི་འཇམ་ཤ་མེད་ཀྱང༌།

བདག་གི་ཡུག་ཡུག་གི་མགོ་སྐྲའི་འཕུར་བསྐྱོད་དེས།

ཁྱོད་ཀྱི་སྐར་ཆེན་ལྟ་བུའི་མིག་ཟུང་དེ་བསྒྲིབས་ཨེ་སོང༌།

 

གཙང་བོའི་ལྷོད་ཤ་མེད་ཀྱང༌།

བདག་གི་ལྷུང་ལྷུང་གི་མཆི་མའི་བཞུར་འགྲོས་དེས།

ཁྱོད་ཀྱི་ས་ཆེན་ལྟ་བུའི་སེམས་པ་དེ་བརླན་ཨེ་སོང༌།

 

ཁུ་བྱུག་གི་དབྱངས་སྙན་མེད་རུང༌།

བདག་གི་སིང་སིང་གི་འབོད་པའི་ངག་ཚིག་དེས།

ཁྱོད་ཀྱི་སྦྲང་ཆུང་ལྟ་བུའི་རྣམ་ཤེས་དེ་བཀུག་ཨེ་སོང༌།

 

གནས་འདི་ནས།   ཁྱོད་ཀྱིས་ཅིས་ཀྱང༌།

བདག་གི་སྡུག་ཡུས་ལ་ཨ་ལན་སྟེར་རོགས།

བདག་གི་སྐྱོ་ངལ་ལ་སེམས་གསོ་གནང་རོགས།

བདག་གི་འདུན་པ་ལ་སྡོངས་གྲོགས་མཛོད་རོགས།

བདག་གི་དུངས་སེམས་འདི་སྙིམ་པས་སྐྱོར་རོགས།

བདག་གི་འཇིག་རྟེན་འདིར་དྲོད་ཁོལ་སྐྱེལ་ཤོག

               

བྲག་གཟར་འདིའི་རྒས་ཁོག་གིས།

ལོ་ཟླས་བཅོམ་ཚར་བའི་ཨུ་ཚུགས་ཤིག་གི་ངོ་གདོང་བསྟན་བྱུང༌།

ངོ་གདོང་ཟད་པོ་དེའི་སྟེང་ན་སྐམ་པའི།

མེ་ཏོག་གི་འདབ་མའི་རྡུལ་ཕྲན་བསྟན་བྱུང༌།

ད་དུང༌།    རྒོད་པོ་ཞིག་གི་གཤོག་སྒྲོ་ཐར་ཐོར།    

ནོར་ནག་ཅིག་གི་མགོ་རུས་སྐམ་པོ།   རྫི་བོ་ཞིག་གི་འུར་ཆ་ཟད་པོ།

ད་དུང༌།    གཞོན་ནུ་མ་ཞིག་གི་བརྩེ་བ་རལ་བོ་ཞིག་ཀྱང༌།

ལོ་ཟླའི་རླུང་བུས་འཐག་བཞིན་པ་བསྟན་བྱུང༌།

 

ཤེས་པར་གྱིས།   ང་རང་སྔ་ས་ནས་གནས་འདིར་འཐིམ་ཡོད།

འཐིམ་ཡོད་པའི་རྐྱེན་གྱིས།

རླུང་འཚུབ་ཀྱིས་མུ་ནས་མུ་རུ་བརྡར་བའི་བྲག་ངོས་སུ

བདག་གིས་ཁྱོད་ལ།  སྔར་བཞིན་དྲག་ཏུ་འབབ་པའི།

དུངས་ཞེན་གྱི་རྦབ་ཆུ་ཞིག་གི་མདུན་ལྗོངས་བཤམས་ཡོད།

                    

དྲོད་རླབས་ཀྱིས་སྐྱོང་དགོས་པ།

དཔྱིད་མགོའི་མེ་ཏོག་དང་འཁྱག་གིས་བསྡམས་པའི་ཆུ་ཕྲན་ཁོ་ན་ག་ནས་ཡིན།

ཨུ་ཚུགས་ཀྱིས་མནར་བའི་སེམས་པ་ཧྲང་བོ་འདི་འང༌།

རེ་སྒུག་ཟད་པོ་ཞིག་གི་རྗེས་ཤུལ་དུ་ཨམ་གཙུགས་བསྡམས་ཏེ།

གཡས་གཡོན་ནི་ཅི་ཞིག་གི་བསླུ་བྲིད་ཀྱིས་སྦགས་པའི་འདུ་ཤེས་ཀྱིས།

ཁྱོད་ཁོ་ན།   མངོན་སུམ་གྱི་བདེན་དོན་ཉག་ཅིག་ཏུ་གྲུབ།

དེ་ལྟ་ན།  འོད་དཀར་བསྣམས་པའི་ཚེས་རིས་ཀྱི་བསིལ་ཟེར་དེ།

མཚམས་སྤྲིན་བཅིངས་པའི་ཉི་གཞོན་གྱི་འོད་ཟེར་དེ།

ཏག་ཏག    ང་ཡི་ཁྱོད་ལ་མངའ་ངེས་ཡིན།   མངའ་ངེས་ཡིན།

 

མར་གཤམ་ན་སྒྱིད་ལུག་གིས་བཞུར་བའི་ཆུ་མིག་དེ།

སུ་ཞིག་གིས་བཏོན་པའི་སྡུག་ཡུས་ཀྱི་མིག་ཆུ།

ཡང༌།  ཁྱོད་རང་ཨུ་ཚུགས་ཀྱིས་ང་ལ་ཕྱོགས་དུས་སུ།

འུ་ཐུག་གིས་བཞུར་བའི་མཆི་མ་ཨེ་ཡིན།

ཡིན་ན་འང༌།    

ཁྱོད་ཀྱི་སྙིང་ཆུང་གི་འཕར་ལྡིང་དེ་ང་ཡིས་གོ་ན་བསམ་གི

ཁྱོད་ཀྱི་འཛུམ་ཆུངགི་གྲོལ་སྟངས་དེ་ང་ཡིས་མཐོང་ན་བསམ་གི

ཁྱོད་ཀྱི་མིག་ཟུང་གི་གཡོ་འགུལ་དེ་ང་ལ་ཕྱོགས་ན་བསམ་གི

                       

མིག་གིས་མཐོང་ཚད་ཀྱི་ཕ་རོལ་གྱི་ཕ་རོལ།

ཤང་ཤང་གི་ཆུ་མོ་བཞིན་འབབ་པའི་དུས་ཚོད་དང་ལང་ཚོའི་བཞུར་རྒྱུན།

ལང་ལོང་གི་སྤྲིན་པ་ལྟར་འཁྲུགས་པའི་སེམས་པ་དང་དུང་ཞེན་གྱི་འདུ་འགོད

ཐར་ཐོར་གྱི་ནོར་ལུག་བཞིན་བརྡལ་བའི་སྙིང་གཏམ་དང་མིག་ཆུའི་ཉམ་ཐག

རབ་རིབ་ཀྱི་གངས་རི་བཞིན་བསྙལ་བའི་འདུན་མ་དང་རྨི་ལམ་གྱི་རྒས་ཁོག

ད་དུང༌།  ངལ་དུབ་ཀྱི་ཉི་ཟླ་སྐར་གསུམ།    དབུལ་ཕོངས་ཀྱི་རྩྭ་ཐང་ཡངས་པོ།

ཁེར་རྐྱང་གི   སྦྲ་ནག་གི་རྣམ་ཤེས་འཁྱམ་པོ།

ཡོད་ཚད་ཀྱི་ཡོད་ཚད།  རེ་གསལ་རེ་མོག་གིས།   

བདག་ལ་གཏམ་རྒྱུད་ཁ་བོ་ཞིག་གི་མགོ་རྐང་སྒྲིག་བཞིན་ཡོད་དམ།

 

མེ་སྟག་ཚ་ཚ་མཆེད་པའི་ཁྱོད་ཀྱི་མིག་དབལ་རྣོན་པོ།

བདག་གི་ཡ་ཆུང་གངས་དཀར་ལ་ཁྲག་སྣག་བསྐྱིལ་བའི་མདའ་མོ་ཨེ་ཡིན

བདག་གི་གློ་སྙིང་མཆིན་གསུམ་ཧྲུག་ཧྲུག་ཏུ་བཟོ་བའི་མདུང་གྲི་ཨེ་ཡིན།

རླུང་འཚུབ་དང་འགྲོགས་པའི་བྱ་རྡུལ་གྱི་ངར་ཤུགས།

ཁྱོད་ཀྱིས་ང་ལ་རྟེན་དུ་གནང་བ་ཨེ་ཡིན།

བསྐྱུར་མ་འཇོག    ན་ཟུག་དེ།

ཁྱོད་ཀྱིས་ང་ལ་དམིགས་སུ་གཏད་པའི་སྦྱིན་པ་ཡིན།

                   

ཁྱོད་ཀྱི་ཁ་གཏད་དུ་འགྲེང་དུས་སུ།

ང་ནི་རི་རྩེ་རུ་ཤུགས་ཀྱིས་བསྐྱོད་པའི་དར་ལྕོག་དེ་ཡིན།

གསོན་སྙིང་གི་འཕར་ལྡིང་དེ་ཁྱོད་ཀྱིས་བཅད་ཆོག

ཚེ་སྲོག་གི་འདབ་མ་དེ་ཁྱོད་ཀྱིས་བཅོམ་ཆོག

མིག་ཀོང་གི་དྭངས་གཙང་དེ་ཁྱོད་ཀྱིས་བརྙོགས་ཆོག

སེམས་གཏིང་གི་རེ་སྨོན་དེ་འང༌།

ཁྱོད་ཀྱིས་ཚལ་བར་གས་ཆོག

                     ཞེས༢༠༡༡ལོའི་ཟླ༤པའི་ཚེས་༢༢ཉིན་གྱི་ཕྱི་དྲོར།

 

 

 

 

rl25258 | རྩོམ་ཡོངས་ཀློག་པ།(746) | ལན་སློག(8)
ང་ཁྱོད་དང་ཉེ་བར་བཅར་འདོད།
2011-3-20 13:47:48

                  ང་ཁྱོད་དང་ཉེ་བར་བཅར་འདོད།
       ནམ་ཡང་མཐོང་ལམ་རབ་རིབ་དུ་བྱེད་པའི་པྲ་ཚེགས་ཀྱི་སྤྲིན་པ་ལེབ་མོའི་ཚོགས།   ལྷིང་འཇགས་ཀྱི་བསམ་གཞིགས་རེ་ཞིག་རེ་ཞིག་དཀྲོག་པའི་འཕུར་ལྡིང་གི་བྱེའུ་ཆུང་སྤྲོ་དགའ་ཅན་དག   སྣུམ་ཤུག་ཤུག་གི་གཤོག་ཟུང་གི་ལྡེམ་རྩལ་ངོམ་པའི་ང་རྒྱལ་གྱི་གླག་རྒོད་སྤྱང་པོ།  ད་དུང༌།   ད་དུང༌།   ཅི་ལ་འང་འཐམ་ཞིང་གང་སར་མཆུ་གཙེགས་བྱེད་པར་དགའ་པའི་ད་དིར་གྱི་འབུ་སྲིན་ལྟོ་དགའ་ཅན་ཚོ།   ཉི་མའི་ཚ་ཟེར་དང་འགྲོགས་ནས་ཇི་འདྲའི་བག་གཡེངས་དང་རང་དབང་གིས་འཚོ་ཨང༌།
         ཏག་ཏག་འདི་འདྲའི་ནམ་ཟླ་དང་དུས་ཚོད་ཀྱི་སྐབས་སུ།   ང་འམ་ཅི་ཞིག་གིས་འཁུར་དུ་ལྕི་བའི་སུ་ཞིག   ལོ་འདབ་བཀྲེས་སྐོམ་ཅན་དག་འཁུར་བའི་ངལ་དུབ་ཀྱི་ལྗོན་འོག་ན།   མིག་ཆུ་དྭངས་མོ་ཞིག་གི་གསོས་སྨན་ལས།   རེ་བ་ལྷག་མ་ཞིག་ལ་ཡིད་ཆད་ཐབས་མི་འདུག  ཉི་ཟེར་ལ་དེ་དུས་ཀྱི་འཇམ་ཤ་མེད་ན་འང༌། བརྗིད་ཆགས་གངས་རི་ལྟ་བུའི།   རྒྱ་རྫོང་ནགས་ཀླུང་འདྲ་བའི།  ལྷུང་ལྷུང་རྫ་ཆུའི་ཚུལ་གྱི།   ཁོད་ཡངས་རྩྭ་ཐང་བཞིན་གྱི་ཁྱོད།  ངའི་གཉོམ་དུང་དུང་གི་མིག་ཟུང་དང་སེམས་པའི་བར་ན།  གཡུལ་ས་གང་ཞིག་ནས་རྒྱལ་བའི་དཔའ་བོ་རྨས་མ་ཞིག་གམ།  རྨི་ལམ་གང་ཞིག་ན་མཛེས་པའི་རྒྱབ་ལྗོངས་ཧྲུལ་པོ་ཞིག  ཡང་ན།  ངའི་སེམས་ཀྱི་གཞི་མར་མཆི་མའི་ས་བོན་གཏོར་མཁན་གྱི་སེམས་བརྟེན་རྣལ་མ་དེ་ཡིན་ན།   གཏོང་རིམ་གྱི་སྨུག་ཀློང་གསེད་པར་བྱེད་པའི་མིག་ཟུང་གིསངའི་ཡ་ཆུང་གི་ཆེས་འཇམ་དང་དྭངས་སར་དོགས་སྣང་བན་བུན་ཞིག་གི་གཉེར་རིས་བཀོད་དོན་ཅི།

rl25258 | རྩོམ་ཡོངས་ཀློག་པ།(540) | ལན་སློག(4)
འབྲེལ་ཡོད་ནང་དོན་ 12 ཡོད།<<<12>>>
ཟིན་བྲིས་བརྡ་ཁྱབ།

 

སྨྱུག་མིང་།  མཚོ།

དྲ་འབྲེལ། 1013461908

དྲ་ལམ། http://blog.tibetcm.com/u/tso25258/index.html

སྙན་ངག་ཡོད་པས

ངས་ནང་སེམས་ཀྱི་དགའ་སྐྱོ་ཆགས་སྡང་གླུ་རུ་བླངས་ཆོག

སྙན་ངག་ཡོད་པས

ངའི་བརྩེ་དུང་ལ་འཇའ་ཚོན་གྱི་ཁ་དོག་ལྡན་ཡོད

སྙན་ངག་ཡོད་པས

དགའ་སྐྱོ་མིག་ཆུར་མུ་ཏིག་གི་རིན་ཐང་ལྡན་ཡོད

སྙན་ངག་ཡོད་པས

ང་ལ་རྒྱ་མཚོ་བཞིན་གྱི་སེམས་ཀྱི་མངའ་ཐང་རྒྱས་ཡོད

སྙན་ངག་ཡོད་པས

ང་ལ་གངས་རི་བཞིན་གྱི་བརྟན་བརླིང་གི་རང་གཤིས་གྲུབ་ཡོད

སེམས་ཁམས་ལོ་ཐོ།
པར་དེབ།
ཟིན་ཐོ་གསར་བ།
དཔྱད་བརྗོད་གསར་བ།
ལན་སློག་གསར་བ།
ངའི་གྲོགས་པོ།
ཟིན་བྲིས་ཆ་འཕྲིན།
 
Powered by Oblog.