མཚོ་སྔོན་པོ་བོད་ཡིག་ཟིན་བྲིས། བོད ཟིན མཚོ་སྔོན་པོ ཟིན་རྩོམ། | པར་རིས། | མཁན་པོ། | ཁྱུ་མཆོག | ཟིན་ཚོམས།
ཐོ་འགོད། | ནང་འཇུག ཉར་ཚགས་བྱེད་པ།
分享按钮
 
སྒྲོལ་མ་ལྷ་ཁང་། http://blog.amdotibet.cn/rl25258/index.aspx
ཁྱིམ་བདག་ལགས། ངས་ཁྱེད་ལ་བཤད། གཉིས་པ།
2012-10-16 9:14:01
 

ཁྱིམ་བདག་ལགས།   ངས་ཁྱེད་ལ་བཤད། གཉིས་པ།

དངོས་ནས།  ལན་རེར་འདང་རེ་རྒྱབ་ན་དེང་གི་བྱིས་པ་འདི་ཚོ་སྙིང་རེ་རྗེ།  ལོ་གསུམ་བཞི་ནས་་ཅི་ཡིན་འདི་ཡིན་མེད་པར་མི་བསམ་ཤེས་དར་མ་ཞིག་གི་ཚུལ་དུ་འགན་ཁུར་ཐེག་མི་ཐེག་ཅིག་ཁུར་ནས་སློབ་གྲྭར་འགྲོ་དགོས།  སྤྱིར་ན་སློབ་གྲྭར་སོང་ནས་རིག་གནས་ཤེས་བྱ་སྦྱོང་རྒྱུ་ནི་གལ་ཆེན་ཡིན་མོད་ཀྱང་བྱིས་པའི་ཡོད་ཚད་སློབ་གྲྭ་ཁོ་ནར་བཅོལ་བ་ནི་ནོར་འཁྲུལ་ཅིག་ཏུ་མི་མཐོང་ག་མེད་རེད།   སྔོན་ཆད་མེས་པོ་གོང་མ་རྣམས་ཀྱི་རིང་ལ་རང་རིགས་ལའང་མཁས་པ་ནི་གནམ་གྱིས་ས་བཀབ་པ་ལྟ་བུར་བྱོན་མྱོང་བ་ལོ་རྒྱུས་དེབ་ཐར་མང་པོ་ལས་མཐོང་གྱིན་འདུག་མོད་སྐད་ཆ་མགོ་རྔ་ཙམ་ཡང་བྱེད་ཤེས་མ་ཤེས་ཀྱི་མཚམས་སུ་བྱིས་པ་དག་སློབ་གྲྭའམ་རིག་གནས་སྦྱོང་ས་གང་ཞིག་ཏུ་བརྫངས་སོང་བ་གོ་མ་མྱོང༌།   གང་ལྟར་མདོར་དེད་ན།  ང་ཚོས་ངེས་པར་བྱ་དགོས་པའི་དོན་ནི།  རྩེད་ཞོར་དང་སྦྱང་ཞོར་གཉིས་ཀ་སྙོམས་སྒྲིག་གང་ལེགས་བྱ་རྒྱུ་དེ་རེད།  མ་མཐའ་ཡང་བྱིས་པའི་དུས་སུ་དེ་འདྲ་བྱ་དགོས་པ་རེད། དྲང་མོ་བཤད།  འཇིག་རྟེན་འདིར་རང་བྱུང་ཁམས་ཀྱི་ཡན་ན་སློབ་དཔོན་དམ་པ་ཞིག་ཡོད་པ་མ་རེད།   ཁྱོད་ཁྱིམ་བདག་ཡིན་རུང་ང་དགེ་རྒན་ཡིན་ཀྱང་ཚང་མ་བྱིས་པ་ལ་མཛུབ་སྟོན་བྱེད་མཁན་ཡིན་པ་གཏོགས་ཐེ་གཏོགས་བྱེད་མཁན་མ་རེད།  རང་བྱུང་ཁམས་ཀྱིས་ད་གཟོད་མི་ལ་དམར་ཁྲིད་ངོ་མ་བྱ་ངེས་རེད།   མ་གཏོགས་ཁྱོད་ཀྱི་རྨོ་འདེབས་དང་ཕྱུགས་སྐྱོང་གི་ལག་རྩལ་དེ་སུས་ཀྱང་ཁྱོད་ལ་བསླབ་པ་མ་རེད།   འདི་ལྟར་བཤད་ན་ཁྱོད་ཀྱིས་ངས་རྨོ་འདེབས་དང་ཕྱུགས་སྐྱོང་ལ་ལག་རྩལ་ཞེས་ན་ཁྱོད་ལ་དགོད་ཁ་ཤོར་སྲིད་མོད།   དེས་ན་ཁྱོད་ཀྱིས་རང་གི་བུ་ཆེ་བ་དང་རང་ཆུང་དུས་ཀྱི་ལོ་ཚད་གཉིས་སྡུར་དང།  ཁྱོད་ཀྱི་བུས་ཁྱོད་ཀྱི་ནུས་བར་དོའམ།   ད་ཆ་ཁྱོད་ཀྱིས་བུས་ནི་ཟ་འཐུང་མ་གཏོགས་ཕལ་ཆེར་དཀའ་རྒྱུ་རེད།  ཁོ་ཚོས་ད་དུང་དོན་དག་གཅིག་ཤེས་པ་ནི་བརྙན་འཕྲིན་ལ་བལྟ་རྒྱུ་དེ་ཡིནལ་སྤྲོ་བའང་དེ་ཁོ་ན་ཙམ་དུ་ཟད་པས་དེང་གི་བྱིས་པ་ཚོ་ནི་རང་བྱུང་ཁམས་ཀྱིས་འདང་མེད་ཁེར་བཀྱེད་དུ་ཕུད་པའི་གྲོགས་མེད་ཁེར་རྐྱང་གི་སྲོག་ཆགས་ནུས་མེད་སྐོར་ཅིག་རེད།  དེ་བས་ང་ཚོ་རྔམ་དགོས་པ་དེ་ནི་བྱིས་པས་སྐད་ཆ་བཤད་ཤེས་མ་ཤེས་ཀྱི་བར་ནས་སློབ་གྲྭར་འཇུག་རྒྱུ་དེ་མིན་པར་སྔ་ས་ནས་རང་བྱུང་ཁམས་ལ་སྤྲད་ནས་བཙོ་སྦྱང་བྱེད་པར་འཇུག་པ་དེ་རེད།  དེ་ལྟར་ན་མ་མཐའ་ཡང་བྱིས་པར་གྲང་བསྲན་ཡོད་ལ་ན་བའང་མེད་པ་ང་ཚོར་མཚོན་ན་ཁ་ཐོག་མིག་ཟིན་མ་ཡིན་ནམ།  ང་ཚོ་གཞི་རིམ་གྱི་བྱིས་པ་ཚོ་སྲ་མོ་རྡོ་ལོག་འདྲ་འདྲ་ཡིན་པ་ནི་ཚོར་མ་ཚོར་གྱི་བར་ནས་རང་བྱུང་ཁམས་ལ་འཐབ་རྩོད་བྱས་པ་ལས་བྱུང་བའི་འབྲས་བུ་བླ་མེད་ཅིག་རེད། 

ཁྱིམ་བདག་ལགས།   ཕལ་ཆེར་ང་ལ་བཤད་རྒྱུ་མང་དྲག་འདུག་ཀྱང་སྲིད།  འོན་ཀྱང་ཁྱེད་རང་ཉན་སྤྲོ་བོ་ཡོང་རྒྱུ་ནི་ངའི་རེ་བ་ཉག་ཅིག་ཡིན།  གལ་ཏེ་ཁྱོད་ཀྱིས་ཀྱང་ངའི་ཁ་ལྕེ་ཝུ་བ་དང་ཀླད་པ་དར་བ་བྱས་ནས་བཤད་བཤད་མཐར་གཉིད་བབས་སོང་ཟེར་ན།   ཁྱིམ་བདག་ལགས།  ང་དངོས་གནས་ཕམ་སོང་བ་རེད།   ཁྱོད་ཀྱང་དངོས་ནས་ཚར་སོང་བ་རེད།  ང་ཕམ་སྲིད་དོན་ནི།  ང་ཡི་རེ་བཞག་སྟོང་ཟད་དུ་གྱུར་ནས་ཡི་མུག་པར་འགྱུར་རྒྱུ་དེ་རེད་ལ།   ཁྱོད་རང་ཚར་དོན་ནི་ཅུང་མི་འགོར་བའི་དུས་ཤིག་ལ་ཁྱོད་ཀྱི་བུའི་ཡོད་ཚད་ལད་འགྲོ་བ་དེ་རེད།  དེ་བས་ཁྱིམ་བདག་ལགས།  ངས་ཁྱོད་ལ་སྙིང་བསྟན་པར་ཁྱོད་ཀྱིས་ཕྱིར་ང་ལ་གློ་བ་མི་སྟོན་པར་ཡོད་ཚད་བྱིས་པ་འདིའི་མ་འོངས་པའམ་ང་ཚོའི་མ་འོངས་པའི་ཆེད་དུ་ཅི་ནས་ཀྱང་རྒྱབ་སྐྱོར་བྱོས་ཤོག   ཁྱོད་ཀྱི་བྱིས་པ་སློབ་སྦྱོང་ལ་མི་བཟང་ངམ།   དེས་ན་སློབ་སྦྱོང་ལ་མི་བཟང་བའི་རྒྱུ་མཚན་ཅི་ཡིན་ལ་འདང་རྒྱབ་ཨེ་མྱོང༌།  ཨོ།  དེ་ནི་བྱིས་པས་སློབ་སྦྱོང་ལ་བརྩོན་པ་མ་བྱས་པ་ཨེ་རེད།   དེས་ན་སློབ་སྦྱོང་ལ་བརྩོན་པ་ཅིའི་ཕྱིར་མ་བྱས་པ་རེད་ཟེར་ན།  རེད།  འདི་ནི་གནད་འགག་རེད།   ང་ཚོས་མཉམ་དུ་གནད་འགག་འདི་ལ་འདང་རྒྱག་རྒྱུ་བྱུང་ན་ཅི་མ་རུང༌།   འདང་རྒྱབ་ནས་ཀྱང་ཐབས་བཀོད་ བཙལ་ནས་ཐག་གིས་བཅད་ན་ཅིའི་མི་ཆོག    ང་ཚོས་མཉམ་དུ་རང་ནུས་ཡོད་ཚད་ཀྱིས་འབད་པ་བྱེད་ཨང༌།

rl25258 | རྩོམ་ཡོངས་ཀློག་པ།(621) | ལན་སློག(7)
སྔས་སུ་བཞག་པའི་སྙིང་གཏམ།
2012-1-26 21:41:20

   སྔས་སུ་བཞག་པའི་སྙིང་གཏམ།                 

                                          མཚོ།

བསིལ་རླུང་ཁྲོད་ཤིག་ཤིག་འདར་བའི་གང་བུས་ཁྱོད་ཀྱི་སེམས་པ་སྒུལ་མྱོང་ན།

ཉི་འོད་ཁྲོད་ལྷུག་པོར་གྲོལ་བའི་འདབ་མས་ཁྱོད་ཀྱིས་ཅི་ཞིག་འཕྲོག་འགྲོ

ད་དུང༌།   ཞེ་དུང་དུང་གིས།   སྙིང་ཉེ་ཉེ་ངང༌།  

ལུས་ངག་ཡིད་གསུམ་ཀྱིས་སྤྱི་གཙིག་ཏུ་འདེགས་པའི་གཡུ་ལོའི་ལྷག་བསམ་གྱིས།

བརྩེ་བ་ལས་འདས་པའི་བརྩེ་བ་ཅི་ཞིག་བཀུགས་བྱུང༌།

མཛེས་པ་ལས་འདས་པའི་མཛེས་པ་ཅི་ཞིག་བཞེངས་ཟིན།

 

སྙིང་གྲོགས་ལགས།     ང་ལ་ཅིས་ཀྱང་ཨ་ལན་སྟེར་རོགས།

 

ཡ་གི་ནས་འཕུར་ཡོང་བའི་སྤྲིན་པ་དེས་སྦྲང་ཆར་ཅིག་གི་གནང་སྦྱིན་བྱས་སོང༌།

མ་གི་ནས་ལྡང་ཡོང་བའི་རླུང་བུ་དེས་བསུང་ཞིམ་ཞིག་གི་བཟི་ཁ་བསྐྱལ་ཡོང༌།

རི་མཐོ་ས་ཞིག་གམ་མཐོང་ཡངས་ས་ཞིག་ནས།

ས་དམའ་ས་ཞིག་གམ་སེམས་སྐྱིད་ས་ཞིག་ནས།

ངས་འགྲམ་པ་སྐྱོར་ནས་ཁྱོད་ལ་གླུ་ཞིག་ལེན་ནམ།   ཞེ་དུང་དུང་གིས།

ངས་མགོ་བོ་སྒུར་ནས་མིག་ནས་མཆི་མ་འདོནམ་ནམ།   ཞེ་སྨྲེང་སྨྲེང་གིས

 

སྙིང་གྲོགས་ལགས།    ང་ལ་ཅིས་ཀྱང་ཨ་ལན་སྟེར་རོགས།

 

རྨི་ལམ་གྱི་བར་བཅུག་གང་རུང་ནས་ག་ལེ་ག་ལེར་མངོན་ཡོང་བའི་ཁྱེད།

དེ་འདྲའི་ཡིད་དུ་འོང་ལ་གཅེས་སུ་རུང་དོན་ཅི་ཡིན།

དུས་ཚོད་ཀྱི་བར་གསེང་གང་རུང་ནས་གློ་བུར་གློ་བུར་དྲན་ཡོང་བའི་ཁྱེད།

དེ་འདྲའི་རྒྱ་ཆེ་ཞིང་གཏིང་ཟབ་དོན་གང་ཡིན།

སེམས་པ་དང་ཆེས་ཐག་ཉེ་ས་ཞིག་ནས་ཁྱོད་ནི་ང་ཡི་གབ་ཚིག་ཅིག་གམ།

མིག་ཟུང་དང་ཆེས་རྒྱང་རིང་ས་ནས་ཁྱོད་ནི་ང་ཡི་དྲན་གདུང་ཞིག་གམ།

 

སྙིང་གྲོགས་ལགས།     ང་ལ་ཅིས་ཀྱང་ཨ་ལན་སྟེར་རོགས།

 

ཁ་སང་གི་དགའ་དགོད་རྒུམ་ཆང་ཁམ་གང་ཡིན་དུ་ཆུགས་ཀྱང༌།

མདང་གི་གི་རྨི་ལམ་དུ་ཏག་ཏག་ཁྱོད་ཡོད་པས།

དེ་རིང་གི་གྱེས་གདུང་ནི་བརྩེ་བས་ཡང་ཡང་བྲན་པའི་བདེ་སྐྱིད་ཕོར་གང་ཡིན་ན།

ཁྱེད་ཀྱི་ཡ་ཆུང་ནས་འཁྱིལ་ཡུན་རིང་བ་དེ་ཅི་ཡིན། 

ཁྱེད་ཀྱི་དྲན་ཡུལ་ནས་ཡལ་དུ་མེད་པ་དེ་སུ་ཡིན།་

ཡང་ན།   ང་དང་རྒྱང་ཐག་རིང་བ་གང་ཞིག

 

སྙིང་གྲོགས་ལགས༌།    ང་ལ་ཅིས་ཀྱང་ཨ་ལན་སྟེར་རོགས།

 

མིག་ཟུང་དེ་ག་ལེར་བཙུམས་དོན།

བརྩེ་བ་རི་རབ་འདྲ་ཞིག་མ་ཐེག་པས་ཨེ་ཡིན།

                    

ཁ་ཚིག་དེ་ཡུན་གྱིས་བགགས་དོན།

འཁྲེང་ཞེན་གཙང་བོ་འདྲ་ཞིག་མ་བརྒལ་པས་ཨེ་ཡིན།

ཚོར་བ་དེ་གཞི་ནས་ཡལ་དོན།

དུང་བ་མེ་ལྕེ་འདྲ་ཞིག་མ་བཟོད་པས་ཨེ་ཡིན།

 

སྙིང་གྲོགས་ལགས།   ཡང་ན་བསྐྱུར་འཇོག་ཨང༌།

དགུན་དུས་འདི་ང་ལ་ཇི་འདྲའི་འཁྱག་ཀྱང༌།  

ཁྱོད་ཀྱི་ངག་ཚིག་གི་དྲོད་ཁོལ་མ་ཡལ་ན་ཅིའི་མི་ཆོག

rl25258 | རྩོམ་ཡོངས་ཀློག་པ།(520) | ལན་སློག(5)
ཟི་ལིང་གི་དགོང་དྲོ།
2011-12-30 11:07:23

ཟི་ལིང་གི་དགོང་དྲོ།

                     མཚོ།

                 དགའ།

དགོང་དྲོའི་རླུང་བུ་འཇམ་པོ་དེ

མཁར་དབུས་ཀྱི་ལྗང་ལོ་དང་མེ་ཏོག་གི་པང་བ་ཡིན་ནམ

སེམས་པ་དང་ཉེ་རུ་བཅར་བའི་མཁར་མཐའི་བོད་མིའི་ཁྲོམ་གྱི་ལག་འཇུ་ཡིན

ཡང་ན

བདག་གིས་མི་ལོ་དུ་མའི་རིང་རྟོག་བཟོ་བྱས་ཚར་བའི་ཁྱོད་ཀྱི་མཛེས་སྡུག་དང་དུངས་བ་ཡིན

རེད་ཨང  བརྩེ་བ་འཁུར་བའི་སེམས་པ་གཉོམ་པོ་འདི    དགོང་དྲོ་འདིར

སྤོབས་པའི་རླུང་བུས་བཏགས་ཏེ་དགའ་ལྷང་ལྷང་གིས་གང་ལ་སྐྱོད

 

དུངས་སྣང་ལ་འཁྱུད་པའི་སྒྲོན་འོད་མག་མོག

སྒྲོན་འོད་ལ་འཐིམ་པའི་ངོ་གདོང་རབ་རིབ

ངོ་གདོང་ན་འཕྱོ་བའི་སྤྲོ་དགའི་འཛུམ་མདངས

ད་དུང    ལྷོད་ཀྱིས་འཁྱིལ་བའི་སེམས་ཚོར་དེ་འང

བདག་གིས་སྐྱབས་མགོན་སུ་ཞིག་ལ་འཁྲུལ་བའི་ཁྱོད་ཀྱིས

བདག་ལ་རྟེན་དུ་གནང་བའི་དུངས་སེམས་ཀྱི་ལེགས་སྐྱེས་ཨེ་ཡིན

ཡིན་ནའང    ཁྱོད་ཀྱི་ཁ་གཏད་དུ་འདི་ལྟར་འགྲེང་དུས

རྒུན་ཆང་ལས་ལྷག་པའི་མངར་ཁ་ཞིག

བདག་གིས་ནམ་ཡང     ཁྱོད་ལ་ཤོད་ཐབས་མི་འདུག

                    སྐྱོ།

དཔུང་བ་མཉམ་གཤིབ་ཀྱིས་སྐྱོད་དུས     ཁུ་སིམ་མེར

ཁྱོད་ཀྱི་ལྷིང་འཇགས་ལས     བདག་གི་སྙིང་གི་འཕར་སྒྲ་ཇེ་དྲག་ཏུ་ཕྱིན་ནའང

ཀུ་རེ་དང་རྩེད་མཚར་ཁྲོད    ཅི་མི་སྙམ་པའི་ཚུལ་འཆོས་ཀྱིས

ཁྱོད་དང་བདེ་མོ་མི་འཇོག་ག་མེད་རེད

ད་ནས     རྨི་འདོད་པའི་རྨི་ལམ་ཞིག་མེ་ཏོག་ཅིག་བཞིན་བཞད་མ་ཐུབ་པར་

བདག་གིས   སུ་དང་གང་ལ་ལེ་བདའ་དང་འཁང་ར་བྱེད་དམ

ཆགས།

ལྷ་ལས་བབས་པ་ཡིན་ནམ  

མུ་ཏིག་གི་ཕྲེང་བ་བདག་གི་མིག་ལམ་དུ་བསྟར་བྱུང

ལྷ་ཡིས་བཀྲོལ་བ་མིན་ནམ

ཚངས་པའི་རོལ་དབྱངས་བདག་གི་སྙན་དབང་དུ་འཛུལ་སོང

འཛུམ་མདངས་དང་གཞས་གདངས་ཀྱི་མཆོད་པའི་དགོང་དྲོ་འདི

བདག་གི་བདེ་སྐྱིད་ཅིག་གི་འགྲེལ་བཤད་ཡིན་ན

དགོད་སྒྲ་དང་གླུ་སྐད་ཀྱིས་ཕྱུག་པའི་ཁྱོད་དང་བདག་ནི་

ཏག་ཏག་བདེ་སྐྱིད་དེའི་འཁྲུལ་མེད་ཀྱི་འབྱུང་ཁུངས་རེད

ཁྱོད་ཀྱི་ལོག་ཕེབས་འདི  བདག་གི་སྣུམ་གྱིས་ཟིན་པའི་རེ་སྒུག་ཡིན་པས་ན

ཡ་ཆུང་གི་ཟབ་སར་སྦས་པའི་བརྩེ་དུང་དེ    དེ་ལྟར་དུ་རང་སོར་བཞག་ཆོག

          སྡང༌།

        

ཁ་ཐག་ཆེས་ཉེ་དུས་ཡིན་ནམ

མདང་ནུབ་ཁྱོད་རང་བདག་གི་མིག་ལམ་ན་ཡོད

སེམས་ཐག་ཆེས་རིང་དུས་ཡིན་ནམ

དེ་རིང་བདག་ནི་ཁྱོད་ཀྱི་རྒྱབ་ཕྱོགས་ན

 

དགོང་དྲོ་འདིར    རླུང་བུ་སྡང་སྡིག་གིས་གཡུགས་བྱུང

དྲོད་རླབས་ཀྱིས་གཅུམས་པའི་ང་ཡི་ཁེར་རྐྱང་གི་རྣམ་ཤེས

རླུང་གིས་སྐྱོད་པའི་སྐྲ་ལོ་དང་མཉམ་དུ    གང་དུ་བསྐྱོད་ཨང

 

rl25258 | རྩོམ་ཡོངས་ཀློག་པ།(562) | ལན་སློག(8)
གློ་བུར་བའི་ཐུག་འཕྲད།
2011-11-25 11:45:58

གློ་བུར་བའི་ཐུག་འཕྲད།

སྤྲོ་དགས་བརྟས་པའི་ཡིད་འོང་གི་ཕྱེ་མ་ལེབ་ཅིག་གི་འཕུར་ལྡིང་ཡིན་ནམ།

དེ་རིང༌།     ངས་གཞི་ནས་ཁྱོད་ཀྱི་གོམ་འགྲོས་མཐོང་བྱུང༌།

མཚར་སྡུག་རྫོགས་པའི་སེར་ཆེན་ཞིག་གི་གང་བུ་ཕྱེས་སོང་བ་ཡིན་ནམ།

དེ་རིང༌།     ཁྱོད་ཀྱི་འཛུམ་ཆུང་མངོན་སུམ་དུ་གྲོལ་བྱུང༌།

རེད་ཨང༌།   ད་དུང་ཞི་འཇམ་གྱི་རླུང་བུས་བཏེགས་པའི་ཁྱོད་ཀྱི་གསུང་སྐད་ལྷང་ལྷང་དེའང༌།

ངའི་རྣ་བའི་བུ་གར་བརྒྱུད་དེ་ནང་སེམས་ཀྱི་ཟབ་སར་ལྗིད་ཏིག་ཏིག་གིས་ལྷུང་སོང༌།

 

ཕྱི་དྲོ་འདིར།   ང་ལ་ཅི་ཞིག་ཐོབ་སོང༌།

ཕྱི་དྲོ་འདིར།   ང་ཡིས་ཅི་ཞིག་བོར་སོང༌།

ཡང་ན།    ཕྱི་དྲོ་འདི་ནས་བཟུང་དེ།

ཕྱི་དྲོ་འདི་ནས་བཟུང་དེ་ངས་ཅི་ཞིག་བསྐྱུར་དེ་གང་ཞིག་ཁྱེར་ནས་འགྲོ་དགོས་ཨང༌།

rl25258 | རྩོམ་ཡོངས་ཀློག་པ།(577) | ལན་སློག(7)
ང་རང་ནམ་ཡང་སེར་སྣས་བཅིངས་པའི་སྲེད་མོ་ཞིག་ཡིན།
2011-11-18 15:14:40

ང་རང་ནམ་ཡང་སེར་སྣས་བཅིངས་པའི་སྲེད་མོ་ཞིག་ཡིན།

གསེར་ཆུས་བྱུགས་པའི་རྫོགས་ལྡན་གྱི་དུས་འདིར།

དལ་དལ་གྱིས།    ཁྱོད་རང་ང་ཡི་ཡ་ཆུང་ལ་ཁ་བའི་འདབ་མ་ཞིག་གི་ཚུལ་གྱིས།

བསུལ་བསུལ་གྱིས་བབས་པ་སྔ་མེད་ལ་འཕྱི་ཡང་མེད།

ཁྱོད་ཀྱི་མཛེས་སྡུག   ངའི་འཁྲེང་ཞེན་དང་དུངས་བའི་སྦུབས་སུ།

དངུལ་ཆུ་བཞིན་འོད་ཀྲིག་གེར།    ང་ཡི་ལུས་ངག་ཡིད་གསུམ་ལ།

ལྷོད་ལྷོད་ཀྱིས་འཐིམ་ཡང༌།   ང་ཡི་ཡོད་ཚད་བདེ་སྐྱིད་ཀྱི་གཞི་མར་བསྐྱལ།

 

རྩི་ཤིང་དང་ས་གཞིས།     གསེར་ལས་ལྷག་པའི་བརྩེ་བའི་འཛུམ་ཆུང་སྟོན་དུས།

ང་རང་ནི་ཁྱོད་ཀྱི་ལང་ཚོས་ཕྱུག་པའི་བྲང་གཞོང་གི

རྟག་རྟེན་གྱི་ན་ཆུང་བུ་མོ་ཞིག་སྟེ།    ཁྱོད་ཀྱི་སེམས་པ་དང་མིག་ཟུང་གི་བར་ན།

མཛེས་སྡུག་གིས་བརྒྱུད།   དགའ་དགོད་ཀྱིས་རྩེན།    བདེ་སྐྱིད་ཀྱིས་འཚོ།

ནག་ནོག་གི་དྲི་མ་ཙམ་ཡང་བཙལ་མི་རྙེད་པའི།

ཁྱོད་ཀྱིས་ཡིད་འོང་གི་ལུས།    ཁྱོད་ཀྱི་དྭངས་གཙང་གི་ཡིད། 

ཁྱོད་ཀྱི་སྙན་འཇེབས་ཀྱི་ངག   ཨ་ཨ་་་་་   

འདི་དག་ངས་དྲན་པའི་ཕྱི་རོལ་དུ་བསྐྱུར་ཐབས་མི་འདུག

 

ཁྱོད་ཀྱིས་བདག་ལ་བསྐྲུན་པའི་རྨི་ལམ་མང་པོ་ཞིག

གངས་རིན་པོ་ཆེའི་ཁ་བ་བཞིན་བང་རིམ་སྟོང་ཕྲག་ཏུ་བརྩེགས་རྗེས།

ང་རང་མོ་ལོ་སུམ་བཅུའི་དམར་སྨུག་གི་རྒྱ་སེ་ཚོམ་བུའི་གསེབ་དུ།

ག་ལེར་འགྱེལ་དེ།   མཆོག་གྱུར་གྱི་ཁྱོད་ལ།

གློ་སྙིང་མཆིན་གསུམ་དུས་གཅིག་ཏུ་སྦྱར་དགོས་སོང༌།

རེད་ཨང༌།    ཁྱོད་རང་ནམ་ཡང༌།    ཐོག་མ་བཞིན་དེ་འདྲའི་སྙིང་དུ་ཉེ་ཨང༌།

སྟོབས་ཀྱིས་ཁེངས་ཡང་འཇམ་མཉེན་གྱི་ཕྱག་ཟུང༌།  

བྲང་གཞོང༌།    ད་དུང་མཆུ་སྒྲོས། 

ཁྱོད་ཀྱི་མདུན་སར།  བླ་སྲོག་དང་རང་བཀུར་བདུད་རྩི་ཡིས་ཡུན་རིང་དུ་བརླན་དོན།

ཁྱོད་ལས་ལྷག་པའི་མགོན་སྐྱབས་ཤིག་མེད་པས་ཨེ་ཡིན།

ཕྱིར་མིག་གིས་ཡང་ཡང་གཟིགས་སྲིད་པའི་མིག་ཟུང་དང༌།

མིག་ཟུང་ལས་ཡུན་གྱིས་བཞུར་སྲིད་པའི་ཁྱོད་ཀྱི་འཁྲེང་ཞེན།

སྒོ་མོ་དལ་གྱིས་རྒྱག་པའི་ཁྲོག་སྒྲ་ལས།    ངས་ཚོར་ཡོད།   

ང་ནམ་ཡང༌།    ཡིད་ཚིམ་ཡོད།

ན་ཆུང་མ་ཞིག་གི་འདུ་ཤེས་འཛིན་པའི་ངའི་གླན་རྟགས་འདི།

མེ་ལོང་གི་ངོས་སུ་གསལ་ལེར་འཆར་ཡོད་ཀྱང༌།

ཟོར་ཡང་དང་སྤྲོ་བས་བརྟས་པའི་ངའི་ཟོལ་མེད་ཀྱི་སེམས་པ་འདི།

ཁྱོད་ཀྱིས་ནམ་ཡང་དང་ལེན་བྱ་སྲིད་པའི་ལེགས་སྐྱེས་ཆུང་ཆུང་ཞིག་བྱ་འདོད།

 

ཁྱོད་ནི་མུན་ནག་དང་ལྐོག་གྱུར་གྱི་ཀློང་ནས།   བདག་ལ་བསྲིང་པའི།

འོད་ཟེར་གྱི་མཛུབ་དཀྲུས་མནབ་པའི་ཕྱག་འཇུ་དེ་ཡིན།   དེ་བས།

ཁྱོད་རང་ཡོད་ས་ནས།    ངས་འོད་སྣང་དང་བདེ་སྐྱིད་ཀྱི་ལམ་སྣ་ཟིན་འགྲོ

ལམ་སྣ་ཟིན་ཐེངས་རེར།     ཁྱོད་ཀྱི་ཕྱིར་དུ།   ཡང་ན་ང་ཡི་ཆེད་དུ།

 

ངས་སྙིང་ཉེ་བ་སུའང་དྲན་པའི་ཕ་རོལ་དུ་བསྐྱལ་མྱོང་མེད།

བསྐྱལ་མེད་པའི་སྙིང་ཉེ་དག་ལ།    

ངས་སྟོན་བཞིན་པ་དེ་སྔར་བཞིན་སྙིང་ཉེ་བའི་ངོས་དེ་ཡིན་པས་ན།

རིང་དུ་བསྲིང་བའི་ཕྱི་ཐག་ཅིག་གི་སླད། ང་རང་ཕ་རོལ་ཞིག་ན། ཁྱོད་དང་ཉེ་རུ་ཡོད།

ཁྱོད་ཀྱི་པང་བ་རུ།   མིག་ཟུང་ག་ལེར་བཙུམས་དུས།

ང་རང་མར་ལོ་བཞིན་ཡུན་གྱིས་ཞི་འགྲོ་ལ།   དར་གོས་བཞིན་ལྷོད་ཀྱིས་སྐྱོད།

བརྩེ་བ་ཁུར་བའི་ངལ་དུབ་དང་མཉམ་དུ།    ཁྱོད་ཀྱི་མདུན་དུ་ཁད་ཀྱིས་འགྱེལ་དུས།

ཁྱོད་ནི།   ངས་མོ་ལོ་སུམ་བཅུར་རྟོག་བཟོ་བྱས་པའི་རླབས་ཆེན་གྱི་དཔའ་བོ་དེ་རེད།

ད་ནི།   རང་གིས་ལྷ་མོར་བསྐོས་ཟིན་པའི་ང༌།  

དཔའ་བོ་ཞིག་གི་ཞབས་ལ་དུད་དེ།

སྡུག་བསྔལ་མེད་པའི་ཕམ་ཚུལ་ཞིག་གི་མགོ་བརྩམས་སོང༌།

 

མཚམས་ལན་རེར།  ཕམ་ཉེས་ནི་བདེ་སྐྱིདརེད།

བདེ་སྐྱིད་དེ།   ཏག་ཏག་མེ་ཏོག་བཞིན་གྱི་སེམས་པ་ཞིག་གི་གྲོལ་སྟངས་ཡིན།

དེ་ན།  དྲན་གདུང་གི་མིག་ཆུ་དེའང༌།

ངས་ཁྱོད་ལ་ཕུལ་བའི་མུ་ཏིག་ཕྲེང་བའི་དྲན་རྟེན་ཡིན།

ཁྱོད་རང་གཅེས་ལོ་བཞིན།    ང་རང་ནམ་ཡང༌།

རང་ཉིད་ཀྱི་ཡོད་ཚད་ཁྱོད་ཀྱི་མདུན་དུ་སྤོངས་འདོད་ཀྱི་ཧམ་པས་ཀུན་དུ་གཙེས་ཡང

ཁྱོད་ཁོ་ནར་ང་རང་ནམ་ཡང་འདི་འདྲའི་སེར་སྣས་བཅིངས་པའི་སྲེད་མོ་ཞིག་ཡིན་ དགོས་ཨང༌།

                                 ༢༠༡༡ལོའི་ཟླ་༡༠བའི་ཚེས་༡༢ཉིན་གྱི་ཞོགས་པར།

rl25258 | རྩོམ་ཡོངས་ཀློག་པ།(652) | ལན་སློག(3)
དྲན་པའི་ཟིན་བྲིས།
2011-10-15 9:35:19

དྲན་པའི་ཟིན་བྲིས།
                       མཚོ།
བདག་ནི་ཁྱོད་ཀྱི་རྨི་ལམ་དུ་ནམ་ཡང་ཡོང་མི་སྲིད་པའི་མཛེས་སྡུག་གི་དུངས་པའི་ལྷ་མོ་དེ་ཡིན
ཁྱོད་ཀྱི་དྲན་པའི་ཕ་རོལ་དུ  རང་གི་དྲན་སྣང་ལ་བརྒྱུས་པའི་ཁྱོད་ཀྱི་ཡོད་ཚད་ཀྱི་ཡོད་ཚད
ཉིན་མཚན་དུས་དྲུག་ཏུ  ཡ་ཆུང་གི་ཆེས་ཟབ་སར་སྒོམ་ནས
 དྲན་གདུང་གིས་མིད་པ་བརྣང ་པའི་སྐྱོ་བ་ཡིས  ང་རང་མཚན་མོའི ་སྨག་རིམ་དུ་ཡང་ཡང་དེད     
ཁེར་རྐྱང་གི་དུངས་བ འི་ལྷ་མོ་ཨང

རི་མགོའི་དར་ལྕོག་རླུང་གིས་ཟད་པའི་རྒས་ཁོག་གིས     ང་ཡི་བརྩེ་བ་གཏན་ནས་སྒུལ་མ་ཐུབ
མི་ལོ་སྟོང་གི་དམ་བཅས་ཟས་པའི་ཡིད་ཆེས་ཡང་བོས    ཁྱོད་ཀྱི་དུངས་པ་ནམ་ཡང་འདྲེན་འོས་མིན
དེ་ལྟ་ན་འང         གྲོགས་པོ     ( འདི་ལྟར་ཁྱོད་རང་འབོད་དུས     ང་རང་ཞེ་སྨྲེང་སྨྲེང་གིས་ངུ་དགོས་བྱུང)
སྟོན་ལོ་ཐོར་བའི་མྱ་ངན་དང་མྱ་ངན་གྱི་རོལ་དབྱངས་ལས 
ངས་ཁྱོད་རང་ཤིན་ཏུ་དྲན་ཨང    དྲན་གྱིན་པ་དེ་ཁྱོད་ཁོ་ན་ག་ནས་ཡིན་ཏེ  
ཁྱོད་ཀྱིས་བཞེངས་པའི་ཆེས་ཡིད་འོང་གི་དུས་ཚིགས་ཀྱིས་བརྩེགས་པའི་ལོ་ཟླ་དག་ཡིན་པས་ན
ཁྱོད་རང་སྒོམ་ཉིན་ནས    ངས་དྲན་འོས་པ་ག་ཚོད་ཅིག
ཨམ་གཙིགས་བསྡམས་ཏེ་རྒྱང་རིང་དུ་ཡང་ཡང་བདས་པར་ཅི་ཁག

ཉི་ཟེར་སྒེའུ་ཁུང་ལས་འཕྲོས་པའི་དྲོད་སྣང་གིས    
ངས་ཕྱི་རོལ་གྱི་སྤང་ཁུད་དྲན་འོང    སྤང་ཁུད་ཀྱི་སེར་ཆེན་དྲན་འོང   
ངས་བར་སྣང་གི་སྤྲིན་པ་དྲན་འོང      སྤྲིན་གསེབ་ཀྱི་འཇའ་ཚོན་དྲན་འོང
ངས་དྲན་ངོགས་ཀྱི་ཁྱོད་རང་དྲན་འོང    ཁྱོད་ཀྱི་ཉིད་འོད་ལས་འདས་པའི་དུངས་བ་དྲན་འོང
གྲོགས་པོ        གྲོགས་པོ        འདི་ལྟར་མི་འབོད་ཐབས་མེད་ཀྱི་འུ་ཐུག་གིས་ང་རང་རྨས་སོང
དུངས་བའི་ལྷ་མོ་ཞིག་འདི་ལྟར་རྨང་ནས་རྨས་སོང

rl25258 | རྩོམ་ཡོངས་ཀློག་པ།(463) | ལན་སློག(4)
ཞི་མོ་ཞིག་གིས་རྒྱུགས་ལ་སྡིགས་པ།
2010-11-16 17:20:00

སློབ་ཆུང་གི་རྒྱུགས་གཞི་དང་འབྲེལ་བའི་བསམ་ཚུལ་ཐོར་བུ།

                                   མཚོ།

དང་པོ།  རྒྱུགས་གཞི་དབྱེ་ཞིབ།

      དེ་ཡང་རྒྱུགས་གཞི་ལེན་པ་ལ་སློབ་གསོ་རིག་པའི་དཔེ་དེབ་ཀྱི་སྟེང་དུ་འདི་ལྟར་འགྲེལ་རྒྱབ་ཡོད་དེ།  སྦྱངས་འབྲས་ལ་ཞིབ་བཤེར་ཚད་ལེན་བྱེད་པ་སྟེ་ཚོད་ལྟའི་རྒྱུགས་གཞི་ཡི་རྣམ་པའི་སྟེང་ནས་སློབ་མའི་སློབ་སྦྱོང་གི་ནུས་པ་ལས་ཐོན་པའི་འབྲས་བུ་ལ་ཚད་འཇལ་པ་ཡིན་ཏེ།   སློབ་གྲྭས་སློབ་མའི་སྦྱངས་འབྲས་ལ་ཚད་འཇལ་རྒྱུགས་ལེན་བྱས་པ་བརྒྱུད་སློབ་ཁྲིད་ལེགས་གྲུབ་བྱུང་ཡོད་མེད་ཀྱི་གནས་ཚུལ་ལ་རྒྱུས་ལོན་དང་ཞིབ་བཤེར་བྱེད་པ་དང༌།   ཞིབ་བཤེར་བྱས་པ་ལས་བྱུང་བའི་གནད་དོན་སྐོར་ཕྱིར་བཏོན་སྟེ་སློབ་ཁྲིད་ཀྱི་གོ་རིམ་ཁྲོད་ཀྱི་ཉམས་པ་སོར་ཆུད་དང་སློབ་སྦྱོང་གི་གོ་རིམ་ཁྲོད་གནས་པའི་གནད་དོན་ལ་མཛུབ་སྟོན་བྱས་ནས་སློབ་ཁྲིད་དང་སློབ་སྦྱོང་གི་སྤུས་ཚད་ཇེ་ལེགས་དང་ཇེ་རྒྱས་སུ་གཏོང་བར་བྱ་བའི་ཐབས་ཤེས་ཤིག་གོ  

སྤྱིར་རྒྱུགས་གཞི་ལ་དྲི་བ་དྲིས་ལན་རང་བཞིན་ཅན་གྱི་རྒྱུགས་ཚིགས་དང་(供答试试题)གདམས་གསེས་རང་བཞིན་ཅན་གྱི་རྒྱུགས་ཚིགས(选答试试题་གཉིས་སུ་དབྱེ་ཡོད་དེ་ད་ཐེངས་ཀྱི་དབྱིན་ཡིག་གི་རྒྱུགས་གཞི་འདི་ལྟ་བུར་མཚོན་ན་ནི་གོང་གསལ་གཉིས་ལས་རྗེས་མའི་རང་བཞིན་ཅན་གྱི་རྒྱུགས་ཚིགས་ཡིན་སྟེ་རྒྱུགས་ཕུད་དགེ་རྒན་གྱི་རེ་བ་ལྟར་དུ་དྲི་བ་དག་ལ་འགྲིག་མིན་བརྡར་ཤ་གཅོད་རྒྱུ་ཅན་(是非题)དང༌།  ཡིན་མིན་གདམས་གསེས་བྱ་རྒྱུ་(选择题)ཅན།  མཐུན་མིན་རྟགས་རྒྱག་པ་ཅན་ཡང་ན་རིགས་བགར་རྒྱུ་ཅན་(组配题)བཅས་རེད་ལ།  རྒྱུགས་གཞི་འདི་ནི་མགོ་ནས་མཇུག་བར་དུ་ཞིབ་ཆ་ལྡན་ཞིང་ཚག་དམ་པ།  ནང་དོན་གྱི་ཆ་ནས་གཞི་རྒྱ་ཆེ་བ་(扩展)   དྲི་གཞི་ལ་འགྱུར་བག་ཆེ་བ་སོགས་མདོར་ན་བསམ་གཞིགས་གཏོང་དགོས་པའི་ཆ་ཤིན་ཏུ་མང་པོ་འདུག་པས་གློ་བུར་དུ་རྒྱུགས་གཞི་འདི་འདྲ་ཚད་ལྡན་ཅན་ཞིག་བྱུང་སོང་བས།   དང་ཐོག་ང་རང་ངོས་ནས་བཤད་ན་ཅོལ་ཆུང་གི་དབང་དུ་སོང་བས་དངོས་ནས་དང་ལེན་བྱེད་དཀའ་བའི་ཚོད་དུ་སླེབས།  ཡིན་ན་འང་བྱ་བ་ཅི་ཞིག་ཡིན་རུང་ངོས་གཞན་ཞིག་ཀྱང་ཡོད་པས་ཉིན་འདི་དག་གི་རིང་ལ་ངས་རྒྱུགས་གཞི་འདིའི་ངོས་གཞན་དེར་བསམ་གཞིགས་བྱས་ཏེ་རྒྱུགས་གཞི་འདི་ལས་བྱུང་བའི་མྱོང་ཚོར་རམ་ཡང་ན་ངེས་ཤེས་ཙམ་པོ་བ་ཞིག་བཤད་ན།    ད་ཐེངས་ཀྱི་རྒྱུགས་གཞི་འདིས་ང་ལ་ངེས་ཤེས་ག་འདྲ་ཞིག་ཐོབ་པར་བྱས་སོང་ཟེར་ན།    ཐོག་མར་རྒྱུགས་གཞི་འདིས་བསླངས་པའི་འགལ་བ་ནས་བཤད་པར་བྱ་སྟེ།   བདག་གིས་བསམ་པ་ཡིན་ན་སྤྱིར་བྱ་བ་ཅི་རིགས་སྒྲུབ་ཀྱང་འགལ་བ་ནི་ནམ་ཡང་གནས་སྲིད་པ་རེད།   རྒྱུ་མཚན་འགལ་བ་ནི་བྱ་བ་ཞིག་འཕེལ་རྒྱས་སུ་འགྲོ་བའི་སྒུལ་ཤུགས་དང༌།   འགལ་བ་བྱུང་བ་ལས་བྱ་བ་དེར་སྔར་ལས་ལྷག་པའི་ངེས་ཤེས་ཟབ་མོ་ཐོབ་སྲིད་པས་འགལ་བ་ལ་ལ་ཞིག་ལྷག་པར་དུ་བྱ་བའི་སྟེང་གི་འགལ་བ་ནི་མཐའ་གཅིག་ཏུ་ནག་ཉེས་ཤིག་ཏུ་རྩི་མི་རུང་བར་དེར་དུས་ཡུན་ཞིག་གི་ནང་བསམ་གཞིགས་བྱས་པ་བརྒྱུད་གྲོས་མོལ་བྱེད་པ་ནི་གལ་ཆེན་ཞིག་གོ་སྙམ་སོང༌།   

དེ་བས་བདག་གིས་ཀྱང་རྒྱུགས་གཞི་འདི་བརྒྱུད་ཐོག་མར་ཤེས་གསལ་བྱུང་བ་ནི་རང་སློབ་གྲྭའི་དབྱིན་ཡིག་སློབ་ཁྲིད་ཀྱི་རྗེས་ལུས་ཀྱི་རྣམ་པ་གཙོ་བྱས་སློབ་ཁྲིད་སྟེང་གནས་པའི་མི་འདང་བའི་ཆ་དང་སློབ་མ་ཚོས་དབྱིན་ཡིག་གི་སློབ་སྦྱོང་ལ་བཟུང་བའི་རྣམ་འགྱུར་སོགས་རེད།  དེ་བས་བདག་གིས་བསམ་པ་ཡིན་ན།  གལ་ཏེ་ད་ཐེངས་ཀྱི་འདི་ལྟ་བུའི་དབྱིན་ཡིག་གི་རྒྱུགས་གཞི་ཡི་ཆུ་ཚད་ལ་སླེབས་དགོས་ན།   དབྱིན་ཡིག་གི་སློབ་ཁྲིད་ལ་ཕྱོགས་ཡོངས་ནས་གནམ་ས་བླ་འོག་བརྗེ་བ་ལྟ་བུའི་འགྱུར་ལྡོག་བྱུང་ཐུབ་དགོས་སོ།   ཡིན་ན་འང༌།  གཞི་རིམ་གྱི་བོད་རིགས་སློབ་ཆུང་ལ་མཚོན་ན་སྦྱོང་དགོས་པའི་བསླབ་བྱ་ཅུང་མང་པས་དབྱིན་ཡིག་གི་སློབ་ཁྲིད་དང་སློབ་སྦྱོང་གི་འགན་ཁུར་ནི་སློབ་ཕྲུག་ཚོའི་རྒྱུད་ལ་བག་ཆགས་ཤིག་འཇོག་རྒྱུ་གཙོར་བཟུང་ན་འོས་སྟེ་སློབ་ཕྲུག་ཚོར་སློབ་སྦྱོང་གི་གནོན་ཤུགས་ཆེ་རུ་མ་འགྱུར་ན་ལེགས་སོ་སྙམ་བྱུང་བས་རྒྱུགས་གཞིའི་ཆ་ནས་ཀྱང་རང་གི་ས་གནས་ཀྱི་སློབ་ཁྲིད་ཀྱི་གནས་ཚུལ་གཞིར་བཟུང་ནས་ཕུད་རྒྱུ་ནི་རེ་བ་ཉག་ཅིག་གོ

གཉིས་པ།  རྒྱུགས་གཞི་ཕུད་མཁན་གྱི་འགན་འཁྲི།

རྒྱུགས་གཞི་ཕུད་མཁན་ཞིག་ཡིན་པའི་ཆ་ནས་དྲང་བདེན་དང་གསང་བ་ལྐོག་གྱུར་ཡིན་པ་གཞིར་བཞག    ཐོག་མར་རྒྱུགས་གཞི་ཕུད་དགོས་པའི་བསླབ་བྱ་དེའི་ནང་དོན་བྱང་ཆུབ་པ་ཞིག་རྟོགས་དགོས་པར་མ་ཟད་བསླབ་བྱ་དེ་ཁྲིད་པའི་སློབ་ཁྲིད་ཀྱི་འགྲོས་ཚད་དང་ཐུན་གྲངས་གཞིར་བཟུང༌།  སློབ་མ་སྤྱིའི་ཆུ་ཚད་དང་བསྟུན་ནས་སློབ་གྲྭ་སྤྱིས་བསླབ་བྱ་དེར་བཏོན་པའི་རེ་བ་ལ་རྒྱུས་ལོན་ལེགས་པོ་བྱས་སྟེ་རྒྱུ་མཚན་དང་དམིགས་ཡུལ་ཡོད་པའི་སྒོ་ནས་ནང་དོན་གྱི་མང་ཉུང་གི་ཆ་ནས་ཀྱང་ཚད་དང་རན་པ་ཞིག་འཁྱོངས་རྒྱུ་བྱ་བར་རིགས་སོ།

གཉིས་པ།  རྒྱུགས་སྲུང་དགེ་རྒན་གྱི་འགན་འཁྲི།

བདག་གིས་བསམ་པ་ཡིན་ན།   ཐོག་མར་རྒྱུགས་སྲུང་དགེ་རྒན་ནི་སྲུང་བར་བྱ་བའི་བསླབ་བྱའི་ནང་དོན་གོ་མཁན་ཞིག་ཡིན་དགོས་པ་དང༌།  འཛིན་གྲྭའི་ཀྲུའུ་རན་གྱིས་རྒྱུགས་སྲུང་དགེ་རྒན་ལ་འཛིན་གྲྭའི་ནང་གནས་པའི་སློབ་མ་དམིགས་བསལ་ཅན་གྱི་གནས་ཚུལ་བཤད་པ་དང་བཅོལ་གདམས་བྱེད་དགོས།   རྒྱུ་མཚན་ནི་ལོ་རིམ་དང་པོ་དང་གཉིས་པའི་སློབ་མ་འགའ་ཤོས་ལ་དགེ་རྒན་གྱིས་སྐུལ་མ་མ་བྱས་ཚེ་རྒྱུགས་ཤོག་སྟོང་བ་སྤྲོད་པ་འང་ཡོད་ལ།  ་རྒྱུགས་སྲུང་དགེ་རྒན་གྱིས་སློབ་མ་ཚོས་ཕན་ཚུན་བར་བརྐུ་ལྟ་བྱེད་མིན་ཁོ་ན་ལ་ཕུར་ཚུགས་སུ་བལྟས་ཏེ་འདུག་རྒྱུ་དང་སློབ་མ་ལ་གང་བྱུང་དུ་ལན་བཤད་པ་སོགས་སྤངས་སྟེ་སློབ་མས་རྒྱུགས་རའི་ནང་ཡིག་རྒྱུགས་ལ་ཞུགས་སྐབས། ཐོག་མར་བྱིས་པ་ཚོའི་སེམས་ཁམས་འཚུབ་པོ་དེ་བདེ་ལ་འབབ་ཆེད་རྒྱུགས་སྲུང་དགེ་རྒན་གྱིས་སྙིང་ཉེ་ཉེ་དང་བྱམས་དུང་དུང་གིས་སློབ་མ་ཚང་ཡོད་མེད་དང་ཚང་མར་སྨྱུ་གུ་ཡོད་མེད་སོགས་དྲི་བ་མདོར་བསྡུས་ཤིག་འདྲི་རྒྱུ་ནི་སློབ་མ་ཚོ་སེམས་བདེ་བག་ཕེབས་ཀྱིས་རྒྱུགས་གཞི་ཡག་པོར་འབྲི་རྒྱུའི་སྔོན་འགྲོའི་ཆ་རྐྱེན་ཡིན།   རྒྱུ་མཚན་ད་ལྟ་རྒྱུགས་འབྲས་ནི་སློབ་མའི་བརྒྱུད་ལ་ཤེས་བྱ་ག་འདྲ་ཞིག་འབྱོར་ཡོད་མེད་དུ།   ཚད་འཇལ་བྱེད་ཀྱི་ཐབས་ཤེས་ཤིག་སྟེ་རྒྱ་མ་ལྟ་བུ་ཞིག་ཡིན་པ་མ་ཟད།   སློབ་མའི་བསླབ་བྱ་གང་གི་རྒྱུགས་འབྲས་ཀྱིས་ཐད་ཀར་དུ་བསླབ་བྱ་གང་དེ་ཁྲིད་པའི་དགེ་རྒན་གྱི་སློབ་ཁྲིད་ཀྱི་འབྲས་བུ་ལ་མཐའ་གཅིག་ཏུ་ཐག་གཅོད་བྱེད་བཞིན་ཡོད་པས་ན་འགྲན་བསྡུར་གྱི་ཚ་རླབས་ཁྲོད་ལུས་སེམས་གཉིས་ཀ་གཙེས་བཞིན་པའི་རང་གི་དགེ་གྲོགས་དང་སློབ་མ་འདི་དག་ལ་བསམ་ཤེས་ཤིག་སྒོམ་པའི་འདུ་ཤེས་ཀྱིས་འགན་དེ་སེམས་ཀྱིས་འཁུར་བར་བྱེད་པ་ནི་སྨྲས་མ་དགོས་པ་ཞིག་མ་ཡིན་ནམ།  དེ་ནས་རེ་རེ་བཞིན་རུས་མིང་དང་འཛིན་གྲྭ་སོགས་འབྲི་རུ་འཇུག་དགོས་པ་དང་རྒྱུགས་གཞིའི་ནང་དོན་རེ་རེ་བཞིན་བཏོན་ཏེ་ནང་དོན་གསལ་བཤད་བྱེད་པ་སོགས་མདོར་ན།  མཛུབ་སྟོན་གྱི་རྣམ་པས་བྱིས་པ་རྣམས་ལ་འཚུབ་ཆ་མི་སློང་བ་དང་ཐོག་མཐའ་བར་གསུམ་ཀུན་དུ་སློབ་མ་ཡོངས་རྗེས་ཆོད་ཡོད་མིན་གྱི་གནས་ཚུལ་ལ་རྒྱུས་ལོན་ཟབ་མོ་བྱེད་དགོས་ལ་སློབ་མ་དམིགས་བསལ་ཅན་ལ་དམིགས་བསལ་ལྟ་སྐྱོང་བྱེད་རྒྱུ་གལ་ཆེའོ།  རྒྱུ་མཚན་ང་ཚོ་དགེ་རྒན་སུ་ལ་འང་རྒྱུགས་ལེན་པ་ནི་འཇིགས་སྐུལ་བའི་ལག་ཆ་ཞིག་ཏུ་མི་འགྱུར་བའི་བསམ་བློའི་སློབ་གསོ་གཏོང་བའི་འགན་ཁུར་ཡོད་དེ་སློབ་མ་ཚོའི་སྣང་ངོར་རྒྱུགས་གཞི་ཡག་པོ་བྲིས་ནས་རྒྱུགས་འབྲས་ལེགས་པོ་ལེན་ཐུབ་ན་དགའ་རྟགས་མང་པོ་ལེན་ཐུབ་པའི་ངེས་ཤེས་ཙམ་ཐོབ་ཏུ་བཅུག་སྟེ་སྐུལ་མ་བྱེད་པ་ལས་ཡིག་རྒྱུགས་བླངས་པ་བརྒྱུད་བྱིས་པ་ཚོར་བསམ་བློའི་སྟེང་གློ་བུར་དུ་སློབ་སྦྱོང་གི་གནོན་ཤུགས་ལྕི་མོ་ཞིག་སྟེར་བར་བགྱིས་ན་ནི་ནག་ཉེས་ཆེན་པོ་ཞིག་ཏུ་འགྱུར་འགྲོ་བ་ལས་མ་འདས་ལ་སློབ་མ་ལ་གནོན་ཤུགས་སྟེར་བ་ནི་སློབ་མའི་སེམས་ཁམས་དང་བསམ་བློའི་ཐེག་ཚད།  ལོ་རིམ་མཐོ་རུ་ཕྱིན་པ་དང་བསྟུན་དགོས་པས་ཡིག་རྒྱུགས་ལེན་པ་དེ་སྐུལ་མ་ནས་གནོན་ཤུགས་སུ་འགྱུར་བར་གོ་རིམ་ངེས་ཅན་ཞིག་བརྒྱུད་དགོས་པ་རེད། 

གསུམ་པ།  རྒྱུགས་འབྲས་གཙིགས་སུ་འཛིན་རྒྱུ་མང་དྲགས་པ་ལས་བྱུང་བའི་་་་་་སེམས་ཁུར།

དེ་ཡང་ད་ལྟའི་མི་རིགས་ས་ཁུལ་གྱི་སློབ་གསོ་སྒྲུབ་སྟངས་དེ་རྒྱུགས་འབྲས་ཀྱི་རྣམ་པ་ཅན་དུ་གྱུར་འདུག་སྟེ།  རྒྱུགས་གཞིའི་རྒྱུགས་འབྲས་ཀྱི་ཐོབ་སྐར་གྱི་མཐོ་དམན་གྱིས་སློབ་མའི་སྦྱངས་འབྲས་ཀྱི་ལེགས་ཉེས་ལ་ཐད་ཀར་དུ་ཐག་གཅོད་བྱེད་བཞིན་ཡོད་ལ་དགེ་རྒན་གྱི་སློབ་གསོའི་འགན་ཁུར་ཡང་ཕལ་ཆེར་འདི་ཙམ་ཁོ་ན་ཡིན་པ་ལྟར་དུ་སྣང་བ་ལ་འང་ཁག་མི་འདུག་སྟེ།   སློབ་མའི་བསླབ་འབྲས་དེ་དགེ་རྒན་གྱི་བྱ་བའི་གྲུབ་འབྲས་ལ་འང་རྩི་བཞིན་ཡོད།   ཡིན་ན་འང༌།   འདི་ནི་གནད་དོན་ཞིག་ཡིན་པས་དངོས་ནས་སེམས་ཁུར་བྱ་དགོས་པའི་གནས་སུ་ལྷུང་འདུག   སྤྱིར་སློབ་གསོ་ཞེས་པ་ནི་སྦྱངས་འབྲས་ཀྱི་ཐོབ་སྐར་ཙམ་དུ་བསམ་ན་དགེ་རྒན་རྣམས་ལ་འགན་འཁུར་ཆེར་མི་འདུག་སྟེ་རྒྱུ་མཚན་ནི་དུས་རྒྱུན་ཀྱི་སློབ་ཁྲིད་བྱས་ཚར་རྗེས་འཕྲོ་མའི་དུས་ཚོད་ནང་ཁྲིད་ཟིན་པའི་ནང་དོན་ཡང་དང་བསྐྱར་དུ་སྦྱངས་པ་བྱས་ན་ཐོབ་སྐར་ནི་མི་དམན་པ་ཞིག་ལོན་སྲིད།   ཡིན་ན་འང༌།  དགེ་རྒན་རྣམས་ཀྱིས་རྒྱུགས་སྐར་གྱི་མཐོ་དམན་ཙམ་ལ་མགོ་འཁོར་ནས་འདུག་དུས།  ་ཞོར་དུ་ཤོར་བཞིན་པ་ནི་ཅི་ཞིག་ཡིན་ནམ།  བདག་གིས་བསམ་ན་ཤོར་བཞིན་པ་དེ་ནི་ཏག་ཏག་ང་ཚོས་གླེང་བཞིན་པའི་སློབ་གསོ་རེད།  བདག་གི་བསམ་ཚུལ་ཞིག་ལ་ང་ཚོས་རྒྱུན་དུ་བྱིས་པ་ཚོས་སློབ་ཐུན་ཚོགས་དུས་སུ་འུར་མི་རྒྱག་པ་དང་སློབ་ཐུན་གྲོལ་དུས་མ་རབས་དང་མི་འོས་པའི་ལས་མི་བྱེད་པའི་སྒྲིག་ལམ་འབའ་ཞིག་བཟུང་ནས་བྱིས་པ་ཚོར་མུ་ནས་མུ་རུ་དཔེ་དེབ་ཀྱི་ནང་དོན་སྦྱངས་པ་དང་བློར་སྐྱོར་ཁོ་ན་བྱེད་པ་ནི་སློབ་གསོ་ཞིག་ཏུ་སེམས་འདུག་པ་ནི་ནོར་འཁྲུལ་ཤ་སྟག་ཅིག་རེད་འདོད་དེ།  དཔེར་ན།  ད་ལྟ་སྤྱི་ཁྱབ་ཀྱིས་བལྟས་ན་སློབ་གྲྭ་ཡོངས་ཀྱི་རྒྱུགས་གཞིའི་ཐོབ་སྐར་ཤིན་ཏུ་མཐོ་བ་དང་རྒྱུགས་འབྲས་ལེགས་པོ་བྱུང་སོང་ཟེར་ནས་བསྟོད་ར་གདེངས་འཇོག་ཚད་མཐོན་པོ་གནང་བཞིན་ཡོད་མོད།  འོན་ཀྱང་བྱིས་པ་ཚོས་ཕན་ཚུན་དང་ཐ་ན་དགེ་རྒན་གྱི་གཞུང་ལས་ཁང་དུ་སུ་ཡང་མེད་དུས་ནང་དུ་གསང་སྟབས་ཀྱིས་འཛུལ་ཡོང་ནས་རང་ཉིད་ལ་ཅི་མཁོ་སོགས་འཁྱེར་བར་བྱེད་ན།  འདི་ནི་སློབ་གསོ་དང་འབྲེལ་བ་ཅི་ཡང་མེད་པ་ཡིན་ནམ།    ཡང་ན་འདི་གནད་དོན་གལ་ཆེན་ཞིག་མ་རེད་དམ།   སྤྱིར་སློབ་ཆུང་སློབ་མ་ནི་ལོ་ན་ཆུང་རྐྱེན་ སེམས་ཁམས་དང་ལུས་ཁམས་སོགས་ཕྱོགས་གང་ཅིའི་ཐད་ནས་གཉོམ་ལ་ཞན་པ།  ཁོར་ཡུག་དང་བྱ་དངོས་མང་པོ་ཞིག་ལ་བསམ་བློའི་ངེས་ཤེས་མེད་པ། བྱ་བ་ཅི་རིགས་ལ་བསམ་བློ་གཏོང་མི་ཤེས་པ་སོགས་མདོར་ན་ཁོ་ཚོས་ཅི་ཡང་ཤེས་ཀྱི་ཡོད་པ་མ་རེད་པས།   བྱིས་པ་འདི་ཚོའི་ནར་སོན་པའི་གོ་རིམ་མང་ཤོས་ཤིག་དགེ་རྒན་ཚོར་རག་ལས་ཡོད་པ་མ་ཡིན་ནམ།  དེ་ན་དགེ་རྒན་གྱི་བྱེད་ནུས་གཙོ་བོ་ནི་རྒྱུགས་སྐར་ཙམ་དུ་བསམ་པའི་སློབ་གསོ་ཡིན་ན།   བྱིས་པ་ཚོ་མ་འོངས་པ་ན་མི་ག་འདྲ་ཞིག་འཁྱོངས་པར་འདང་མ་རྒྱབ་པས།   བྱིས་པ་ཚོ་ཕྱུགས་བཞིན་འཚོ་སྐྱོང་བྱས་ནས་ཐ་མར་ཤན་པའི་ལག་ཏུ་བཞག་པ་དང་ཁྱད་ཅི།    དེ་བས་བདག་གིས་བསམ་པ་ཡིན་ན།    སློབ་ཁྲིད་ཀྱི་ཞོར་དུ་རྒྱུན་དུ་བྱིས་པ་ཚོར་རང་མི་རིགས་ཀྱི་ཕུན་སུམ་ཚོགས་པའི་རིགས་  གནས་དང་ལོ་རྒྱུས་སོགས་དང་འབྲེལ་ནས་མི་ཆོས་སློབ་གསོ་མང་དུ་བྱས་སྟེ་ཁ་ལེན་ཚིག་བརྩི་བྱེད་ལ་བླངས་དོར་གྱི་དབྱེ་བ་འབྱེད་ཤེས་པའི་མི་གཤིས་ཡག་པོ་ལྡན་པ་དང་མི་རིགས་དང་མེས་རྒྱལ་གྱི་འདུ་ཤེས་ཡོད་པའི་བྱིས་པ་ཡ་རབས་ཤིག་ཏུ་འགྱུར་བར་བྱེད་པ་གཙོ་བྱས་ནས་བྱིས་པའི་དགའ་ཕྱོགས་དང་གཞན་པའི་ནུས་པ་སོགས་ལ་མཉམ་འཇོག་བྱེད་རྒྱུ་དང་ཞིབ་ལྟ་བྱེད་རྒྱུ་ནི་ཤིན་དུ་གལ་ཆེ་འདུག་བསམ་བྱུང༌།    དེ་ཡང་སློབ་གསོའི་རིག་པའི་དཔེ་དེབ་ཅིག་ཏུ་འདི་ལྟར་བྲིས་འདུག་སྟེ། སློབ་ཆུང་རིམ་པའི་སློབ་གསོའི་འགན་ཁུར་དང་ལེགས་འགྲུབ་ཡོང་ཚད་གཙོ་བོ་ནི་རྨང་གཞི་བརྟན་པོ་ཞིག་འཛུགས་རྒྱུ་དེ་ཡིན་ཏེ།  སློབ་གྲྭ་གང་ལ་ཞུགས་ན་འང་ཆོག་པའི་རིག་གནས་ཀྱི་རྨང་གཞི་མཐུག་པོ་གཏོང་བ་ཡིན་ཏེ།   སྐད་ཡིག་དང་གྲངས་རིགས་ལ་སྦྱངས་པ་བྱས་ནས་འབྲི་ཀློག་དང་རྩིས་རྒྱག  ད་དུང་ལག་ཤེས་ཀྱི་ནུས་རྩལ་ལ་སྦྱོང་བརྡར་བྱས་ན།  བྱིས་པའི་བསམ་བློའི་ནུས་པ་ལ་འཕེལ་རྒྱས་དང་དེང་ཕྱིན་གྱི་སློབ་སྦྱོང་གི་ནུས་པའི་འཕེལ་རྒྱས་ལ་འང་དོན་སྙིང་གལ་ཆེན་ཡོད་པ་མ་ཟད།  དེ་བས་ལག་ཤེས་ཀྱི་རིགས་ཡང་གཙོ་གནད་དུ་འཛིན་དགོས་སྟེ།  གསར་གཏོད་ཀྱི་ནུས་པ་ལྡན་པའི་མི་ལ་མཚོན་ན་སློབ་ཆུང་སྐབས་སུ་རྟགས་མཚན་མངོན་སྲིད་པས་དུས་ཚོད་དམ་འཛིན་བྱས་ནས་གསོ་སྐྱོང་བྱ་རྒྱུ་གཙོ་བོ་ཡིན།  གལ་ཏེ་དུས་ཚོད་འདི་བདའ་བ་ཡིན་ན་རྗེས་ཕྱོགས་སུ་བྱེད་ནུས་ཆེན་པོ་ཐོན་པར་ཤིན་ཏུ་དལ་བ་རེད།   དེ་བས་སློབ་ཆུང་སྐབས་སུ་བྱིས་པ་རྣམས་ལ་ཐོག་མ་ནས་བསམ་བློ་བཏང་སྟེ་ལག་པ་འགུལ་བའི་ནུས་པ་སྐྱེད་བསྲིང་བྱས་ནས་རང་ཉིད་ཀྱི་བློ་རིག་དང་ལུས་ཤུགས་བརྟེན་ནས་སྤུས་ཚད་མཐོ་བའི་སྤྱི་དམངས་ཤིག་བྱེད་པར་སྔ་མོ་ནས་རྨང་གཞི་ལེགས་པོ་བཏིངས་ནས་རྒྱལ་ཡོངས་མི་རིགས་ཀྱི་རིག་གནས་ཀྱི་སྤུས་ཚད་མཐོར་འདེགས་བྱེད་པར་རྨང་གཞི་འདིང་དགོས་པ་རེད།  དེ་ན་ང་ཚོའི་འགན་ཁུར་ནི་རྒྱུགས་སྐར་མཐོར་འདེགས་བྱེད་པ་ཙམ་ཡིན་ནམ།

 

   ༢༠༡༠ལོའི་ཟླ༡༡པའི་ཚེས༡༡ཉིན།

 

rl25258 | རྩོམ་ཡོངས་ཀློག་པ།(765) | ལན་སློག(7)
ཁྱོད༌། ང་ཁོ་ནའི་ཡིན།
2010-11-9 11:55:00

ཁྱོད༌།    ང་ཁོ་ནའི་ཡིན།
                           མཚོ།
ཁྱོད།   དཀོན་མཆོག་སུ་ཞིག་གིས་ང་ལ་ཆེད་དུ་གནང་བའི།
བདག་མེད་ཀྱི་བསླུ་བྲིད་ཡིན་ནམ།
སུ་ཡང་ཁྱོད་ལ་མཇལ་མ་སོང༌།

ཡང་ན།   སེམས་ལྗོངས་གང་ཞིག་ནས་བདས་བའི།
ཁེར་རྐྱང་གི་བསིལ་རླུང་ཡིན།
སུས་ཀྱང་ཁྱོད་རང་ཚོར་མ་སོང༌།

ཡང་ན།  སེང་རས་ལྟ་བུའི་འཇིག་རྟེན་གང་ཞིག་ནས།
ཆེད་དུ་ང་ལ་བཞད་པའི།
མག་མོག་གི་རྒྱ་སེ་རྐང་གཅིག་ཡིན་ནམ།
སུས་ཀྱང་ཁྱོད་རང་བལ་མ་སོང༌།

གང་ལྟར།   ཁྱོད་ཉིད།
ད་ནས་ངའི་རྨི་ལམ་གྱི་རྒྱབ་ལྗོངས་ཡིན།
ད་ནས་ངའི་མངོན་སུམ་གྱི་མཛེས་སྡུག་ཡིན།

ཁྱོད་ཨ།    ཁྱོད་ཨ། 
ངའི་སྨྲ་བསམ་བརྗོད་འདས་ཀྱི་སེམས་གཏམ་སྙི་མོའི་བར་གསེང་ན།
ཇི་འདྲའི་སྙིང་དུ་སྡུག
ངའི་འཚོ་བའི་མེ་སོན་ཤུགས་ཀྱིས་འབར་བའི་འོད་ངོགས་ན།
ཇི་འདྲའི་ཡིད་དུ་འོང༌།

རྨི་ལམ་གཞན་ཞིག་གིས་ཁུར་དུ་ལྕི་བའི་མཚན་ལྗོངས་རེ་རེ།
ད་ནི་ཁྱོད་རང་བསམ་ཆོག་པའི་སྐལ་བ་ཡིན་དུས།
ངལ་དུབ་ཀྱིས་མནར་བའི་སེམས་པ་འདི།
ད་ནས།   རྒྱང་རིང་ལ་བཅར་དགོས་མི་འདུག

rl25258 | རྩོམ་ཡོངས་ཀློག་པ།(1139) | ལན་སློག(19)
བུ་ཕྲུག་ཅིག་གི་མིག་ཆུའི་བྱུང་བ།
2010-10-28 15:01:00
བུ་ཕྲུག་ཅིག་གི་མིག་ཆུའི་བྱུང་བ།
        དེ་རིང་ནི།   ཟླ་དྲུག་པའི་ཚེས་བཅུ་བཞི་ཡིན་ལ།  ཨ་ཕའི་དུས་ཆེན་ཉིན་མོ་རེད།  དེ་རིང་ཨ་ཕའི་དུས་ཆེན་ཡིན་པའང་གྲོགས་པོ་ཤིག་གིས་བཤད་པས་ཐོལ་གྱིས་དྲན་པ་ལས་ཡོངས་སུ་བརྗེད་འདུག་ལ།   ད་གཟོད་ཁྱོད་རང་རྒྱང་རིང་ན་ཡོད་པ་ཚོར་ཞིང་ཁྱོད་ཀྱིས་རྒྱང་རིང་གི་གནས་དེ་ན་ཁྱིམ་མིའི་བདེ་སྡུག་སེམས་ཁུངས་ལ་ཉར་ཏེ་དངུལ་ལོར་རེ་རེ་བཞིན་དཀའ་ཚགས་དང་ངལ་དུབ་ཀྱིས་བརྩོན་ལེན་བྱེད་བཞིན་པ་ཡུན་གྱིས་ཚོར་ཡོང༌།  དུས་ཆེན་འདི་ལྟ་བུ་ལ་ཁྱོད་ཀྱིས་དང་དོད་བྱེད་མི་སྲིད་ན་ཡང༌།  བདག་ནི་ཁྱོད་ཀྱི་བུ་ཕྲུག་ཅིག་ཡིན་པའི་ཆ་ནས།   ཁྱོད་ལ་དབང་བའི་ཉིན་མོ་གཅིག་པོ་འདི་འང་གཏིང་བརྗེད་དུ་གྱུར་ན།   ངས་བསམ་མྱོང་ལ་བཤད་ཀྱང་མྱོང་བའི་དྲིན་ལན་ཞེས་པའི་ཚིག་འབྲུ་དེར་ད་ནི་ངོ་གནོང་དགོས་བྱུང༌། 
        ཡོད་ཚད་ཅིག་འདས་སོང་བའི་དེ་རིང༌།  མང་པོ་ཞིག་ཡིད་ནས་ཝ་ལེར་འདུག་ནའང༌།   ཅི་ལྟར་དྲན་ནས་གང་ལྟར་བསམ་ཡང༌།  ངའི་ཕྱིར་དྲན་གྱི་ཀློང་ན་ཁྱོད་གཅིག་པུ་ལྷིང་འཇགས་དང་རབ་རིབ་ཁྲོད་གནས་བ་དེ་ནི།  ཨ་ཕས་ནམ་ཡང་རྡུང་རྡེག་གཏོང་མི་སྲིད་པས་ལོས་ཡིན།  ཐག་རིང་ནས་ཁྱེར་ཡོང་བའི་བརྩེ་ཞེན་གྱི་སེམས་པ་འདི་ཁྱིམ་མི་རེ་རེར་དགོ་བྱ་རྒྱག་དུས་ཀྱང༌།  ཁྱོད་ནི་ནམ་ཡང་བདག་གི་བརྗེད་ཡུལ་གྱི་གྲུ་ཟུར་ཞིག་ན་ང་ཡི་ལོག་ཕེབས་ལ་དགའ་མགུའི་རྟེན་འབྲེལ་ཞུ་མཁན་གྱི་ཕ་སེམས་རྒྱ་ཅན་དེ་རེད་ཨང༌།
       མགོ་ནག་མི་ཡི་སྐྱིད་སྡུག་གནམ་གྱི་ལག་ཡིན་ན་འང༌།  ཁྱོད་ནི་ནམ་ཡང་གནམ་རྒན་མར་འཕྲིན་ཡིག་བཏང་སྟེ་ལེ་བདའ་དང་སློང་མོ་བྱེད་མི་སྲིད་པའི་རྟོགས་སད་ཀྱི་སོ་ནམ་པ་ཞིག་ཡིན་རྐྱེན།  ནང་མིའི་བདེ་སྡུག་དང་བུ་ཕྲུག་ཚོའི་མདུན་ལམ་གསར་བ་ཞིག་གི་ཆེད་དུ་ཁྱོད་ཀྱིས་ལམ་རྒྱགསམེད་བའི་འགྲུལ་བཞུད་རེ་རེ་སྙིང་སྟོབས་དང་ཡིད་ཆེས་ཀྱིས་མགོ་བརྩམས་ཤིང་ངལ་དུབ་ཀྱིས་ཕྱིར་ལོག་ཐེངས་རེར།  སྐྱེལ་བསུ་གང་ཡང་མེད་པ་རྒྱུན་ལྡན་དུ་གྱུར་ན་འང༌།   ཁྱོད་ཀྱིས་ནམ་ཡང་འཁང་ར་བྱས་མ་མྱོང་བ་དེ་ནི།  ཁྱོད་ཀྱི་སྨྲ་བསམ་བརྗོད་འདས་ཀྱི་ཞེན་ཆགས་དང་དགའ་འཛོམས་ཤིག་གི་མཚོན་རྟགས་ཡིན་པ་ངས་ཅིས་ཀྱང་རྟོགས་དགོས་ཨང༌།
       ནམ་ཞིག་ནས་ཁྱོད་རང་དུད་ཆང་ལ་ལོབས་སོང་བ་ངས་ཀྱང་མཉམ་མ་བཞག་ལ།  ཅིའི་ཕྱིར་དུ་ཁྱོད་ལ་མིག་ཆུ་ཞེས་པ་ཞིག་མེད་སོང་བ་ཡང༌།  ཁྱོད་ནི་ཡོད་ཚད་ཅིག་ཐེག་དགོས་ལ་ཐེག་ཡང་འོས་བའི་ངའི་སེམས་ཀྱི་སྟོབས་པོ་ཆེ་དེ་ཡིན་པས་ཡིན་ལ།  ནམ་ཞིག་ནས་སྐྲ་འདབ་ཁ་བའི་མདངས་ལ་བསྒྱུར་ཅིང་ངོ་གདོང་གཉེར་མས་ཁེངས་ཡོད་པ་སོགས།  མདོར་ན།  ངའི་དང་དོད་ཀྱི་ཆེས་ཕྱི་རོལ་ན་འདུག་པ་དེ་འང༌།  ཁྱོད་ནི་ཁྱིམ་མི་ཡོད་ཚད་ཀྱི་ལང་ཚོའི་རྒ་བ་འཁུར་དགོས་ལ་འཁུར་ཡང་འོས་བའི་ངའི་སེམས་ཀྱི་རྟུལ་ཕོད་དེ་ཡིན་པས་ལོས་ཡིན།
       ཨ་མའི་སྐད་གདངས་དང་སེམས་ཁམས་ཀྱིས་ཤན་ཞུགས་པའི་ངའི་བྱིས་དུས་ཀྱི་ལོ་ཟླའི་ཁྲོད།   ཁྱོད་རང་ཕྱིར་སོང་ཤུལ་དུ།  ཨ་མའི་མིག་ཆུས་བརླན་པའི་ངའི་ཉམ་ཆུང་གི་བྱིས་བློས་ཁྱོད་ལ་ལེ་བདའ་ག་ཙམ་བྱས་མྱོང༌།  ཡིན་ན་ཡང༌།  ལོ་མང་པོ་མང་པོ་ཞིག་འགོར་བའི་དེ་རིང༌།  ངས་ཁྱོད་ཀྱི་རིད་གྱོང་གི་ངོ་གདོང་དང་མདངས་ཉམས་པའི་མིག་ཟུང་ལས་ལོ་ཟླའི་རྗེས་ཤུལ་མཐོང་སོང་ལ།   འཚོ་བའི་གདུག་རྩུབ་ཀྱང་བཀླགས་སོང༌།  ཨ་ཕ་ཡ།  ངས་མིག་ཆུ་འདོན་པར་འཁང་ར་མ་བྱེད།   སྤྱིར་ན་ངས་ཀྱང་བུ་ཞིག་གི་ཚབ་དུ་བརྟན་བརླིང་གིས་ཅི་ལ་ཡང་གདོང་གཏུག་འདོད་མོད།  ཡིན་ན་ཡང་ལས་དབང་གི་ཀུ་རེ་འདི་ངས་གཟོད་ཐབས་མི་འདུག  ཡང་ན།  ཁྱོད་ཉིད་ཅིའི་ཕྱིར་ལས་དབང་ལ་གདོང་གཏུག་ཕོད་པའི་བབ་ཆགས་ཀྱི་དཔའ་བོ་དེ་ཡིན་སོང༌།
      དེ་རིང་ང་ཨ་མའི་སྡུག་ཡུས་ལ་སུན་སྣང་སྐྱེས་དོན།  ང་རང་ནར་སོན་རི་ཤོར་གྱི་བུ་ཕྲུག་ཅིག་གི་མཚོན་རྟགས་ཁོ་ན་མ་ཡིན་པར།  ཁྱོད་ཀྱི་ཞི་དུལ་ལ་དུངས་བ་སྐྱེས་བས་ཡིན་ལ་ངས་སྔར་ནས་ཨ་མའི་བདེ་སྡུག་མིག་གིས་འཚོས་ཡོད་པས།  ད་ནི་ཁྱོད་ཀྱི་སྐྱིད་སྡུག་སེམས་ཀྱིས་ཚོར་འདོད་འདུག་པས་ཡིན།  ཆུང་དུས་སུ།  ཁྱོད་ནི་ནམ་ཡང་འདི་ལྟར་ཏེ།  ཤེས་མེད་ཚོར་མེད་ཀྱིས་ངའི་སེམས་ལ་ཞོགས་པའི་བ་མོ་ལྟ་བུའི་བག་ཆགས་རེ་བཞག་རྗེས་སླར་ཡང་ཞོགས་པའི་བ་མོ་བཞིན་གར་མེད་དུ་གང་ཞིག་ལ་བུད་འགྲོ  ངོ་མ།  དེ་དུས་ངས་ཞོགས་པའི་བ་མོ་ལྟ་བུའི་ཁྱོད་རང་ད་ལྟའི་ངའི་ཉི་འོད་བཞིན་གྱི་བདེ་སྐྱིད་ཀྱི་འཚོ་བ་འདིའི་གཞི་མ་ཡིན་པ་ཡེ་ནས་ཚོར་མ་བྱུང༌།  ཨ་ཕ་ལགས།  ངའི་བསམ་གཞིག་གི་བྱས་ཉེས་ལ་དགོངས་པ་མི་ཚོམ་རོགས།
      ས་རྡུལ་དང་ངལ་དུབ་ཀྱིས་མནར་བའི་ཁྱོད་རང༌།  བྲེལ་འཚུབ་ཀྱི་བར་གསེང་དག་ཏུ་ཆང་དམ་དང་མཉམ་དུ་འགྱེལ་དུས།  ངས་ད་གཟོད་ཁྱོད་ཀྱི་ཞལ་ངོ་རུ་ཤར་ཤུར་དུ་གནས་པའི་གཉེར་མའི་ཟབ་ཚད་རྟོགས་ལ།  རྡབ་རྡིབ་ཀྱི་བཟི་སྐད་བར་ནས་ད་གཟོད་ཁྱོད་ཀྱི་མི་ཚེའི་དཀའ་སྡུག་ཚོར།    ཡིན་ན་ཡང་འཇིག་རྟེན་འདིའི་འདུ་བྲལ་གྱི་ཆོས་ཉིད་ཀྱིས་རང་དང་རང་གི་ཡོད་ཚད་ཤོང་སའི་སྐྱིལ་བུ་ཞིག་གི་ཆེད་དུ།  ང་དངོས་སུ་ཁྱོད་ཀྱི་བརྩེ་སེམས་ཀྱི་ཁུག་ནས་ཕྱིར་འབུད་བྱེད་དུས།  ཁྱོད་ཀྱི་འཛུམ་མདངས་དང་ལྷག་བསམ་ལ་སྔར་བཞིན་གྱིས་གཟི་འོད་འཕྲོ།  ཨ་ཕ།  སྤྱིར་ན་སྐབས་འདིར་ཁྱོད་ཀྱིས་མིག་ཆུ་འདོན་ཞོར་ང་ལ་ལེ་བདའ་ཡང་ཡང་བྱེད་འོས།  རྒྱུ་མཚན༌།  ང་ནར་སོན་དུས་ཁྱོད་རང་མི་ཚེའི་ཕ་མཐའ་ན་རྒས་ཁོག་དང་ཁེར་རྐྱང་ཡིན།
སྤྱིར་ན་མི་ཚེ་འདིར་ངས་སྤྲོ་གར་ཞིག་ཁྲབ་འདོད་ཆེ་མོད།  ཡིན་ན་ཡང༌།  མི་ལོ་ཉི་ཤུའི་འཁྲབ་གཞུང་གི་ཡོལ་བ་རྒྱག་ལ་ཉེ་དུས།  ངས་ཁྱོདལ་སྡུག་བསྔལ་བསླངས་སོང་བ་དེར་ངས་མགོ་ལྐོག་སྐམ་པོ་ས་རུ་བསྡུ་རེག་བར་དུའང་ནོངས་འགྱོད་སྐྱེས་དགོས་བྱུང་ལ་རང་གིས་རང་ལ་བཞག་པའི་སེམས་གཏིང་གི་སོས་མེད་ཀྱི་རྨ་ཁ་ཞིག་ཀྱང་ཡིན་སོང༌།  དེ་བཞིན།  མི་ཚེའི་རྫོགས་ལྡན་གྱི་དུས་ཚིགས་འདིར་ཡང༌།  ངས་ཁྱོད་ཀྱི་འདོད་དོན་ལ་ཅི་ཡང་བྱས་མ་སོང་ལ།  ཁྱོད་ཀྱིས་ཀྱང་བདག་གི་བྱས་ཉེས་ལ་འཁེང་ར་བྱས་མ་སོང༌།  ཨ་ཕ་ལགས།  ད་ལྟ་གཞི་ནས་མ་རུ་གྱུར་བའི་ངས་ཁྱོད་ཀྱིས་སྲོག་བཞིན་གཅེས་པའི་ཚ་བོར་བྱིན་དང་སྟེར་མུས་ཀྱི་གཏོང་ཕོད་བསམ་ཐེངས་རེར།  རང་གིས་རང་ལ་འགྲམ་ལྕགས་ཚ་བོ་རེ་བསླང་འོང༌།  རྒྱུ་མཚན།  ངས་ཁྱོད་ཀྱི་སླད་དུ་ཅི་ཡང་བྱས་མ་སོང་ཨང༌།  ཐ་ན་ཚ་ལམ་ལམ་གྱི་འོ་ཇ་དཀར་ཡོལ་གང་འང༌།  ང་ད་དུང་ཡང་ཁྱོད་ཀྱི་སྐྱབས་བཅོལ་ལ་རེ་བའི་བྱིས་པ་བསམ་མེད་ཅིག་ཡིན་ལ།  ཁྱོད་ཀྱི་བྱིན་རླབས་སློང་བའི་འཚོ་བའི་སྤྲང་བོ་ཞིག་ཀྱང་ཡིན་འདུག
བཤད་སྒྲོས་སུ།  ཁྱོད་རང་རི་ཆུ་ཁྲི་ཕྲག་གི་མཚམས་སུ།  རེ་བ་སྣུམ་པོ་ཞིག་གི་ཆེད་དུ་འགྲོ་བའི་ལམ་བར་དུ།  གནས་ཚང་གཡར་བའི་གྲོང་ཁྱེར་གྱི་སྨག་ནག་པའི་མཚན་མོ་དེ་ནི།  ཁྱོད་ཁོ་ན་མ་ཤོང་ལ་ཁྱོད་ཁོ་ནར་བསྐྲུན་པའི་་དགུན་འཁྱག་གི་མཚན་མོ་ཞིག་ཡིན་འདུག་ཏེ།  ཁྱོད་གཅིག་པུ་ཁ་བ་བུ་ཡུག་གི་ཀློང་ན་འདར་སུག་སུག་གིས་འགྲེང་དགོས་སོང་བ་བདེན་ནམ།  གལ་ཏེ།  གནས་དེ་ནི་ཕ་ཡུལ་ཡིན་ཚེ།  སྐབས་དེ་ནི་ཁྱོད་ཀྱི་ལུས་སེམས་གཉིས་ཀས་དུས་གཅིག་ཏུ་ངལ་གསོ་བའི་དྲོད་འཇམ་གྱི་དུས་ཤིག་ཡིན་སྲིད།
ཨ་ཕ་ཡ།  ཡང་ན་ལས་དབང་ལ་ཡིད་ཆེས་བྱོས་ཤིག  སོ་ནམ་པ་ཞིག་གི་བློ་ཡུལ་ལས་འགོང་བའི་ཁུར་བོ་ཞིག་ད་ནི་མི་འཁུར་བར་བྱ་སྟེ།  རྣང་ཞིང་དང་རྩྭ་ཐང་ཕ་རོལ་གྱི་ཡོད་ཚད་རྒྱུས་མེད་ཀྱི་རྡོ་བ་འཁྱག་ཏོ་ཙམ་ལས་མ་འདས།  ཐོག་མར་ཁྱོད་ཀྱི་དྭངས་གཙང་གི་སེམས་པ་དེས་དེ་དག་གི་དངོས་གྲུབ་གཏན་ནས་ལྕོགས་མི་ནུས་ན།  ཉམས་མེད་ཀྱི་སྤོབས་པ་དེ་གཏན་ནས་ཉམས་དམེས་སུ་མི་གཏོང་རོགས།  ཁྱོད་ཀྱི་སྤོབས་པ་དང་ལྷག་བསམ་དེ་ད་དུང་ཡང་བུ་རབས་ཚ་རྒྱུད་ག་ཙམ་ཞིག་གི་མི་ཚེའི་བདེན་ལུགས་དང་འཚོ་བའི་སྙིང་བོ་ཡིན།
ཡང་ན།  ཁྱོད་རང་རེ་ཞིག་ངལ་གསོ་གྱིས་དང༌།  ས་ཞིང་གྲུ་བཞི་དང་མཐའ་ཡས་རྩྭ་ཐང༌།   ནམ་ཡང་ཁྱོད་ཀྱི་མཛད་མེད་ཀྱི་རྒྱུ་ནོར་ཡིན།  ད་དུང་ཁྱོད་ཀྱི་མདུན་སར་ང་ནམ་ཡང་ཡ་རབས་ཀྱི་བུ་ཕྲུག་དེ་ཡིན་ལ་ཚ་བོ་ཚ་མོ་དག་ནི་ཁྱོད་ཀྱི་མིག་གི་ལྟད་མོ་ཡིན་ཞིང༌།  ཁང་ཁྱིམ་གྲུ་བཞི་འདི་ཁྱོད་ཀྱི་གནས་མལ་དྲོན་མོ་ཡིན།  དོན་དམ་དུ།  འདི་རུ་ཕ་མེས་ཀྱིས་འུ་ཅག་ལ་ཅི་ཡང་བཞག་ཡོད་པས།  ཕ་རོལ་ནི་སྐྱི་ཡ་བའི་གཡང་གཟེར་ཡིན་སྲིད་ཀྱང༌།  འདི་གའི་ཕུན་ཚོགས་ནི་ཁྱོད་ཀྱིས་ཡུན་གྱིས་བཙལ་ནས་རུམ་ལ་བསྡུ་ཆོག་ཆོག་ཡིན།  ཁྱོད་ནི་ཨ་ཕ་དང་བདག་པོ་ཡིན་རྐྱེན།  ཁྱོད་ཀྱིས་ཅི་ལ་འང་སྣང་དོགས་བྱ་དགོས་དོན་མེད།
rl25258 | རྩོམ་ཡོངས་ཀློག་པ།(555) | ལན་སློག(7)
ང་ཡི་ཁྱེད། ཁྱེད་ཀྱི་ང༌།
2010-10-21 11:15:00
ང་ཡི་ཁྱེད།   ཁྱེད་ཀྱི་ང༌།
མཚོ།

ཟླ་བའི་འོད་ངོགས་ནས་འགྱེལ་པ་མང་དྲགས་པས།
ཕན་ཚུན་བྲལ་དོགས་ཀྱིས།
ཁྱོད་དང་འུ་གཉིས།
དམ་དུ་འཁྱུད་པ་གྲངས་མེད་ཡིན།
ཡིན་ན་ཡང༌།
ཁྱེད་དང་འུ་གཉིས།
ཕན་ཚུན་གྱི་མུན་སེལ་མར་མེ་ཡིན།

ཁྱེད་ཀྱི་ང༌།
ཚོར་བ་ཡི་རྩེ་མོ་རུ་ཐོར་མི་རུང་བའི།
ཁྱེད་ཀྱི་ང༌། 
དྭང་གཙང་གི་ཟིལ་ཐིགས་ང།
ང་ཡི་ཁྱེད།
ང་ཡི་མཆི་མ་དང་མཛའ་སེམས་ཀྱིས་བཏེགས་པའི།
ང་ཡི་ཁྱེད།
ཁྱད་འཕགས་ཀྱི་སེམས་བརྟན་དང་སྐྱབས་མགོན་ཁྱེད།
               
ང་ཡི་ཁྱེད།     ཁྱེད་ཀྱི་ང༌།
མཛེས་སྡུག་ཡོད་ཚད་ལ་མེད་མི་རུང་བའི།
ང་ཡི་ཡང་སྙིང་ཁྱེད།
མི་ཟུང་རྒྱལ་མོའི་ངོས་སུ་ཡལ་མི་རུང་བའི།
ཁྱེད་ཀྱི་སྙིང་སྡུག་ང༌།

དེ་རིང་ཡང༌།   འུ་གཉིས་ཀས་ཕན་ཚུན་བྲང་ལ་གླན།
ཁྱེད་ཀྱིས་བདག་ལ།   ཡང་བསྐྱར།
འབྲལ་མི་སྲིད་པའི་ཆོད་སེམས་བཞག་སོང་བས།
བདག་ལ་ཁྱེད་རང།   སྔར་བཞིན།
བསྐྱུར་མི་སྲིད་པའི་དམ་བཅའ་བརྟན་པས།
rl25258 | རྩོམ་ཡོངས་ཀློག་པ།(521) | ལན་སློག(9)
འབྲེལ་ཡོད་ནང་དོན་ 11 ཡོད།<<<12>>>
ཟིན་བྲིས་བརྡ་ཁྱབ།

 

སྨྱུག་མིང་།  མཚོ།

དྲ་འབྲེལ། 1013461908

དྲ་ལམ། http://blog.tibetcm.com/u/tso25258/index.html

སྙན་ངག་ཡོད་པས

ངས་ནང་སེམས་ཀྱི་དགའ་སྐྱོ་ཆགས་སྡང་གླུ་རུ་བླངས་ཆོག

སྙན་ངག་ཡོད་པས

ངའི་བརྩེ་དུང་ལ་འཇའ་ཚོན་གྱི་ཁ་དོག་ལྡན་ཡོད

སྙན་ངག་ཡོད་པས

དགའ་སྐྱོ་མིག་ཆུར་མུ་ཏིག་གི་རིན་ཐང་ལྡན་ཡོད

སྙན་ངག་ཡོད་པས

ང་ལ་རྒྱ་མཚོ་བཞིན་གྱི་སེམས་ཀྱི་མངའ་ཐང་རྒྱས་ཡོད

སྙན་ངག་ཡོད་པས

ང་ལ་གངས་རི་བཞིན་གྱི་བརྟན་བརླིང་གི་རང་གཤིས་གྲུབ་ཡོད

སེམས་ཁམས་ལོ་ཐོ།
པར་དེབ།
ཟིན་ཐོ་གསར་བ།
དཔྱད་བརྗོད་གསར་བ།
ལན་སློག་གསར་བ།
ངའི་གྲོགས་པོ།
ཟིན་བྲིས་ཆ་འཕྲིན།
 
Powered by Oblog.