མཚོ་སྔོན་པོ་བོད་ཡིག་ཟིན་བྲིས། བོད ཟིན མཚོ་སྔོན་པོ ཟིན་རྩོམ། | པར་རིས། | མཁན་པོ། | ཁྱུ་མཆོག | ཟིན་ཚོམས།
ཐོ་འགོད། | ནང་འཇུག ཉར་ཚགས་བྱེད་པ།
分享按钮
གཡག་རོག་གི་ཕ་ཁྱིམ།
http://blog.amdotibet.cn/kangdiy/index.aspx
ཕྲེང་བསྟར།
ངས་མཐོང་བའི་ཝ་ར་ཎཱ་སི།
རྩོམ་པ་པོ།:kangdiy སྤེལ་དུས་:2011-2-12 14:11:00

ངས་མཐོང་བའི་ཝ་ར་ཎཱ་སི།

              གནས་སྐོར་ལྗོངས་རྒྱུ་སོགས་དུས་གཅིག་ལྟར་ད་ལོའི་ཕྱི་ཟླ་དང་པོའི་ཚེས་ལྔ་ཉིན་གྲོགས་པོ་འགའ་ཤས་དང་མཉམ་ཏུ་ལམ་ལ་ཆས་ཏེ། མེ་འཁོར་གྱིས་ངུ་རྒྱང་གཅིག་གི་ཡུལ་ཝ་ར་ཎཱ་སིར་ཉིན་མཚན་བཞི་ཙམ་གྱི་སླེབས་སོང་། སྤྱིར་ན་རྒྱ་གར་གྱི་ས་འདིར་གནའ་བོའི་ཆོས་ལུགས་མང་བོའི་ལོ་རྒྱུས་ཤིན་ཏུ་མང་མོད། ང་ལ་མཚོན་ན་ནང་བའི་གནས་ཆེན་འདི་དག་ནི་བདག་ཤ་གསེང་རུས་གསེང་ལ་ཟུག་པའི་ཕ་མེས་ཀྱི་བག་ཆགས་དེས་དབང་གིས་མ་གླེང་རང་གླེང་དུ་གྱུར་འདུག དེའི་ཕྱིར་ངས་དངོས་སུ་མཐོང་བའི་བའི་ཝར་ཎཱ་ནི་འདི་ལྟར་འདུག ཝ་ར་ཎཱ་སི་ནི། འདུལ་བ་ཚིག་ལེའུར་བྱས་པ་ལས། མཉན་ཡོད་གནས་བཅས་ཙམ་པ་ཀ །ཝ་ར་ཎཱ་ན་སི་ཡངས་པ་ཅན། །རྒྱལ་པོའི་ཁབ་ནི་དྲུག་པ་སྟེ། །འདི་ནི་གྲོང་ཁྱེར་ཆེན་པོར་ཤེས། །ཞེས་གསུངས་པ་ལྟར། གནའ་བོའི་རྒྱ་གར་གྱི་གྲོང་ཁྱེར་ཆེན་པོ་དྲུག་གི་ནང་ཚན་དང་། ལྷག་དོན། མདོ་སྡེ་དགོངས་འགྲེལ་ལས། བཅོམ་ལྡན་འདས་ཀྱིས་དང་པོར་ཡུལ་ཝ་ར་ཎཱ་སིར་དྲང་སྲོང་སྨྲ་བ་རི་དྭགས་ཀྱི་ནགས་སུ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ་འཕགས་པའི་བདེན་པ་བཞིའི་རྣམ་པ་བསྟན། གསུངས་པ་ལྟར། བདག་ཅག་གི་སྟོན་པས་འཁོར་ལྔ་སྡེ་བཟང་པོར་བཀའ་དང་པོ་བདེན་བཞིའི་ཆོས་འཁོར་བསྐོར་བའི་གནས་བྱིན་ཅན་དེ་ཡིན་ལ།

                     ང་རང་དེར་སླེབས་དུས་བོད་རྩིས་ཀྱི་དགུན་ཟླ་བཅུ་གཅིག་པའི་ཚེས་བཅུ་གཅིག་ཡིན་པས་གནམ་གཤིས་ཀྱང་གྲང་ངར་ཆེ་ལ་ཉིན་མཚན་ཀུན་ཏུ་མཁའ་དབུགས་སྨུག་སྤྲིན་གྱིས་བཏུམས་ཤིང་ཐག་རིང་གི་ཡུལ་གྲུ་ཆེན་པོ་མཐོང་མི་ཐུབ་པ་མ་ཟད། མྱི་མང་གིས་གནམ་ས་བླ་འོག་སྒྱུར་ལ་བྱེད་བཞིན་པའི་སྐབས་རེད། ཝ་ར་ཎཱ་སིའམ་ཡང་ན Saranath ནི་Utlar Pradesh མངའ་སྡེའི་ཝར་ཎཱ་གྲོང་ཁྱེར་ཟེར་བ་དེ་ཡིན་ལ། མཆོད་རྟེན་ནས་མེ་འཁོར་འབབ་ཚུགས་བར་སྤྱི་ལེ་བཅུ་བཞི་ཡོད་། དེ་རུ་ད་དུང་བོད་དང་རྒྱ་ནག ཀོ་རི་ཡ། ཉི་ཧོང་སོགས་ཀྱི་དགོན་པ་དང་ལྷ་ཁང་སོགས་ཤུན་ཏུ་མང་།

                   དེ་ནི་སྔོན་གྱི་ཆོས་འཁོར་བསྐོར་བའི་གནས་ཡིན་མོད། ད་ལྟ་ནི་ལྷ་ཁང་མཆོད་རྟེན་གྱི་གནའ་ཤུལ་གྱང་ཆག་དང་རྩིག་གདན་ཙམ་དུ་གྱུར་ཚར་པས་ཤུན་ཏུ་ཕངས། ད་ལྟ་དངོས་སུ་འཇལ་རྒྱུ་ཡོད་པ་ནི་ཤར་ངོས་ཀྱི་ངྷརྨ་ཀའི་མཆོད་རྟེན་བྱ་བ་དེ་ཡིན་ལ། དེ་ཡང་གུཔྟའི་རྒྱལ་རྒྱུད་ཀྱི་སྐབས་སུ་བཞེངས་པར་བཤད། གནས་དེའི་མཆོད་རྟེན་ཆེ་ཤོས་ཀྱང་ཡིན། ཆོས་འཁོར་དངོས་སུ་བསྐོར་བའི་ཤུལ་ལ་རྡོའི་དྲ་མིག་གིས་བསྐོར་བའི་མཆོད་རྟེན་ཆུང་བུ་ཞིག་ཡོད་པར་གནས་ཡིག་དུ་བྲིས་འདུག་མོད། དེ་རུ་རྡོའི་དྲ་མིག་གིས་བསྐོར་བའི་མཆོད་རྟེན་གྱི་ཤུལ་མ་ཞིག་ལས་མཆོད་རྟེན་དངོས་ནི་མི་འདུག དེ་དང་ཉེ་བ་ན་ཆོས་རྒྱལ་ཨ་ཤོ་ཀའམ་ཆོས་རྒྱལ་མྱ་ངན་མེད་ཀྱིས་བཞེངས་པའི་རྡོ་རིང་ཀ་བ་དེ་ཡང་ད་ལྟ་དུམ་བུ་ལྔ་རུ་གྱུར་འདུག དུམ་བུ་ལྔ་དེ་ལྕགས་ཀྱི་དྲ་མིག་བསྐོར་ནས་ཡོད་ལ། དབུས་ཀྱི་རྡོ་རིང་ཕྱེད་དེའི་ངོས་སུ་ཡོད་པའི་ཡི་གེ་དག་ལོ་ཉིས་སྟོང་སྔོན་གྱི་པ་ལེའི་ཡི་གེ་ཡིན་པར་བཤད། རྡོ་རིང་རྒྱབ་ངོས་སུ་རྡོ་རིང་གི་ཡི་གེ་ལས་གཞན་པའི་བོད་ཡིག་དང་ཧ་ཅང་འདྲ་བའི་ཡིག་གེ་ཞིག་འདུག་ལ། བཤམ་དུ་ཡང་བོད་ཀྱི་ཨང་གྲངས་དང་ཧ་ཅང་འདྲ་བའི་ཨང་ཀི་ཡིན་ནམ་ཡི་གེ་གང་ཡིན་མི་ཤེས་པ་ཞིག་འདུག ཡི་གེ་དེ་དག་ལ་བལྟས་ཀྱིན་བལྟས་ཀྱིན་ཡིག་རྐྱང་དང་བརྩེགས་ཡིག་གཅིག་གཉིས་བྱས་ནས་འགའ་ཤས་བཀླག་ཐུབ་པ་ལྟ་བུ་འདུག་མོད། དེ་ཙམ་གྱིས་བོད་ཡིག་ཡིན་པ་དང་བརྗོད་བྱ་ཡོད་པར་ཁ་ཚོད་ཆོད་དཀའ།    རྡོ་རིང་ཉེ་འདབས་སུ་ཡོད་པའི་ལྷ་ཁང་ཤུལ་ཏུ་རྡོའི་ཀ་བ་བཞི་ཁྲི་མ་མི་ཚད་ལྟ་བུ་གཉིས་འདུག་པ་དེ་ནི་སྔོན་སྟོན་པས་ཆོས་འཁོར་བསྐོར་ཤུལ་ཡིན་པར་བཤད། གནས་ཡིག་དུ་རྡོའི་དྲ་མིག་གིས་བསྐོར་བའི་མཆོད་རྟེན་ཆུང་ངུ་ཞིག་ཡོད་ཟེར་བ་དེ་ཡིན་ནམ་ཁ་ཚོད་མི་ཆོད། ད་ལྟའི་མཆོད་རྟེན་ཆེན་པོ་དེ་ནི་སྔོན་ཀླ་ཀློས་གཏོར་བཅོམ་བཏངས་པའི་ལྷ་ཁང་གི་ཤུལ་མ་དག་ཕྱོགས་གཅིག་དུ་སྤུངས་ནས་བཞེངས་པའི་མཆོད་རྟེན་ཡིན་པར་དགེ་སློང་སེར་བོའི་སྡེ་བས་གསུངས་པར་གྲགས་ལ་བདེན་ཤས་ཆེ། རྡོ་རིང་གི་རྒྱབ་ངོས་ཀྱི་ཡི་གེ་དེ་དག་ནི་སྔོན་ཀྱི་སཾསྐྲྀཏའི་མ་ཕྱི་ཡིན་པར་ཡང་བཤད།

               ཤར་ངོས་ཀྱི་མཆོད་རྟེན་དེ་ནི་མཐའ་འཁོར་དུ་དབུ་ཁང་ཀའུའི་དབྱིབས་ཅན་པད་འདབ་བརྒྱད་ཀྱིས་ཕྱོགས་བརྒྱད་ནས་བརྒྱན་ཡོད་ལ། དེའི་སྟོད་དུ་རང་འཐེག་གི་ལྟེ་བའི་དབྱིབས་དང་འདྲ་ལ་སྨད་དུ་འཁོར་ཆེན་དུང་འཁོར་ལྟར་དབྱིབས་སྒོར་མོ་དང་དམིངས་གདན་ལ་རྡོ་ལས་གྲུབ། སྟོད་སྨད་གཉིས་ལ་ཆེ་ཆུང་ཤུན་དུ་ཡོད། འདི་ལ་གནའ་བོའི་རྒྱ་གར་གྱི་མཆོད་རྟེན་གྱི་བཟོ་དབྱིབས་གཞན་དང་མཚུངས་ཆོས་སོགས་ཅི་ཡང་མི་བྲོ་བར་བལྟས་ན། དེ་ནི་སྔོན་གྱི་ཀླ་ཀློས་བཅོམས་པའི་སྐུ་གསུང་ཐུགས་རྟེན་དག་ཕྱོགས་གཅིག་དུ་སྤུངས་ནས་བཞེངས་ཟེར་བའི་དགེ་སློང་སེར་བོའི་བཞེད་པ་བདེན་ཤས་ཆེན་པོ་འདུག   སྤྱིར་རྒྱ་གར་དུ་རྡོ་རྗེ་གདན་དང་འབྲས་སྤུངས་མཆོད་རྟེན་སོགས་ནང་བ་གཅིག་བུ་མ་ཡིན་པའི་མཆོད་རྟེན་བཞེངས་སྲོལ་ཤུན་ཏུ་མང་མོད། དེ་དག་གི་བཟོ་བཀོད་ལ་རྩེ་མོ་མཐོ་ཞིང་དབྱིབས་དང་མཐའ་འཁོར་དུ་རྡོའི་རི་མོས་ཡོངས་སུ་སྐོར་བའི་ལུགས་ཡོད་མོད། འདིའི་པད་འདབ་དག་གི་ཕྱོགས་ཀུན་ཏུ་མཆོད་རྟེན་རང་གི་མཐའ་འཁོར་དང་འཚམས་པའི་ཆ་སྙོམས་ཀྱི་རི་མོ་མེད་པར་པད་འདབ་ཀྱི་ཕྱོགས་འགའ་རེ་ན་རྡོའི་པ་ཏྲ་དང་བཟོ་དབྱིབས་མངོན་ཡོད་ཀྱང་། ཕྱོགས་མཐའ་མང་ཆེ་བ་རང་བྱུང་གི་རྡོ་རྩིག་གི་དབྱིབས་ལས་རི་མོ་སོགས་གང་ཡང་མི་འདུག་པར་བལྟས་ན། རྡོའི་པ་ཏྲ་དེ་དག་ནི་ཕྱོགས་གཞན་གྱི་ལྷ་ཁང་གི་རྩིག་རྡོའི་རྡོ་བརྐོས་རི་མོ་ཡིན་པ་ལས་མཆོད་རྟེན་རང་གི་ཆེད་བཟོས་པ་མིན་པ་ཤ་སྟག་རེད   དེའི་ཕྱིར་བོད་མི་སུ་ཞིག་སླེབས་ཚེ་དང་པོར་མཐོན་པོར་བཞེངས་པའི་མཆོད་རྟེན་ཆེན་པོ་དེར་རྒྱུགས་ནས་ཐོད་པ་གཏུག་པ་ལས། ནུབ་དབུས་སུ་རྡོའི་དྲ་མིག་ནང་གི་མཆོད་རྟེན་དང་ལྷ་ཁང་གི་ཤུལ་ལ་དོ་སྣང་ཤུན་ཏུ་ཆུང་པས་ཕངས་པ་ལ། འདི་ནི་གཙོ་ཆེ་བ་ད་ལྟ་དགེ་སློང་སེར་བོའི་སྡེ་བས་གཙོ་བོ་བྱེད་ལ། སངྒ་ལ་དང་ཐེ་ཝན་འབར་མ་སོགས་ཀྱི་ཆོས་དད་པ་དག་གིས་མཉམ་གཅིག་དུ་སྨོན་ལམ་རྒྱག་པ་དང་རྡོའི་ཀ་བར་གསེར་ཆུ་སོགས་བྱུགས་ནས་ཆོས་ཀྱི་མཛད་སྒོ་རྒྱ་ཆེན་དེ་རུ་བྱེད།

            མཆོད་རྟེན་གྱི་ཤར་ཕྱོགས་སུ་གོམ་པ་ཉིས་བརྒྱ་ཙམ་གྱི་སར་ཡུལ་སངྒ་ལ་ནས་ཕེབས་པའི་སྐྱེ་བུ་སྙིང་སྟོབས་ཆེན་པོ་དགེ་བསྙེན་ངྷརྨ་པཱ་(Anagarika Dharmapala)ལས་བཞེངས་པའི་མཱུ་ལ་གན་ངྷི་ཀཱུ་ཊའི་གཙུག་ལག་ཁང་ཡོད། དེར་སངས་རྒྱས་ཀྱི་སྐུ་རུས་ཚན་པ་གཉིས་བཞུགས། གཅིག་རྡོ་འཇོག་གི་ཡུལ་གྱི་མཆོད་རྟེན་རྙིང་བ་ཞིག་ལས་ཐོབ། གཅིག་ཤོས་ལྷོ་ཕྱོགས་དཔལ་གྱི་རི་ནས་རྙེད་པར་བཤད། ཉེ་འདབས་སུ་སྟོན་པ་གཙོ་འཁོར་དུ་ལྔ་སྡེ་བཟང་པོ་སོགས་ཀྱི་སྐུ་བརྙན་བཞེངས་ནས་རྒྱ་བོད་སོག་དབྱིན་སོགས་ཡིག་སྣ་མང་བོའི་སྟེང་ཆོས་ཀྱི་འཁོར་ལོའི་མདོ་རྡོ་ཀ་མ་ལར་བརྐོས་ཡོད། མཆོད་རྟེན་གྱི་ལྷོ་ནུབ་མཚམས་ཀྱི་ལེའུར་ཕྱེད་ཙམ་ན་མཆོད་རྟེན་ཤུལ་མ་ས་སྦགས་འདྲེས་མའི་ས་འབུར་མཐོ་ཟམ་གྱི་སྟེང་ལྷ་ཁང་ཟུར་བརྒྱད་མ་ཞིག་འདུག དེ་ནི་སྔོན་འཁོར་ལྔ་སྡེ་བཟང་པོ་དང་པོར་སྟོན་པར་མཇལ་བའི་གནས་ཡིན་པར་བཤད། ལྷ་ཁང་ནང་དུ་ཨར་འདམ་གྱི་རྡོ་མཐིལ་དུ་རྡོའི་ཀ་བའི་སྣེ་ལྟ་བུའི་ཕྱོགས་འགའ་ཤས་ན་མངོན་པ་ཙམ་ལས་གཞན་ཅི་ཡང་མི་འདུག

རྩོམ་ཡོངས་ཀློག་པ།(1226) | ལན་སློག(0)
གནད་ཚིག:ཝ་ར་ཎཱ་སི།
ནང་འཇུག་བྱས་རྗེས་ ཁྱེད་ཉིད་ཀྱི་ཆ་འཕྲིན་འདིར་འཆར་ངེས།
粗体 斜体 下划线 插入引用 插入表情
Powered by Oblog.