ཟིན་ཚོམས་ཆ་འཕྲིན།
  • ཟིན་ཚོམས་མིང་།:ཁྲ་ཁྲ
ཟིན་ཚོམས་མཚམས་སྦྱོར།:

ཟིན་ཚོམས་སུ་ཕེབས་ཤོག།

  • བསྐྲུན་མཁན།:ladeshensui
  • བསྐྲུན་དུས།:2014-6-19 23:42:42
  • ཁོངས་མི་བསྡོམས་གྲངས།:2
  • བརྗོད་གཞི་བསྡོམས་གྲངས།:9
  • ལན་སློག་བསྡོམས་གྲངས།:3
ཁྲ་ཁྲ >སྨན་གྱི་ལྷ་མོའི་མདོ་ལས་འཕྲོས་བའི་འདོད་སྤྱོད་ཀྱི་དགོས་སྐྱོན་ཞེས་བྱ་བ་བཞུགས་སོ། (བལྟ་ཀློག་གྲངས།:2266)
སྤེལ་བའི་དུས་2016-2-25 15:37:13
སྨན་གྱི་ལྷ་མོའི་མདོ་ལས་འཕྲོས་བའི་འདོད་སྤྱོད་ཀྱི་དགོས་སྐྱོན་ཞེས་བྱ་བ་བཞུགས་སོ།
                ༼ཀ༽

སྐྱེས་བའི་མིག་ལ་བུད་མེད་དང་།།
བུད་མེད་མིག་ལ་སྐྱེས་པ་མཛེས།།
འདི་ནི་ཕོ་མོའི་མཛའ་བ་སྟེ།།
འདོད་པ་ཀུན་གྱི་མཆོག་ཀྱང་ཡིན།།

དེ་ལ་ཆགས་ཤིང་ཞེན་པ་ཡི།།
འགྲོ་བ་ཀུན་གྱི་རྒྱུ་གཅིག་པུའི།།
ལུས་རྟེན་ཐོབ་ཅིང་རྙེད་པ་ནི།།
བདག་ཅག་ཀུན་གྱི་བསོད་ནམས་འདྲ།།

མ་ཡི་ནུ་ཞོས་བསྐྱངས་བའི་མཐར།།
ལུས་སྟོབས་རྒྱས་ཤིང་ལང་ཚོ་དར།།
དེ་ལ་མོ་ཡི་གཟུགས་བྱད་ནི།།
རྐེད་པ་ཕྲ་ཞིང་བརླ་ཤ་རྒྱས།།
སྨིན་མ་ནག་ཅིང་མིག་ཟུང་གིས།།
འདོད་ལྡན་སྐྱེས་པ་འགུག་པར་བྱེད།།

ཕོ་ནི་སྟོབས་ལྡན་གཟུགས་བྱད་དེ།།
མོ་ལས་ལྡོག་ཅིང་ཐབས་ལ་མཁས།།
འགའ་རེས་ས་ཡི་ཁམས་ཀྱང་འཛིན།།
འདི་ནི་བུད་མེད་རྣམས་ཀྱི་ནི།།
གྲོགས་ཀྱི་མཆོག་དང་སྙིང་གི་རྒྱན།།

སྐྱེས་པ་བུད་མེད་དབྱེ་བ་ནི།།
སྐད་དང་གཟུགས་ཀྱིས་ཕྱེ་བ་མིན།།
སྐྱེས་དང་མ་སྐྱེས་རྟགས་ཀྱི་དབྱེ།།
སྐྱེས་པ་སྐྱེས་དུས་རྟགས་སྐྱེས་ཕྱིར།།
སྐྱེས་པ་ཞེས་ཀྱང་བརྗོད་པ་སྟེ།།
བུད་མེད་སྐྱེས་དུས་སྐྱེས་མེད་པས།།
བུད་མེད་སྐྱེས་མེད་ཅེས་ཀྱང་བརྗོད།།

འདོད་ཆེན་མེ་ལྕེ་འབར་བ་ནི།།
བཅུ་དྲུག་ལོ་ནས་བཞི་བཅུ་བར།།
འདོད་པའི་འདོད་པ་སྤྱོད་པ་སྟེ།།
འགའ་ཞིག་མ་ངེས་དྲུག་ཅུའང་།།
འདོད་པ་སྤྱོད་པ་ཡོད་ཀྱང་སྲིད།།

སྤྱིར་ན་འདོད་སྤྱོད་ལུས་ཀྱི་དུག།
ཤ་སྐམ་སྙིང་དང་མཚན་མའི་ནད།།
ཧ་ཅང་དྲག་ན་སྲོག་ཀྱང་འཕྲོག།
སྒོས་སུ་ལུས་ཐང་སྙིགས་འདོར་བར།།
འདོད་སྤྱོད་མེད་ན་མི་རུང་ངོ་།།
དེའི་ཕྱིར་སྲེད་ལྡན་ཕོ་མོ་ཡིས།།
འདོད་སྤྱོད་པ་ལ་ཆོག་ཤེས་བྱ།།

དགུན་དུས་རོ་བཙའ་མང་བ་ཡིས།།
འདོད་སྤྱོད་མང་ཡང་གནོད་པ་མེད།།
སྟོན་དཔྱིད་ཞག་གཉིས་ཐེངས་གཅིག་དང་།།
དབྱར་སོས་ཟླ་ཕྱེད་འདས་ན་གཅིག།
འདི་ལས་ཐལ་ན་མགོ་འཁོར་ནད།།
ཧ་ཅང་ཐལ་དྲག་འཆི་ཡང་སྲིད།།
ཟུངས་ཀྱི་མཐར་ཐུག་ཁུ་བ་སྟེ།།
འདོད་སྤྱོད་མང་ན་ཟད་པར་འགྱུར།།
མ་སྤྱོད་བསྡད་ན་རྡེའུ་ནད་འབྱུང་།།
དེ་ན་ཚད་དང་མཐུན་ན་བཟང་།།
འདོད་སྤྱོད་སྤང་བའི་དགེ་སློང་ཚོས།།
བློ་དང་ཐབས་ཀྱི་ཁུ་འདོན་བྱ།།
ལུས་སྟོབས་ཉམས་པའི་རྒད་པོ་དང་།།
ནད་ཀྱིས་གདུང་བའི་མི་རྣམས་ཀྱི།།
འདོད་པ་སྤྱད་ན་ཉེས་པ་ཆེ།།
དེའི་ཕྱིར་ཁུ་བ་འདོད་སྤྱོད་སྒོམ།།
འདོད་སྤྱོད་པ་དང་ཆགས་སྤྱོད་པ།།
ཉལ་པོ་སྤྱོད་དང་འཁྲིག་སྤྱོད་པ།།
མོ་སྤྱོད་གཡབ་རེས་མིང་ཡིན་ཏེ།
འཇིག་རྟེན་འགྲོ་བའི་རྒྱུ་རུ་གྲགས།།
འདོད་སྤྱོད་མ་བྱས་འགྲོ་བ་མེད།།
འགྲོ་བ་མེད་ན་འཇིག་རྟེན་སྟོང་།།
འདི་ནི་ཉལ་པོའི་དགོས་མཚན་རེད།།
            ༼ཁ༽
ཕོ་ལོ་ཉེར་བཞི་སོ་ལྔ་དང་།།
མོ་ལོ་ཉེར་གཉིས་ཉེར་དགུ་བར།།
ཕྲུ་གུ་སྐྱེས་པ་མཆོག་ཡིན་ཞེས།།
ཀྲུང་གོའི་རྒྱ་མིའི་ལུགས་ན་འདུག།

དེ་ལས་ཐལ་ན་ཤེས་སོགས་དམན།།
དེ་ལ་མ་སླེབས་ཕྲུ་གུ་སྐྱེས།།
བློ་དང་གཟུགས་བྱད་མི་ལེགས་པ།།
མ་ཧ་ཙི་ནའི་ལུགས་ན་སྣང་།།

གཟུགས་སྟོབས་ལུས་སྟོབས་རྒྱས་པའི་དུས།།
ཕྲུ་གུ་སྐྱེས་པ་མཆོག་ཡིན་པ།།
དེང་གི་མཁས་པ་ཀུན་གྱི་གླེང་།།
དེ་ན་གཟུགས་ལུས་སྨིན་རྒྱས་དུས།།
བུ་འདོད་རྣམས་ཀྱི་འདོད་སྤྱོད་བྱ།།

བུ་བཙའ་རིགས་རྒྱུད་ལེགས་འབྱུང་ཕྱིར།།
དུས་མིན་འདོད་སྤྱོད་སྤང་བ་དང་།།
ཚུལ་མིན་འདོད་སྤྱོད་མི་བྱ་སྟེ།།
རྒན་པོས་གཞོན་པ་སྤྱོད་པ་དང་།།
གཞོན་པའི་རྒན་པོར་སྤྱོད་པ་དང་།།
ཁྱོ་བོ་ཅན་དང་ཆུང་མ་ཅན།།
མི་སྡུག་སྦྲུམ་མར་འདོད་སྤྱོད་སྤང་།།

རོ་བཙའ་རྒྱུད་ཀྱི་མཆོག་ཡིན་པས།།
དུས་བཀག་ཚད་བཀག་མ་ནོར་གཅེས།།
གཅིག་གསུམ་དགུ་སོགས་ཡ་འདེད་དང་།།
གཉིས་བཞི་བརྒྱད་སོགས་ཆ་འདེད་དེ།།
མ་ནོར་སྨན་གཞུང་བཞིན་སྤྱོད་ན།།
ཕོ་མོ་གང་དགོས་འདོད་བཞིན་འགྲུབ།།

ཁུ་ཟད་ཕྲུ་གུའི་རྒྱུ་འགྱུར་དང་།།
མ་སྨིན་རྒྱུ་འགྱུར་གང་ཡང་རུང་།།
སྐྱེ་སྟོབས་ཞེན་ཞིང་རིག་པ་དམན།།
དེའི་ཕྱིར་གང་འདོད་མ་སྤྱོད་ཅིག།

ཨེ་ཙི་ནད་དུག་སྦྱར་མ་དང་།
རེག་དུག་བསེ་དུག་ལ་སོགས་པའི།།
མཚན་མའི་འགོས་ནད་ཡོད་དོ་ཅོག།
འདོད་པའི་སྤྱོད་ལམ་ལོག་ལས་བྱུང་།།
དེའི་ཕྱིར་གང་བྱུང་འདོད་སྤྱོད་སྤོངས།།

མདོར་ན་གཟུགས་ཆེ་ལུས་སྟོབས་ཆེ།།
ཤེས་བཟང་དྲན་གསལ་སྨྲ་བརྗོད་དག།
ངང་རྒྱུད་བཟང་བ་ལ་སོགས་དང་།།
གཟུགས་པོ་ཆུང་དང་ལུས་སྟོབས་ཆུང་།།
ཤེས་ངན་དྲན་རྟུལ་བློ་ཆུང་སོགས།།
མི་ཡི་གཤིས་སྤྱོད་བཟང་ངན་ཡང་།།
ཁུ་བ་སྨིན་དང་མ་སྨིན་དང་།།
སྐྱོན་གྱིས་སྦགས་མིན་དག་ལས་འབྱུང་།།

ཁུ་བ་ལུས་ཀྱི་རྩ་བ་སྟེ།།
འགའ་རེས་ལུས་ཀྱི་བཅུད་ཀྱང་ཟེར།།
འགའ་རེས་ལུས་ཀྱི་རྒྱུ་ཡང་ཟེར།།
སྨན་གྱི་གཞུང་དུ་ཁུ་བ་ཟེར།།

ཁུ་བ་ཟད་ན་འདོད་པ་ཉམས།།
འདོད་ཉམས་ཕོ་མོ་གང་ཡིན་ཡང་།།
བུ་བཙའ་རིགས་རྒྱུད་སྤེལ་མི་ནུས།།
དེ་ལ་རོ་བཙའི་སྨན་བསྟེན་ནས།།
ཁུ་བ་མ་གཏོང་ཚོད་འཛིན་བྱ།།

ཚོད་འཛིན་མ་ཤེས་ཞ་དང་སྒུར།།
དྲན་པ་ལ་སོགས་རྟུལ་པོ་འབྱུང་།།
ཚོད་འཛིན་ཤེས་ན་གཟུགས་བཟང་དང་།།
དྲན་གསལ་གདོང་མཛེས་སྨད་དུ་འབྱུང་།།
དེའི་ཕྱིར་ཁུ་བ་ཚོད་འཛིན་གཅེས།།
འདི་ནི་ཁུ་བའི་དགེ་སྐྱོན་ཡིན།
         ༼ག༽
འཇིག་རྟེན་ཁམས་ཀྱི་སེམས་ཅན་ཀུན།།
ཕ་མས་འདོད་སྤྱོད་བྱས་ལས་འབྱུང་།།
འདོད་སྤྱོད་མ་བྱས་སེམས་ཅན་ཞིག།
འཇིག་རྟེན་འདི་ཡོད་མ་མཆིས།།
འོན་ཀྱང་མཚོ་སྐྱེས་པད་འབྱུང་ཞེས།།
མངལ་ལས་མ་སྐྱེས་སྐྱེས་བུའང་།།
ནང་བའི་ཆོས་འབྱུང་ཁག་ན་གསལ།།

དེ་ལ་ཕ་ཡི་ཁུ་བ་ནི།།
མདོག་དཀར་རོ་སྐྱུར་མང་བ་དང་།།
ངོ་བོ་ལྕི་ན་སྐྱོན་མེད་རྟགས།།
མ་ཡི་ཁུ་བ་ཁམས་དམར་ནི།།
ཚོས་ཁུ་རི་བོང་ཁྲག་འདྲ་སྟེ།།
དམར་ལ་དྭངས་ཤིང་བཀྲུས་བའི་ཚེ།།
དག་པར་འགྱུར་བ་སྐྱོན་མེད་དེ།།
མངལ་ཆགས་རྒྱུ་རུ་རུང་བ་ཞེས།།
སྨན་གྱི་རྒྱུད་ཀྱི་གཞུང་ན་སྣང་།།
དེ་ལྡོག་རྩུབ་ནག་རོ་བསྐ་དང་།།
རོ་སྐྱུར་མདོག་སེར་དྲི་མ་མནན།།
སྐྱ་འབྱར་རོ་མངར་བསིལ་བ་དང་།།
དུམ་བུར་ཆད་དང་སྣག་འདྲ་བ།།
མདུད་པ་ཅན་དང་སྐམ་རིལ་དང་།།
བཤང་གཅི་འདྲ་སོགས་མི་རུང་ཞེས།།
སློབ་དཔོན་སྨྲ་བའི་གསུང་ལས་ཐོས།།

ལུས་ཀྱི་ཕུང་བོ་ཆགས་པའི་རྒྱུ།།
ལུས་ཟུངས་ཕྱི་མ་ཁུ་བ་སྟེ།།
སྤྱིར་ན་རྒན་གཞོན་ཀུན་ལ་ཡོད།།
སྒོས་སུ་ན་གཞོན་དར་མ་མང་།།

དེ་ལ་ཕོ་མོས་འདོད་སྤྱོད་དུས།།
ཁུ་བ་མང་ན་བུ་ཕོ་དང་།།
ཟླ་མཚན་མང་ན་བུ་མོ་འབྱུང་།།
ཆ་མཉམ་ཡིན་ན་མ་ནིང་དང་།།།
ཆ་གཉིས་གྱུར་ན་མཚེ་མ་ཞེས།།
གཡུ་ཐོག་སྨན་གྱི་རྒྱུད་ན་གསུང་།།
རུས་པ་སུམ་བརྒྱ་དྲུག་ཅུ་དང་།།
ཀླད་ཞོ་རྒྱུངས་པ་རྩ་དཀར་རྣམས།།
ཕ་ཡི་ཁུ་བའི་རྒྱུས་སྐྱེད་པས།།
ཀླད་པའི་དབང་ཤེས་ཕ་དང་འབྲེལ།།
ཤ་ཁྲག་དོན་སྣོད་རྩ་ནག་རྣམས།།
མ་ཡི་ཟླ་མཚན་རྒྱུས་སྐྱེད་པས།།
ཡིད་འཛིན་སེམས་ཤེས་མ་དང་འབྲེལ།།
གཞན་ཡང་ལུས་སུ་གྲུབ་པ་ཡི།།
སེམས་ཅན་འགྲོ་བ་མཐའ་དག་ཀྱང་།།
འདོད་སྤྱོད་ཁུ་བའི་རྒྱུ་ལས་སྐྱེད།།
དེ་ན་འདོད་སྤྱོད་རྐྱེན་བྱས་པའི།།
འགྲོ་བ་སེམས་ཅན་ཐམས་ཅད་རྣམས།།
ཡུན་ནས་ཡུན་དུ་བརྟན་པ་ལ།།
ཁུ་བ་དགོས་མཁོ་མི་ཆེའམ།།

དེ་ཡང་ཟས་བཅུད་དྭངས་མ་སྟེ།།
དྭངས་མ་རིམ་འགྱུར་ཁྲག་ཤ་སོགས།།
ཟུངས་ཀྱི་མཐར་ཐུག་ཁུ་བ་སྟེ།།
དྭངས་སྙིགས་གཉིས་སུ་དབྱེ་བ་ཡི།།
དྭངས་མ་སྙིང་གནས་མདངས་སུ་འགྲོ།།
སྙིགས་མ་བསམ་སེའུ་བུ་འཛིན་སོགས།།
མཁས་པ་གཡུ་ཐོག་ལུགས་ན་སྣང་།།

བསམ་སེའུ་ནོར་གྱི་བང་མཛོད་ཅེས།།
དཔེ་འཇོག་རྒྱུད་བཞིའི་འདྲ་དཔེ་བསྟན།།
དེ་ལ་རྒྱལ་བོའི་བང་མཛོད་ནི།།
སྣ་ཚོགས་རིན་ཆེན་འདུས་གནས་ཡིན།།
དོན་གྱི་རྒྱལ་བོ་སྙིང་ཁམས་ནི།།
བཅུད་ཀྱི་དྭངས་མ་འདུས་པའི་རྟེན།།
ཁུ་བ་དཀར་དམར་འབྱུང་ས་ཡིན།།
དེ་ཡི་སྙིགས་མ་བསམ་སེའུ་གསོག།
བུ་བཙའ་རིགས་རྒྱུད་སྤེལ་བའི་རྒྱུ།།
དྭངས་མ་ལུས་ཀྱི་མདངས་སུ་འགྲོ།།
ཤ་དང་པགས་མདོག་མཛེས་པའི་རྒྱུ།།
འདྲ་དཔེ་བསྟན་པའི་དགོས་མཚན་འདི།།;
མཁས་པ་གཞན་གྱི་ལུགས་མིན་ཏེ།།
སྲིན་སྲས་ལོག་པའི་འཆལ་གཏམ་ཡིན།།

དྭངས་མའི་དྭངས་མ་ཁུ་བ་ལ།།
ཚད་ལས་འཕེལ་དང་ཟད་པ་དང་།།
སྙོམ་པོར་འདུག་དང་རྣམ་གསུམ་ལས།།
འཕེལ་ན་ལྡབ་འགྱུར་བུད་མེད་དགའ།།
ཟད་ན་ཁྲག་འབྱུང་འཚིག་པར་བསམ།།
སྙོམ་གནས་ལུས་ཐང་དབང་གསལ་ཞེས།།
སྔོན་བྱོན་བོད་སྨན་མཁས་པའི་གསུང་།།

མི་ན་གནས་པར་འདོད་པ་དང་།།
ཚེ་རིང་གཞོན་པར་འདོད་པ་ཚོས།།
ཁུ་བ་འཕེལ་ཟད་མ་ཡིན་པའི།།
སྙོམ་པོར་གནས་པའི་ཐབས་ལ་བརྩོན།།
                   ༼ང༽
འདོད་པའི་གཡེམ་ལ་ཞུགས་པའི་དུས།།
ཕོ་མཚན་མོ་མཚན་གཙུབ་པ་ཡིས།།
མཐར་ཐུག་བདེ་ཐོབ་ཁུ་ཁྲག་འབྱུང་།།
དེའི་དཔེར་གཙུབ་ཤིང་བརྡར་བ་ཡིས།།
མཇུག་མཐར་མེ་རུ་འབར་བ་ཡང་།།
རྒྱུད་བཞིའི་གྲུབ་པ་ལུས་ན་འདུག།
ཕོ་མཚན་མགོ་ཆེ་རྩད་ཕྲ་དང་།།
ཆེན་པོ་རིང་པོ་ཐུང་པ་དང་།།
གུག་པོ་འཁྱོག་པོ་སྣ་མང་ལས།།
མགོ་ཆེ་རྩད་ཕྲ་མཆོག་ཏུ་བསྔགས།།
འདོད་རྔམ་མོ་ཡང་ཚིམ་པར་བྱེད།།
དེ་ལས་གཞན་པ་དམན་པར་འདོད།།

མོ་མཚན་ཁ་ཆེ་གཏིང་རིང་དང་།།།
ཁ་ཆུང་གཏིང་ཐུང་དམ་པོ་དང་།།
ལྷོད་པོ་རླུག་པོ་ཆུ་ལུག་དང་།།
སྤུ་ཡོད་སྤུ་མེད་སྣ་ཚོགས་ལས།།
ཁ་ཆུང་གཏིང་ཐུང་དམ་པོ་ནི།།
འདོད་ཅན་སྐྱེས་བུ་ཚིམ་པས་མཆོག།
དེ་ལས་གཞན་ནི་དམན་པར་འདོད།།

འདོད་སྤྱོད་དབྱེ་བ་ཕོ་ལས་དང་།།
མོ་ལས་མཉམ་ལས་རྣམ་གསུམ་ལས།
ཕོ་ཡིས་མོ་སྤྱོད་སྟངས་སྟབས་ལ།།
ཉལ་ནས་སྤྱོད་དང་གོག་ནས་སྤྱོད།།
ལངས་ནས་སྤྱོད་དང་རྣམ་པ་གསུམ།།
བྱེ་བྲག་ཉལ་སྤྱོད་སྟེང་སྤྱོད་དང་།།
འོག་ནས་སྤྱོད་དང་ཟུར་ནས་སྤྱོད།།
རྒྱབ་ནས་སྤྱོད་དང་མདུན་ནས་སྤྱོད།།
ལངས་ནས་མདུན་སྤྱོད་རྒྱབ་སྤྱོད་དང་།།
གོག་ནས་རྒྱབ་སྤྱོད་བརྒྱད་དུ་བཤད།།
དེ་བཞིན་མོ་ལས་མཉམ་ལས་ཀྱང་།།
བརྒྱད་བརྒྱད་གཉིས་སུ་ཕྱེས་ནས་ནི།།
སྤྱོད་སྟངས་ཉི་ཤུ་རྩ་བཞི་གསུང་།།
ཕོ་ལས་མོ་ལ་སྐྱིད་པ་དང་།།
མོ་ལས་ཕོ་ལ་འཕྲོད་པར་སྣང་།།
མཉམ་ལས་གཉིས་ཀར་ཕན་པ་ཆེ།།
བྱེ་བྲག་མོ་ཡིས་སྟེང་སྤྱོད་ཀྱིས།།
སྐྱེས་པའི་འདོད་པ་མ་ལུས་སྐོང་།།
ཁྱད་པར་མོ་ལ་བདེ་ཆེན་སྟེར།།
དེ་མིན་ཟུར་སྤྱོད་རྒྱབ་སྤྱོད་སོགས།།
སྤྱོད་ཀྱི་སྟངས་སྟབས་སྣ་ཚོགས་ལ།།
རོལ་མྱང་འདོད་པའི་སྐྱེ་བོ་ཚོས།།
མཁས་སྨྱོན་དགེ་ཆོས་གསུང་ལ་ལྟོས།།

ཉལ་ལངས་གོག་སོགས་བརྒྱད་བརྒྱད་གསུམ།།
སྤྱོད་སྟངས་ཉེར་བཞིར་སྤྱི་ལ་ཁྱབ།།
བྱེ་བྲག་མ་ངེས་པང་སྤྱོད་དང་།།
ཚུལ་མིན་ཁར་སྤྱོད་བཤང་སྤྱོད་དང་།།
ཕོ་མཚན་ཁ་འཇིབ་ལྕེ་ལྡག་སོགས།།
འདོད་སྤྱོད་ཚད་ལས་འདས་པ་དག།
བོད་མིན་ཕྱི་ཡི་ལུགས་ན་འདུག།
དེ་དག་བཤད་པའི་དགོས་པ་ཆུང་།།

ལོག་སྤྱོད་རྟ་དང་ཁྱི་ལ་སོགས།།
སྐྱེས་གནས་མི་མཐུན་འཁྲིག་སྤྱོད་ཀྱིས།།
མཚན་མའི་རིམས་ནག་ཁྱད་པར་ཅན།།
འབྲས་ཡི་འགོས་ནད་འབྱུང་བར་འགྱུར།།
མཚན་མའི་འབྲས་ནག་རིམས་ནག་དང་།།
འདོད་ལོག་མཚན་དུག་ནག་པོ་སོགས།།
ཨེ་ཙིའི་མིང་གི་རྣམ་གྲངས་ཡིན།།
ལྷག་པར་དེང་སང་འདོད་འཚོང་གིས།།
འབྲས་ནག་འགོས་བའི་རྟ་བཞོན་ནས།།
བོད་ཡུལ་སྟོད་སྨད་བར་གསུམ་དང་།།
རྒྱ་ཡུལ་བལ་ཡུལ་འབྲུག་ཡུལ་སོགས།།
ཐ་ན་འཛམ་གླིང་རྒྱལ་ཁམས་ཀྱང་།།
རྩད་ནས་བརླག་པའི་ཉེན་ཁ་ཆེ།།
དེ་ལ་མཚན་མའི་འབྲས་ནག་གི།
རྩ་བ་སྨན་འཚོང་སྤྱོད་པ་སྟེ།།
སྨན་འཚོང་མ་སྤྱོད་འབྲས་ནག་དཀོན།།
འབྲས་ནག་བྱུང་ན་ལུས་སྲོག་འཇོམས།།
དེ་ན་གངས་ཅན་སྐྱེས་པ་ཚོ།།
ཡང་སྒོས་འདོད་ཅན་གཞོན་པ་རྣམས།།
མཚན་འབྲས་ནག་པོ་འགོག་པའི་ཕྱིར།།
སྨད་འཚོང་གཏན་ནས་མ་སྤྱོད་ཅིག།
གཞན་ཡང་ན་གཞོན་སྟོབས་ཟད་དང་།།
ལོ་བགྲེས་ནད་ཅན་བྱིས་པ་དང་།།
མི་སྡུག་སྦྲུམ་མ་ཤུགས་ཞན་དང་།།
ཟླ་མཚན་འབྱུང་དུས་འདོད་སྤྱོད་སོགས།།
རབ་ན་ཐབས་ཀྱིས་འགོག་པར་བྱ།།
དེ་མིན་ན་ཚོད་སྟོབས་ལྡན་ཡང་།།
དུས་དང་བསྟུན་ནས་རན་པར་སྤྱོད།།
མ་རན་དུས་མིན་ནད་རིགས་ཏེ།།
ལུས་ལྷོད་རབ་རིབ་མགོ་ནད་དང་།།
སྙིང་ནད་མཚན་མའི་ནད་ཀྱང་འབྱུང་།།
ཧ་ཅང་འདས་ན་སྲོག་གཤེད་ཅེས།།
མཁས་པ་གཡུ་ཐོག་མགོན་པོས་གསུང་།།
མདོར་ན་རན་པར་བྱ་ལྔ་སྟེ།།
ཁ་ལ་ཟས་ཚོད་རན་པ་གཅིག།
ཁོང་ལ་སྐོམ་ཚོད་རན་པ་གཉིས།།
ཡིད་ཀྱིས་བསམ་ཚོད་རན་པ་གསུམ།།
ངག་གིས་སྨྲ་བརྗོད་རན་པ་བཞི།།
ལུས་ཀྱིས་འདོད་སྤྱོད་རན་པ་ལྔ།།
རན་པ་ལྔ་པོ་གཅེས་བཟུང་ན།།
ལུས་སྲོག་བྲག་ལས་བརྟན་པ་དང་།།
ཤེས་པར་གློག་ལས་མྱུར་བ་དང་།།
ཚེ་རིང་ལོ་བརྒྱ་ཐུབ་པར་འགྱུར།།



             2016ལོའི་ཟླ2ཚེས25ཉིན།


གཞིས་བདག(ladeshensui)
སྦྱར་ལན་སློག་པ།
粗体 斜体 下划线 插入引用 插入表情