མཚོ་སྔོན་པོ་བོད་ཡིག་ཟིན་བྲིས། བོད ཟིན མཚོ་སྔོན་པོ ཟིན་རྩོམ། | པར་རིས། | མཁན་པོ། | ཁྱུ་མཆོག | ཟིན་ཚོམས།
ཐོ་འགོད། | ནང་འཇུག ཉར་ཚགས་བྱེད་པ།
分享按钮
chisanghua སྤེལ་དུས། - 2015-1-7 12:36:30
 

       མཐའ་མཇུག་གི་རི་དྭགས་པ།

       སྒོ་མེ་ཚེ་རིང་བཀྲ་ཤིས།  

ཤར་རིའི་རྩེ་རུ་གསེར་མདོག་གི་ཉི་མ་དལ་བུར་འཕགས་མགོ་བརྩམས་བྱུང——རི་དྭགས་པའབར་ཚག་གིས་གནའ་ལྤགས་ཀྱིས་བཟོས་པའི་རྩག་ཐུང་རྙིང་ཧྲུལ་རྒྱབ་ཏུ་གོན་ཞིང་ལོ་མང་པོར་ལག་ཏུ་མ་བཟུང་བའི་པི་ར་རྭ་རིང་དེ་ཕྲག་ཏུ་ཁུར་ནས་མཐོ་ལ་བརྗིད་པའི་རི་བོ་དེ་བསྙེགས་ནས་སོང་། རི་བོ་མཐོན་པོ་དེ་ནི་གནས་འདིའི་གནས་བདག་དང་ས་འདིའི་ས་བདག་སྟེ་མིང་ལ་ཨ་མྱེས་སྒོ་རྩེ་ཟེར་ཞིང་། ངག་རྒྱུན་དུ་རྟ་མཆོག་དཀར་པོར་བཅིབས་ཤིང་སྐུ་མདོག་དཀར་ལ་ཕྱག་གཡས་སུ་མདུང་དང་གཡོན་དུ་ཞགས་པ་འཆིང་བ་ཁྲོས་པའི་ཉམས་ཅན་ཞིག་ཏུ་སྣང་བར་བཤད། རྒྱང་ནས་བལྟས་ཚེ་རྩེ་མོ་གངས་ཀྱིས་བཟུང་ཞིང་འདབས་རོལ་ནགས་ཀྱིས་བསྐོར་བའི་རི་བོ་མཐོན་པོ་དེ་ནི་གནམ་འདེགས་ཀྱི་ཀ་བ་ཞིག་དང་འདྲ་བར་གནམ་སའི་བར་གླེགས་སུ་ཀྲོང་ངེར་འགྱིང་འདུག   གནམ་ངོ་ནམ་རྒྱུན་ལས་ཀྱང་ཤིན་ཏུ་དྭངས་པས་གངས་དཀར་གྱི་ཅོད་པན་ནི་མིག་ལ་འཚེར་ཞིང་འཚེར་ལ་མི་སེམས་ཀྱི་དང་བ་འདྲེན་པའི་ཟིལ་ཤུགས་ཤིག་ཉི་འོད་ཀྱི་ཀློང་ནས་ལམ་ལམ་དུ་འབར།  རི་དྭགས་པ་འབར་ཚག་ལོ་ན་བགྲེས་པས་གོམ་པའི་འདེགས་འཇོག་ལའང་ངང་ངམ་ཤུགས་ཀྱིས་རྒས་རྟགས་ཤིག་ཐོན་འདུག་པ་སྨོས་མ་དགོས། ཁོ་རང་ཉིན་སྲིབ་གཉིས་ཀྱི་མཚམས་སུ་གྱ་གྱུར་འཐེན་པའི་རྐང་ལམ་སྟེང་དུ་ཉི་འོད་དང་གྲིབ་མར་འགོམ་རེ་བྱེད་ཀྱིན་མཚམས་རེར་ངལ་ཅུང་ཙམ་གསོ་བ་དང་དེ་ནས་ཡང་བསྐྱར་ལྗིད་ཏིག་གེར་གོམ་པ་མདུན་དུ་སྤོས་ནས་འགྲོ་ནའང་། སེམས་ཀྱིས་ལྕོགས་ཀྱང་ལུས་ཀྱིས་མི་ལྕོགས་པའི་དབང་གིས་ཁོའི་ཁ་ནས་དབུགས་རིང་ནར་མོ་རེ་རེ་ཤུ་རུ་རུ་སྒྲོག་པར་བྱེད།  དེ་དུས་ཁོས་རྩག་ཐུང་གི་སྐ་རགས་ལྷོད་ཙམ་བྱས་ཤིང་ཉིན་སྲིབ་གཉིས་ཀྱི་མཚམས་ནས་གོམ་པ་ཉིན་ལ་སྤོས་ཏེ་ལམ་འགྲམ་གྱི་ཕ་བོང་ནག་ལྡིང་གཡག་རོ་འདྲ་བ་ཞིག་ཡོད་པ་དེར་ཁེན་ཞིང་ཐང་ལ་ཙོག་བྱུང་། ཁོ་དེ་ལྟར་ཙོག་ནས་སྡོད་དུས་ཉི་མ་ནི་དྲོ་ཞིང་དྲོ་བས་ཉི་མས་ཤིག་བསྒུལ་ཤིག་གིས་མི་བསྒུལ་ཟེར་བ་བཞིན་ཁོའི་མཆན་འོག་ཏུ་ཟ་འཕྲུག་ཙག་ཤེད་རྒྱུག་པ་ཞིག་ལངས་བྱུང་། ཁོས་ལག་པ་ཡ་གཅིག་མཆན་འོག་ཏུ་བསྲིངས་ནས་ཤེད་ཀྱིས་འཕྲུག་པ་ན་སྐོམ་པའི་དུས་སུ་ཆུ་འཁྱག་ཕོར་གང་འཐུང་བ་བཞིན་བདེ་བ་བསམ་གྱིས་མི་ཁྱབ་པ་ཞིག་སྐྱེས། ཁོས་དེ་ལྟར་ཡུན་རིང་ཞིག་ལ་འཕྲུག་མཐར་སེན་མོའི་བར་དུ་ཤིག་ནས་འབྲུ་ཙམ་ཞིག་འཚང་ནས་ཐོན་བྱུང་བས་ཁོས་ཤིག་དེ་མཐེ་བོང་དང་གོང་མཛུབ་བར་དུ་བླངས་ཤིང་མིག་ལམ་དུ་བཀྱགས་ཏེ་ཞིབ་ཏུ་ཐེངས་ཤིག་བལྟས་འཕྲལ་འགྲམ་གྱི་རྩྭ་གསེང་དུ་འཕངས་སོང་། ཕ་བོང་ནག་ལྡིང་དེའི་འདབས་རོལ་ཀུན་ཏུ་སྟག་པ་དང་སྐྱེར་བ་དང་སུ་རུ་དཀར་ནག་དང་གླང་མ་སོགས་ཤིང་རིགས་མང་པོ་འཛིང་ནས་སྐྱེས་ཡོད་ལ་རི་བྱིའི་འགའ་རེས་གླུ་ཆུང་ངག་ལ་འགུག་བཞིན་ཕར་འཕུར་ཚུར་འཕུར་ལན་འགའ་བྱས་རྗེས་མཐོང་ལམ་ནས་མི་སྣང་བར་ཡལ་འགྲོ། རི་དྭགས་པ་འབར་ཚག་གིས་མིག་གི་མཐོང་རྒྱ་མུ་མཐུད་དུ་ཡངས་པོར་བསྐྱེད་པ་ན་རྒྱང་རིང་གི་རི་བོ་དག་ནི་མཐོང་ལམ་ནས་དམའ་མོར་གྱུར་ཅིང་ཁུ་སིམ་མེར་ཁོའི་ཅི་བྱེད་ལ་བལྟས་འདུག་པ་འདྲ་བའི་ཚོར་བ་ཞིག་སྟེར། ཁོས་འབར་ཚག་གིས་བཀང་བའི་གདོང་ལ་ལག་པས་ཕུར་ཙམ་བྱས་ཤིང་དེ་ནས་རུམ་གྱི་སྣ་ཐལ་བླངས་ཏེ་ཤུགས་ཀྱིས་ལན་འགའ་རྔུབ་པ་ན་གློ་ལུད་འགའ་བསྟུད་མུར་བརྒྱབ་བྱུང་།  ཁོར་ཡུག་ཀུན་ནི་དེ་ལྟར་ལྷིང་ཞིང་འཇགས་པས་ཁོས་གློ་ལུད་ཅིག་བརྒྱབ་པ་དེས་ཀྱང་རི་ཀླུང་གི་རྨི་ལམ་མཐའ་དག་དཀྲོགས་པར་བྱེད།  དེ་དུས་ཁོའི་མིག་ཟུང་ཁུ་སིམ་མེའི་རི་བོ་དམའ་མོ་དག་ལས་མར་ཕབ་པ་ན་ཁོ་རང་འཚར་ལོངས་བྱུང་ཞིང་རྒ་བས་ཁུར་གྱིས་ནོན་སའི་རི་གྲོང་དེ་མིག་ལམ་དུ་རབ་རིབ་ནས་གསལ་བོར་མངོན་བྱུང་། བར་ཐག་གི་དབང་གིས་ས་གྱང་དམའ་མོས་བསྐོར་བའི་གཞིས་མ་དག་ནི་འབར་ཞུན་གྱི་སྒམ་ཆུང་འགའ་ཅི་འདོད་དུ་རི་ཚོགས་ཀྱི་པང་དུ་གཡུག་པ་དང་འདྲ་བར་གོ་རིམ་མེད་པར་གཡས་ལོག་གཡོན་ལོག་བྱས་ནས་འདུག  ཁོའི་མིག་གཉིས་འགུལ་བ་མེད་པར་ཅེར་ནས་སྡོད་དུས་འབར་ཞུན་གྱི་སྒམ་ཆུང་ལྟ་བུའི་གཞིས་མ་དེ་དག་གི་གསེང་དུ་ཐ་མག་གི་སྒམ་ཆུང་ལྟ་བུ་ཞིག་དཀར་ལམ་མེར་མངོན་པ་མཐོང་། དེ་ནི་ཡུལ་མི་རྣམས་ཀྱིས་དཀར་པོ་ལྷ་ཆོས་བསྒྲུབ་ས་དང་ནག་པོ་གདོན་འདྲེ་འདུལ་སའི་མ་ཎི་ཁང་སྟེ། བལྟས་ཀྱིན་བལྟས་ཀྱིན་མ་མོ་བརྒྱ་ཡི་དབུས་ཀྱི་ཁྲོམ་རྒན་ཞིག་དང་འདྲ་བར་ང་རྒྱལ་གྱི་མགོ་འཕང་མཐོ་རུ་དགྱེ་འདུག  ཁོས་ཕ་བོང་ནག་ལྡིང་དེར་ཁེན་ནས་ཐེངས་ག་ཚོད་ཅིག་ལ་འདི་ལྟར་དམིགས་མེད་དུ་ཕྱོགས་བཞིར་གཡེངས་པ་མི་དྲན་མོད། ད་ལྟ་བསམས་ན་ཁོ་རང་ཐེངས་དང་པོར་ཨ་མྱེས་སྒོ་རྩེར་འགོས་པ་ནས་གནས་འདི་ནི་སུ་ཞིག་གིས་ཆེད་དུ་ཁོ་ལ་བཀོད་སྒྲིག་བྱས་པ་བཞིན་ཕ་བོང་ནག་ལྡང་ལ་ཁེན་པ་དེ་གོམས་ལོབས་སུ་གྱུར། ཁོས་དེ་ལྟར་ཡུན་རིང་བོར་ཅེར་ནས་བསྡད་པ་ན་ད་ནི་ཁོ་རང་རྒས་ཤིང་འཁོགས་པར་གྱུར་ནའང་མིག་ལམ་གྱི་ཡོད་ཚད་ནི་གདོད་མ་ནས་ཇི་ལྟར་ཡོད་པ་ད་ལྟ་ཡང་དེ་ལྟར་འགྱུར་བ་ཙམ་ཡང་མེད་པ་ལྟར་འདུག་པས། རི་དྭགས་པ་འབར་ཚག་གི་སེམས་ལ་ལོ་དང་ཟླ་བའི་གོམ་ཁ་ལྡོག་ཕྱོགས་སུ་བསྒྱུར་ནུས་ཚེ་ཁོ་ཚང་ལའང་མགོ་གསེར་ཞྭ་ཅན་གྱི་བླ་མ་དང་དབུ་ལ་ཐོད་ཅན་གྱི་དཔོན་པོ་འཁྲུངས་མ་མྱོང་བ་ཞིག་མིན་སྙམ་ནས་དགའ་རྒྱུ་ཞིག་བྱུང་ནའང་། དེ་མ་ཉིད་དུ་བསམ་ཚུལ་གཞན་ཞིག་གིས་དེ་དག་གིས་ཅི་བྱ་སྟེ་སྔ་དྲོ་ཡོད་ལ་ཕྱི་དྲོ་མེད་པ་རྫ་མགོའི་ཟིལ་བ་འདྲ་ཞིང་ཐ་ན་ས་སྒང་རིལ་མོ་འདིར་འགྱུར་བ་ཕྲན་ཙམ་ཡང་བཟོ་མ་ཐུབ་ཟེར་བ་ན་ཁོ་ལ་ཚོད་ཚོད་དུ་ཕངས་སེམས་ཤིག་ཐོལ་ཐོལ་དུ་སྐྱེས་བྱུང་། ཁོས་དེ་ལྟར་ཡར་དྲན་མར་དྲན་བྱེད་ཀྱིན་དུས་ཡུན་རིང་བོ་ཞིག་འགོར་འཕྲལ་རང་གི་དེ་རིང་གི་དོན་བྱ་ཅི་ཡིན་དྲན་བྱུང་བས་སེམས་ལ་འཚུབ་ཆ་ཞིག་ལངས་བྱུང་།  ཁོ་ཡར་ལངས་ཏེ་རྩག་ཧྲུལ་གྱི་སྐ་རགས་དམ་དུ་བཅིངས་རྗེས་ཡང་བསྐྱར་རི་ལམ་ཀྱག་ཀྱོག་དེའི་སྟེང་ལ་གོམ་པ་སྤོས་ཏེ་མཐོ་ས་ནས་མཐོ་སར་འཛེགས། དེ་ནི་ན་ནིང་གི་ལོ་སྨད་ཅིག་ཡིན་པ་འདྲ་སྟེ་ལོ་ན་ཚོད་ཀྱི་དབང་གིས་དྲན་པ་ཉམས་ཏེ་གསལ་བོ་ཞིག་འཆད་རྒྱུ་མི་འདུག་མོད། གསར་བུ་མགོ་འབལ་ལེ་བ་སྐོར་ཞིག་གང་ཞིག་ནས་འཇུར་ཡོང་བ་བཞིན་གྲོང་ཚོའི་བཞི་མདོར་ཡོང་ནས་ཨོ་རྒྱན་རིན་པོ་ཆེ་ལྷོ་ཕྱོགས་སྲིན་པོའི་ཡུལ་དུ་གྲང་བས་མནར་ཏེ་པགས་རྩག་ཅིག་བཟོ་དགོས་པའི་བཀལ་བསྩལ་བྱུང་མོད། ཡུལ་ཕྱོགས་ལ་ལུང་ནས་པགས་པ་མང་པོ་བསྡུས་ནའང་ཁོང་གི་སྐུ་ནི་རི་རྒྱལ་ལྷུན་པོ་བཞིན་མཐོ་ཞིང་བརྗིད་པས་ད་དུང་པགས་པས་མ་འདང་བར་བཟོ་འཕྲོར་ལུས་ཡོད། ད་ནི་ཁོང་གི་ལུང་བསྟན་ལྟར་ཡུལ་འདིར་པགས་པ་སྡུད་དུ་ཡོང་བ་ཡིན་པས་ཁྱིམ་ཚང་སོ་སོའི་རང་རང་གི་པགས་པ་གང་ལེགས་གང་བཟང་ཨོ་རྒྱན་རིན་པོ་ཆེར་ཞལ་འདེབས་སུ་གནང་རྒྱུ་མཁྱེན་ཟེར་བས། གྲོང་ཚོའི་ནང་གི་རྒད་པོ་བསམ་ཤེས་ཚོས་ལག་པའི་ཐལ་མོ་བྲང་ལ་སྦྱར་ཏེ། ཨོཾ་མ་ཎི་པདྨེ་ཧཱུྃ་ཧྲཱི། ཨོ་རྒྱན་རིན་པོ་ཆེ་ལ་གསོལ་བ་འདེབས། སློབ་དཔོན་རིན་པོ་ཆེ་ཁོང་གིས་ང་ཚོ་ཐུགས་ནས་མ་དོར་ཞིང་སྙིང་རྗེའི་སྤྱན་དཀྱུས་རིང་མོས་གཟིགས་པར་གུས་པས་འདུད་ཟེར་ཞིང་རང་རང་ཁྱིམ་ནས་པགས་པ་གང་ལེགས་གང་བཟང་ཞལ་འདེབས་སུ་ཕུལ་ཞིང་། རི་དྭགས་པ་འབར་ཚག་གིས་ཀྱང་རང་ཁྱིམ་གྱི་རྡང་ལ་འཕངས་པའི་པགས་པ་མང་པོ་ལས་པགས་པ་ཉི་ཤུ་བསལ་ཏེ་བྱིན་པ་རེད།  གསར་བུ་མགོ་འབལ་ལེ་བ་དེ་དག་འགྲོ་ཁར་རི་དྭགས་པ་འབར་ཚག་གི་མདུན་ཡོང་སྟེ་ཁོར་ཨོ་རྒྱན་རིན་པོ་ཆེ་ཁོང་ཉིད་ཀྱི་འདོད་མོས་ལྟར་ན་པགས་རྩག་གི་གོང་ཁར་གཟིགས་པགས་དང་ཝ་པགས་སོགས་ཀྱིས་བརྒྱན་ན་ལེགས་ཟེར་བས། གོ་ཐོས་སུ་ཁྱོད་རང་རི་དྭགས་པ་ཞིག་ཡིན་པས་ཁྱེད་ལ་ཝ་ལྤགས་དང་གཟིག་ལྤགས་སོགས་ཡོད་སྲིད་པ་གདོན་མི་ཟ་ཟེར་བ་ན། རི་དྭགས་པ་འབར་ཚག་གིས་ཝ་པགས་འགའ་ཡོད་པ་སྔར་ནས་བཙོངས་ཚར་བས་ཅིས་ཀྱང་མཁོ་ཚེ་དུས་ཡུན་ཟླ་འགར་བསྲིངས་ན་ཆོག་གམ་ཅེས་བཤད་པར། གསར་བུ་མགོ་འབལ་ལེ་བ་དེ་དག་གིས་དེས་ན་དེ་བྱོས་གང་ལྟར་མགྱོགས་པོ་བྱ་དགོས་ཟེར་ཞིང་ལུག་ལྤགས་གང་བཟང་གང་ལེགས་རྣམས་འཁྱེར་ནས་བུད་སོང་།  དུས་ཚོད་ནི་གཏུགས་ནས་བསླེབས་བྱུང་ནའང་ཝ་ལྤགས་གཅིག་ཀྱང་ལག་སོན་མ་བྱུང་བས་རི་དྭགས་པ་འབར་ཚག་གིས་དངན་པ་ཞིག་འཐེན་བཞིན་རི་ལམ་ཀྱག་ཀྱག་དེར་འགོས་ཏེ་ཕྱིན། རླུང་བུ་ཡང་མོ་ཞིག་དལ་བུར་ལྡང་བ་ན་ལམ་འགྲམ་གྱི་རྩི་ཤིང་སྐམ་པོ་དག་གིས་མགོ་ལྕོག་ལྡེམ་ཙམ་གྱིས་རླུང་བུའི་ཕེབས་འབྱོར་ལ་བསུ་མ་བྱེད་ནའང་། རླུང་བུ་དེ་ལམ་ངོས་སུ་འཕོས་པའི་སྐད་ཅིག་མར་ས་རྡུལ་རྣམས་སྐྲག་སྟེ་འབྲོ་བ་བཞིན་ཁོའི་རྡོག་སྣེ་བརྒྱུད་དེ་རྒྱང་རིང་གི་ཡུལ་དུ་ཞོགས་སོང་། ཁོས་གནའ་ལྤགས་ཀྱི་རྩག་ཐུང་དེའི་གོང་ཁ་དམ་པོར་བསྡམས་ཤིང་བྲོས་ནས་འབྲོ་བའི་ས་རྡུལ་གྱི་རྗེས་ལ་མཆིལ་ཞགས་འགའ་འཕངས་ཤིང་། དེ་ནས་དབུགས་རིང་ཞིག་འཐེན་ཞིང་མགོ་བོ་ཡར་དགྱེ་སྟེ་གངས་ཀྱིས་བཟུང་བའི་རི་རྩེར་ལན་གཅིག་ལྟ་དུས་ཉི་འོད་ཀྱི་ལྡོག་འཕྲོའི་རྩེ་ལ་འཇའ་ཚོན་སྣ་ལྔའི་འོད་ཀྱི་གོང་བུ་མང་པོ་ལུ་གུ་བརྒྱུད་དུ་བསྟར་འདུག་པས། ཁོས་མཛུབ་གུས་འོད་ཀྱི་གོང་བུ་དེ་དག་རེ་རེ་བཞིན་བརྩིས་མོད་དེ་དག་ལ་འགྱུར་ལྡོག་ཤིན་ཏུ་རྒོད་རྐྱེན་ཁ་གྲངས་ལེན་མ་ཐུབ། དེ་ལྟར་བསྟུད་མུར་ལན་འགར་བརྩིས་ཀྱང་ངལ་བ་འབྲས་མེད་ཡིན་པས་གངས་རིའི་རྩེ་ལ་བཀལ་བའི་མིག་མདངས་སླར་ཡང་མིག་མདུན་གྱི་རྐང་ལམ་སྟེང་དུ་བསྒྱུར།  རྐང་ལམ་ཀྱག་ཀྱོག་དེ་དེད་ནས་སོང་ན་ཝ་ཚང་ནང་ཟེར་བའི་ལུང་ཤུར་ཆུང་ཆུང་ཞིག་ཡོད་པས་ཁོས་དམིགས་པ་དེར་གཏད་ནས་དཀའ་ཚེགས་ཀྱིས་མདུན་དུ་ཕྱིན། ……ཨ་ཤུ། ཁྱོད་ལའང་ཅི་ཁག་སྟེ་ད་ནི་རི་དྭགས་བདའ་རུ་འགྲོ་བའི་ལོ་ཚོད་སྔར་ནས་འདའ་ཟིན། དགུང་ལོ་བདུན་ཅུར་ཉེ་བའི་རྒད་པོ་ཞིག་གིས་ད་དུང་པི་ར་ཁུར་ནས་འགྲོ་བ་ཁྱོད་ལས་མེད། ག་ལ་ཡོད…… གཏན་ནས་ཡོད་མི་སྲིད། ཨ་ཤུ། ད་ནི་ཁྱོད་ཀྱང་སྡེ་དཀྱིལ་གྱི་ཀ་རག་བྱུགས་པའི་མ་ཎི་ཁང་དུ་འཛུལ་ནས་ཚེ་ཕྱི་མའི་ལམ་བྲོ་གསོག་པའི་དུས་ལ་བབས་འདུག …… ཨ་ཙི། ཁྱོད་ཀྱིས་ཅི་ཟེར……ཁོས་རང་གིས་ཅི་བཤད་ལ་བཤགས་པའི་ཚུལ་གྱིས་ཨོ་རྒྱན་རིན་པོ་ཆེ་ལ་གསོལ་བ་འདེབས་ཞེས་ངག་ནས་ལན་ཅིག་བཟློས་པ་ན་གོམ་པའི་འདེགས་འཇོགས་ཇེ་ཡང་དུ་ཕྱིན་པ་ལྟ་བུའི་སྣང་བ་ཞིག་སྟེར།  ཁོས་འགྲོ་ཞོར་དུ་ཕྱིར་ལྟ་ཞིག་བྱེད་དུས་ཞོགས་པར་ལམ་དུ་ཆས་སའི་རྐང་ལམ་ཀྱག་ཀྱོག་དེ་ནི་དུག་སྦྲུལ་ཞིག་ཐང་ལ་ཉལ་བ་དང་འདྲ་བར་རང་གི་རྡོག་འོག་ནས་གྲོང་ཚོའི་མཚམས་སུ་སྐྱ་ཤལ་ལེར་བསྲིངས་འདུག་ལ། རྐང་ལམ་ངོས་སུ་འཕོས་པའི་གྲིབ་མ་དེ་རང་ཉིད་འགུལ་ཙམ་བྱས་ཚེ་འགུལ་ཙམ་བྱེད་ཅིང་རང་ཉིད་སྒུར་ཙམ་བྱས་ན་སྒུར་ཙམ་བྱེད་ལ་རང་ཉིད་མ་འགུལ་བར་བསྡད་ན་དེ་ཡང་འགུལ་མེད་དུ་འདུག་པས། ཁོ་ནི་བྱིས་པ་བསམ་མེད་ཅིག་དང་འདྲ་བར་འགུལ་ཙམ་དང་སྒུར་ཙམ་བྱེད་ཀྱིན་ཁྱོད་འགུལ་ཡ་ཁྱོད་སྒུར་ཡ་ཟེར་ཞིང་། ཁོ་དེ་ལྟར་འགུལ་ཙམ་དང་སྒུར་ཙམ་ལན་འགའ་བྱས་རྗེས་ཁ་ནས་ཡང་བསྐྱར་ཨ་ཤུ་ཟེར་བཞིན་དངན་པ་རིང་བོ་ཞིག་འཐེན་སོང་ལ། དེ་ནས་ཁྱོད་འགུལ་ཤེས་ཀྱང་ཁ་གྲགས་མི་ཤེས་པས་ཁྱོད་ངའི་འགྲོ་རོགས་ལ་མི་ཉན་ཟེར་ཞིང་འཁང་ར་ལྟ་བུ་ཞིག་བྱེད་བཞིན་གོམ་ཁ་མདུན་ལ་བསྒྱུར་སོང་། ཁ་དཔེ་ལ་སྒོ་རྩེ་ལ་ཡི་ལ་ལ་བལྟས་དང་བཀལ་མོ་ནང་གི་བྲོ་ལ་བལྟས་ཟེར་མོད། ཁོའི་སེམས་ལ་གནའ་དང་མ་གསར་བུ་ཡིན་དུས་ལ་ཐུང་ཐུང་འདི་ཙམ་ལ་འགོས་པར་མིག་རྡེབ་དབང་ཙམ་དང་དབུགས་ལེན་དབང་ཙམ་ཡིན། ད་ནི་རྒས་སོང་།  ད་ནི་དངོས་གནས་རྒས་སོང་། ཁོས་དེ་ལྟར་དྲན་པ་ན་ལོ་ཟླས་ཆར་རླུང་གིས་བསུབ་མ་ཐུབ་པའི་གཏམ་རྒྱུད་འགའ་རེ་དྲན་ངོགས་སུ་ཆུ་ཁའི་སོག་མ་བཞིན་གཡེང་ནས་མངོན་བྱུང་། དེ་དུས་ནི་ཁོ་རང་ངལ་བས་མི་དུབ་ཅིང་ཟས་པས་མི་འགྲངས་པའི་ལོ་ཚོད་ཡིན་པས་ནམ་ཡང་ཝ་མོ་དམར་པོ་མེ་འདྲ་ཞིག་གམ་གླ་ཕོ་ནག་པོ་རླུང་འདྲ་རེ་ཁོའི་བོའུ་ཁ་ནས་ཅལ་སེ་འགྱེལ་འགྲོ་བས་རི་དྭགས་པ་ཟེར་ན་ཁོ་ཡིན་ལ་ཁོ་ཟེར་ན་རི་དྭགས་པ་ཡིན།  ཁོས་ཝ་མོ་དམར་པོ་མེ་འདྲ་བ་ཞིག་རུ་བར་དུ་ཁུར་ནས་འགྲོ་དུས་མོ་གསར་ཚོའི་མིག་ཟུང་ནི་ཁོའི་རྒྱབ་ཀྱི་ཝ་མོར་འབྲལ་མི་ཕོད་པ་བཞིན་ཅེར་འདུག་པའི་རྣམ་པ་དེ་ད་དུང་ཡང་ཁ་སང་བྱུང་བ་དང་ཁྱད་ཅི།  དེ་དུས་ཨ་ཡེ་སྒྲོལ་མ་ནི་ཨ་ཡེ་ཞིག་ག་ལ་ཡིན་ཏེ་ལང་ཚོའི་མེ་ཏོག་ལྷམ་མེར་བཞད་ཅིང་གཟུགས་སྐྱེ་ལུས་ང་ཡོད་དང་ཡག་མོ་སྒོ་ང་ཡོད་ཟེར་བའི་མོ་གསར་རང་སྣང་ཅན་ཞིག་ཡིན་མོད། ཡིན་ནའང་ཝ་མོ་དམར་པོ་མེ་འདྲ་བ་དེ་ཡིས་མོའི་སེམས་ཀྱི་རང་སྣང་དེ་ཡང་ཐལ་དང་རྡུལ་དུ་བསྲེགས་ནས་ང་ལ་ཁྱོད་ལས་མི་དགོས་ཟེར་བའི་བུ་མོ་ཉམ་ཆུང་ཞིག་ཏུ་བསྒྱུར་སོང་།   ཧི་ཧི། དེ་ནི་གཏམ་དཔེ་ཞིག་གི་ལམ་ནས་བཤད་ན་གད་པས་གཡག་ལ་འཕྲུག་པ་ལས་གཡག་གིས་གད་པར་འཕྲུག་པ་རེད་ཅེ་ན་འགྲིག ད་ནི་མོ་ཡང་རྒས་ཤིང་འཁོགས་པར་གྱུར་ཏེ་གནའ་དང་མའི་ཤུལ་ཙམ་ལྷག་མི་འདུག་པས་གདུང་སེམས་ཤིག་ངང་ངམ་ཤུགས་ཀྱིས་སྐྱེས་བྱུང་།  མཛེས་མ་སྒྲོལ་མ་ཨ་ཡེ་སྒྲོལ་མར་གྱུར་པའི་གོ་རིམ་ཁྲོད་དུ་ཁོ་ཡང་ཕོ་གསར་བཀྲ་ཤིས་ནས་རི་དྭགས་པ་འབར་ཚག་ཏུ་གྱུར་ཅིང་ད་ནི་གོམ་པ་འགའ་མདུན་དུ་སྤོ་བ་ལའང་དབུགས་ཧལ་ཧལ་དུ་ལེན་དགོས་པ་འདི་རེད། གནའ་དང་མ་གསར་བུ་ཡིན་དུས་ཁྱོད་བཀྲ་ཤིས་ཟེར་ན་ཕོ་རྒོད་པོའི་མིག་དཔེ་ལྟ་ས་ཞིག་དང་མ་བུ་མོའི་ཡིད་སྨོན་འཆོར་ས་ཞིག་ཡིན་པ་ཨེ་དྲན།  ཁྱོད་ཀྱིས་སྒྲོལ་མ་རྟ་རྒྱབ་ཏུ་བླངས་ནས་མི་ཚོགས་བརྒྱ་འདུས་སྟོང་འདུས་ཀྱི་ཁྲོད་ནས་ཁྲོམ་ཆེན་ཟིལ་གྱིས་གནོན་ནས་འགྲོ་དུས།  ཨ་ཨ་ཨ…… ཕྱོགས་དང་ཕྱོགས་ཀྱི་རེ་སྨོན་གྱིས་ཁེངས་པའི་མིག་མདངས་དེ་དག……  མིག་མདངས་དེ་དག་གི་ཁྲོད་དུ་ཁྱོད་ནི་ལྷ་ཕྲུག་ཅིག་དང་འདྲ།  ཡང་ན་ཁྱོད་ནི……ཁྱོད་ནི……རི་དྭགས་པ་འབར་ཚག་གིས་ཁོ་ནི་གང་ཞིག་ལ་འདྲ་བ་འདང་ཇི་ལྟར་བརྒྱབ་ཀྱང་དཔེ་འོས་མོ་ཞིག་མ་རྙེད་པར་སྡོད་དུས།  ཕ་གིའི་ནགས་གསེང་ནས་ཕོ་རོག་ཅིག་གློ་བུར་གློག་བཞིན་འཁྱུག་འོངས་ཏེ་ཁོའི་རྣ་ལམ་དུ་ཨག་སྐད་རྣམ་རྟོག་ཟ་བ་ཞིག་བླུགས་རྗེས་གར་སོང་ཆ་མེད་དུ་གྱུར་པས། ཁོ་རང་སླར་ཡང་ལོ་ངོ་མང་པོའི་སྔ་རོལ་གྱི་ཁྲོམ་ཚོགས་དབུས་ནས་མིག་མདུན་གྱི་རྐང་ལམ་ཀྱག་ཀྱོག་དེའི་སྟེང་དུ་ཅལ་སེ་གཡུགས་བྱུང་།  ཨ་ཁ། ཐན་བྱ་གན་ཞེས་སྡིགས་དམོད་བྱེད་ཀྱིན་རི་དྭགས་པ་འབར་ཚག་གིས་ཕོ་རོག་མ་དགོས་འཕུར་བའི་ཤུལ་ཙམ་ཡང་མེད་ཀྱང་ཕྱོགས་དེར་ཧད་དེ་ཡུད་ཙམ་ལ་ལུས་སོང་།  ད་ནི་གོམ་པ་འགའ་ཡིས་ཝ་ཚང་ནང་ཟེར་བའི་གྲོག་ཤུར་མ་མོའི་ལོང་ག་ལྟ་བུ་ཞིག་ཡོད་པ་དེར་བསླེབས་ལ་ཉེ་བས་རི་དྭགས་པ་འབར་ཚག་གིས་ཨམ་གཙིགས་བསྡམས་ཏེ་མདུན་དུ་ཕྱིན། ཁོ་གསོམ་སྡོང་སྐམ་པོ་ཐང་ལ་འགྱེལ་འདུག་པ་སྟེང་དུ་སྔོ་རག་ཆགས་པ་ཞིག་ཡོད་པའི་ཕག་ཏུ་ཡིབས་ཤིང་པི་ར་མིག་ཁར་བླངས་ཏེ་ཁ་རོག་གེར་ཝ་མོ་རེ་ཨེ་མཐོང་ལ་རེ་སྒུག་བྱས་ནས་བསྡད། ད་ནི་ཝ་མོ་ཞིག་ཀྱང་མི་སོད་པ་འདི་ཅི་ཡིན་ནམ་སྙམ་སྟེ་འདང་ཞིག་བརྒྱབ་པ་ན་ཁོས་སེམས་ལ་དེ་སྔ་བསད་པའི་ཝ་མོ་དེ་དག་དྲན་བྱུང་། ཁོས་ཚེ་འདིར་ཝ་མོ་མང་པོ་ཞིག་བསད་མྱོང་བ་ནི་དོན་དངོས་ཏེ་ཚེ་རིང་གི་ཝ་ཞྭ་དེ་ཁོས་བསད་པའི་ཝ་ལྤགས་ཀྱིས་བཟོས་ཤིང་མར་གྲོད་པུ་གཉིས་ལ་བརྗེས་པ་ཡིན། དོན་གྲུབ་ཀྱི་ཆུང་མའི་ཝ་ཞྭ་དེ་ཡང་ཁོས་བསད་པའི་ཝ་ལྤགས་ཀྱིས་བཟོས་ཤིང་འབྲུ་སྒྱེ་མོ་གང་ལ་བརྗེས་པ་ཡིན། ལྕགས་མོའི་ཝ་ཞྭ་དེ་ཡང་ཁོས་བསད་པའི་ཝ་ལྤགས་ཀྱིས་བཟོས་ཤིང་དངུལ་སྒོར་གསུམ་ལ་བརྗེས་པ་ཡིན། ད་དུང་ལྕགས་འབུམ་གྱི་ཝ་ཞྭ། ཀླུ་རྒྱལ་གྱི་ཝ་ཞྭ། ནོར་བུའི་ཝ་ཞྭ། ལྷུན་འགྲུབ་ཀྱི་ཝ་ཞྭ། འཇིགས་མེད་ཀྱི་ཝ་ཞྭ། བསོད་ནམས་ཀྱི་ཝ་ཞྭ། ལྷ་འཚོའི་ཝ་ཞྭ། གཡང་འཚོའི་ཝ་ཞྭ།  བདུད་འདུལ་གྱི་ཝ་ཞྭ། གཅོད་པའི་ཝ་ཞྭ…… ཁོས་དེ་ལྟར་དྲན་བཞིན་དུས་ཡུན་ག་ཚོད་ཅིག་ཕྱིན་པ་མི་ཤེས་མོད་ལག་པ་གཉིས་ཀ་སྦྲིད་དེ་སེན་ཏོག་བྱས་ཀྱང་ཚོར་བ་མེད་པར་གྱུར་འདུག་ལ་རྐང་པ་གཉིས་ཀ་ཡང་ཧྲེང་ཧྲེང་དུ་གྱུར་ནས་བསྐུམས་ཀྱང་སྐུམ་དཀའ་བའི་ཚད་ལ་བསྐྱལ་འདུག  ཁོས་ལག་པ་གཉིས་ཕུར་ཕུར་ཙམ་བྱས་ཤིང་དེ་ནས་འདུག་སྟངས་བརྗེས་ཏེ་ཡང་བསྐྱར་གྲོག་ཤུར་དེའི་གཡས་གཡོན་ལ་མིག་ཧྲིག་གེར་བལྟས་ནས་བསྡད།  གྲོག་ཤུར་གྱི་མཐིལ་དུ་ཆུ་མིག་དྭངས་མོ་ཞིག་ཆུ་རྒོད་གདུ་བ་བཞིན་ལྷོག་ལྷོག་ཏུ་འཕྱུར་ཅིང་དགའ་བའི་གླུ་དབྱངས་ལེན་བཞིན་ཐུར་ནས་ཐུར་དུ་འབབ་བཞིན་འདུག ཆུ་ཕྲན་དེ་མིག་ལམ་དུ་ཤར་བ་དེས་ཁོར་སྐོམ་པའི་ཚོར་བ་དྲག་པོ་ཞིག་རྒྱུ་མའི་མཐིལ་ནས་མེ་རི་བཞིན་འཕྱུར་བྱུང་ནའང་ཁོས་དེ་ལྟར་བསྲན་ནས་བསྡད།  རི་དྭགས་རྣམས་ལ་ནི་ཁོར་ཆ་རྒྱུས་གསལ་བོ་ཡོད་དེ་དེ་སྔ་ཁོ་རང་གསར་བུ་ཡིན་དུས་ཆུ་མིག་དེའི་ཁ་ནས་རྫ་ཆུ་བསིལ་མར་རོལ་བའི་རི་དྭགས་ཅི་འདྲའི་མང་པོ་ཞིག་ལྔ་ལམ་དུ་བརྫངས་མྱོང་ཨང་།  ལྷག་ཏུ་ཝ་མོ་རྣམས་ནི་ཆུ་མཐོང་ན་མཆུ་ཏོ་མདོང་མདོང་བོ་ཆུ་ལ་བཙུགས་ཏེ་འགྲངས་པའང་མི་ཤེས་པར་རྐང་ལག་ཐུང་ཐུང་གིས་ཕོ་བ་མི་ཐེག་པ་ཞིག་འཐུང་རྗེས། རང་ཉིད་ལས་ཀྱང་ཆེ་བའི་རྔ་མ་རྒྱབ་ལ་དྲུད་ཅིང་གཡས་འཁྱོར་གཡོན་འཁྱོར་བྱེད་བཞིན་ཉིན་ཁ་དྲོ་སར་ངལ་ཡིད་ཚིམས་པ་ཞིག་གསོ་བ་རེད། སྐབས་དེ་ནི་རི་དྭགས་པ་འབར་ཚག་ལ་མཚོན་ན་གླགས་ཀྱི་ནང་གི་མཆོག་སྟེ་པི་ར་རྭ་རིང་ལག་ཏུ་བཟུང་སྟེ་སྐག་སེ་བརྒྱབ་ཚེ་ཝ་མོ་དམར་པོ་མེ་འདྲ་ཞིག་རང་ཚུགས་ཤོར་ཏེ་གྲུ་གུ་བཞིན་འགྲིལ་བར་བྱེད་སྲིད།  ཁོས་མུ་མཐུད་དུ་རེ་སྒུག་གི་མིག་ཟུང་ཆེས་ཆེར་བགྲད་དེ་སྡོད་སྐབས་གཉིད་སྣང་འགོག་མེད་ཅིག་རྩ་ལམ་ཧྲིལ་བོར་ཁྱབ་ཅིང་མཐའ་མར་རིག་པ་ཉོབ་ཏེ་མིག་ལམ་གྱི་ཡོད་ཚད་རབ་རིབ་ནས་མག་མོག་ཏུ་གྱུར་སོང་།  རྨི་ལམ་དུ་ཨོ་རྒྱན་རིན་པོ་ཆེ་ཡིན་ཟེར་བའི་མི་ཆེན་མགོ་བོ་ཡར་བཀྱགས་ནས་མ་བལྟས་ན་ཞལ་ཡང་མི་མཐོང་བ་ཞིག་གིས་ཁོའི་མདུན་ལྗོངས་ཡོད་ཚད་ནག་རོག་གེར་བསྒྲིབས་བྱུང་།  མི་ཆེན་དེས་རི་དྭགས་པ་འབར་ཚག་ཁྱོད་ཀྱིས་ངའི་པགས་རྩག་གི་གོང་ཁར་འཐེན་རྒྱུའི་ཝ་ལྤགས་ད་དུང་འཁྱེར་ཡོང་རྒྱུ་མིན་ནམ་ཟེར་ཞིང་མིག་གཉིས་ཕུར་ཚུགས་སུ་ཁོར་ཅེར་ནས་བསྡད་བྱུང་། ཁོ་རང་བློང་བློང་བོར་གྱུར་ཏེ་ཁ་ནས་སློབ་དཔོན་རིན་པོ་ཆེ་ལགས་སྐལ་བ་སྙིགས་མའི་དུས་འདི་ལ་ཝ་ལྤགས་ཤིག་ཀྱང་རྙེད་དཀའ་བས། ངས་ཉིད་ཀྱི་རེ་བ་དུས་ལྟར་མ་འགྲུབ་པར་དགོངས་དག་གནང་རོགས་ཞེས་པུས་མོའི་སླ་ང་ཐང་ལ་བཙུགས་ཏེ་ཡང་ཡང་ཕྱག་བཙལ་བ་ན། མི་ཆེན་དེས་ཧབ་ཆ་འབྲུག་སྒྲ་ལྡིར་འདྲ་ཞིག་སྒྲོག་པ་དང་དེ་ནས་ད་དུང་ཁྱོད་ལ་ཉིན་འགའི་དུས་ཚོད་སྟེར་དེའི་རང་ལ་མ་འགྲུབ་ན་ངས་ཁྱོད་རང་སྲིན་པོའི་ཡུལ་དུ་སྤྱུགས་རྒྱུ་ཡིན་ཟེར་བ་དང་། ཡང་བསྐྱར་ཧ་ཧ་ཧ་ཞེས་ཧབ་ཆ་འབྲུག་སྒྲ་ལྡིར་སྒྲ་ཞིག་སྒྲོག་འཕྲལ་སྤྲིན་ཕུང་ཝ་མོ་འདྲ་བ་ཞིག་གི་རྒྱབ་ཏུ་ཞོན་ཏེ་ཨ་སྔོན་དབྱིངས་སུ་དལ་བ་དལ་བུར་བཞུད་སོང་། རི་དྭགས་པ་འབར་ཚག་སྔངས་ཤིང་སྐྲག་སྟེ་གཉིད་གུང་ནས་གློ་བུར་སད་དུས་ཁོ་ར་ཁོར་ཡུག་ཀུན་ཏུ་རླུང་གིས་ཁ་ཤུ་འདེབས་ཤིང་གནམ་ངོ་ཡང་ཐལ་མདོག་ཏུ་གྱུར་འདུག  ལྟ་ཕྱོགས་ཤིག་གིས་སྟོད་ཀྱི་ཨ་མྱེས་སྒོ་རྩེའི་དབུ་འཕང་མཐོན་པོ་དེ་ཡང་ཐལ་སྐྱ་སྤར་མོ་གང་གཅོལ་བཞིན་རབ་རིབ་ནས་མག་མོག་ཅིག་ཏུ་བསྒྱུར་འདུག་ཅིང་ཝ་མོ་ཞིག་གི་མཆོང་སྟོབས་ཀྱིས་འབྲོ་བ་དང་ཀུན་ནས་མཚུངས། ཁོས་སེམས་ལ་དེ་རིང་གི་གནམ་གཤིས་འདིར་ཅི་བྱུང་འདི་བྱུང་སྙམ་ནས་སྡོང་སྐམ་དེའི་ཕག་ནས་མགོ་བོ་ཡར་བཀྱགས་པ་དང་མིག་ལམ་གྱི་གྲོག་ཤུར་དེ་རུ་ཅི་ཞིག་འགུལ་བཞིན་པ་མཐོང་བྱུང་།  ཁོས་པི་ར་ལག་ཏུ་བཟུང་ཞིང་མིག་གཅིག་ཟུམ་སྟེ་བལྟས་པ་ན་ཝ་མོ་ཞིག་ཡིན་པ་འདྲ་བས་ཐེ་ཚོམ་མེད་པར་སྐག་སེ་བཏང་བ་དང་དེ་ཙི་སྒྲ་ཞིག་དང་ཆབས་ཅིག་དབུགས་རྨེག་གེར་འགྱེལ་སོང་། རི་དྭགས་པ་འབར་ཚག་དགའ་བས་མྱོས་ཏེ་རྒྱུག་མ་འདུར་གྱིས་གྲོག་ཤུར་དེའི་མཐིལ་དུ་ཕྱིན་པ་ན་བློ་ཡུལ་ལས་འདས་པ་ཞིག་ལ་དེ་ནི་ཝ་མོ་ཞིག་མིན་པར་སྤྱང་ཕྲུག་ཅིག་ཡིན་འདུག་པས་སེམས་པ་དེ་མ་ཉིད་དུ་སྐྱོ་བའི་གཡང་ལ་བརྫངས་སོང་། སྤྱང་ཕྲུག་དེས་མིག་གཉིས་གཡོ་བ་མེད་པར་ཁོར་ཅེར་འདུག་ལ་དཔྲལ་ངོས་ཧྲིལ་བོར་ཁྲག་གིས་སྦགས་ཏེ་འཇིགས་ཡེར་བ་ཞིག་ཏུ་བཏང་འདུག ཨ་ཙི།གསད་རྒྱུའི་ཝ་མོ་མ་སོད་པར་གསད་མི་དགོས་རྒྱུའི་སྤྱང་ཕྲུག་ཅིག་བསད་སོང་།  ཤུ — ཁོས་ཁ་ནས་ཨ་ཤུ་དང་ཨུ་ཤུ་ཟེར་བཞིན་ཕྱོགས་བཞིའི་ཁོར་ཡུག་ཏུ་བལྟས་པ་ན། སྐྱི་བསེར་གྱི་ལག་པ་རྩུབ་མོས་རྩྭ་རྩིའི་མགོ་འཕང་སྤྲུགས་སྤྲུགས་གནང་ནས་ཁོ་རང་ནང་བཞིན་ཨ་ཤུ་དང་ཨུ་ཤུ་འདེབས་པར་བྱེད་པས་ཁོ་ལ་གྲང་འདར་འགའ་བསྟུད་མུར་བརྒྱབ་བྱུང་།  ཕྱི་དྲོའི་མཚམས་སུ་གནམ་ངོ་ནི་ཇེ་སྡུག་ནས་ཇེ་སྡུག་ཏུ་ཕྱིན་ཏེ་ནག་རོག་རོག་ཏུ་སྣང་བས། ཁོའི་སེམས་ལ་ད་ནི་ཝ་མོ་ཞིག་ལག་ཏུ་མི་ཐེབས་པ་ཐག་གིས་ཆོད་སྙམ་ནས་ཕྱིར་རྐང་ལམ་ཀྱག་ཀྱོག་ཏུ་ཞུགས་ནས་ཡུལ་ལ་ལྡོག་པའི་སྟ་གོན་བྱས།  ཁོས་ལམ་རིང་ཐུང་བོར་རྨི་ལམ་དེ་དང་གནམ་གཤིས་གཉིས་ལ་བསམ་བློ་གཏོང་བཞིན་སྐྱོད་དུས་རླུང་ནག་འཚུབ་མས་རྒྱབ་ནས་དེད་དེ་ཁ་སྦུབས་སུ་བསྒྱེལ་ལ་ཁད་བྱེད། ཁོ་རང་དེ་ལྟར་གོག་མ་ནུར་གྱིས་རི་འདབས་སུ་བསླེབས་དུས་གནམ་ངོ་ནི་ཇེ་རུབ་ཏུ་གྱུར་ཏེ་ལམ་གྱི་སྣེ་མོའང་ཟིན་མི་ཟིན་ཙམ་དུ་བསྒྱུར་འདུག  ཁོའི་སེམས་ལ་སྤྱང་ཕྲུག་དེའི་ཆེས་ཆེར་གདངས་པའི་མིག་དང་གནམ་གཤིས་ཀྱི་ཡ་ང་བའི་འགྱུར་བ་སོགས་དྲན་བཞིན་འབའ་འབུར་མི་སྙོམས་པའི་ལམ་བུ་མང་པོ་བརྒྱུད་མཐར་གྲོང་ཚོའི་གཉའ་ལ་བསླེབས།  གྲོང་ཚོའི་ནང་དུ་མི་མང་པོས་མ་ཎི་ཡིག་དྲུག་དབྱངས་སུ་གྱེར་བའམ་ལྕགས་གཞོང་དང་སླ་ང་ཆག་པོ་སོགས་བརྡུངས་ནས་ཁྲོག་སྒྲ་པང་སྒྲས་གནམ་ས་འགེངས་པར་བྱེད། ཆེས་སྔོན་དུ་འགྲེངས་ནས་ཀི་རིང་འདེབས་ཀྱིན་སླ་ང་ཆག་པོ་ཞིག་ཏིང་ཏིང་དུ་རྡུང་མཁན་དེ་ནི་གྲོང་ཚོའི་ནང་གི་རང་དང་ན་ཚོད་མཉམ་པའི་རྒད་པོ་དོན་འགྲུབ་རེད།   དེའི་རྗེས་སུ་འབྲངས་ནས་མ་ཎི་ཡིག་དྲུག་དབྱངས་ལ་གྱེར་ཞིང་ལག་ཟུང་བྲང་ལ་སྦྱར་ཏེ་གསོལ་བ་འདེབས་མཁན་དེ་ནི་ཨ་ཡེ་ལྷ་མོ་རེད། ད་དུང་གྲོང་ཚོའི་ནང་གི་ལོ་ལོན་གཞན་དག་དང་གསར་བུ་གསར་མོ་བྱིས་པ་ཆེ་ཆུང་ཚང་མས་བློ་རྩེ་གཅིག་སྒྲིམ་གྱིས་མགོ་བོ་མཁའ་ལ་བཀྱགས་ནས་རང་རང་གི་ལག་ཏུ་ཐོགས་པའི་ཅ་ལག་ཅི་རིགས་རྡུང་ཞིང་ཀི་སྒྲ་སྒྲོག་ཅིང་མཆིས། ཁོས་ཅི་ཡིན་ཆ་མ་འཚལ་བར་ཡར་ཁའི་ངོ་ལ་བལྟས་ནས་ཅུང་ཟད་ཧད་ཅིང་མར་ཁའི་གདོང་ལ་བལྟས་ནས་ཅུང་ཟད་ལུས་ནའང་མི་རྣམས་ཀྱིས་ཁོ་ལ་སྣང་དོགས་སྤུ་ཙམ་ཡང་མི་བྱེད་པར་རང་རང་ས་རུ་ལྐོག་གྱུར་གྱི་ཆོ་ག་ཅི་ཞིག་སྤེལ་བ་བཞིན་དེ་ལ་རྣམ་རིག་བསྒྲིམས་འདུག   དེ་དུས་རི་དྭགས་པ་འབར་ཚག་གིས་ཀྱང་ཀུན་གྱི་མཐོང་ལམ་དེད་ནས་སླང་ཕྱིས་ཚི་སྟིག་ཅིག་དང་འདྲ་བའི་ནམ་མཁར་ལན་གཅིག་བལྟས་པས་ད་གཟོད་ཉི་མ་གཟའ་ཡིས་ཟིན་པ་ཤེས་སོང་།ཁོའི་ཁ་ནས་ཨ་ཁ་ད་ང་རྒད་པོ་དངོས་གནས་ཧོན་ལོག་འདུག་ཉི་མ་གཟའ་ཡིས་ཟིན་པའང་ཤེས་ཀྱིན་མི་འདུག་ཟེར་གྱིན་ཕྲག་གི་པི་ར་བླངས་ཏེ་ནམ་མཁའི་དབྱིངས་སུ་བསྟུད་མུར་ལན་འགའ་བརྒྱབ། ནམ་མཁའི་དབྱིངས་སུ་ཉི་མ་ནི་བྱིའི་ཕྲུག་དམར་རྗེན་ཞིག་ཁྲ་ཡིས་ཁུར་ནས་འགྲོ་བ་དང་འདྲ་བར་འཕག་ཙམ་བྱས་ཀྱང་ཐར་བའི་སྐལ་བ་ནི་ཡོངས་སུ་བྲལ། མི་རྣམས་ཀྱིས་མུ་མཐུད་དུ་ལག་གི་ཅ་ལག་དག་རྡུང་ཞིང་ཀི་སྒྲ་བསྒྲགས་ཏེ་དམར་ལམ་ལམ་གྱི་ཉི་མ་དེ་མ་རུང་བདུད་ཀྱི་འཇིགས་པ་ལས་ཐར་བའི་གསོལ་འདེབས་བྱེད་ཀྱིན་འདུག་སྟེ།     ཀྭོ——   ཀྭོ——  ཀྭོ——  ཀྭོ——  ཀྭོ—— ཀྭོ  …… དགོང་མོ་དེར་རི་དྭགས་པ་འབར་ཚག་ཐང་ཆད་དེ་ཚ་ཐབ་སྟེང་འགོས་པ་ནས་གཉིད་ཀྱི་རྟ་ཕོས་རྨི་ལམ་གྱི་ཞིང་དུ་དྲུད་སོང་།  དོན་དུ་རྨི་ལམ་མམ་མངོན་སུམ་གང་ཡིན་ཆ་མི་འཚལ་མོད་རྣ་ལམ་དུ་སྤྱང་ཀིའི་ངུད་མོ་ཞིག་རེས་གསལ་རེས་མོག་ངང་འཁོར་ཡོང་བས་རྨི་ལམ་ལས་ཡོངས་སུ་སད་དུས་ཀྱང་རྣ་ལམ་དུ་སྤྱང་ཀིའི་ངུད་མོ་ལྟ་བུ་ཞིག་མཚམས་མེད་པར་གྲགས་འོངས།  ཐོ་རངས་ནམ་ལང་དུ་ཉེ་དུས་ཁོ་རང་ཡར་ལངས་ཤིང་སྒོར་བུད་པ་ན་ལུག་ལྷས་ཀྱི་འདབས་རོལ་ཁྲག་གིས་སྦགས་ཏེ་དམར་པོར་བསྒྱུར་འདུག་པ་མཐོང་བྱུང་། ཁོ་རང་འཚབ་འཚུབ་ངང་ཉེ་སར་ཕྱིན་ནས་བལྟས་དུས་ཡ་ང་བ་ཞིག་ལ་ཁོ་ཚང་གི་ལུག་ཚེ་ཐར་རྭ་བཞི་གཅིག་པུས་མགོ་བོ་ཀྲོག་ཀྲོག་བྱེད་པ་ལས་གཞན་རྣམས་གཅིག་ཀྱང་མ་ལུས་པར་གཡས་སྒྱེལ་གཡོན་སྒྱེལ་བྱས་འདུག   རི་དྭགས་པ་འབར་ཚག་ཧ་ལས་ཤིང་ཧང་སངས་ནས་མིག་གཉིས་ཕུར་ཕུར་ཙམ་བྱས་ཏེ་ཞིབ་ཏུ་བལྟས་དུས་མིག་མདུན་གྱི་ཡོད་ཚད་ནི་མངོན་སུམ་སྟེ་ལུག་ཀུན་གྱི་སྐེ་རུ་སྤྱང་ཀིའི་མཆེ་བ་རྣོན་པོས་རྨུགས་པའི་ཤུལ་རྗེས་གསལ་བོར་ཕབ་འདུག  ཁོའི་རུས་གསེང་ལ་འཁྱག་དར་ཕོན་པོ་ཞིག་སྤུངས་པ་བཞིན་འདར་རྒྱུ་ཞིག་བྱུང་བ་དང་ལུས་ཀྱི་ཡན་ལག་ཉིང་ལག་མ་ལུས་ཀྱང་ལྷབ་ལྷབ་ཏུ་གཡོས——རི་དྭགས་པ་འབར་ཚག་གི་མིག་ལམ་དུ་སྤྱང་ཕྲུག་དེའི་ཆེས་ཆེར་གདངས་པའི་མིག་གཉིས་གཡོ་བ་མེད་པར་རང་ལ་ཅེར་འདུག་པ་ཤར་བྱུང་།

མཆན། 

    རི་དྭགས་པ་ནི་རྔོན་པར་འཇུག

chisanghua སྤེལ་དུས། - 2014-4-8 9:21:06

ཨུ་རུ་སུའི་སྙན་ངག་པ། 

སྟོན་མཇུག་གི་སྟག་པ་དཀར་པོ་ཨུ་རུ་སུའི་གྲམ་གཞུང་ཀུན་ཏུ་སྐྱོ་སྣང་གིས་འཛིང་།

མིག་ཆུ་ལྟ་བུའི་ལོ་མ་སེར་པོ། རི་ཐང་ཡངས་པོར་ན་ཟུག་གིས་འཕྱོ།

མ་ཡུམ་གྱི་བརྩེ་བ་བཞིན་འབྱམས་ཀླས་པའི་ས་གཞིའི་པང་དུ།

ཨུ་རུ་སུའི་སྙན་ངག་པས། རྐང་དུང་གི་འགྱུར་ཁུགས་ལྟ་བུའི་སྙན་ངག་ཕོན་པོར་སྤུངས།

རི་ཀླུང་གི་ཁོག་པ་བཤགས་པའི་ཐ་སྙད་ཀྱི་རལ་གྲི་རྣོན་པོས།

གྲང་རླུང་གི་རྒྱུ་བ་རི་རབ་ཀྱི་ཕྱི་རོལ་ཏུ་བཀག

 

1925ལོའི་ནམ་མཁའ་ཡར་ལངས་ཀྱི་ཞོགས་པ་དེར།

ནམ་མཁའི་མཐོངས་ནས་ཁ་བ་ལེབ་མོ་ལེབ་མོ་མཉམ་སྒྲོག་རོལ་མོ་བཞིན་ས་ཆེན་གྱི་པང་དུ་འཐོར།

སྟག་པ་དཀར་པོའི་ལོ་མའི་ངོས་ལ་སྙན་ངག་གི་སེར་ཐིགས་ཕབ་མྱོང་བའི་ཨུ་རུ་སུའི་སྙན་ངག་པས།

ཕྱིར་མིག་གི་ཀློང་ནས་རི་ཚོགས་ཀྱི་བརྗིད་རྔམ་བོར་ཅིང་།

ཉི་ཤར་གྱི་བརྩེ་བ་རང་སེམས་ནས་དུར་དུ་སྦས།

ཨུ་རུ་སུའི་སྙན་ངག་པ། གངས་ཐང་ནས་རྐང་རྗེན་དུ་འགྲོ་དུས།

ཕོ་རོག་ནག་ཆུང་ཞིག་གི་ཨག་སྐད་ཀྱིས།

མཐའ་མཇུག་གི་སྐྱེལ་མ་བྱས།

དེ་ནས་བཟུང་། སྙིང་དམར་པོ་ཞིག་གི་འཕར་ལྡིང་། 

ཨུ་རུ་སུའི་རྨ་ཁས་ཁེངས་པའི་ས་གཞི་ཆེན་པོ་དེའི་སྐྱོ་གྲོགས་སུ་གྱུར།

 

ཨུ་རུ་སུའི་སྙན་ངག་པ་མེ་ཡི་སྡོངས་གྲོགས་ཡིན།

ཨུ་རུ་སུའི་སྙན་ངག་པ་རླུང་གི་སྡོང་གྲོགས་ཡིན།

ཨུ་རུ་སུའི་སྙན་ངག་པས་ནམ་མཁའ་ཕྱེད་ཀ་བསྲེགས་རྗེས།

རང་ཉིད་ཀྱང་མེ་དང་རླུང་གི་ངོ་བོར་འཐིམ་སོང་།

chisanghua སྤེལ་དུས། - 2013-12-27 10:13:42
           དགུན་གྱི་གཤོག་པ། 

 

རྒྱང་ནས་རྒྱང་དུ་བལྟས་ཚེ  དགུན་གྱི་མཛེས་སྡུག་རི་རབ་ཀྱི་ཁོང་དུ་འབར

རྡོ་དང་གཡའ་མའི་གསེང་དུ་ལྷུང་བའི་ཁངས་འཁྱག་དེ་དག

ཉིན་སྲིབ་ཀྱི་མཚམས་ནས་སོ་ཕྲེང་དགོད

མེ་ཏོག་གི་འདབ་ལོ་བོར་བའི་གཞུང་རྟ་སྐམ་པོ་ཞིག

སྐྱི་བསེར་གྱིས་ལྡག་ཅིང་མཆིས

འཁྱག་རོམ་གྱིས་བཅིངས་པའི་ཆུ་ཕྲན་ཀྱ་ཀྱུ 

ཀྱ་ཀྱུའི་དབྱིབས་ཀྱིས་མཛེས

སྟོང་བའི་དབྱིངས་སུ  སྤྲིན་པ་ཞིག་གི་འཕྱོ་འཇགས་ཀྱིས

ནམ་མཁའི་དྭངས་གཙང་རྙོག

བྱེའུ་ཞིག་གི་འཕུར་སྐྱོད  དལ་བ་དལ་བུར

མིག་གི་མཐོང་རྒྱ་བརྒལ

རང་བྱུང་གི་གར་སྟབས  རྩྭ་རྩིའི་མགོ་འཕང་ལ་བསྙེས

དབེན་འཇགས་ཁྲོད་ཀྱི་རི་ཀླུང་ཐང་གསུམ  དབེན་འཇགས་ཁྲོད་འཐིམ

……

 

ཁ་བའི་ཀློང་དུ  སྐྱ་མི་ཞིག་གི་གྲིབ་གཟུགས་ཉི་འོད་ཀྱི་རྩེ་ལ་བསྐྱོན

སེང་གེ་ང་རོ་ཡོད་མེད་མི་ཤེས

གཟིག་གི་མཆོང་སྟོབས་ཡོད་མེད་ཀྱང་མི་ཤེས

སྐྱ་མི་དེའི་རྒྱབ་གཟུགས་ཀྱིས་ངའི་མཐོང་ལམ་འཕྲེད་ཀྱི་གཅོད་དུས

དགུན་ཁ་འདར་ཙམ་གཡོ་ཙམ་གྱིས

རྒྱབ་ལྗོངས་ཡོད་ཚད་ཀྱི་གྲ་ཁ་བསྣོགས་སོང

 

ཁ་བ་བབས་པའི་དུས་སྐབས་གང་རུང་ལ

ས་གཞི་དཀར་པོས་མིའི་རིགས་ལ  མིའི་རིགས་ཀྱི་ཚབ་ཏུ་འགྱོད་བཤགས་ཞུ

ལྗོན་པའི་ཡལ་ག་དག་ལས་འཕུར་བའི་ཁྭ་ཏའི་ཚོགས

ལྗོན་པ་གཞན་ཞིག་གི་ཡལ་གར་འབབ

དེ་ནི་གནམ་འོག་གི་ཆེས་དྭངས་གཙང་གི་འཕུར་སྐྱོད་དེ

ཁ་བ་བབས་པའི་དུས་སྐབས་གང་རུང་ལ

རང་བྱུང་གི་མཛེས་པ་མཛེས་པས་སྤུད

 

ཁ་བ་ལེབ་མོ་ལེབ་མོ་འོད་ཀྱིས་མཆོངས་ཏེ

ངའི་བྱིས་དུས་ཀྱི་གྲོང་ཚོར་མཛེས་པའི་ཉམས་ཀྱིས་ཟེགས་དུས

སེམས་པ་ཁོ་ན་ལོ་ངོ་མང་པོའི་སྔ་རོལ་དུ་ལུས་འདུག

དེ་ནི་ལོ་རྒྱུས་ཀྱི་ཕྱིར་དྲན་ཐེངས་ཤིག

ཕྱིར་རྟོག་གི་ཁམས་སུ་གཡེང་བའི་ལོ་མ་འགའ

བསམ་གཞིག་གི་རྒྱ་རུ་ཁེགས་སོང

ཁ་བ་ལེབ་མོ་ལེབ་མོ་སེམས་ལ་དྲོད་ཀྱིས་བབས་བྱུང

 

དུས་ཚིགས་འདིར  སེམས་པ་ཁོ་ནས་སེམས་པ་བསྲུངས་ནས

དུས་ཚིགས་འདི་ལ་འོ་རྒྱལ་ཞུས

དུས་ཚིགས་འདིར  དགུན་ཁ་འཕུར་གྱིན་འདུག

དགུན་གྱི་གཤོག་པའི་སྟེང་ལ་སྨོན་འདུན་སྤར་མོ་གང་བསྣམས་འདུག

རེ་སྨོན་སྐྱོགས་མགོ་གང་ཐོགས་འདུག

ད་དུང་སེམས་དོན་རྫ་མ་གང་བཟུང་འདུག

        2013/12/27ཟི་ལིང་དུ།

chisanghua སྤེལ་དུས། - 2013-12-19 9:20:26

སྐྱེ་བ་གཉིས་ཀྱི་འདས་དོན།

སྒོ་མེ་ཚེ་རིང་བཀྲ་ཤིས།

1978ལོ། དབྱར་ཁ། 

དེ་ནི་དུས་ཚོད་ཀྱིས་རིང་དུ་བསྐྱུར་པའི་འདས་སོང་གི་ལོ་ཟླ་ཞིག

ཉི་འོད་ནི་ནམ་རྒྱུན་ལས་ཀྱང་ཚ་བེར་བེར་བྱེད་ཅིང་། མཁའ་དབུགས་ཁྲོད་དུ་ཅི་ཞིག་མེ་ཡིས་འཚིག་པ་ལྟར་གཞོབ་དྲི་ཞིག་གིས་ཀུན་ནས་ཁྱབ།  དབྱར་ཟླ་དྲུག་པའི་ཕྱི་དྲོ་དེར། ཉི་འོད་ཀྱིས་གསེར་ཆུ་བྱུགས་པའི་རི་ལ་ཐང་ཀུན་མཐའ་མེད་གཏིང་མེད་ཀྱི་ལྷིང་འཇགས་ཤིག་གི་ཁྲོད་དུ་ཁུ་སིམ་མེར་གཉིད་འདུག མངོན་གསལ་གྱིས་ནུབ་ནས་ནུབ་ཏུ་གཟུར་བའི་ཉིན་བྱེད་ཁོ་ནས་ཅི་ཞིག་བློས་མི་ཐོངས་པ་བཞིན།  མི་ཡུལ་གྱི་ཕྱི་དྲོ་དེར་ཡང་ཡང་ཕྱི་མིག་བསློགས་ཏེ་འབྲལ་མི་ཕོད་པའི་རྣམ་འགྱུར་སྟོན། སྤོ་བོས་སྔོན་ལ་ལག་པ་རྒྱབ་ལག་བྱས་ཏེ་ཞིང་ཚུགས་བར་ནས་ཕར་འགྲོ་ཚུར་འགྲོ་ལན་འགའ་བྱས་ཤིང་། དེ་ནས་ལག་གཡས་དཔྲལ་ངོས་སུ་བཙུགས་ཏེ་ཉི་འོད་བསྒྲིབས་ཀྱིན། མདུན་ཕྱོགས་ཀྱི་སོག་ལེའི་སོ་ཁ་ལྟ་བུའི་རི་བོའི་ཚོགས་ལ་མིག་ཞགས་ཤིག་འཕངས་པ་དང་། སླར་ཡང་མིག་དབང་བསྡུས་ཏེ་ལོགས་གཉིས་ཀྱི་ཞིང་ཐང་ལ་ལྟ་ཙམ་ལྟ་ཙམ་བྱེད། ཞིང་ནང་དུ་ཐར་ཐོར་དུ་སྐྱེས་པའི་གྲོ་མྱུག་ནི་གྲོ་མྱུག་ཟེར་བ་ལས། སེར་པོ་འགྱུར་མ་རན་གོང་ནས་སེར་པོར་གྱུར་པའི་རྩྭ་ལྡུམ་ཕོན་པ་ཞིག་རེད་ཅེས་བཤད་ཆོག  ཁོང་གིས་ཅི་ཞིག་བཤད་འདོད་ཀྱི་ཁ་ཤ་འཕག་ཙམ་འཕག་ཙམ་བྱས་མོད། མཐའ་མར་ཅི་ཡང་མ་ཤོད་པར་མགོ་གཅུད་དམར་པོས་ཨ་ལོང་ཞིག་བཅོས་ཏེ་གདུང་མར་བཏགས་ཤིང་། རལ་བ་སྦོམ་པོ་དེ་མགོ་ལ་དམ་པོར་དཀྲིས་རྗེས་སྐེ་ནི་རང་དབང་མེད་པ་ལྟར་ཨ་ལོང་དེའི་ནང་དུ་བསྲིངས……

དེ་ལྟར་སྤོ་བོ་ནི་ལོ་དེའི་དབྱར་ཁའི་ཕྱི་དྲོ་དེར་སྡེ་འདབས་ཀྱི་མཚམས་ཁང་ཆུང་ཆུང་དེའི་ནང་དུ་རང་ཤི་བརྒྱབ་པ་རེད། སྤོ་བོས་འཇིག་རྟེན་ལ་མཐའ་མཇུག་གི་ཕྱི་མིག་སློག་པའི་སྣང་བརྙན་དེ་ནི་ཆུང་དུས་སུ་ཞིག་གིས་ང་ལ་ཞིབ་བརྗོད་གནང་བ་འཆད་རྒྱུ་མི་འདུག་མོད། དེ་ནི་བློ་བཟོ་འབའ་ཞིག་རེད་ཟེར་ན་ང་རང་གིས་རྩ་བ་ནས་ཁས་ལེན་བྱ་མི་འདོད། ངའི་བག་ཆགས་ཀྱི་གཏིང་རིམ་ཞིག་ཏུ་དྲན་པ་དེ་འདྲ་ཞིག་བྱེད་པོ་གང་ཞིག་གིས་སྦས་པ་བཞིན་རབ་རིབ་ཅིག་ཉར་འདུག ལོ་ཟླའི་ཆར་རླུང་གིས་ཡང་ཡང་བྲན་པའི་མཚམས་ཁང་དེ་ནི་སྡེ་དཔོན་བཀོད་པ་ཅན་ཞིག་གིས་ཆེད་དུ་སྤོ་བོར་སེར་བ་འགོག་སྤྱད་དུ་བརྩིགས་པ་ཡིན། མཚམས་ཁང་དེའི་སྒོ་དྲུང་ནས་ཆོས་སྐད་ལྷང་ལྷང་ངང་འུར་སྐྱའི་ཁུད་དུ་ཡུང་དཀར་བཞག་ནས་མགོ་ལ་བསྐོར་ཞིང་། ནམ་མཁའི་དབྱིངས་ཀྱི་སྤྲིན་ནག་གི་འདུ་འགོད་ཕྱོགས་སོར་ཀྲུགས་ཐེངས་རེ་ལ། ཁོང་གི་གདོང་གི་རྣམ་ཀུན་མཐོང་དཀོན་པའི་གཟབ་ནན་གྱི་རྣམ་འགྱུར་གསེང་ལ་འབྱར་བའི་གཟི་ཉམས་དེ། ལོ་མང་པོའི་རྗེས་སུ་ད་དུང་གྲོ་ཞིང་ཁའི་ལོ་ལོན་ཚོས་གཅིག་ཁར་གཉིས་བཏགས་ནས་གླེང་བཞིན་འདུག དེ་དུས་ང་རང་ད་དུང་འཇིག་རྟེན་དཀར་ངོགས་སུ་བསླེབས་མེད་དེ། ང་སྐྱེས་དུས་ནི་ཕྱི་ལོའི་སྟོན་ཁ་སྟེ་སྤོ་བོ་འདས་ནས་ཏག་ཏག་ལོ་གཅིག་དང་ཟླ་གཅིག་འགོར་མ་འགོར་ཙམ་ཡིན། སྡེ་མི་རྒན་པ་ཚོས་ང་ལ་ཁྱོད་ཀྱི་སྤོ་བོ་ནི་སྔགས་རྒན་བརྗིད་པོ་ཟེར་བ་ཡིན་ཡ། མི་ལ་གུས་ཤིང་སྐྲག་པའི་སྣང་བ་དུས་གཅིག་ཏུ་སྦྱིན་པར་བྱེད་ཟེར། ཨ་ཕས་བཤད་ཀྱང་བདག་གི་སྤོ་བོ་ནི་གཟུགས་བོང་ཆེ་ཞིང་ཕྲག་ཞེང་ཡངས་ལ། སྤྱན་དཀྱུས་རིང་ཞིང་སྣ་བོ་ཤིན་ཏུ་ཆེ་བ་དང་། ལྷག་ཏུ་མགོ་ཡི་རལ་བ་སྦོམ་པོ་དེ་ལ་བལྟས་མ་ཉིད་ནས་གདོད་མའི་གྱད་མི་ཞིག་དང་དབྱེར་མ་མཆིས་ཟེར། དེ་ནི་བདེན་པ་བདེན་རྐྱང་ཡིན་པ་གོར་མ་ཆག་སྟེ། ཕ་རྒན་གྱིས་ཞིབ་བརྗོད་བྱས་པའི་སྤོ་བོའི་སྣང་བརྙན་དེ་ལ་འུད་བརྗོད་དང་སྒྲོ་འདོགས་ཀྱི་ཆ་ཅི་ཡང་ཡོད་མི་སྲིད། རྒྱུ་མཚན་ནི་ངའི་ཕ་རྒན་ཀུན་བཟང་གིས་ཁོའི་ཕ་རྒན་མཐོ་རིས་པོ་སྟེ་ངའི་སྤོ་བོའི་གཟུགས་བྱད་རྒྱུན་འཛིན་བྱས་ཡོད་དེ། གཟུགས་བོང་ཆེ་ཞིང་ཕྲག་ཞེང་ཡངས་ལ། སྤྱན་དཀྱུས་རིང་ཞིང་སྣ་བོ་ཤིན་ཏུ་ཆེ་བ་དང་། མགོ་ཡི་རལ་བ་སྦོམ་པོ་བཅས་ཀྱི་སྟེང་ནས་སྤོ་བོའི་སྣང་བརྙན་ཇི་བཞིན་དུ་རྟོག་བཟོ་བྱ་ཐུབ། ཡིན་ནའང་ངས་ཤེས་འདོད་ཀྱང་ཤེས་ཐབས་བྲལ་བ་ནི་སྤོ་བོས་ཅིའི་ཕྱིར་རང་ཤི་བརྒྱབ་པ་དེ་རེད། 

སྤོ་བོས་ཅིའི་ཕྱིར་རང་ཤི་བརྒྱབ་པ་ཡིན་ནམ། 

སྤོ་བོའི་རང་ཤི་བརྒྱབ་པར་བཤད་ཚུལ་མི་འདྲ་བ་ཁ་ཤས་ཡོད་དེ། སྤོ་བོ་དང་གྲུབ་མཐའི་ཕྱོགས་རིས་ཀྱི་དབང་གིས་ཞེ་འགྲས་སུ་སོང་ཡོད་པའི་དགེ་བོ་ལོ་ལོན་དེས་བཤད་ན། སྤོ་བོས་སེར་འགོག་གི་རིང་ལ་ལྷ་ཀླུ་གཉན་གསུམ་གྱི་ཐུགས་སེམས་མང་དུ་དཀྲུགས་པས། ལྷ་ཀླུ་གཉན་གསུམ་མ་རངས་པར་སྤོ་བོའི་སྲོག་ཕྲོགས་པ་རེད་ཟེར། ཡང་སྤོ་བོ་དང་ན་ཚོད་མཉམ་པའི་སྔགས་རྒན་རིག་འཛིན་གྱིས་བཤད་ན། སྤོ་བོས་སེར་འགོག་གི་རིང་ལ་ཕྱོགས་ལ་ལུང་གི་དཀོར་ཟས་དཀོར་ཆུ་འཐུང་དྲགས་པས་རྣམ་སྨིན་འཁོར་བ་རེད་ཟེར། སྔ་མ་ནི་གྲུབ་མཐའི་དབང་གིས་ཡིན་ཟེར་ན། ཕྱི་མ་ནི་ཕྲག་དོག་གི་སྐད་ཆ་ཁོ་ན་རེད་ཅེས་ཁ་ཚོན་བཅད་ཆོག་མོད། འོན་ཀྱང་། སྤོ་བོས་རང་ཤི་རྒྱག་དགོས་པའི་རྒྱུ་མཚན་ནི་བདག་གི་ཕ་རྒན་ལ་ཡང་གསལ་བོ་ཞིག་འཆད་རྒྱུ་མི་འདུག 

ཨ་ཕ་ནི་སེམས་ཀྱི་འགྱུ་བ་གདོང་ལ་མངོན་མཁས་པའི་མི་དེའི་རིགས་མིན་ནའང་།ཨ་ཕའི་གདོང་ལ་སྐྱོ་ཉམས་ཤིག་དོད་ཅིང་། སྔོན་ལ་དངན་པ་གཅིག་འཐེན་གཉིས་འཐེན་བྱེད་ཅིང་།  དེ་ནས་གདོང་ལ་སྐྱོ་ཉམས་རབ་རིབ་ཅིག་འཁོར་ཞིང་། བདག་གི་མགོ་ལ་རེག་རེག་བྱེད་ཞོར། མུན་ནག་གི་ལོ་ཟླ་དེའི་ནང་དུ་ཁྱོད་ཀྱི་སྤོ་བོས་མགོ་ལ་ཡོང་ཡོང་ཞིག་གཞན་གྱི་མགོ་ལ་ཡོང་མེད་ཟེར།  སྤོ་བོར་ཤོག་བུའི་ཞྭ་མོ་བསྐོན་ཞིང་མི་ཚོགས་ཀྱི་སྔུན་ནས་ཡར་འདེད་མར་འདེད་བྱས་པ་མ་ཟད། སྤོ་བོར་བླ་མའི་ཚུལ་དུ་བཀུར་ཞིང་ཐོད་པ་གཏུག་མྱོང་བའི་ཧུར་ཐག་པ་མང་པོས་མཆིལ་ཞགས་འཕངས་ཤིང་རྡོག་ཐོས་གཞུས་པ་ཡང་བགྲངས་ཀྱིས་མི་ལངས་ཟེར།  

ང་རང་ནར་སོན་རྗེས། ཨ་ཕས་རྒྱུན་དུ་གླེང་བའི་མུན་ནག་གི་ལོ་ཟླ་ཟེར་བ་ནི།།མི་རྣམས་ཀྱི་སེམས་ལ་འཇིགས་པ་དང་རྨ་ཁ་ཟབ་མོ་བརྐོས་མྱོང་བའི་རིག་གསར་ལ་སྟོན་པ་ཤེས།ཨ་ཕས་གསལ་བོར་མ་བཤད་ཀྱང་། ཁོང་གི་སྐད་ཆའི་ཤུགས་སུ་སྤོ་བོའི་ཤི་རྐྱེན་ནི་མུན་ནག་གི་ལོ་ཟླ་དེ་དང་འབྲེལ་བ་ཡོད་པའི་དོན་ཞིག་བསྐུངས་འདུག ངས་ཨ་ཕར་ཅི་ཡང་མ་བཤད་མོད། འོན་ཀྱང་བསམ་ཚུལ་དེ་ལ་ང་ཡང་མི་འཐད། སྤོ་བོའི་འདས་རྐྱེན་ནི་སྐྱི་གཡའ་བའི་དོན་རྐྱེན་དེ་དག་དང་འབྲེལ་བ་ཡོད་དམ། རླུང་བཞིན་ལྡང་ཞིང་མེ་བཞིན་འབར་བའི་ལོ་ཟླ་དེའི་ནང་དུའང་སྤོ་བོར་དྲན་ཚུལ་དེ་འདྲ་མ་སྐྱེས་པར། མགོ་ལ་ལྷུང་བ་ཡོད་ཚད་ཕྲག་ལ་བླངས་ཤིང་དཀའ་སྡུག་མཐའ་དག་གདོང་གིས་བསུས་པ་མ་ཟད། ཁོང་གིས་ད་དུང་མགོ་ལ་ཡོང་དགོས་པ་དག་ཅིས་ཀྱང་ཡོང་དགོས་པ་རེད། དེ་ལ་གཞའ་ས་སྦས་ས་མེད། ཡང་གཅིག་བཤད་ན་དེ་ནི་ལས་ཀྱི་བཀོད་སྒྲིག་ཡིན་པ་རེད་ཟེར།   དེ་བས། སྤོ་བོའི་གབ་ཚིག་ལྟ་བུའི་འདས་རྐྱེན་ནི་དུས་ཡུན་རིང་བོ་ཞིག་ལ་གྲོ་ཞིང་ཁ་དང་ཐ་ན་ལུང་་དེའི་མི་རྣམས་ཀྱི་གླེང་གཞིར་གྱུར་མྱོང་། 

 

    

ཆུང་དུས་སུ། ཨ་ཕས་སྤོ་བོ་གླེང་ཡོང་དུས་ང་སྤོ་བོའི་སྟེང་དུ་སྦྱོར་ཅིང་། གླེང་ཡོང་དུས་སྤོ་བོངའི་སྟེང་དུ་སྦྱོར་བའི་བྱེད་སྟངས་དེར་གཏན་ནས་གོ་བ་ལེན་མ་ཐུབ། ཨ་ཕས་ངའི་གདོང་གི་མངལ་རྟགས་གོར་གོར་དེ་བསྟན་ནས་ཁྱོད་ཀྱི་གདོང་གི་རྨ་ཤུལ་འདི་ཚེ་འབུམ་ཁ་ཆེ་ཡིས་བཏོད་པ་རེད་ཟེར་དུས། ངས་ཅི་ཡིན་ཧ་མ་གོ་བར། ཚེ་འབུམ་ཁ་ཆེ་ཟེར་བ་སུ་རེད། ཁོས་ཅིའི་ཕྱིར་ངའི་གདོང་དུ་རྨ་ཁ་བཏོད་པ་རེད་ཅེས་འདྲི་དུས། ཁོང་གིས་ད་གཟོད་ཅི་ཞིག་རྟོགས་སོང་བ་ལྟར། མ་རེད། ཁྱོད་ཟེར་བ་མིན། ཚེ་འབུམ་ཁ་ཆེ་ནི་དེ་དུས་ཀྱི་ཧུར་ཐག་པ་ཞིག་ཡིན། ཁོས་ཁྱོད་ཀྱི་སྤོ་བོའི་གདོང་ལ་རྟ་ལྕག་གིས་བྲབས་པ་རེད་ཟེར། ཨ་ཕའི་སྐད་ཆ་དེ་བཤད་དུས། གདོང་གི་ཆ་ཤས་གང་ཞིག་གློག་གིས་བརྒྱབ་པ་ལྟར་འདར་ཙམ་འདར་ཙམ་བྱེད་ལ། ལག་ཟུང་སྙིང་གར་སྦྱར་ནས་དཀོན་མཆོག་གསུམ་པོས་མཁྱེན་ཟེར་བཞིན་གསོལ་བ་དྲག་ཏུ་འདེབས་པར་བྱེད།   

ང་ནི་རྨི་ལམ་མང་བའི་མི་ཞིག་སྟེ། ནམ་རྒྱུན་མཚན་གྱི་སྨག་རུམ་གྱིས་འཇིག་རྟེན་གཡོགས་ཤིང་། གཉིད་ཀྱི་ལག་པས་ང་ལ་གཡབ་མོ་བྱེད་ཐེངས་རེར། མི་རྒན་རྟ་དཀར་པོར་བཅིབས་པ་ཞིག་རྩྭ་ཐང་ཡངས་པོའི་ཕང་བ་རུ་གློག་ཞགས་བཞིན་འཁྱུག་ཅིང་། དེ་ནས་ང་ལ་ཕྱོགས་ཏེ་ཀི་རིང་ཞིག་འདེབས་བཞིན་བང་གིས་བརྒྱུགས་འོངས། མི་རྒན་དེ་ཏག་ཏག་ངའི་དྲན་པར་རབ་རིབ་ཅིག་ཉར་ཡོད་པའི་སྤོ་བོའི་སྣང་བརྙན་དང་ཀུན་ནས་མཚུངས།མི་རྒན་དེས་རྟ་ཐོག་ནས་ཐང་ལ་བབས་ཤིང་། ང་ལ་ཕྱོགས་ནས་འཛུམ་ཙམ་བྱེད་པ་དང། དེ་ནས་ངའི་ལག་ཏུ་རྩམ་པ་འཆིང་བུ་ཞིག་བཞག་རྗེས་སླར་ཡང་གློག་ཞགས་བཞིན་སྐད་ཅིག་གི་རིང་ལ་ཡལ་འགྲོ། མི་ལོ་མང་པོ་ཞིག་ལ་ངས་རྨི་ལམ་དེ་བསྟུད་མུར་ཐེངས་མང་རྨིས་མྱོང་ཞིང་། མཚམས་རེར་ངས་རྨི་ལམ་དེ་རྨི་ལམ་ཞིག་ཡིན་པའང་བརྗེད་དེ་རྨི་ལམ་གྱི་ཁྲོད་ནས་དགའ་སྟེ་བགད་ནས་སད་འོངས། ཡི་མུག་པའི་ཚོར་བ་མཐའ་དག་ནི་རྨི་ལམ་ལས་སད་རྗེས་བྱུང་བ་འབའ་ཞིག་སྟེ། ང་རང་རྔ་མ་མེད་པའི་རྨི་ལམ་དེར་འཁྲེང་ནས་སེམས་པ་སྐྱོ་ངལ་གྱི་གཡང་དུ་ལྷུང་བ་ཐེངས་གཅིག་མིན། དེ་དུས་ངས་མུ་མཐུད་དུ་མིག་ཟུང་བཙན་གྱིས་བཙུམ་སྟེ་རྨི་ལམ་དེའི་མཇུག་སྐྱོང་འདོད་ཀྱི་འདོད་ཧམ་བཅངས་ནའང་། ནམ་ཡང་རྨི་ལམ་དེའི་མཇུག་ནི་ལྷ་འདྲེ་སུ་ཞིག་གིས་བསམ་གཟས་ནས་དུམ་སེ་བཅད་པ་ལྟར་ངའི་རྨི་ལམ་གྱི་ཞིང་དུ་མངོན་རྒྱུ་མ་བྱུང་། 

ཆུང་ངུའི་དུས་ཀྱི་དྲན་པ་དག་ནི་རྡོ་ལ་རི་མོ་བརྐོས་པ་བཞིན་བསུབ་མེད་སྒྲིལ་བྲལ་དུ་ངའི་སྣང་ངོར་གསལ་ལེར་ཤར་འོངས།  སྡེ་དཀྱིལ་གྱི་མ་ཎི་ཁང་དེ་ནི་ལྐོག་གྱུར་གྱི་གསང་གནས་ཞིག་དང་འདྲ་བར་འགུགས་ཤུགས་ཆེས་ཆེར་ལྡན་པ་ཞིག་ཡིན།  རྨོ་མོས་ང་ཁོའི་རྗེས་ལ་ཁྲིད་དེ་ལྐོག་གྱུར་གྱི་གསང་གནས་གང་དེར་བགྲོད་དུས། ལྷ་ཚོགས་ཀྱི་ཞལ་བཞིན་དག་ནི་སྔོན་ནས་འདྲིས་པ་བཞིན་ང་ལ་རྒྱུས་མེད་ཀྱི་སྣང་བ་ཅི་ཡང་མ་བྱིན། ཐ་ན་ངས་མ་ཎི་ཁང་གི་རྩིགས་ལྡེབས་སུ་དཔྱངས་ཡོད་པའི་རྔ་ཀོར་ཏེ་པང་པང་དུ་རྡུང་དུས་ཀྱང་། རྨོ་མོས་མིག་ནས་མཆི་མ་ཉིལ་ལེར་སྐལ་བཟང་ཞེས་སྤོ་བོའི་མིང་ངམ་ཡང་ན་ངའི་མིང་ནས་ང་ལ་འབོད་པ་ལས་བཀག་འགོག་ཅི་ཡང་མི་བྱེད། རྡོ་རྗེ་གོ་ཁར་ལྷུང་ན་བུ་ཆུང་གི་རྩེ་སྤྱད་ཟེར་བ་ལྟར། སྤྱིར་ན་ཆོས་སྤྱོད་ཡོ་བྱད་དག་ནི་བྱིས་པས་རྩེད་ཆས་སུ་གཏན་ནས་མི་རུང་སྟེ། དེ་དག་ནུ་བོའམ་སྲིང་མོའི་ལག་ཏུ་ཤོར་ཚེ། རྨོ་མོས་འཕྲལ་དུ་ལག་ནས་ཕྲོགས་ཏེ་བཀག་འགོག་བྱེད་སྲིད་པ་ཁོ་ཐག་ཡིན། ཡིན་ནའང་ངས་དྲིལ་བུ་དང་སྦུབས་ཆ་ཡང་ན་རྡོ་རྗེ་གང་རུང་ལག་ཏུ་བཟུང་ནས་སིང་སིང་དུ་དཀྲོལ་བའམ་ཆ་ཆ་ཞེས་བརྡུངས་ནའང་། རྨོ་མོས་མིག་ཧྲིག་གེར་ང་ལ་ལྟ་བ་ལས་སྡང་སྡིགས་ཅི་ཡང་བསྟན་མ་མྱོང་། དེ་ལ་སྲིང་མོ་དང་ནུ་བོ་གཉིས་ཀས་རྨོ་མོར་དུས་ཡུན་རིང་བོ་ཞིག་ལ་བསམ་འཆར་བཤད་ཀྱིན་འདུག  ཡང་གཅིག་བཤད་ན། སྲིང་མོ་དང་ནུ་བོ་གཉིས་ཀ་མཚམས་རེར་བ་རྫིའམ་ར་རྫིར་འགྲོ་དགོས་མོད། འོན་ཀྱང་ངའི་ཆུང་དུས་ཀྱི་ལོ་ཟླ་རྨོ་མོ་དང་འགྲོགས་ནས་མ་ཎི་ཁང་གི་ཁྱམས་རར་ཡོད་པའི་མ་ཎི་འཁོར་ཆེན་དེ་ཉིན་དང་ཉིན་བསྟུད་ནས་བསྐོར་བ་ཡིན། 

ང་ཚོའི་སྡེ་བའི་རྩིབས་ལོགས་སུ་སྡོང་ར་ཆེན་པོ་ཞིག་ཡོད། སྡོང་ར་ནི་རྗེས་ཀྱི་འབོད་སྟངས་རེད། ཨ་ཕས་བཤད་པའི་མུན་ནག་གི་ལོ་ཟླ་དེའི་ནང་སྡོང་ར་དེ་ད་དུང་སྡོང་ར་ཞིག་མིན། དེ་ནི་གཞི་ཁྱོན་ཅུང་ཆེ་བའི་ཕག་གསོ་ར་བ་ཞིག་ཡིན། རྗེས་སུ་ས་ཞིང་སྒེར་ལ་བགོས་རྗེས་སྡོང་ཕྲུག་མང་པོ་བཙུགས་ཤིང་ཁྱིམ་ཚང་རེ་རེར་བགོས་ཏེ་ད་ལྟའི་སྡོང་ར་དེར་བསྒྱུར་པ་རེད། སྤོ་བོ་དེ་སྔ་ཕག་ར་དེའི་ཕག་གསོ་མཁན་བྱས་མྱོང་བས། སྡེ་མི་ཚོས་སྤོ་བོར་ཕག་དཔོན་ཞེས་པའི་ཟུར་ཟའི་མིང་ཞིག་ཀྱང་བཏགས་མྱོང་བ་རེད། དེ་ནི་རྨོ་མོས་ང་ལ་བཤད་པའི་གཏམ་རྒྱུད་ཅིག་སྟེ། ཟ་མ་དཀའ་ཞིང་མུ་གེ་རྒྱུན་ཆད་མེད་པའི་ལོ་དེ་དག་གི་རིང་ལ། ཟ་མའི་ཡན་ན་རིན་པོ་ཆེ་ཞིག་ཡོད་མི་སྲིད། ཕག་ཤ་འགྲངས་ཐག་ཆོད་པ་ཞིག་ཟོས་པའི་གཏམ་རྒྱུད་དེ་ནི་ད་དུང་ཡང་སེམས་ཀྱི་གཏིང་ཞིག་ཏུ་ཀྲིག་ཀྲིག་ཏུ་འགུལ་བཞིན་འདུག་ཟེར། སྤོ་བོ་ནི་བལྟས་ན་གྱད་མི་ཞིག་དང་མཚུངས་ཀྱང་། སྲོག་གཅོད་པའི་ཐད་དུ་བྱིའུ་ཞིག་གསོད་པར་ཡང་སྙིང་རྩ་འདར་བའི་མི་ཞིག་ཡིན། ལོ་རབས་དེའི་ནང་དུ་བྱིའུ་བསད་དེ་བསྲེགས་ནས་ཟ་མཁན་ཡང་མང་པོ་ཡོད། ཡིན་ནའང་ཁྱེད་ཀྱི་སྤོ་བོས་དེ་ཙམ་ཡང་མི་ནུས། མཚན་མོ་དེར་སྤོ་བོ་འཇབ་ཀྱིན་འཇབ་ཀྱིན་ཁྱིམ་ལ་བསླེབས་དུས།  ནམ་གུང་སྔར་ནས་ཡོལ་འདུག་ཅིང་ནམ་ལངས་པར་དུས་ཡུན་རིང་བོ་མེད།   ཁོའི་ལག་ཏུ་དཀར་རྡོག་སེ་འདུག་པའི་དངོས་པོ་ཞིག་བཟུང་འདུག་ཅིང་། ཟླ་འོད་ཤིན་ཏུ་གསལ་བས་དཀར་རྡོག་སེ་འདུག་པའི་དངོས་པོ་དེ་ནི་མིག་ལམ་དུ་འོད་ཀྲིག་ཀྲིག་བྱེད་ཟེར། རྨོ་མོས་དེ་ལྟར་བཤད་དུས། གདོང་ལ་དགའ་སྐྱོ་ཟུང་འབྲེལ་གྱི་རྣམ་པ་ཞིག་ཀུན་ནས་ཤར་འདུག  རྨོ་མོས་སྤོ་བོར་ཁྱེད་ཀྱི་ལག་གི་དེ་ཅི་ཡིན་ཞེས་འདྲི་དུས། སྤོ་བོས་སྐད་མགོ་ཧ་ཅང་དམའ་མོས་ངང་འདི་ཕག་ཤ་ཡིན། ངས་ཕག་ཕྲུག་ཅིག་བསད་པ་ཡིན་ཟེར། སྤོ་བོས་སྐད་ཆ་དེ་བཤད་དུས་ཁོང་གི་སྐད་མངོན་གསལ་གྱིས་འདར་གྱིན་འདུག་ཟེར། གཏམ་དེ་ནི་འགད་རྫས་ཤིག་དང་འདྲ་བར་ཟླ་འོད་ཀྱི་བཀྲགས་མདངས་བརྒྱུད་དེ་རྨོ་མོའི་རྣ་ལམ་དུ་ལྷུང་དུས། མོ་ནི་སྐྲག་ཅིང་དངངས་ཏེ་ཏབ་ཅིག་ལ་ཁ་ཤ་འགུལ་ཙམ་འགུལ་ཙམ་བྱེད་པ་ལས་ཁ་ནས་ཚིག་གཅིག་ཀྱང་སྒོར་འབྱིན་མ་ཐུབ་ཟེར། རྨོ་མོས་རང་ཁྱིམ་གྱི་གྲུ་ག་སོ་སོར་བསམ་བཞིན་དང་བསམ་བཞིན་མ་ཡིན་པར་མིག་ཉུལ་ཞིག་བྱས་རྗེས། མྱུར་དུ་ཁྱིམ་ལ་འཛུལ་རོགས་ཞེས་སྤོ་བོར་བསྐུལ་བ་ན་ཐོ་ཡོར་བཞིན་འགྲེངས་པའི་སྤོ་བོའང་གློ་བུར་སད་པ་བཞིན་ཡང་ཡང་རང་གི་རྗེས་ལ་ཕྱི་མིག་སློག་བཞིན་ཁྱིམ་དུ་འཛུལ། མཚན་མོ་དེའི་ཟླ་འོད་ནི་དུས་རྒྱུན་ལས་ཀྱང་གསལ་གྱི་ལེར་འཕྲོས་ཡོད་པས། སྤོ་བོ་དང་རྨོ་མོ་གཉིས་ཀྱིས་མཚན་མོ་དེའི་ནམ་མཁའ་ནས་སྤྲིན་ནག་གིས་གར་སྟབས་ལང་ལོང་བསྒྱུར་པར་རེ་སྒུག་གི་མིག་ཟུང་ཆེས་ཆེར་བགྲད་ཀྱང་། ནམ་མཁའི་མདངས་ནི་ཇེ་གསལ་ནས་ཇེ་གསལ་དུ་གྱུར་ཏེ་མཐའ་མར་ནམ་ལངས་སོང་ཟེར། སྤོ་བོར་སྤྲིན་ནག་གི་འདུ་འགོད་དཀྲུགས་པའི་འཇོན་ཐང་ལྡན་ནའང་། སྤོ་བོར་སྤྲིན་ནག་གི་འདུ་འགོད་མཁའ་ལ་བསུ་བའི་ནུས་པ་རྩ་ནས་མི་འདུག་ཅེས་རྨོ་མོས་འཁང་ར་ལྟ་བུ་ཞིག་བྱས་སོང་།  རྨོ་མོས་ཟླ་འོད་གསལ་བའི་མཚན་མོར་ཐབ་ཁུང་དུ་མེ་བུས་ཚེ། དུ་ཁུང་ལས་དུ་བ་རྨུ་ཐག་བཞིན་མཁའ་ལ་འཐེན་སྲིད་ཅིང། མཚན་མོའི་གྲུ་ག་སོ་སོར་འུག་པ་བཞིན་མིག་ཟུང་ཧྲིག་གེར་སྡོད་པའི་ཧུར་ཐག་པ་མང་པོ་ཡོད། མཚན་མོར་མེ་འབུད་པ་ནི་དགྲ་བོར་གཡབ་མོ་བྱེད་པ་དང་འདྲ་ཟེར། མཐའ་མར་ཐབས་ཟད་དེ་སྤོ་བོས་ཕག་ཕྲུག་ཆུང་ཆུང་དེའི་ཤ་ལབ་དོང་གི་གཏིང་དུ་མི་སྦས་ག་མེད་བྱུང་། 

ཕྱི་ཉིན་གྱི་དོན་དག་ནི་བདག་གི་གདོང་ལ་བབས་པའི་མངལ་རྟགས་གོར་གོར་དེ་དང་འབྲེལ་བ་ཡོད་པ་རེད།  ཧུར་ཐག་པ་ཚེ་འབུམ་ཁ་ཆེ་ཡིས་རྟ་ལྕག་གིས་སྤོ་བོའི་གདོང་ལ་འབྲབ་བཞིན། ཕག་ཕྲུག་ཅིག་གློ་བུར་བོར་སོང་ཟེར་ན་སུ་རྣར་འགྲོ། གཤོག་པ་ཡོད་ན་མཁའ་ལ་འཕུར་སོང་ཟེར། སྡེར་མོ་ཡོད་ན་ས་ལ་འཛུལ་སོང་ཟེར་ཞེས་ཁ་རྒྱ་སྒོ་ལྟ་བུའི་ནང་ནས་ཚིག་མདའ་མོ་བཞིན་འཕེན་གྱིན། རྟ་ལྕག་གིས་ཡང་བསྐྱར་སྤོ་བོའི་གདོང་ལ་ཤུགས་ཀྱིས་འབྲབ་དུས། སྤོ་བོས་ན་ཟུག་བཟོད་ཅི་ཐུབ་ཀྱིས་མི་ངན་ཚེ་འབུམ་ལ་ཞུ་འབོད་ཀྱི་ཚིག་གཅིག་ཀྱང་མ་བཤད། སྤོ་བོའི་ཨམ་གཙིགས་བསྡམས་ཏེ་ཁ་ནས་ཡང་ཡང་བསྐྱར་ཟློས་ཀྱིས་ཚིག་གཉིས་བཤད་པ་ནི། ངས་མི་ཤེས། ངས་ངོ་མ་མི་ཤེས་ཞེས་པ་གཉིས་ཡིན་ཟེར། 

ཁྱོད་ཀྱིས་མི་ཤེས་སམ།

མི་ཤེས།

ཁྱོད་ཀྱིས་ངོ་མ་མི་ཤེས་སམ།

ངས་ངོ་མ་མི་ཤེས།

ཚེ་འབུམ་ཁ་ཆེ་ཡིས་སྤོ་བོའི་གདོང་ལ་རྟ་ལྕག་གིས་ཚ་བེར་བེར་ཞིག་བྲབས་པ་དེས། སྤོ་བོའི་གདོང་གི་ཤ་སྐྱི་གཉིས་ཀ་འདར་ཙམ་བྱས་ཤིང་། དེ་ནས་གདོང་དུ་ཁྲག་གི་ལྟེང་ཀ་ཆུང་ཆུང་ཞིག་དལ་བུར་འཛུམ་བྱུང་།  སྤོ་བོའི་ན་ཟུག་གིས་གཙེས་པའི་གདོང་ནི་རྩ་འཐེན་བྱུང་བ་ལྟར་འགུལ་ཙམ་འགུལ་ཙམ་བྱས་བྱུང་། ཚེ་འབུམ་ཁ་ཆེ་མི་མང་གི་སྔུན་ནས་ཕར་འགྲོ་ཚུར་འགྲོ་ལན་འགའ་བྱས་རྗེས་སླར་ཡང་སྤོ་བོའི་མདུན་དུ་ཡོང་སྟེ། སྤོ་བོའི་ཁྲག་གིས་སྦགས་པའི་གདོང་ལ་མཛུབ་མོ་ཀེར་ཏེ་ངས་ཁྱོད་ལ་མཐའ་མཇུག་གི་དྲི་བ་ཞིག་འདྲི་ཟེར་མོད། དོན་དུ་དྲི་བ་ལྷག་མ་ཅི་ཡང་མ་བཏོན། ཡང་བསྐྱར་གོང་གི་དྲི་བ་དེ་གཉིས་བསྐྱར་ཟློས་ཤིག་བྱས།

ཁྱོད་ཀྱིས་མི་ཤེས་སམ།

མི་ཤེས།

ཁྱོད་ཀྱིས་ངོ་མ་མི་ཤེས་སམ།

ངས་ངོ་མ་མི་ཤེས།

སྤོ་བོའི་ཚིག་དེ་གཉིས་ཀྱིས་ཚེ་འབུམ་ཁ་ཆེའི་ཐབས་བཀོད་བརྒྱ་དང་བརྒྱད་པོ་གཡང་དུ་བརྫངས་ཞིང་། སྤོ་བོའི་ཚིག་དེ་གཉིས་ཀྱིས་ངེད་ཚང་གི་བཟའ་མི་གང་བོས་ཕག་ཤ་རྒྱགས་ཆད་པ་ཞིག་ཟོས་པ་དང་། སྣུམ་གྱིས་བཏང་བའི་ཕོ་བ་དང་རྒྱུ་མ་རྣམས་ཡང་བསྐྱར་སྣུམ་ཤིག་གེར་བཏང་བ་རེད། ཚེ་འབུམ་ཁ་ཆེ་མཇུག་མཐར་ཅི་བྱ་གཏོལ་མེད་དུ་གྱུར་ཏེ། ད་ནས་བཟུང་ཁྱོད་ཕག་གསོ་ར་བར་གཏན་ནས་སོང་མི་ཆོག་ཟེར། བྱ་བ་དེ་ཡང་རྗེས་སུ་དེ་ལྟར་མཚམས་བསྐྱུར་སོང་། 

ཆུང་དུས་སུ། ང་རང་སྡེ་བའི་རྩིབས་ལོགས་ཀྱི་སྡོང་ར་དེར་སོང་བ་རྨོ་མོས་ཤེས་རྗེས། སྐལ་བཟང་། སྡོང་རའི་ནང་དུ་འགྲོ་མི་ཉན། ས་དེ་ནི་གཏན་ནས་མི་གཙང། དེ་རུ་དོན་དག་ཡ་མཚན་ཅི་འདྲ་མང་པོ་ཞིག་བྱུང་ཡོད་པ་ཁྱོད་ཀྱིས་ག་ལ་ཤེས་ཟེར། རྨོ་མོས་དེ་ལྟར་བཤད་པ་དེས་ང་རང་ལྷག་ཏུ་སྡོང་རའི་ནང་འགྲོ་འདོད་ཀྱི་འདུན་པ་ཞིག་འགོག་མེད་དུ་སྐྱེས་སུ་བཅུག 

  དེ་ནི་རྨི་ལམ་ཞིག་ཅིས་ཀྱང་ཡིན་མི་སྲིད། 

ཀུན་ལ་བཤད་ཚེ་རྣར་མི་འགྲོ་བ་ལྟ་བུ་ཞིག་ཡིན་མོད། ཐེངས་ཤིག་ང་རང་དངོས་སུ་དོན་དག་ཡ་མཚན་ཞིག་ལ་འཕྲད་བྱུང་། ངའི་སྣང་ངོར་མི་ཆེན་རྟ་རྒན་འདྲ་བ་ཞིག་གིས་ཕག་ཕྲུག་འགའ་དེད་ནས་སྡོང་རའི་ནང་ཕར་འགྲོ་ཚུར་འགྲོ་བྱེད་པའི་སྣང་བརྙན་ཞིག་འཁོར་ཡོང་། ངས་ཀྱང་རྟོག་བཟོའི་ཚུལ་དུ་ཕག་པ་འགའ་མིག་ལམ་དུ་མངོན་པར་བྱས་པ་ན། སྡོང་རའི་ནང་ཕར་འགྲོ་ཚུར་འགྲོ་བྱེད་པའི་མི་ཆེན་དེ་དང་ངེད་གཉིས་ངོ་བོ་གཅིག་ཏུ་འདྲེས་ཤིང་། རྟོག་བཟོ་ནི་དེ་མ་ཉིད་དུ་མངོན་སུམ་དུ་གྱུར་ཅིང་། མངོན་སུམ་གྱི་བྱུང་བ་མཐའ་དག་ངའི་མིག་ལམ་དུ་ཤར་བྱུང་། 

……

ཟླ་འོད་རབ་ཏུ་འཚེར་བའི་མཚན་མོ་དེར་ཕག་ཕྲུག་དེ་བསད་པའི་རྣམ་པ་དག་ཀྱང་ཁ་སང་བྱུང་བ་བཞིན་ཡིད་ངོགས་ནས་མིག་ལམ་དུ་འཕོས་འོངས་ཏེ། ཕག་རའི་ནང་གི་མི་རྣམས་རང་ཡུལ་དུ་ལོག་ཤུལ་དུ། ཕག་ར་ནི་སྟོང་ཞིང་འཇགས་པས་ངས་སྒྲོལ་མ་ཚར་འགའ་ཁོག་འདོན་བྱེད་ཀྱིན་ཕག་རའི་ནང་དུ་ཡར་ལྟ་མར་ལྟ་བྱས་ནས་སྡོད་དུས། གློ་བུར་ཕག་ཕྲུག་ཅིག་ཙིར་ཙིར་དུ་ངུས་བྱུང་། ཕག་ཕྲུག་ཙིར་ཙིར་དུ་ངུས་པ་དེས་ང་ལ་འཚབ་སྣང་འགོག་མེད་ཅིག་སྦྱིན་པར་བྱེད། ངས་ཅི་ཡིན་འདི་ཡིན་སྙམ་ནས་མདུན་དུ་ཕྱིན་དུས། ཕག་ཕྲུག་དེས་ཡང་བསྐྱར་ང་ལ་བལྟས་ནས་ཙིར་ཙིར་དུ་ངུས་བྱུང་། འཚབ་སྣང་ནི་སྐད་ཅིག་ཉིད་ལ་སྡང་སེམས་དུ་གྱུར་དུས། ངས་ཐང་ནས་རྡོ་ཞིག་བླངས་ཏེ་ལག་ཏུ་བཅངས་འདུག  སྐབས་དེར་ང་ལ་དྲན་ཚུལ་དེ་འདྲ་ཞིག་ཇི་ལྟར་སྐྱེས་པ་བཤད་རྒྱུ་མེད་ཀྱང་། གང་ལྟར་ཕག་ཕྲུག་དེའི་མགོ་ལ་ལག་ཏུ་བཅངས་པའི་རྡོ་དེས་སྐག་སེ་བརྒྱབ་པ་ན། ཙིར་ཙིར་ངང་ང་ལ་འགྲན་སློང་བ་ལྟ་བུའི་ཕག་ཕྲུག་གི་ངུ་སྐད་ནི་སའི་གོ་ལ་རིལ་མོའི་སྒང་ནས་ཤུལ་མེད་རྗེས་མེད་དུ་གྱུར་སོང་། དེའི་ཚབ་ཏུ་རང་ཚུགས་མེད་པར་ཐང་ལ་འགྱེལ་བའི་ཕག་ཕྲུག་དེའི་བེམ་རོ་དང་། ངའི་ལྟིག་ལྟིག་ཏུ་ལྡིང་བར་བྱེད་པའི་སྙིང་གི་འཕར་ལྡིང་གཉིས་རེད། ལྷིང་འཇགས་ཀྱི་མཚན་མོ་དེར། ལྷིང་འཇགས་ཀྱི་ཁོང་ནས་སྨིན་པའི་འགྱོད་སྣང་དང་སྐྲག་སྣང་གཉིས། ངའི་སེམས་ཁོང་དུ་བང་གིས་རྒྱུག་པའི་རྟ་ཕོ་ཆ་ཞིག་དང་འདྲ་བར་སུ་མགྱོགས་འགྲན་པར་བྱེད་པས།  ང་ནི་ཡུན་རིང་བོ་ཞིག་ལ་གྲག་མེད་དུ་འཇིམ་སྐུ་བཞིན་འགུལ་བ་མེད་པར་ལུས། ང་རང་རང་ཉིད་ལས་ཐར་དུས་དུས་ཚོད་ཅི་ཙམ་འགོར་བ་སུས་ཤེས། གློ་བུར་གློ་བུར་བྱུང་བའི་དྲན་ཚུལ་དག་ནི་མཚམས་རེར་དེ་འདྲའི་བློ་གྲོས་དང་ལྡན་པ་ཞིག་སྟེ། ངས་ཕག་ཕྲུག་དེ་ཕག་ལྟོ་བཟོ་བར་གྲ་སྒྲིག་བྱས་པའི་ཆུ་རྒོད་སླ་ང་ཆེན་པོ་གང་ཡོད་པ་དེའི་ནང་དུ་སྦངས་ཤིང་། བདར་རྡོས་སྤུ་རྣམས་བདར་ཅིང་དྲད་དེ་གཙང་དག་ཏུ་བཀྲུས་ཚར་དུས་ནམ་ཕྱེད་ཡོལ་ཟིན……

རྗེས་ཀྱི་བྱ་བ་རྣམས་ནི་ང་ལ་དྲན་རྒྱུ་ཅི་ཡང་མི་འདུག དེ་ནི་ཉིན་གསུམ་འགོར་རྗེས་ཀྱི་མཚན་མོ་ཞིག་ཡིན་ཟེར། རྨོ་མོས་བཤད་པའི་ཕག་ཤ་ཟ་སྐབས་ཀྱི་དགའ་སྣང་དང་སྐྲག་སྣང་དག་ང་ལ་དྲན་རྒྱུ་མི་འདུག  རྨོ་མོས་བཤད་ན། ངས་བཟའ་མི་གང་བོར་ཕག་ཤ་བགོ་བཤའ་བརྒྱབ་རྗེས། ང་རང་ཁང་ཐོག་ཏུ་ཡིབས་ནས་སོ་ལྟ་བྱས་པ་རེད་ཟེར། རྨོ་མོས་ད་དུང་ལས་ལེགས་པ་ཞིག་ལ་མཚན་མོ་དེར་ཟླ་ནག་ཆུ་ནག་ཅིག་ཡིན་པས། དུ་ཁུང་ནས་འཕྱུར་བའི་དུ་བ་དང་མཚན་སྨག་གཉིས་གཞིག་གཅིག་ཏུ་འདྲེས་ཏེ་སོ་སོའི་དབྱེ་བ་གཏན་ནས་འབྱེད་དཀའ་ཟེར། གལ་ཏེ་དེ་ལྟར་མིན་ཚེ། རྗེས་ཀྱི་ཕག་ཤ་ཟོས་པའི་དོན་དག་ཀྱང་གླེང་ཐབས་ཡོད་མི་སྲིད། རྨོ་མོས་མུ་མཐུད་དུ་མོའི་ཕྲུ་གུ་དག་ནི་སྤྱང་ཕྲུག་ཅིག་སྤྱང་མའི་མཐའ་ལ་རུབ་པ་བཞིན་མོའི་མཐའ་ལ་རུབ་སྟེ། ཕག་ཤར་སོ་འདེབས་པའི་རྣམ་པ་དེ་ད་དུང་དྲན་ན་ཡིད་འགུལ་ཐེབས་པ་ཞིག་རེད་ཟེར། ཡིན་ནའང་ང་ལ་དེ་དག་དངོས་གནས་ཅི་ཡང་དྲན་རྒྱུ་མི་འདུག   

སྤོ་བོ་གྲོངས་པའི་ཕྱི་ལོ་སྟེ། ཡང་ན་ང་རང་འཇིག་རྟེན་མི་ཡུལ་དུ་ཡོང་བའི་ནམ་གུང་དེར་ཟླ་འོད་ཤིན་ཏུ་གསལ་བས།  ཨ་ཕས་དེ་ནི་རྟེན་འབྲེལ་ལེགས་པ་ཞིག་ཏུ་བརྩི་ནའང་། རྨོ་མོའི་སེམས་ཀྱི་གཏིང་རིམ་ཞིག་ཏུ་ཟླ་འོད་ནི་མི་ལ་སྐྲག་སློང་སྤྱད་ལྟ་བུ་ཞིག་ཏུ་ཆགས་ཚར་འདུག་པས།    ཟླ་འོད་ གསལ་བའི་མཚན་མོར་མོ་ལ་ཁྱིམ་གྱི་གྲུ་ག་སོ་སོར་མིག་ཉུལ་བྱེད་པའི་སྲོལ་ཞིག་རྒྱུན་འབྱམས་སུ་གྱུར་ཡོད་པར་བཤད།  མཚན་མོ་དེར་ང་འཇིག་རྟེན་མི་ཡུལ་དུ་ཐོག་མར་ཡོང་དུས་ཀྱང་། རྨོ་མོས་མཉམ་བཞག་མ་བཞག་གི་མཚམས་ནས་ཁྱིམ་གྱི་གྲུ་ཁ་སོ་སོར་མིག་ཉུལ་ཞིག་བྱས་སོང་ཟེར། དེ་ནི་ང་ལ་ཨ་ཕས་བཤད་པ་ཡིན། ཟླ་འོད་ལ་སྐྲག་སྣང་གི་སེམས་པ་འཛིན་པའི་རྨོ་མོས་ངས་གདོང་གི་མངལ་རྟགས་གོར་གོར་དེ་ལ་ཞིབ་ལྟ་ཞིག་རྗེས། རེད། འཆུག་མེད། འདི་ནི་སྐལ་བཟང་རེད། ཅེས་ངའི་སྤོ་བོ་མཐོ་རིས་པོའི་མིང་ནས་ང་ལ་ཐེངས་ཤིག་བོས་པས། ངས་ད་གཟོད་མི་ཡུལ་གྱི་ཆེས་ཐོག་མའི་ངུ་སྐད་དེ་ངེད་ཚང་གི་ཐབ་ཚང་རྙིང་པ་དེའི་ནང་ནས་བསྒྲགས་པ་རེད། ངུ་སྐད་དེ་ནི་ང་རང་འཇིག་རྟེན་མི་ཡུལ་དུ་ཡོང་བའི་མཚོན་རྟགས་ཀྱང་ཡིན་ནོ།། དེ་ནས་བཟུང་ང་དང་ངའི་སྐྱེས་པ་སྔོན་མ་གཉིས་ནི་མི་གཅིག་དང་མིང་གཅིག་གི་བདག་ཉིད་དུ་གྱུར་སོང་། རྗེས་སུ་ཨ་ཕས་རྨོ་མོ་ལ་ང་ཚོ་དགོན་པའི་བླ་མའི་མདུན་དུ་ཕྱིན་ནས་ང་ལ་མིང་ཞིག་སློང་བའི་གྲོས་མགོ་བཏོན་པ་ན། རྨོ་མོས་ཕྲུ་གུར་མིང་ཡོད་པ་མིན་ནམ་ཞེས་བཤད་ཞོར། མོའི་པང་དུ་ཡོད་པའི་ང་ལ་བལྟས་ནས་སྐལ་བཟང་སྐལ་བཟང་ཞེས་འབོད་པར་བྱེད་ཟེར། ཨ་ཕས་ད་དུང་ང་ལ། ཁོང་གིས་དུས་ཡུན་རིང་བོ་ཞིག་ལ་ཁོང་གི་ཕའི་མིང་ནས་ངའི་མིང་ལ་འབོད་པ་དེ་གང་ཞིག་ནས་མི་ནུས་པར་འདུག་པས། དེ་ལ་ཁོང་གིས་ངའི་མིང་ལ་སྐལ་བྷ་ཞེས་གཅེས་མིང་ཞིག་བཏགས་ཀྱང་། ང་གོམ་པ་སྤོ་ཤེས་པ་ཙམ་མམ་སྐད་ཆ་བཤད་ཤེས་པ་ཙམ་ནས་ང་ནི་སྐལ་བྷ་མིན། ང་ནི་སྐལ་བཟང་ཡིན་ཞེས་གལ་ཏེ་སུ་ཞིག་གིས་ང་ལ་སྐལ་བྷ་ཞེས་བོས་ཚེ་གཏན་ནས་ཨ་ལན་མི་སྟེར་ཟེར།

    རྨོ་མོ་འདས་པའི་ལོ་དེར་ང་རང་ཕོ་ལོ་བཅོ་བརྒྱད་ཡིན། ལོ་དེར་ང་རང་རྒྱང་རིང་ནང་ལོགས་ཀྱི་གྲོང་ཁྱེར་ཞིག་ཏུ་སློབ་ཆེན་འགྲིམ་བཞིན་ཡོད། ཨ་ཕས་མལ་ཁང་དུ་ཁ་པར་བཏང་ཡོང་ནས་ང་ལ་རྨོ་མོ་འདས་སོང་ཞེས་བརྡ་སྤྲོད་པའི་མཚན་མོ་དེར།  ང་ནི་གྲོགས་མོ་དང་མཉམ་དུ་སློབ་གྲྭའི་ར་སྐོར་ནང་འཆམ་འཆམ་དུ་ཕྱིན་ཅིང་། གྱེས་ཁར་ད་དུང་ཕན་ཚུན་དམ་པོར་བསྡམས་ཤིང་མཆུ་སྒྲོས་ལས་ཀ་ར་གཞིབས་པ་བཞིན་ཡུན་རིང་འཇིབ་འཇིབ་ནས་ཕྱིར་ལོག་མ་ཐག་ཡིན། ཨ་ཕས་ཁ་པར་བཏང་ཡོང་དུས། ངས་གསང་སྤྱོད་ཁང་དུ་ལུས་ཕུང་བཀྲུ་བཞིན་པའི་སྒང་ཡིན། ངས་ཀྱང་ཁ་པར་གྱི་སིང་སྒྲ་གསལ་བོར་ཐོས་བྱུང་། དེ་དུས་མལ་ཁང་གི་སྒོ་བརྒྱབ་མེད་པས། ཁ་པར་གྱི་སིང་སྒྲ་ནི་ཁྱམས་རིང་བརྒྱུད་ཅིང་བྲག་ཅ་དང་བཅས་ངའི་རྣ་ལམ་དུ་ལྷུང་ཡོང་། དེར་མཐུད་ནས་ང་དང་མལ་ཁང་གཅིག་ཡིན་པའི་མིག་དམར་གྱིས། སྐལ་བཟང་། སྐལ་བཟང་ཞེས་ངའི་མིང་ནས་བོས་བྱུང་།  ངས་ཁ་པར་གྱི་ཉན་ཆས་རྣ་རྩར་བླངས་པ་ན། ཨ་ཕས། རྨོ་མོ་དེ་རིང་ཕྱི་དྲོ་མ་བདེ་ཐལ། ཁྱེད་རང་འདས་མཆོད་བསྒྲུབ་པར་ཡོང་མི་དགོས། རྨོ་མོའི་རྗེས་སུ་མ་ཎི་ཚར་འགའ་ཐོན་དང་དེ་ལས་བཟང་བ་མེད་ཟེར་དུས་སྐད་ཆའི་གདངས་ལ་བབས་ཆགས་པའི་བཟོ་ལྟ་ཞིག་ཡོངས་སུ་མངོན་འདུག 

མི་ཡི་ཚེ་ཐག་ལྟར་ན། རྨོ་མོ་ནི་རབ་ཏུ་སྨིན་ཏེ་སིལ་ཏོག་བཞིན་ལྗོན་རྩེ་ནས་ལྟིག་སེ་སར་ལྷུང་བ་ལས། སུ་དང་གང་གིས་བཏོག་སྟེ་ལྷུང་བ་དང་གཏན་ནས་མི་འདྲ། རྨོ་མོ་ནི་ལོ་དེར་དགུང་ལོ་བརྒྱད་ཅུ་གྱ་དགུ་ལ་བསླེབས་ཟིན་པས། ད་ལོ་གཅིག་ལ་བསྡད་ན་དགུང་ལོ་དགུ་ཅུ་རེད། ང་ཚོའི་ཡུལ་ཕྱོགས་སུ་དགུང་ལོ་དེ་འདྲའི་མཐོན་པོར་བསྡད་པའི་མི་ཞིག་ད་སྔ་ཡན་ཆོད་དུ་བྱུང་མྱོང་བ་སུ་ལའང་ལབ་རྒྱུ་མེད།  མིའི་ཚེ་ཚད་ཀྱི་ངོས་ནས་བཤད་ཀྱང་། རྨོ་མོ་ཚེ་ཕྱི་མར་འགྲོ་རན་འདུག་པ་ནི་སྨོས་སུ་མེད་མོད། རྨོ་མོ་མ་བདེ་ཐལ་ཞེས་བཤད་དུས་ངས་རང་གི་སེམས་འགྱུར་ཚོད་འཛིན་བྱེད་ཐབས་བྲལ། ངའི་སེམས་པ་ནི་གློ་བུར་འཁྱགས་སིབ་སིབ་ཏུ་གྱུར་ཅིང་། མིག་ལས་མཆི་མ་ཤ་ར་ར་བབས་བྱུང་། ནང་སེམས་ཀྱི་ཅི་ཞིག་ཁ་པར་ནང་གི་གཏམ་དེས་ཕྱི་ལ་བཏོན་པ་དང་འདྲ་སྟེ། ངའི་ལུས་སེམས་གཉིས་ཀ་སྟོང་ཧང་ཧང་དུ་གྱུར་སོང་། 

རྨོ་མོ་འདས་པའི་ལོ་དེ་ནི་ངེད་ཚང་ལ་མཚོན་ནས་བཤད་ན་སྐྱིད་སྡུག་མཉམ་བྱུང་གི་ལོ་ཞིག་ཡིན་ཏེ། ངའི་སྲིང་ཆུང་མ་ལྷ་མོ་གནས་ལ་བྱིན་ནས་རིང་བོ་མ་འགོར་བར་རྨོ་མོ་ཚེ་ལས་འདས་པས། ཨ་ཕས་སྲིང་མོ་གནས་ལ་བྱིན་ཚར་ནའང་སྟོན་མོའི་ཆོ་ག་རྗེས་སུ་བསྣུར་དགོས་བྱུང་། རྨོ་མོ་གཤེགས་པའི་མཚན་མོ་དེ་ནི་ལུགས་རྙིང་གི་ཚེས་པ་བཅོ་ལྔར་འཁེལ་ཡོད།  རྒྱང་རིང་གི་ནང་ལོགས་ཀྱི་གྲོང་ཁྱེར་དེ་ནས་ངའི་མཁའ་དབྱིངས་སུ་ལྟ་དུས། ནང་ལོགས་ཀྱི་གྲོང་ཁྱེར་དེའི་མཁའ་དབྱིངས་ཀྱི་བཅོ་ལྔའི་དུང་ཟླ་ནི་ཕ་ཡུལ་མཐོ་སྒང་དང་བསྡུར་ཐབས་བྲལ་ཀྱང་། འོད་མག་མོག་ཅིག་སྤྲོ་བར་བྱེད་པའི་ཟླ་འོད་ནི་གློག་ཞུན་གྱིས་གསལ་བར་བཏང་བའི་མཁའ་དབྱིངས་ནས་ལྷོད་གྱིག་གེར་བཞུགས་འདུག  ཟླ་འོད་ལ་ཞེད་པའི་རྨོ་མོ་ནི་ཟླ་འོད་གསལ་བའི་མཚན་མོ་དེར་ཁེར་རྐྱང་ངང་བདེ་ལྡན་གྱི་ཞིང་དེར་ཆས་དགོས། རྨོ་མོ་ནི་ཚེ་གང་བོར་ཟླ་འོད་དང་འབྲེལ་ཐག་གཅོད་མི་ཐུབ་པའི་མི་ཞིག་ཡིན་པ་འདྲ། ངས་མ་ཎི་ཚར་འགའ་ཁོག་འདོན་བྱས་ནས་རིང་བོ་མ་འགོར་བར། ངོ་གམཚར་བ་ཞིག་ལ་ནམ་མཁའི་ངོ་གདོང་ངང་གིས་འགྱུར་ཅིང་མཐའ་མར་ཆར་བ་ཟམ་ཟིམ་ཞིག་མཚན་ཀློང་ནས་དལ་བུར་བབས་བྱུང་སྟེ། ངའི་མིག་ལ་ལེ་དབར་བརྒྱ་ཕྲག་མང་པོའི་ཕ་རོལ་གྱི་མཐོ་སྒང་གི་གྲོང་ཚོ་དེའི་ནམ་མཁར་ཡང་། སྤྲིན་པོ་སྲབ་མོ་ཞིག་ཕར་གཡོ་ཚུར་གཡོ་བྱེད་ཅིང་ཟླ་འོད་ཀྱི་མདངས་གཉོམ་ནས་གཉོམ་དུ་གྱུར་པའི་བརྙན་རིས་ཤིག་ག་ལེ་ག་ལེར་མངོན་བྱུང་།སྣང་བ་ཞིག་ལ་རྨོ་མོས་མུན་ནག་གི་ཀློང་ནས་ང་ལ་ཅེ་རེར་བལྟས་འདུག  འཛུལ་དམུལ་དམུལ་ངང་བལྟས་འདུག  རེད་དེ། རྨོ་མོས་གདོང་ལ་འཛུམ་མདངས་བསྣམས་ནས་བདེ་ལྡན་གྱི་ཞིང་གང་དེར་ཆས་སོང་། 

སྲིང་ཆུང་མ་ལྷ་མོ་གནས་ལ་ཕྱིན་པའི་ཕྱི་ལོར་མོར་མངལ་འཁོར་ཞིང་བུ་མོ་སྙིང་རྗེ་བོ་ཞིག་སྐྱེས།  རྟགས་དང་མཚན་མའི་སྟེང་ནས་སྒྲུབ་བྱེད་དུ་འགྲོ་བ་ཅི་ཡང་བགྲང་རྒྱུ་མེད་མོད། ལོ་སར་གྱི་སྐབས་སུ་སྲིང་མོས་བུ་མོ་འཁུར་ཏེ་རང་གི་ཕ་ཁྱིམ་ལ་ཕྱག་འཚལ་དུ་ཡོང་དུས། ཨ་ཕས་ཚ་མོའི་གདོང་ལ་ཡང་ཡང་འོ་བྱེད་བཞིན། སྲིང་ཆུང་མར་འདི་ནི་ཁྱོད་ཀྱི་རྨོ་མོ་ཡིན་ཁོ་ཐག་ཡིན། བུ་མོ་འདི་སྐྱེས་པའི་མཚན་མོ་དེར་ང་ལ་རྨི་ལམ་ཞིག་རྨིས་བྱུང་། རྨི་ལམ་དུ་མེ་ཏོག་ཁྲ་ལམ་མེར་བཞད་པའི་རྩྭ་ཐང་ཞིག་ཏུ་རྨོ་མོས་ཁྱོད་ཀྱི་ལག་པ་ནས་འཇུས་ཏེ་འགྲོ་བཞིན་འདུག་ཟེར། དེ་དུས་ཁ་གྲག་རྒྱུར་མི་དགའ་བའི་ཨ་མ་ཡང་ང་ཚོའི་ཁ་བརྡའི་ཁྲོད་དུ་བསྲེས་ནས། བུ་མོ་འདི་མ་སྐྱེས་པའི་སྔོན་དུ་ང་ལའང་རྨི་ལམ་ཞིག་རྨིས་བྱུང་སྟེ། རྨི་ལམ་དུ་རྨོ་མོས་ངའི་ལག་ཏུ་མེ་ཏོག་ཁྲ་ལམ་མེར་བཞད་པ་ཞིག་བཞག་ནས། འདི་ལྷ་མོར་བྱིན་ཞེས་བཤད་རྗེས་མི་སྣང་བར་ཡལ་སོང་ཟེར། ངས་སྲིང་མོའི་བུ་མོ་སྟེ་ཚ་མོ་པང་ནས་ཁ་སློང་དུས་མོས་ང་ལ་བལྟས་ནས་མིག་གཉིས་རིག་རིག་ཏུ་འགུལ་བར་བྱེད་ཅིང་། ལག་པས་ཡང་ཡང་ངའི་སྐེ་ལ་བཏགས་ཡོད་པའི་བ་སོའི་ཕྲེང་བ་དེ་ལ་རེག་ཡོང་།  བ་སོའི་ཕྲེང་བ་དེ་ནི་རྨོ་མོས་ང་ལ་བསྐྱུར་པ་རེད། བ་སོའི་ཕྲེང་བ་དེ་ངའི་སྐེ་རུ་བཏགས་བཏགས་ལ་ཡོད། བ་སོའི་ཕྲེང་བ་དེ་སྐེ་ལ་བཏགས་ཚེ་རྨོ་མོ་ནམ་ཡང་ང་དང་ཁ་བྲལ་མེད་པའི་སྣང་བ་ཞིག་སྦྱིན་པར་བྱེད། སྲིང་མོ་དང་ཚ་མོ་གཉིས་ཕྱིར་ལོག་སྐབས་ངས་རང་གི་སྐེ་ཡི་བ་སོའི་ཕྲེང་བ་དེ་ཚ་མོའི་སྐེ་ལ་བསྐོན་ནས་དེ་རིང་ནས་བཟུང་ཁྱེད་ཀྱི་ཕྲེང་བ་ཕྱིར་ཁྱེད་ལ་སྤྲད་པ་ཡིན་ཞེས་བཤད་དུས། ཚ་མོའི་ཞོ་ཤ་ཆགས་པའི་བཞིན་ལ་འཛུམ་ཞིག་ལངས་འདུག་ཅིང་། ང་ལ་ཡང་ཡང་ཕྱི་མིག་སློག་པའི་རྣམ་འགྱུར་ལ་བལྟས་ན་ཤིན་ཏུ་འབྲལ་མི་འདོད་པ་ཞིག་དང་འདྲ་བས། ང་དང་ཨ་མ་གཉིས་ཀྱིས་སྲིང་མོ་དང་ཚ་མོ་གཉིས་ཀ་སྡེ་འདབས་བར་དུ་བསྐྱལ་བ་ཡིན། ངས་སྲིང་མོ་དང་ཚ་མོ་གཉིས་ཀྱི་འགུལ་ཙམ་འགུལ་ཙམ་བྱེད་པའི་རྒྱབ་གཟུགས་ཅེར་སྡོད་དུས། གློ་བུར་སེམས་པའི་མཐོངས་སུ་དཀར་ཁུང་ཞིག་བཏོད་པ་དང་འདྲ་བར་འོད་ལམ་མེར་གྱུར་པ་མ་ཟད། བག་ཕེབས་པའི་ཚོར་བ་ཞིག་ང་རང་བདེ་འབོལ་ལེར་བཏང་སོང་།

ཨ་ཕས་རྗེས་སུ་སྤོ་བོའི་ཕུང་བོ་ཞུགས་ལ་འབུལ་དུས་ཀྱི་ཞོགས་པ་དེའི་རྣམ་པ་བཤད་སྐབས།  ཕྱིར་དྲན་གྱིས་ཚུལ་དུ། ཞོགས་པ་དེར་ནམ་གསལ་མ་གསལ་གྱི་མཚམས་སུ། ཕ་མཐོ་རིས་པོའི་ཕུང་བོ་ཁོས་ལོ་མང་པོར་སྒྲུབ་སྦྱོང་བྱས་མྱོང་བའི་མཚམས་ཁང་དེའི་གཡས་ལོགས་སུ་མེ་ལ་བསྒྲོན་པ་རེད། ཐབ་ཁུང་ལས་མཆེད་པའི་དུ་བ་མགོ་མ་ནི་རླུང་དང་བསེར་བུ་གང་གི་རམ་འདེགས་ལ་མ་བརྟེན་པར། དེ་ལྟར་རང་ཁྱིམ་གྱི་ཕྱོགས་སུ་དེངས་ནས་ཐལ། རྨོ་མོས་དེ་ནི་ལྟས་བཟང་ཞིག་ཡིན། ཁྱེད་ཀྱི་ཕ་རྒན་སླར་ཡང་རང་ཁྱིམ་ནས་སྐྱེ་རྒྱུ་ཡིན་པའི་རྟགས་རེད་ཅེས་མིག་ནས་མཆི་མ་ཉིལ་ལེར་བྱེད་ཟེར།  ང་ནར་སོན་དུས་ཀྱང་རྨོ་མོས་མཆི་མ་ཉིལ་ལེར་ཞོགས་པ་དེའི་དྲན་ཚུལ་གླེང་བྱུང། རྨོ་མོ་དང་ཨ་ཕས་བཤད་པའི་ཞོགས་པ་དེའི་རྣམ་པ་གཉིས་བར་ཡིག་འབྲུ་གཅིག་གིས་མི་མང་ལ་གཅིག་གིས་མི་ཉུང་བས།  རྨོ་མོའི་རྒས་གཉེར་གྱི་ཟབ་ས་རུ་ཞོགས་པ་དེའི་མཁའ་དབུགས་ལ་ཚོར་རྟོགས་བྱེད་ཐབས་བྲལ་ཀྱང་། རྨོ་མོས་སྐད་ཆ་དེའི་བཤད་སྐབས་ཀྱི་རྣམ་འགྱུར་དང་སེམས་ཀྱི་འགྱུ་བ་ནི་ད་དུང་ཞོགས་པ་དེའི་མཁའ་དབུགས་ཁྲོད་ལུས་འདུག་པ་ཚོར་ཐུབ། 

རྨོ་མོས་ངའི་གདོང་ལ་གཅེས་པའི་འོ་བྱེད་ཀྱིན་ལག་པས་མགོར་བྱིལ་བྱིལ་གཏོང་དུས། ངས་རྨོ་མོ། རྨོ་མོ། དེས་ན་ཁྱོད་སུའི་རྣམ་ཤེས་ཡིན་ཞེས་དྲིས་པ་ཡིན།

   རྨོ་མོས་ང་ལ་རྒྱང་རིང་གི་རི་བོ་མཐོ་རྒྱུ་མེད་པ་དེ་བསྟན་ནས་ང་ནི་གན་གི་ཕར་ནང་ནས་ཡོང་བ་ཡིན་ཟེར།

ཁྱོད་ཀྱིས་ཇི་ལྟར་ཤེས་པ་ཡིན།

ངའི་ཕ་མཐོ་རིས་པོས་ང་ཆུང་དུས་སུ་ཁྱོད་གང་ནས་ཡོང་བ་ཡིན་ཞེས་འདྲི་དུས། ངས་རི་བོ་གན་བསྟན་ནས། ང་ནི་རི་བོ་གན་གི་ཕར་ནང་ནས་ཡོང་བ་ཡིན་ཟེར་ཞེས་བཤད།  

དེས་ན་ཁྱོད་རང་རི་བོ་གན་གི་ཕར་ནང་འདིར་ཅི་བྱེད་དུ་ཡོང་བ་ཡིན་ནམ། 

དེ་ནི་སྐྱེས་པ་སྔོན་མའི་ཚོགས་གསོག་རེད། ཡང་ན་ངས་ཡུལ་འདི་ཞིག་ལ་སྨོན་ལམ་བརྒྱབ་ཡོད་ཀྱང་སྲིད།

རྨོ་མོ། ཚོག་གསོག་ཟེར་བ་ཅི་རེད།

དགེ་བ་བསྒྲུབས་པ་ལ་ཟེར།

དགེ་བ་བསྒྲུབས་པ་ཟེར་བ་ཅི་རེད།

དགེ་བ་བསྒྲུབས་པ་ནི་ལས་ངན་པ་སྤངས་ཤིང་། ལས་བཟང་བོ་བསྒྲུབས་པ་ལ་ཟེར།

དེས་ན་རྨོ་མོས་ལས་ངན་པ་བསྒྲུབས་མྱོང་ངམ།

མུན་ནག་གི་དུས་སྐབས་དེའི་ནང་ལས་ངན་པ་གཅིག་ཀྱང་བསྒྲུབས་མ་མྱོང་མཁན་ཞིག་ག་ལ་ཡོད།

ཁྱོད་ཀྱིས་ལས་ངན་པ་ཅི་ཞིག་བསྒྲུབས་མྱོང་།

གཞུང་གི་མཛོད་ཁང་ནས་གྲོ་སྒྱེ་མོ་ཆུང་ཆུང་གང་བརྐུས་མྱོང་། ད་དུང་ཁ་རོག་གེར་ཞིང་ནང་ནས་ཞོག་ཁོག་སླེ་བོ་གང་བསློགས་མྱོང་།

དེ་ཡང་ལས་ངན་པ་ཡིན་ནམ།

ལོས་ཡིན།

……

ཕྱིར་དྲན་ཞིག་བྱས་ན། རྨོ་མོ་ནི་སུན་སྣང་གིས་སྟོངས་པའི་མི་ཞིག་རེད། ངས་རྨོ་མོར་ཅི་དྲིས་ཀྱང་མོས་དལ་བྲེལ་མེད་པར་རེ་རེ་བཞིན་ལན་འདེབས་པར་བྱེད་ཅིང་། ད་དུང་མཚམས་རེར་དྲིས་ལན་ཞིག་ལས་འཕྲོས་ཏེ་གཏམ་རྒྱུད་རེ་ཡང་བཤད་འོངས། རྨོ་མོས་ང་ལ་ཚེ་འབུམ་ཁ་ཆེ་ཡི་གཏམ་རྒྱུད་བཤད་པ་དེ་ངས་ད་དུང་དྲན་བཞིན་འདུག་སྟེ།  

 ……ཚེ་འབུམ་ཁ་ཆེ་ནི་ཆུང་དུས་སུ་མི་དབུལ་བོ་དབུལ་ནག་ཅིག་ཡིན་ལ། ཕ་མ་གཉིས་འདས་རྗེས་ཁྱོད་ཀྱི་སྤོ་བོ་མཐོ་རིས་པོའི་ཕ་རྒན་མཐོ་རིས་པོས་བདག་སྐྱོང་བྱས་པ་རེད། དེ་དུས་ང་དང་ཁྱོད་ཀྱི་སྤོ་བོ་མཐོ་རིས་པོ། ད་དུང་ཚེ་འབུམ་ཁ་ཆེ་བཅས་ང་ཚོའི་ན་ཚོད་ལ་ཆེ་ཆུང་ཆེན་པོ་མི་རྒྱུག་པས་རྩེད་ར་གཅིག་གི་རྩེ་གྲོགས་ཡིན།  ཚེ་འབུམ་ཁ་ཆེ་ནི་དེ་དུས་ནས་བྱིས་པ་བསམ་ནག་ཅིག་ཡིན་ཅེས་བཤད་ཆོག  ཁོས་ང་ལ་བརྙས་བཅོས་ཐེངས་མང་བྱས་མྱོང་། ཁོས་ང་ལ་བརྙས་བཅོས་ཐེངས་བྱེད་ཐེངས་རེར་ཁྱོད་ཀྱིས་སྤོ་བོ་ངའི་རྒྱབ་རྩར་ལངས་ཏེ་ཁོ་ལ་ཁུ་ཚུར་རེའམ་འགྲམ་ལྕག་རེ་སྦྱིན་སྲིད། རྨོ་མོས་དེ་ལྟར་བཤད་དུས། ངའི་མིག་ལམ་དུ་ངས་ཚེ་འབུམ་ཁ་ཆེ་ཟེར་བའི་བྱིས་པ་ཞིག་ལ་འགྲམ་ལྕག་གིས་གཞུས་པའི་སྣང་བརྙན་ཞིག་མངོན་བྱུང་། རྨོ་མོས་ཁྱོད་ཀྱི་སྤོ་བོའི་ཕ་མཐོ་རིས་པོ་ཡང་སྔགས་རྒན་ཞིག་ཡིན་པས། ཆུང་ངུའི་དུས་སུ་ཁོ་གཉིས་ལ་མཉམ་དུ་རྒྱུན་སྤྱོད་ཀྱི་ཞལ་འདོན་རིགས་བསླབས་མོད། ཚེ་འབུམ་ཁ་ཆེ་ཡིས་རང་གིས་འདོན་མི་ཤེས་པ་མ་ཟད་ད་དུང་ཁྱོད་ཀྱི་སྤོ་བོའི་ཁ་གཅོལ་ནས་སྒྲ་ལོག་དོན་ལོག་ཏག་ཏག་འདོན་པས། ཁྱོད་ཀྱི་སྤོ་བོའི་ཕ་མཐོ་རིས་པོ་ཡང་ཐབས་ཟད་དེ་ཁྱོད་ཀྱི་སྤོ་བོ་ལ་མུ་མཐུད་དུ་ཆོས་ལུགས་ཆོ་ག་སྣ་ཚོགས་དཔྱིས་ཕྱིན་པ་ཞིག་ཁྲིད་ཀྱང་། ཚེ་འབུམ་ཁ་ཆེ་ར་རྫིར་མི་མངགས་ག་མེད་བྱུང་། དྲང་མོར་བཤད་ན་ཁྱོད་ཀྱི་སྤོ་བོ་དང་ཚེ་འབུམ་ཁ་ཆེ་གཉིས་ཁྱིམ་གཅིག་ནས་སྐྱེས་པ་ཡིན་པས། ཁོས་ཁྱོད་ལ་མི་མང་ཚོགས་སར་དེ་ལྟར་རྟ་ལྕག་གིས་འབྲབ་དོན་མེད། རྨོ་མོས་དེ་ལྟར་བཤད་ཞོར་བདག་གི་གདོང་གི་མངལ་རྟགས་གོར་གོར་དེར་ལག་པས་རེག་ཙམ་བྱས་སོང་། 

རྨོ་མོས་མུ་མཐུད་དུ། ཚེ་འབུམ་ཁ་ཆེ་ཡིས་རྗེས་སུ་སྟོན་སྐུ་ཞིག་སྐུབས་སྟེགས་བྱས་ཤིང་། དཔེ་ཆ་སྣ་རིང་ཞིག་གིས་སྣབས་ཕྱིས་བཞིན། ང་ལ་ཆོས་སློབ་མི་འདོད་ཀྱང་ཁོའི་ཕ་རྒན་གྱིས་བཙན་གྱིས་འཁྲིད་པ་རེད། ངས་དེ་དུས་ནས་དེ་ནི་རྨོངས་དད་ཡིན་པ་རྟོགས་ནས་དང་ལེན་མ་བྱས།  ད་ལྟ་ཡིན་ནའང་དེ་རེད། སུ་ཞིག་གིས་རྨོངས་དད་བྱས་ན་དེ་རང་ཕམ་པར་བརྒྱག་དགོས་ཞེས་བཙན་ངར་གྱིས་བཤད་ཅིང་། ཚེ་འབུམ་ཁ་ཆེ་ཡིས་ད་དུང་ང་འདི་བ་ཚང་གིས་གཡོག་ལ་བཀོལ་ནས་ར་རྫི་བྱས་པ་རེད། ད་ནི་སྐྱིན་པ་ལེན་དགོས་ཞེས་ཁྱོད་ཀྱི་སྤོ་བོའི་སྐེ་ལ་ཞོན་ནས་ཡར་འདེད་མར་འདེད་བྱས་པ་རེད། རྨོ་མོས་དེ་ལྟར་བཤད་དུས། ཡང་ངའི་མཐོང་ལམ་དུ་ཚེ་འབུམ་ཁ་ཆེ་ཟེར་བའི་མི་གཏེ་ངན་དེས་ངའི་སྐེ་ལ་ཞོན་ནས་རྫིག་རྫིག་རྔམ་རྔམ་བྱེད་པའི་བཟོ་ལྟ་ཞིག་ཝ་ལེར་ཤར་ཡོང་།

བདག་གི་ཨ་མས་བཤད་ན་རྗེས་སུ་བྱུང་བའི་དོན་དག་དེ་རྣམས་ནི་རྣམ་སྨིན་རེད་ཟེར།  ཚེ་འབུམ་ཁ་ཆེའི་བུ་ཆེ་བ་དགུན་ཁ་ཞིག་ལ་སྡེ་འདབས་ཀྱི་གྲམ་ཆུར་ལྷུང་སྟེ་འཁྱག་ཤི་ཐེབས་པ་དང་། དེ་ནས་ལོ་གཅིག་མ་འགོར་བར།  ཚེ་འབུམ་ཁ་ཆེའི་བུ་ཆུང་བ་ཡང་རྟ་རྒན་ཞིག་གིས་གཡང་ལ་བརྫངས་སོང་། གསར་བརྗེ་སྐྱིད་ཟེར་བའི་སྨྱོན་པ་དེ་ལོས་ཤེས། ངག་ལྐུགས་ཤིང་རྣ་འོན་ནས་ཕལ་ཆེར་ལོ་བཞི་བཅུ་འགོར་ཟིན་པ་དེ་རེད། ཨ་མས་དེ་ལྟར་བཤད་དུས་ཤུགས་རིང་ཞིག་འབྱིན་བཞིན་མི་ལ་སྣོག་རྒྱུ་གཏན་ནས་མང་མི་ཉན་ཟེར། དེ་ནི་ཁ་གྲག་རྒྱུར་མི་དགའ་བའི་ངའི་མ་རྒན་གྱིས་རྒྱུན་པར་ཁ་ལ་འཕྲེད་ཀྱིས་བཟུང་ཡོད་པའི་གདམ་ངག་ཀྱང་ཡིན། 

……

ལོ་མང་པོ་འགོར་བའི་དེ་རིང་། ང་རང་ཡང་བསྐྱར་ཕ་ཡུལ་དུ་ལོག་ཅིང་། སྤོ་བོ་སོང་མྱོང་བའི་རྐང་ལམ་དེད་ནས་སྡེ་འདབས་ཀྱི་མཚམས་ཁང་རྙིང་རལ་དེའི་འགྲམ་དུ་ཕྱིན་པ་ཡིན། མཚམས་ཁང་དེ་ནི་ད་དུང་ཡང་ལོ་རྒྱུས་ཀྱི་དོད་དུ་འགྱེལ་མ་ལངས་ཤིག་བྱས་ནས་ཁུ་སིམ་མེར་བསྡད་འདུག  ངས་མཚམས་ཁང་གི་རྩིགས་པར་རྒྱབ་བསྙེས་ཏེ་བསམ་གཞིག་གི་གཤོག་པ་མཐར་ཇི་ལྟར་བཅད་ཀྱང་།  སྐྱེ་བ་སྔོན་མའི་འདས་རྐྱེན་ནི་ཡིད་ལ་རབ་རིབ་ཙམ་ཡང་འཁོར་རྒྱུ་མ་བྱུང་། ཡིན་ཡང་ང་ལ་གློ་བུར་བསམ་ཚུལ་ཞིག་སྐྱེས་པ་ནི། སྤོ་བོའི་ཤི་རྐྱེན་ནི་དོན་དུ་ཁོང་གིས་ཕུང་བོ་ཞིག་བརྗེས་འདོད་པ་ལས་རྒྱུ་རྐྱེན་གཞན་གང་ཡང་མེད་ཀྱང་སྲིད་ཅེས་པ་དེའོ།། ངས་དེ་ལྟར་དྲན་པ་ན་ལྗིད་ཏིག་གེའི་ཁུར་བོ་ཞིག་ཐང་ལ་ཕོག་པ་དང་འདྲ་བར། ལུས་སེམས་གཉིས་ཀ་ངང་ངམ་ཤུགས་ཀྱིས་ཡང་ཟོར་རེར་བུད་སོང་། ང་རང་རྣང་ཞིང་གི་ཐེམ་པ་བརྒལ་ཏེ་མདུན་དུ་ཕྱིན་ཅིང་། ལག་གཡས་དཔྲལ་ངོས་སུ་བཙུགས་ཏེ་མེ་ཕུང་ཞིག་དང་མཚུངས་པའི་ཉིན་བྱེད་ལ་ཡུན་རིང་ཅེར། མིག་ལ་གཙེས་པའི་ཉིན་བྱེད་ཀྱིས་ཀྱང་ང་ལ་འགུལ་མེད་དུ་ཅེར་འདུག དེ་ནས་ངས་མིག་ཟུང་ཟུམ་ཙམ་ཟུམ་ཙམ་བྱས་རྗེས། མཐོང་ལམ་དུ་སྔོ་ལྟེམས་སེར་ཡོད་པའི་ལོ་ཏོག་གི་ཚོགས་ལ་མིག་གཡེང་ཞིག་བྱས། དེ་དུས་གར་ཡོང་ཆ་མེད་ཀྱི་རླུང་བུ་ལྡོམ་པོ་ཞིག་བསིལ་བསིལ་དུ་ལྡང་བ་ན།  སེར་ལམ་ལམ་བྱེད་པའི་ལོ་ཏོག་གི་ཚོགས་ཟླ་དྲུག་པའི་ཞིང་ཐང་དུ་རྒྱ་མཚོའི་རླབས་བཞིན་ཤིག་ཤིག་ཏུ་གཡོས་བྱུང་། 

(གསལ་བཤད། སྒྲུང་གཏམ་འདི<<བོད་ཀྱི་རྩོམ་རིག་སྒྱུ་རྩལ>>སྟེང་བཀོད་ཡོད་མོད། རྗེས་སུ་བཟོ་བཅོས་མང་ཙམ་བརྒྱབ་ཡོད་པས།དེར་བཀོད་པ་དང་འདིར་བཀོད་པ་གཉིས་ལ་ཁྱད་པར་ཆེ་ཙམ་ཡོད།  )

chisanghua སྤེལ་དུས། - 2013-5-17 11:16:33
 

1986 ལོའི་ཆར་ལྭ།

སྒོ་མེ་ཚེ་རིང་བཀྲ་ཤིས།

དེ་ནི་སྤྱི་ལོ1986ལོ་ཡིན།

ལོ་དེར་བཀྲ་ཤིས་ནི་ལོ་དགུ་ལ་སོན་ཙམ་གྱི་བྱིས་པ་ཞིག་ཡིན།

ལོ་དེར་བཀྲ་ཤིས་ནི་སློབ་ཆུང་ལོ་རིམ་གཉིས་པའི་ཐེམ་པར་གོམ་པ་སྤོས་མ་ཐག་གི་སློབ་ཆུང་སློབ་མ་ཞིག་ཡིན།

བཀྲ་ཤིས་མལ་ལས་ལངས་མ་ཐག ཟི་ལིང་དུ་ཡོད་པའི་ཁུ་བོས་རང་ལ་འཚམ་རྟགས་སུ་ཉོས་ཡོང་བའི་ཆར་ལྭ་དེ་གོན་རྩིས་བྱས་ཀྱང་། ཨ་མས་ཕྱི་རོལ་ཏུ་ཆར་ཐིགས་ཙམ་ཡང་འབབ་ཀྱིན་མེད་པས་ཁྱོད་ཀྱིས་ཆར་ལྭ་གོན་ནས་ཅི་བྱ་ཞེས་བཤད་པས།བཀྲ་ཤིས་ཀྱིས་ནམ་མཁའི་མཐོངས་སུ་ཡང་ཡང་ལྟ་བཞིན་འཐད་ལ་མི་འཐད་ངང་ཆར་ལྭ་དེ་དཔེ་ཁུག་ཏུ་བཅུག་རྗེས་སློབ་གྲྭར་ཕྱིན།

བཀྲ་ཤིས་ཀྱིས་དེ་རིང་ཅིའི་ཕྱིར་ཆར་བ་མ་བབས་པ་ཡིན་ནམ་སྙམ་བཞིན་ཕངས་སེམས་དང་བཅས་སློབ་གྲྭར་འགྲོ་དུས།རྒྱབ་ཕྱོགས་ནས་མི་ཞིག་གིས་ཁོའི་མིང་ནས་འབོད་ཀྱིན་འདུག  ཁོ་རང་ཁ་ཕྱིར་འཁོར་ནས་ལྟ་དུས་དེ་ནི་རང་དང་འཛིན་གྲྭ་གཅིག་པའི་སློབ་གྲོགས་སྟོབས་ལྡན་རེད།སྟོབས་ལྡན་གྱིས་ང་ལ་ཅུང་ཟད་སྒུགས་རོགས་ཞེས་སྐད་རྒྱག་ཞོར་ཁོའི་ཕྱོགས་སུ་བརྒྱུགས་ནས་འོང་བཞིན་འདུག བཀྲ་ཤིས་དང་སྟོབས་ལྡན་གཉིས་སྡེ་འདབས་ཀྱི་རྐང་ལམ་ཨ་ཀྱོག་པ་ཀྱོག་དེ་བརྒྱུད་ནས་ལམ་འགྲམ་གྱི་གད་པ་དེའི་ཁར་བསླེབས་སྐབས། བཀྲ་ཤིས་ཀྱིས་སྟོབས་ལྡན་ལ་དེ་རིང་ཆར་བ་འབབ་སྲིད་དམ་ཞེས་དྲིས། སྟོབས་ལྡན་གྱིས་ཤར་རིའི་རྩེ་རུ་འོད་ཀྱི་ཟེར་མ་ལམ་ལམ་སྤྲོ་བའི་ཉི་གཞོན་ལ་ཐེངས་ཤིག་ཅེར་རྗེས། ཚིག་ཐག་ཆོད་པོའི་སྒོ་ནས་དེ་རིང་ཆར་བ་འབབ་རྒྱུ་མ་རེད་ཅེས་ལན་བཏབ། སྐད་ཆ་དེས་བཀྲ་ཤིས་ཀྱི་རེ་བའི་མེ་ལྕེའི་སྟེང་དུ་ཆུ་འཁྱག་ཟོ་གང་བླུགས་པ་ལྟར་སེམས་པ་འཁྱག་སིབ་སིབ་ཏུ་བཏང་། བཀྲ་ཤིས་ཀྱིས་ཆར་བ་ཞིག་ཀྱང་མི་འབབ་པ་ཅི་ཡིན་ནམ་ཟེར། སྟོབས་ལྡན་གྱིས་བཀྲ་ཤིས་ཀྱི་སེམས་དོན་མ་རྟོགས་པར་ཆར་བ་བབས་ནས་ཅི་བྱེད་ཨང་ཟེར།

ང་ནི་ཆར་བ་བབས་ན་དགའ།

ང་ནི་ཆར་བ་མ་བབས་ན་དགའ།

གནམ་རྒན་མ། ཆར་བ་ཞིག་འབབ་རོགས།

གནམ་རྒན་མ། ཆར་བ་ཞིག་མི་འབབ་རོགས།

ཆར་བ་བབས་ན་བཟང་།

ཆར་བ་མ་བབས་ན་བཟང་།

བཀྲ་ཤིས་ཀྱིས་ཅི་བཤད་ལ་སྟོབས་ལྡན་གྱིས་ལྡོག་ཕྱོགས་ནས་བཤད་འོངས་པས། བཀྲ་ཤིས་རབ་ཏུ་ཁྲོས་ཏེ། སྟོབས་ལྡན་སྣ་འབིགས་ཁྱོད་ཀྱི་ཨ་བ་ཨ་མ། ཅི་རེད། བསམ་གཟས་ནས་ང་ལ་བརྙད་རྐོ་བ་ཡིན་ནམ་ཟེར།

  སྟོབས་ལྡན་ཡང་རང་དགར་ཁ་རོག་གེར་སྡོད་མཁན་ཞིག་མིན་པ་འདྲ། བཀྲ་ཤིས་ཐོད་འབུར། ཆར་བ་བབས་ནས་རོ་བྱེད་དམ་ཟེར།

སྟོབས་ལྡན་གྱི་དམོད་ཚིག་དེ་ཐོས་མ་ཐག  བཀྲ་ཤིས་ནི་རྒྱུག་ཐེངས་ཤིག་གིས་སྟོབས་ལྡན་གྱི་གམ་ཏུ་བརྒྱུགས་ཤིང་། འཛིན་ཐེངས་ཤིག་གིས་སྟོབས་ལྡན་གྱི་སྐྲ་ལོ་ནས་བཟུང་བྱུང་། ད་ཁྱོད་ཀྱིས་དེ་ལྟར་ཤོད། ཁོས་སྟོབས་ལྡན་གྱི་སྐྲ་ལོ་ནས་བཟུང་སྟེ་མགོ་བོ་མར་མནན་པ་ན། སྟོབས་ལྡན་གྱི་ཡར་སྔོན་གྱི་ཁེངས་ཉམས་ཡོངས་སུ་ཤོར་འདུག་ནའང་། ཁ་ནས་ད་དུང་ཆར་བ་འབབ་མི་འབབ་དེ་ཁྱོད་ལ་འབྲེལ་བ་ཅི་ཡོད། ངས་ཆར་བ་མ་འབབ་ཅེས་བཤད་པ་མ་གཏོགས་ཁྱོད་ཀྱི་གཅིན་མ་འབབ་ཅེས་བཤད་པ་ཡིན་ནམ་ཟེར།

ཁྱོད་ཀྱིས་ངེས་པར་དུ་ཆར་བ་འབབ་རོགས་ཞེས་བཤད་དགོས།

མི་བཤད།

མི་བཤད་དམ།

བཀྲ་ཤིས་ཀྱིས་སྟོབས་ལྡན་གྱི་སྐྲ་ལོ་ནས་ཤུགས་ཀྱིས་འཐེན་པ་ན།སྟོབས་ལྡན་གྱིས་ན་ཟུག་མ་བཟོད་པར།  ཨ་ཚ། ཨ་ཚ། ཆར་བ། ཆར་བ་འབབ་རོགས་ཞེས་བཤད།

ཆར་བ་བབས་ན་བཟང་ཞེས་བཤད་རོགས།

མི་བཤད།

མི་བཤད་དམ།

བཀྲ་ཤིས་ཀྱིས་སྔར་བཞིན་སྟོབས་ལྡན་གྱི་སྐྲ་ལོ་ནས་ཤུགས་ཀྱིས་འཐེན་བཞིན་ཁྱོད་ཀྱིས་བཤད་རྒྱུ་ཡིན་ནམ་མིན་ཟེར།

སྟོབས་ལྡན་གྱིས་ཨ་ཚ། ཨ་ཚ། ཆར་བ། ཆར་བ་བབས་ན་བཟང་ཞེས་བཤད།

སྐབས་དེར་རྐང་ལམ་གྱི་སྣེ་རུ་དགེ་རྒན་རྡོ་རྗེ་སློབ་གྲྭའི་ཕྱོགས་སུ་འོང་བཞིན་ཡོད་པས། བཀྲ་ཤིས་ཀྱིས་སྟོབས་ལྡན་གྱི་སྐྲ་ནས་བཏང་སྟེ་གཉིས་ཀ་གཅིག་ལས་གཅིག་མགྱོགས་ཀྱིས་སློབ་གྲྭའི་ཕྱོགས་སུ་བརྒྱུགས་སོང་། ཁོ་གཉིས་ཀ་སློབ་གྲྭའི་ར་སྐོར་ནང་དུ་འབྱོར་དུས། སྔོན་ལ་བསླེབས་པའི་སློབ་གྲོགས་ཚོས་ལག་ཏུ་རྡོ་འཇོང་རེ་ཐོགས་ཏེ་ཐང་ལ་ཡི་གེ་འབྲི་བཞིན་འདུག བཀྲ་ཤིས་དང་སྟོབས་ལྡན་གཉིས་ཀྱང་སློབ་གྲོགས་དེ་དག་གི་གྲས་སུ་བཙངས། སློབ་གྲོགས་ཚོས་དགེ་རྒན་རྡོ་རྗེ་བསླེབས་པ་མཐོང་བས་མགོ་བོ་བསྒུར་ནས། ཀ་བ་ཀ་བ་ཁ་བ་ཁ་བ་ཞེས་ངག་ལ་སྐྱོར་བཞིན་སུ་མགྱོགས་འགྲན་པ་ལྟར་མིང་ཚིག་དེ་དག་ཐང་ལ་འབྲི་ཐུབ་ཐུབ་བྱེད།  བཀྲ་ཤིས་གཅིག་པུས་ཐང་ལ་ཡི་གེ་འབྲི་ཞོར་སྤྲིན་བྱིའུ་མགོ་ཙམ་ཡང་མེད་པའི་ནམ་མཁར་ཡང་ཡང་ལྟ་བཞིན་འདུག དེ་དུས་ཞོགས་པའི་ཉི་འོད་ནི་སློབ་ཁང་གི་སྒེའུ་ཁུང་གི་ཤེལ་སྒོའི་ངོས་སུ་འཕྲོས་ཏེ་ལྡོག་འོད་ལམ་ལམ་འཚེར། དེས་བཀྲ་ཤིས་ཀྱི་མིག་ལ་གཙེས་ཤིང་ཚ་ལམ་ལམ་བྱེད།

   གྲོ་ཞིང་ཁ་སློབ་ཆུང་ནི་སློབ་གྲྭ་ཆུང་ཆུང་ཞིག་སྟེ། སློབ་གྲྭ་ཆུང་ཆུང་དེར་སློབ་མ་བཅུ་ཕྲག་ཙམ་ལས་མེད་ལ། དེ་བཞིན་དགེ་རྒན་ཡང་དགེ་རྒན་རྡོ་རྗེ་གཅིག་པུ་མ་གཏོགས་མེད། དགེ་རྒན་རྡོ་རྗེ་ནི་སློབ་གྲྭ་དེའི་སློབ་གཙོ་ཡིན་ལ་དགེ་རྒན་ཡང་ཡིན། དགེ་རྒན་རྡོ་རྗེ་ཡིས་སྔ་དྲོའི་སློབ་ཐུན་བཞི་བོའི་རིང་ལ་རྩིས་རིག་དང་བོད་ཡིག་རེས་མོས་སུ་ཁྲིད་དགོས། ལྕང་སྡོང་གུག་ཏོ་ཞིག་གི་སྐེ་ལ་ཅོང་རྙིང་བཙའ་ཏོ་ཞིག་དཔྱངས་ཡོད་པ་དེས་ཏིང་ཏིང་ཞེས་སྒྲ་གཉིས་རེ་གཉིས་རེ་གྲག་དུས་སློབ་ཐུན་འཚོགས་པའི་བརྡ་ཡིན།  དགེ་རྒན་རྡོ་རྗེ་སློབ་ཁང་དུ་འཛུལ་མ་ཐག་ཅག་ཅག་ཅག་བྱེད་པའི་སློབ་གྲོགས་ཚོ་ཅག་མེད་སེར་གྱུར། ཁོང་གིས་སློབ་ཚན་གསར་བ་ཞིག་ཁྲིད་ནས་རྫོགས་ལ་ཉེ་དུས་བཀྲ་ཤིས་ཀྱིས་མིག་གཉིས་གཡོ་བ་མེད་པར་ཕྱི་རོལ་ཏུ་ཅེར་འདུག་པ་མཐོང་བྱུང་། ཁོང་གིས་བཀྲ་ཤིས་དོན་གྲུབ་ཅེས་ཁོའི་མིང་ཧྲིལ་བོས་ཐེངས་གཉིས་ལ་བོས་ཀྱང་བཀྲ་ཤིས་ཀྱིས་མ་གོ། དགེ་རྒན་རྡོ་རྗེ་ཡིས་ཁྲིད་ལྕག་ཐོགས་ཏེ་བཀྲ་ཤིས་ཀྱི་གམ་ཏུ་བསླེབས་ཤིང་སྐེ་ཁུག་ལ་ཁྲིད་ལྕག་གིས་ཅལ་སེ་བརྒྱབ་པ་ན། བཀྲ་ཤིས་གང་ཞིག་ནས་གློ་བུར་སད་པ་ལྟར་ཡར་ལངས་ཤིང་། མགོ་བོ་ལག་པས་བསྐྱོར་ཏེ་དགེ་རྒན་གྱི་གདོང་ལ་འོག་མིག་གིས་ལྟ་བཞིན་འདུག

ཁྱོད་ཀྱིས་སེམས་ལ་ཅི་ཞིག་དྲན་བཞིན་ཡོད།

ཅི་ཡང་དྲན་བཞིན་མེད།

དེས་ན་སྒེའུ་ཁུང་ཕྱི་རོལ་ཏུ་ཅི་ཞིག་ཡོད་དམ།

ཅི་ཡང་མེད།

མེད་དམ།

མེད།

དགེ་རྒན་རྡོ་རྗེ་ཡིས་ཁོས་ཕྱི་རོལ་ཏུ་ལྟ་བའི་རྒྱུ་མཚན་རྒྱུ་མ་ཕུག་འདེད་མི་བྱེད་པར།  ད་ཐེངས་ཁྱོད་ལ་གུ་ཡངས་བཏང་བ་ཡིན། རྗེས་མར་སློབ་ཁྲིད་ལ་ཡག་པོར་མ་ཉན་ཚེ་ངས་ཁྱོད་ལ་ཆད་པ་ནན་མོ་གཅད་རྒྱུ་ཡིན། ཨེ་གོ་ཐལ་ཟེར།བཀྲ་ཤིས་ཀྱིས་མགོ་བོ་ཡར་དགྱེ་ནས་ཡ་ཞེས་ལན་བཏབ་རྗེས་སླར་ཡང་མགོ་བོ་སྨད་སོང་། སྐབས་དེར་དགེ་རྒན་རྡོ་རྗེ་ཁྲིད་སྟེགས་སྟེང་བུད་དེ་མུ་མཐུད་དུ་སློབ་ཚན་ཁྲིད་ཀྱིན་འདུག   མཇུག་ཏུ་དགེ་རྒན་རྡོ་རྗེ་ཡིས་སློབ་ཚན་ནང་གི་མིང་ཚིག་འགའ་ནག་པང་སྟེང་བྲིས་ཏེ་སློབ་གྲོགས་ཚོར་ཚིག་གྲུབ་བཟོ་རུ་བཅུག 

ཐོག་མར་སློབ་གྲོགས་ཚོས་ཆར་བ་ཞེས་པའི་མིང་ཚིག་འདིར་ཚིག་གྲུབ་བཟོ་རོགས།  ཡ། འཇིགས་མེད་ནས་མགོ་རྩོམ་རྒྱུ་བྱོས།

གྲལ་གཤར་སྔོན་མར་ཙོག་ཡོད་པའི་སློབ་གྲོགས་དེ་ཡར་ལངས་ཏེ། ཆར་བ་བབས་ན་གྱོན་པ་རློན་པར་བཏང་འགྲོ་ཟེར།

རེད། བཟང་གི དགེ་རྒན་རྡོ་རྗེས་ཡིས་དེ་ལྟར་བཤད།

དེའི་འཕྲོར་སློབ་གྲོགས་གཅོད་པ་ཡར་ལངས་ཏེ། ཆར་བ་བབས་ན་ཟམ་པ་ཁུར་འགྲོ་ཟེར།

རེད། བཟང་གི

དེའི་འཕྲོར་སློབ་གྲོགས་སྟོབས་ལྡན་ཡར་ལངས་ཏེ། ང་རང་ཆར་བ་ལ་མི་དགའ་ཟེར།

ཡ། དེ་ཡང་ཆོག་གི

དེའི་འཕྲོར་སློབ་གྲོགས་སྒྲོལ་མ་ཡར་ལངས་ཏེ།  ཆར་བ་བབས་ན་ཨ་མ་ལས་ཀར་འགྲོ་མི་ཐུབ་ཟེར།

རེད། འགྲིག་གི

སློབ་གྲོགས་ཚོས་རེ་རེ་བཞིན་ཚིག་གྲུབ་བཟོས་ནས་བཀྲ་ཤིས་ཀྱི་མཚམས་སུ་བསླེབས་དུས། ཁོས་ང་ནི་ཆར་བ་ལ་དགའ། ཆར་བ་བབས་ན་བདག་གིས་ཆར་ལྭ་གོན་ཆོག་ཟེར།

དགེ་རྒན་རྡོ་རྗེ་ཡིས་བཀྲ་ཤིས་ཀྱིས་ཆར་བ་ཞེས་པའི་མིང་ཚིག་འདིར་ཚིག་གྲུབ་གཉིས་བཟོས་བྱུང་། ཁོས་སློབ་ཁྲིད་ལ་ལེགས་པོར་མི་ཉན་པ་དེ་མི་བཟང་། ཡིན་ནའང་ཁོས་ཚིག་གྲུབ་བཟོས་པ་ཤིན་ཏུ་ལེགས། འདིའི་ཕྱོགས་ནས་སློབ་གྲོགས་ཚོས་ཁོར་སློབ་སྦྱོང་བྱ་རོགས་ཟེར།

ཕྱི་དྲོ་སློབ་གྲྭ་གྲོལ་རྗེས་སློབ་གྲོགས་ཚོ་སྡེ་འདབས་ཀྱི་རྐང་ལམ་དེའི་སྟེང་དུ་ཐར་ཐོར་ངང་ཡུལ་དུ་ལོག་གིན་འདུག  དབྱར་གྱི་ཉི་མ་ཤིན་ཏུ་རིང་བས་ད་ད་དུང་ཉི་མ་རི་ལ་ནུབ་པར་ཐག་ཚད་ཅིག་གིས་ཀྱང་མི་ཚད།  གྲོ་ཞིང་ཁ་སྡེ་བ་ནི་ཉིན་ཁར་ཆགས་ཡོད་པས་ཕྱི་དྲོའི་མཚམས་སུ་བསླེབས་ཀྱང་།  སེར་ལམ་ལམ་གྱི་ཉི་མས་རི་གྲོང་སྐྱ་བོ་དེ་གཞོབ་ལ་ཁད་བྱེད། ལམ་འགྲམ་གྱི་གད་པའི་དེའི་ཁར་ཐར་ཐོར་དུ་བཞད་པའི་རེ་ལྕག་པའི་མེ་ཏོག་དང་། ད་དུང་མིང་མི་ཐོགས་པའི་མེ་ཏོག་གཞན་རྣམས་ཀྱང་ཤིན་ཏུ་ཚ་བའི་ཉི་འོད་འོག་ཏུ་མགོ་བོ་བསྣར་ནས་བཀྲག་མདངས་ཡོངས་སུ་ཤོར།  སློབ་གྲོགས་རྣམས་ཀྱང་ཙད་ཀྱིས་ཤིན་ཏུ་གཙེས་པས།སློབ་གྲོགས་ཕོ་དག་གིས་ཕྱི་ལྭ་ཕུད་དེ་དཔུང་རྗེན་དུ་འགྲོ་བཞིན་འདུག   ཡིན་ནའང་སྐབས་དེར་བཀྲ་ཤིས་ཀྱིས་དཔེ་ཁུག་ལས་ཆར་ལྭ་སེར་པོ་དེ་བཏོན་སྟེ་ལུས་ལ་གོན་བྱུང་། ཉི་འོད་ཀྱི་འོག་ཏུ་ཆར་ལྭ་དེ་ནི་དེ་ལྟར་ཚོན་མདངས་ཀྱིས་ཀུན་ནས་ཕྱུག་པ་ཞིག་སྟེ། གྲོ་ཞིང་ཁའི་སྡེ་འདབས་ཀྱི་རྐང་ལམ་ཕྲ་མོ་དེའི་སྟེང་དུ་སེར་ལམ་ལམ་བྱེད། སེར་ལམ་ལམ་གྱི་ཆར་ལྭ་དེས་སྐྱ་ཐོ་ཐོ་བྱེད་པའི་སློབ་གྲོགས་ཀུན་གྱི་མིག་དབང་ཅིག་ཅར་དུ་ཕྲོགས་སོང་། སློབ་གྲོགས་ཚོས་བཀྲ་ཤིས་ཀྱི་ཆར་ལྭ་མཐོང་བའི་མོད་ལ།  སྔོན་དུ་སྐྱོད་པ་རྣམས་རྗེས་སུ་བསྣུར་ཅིང་རྗེས་སུ་ལུས་པ་རྣམས་མདུན་དུ་བརྒྱུགས་ཏེ་བཀྲ་ཤིས་ཕྱི་སྐོར་ནང་སྐོར་བྱས། 

སྟོབས་ལྡན་གྱིས་ཁ་སྔོན་ལ་གྲགས་ཏེ།  གོས་ལྭ་འདི་ཡག་པ་ལ་ཟེར་ཞོར་ལག་པ་མདུན་དུ་བསྲིངས་ནས་སེར་ལམ་ལམ་གྱི་ཆར་ལྭར་རེག་རྩིས་བྱེད་དུས།  བཀྲ་ཤིས་ཀྱིས་ཁྱོད་ཀྱིས་ཅི་ཟེར། གོས་ལྭ། འདི་གོས་ལྭ་རེད་དམ་ཞེས་ལྡོག་འདྲི་བྱེད་ཞོར་སྟབས་ལྡན་གྱི་མདུན་དུ་བསྲིངས་ནས་འོང་བཞིན་པའི་ལག་པ་བཀག་སྟེ།  ཁྱོད་ཀྱིས་ངའི་ལྭ་འདི་རྫོབ་རྒྱུ་རེད་ཟེར། 

སྐབས་དེར་སློབ་གྲོགས་གཞན་རྣམས་ཀྱིས་ཀྱང་ཡིད་སྨོན་ཤོར་བའི་མིག་མདངས་ཀྱིས། བཀྲ་ཤིས་ཀྱི་སེར་ལམ་ལམ་གྱི་ལྭ་བ་དེར་ལྟ་བཞིན་གཅིག་རྗེས་གཉིས་མཐུད་དུ་ཁ་གྲགས་བྱུང་།

འདི་གོས་ལྭ་མིན་ན་ཅི་རེད། དེ་ནི་འཇིགས་མེད་རེད།

འདི་ཐར་མ་ཟེར་བ་དེ་མིན་ནམ།  དེ་ནི་ལྷུན་གྲུབ་རེད།

ཁྱོད་ཀྱི་ཐར་མ་སེར་པོ་ཞིག་མཐོང་མྱོང་ངམ། དེ་ནི་གཅོད་པ་རེད།

འདི་ནི་པ་ཎ་མ་ཟེར་བ་དེ་མིན་ནམ། དེ་ནི་སྒྲོལ་མ་རེད།

སྐབས་དེར། བཀྲ་ཤིས་ཀྱི་གདོང་ལ་གཟི་མདངས་ཤིག་རྣམ་པར་འཚེར་ཏེ་འདི་ནི་ཁྱོད་ཚོས་ཤེས་པ་ཞིག་མ་རེད་ཟེར།

འཇིགས་མེད་ཀྱིས།  ཆམ་སྟེགས་སྤྱད་མིན་ནམ།

ལྷུན་གྲུབ་ཀྱིས། མི་ཤེས་རྒྱུ་ཅི་ཡོད། ལྷ་འབབ་སྤྱད་རེད་ཡ།

གཅོད་པས།  དེ་ཡང་མིན་པ་འདྲ།

སྒྲོལ་མས། བཀྲ་ཤིས། ཁྱོད་ཀྱིས་ཤོད་ཡ། འདི་ཅི་རེད།

བཀྲ་ཤིས་ཀྱི་གདོང་ལ་བྱིས་པ་ཞིག་ལ་མི་མཛའ་བའི་ཁེངས་ཉམས་ཆེན་པོ་ཞིག་དོད་དེ། འདི་ཡང་མི་ཤེས་སམ།  འདི་ནི་ཆར་ལྭ་རེད་ཡ། ཁྱོད་ཚོས་ཆར་ལྭ་ཤེས་སམ། ཆར་ལྭ། ཆར་ལྭ་ཡང་གོ་མ་མྱོང་ངམ་ཟེར།

སློབ་གྲོགས་ཚོས་མཉམ་དུ་མགོ་བོ་ཐེད་དུ་གཡུགས་སོང་།  རྣམ་པ་དེར་བཀྲ་ཤིས་སྔར་ལས་ཀྱང་ཡིད་ཚིམས་པར་གྱུར་ཏེ། ཆར་ལྭ་ནི་ཆར་བའི་ནང་གོན་རྒྱུ་རེད་ཡ། ཤེས་སམ་ཟེར།

སྟོབས་ལྡན་གྱིས་ཡང་ཁ་སྔོན་ལ་གྲགས་བྱུང་། ཁྱོད་ཀྱི་ལྭ་བ་དེ་ཆར་ལྭ་ཡིན་ན། ཁྱོད་ཀྱིས་ཙད་པའི་ནང་དུ་གོན་ནས་ཅི་བྱེད་ཟེར།  སློབ་གྲོགས་གཞན་རྣམས་ཀྱང་སྟོབས་ལྡན་གྱི་གཏམ་དེར་ཀུན་ནས་འཐད་དེ་མིག་ཟུང་རིག་རིག་ངང་བཀྲ་ཤིས་ཀྱིས་ཅི་བཤད་ལ་བསྒུགས་འདུག

སྟོབས་ལྡན་གྱི་གཏམ་དེར་སློབ་གྲོགས་གཞན་ཀུན་འཐད་པ་བྱུང་ནའང་།  དེས་བཀྲ་ཤིས་གྲག་རྒྱུ་མེད་པར་བཏང་སོང་།  ཁོས་ཡུད་ཙམ་ལ་ལན་ཅི་ཡང་མི་འདེབས་པར་བསྡད་རྗེས། མགྲིན་པའི་ནང་བལ་ལོག་ཅིག་འཚང་བ་ལྟར་ངག་ལྐུགས་བཞིན། འདི།འདི། ངའི་ཆར་ལྭ་རེད། ངས་ནམ་གོན་ན་གོན། ཁྱོད་ཚོར་འབྲེལ་བ་ཅི་ཞིག་ཡོད་ཟེར།

ཆར་ལྭ་བཟོ་བྱེད་ཀྱི་རྫས་ནི་འགྱིག་ལས་གྲུབ་པ་ཡིན་པས། བཀྲ་ཤིས་ཀྱི་ལུས་ཡོངས་དྲོས་ཏེ་གདོང་དུ་རྔུལ་ཆུ་ཆུ་བཞིན་བཞུར་གྱིན་འདུག   ཡིན་ནའང་བཀྲ་ཤིས་ཀྱིས་ཆར་ལྭ་ཕུད་པའི་བཟོ་ལྟ་ཙམ་ཡང་མེད་པར།  གྲོ་ཞིང་ཁའི་སྡེ་འདབས་སུ། སེར་ལམ་ལམ་གྱི་ཉི་འོད་འོག་སེར་ལམ་ལམ་གྱི་ཆར་ལྭ་དེ་གོན་ནས་ཧ་ཅང་འགྱིང་ཉམས་ཀྱིས་ལངས་འདུག  རིམ་གྱིས་ཉི་མ་ནུབ་རིའི་ཕང་དུ་གཤེགས་ལ་ཉེ་བས། སློབ་གྲོགས་ཚོས་ཁོར་མུ་མཐུད་དུ་ཆར་ལྭའི་སྐོར་མི་གླེང་བར། རེ་རེ་བཞིན་ཕྱི་མིག་སློག་གིན་སྔ་གཞུག་བྱས་ནས་མདུན་དུ་བརྒྱུགས་སོང་།  བཀྲ་ཤིས་གཅིག་པུས་རྐང་ལམ་ཕྲ་མོའི་སྟེང་ཁ་ནས་སི་ལི་རྒྱག་ཞོར་ཕར་གཡེང་ཚུར་གཡེང་ངང་དལ་བྲེལ་མེད་པར་སྐྱོད་གྱིན་འདུག  

ལོ་དེ་ནི་གྲོ་ཞིང་ཁའི་ཡུལ་མི་རྣམས་ལ་མཚོན་ན་ནམ་ཡང་བརྗེད་མི་སྲིད་པའི་ལོ་ཞིག་ཡིན། ལོ་དེའི་ཐན་པ་དེས་ཡུལ་ཕྱོགས་དེར་ལོ་རྒྱུས་ཀྱི་ཟིན་ཐོ་གསར་བ་ཞིག་བསྐྲུན།  ཐན་པ་བྱུང་བའི་ལོ་དེར་སྡེ་མི་ཀུན་གྱི་རེ་བ་ཉག་གཅིག་པུ་སྔགས་རྒན་རིག་འཛིན་ལ་གཏད་འདུག  སྡེ་དཔོན་ནམ་བཀྲ་ཤིས་ཀྱི་ཨ་ཕ་སྔགས་རྒན་རིག་འཛིན་གྱི་མཚམས་ཁང་དོག་མོ་དེའི་གོ་འདབས་སུ་སྐྱིལ་ཀྲུང་དུ་བསྡད་དེ། ཨ་ཁུག་རིག་འཛིན་ལོ་ལོ། ད་བཀོད་པ་ཞིག་མ་འཐེན་ན་ད་ལོར་འབྲུ་སྤར་མོ་གང་ཡང་སྡུད་ཐུབ་རྒྱུ་མ་རེད་ཟེར་དུས། ཚ་ཐབ་སྟེང་ནས་རས་ལྭ་དམར་སྨུག་རྙིང་སྟུག་ཅིག་གཡང་ཤམ་བྱས་ཤིང་། རལ་བ་སྦོམ་པོ་དེ་མགོ་ལ་དཀྲི་བཞིན་པའི་སྔགས་རྒན་རིག་འཛིན་གྱིས། འོ་ལེ། དོ་ཚིགས་ཀྱི་ཐན་པ་འདི་ཅི་རེད། ངས་ཀྱང་ཁ་ཏོན་མ་བྱས་པའི་བསམ་པ་ཞིག་མེད། ད་ཁྱོད་མ་འཚུབ་དང་། ངས་མོ་ཞིག་འདེབས་ཟེར་ཞོར་ཁ་མདོག་ཀྱང་མི་ཤེས་པའི་ཕྲེང་བ་དེ་མཛུབ་བར་ནས་ཡར་འདེད་མར་འདེད་ལན་འགའ་བྱས་ཤིང་། དེ་ནས་གླེགས་ཐུམ་གྱི་ཁུད་དུ་གཅུད་པའི་མོ་དཔེ་སྣ་ཐུང་དེ་ཕར་སློག་ཚུར་སློག་ཅིག་བྱས་རྗེས། བྲེལ་ཉམས་དང་བཅས་ཚ་ཐབ་སྟེང་ཅེར་འདུག་པའི་སྡེ་དཔོན་ལ་བཅའ་བ་རིམ་གྲོ་ཞིག་བསྒྲུབ་དགོས་པ་འདྲ་ཟེར། སྡེ་དཔོན་གྱིས་སྔགས་རྒན་རིག་འཛིན་གྱི་གཏམ་བཤད་མ་ཚར་གོང་། ཨ་ཁུ་རིག་འཛིན་ལོ་ལོ་ད་ཁྱོད་ཀྱིས་བལྟོས། ངས་ཅི་ཤེས། ཁྱོད་ཀྱིས་ཅི་བཤད་ན་དེ་ཡིན་ཅེས་བཤད་པ་ན། དེས་ན་ཚེས་པ་དགུ་ལ་ཀླུ་གཏོར་ཞིག་འཕེན་རྒྱུ་བྱོས། གཅིག་གཉིས་གསུམ་བཞི་ལྔ། རེད། ད་དུང་ཉིན་ལྔ་འདུག  དེའི་རིང་ལ་གྲ་སྒྲིག་ཅིག་བྱོས་ཟེར་བ་ན། སྡེ་དཔོན་གྱིས་སྔགས་རྒན་རིག་འཛིན་ལ་བདེ་མོ་བཞག་རྗེས་འཕྲལ་དུ་བུད་སོང་།

དེ་ཡང་ཉི་འོད་སེར་ལམ་མེར་འཕྲོ་བའི་ཉིན་མོ་ཞིག་རེད། ཁོར་ཡུག་ཀུན་ཙད་པས་མནར་ཏེ་ཕག་རྒན་ཞིག་དང་འདྲ་བར་གཉིད་ལ་ཤོར་འདུག  གྲོ་ཞིང་ཁ་སློབ་ཆུང་གི་སློབ་ཁང་ཞིག་ཏུ་དགེ་རྒན་རྡོ་རྗེ་ཡིས། མཁས་པ་སློབ་པའི་དུས་ན་སྡུག། བདེ་བར་སྡོད་ལ་མཁས་མི་སྲིད།། ཅེས་ས་སྐྱ་ལེགས་བཤད་ཀྱི་ཚན་པ་ཞིག་སློབ་གྲོགས་ཚོར་ཁྲིད་ཀྱིན་འདུག་ལ།  སློབ་གྲོགས་ཚོའི་གདོང་དུ་སྒྱིད་ལུག་གི་ཉམས་ཤིག་ཤར་ཅིང་། མཁསཔ་སློབཔའིདུསསྡུག། བདེབརསྡོདམཁསམིསྲིད།།ཅེས་གདངས་ཇེ་རིང་དུ་བཏང་ནས་གྱེར་གྱིན་འདུག  ཡིན་ནའང་བཀྲ་ཤིས་ཀྱི་གདོང་ལ་རྣམ་ཀུན་ལས་ཀྱང་རྣམ་རིག་ཅིག་རྒྱས་ཤིང་། མིག་གཉིས་རིག་རིག་ངང་སྒེའུ་ཁུང་གི་ཕྱི་རོལ་ཏུ་ཤོར།   ཁོའི་མཐོང་ལམ་དུ་མངོན་པ་ནི་ཕ་གིའི་ཞིང་ནང་གི་སྐྱེས་ཚད་ཤིན་ཏུ་དམའ་བའི་ལོ་ཏོག་རེད། ཁོས་རང་གི་མཐོང་ལམ་མུ་མཐུད་དེ་རྒྱ་བསྐྱེད་པ་ན། རྒྱང་རིང་གི་གནམ་མཐའི་མཚམས་སུ་ཉི་འོད་ཀྱིས་ནམ་མཁའ་དང་ས་གཞི་མེ་རུ་སྦར་གྱིན་འདུག  བཀྲ་ཤིས་ཀྱི་སེམས་སུ་ཆར་བ་ཞིག་འབབ་རྒྱུ་ན་ཅི་མ་རུང་སྙམ།  ཁོས་དེ་ལྟར་སྙམ་པ་དང་། སེམས་པ་རྟོགས་བཟོའི་ཁྲོད་ཀྱི་ཆར་ཀློང་དུ་ཤོར་སོང་། སྐབས་དེར་ཁོའི་མིག་ལམ་དུ་རང་གིས་ཀྱང་ཡིད་སྨོན་བྱེད་པའི་སློབ་གྲོགས་བཀྲ་ཤིས་ཤར་བྱུང་། སློབ་གྲོགས་གཞན་རྣམས་ཀྱི་ལྭ་བ་ཆར་གྱིས་བརླན་ཞིང་ལྭ་འདབས་ནས་ཆུ་ཐིགས་ཙ་ར་ར་བྱེད་ཀྱང་། བཀྲ་ཤིས་ཀྱིས་ཆར་ལྭ་གྱོན་ནས་ཧ་ཅང་ཁེངས་ཉམས་ཀྱིས་བསྐྱོད་ཅིང་། བཀྲ་ཤིས་ཀྱི་ཁ་ནས།ཆར་བ་ཤུགས་ཀྱིས་འབབ་རོགས།  བོབས་ཡ། ཆར་བ་བོབས་ཡ་ཞེས་ས་ལྡིང་གནམ་ལྡིང་བྱེད་ཀྱིན་འདུག  བཀྲ་ཤིས་ཀྱི་ཆར་ལྭ་ནི་སློབ་གྲོགས་ཚོས་ཡིད་སྨོན་བྱེད་ས་ཡིན་ལ། བཀྲ་ཤིས་ཀྱིས་ཡིད་སྨོན་བྱེད་ས་ནི་སློབ་གྲོགས་ཚོའི་མིག་ཟུང་ཡིན།  སློབ་གྲོགས་ཚོས་ཁོ་ལ་ཡིད་སྨོན་བྱེད་པའི་མིག་ཟུང་དེར་འགུགས་ཤུགས་ཡ་མེད་ཅིག་འདུག  ཆར་ཀློང་དུ་བཀྲ་ཤིས་ཀྱི་ཆར་ལྭ་སེར་ལམ་ལམ་སེར་ལམ་ལམ་བྱེད་ཅིང་། ཆར་ཐིགས་རེ་རེ་ཁོའི་ཆར་ལྭའི་སྟེང་ནས་མུ་ཏིག་བཞིན་གྲིལ་ཏེ་ཕྱོགས་བཞིར་ཆོལ།

ཆར་བ་བོབས་ཡ། ཆར་བ་བོབས་ཡ། ཁོའི་ཁ་ནས་དེ་ལྟར་ཤོར།

བཀྲ་ཤིས་དོན་གྲུབ།

སྐད་འགྲགས་དང་བཅས་བཀྲ་ཤིས་དོན་གྲུབ་ཅེས་ཁོའི་མིང་ཧྲིལ་བོས་འབོད་མཁན་ནི་ནམ་ཡང་དགེ་རྒན་རྡོ་རྗེ་ཡིན། དགེ་རྒན་རྡོ་རྗེ་ཡིས་ལག་གི་དཔེ་ཆ་ཁྲིད་ཅོག་སྟེང་ཁ་བསྒོར་རྗེས་ཐད་ཀར་བཀྲ་ཤིས་གཟས་ནས་བསླེབས་བྱུང་། དགེ་རྒན་རྡོ་རྗེ་ཡིས་བཀྲ་ཤིས་དོན་གྲུབ་ཅེས་བོས་པའི་སྐད་ཅིག་མ་དེར། ཕྱི་རོལ་གྱི་ཆར་ཀློང་དུ་ས་ལྡིང་གནམ་ལྡིང་བྱེད་པའི་བཀྲ་ཤིས་དང་སློབ་ཁང་གི་ནང་གི་སློབ་གྲོགས་བཀྲ་ཤིས་གཉིས་གཞི་གཅིག་ཏུ་འདྲེས། དགེ་རྒན་རྡོ་རྗེ་ཡིས་རྔུལ་ཆུ་ཁྲོམ་ཁྲོམ་ངང་ཆར་བ་འབབ་མིན་དེར་ཁྱོད་ཀྱིས་ཁ་ཡ་བྱ་དགོས་སམ། དེ་ནི་ཕ་མ་ཚོའི་བྱ་བ་རེད། ཁྱོད་ཀྱིས་འདོན་རྒྱུའི་དཔེ་ཆ་མི་འདོན་པར་དེར་ཁ་ཡ་བྱས་ནས་ཅི་བྱེད་ཟེར། ཡིན་ནའང་དགེ་རྒན་རྡོ་རྗེ་ཡི་ཁ་ནས་ཀྱང་ད་ལོའི་ཐན་པ་འདི་ཨང་ཞེས་འཁང་ར་ལྟ་བུ་ཞིག་བྱེད་ཞོར། ལག་པས་རྔུལ་ཆུ་འབྱིད་བཞིན་ཕྱི་རོལ་ཏུ་མིག་ཞགས་ཤིག་འཕངས་སོང་།

ཕྱི་དྲོའི་མཚམས་སུ། སྡེ་འདབས་ཀྱི་གད་པ་དེའི་ཁར་སེར་ལམ་ལམ་གྱི་ཅི་ཞིག་སློབ་གྲོགས་ཚོས་ཕྱི་སྐོར་ནང་སྐོར་བྱས་འདུག འོ།  དེ་ནི་ངའི་སྒྲུང་གཏམ་ཁྲོད་འབྲི་བཞིན་པའི་སློབ་གྲོགས་བཀྲ་ཤིས་རེད། ཁོའི་གདོང་དུ་རྔུལ་ཆུའི་དོག་པ་རེ་རེ་ཕྲེང་ཐག་ཐོར་བ་དང་འདྲ་བར་འཐོར་གྱིན་འདུག་ནའང། རྔུལ་ཆུའི་སྦངས་པའི་འཛུམས་མདངས་དེར་སྔར་བཞིན་བཀྲག་མདངས་ཤིག་འཚེར་ཞིང་གདའ། སྐབས་དེར་སློབ་གྲོགས་ཤིག་གིས། བཀྲ་ཤིས། ཁྱོད་ཀྱིས་ཆར་ལྭ་དེ་ངས་ཚོད་ལྟ་ཞིག་བྱས་ན་ཆོག་གམ་ཟེར།  དེ་ནི་གཞན་མིན་པར་སྔར་བཞིན་ཁ་སྔོན་དུ་གྲགས་པར་དགའ་བའི་སྟོབས་ལྡན་རེད། སློབ་གྲོགས་གཞན་རྣམས་ཀྱིས་བཀྲ་ཤིས་ཀྱིས་སྟོབས་ལྡན་ལ་ལན་ཇི་ལྟ་བུ་ཞིག་གདོན་པར་བསྒུགས་འདུག  

ཅི་ཟེར། ངའི་ཆར་ལྭ་ཁྱོད་ཀྱིས་ཚོད་ལྟ་ཞིག་བྱེད་རྒྱུ། ཧ་ཧ་ཧ། བཀྲ་ཤིས་ཀྱིས་རང་ཉིད་ལ་མི་མཛའ་བའི་ཧབ་དགོད་ཅིག་བྱས་རྗེས། ཁྱོད་ཀྱིས་ས་མ་རུབ་གོང་ནས་རྨི་ལམ་རྨི་བཞིན་འདུག་ག་ཞེས་སྐད་གདངས་ཀྱང་ཡུན་ལ་བསྲིངས་ཤིང་།  རང་ཉིད་ལ་མི་མཛའ་བའི་གཏམ་དཔེ་ཞིག་འཐེན་སོང་།  

བཀྲ་ཤིས་ལོ་ལོ། དེ་ནི་སྟོབས་ལྡན་གྱི་སྐད་རེད།

ཨ་ཁུ་ལོ་ལོ། ཨ་ཁུ་ལོ་ལོས་ཆར་ལྭ་ཁུགས་སམ། དེ་ནི་བཀྲ་ཤིས་ཀྱི་སྐད་རེད།

སློབ་གྲོགས་གཞན་རྣམས་ཀྱིས་ཁ་ཁུ་སིམ་མེར་ཁོ་གཉིས་ཀྱིས་ཅི་བཤད་ལ་མཉན་འདུག  

འུ་གཉིས་ཀྱི་འདང་། སྟོབས་ལྡན་གྱི་ཁ་ནས་ཀྱང་བྱིས་པ་ཞིག་ལ་མི་མཛའ་བའི་སྐད་ཆ་ཞིག་བཤད་བྱུང་།

ཅི་ཞིག་གི་འདང་། འདང་ཟེར་བ་ཅི་རེད། ད་ཐེངས་བཀྲ་ཤིས་ཀྱིས་འདང་ཟེར་བའི་སྐད་ཆ་དེའི་ནང་དོན་ཧ་མ་གོ་བ་འདྲ།

འདང་ཟེར་བ་ནི་འདང་། དཔེར་ན་འུ་གཉིས་ཀྱི་འདང་ལྟ་བུ་རེད།

ང་ལ་ཆར་ལྭ་ལས་འདང་མེད། བཀྲ་ཤིས་ཀྱི་འདང་ཞེས་པའི་ནང་དོན་གཏན་ནས་ཧ་མ་སོང་།

སྐབས་དེར་རླུང་ཡང་མོ་ཞིག་དང་བསྡོངས་ནས་མཁའ་དབུགས་དྲོན་པོ་ཞིག་ཁོ་ཚོའི་བར་དུ་མེ་བཞིན་བསྐྱིལ་བྱུང་།  ཅི་འདྲའི་ཚིག་པ་ལ། ང་འཚིག་ནས་ཤི་ཐལ། ལྷན་གྲུབ་ཀྱིས་དེ་ལྟར་བཤད་ཀྱིན་སྔོན་ལ་བུད་སོང་། དེའི་འཕྲོར་འཇིགས་མེད་དང་སྒྲོལ་མ་སོགས་ཀྱིས་ཀྱང་སྟོབས་ལྡན་ལ་རེ་བ་མེད་པ་ཤེས་པས། ལྷུན་འགྲུབ་ཀྱི་རྗེས་བསྙེགས་ནས་བུད་སོང་། ད་ནི་གྲོ་ཞིང་ཁའི་སྡེ་འདབས་ཀྱི་རྐང་ལམ་ཕྲ་མོ་དེའི་སྟེང་དུ་བཀྲ་ཤིས་དང་སྟོབས་ལྡན་གཉིས་ལས་ལྷག་མི་འདུག

སེར་ལམ་ལམ་བྱེད་པ་དེ་བཀྲ་ཤིས་རེད།

སྐྱ་ཐོ་ཐོ་བྱེད་པ་དེ་སྟོབས་ལྡན་རེད།

སྟོབས་ལྡན་གྱིས་བཀྲ་ཤིས་ལོ་ལོ། ཁྱོད་ཀྱིས་ཆར་ལྭ་དེ་ང་ལ་ཚོད་ལྟ་ཞིག་བྱ་རུ་ཆུགས་དང་། ངས་ཁྱོད་རང་ཁུར་ནས་ཡུལ་ལ་འགྲོ་ཟེར།

སྟོབས་ལྡན་གྱི་གཏམ་དེས་ཚ་བས་གདུང་བའི་བཀྲ་ཤིས་ཀྱི་སེམས་པ་དལ་བུར་བསྒུལ་བྱུང་། ཡིན་ནའང་ཁོས་ཐད་ཀར་ཁས་མི་ལེན་པར། དེས་ན་སྔོན་ལ་ང་ཕྱག་ཅིག་འཚོལ་དང་། དེ་ནས་ངས་ཁྱོད་ལ་ཚོད་ལྟ་བྱ་རུ་འཇུག་ཟེར།

སྟོབས་ལྡན་ནི་དགའ་སྟེ་བསྟུད་མུར་བཀྲ་ཤིས་ལ་ཕྱག་གསུམ་འཚལ་སོང་།

སེར་ལམ་ལམ་གྱི་ཆར་ལྭ་གྱོན་པའི་བྱིས་པ་ཞིག་གིས་བྱིས་པ་གཞན་ཞིག་ཁུར་ཏེ། གྲོ་ཞིང་ཁའི་སྡེ་འདབས་ཀྱི་རྐང་ལམ་ཕྲ་མོའི་སྟེང་ཁྱར་ཁྱོར་དུ་འགྲོ་བཞིན་པ་ནི་སྟོབས་ལྡན་རེད། བཀྲ་ཤིས་ནི་བྲན་བདག་ཅིག་དང་མཚུངས་པར་སྟོབས་ལྡན་གྱི་རྒྱབ་ནས་སི་ལི་རྒྱག་ཅིང་། གདོང་དུ་འཛུམ་མདངས་འདོམ་གང་དཔྱངས་འདུག  གོམ་པ་ཁྱར་ཁྱོར་སྤོ་བའི་སྟོབས་ལྡན་གྱི་རྣ་འབིགས་འབིགས་དེའི་སྟེང་དུ་རྔུལ་ཆུ་ནི་བསིལ་བ་བཞིན་འཛུམ་བྱུང་།  ཁོས་དབུགས་ཧལ་ཧལ་དུ་ལེན་བཞིན་བཀྲ་ཤིས་ཁུར་ནས་མདུན་དུ་དཀའ་ཚེགས་ཀྱིས་སྐྱོད་ཀྱིན་གདའ།

དེ་དུས་སྡེ་མི་ཡོངས་ཀྱིས་འཕེན་འགྱུར་གྱི་ཀླུ་གཏོར་དེར་རང་རང་ས་རུ་གྲ་སྒྲིག་བྱེད་ཀྱིན་འདུག  ཀླུ་གཏོར་དེ་ལ་མི་མཁོ་པ་གཅིག་ཀྱང་མེད་དེ། འབྲུ་སྣ། གོས་སྣ། ཤིང་སྣ།  སྡེ་མི་ཚོས་ལོ་དེའི་ཐན་པ་བཟློག་ཆེད་རང་ལ་ཅི་ཡོད་མ་ཎི་ཁང་དུ་སྐྱེལ་གྱིན་འདུག  སྡེ་དཔོན་གྱིས་གོས་ཆེན་འཁོར་ལོ་མ་ཞིག་གི་ཁ་ནས་གོར་ཤུར་མོ་ཞིག་བྲེ་བཞིན་པའི་སྒང་དུ། བཀྲ་ཤིས་ཀྱིས། ཨ་ཕ་ལོ་ལོ། ང་ལ་ཆར་བ་ཞིག་འབབ་དུ་ཆུགས། ངས་ཆར་བའི་ནང་དུ་ཆར་ལྭ་གྱོན་ན་འདོད་ཅེས་ཡང་ཡང་ཞུ་བ་བྱས་སོང་།

སྡེ་དཔོན་གྱིས་ཆར་བ་ནི་སྔགས་རྒན་རིག་འཛིན་གྱིས་ཀྱང་འབབ་དུ་འཇུག་མི་ནུས་ན། ངས་ག་ལ་འབབ་དུ་འཇུག་ཐུབ་ཟེར།

བཀྲ་ཤིས་ཀྱིས། ཨ་ཕ་ལོ་ལོ། ཨ་ཕ་ལོ་ལོ་ཞེས་ཡང་ཡང་ཞུ་བ་བྱེད།

ངས་ཁྱོད་ལ་མི་སྐད་བཤད་རུང་ཁྱོད་ཀྱིས་མི་གོ་བ་ཅི་རེད།

ཨ་ཕ་ལོ་ལོ། ཨ་ཕ་ལོ་ལོ།

འདིས་གླེན་བཤད་རྒྱག་པར་ལྟོས་དང་།ངས་ཆར་བ་འབབ་དུ་འཇུག་ཐུབ་ན་གོས་བྲེས་ནས་ཅི་བྱེད།

ཨ་ཕ་ལོ་ལོ་། ཨ་ཕ་ལོ་ལོ།

བཀྲ་ཤིས་ཀྱིས་ཨ་ཕའི་རྒྱབ་ལ་འཇུས་ནས་ཡང་ཡང་བསྒུལ་བྱུང་བས།  སྡེ་དཔོན་གྱི་ལག་གི་གོས་ཆེན་འཁོར་མོ་མ་དེ་གསེག་ནས་བྲེས་སོང་། གོས་ཆེན་གསེག་ནས་བྲེས་སོང་བ་དེས་སྡེ་དཔོན་གྱི་སྙིང་རླུང་སྟོད་ལ་འཚང་དུ་བཅུག འདྲེ་ཕྲུག་འདི། ད་ཁྱོད་ལ་ཆར་དགོས་ན་མ། བཀྲ་ཤིས་ཀྱི་གདོང་དུ་ཐལ་ལྕག་གིས་བརྒྱབ་པའི་ཅལ་སྒྲ་དེ་ཡིས་བསུས་ཡོང་བ་ནི་བཀྲ་ཤིས་ཀྱི་ཨ་མ་རེད།

ཁྱོད་ཀྱིས་ཞི་ལིར་གཅར་ནས་ཅི་བྱེད། ཞི་ལི་ཁུ་ཚུར་ཙམ་ཞིག་ལ་དེ་ལྟར་རྒྱག་རིན་ཞིག་ཡོད་དམ། ཤོག  ཞི་ལི་འདིར་ཤོག

བཀྲ་ཤིས་ཀྱི་ཨ་མས་མིག་ནས་མཆི་མ་ཆར་བ་བཞིན་འབབ་པའི་བཀྲ་ཤིས་རང་གི་གམ་ཏུ་བོས་ཤིང་། དེ་ནས་ཨ་མས་ཁྱོད་ལ་ཆར་འབབ་དུ་འཇུག་ཟེར་བ་ན། བཀྲ་ཤིས་ཀྱི་ངོ་གདོང་ནམ་མཁའ་བཞིན་དྭངས་ཤིང་། བཀྲ་ཤིས་ཀྱི་མིག་ཆུ་ཡང་ཆར་བ་བཞིན་འབབ་མཚམས་ཆད་སོང་།

བཀྲ་ཤིས་ཀྱི་ཨ་མས་ཆུ་རྫ་ལས་ཆུ་འགྱིག་ཤོག་ཆེན་པོ་གང་བཅུས་ཤིང་། འགྱིག་ཤོག་ཆེན་པོ་དེ་ལྭ་བ་སྐམ་བྱེད་ཀྱི་ལྕགས་གདང་དུ་བཏགས་རྗེས། ཞི་ལི་འདིར་ཤོག་ཅེས་བོས་བྱུང་། བཀྲ་ཤིས་ཀྱིས་ཨ་མས་ཅི་ཞིག་བྱེད་ཀྱིན་པ་མི་ཤེས་མོད། ཨ་མས་བཀོད་སྒྲིག་ལྟར་འགྱིག་ཤོག་ཆེན་པོ་དེའི་འོག་ཏུ་འགྲེངས་ནས་བསྡད། སྐབས་དེར་ཨ་མས་འབིག་ཅིག་འཁྱེར་ཡོང་ནས་འགྱིག་ཤོག་དེར་ཁུང་བུ་ཆེ་ཆུང་མེད་པ་འགའ་བཏོད་པ་ན། ཁུང་བུ་དེ་དག་ལས་དངོས་གནས་ཆུ་ནི་ཆར་བ་བཞིན་ཤག་ཤག་ཏུ་བབས་བྱུང་།

འོ། ཆར་བ་བབས་བྱུང་། ཆར་བ་བབས་བྱུང་།

བཀྲ་ཤིས་ཀྱིས་ཤག་ཤག་འཇོ་བ་དེ་ནི་ཆར་བ་མིན་པ་ཤེས་ནའང་སེམས་པ་རབ་ཏུ་དགའ་སྟེ་དགའ་བའི་དགའ་འབོད་བྱེད་ལ། མོའི་ཨ་མའི་གདོང་དུ་འཛུམ་ཟླ་བ་འདྲ་ཞིག་ཤར་ནས་བཀྲ་ཤིས་ལ་བལྟས་འདུག  སྡེ་དཔོན་གཅིག་པུ་ངོ་གནག་ནས་བཀྲ་ཤིས་དང་ཁོའི་ཨ་མ་གཉིས་ལ། འདི་གཉི་ག་སྨྱོས་འདུག་ཟེར་ཞོར་ཁང་པ་མར་འཁོར་དེའི་ནང་དུ་འཛུལ་སོང་།

འོ། ཆར་བ་བབས་བྱུང་། ཆར་བ་བབས་བྱུང་།

འོ། ཆར་བ་བབས་བྱུང་། ཆར་བ་བབས་བྱུང་།

བཀྲ་ཤིས་དོན་འགྲུབ་ཀྱི་དགའ་འབོད་ཀྱི་སྒྲ་ནི་ཁོ་ཚང་གི་གཞིས་ཀའི་ནང་ཀུན་ཏུ་ཁྱབ་སོང་།

སྡེ་དཔོན་གྱིས་གོས་ཤུར་མོ་ཞིག་བཟུང་ཞིང་། ངོ་མ་འདི་གཉི་ག་སྨྱོས་འདུག་ཅེས་ཆིག་ལབ་ལྟ་བུ་ཞིག་རྒྱག་ཞོར། ཕྱི་མིག་གིས་ཡང་ཡང་ལྟ་བཞིན་རྒྱ་སྒོ་ཁྲོག་སེ་བརྒྱབ་སྟེ་བུད་སོང་།

  འོ། ཆར་བ་བབས་བྱུང་། ཆར་བ་བབས་བྱུང་།

འོ། ཆར་བ་བབས་བྱུང་། ཆར་བ་བབས་བྱུང་།

ཀླུ་གཏོར་འཕེན་པའི་ཉིན་མོ་དེར་སྡེ་བའི་ནང་གི་གསར་བུ་ཚོས། མིའམ་ཀླུ་ཡི་གཟུགས་སུ་བཞེངས་པའི་གཏོར་མ་ཆེན་མོ་དེའི་སྟེང་དུ་རྒྱན་ཆ་སྣ་ཚོགས་འདོགས་ཀྱིན་འདུག  སྔགས་རྒན་རིག་འཛིན་གྱིས་རས་ལྭ་དམར་སྨུག་དེ་གཡང་ཤམ་བྱས་ཏེ་གཏོར་མ་ཆེན་པོ་དེར་གཡས་ལྟ་གཡོན་ལྟ་ལན་འགའ་བྱས་རྗེས། གཏོར་མ་ཟེར་བ་རེད། གཏོར་མ་འདིར་ན་བཟའ་སེར་པོ་ཞིག་ཡོད་ཚེ་ཅི་མ་རུང་། ད་ནི་ན་བཟའ་སེར་པོ་ཞིག་ཆད་འདུག་ཡ་ཞེས་སྨྲེ་སྔགས་ཆིལ་ཆིལ་དུ་འདོན་བཞིན་འདུག སྐབས་དེར་སྡེ་དཔོན་མི་ཚོགས་ཀྱི་གསེང་ནས་འཛུལ་ཡོང་སྟེ་ངེད་ཚང་ལ་ཆར་ལྭ་སེར་པོ་ཞིག་ཡོད། དེ་ཆོག་གམ་ཟེར། སྔགས་རྒན་རིག་འཛིན་གྱི་གདོང་དུ་གློ་བུར་འཛུམ་ཆུང་ཞིག་མངོན་ཏེ། སེར་པོ་ཡིན་ནམ། སེར་པོ་ཡིན་ན་ལོས་ཆོག  མྱུར་དུ་འཁྱེར་ཤོག་དང་ང་ཚོས་གཏོར་མ་འཕེན་རྒྱུ་བྱ་ཞེས་བསྐུལ་བ་ན། སྡེ་དཔོན་ནི་བྱ་ལྟར་འཕུར་ཏེ་སོང་ནས་བྱ་ལྟར་འཕུར་ཡོང་ཞིང་།  བཀྲ་ཤིས་ཀྱི་ཆར་ལྭ་སེར་པོ་དེ་སྔགས་རྒན་རིག་འཛིན་གྱི་ལག་ཏུ་ཕུལ།

ཆར་ལྭ་སེར་པོ་སེར་ལམ་ལམ་གྱོན་པའི་གཏོར་མ་དེ་གསར་བུ་ཚོས་ཤིང་གི་ཁྲི་ལ་བསྐྱོན་ཏེ་ལམ་དུ་ཆས། སྔགས་རྒན་རིག་འཛིན་གྱིས་གཏོར་མ་དེ་ལམ་འགྲམ་གྱི་གད་པའི་ནང་འཕངས་རྗེས་ཕྱིར་མིག་ལྟ་མི་ཉན་ཟེར་བ་ན། གསར་བུ་ཚོས་མགྲིན་གཅིག་ཏུ་ལགས་སོ་ཟེར། སེར་ལམ་ལམ་གྱི་གཏོར་མ་དེ་གསར་བུ་ཚོས་ཕྱི་སྐོར་ནང་སྐོར་བྱས་ཏེ་གྲོ་ཞིང་ཁའི་རུ་བར་བརྒྱུད་དེ་ཁུར་སོང་། སེར་ལམ་ལམ་གྱི་ཉི་འོད་འོག་ཏུ་སེར་ལམ་ལམ་གྱི་ཀླུ་གཏོར་དེ། དེ་སྔོན་སློབ་གྲོགས་ཚོས་སེར་ལམ་ལམ་གྱི་བཀྲ་ཤིས་བསྐོར་བ་བཞིན་གསར་བུ་ཚོས་ཕྱི་སྐོར་ནང་སྐོར་བྱས་ནས་འགྲོ་བཞིན་འདུག  ཤུལ་དུ་སྔགས་རྒན་རིག་འཛིན་གྱིས་ཌ་རུ་དང་སྦུབས་ཆ་དཀྲོལ་བའི་སྒྲ་བརྗིད་རྔམ་དང་བཅས་བར་མེད་དུ་གྲགས་འོངས་པ་ན། གྲོ་ཞིང་ཁའི་མཁའ་དབུགས་ཁྲོད་དུ་ཡང་བརྗིད་རྔམ་དང་བྲེལ་ཤ་ཞིག་གིས་ཀུན་ནས་ཁེངས་འདུག

དེ་དུས་རྒྱང་རིང་གི་གནམ་སའི་མཚམས་ནས་སྤྲིན་པ་རྟ་རྒན་འདྲ་བ་དུ་མ་ལངས་བྱུང་ལ། དེ་ནས་རྟ་རྒན་ཚོས་སྔོག་མ་གྱེན་ཏུ་གཟེངས་ཤིང་ཡང་ཡང་གསིག་པར་བྱེད།  སྔགས་རྒན་རིག་འཛིན་གྱི་ཌ་རུ་དང་སྦུབས་ཆའི་སྒྲ་ཡང་ཇེ་ཆེ་ནས་ཇེ་ཆེར་གྱུར། བར་སྐབས་ཤིག་ལ་སྤྲིན་པ་རྟ་རྒན་འདྲ་བ་དེ་ཚོ་གྲོ་ཞིང་ཁའི་བར་སྣང་དུ་ཇེ་ཉེ་ནས་ཇེ་ཉེར་སོང་བ་དང་། ལོ་དེའི་ཆར་བ་ཐོག་མ་སྡེ་མི་ཡོངས་ཀྱིས་རེ་ལྟོས་གྲངས་མེད་ཁྲོད་མཚར་སྣང་དང་བཅས་ཤག་ཤག་ཏུ་བབས་བྱུང་།

འོ། ཆར་བ་བབས་བྱུང་། ཆར་བ་བབས་བྱུང་།

འོ། ཆར་བ་བབས་བྱུང་། ཆར་བ་བབས་བྱུང་།

འོ། ཆར་བ་བབས་བྱུང་། ཆར་བ་བབས་བྱུང་།

སྡེ་མི་རྣམས་ནི་བྱིས་པ་བསམ་མེད་ཏག་ཏག་དང་འདྲ་བར་ཆར་བའི་ཀློང་དུ་དགའ་འབོད་དང་ས་ལྡིང་གནམ་ལྡིང་བྱེད་ཅིང།སྡེ་དཔོན་གྱི་གདོང་གི་སེམས་ཁྲལ་མ་ལུས་ཆར་བས་བཀྲུས་པ་བཞིན་འཛུམ་ཤིག་ཤིག་ངང་། ད་ནི་དགའ་བ་ལ། ད་ནི་སྐྱིད་པ་ལ་ཟེར་བ་ན། སྡེ་མི་རྣམས་སྡེ་དཔོན་གྱི་སྟེང་དུ་རུབ་ཡོང་སྟེ་ལ་ལས་སྡེ་དཔོན་གྱི་ལག་པ་ནས་འཇུས་ཤིང་། ལ་ལས་སྡེ་དཔོན་གྱི་རྐང་པ་ནས་འཇུས་ཏེ་མཁའ་ལ་བཀྱགས་ཤིང་སྐྱིད་པའི་དགོད་སྒྲ་ལྷང་ལྷང་སྒྲོག  

དེ་དུས་གྲོ་ཞིང་ཁ་སློབ་ཆུང་ནང་གི་ལྕང་སྡོང་གུག་ཏོ་དེའི་སྐེ་རུ་དཔྱངས་པའི་ཅོང་རྙིང་བཙའ་ཏོ་དེ་ཧ་ཅང་རྒྱུན་ལྡན་ངང་ཏིང་ཏིང་ཏིང་གྲགས་པ་དང་། སྡེ་འདབས་ཀྱི་རྐང་ལམ་ཕྲ་མོའི་སྟེང་དུ་བྱིས་པ་འགའ་བརྒྱུགས་ནས་འོང་བཞིན་འདུག   ཆེས་སྔོན་དུ་རྒྱུག་མཁན་དེ་ནི་བཀྲ་ཤིས་རེད། སྟོབས་ལྡན་གྱིས་སྔོན་དུ་རྒྱུག་བཞིན་པའི་བཀྲ་ཤིས་ལ། ཝེ།  བཀྲ་ཤིས། ཁྱོད་ཀྱིས་ཆར་ལྭ་མི་གོན་ནམ། ཝེ། བཀྲ་ཤིས་ཞེས་ཡང་ཡང་འབོད་ཀྱིན་འདུག་ནའང་། བཀྲ་ཤིས་ཀྱིས་སྟོབས་ལྡན་གྱི་འབོད་སྒྲ་རྣ་རྒྱབ་ཀྱི་ཆར་ཀློང་དུ་བོར་ནས་མདུན་དུ་རྒྱུག་བཞིན་འདུག  ཁོས་རང་གིས་རང་ལ་ཞོགས་པར་ཆར་ལྭ་སློབ་གྲྭར་འཁྱེར་རྒྱུ་བརྗེད་པར་ལེ་ལན་བདའ་བཞིན་ཤུགས་ཀྱིས་བརྒྱུགས། ཁོའི་སེམས་ཁོང་དུ་ཆར་ལྭ་སེར་པོ་དེ་ཁོ་ན་དྲན་བཞིན་འདུག  ཆར་ལྭ་སེར་པོ་དེ་ཁོའི་མིག་ལམ་དུ་སེར་ལམ་ལམ་ངང་མངོན་བྱུང་། ད་ནི་མྱུར་དུ་ཡུལ་ལ་ལོག་ནས་ཆར་ལྭ་ཡིད་ཚིམས་པ་ཞིག་གོན་ཆོག  ད་ནི་སྐྱིད་པ་ལ། ད་ནི་དགའ་བ་ལ། ཆར་ཞོད་ཆེན་པོ་དེའི་ཁྲོད་དུ་བཀྲ་ཤིས་ནི་གློག་ཞགས་ཤིག་དང་འདྲ་སྟེ། ཁོ་ནི་རྐང་ལམ་ཕྲ་མོ་དེའི་སྟེང་ནས་འཕུར་མ་ལྡིང་གིས་འོང་བཞིན་འདུག  འཕུར་མ་ལྡིང་གིས་རྐང་ལམ་ཕྲ་མོ་དེད་ནས་ལམ་འགྲམ་གྱི་གད་པ་དེའི་ཁར་བསླེབས་དུས། བཀྲ་ཤིས་རྡོག་འདྲེད་ཤོར་ཐེངས་ཤིག་གིས་གད་པ་དེའི་ནང་དུ་ཡེར་སོང་།ཁོའི་མིག་ལམ་དུ་ཆར་ལྭ་སེར་པོ་དེ་ནི་སེར་ལམ་ལམ་བཞད་པའི་མེ་ཏོག་ཚོམ་བུ་ཞིག་དང་འདྲ་བར། སེར་ལམ་ལམ་ངང་མཁའ་དབྱིངས་སུ་དལ་བུར་རླུང་གིས་བསྐྱོད་ཅིང་།ཆར་ལྭ་དེ་སྡེ་མི་རྣམས་ཀྱི་དགོད་སྒྲ་ལྷང་ལྷང་ཁྲོད་རླུང་གིས་སྐྱོད་ཀྱིན་སྐྱོད་ཀྱིན་མི་སྣང་བར་གྱུར་སོང་།  བཀྲ་ཤིས་དྲན་མེད་དུ་བརྒྱལ་བའི་སྐབས་དེར། ཆར་ལྭ་སེར་པོ་གྱོན་པའི་མིའམ་ཀླུ་ཡི་གཟུགས་སུ་བཞེངས་པའི་གཏོར་མ་ཆེན་པོ་དེ་ཡིས། རང་གི་གམ་དུ་ཀན་རྐྱལ་དུ་ཉལ་བའི་བྱིས་པ་དེར་འཛུམ་གྱི་ལེར་བལྟས་འདུག་ལ། བྱིས་པ་དེའི་མགྲིན་པ་ལས་ཧུར་སྒྲ་ལན་འགའ་གྲགས་རྗེས། ཁའི་གྲུ་ཟུར་ནས་ཁྲག་ནི་ཆར་བ་དང་འདྲེས་ནས་ས་ལ་ཟེགས་འོངས། ཡིན་ནའང་བྱིས་པ་དེའི་མིག་གཉིས་གཡོ་བ་མེད་པར་གཏོར་མ་ཆེན་པོ་དེའི་སྟེང་དུ་གྱོན་པའི་ཆར་ལྭ་སེར་པོ་དེར་ཅེར་འདུག

chisanghua སྤེལ་དུས། - 2013-5-17 11:11:00
 

བཀྲ་ཤིས་ཞེས་པའི་ཁྱི་རྒན་ཞིག་རྗེས་སུ་དྲན་པ།

                   སྒོ་མེ་ཚེ་རིང་བཀྲ་ཤིས།

བཀྲ་ཤིས་ནི་ཁྱི་རྒན་ཞིག་གི་མིང་ཡིན། སྒྲོལ་མ་ནི་རྨོ་མོ་ཞིག་གི་མིང་ཡིན།

ཁྱི་རྒན་བཀྲ་ཤིས་ཤི་ནས་ལོ་མང་འགོར་ཟིན་ལ། རྨོ་མོ་སྒྲོལ་མའང་ཤི་ནས་ལོ་མང་འགོར་ཟིན།

དེ་ནི་ལོ་ངོ་མང་པོའི་སྔ་རོལ་སྟེ། དེ་དུས་ཕ་ཡུལ་གྲོ་ཞིང་ཁའི་རུ་བར་དུ་ག་ནས་ཡོང་བ་མི་ཤེས་པའི་ཁྱི་ལྡོམ་མང་པོ་མཐོང་རྒྱུ་ཡོད་ལ། ཁྱི་ལྡོམ་དེ་དག་ལས་མང་ཆེ་བར་ཁྱི་ཡི་མཚན་ཉིད་མི་ཚང་ཞེས་ཀྱང་བཤད་ཆོག་སྟེ། ཁྱི་ལ་ཡོད་འོས་པའི་ཟུག་སྐད་འབྱིན་མི་ཤེས་ཤིང། ཁྱི་ལ་ཡོད་འོས་པའི་བཙན་ངར་ཡང་མེད་པར། ཁྱི་ལྡོམ་དེ་དག་གིས་མི་ཞིག་མཐོང་བའི་མོད་ལ་མགོ་སྒུར་སྒུར་དང་རྔ་མ་གཡུག་གཡུག་བྱས་ནས་བྲོས་འགྲོ་བས། ང་དང་ངའི་རྩེ་རོགས་བྱིས་པ་ཚོ་ཡང་ཁྱི་དེ་རིགས་ལ་མི་སྐྲག་པར་མ་ཟད། ཐ་ན་གང་ནས་འཕྲད་ཀྱང་རྡོ་རྡུང་བྱས་ནས་ཡར་བདའ་མར་བདའ་བགྱིས་པ་ཡིན།  ཡིན་ནའང་ད་ལྟ་ཕ་ཡུལ་གྲོ་ཞིང་ཁའི་རུ་བར་དུ་ཁྱི་ལྡོམ་གཅིག་ཀྱང་མཐོང་རྒྱུ་མི་འདུག  ཁྱི་ལྡོམ་རྣམས་སྔར་ནས་ཕ་ཡུལ་གྲོ་ཞིང་ཁའི་འདབས་འབྲེལ་གྱི་རྒྱ་སྡེ་དེ་དག་གི་ཁ་ཟས་སུ་གྱུར་ཟིན། ཁྱི་ལྡོམ་དེ་དག་ཁྲོད་ཀྱི་ཁྱི་རྒན་ཞིག་ནི་བདག་གིས་ནམ་ཡང་བརྗེད་ཐབས་མི་འདུག་སྟེ། དེ་ནི་གོང་དུ་གླེང་བའི་ཁྱི་རྒན་བཀྲ་ཤིས་ཞེས་པ་དེ་ཡིན།

   ཁྱི་རྒན་བཀྲ་ཤིས་ནི་ཁྱི་ལྡོམ་མང་པོའི་ཁྲོད་ཀྱི་ལས་བསོད་ཅན་གྱི་ཁྱི་རྒན་ཞིག་ཡིན། དེ་ལྟར་བཤད་དོན་ནི་ཁྱི་རྒན་བཀྲ་ཤིས་ལ་ཁྱི་ལྡོམ་གཞན་ལ་མེད་པའི་འཇོན་ཐང་མང་པོ་ངོམ་རྒྱུ་ཡོད་པ་རེད། ཁྱོད་ཀྱིས་ཁྱི་རྒན་བཀྲ་ཤིས་ལ་དད་པ་བྱ་རོགས་ཞེས་བརྗོད་པའི་ཚེ་ན། ཁྱི་རྒན་བཀྲ་ཤིས་རྐང་པ་གཉིས་ཀར་བརྟེན་ནས་ཡར་འགྲེང་ཞིང་ལག་ཟུང་གིས་ཐལ་མོར་སྦྱོར་བར་བྱེད་ལ།   ཁྱེད་ཀྱིས་ཁྱི་རྒན་བཀྲ་ཤིས་ལ་མ་ཎི་འདོན་རོགས་ཞེས་བསྐུལ་བའི་ཚེ་ན། ཁྱི་རྒན་བཀྲ་ཤིས་ཀྱིས་ཁ་ནས་ཨུམ་ཨུམ་ཞེས་སྒྲ་འབྱིན་པར་བྱེད་པས། དམ་པ་ལྷ་ཆོས་ལ་དད་པ་རྩེ་གཅིག་ཏུ་བསྒོམས་པའི་རྨོ་མོ་སྒྲོལ་མས། ཁྱི་རྒན་འདིས་སྐྱེས་པ་ཁྱི་ལུས་བླངས་པ་མ་གཏོགས་རྣམ་ཤེས་དགའ་ཞིག་ཡིན་པ་གདོན་མི་ཟ་ཞེས་རང་ཁྱིམ་གྱི་སྒོ་ཁར་ཁྱི་ཁང་དྲོན་པོ་ཞིག་ལས་ཤིང་། ཁྱི་རྒན་གྱི་མིང་ལའང་བཀྲ་ཤིས་ཞེས་པའི་མི་མིང་དེ་བཏགས་པ་རེད། རྨོ་མོ་སྒྲོལ་མའི་ཁྱོ་ག་སྤོ་བོ་རིག་འཛིན་ནི་ང་ཚོའི་ཡུལ་ཕྱོགས་སུ་མཚན་སྙན་ཕྱོགས་ཀུན་ཏུ་ཁྱབ་པའི་སྔགས་རྒན་ཞིག་ཡིན་པས། ཁོ་ཡང་རྨོ་མོ་སྒྲོལ་མའི་གཏམ་ལ་ཡིད་ཆེས་ཆེན་པོ་བྱུང་། ཁོ་རྒན་རྒོན་གཉིས་ལ་བུ་དང་བུ་མོ་གཅིག་ཀྱང་མེད་པས། རྒྱུན་དུ་ཁྱི་རྒན་བཀྲ་ཤིས་ནི་བུ་ཞིག་གི་ཚད་ལ་བཞག་སྟེ་ཟས་གང་ཞིམ་སྟེར་བཞིན་ཡོད། དེ་བས་ཁྱི་རྒན་བཀྲ་ཤིས་ཀྱིས་ཁྱི་ལྡོམ་གཞན་དག་དང་འདྲ་བར་ཟས་འཚོལ་མི་དགོས་པར་རང་འགྲུབ་ཡིན་ལ། བཏགས་ཁྱི་གཞན་དག་དང་འདྲ་བར་སྐེ་ལ་ལྕགས་ཐག་སྦྲེལ་མི་དགོས་པར་རང་དབང་ཡིན་པས། ཁྱི་ཞིག་ལ་མཚོན་ན་ཁྱི་རྒན་བཀྲ་ཤིས་ལས་སྐྱིད་པོ་ཞིག་ཡོད་མི་སྲིད། སྡེ་མི་ཀུན་གྱིས་ཀྱང་ཁྱི་རྒན་བཀྲ་ཤིས་ཁྱི་ཞིག་གི་ཚད་ལ་མི་འཇོག་པར་རྨོ་མོ་སྒྲོལ་མ་ཚང་གི་བཀྲ་ཤིས་ཞེས་འབོད་པར་བྱེད།

  ཁྱི་རྒན་བཀྲ་ཤིས་ཁྱི་ལྡོམ་ཞིག་ནས་རྨོ་མོ་སྒྲོལ་མ་ཚང་གི་བཀྲ་ཤིས་སུ་གྱུར་པ་ནས། བལྟས་བལྟས་ལ་རྒྱགས་པ་ཆགས་ཤིང་སྤུ་མདོག་ཀྱང་ཇེ་ལེགས་ནས་ཇེ་ལེགས་སུ་གྱུར། དེ་ནི་ཕ་ཡུལ་གྲོ་ཞིང་ཁའི་ཡུལ་མི་རྣམས་ལ་མཚོན་ན་དགའ་འོས་པའི་དོན་དག་ཅིག་མིན་ལ་སྐྱོ་དགོས་པའི་དོན་དག་ཅིག་དེ་བས་ཀྱང་ག་ལ་ཡིན།  ཡིན་ནའང་ང་ལ་མཚོན་ན་དེ་ནི་དགའ་འོས་པའི་དོན་དག་ཅིག་གཏན་ནས་མིན་པ་མ་ཟད་སྐྱོ་དགོས་པའི་དོན་དག་ཅིག་ཏུ་གྱུར།  དེའི་རྒྱུ་མཚན་ནི་ངའི་རྩེ་རོགས་ཚོས་ཁྱི་རྒན་བཀྲ་ཤིས་ལ་རྨོ་མོ་སྒྲོལ་མ་ཚང་གི་བཀྲ་ཤིས་ཞེས་འབོད་པའི་མཚུངས་སུ་ངའི་མིང་ལ་ཁྱི་རྒན་བཀྲ་ཤིས་ཞེས་འབོད་པས། ཐོག་མར་ང་རང་རྩེ་རོགས་ཚོའི་སྟེང་དུ་སྙིངས་ལངས་པ་དང་། མཐའ་མར་རྨོ་མོ་སྒྲོལ་མའི་སྟེང་དུ་སྙིང་ལངས་འོངས། ཁོའི་ཁྱི་རྒན་དེའི་མིང་ལ་ཚེ་རིང་དང་དོན་འགྲུབ། ཡང་ན་རྡོ་རྗེ་དང་འཇིགས་མེད་སོགས་གང་བཏགས་ན་བཏགས། བསམ་གཟས་ནས་ངའི་མིང་ཁྱི་རྒན་དེར་འདོགས་དོན་ཅི་ཡིན་ནམ། 

ཁྱི་རྒན་བཀྲ་ཤིས་ནི་སྔོན་དང་མི་འདྲ་བར་རྨོ་མོ་སྒྲོལ་མས་ཁོའི་སྐེ་ལ་བཏགས་པའི་གཡེར་དྲིལ་དེ་ཕར་གཡུག་ཚུར་གཡུག་བྱེད་ཅིང་། དྲིལ་སྒྲ་སིང་སིང་དུ་སྒྲོག་བཞིན་ཕ་ཡུལ་གྲོ་ཞིང་ཁའི་རུ་བར་ཀུན་ཏུ་ཧང་འགྲོས་བྱེད། དེའི་མཚུངས་སུ་ཁྱི་རྒན་བཀྲ་ཤིས་ཞེས་ངའི་མིང་ལ་བཏགས་པའི་མཚང་མིང་དེ་ཡང་། སྡེ་བ་ཡར་ནང་མར་ནང་ཀུན་གྱི་བྱིས་པ་ཚོའི་ཁ་ན་རྨོ་མོ་སྒྲོལ་མ་ཚང་གི་བཀྲ་ཤིས་ཀྱི་སྐེ་ལ་བཏགས་པའི་གཡེར་དྲིལ་བཞིན་སིང་སིང་དུ་གྲགས་འོངས།  ང་རང་སློབ་གྲྭར་སོང་ཚེ་སློབ་གྲོགས་ཚོས་ཀྱང་ང་ལ་ཁྱི་རྒན་བཀྲ་ཤིས་ཞེས་འབོད་པས། ངས་ང་ལ་ཁྱི་རྒན་བཀྲ་ཤིས་ཞེས་འབོད་པའི་སློབ་གྲོགས་ཚོར་རེ་རེ་བཞིན་རྡུང་རེས་བརྒྱབ་ནས་མགོ་རྔ་མ་ཕུད་སོང་། དེའི་དོན་དུ་ངས་སློབ་གྲོགས་ཚོར་ཁ་ཁྲག་སྣ་ཁྲག་བཞུར་དུ་བཅུག་པ་ཐེངས་མང་ཡིན་ལ། དེ་བཞིན་སློབ་གྲོགས་ཚོས་ང་ལ་ཁ་ཁྲག་སྣ་ཁྲག་བཞུར་དུ་བཅུག་པ་ཡང་ཐེངས་མང་ཡིན།  ཡིན་ནའང་དེས་ང་ལ་ཁྱི་རྒན་བཀྲ་ཤིས་འབོད་པ་དེར་བཀག་འགོག་བྱ་མ་ཐུབ། ལྡོག་སྟེ་དགེ་རྒན་རྡོ་རྗེ་ཡིས་ང་རང་མི་མང་གི་གྲས་སུ་བརྩེངས་ཤིང་ངའི་ལག་མཐིལ་དུ་ལྕང་ལྕུག་གིས་བྲབས་ཏེ། ང་ནི་སློབ་གྲོགས་བར་དུ་མཐུན་སྒྲིལ་མི་བྱེད་པའི་གཏེ་བོ་རེད་ཅེས་བསྒྲགས་པ་མ་ཟད། རྒྱུན་དུ་ང་རང་རེས་མོས་པ་མིན་ནའང་སློབ་ཁང་ནང་གཙང་སྦྲ་བྱེད་པའི་ཆད་པ་བཅད་པ་རེད། སྔོན་ཆད་ང་ནི་འཛིན་གྲྭའི་ནང་གི་སློབ་སྦྱོང་རྩེ་གྲའི་གྲས་ཡིན་ཞིང་། ད་དུང་འཛིན་གྲྭའི་སློབ་སྦྱོང་ཨུ་ཡོན་གྱི་འགན་ཡང་ཁུར་ཡོད།  ཡིན་ནའང་དེ་ནས་བཟུང་ངའི་སེམས་མི་སྐྱིད་པར་གྱུར་པས་སློབ་སྦྱོང་བྱ་འདོད་ཀྱི་འདུན་པའང་རིམ་གྱིས་ཉམས་སོང་། སློབ་སྦྱོང་བྱ་འདོད་ཀྱི་འདུན་པ་ཉམས་པ་དེས་ངའི་སློབ་སྦྱོང་གི་གྲུབ་འབྲས་ལ་ཐད་ཀར་ཤུགས་རྐྱེན་ཐེབས་ཏེ། མཇུག་རྒྱུགས་ཀྱི་སྐབས་སུ་ང་ནི་འཛིན་གྲྭའི་ནང་སློབ་སྦྱོང་ཆེས་ཞན་པའི་གྲས་སུ་ལྷུང་སོང་། དེའི་རྐྱེན་གྱིས་དགེ་རྒན་རྡོ་རྗེ་ཡིས་འཛིན་གྲྭ་གང་བོའི་མདུན་ནས་ངའི་སློབ་སྦྱོང་ཨུ་ཡོན་གྱི་མིང་བཏགས་བླངས་པ་ཡིན་ཞེས་བསྒྲགས་ཤིང་།  འཛིན་གྲྭའི་ཨུ་ཡོན་གྱི་མིང་བཏགས་རྒྱུན་དུ་ང་ལ་ཁྱི་རྒན་བཀྲ་ཤིས་ཞེས་འབོད་པའི་འཇིགས་མེད་ཁ་རྐོ་ལ་གནང་སོང་།  དེ་ནི་ང་ལ་མཚོན་ན་ཀུན་གྱིས་ཁྱི་རྒན་བཀྲ་ཤིས་ཞེས་བོས་པ་ལས་ཀྱང་སྐྱོ་དགོས་པའི་དོན་དག་ཅིག་ཏུ་གྱུར།  ད་དུང་དེ་ཙམ་གྱིས་ག་ལ་ཚད་དེ།  སློབ་སྦྱོང་ལ་ཇེ་ཞན་དུ་སོང་བ་ནས་ཨ་ཕའི་གདོང་གི་འཛུམ་མདངས་ཀྱང་ཉིན་རེ་ནས་ཉིན་རེར་ཇེ་ཉུང་དུ་སོང་ཞིང་། མཐའ་མར་ཨ་ཕའི་སྒོ་ལེབ་ལྟ་བུའི་ལག་པ་དེ་རྒྱུན་དུ་ངའི་གདོང་ལ་འབབ་རྐྱང་བྱེད་པས། ངའི་སེམས་སུ་ང་ནི་སུས་ཀྱང་བློར་མི་འབབ་པའི་བྱིས་པ་ཞིག་ཏུ་གྱུར་སོང་སྙམ་ཞིང་། མཚན་མོ་མང་པོར་མགོ་བོ་མལ་ཐུལ་གྱིས་བཏུམས་ནས་ཡང་ཡང་ངུས་པ་ཡིན། 

 

 དེ་ནི་གཟའ་ཉི་མའི་ཉིན་ཞིག་ཡིན། ཉིན་དེར་ཕ་མ་གཉིས་ཀ་ལས་ཀར་སོང་ཤུལ་དུ་ང་གཅིག་པུ་ཁྱིམ་དུ་བསྡད་ཡོད།  སྡེ་བའི་ནང་གི་བྱིས་པ་ཚོས་ང་རང་སྔར་ནས་རྩེ་རོགས་སུ་མི་ཐེ་བས་ད་ནི་ང་ལ་འགྲོ་ས་ཞིག་ཀྱང་མི་འདུག  སྐབས་དེར་ངའི་སེམས་སུ་དགེ་རྒན་རྡོ་རྗེ་ཡི་སྐད་ཆ་དེ་དག་དྲན་བྱུང་། ཁོས་ངའི་འཛིན་གྲྭའི་ཨུ་ཡོན་གྱི་མིང་བཏགས་བླངས་ནས་འཇིགས་མེད་ཁ་རྐོར་གནང་བའི་ཉིན་དེར། ཁྲིད་སྟེགས་སྟེང་ནས་མར་འཁོར་ཏེ། བཀྲ་ཤིས་ནི་ང་ཚོའི་འཛིན་གྲྭའི་ཞབས་འདྲེན་ཡིན་པས། རྗེས་སུ་ཁྱེད་ཅག་གིས་བཀྲ་ཤིས་ལ་གཏན་ནས་སློབ་སྦྱོང་བྱ་མི་ཉན། བཀྲ་ཤིས་ལ་སློབ་སྦྱོང་བྱས་ན་མཇུག་འབྲས་འདི་ཡིན་ཟེར་ཞོར་གྲལ་མགོར་བསླངས་པའི་ང་ལ་འགྲམ་ལྕག་ཚ་ཐག་པ་ཆོད་པ་ཞིག་གཞུས་སོང་།  དགེ་རྒན་རྡོ་རྗེ་ཡི་འགྱུར་ལྡོག་དེ་ནི་དངོས་གནས་ཧ་ལས་པ་ཞིག་སྟེ། སྔོན་ཆད་ཡིན་ན་ནམ་ཡང་སློབ་གྲོགས་བཀྲ་ཤིས་ལ་སློབ་སྦྱོང་བྱ་དགོས་ཞེས་ཀུན་གྱི་མདུན་དུ་ང་ནི་མཐེ་མོང་སྟོན་ས་ཞིག་ཡིན་ལ། དེ་དུས་ངའི་སེམས་ཁོང་དུ་དགེ་རྒན་རྡོ་རྗེ་ནི་རང་ཉིད་ཆེས་དགའ་མོས་བྱེད་སའི་དགེ་རྒན་ཞིག་ཏུ་རྩི་བཞིན་ཡོད། ངས་ད་དུང་མ་འོངས་པར་དགེ་རྒན་རྡོ་རྗེ་ལྟ་བུའི་དགེ་རྒན་ཞིག་བྱ་རྒྱུ་རང་གི་ཕུགས་བསམ་ཡིན་ཞེས་རྩོམ་ཡིག་ཏུ་ཡང་བྲིས་མྱོང་། ཐ་ན་ནམ་ཞིག་རང་ཉིད་ལས་བྱེད་པར་གྱུར་ཅིང་ཟླ་ཕོགས་བླངས་ཚེ་དགེ་རྒན་རྡོ་རྗེ་ལ་ཀ་ར་མང་པོ་མང་པོ་ཉོ་རྒྱུ་ཞེས་སློབ་གྲོགས་ཚོར་ཡང་བཤད་མྱོང་།  ཡིན་ནའང་ད་ནི་དགེ་རྒན་རྡོ་རྗེ་མཐོང་མ་ཐག་སྤྱི་བདེ་མི་སྣ་མཐོང་བ་བཞིན་ང་ནི་སྐྲག་སྟེ་ཉྭ་ཡང་ལྷེམ་ལྷེམ་བྱེད་ལ། ཁོ་ནི་ང་རང་ཆེས་མི་དགའ་བའི་དགེ་རྒན་ཞིག་ཏུ་གྱུར་སོང་། ངས་དེ་དག་དྲན་བཞིན་དྲན་བཞིན་དགེ་རྒན་རྡོ་རྗེ་ལ་སྐྱིན་པ་ཞིག་ལེན་དགོས་སྙམ་ཞིང་། དེ་ནས་ངས་སྐྱིན་པ་ཇི་ལྟར་ལེན་པའི་སྐོར་ལ་འདང་བརྒྱབ་བརྒྱབ་རྗེས་འཆར་གཞི་ཞིག་ཡིད་ལ་འཁོར་བྱུང་། ང་རང་སུས་ཀྱང་མི་མཐོང་བར་བྱས་ནས་སློབ་གྲྭའི་གྱང་ཁར་འགོས་ཏེ་ནང་དུ་ཕྱིན་པ་ན། གཟའ་ཉི་མའི་ཉིན་གྱི་སློབ་གྲྭ་ནི་བདག་པོས་བོར་བའི་ར་སྟོང་ཞིག་དང་འདྲ་བར་སྟོང་ཧང་ཧང་དུ་འདུག་ལ།  དུས་རྒྱུན་ཏིང་ཏིང་ཏིང་གྲགས་པའི་ཅོང་རྙིང་དེ་ཡང་སྡོང་སྐམ་དེའི་ཡལ་གའི་སྟེང་དུ་གཉིད་ལ་ཤོར་བ་བཞིན་ཁུ་སིམ་མེར་འདུག  ང་ནི་རྐུན་མ་ཞིག་དང་འདྲ་བར་འཇབ་ཀྱིན་འཇབ་ཀྱིན་དགེ་རྒན་རྡོ་རྗེ་ཡི་གཞུང་ལས་ཁང་གི་སྒོ་ཁར་སོང་ཞིང་། ཤེལ་སྒོ་མེད་པའི་སྒེའུ་ཁུང་ཆག་པོ་དེ་ལས་ནང་དུ་འཛུལ་བ་ན། གཞུང་ལས་ཁང་དུ་དགེ་རྒན་རྡོ་རྗེ་མེད་ཀྱང་སྣང་བ་ཞིག་ལ་སྙིང་གི་འཕར་ཚད་ཇེ་མགྱོགས་སུ་ཕྱིན། ཡིན་ནའང་ངས་རང་གིས་རང་ལ་སྙིང་ཕུར་བརྡབ་བཞིན་ཁ་ནས་དགེ་རྒན་རྡོ་རྗེ་ཁྱི་སྐྱག་ཅེས་སྡིགས་མོ་བྱེད་བཞིན། ཁོའི་གཞུང་ལས་ཁང་གི་ཐང་གཅལ་དུ་སྐྱག་རྒན་ཞིག་བཏང་བ་ཡིན། དེས་ཀྱང་ངའི་སྙིང་ནད་དྭངས་ཐབས་མེད་པས་ཁོའི་སྒྲོག་ཙེའི་སྟེང་གི་ལས་བྱ་ཞུ་དག་བྱེད་སྤྱད་ཀྱི་སྨྱུ་གུ་དམར་པོ་དེ་བླངས་ནས་སྐྱག་རྒན་གྱི་སྟེང་དུ་འཛེར་བ་ན། སེམས་ཀྱི་ག་ཤེད་ཅིག་ནས་ཅི་ཞིག་དྭངས་སོང་བ་དང་འདྲ།  དེ་ནས་ང་རང་སླར་ཡང་སྒེའུ་ཁུང་ཆག་རོ་དེ་ལས་ཕྱིར་བུད་དེ་ཁ་རོག་གེར་ཡུལ་དུ་ལོག་པ་ཡིན། ད་ནི་རང་གིས་རླབས་ཆེ་བའི་བྱ་བ་ཞིག་བསྒྲུབས་སོང་སྙམ་ནས་སེམས་པ་དགའ་ཡལ་ལེ་འགྲོ་དུས།  ང་རང་ཏག་ཏག་ཁྱི་རྒན་བཀྲ་ཤིས་ཀྱིས་སྐེ་ཡི་གཡེར་དྲིལ་སིང་སིང་དུ་དཀྲོལ་བཞིན་འགྲོ་བ་དང་འཕྲད་བྱུང། དེས་ངའི་སེམས་ཀྱི་དགའ་སྣང་མ་ལུས་རྩ་བ་ནས་བཅོམ་སོང། ངས་ཐང་ནས་སྤོ་ཐོ་ཞིག་བཏུས་ཏེ་བརྒྱབ་པ་ན་ཁྱི་རྒན་བཀྲ་ཤིས་ཀྱིས་རྔ་མ་གཡུག་བཞིན་གཡུག་བཞིན་བྲོས་སོང་། ངས་དེའི་གཞུག་ལ་མཆིལ་ཞགས་ཤིག་འཕངས་རྗེས་ཁྱིམ་དུ་འཛུལ་བ་ཡིན།  

    གཟའ་ཟླ་བའི་ཞོགས་པར་སློབ་གྲོགས་ཚོ་སྔ་མོ་ནས་སློབ་གྲྭར་བསླེབས་ཤིང་། སློབ་གྲྭའི་ར་སྐོར་ནང་དུ་ཐང་ལ་ཡི་གེ་འབྲི་བཞིན་འདུག   ངས་ཀྱང་དཔེ་ཁུག་སྒྲོག་ཙེ་ནང་བཞག་རྗེས་སློབ་གྲོགས་ཚོའི་གྲས་སུ་འཛུལ་སྟེ་ཡི་གེ་འབྲི་ཁུལ་བྱས་པ་ཡིན། དེ་དུས་དགེ་རྒན་རྡོ་རྗེ་ཡིས་ཐ་མག་སྔོ་ལྷོག་གེར་འཐེན་བཞིན་སློབ་གྲྭའི་སྒོ་ཆེན་འཛུལ་ནས་ཡོང་གིན་འདུག  ངས་ཁོས་ཅི་བྱེད་ལ་བལྟས་ནས་བསྡད་པ་ན། ཁོ་རང་སྔོན་ལ་སློབ་གྲོགས་ཚོས་ཡི་གེ་འབྲི་བཞིན་པའི་གམ་དུ་ཡོང་ནས་ཞིབ་ལྟ་ཞིག་བྱས་རྗེས། ཁ་ནང་ནས་ལུད་པ་ལུག་རོ་འདྲ་ཞིག་ཅལ་སེ་འཕངས་རྗེས་གཞུང་ལས་ཁང་གི་ཕྱོགས་སུ་བུད་སོང་།

   དེ་ནས་ངས་ཁོས་ཅི་ཞིག་བྱེད་པར་རྟོགས་བཟོ་བྱས་པ་ན། ཅུང་མ་འགོར་བར་ངས་རྟོགས་བཟོ་བྱས་པའི་བྱ་བ་རྣམས་ཁོའི་སྟེང་ནས་རེ་རེ་བཞིན་མངོན་བྱུང་། ཐོག་མར་ཨ་བ་ཨ་མ་ཞེས་སྡིགས་མོ་ཞིག་བྱས་ཤིང་། དེ་ནས་ལག་པས་སྣ་བ་བཏུམས་ཞིང་ཕེ་ཕེ་ཕེ་ཞེས་མཆི་མ་འདེབས་ཀྱིན་ཕྱི་རོལ་ཏུ་འདུར་མ་རྒྱུགས་ཀྱིས་བསླེབས་བྱུང་། ཁོས་སྐད་འགྲགས་འགྲགས་ངང་ང་ཚོར་ཕྱོགས་ཏེ་ཁྱི་སྐྱག་ཆ་བོ་མྱུར་དུ་འདིར་ཤོག་ལ་རུ་བསྒྲིགས་རོགས་ཞེས་སྐད་བརྒྱབ་པ་ན། སློབ་གྲོགས་ཚོས་ཅི་ཡིན་འདི་ཡིན་མ་ཤེས་པར་ཁོར་ཧད་འདུག  ཁོས་ཡང་བསྐྱར་ཁྱི་སྐྱག་ཆ་བོ་མྱུར་དུ་འདིར་ཤོག་ལ་རུ་བསྒྲིགས་ཞེས་པ་མི་གོའམ་ཟེར། དེ་དུས་སློབ་གྲོགས་ཚོ་གློ་བུར་དུ་སད་པ་བཞིན་གཞུང་ལས་ཁང་གི་མདུན་ཐད་དུ་བརྒྱུགས་ནས་རུ་བསྒྲིགས་སོང་། སྐབས་དེར་ངའི་སེམས་ཀྱི་སྤྲོ་སྣང་ཡང་རིམ་གྱིས་སྐྲག་སྣང་དུ་འགྱུར་མགོ་བརྩམས།  

སུ་ཡིན། མྱུར་དུ་ཁས་ལོངས།

སློབ་གྲོགས་ཚོས་ཅི་ཡིན་མ་ཤེས་པར་ཕན་ཚུན་གྱི་གདོང་ལ་ལྟ་བཞིན་འདུག  ངས་ཀྱང་མ་ཤེས་ཁུལ་བྱས་ནས་སློབ་གྲོགས་ཚོའི་གདོང་ལ་བལྟས་པ་ཡིན།

ཨ་བ་ཨ་མ། ངའི་གཞུང་ལས་ཁང་དུ་སྐྱག་པ་གཏོང་མཁན་སུ་ཡིན།

སློབ་གྲོགས་ཚོ་སྔར་བཞིན་ཁུ་སིམ་མེར་བསྡད།

 སྐབས་དེར་དགེ་རྒན་རྡོ་རྗེ་སློབ་གྲོགས་ཚོའི་གསེང་ནས་ཡར་མགྲོ་མར་འགྲོ་ལན་འགའ་བྱས་རྗེས།  ཚང་མས་རྐང་པ་གནམ་ལ་ཁྱོགས་ཟེར། སློབ་གྲོགས་ཚོས་ཅི་ཡིན་མ་ཤེས་པར་རྐང་པ་གནམ་ལ་འགྱོགས་མགོ་བརྩམས། ངའི་སྙིང་ནི་སྟིག་སྟིག་ཏུ་ལྡིང་བཞིན་འདུག་ནའང་། དགེ་རྒན་རྡོ་རྗེ་ཡིས་རྐང་པ་གནམ་ལ་ཁྱོགས་ཟེར་དོན་ངས་ཀྱང་མ་ཤེས། ངས་རང་གི་སེམས་ཀྱི་སྐྲག་སྣང་སྦ་ཆེད་རྐང་པ་ནི་གཞན་ཀུན་ལས་ཀྱང་མཐོ་རུ་བཀྱགས་པ་ཡིན། དགེ་རྒན་རྡོ་རྗེ་ཡིས་མགོ་བོ་བསྒུར་ནས་སློབ་གྲོགས་རེ་རེའིི་ལྷམ་མཐིལ་ལ་ལྟ་བཞིན་འདུག  དགེ་རྒན་རྡོ་རྗེ་ངའི་གམ་དུ་བསླེབས་པ་དང་སློབ་གྲོགས་གཞན་ཀུན་ལས་ཀྱང་ལྟ་ཡག་ཅིག་བྱས་སོང་། དེ་ནས་ཁོས་མུ་མཐུད་དུ་སློབ་གྲོགས་གཞན་དག་གི་ལྷམ་མཐིལ་དུ་མི་ལྟ་བར་ངའི་སྐྲ་ནས་འཇུས་ཏེ་ཕྱིར་འཐེན་བྱུང་ལ། སློབ་གྲོགས་ཀུན་ལ། སོང་། ཡི་གེ་འབྲི་རུ་སོང་ཟེར། དེ་དུས་དགེ་རྒན་གཞན་རྣམས་ཀྱང་གཅིག་རྗེས་གཉིས་མཐུད་ངང་བསླེབས་བྱུང་། ཁོ་ཚོས་ཧ་ལས་པའི་ཉམས་ཀྱིས་ང་དང་དགེ་རྒན་རྡོ་རྗེ་གཉིས་ལ་བལྟས་འདུག   དགེ་རྒན་རྡོ་རྗེ་ཡིས་ཐད་ཀར་ང་རང་ཁོའི་གཞུང་ལས་ཁང་དུ་དྲུད་ཅིང་།  དེ་ནས་ང་ལ་ཁྱོད་བུ་ངར་བ་རེད་ལ། ངའི་གཞུང་ལས་ཁང་དུ་སྐྱག་པ་ཐོངས་ཞེས་ཁྱོད་ལ་སུས་བཤད་པ་ཡིན།  ཁྱོད་ཀྱིས་ཨ་ཕས་བཤད་དམ་ཨ་མས་བཤད། ཁྱོད་ཀྱིས་ཇི་ལྟར་བཏང་བ་དེ་ལྟར་ཉ་ར་བྱོས། ཨེ་གོ་ཐལ་ཟེར་ཞོར་ང་ལ་འགྲམ་ལྕག་ཚ་ཐག་ཆོད་པ་ཞིག་གཞུས།  ངས་བཏང་བའི་སེར་ལམ་ལམ་གྱི་སྐྱག་རྒན་དེ་ནི་དེ་ལྟར་དགེ་རྒན་རྡོ་རྗེ་ཡི་གཞུང་ལས་ཁང་གི་ཐང་གཅལ་དུ་དྲི་ངན་ཞིག་དང་བསྡོངས་ནས་ཀྲོང་ངེར་འགྱིང་འདུག་ཅིང་། དེའི་སྟེང་དུ་འཛེར་བའི་སྨྱུ་གུ་དམར་པོ་དེ་ནི་དམག་དཔུང་གང་ཞིག་གིས་ཕ་རོལ་པོ་ཕམ་པར་བརྒྱབ་རྗེས་ཤུལ་དུ་བསླངས་པའི་དར་ཆ་ཞིག་དང་འདྲ། སྐྱག་སྦྲང་ཞིག་ཝང་སྒྲ་དང་བཅས་འཐབ་འཛིང་གནམ་གྲུ་ཞིག་དང་འདྲ་བར་འཕུར་ཡོང་སྟེ་སེར་ལམ་ལམ་གྱི་སྐྱག་པའི་སྟེང་དུ་བབས་བྱུང་། དེ་ལྟར་དྲན་མུར་གློག་བརྙན་ནང་མཐོང་བའི་ཀྲུང་འཇར་བར་གྱི་ཛ་དྲག་གི་དམག་འཁྲུག་ཅིག་ཀྱང་ཡིད་ལ་འཁོར་འོངས། སྐབས་དེར་ངས་དགེ་རྒན་རྡོ་རྗེ་ཡིས་སྐྱག་རྒན་དེ་གཏོང་མཁན་ང་ཡིན་པ་ཇི་ལྟར་ཤེས་སོང་བ་གསལ་བོར་རྟོགས་སོང་། མ་གཞི་སྐྱག་རྒན་དེའི་མཐའ་རུ་ངའི་མཛེར་རིས་ཅན་གྱི་ལྷམ་དེའི་རྐང་རྗེས་གསལ་བོར་བབས་འདུག  ངས་ད་གཟོད་ང་ཚོའི་སློབ་གྲྭའི་ནང་དུ་ལྷམ་མཐིལ་མཛེར་རིས་ཅན་གྱོན་མཁན་ང་གཅིག་པུ་ལས་མེད་པ་དྲན། ཞོགས་པ་དེའི་འཐབ་འཁྲུག་ཁྲོད་ང་ནི་འཇར་དམག་དང་དགེ་རྒན་རྡོ་རྗེ་ནི་ཀྲུང་དམག་ཏུ་གྱུར།

    ངས་དེ་ལྟར་སྐྱག་རྒན་དེར་བལྟས་ཏེ་སེམས་པ་རྟོགས་འགྱུའི་ཀློང་དུ་འཁྱུག་སྐབས། དགེ་རྒན་རྡོ་རྗེ་ཡི་ནག་ཐིང་ཐིང་གི་གྲིབ་གཟུགས་ཀྱིས་ངའི་སྐྱག་པའི་སྟེང་འཕྲོས་པའི་སེར་ལམ་ལམ་གྱི་ཉི་འོད་བསྒྲིབས་པ་དང་། སྐྱག་རྒན་དེའི་སེར་མདངས་ཀྱང་འཕྲལ་དུ་མོག་པོར་བཏང་། དེ་དུས་འཐབ་འཛིང་གནམ་གྲུ་ཡང་ཝང་སྒྲ་དང་བཅས་གང་ཞིག་ཏུ་འཕུར་སོང་། དགེ་རྒན་རྡོ་རྗེས་དྲ་མའི་ཕྱི་རོལ་ཏུ་ནག་འཚུབ་བེར་འགྲེང་སྟེ་སྒེའུ་ཁུང་ཐག་ཐག་ཏུ་རྡུང་བཞིན་། ཁྱོད་ཀྱིས་དེ་ཟ་རྒྱུ་ཡིན་ནམ་ཟེར། ཁོས་དེ་ལྟར་བཤད་རྗེས་ང་ལ་ཐ་ན་ཤོག་བུ་ལེབ་མོ་ཞིག་ཀྱང་མ་བྱིན། ཁོས་ང་ལ་ལག་པས་ཉ་ར་བྱོས་ཟེར། ལས་ལེགས་པ་ཞིག་ལ་སྐྱག་པ་ནི་སྔོན་ཉིན་མོར་བཏང་པ་ཡིན་པས་སྲ་ཀུན་ནས་ཆགས་འདུག  ངས་རང་གིས་བཏང་པའི་སྐྱག་པ་རང་གི་ལག་པས་འཁྱེར་ནས་སོང་བ་ཡིན། དེ་དུས་ཐང་ལ་ཡི་གེ་འབྲི་བཞིན་པའི་སློབ་གྲོགས་ཀུན་གྱིས་ཡི་གེ་འབྲི་མཚམས་བཞག་ནས་ང་ལ་མིག་གིས་རིག་རིག་ངང་ལྟ་བཞིན་འདུག  ང་རང་ཞོགས་པ་དེའི་དེ་འདྲའི་སྡུག་ཅིག་ལ་འཕྲད་མ་མྱོང་། དེས་ངའི་རྩིས་ཐང་ཏིལ་འབྲུ་ཙམ་པོ་ཀུན་ནས་བཅོམ་ཞིང་གདོང་ནི་ཚ་ལམ་ལམ་དུ་བཏང་། ངས་དེ་ལྟར་སྐྱག་པ་སྐམ་པོ་དེ་འཁྱེར་ནས་སློབ་གྲོགས་ཚོས་སྤྱོད་ཁང་དུ་འབོད་པའི་ཚེར་ཕུང་ཆེན་པོ་དེའི་རྒྱབ་ཏུ་གཡུགས་ནས་ཕྱིར་འོང་དུས།  རྨོ་མོ་སྒྲོལ་མ་ཚང་གི་ཁྱི་རྒན་བཀྲ་ཤིས་གང་ཞིག་ནས་འཇུར་ཡོང་བ་མ་ཤེས་མོད།  ཆེད་དུ་བདག་ལ་བརྙད་རྐོ་བ་བཞིན་ང་ལ་ཕྱོགས་ནས་འབ་སྐད་འགའ་བྱུངས་རྗེས། ཕ་གིའི་ཆུ་ཁུང་ནང་དུ་འཛུལ་ནས་བྲོས་སོང་།

   དགེ་རྒན་རྡོ་རྗེ་ཡིས་རྣམ་པ་དེའི་མཐོང་བའི་མོད་ལ། མགྲིན་པ་བསངས་ཙམ་བྱས་ཏེ་ཁྱོད་ནི་རྨོ་མོ་སྒྲོལ་མ་ཚང་གི་བཀྲ་ཤིས་ལའང་མི་དོ། དེས་ཀྱང་ཟ་ས་གང་ཡིན་པ་དང་གཏང་ས་གང་ཡིན་པ་ཤེས་ཀྱིན་འདུག་ཟེར།    ངས་ད་ལྟ་ཕྱིར་འདང་རྒྱག་དུས་ཀྱང་། དགེ་རྒན་རྡོ་རྗེ་ནི་དགེ་རྒན་དེ་འདྲའི་བཙན་པོ་ཞིག་ཡིན་པའི་ཚོད་ཀྱིས། ཞོགས་པ་དེར་ངས་ཁོའི་གཞུང་ལས་ཁང་དུ་སྐྱག་པ་བཏང་བར་ཁོས་ང་ལ་འབབ་འོས་པའི་གཅར་རྡུང་དྲག་པོ་མ་བྱས། དེར་ངས་འདང་ཇི་ལྟར་བརྒྱབ་ཀྱང་ད་དུང་འདང་ཕོག་ཐབས་མི་འདུག་ལ། དེས་ངའི་སེམས་ཀྱི་ཁོའི་སྣང་བརྙན་ལ་འགྱུར་ལྡོག་ཕྲན་ཙམ་འབྱུང་དུ་བཅུག རྗེས་སུ་སྡེ་མི་ཀུན་གྱིས་ངས་དགེ་རྒན་རྡོ་རྗེ་ཡི་གཞུང་ལས་ཁང་དུ་སྐྱག་པ་བཏང་བའི་གནས་ཚུལ་གསར་འགྱུར་ཞིག་ཏུ་བརྩིས་ནས་རླུང་ལྟར་བསྒྲགས་མགོ་བརྩམས། གསར་འགྱུར་དེ་གཅིག་ཁ་གཅིག་བརྒྱུད་དེ་ངའི་ཨ་ཕའི་རྣ་ལམ་དུ་ལྷུང་དུས་ནི་ཉིན་གཉིས་གསུམ་གྱི་རྗེས་རེད། མཚན་མོ་དེར་ངའི་ཨ་མ་ལགས་ངའི་རྒྱབ་རོགས་སུ་ལངས་ནས་ཡང་ཡང་ཞུ་བ་བྱས་མེད་ཚེ་ཨ་ཕས་ང་ལ་ཁ་ཁྲག་སྣ་ཁྲག་བཞུར་བ་ཞིག་གཅར་རྡུང་བྱས་ཡོད་པ་ཐག་ཆོད་ཡིན། མ་དྲིན་མོ་ཆེ་ཟེར་བ་ནི་དངོས་གནས་རླབས་ཆེ་བ་ལ་ཨང་། མོས་ནམ་ཡང་ངས་སྐྱོན་ཅི་བྱས་ཀྱང་དེ་ལྟར་བདག་ལ་བཟོད་སྒོམ་གྱི་ལག་ཟུང་བརྐྱངས་བརྐྱངས་ལ་ཡོད།

ངས་དགེ་རྒན་རྡོ་རྗེ་ཡི་གཞུང་ལས་ཁང་དུ་སྐྱག་པ་བཏང་བའི་དོན་རྐྱེན་དེ་དེ་ལྟར་རེ་ཞིག་འཇགས་ཟིན་ནའང་།  སློབ་གྲོགས་ཚོས་ངའི་མཚང་མིང་ལ་ཁྱི་རྒན་བཀྲ་ཤིས་ནས་བཀྲ་ཤིས་ཁྱི་སྐྱག་ཏུ་བསྒྱུར་སོང་།  ཁྱི་རྒན་དང་ཁྱི་སྐྱག་གང་ཡིན་རུང་ཁྱི་ཞིག་ལ་འབྲེལ་བ་ཡོད་དེ། དེ་ནི་ལན་པ་ཡོད་ཚད་རྨོ་མོ་སྒྲོལ་མ་ཚང་གི་བཀྲ་ཤིས་ཟེར་བའི་ཁྱི་རྒན་དེ་ལན་པ་རེད།  ངས་དེ་ལྟར་དྲན་པ་དང་།  སེམས་ལ་ཅིས་ཀྱང་ཁྱི་རྒན་བཀྲ་ཤིས་དེ་མ་བསད་ན་རང་ཉིད་ནམ་ཡང་ཁྱི་ཞིག་དང་འབྲེལ་བ་གཅོད་ཐུབ་རྒྱུ་མ་རེད་སྙམ་བྱུང་།  ད་ནི་ཅིས་ཀྱང་ཁྱི་རྒན་དེ་གསོད་ཐབས་བྱ་དགོས།  ངའི་སེམས་ལ་དེ་ལྟར་ཡང་ཡང་དྲན། དེ་ནས་བཟུང་ངས་ཁྱི་རྒན་དེ་གསོད་པའི་སྐོར་ལ་འཆར་གཞི་བཟོས་པ་ཡིན།

   ཉིན་ཞིག་ངས་ཁྱི་རྒན་དེ་རྒྱུན་དུ་འགྲོ་རྒྱུག་བྱེད་སའི་སྲང་མདོ་དེ་རུ་གབ་སྦས་བྱས་ནས་བསྒུགས་པ་ཡིན། སྔ་དྲོ་ཞིག་ལ་བསྒུགས་བསྒུགས་པ་ན་ཁྱི་རྒན་བཀྲ་ཤིས་ཟེར་བའི་ང་རང་སྡུག་ལ་སྦྱོར་མཁན་གྱི་ཁྱི་རྒན་དེས་གཡེར་དྲིལ་སིང་སིང་ངང་རྔ་མ་གཡུག་བཞིན་གཡུག་བཞིན་སྲང་མདོ་རུ་མངོན་བྱུང་། ངས་རང་གི་ལག་ཏུ་གྲ་སྒྲིག་བྱས་ཡོད་པའི་རྡོ་ལོག་དེ་ཡིས་ཡོ་གཟུར་མེད་པར་ཁྱི་རྒན་དེའི་མགོར་སྐག་སེ་བརྒྱབ་པ་ན།  ཁྱི་རྒན་དེས་རྣ་ལ་གཟན་པའི་ཨག་སྐད་ཅིག་འདེབས་བཞིན་རྨོ་མོ་སྒྲོལ་མ་ཚང་གི་ཕྱོགས་སུ་བྲོས་སོང་།  ཡིད་ཕངས་པ་ཞིག་ལ་ངས་ཁྱི་རྒན་དེ་གསོད་མ་ཐུབ། རྗེས་སུ་ངས་ཁྱི་རྒན་དེ་མཐོང་དུས་དེའི་མིག་གཡས་པ་ཕྱི་རུ་ཕྱུངས་ཟིན་འདུག ཡིན་ནའང་དེ་ཙམ་གྱིས་ངའི་སེམས་ཀྱི་ཞེ་སྡང་ཞི་མ་ཐུབ། ཁྱི་རྒན་དེ་གསོད་རྒྱུ་ནི་ངའི་དུས་སྐབས་ཤིག་གི་རིང་གི་ཆེས་གལ་ཆེ་བའི་དམིགས་འབེན་དང་ངའི་འཚོ་བའི་ཁ་ཕྱོགས་ལྟ་བུ་ཞིག་ཏུ་གྱུར། ད་ནི་ཅི་བྱས་ན་དགའ་ཨང་། ངས་ཐོག་མར་རྒྱ་ཧོ་ལང་གི་ལག་ནས་ཕག་སྤུ་ཙིག་སྨན་དུ་བརྗེས་ཏེ་ཁྱི་རྒན་དེ་གསོད་པར་སྟ་གོན་བྱས། སྟབས་ཉེས་པ་ཞིག་ལ་ངས་རྨོ་མོ་སྒྲོལ་མ་ཚང་གི་གཞིས་ཀའི་ཉེ་འདབས་སུ་འཕངས་པའི་ཙིག་སྨན་དེ་ཁྱི་རྒན་བཀྲ་ཤིས་ཀྱིས་མ་ཟོས་པར་ཁྱི་ལྡོམ་གཞན་ཞིག་གིས་ཟོས་སོང་། དེ་ནི་ངེད་ཚང་གི་གཡུལ་ཁའི་ནང་དུ་འགྱེལ་འདུག་པའི་ཁྱི་རོ་དེའི་སྟེང་ནས་ང་ལ་བདེན་དཔང་བྱས་བྱུང་། དེ་ལྟར་ངས་ཅིས་ཀྱང་གསོད་འདོད་ཀྱང་གསོད་དགོས་པའི་ཁྱི་རྒན་བཀྲ་ཤིས་གསོད་མ་ཐུབ་པར་སྡོད་པའི་ཉིན་ཞིག་ལ། ང་རང་རྨོ་མོ་སྒྲོལ་མ་ཚང་གི་སྒོ་ཁ་བརྒྱུད་ནས་འགྲོ་དུས། རྨོ་མོ་སྒྲོལ་མས་ཁྱི་རྒན་དེ་པང་ནས། ངའི་གཅེས་ཕྲུག ཁྱོད་ཀྱི་མིག་ཞར་བ་ལས་ངའི་མིག་ཞར་སོང་ན་མི་བཟང་ངམ། ངའི་གཅེས་ཕྲུག་ཁྱོད་ཀྱི་ལས་འདི་བཙོག་པ་ལ། མིའི་ནང་དུ་མི་ཅི་འདྲའི་བསམ་ནག་ཅིག་ཡོད་པ་ལ་ཨང་། དཀོན་མཆོག་གསུམ་པོ། ངའི་གཅེས་ཕྲུག་འདིར་སྙིང་རྗེ་ཞིག་བསྒོམ་རོགས་ཞེས་མིག་ཆུ་བཞུར་བཞིན་གསོལ་བ་འདེབས་ཀྱིན་འདུག དེ་དུས་ངས་མིག་ཡ་གཅིག་ཕྱི་རུ་ཕྱུངས་ཟིན་པའི་ཁྱི་རྒན་དེའི་ཉམ་ཐག་གི་རྣམ་པ་མཐོང་བྱུང་ལ། རྨོ་མོ་སྒྲོལ་མའི་གདོང་གི་སྙིང་རྗེས་རབ་ཏུ་གདུང་བའི་སྐྱོ་སྣང་མ་ལུས་ཀྱང་མཐོང་བྱུང་། རྗེས་སུ་སྡེ་མི་ཁ་ཤས་ཀྱིས་ང་ལ་དོགས་པ་ཟོས་ཏེ་རྨོ་མོ་སྒྲོལ་མ་ཚང་གི་བཀྲ་ཤིས་ཀྱི་མིག་ལ་རྡོ་ཡིས་རྒྱག་མཁན་ཁྱོད་མིན་ནམ་ཞེས་འདྲི། ཡིན་ནའང་ངས་དོན་དངོས་དེ་ཅིས་ཀྱང་ཁས་མ་བླངས་མོད། རྨོ་མོ་སྒྲོལ་མ་དང་ཁྱི་རྒན་བཀྲ་ཤིས་གཉིས་ཀྱི་རྣམ་པ་དེ་མིག་ལམ་དུ་ཤར་ཐེངས་རེར། ངའི་སེམས་པར་ཅི་ཡིན་འདི་ཡིན་མེད་པར་འགྱོད་སྣང་དང་སྙིང་རྗེ་ཞིག་ཀྱང་ཚམ་ཚོམ་མེད་པར་སྐྱེས་བྱུང་ལ། ལྷག་ཏུ་ཁྱི་རྒན་བཀྲ་ཤིས་ཀྱིས་ཡུལ་གང་ཡིན་རུང་ང་མཐོང་བ་དང་འཕྲལ་དུ་འབྲོ་བར་བྱེད་པས། ཚོར་བ་དེ་ངའི་ན་ཆུང་བའི་སེམས་ཁོང་ནས་རིམས་ནད་བཞིན་ཇེ་དྲག་ནས་ཇེ་དྲག་ཏུ་འགྱུར་མགོ་བརྩམས། དེ་ནས་བཟུང་།  ངས་ཁྱི་རྒན་དེ་གསོད་པའི་དྲན་ཚུལ་མ་ལུས་སེམས་ནས་རྒྱང་དུ་སྤྱུགས་པ་ཡིན། 

རྗེས་སུ་རྨོ་མོ་སྒྲོལ་མ་དང་སྤོ་བོ་རིག་འཛིན་གཉིས་ཀྱིས་མི་རིག་རིག་ཐུག་ཐུག་ལ། ངེད་ཚང་གི་བཀྲ་ཤིས་ཀྱིས་མིག་དབྱུངས་མཁན་དེར་རྣམ་སྨིན་འཁོར་སྲིད་ཅེས་ཡང་ཡང་བརྗོད་ཀྱིན་པ་ངས་ཀྱང་གོ་མྱོང་།

དེའི་རྗེས་སུ་སྔགས་རྒན་རིག་འཛིན་དང་རྨོ་མོ་སྒྲོལ་མ་གཉིས་ཀ་སྔ་གཞུག་བྱས་ནས་ཤི་སོང་།

དེའི་ཡང་རྗེས་སུ་ཁྱི་རྒན་བཀྲ་ཤིས་ཀྱང་ཤི་སོང་།

དེའི་ཡང་རྗེས་སུ་ཁོ་ཚང་ཤུལ་ཆད་དུ་གྱུར།

 

ང་རང་ནར་སོན་པ་དང་བསྟུན་ནས་ངས་ཀྱང་རིམ་གྱིས་བསམ་ཤེས་བྱུང་ལ། ཨ་མས་ཀྱང་ང་ལ་རྒྱུན་དུ་སློབ་སྦྱོང་ལ་འབད་པ་བྱ་དགོས་པའི་སློབ་གསོ་གཏོང་བས། ངས་རང་གི་མ་དྲིན་མོ་ཆེ་ཡི་ཕྱིར་དུ་སློབ་གྲོགས་ཚོས་ང་ལ་ཁྱི་རྒན་དང་ཁྱི་སྐྱག་ཅི་བོས་ཀྱང་སྣང་དོགས་ཡེ་ནས་མ་བྱས།  ངས་ང་ལ་དེ་ལྟར་འབོད་མཁན་རྣམས་འགྲན་ཡར་བཟུང་སྟེ་སློབ་སྦྱོང་ལ་འབད་པ་བྱས་པས་སློབ་གྲྭ་ཆེ་འབྲིང་ཆུང་གསུམ་བདེ་བླག་ངང་འགྲིམས་ཐུབ་པ་བྱུང་ཞིང་།  སློབ་མཐར་ཕྱིན་རྗེས་ང་རང་རྒྱལ་ཁབ་ཀྱི་ཟླ་ཕོགས་ལེན་པའི་ལས་བྱེད་པ་ཞིག་སྟེ་སྐར་ཆེན་ཚགས་པར་གྱི་གསར་འགོད་པར་གྱུར་། དེ་སྔ་ང་ལ་ཁྱི་རྒན་བཀྲ་ཤིས་དང་བཀྲ་ཤིས་ཁྱི་སྐྱག་ཅེས་འབོད་མཁན་གྱི་སློབ་གྲོགས་ཚོའང་ན་ཚོད་ཆེན་པོ་ཆགས་ཟིན་པས། ཁོ་ཚོས་ང་ལ་ཁྱི་རྒན་བཀྲ་ཤིས་དང་བཀྲ་ཤིས་ཁྱི་སྐྱག་ཅེས་མི་འབོད་པ་མ་ཟད། ང་རང་ཡུལ་ལ་ལོག་ཐེངས་རེར་ད་དུང་ཁྱོད་ནི་རིག་གནས་པ་ཡིན་ནི་རེད་ཅེས་བརྩི་འཇོག་ཆེན་པོ་བྱེད།

 ཡིན་ནའང་དོན་དག་ཅིག་ངའི་མི་ཚེ་དང་གྲིབ་མ་བཞིན་འགྲོགས་ཡོད་པ་ནི། ངས་ཁྱི་རྒན་བཀྲ་ཤིས་ཀྱི་མིག་ཡ་གཅིག་རྡོས་བརྒྱབ་ནས་ཕྱི་རུ་ཕྱུངས་པ་དེ་རེད། དེའི་དོན་དུ་ངས་རྨི་ལམ་འཚུབ་པོ་ཅི་འདྲའི་མང་པོ་ཞིག་རྨིས་མྱོང་བ་ངས་ད་དུང་བརྗེད་ག་ལ་སྲིད།  མཚམས་རེར་སྔགས་རྒན་རིག་འཛིན་གྱིས་མིས་ཐོད་སྐོགས་ཀྱིས་བཟོས་པའི་ཌ་རུ་དེས་ཕར་གཡུག་ཚུར་གཡུག་བྱེད་ཀྱིན། བཀྲ་ཤིས། ཁྱོད་ལ་འཇིག་རྟེན་འདི་ནས་ཐར་ས་ཞིག་མེད་ཟེར་ཞིང་། ཞོགས་པར་གཉིད་ལས་སད་དུས་ད་དུང་ཁོའི་རལ་བ་སྦོམ་པོ་དེ་ངའི་མིག་ལམ་ནས་ཕར་གཡོ་ཚུར་གཡོ་བྱེད། ཡང་ལན་རེར་རྨོ་མོ་སྒྲོལ་མས་མོའི་འཁར་བ་འཁྱོག་པོ་དེ་བཟུང་ནས་ང་རང་ཡར་བདའ་མར་བདའ་བྱེད་པས།  ཞོགས་པར་ངའི་སྔས་མགོ་རྔུལ་ཆུས་སྦངས་ནས་རློན་པར་བཏང་འདུག  ད་དུང་མཚམས་རེར་ཁྱི་རྒན་བཀྲ་ཤིས་ཀྱིས་ངའི་སྒྱིད་པ་ནས་འཇུས་ཤིང་མཆེ་བ་རྣོན་པོས་ངའི་ཤ་ལེབ་མོ་ལེབ་མོ་ཞེས་ནས་གཅོད་པར་བྱེད། དེ་ལྟ་ནའང་ངས་ཁ་ནས་ཤུ་སྒྲ་ཙམ་ཡང་སྒྲོག་མི་ཐུབ། 

རྨི་ལམ་དེ་དག་ནི་དེ་འདྲའི་འཇིགས་སུ་རུང་བ་ཞིག་ཡིན་ཀྱང་། རྨི་ལམ་ལ་ཆ་འཇོག་ཅི་ཡོད་ཅེས་ཁ་ཡ་མ་བྱས་རུང་ཆོག་མོད།  སེམས་ཁྲལ་ཆེས་ཆེ་བ་ནི་ངའི་ན་སོ་དར་ལ་བབས་པ་དང་བསྟུན་ནས་ངའི་མིག་ཡ་གཅིག་གི་མཐོང་ཚད་ཇེ་གཉོམ་ནས་ཇེ་གཉོམ་ཡིན་པ་དང་། མཚམས་རེར་ཚོད་ཚོད་ལ་ན་ཟུག་བཟོད་གླགས་མེད་པ་རེ་སྐྱེ་ཡོང་བས། ངའི་སེམས་ལ་སྔགས་རྒན་རིག་འཛིན་དང་རྨོ་མོ་སྒྲོལ་མ་གཉིས་ཀྱིས་རྣམ་སྨིན་འཁོར་ངེས་ཞེས་པའི་སྐད་ཆ་དེ་ཤར་ཡོང་།  ཡིན་ནའང་རང་སེམས་རང་གསོ་བྱ་ཆེད། ངས་ཁྱི་རྒན་བཀྲ་ཤིས་ཀྱི་མིག་གཡས་པ་ཕྱི་རུ་ཕྱུངས་པ་ཡིན་ལ། ངའི་མིག་ནི་གཡོན་པ་ན་བ་ཡིན་པས་རྣམ་སྨིན་ཟེར་བ་དེ་ཡིན་མི་སྲིད་ཅེས་ཁེར་ལབ་བརྒྱབ་པ་ཡིན། ངས་ཁྱི་རྒན་དེའི་མིག་ཕྱི་རུ་ཕྱུངས་པ་དང་ངའི་མིག་ན་བ་གཉིས་བར་དོན་དུ་འབྲེལ་བ་ཡོད་མེད་བཤད་དཀའ་ཡང་། ངའི་མིག་ན་ཐེངས་རེར་སེམས་ཁོང་དུ་བཀྲ་ཤིས་ཞེས་པའི་ཁྱི་རྒན་དེ་དྲན་ཡོང་ལ།  དེ་དང་འབྲེལ་བའི་དོན་དག་རྣམས་ཀྱང་ཡང་ཡང་དྲན་ཡོང་།

 

 

  

chisanghua སྤེལ་དུས། - 2013-5-13 8:54:47
 

མ་ཡུམ་དུས་ཆེན་ཉིན་མ་ཡུམ་ལ་ཕུལ་བ།

 

བྱིའུ་འཕུར་ཟིན་ནའང་། གཤོག་པ་འཇམ་པོ་ཞིག་གི་དྲོད་ཁོལ།

སྔར་བཞིན་ཚང་སྐྱིབས་སུ་ལུས་འདུག 

ཉི་འོད་ཀྱི་གསེར་ཆུ་བྱུགས་པའི་གཤོག་པ་ཆ་གཅིག་པོ་དེ།

མ་ཡུམ་གྱིས་མིའི་རིགས་ལ་བཏེགས་པའི་ཕྱག་ཟུང་ཡིན།

སྟོང་བའི་ནམ་མཁའ་ལ་མཐའ་དབུས་མེད་པ་ནང་བཞིན།

བརྩེ་བའི་འོད་སྣང་ལ་ཕྱོགས་རིས་ཡོད་མི་སྲིད།

 

མ་ཡུམ་དཔེ་ཅན་དཔེ་ལ་སྔར་བཞིན་མ་ཡུམ་ཉིད་ལས་འཚམ་པོ་ཞིག་མི་རྙེད།

ས་སྲོད་ཀྱི་སྒང་ག་དག་ཏུ་ཉིན་བྱེད་ཀྱིས་ཟེར་འཕྲོ་བསྐྱུར་ནས་འགྲོ་བ་ཇི་བཞིན།

མ་ཡུམ་གྱིས་བྱམས་བརྩེའི་དྲོད་ལྷག་རང་ཁྱིམ་གྱི་གོ་འདབས་སུ་སྤུངས་ནས།

སྨག་རུམ་གྱི་ཁོང་དུ་ཉིན་བྱེད་ལས་ལྷག་པའི་འོད་སྣང་སྦས།

ཞོགས་པར། ཕ་ཡུལ་གྱེས་བྲལ་གྱི་དཔང་དུ་བཞག་སྟེ་རྒྱང་ལ་བཞུད་དུས།

མདུན་སྐྱོད་ཀྱི་གཡང་ལ་མི་ལྟུང་བའི་སྨོན་ལམ་མ་ཡུམ་གྱིས་ཞུས་ཡོད་པས།

སེམས་པ་མ་ཡུམ་གྱི་སྐུལ་ལྕག་ལ་འགྲོགས་ནས་མི་ཚེའི་ལ་ལུང་འགྲིམས།

 

མ་ཡུམ་གྱི་སྐྲ་ལོའི་བྲག་ཐེམ་དུ་གངས་ཀྱིས་ཞབས་རྗེས་དཔར་བ་ནི།

རྒྱང་བཞུད་པ་གང་དེའི་སེམས་ཀྱི་འཁྱག་དར་ཡིན།

གྲང་ཤུར་ཤུར་གྱི་ཚོར་བ་དེ་རྩ་ལམ་བརྒྱུད་ནས་ཕ་ཁྱིམ་དུ་དེངས་འགྲོ།

ཕྱིར་ལྟ་གྲངས་མེད་ཀྱི་ཁྲོད་དུ།

ཕ་ཡུལ་ནི་དེ་འདྲའི་ཉེ་ཞིང་དེ་འདྲའི་རིང་།

མ་ཡུམ་ཡང་དེ་ལྟ་དེ་ལྟར་ཡིན།

 

མ་ཡུམ་དྲན་དུས། ལམ་གྱི་ཁུག་ཀྱོག་རེ་ནས་རྐང་མལ་ཡང་ཡང་གསོས་ཤིང་།

ཐོག་མར་ལམ་ལ་ཆས་པའི་གནས་དེ་ཡིད་ལ་འཁོར་འོངས།

མ་ཡུམ་གྱི་ཞལ་རས་ལྷག་ཏུ་ཡིད་ལ་འཁོར་འོངས།

ཟླ་བ་ཡར་ངོ་ཞིག་ལ་སྙིང་གཏམ་གླེང་ཞིང།

རླུང་བུ་ལྡོམ་པོ་ཞིག་ལ་སེམས་པ་བསྐུར།

 

དགུང་གྲངས་ཀྱི་རྩེ་ལ་དཔྱངས་པའི་མ་ཡུམ་གྱི་འཛུམ་ཞལ།

ལྗོན་རྩེར་ཁུར་གྱིས་དུད་པའི་ཀུ་ཤུ་ཞིག་དང་ཁྱད་ཅི།

མི་ཚེའི་དབྱར་དགུན་སྟོན་དཔྱིད།

འཚོ་བའི་རི་ཆུ་ལ་ཐང་།

ཡོད་ཚད་བསམ་གཞིག་གི་ཁྱོགས་ལ་བཀལ་ཚེ།

ནམ་ཡང་ས་གཞིའི་རྒྱ་ཁྱོན་དུ་བཀྲམ་ཞིང་།

ལྷུན་པོའི་མཐོ་ཚད་དུ་འགྲེངས་ནས།

ཀུ་ཤུ་བཞིན་གཟུགས་ལ་མཛེས་པ། རོ་ལ་ཞིམ་པ།

མ་ཡུམ་ཡིན།

 

ཉིན་མོ་འདིར། ལྷད་ཀྱིས་མ་གོས་པའི་རི་སྐྱེས་མེ་ཏོག་ཚོམ་བུ་ཞིག

ལག་ཏུ་ཐོགས་ཏེ་དབུལ་ས་ཞིག་ཡོད་ཚེ།

མ་ཡུམ་དུས་ཆེན་མི་ཤེས་པའི་མ་ཡུམ་སྟེ།

ཡང་ན་ཉིན་མོ་ཡོངས་རྫོགས་ལ།

ནམ་ཡང་མ་ཡུམ་ཡིན་འོས།

chisanghua སྤེལ་དུས། - 2013-3-20 9:18:31

 ཨ་ཅེ། ང་ཕ་ཡུལ་དུ་ལོག་འདོད། 

 

དགུན་ཁ་ཧ་ཅང་འཁྱག  ང་ཕ་ཡུལ་དུ་ལོག་འདོད།

རྡོག་འོག་གི་གཞུང་ལམ་ངོས་སུ་བ་མོ་མཐུག་པོ་ཆགས་འདུག

ངའི་ཁ་རླངས་དྲོན་མོས་ཞོགས་པའི་ནམ་མཁའ་སྲོས་ནའང་།

ས་གཞིའི་སྲ་མཁྲེགས་རུས་ལ་ཟུག་པས།   ང་ཤིན་ཏུ་གྲང་།

མཐོང་ལམ་གྱི་རི་ཚོགས་ཁ་བས་བཟུང་ཚར།  དཀར་བོང་བོང་འཇིག་རྟེན་དུ།

ཁྱོད་ཀྱི་སྙིང་ཉེ་བའི་རྒྱབ་གཟུགས། ཁྱོད་ཀྱི་མགོ་རས་གློ་སྐྱ།  ཁྱོད་མི་འདུག  

 

གྲོང་ཁྱེར་གྱི་གྲུ་ཟུར་འདི་རུ། ངས་ཁེར་རྐྱང་མཐོང་བྱུང་།  ཁེར་རྐྱང་ང་ལ་གཟས་འོངས།

སེམས་པ་འདི་སིལ་བུར་གཤགས་པའི་ཤོག་བུ་བཞིན།

རླུང་ནང་དུ་གཤེགས་སོང་།

ཁེར་རྐྱང་དུ་བསྡད་ནས་ཕ་ཡུལ་དྲན་དུས།

ངས་ཕ་ཡུལ་གྱི་ཕྱོགས་མཚམས་མི་རྙེད། 

ཡུན་རིང་གི་འཁྱམ་ཉུལ་ལས་ངས་ཕ་ཡུལ་བོར་སོང་། ངས་རང་ཉིད་བོར་སོང་།

སྨག་གིས་བཅིངས་པའི་མཚན་མོ་མང་པོར།

ངས་ཕྱིར་དྲན་ཁོ་ནས་རང་སེམས་གསོས།

 

ཨ་ཅེ། ང་ཕ་ཡུལ་དུ་འཁྲིད་རོགས།

དགུང་གཞུང་འདིར། ཆུ་ཕྲན་གྱི་སྨྲེ་སྔགས་རིང་མོས་ངའི་རྨི་ལམ་དཀྲོགས་སོང་།

དྲན་རེག་ཏུ་གྱུར་བའི་མངོན་སུམ་ཡོད་ཚད་ང་དང་རྒྱང་ཐག་རིང་།

ཨ་ཅེ། ང་དཔུང་མེད་རྒྱབ་ཆད་དུ་ལུས་ཡོད།

ཡིད་རྟོན་གྱི་མེ་སྟག་ཕྲ་མོ་ཙག་རླུང་གིས་ཁུར་སོང་།

གྲང་ཤུར་ཤུར་གྱི་མཁའ་དབུགས་ངའི་གདོང་དུ་བཙངས་ནས།

དུས་ཚིགས་ཤིག་གི་གདུག་རྩུབ་ང་ལ་བསྐྱུར།

སྨྱོ་ཧམ་གྱི་རླུང་བུས་ང་ལ་ཁ་ཤུ་འདེབས།

 

ཀ་ཁའི་མགྲིན་པ་ནས་བཙིར་མཁན་དེ་ཚོ།

ངའི་ཕྱོགས་སུ་འོང་གིན་འདུག

ངས་གངས་དཀར་ལ་བཅངས་པའི་བརྩེ་སེམས།

ཁོ་ཚོས་རྡོག་རོལ་དུ་གཏོང་མགོ་བརྩམས།

ང་ཕ་ཡུལ་དུ་འཁྲིད་རོགས།

 

ཨ་ཅེ། ཁྱེད་ཀྱིས་དྲོད་ལམ་ལམ་གྱི་ལག་པ་ང་ལ་སྲིངས་རོགས།

ཨ་ཅེ། ང་ཕ་ཡུལ་དུ་ལོག་འདོད། 

      ང་བྱིས་དུས་ཀྱི་ཕ་ཡུལ་དུ་ལོག་འདོད།

2012/12/15ཡི་ཞོགས་པར། 

chisanghua སྤེལ་དུས། - 2013-3-19 15:04:54
 

ང་དང་ཁྱོད་ཀྱིས་མཐོང་བའི་མེ་ཏོག

མེ་ཏོག་མང་པོ་བཞད་འདུག

མེ་ཏོག་མང་པོ་ག་ས་གང་དུ་བཞད་འདུག 

དམར་པོ། གློ་སྐྱ། སེར་པོ། སྔོན་པོ། སྨུག་པོ། དཀར་པོ།

ཁྱོད་ཀྱིས་མེ་ཏོག་དེ་དག་ལ་བལྟས་ནས།

དབྱར་ཁ་གླེང་བཞིན་འདུག

ཉི་འོད་གླེང་བཞིན་འདུག

ཡིན་ནའང་།

ཁ་དོག་མེད་པའི་མེ་ཏོག་དེ་གཅིག་པུ།

ངའི་སེམས་ནང་དུ་བཞད་ཡོད།

ངས་མེ་ཏོག་དེ་ལ་བལྟས་ནས།

དགུན་ཁ་གླེང་བཞིན་ཡོད།

མུན་པ་གླེང་བཞིན་ཡོད།  

chisanghua སྤེལ་དུས། - 2013-3-19 10:30:49
 

མཚན་མོ། ད་དུང་མཚན་མོ།

 

ང་རང་མཚན་གྱི་སྨག་རུམ་ལ་སྐྲག་སྟེ།

འཇིག་རྟེན་འོད་ངོགས་སུ་དངངས་འགྲོས་ཀྱིས་བསླེབས་དུས།

མིག་ཟུང་དང་འཛུམ་མདངས་གྲངས་མེད་ཀྱི་གོ་དོན་ནི།

མཚན་སྨག་གི་སྔོན་འགྲོ་དང་སྟ་གོན་དང་རྒྱབ་ལྗོངས་དང་བློས་བསླངས་ཡིན་པ་ཚོར།

དེ་དུས་ངས་དཀར་ནག་གི་དབྱེ་བ་ཡང་ཉིན་བྱེད་ཀྱིས་གསལ་མ་གསལ་དང་།

མུན་ནག་གིས་བསྒྲིབས་མ་བསྒྲིབས་ཤིག་ལ་འབྲེལ་བ་མེད་པ་གཞི་ནས་གོ་སོང་།

 

མཚན་མོ། མགོ་སྦྲ་སྨུག་པོའི་འོག་གི་མེས་པོའི་རྨི་ལམ་གྱི་ཁ་དོག་དང་འདྲ་བྱུང་།

གཏིང་རིང་བའི་ངལ་དུབ་ཀྱི་རྨ་ཁར་ཟུག་པའི་ཚེར་མ་རྣོན་པོ་དེས།

མུན་ནག་གི་གདོང་ལ་བུད་ནས་རང་ཉིད་ཀྱི་རུས་རྐང་མེ་ལ་སྦར་མཁན།

ནམ་ཡང་འོད་སྣང་ལ་འཐམ་འཁྱུད་དང་འོ་སྦྱོར་བྱེད་པའི །

གནམ་འོག་གི་ཁེར་རྐྱང་གི་རྐང་ཐང་པས།

སེམས་པའི་དྭངས་གཙང་བསྲུང་ཕྱིར།

ཁ་བ་བུ་ཡུག་གི་ཀློང་དུ་མཆོངས་ཏེ།

མཚན་གཞུང་དུ་རྨི་ལམ་གྱི་ས་བོན་གཏོར།

 

སྨག་ཧ་ཅང་གནག

མཚན་མོའི་གཅོང་རོང་དུ་ལུས་པའི་ཁེར་རྐྱང་གི་སེམས་པ་ཁོ་ན།

མཚན་རླུང་ཁྲོད་འདར་གྱིན་འདར་གྱིན་ཟླ་བ་ཟད་པོ་ཞིག་ལ་སྙིང་གཏམ་གླེངས།

མཚན་སྨག་གིས་སྙིང་ཙག་ཤད་སྟེར་དུས།

འོད་ལ་ཕྱོགས་པའི་འབུ་མེ་ལྕེབས་བཞིན།

ཁ་ཕྱོགས་ཐམས་ཅད་ཁ་ཕྱོགས་ཀྱིས་སྟོང་ཞིང་།

སྐྱོ་སྣང་ཐམས་ཅད་སྐྱོ་སྣང་གིས་གཙེས་ཏེ།

ཁྱོད་ཀྱིས་མཆོད་མེ་རྐོང་གང་གི་ཁ་ནས་རང་དབང་བསྙེགས།

 

མཚན་མོའི་མུན་སྨག་ལ་ལོབས་པའི་མིག་ཟུང་།

སེམས་ཀྱི་རྒྱབ་འགལ་དུ་ལངས་ཏེ།

གཉིད་ཀྱི་བདེ་བ་ལ་ཚིམ་མེད་དུ་རོལ་དུས།

རྨི་ལམ་གྱི་གངས་ཐང་དུ་ཅེ་སྤྱང་གི་སུག་རྗེས་རིང་དུ་འཐེན།

མཚན་མོར་རང་གི་སྙིང་ལ་སྦར་འདྲད་བྱེད་མཁན་ག་ཚོད་ཡོད་ཨང་།

མཚན་མོ། ད་དུང་མཚན་མོ་རེད།

མཚན་མོ་ཁོ་ན་ང་རང་གཉིད་འོངས་ཐབས་བྲལ་བའི་རྒྱུ་དང་རྐྱེན་ཡིན་པ་སུ་ལ་གསང་།

                 2013/1/12

chisanghua སྤེལ་དུས། - 2013-2-22 9:52:21
 

ཁོ་རང་། གངས་རིའི་ཁོང་གསེང་དུ་ལོག་སོང་།

___ སྙན་ངག་པ་གཉའ་གོང་ལྷ་བྷེ་ལ་རྗེས་དྲན་དུ།

མེ་ཏོག་གི་འདབ་ལོ་གྲང་འཁྱག་གི་རྒྱ་ལས་ད་དུང་ཐར་མེད།

སེམས་པ་ཁོ་ན་ཕྱི་རོལ་ཏུ་གྲང་འདར་རྒྱག་པའི་སྐར་ཕྲན་དང་ལྷན་དུ་ཡང་ཡང་ངུ།

མཐོང་ལམ་དུ་གྲིབ་གཟུགས་མང་པོ་འཕྲུལ་སྣང་དང་བསྡོངས་ནས་འཚང་ཁ་ཤིག་ཤིག་བྱེད།

དུས་སྐབས་འདིར། སྣང་བའི་དཀར་ཁུང་ཡོད་ཚད་མུན་ནག་གིས་ཕྱེས་ཏེ།

དྲན་གཞིགས་ཀྱི་བར་སྣང་དུ་ཕྱིར་དྲན་དུ་རུང་བ་མཐའ་དག་མོག་པོར་གྱུར།

མཚན་མོ་ཤིན་ཏུ་རིང་། རྨི་ལམ་ལ་ཁ་དོག་དབེན་པའི་དགུན་ལྗོངས་ཤིག

སྙིང་གར་སྐྱེས་པའི་སྐྲན་རྡོག་བཞིན་ངའི་དུས་གསུམ་གྱི་སྐྱོ་གར་དུ་གྱུར།

ཁྱོད་ཀྱིས་དབྱངས་གསལ་གྱི་རྒྱན་ཆ་སྤྲས་ནས་གངས་རིའི་ཁོང་གསེང་དུ་བཞུད་སོང་།

གསལ་ལ་མི་གསལ་བའི་རྐང་རྗེས་དེ་དག

མི་ཡུལ་དུ་བསྐྱུར་བའི་ན་ཟུག་ཡིན། ཨག་འབོད་ཡིན།

ནུས་མེད་གཉོམ་ཆུང་གི་སྙན་ཚིག་འགའ་ཡིད་ཆེས་དུ་རློམ་པའི་ང་རང་།

མིང་ཚིག་གི་ཐེམ་སྐས་ལ་འཛེགས་ཏེ།

ཁྱོད་ཀྱི་རྒྱབ་གཟུགས་ལ་ཅེར་ཡོད།

ཕྱི་གསལ་ནང་གསལ་གྱི་ཁྱོད་ལ་ཅེར་ཡོད།

         2013ལོའི་ཟླ2པའི་ཚེས22ཉིན་མདོ་ཐང་ཟི་ལིང་དུ།

chisanghua སྤེལ་དུས། - 2012-11-9 10:49:59
 

  2010 ལོའི་གསར་འགྱུར།

                               སྒོ་མེ་ཚེ་རིང་བཀྲ་ཤིས། ( ཟི་ལིང)

                  

བཀྲ་ཤིས་ཤི་སོང་།

བཀྲ་ཤིས་སྤྱི་ལོ2010ལོའི་ཟླ6པའི་ཚེས15ཉིན་ཤི་སོང་།

བཀྲ་ཤིས་ཀྱི་འདས་དོན་ནི་ཞིང་ཆེན་ཡོངས་ཀྱི་ལོ་དེའི་ཆེས་གལ་ཆེ་བའི་གསར་འགྱུར་དུ་གྱུར།

འཇིག་རྟེན་དུ་ཚེ་སྲོག་ལས་རྩ་ཆེ་བ་དང་རིན་པོ་ཆེ་ཞིག་མེད་པས། མི་ཞིག་གི་ཚེ་སྲོག་གི་རིན་ཐང་ལ་དམའ་ཕབ་པ་ནི་ཤིན་ཏུ་མི་འོས་པ་ཞིག་ཡིན་ལ། ལྷག་ཏུ་གཞན་དོན་དུ་གཤེགས་པའི་ཚེ་སྲོག་ཅིག་གི་རིན་ཐང་ལ་ལྟ་ཚུལ་བླ་བརྡོལ་དུ་སྤེལ་བ་ནི་དེ་བས་ཀྱང་ག་ལ་རུང་། དེ་བས། བཀྲ་ཤིས་ཀྱི་གཏམ་རྒྱུད་དེ་ཡང་བསྐྱར་སུ་ལའང་གླེང་འདུན་ཡེ་ནས་མེད་དེ།ཡང་གཅིག་བཤད་ན། བཀྲ་ཤིས་ཀྱི་གཏམ་རྒྱུད་ནི་སྔར་ནས་ཚགས་པར་དང་བརྙན་འཕྲིན་སོགས་སྨྱན་བྱེད་སྣ་ཚོགས་བརྒྱུད་ནས་གྲོང་ཁྱེར་འདི་མ་མ་ཟད་ཞིང་ཆེན་ཡོངས་སུ་ས་ཁྱབ་རྡོ་ཁྱབ་ཏུ་གྱུར་ཅིང་། ཁོར་སློབ་སྦྱོང་བྱེད་པའི་བྱ་འགུལ་ཡང་མེ་བཞིན་འབར་ཞིང་མེ་བཞིན་ཞི་ནས་ཀྱང་ལོ་ངོ་གཉིས་འགོར་ལ་ཉེ། ད་ནི་ཡང་བསྐྱར་གཏམ་རྒྱུད་དེ་ཡིག་ཐོག་ཏུ་ཕབ་པའི་དགོས་པ་ཅི་ལ་ཡོད། ཡིན་ནའང་སེམས་ཀྱི་ག་ཤེད་ཅིག་ཏུ་གཏམ་རྒྱུད་དེ་ཀུན་ལ་གསལ་བོར་འཆད་འདོད་ཀྱི་འདུན་པ་ཞིག་འགོག་མེད་དུ་སྐྱེས་འོངས།

བཀྲ་ཤིས་ནི་བདག་དང་སྡེ་བ་གཅིག་ཏུ་སྐྱེས་ཤིང་རྩེད་ར་གཅིག་ཏུ་ནར་སོན་ཞིང། ཆུང་དུས་ནས་བྱིས་པ་མ་རབས་པྲ་ཚག་ཅིག་ཡིན་པས་སློབ་གྲྭའི་དགེ་རྒན་དང་ཁྱིམ་གྱི་ཕ་མ། སྡེ་བའི་རྒན་གཞོན་ཀུན་གྱིས་བཀྲ་ཤིས་གླེང་ཡོང་དུས་མགོ་བོ་ཐེད་དུ་མི་གཡུག་མཁན་གཅིག་ཀྱང་མེད། ང་ཚོ་སློབ་ཆུང་འགྲིམས་དུས་དགེ་རྒན་ཚེ་རིང་ལགས་ཀྱིསབཀྲ་ཤིས་ལ་སློབ་སྦྱོང་བྱེད་མི་ཉན”ཞེས་ཁ་ནས་མ་ཎི་འདོན་འདོན་བྱེད་ལ། རྒྱུན་དུ་ཁོའི་ལག་མཐིལ་ལ་ལྕང་ལྕུག་གིས་འབྲབ་པའི་སྣང་བརྙན་དེ་ད་དུང་ཡང་བདག་གི་མིག་ལམ་དུ་གསལ་བོར་ཤར་ཡོང་།

དེ་ནི་ནམ་ཡང་བརྗེད་མི་སྲིད་དེ། ཞོགས་པ་ཞིག་ལ་ཁོས་སྒོ་ལ་སྲུབས་ཀ་ཅུང་ཟད་ཕྱེས་རྗེས་སྒོ་ཀླད་དུ་ཆུ་འཁྱག་གཞོང་པ་གང་བཞག་སྟེ་ཅི་མི་སྙམ་པར་རང་གི་འདུག་སྟེགས་སུ་བསྡད་འདུག  ང་ཚོས་ཁོརདེ་འདྲ་བྱེད་མི་ཉན། དགེ་རྒན་གྱིས་གཅར་རྡུང་བྱེད་ངེས”ཞེས་བཤད་ཀྱང་། ཁོསསུས་སྒོ་ཐོག་གི་གཞོང་པ་བླངས་ན་མི་དེའི་རྐང་མ་བརྡུངས་ན་ང་མི་མིན”ཞེས་སྐྲག་བསླངས་པས། ང་ཚོ་ཡང་རང་གི་འདུག་སྟེགས་སྟེང་ཀུམ་ནས་མི་སྡོད་ཀ་མེད་དུ་གྱུར། སྐབས་དེར་དགེ་རྒན་ཚེ་རིང་ལགས་ཀྱིས་ལག་ལ་དཔེ་ཆ་དང་ཁྲིད་ལྕག་ཐོགས་ནས་བསླེབས་བྱུང་། ཁོས་སྒོ་ཕྱེས་པའི་སྐད་ཅིག་མ་དེར་ཆུ་འཁྱག་གཞོང་པ་གང་བོ་ཤག་སེ་ཁོའི་སྐེ་ཁུག་ཏུ་ཐོར། དགེ་རྒན་ཚེ་རིང་ལགས་ནི་ཐུགས་རབ་ཏུ་ཁྲོས་ཏེ་གཞོང་པར་རྡོག་ཐོས་ཤུགས་ཀྱིས་བརྒྱབ་པ་ན། གཞོང་པ་ནི་ཁྲོག་སྒྲ་དང་བཅས་སློབ་ཁང་གི་ཕྱི་རོལ་ཏུ་བརྒྱངས་སོང་། ང་ཚོ་ནི་སྐྲག་ཐག་ཆོད་དེ་ལུས་ཀྱི་བ་སྤུ་ཡང་གྱེན་དུ་གཟེངས་བྱུང་། དགེ་རྒན་ཚེ་རིང་ལགས་ཀྱིས“གཏེ་ངན། འདྲེ་ཕྲུག  ཁྱི་སྐྱག  ཨ་བ་ཨ་མ”ཞེས་ཁ་ནས་གང་བྱུང་དུ་སྡིག་བཞིན་སྒོ་ཐོག་ཏུ་གཞོང་པ་འཇོག་མཁན་སུ་ཡིན་ཡང་མི་འདྲི་བར་ཐད་ཀར་བཀྲ་ཤིས་གཟས་ནས་བརྒྱུགས་སོང་། དགེ་རྒན་ཚེ་རིང་གིས་ཁོའི་སྐྲ་ནས་འཇུས་ཏེ་གཅར་རྡུང་ཡིད་ཚིམ་པ་ཞིག་བྱས་རྗེས་ཁ་ཁྲག་སྣ་ཁྲག་བཞུར་བཞིན་པའི་བཀྲ་ཤིས་ལ་རྡོག་ཐོས་གཞུས་བཞིན། “ཁྱི་སྐྱག་ཁྱོད་ད་སྒོར་སོང་། སང་ཕྱིན་ཆད་སློབ་གྲྭའི་ནང་ཤོག་དང་ངས་ཁྱོད་ཀྱི་རྐང་མ་བཅག་ན་ལྟོས”ཟེར། དེ་ནས་བཟུང་ང་ཚོའི་སློབ་གྲྭར་བཀྲ་ཤིས་ཟེར་བའི་འདྲེ་ཕྲུག་གམ་ཁྱི་སྐྱག་དེ་འོང་རྒྱུ་མ་བྱུང་ལ། ཁོ་རང་མ་ཡོང་བ་དེར་སློབ་གྲོགས་ཚོ་ཤིན་ཏུ་དགའ་བར་གྱུར།

བཀྲ་ཤིས་ཀྱི་གཏམ་རྒྱུད་གླེང་དུས། སྔགས་རྒན་རིག་འཛིན་གྱིས་ད་དུང་ཡང་མགོ་བོ་གཡུག་བཞིན། “དངོས་གནས་བྱིས་པ་མ་རབས་ཟེར་བ་ནི་བཀྲ་ཤིས་ཡིན་ཡ། བྱིས་པ་དེས་མི་ལ་ཉི་མར་ཡག་པོ་ཞིག་ཀྱང་ལྡེ་རུ་མི་འཇུག  མ་ཎི་ཞིག་འདོན་དུས་ཀྱང་གཏེ་ངན་དེས་ཁ་གཅོལ་བར་བྱེད།  ཨ་ལ་ལ། བྱིས་པ་དེ་འདྲ་ཞིག་ངས་གཏན་ནས་རིག་མ་མྱོང། དེ་ནི་གླང་དར་མའི་ཚ་བོ་ཞིག་ཡིན་པ་ཐག་གིས་ཆོད། ཕེ་ཕེ་ཕེ”ཟེར། སྔགས་རྒན་རིག་འཛིན་ལའང་ཅི་ཁག་སྟེ། སྡེ་འདབས་ཀྱི་ཉིན་ཁར་ཉི་མར་ལྡེ་བཞིན་མ་ཎི་འདོན་སྐབས་བཀྲ་ཤིས་ཀྱིས་བསམ་གཟས་ནས་ས་རྡུལ་སློང་བའམ། ཡང་ན་ས་ཏོས་བརྒྱབ་ནས་རྙད་རྐོ་བར་བྱེད་ལ།  ཡར་ལངས་ནས་བདའ་ཚེ་བྲོས་འགྲོ་བ་དང་། ཐང་ལ་ཙོག་མ་ཐག་ཡང་བསྐྱར་ཁ་སློང་བར་བྱེད།

བཀྲ་ཤིས་ནི་དེ་འདྲའི་མི་ཐ་ཤལ་ཤིག་ཡིན་པས། ཁོ་རང་ཤི་སོང་བར་སྡེ་བའི་ནང་གི་མི་རྣམས་ཕངས་སེམས་ཅི་ཡང་སྐྱེ་ཡི་མི་འདུག ལྷག་ཏུ་བཀྲ་ཤིས་ནི་དཔའ་བོ་ཞིག་ཡིན་ཅེ་ན་སྡེ་མི་རྣམས་དགོད་ཁ་འཆོར་བཞིན“བཀྲ་ཤིས་ཡེ”ཞེས་ལྡོག་འདྲི་བྱེད། ཡིན་ནའང་དེས་བཀྲ་ཤིས་ཀྱི་དཔའ་བོའི་སྣང་བརྙན་ནི་སྒྲིབ་ག་ལ་ཐུབ།

བཀྲ་ཤིས་ནི་དཔའ་བོ་ཡིན།

བཀྲ་ཤིས་ནི་དཔའ་བོ་ཡིན་ཏེ།  ལྷག་པར་བཀྲ་ཤིས་ཀྱི་བླ་མེད་མཛད་རྗེས་ཚགས་པར་དང་བརྙན་འཕྲིན་སོགས་ལས་བསྒྲགས་ཤིང་། གོང་དཔོན་པོ་ནས་ཞོལ་མི་སེར་ཡོངས་ཀྱིས་དཔའ་བོ་བཀྲ་ཤིས་ལ་སློབ་སྦྱོང་བྱེད་པའི་བྱ་འགུལ་རབས་དང་རིམ་པ་སྤེལ།

སྐབས་ཐོག་དེར་ང་རང་སློབ་ཆེན་ནས་མཐར་ཕྱིན་ཏེ«སྐར་ཆེན་ཚགས་པར»དུ་ལས་བགོ་བྱས་མ་ཐག་ཡིན། སྐབས་དེར་ཞིང་ཆེན་ཡོངས་སུ་གཞི་ཁྱོན་ཆེན་པོས་མི་རིགས་མཐུན་སྒྲིལ་སྐོར་གྱི་སྲིད་ཇུས་རང་བཞིན་གྱི་བྱ་འགུལ་ཞིག་ཚ་ཚ་འུར་འུར་དུ་སྤེལ་སྒང་ཡིན་པས། བཀྲ་ཤིས་ཤི་བའི་གནས་ཚུལ་མགོ་ཁྲིད་ཀྱི་རྣ་ལམ་དུ་མཆེད་མ་ཐག“ད་ཐེངས་གསར་འགྱུར་གལ་ཆེན་ཞིག་རྙེད་བྱུང་། ཁྱོད་རང་མྱུར་དུ་བཀྲ་ཤིས་ཟེར་བའི་གསར་བུ་དེའི་ཕ་ཡུལ་ལ་བཅར་འདྲི་བྱེད་དུ་སོང”ཟེར། ངས་མགོ་ཁྲིད་ལ“བཀྲ་ཤིས་ནི་བདག་དང་ཕ་ཡུལ་གཅིག་པ་ཡིན། ད་དུང་ངའི་སློབ་གྲོགས་ཡིན”ཅེས་བཤད་པ་ན། མགོ་ཁྲིད་ནི་རྨ་བྱས་དབྱར་རྔ་ཐོས་པ་བཞིན་ལྷག་ཏུ་དགའ་སྟེ“དེས་ན་ལྷག་ཏུ་འགྲིག་འདུག  ཁྱོད་སོང་ལ་གསར་འགྱུར་ཡག་པོ་ཞིག་ཕྲིས་ཤོག  འདི་ནི་གོ་སྐབས་ལེགས་པོ་ཞིག་རེད།  གོ་སྐབས་ལེགས་པོ་འདི་ཁྱོད་ཀྱིས་དམ་འཛིན་བྱེད་ཤེས་དགོས”ཟེར།

གཤམ་གྱི་རྒྱས་འཕྲིན་འདི་ནི་ངས“གོ་སྐབས་ལེགས་པོ”དེ་དམ་འཛིན་བྱས་ནས་བྲིས་

ཤིང་། རྗེས་སུ་བྱ་དགའ་ཡང་རབས་དང་རིམ་པ་ཐོབ་མྱོང་པའི་རྒྱས་འཕྲིན་དེ་ཡིན།

                          

 དཔའ་བོའི་བྱས་རྗེས་ནམ་ཡང་ང་ཚོའི་སེམས་ཁོང་དུ་གནས།

རང་སྲོག་དོར་ནས་གཞན་སྲོག་སྐྱོབ་མཁན་དཔའ་བོ་བཀྲ་ཤིས་ཀྱི་གནས་ཚུལ་བཀོད་པ།

གསར་འགོད་པ། ཉི་མ་འོད་འབར།

བཀྲ་ཤིས་ནི་ཕོ་ལོ21ལ་བུད་མ་ཐག་པའི་བོད་ཀྱི་གཞོན་ནུ་ཞིག་དང་། ཞིང་པ་ཞོར་ལས་པ་ཕལ་བའི་ཁྲོད་ཀྱི་ཕལ་བ་ཞིག་ཡིན། ཁོང་གིས་ཆུ་རྐའི་ནང་ལྷུང་བའི་རྒྱ་རིགས་བྱིས་པ་ཞིག་སྐྱོབ་ཆེད་རང་གི་རིན་ཆེན་ཚེ་སྲོག་ཕངས་མེད་དུ་སྦྱིན་པ་རེད།

ད་ལོའི་ཟླ5པའི་ནང་བཀྲ་ཤིས་ལ་རྒྱུ་ལྷག་བྱུང་ནས་གཤག་བཅོས་བྱས་པས་ལུས་ཕུང་སླར་སོས་པ་དེ་འདྲ་མི་བཟང་མོད། འོན་ཀྱང་བཀྲ་ཤིས་ཀྱིས་ཁྱིམ་ཚང་གི་དབུལ་ཕོངས་རྣམ་པ་བསྒྱུར་ཆེད་དང་འདྲུད་འཐེན་འཁོར་ལོ་ཞིག་ཉོ་ཕྱིར། ཕ་མས་འགྲོ་མི་དགོས་ཚུལ་ཇི་ལྟར་བཤད་ཀྱང་མ་ཁོགས་པར་སྡེ་བའི་ནང་གི་གསར་བུ་གཞན་དག་དང་མཉམ་དུ་ཟླ6པའི་ཚེས15ཉིན་ཡུལ་མི་དང་ཁ་བྲལ་ཏེ་ཟི་ལིང་དུ་ཞོར་ལས་སུ་ཆས། དེ་ནི་ཁོ་རང་ཕ་ཡུལ་དང་གཉེན་ཉེ་དང་སྤུན་ཟླ་སོགས་དང་གཏན་དུ་གྱེས་པ་ཁོས་ག་ལ་ཤེས། ཁོ་ཚོ་ཟི་ལིང་དུ་བསླེབས་རྗེས་ཐོག་མར་ཞོར་ལས་འཚོལ་སའི་གནས་བཙལ་ཅིང་སྡོད་ས་སོགས་བཀོད་སྒྲིག་བྱས། ཁོ་ཚོའི་ཁྲོད་ཀྱི་མི་ཁ་ཤས་ནི་ཐེངས་དང་པོར་ཟི་ལིང་དུ་ཡོང་བ་ཡིན་པས་ཕྱི་རོལ་ཏུ་ཉུལ་འདོད་སྐྱེས། ཕྱི་དྲོའི་ཆུ་ཚོད5ཙམ་གྱི་སྟེང་དུ་ཁོ་ཚོ་ཞོར་ལས་རྙེད་པའི་དགའ་སྣང་དང་ཕན་ཚུན་ལ་ཀུ་རེ་རྩེད་མོ་རྩེ་ཞོར་ཁང་དབྱང་གློག་འདོན་བཟོ་གྲྭའི་ཆུ་རྐའི་འགྲམ་ངོགས་བརྒྱུད་སྐབས། བྱིས་པ་ཞིག་ཆུ་རྐའི་ནང་འཕག་འཚག་རྒྱག་པ་མཐོང་བས་བཀྲ་ཤིས་ཀྱིསམྱུར་དུ་བྱིས་པ་སྐྱོབ་རོགས”ཞེས་བཤད་མ་ཐག་ལྡིང་ཐེངས་གཅིག་གིས་བྱིས་པའི་དྲང་ཐད་ནས་མར་ལྡིང་བ་དང་། དེ་དང་མཉམ་དུ་ཁོའི་རོགས་པ་སྟོབས་ལྡན་དང་འཇིགས་མེད་གཉིས་ཀྱང་ཐེ་ཚོམ་སྤུ་ཙམ་ཡང་མེད་པར་ཆུ་ནང་དུ་མཆོངས། རྐ་ཆུ་ནི་ཤིན་ཏུ་ཆེ་བས་ཁོ་རང་ཡུན་གྱིས་ཡུན་གྱིས་ཆུ་ནང་དུ་ནུབ། ཡིན་ནའང་ཆུ་ནང་དུ་ནུབ་པའི་སྐད་ཅིག་མར་བཀྲ་ཤིས་ཀྱིས་ལག་ཟུང་གིས་བྱིས་པ་དེ་ཡར་བཀྱགས་ཏེ་སྟོབས་ལྡན་གྱི་ལག་ཏུ་གཏད། བྱིས་པ་དེ་ཉེན་ཁ་ལས་ཡོངས་སུ་ཐར་ནའང་བཀྲ་ཤིས་ནི་རྐ་ཆུའི་གཏིང་རིམ་དུ་ནུབ་སོང……

གསར་འགོད་པས་ཁོའི་འགྲོ་རོགས་སྟོབས་ལྡན་ལ་བཅར་འདྲི་བྱེད་དུས། ཁོས་ཧ་ཅང་སྐྱོ་སྣང་དང་བཅསང་དང་འཇིགས་མེད་གཉིས་ཀྱིས་བྱིས་པ་དེ་ཆུ་ཁར་བཞག་ནས་ཕྱིར་འཁོར་དུས་བཀྲ་ཤིས་ཀྱི་ལག་པ་གཡུག་གཡུག་ཙམ་བྱེད་པ་ལས་ཅི་ཡང་མཐོང་རྒྱུ་མི་འདུག  མྱུར་དུ་ཁོ་རང་སྐྱོབ་བསམ་དུས་ཆུ་གཏིང་བ་དང་རྙོག་པ་ཡིན་པས་སྐྱོབ་མ་ཐུབ”ཅེས་བཤད་ཅིང་། གདོང་ལ་ནོངས་འགྱོད་དང་ཕང་སེམས་ཤིག་སྐྱེས་འདུག  རྣམ་པ་དེ་དངོས་སུ་མཐོང་མཁན་རྒྱ་རིགས་བུད་མེད་ཝང་ཤང་ལན་ཡིད་འགུལ་ཐེབས་ཀྱིནཅི་འདྲའི་ཕོ་གསར་ཡ་རབས་ཤིག  དེ་འདྲའི་གཏིང་ཟབ་པའི་ཆུ་རྐའི་ནང་དུ་ཐེ་ཚོམ་ཅི་ཡང་མེད་པར་མཆོངས་སོང་། ཁོའི་ན་ཚོད་དེ་འདྲ་ཆུང་། ཡིད་ཕངས་པ་ལ། ཡིད་ཕངས་པ་ལ”ཞེས་ངག་ནས་ཟློ་བཞིན་མཆི་མ་ཤར་ཤར་དུ་བཞུར་འོངས།

ཟླ༩བའི་ཚེས༡ཉིན་གྱི་ཕྱི་དྲོ་གསར་འགོད་པས་དཔའ་བོ་བཀྲ་ཤིས་ཀྱི་འདས་རྐྱེན་ལ་དམིགས་ནས་ཆེད་དུ་ཁོའི་ཕ་ཡུལ་དུ་བཅར་འདྲིར་ཕྱིན།  བཀྲ་ཤིས་ཀྱི་ཕ་ཡུལ་ནི་ཆུ་ནག་རྫོང་ལུང་དཀར་ཡུལ་ཚོ་ནས་སྤྱི་ལེ5ཙམ་ཕྱིན་ཚེ་ཆུ་བོ་ཞིག་བརྒལ་ནས་འགྲོ་དགོས། ཆུ་བོ་ཆེ་རྒྱུ་མེད་ནའང་རླངས་འཁོར་མི་བུད་ལ་ཟམ་པའང་མེད་པས་ངེས་པར་དུ་ཆུ་ལ་མི་བརྒལ་ཐབས་མེད་ཡིན། བཀྲ་ཤིས་དེ་སྔ་འཚོ་མྱོང་བའི་སྡེ་བ་དེ་ནི་བོད་རིགས་རྐྱང་རྐྱང་གི་སྡེ་བ་ཞིག་ཡིན་ལ་དུད་ཁྱིམ23ལས་མེད།གསར་འགོད་པ་ཁོའི་ཁྱིམ་ལ་བསླེབས་དུས་ཕ་མ་གཉིས་ཟི་ལིང་དུ་བུད་སོང་ནའང་སྡེ་མི་རྣམས་དེར་འདུས་ནས་ཟང་ཟིང་ལང་ལོང་བྱེད་ཀྱིན་འདུག

ངས་ཁོའི་ཨ་ཁུ་ནོར་བུ་ལ་དེའི་སྐོར་གླེང་དུས། ཁོསབཀྲ་ཤིས་ནི་བྱིས་པ་རིག་ཡག་ཅིག་ཡིན།སློབ་སྦྱོང་ལ་ཧ་ཅང་བཟང་མོད།འོན་ཀྱང་ཁྱིམ་ཚང་ལ་དཀའ་ཁག་ཆེ་བས་སློབ་ཆུང་ནས་མཐར་ཕྱིན་རྗེས་སློབ་མཚམས་བསྐྱུར་ནས་ཡུལ་དུ་ལས་ཀ་མི་ལས་ཐབས་མེད་བྱུངཟེར།

 སྡེ་མི་རྣམས་ཀྱིས་གཅིག་ཁ་གཅིག་གིས་ཕྲོགས་ཏེ་གསར་འགོད་པར་བཀྲ་ཤིས་ཀྱི་ཡ་རབས་སྤྱོད་བཟང་གི་མི་གཤིས་གླེང་མགོ་བརྩམས། ན་ནིང་དབྱར་ཁར་སྡེ་བའི་གྲམ་པའི་ནང་ཆུ་ལོག་བྱུང་བས་ཁྱིམ་ཚང་ཞིག་གི་ལུག5ཆུས་ཁུར། བཀྲ་ཤིས་ཀྱིས་དེ་མཐོང་ནས་ཐེ་ཚོམ་མེད་པར་ཆུ་ནང་དུ་ལྡིང་ཞིང་ལུག2སྐྱོབ་ཐབས་བྱས། ཡང་ཐེངས་མང་པོར་སྡེ་བའི་ནང་གི་ཞིང་ལ་ཆུ་གཏོང་བའི་ལྕགས་སྦུག་ཆུ་ལོག་གིས་ཁུར་བ་ཆུ་ཁར་བླངས། ཁོ་ཆུ་ལ་རྐྱལ་མི་ཤེས་ནའང་ཡར་འགྲོ་མར་འགྲོ་བྱེད་དུས་ཆུ་ལ་བརྒལ་དགོས་པ་དང་དེའི་ཁར་སྤོབས་པ་ཅུང་ཆེ་བས་ཆུ་ལ་དེ་འདྲ་མི་སྐྲག  སྡེ་བའི་ནང་གི་རྒན་པ་ཚོས་བཤད་རྒྱུར། བཀྲ་ཤིས་ནི་ཁ་ལེན་ཚིག་རྩི་བྱེད་པའི་བྱིས་པ་ཡ་རབས་ཤིག་ཡིན།སུ་ཚང་ལ་རོགས་བྱ་རྒྱུ་ཡོད་ན་ཁོ་དེ་ཚང་ལ་རང་འགུལ་གྱིས་ཐོན་ཡོང་། ང་ཚོ་ཚང་མར་ལས་ཀ་ཅི་ཞིག་ལས་དགོས་ཀྱང་ཁོ་ལ་ཡིད་ཆེས་ཧ་ཅང་ཡོད།

 སྡེ་བའི་ཧྲེ་ཀྲང་འཕགས་མོས་བཤད་རྒྱུར། བཀྲ་ཤིས་ནི་བྱིས་པ་ཡ་རབས་ཤིག་ཡིན། སྡེ་མི་རྣམས་ཀྱིས་ཁོ་གློ་བུར་དུ་མེད་སོང་བ་གོ་རྗེས་སེམས་སྡུག་བྱེད་ཀྱིན་འདུག   ཡིན་ནའང་ཕྱོགས་ཆེ་ས་ནས་འདང་བརྒྱབ་ན་གཞན་གྱི་བྱིས་པ་ཞིག་སྐྱོབ་ཆེད་རང་སྲོག་ཕུལ་བ་ནི་ང་ཚོ་སྡེ་བའི་གཟི་བརྗིད་ཅིག་ཀྱང་རེད།

  བཀྲ་ཤིས་ཀྱི་ནུ་བོ་བསམ་འགྲུབ་ཀྱིས་གདོང་ལ་སྐྱོ་ཉམས་ཤིག་ཤར་ཏེངེད་ཚང་ལ་སྤུན་བཞི་ཡོད།ཁོ་ནི་ངའི་ཕུ་བོ་གཉིས་པ་ཡིན། ཕུ་བོ་དུས་རྒྱུན་དུ་ང་ལ་ཧ་ཅང་བཟང་། ཁོའི་ལག་ཏུ་སྒོར་མོ་རེ་གཉིས་ཙམ་ལས་མེད་ནའང་ང་ལ་ཀ་ར་དང་སྟབས་བདེ་ཐུག་པ་སོགས་ཉོས་ཡོང་།  ཁ་སང་ཁོ་དང་སྡེ་བའི་ནང་གི་གསར་བུ་ཚོ་མཉམ་དུ་་ཟི་ལིང་ལ་ཞོར་ལ་སུ་སོང་བ་རེད། སྒོར་མོ་ཁ་ཤས་བཙལ་རྗེས་ཕྱིར་ཡོང་ནས་འདྲུད་འཐེན་འཁོར་ལོ་ཞིག་ཉོ་རྩིས་ཡོད། ཡིན་ནའང་ཕུ་བོ་ཁོ་རང…… ”ཞེས་མིད་པ་འཆུས་ཤིང་མིག་ཆུ་བཞུར་ཏེ་བཤད་མཚམས་ཆད་སོང་།

  བཀྲ་ཤིས་ཀྱི་ཁྱིམ་ནས་སྡེ་འདབས་ཀྱི་ཆུ་བོ་དེ་བརྒལ་ཅིང་ཀྱག་ཀྱོག་གི་རི་ལམ་ཞིག་དེད་ནས་སོང་ཚེ། སྡེ་བའི་སློབ་ཆུང་ནི་རི་སྐེད་ཀྱི་ངོས་ཅུང་སྙོམས་ས་ཞིག་ཏུ་ཆགས་ཡོད།ཁོ་རང་སློབ་ཆུང་འགྲིམ་སྐབས་ཉིན་རྒྱུན་ལམ་འདི་བརྒྱུད་ནས་སློབ་གྲྭར་སོང་ཞིང་ཁྱིམ་དུ་ལོག་པ་རེད།

  ཚེ་རིང་ནི་བཀྲ་ཤིས་སློབ་ཆུང་འགྲིམ་སྐབས་ཀྱི་འཛིན་གྲྭའི་ཀྲུའུ་རིན་ཡིན་ལ། ད་ལྟ་སློབ་ཆུང་དེའི་སློབ་གཙོའི་འགན་འཁུར་འདུག  བཀྲ་ཤིས་སློབ་ཆུང་འགྲིམ་སྐབས་ཀྱི་གནས་ཚུལ་གླེང་དུས་ཁོས་བསམ་བློ་བག་ཙམ་བཏང་རྗེས་གསར་འགོད་པར་འདི་ལྟར་གླེང་བྱུང་། 1992ལོའི་ཟླ9བར། ལོ7ལ་བུད་པའི་བཀྲ་ཤིས་སློབ་ཆུང་དུ་ཞུགས་པ་རེད། ལམ་ཐག་རིང་བ་དང་ལམ་དེ་འདྲ་མི་བཟང་བས་ཁོ་རང་ཞོགས་པའི་ཆུ་ཚོད7སྟེང་སློབ་གྲྭར་འགྲོ་དགོས་པ་དང་།མཚམས་རེར་ཆར་བབས་ནའང་ཁོས་ཐབས་བརྒྱ་ཇུས་སྟོང་གིས་ཆུར་བརྒལ་ནས་སློབ་གྲྭར་ཡོང་བ་ལས་སློབ་ཞོལ་ཐེངས་གཅིག་ཀྱང་བྱས་མ་མྱོང་། དོན་བྱ་གཅིག་ནི་དགེ་རྒན་ཚེ་རིང་གིས་ནམ་ཡང་བརྗེད་ཀྱིན་མི་འདུག “དེ་ནི་བཀྲ་ཤིས་སློབ་ཆུང་གི་ལོ་རིམ་གཉིས་པའི་སྐབས་ཡིན།ཉིན་ཞིག་ཁོས་ལམ་བར་དུ་སྒོར་ཟུར3རྙེད་པས། སློབ་གྲྭར་ཐོན་མ་ཐག་ང་ལ་སྤྲདཟེར། སྒོར་ཟུར3ཡིན་ནའང་དཀའ་ཁག་ཆེ་བའི་ཁྱིམ་ཚང་ཞིག་ལ་མཚོན་ན་དེའང་ཧ་ཅང་གལ་ཆེན་ཞིག་ཡིན། བཀྲ་ཤིས་ཀྱི་ཡ་རབས་སྤྱོད་བཟང་གི་གཤིས་རྒྱུད་ནི་ཆུང་དུས་ནས་གོམས་པ་ཡིན་པས་དོན་ཆུང་དེས་ཀྱང་དགེ་རྒན་ཚེ་རིང་ལ་བག་ཆགས་ཟབ་མོ་བཞག་པ་རེད།

བཀྲ་ཤིས་ཀྱི་སློབ་སྦྱོང་གི་གྲུབ་འབྲས་ཧ་ཅང་བཟང་། སློབ་རིམ་གཉིས་པའི་སྐབས་སུ་ན་ཆུང་གདོང་ལེན་རུ་ཁག་ནང་ཞུགས་པ་དང་། སློབ་རིམ་གསུམ་པའི་སྐབས་ནས་བཟུངགསུམ་བཟང་སློབ་མརབདམས། སློབ་གྲོགས་ནོར་བུ་འཚོ་དང་ཁོ་གཉིས་རུ་ཁག་གཅིག་གི་ཡིན། དགུན་ཁར་ནོར་བུ་འཚོའི་རྐང་ལག་རྒྱུན་དུ་ཙག་གིས་ཕྱིད་དེ་འགྲོ་མི་ཐུབ། བཀྲ་ཤིས་ཀྱིས་ཐེངས་མང་པོར་ནོར་བུ་འཚོ་ཁུར་ནས་སློབ་གྲྭར་ཡོང་བ་རེད།1995ལོའི་དབྱར་ཁའི་ཉིན་ཞིག་ཆུ་ལོག་ཆེན་པོ་བྱུང་བས་སློབ་མ་ཞིག་གི་ལྷམ་ཆུ་ལོག་གིས་ཁུར།སློབ་མ་དེས་ཆུ་ལོག་ནང་ཁུར་ནས་འགྲོ་བཞིན་པའི་རང་གི་ལྷམ་ལ་བལྟས་ནས་ངུ་འབོད་བྱས་པར། བཀྲ་ཤིས་ཀྱིས་ཐབས་བརྒྱ་ཇུས་སྟོང་སྤྱད་དེ་ལྷམ་ཆུ་ཁར་ལེན་ཐབས་བྱས། ཞིང་པའི་བྱིས་པ་ཞིག་ལ་མཚོན་ནས་བཤད་ན་ལྷམ་ཞིག་གི་རིན་ཐང་ནི་ང་ཚོས་བློ་ཡུལ་དུ་ཤོང་དཀའ་བ་ཡིན། དགེ་རྒན་ཚེ་རིང་གི་བག་ཆགས་ཁྲོད་བཀྲ་ཤིས་ནི་ངལ་རྩོལ་ལ་དགའ་བ་དང་།སློབ་སྦྱོང་ལ་དགའ་བ།དགེ་རྒན་ལ་བརྩི་བཀུར་དང་སློབ་གྲོགས་བར་མཐུན་སྒྲིལ་བྱེད་པའི་བྱིས་པ་ཡ་རབས་ཤིག་ཡིན།

  བཀྲ་ཤིས་བུད་སོང་།ཡིན་ནའང་ཁོས་རང་སྲོག་དོར་ནས་གཞན་སྲོག་བསྐྱབས་པའི་དཔའ་བོའི་བྱས་རྗེས་ནམ་ཡང་ང་ཚོའི་སེམས་ཁོང་དུ་གནས་ཤིང་། ཁོའི་ཡ་རབས་སྤྱོད་བཟང་གིས་དེང་རབས་ན་གཞོན་གྱི་བདེན་མཐོང་དཔའ་སྐྱེད་དང་བླ་ན་མེད་པའི་སྙིང་སྟོབས་མཚོན་པ་མ་ཟད།ཀྲུང་ཧྭ་མི་རིགས་ཀྱི་སྲོལ་རྒྱུན་སྤྱོད་བཟང་བོ་ཡང་མཚོན་པ་རེད། འདི་ནི་དེང་རབས་ན་གཞོན་གྱིས་སློབ་སྦྱོང་བྱ་བའི་མིག་དཔེ་དང་། མི་རིགས་སོ་སོའི་བར་ཁ་འབྲལ་ཐབས་མེད་པའི་དཔེ་མཚོན་གསོན་པོ་ཞིག་ཀྱང་རེད།

གོང་གི་རྒྱས་འཕྲིན་འདི«སྐར་ཆེན་ཚགས་པར»སྟེང་སྤེལ་བའི་རྗེས་སུ། བདག་གི་སེམས་པ་ནི་འགལ་འདུའི་གཡང་དུ་ལྷུང་སོང་། གལ་ཏེ་ཕྱི་མའི་ཡུལ་ནས་བཀྲ་ཤིས་ཀྱིས་བདག་གི་རྒྱས་འཕྲིན་འདི་མཐོང་ཐུབ་ཚེ། ཁོས་བདག་ལ་བསྟོད་པའི་མཐེ་བོང་སྒྲེང་ངམ། ཡང་ན་དམོད་པའི་མཆིལ་ཞགས་འཕེན་སྲིད། དེ་ནི་འཇིག་རྟེན་མི་ཡུལ་དུ་འཚོ་བའི་གང་ཟག་སུས་ཀྱང་མཁྱེན་ག་ལ་སྲིད། གང་ལྟར། བདག་གི་བྲིས་པའི་རྒྱས་འཕྲིན་ལ་དགའ་རྟགས་རབས་དང་རིམ་པ་ཐོབ་པ་ནི་དོན་དངོས་ཡིན། ངས་དགའ་རྟགས་སུ་བྱིན་པའི་སྒོར་གྱིས་ལྦུ་རག་ཧབ་ཀྱིས་འཐུང་ཐེངས་རེར་ནམ་ཡང་བཀྲ་ཤིས་ཞེས་པའིསློབ་གྲོགས་དེ་ཡང་ཡང་དྲན་འོངས།

ངས་ད་དུང་གསལ་བོར་དྲན་བཞིན་འདུག་སྟེ། ཟླ 6པའི་ཚེས16ཉིན་གྱི་ཞོགས་པར། ང་རང་གཞུང་ནས་བཀོད་སྒྲིག་བྱས་པའི་རླངས་འཁོར་དུ་བསྡད་དེ་ཕ་ཡུལ་ཕྱོགས་སུ་བཅར་འདྲིར་ཕྱིན་པ་ཡིན། ངའི་འགྲོ་རོགས་ལ་ད་དུང་སྡེ་ཁག་གཞན་པའི་རྒྱ་རིགས་གསར་འགོད་པ་ཁ་ཤས་ཀྱང་ཡོད། ལམ་དུ་ངས་བཀྲ་ཤིས་ཀྱི་ཨ་ཁུ་ནོར་བུ་ལ་ཁ་པར་བཏང་སྟེ། “ཁྱིམ་དུ་དེང་རབས་ཀྱི་ཁྱིམ་ཆས་གསར་བའམ་དངོས་པོ་རྩ་ཆེན་རེ་ཡོད་ཚེ་སྦས་ན་བཟང་། ཁྱིམ་ཚང་དབུལ་བོ་ཞིག་གི་རྣམ་པར་བསྒྱུར་ན་སྒོར་མོ་མང་ཙམ་རེག་ཐུབ་ཀྱང་སྲིད”ཅེས་ཁོག་གཏམ་བཤད།ངའི་སེམས་སུ་མི་ནི་ཤི་ཚར་བས་སྒོར་མོ་འགའ་རེ་ལོན་ན་ཡང་ཧ་ཅང་བཟང་སྙམ་པ་ཡིན།

གསར་འགྱུར་གྱི་ནུས་པ་ལ་ང་རང་ཡིད་ཆེས་ཤིན་ཏུ་ཡོད་དེ། བཟང་བོ་ཞིག་ངན་པར་བསྒྱུར་འདོད་ན་སླ་མོ་ཡིན་ལ། ངན་པ་ཞིག་བཟང་བོར་བསྒྱུར་འདོད་ནའང་སླ་མོ་ཡིན། 

ང་ཚོ་སྡེ་འདབས་ཀྱི་གྲམ་ཆུ་བརྒལ་ནས་བཀྲ་ཤིས་ཚང་གི་སྒོ་ཁར་བསླེབས་དུས་མི་མང་པོ་དེར་རུབ་འདུག་ལ། བཀྲ་ཤིས་ཀྱི་ཕ་མ་གཉིས་ཀ་སྔོན་དགོང་མོར་ཟི་ལིང་དུ་བེམ་པོར་མཇལ་དུ་སོང་ཟིན་པས། ཁོ་ཚང་དུ་ཁྱིམ་བདག་གི་ཚབ་ཏུ་ཨ་ཁུ་ནོར་བུ་བསྡད་འདུག  ནམ་རྒྱུན་ཕ་ཡུལ་དུ་ལོག་ཐེངས་རེར་ཁོ་ཚང་གི་སྒོ་ཁར་མཐོང་ཐུབ་པའི་འདྲུད་འཐེན་འཁོར་ལོ་ཆག་པོ་དེ་ཡང་མི་མཐོང་ལ། ཁྱིམ་དུ་དངོས་གནས་འགྲོ་འཆག་ཉལ་འདུག་ལ་མཁོ་བའི་དངོས་པོ་རྩག་རྩིག་དག་ལས་གཞན་རྣམས་སྔར་ནས་སྦས་ཟིན། གསར་འགོད་པ་ཚོས་བཅར་འདྲི་བྱེད་དུས་ཨ་ཁུ་ནོར་བུས་མེད་མུག་འདོན་ཐུབ་ཐུབ་བྱེད་ཅིང་། ངས་ཀྱང་ལོ་ཙ་བྱེད་དུས་གཅིག་ཁར་གཉིས་བསྣན་ནས་ཁོ་ཚང་གི་དཀའ་ཁག་གི་གནས་བབ་ཚབས་ཆེན་དུ་བསྒྱུར་ཅི་ཐུབ་བྱས་པ་ཡིན།

ད་ལྟ་ཕྱིར་ལྟ་བྱེད་དུས། ངས་སློབ་གྲོགས་བཀྲ་ཤིས་དང་གོང་གི་རང་གིས་རྒྱས་འཕྲིན་དུ་བྲིས་པའི་ཡ་རབས་སྤྱོད་བཟང་གི་དཔའ་བོ་བཀྲ་ཤིས་གཉིས་ཀྱི་བར་ལ་མཚུངས་རྟགས་ཅིས་ཀྱང་བརྒྱག་ཐབས་བྲལ། བཀྲ་ཤིས་གཉིས་ཀྱི་བར་ནས་ང་རང་ཧད་དེ་ཡུན་རིང་ལུས། དོན་དམ་དུ་བཀྲ་ཤིས་ནི་དཔའ་བོ་ཞིག་ཡིན་ནམ། བཀྲ་ཤིས་ནི་དཔའ་བོ་ཡིན་མི་སྲིད། ངས་བཀྲ་ཤིས་ལ་དཔའ་བོ་ཞེས་པའི་བདེན་ཁ་རྩ་ནས་སྟེར་མི་འདོད། ཨང་འདིས་ཅི་ཟེར།བཀྲ་ཤིས་ནི་དཔའ་བོ་ཡིན།  བཀྲ་ཤིས་ནི་དཔའ་བོ་ལོས་ཡིན། བཀྲ་ཤིས་ཀྱི་དཔའ་བོའི་མཛད་རྗེས་ལ་ཞིང་ཆེན་རིམ་པའི་མགོ་ཁྲིད་དག་གིས་ཀྱང་སློབ་སྦྱོང་བྱེད་བཞིན་པ་མ་ཡིན་ནམ།     

སྐབས་དེར་ངས་བཀྲ་ཤིས་ཀྱི་གཏམ་རྒྱུད་གཞན་ཞིག་དྲན་བྱུང་། དེ་ནི་ང་རང་སློབ་རིམ་བཞི་པའི་སྐབས་ཡིན། ང་ནི་ང་ཚོའི་འཛིན་གྲྭའི་ནང་ལོ་ན་ཆེས་ཆུང་ཞིང་གཟུགས་བོངས་ཀྱང་ཤིན་ཏུ་ཆུང་། དེ་བས་འཛིན་གྲྭའི་སློབ་གྲོགས་ཕོ་མོ་ཀུན་གྱིས་ང་ནི་གླ་པ་ལྟར་བཀོལ་ཞིང་། རྒྱུན་དུ་བརྙས་བཅོས་ཅི་འདོད་དུ་བྱེད། དེ་འདྲ་ཡིན་ཀྱང་ང་རང་ཁོ་ཚོར་སྐྲག་ནས་སྐད་ཆ་ཚིག་གཅིག་ཀྱང་བཤད་མ་ཕོད། ཉིན་ཞིག་འཇིགས་མེད་ཀྱིས་བདག་གི་དཔེ་ཆའི་སྟེང་དུ་སྣག་ཚ་བླུགས་ནས་དཔེ་ཆ་ནི་ནག་པོ་ནག་རྐྱང་བསྒྱུར་པས།  ང་རང་ངུ་བཞིན་དུ་འཇིགས་མེད་ལ“ཁྱོད་ཀྱིས་ངའི་དཔེ་ཆའི་སྟེང་དུ་སྣག་ཚ་བླུགས་པས་ངས་དགེ་རྒན་ལ་གཏུག་བཤེར་བྱ་རྒྱུ་ཡིན”ཞེས་བཤད་པ་ན། ཁོས་ངའི་དཔེ་ཆའི་སྟེང་དུ་སྣག་ཚ་བླུགས་པ་མིན་པར་ངས་ཁོའི་དཔེ་ཆའི་སྟེང་དུ་སྣག་ཚ་བླུགས་པ་དང་འདྲ་བར་འཇིགས་མེད་སྤོ་མཛོ་འདྲ་བ་ཞིག་ལངས་ཏེ།  “སྐྱག་ཕྲུག་ཁྱོད་ཀྱིས་ཅི་ཟེར”ཞེས་ང་ལ་ཁུ་ཚུར་སྟོན་བཞིན“ཁྱོད་ལ་ལྔ་སྐྲངས་དྲུག་འབུར་དགོས་སམ”ཟེར། ངས་མུ་མཐུད་དུ་འཇིགས་མེད་ལ་ཅི་ཡང་ཟེར་མ་ཕོད་པར་ངུ་བཞིན་སྡོད་སྐབས། བཀྲ་ཤིས་ཡོང་ནས་འཇིགས་མེད་ཀྱི་མཐོང་གར་འཇུས་ཏེ“འཇིགས་མེད་ཁ་རྐོ་ཁྱོད་ཀྱིས་ཅི་ཟེར། མི་ལ་བརྙས་བཅོས་བྱེད་ནའང་དེ་འདྲའི་བརྙས་བཅོས་བྱེད་སྲོལ་ཞིག་ཡོད་དམ། ཁྱོད་ཀྱིས་ཉི་མར་ལྔ་སྐྲངས་དྲུག་འབུར་མ་བྱིན་གོང་ངས་ཁྱོད་ལ་ལྔ་སྐྲངས་དྲུག་འབུར་སྟེར”ཞེས་བཤད་པ་ན། ང་འཇིགས་མེད་ལ་སྐྲག་པ་བཞིན་འཇིགས་མེད་ནི་བཀྲ་ཤིས་ལ་སྐྲག་ནས“བཀྲ་ཤིས་ལོ་ལོ། བཀྲ་ཤིས་ལོ་ལོ”ཞེས་ལག་པས་མ་ནེ་འཐེན་ཞོར་ཞུ་བ་བྱེད། ཁོས་མུ་མཐུད་དུ“ལྔ་སྐྲངས་དྲུག་འབུར་མི་དགོས་ན། རང་གི་དཔེ་ཆ་ཉི་མར་སྟེར་རོགས”ཟེར། བཀྲ་ཤིས་ཀྱི་སྐད་ཆ་དེ་གོ་བས་ང་ནི་དགའ་སྟེ་ཅི་ཞིག་བྱ་དགོས་པའང་མི་ཤེས་པར་གྱུར། ད་ལྟ་ཕྱིར་འདང་བརྒྱབ་ཀྱང་ང་རང་དེ་འདྲ་ཞིག་ད་རག་བར་དུ་དགའ་མ་མྱོང་བ་འདྲ། རྗེས་སུ་ང་རང་རིམ་པ་བཞིན་སློབ་གྲྭར་འགྲིམས་པས། བཀྲ་ཤིས་ལ་འབྲེལ་འདྲིས་བྱེད་པའི་གོ་སྐབས་ཆེར་མ་བྱུང་། 

ཕྱིར་དྲན་གྱི་མཚམས་དེར་བསླེབས་དུས། ངའི་སེམས་པར་བཀྲ་ཤིས་ནི་དངོས་གནས་དཔའ་བོ་ཞིག་ཡིན་སྣང་སྐྱེས་ཤིང་།ཁ་ནས་ཚམ་ཚོམ་མེད་པར “དཔའ་བོ་བཀྲ་ཤིས་ལ་སློབ་སྦྱོང་བྱེད”

ཅེས་ཤོར་སོང།

ན་ནིང་ལོ་གསར་སྐབས་སུ་ང་རང་ཕ་ཡུལ་དུ་ལོག་ཅིང་། རྒྱ་ལོ་ཚེས་གཉིས་ཉིན་གྱི་ཞོགས་པར་དགེ་རྒན་ཚེ་རིང་ལ་ལོ་གསར་འཚམ་འདྲིར་ཕྱིན་པ་ཡིན། དགེ་རྒན་ཚེ་རིང་ནི་དགའ་སྟེ “ཤོག་ཤོག  ནང་དུ་ཤོག”ཅེས་ང་རང་ཁོ་ཚང་གི་འགྲུལ་ཁང་དུ་དྲངས། ཁོས་ང་རང་ཚ་ཐབ་སྟེང་འབུད་དུ་བཅུག་རྗེས་བྱ་བའི་སྐོར་གྱི་གནས་ཚུལ་དྲིས་ཤིང་། “ད་དུང་དགེ་རྒན་བརྗེད་མེད་པ་ནི་ཁྱོད་གཅིག་པུ་རེད། ཡ་ཇ་ཐུངས”ཞེས་བཤད་ཞོར་ལུག་གི་ཚང་ར་ཞིག་བདག་གི་ལག་ཏུ་གཏད། ངས་ཀྱང་ཅི་མི་སྙམ་པར་ཤ་ཟ་བཞིན་དགེ་རྒན་ཚེ་རིང་ལ་ཡར་མར་གྱི་ཁ་བརྡ་བྱས།  ངེད་གཉིས་ཀྱིས་ཁ་བརྡ་བྱེད་ཀྱིན་བྱེད་ཀྱིན་གླེང་གཞི་ངང་ངམ་ཤུགས་ཀྱིས་བཀྲ་ཤིས་ཀྱི་སྟེང་དུ་བབས་བྱུང་།

“བཀྲ་ཤིས་ཀྱིས་ནོར་བུ་འཚོ་ཁུར་ནས་སློབ་གྲྭར་ཡོང་བ་རེད་ཅེས་པ་དེ་བདེན་ནམ།”

“རྫུན་ཡིན།”

“དེས་ན་བཀྲ་ཤིས་ཀྱིས་སྒོར་ཟུར་གསུམ་རྙེད་ནས་ཁྱོད་ལ་བྱིན་ཟེར་བ་བདེན་ནམ།”

“རྫུན་ཡིན།”

“བཀྲ་ཤིས་ཀྱིས་སློབ་གྲོགས་ཤིག་གི་ལྷམ་ཆུས་ཁུར་བ་ཆུ་ཁར་བླངས་ཟེར་བ་བདེན་ནམ།”

དགེ་རྒན་ཚེ་རིང་དགོད་ཀྱིན“དེ་ཡང་རྫུན་ཡིན།”ཟེར།

“ཨ

  དགེ་རྒན་ཚེ་རིང་གིས་ང་རང་ཧ་ལས་པའི་ཉམས་ལ་བལྟས་ནས“ཡོད་ཚད་རྫོང་སློབ་གསོ་ཅུས་ཀྱི་ཝང་ཅུས་ཀྲང་གི་བཀའ་ལྟར་རྫུན་གཏམ་པ་ཡིན”ཟེར།

རྗེས་སུ་ང་རང་སྟོབས་ལྡན་ལ་འཕྲད་དུས་ངས་ཁོ་ལ་བཀྲ་ཤིས་ཀྱི་གནས་ཚུལ་དྲིས་པ་ཡིན།

སྟོབས་ལྡན་གྱིས་ང་ལ་གཤམ་གྱི་སྐད་ཆ་འདི་བཤད་བྱུང་།

    ཤི་བོས་བླ་བསྒུལ་བ་མིན་མོད། ཉིན་དེར་འཇིགས་མེད་དང་བཀྲ་ཤིས་སོགས་ང་ཚོ་གློག་འདོན་བཟོ་གྲྭ་དེ་བརྒྱུད་ནས་འགྲོ་སྐབས། བྱིས་པ་ཞིག་ཆུ་ནང་དུ་ལྷུང་ནས་འཕག་འཚག་རྒྱག་གིན་འདུག  སྐབས་དེར་ངས་འཇིགས་མེད་དང་བཀྲ་ཤིས་གཉིས་ལ་ང་ཚོ་ཆུ་ནང་དུ་ལྡིང་ནས་བྱིས་པ་དེ་སྐྱོབ་པའི་གྲོས་གཞི་བཏོན་པ་ན། འཇིགས་མེད་ཀྱིས་ཅི་ཡང་མི་ཟེར་མོད། བཀྲ་ཤིས་ཀྱིས“སྐྱོབ་འདོད་ན་རང་གིས་སྐྱོབ། ངས་སྐྱོབ་མི་ཐུབ”ཟེར། སྐབས་དེར་བྱིས་པ་དེས་ང་ཚོ་མཐོང་བས“སྲོག་སྐྱོབ་རོགས།སྲོག་སྐྱོབ་རོགས”ཞེས་ངུ་འབོད་བྱེད་ཀྱིན་འདུག  ངས་ཁོ་གཉིས་ལ་མུ་མཐུད་དུ་ཅི་ཡང་མ་བཤད་པར་ཐད་ཀར་ཆུ་ནང་དུ་ལྡིང་བ་ཡིན།  ང་ཡང་བཟང་ན་ངན་ན་དཀོན་མཆོག་གསུམ་ལ་དད་པ་བྱེད་མཁན་ཞིག་ཡིན། བལྟས་བལྟས་ལ་བྱིས་པ་དེ་ཤི་རུ་འཇུག་མི་འདོད། ང་ཆུ་ནང་དུ་ལྡིང་བ་མཐོང་བས་འཇིགས་མེད་དང་བཀྲ་ཤིས་གཉིས་ཀ་ཡང་ཚམ་ཚོམ་མེད་པར་ལྡིང་བྱུང་། ཡིན་ཀྱང་བྱིས་པ་ནི་ངས་བསྐྱབས་པ་ཡིན། ཁྱོད་ཀྱིས་རིག་ཡོད་ནའང་ཐང་།  ཆུ་རྐ་དེ་ནི་ཤིན་ཏུ་གཏིང་། བཀྲ་ཤིས་ལྡིང་ཐེངས་གཅིག་གིས་ཆུ་ནང་དུ་ནུབ་སོང་། ཁོས་ཐ་ན་བྱིས་པ་དེའི་ལག་མགོར་རེག་ཙམ་ཡང་བྱ་མ་ཐུབ། འཇིགས་མེད་དང་ངེད་གཉིས་ཀྱིས་བྱིས་པ་དེ་ཆུ་ཁར་བླངས་ནས་ཁ་ཕྱིར་འཁོར་དུས། བཀྲ་ཤིས་ཆུ་ཁར་གཡེང་ཙམ་བྱས་ནའང་སླར་ཡང་ཆུ་ནང་དུ་ཐིམ་སོང་། ང་སླར་ཡང་ཆུ་ལ་རྐྱལ་ནས་བཀྲ་ཤིས་སྐྱོབ་ཏུ་འགྲོ་དུས། བཀྲ་ཤིས་ཆུས་ཁུར་ཟིན་པ་འདྲ། ངས་ཡར་མར་དུ་བལྟས་ཀྱང་། ཆུ་རྙོག་པ་ཡིན་པས་ཅི་ཡང་མཐོང་མི་ཐུབ། སྐབས་དེར་མི་མང་པོ་ཆུ་ཁར་རུབ་འདུག  ངས་མི་ཚོགས་ལ་ཕྱོགས་ནས“བཀྲ་ཤིས་སྐྱོབ་རོགས”ཞེས་སྐད་ལ་བརྒྱབ་ནས་བོས་ཀྱང་། མི་རྣམས་ཀྱིས་རིག་རིག་ངང་ཆུ་ནང་དུ་ལྟ་བ་ལས་ཆུ་ནང་དུ་ལྡིང་ནས་བཀྲ་ཤིས་སྐྱོབ་མཁན་གཅིག་ཀྱང་མི་འདུག  ང་ནི་ཐབས་ཟད་དེ་ངུ་འབོད་བྱེད་ཀྱིན“ཨ་མྱེས་ཡུལ་ལྷ”ཞེས་བོས་ཀྱང་། ཨ་མྱེས་ཡུལ་ལྷས་ཀྱང་བཀྲ་ཤིས་སྐྱོབ་མ་ཐུབ། རྗེས་སུ་མེ་གསོད་རུ་ཁག་གི་དམག་ཡོང་ནས་བཀྲ་ཤིས་ཀྱི་བེམ་པོ་ཆུ་ཁར་བླངས་པ་རེད། ང་ནི་སྐྲག་སྟེ་བཀྲ་ཤིས་ཀྱི་ངོ་ལ་ལྟ་ཡག་ཅིག་ཀྱང་བྱ་མ་ཐུབ……

 རྗེས་སུ་རྒྱལ་ཁབ་ཀྱིས་བཀྲ་ཤིས་ནི་དཔའ་བོ་ཡིན་ཞེས་བསྒྲགས་ཤིང་། ཁོ་ཚང་ལ་སྒོར་མོ་མང་པོ་བྱིན་པ་རེད། ང་ལ་སྐར་ལི་གང་ཡང་མ་བྱིན། སྒོར་མོ་མ་བྱིན་ན་མ་བྱིན། བྱིས་པ་དེ་ངས་བསྐྱབས་ཀྱང་ཁོ་ཚོས་བཀྲ་ཤིས་ཀྱིས་བསྐྱབས་པ་རེད་ཅེས་སྒྲོག་པ་ལས་ངའི་མིང་ཙམ་ཡང་མ་གླེང་། ད་དུང་གོང་རིམ་ནས་ང་ལ་རྫུན་ལུང་བ་གང་བསྒྲིག་ཏུ་བཅུག  གནས་ཚུལ་ངོ་མ་བཤད་ན་དེ་འདྲ་རེད། ཡ། ད་ཆོག་གི  ལོ་གསར་གྱི་སྐབས་ལ་དེ་དག་གླེང་ནས་ཅི་བྱེད།

སྟོབས་ལྡན་གྱིས་གོང་གི་སྐད་ཆ་དེ་དབུགས་ཐེངས་གཅིག་གིས་བཤད་ཚར་རྗེས། ངའི་སེམས་པ་ཡང་བསྐྱར་འགལ་འདུའི་ཕུང་བོ་ཞིག་ཏུ་གྱུར། སྟོབས་ལྡན་གྱིས་བདེན་ཅོག་ཅོག་གིས་སྐད་ཆ་བཤད་བཞིན་པའི་གདོང་གི་རྣམ་འགྱུར་ལ་བལྟས་ནས། བདག་གི་དྲན་པ་བསམ་གཞིག་གི་གཡང་ལ་ལྕེབས་སོང་།

ཕྱི་ཉིན་ངས་དོན་དག་དེ་བདེན་མིན་བརྡར་ཤ་ཞིག་གཅོད་ཆེད་འཇིགས་མེད་ཚང་དུ་གནས་ཚུལ་རྒྱུས་ལོན་བྱེད་དུ་སོང་བ་ཡིན། ངས་འཇིགས་མེད་ལ་བཀྲ་ཤིས་ཀྱི་སྐོར་དྲིས་པ་ན་ཁོའི་གདོང་ལ་རྣམ་རིག་ཅིག་རྒྱས་ཤིང་། སྟོབས་ལྡན་གྱིས་བཤད་པའི་གནས་ཚུལ་དང་མི་འདྲ་བའི་གནས་ཚུལ་གཞན་ཞིག་འདི་ལྟར་གླེང་བྱུང་།

……ཉིན་དེར་ང་ཚོ་གློག་འདོན་བཟོ་གྲྭ་དེ་བརྒྱུད་ནས་འགྲོ་སྐབས་བྱིས་པ་ཞིག་གིས་ཆུ་རྐའི་ནང་དུ“སྲོག་སྐྱོབ་

རོགས། སྲོག་སྐྱོབ་རོགས”ཞེས་ངུ་འབོད་བྱེད་ཀྱིན་འདུག  རྣམ་པ་དེ་མཐོང་བས་ངས་སྟོབས་ལྡན་དང་བཀྲ་ཤིས་གཉིས་ལ“བྱིས་པ་ཞིག་ཆུ་ནང་དུ་ལྷུང་འདུག  ང་ཚོ་བྱིས་པ་གན་སྐྱོབ་ཏུ་འགྲོ་ཡ”ཞེས་བཤད་པ་ན། སྟོབས་ལྡན་དང་བཀྲ་ཤིས་གཉིས་ཀྱིས“བྱིས་པ་གན་བསྐྱབས་ནས་ང་ཚོ་ཆུས་འཁུར་སོང་ན་ཅི་བྱ། ཁྱོད་ཆུ་ལ་མི་སྐྲག་ན་ངེད་གཉིས་ཆུ་ལ་སྐྲག སྐྱོབ་འདོད་ན་རང་གིས་སྐྱོབ”ཟེར། ཁྱི་སྐྱག་ཟེར་བ་ནི་དངོས་གནས་ཁོ་གཉིས་རེད། བྱིས་པ་དེ་བལྟས་བལྟས་ལ་ཆུ་ནང་དུ་ཐིམ་བཞིན་འདུག  སྐབས་དེར་ང་རང་ལྡིང་ཐེངས་གཅིག་གིས་བྱིས་པ་དེའི་དྲང་ཐད་དུ་ལྡིང་ཞིང་། ལག་པ་ཕར་གཡུག་ཚུར་གཡུག་བྱས་པ་ན་སྟབས་ལེགས་པ་ཞིག་ལ་བྱིས་པ་དེའི་ལག་པ་ལག་ཏུ་ཟིན་བྱུང་། ངས་སྐྲག་མ་དངངས་ཀྱིས་ཤུགས་ཀྱིས་འཐེན་པ་ན་ཆུ་ནང་དུ་ནུབ་ལ་ཉེ་བའི་བྱིས་པ་དེ་ཆུ་ཁར་འཐེན་བྱུང་། སྐབས་དེར་སྟོབས་ལྡན་ཡང་ཆུ་རྐའི་ནང་དུ་ལྡིང་འདུག  ཁོའི་ལག་པ་ཚུར་བསྲིངས་པས་ང་རང་ཁོའི་ལག་མགོར་འཇུས་ཤིང་བྱིས་པ་དེ་རྗེས་སུ་འཐེན་པ་ཡིན།  ངེད་གཉིས་ཆུ་ཁར་བུད་རྗེས་ངས་སྟོབས་ལྡན་ལ“བཀྲ་ཤིས་གང་དུ་བུད་སོང”ཞེས་དྲིས་པ་ན། སྟོབས་ལྡན་ནི་གློ་བུར་དུ་སད་པ་བཞིན། “བཀྲ་ཤིས། བཀྲ་ཤིས། བཀྲ་ཤིས་ཀྱང་ཆུ་ནང་དུ་ལྡིང་སོང་བ་དང་འདྲ”ཟེར། ངེད་གཉིས་ཀྱིས་ཆུ་ནང་དུ་བལྟས་ནས་བཙལ་པ་ན་བཀྲ་ཤིས་ནི་སྔར་ནས་ཆུ་ནང་དུ་ནུབ་ཟིན་པ་འདྲ། ང་དང་སྟོབས་ལྡན་གཉིས་སླར་ཡང་ཆུ་ནང་དུ་ལྡིང་ནས་བཀྲ་ཤིས་བཙལ་པ་ན། བཀྲ་ཤིས་ཀྱི་གྲིབ་མ་ཙམ་ཡང་མི་རྙེད། དེ་དུས་བཀྲ་ཤིས་ཆུ་ནང་དུ་ནུབ་ཟིན་པ་ཁོ་ཐག་རེད། ཆུ་རྙོག་པ་ཡིན་པའི་ཁར་ཧ་ཅང་གཏིང་བས་ང་དང་སྟོབས་ལྡན་གཉིས་ཀྱང་ཅི་བྱ་གཏོལ་མེད་དུ་ལུས། དེ་དུས་མི་མང་པོ་ཆུ་རྐའི་ཁར་རུབ་འདུག  རྗེས་སུ་མེ་གསོད་རུ་ཁག་གི་དམག་ཡོང་ནས་བཀྲ་ཤིས་ཀྱི་བེམ་པོ་ཆུ་ཁར་བླངས་པ་རེད། རྒྱལ་ཁབ་ཀྱིས་ད་དུང་ངས་བསྐྱབས་པའི་བྱིས་པ་དེ་བཀྲ་ཤིས་ཀྱིས་བསྐྱབས་པ་རེད་ཅེས་བསྒྲགས་ཤིང་།  བཀྲ་ཤིས་ནི་དཔའ་བོ་རེད་ཟེར། ད་དུང་ཁོ་ཚང་ལ་སྒོར་མོ་མང་པོ་བྱིན་ནས་སེམས་གསོ་བྱས་པ་རེད། དེ་ནི་ཇི་ལྟར་བསྒྲགས་ན་བསྒྲགས། མིང་སྐམ་པོ་ཙམ་གྱིས་ཅི་བྱེད། ཡིན་ནའང་ང་ལ་སྒོར་རྡོག་ཁ་ཤས་ཅིས་ཀྱང་འབབ་བ། ཡ།ཁྱོད་ནི་རིག་གནས་པ་རེད། ཁྱོད་ཀྱིས་དྲང་མོར་ཤོད་དང་། དཔའ་བོ་ནི་ང་རེད་དམ་བཀྲ་ཤིས་རེད།

འཇིགས་མེད་ཀྱི་དྲི་བ་དེས་ང་རང་གྲག་མེད་སེ་བཏང་བྱུང་།  དོན་དམ་དུ་དཔའ་བོ་སུ་ཡིན་ནམ།  སྟོབས་ལྡན་དང་འཇིགས་མེད། བཀྲ་ཤིས་གསུམ་པོ་རེས་མོས་སུ་ངའི་ཀླད་པའི་ནང་དུ་འཁོར་ནའང་། དོན་དུ་དཔའ་བོ་སུ་ཡིན་པ་ངས་ཀྱང་ལན་འདེབས་མི་ཤེས།

གང་ལྟར། བཀྲ་ཤིས་ཤི་སོང་།

དཔའ་བོ་བཀྲ་ཤིས་ཤི་སོང་།

དཔའ་བོ་བཀྲ་ཤིས་ཤི་སོང་བའི་དོན་དག་དེ 2010ལོའི་གསར་འགྱུར་གལ་ཆེན་ཞིག་ཏུ་བརྩིས་ཤིང། ཞིང་ཆེན་གོང་འོག་ཏུ་གཙིགས་སྣང་ཆེན་པོ་བྱས་ཏེ “དཔའ་བོ་བཀྲ་ཤིས་ལ་སློབ་སྦྱོང་བྱ་དགོས”དང་། “བདེན་མཐོང་དཔའ་སྐྱེད་ཀྱི་དཔའ་བོ་བཀྲ་ཤིས་ནི་དུས་རབས་གསར་བའི་ན་གཞོན་གྱི་མིག་དཔེ་ཡིན།” “བཀྲ་ཤིས་ནི་ནམ་ཡང་གུང་ཁྲན་ཏང་གི་བུ་ཕྲུག་བཟང་བོ་ཡིན”ཞེས་ཁ་གཡང་སྣ་ཚོགས་ཆུ་འབབ་ཀྱི་དབྱངས་ལྟར་སྒྲོག་བཞིན་འདུག་ལ།  “བདེན་མཐོང་དཔའ་བསྐྱེད་ཀྱི་དཔའ་བོ”དང་། “མི་རིགས་མཐུན་སྒྲིལ་གྱི་སྔོན་ཐོན་མི་སྣ”སོགས་མཚན་སྙན་ཡང་རྣམ་པ་སྣ་ཚོགས་ཤིག་གནང་བ་རེད།

རྗེས་སུ་སྲིད་གཞུང་གིས་ད་དུང་དཔའ་བོར་དྲིན་ལན་གཟོ་ཆེད་ང་ཚོའི་སྡེ་འདབས་སུ་ཨར་འདམ་གྱི་ཟམ་ཆེན་ཞིག་འཕངས་བྱུང་ལ། ཟམ་པ་དེའི་འགྲམ་དུ་ད་དུང“དཔའ་བོའི་ཟམ་པ”ཞེས་ཡིག་འབྲུ་བཞི་བྲིས་ཡོད་པའི་རྡོ་རིང་ཞིག་ཀྱང་བསླངས་བྱུང་། ཟམ་པ་དེ་འཕངས་པས་ང་ཚོའི་སྡེ་བར་དངོས་གནས་སྟབས་བདེ་ཆེན་པོ་བཟོས། སྡེ་མི་རྣམས་དཔའ་བོའི་ཟམ་པའི་སྟེང་ནས་ཡར་འགྲོ་མར་ཡོང་བྱེད་ཀྱིན་འདུག་ལ། བདག་ཀྱང་དཔའ་བོའི་ཟམ་པ་བརྒྱུད་ནས་ཕ་ཡུལ་དུ་ཐེངས་མང་སོང་མྱོང་། དཔའ་བོའི་ཟམ་པ་བརྒྱུད་ནས་འགྲོ་ཐེངས་རེར་ངའི་ཡིད་ལ་བཀྲ་ཤིས་ཟེར་བའི་སློབ་གྲོགས་དེ་ཡང་ཡང་འཁོར་འོངས……

chisanghua སྤེལ་དུས། - 2012-10-15 11:04:39
 

འབྲུག་ཡུལ་ནས་ལྷ་ས་དྲན་པ།

 

                                                ཆར་སྡོད་བྱེའུ་ཡིས་བརྩམས།

 

                             

མ་གཞིར་ཁྱོད་ལ་བསྐུར་པའི་འཕྲིན་ཡིག་ཏུ་ལྷ་ས་ཐེངས་གཅིག་གླེང་ན་འོས། ཉམ་ཆུང་པའི་སྤྲེའུ་དེ་དང་གཏུམ་དྲག་པའི་སྲིན་མོ་དེ།  གར་སོང་ཆ་མེད་དུ་གྱུར།

ངའི་དྲན་གདུང་དང་ངའི་མིག་ཆུ།  ཡོད་ཚད་ཀྱི་ཡོད་ཚད་ལ་ནག་ཉེས་ཆེ་ན། ངའི་མིག་ཆུས་ཁྱོད་ཉིད་གཤེར་མི་ཐུབ་ལ།  ངའི་དྲན་གདུང་གིས་ཁྱོད་ཉིད་དབྲབ་མི་སྲིད་ཀྱང་།  ཡིད་སེམས་ཀྱི་གཏིང་སར་རུ་རེ་སྒུག་ཅིག་ཡོད་ཚུལ་ཡུན་རིང་དུ་ངོམ།

ཡུན་རིང་པོར་བཟོད་སྒོམ་གྱིས་སྐྱེལ་ན། ཁ་དོག་ཤོར་པའི་བཤད་རྒྱུན་རིང་མོ་ཞིག་ལས་བསལ་བསམ་རུང་། སྐྱོ་བའི་སྐྱོ་སྣང་གིས་དྲན་ཆོག་པའི་ལྷ་ས་མ་དྲན།

 

                                     ༢

མཆི་མས་གཡོགས་པའི་ངོ་གདོང་ལ།    སྙིང་རྗེ་ཡིས་ཕྱི་མིག་གཟིགས་དང་།

ལས་དབང་འདིེར་འཛུམ་དམུལ་དམུལ་གྱིིས་སྲུང་ཆོག་ཚེ།  མི་ཚེ་འདི་སྐྱོ་ལྷང་ལྷང་གིས་འགྲོ་པ་ཅི།

ངུ་སྟངས་ཤིག་ཡར་ལུང་གཙང་པོས་ཚོར་ཡོད་ན། གནའ་བོའི་ཚོ་ཁག་གི་སྣང་བརྙན་རབ་རིབ། བཤད་འཕྲོར་ལུས་པའི་སྙིང་གཏམ་དུ་འཇོག་འོས།

སའི་གོ་ལའི་སྒང་དུ། ཁྱོད་ནི་ཡུལ་ཤོར་པ །  ཞེ་ས་ཐེངས་གཅིག་མྱོང་པའི་སྐལ་བ་དབེན།

སའི་གོ་ལའི་སྒང་དུ། ཁྱོད་ནི་ཡུལ་འཁྱམས་པ ། སྙན་འཇེབས་དབྱངས་ཀྱི་འགྱུར་ཁུགས་སུ་བཞུར་ཁག།

 

                                          ༣

ཤ་དང་མཆིན་པ་བརླན་པའི་སྤྲེའུ་དང་སྲིན་མོའི་བརྩེ་དུང་གི་མཇུག་བྱང་དུ།  རེི་རེ་གནའ་སྔ་མོར་བཅོལ །

རེ་རེ་འུར་ཟང་ཟིང་།  རེ་རེ་ལ་ངོ་མཚར་དུས ། ཡུལ་མཐའ་འཁོབ་ཡར་ལུང་ལ་ལོག་ནས།  བོད་སྐད་ཀྱི་དམངས་་གླུ་ཞིག་སྐད་གསེངས་མཐོན་པོས་བཏེགས་འདོད།

དམངས་གླུ་རུ།   མཁའ་མཐའི་སྐར་མ །མཚན་མོའི་རྫི་བོ། དམངས་གླུ་རུ།ལ་ཁའི་དར་ལྕོག། རྩ་ཐང་གི་སོ་སྲུང་།

རེ་རེ་ལ་ཚོར་སྣང་སྤྲོས་ན། རྨས་སྐྱོན་དུ་ཕོག་པའི་ཁྱོད་ཉིད་ནི་དྲན་ཆོག་པའི་ལྷ་ས་རེད།

 

                                        ༤

གསོལ་འདེབས་ཤིག་སེམས་ཀྱིས་བཟློས། སྔར་འོང་སའི་ལམ་བུ་སྐྱ་ཐིང་ཐིང་།

རེ་ལྟོས་ཤིག་མིག་གིས་འབུལ།  བར་ཆད་ཀྱི་སྐྱོགས་མཚམས་ནག་ཡོར་ཡོར།

ལྷན་འཛོམས་ཤིག་ལག་པས་གཉོར། དྲན་བཞིན་པའི་ལྷ་ས་ཁུ་སིམ་སིམ།

ཀྱེ་ཀྱེ།  བྱེའུ་ཆུང་ཞིག་གི་ཚལ་གྱིས་གཤོག་ཟུང་བརྐྱངས་ཏེ།   ཉི་ཟླའི་ འོད་མདངས་བཀྲ་པའི་གནམ་སྔོན་པོ།  སྲིད་པ་འདི་རུ་མེད་སོང་།

 

                                          ༥

ཡོད་ཚད་སྟེས་དབང་དུ་གྱུར་ན། མིག་ཟུང་ཟིམ་ཟིམ་གྱིས་མ་བཙུམ ། རྨི་ལམ་ཚར་གཅིག་གི་འགོ་རུ། ཁྱོད་ནི་ཆར་ཆུ་འཇོམས་པའི་ཐང་ཀ་

ཞིག་གི་སྟེང་དུ་གསོན། སྤྲང་བོ་ནང་བཞིན་མཐེ་བོང་བསྒྲེངས་ཀྱང་།ཅི་ཞིག་རྙེད་ཐུབ།

རྨི་ལམ་ཚར་གཅིག་གི་མཇུག་ཏུ།  ཁྱོད་ནི་རླུང་འཚུབ་ཀྱིས་ཁུར་པའི་སྙན་ངག་ཅིག་ཏུ་ཤི། ཡུགས་ས་ནང་བཞིན་ངུས་ངུས་ཀྱང་། གང་ཞིག་ཐོབ་སྲིད།

ཡོད་ཚད་རང་ཉིད་ལ་བྲལ་ན། ཟུག་གཟེར་གྱི་མྱོང་པ་རང་སེམས་ལ་གསོག་དང་། གསེར་གྱི་ཕོ་བྲང་། མོན་གྱི་མགུར་གླུ་རུ་ཡོད་ཡོད་འདྲ།

 

                                   ༦

ཁྲག་གིས་སྦགས་པའི་ངོ་གདོང་། མིག་ཅེ་རེར་ངང་རྒྱང་རིང་ལ་མ་བོར།

རྟག་ཏུ་མགྲིན་པར་འཚང་པའི་དྲི་བ་འདིའང་ཆོས་སྐྱོང་སྲུང་མས་ མི་ཉན། སྨོན་ལམ་ལྟ་བུའི་གོ་རིམ་དུ། མགོན་སྐྱབས་ཤིག་གློ་བུར་དུ་འབྱོན་ཞིང་།

ཁྱོད་ལ་བྱིལ་བྱིལ་གནངས་པ་ནི །ཁྱོད་ཀྱིས་མི་རབས་ནས་མི་རབས་བར་དུ་བརྒྱུད་པའི་སྡུག་བསྔལ་བགྲང་རོགས།

 

                                           ༧

མགོ་བོ་བྲང་ལ་སྨད་ནས་མིག་ཆུ་མི་འཐུང་མ་གསུངས། དྲན་གདུང་གི་གནར་གཅོད་ལ་ཐར་ལམ་དགོས་ན།

སྐྲངས་འབུར་ཁེངས་པའི་གྲིབ་ནག་ལ་གཡས་སྐྱོར་གཡོན་སྲུང་གི་བསོད་ནམས་ཉམས་དུས། སྐྱབས་འཇུག་ཅིག་སུ་ལ་ཞུ་འོས།

སྐྱབས་སུ་མཆོད་པའི་ལྷ་དང་ལྷ་མོ་ལགས།

ཁོ་ལ་སྐྱིད་པའི་ རྨི་ལམ་གནོངས་དང་།  ཁོ་ཡི་མཚན་མོ་ནི་སྨག་རུམ་གྱིས་བསྐོར་ཞིང་། ཁོའི་མིག་ཟུང་དུ་འདས་དུས་ཀྱི་གཟུགས་བརྙན་ཞིག་འཆར།

 

                                          ༨

ལོ་གསར་གནམ་དགོང་གི་རྨི་ལམ་དུ་སིམ་པའི་ཁྱོད། བཙོན་ནས་ལྕེབས་པའི་ད་ཕྲུག་དེ་མིན་འདོད།

མར་མེ་ཁྲོམ་བསྐོར་རུ་ཞེད་སྣང་ཞིག་གམ་སྐྱོ་སྣང་ཞིག་ཁོ་བོར་འཕྲད།

མུན་པའི་ཚོགས་མར་མར་བཞུར་དུས།  ས་ཆེན་གྱི་པང་དུ་འཐིམས་པའི་རྣམ་ཤེས་དེ་ཁྱོད་མིན་བསམ།  དམྱལ་བ་འདྲ་པའི་བཙོན་ཁང་དུ་མཐའ་མའི་ཁ་

ཆེམས་ཤབ་ཤུབ་སུ་ལ་བསྐུར།

སྙིང་གསེབ་ལ་ཟུག་རྔུ་རྡེབ་ཐེངས་རེར།    འཁྲེང་ཞེན་གྱི་དབུགས་རིང་ ཁྲོད་དུ །   ཞེན་ཆགས་ཀྱི་རྒྱང་མིག་དྲུང་དུ།   ད་དུང་རེ་སྨོན་གྱི་རི་མོ་རུ།

ཁྱོད་རང་འགྱེལ།   ཁྱོད་རང་གཡོ།  ཁྱོད་རང་འཁྱུག།

 

                                            ༩

ཚེ་གཅིག་ལུས་གཅིག་གཞན་ཡུལ་ནས་རྒས་ན། གནོངས་འགྱོད་ཀྱིས་བྲན་གཡོག་གྱུར་སྲིད།

མི་མངོན་པའི་བར་ཐག་རིང་མོས །ང་ཡང་རང་དབང་མེད་པ་ལྟར། སོང་ཟིན་པའི་རྐང་ལམ་ཕྲ་མོར་ཡང་བསྐྱར་ཞུགས། ལམ་གྱི་སྐྱོགས་

མཚམས་རེ་ནས་ཁྱོད་གཅིག་པུ་དྲན་རྒྱུ་ནི། གོ་ནོར་ཐེབས་པའི་ལས་དབང་མིན་སྙམ།

སེམས་ཁོང་དུ་སྨིན་པའི་མཛེས་སྡུག་རེ་རེ་ཨ།  མིག་ཟུང་གིས་མཇལ་པའི་དུས་ཆད་ཚེ་འདི་མེད་པར།

ཕལ་ཆེར་སྐྱེ་བ་རྗེས་མ་ཆེས་ཐོག་མའི་སྨོན་ལམ་དུ་བསྒྲིགས་ནས།   ཆེས་མཐའ་མའི་འཐམ་འཁྱུད་ལ་དུང་སེམས་གྱེར་དགོས་ན།

ཁྱོད་ཀྱིས་དུས་ཡུན་རིང་པོ་ཞེས་འཁང་ར་མ་བྱེད།

 

                                           ༡༠

ཡུགས་ས་རུ་ལུས་པའི་བགྲེས་པོ་ཞིག་གི་སྐད་ཆའི་བརྗོད་སྙིང་དུ། དམར་པོ་རི་སྐད་ཅིག་གི་ས་འགུལ་ཁྲོད་དུ་ཉིལ།

ཡང་ན་ས་རྡུལ་གྱི་ཕུང་པོ་རུ་གྱུར་པའི་དམར་པོ་རི།ཕྱི་མིག་གི་རྒྱབ་ལྗོངས་སུ་མྱོང་དུས། སྨྲ་མི་ཤེས་པའི་སྐྱོ་ངལ་ཞིག་སེམས་ཀྱི་ཟབ་ས་རུ་རྩེན་ལ།

ཟླ་བོས་བསྐྱུར་པའི་ཡུགས་ས་དེ་ཁ་སང་གི་ཁྲིམས་ཁང་ལ་རྫོངས་བསམ།

གང་ལྟར།  མྱ་ངན་གྱི་ཁ་གཏད་དུ་འགྲེང་དགོས་པས།བཟློག་ཏུ་མེད་པའི་ཚོར་སྣང་དག་དུམ་བུམ་གཏུབས་དགོས་ཀྱང་།  ཁྱོད་ཀྱིས་ཅི་ཡང་མི་སྨྲ།

ཁྱོད་སྲུང་པའི་ལྷ་དམག་རྒྱང་དུ་བྱེར།

                                       

                                       ༡༡                   

 

ཕམ་དམག་ནི་ཕམ་དམག་རེད།  སྔར་ལྟར་གསང་དགོས་པ་གང་་ཡིན།

རང་ཉིད་ལ་སྐྲག་པའི་ལོ་ཟླ་རུ། རང་ཉིད་ནི་རང་གི་མགོན་དུ་མི་སྒོམ། གཏིང་ཟབ་པའི་ཁ་ཏའི་ཨག་འགྱུར་དུ།གང་ཞིག་ལྷང་ལྷང་དུ་བརྟོལ་སོང་།

འབོད་པ་ཁ་ཤས་སུ་འཕྱོ་པའི་ཁྱོད་ཉིད། ཐག་རིང་ནས་ཐག་ཉེ་རུ་བོས་འདོད་ཀྱང་།  འཛུམ་དམུལ་ཞིག་མི་ངོམ་ལ། སྐྱོ་གླུ་ཞིག་མི་ལེན།

ཧ་ཅང་ཁུ་སིམ་མེར་འཚོ་བ་ནི། ཚེ་གང་གི་་ལན་ཆགས་སུ་ཐོར་དུས།  ཁྱོད་ལ་ཅི་ཞིག་བཀའ་འདྲི་ཞུ།

 

                                             ༡༢

ངུ་ཤེས་པའི་ཁྱོད། ལུས་དྲོད་ཉམས་པ་ལྟར་མི་ཡུལ་ལ་གྱེས་ན། ཕྱི་མིག་མ་ལྟ།

གྱེས་པ་ལས་སུ་སྨིན་རུང་། སྐྱེལ་མ་རེ་ག་ལེར་བཙལ་ཚེ། མཆི་མ་རེ་སེམས་ཁོང་ལ་འགྲིལ་བཞིན། བཟློག་ཐབས་མེད་པའི་དུས་ཚོད་ལ་ཕྱིར་དྲན་རིང་མོ་ཞིག་བཅོལ་ལམ།

ངུ་ཤེས་པའི་ཁྱོད་ལྷ་ས་རུ་འབྱོར་ན ། ནང་མ་ཁང་གི་སྦུག་ཏུ་མ་འཛུལ། ལོ་གསར་གྱི་གཏམ་རྒྱུད་ཅིག་ཧོར་དམག་གིས་བརྩམས་པས།

ལྷ་ས་ནི་དྲན་ཆོག་པའི་ལྷ་ས་ལགས།

 

                                                    ༡༣

མིག་འབྲས་གསེབ་ཏུ་རེ་སྒུག་ཟླུམ་པོ་ཞིག་གབ་ནས། མཚན་མོ་རེ་རེར་ཉུལ། ཁྱི་ཚོགས་ཀྱི་ངུ་ཟུག་གིས་གཉིད་མ་ཁུགས།

རྨི་ལམ་རྨིས་འཕྲོར་ལུས་པའི་མཚན་མོ་ཞིག་ལ།  དམག་རྟ་ཁྲི་ཕྲག་གིས་ཁྲག་དམར་གྱོན་ནས་རང་ཡུལ་ལ་ལོག།

འཚེར་སྣང་གི་མཚན་མོ་དེར། གཞོབ་དྲི་དང་ཁྲག་དྲི་འཐུལ་པའི་ཁྱོད་ཀྱི་ཉེ་ས་རུ་སུ་ཞིག་འགྲེང་ཡོད།སེམས་གསོ་ཙམ་སྒུག་པའི་ཁྱོད་ནི་ཁྱོད་དེ། ད་ལྟ་རླུང་གི་རྒྱུ་ཕྱོགས་སུ་ཡམ་ཡོམ་དུ་གཡོ།

 

                                                   ༡༤

དྲག་རླུང་གིས་བཅོམ་པའི་ཁྱོད་ལ།  ངས་ཀྱང་སྔ་མོ་ནས་གདུང་སེམས་བྱོ་པའམ་འཇིག་རྟེན་གྱི་དཀར་ངོགས་སུ་ཁྲིད་ནས། མར་མེའི་སྨོན་ལམ་སྒྲུག།

ཉམས་སུ་མྱོང་པ་ཐམས་ཅད་བརྗེད་འདོད་མེད་པར། ནམ་ཡང་གླུ་བ་ཞིག་གི་གླུ་སྐད་དུ་འབབ་ན། ངས་ཀྱང་ཁྱོད་ལ་དགོས་པའི་དྲོད་འཇམ་གང་ནས་བཙལ།

གོམ་པ་རེ་རེ་ཤུགས་ཀྱིས་སྤོས། ལན་མེད་པའི་དྲི་བ་རེ་རེ་སེམས་ལ་རུབ་པས།  ང་ངུ་ཆོག་གམ།  ང་ཡང་ཐེངས་མང་པོར་ངུ་རུ་བཅུག་དང་།  དྲག་རླུང་གིས་བཅོམ་པའི་ཁྱོད་ནི་བྲིས་མི་ཚར་པའི་སྙན་ངག་གི་བསླུ་བྲིད་དུ་གཏོགས།

 

                                           ༡༥

ནམ་ཞིག་སེམས་པ་ལ་ཨ་ཐང་ཆད་ན། འཁྱར་འཁྱོར་ངང་ལྷོ་རུ་ཉུལ་ཞིང་ཤར་རུ་འཁྱམ།

མིག་ཟུང་ལ་སེར་ཀ་གས་ཏེ།  མཛེས་རིས་ལྟར་འཁྱུག་པའི་ཁྱོད་ཀྱང་རེ་ལྟོས་སུ་དཀྲིས་ནས། སོང་ཟིན་པའི་རྒྱལ་རབས་ཤིག་ཡང་བསྐྱར་འབྱོན་ཏེ།

ཕོ་བྲང་དེ་མཐོ་རུ་ནས་མཐོ་རུ་བཞེངས་ན་བརྗིད་ཉམས་ལྡན།

ནམ་ཞིག་ཁ་བ་དང་མཉམ་དུ་ནང་དོན་མི་གཅིག་པའི་ལོ་ཟླ་དེ་ཚོ་དྲན་བཞིན་ཁྱོད་དྲན་དུས།  ཁྱོད་ཀྱིས་ས་རྡུལ་མནབས་པའི་ངོ་གདོང་ང་ལ་སྟོན་སྲིད།

 

                                                 ༡༦

ཚོར་བའི་མཐའ་རུ་འཁྱུད་པའི་ཁྱོད་ལ་མ་ཡུམ་སུ་ཡིས་གཅེས་ཕྲུག་ཏུ་གཉོར།  ངུ་སྐད་དང་ལྷན་དུ་ནར་སོན་རུང་།  དབུལ་ཕོང་གི་མིག་ཆུ་

ནམ་ཡང་སྐམ་མ་མྱོང་ལ། མིག་ཆུ་རུ་ལུས་པའི་མཇལ་འཛོམས་ཤིག། ཉིན་མཚན་གྱི་བར་ནས་ཟད་ཚར་ན། ལས་དབང་གི་བཀའ་བཀོད་ལ་ཡང་

ནས་ཡང་དུ་ཡིད་རྟོན་བྱེད་སྲིད།

དྲན་ཆོག་པའི་ཁྱོད།  ནམ་ཞིག་འཛུམ་དམུལ་གྱོན་ནས་ཚོར་པའི་ཉེ་ས་རུ་ལྷགས།  དེ་དུས།  གཏམ་གྱི་འགོ་བརྗོད་ཁྱོད་ཡིན།

 

                                              ༡༧

དམར་མཆོད་དུ་ཕུལ་པའི་རྣམ་ཤེས་རེ་རེ།  དབྱངས་གསལ་སོ་བཞིས་སྐྱོབ་ཐུབ་ན།  སླར་ཡང་ཐག་རིང་ཐག་རིང་ལ་མ་འགྲོ།

མྱ་ངན་གྱི་ཉིན་ཞིག་དྲན་པར་ཁྲོད་སླེབས་སྐབས། འཚིག་དྲི་མ་ཡལ་པའི་རུས་རྐང་རེ་རེ། ཕྱོགས་བཞི་མཚམས་བརྒྱད་ཀྱི་མཆོད་རྟེན་དུ་བཞེངས་པ་ཅིའི་ཕྱིར་བརྗེད།

རྣམ་ཤེས་རེ་རེ་ཁྱོད་ལ་དུང་པ་ནས། ཁྱོད་ནི་མཛེས་ཤིང་སྡུག་པའི་ལྷ་ཡུལ་བཞིན་རྒྱང་ཐག་རིང་།

 

                                           ༡༨

ངུ་སྟངས་ཤིག་བོར་སོང་། ཁྱོད་ཀྱིས་གཏན་དུ་གུ་ཡངས་མ་གཏོང་། སྙན་ངག་ཏུ་བྲིས་མྱོང་པའི་ཁྱོད་ནི་སྐུ་དྲག་གི་སྒེའུ་ཁུང་ལས་འཕྲོས་ཤིང་། སྤྲོ་སྣང་རབ་ཏུ་འཕེལ་པའི་གསོལ་སྟོན་དུ་བཤམས།

ཁྱོད་ཀྱིས་ལྕགས་སྒྲོག་སིལ་སིལ་གྱིས་དཀྲོལ་དང་། འདར་སིག་སིག་གི་སྣང་བརྙན་ཡང་མཇུག་མ་བསྒྲིལ་པའི་ཟློས་གར་རུ་ཟུག་ན། རེ་ཞིག་དྲན་མེད་དུ་འགྱེལ་། ཡུན་རིང་པོར།  དབུགས་རིང་དུ་འཁྱིལ།

 

                                            ༡༩

མུན་ནག་གིས་ཁྱོད་ཉིད་མཚན་མོ་གཞན་ཞིག་ལ་ཁྲིད་རྗེས།  སྔར་ལས་ཐེངས་གཅིག་མཐོང་ན་འདོད། ཁྱོད་ཉིད་གང་དུ་ཡོད།

མིག་བཙུམ་ནས་སེམས་ལ་སློང་ཡང་། ཁྱོད་ཉིད་ནག་ཡོར་ཡོར་གྱི་མུན་ནག་ལ་བསྲེས།

ཟླ་བ། ཟླ་བ།  མུ་མེད་ཀྱི་ནམ་མཁའ་ལས་འཁྱར་སོང་ན། ངས་ཀྱང་མུན་ནག་གོན་ནས། ཁྱོད་ཀྱི་གྲིབ་མ་རྨི་ལམ་དུ་བཅོལ།

ཤུགས་རིང་ཞིག་གིས་ཁྱོད་ནི་ཁྲག་བཞིན་དམར།

 

                                               ༢༠

རྒྱང་རིང་ལ་འཕུར་ཟིན་པའི་ཁྲུང་ཁྲུང་། ཁྱོད་ཀྱི་ལྷ་བྱ་ཡིན་པ་དྲན་དང་དྲན་མོད།

ན་བུན་ཐོར་པའི་ལོ་ཟླར། མིག་ཟུང་བཀོལ་ནས་བཙལ་བསམ་ཡང་། མིག་ཟུང་དུ་འཛུལ་པ་སུ་ཡིན།  རྒྱང་རིང་རྒྱང་སྨོན་དུ་བསྒྲིགས་ཀྱང་།

ཁྲུང་ཁྲུང་དེ་རྒྱང་རིང་ན་མེད།

རྒྱང་རིང་ལ་འཕུར་ཟིན་པའི་ཁྲུང་ཁྲུང་། དྲན་གླུ་ཞིག་གི་ཁུགས་སུ་འཁོར་རུང་། གཤོག་སྒྲོ་འཇམ་པོ་བྱང་རླུང་གིས་ཁུར་པ་ཨེ་མཐོང་།

མནར་གཅོད་ཅིག་འདི་ལྟར་ཚོར་སྣང་དུ་སྤུར་ན།  མྱ་ངན་རྫོགས་མེད་ཅིག་འདི་ལྟར་སུ་ལ་བཞག་སྟེ་འགྲོ།

 

                                                     ༢༡

རེ་བ་རུ་རེ་བ་ལྷག་མ་ཞིག་བཟུང་ན། སྙིང་བཞིན་ལྡིང་པའི་བཙན་པོ་ཚོ་ཕྱིར་འོང་མེད།

མིག་ཆུ་རུ་མིག་ཆུ་སྐྱུར་མོ་ཞིག་བསྐྱིལ་ན། མིག་བཞིན་འཕགས་པའི་བློན་པོ་ཚོ་ཕྱིར་འོང་མེད།

ཕམ་ཁའི་རེ་བ་བསྲུབ་སྐལ་ལྡན་ན།  སྐྱོ་སྣང་གི་མིག་ཆུ་གཞིབ་ཐབས་རེག་ན །  དྲན་གདུང་གིས་མཉེས་པའི་རྒྱང་ལྟ་རུ་ཁྱོད་རང་བཏུམ་སྲིད།

ཁྱོད་ཀྱི་མངལ་ལ་བརྫིས་པའི་ཁྲག་རྗེས་རིང་མོ ། དྲན་རྟེན་དུ་གཡེང་དགོས་པའི་ཡ་ཐོག་གི་དམག་འཁྲུག་མིན་པ་ཚོར།

རྣམ་ཤེས་ཕྲ་མོ་ཁྱོད་ལ་ཕྱོགས་པ་ནས། བཀའ་བཀོད་མེད་པར་ཐོར་སོང་པ་དྲན་ནམ།  ཁྱོད་ཀྱིས་ལན་གཅིག་གི་རྒྱང་འབོད་དུ་བཏུས་དང་།

རྣམ་ཤེས་སུ་བརྒྱུས་པའི་ཁྱོད་ཨང་།

 

                                                    ༢༢

དྲན་གླུའི་མཆོད་པ་རུ་ཁྱོད་གཅིག་པུ་བཤམས་ཀྱང་།  ཡིད་རྟོན་འཕེལ་པའི་གྲུ་ཁ་ཞིག་ཏུ་ཁྱོད་རང་མྱུར་བར་མི་མངོན།

ངུས་ངུས་ངུས་པའི་མིག་འབུར། སུ་ཞིག་གི་བརྩེ་དུང་དུ་བསྟན།  མག་མོག་གི་རུས་ཐལ་ལ་རྣམ་ཤེས་བྲལ་ཡང་། སྔར་བཞིན་སེམས་པ་ཐེངས་ཤིག་གླན།

ཆགས་འཇིག་རེ་རེ་ཁྱོད་དང་བསྡོངས་ཏེ། ངུས་མི་ཚར་པའི་ཁྱོད་ལ་སྦར་འབྲད་བྱེད་བཞིན་གང་དུ་གཏོར།

 

                                            ༢༣

ཁྱེད་ཡང་བསྐྱར་མུན་པའི་ཁྲོད་ལ་ལྷུང་སོང།  ངས་ལས་སྙོབས་ཇི་ཙམ་བྱས་ཀྱང་།  དེ་ཙམ་གྱིས་རྙེད་པའི་ཚོར་སྣང་དུ།   འདར་སིག་སིག་གིས་འཚོ་དགོས་པ་གཏན་འཁེལ་པས།  ངས་བཤད་རྒྱུན་གང་ཞིག་གི་ཀློང་དུ་འགྲེང་ནས།   ཆར་བའམ་ཁ་བའི་ལམ་བུ་ཚུར་ལ་བསུ།

 ལྷ་ས།  ཁྱེད་སུ་ཡི་ཡིན།   ཁྱེད་ཀྱི་མིག་ཆུ་ཁ་ཤས་མིན་པར་སྨོན།  ཁྱེད་དང་བྲལ་བའི་རྣམ་ཤེས་རེ་རེ།   

                                             ༢༤

ཡང་གཅིག་བཤད་ན།  མི་མདོན་པའི་ལས་དབང་དཀའ།  དྲན་གདུང་སྐྱོང་ཀིན་པའི་སེམས་ཁོང་ཏུ།  ཁྱེད་ནི་གཏན་ཏུ་མཛེས་སྡུག་གིས་བཏུམ་མོད།    ཆགས་འཇིག་གི་འཕྲོར་རུ་ཆགས་འཇིག་མཐུད་པ་ནས།   ང་ནི་འཇིག་རྟེན་འདི་རུ་གྲགས་འགུལ་མེད་པ་ལྟར་སྣང་། ངའི་དབུགས་རྔུབ་ན།  ད་དུང་ཁྱེད་ཉིད་འགུལ་བཞིན།

 

                                         ༢༥

རྨི་ལམ་ནི་རྨི་ལམ་ལ་དབང་རུང་།  ཁྱེད་ལ་དབང་བའི་རྨི་ལམ་ཡང་རླུང་འཚུབ་ཀྱིས་ཁུར་པས། 

 ང་མྱ་ནང་གྱིས་བཟུང་ནས།  ངས་མིག་ཆུའི་ལོ་ཟླ་སུ་ལ་གསང་།

 

2012/8/24  ཉིན་རྩོམ་པ་པོའི་མ་ཡིག་སྦྱར།

chisanghua སྤེལ་དུས། - 2012-10-10 14:37:47
 

 

ཟླ་འོད་འོག་གི་གྲོ་ཞིང་ཁ།


ཟླ་བ་བསྙེགས་ནས།སྐར་མ་བསྙེགས་ནས།
ང་རང་གྲོ་ཞིང་ཁའི་མཚན་ངོགས་སུ་འབྱོར།
བསིལ་ཞིང་འཇམ་པའི་མཚན་རླུང་གིས།
ཟླ་འོད་ཁུར་ནས་བདག་ལ་བགྲོད་ལམ་ཕྱེས།
རྡོག་འོག་གི་རྐང་ལམ་ཕྲ་མོ་ཕྱིར་དྲན་གྱི་ཀློང་དུ་བསྲིངས།
བསམ་གཞིག་གི་ལྗོན་རྩེར་སྨིན་པའི་འདས་དོན་གྱི་འབྲས་བུ་མངར་མོ།
བྱིས་དུས་ཀྱི་རྩེད་རར་ངང་གིས་བྲུལ།

ང་ཡི་ཕ་ཡུལ།དོ་ནུབ་བདག་གིས་ཟླ་འོད་ཀྱི་མཚན་གོས་གྱོན་ནས།
རང་བྱུང་ཁམས་ཀྱི་ལྷིང་འཇགས་ལ་མཉན་ཡོད།
དོ་ནུབ་ཀྱི་ཟླ་བ་དཀར་བོང་བོང་།བྱིས་སྒྲུང་གི་འཇིག་རྟེན་དུ་ལུས་པའི།
གཏམ་རྒྱུད་ཀྱི་འགྱུར་ཁུགས་ཤིག་དང་འདྲ་བར།
ངའི་སེམས་ཁ་རུ་ངང་གིས་ཤུད་སོང་།

ཟླ་འོད་ཀྱི་བསིལ་འཇམ་ལ་མགོ་བོ་བསྙེས་ནས།
དགུ་ཚིགས་ཀྱི་ཀློང་དུ་བསམ་གཞིག་གི་འདབ་གཤོག་བརྐྱངས་ཚེ།
རེས་གསལ་རེས་མོག་གི་དྲན་པ་དེ་ཚོས།
ཟླ་འོད་ཀྱི་དྭངས་གཙང་རུམ་ནས།
མཚན་མོའི་མཁའ་ངོགས་སུ་འགྲེ་ལྡོག་བརྒྱག
ཟླ་འོད་ཀྱི་གཅེས་སྐྱོང་ཐོབ་པའི་གྲོ་ཞིང་ཁ།
སྔུར་དབྱངས་ཀྱི་ཀློང་དུ་བདེ་བར་གཟིམས།

ཟླ་འོད་ནི་ཤང་ཤང་འབབ་པའི་གཙང་བོ་ཞིག་དང་འདྲ་སྟེ།
འབའ་འབུར་མི་སྙོམས་པའི་ལ་ཐང་ཀུན་ཏུ།
ཟླ་འོད་ཆུ་རུ་བཞུར།
ཟླ་འོད་ཀྱི་ཟེགས་མ་བདག་གི་རྨི་ལམ་དུ་ཆོལ་སོང་
བདག་གི་ངལ་དུབ་བཀྲུས་སོང་

 

chisanghua སྤེལ་དུས། - 2012-10-10 14:34:24
 

བདེ་སྐྱིད་ཀྱི་ཚོར་བ།
                                 
ཤིག་དང་སྲོ་མང་དེ་དག   དཀའ་ཚེགས་ཀྱི་ལོ་ཟླ་དེ་དག
འཚོ་བའི་གཏིང་མཐར་བྱིངས་པའི་སྐྱོ་ངལ་དང་།
ན་ཟུག  ཁུན་སྒྲ་དེ་དག
ནམ་ཡང་མི་མཐོང་བའི་ཁྱོད་ཀྱི་སེམས་པ།
རྟོག་བཏགས་ཀྱི་རླུང་བུ།
ནམ་ཟླ་སྟོན་ལ་རན་པའི་སྟ་གོན།
སེར་ཐིག་ལྷུང་བའི་ལོ་མ་ཞིག་མཁའ་ལ་འཕུར་ཞིང་ས་ལ་ལྷུང་བའི་གོ་རིམ།
དེ་དག་གི་དེ་དག    སྐད་ཅིག་མ་དེ་དག     

རྒྱུ་མཚན་མེད་པར་ངུ་སྙིང་འདོད་པའི་སེམས་ཁམས།
རླུང་ནང་དུ་ཕ་ཡུལ་དྲན་པའི་སྐྱོ་སྣང་རབ་རིབ།
ཁེར་རྐྱང་གི་དུས་སུ་སུ་ཞིག་ལ་སྙན་ངག་གླེང་འདོད་ཀྱི་སེམས་ཀྱི་བྲེལ་འཚུབ།
ཅི་ཞིག་བརྗོད་འདོད་ཀྱང་ངག་ནས་ཁེགས་པར་གྱུར་པའི་ཚོར་སྣང་བན་བུན།
མེ་ཏོག་རྐང་གཅིག་ཐོར་ཞིང་ལྷུང་སྐབས་ཀྱི་མིག་ཆུ།
རྩམ་སྐྱ་ཁམ་གང་ལྡག་སྐབས་ཀྱི་སེམས་འགུལ།
དེ་དག་གི་དེ་དག

ངའི་འདོད་པ་དེ་དག    ངའི་དྲན་པ་དེ་དག     
ངས་འཁྲབ་འདོད་པ་དེ་དག     ངས་གཏོར་ཅིང་བཤིག་འདོད་པ་དེ་དག  དེ་དག
ཡང་ན་ང་དང་ཉེ་ཙམ་ཉེ་ཙམ་དང་། ང་དང་རིང་ཙམ་རིང་ཙམ་གྱི་ཚོར་བ་དེ་དག
དེ་དག   འཇིག་རྟེན་གསོན་ངོགས་ཀྱི་བདེ་སྐྱིད་རེད།
དེ་དག་ཚོར་བ་རེད།
དེ་དག་བདེ་སྐྱིད་ཀྱི་ཚོར་བ་དངོས་རང་རེད།

chisanghua སྤེལ་དུས། - 2012-8-27 10:22:35
 

དཔལ་དགེ་གྲོང་རྡལ་གྱི་ཉིན་གུང་།

 

མཚོ་སྔོན་པོ་དང་བར་ཐག་ཉེ་ཙམ་ཡོད་པའི་དཔལ་དགེ་གྲོང་རྡལ།

མཐོ་སྒང་གི་ཕང་བར་འགྲེ་ལོག་རྒྱག་པའི་བྱིས་པ་ཞིག་དང་འདྲ།

གསར་དུ་ལས་པའི་ཁང་བརྩེགས་དམའ་མོ་དག་སྟོང་ཧང་ཧང་ངང་།

ཉིན་གུང་གི་ཚ་སྡུག་འོག་ཏུ་གང་ཞིག་ལ་ཧད་འདུག

ཡར་འགྲོ་མར་འོང་གི་རླངས་འཁོར་རྣམས།

དཔལ་དགེ་གྲོང་རྡལ་གྱི་དཀྱིལ་བཤགས་ནས་འགྲོ་དུས།

རྣ་ལ་འཛེར་བའི་དུང་སྒྲ་རེ་བསྐྱུར་ནས་བཞུད་འགྲོ།

 

ཉིན་གུང་གི་དཔལ་དགེ་གྲོང་རྡལ།

ཁུ་སིམ་གྱི་ཀློང་དུ་འཛུལ་ནས།

འབྲོག་པ་རྒད་པོ་ཞིག་དང་འདྲ་བར་རྩྭ་ཐང་གི་དབུས་སུ་ཉི་མར་ལྡེ་འདུག

ཁ་ཆེ་ཟ་ཁང་ནང་དུ་འཐེན་ཐུག་འཐུང་བའི་འབྲོག་མོ་འགས་ཧབ་ཆ་རྒྱག་བཞིན།

ང་ལ་ཅེར་བའམ་ཡང་ན་གང་ཞིག་ཏུ་ཅེར་འདུག

ད་དུང་འཕྲུལ་རྟའི་གོང་དུ་སུམ་འཕང་བརྒྱབ་པའི་གསར་བུ་འགའ།

ལྡིར་སྒྲ་དང་འགྲོགས་ནས་ཤར་རྒྱུགས་བྱེད།

 

འདི་ནི་དཔལ་དགེ་གྲོང་རྡལ་གྱི་ཉིན་གུང་སྟེ།

ང་མ་བསླེབས་པའི་སྔ་རོལ་ཏུ་ཡང་དཔལ་དགེ་གྲོང་རྡལ་འདི་འདྲ་ཞིག་ཡིན་སྲིད།

ངས་དེ་ལྟར་འདང་རྒྱག་བཞིན་མཁའ་དབྱིངས་སུ་ལྟ་དུས།

སྤྲིན་པ་ནག་པོ་ཞིག་གིས།

དཔལ་དགེ་གྲོང་རྡལ་གྱི་མཐོངས་སུ་བཞད་པའི་ཉིན་བྱེད།

ག་ལེར་བསྒྲིབས་བྱུང་།

2012/ 28/ 25ཉིན་དཔལ་དགེ་གྲོང་རྡལ་དུ།

chisanghua སྤེལ་དུས། - 2012-8-24 9:58:19
             

     པེ་ཏའོ་ཡི་སྙན་ངག

                   ཁྲི་སེམས་དཔས་བསྒྱུར།

པེ་ཏའོ1949—ཕ་ཡུལ་ཀྲེ་ཅང་ཧུའུ་ཀྲོའུ་ཡི་ཡིན་ལ།པེ་ཅིན་ནས་སྐྱེས། རིག་གསར་སྐབས་སུ་སློབ་འབྲིང་ནསམཐར་ཕྱིན་རྗེས་པེ་ཅིན་ནས་བཟོ་པ་བྱས།རྒྱའི་དམངས་ཁྲོད་དུས་དེབ་གྲགས་ཅནདེ་རིངགསར་སྤེལ་བྱེད་མཁན་གྲས་ཀྱི་གཅིག་ཡིན་ལ།ད་ལྟ་ཕྱིའི་རྒྱལ་ཁབ་ཏུ་གཞིས་ཆགས་པ་མ་ཟད། ཕྱིའི་རྒྱལ་ཁབ་ཏུ་པར་སྐྲུན་བྱེད་བཞིན་པའི་རྩོམ་རིག་དུས་དེབདེ་རིངགི་སྒྲིག་གཙོའི་འགན་ཁུར་ཡོད།བརྩམས་ཆོས་པེ་ཏའོ་ཡི་སྙན་ངག་བདམས་བསྒྲིགསདངཉི་མའི་གྲོང་གི་ཟིན་ཐོ》《པེ་ཏའོ་དང་ཀུའུ་ཁྲིན་གྱི་སྙན་ངག་བདམས་སྒྲིག》《པེ་ཏའོ་ཡི་སྙན་ངག་ཕྱོགས་བསྒྲིགས》《རྒྱུས་མེད་ཀྱི་མཚོ་ངོགསསོགས་མང་དུ་ཡོད་པ་རེད།ཁོང་ནི་རྒྱ་ནག་གི་རབ་རིབ་སྙན་ངག་གི་འཐུས་ཚབ་སྙན་ངག་པ་ཡིན་ནོ།།

ལན་ལྡོན་པ།

ཁྲེལ་མེད་ནི་ཁྲེལ་མེད་པའི་ལམ་ཡིག་ཡིན།

  བླ་མེད་ནི་བླ་མེད་པའི་དུར་ཡིག་ཡིན།

  ལྟོས་དང་། གསེར་ཆུ་བྱུགས་པའི་མཁའ་དབྱིངས་སུ།

  འདས་པོའི་ལྡོག་གཟུགས་འཁྱོག་པོ་འཕྱོ་ཞིང་ཁེངས།

  

  འཁྱག་རོམ་གྱི་དུས་རིམ་འདས་ཟིན་ནའང་།

  ག་ས་གང་དུ་ད་དུང་འཁྱག་རོམ་གྱིས་ཁེངས་འདུག་པ་

   འདི་ཅི་རེད།

  ཧའོ་ཝང་ཅོགསར་རྙེད་བྱུང་ཟིན་ནའང་།

  མཚོ་འཁྱིལསྟེང་ད་དུང་གཡོར་གྲུ་མང་པོས་འཚང་

   ཁ་རྒྱག་པ་འདི་ཅི་རེད།

  

  ང་རང་འཇིག་རྟེན་འདིར་འོང་དུས།

  ཤོག་བུ་དང་། ཐག་པ།གྲིབ་གཟུགས་ལས་ཅི་ཡང་བཟུང་མེད།

  དེ་ནི་འདྲི་གཅོད་གྱི་སྔ་རོལ་དུ།

  ཁྲིམས་ཐག་བཅད་ཟིན་པ་དག་གི་སྐད་སྒྲ་སྒྲོག་འདོན་

   བྱེད་པའི་ཆེད་དུ་ཡིན།

  

  ངས་ཁྱེད་ལ་བཤད་ཆོག འཇིག་རྟེན་ལགས།

  རངཡིདམིཆེས།

  གལ་ཏེ་ཁྱེད་ཀྱི་རྡོག་འོག་ཏུ་འགྲན་སློང་པ་ཆིག་སྟོང་ཡོད་ཚེ།

  ང་རང་ཆིག་སྟོང་གི་རྗེས་ཀྱི་མི་དེར་བརྩི་རོགས།

  

  གནམ་སྔོན་པོ་ཡིན་པར་ང་རང་ཡིད་མི་ཆེས།

  འབྲུག་སྒྲའི་བྲག་ཅར་ང་རང་ཡིད་མི་ཆེས།

  རྨི་ལམ་ནི་རྫུན་མ་ཡིན་པར་ང་རང་ཡིད་མི་ཆེས།

  ཤི་རྗེས་རྣམ་སྨིན་མི་འཁོར་པར་ང་རང་ཡིད་མི་ཆེས།

  

  གལ་ཏེ་རྒྱ་མཚོའི་འགྲམ་ངོགས་ཅིས་ཀྱང་བརྡོལ་སྲིད་ཚེ།

  སྡུག་གི་ཆུ་ཕུང་མ་ལུས་ངའི་སེམས་ཁོང་དུ་འབྱོ་བར་ཤོག

  གལ་ཏེ་ས་གཞི་ངེས་པར་དུ་དབྱིངས་སུ་འཕགས་པར་

   འགྱུར་ན།

  འགྲོ་མིར་ཡང་བསྐྱར་འཚོ་གནས་ཀྱི་ཡང་རྩེ་ཞིག་གདམ་

   དུ་འཇུག་རོགས།

  

  གོ་སྐབས་གསར་བ་དང་འོད་མདངས་འཚེར་བའི་སྐར་མ།

  ཡོལ་བ་མེད་པའི་ནམ་མཁའི་དབྱིངས་སུ་འཚང་

   བཞིན་འདུག

  དེ་ནི་ལོ་ངོ་སྟོང་ཕྲག་ལྔའི་རིང་གི་གཟུགས་བརྙན་ཡི་གེ་རེད།

  དེ་ནི་མ་འོངས་པར་མི་རྣམས་ཀྱིས་ཅེ་རེར་བལྟ་བའི་

   མིག་ཟུང་རེད།

   1976.4

ཡོད་ཚད།

ཡོད་ཚད་ནི་ལས་དབང་རེད།

  ཡོད་ཚད་ནི་སྨུག་སྤྲིན་རེད།

  ཡོད་ཚད་ནི་མཇུག་འབྲས་མེད་པའི་གླེང་སློང་རེད།

  ཡོད་ཚད་ནི་འཕྲལ་དུ་ཤོར་འགྲོ་བའི་འཚོལ་སྙེག་ཡིན།

  དགའ་སྤྲོ་ཡོད་ཚད་ལ་འཛུམ་མདངས་མེད།

  དཀའ་སྡུག་ཡོད་ཚད་ལ་མཆི་མའི་ཤུལ་རྗེས་མེད།

  སྐད་ཆ་ཡོད་ཚད་ནི་བསྐྱར་ཟློས་ཡིན།

  འབྲེལ་འདྲིས་ཡོད་ཚད་ནི་ཐོག་མའི་མཇལ་འཛོམས་རེད།

  བརྩེ་དུང་ཡོད་ཚད་སེམས་ཁོང་དུ་སྦས།

  འདས་དོན་ཡོད་ཚད་རྨི་ལམ་ཁྲོད་བསྐུངས།

  རེ་བ་ཡོད་ཚད་ཀྱིས་འགྲེལ་བཤད་བསྣམས་འདུག

  དད་མོས་ཡོད་ཚད་ཀྱིས་འཁུན་སྒྲ་བསྣམས་འདུག

  ཐོལ་བྱུང་ཡོད་ཚད་ལ་སྐད་ཅིག་མའི་ལྷིང་འཇགས་ཡོད།

  འཆི་བ་ཡོད་ཚད་ལ་རྒྱུན་རིང་བའི་བྲག་ཅ་ཡོད།

འགྲོ།

  འགྲོ།

  སྡོང་ལོ་གྲོག་རོང་གི་ཟབ་སར་སྤུར་ཟིན།

  ཡིན་ཡང་གླུ་སྒྲ་ལ་ལོག་མལ་མི་འདུག

  

  འགྲོ།

  འཁྱག་རོམ་སྟེང་གི་ཟླ་འོད།

  གྲམ་གཞུང་ནས་གྱེན་དུ་འཕྱུར།

  

  འགྲོ།

  མིག་ཟུང་མཁའ་དབྱིངས་སུ་གཏད་དེ།

  སེམས་པས་མུན་མདོག་གི་རྔ་བོ་ཆེ་དྲག་ཏུ་བརྡུངས།

  

  འགྲོ།

  ང་ཚོའི་དྲན་པ་ཉམས་མེད།

  ང་ཚོ་ཚེ་སྲོག་གི་མཚེའུ་འཚོལ་དུ་འགྲོ།

  

  འགྲོ།

  ལམ་ཡ་ལམ་དུ།

  རྒྱ་མེན་དམར་པོས་ཁྱབ་འདུག

ཉི་མའི་གྲོང་གི་ཟིན་ཐོ། ཚན་བཀོད

 

       ཚེ་སྲོག

  ཉི་མ་ཡང་སྟེང་དུ་འཕགས་བྱུང་།

       བྱིས་པ།

  རྒྱ་མཚོ་ཆེན་པོ་ཤོང་ཐུབ་པའི་རི་མོ་ཞིག

  ལྟེབས་ནས་ཕུག་རོན་དཀར་མོ་ཞིག་ཏུ་གྱུར།

      ངལ་རྩོལ།

  ལག་པས།  སའི་གོ་ལ་བཅིངས།

       ཞི་བདེ།

  རྒྱལ་པོ་ཤི་ཟིན་པའི་ཡུལ་གྲུར།

  མེ་མདའ་རྙིང་བ་དེར་ཡལ་འདབ་རྒྱས་ཤིང་།

  མྱུ་གུ་འབུས་ཏེ།

  དབང་བོ་སྐྱོན་ཅན་གྱི་འཁར་བར་གྱུར།

སྒྱུར་པ་པོའི་མཆན།

  ཧའོ་ཝང་ཅའོ།好望角,Cape of Good Hope) དེ་ནི་གླིང་ཆེན་ཨ་ཧྥེ་རི་ཁའི་ལྷོ་ཕྱོགས་སུ་ཆགས་ཤིང་། ནུབ་ཀྱི་རྒྱ་མཚོ་ཆེན་པོ་

དང་ཧིན་རྡུ་རྒྱ་མཚོའི་བར་གྱི་སྐམ་སའི་མཚོན་རྟགས་གལ་ཆེན་ཞིག་ཡིན།

  མཚོ་འཁྱིལ། 死海,the Dead sea)དེ་ནི་དབྱི་སི་རལ་དང་ཅོར་ཏན་གཉིས་ཀྱི་མཚམས་སུ་གནས་པའི་ཚྭ་མཚོ་ཞིག་ཡིན།

chisanghua སྤེལ་དུས། - 2012-8-13 10:17:40
 

ཕྱིར་ལོག་པའི་རྣམ་ཤེས་དང་རྒྱང་བཞུད་ཀྱི་བསམ་བློ།

     

___མཚོ་སྔོན་རྒྱལ་སྤྱིའི་རང་སའི་ཡུལ་མིའི་མི་རིགས་སྙན་ངག་པའི་སྦྲ་གུར་གྲོས་ཚོགས་དེ་མཛེས་སྡུག་ལྡན་པའི་གསེར་དངུལ་རྩྭ་ཐང་དུ་བསྡུས་པ།

ཟླ8པའི་ཚེས11ཉིན། ཀྲུང་གོ་གྲངས་ཉུང་མི་རིགས་རྩོམ་པ་པོ་སློབ་ཚོགས་དང་། མཚོ་སྔོན་པོ་རྒྱལ་སྤྱིའི་སྙན་ངག་དུས་ཆེན་གྱི་རྩ་འཛུགས་ཨུ་ཡོན་ལྷན་ཁང་། མཚོ་སྔོན་ཞིང་ཆེན་སྲིད་གཞུང་གཞུང་སྒྲུབ་ཁང་། ཞིང་ཆེན་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས། ཞིང་ཆེན་གཙང་གསུམ་འབྱུང་ཡུལ་གཞུང་སྒྲུབ་ཁང་བཅས་ཀྱིས་གཙོ་སྒྲུབ་མཛད་པ་དང་། འཛམ་གླིང་རྩོམ་རིག་དུས་དེབ་ཁང་དང་། སྙན་ངག་འཚོལ་ཞིབ་དུས་དེབ་ཁང་། ཞིང་ཆེན་རྩོམ་པ་པོ་མཐུན་ཚོགས་བཅས་ཀྱིས་སྒྲུབ་འགན་ཁུར་ཞིང་། ཕྱིར་ལོག་པའི་རྣམ་ཤེས་དང་རྒྱང་བཞུད་ཀྱི་བསམ་བློ་ཞེས་པའི་

མཚོ་སྔོན་རྒྱལ་སྤྱིའི་རང་སའི་ཡུལ་མིའི་མི་རིགས་སྙན་ངག་པའི་སྦྲ་གུར་གྲོས་ཚོགས་དེ་མཛེས་སྡུག་ལྡན་པའི་གསེར་དངུལ་རྩྭ་ཐང་དུ་བསྡུས། མཚོ་སྔོན་ཞིང་ཆེན་ཏང་ཨུའི་རྒྱུན་ཨུའམ་དྲིལ་སྒྲོག་པུ འུ་ཡི་པུའུ་ཀྲང་ཅི་ཏེ་མྰ་ཅས་ཐེངས་འདིའི་གྲོས་ཚོགས་སྟེང་གཏམ་བཤད་གལ་ཆེན་གནང་ཞིང་། མཚོ་སྔོན་ཞིང་ཆེན་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཏང་ཙུའུ་ཧྲུའུ་ཅིའམ་ཀྲུའུ་ཞི་པད་གོས་གྲོས་ཚོགས་ལ་མགོ་འཛིན་མཛད།

    ཐེངས་འདིའི་གྲོས་ཚོགས་ནང་ཨ་རི་དང་ཧྥ་རན་སི། ཧིན་རྡུ། མོ་ཞི་ཁོ། དབྱི་ལང་སོགས་ཕྱིའི་རྒྱལ་ཁབ་བཅུ་ཡས་མས་ནས་ཕེབས་པའི་སྙན་ངག་པ་རྡི་ཨོ་སི་དང་ན་ཐ་ལི་ཡ།མེ་ཏན་ལི་སོགས་དང་། རྒྱལ་ནང་གི་ན་གཞོན་སྙན་ངག་པ་ཧྲུའུ་ཚེ། ཤའོ་ཤའོ། ཀའོ་ཤིན། ཡེ་ཡན་པིན། ཀུན་ཀྲན་ཁྲུང་། མ་ཧྥེ་སོགས་ཞུགས།།

chisanghua སྤེལ་དུས། - 2012-7-26 9:37:56
 

 སྒྲེན་པོ་དང་གླག་དང་ཁ་བ་སྙིང་ལྕགས་དང་གངས་སོགས་ལོ་རབས་བརྒྱད་བཅུའི་རྗེས་སུ་སྐྱེས་པའི་ན་གཞོན་རྣམས་ལ།

   འདི་གའི་ཚགས་པར་དུ་ཁྱེད་ཅག་གི་སྙན་ངག་བརྩམས་ཆོས་ཕྱོགས་གཅིག་ཏུ་དྲིལ་ནས་ཆེད་བསྒྲིགས་ལེ་ཚན་ཞིག་བསྒྲུབ་འདུན་ཡོད་པས། གལ་ཏེ་ཁྱེད་ཅག་ལའང་མོས་པ་ཡོད་ཚེ། སོ་སོའི་སྙན་ངག་བརྩམས་ཆོས་བཞི་ནས་ལྔ་དང་འདྲ་པར། ངོ་སྤྲོད་ཐུང་ངུ་བཅས་བསྐུར་གནང་ཡོད་པ་ཞུ།  

ཡིག་སྒམ།

Caizha123@yahoo.com.cn

chisanghua སྤེལ་དུས། - 2012-5-17 15:10:07
 

 ང་རང་ཕ་ཡུལ་དུ་ལོག་རན།                   

 

ང་རང་ཕ་ཡུལ་དུ་ལོག་རན།

ཕ་ཡུལ་གྱི་མཛེས་པའི་རི་བོ་ནི་བདག་གི་སྤུན་ཟླ་ཡིན།

རི་བོ་སྔར་བཞིན་རྔམ་ཞིང་བརྗིད།

ང་རང་ཕ་ཡུལ་དུ་ལོག་རན།

ཕ་ཡུལ་གྱི་དྭངས་པའི་གཙང་བོ་ནི་བདག་གི་མཛའ་མོ་ཡིན།

གཙང་བོ་སྔར་བཞིན་ལྷུང་ལྷུང་འབབ།

 

ང་རང་ཅིས་ཀྱང་ཕ་ཡུལ་དུ་ལོག་རན། སྟོན་རླུང་གི་བསིལ་ཤ་རྒྱབ་ལ་ཁུར་ནས།

གང་སར་བྲུལ་བའི་སྡོང་ལོའི་སྟེང་རྡོག་པ་ཧྲག་ཧྲག་ཏུ་སྤོ་བཞིན།

ནག་ནོག་གིས་ཟིན་པའི་སེམས་པ་བསིལ་ཆར་གྱིས་གཙང་མར་བཀྲུས་ཏེ།

ཕ་ཡུལ་གྱི་རུ་ཁ་ཁྱིམ་མཚེས་ལ་འཚམས་འདྲིར་འགྲོ།

ཕ་ཡུལ་གྱི་ཕུ་ནུ་མིང་སྲིང་ལ་མཇལ་འཕྲད་དུ་འགྲོ།

 

ཕ་ཡུལ་གྱི་ཞོགས་པ། ཕ་མེས་ཀྱི་ཞོགས་པ། བྱ་བྱེའུ་འབའ་འབུ་ཡི་ཞོགས་པ།

བདག་གི་གྲོང་ཚོ་ཆུང་ཆུང་། ར་ལུག་གི་འབའ་སྒྲའི་ཁྲོད་ནས་སད།

ཉི་མའི་རྟ་མཆོག་ཀ་རག་བྱུགས་པའི་ལོ་མང་གི་མཁར་གྱང་སྟེང་དུ་གསེར་མདོག་གིས་

མཆོངས་པ་ན།

འོད་ཀྱིས་བསྐྱུགས་པའི་གྲོང་ཚོ་སྟོན་མཇུག་གི་ལོ་འདབས་གསེང་དུ་མེ་རུ་འབར།

 

ཕ་ཡུལ་གྱི་ཞོགས་པར། དྭངས་གཙང་གི་མཁའ་དབུགས་ཁྲོད་དུ།

བསང་དུད་ལང་ལོང་། ལང་ལོང་ངང་ལྷ་ཚོགས་ཀྱི་ཞིང་དུ་འཐེན།

བྱེའུ་སྐད་ཅ་ཅིར། ཅ་ཅིར་ངང་བདག་སེམས་ཀྱི་སྐྱིད་དུ་བབས།

 

ང་རང་ཕ་ཡུལ་དུ་ལོག་རན། 

ཕ་ཡུལ་གྱི་ནམ་མཁའི་འོག་ཏུ་བདག་གི་དྲན་པ་ནི་ཤོག་དཀར་བཞིན་དྭངས་ཤིང་གཙང་།

ང་རང་ཕ་ཡུལ་གྱི་མཚན་ཀློང་དུ་འཛུལ་ནས།

འོད་འཚེར་བའི་སེམས་དོན་གྱི་ཕྲེང་བ་སྐར་ཚོགས་ཀྱི་མགུལ་དུ་བསྐོན་ཅིང།

ཁུ་སིམ་གྱི་དཀྱིལ་སྙིང་ནས་ཁུ་སིམ་གྱི་ཁུ་སིམ་ལ་ཉན་འདོད། ཁུ་སིམ་གྱི་ང་རོ་ལ་ཉན་འདོད།

 

ང་ནི་རྒྱང་བཞུད་ཀྱི་བུ་ཆུང་སྟེ།ང་རང་ཕ་ཡུལ་གྱི་རི་སྒང་དུ་འགྲེང་སྟེ་ཟླ་འོད་འོག་གི་གྲོང་

ཚོར་བལྟ་འདོད།

རུ་བར་དུ་སྡོམ་རྒྱ་བཞིན་ཀྱག་ཀྱོག་ཏུ་འཐེན་པའི་རྐང་ལམ་དེ་དག

བདག་གི་བྱིས་དུས་ཀྱི་ལོ་ཟླ་གསལ་བའི་ས་བཀྲ་ཡིན།

ཀྱེ། བདག་གི་ཕ་ཡུལ། ངས་རང་གི་ཕུང་བོ་ཁྱེད་ཀྱི་རི་སྒང་དུ་བསྐམས་ནས།

རྣམ་ཤེས་ཀྱི་གོམ་སྟབས་བྱིས་དུས་ཀྱི་རྩེད་རར་བསྒྱུར་འདོད།

 

ཕ་ཡུལ་དུ་འགྲོ་ཡ།  ཕ་ཡུལ་དུ་ས་འདམ་གྱི་དྲི་ངད་སྣོམ་དུ་འགྲོ།

དྲི་ངད་དེ། ས་འདམ་ནང་གློ་ཉལ་བྱེད་པའི་ཡུལ་མི་ཚོའི་ལོངས་སྤྱོད་ཡིན།

མིག་མེད་གྲོག་མས། ས་འདམ་གྱི་དྲི་ངད་སྣོམ།

ལྗང་མྱུག་ཕྲ་མོས། ས་འདམ་གྱི་དྲི་ངད་སྣོམ།

ཆུ་རྩེད་ལ་རོལ་བའི་བྱིས་པས་ཀྱང་།  ས་འདམ་གྱི་དྲི་ངད་སྣོམ།

དེ་བོང་བུ་དང་གླང་རྒན་ལ་དབང་། དེ་རེའུ་ལ་དབང་། དེ་སོ་ནམ་པར་དབང་། དེ་ཞིང་གྲོང་ལ་དབང་།

དེ་ཤར་ནས་ནུབ་ཏུ་ལྡང་། ལྷོ་ནས་བྱང་དུ་ལྡང་།

དེ་ཕ་ཡུལ་གྱི་ཕྱོགས་མཚམས་ཀུན་ཏུ་ལྡང་།

དེ་ནམ་ཡང་བདག་གི་སེམས་ཁོང་ན་ལྡང་ཨང་།

 

ང་རང་ཕ་ཡུལ་དུ་ལོག་རན། ཅིས་ཀྱང་ཕ་ཡུལ་དུ་ལོག་རན།

ཕ་ཡུལ་ཁོ་ན་ནི་བདག་གི་མེས་རྒྱལ་དང་། བདག་གི་དག་ཞིང་། བདག་གི་རྣམ་ཤེས་

ཀྱི་ལོག་མལ་ཡིན།

               2011/9/16

འབྲེལ་ཡོད་ནང་དོན་ 93 ཡོད།<<<12345>>>
Powered by Oblog.